ដោយ: សុខុម

អន្តរជាតិ: ក្រុមហ៊ុនផលិតរថយន្តអ៊ីតាលី-អាមេរិក Fiat Chrysler Automobiles ហៅកាត់ FCA និងក្រុមហ៊ុនផលិតរថយន្តបារាំង Groupe PSA ហៅកាត់ PSA ដែលផលិតរថយន្ត Peugeot និងរថយន្ត Citroën រំពឹងថា ដំណើរការច្របាច់បញ្ចូលគ្នានូវក្រុមហ៊ុនទាំងពីរនេះក្រោមឈ្មោះថ្មីថា Stellantis នឹងបញ្ចប់ជាស្ថាពរនៅថ្ងៃទី១៦ មករា។ នេះបើយោងតាមសារព័ត៌មាន CNN ចុះផ្សាយកាលពីថ្ងៃច័ន្ទ ទី៤ មករា។

ក្រុមហ៊ុនទាំងពីរបានប្រកាសរួមគ្នាថា ម្ចាស់ភាគហ៊ុននៃក្រុមហ៊ុនទាំងពីរបានអនុម័តការច្របាច់បញ្ចូលគ្នានេះកាលពីថ្ងៃច័ន្ទ ទី៤ មករា។

ក្រុមហ៊ុន FCA ផលិតរថយន្តដូចជា Chrysler រថយន្ត Dodge រថយន្ត Ram រថយន្ត Jeep រថយន្ត Fiat រថយន្ត Alfa Romeo រថយន្ត Maserati និងរថយន្ត Lancia។ ចំណែកឯក្រុមហ៊ុន PSA ផលិតរថយន្តដូចជារថយន្ត Peugeot រថយន្ត Citroën រថយន្ត DS រថយន្ត Opel និងរថយន្ត Vauxhall។

លោក Jeff Schuster អ្នកវិភាគប្រចាំក្រុមហ៊ុនវិភាគទីផ្សាររថយន្ត LMC Automotive បានលើកឡើងថា នៅពេលច្របាច់បញ្ចូលគ្នារួចរាល់ ក្រុមហ៊ុនរួមថ្មីនេះនឹងក្លាយជាក្រុមហ៊ុនផលិតរថយន្តធំបំផុតទី៤ ក្នុងពិភពលោកជាមួយនឹងទ្រព្យសកម្មសរុបរហូតដល់ទៅប្រមាណ ៥៧ ពាន់លានដុល្លារ។

ក្នុងឆ្នាំ២០១៩ ក្រុមហ៊ុនទាំងពីរលក់រថយន្តរួមគ្នាបាន ៨ លានគ្រឿង បើធៀបទៅនឹងក្រុមហ៊ុនផលិតរថយន្តអាល្លឺម៉ង់ Volkswagen ដែលលក់រថយន្តដាច់បានប្រហែល ១១ លានគ្រឿងក្នុងឆ្នាំនោះ។

លោក Jeff Schuster គូសបញ្ជាក់ថា ក្រុមហ៊ុន FCA និងក្រុមហ៊ុន PSA ប្រកួតប្រជែងក្នុងទីផ្សាររថយន្តនៅអឺរ៉ុប ប៉ុន្តែក្រុមហ៊ុន PSA ស្ទើរតែគ្មានវត្តមាននៅសហរដ្ឋអាមេរិក ខណៈក្រុមហ៊ុន FCA ជាក្រុមហ៊ុនផលិតរថយន្តធំបំផុតទី៤ និយាយអំពីការលក់នៅក្នុងប្រទេសមហាអំណាចមួយនេះ។ ប៉ុន្តែក្រុមហ៊ុនទាំងពីរបានប្រឹងប្រែងប្រកួតយ៉ាងស្វិតស្វាញនៅក្នុងទីផ្សាររថយន្តដែលរីកចម្រើនយ៉ាងឆាប់រហ័សក្នុងប្រទេសចិន។

អ្នកវិភាគរូបនេះបានបន្ថែមទៀតថា ភ្លាមៗការច្របាច់បញ្ចូលគ្នានេះមិនអាចជួយអ្វីបានច្រើនឡើយ ដូចនេះបញ្ហាប្រឈមនឹងនៅតែមានសម្រាប់ក្រុមហ៊ុនរួមបញ្ចូលគ្នាថ្មីនេះ។

