ដោយ:គង់ សូរិយា

ភ្នំពេញ: មន្រ្តីជាន់ខ្ពស់នៃក្រសួងពាណិជ្ជកម្មបានឱ្យដឹងថា ច្បាប់ស្តីពីកិច្ចការពារអ្នកប្រើប្រាស់នៅកម្ពុជា នឹងដាក់ឱ្យអនុវត្តពេញលេញនៅខែមីនាខាងមុខ ខណៈដែលបច្ចុប្បន្ន ច្បាប់នេះស្ថិតក្នុងការរៀបចំបន្ថែមពីអន្តរក្រសួង។

លោកផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប) នៃក្រសួងពាណិជ្ជកម្ម បានមានប្រសាសន៍ឲ្យ​ដឹងនាថ្ងៃទី៤ មករានេះថា“ច្បាប់ស្តីពីកិច្ចការពារអ្នកប្រើប្រាស់នេះ ពួកយើងរងចាំប្រកាសពិន័យអន្តរកាល ដែលក្រសួងពាក់ព័ន្ធបានប្រជុំជជែកគ្នាហើយ ប្រហែលអាចចប់នៅដើមខែមករានេះ។

លោកបន្តថា “យើងនៅមានប្រកាស២ទៀត ដែលគណៈកម្មាធិការជាតិការពារអ្នកប្រើប្រាស់ នឹងសម្រេចនៅថ្ងៃទី១៣ ខែមករា ហើយនឹងមានប្រកាសផ្សេងៗទៀត ដូច្នេះការអនុវត្តន៍ពេញលេញយើងនឹងចាប់ផ្តើមនៅខែមីនា ដោយស្ថិតក្នុងកសាងឯកសារគតិយុត្តនៅក្រោមច្បាប់បណ្តើរៗ ផែនការសកម្មភាព ឯកសារគតិយុត្តក្រោម គឺរយះពេលក្នុងឆ្នាំ២០២១នឹងត្រូវមានទាំងអស់”។

ទាក់ទងនឹងពាក្យបណ្តឹងនានាពីសាធារណៈជននាពេលកន្លងមក លោកផាន អូនបានឱ្យដឹងថា មិនទាន់មានតួលេខទេ គ្រាន់តែដឹងថាមានពាក្យបណ្តឹងទាំងតូច និងធំ ដែលភាគច្រើនទាក់ទងម្សៅទឹកដោះគោ និងបណ្តឹងតូចៗផ្សេងទៀតទាក់ទងខូស្មិចទិច និងបណ្តឹងស្ថានីយប្រេងឥន្ធនៈមួយចំនួន។ ក្រៅពីនេះ អគ្គនាយកដ្ឋានមានចាត់វិធានការដាក់បណ្តឹងខ្លួនឯង ចំពោះអ្នកធ្វើធុរកិច្ចណាដែលមិនសុច្ចរិត និងការអនុវត្តន៍ធុរកិច្ចមិនសុច្ចរិតតែម្តងផងដែរ។

រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធានគណៈកម្មាធិការជាតិការពារអ្នកប្រើប្រាស់ បានលើកឡើងកាលពីពេលកន្លងមកថា ដោយសារប្រព័ន្ធ និងគោលនយោបាយ ក្នុងកិច្ចការពារអ្នកប្រើប្រាស់របស់កម្ពុជាមានលក្ខណៈក្មេងខ្ចីនៅឡើយ បើធៀបទៅនឹងប្រទេសក្នុងតំបន់ ដូច្នេះហើយទើបតម្រូវឱ្យមានការងារចំពោះមុខជាច្រើនត្រូវធ្វើ បូករួមទាំងការបំពេញនូវសេចក្តីត្រូវផ្សេងៗទៀត។

ច្បាប់ស្តីពីកិច្ចការពារអ្នកប្រើប្រាស់ ត្រូវបានប្រកាសឲ្យប្រើប្រាស់ដាក់ឱ្យអនុវត្តន នាខែវិចិ្ឆកា ឆ្នាំ២០១៩កន្លងទៅ ក្នុងនោះមាត្រា៥ បានចែងអំពីការបង្កើតនូវគណៈកម្មាធិការជាតិការពារអ្នកប្រើប្រាស់នេះឡើង។ តាមរយៈអាណត្តិ ដែលត្រូវបានផ្តល់ឱ្យដោយច្បាប់ អនុក្រឹត្យស្តីពី ការរៀបចំនិងការប្រព្រឹត្តទៅ របស់គណៈកម្មាធិការជាតិការពារអ្នកប្រើប្រាស់ ក៏ត្រូវទទួលបានការឯកភាពពីប្រមុខរាជរដ្ឋាភិបាលផងដែរ ហើយសមាសភាពនៃគណៈកម្មាធិការជាតិ តំណាងមកពីក្រសួង ស្ថាប័នចំនួន១២រូប៕

