ដោយ ៖ រ៉ាណេត
ភ្នំពេញ ៖ បន្ទាប់ពីភាគខាងជើង និងខាងត្បូងរាជធានីភ្នំពេញ ដែលត្រូវបានចាក់បញ្ចូលនូវគម្រោងវិនិយោគ និងអភិវឌ្ឍន៍សំណង់លំនៅដ្ឋានយ៉ាងស្អាកស្កះ បច្ចុប្បន្ននេះ បណ្តាអ្នកអភិវឌ្ឍន៍មួយចំនួនចាប់ផ្តើមសម្លឹងទៅកាន់តំបន់ភាគខាងលិចក្រុងវិញម្ដងរួមជាមួយនឹងការដាក់គោលដៅទីផ្សាររបស់ខ្លួនផងដែរ។

ភាគខាងលិចក្រុងភ្នំពេញ រួមមានចាប់ពីតំបន់ភ្នំបាសិតស្ថិតនៅក្នុងខណ្ឌព្រែកព្នៅ តំបន់មួយចំនួនស្ថិតនៅក្នុងស្រុកឧដុង្គ ខេត្តកំពង់ស្ពឺ និងតំបន់មួយចំនួនទៀតស្ថិតនៅក្នុងស្រុលពញាឮ ខេត្តកណ្តាល។
អគ្គនាយកក្រុមហ៊ុន Premium Group លោកម៉ាន់ ច័ន្ទឌី បានមានប្រសាសន៍នៅព្រឹកថ្ងៃទី៧ ខែមករា ឆ្នាំ២០២១នេះថា នៅពេលនេះសម្រាប់សកម្មភាពអភិវឌ្ឍន៍ និងសាងសង់សំណង់លំនៅដ្ឋានកម្រិតមធ្យមនៅភាគខាងជើង និងភាគខាងត្បូងរាជធានីភ្នំពេញ នៅតែមានហើយនឹងបន្តក្នុងរយៈពេលយូរឆ្នាំទៀតរហូតដល់ប្រមាន៣-៥ឆ្នាំទៅមុខទៀត។

លោកបន្តឱ្យដឹងថា “សកម្មភាពសាងសង់ខាងលើនេះ គឺអ្នកអភិវឌ្ឍន៍បានទិញដីទុកអភិវឌ្ឍន៍គម្រោងរបស់ខ្លួនតាំងតែពីបុ៉ន្មានឆ្នាំមុនខណៈដែលតម្លៃដីនៅទាបនៅឡើយ ហើយពេលនេះក៏នៅតែបន្តសាងសង់គម្រោងចាស់ដែលនៅមិនទាន់បានបញ្ចប់តែប៉ុណ្ណោះ”។ លោកថា “ចាប់ពីពេលនេះទៅបើឱ្យអ្នកអភិវឌ្ឍន៍ទិញដីនៅភាគខាងជើង ឬខាងត្បូងបន្ថែមសម្រាប់សាងសង់លំនៅដ្ឋានកម្រិតមធ្យមផ្គត់ផ្គង់ទីផ្សារ ប្រហែលជាមិនមានទៀតនោះទេ ព្រោះតម្លៃដីនៅតំបន់នេះបានឡើងថ្លៃខ្ពស់រួចទៅហើយ ដែលមិនអនុគ្រោះដល់ឱកាសចំណេញពីការវិនិយោគ និងអភិវឌ្ឍទៀតនោះទេ”។

លោកម៉ាន់ ច័ន្ទឌីបានលើកឡើងថា បច្ចុប្បន្នអ្នកអភិវឌ្ឍន៍បាន និងកំពុងសម្លឹងទៅកាន់ភាគខាងលិចរាជធានីភ្នំពេញវិញម្ដង ដោយសារតែនៅតំបន់នោះនៅមានវិសាលភាពផ្ទៃដីទំនេរច្រើន តម្លៃនៅថោក និងមានគម្រោងអភិវឌ្ឍន៍ហេដ្ឋារចនាសម្ព័ន្ធជាច្រើនដែលផ្តួចផ្តើមដោយរដ្ឋាភិបាល។