ភាគហ៊ុនរបស់ក្រុមហ៊ុន Stellantis នឹងចាប់ផ្ដើមធ្វើការជួញដូរនៅលើទីផ្សារភាគហ៊ុនក្នុងក្រុងប៉ារីស ប្រទេសបារាំង និងក្រុងមីលែន (Milan) ប្រទេសអ៊ីតាលី នៅថ្ងៃច័ន្ទ ទី១១ មករា និងនៅលើទីផ្សារភាគហ៊ុនអាមេរិក New York Stock Exchange នៅថ្ងៃបន្ទាប់។

ក្រុមហ៊ុនទាំងពីរបានបញ្ជាក់ថា ការច្របាច់បញ្ចូលគ្នានេះនៅត្រូវការការអនុម័តជាចុងក្រោយពីក្រុមនិយ័តករ ដែលក្នុងនោះរួមមានទាំងសហភាពអឺរ៉ុប និងធនាគារកណ្ដាលអឺរ៉ុប ផងដែរ៕

ដោយ ៖ រ៉ាណេត

កែប៖ ស្ថិតនៅក្នុងផែនការនៃការអភិវឌ្ឍន៍ខេត្ត/ក្រុងកែបឱ្យក្លាយជាគោលដៅទេសចរណ៍ប្រណីតបែបធម្មជាតិកម្រិតខ្ពស់របស់រាជរដ្ឋាភិបាលកម្ពុជា រដ្ឋបាលខេត្តកែបបានសហការដៃគូជាមួយវិស័យឯកជនក្នុងការកែប្រែតំបន់កម្សាន្តនានាជាច្រើន ជាក់ស្ដែងដូចជាការគម្រោងសាងសង់កំពង់ផែទេសចរណ៍កោះទន្សាយដែលរហូតមកដល់ដើមឆ្នាំ២០២១នេះសម្រេចបានប្រមាណ៤០ភាគរយ ដែលគ្រោងនឹងបញ្ចប់ក្នុងពេលខាងមុខដើម្បីបម្រើសេវាកម្មដល់ទេសចរ។

លោក តាត់ ស៊ុនហួត អគ្គនាយករងនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែបានប្រាប់ឱ្យដឹងនៅព្រឹកថ្ងៃទី៦ ខែមករា ឆ្នាំ២០២១ថា កំពង់ផែទេសចរណ៍កោះទន្សាយ បានបើកដំណើរការសាងសង់ តាំងពីចុងខែធ្នូ ឆ្នាំ២០១៨មកម្លេះ ហើយគ្រោងបញ្ជប់នៅខែ វិច្ឆិកា ឆ្នាំ២០១៩ តែដោយសារបញ្ហាយឺតយ៉ាវលើបច្ចេកទេសបុកគ្រឹះ និងបញ្ហាជំងឹកូវីដ១៩ ទើបពន្យាពេលមកដល់ពេលនេះ។

លោកបញ្ជាក់ថា “ការសាងសង់កំពង់ផែនេះសម្រាប់តែបម្រើឱ្យវិស័យទេសចរណ៍តែមួយមុខប៉ុណ្ណោះ ដោយឡែកការដឹងជញ្ជូនទំនិញផ្សេងៗមិនអាចប្រើប្រាស់កំពង់ផែនេះបានឡើយ ព្រោះផែនេះមានទម្ងន់ផ្ទុកមិនអាចលើសពី១៥តោននោះទេ ដោយមិនមែនជាប្រភេទផែធនធ្ងន់សម្រាប់បម្រើឲ្យការដឹកជញ្ជូននោះឡើយ។ កំពង់ផែនេះ មានលទ្ធភាពអាចទទួលចតនាវាដែលអាចដឹកមនុស្សបានក្រោម៣០០នាក់”។

ការសាងសង់កំពង់ផែទេសចរណ៍កែប កោះទន្សាយ និងអគារលក់សំបុត្រព្រមទាំងកន្លែងរង់ចាំ ដែលដំណើរការសាងសង់បានជាង ៤០ភាគរយនេះស្ថិតនៅលើទីតាំងផែចាស់ ក្នុងភូមិកែប សង្កាត់កែប ក្រុងកែប ខេត្តកែប ដែលមានរូបរាងជាក្តាម មានចម្ងាយពីដីគោក ចូលទៅក្នុងសមុទ្រប្រមាណ ៣០៦ម៉ែត្រ ទទឹង ៦៨ម៉ែត្រ មានផ្ទៃក្រឡាសរុបប្រមាណ៤ ៦៦១,៥០ម៉ែត្រការ៉េ ប្រើប្រាស់ថវិការសាងសង់សរុបជិត ៥០០០លានរៀល។