ដោយៈ រ៉ាណេត

កំពតៈ គម្រោងសាងសង់កំពង់ផែទេសចរណ៍អន្តរជាតិ ប្រចាំនៅក្នុងខេត្តកំពតរហូតមកដល់ដើមឆ្នាំ២០២១នេះ សម្រេចបានប្រមាណ៤៥ភាគរយហើយ ដែលគ្រោងនឹងបញ្ចប់ទាំងស្រុង នៅត្រឹមខែមិថុនា ឆ្នាំ២០២១ខាងនេះ ដើម្បីដាក់ដណើរការនិងទទួលស្វាគមន៍ទេសចរជាតិ អន្តរជាតិនានា។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃចន្ទ ទី៤ ខែមករា ឆ្នាំ២០២១នេះ បន្ទាប់ពីបញ្ចប់ការចុះត្រួតពិនិត្យវឌ្ឍនភាព និងគុណភាពផ្លូវជាតិលេខ៣ បានបន្តចុះទស្សនកិច្ច គម្រោងអភិវឌ្ឍសាងសង់កំពង់ផែទេសចរណ៍អន្តរជាតិប្រចាំខេត្តកំពត ដែលជាលទ្ធផលសម្រេចបានប្រមាណ៤៥ភាគរយ នៃគម្រោងសរុប។

គម្រោងសាងសង់កំពង់ផែទេសចរណ៍អន្តរជាតិ លើកដំបូងប្រចាំនៅក្នុងខេត្តកំពតនេះ ទទួលបានការគាំទ្រហិរញ្ញប្បទានសម្បទាន ពីធនាគារអភិវឌ្ឍន៍អាស៊ី (ADB) ដែលមានតម្លៃជិត១០លានដុល្លារអាមេរិក។ គម្រោងនេះមានទីតាំងស្ថិតនៅស្រុកទឹកឈូ ខេត្តកំពត ដែលក្រោយពីបញ្ចប់ការសាងសង់ជាស្ថាពរ នឹងក្លាយជាច្រកទ្វារដ៏សំខាន់សម្រាប់ទទួលភ្ញៀវទេសចរជាតិ និងអន្តរជាតិចំរុះជាតិសាសន៍ ធ្វើដំណើរកម្សាន្តតាមផ្លូវទឹក ជាពិសេសទេសចរមកពីប្រទេសថៃ និងប្រទេសវៀតណាមចូលមកកាន់កម្ពុជា។

នៅក្នុងផែនការអភិវឌ្ឍន៍វិស័យទេសចរណ៍ ឆ្នាំ២០១៩-២០២៣ ខេត្តកំពតគ្រោងទទួលភ្ញៀវទេសចរជាតិ និងអន្តរជាតិយ៉ាងតិច២,៥លាននាក់ គិតត្រឹមឆ្នាំ២០២៣។

លោកសយ ស៊ីណុល ប្រធានមន្ទីរទេសចរណ៍ខេត្តកំពតធ្លាប់បានប្រាប់ថា នៅពេលដែលទីតាំងកំពង់ផែបានបញ្ចប់ និងដាក់ឱ្យដំណើរការសេវាកម្ម វានឹងចូលរួមចំណែ​កលើកកម្ពស់វិស័យទេសចរណ៍របស់ខេត្ត ជាពិសេសតាមរយៈកញ្ចប់ទេសចរណ៍ ដែលភ្ជាប់ខេត្តកំពត ជាមួយគោលដៅនៅប្រទេសវៀតណាម និងថៃ ដោយរំពឹងថានឹងផ្តល់សេវាទេសចរណ៍អន្តរជាតិ និងក្នុងស្រុកចំនួន៣,៦០0,០០០នាក់ក្នុងមួយឆ្នាំ។

កំពង់ផែទេសចរណ៍អន្តរជាតិមួយនេះ មានបណ្តោយ៣០០ម៉ែត្រ និងមានសមត្ថភាពអាចផ្ទុកនាវា ដឹកអ្នកដំណើរបានពី៣០០-៤០០នាក់។ កំពង់ផែនេះក៏ផ្នែកមួយក្នុងការចូលរួមអភិវឌ្ឍន៍វិស័យទេសចរណ៍នៅខេត្តកំពត ហើយបង្កើតឱកាសការងារ និងបង្កើនប្រាក់ចំណូល លើកកម្ពស់ជីវភាពរស់នៅរបស់ប្រជាពលរដ្ឋផងដែរ៕

