ដោយៈគង់ សូរិយា
កំពង់ចាមៈ មានប្រជាជនរស់នៅច្រើនជាង ១លាននាក់ ខេត្តកំពង់ចាមហាក់មិនសូវមានការនឹកនាំដល់ច្រើននៅឡើយ ទាក់ទងនឹងគម្រោងអភិវឌ្ឍន៍វិស័យសំណង់ និងអចលនទ្រព្យ ប៉ុន្តែវាជាខេត្តមានសក្តានុពលច្រើនផ្នែកសេដ្ឋកិច្ច។
មានចម្ងាយ ១២៤គីឡូម៉ែត្រ ពីរាជធានីភ្នមពេញ ខេត្តកំពង់ចាមត្រូវបានគេមើលឃើញថា មានភាពរីកចម្រើន និងអភិវឌ្ឍន៍ជាងបណ្តាខេត្តជិតខាងមួយចំនួន ដូចជាខេត្តព្រៃវែង ខេត្តកំពង់ឆ្នាំ និងត្បូងឃ្មុំ និងខេត្តកំពង់ធំជាដើម ខណៈដែលវត្តមានរបស់ក្រុមហ៊ុនវិនិយោគ និងអភិវឌ្ឍន៍លើវិស័យសំណង់លំនៅដ្ឋាន បានបង្ហាញវត្តមានរួចជាស្រេច។
អភិបាលខេត្តកំពង់ចាម លោក អ៊ុន ចាន់ដា បានមានប្រសាសន៍ប្រាប់តាមទូរស័ព្ទកាលពីពេលថ្មីៗនេះថា បច្ចុប្បន្ននេះ រដ្ឋបាលខេត្ត កំពុងតែយកចិត្តទុកដាក់ទៅលើការរៀបចំ និងស្ថាបនាហេដ្ឋារចនាសម្ព័ន្ធទូទៅ ដោយគ្រប់ផ្លូវតូចធំនៅក្នុងក្រុង និងតំបន់ជាយក្រុងសុទ្ធតែត្រូវបានស្ថាបនាជាផ្លូវបេតុង និងចាក់កៅស៊ូទាំងអស់ ដើម្បីបង្កភាពងាយស្រួលដល់ការធ្វើដំណើរ និងបម្រើដល់វិស័យដឹងជញ្ជូន។
លោកបន្តថា “ពីមួយឆ្នាំទៅមួយឆ្នាំ កំណើនប្រជាជន មានការកើនឡើងជាប្រចាំ ជាក់ស្ដែងពេលនេះ ចំនួនប្រជាជននៅទាំងខេត្ត មានចំនួនរហូតដល់ជាង ១.១លាននាក់ ខណៈដែលនៅក្នុងក្រុងកំពង់ចាមមានចំនួនជាង៤ម៉ឺននាក់ ជាមួយផលទុនជាតិសរុបសំរាប់មនុស្សម្នាក់ក្នុងមួយឆ្នាំមានចំនួន១៦៤៨ ដុល្លារ” ។
វិស័យសេដ្ឋកិច្ច ដែលឈានមុខគេប្រចាំខេត្តកំពង់ចាម ត្រូវបានលោកអភិបាលខេត្តបញ្ជាក់ប្រាប់ថា “វិស័យកសិឧស្សាហកម្មបានដើរឈានមុខគេ ដែលមានរោងចក្រកាត់ដេរកំបូងដំណើរចំនួន១៧ រួមជាមួយនឹសហគ្រាសតូចធំផ្សេងទៀត ចំនួនជាង២០០ទីតាំង ដែលចំនួននេះនៅមិនទាន់រាប់បញ្ចូលសហគ្រាសខ្នាតតូច ដែលមិនទាន់ចុះបញ្ជីនោះទេ” ។
ងាកមកចាប់អារម្មណ៍ជាមួយ នឹងភាពរីកចម្រើនលើវិស័យសំណង់ និងអចលនទ្រព្យ ខេត្តកំពង់ចាមក៏មានកំពុងសមានសកម្មភាព អភិវឌ្ឍន៍គំរោងលំនៅដ្ឋានបែបទាន់សម័យផងដែរ ដែលក្នុងនោះរួមមានបុរីធំៗចំនួន២ (បញ្ចប់គម្រោងរួចរាល់) គម្រោង បណ្តុំលំនៅដ្ឋានបែបបុរី ដែលវិនិយោគដោយក្រុមហ៊ុននៅម្ដុំបឹងស្នាយ និងសំណង់លំនៅដ្ឋានបែបទំនើបដែលអភិវឌ្ឍន៍ឡើងជាលក្ខណៈឯកជន។
ពាក់ព័ន្ឋនឹងសក្តានុពលរបស់ខេត្តកំពង់ចាម អ្នកជំនាញនិងអភិវឌ្ឍន៍ក្នុងវិស័យអចលនទ្រព្យក៏មិនសូវបង្ហាញសុទិដ្ឋិនិយមផងដែរ។
អគ្គនាយកក្រុមហ៊ុនអចលនទ្រព្យ លោកឧកញ៉ា នួន រិទ្ធី មានប្រសាសន៍ថា ភាពរីកចម្រើន និងការអភិវឌ្ឍន៍ក្នុងវិស័យនេះពិតជាមានមែន ប៉ុន្តែហាក់នៅមិនទាន់ខ្លាំងក្លានោះទេ ទោះជាប្រជាជននៅក្នុងខេត្តនេះមានចំនួនច្រើន ប៉ុន្តែទំហំផ្ទៃដីក៏មានវិសាលភាពធំធេងណាស់ដែរ ខណៈដែលតម្រូវការនៃការប្រើប្រាស់ដីនៅមានកម្រិតនៅឡើយ” ។
លោកឧកញ៉ាបន្តទៀតថា “ឱកាសនៃការវិនិយោគ ដើម្បីទទួលបានចំណេញត្រឡប់មកវិញក្នុងរយៈពេលខ្លីនៅក្នុងខេត្តនេះ គឺនៅមានកម្រិត ហើយអ្នកវិនិយោគក៏មានការប្រយ័ត្នប្រយែងផងដែរ” ។
បច្ចុប្បន្នតម្លៃដី និងអចលនទ្រព្យ នៅក្នុងតំបន់ពាណិជ្ជកម្មកណ្តាលខេត្តអាចស្ថិតក្នុងចន្លោះ ២ ០០០ទៅ៣០០០ ដុល្លារក្នុងមួយម៉ែត្រការ៉េ។ ដោយឡែកដីលំនៅដ្ឋានអាចត្រឹម៧០០ដុល្លារចុះក្រោមក្នុងមួយម៉ែត្រការ៉េ ហើយសម្រាប់ដីលំនៅដ្ឋាននៅតាមភូមិឃុំ អាចមានតម្លៃ៥០-៧០ដុល្លារក្នុងមួយម៉ែត្រការ៉េ ហើយតម្លៃដីស្រែចម្ការ គឺមានកម្រិតស្រដៀងគ្នាទៅនឹងខេត្តដទៃទៀតដែរ៕