បច្ចប្បន្នកំពង់ផែមួយនេះ ត្រូវបានរដ្ឋបាលខេត្តកែប ដាក់ជួលឲ្យទៅវិស័យឯកជនជាអ្នកគ្រប់គ្រង ដោយកាលពីថ្ងៃទី២៣ ខែវិច្ចិការ ឆ្នាំ២០២០ កន្លងទៅនេះ រដ្ឋបាលខេត្តកែប តាមរយៈមន្ទីរសេដ្ឋកិច្ច និងហិរញ្ញវត្ថុ បានបើកការដេញថ្លៃកំពង់ផែនេះ និងទីតាំងសំខាន់ៗរបស់ខេត្តចំនួន៣ទៀតឱ្យទៅវិស័យឯកជន៕

ដោយ ៖ រ៉ាណេត

ភ្នំពេញ ៖ បញ្ហានៃទំនាស់ និងវិវាទដីធ្លីនៅក្នុងខេត្តកំពតដែលកំពុងមានការអភិវឌ្ឍ និងរីកចម្រើនប្រែក្លាយទៅជាគោលដៅទេសចរណ៍កម្រិតខ្ពស់ប្រចាំប្រទេសនាពេលបច្ចុប្បន្ន បានក្លាយជាបញ្ហាដែលមានភាពប្រឈមជាងគេ និងតម្រូវឱ្យមានយន្តការដោះស្រាយប្រកបដោយប្រសិទ្ធភាព និងតម្លាភាពបំផុត។

អភិបាលខេត្តកំពត លោកជាវ តាយ បានប្រសាសន៍នៅថ្ងៃទី៥ ខែមករា ឆ្នាំ២០២១ថា រឿងដែលកំពុងប្រឈមជាងគេ នៅតាមបណ្តាក្រុង ស្រុក គឺបញ្ហាបទស្មើសដីធ្លី ដែលទាមទារឱ្យអភិបាលក្រុង ស្រុក ត្រូវមានវិធានការម៉ឺងម៉ាត់ បើមិនដូច្នេះ ទេបទល្មើសនឹងបន្តកើតមានឡើង យ៉ាងអនាធិបតេយ្យជាក់ជាមិនខាននោះទេ។

លោកបានបន្តថា “វាពិតជាសំខាន់បំផុតសម្រាប់រាលការប្រជុំពិភាក្សាក្នុងការឆ្លុះបញ្ចាំងអំពីសមិទ្ធផល និងលទ្ធផលការងារអំពីបញ្ហាប្រឈម សំណូមពរ ដែលតែងកើតមានឡើងនៅក្នុងមូលដ្ឋានដើម្បីរួមគ្នាពិនិត្យ និងបន្តការដោះស្រាយឱ្យមានប្រសិទ្ធភាព ប្រសិទ្ធផល និងការអភិវឌ្ឍប្រកបដោយនិរន្តរភាព និងចីរភាព”។

ដោយឡែកពាក់ព័ន្ធទៅនឹងដំណោះស្រាយនៃវិវាទដីធ្លីទាំងនៅក្នុង និងជុំវិញខេត្តកំពតដែលតែងកើតមានខាងលើនេះលោកអភិបាលខេត្តបានជំរុញឱ្យមន្ត្រី និងអាជ្ញាធរពាក់ព័ន្ធរួមសហការគ្នាអនុវត្តផ្អែកលើមូលដ្ឋាន ៣ដំណាក់កាលសំខាន់រួមមាន ទី១ ផ្សព្វផ្សាយលិខិតបទដ្ឋានគតិយុត្តិឲ្យបានទូលំទូលាយដល់ពលរដ្ឋបានដឹង ទី២ ចុះពន្យល់ណែនាំ និងធ្វើកិច្ចសន្យាលើការប្រព្រឹត្តល្មើស ហើយទី៣ ការអនុវត្តនិតិវិធីច្បាប់ដោះស្រាយតាមប្រព័ន្ធតុលាការ។