លោកបានបញ្ជាក់ថា “តម្លៃដីនៅភាគខាងលិចរាជធានីភ្នំពេញនៅទាប ដែលអនុគ្រោះដល់ការវិនិយោគ និងការអភិវឌ្ឍន៍។ មិនថានៅប៉ែកខាងផ្លូវជាតិលេខ៥ ក្នុងស្រុកពញាឮ ខេត្តកណ្តាល នៅតំបន់មួយចំនួនក្នុងស្រុកឧដុង្គ ខេត្តកំពង់ស្ពឺក្បែរផ្លូវជាតិលេខ៥១ ឬតំបន់កណ្តាលក្បែរភ្នំបាសិត និងក្បែរបឹងតាមោកក្នុងខណ្ឌព្រែកព្នៅនោះទេ គឺមានគម្រោងអភិវឌ្ឍន៍ជាច្រើន”។ លោកបន្តថា “តំបន់ទាំងនេះស័ក្ដិសមនឹងការអភិវឌ្ឍវិស័យលំនៅដ្ឋានកម្រិតមធ្យម និងក្រោមមធ្យម ដោយសារតែតម្លៃដីនៅតំបន់ដែលគួរវិនិយោគ និងអភិវឌ្ឍន៍គិតជាមធ្យមស្ថិតនៅក្នុងចន្លោះពី៣០-៤០ដុល្លារក្នុងមួយម៉ែត្រការ៉េ ដែលតម្លៃនេះបានអនុគ្រោះដល់ផលចំណេញសម្រាប់អ្នកអភិវឌ្ឍន៍”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ថា ជាធម្មតានៅពេលដែលនៅតំបន់ក្រុងត្រូវបានបំពេញដោយគម្រោងអភិវឌ្ឍន៍ដែលរួមមានសំណង់តូចធំជាច្រើននោះវានឹងរុញច្រានចេញទៅកាន់តំបន់ដែលស្ថិតនៅក្បែរជាបន្តបន្ទាប់។ ដោយឡែកសម្រាប់ការអភិវឌ្ឍក្នុងវិស័យលំនៅដ្ឋានក៏ដូចជាគ្នា នៅពេលដែលតំបន់មួយត្រូវបានចា់បំពេញកាន់តែច្រើន នោះតម្លៃនឹងកើនឡើងខ្ពស់ដោយស្វ័យប្រវត្តិ ដូច្នេះអ្នកវិនិយោគ ក៏ដូចជាអ្នកអភិវឌ្ឍន៍ត្រូវតែងាកទៅរកតំបន់ណាដែលអាចមានសក្ដានុពលល្អ អាចបំផុសទីផ្សារបាន និងងាយទទួលបានចំណេញត្រឡប់មកវិញ។

លោកបានបញ្ជាក់ថា “នៅតំបន់ភាគខាងលិចក្រុង គឺមានគម្រោងអភិវឌ្ឍន៍សំណង់លំនៅដ្ឋានជាច្រើនដែលនឹងបង្ហាញខ្លួននៅទីនោះ មានទាំងសំណង់បណ្តុំលំនៅដ្ឋាន និងសំណង់បែបបុរីផងដែរ ប៉ុន្តែសម្រាប់តម្លៃភាគច្រើនជាប្រភេទលំនៅដ្ឋានកម្រិតសមរម្យតែប៉ុណ្ណោះ”៕

ដោយ៖ ប៊ី

ភ្នំពេញ៖ កម្ពុជានឹងមានវគ្គបណ្ដុះបណ្ដាលថ្នាក់បរិញ្ញាបត្ររង លើមុខវិជ្ជាអចលនទ្រព្យជាលើកដំបូង ដើម្បីឱ្យមានជំនាញច្បាស់លាស់ ប្រកបដោយក្រមសីលធម៌វិជ្ជាជីវៈនៅឆ្នាំ២០២១នេះ។ នេះបើយោងតាមការលើកឡើងរបស់លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)។

លោកច្រឹក សុខនីមបានថ្លែងកាលពីថ្មីៗនេះ “វគ្គបរិញ្ញាបត្ររង មុខវិជ្ជាអចលនទ្រព្យ នឹងចាប់អនុវត្ដនៅឆ្នាំ២០២១នេះ ដើម្បីបម្រើជូននូវសេវាកម្ម ឱ្យអ្នកដែលមានជំនាញ នៅក្នុងវិស័យអចលនទ្រព្យ កាន់តែច្រើនទៅៗ ដើម្បីមានការប្រកួតប្រជែង”។

លោកបានឱ្យដឹងថា វិស័យអចលនទ្រព្យនៅកម្ពុជា រយៈពេលជាង២០ឆ្នាំនេះ ធ្វើតាមតំណ “ចេះតាមត តំណតាមថា” មិនទាន់កម្រិតស្ដង់ដារមួយ ដែលទទួលស្គាល់ ជាលក្ខណៈជាតិ នៅឡើយនោះទេ។

