អ្នកជំនាញអន្តរជាតិ៖ ការព្យាករណ៍ពីសេដ្ឋកិច្ចកម្ពុជាពីស្ថាប័នអន្តរជាតិនឹងបង្កើនទំនុកដល់ការវិនិយោគអចលនទ្រព្យ

ដោយៈ ម៉ាណេត

ភ្នំពេញៈ អ្នកជំនាញអន្តរជាតិបានលើកឡើងថា ការព្យាករណ៍ពីកំណើនសេដ្ឋកិច្ចនៅកម្ពុជាសម្រាប់ឆ្នាំ២០២១ នឹងផ្តល់ទំនុកចិត្ត និងទាក់ទាញវិនិយោគិនកាន់ច្រើនមកបោះទុនវិនិយោគនៅកម្ពុជា។

ធនាគារពិភពលោកបានព្យាករថា សេដ្ឋកិច្ចកម្ពុជានឹងងើបឡើងវិញប្រហែលជិត៤ភាគរយ ក្នុងឆ្នាំ២០២១ ខណៈធនាគារជាតិនៃកម្ពុជាក៏បានព្យាករដែរថា ក្នុងបរិការណ៍ ដែលថ្នាំបង្ការមានប្រសិទ្ធភាព អាចទប់ស្កាត់ការរីករាលដាលនៃជំងឺកូវីដ១៩ បានក្នុងឆមាសទី១ ឆ្នាំ២០២១ នោះសេដ្ឋកិច្ចកម្ពុជារំពឹងថានឹងអាចងើបឡើងវិញក្នុងរង្វង់៤% ។

លោក James Hodge នាយកជាន់ខ្ពស់ក្រុមហ៊ុន CBRE Cambodia បានថ្លែងប្រាប់នៅថ្ងៃទី៧ ខែមករា ឆ្នាំ២០២០ ថា ការព្យាករណ៍កំណើនសេដ្ឋកិច្ច សម្រាប់ប្រទេសកម្ពុជាគឺជាដំណឹងល្អ ដែលនឹងបង្កើនទំនុកចិត្តរបស់វិនិយោគិន និងអ្នកអភិវឌ្ឍន៍។

លោកបានថ្លែងថា “ការព្យាករណ៍ទាំងនេះបានបង្ហាញថា អាជីវកម្ម និងអ្នកវិនិយោគនឹងធ្វើបានល្អប្រសើរ ជាងការរំពឹងទុកនៅឆ្នាំនេះ ហើយដូច្នេះទឹកប្រាក់ច្រើន ដែលពួកគេបានវិនិយោគ នឹងទទួលបានផ្លែផ្កា” ។

លោកបានបន្តទៀតថា ជាក់ស្តែងការព្យាករណ៍នេះ មានផលប្រយោជន៍ដល់សកម្មភាពអចលនទ្រព្យពីមួយថ្ងៃទៅមួយថ្ងៃទេ ហើយការរីកចម្រើននៃវិស័យសេដ្ឋកិច្ចនៅកម្ពុជានឹងជំរុញឱ្យមាននិន្នាការវិជ្ជមាន ដល់ទីផ្សារអចលនទ្រព្យ បើប្រៀបធៀបឆ្នាំ២០២០ ។

លោកបានឱ្យដឹងថា “សម្រាប់វិនិយោគិនធំៗ ការព្យាករណ៍ពីកំណើនសេដ្ឋកិច្ចកម្ពុជា នឹងផ្តល់ឱ្យពួកគេនូវសញ្ញាដ៏រឹងមាំ នៃកម្លាំងមូលដ្ឋាននៃសេដ្ឋកិច្ច និងអាចជះឥទ្ធិពលជាវិជ្ជមានដល់ការសម្រេចចិត្តរបស់ពួកគេ នៅក្នុងការវិនិយោគនៅប្រទេសកម្ពុជា” ៕

កម្ពុជាកំពុងពង្រីកការតភ្ជាប់ផ្កូវអាកាសដើម្បីប្រកួតប្រជែងក្នុងតំបន់ និងជម្រុញកំនើនសេដ្ឋកិច្ច

ដោយៈវឌ្ឈនា

ភ្នំពេញៈ រដ្ឋាភិបាលកម្ពុជាបាន នឹងកំពុងធ្វើពិពិធកម្មព្រលានយន្តហោះ នៅក្នុងប្រទេសដោយមានទាំងពង្រីកផ្លូវរត់ និងសាងសង់ព្រលានយន្តហោះខ្នាតអន្តរជាតិថ្មី ក្នុងទុនវិនិយោគរាប់ពាន់លានដុល្លារអាមេរិក ដើម្បីឆ្លើយតបទៅនឹងការដឹកជញ្ជូន តាមផ្លូវការអាកាស និងប្រកួតប្រជែងនៅក្នុងតំបន់ ព្រមទាំងលំហូវិនិយោគមកពីបណ្តាប្រទេសនានាលើសកលលោក។