ជាមួយគ្នានេះ លោកជាវ តាយ ក៏បានណែនាំដល់អាជ្ញាធរក្រុង ស្រុក និងជំនាញពាក់ព័ន្ធទាំងអស់ ក្រៅពីការយកចិត្តទុកដាក់ផ្ដល់សេវារដ្ឋបាល សេវាសាធារណៈ និងការរក្សាសន្តិសុខសណ្ដាប់ធ្នាប់ ជូនប្រជាពលរដ្ឋ ក៏ត្រូវបន្តការប្រុងប្រយ័ត្នយកចិត្តទុកដាក់ចូលរួមពង្រឹងការអនុវត្តវិធានការ ការពារសុវត្ថិភាពសង្គម តាមវិធានការណែនាំរបស់រាជរដ្ឋាភិបាល ក៏ដូចក្រសួងសុខាភិបាល ដើម្បីបង្ការទប់ស្កាត់នូវហានិភ័យនៃការរីករាលដាលជំងឺកូវីដ-១៩ កុំឱ្យចូលក្នុងសហគមន៍ខេត្តកំពតឱ្យបានដាច់ខាត៕

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បានប្រកាសពីសេចក្ដីជូនដំណឹងដោយបង្ហាញពីការតម្លើងពន្ធ៥ភាគរយលើតម្លៃគិតពន្ធគយ ទៅលើការនាំចូលរថយន្តសម្រាប់ប្រើប្រាស់ផ្ទាល់ខ្លួន ។

យោងតាមសេចក្តីជូនដំណឹងដែលបានផ្សព្វផ្សាយជាសាធារណៈនៅដើមខែមករា ឆ្នាំ២០២១នេះបានឱ្យដឹងថា ដើម្បីពង្រឹងប្រសិទ្ធភាពនៃការគ្រប់គ្រងការនាំចូលជាលក្ខណៈបុគ្គលសម្រាប់ប្រើប្រាស់ផ្ទាល់នូវរថយន្តថ្មីដែលជាប់សិទ្ធិផ្ដាច់មុខលើការនាំចូល និងចែកចាយ ក្រសួងសេដ្ឋកិច្ចនិងហិរញ្ញវត្ថុ សម្រេចកំណត់លក្ខខណ្ឌ និងវិធានការមួយចំនួនសម្រាប់នាំចូលតាមរូបភាពរួមមាន ទី១ បូកបន្ថែម៥ភាគរយលើតម្លៃគិតពន្ធគយ ទី២ បុគ្គលនាំចូលមិនអាចលក់ឬផ្ទេរកម្មសិទ្ធរថយន្តទៅបុគ្គលផ្សេងមុនពេលចុះបញ្ជីធ្វើស្លាកលេខរថយន្តជាកម្មសិទ្ធិផ្ទាល់ខ្លួនបានឡើយ ទី៣ បុគ្គលដែលមិនអនុវត្តតាមលក្ខខណ្ឌដូចចែង នឹងត្រូវរងនូវទោសទណ្ឌតាមបទប្បញ្ញត្តិជាធរមាន ។

លោកងន សាំង អគ្គនាយកក្រុមហ៊ុន RMA Cambodia ដែលនាំចូលរថយន្តជាច្រើនម៉ាកមកកម្ពុជាបានឱ្យដឹងថា វិធានការតម្លើងពន្ធនេះនឹងជួយដល់អ្នកនាំចូលរថយន្តផ្ដាច់មុខនៅកកម្ពុជាបានមួយកម្រិតទៀតផងដែរ ហើយលោកសូមសាទរនូវវិធានការរបស់រដ្ឋាភិបាលលើការដំឡើងពន្ធនេះ ។

លោកបន្តថា “នៅពេលរដ្ឋតម្លើងពន្ធនេះបន្ថែមទៀត នឹងធ្វើឱ្យតម្លៃនាំចូលជាលក្ខណៈឯកជន លក្ខណៈបុគ្គលនឹងអាចកៀកជាមួយតម្លៃក្រុមហ៊ុននាំចូល ដូច្នេះអ្នកនាំចូលជាលក្ខណៈបុគ្គលនឹងអាចកាត់បន្ថយ ហើយងាយមកទិញរថយន្តពីក្រុមហ៊ុននាំចូលវិញ”។