លោក ច្រឹក សុខនីមបានបន្តទៀតថា កម្ពុជាមិនទាន់មានសាលារៀន អចលនទ្រព្យនៅឡើយទេ បើធៀបនឹងបណ្ដាប្រទេស នៅក្នុងតំបន់អាស៊ាន ហើយពេលនេះ គឺជាចំណុចចាប់ផ្ដើម ទោះបីជាជួបបញ្ហាខ្លះក៏ដោយ ចាំកែតម្រូវនៅពេលក្រោយទៀត។

ជាមួយគ្នានេះលោកបានបញ្ជាក់ថា វិស័យអចលនទ្រព្យ បើយើងមិនមានការអប់រំ ជំនាញច្បាស់លាស់នោះទេ វាអាចប្រឈមហានិភ័យច្រើន ទាំងអ្នកលក់ និងអ្នកទិញ ដូច្នេះយើងគួរតែមានកម្រិតការអប់រំ ប្រកបដោយវិជ្ជាជីវៈ។

លោកច្រឹក សុខនីមបានឲ្យដឹងទៀតថា នៅពេលដែលមានការអប់រំ លើជំនាញអចលនទ្រព្យនេះច្បាស់លាស់ យើងនឹងទទួលបាន អ្នកដែលរកស៊ីលើវិស័យនេះ ប្រកបដោយក្របសីលធម៌វិជ្ជាជីវៈ និងមានការបង់ពន្ធជូនរដ្ឋត្រឹមត្រូវ ដូច្នេះ រដ្ឋក៏មាន រាស្ដ្រក៏មាន៕

ដោយ ៖ រ៉ាណេត
ភ្នំពេញ ៖ ជាការអបអរសាទរនៅក្នុងឱកាសចូលឆ្នាំថ្មី ឆ្នាំសាកល២០២១ ក្រុមហ៊ុនភ្នាក់ងារអចលនទ្រព្យ DNZ Realty បានសហការជាមួយក្រុមហ៊ុនអភិវឌ្ឍន៍ខុនដូ Urban Village រៀបចំពិធីជួបជុំជប់លៀងទទួលទានអាហារ និងភេសជ្ជៈចម្រុះ ជាលក្ខណៈគ្រួសារស្និទ្ធស្នាល ដោយមានការប្រគំតន្ត្រីសម័យ មានកន្លែងក្មេងលេង និងការចាប់ឆ្នោតយករង្វាន់ជាច្រើន។

កម្មវិធីនេះ នឹងប្រព្រឹត្តទៅនៅថ្ងៃទី២៤ ខែមករា ឆ្នាំ២០២១ ចាប់ពីម៉ោង១០ព្រឹក រហូតដល់ម៉ោង៥ល្ងាច ដោយគ្រប់អ្នកដែលត្រូវបានអញ្ជើញចូលរួម ក៏ដូចជាអ្នកចុះឈ្មោះចូលរួមដោយផ្ទាល់ សុទ្ធតែមិនត្រូវបានចំណាយថវិកានោះឡើយ ហើយថែមទាំងមានឱកាសចាប់ឆ្នោតផ្សងសំណាង ទទួលបានរង្វាន់អនុស្សាវរីយ៍ ជាពិសេសអាចទទួលបានការបញ្ចុះតម្លៃ លើការទិញខុនដូប្រណីតរបស់គម្រោង Urban Village ថែមទៀតផង។

នាយកក្រុមហ៊ុនភ្នាក់ងារអចលនទ្រព្យ DNZ Realty លោក រិន ច័ន្ទរិទ្ធិ បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៥ វិច្ឆិកានេះថា កម្មវិធីដ៏អធិកអធអធមនេះ ក្រៅពីមានការជួបជុំ ជជែកពិភាក្សាការងារលើមុខជំនួញផ្សេងៗ ក៏ដូចជាជំនួញនៅក្នុងវិស័យអចលនទ្រព្យ អ្នកចូលរួមទាំងអស់នឹងបានជ្រាប ពីទីផ្សារអចលនទ្រព្យនាពេលបច្ចុប្បន្ន ក៏ដូចជាឱកាសវិនិយោគនៅពេលអនាគតផងដែរ ក្រោមការធ្វើបទបង្ហាញដោយអ្នកជំនាញជាតិ និងអន្តរជាតិដោយផ្ទាល់។