ដោយៈ រ៉ាណេត

ភ្នំពេញៈ កម្ពុជាទទួលបានកំណើនទុនវិនិយោគ សរុបជាង៤ពាន់លានដុល្លារទៅលើគម្រោងចំនួន១៧៨ នៅទូទាំងប្រទេស ខណៈដែលទំហំនៃការនាំចេញមានការកើនឡើងរហូតដល់ប្រមាណ១៦ពាន់លានដុល្លារ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍នៅរសៀលថ្ងៃទី៤ ខែមករា ឆ្នាំ២០២១នេះថា ការកើនឡើងនៃចំនួនទុនវិនិយោគនៅក្នុងឆ្នាំ២០២០កន្លងទៅថ្មីៗនេះ គឺបណ្តាលមកពីចលករសំខាន់ៗចំនួន២ គឺទី១កត្តាសន្តិភាព និងស្ថិរភាពនយោបាយ ទី២ ការដាក់ចេញឱ្យអនុវត្តន៍៍ នូវគោលនយោបាយសេដ្ឋកិច្ចបើកទូលាយថ្មីរបស់រាជរដ្ឋាភិបាលកម្ពុជា។

លោកឧកញ៉ាបន្តថា “គោលដៅនៃការវិនិយោគពីសំណាក់ក្រុមហ៊ុនជាតិ និងអន្តរជាតិគឺវានៅតែបន្តកើនឡើងជាបន្តបន្ទាប់ ដែលក្នុងនោះមួយភាគធំទទួលបានផលប្រ​យោ​ជន៍ពីកិច្ចព្រមព្រៀងពាណិជ្ជកម្មសេរី ជាមួយមហាអំណាចសេដ្ឋកិច្ចចិន ការទទួលបាន GSP ពីចក្រភពអង់គ្លេស ដែលអាចនាំទំនិញចូលទីផ្សារអឺរ៉ុបដោយការរួចពន្ធ ការអនុវត្តនៃកិច្ចចុះហត្ថលេខាលើកិច្ចព្រមព្រៀង ដៃគូសេដ្ឋកិច្ចគ្រប់ជ្រុងជ្រោយ (RCEP) ជាកិច្ចព្រមព្រៀងពាណិជ្ជកម្មធំបំផុតក្នុងពិភពលោក រួមជាមួយនឹងការរៀបចំកំណែទម្រង់ច្បាប់វិនិយោគថ្មី”។

លោកឧកញ៉ាលឹម ហេងបានបន្តថា បន្ថែមពីនេះ ហេតុផលសំខាន់ដែលធ្វើឱ្យប្រទេសមួយ អាចទទួលបានកំណើនទុនវិនិយោគបន្ថែម គឺមានកត្តាសំខាន់ៗចំនួនយ៉ាង ទី១ សន្ដិភាព ស្ថិរភាពនយោបាយ ទី២ ការដាក់ចេញនូវគោលនយោបាយសេដ្ឋកិច្ចដ៏ល្អត្រឹមត្រូវដែលធុរជន នៅតាមបណ្តាប្រទេសនានា អាចមានជំនឿចិត្តយ៉ាងមុតមាំក្នុងការចូលមកបណ្តាក់ទុនវិនិយោគ ដែលអាចទទួលបានចំណេញ។ ដូច្នេះកត្តានៃគោលនយោ​បាយទាំង២នេះគឺមានសារសំខាន់បំផុត។

លោកឧកញ៉ាបានលើកឧទារហណ៍ថា “យើងធ្លាប់បានឃើញរួចមកហើយថា នៅតាមបណ្តាប្រទេសមួយចំនួន មានសន្ដិភាពពេញលេញ ប៉ុន្តែកត្តានៃគោលនយោបាយសេដ្ឋកិច្ចមិនល្អ មិនអំណោយផលដល់វិនិយោគិន”។លោកបន្តថា “ដូច្នេះសេដ្ឋកិច្ចនៃប្រទេសនោះមិនអាចរីកចម្រើនបាននោះទេ។ ផ្ទុយទៅវិញគោលនយោបាយទាំង២ ដូច​ដែលបានលើកឡើងខាងលើនេះ បានដើរតួនាទីយ៉ាងសំខាន់ នៅក្នុងការទ្រទ្រង់ដល់កំណើនសេដ្ឋកិច្ចប្រទេសជាតិទាំងមូល”។

ជាមួយនឹងការសាទរ ទៅនឹងការទទួលបានកំណើនទុនវិនិយោគបន្ថែម ក៏ដូចជាទំហំនៃការនាំចេញរបស់កម្ពុជា មានការកើនឡើងនៅក្នុងឆ្នាំ២០២០ លោកឧកញ៉ា លឹម ហេង បានបញ្ជាក់ថា ថ្វីត្បិតទំហំនៃការនាំចេញរបស់យើងបានកើនឡើង ប៉ុន្តែយើងត្រូវតែបង្កើនលទ្ធភាពផលិតសម្រាប់នាំចេញទៅកាន់ទីផ្សារអន្តរជាតិបន្ថែមទៀត។