លោកបន្តថា “នៅពេលមានការបញ្ជាទិញរថយន្តតាមរយៈក្រុមហ៊ុននាំចូលកាន់តែច្រើន នោះវានឹងជួយសេដ្ឋកិច្ចកម្ពុជាបានមួយកម្រិតទៀតដោយសារតែការបង្កើតការងារជូនបុគ្គលិកក្នុងវិស័យឧស្សាហកម្មយានយន្តនៅកម្ពុជា។ ការនាំចូលរថយន្តជាលក្ខណៈប្រើប្រាស់ផ្ទាល់ខ្លួននៅកម្ពុជាបច្ចុប្បន្ននេះ គឺភាគច្រើននាំចូលតែរថយន្តទំនើបៗប៉ុណ្ណោះ ( Luxury Car ) សម្រាប់រថយន្តមធ្យម ( Premium Car ) គឺមិនសូវមានទេ គឺមានតិចតួចប៉ុណ្ណោះ”។

តបទៅនឹងការសម្រេចតម្លើងពន្ធលើការនាំរថយន្តថ្មីសម្រាប់ប្រើប្រាស់ផ្ទាល់ខ្លួនខាងលើនេះ ប្រធានសមាគមអ្នកលក់យានយន្តកម្ពុជា លោកឈុន គឹមស៊្រុនបានដាក់លិខិតមួយទៅកាន់រដ្ឋាភិបាល ដើម្បីស្នើសុំការបកស្រាយបំភ្លឺ និងស្នើសុំផ្អាកការអនុវត្តការកំណត់លក្ខខណ្ឌ និងវិធានការមួយចំនួនលើការនាំចូលរថយន្តជាប់សិទ្ធិផ្តាច់មុខ។

លោកបញ្ជាក់ថា “ចាប់តាំងពីការអនុវត្តប្រកាសស្តីពីនីតិវិធីសម្រាប់ការកត់ត្រា និងតម្កល់លិខិតប្រគល់សិទ្ធិនាំចូលទំនិញពាក់ម៉ាកផ្តាច់មុខក្នុងឆ្នាំ២០១៦ របស់ក្រសួងពាណិជ្ជកម្មរួចមក យើងខ្ញុំជាម្ចាស់អាជីវកម្មលក់រថយន្ត ឬឃ្លាំងរថយន្តដែលនាំចូលរថយន្តសម្រាប់លក់ឱ្យអតិថិជនក្នុងស្រុកទទួលរងផលប៉ះពាល់ និងសម្ពាធ និងរាំងស្ទះដល់ការលក់រថយន្តថ្មីពីសំណាក់ក្រុមហ៊ុនលក់រថយន្តផ្តាច់មុខនៅក្នុងស្រុក”។

បន្ថែមលើនេះ សមាគមទើបតែទទួលបានព័ត៌មានពីបណ្តាញសង្គមអំពីលិខិតរបស់ក្រសួងសេដ្ឋកិច្ចដែលមានខ្លឹមសារ ដូចជា បូកបន្ថែម ៥ភាគរយ លើតម្លៃគិតពន្ធគយ,បុគ្គលនាំចូលមិនអាចលក់ ឬផ្ទេរកម្មសិទ្ធិរថយន្តទៅបុគ្គលផ្សេង មុនពេលចុះបញ្ជីធ្វើផ្លាកលេខ រថយន្តជាកម្មសិទ្ធិផ្ទាល់ខ្លួនបានឡើង។ បុគ្គលដែលមិនអនុវត្តតាមលក្ខខណ្ឌដូចមានចែងខាងលើ នឹងត្រូវទទួលរងនូវទោសទណ្ឌតាមបទប្បញ្ញត្តិជាធរមាន ដែលនឹងត្រូវអនុវត្តចាប់ពីដើមខែមករា ឆ្នាំ២០២១ខាងមុខ។

នៅក្នុងលិខិតដែលសមាគមអ្នកលក់យានយន្តកម្ពុជាដាក់ស្នើដល់រដ្ឋាភិបាលបានបញ្ជាក់ថា ការចាប់ផ្តើមអនុវត្តដោយរហ័ស និងពុំមានការចែករំលែកព័ត៌មានឱ្យបានទូលំទូលាយ ប៉ះពាល់យ៉ាងខ្លាំងដល់អាជីវកម្មមួយនេះ ដូច្នេះការស្នើសុំខាងលើនេះ សមាគមសង្ឃឹមថា មានការយោគយល់ និងមានដំណោះស្រាយយ៉ាងឆាប់រហ័ស ខណៈដែលការដាក់ឱ្យអនុវត្តលើលិខិតខាងលើ គឺជាការដាក់សម្ពាធថ្មីមួយដែលអាចបណ្តាលឱ្យអាជីវកម្មលក់រថយន្ត និងអាជីករក្នុងស្រុកដទៃទៀតមិនអាចទទួលយកបាន ព្រមទាំងមិនទាន់អាចរៀបចំលក្ខណៈសម្បត្តិដើម្បីសម្របខ្លួនទៅនឹងបរិបទថ្មីមួយនេះ។