លោកបានបញ្ជាក់ថា “កម្មវិធីរបស់យើងខ្ញុំមានការជួបពិភាក្សា សំណេះសំណាលបង្កើនភាពស្និទ្ធស្នាលជាមួយគ្នា អមដោយការប្រគំតន្ត្រីសម័យ ក្រោមវត្តមានរបស់លោក សុះ ម៉ាច លោក សាន ផាននិត កញ្ញា គង់ វង្សយ៉ាទី ព្រមទាំងតារាចម្រៀងជាច្រើននាក់ទៀត”។ លោកបន្តថា “ក្រៅពីនេះក៏មានការរៀបចំជាកន្លែងក្មេងលេង និងសកម្មភាពកម្សាន្តនានា រួមជាមួយនឹងការបម្រើសេវាម្ហូបអាហារដ៌ឆ្ងាញ់ពិសា ស្រាបៀរស្រស់ៗ និងស្រាក្រហមជាដើម”។

បន្ថែមពីនេះ លោកអ្នកក៏បានស្គាល់ច្បាស់ពីលក្ខណៈពិសេស និងប្រណីតភាពរបស់គម្រោងខុនដូ Urban Village ដែលកំពុងបន្តដំណើរការសាងសង់យ៉ាងសកម្ម ដើម្បីបំពេញតាមតម្រូវការទីផ្សារផងដែរ។ លោកអ្នកគ្រាន់តែបង់ប្រាក់១០% មុនតែប៉ុណ្ណោះ នឹងក្លាយជាម្ចាស់កម្មសិទ្ធិ នៃខុនដូដ៏ប្រណីត ស្ថិតនៅកណ្តាលរាជធានីភ្នំពេញ លើផ្លូវ៦០ម៉ែត្រ ដែលជាមជ្ឈមណ្ឌលពាណិជ្ជកម្ម ហើយកាន់តែពិសេសគឺទទួលបានទូរស័ព្ទស្មាតហ្វូន iphone 12 ចំនួន១គ្រឿងភ្លាមៗ។

សម្រាប់អ្នកមានចំណាប់អារម្មណ៍ ចូលកម្សាន្តនៅក្នុងកម្មវិធីដ៏រីករាយនេះ អាចទាក់ទងបានតាមរយៈទូរស័ព្ទលេខ ៖ 012 570 571 / 010 570 571។

ទីតាំងនៃកម្មវិធី ៖ ទល់មុខវត្តចាក់អង្រែលើ ក្នុងបរិវេណ Factory Phnom Penh ឬទីតាំងគម្រោងអភិវឌ្ឍន៍ខុនដូ Urban Village

ដោយ ៖ រ៉ាណេត

ភ្នំពេញ ៖ បើទោះជាកម្ពុជាបានទទួលរងនូវសំពាធពីវិបត្តិនៃជំងឺសាកលក៏ដោយ ប៉ុន្តែសម្រាប់ក្រុមហ៊ុនអចលនទ្រព្យអន្តរជាតិដ៏ល្បីឈ្មោះមកពីសហរដ្ឋអាមេរិកនៅតែសម្លឹងឃើញពីឱកាសដ៏ល្អសម្រាប់ការវិនិយោគនៅកម្ពុជា ដែលអាចទទួលបានផលប្រយោជន៍ច្រើនជាងបណ្តាប្រទេសមួយចំនួនដែលស្ថិតនៅក្នុងតំបន់។

អគ្គនាយិកាក្រុមហ៊ុនអចលនទ្រព្យអន្តរជាតិ Century21 Cambodia លោកស្រី Grace Rachny Fong បានមានប្រសាសន៍នៅថ្ងៃទី៦ ខែមករា ឆ្នាំ២០២១ថា ទោះជាស្ថិតនៅក្នុងស្ថានភាពនាពេលបច្ចុប្បន្ន ប៉ុន្តែសម្រាប់ទីផ្សារអចលនទ្រព្យកម្ពុជានៅតែបន្តផ្តល់ឱកាសចំណេញសម្រាប់ការបណ្តាក់ទុនវិនិយោគ និងអភិវឌ្ឍច្រើនជាងទីផ្សារអចលនទ្រព្យដែលស្ថិតនៅតាមបណ្តាប្រទេសជិតខាងដែលស្ថិតនៅក្នុងតំបន់។