លោកបន្តថា ការនាំចេញ និងមានទីផ្សារល្អរបស់កម្ពុជាមួយភាគធំ គឺផលិតផលវាយនភ័ណ កាត់ដេរ គ្រឿងបង្គុំ ជាពិសេស កង ដែលមានទីផ្សារទូលាយ ប៉ុន្តែសម្រាប់ប្រភេទផលិតផលកសិ-ឧស្សាហកម្មកម្ពុជានៅមានកម្រិតនៅឡើយ។ ដូច្នេះ កម្ពុជាត្រូវតែពង្រឹង និងពង្រីកលទ្ធភាពក្នុងផលិតប្រកបដោយគុណភាព សម្រាប់ការនាំចេញបន្ថែមទៀត ដើម្បីអាចទទួលបានប្រយោជន៍ពីកិច្ចព្រមព្រៀង និងការទទួលបានកិច្ចអនុគ្រោះពន្ធ​សំខាន់លើមុខទំនិញនៃការនាំចេញ៕

        ដោយស៊ីវ ម៉េង

        ភ្នំពេញៈ  ផលិតផលថ្នាំលាបថេមភល ផេន (Temple Paint) របស់ក្រុមហ៊ុន IMCT Co., Ltd បាននិងកំពុងផ្តល់ជម្រើសដល់អតិថិជន នូវផលិតផលចំនួន៣ប្រភេទ ដែលអាចបត់បែនបាន និងស្របតាមតម្រូវការរបស់អតិថិជន។

នាយកក្រុមហ៊ុនIMCT ដែលផលិតថ្នាំលាបម៉ាកTemple Paint លោកធួន ស៊ីណានបានមានប្រសាសន៍ឱ្យដឹងកាលពីចុងសប្តាហ៍មុនថា សម្រាប់ថ្នាំលាប Temple Paint ដែលប្រើប្រាស់រូបមន្តចុងក្រោយបង្អស់ នៃបច្ចេកវិទ្យាទំនើប មានការគាំទ្រពីសំណាក់អតិថិជនជាច្រើន ដោយសារគុណភាព និងរយៈពេលប្រើប្រាស់បានយូឆ្នាំ។ ជាពិសេសទៅទៀតនោះគឺបរិមាណ ហើយអត្ថប្រយោជន៍មួយទៀតនោះ គឺគ្មានក្លិនប៉ះពាល់ដល់សុ​ខ​ភាពទៀតផង និងធ្វើឱ្យគេហដ្ឋានរបស់លោកអ្នក មានភាពស្រស់ស្អាត និងគួរឱ្យទាក់ទាញ។

ថ្នាំលាបTemple Paintបានផលិតលើផលិតផលបីទម្រង់ ដែលមានតម្លៃទាប តម្លៃមធ្យម និងតម្លៃខ្ពស់ ដែលសុទ្ឋតែមានគុណភាពស្តង់ដាអន្តរជាតិ អាចប្រកួតប្រជែងជាមួ​យថ្នាំលាបនាំចូល្បីៗបានផងដែរ។

ទី១ Temple Paint ឈ្មោះ “កោះកេរ្ត៍”ជាថ្នាំដែលមានតម្លៃប្រកួតប្រជែងជាមួយថ្នាំលាបក្នុងស្រុកដទៃទៀត និងមានគុណភាពស្តង់ដាអន្តរជាតិ ទី២ Temple Paint “ម៉ាកបន្ទាយស្រី” ជាផលិតផលមានកម្រិតមធ្យម ប៉ុន្តែស្តង់ដាលំដាប់អន្តរជាតិ និងអាចធានារយៈពេលប្រើប្រាស់បានយូរ និងទី៣ Temple Paintម៉ាក “អង្គរវត្ត”ជាប្រភេទថ្នាំាំប្រណីត និងអាចប្រើប្រាស់បានរយៈពេលវែង មិនចាញ់ផលិតផលនាំចូលមកពីក្រៅប្រទេសនោះទេ ជាពិសេសធានាគុណភាពប្រើប្រាស់រយៈពេលវែង និងមានការធានាជូនពីរោងចក្រយ៉ាងត្រឹមត្រូវ។

លោកបានឱ្យដឹងទៀតថា “ផលិតផលនេះ បានផលិតតាមរូបមន្តផ្សំចុងក្រោយបង្អ ស់នៃបច្ចេកវិទ្យាទំនើប ដែលមានសមត្ថភាពខ្ពស់ ក្នុងការការពារផ្ទៃជញ្ជាំងឱ្យមានភាពរឹងមាំ និងរលោង”។

លោកធួន ស៊ីណានបានបន្តថា ជាងនេះទៅទៀតTemple Paint វាជាប្រភេទថ្នាំ ដែលធន់នឹងទឹក និងអាចលាងសម្អាត ដើម្បីធ្វើឱ្យផ្ទៃជញ្ជាំងទាំងមូលរក្សានូវភាពស្អាត និងរឹងមាំបានយូរអង្វែង ហើយគ្មានធាតុផ្សំAPEO ដែលបង្កផលប៉ះពាល់ទៅដល់បរិស្ថាន។