តាមលិខិតបានបញ្ជាក់បន្ថែមទៀតថា សមាគមអ្នកលក់ឡាននេះគឺមានចំនួនជាង២០០នាក់ មានការព្រួយបារម្ភការធ្លាក់ចុះនៃសេដ្ឋកិច្ចរបស់ពួកគាត់ ដោយសារតែការរាំងខ្ទប់នៃការប្រើសិទ្ធផ្តាច់មុខរបស់ក្រុមហ៊ុនបានប៉ះពាល់ដល់ពួកគាត់ ខណៈពួកគាត់កំពុងជួបវិបត្តិនៃមេរោគកូវិដ១៩ផងនោះ៕

ដោយ ប៊ី

ភ្នំពេញៈ ក្រុមហ៊ុន BEST Inc., ផ្តល់​ដំណោះស្រាយ​ខ្សែសង្វាក់​ផ្គត់ផ្គង់​ឆ្លាត​វៃ​ឈានមុខ​គេ និង​ជា​អ្នកផ្តល់​សេវាកម្ម​ដឹក​ជ​ញ្ជួ​ន​នៅ​ប្រទេស​ចិន នៅ​ថ្ងៃ​ម្សិល​ម៉ិ​ញ​នេះ​បានប្រកាស​ពង្រីក​បន្ថែម​ទៀត​របស់ខ្លួន​ទៅកាន់​អាស៊ីអាគ្នេយ៍។ នេះ​បើ​យោងតាម​សេចក្តីប្រកាស​ព័ត៌មាន​របស់​ក្រុមហ៊ុន​នេះ ។

ការបើក​ដំណើរការ​សេវាកម្ម ដឹកជញ្ជូន​រហ័ស​រប​ស់​ក្រុមហ៊ុន នឹងធ្វើ​ឡើង​នៅ​ប្រទេស​ម៉ាឡេស៊ី កម្ពុជា និង​សឹង្ហ​បុរី បន្ទាប់ពី​ប្រទេស​ថៃ និង​វៀតណាម​កាលពី​ឆ្នាំមុន និង​ជាការ​បោះជំហាន​ទៅមុខ​ដ៏​សំខាន់​មួយទៀត នៅក្នុង​មហិច្ឆតា​របស់​ក្រុមហ៊ុន ក្នុង​ការកសាង​បណ្តាញ​ភ័ស្តុភារ​ដឹកជញ្ជូន ប្រកបដោយ​ប្រសិទ្ធភាព ជាមួយនឹង​ការ​គ្របដណ្តប់​យ៉ាង​ទូលំទូលាយ​នៅក្នុង​តំបន់​អាស៊ីអាគ្នេយ៍។

ក្រុមហ៊ុន​ក៏បាន​ប្រកាស​បង្កើន ដំណោះស្រាយ​ដឹក​ជ​ញ្ចូ​ន​អន្តរជាតិ ដោយ​បើក​ដំណើរការ​សេវាកម្ម​ឆ្លងកាត់​ព្រំដែន រវាង​ប្រទេស​ចិន និង​ទីផ្សារ​ចំនួន៥នៅ​អាស៊ីអាគ្នេយ៍​ក្នុង​ខែ​នេះ។

លោក Johnny Chou ស្ថាបនិក និង​ជា​ប្រធាន​នាយក​ប្រតិបត្តិ​នៃ​ក្រុមហ៊ុន Best Inc បាន​មានប្រសាសន៍ថា “យើង​មានការ​រំភើប​ក្នុងការ​អភិវឌ្ឍ បណ្តាញ​ភ័ស្តុភារ​របស់​យើង​នៅ​អាស៊ីអាគ្នេយ៍ ដែលជា​តំបន់​ផ្តោត​សំខាន់ នៃ​យុទ្ធសាស្ត្រ​សកល​របស់​យើង” ។ លោក​បាន​បន្តថា “ការផ្ទុះ​ឡើង​នៃ​ជំងឺ COVID-១៩ បាន​បង្កើនល្បឿន និង​ការពឹងផ្អែក​របស់​អតិថិជន​ទៅលើ ពាណិជ្ជកម្ម​តាម​ប្រព័ន្ធ​អេ​ឡិច​ត្រូ​និ​ច និង​បង្កើត​ឱកាស​សក្តានុពល​កាន់តែ​ធំ​នៅក្នុង​តំបន់” ។