លោកស្រីបន្តថា “ក្រុមហ៊ុន Century21 Cambodia បានតាំងជំហរនៅក្នុងប្រទេសកម្ពុជាអស់រយៈពេល៧ឆ្នាំមកហើយ បន្ទាប់ពីបានបង្កើតឡើងដោយជោគជ័យកាលពី៥0ឆ្នាំមុននៅក្នុងសហរដ្ឋអាមេរិក និងបានពង្រីកវិសាលភាពរហូតដល់៨៤ប្រទេស ហើយកម្ពុជាគឺជាប្រទេសសមាជិកទី៧៥”។

លោកស្រីបន្តថា “ជាបទពិសោធន៍នៅក្នុងវិស័យអចលនទ្រព្យក្នុងភាពជាក្រុមហ៊ុនជំនាញបានមើលឃើញថា វិស័យអចលនទ្រព្យនៅកម្ពុជាមិនថាពេលនេះ ឬបន្តទៅមុខក្នុងរយៈពេល៧-១០ឆ្នាំ កម្ពុជានៅតែផ្តល់ឱកាសចំណេញក្នុងការវិនិយោគនៅលើទីផ្សារអចលនទ្រព្យដែលកំពុងមានការអភិវឌ្ឍន៍ និងរីកចម្រើន”។

កាលពីអំឡុងឆ្នាំ២០១៣ វិស័យអចលនទ្រព្យនៅកម្ពុជា ជាពិសេសគម្រោងអភិវឌ្ឍសំណង់អគារធំៗដែលមានតម្លៃរាបសិបលានដុល្លារគឺនៅមានកម្រិតនៅឡើយ ប៉ុន្តែចាប់តាំងពីអំឡុងឆ្នាំ២០១៨-២០១៩ សន្ទុះនៃការវិនិយោគ និងអភិវឌ្ឍន៍ទៅលើគម្រោងធំៗមានការកើនឡើងយ៉ាងខ្លាំង និងគួរឱ្យកត់សម្គាល់។ ជាមួយនឹងសន្ទុះនៃភាពរីកចម្រើនទាំងនេះ គ្រួសាររបស់ក្រុមហ៊ុនអចលនទ្រព្យអន្តរជាតិ Century21 Cambodia បានពង្រីកខ្លួនពី១ការិយាល័យ រហូតដល់៨៦ ដោយមានភ្នាក់ងារពី២០០ រហូតដល់៧០០ភ្នាក់ងារពេញសិទ្ធិនៅទូទាំងប្រទេសកម្ពុជា ហើយនឹងបន្តពង្រីក និងបង្កើនឱ្យដល់៣៨០០នាក់ ដើម្បីផ្តល់នូវសេវាកម្មប្រកបដោយគុណភាព សុវត្ថិភាព និងផលចំណេញជូនដល់អតិថិជនរបស់ខ្លួន។

លោកស្រី Grace Rachny Fong បានមានប្រសាសន៍បញ្ជាក់ឱ្យដឹងថា សម្រាប់ឱកាសចំណេញពីការវិនិយោគគឺនៅតែមានឱកាសច្រើនចាប់ពីថ្ងៃនេះទៅថ្ងៃអនាគត។ ជាក់ស្ដែងដូចជាតម្លៃដីនៅតំបន់ទួលគោកដែលស្ថិតនៅក្នុងចន្លោះ៣២០០-៣៥០០ដុល្លារក្នុងមួយការ៉េខណៈដែលកាលពីអំឡុងឆ្នាំ២០១៦-២០១៧ មានតម្លៃត្រឹម២០០០ដុល្លារតែប៉ុណ្ណោះ ហើយនៅក្នុងរយៈពេលប្រមាណជា៥ឆ្នាំខាងមុខវានឹងអាចវិវឌ្ឍឈានទៅរកតម្លៃប្រហាក់ប្រហែលនឹងដីនៅតំបន់បឹងកេង១នាពេលបច្ចុប្បន្ន ដែលស្ថិតក្នុងចន្លោះពី៦៥០០-៧០០០ដុល្លារក្នុងមួយម៉ែត្រការ៉េ។ ដូច្នេះសម្រាប់អ្នកដែលវិនិយោគនៅពេលបច្ចុប្បន្ន និងរំពឹងសម្រាប់ថ្ងៃអនាគតនៅតែមានឱកាសទទួលបានចំណេញខ្ពស់នៅឡើយ៕