ក្រុមហ៊ុន IMCT Co., Ltd បានទទួលការអនុញ្ញាតិ ពីរាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីបានប្រើឈ្មោះប្រាសាទអង្គរវត្ត ជាទីគោរពសក្ការៈ នៅក្នុងម៉ាកយីរហោ ផលិតផលថ្នាំលាប របស់ក្រុមហ៊ុន IMCT Co., Ltd។

ម្ចាស់ដេប៉ូ និងអ្នកសាងសង់នានាចាប់អារម្មណ៍សួមទំនាក់ទំនងតាមទូរសព្ទលេខ៖ ០៩៦ ២៦ ៩៩ ១៩៨/ ០៧៨ ៥៨ ៥៣ ៤៧៕

ដោយៈ សុខុម

សៀងហៃ: ក្រសួងពាណិជ្ជកម្មចិន បានប្រកាសក្ដែងៗកាលពីថ្ងៃសៅរ៍ ទី០២ មករា ដើមឆ្នាំ២០២១ នេះថា ប្រទេសចិន នឹងចាត់ “វិធានការចាំបាច់នានា” ដើម្បីការពារផលប្រយោជន៍របស់បណ្ដាក្រុមហ៊ុនចិន បន្ទាប់ពីផ្សារភាគហ៊ុនអាមេរិក New York Stock Exchange ហៅកាត់ NYSE ប្រកាសថា ខ្លួននឹងចាប់ផ្ដើមដំណើរការលុបក្រុមហ៊ុនទូរគមនាគមន៍ចិន ចំនួន ៣ ដែលរងការចោទប្រកាន់ថាមានទំនាក់ទំនងនឹងយោធាចិន ចេញពីបញ្ជីផ្សារភាគហ៊ុនរបស់សហរដ្ឋអាមេរិក។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី០២ មករា ឆ្នាំ២០២១។

ផ្សារភាគហ៊ុន New York Stock Exchange បានប្រកាសកាលពីថ្ងៃព្រហស្បតិ៍ ទី៣១ ធ្នូ ចុងឆ្នាំ២០២០ ថា ខ្លួននឹងចាប់ផ្ដើមដំណើរការលុបក្រុមហ៊ុនទូរគមនាគមន៍ចិន ចំនួន ៣ រួមមានក្រុមហ៊ុន China Mobile ក្រុមហ៊ុន China Unicom និងក្រុមហ៊ុន China Telecom ចេញពីបញ្ជីផ្សារភាគហ៊ុនរបស់សហរដ្ឋអាមេរិក ដើម្បីឆ្លើយតបទៅនឹងសេចក្ដីសម្រេចរបស់ប្រធានាធិបតី ដូណាល់ ត្រាំ ក្នុងការរារាំងការវិនិយោគរបស់អាមេរិក ទៅលើបណ្ដាក្រុមហ៊ុនដែលកាន់កាប់ ឬគ្រប់គ្រងដោយយោធាចិន។

ការជួញដូររបស់ក្រុមហ៊ុនចិន ទាំងនេះនឹងត្រូវផ្អាកនៅពេលណាមួយចន្លោះពីថ្ងៃ មករា ដល់ថ្ងៃទី១១ មករា។

ជាការឆ្លើយតប ក្រសួងពាណិជ្ជកម្មចិន បានចេញសេចក្ដីថ្លែងការណ៍ថ្កោលទោសថា ការលុបក្រុមហ៊ុនចិន ចេញពីបញ្ជីផ្សារភាគហ៊ុនសហរដ្ឋអាមេរិក គឺជាការរំលោភបំពានដល់សន្តិសុខជាតិ និងមិនស្របទៅតាមច្បាប់ទីផ្សារ។

អ្នកនាំពាក្យក្រសួងពាណិជ្ជកម្មចិន និយាយថា “ចិន ប្រឆាំងដាច់ខាតចំពោះអាមេរិក ដែលបំពានដល់សន្តិសុខជាតិតាមរយៈការដាក់បញ្ចូលបណ្ដាក្រុមហ៊ុនចិន ទៅក្នុងអ្វីដែលគេហៅថា ‘ក្រុមហ៊ុនយោធារបស់ចិន កុម្មុយនីស្ត’ ហើយចិន នឹងចាត់វិធានការតបតចាំបាច់នានាដើម្បីការពារដាច់ខាតនូវសិទ្ធិ និងផលប្រយោជន៍ស្របច្បាប់របស់បណ្ដាក្រុមហ៊ុនចិន”។

វិធានការតបតទាំងនោះក៏នឹងធ្វើឱ្យ “គ្រប់ភាគីពាក់ព័ន្ធទាំងអស់បាត់បង់ទំនុកចិត្តខ្លាំងទៅលើទីផ្សារមូលធនរបស់សហរដ្ឋអាមេរិក” ផងដែរ។ ទោះជាយ៉ាងណា ក្រសួងពាណិជ្ជកម្មចិន មិនបានផ្តល់ព័ត៌មានលម្អិតថា តើវិធានការទាំងនោះជាអ្វីឱ្យប្រាកដឡើយ។