លោក​បាន​ថ្លែងថា យើង​មាន​ទំនុកចិត្ត​ថា​សេវាកម្ម​ដឹក​ជ​ញ្ចូ​ន ដែល​ផ្តល់​ដោយ​បច្ចេកវិទ្យា​របស់​យើង និង​ជម្រើស​ដឹកជញ្ជូន ដែលមាន​គុណភាព​ខ្ពស់ នឹង​ក្លាយជា​សមាសធាតុ​សេវាកម្ម​ដ៏​សំខាន់​សម្រាប់​ទាំង​ពាណិជ្ជករ និង​អ្នកប្រើប្រាស់​ទាំង ក្នុងអំឡុងពេល​ដ៏​លំបាក​នេះ និង​លើសពីនេះ​ទៀត។

ដោយ​ប្រើ​គំរូ និង​បទពិសោធន៍​ជោគជ័យ​នៅក្នុង​ប្រទេស​ថៃ និង​វៀតណាម ក្រុមហ៊ុន គ្រោង​នឹង​ដំណើរការ​មជ្ឈមណ្ឌល​ត​ចំនួន១២ និង​ស្ថានីយ​សេវាកម្ម​ចំនួន៤០០កន្លែង​នៅ​ទូទាំងប្រទេស​ម៉ាឡេស៊ី កម្ពុជា និង​សឹង្ហ​បុរី​ក្នុង​រយៈពេល៣ឆ្នាំ​ខាងមុខ។ នេះ​រួមបញ្ចូល​ទាំង​មជ្ឈមណ្ឌល ទៅតាម​តម្រូវការ​ពីរ​នៅ​ទីក្រុង​គូ​ឡា​ឡាំ​ពួ និង​រាជធានី​ភ្នំពេញ ដែល​នឹងត្រូវ​បំពាក់​ដោយ​ឧបករណ៍​ស្វ័យប្រវត្តិកម្ម​ទំនើប ដូចជា ស្វ័យប្រវត្តិកម្ម​ល្បឿន​លឿន និង​ប្រព័ន្ធ​ស្កេ​ន​ទម្ងន់។

យោងតាម​ការស្រាវជ្រាវ​រួមគ្នា​របស់ Google, Temasek និង Bain & Company ដោយមាន​អ្នកប្រើប្រាស់​អ៊ី​ន​ធឺ​ណេ​ត តាម​ទូរស័ព្ទ​ចល័ត​មាន​ចំនួន៣៦០លាន​នាក់ វិស័យ​ពាណិជ្ជកម្ម​តាម​ប្រព័ន្ធ​អេឡិចត្រូនិក នៅ​អាស៊ីអាគ្នេយ៍​នឹងមាន​តម្លៃ​ដល់ ១៥០ពាន់​លាន​ដុល្លារ​នៅ​ឆ្នាំ២០២៥ កើនឡើង៣៨ពាន់​លាន​ដុល្លារ​អាមេរិក​ក្នុង​ឆ្នាំ ២០១៩ ។

ដើម្បី​ឆ្លើយតប​នឹង​ការកើនឡើង តម្រូវការ​ពាណិជ្ជកម្ម​តាម​ប្រព័ន្ធ​អេ​ឡិច​ត្រូ​និ​ច និង​ការវិវឌ្ឍ​តំរូវការ​របស់​អតិថិជន ក្រុមហ៊ុន BEST ផ្តល់ជូន​ជម្រើស​នៃ​ការ​ចែកចាយ​នៅ​ថ្ងៃក្រោយ​សំ​ម្រា​ប់​តំបន់សំខាន់ៗនៃ​ប្រទេស​ថៃ និង​ការ​ចែកចាយ​នៅ​ថ្ងៃ​តែមួយ​នៅ​ទីក្រុង​ហូជីមិញ និង​ហាណូយ​ប្រទេស​វៀតណាម។ បរិមាណ​កញ្ចប់​ដឹង​ជ​ញ្ជួ​ន​របស់​ក្រុមហ៊ុន​មកពី​អាស៊ីអាគ្នេយ៍ បាន​កើន​ដល់៨,៨លាន​កញ្ចប់​នៅក្នុង​ត្រីមាស​ទី១ ៕