លោក ហូ វណ្ឌី អគ្គលេខាធិការសម្ព័ន្ធទេសចរណ៏ជាតិកម្ពុជា បានប្រាប់គេហទំព័រ Propertyarea.asia កាលពីពេលថ្មីៗនេះថា ការធ្វើពិពិធកម្មព្រលានយន្តរបស់កម្ពុជា នាពេលបច្ចុប្បន្ននេះ គឺឆ្លើយតបទៅនឹងការដឹកជញ្ជូន តាមផ្លូវអាកាសនាពេលខាងមុខ និងសម្រាប់ធ្វើការប្រកួតប្រជែង ការដឹកជញ្ជូនតាមផ្លូវអាកាសនៅក្នុងតំបន់ និងនៅលើពិភពលោក។

លោកបន្តថា “វាជាចំណុចល្អខ្លាំងមែនទែន សម្រាប់ប្រទេសកម្ពុជា ព្រោះថាការដឹកជញ្ជូនតាមផ្លូវអាកាសនេះ គឺមានសារៈសំខាន់ណាស់ នៅក្នុងទសវត្សរ៍នេះ ពីព្រោះយើងដឹងហើយថា ការរីកចំរើននៅក្នុងប្រទេសនាមួយៗ វាមានការេប្រកួតប្រជែងគ្នាខ្លាំងណាស់” ។ លោកបន្ថែមថា “ការដឹកជញ្ជូនតាមផ្លូវការននេះ បាននឹងកំពុងមានការប្រកួតប្រជែងខ្ពស់ និងមានសក្តានុពលខ្លាំង ដោយមិនមែនប្រកួតប្រជែងឆ្នាំនោះទេ តែគេប្រកួតប្រជែងជាមួយនឹងពេលវេលា គេគិតខែ មកអាទិត្យ និងថ្ងៃ ហើយកន្លែងខ្លះគេគិតម៉ោងថែមទៀត” ។

លោក ស្រី ឆាយ ស៊ីវលីន ប្រធានសមាគមទេសចរណ៍កម្ពុជា បានឱ្យដឹងដែរថា ការដែលរាជរដ្ឋាភិបាលបានដាក់ទុនវិនិយោគ រាប់ពាន់លានដុល្លារអាមេរិក លើការពង្រីក និងការសាងសង់ព្រលានយន្តហោះថ្មី នៅក្នុងប្រទេសនេះ មិនមែនជាគម្រោងដែលត្រូវបានធ្វើឡើងនៅថ្ងៃនេះនោះទេ ពោលគឺរាជរដ្ឋាភិបាលមានផែនការអភិវឌ្ឍតាំងពីយូរាប់ឆ្នាំណាស់មកហើយ។

លោកស្រីបន្តថា “ការធ្វើពិធកម្មព្រលានយន្តហោះនេះ គឺការឆ្លើយតបទៅនឹង ទំហំនៃការវិនិយោគ និងទេសចរណ៍ហូរចូលមកកម្ពុជាកាន់តែច្រើនឡើង ពីមួយឆ្នាំកាលពីកន្លងមកនេះ។លោកស្រីបន្ថែមថា “នេះក៏ជាល្អសម្រាប់វិស័យដឹកជញ្ជូន តាមផ្លូវអាកាសរបស់កម្ពុជា ដែលមានសមត្ថភាពអាចទទួលចុះចតនូវយន្តហោះធំៗ និងទទួលជើងហោះហើរបានកាន់តែច្រើនថែមទៀត ខណៈដែលកម្ពុជានៅខ្វះខាតជើងហោះហើរត្រង់” ។

លោកស្រីបន្តថា យើងឃើញមានការហោះហើរច្រើនមែន តែអត់មានជើងហោះហើរត្រង់ពីប្រទេសឆ្ងាយៗនោះទេ ហើយនៅពេលយើងមានព្រលានយន្តហោះខ្នាតអន្តរជាតិនេះ កម្ពុជានឹងទទួលបានជើងហោះហើរត្រង់កាន់តែច្រើន ។ កន្លងមកនេះ យើងមិនទាន់ទទួលបានជើងហោះហើរត្រង់ពីអាមេរិក អឺរ៉ុបនោះទេ ដោយយើងពឹងពាក់ទៅលើប្រទេសជិតខាង។