គេមើលឃើញថា ក្រោមរដ្ឋការរបស់លោក ដូណាល់ ត្រាំ សហរដ្ឋអាមេរិក បានបង្កើនទណ្ឌកម្មសេដ្ឋកិច្ច និងបម្រាមធ្វើដំណើរប្រឆាំងបណ្ដាក្រុមហ៊ុនចិន ក្រុមមន្ត្រីរដ្ឋាភិបាលចិន និងសមាជិកបក្សកុម្មុយនីស្តចិន ជាពិសេសក្នុងរយៈពេលប៉ុន្មានសប្ដាហ៍ចុងក្រោយនៃការកាន់អំណាចរបស់លោក ត្រាំ។

ហើយកាលពីខែធ្នូ ចុងឆ្នាំ២០២០ សហរដ្ឋអាមេរិក បានប្រកាសផែនការកំណត់ទិដ្ឋាការសម្រាប់សមាជិកនៃបក្សកុម្មុយនីស្តចិន និងក្រុមគ្រួសាររបស់ពួកគេមកនៅត្រឹមរយៈពេលតែ ១ ខែជំនួសឱ្យរយៈពេល ១០ ឆ្នាំ។

លើសពីនេះ ក្រុមហ៊ុនបច្ចេកវិទ្យាខ្នាតយក្សរបស់ចិន Huawei ត្រូវបានធាក់ចេញពីទីផ្សារសហរដ្ឋអាមេរិក ហើយសហរដ្ឋអាមេរិក ថែមទាំងបានឡប់ប៊ី (បញ្ចុះបញ្ចូល) ឱ្យប្រទេសផ្សេងៗធ្វើតាមខ្លួនទៀតផង ហើយទទួលបានលទ្ធផលចម្រុះ៕

ដោយ៖ ប៊ី

ភ្នំពេញ: ក្រុមហ៊ុន MARVEL GARMENT ដែលក្រុមហ៊ុនផលិតសម្លៀកបំពាក់ធំបំផុតមួយរបស់ចិន ប្រកាសពង្រីកទីតាំងផលិតកម្មបន្ថែមនៅកម្ពុជា ខណៈក្រុមហ៊ុនត្រូវការជ្រើសរើសកម្មកររាប់ពាន់នាក់ ដើម្បីឆ្លើយតបនឹងការពង្រីកទីតាំងផលិតកម្មរបស់របសខ្លួន។

យោងតាមសេចក្តីប្រកាសព័ត៌មានរបស់ក្រុមហ៊ុនតំបន់សេដ្ឋកិច្ចពិសេសភ្នំពេញ (PPSP) ចេញផ្សាយនៅចុងសប្តាហ៍កន្លងមកនេះ បានឱ្យដឹងថា លោកប្រធាន Tan Kak Khun តំណាងក្រុមហ៊ុន PPSP និងលោក Yan Delinប្រធានចាត់ការទូទៅ នៃក្រុមហ៊ុន MARVEL GARMENT បានចុះហត្ថលេខាលើកិច្ចព្រមព្រៀងជួលដីបន្ថែម។

ក្រុមហ៊ុន MARVEL GARMENT គឺជាក្រុមហ៊ុនផលិតសម្លៀកបំពាក់ធំជាងគេបំផុតនៅប្រទេសចិន ដែលបាននឹងកំពុងសាងសង់កន្លែងផលិតកម្មថ្មី ចាប់តាំងពីខែមីនាឆ្នាំ២០១៩ នៅតំបន់សេដ្ឋកិច្ចពិសេសភ្នំពេញ។

ខណៈខ្សែចង្វាក់ផលិតកម្មកំពុងត្រូវបានបញ្ចប់ម្តងមួយៗ ក្រុមហ៊ុនបានជ្រើសរើសកម្មករជាង៣.០០០នាក់ ចាប់តាំងពីដើមខែតុលាឆ្នាំ ២០២០ ហើយមានតម្រូវការបន្ទាន់ក្នុងការជ្រើសរើសកម្មកររហូតដល់ទៅ៦០០០នាក់នៅចុងខែកុម្ភៈឆ្នាំ២០២១។

ដោយមើលឃើញពីចំនួនកម្មករកើនឡើង ក្រុមហ៊ុនកំពុងបង្កើនល្បឿន ដើម្បីរៀបចំកន្លែងស្នាក់នៅរបស់កម្មករ និងកន្លែងនៅជុំវិញ។ គោលដៅគឺតម្រូវឱ្យមានកន្លែងស្នាក់នៅសម្រាប់កម្មករជាង១ម៉ឺននាក់ នៅឆ្នាំ២០២១។

កិច្ចព្រមព្រៀងនេះពាក់ព័ន្ធនឹងជួលដីទំហំ៣.៧ហិកតាបន្ថែម ដែលជាកិច្ចសហការមួយរវាងក្រុមហ៊ុនទាំងពីរ ដើម្បីបង្កើតការងារ និងលើកកម្ពស់វិស័យឧស្សាហកម្មនៅប្រទេសកម្ពុជា៕

ដោយ ៖ គង់ ម៉ាលីន

ភ្នំពេញ ៖ គម្រោងសាងសង់ពង្រីក និងលើកកម្ពស់គុណភាពផ្លូវជាតិលេខ៣ចាប់ពីរង្វង់មូលចោមចៅរហូតដល់ខេត្តកំពត ប្រវែង១៣៤គីឡូម៉ែត្រ រហូតមកដល់ពេលនេះសម្រេចបានលទ្ធផលប្រមាណ៩០ភាគរយ នឹងអាចបញ្ចប់ទាំងស្រុងនៅត្រឹមខែកញ្ញា ឆ្នាំ២០២១ខាងមុខនេះ មុនកាលកំណត់១ឆ្នាំ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានមានប្រសាសន៍ថ្ងៃទី៤ ខែមករា ឆ្នាំ២០២០នេះ ការរួចរាល់មុនគម្រោងនេះ គឺបានឆ្លងកាត់ការត្រួតពិនិត្យរបស់មន្ត្រីជំនាញគ្រប់ដំណាក់កាលសាងសង់ទាំងអស់ និងបានត្រឹមត្រូវតាមលក្ខណ:បច្ចេកទេស។

លោកទេសរដ្ឋមន្ត្រីបានបន្ថែមទៀតថា “ដើម្បីបញ្ជៀសឱ្យបានកាន់តែមានប្រសិទ្ធភាព ក្នុងការបើកបរបត់ត្រឡប់ក្រោយនៅលើផ្លូវជាតិលេខ៣នេះ នឹងក្រោយពីការស្នើរបស់ក្រសួងក្រុមហ៊ុនសាងសង់ក៏បានសម្រេចជួយសាងសង់ផ្លូវត្រឡប់ក្រោយចំនួន៥កន្លែង នៅលើផ្លូវជាតិលខ៣នេះផងដែរ”។

ការពង្រីក និងលើកកម្រិតគុណភាព (ពី DBST ទៅ AC) លើកំណាត់ផ្លូវជាតិលេខ៣នេះ មានប្រវែងសរុបជិត១៣៥គីឡូម៉ែត្រ ចាប់ពីរង្វង់មូលចោមចៅ ដល់ក្រុងកំពត ក្រោមហិរញ្ញប្បទានសម្បទានរបស់រដ្ឋាភិបាលចិនជាង ២០០លានដុល្លារអាមេរិក។

គម្រោងនេះចែកចេញជាពីរកំណាត់៖ កំណាត់ទី១ ចាប់ពីភ្នំពេញ (ចោមចៅ)-បែកគូស មានប្រវែងជិត៧០គីឡូម៉ែត្រ ត្រូវពង្រីកទទឹងតួផ្លូវរហូតដល់ ២៤.៥ម៉ែត្រ ជា៤គន្លង (២គន្លងទៅ ២គន្លងមក) ដោយក្រាលបេតុងកៅស៊ូ AC កម្រាស់ ៩សង់ទីម៉ែត្រ ទទឹង ២១ម៉ែត្រ លើទទឹងតួផ្លូវសរុប ២៤.៥ម៉ែត្រ។ ដោយឡែកកំណាត់ទី២ ចាប់ពីបែកគូស ដល់ក្រុងកំពត ប្រវែងជិត៦៥គីឡូម៉ែត្រ ត្រូវពង្រីកទទឹងតួផ្លូវរហូតដល់ ១២ម៉ែត្រ ជា២គន្លង (១គន្លងទៅ ១គន្លងមក) ដោយក្រាលបេតុងកៅស៊ូ AC កម្រាស់៧សង់ទីម៉ែត្រ ទទឹង ១១ម៉ែត្រ៕

ដោយ ៖ រ៉ាណេត

តាកែវ ៖ នៅពេលដ៏ខ្លីខាងមុខនេះ វត្តមាននៃស្ពានអាកាសថ្មើរជើងឆ្លងកាត់បណ្តាផ្លូវជាតិនានានឹងមានការសាងសង់កាន់តែច្រើនបន្ថែមទៀត ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ បញ្ចៀសគ្រោះថ្នាក់ចរាចរណ៍ក្រោមការយកចិត្តទុកដាក់ពីសំណាក់ប្រមុខរាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្ត្រីនៃកម្ពុជា។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹងជញ្ជូន បានអះអាង និងបញ្ជាក់ពីគម្រោងនៃការសាងសង់ស្ពានអាកាសថ្មើរជើងឆ្លងកាត់ផ្លូវជាតិលេខ៣ដែលកំពុងស្ថិតនៅក្នុងដំណាក់កាលចុងក្រោយនៃការសាងសង់ត្រង់ចំណុចផ្សារត្រាំខ្នារ ខេត្តតាកែវព្រំប្រទល់ខេត្តកំពង់ស្ពឺ ដើម្បីសម្រួលដល់ការធ្វើចរាចរណ៍ និងកាត់គ្រោះថ្នាក់ជាយថាហេតុនៅពេលឆ្លងផ្លូវ។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូនបានមានប្រសាសន៍នៅព្រឹកថ្ងៃទី៤ ខែមករា ឆ្នាំ២០២១នេះថា ក្រោមការយល់ស្រប និងអនុញ្ញាតពីសំណាក់សម្ដេចតេជោ ហ៊ុន សែន ទៅលើការយកចិត្តទុកដាក់ចំពោះសុខសុវត្ថិភាពរបស់ប្រជាពលរដ្ឋដែលជាអ្នកដំណើរ ជាពិសេសសិស្សសាលាដែលតែងឆ្លងកាត់ផ្លូវថ្នល់ដែលមានទំហំរហូតដល់៤គន្លងនៅចំណុចទីប្រជុំជនផ្សារត្រាំខ្នារព្រំប្រទល់ខេត្តតាកែវ និងខេត្តកំពង់ស្ពឺ ស្ពានអាកាសថ្មើរជើងនៅតំបន់នេះនឹងត្រូវសាងសង់ជាចាំបាច់។

លោកទេសរដ្ឋមន្ត្រីបានបន្ដថា “មានអ្នកខ្លះបានផ្តល់យោបល់ថា ការសាងសង់ស្ពានអាកាសថ្មើរជើងនៅចំណុចផ្សារត្រាំខ្នារនឹងធ្វើឱ្យប៉ះពាល់ដល់សោភ័ណភាពផ្សារ ប៉ុន្តែអ្វីដែលសំខាន់គឺយើងគិតពីសុវត្ថិភាពរបស់អ្នកដំណើរ ជាពិសេសសិស្សសាលាដែលតែងឆ្លងផ្លូវនៅតំបន់នេះ។ ផ្លូវធំដែលមានរហូតដល់៤គន្លង នៅពេលឆ្លងផ្លូវតើអាចនឹងមានគ្រោះថ្នាក់អ្វីកើតឡើង យើងមិនអាចសន្មត់បាននោះទេ ប៉ុន្តែដើម្បីជៀសវាងគ្រោះថ្នាក់កើតឡើងជាយថាហេតុនៅពេលឆ្លងថ្នល់ គឺត្រូវតែមានស្ពានអាកាសថ្មើរជើងដែលអាចធានាបាននូវសុវត្ថិភាព”។

គម្រោងសាងសង់ស្ពានអាកាសថ្មើរជើងឆ្លងកាត់ផ្លូវជាតិលេខ៣ ដែលមានទំហំធំ រហូតដល់ដល់៤គន្លង ស្ថិតនៅចំណុចផ្សារត្រាំខ្នារថ្មី ស្រុកត្រាំខ្នារ ខេត្តតាកែវ ជាព្រំប្រទល់ជាមួយនឹងស្រុកគង់ពិសី ខេត្តកំពង់ស្ពឺដែលកំពុងមានការអភិវឌ្ឍលើផ្នែកហេដ្ឋារចនាសម្ព័ន្ធជាច្រើនទីតាំងក្រោមការវិនិយោគដោយរាជរដ្ឋាភិបាលកម្ពុជា។

អភិបាលខេត្តកំពង់ស្ពឺ លោក វ៉ី សំណាង បានមានប្រសាសន៍ប្រាប់តាមទូរស័ព្ទថា “គម្រោងសាងសង់ស្ពានអាកាសសម្រាប់អ្នកថ្មើរជើងនេះ រដ្ឋបាលខេត្តកំពង់ស្ពឺបានសិក្សាលម្អិតជាមួយក្រុមមន្ត្រីជំនាញបច្ចេកទេសរួចរាល់ហើយ ហើយពាក់ព័ន្ធទៅនឹងពេលវេលាបើកការដ្ឋានសាងសង់ គឺអាស្រ័យលើមន្ត្រីបច្ចេកទេសរបស់ក្រសួង និងក្រុមហ៊ុនម៉ៅការសាងសង់”។

លោកបានបញ្ជាក់ទៀតថា “គ្រប់គម្រោងសាងសង់ និងអភិវឌ្ឍន៍ហេដ្ឋារចនាសម្ព័ន្ធទាំងអស់របស់រាជរដ្ឋាភិបាល គឺសុទ្ធតែក្នុងគោលបំណងផ្តល់ភាពងាយស្រួលដល់បងប្អូនប្រជាពលរដ្ឋទាំងនៅក្នុងតំបន់ និងអ្នកធ្វើដំណើរទាំងអស់ ហើយការអភិវឌ្ឍនេះនឹងនៅតែបន្តដំណើរទៅមុខជាបន្តបន្ទាប់ទៀតស្របតាមគោលការណ៍របស់រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន នាយករដ្ឋមន្ត្រីជាប្រមុខដឹកនាំ”៕