ជាមួយគ្នានេះ លោកស៊ិនចាន់ សេរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការអាកាសចរណ៍ស៊ីវិល កាលពីកន្លងមកនេះបានឱ្យដឹងថា រដ្ឋាភិបាលបានបោះទុនជាង៣០០០លានដុល្លារអាមេរិក ក្នុងការពង្រីកនិងស្តារឡើងវិញ នូវព្រលានយន្តហោះទាំង៣របស់កម្ពុជា ដើម្បីជំរុញឱ្យវិស័យអាកាសចរណ៍កម្ពុជា កាន់តែការតែទំនើប និងអាចឱ្យយន្តហោធុនធំអាចចុះចតបាន។

លោកបន្ថែមថា “ទំហំទុននៃការវិយោគចំណាយលើព្រលានយន្ត នៅភ្នំពេញ សៀមរាប និងខេត្តព្រះសីហនុ រួមទាំងគម្រោងព្រលានយន្តហោះថ្មីៗផ្សេងទៀត អញ្ចឹងយើងគ្រោងចំណាយជាង៣០០០លានដុល្លារអាមេរិក” ។

រាជរដ្ឋាភិបាលបាន និងកំពុងតែដំណើរការអភិវឌ្ឍ ហេដ្ឋារចនាសម្ព័ន្ឋអាកាសយានដ្ឋានជាតិ-អន្តរជាតិចំនួន៣ គឺអាកាសយានដ្ឋានអន្តរជាតិភ្នំពេញថ្មី អាកាសយានដ្ឋានអន្តរជាតិសៀមរាប បញ្ចប់ការពង្រីកអាកាសយានដ្ឋានអន្តរជាតិខេត្តព្រះសីហនុ និងអាកាសយានដ្ឋានអន្តរជាតិតារាសាគរ ខេត្តកោះកុង។

ក្រៅពីអាកាសយានដ្ឋានអន្តរជាតិ កម្ពុជាក៏គ្រោងឱ្យមានអកាសយានដ្ឋានក្នុងស្រុកមួយចំនួនទៀតដូចជា អាកាសយានដ្ឋានខេត្តមណ្ឌលគិរី អាកាសយានដ្ឋានបាត់ដំបង អាកាសយានដ្ឋានស្ទឹងត្រែង អាកាសយានដ្ឋានកោះកុង និងអាកាសយានដ្ឋានប៉ោយប៉ែតជាដើមនាពេលអានាគតផងដែរ៕

រដ្ឋាភិបាលកម្ពុជាកំណត់ឆ្នាំ២០៣០ នឹងដាក់ដំណើរការថាមពលកើតឡើងវិញឱ្យបាន ២៥ភាគរយ

ដោយៈ រ៉ាណេត

ភ្នំពេញៈ រដ្ឋាភិបាលកម្ពុជា បានកំណត់ដាក់បញ្ចូលគោលដៅអនុវត្តន៍ថ្មី នៃការផលិតអគ្គិសនី ដើរដោយថាមពលកកើតឡើងវិញ ឲ្យបានប្រមាណ២៥ភាគរយនៅក្នុងល្បាយថាមពលនៅត្រឹមឆ្នាំ២០៣០ ដើម្បីផ្គត់ផ្គង់តម្រូវការប្រើប្រាស់ជាក់ស្ដែង និងរួមចំណែកក្នុងការដោះស្រាយ នូវបម្រែបម្រួលអាកាសធាតុ ដែលជាកង្វល់របស់ពិភពលោកនាពេលបច្ចុប្បន្ន។

សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍កាលពីពេលកន្លងទៅថ្មីៗនេះថា គោលដៅថ្មីនេះ ក៏រួមបញ្ចូលការផលិតអគ្គិសនី ពីថាមពលកកើតឡើងវិញចំនួន២៥ភាគរយ នៅក្នុងល្បាយថាមពល (Energy Mix) នៅឆ្នាំ២០៣០ ។ ទន្ទឹមនេះដែរ ការប្រែប្រួលអាកាសធាតុជាបាតុភូតប្រទាក់ក្រឡាគ្នា ដែលត្រូវដោះស្រាយតាមមធ្យោបាយ ជាកញ្ចប់គ្រប់ជ្រុងជ្រោយទាំងលើទិដ្ឋភាពសង្គម សេដ្ឋកិច្ច និងបរិស្ថាន។

នៅក្នុងរបាយការណ៍បច្ចុប្បន្នភាពស្តីពី ការចូលរួមចំណែករបស់ជាតិ ដើម្បីដោះស្រាយការប្រែប្រួលអាកាសធាតុ ដែលកម្ពុជាត្រៀមដាក់ជូនទៅលេខាធិការដ្ឋានអនុសញ្ញាសហប្រជាជាតិស្តីពី ការប្រែប្រួលអាកាសធាតុ (UNFCCC) នាដំណាច់ឆ្នាំនេះ កម្ពុជា បានបញ្ចូលនូវគោលដៅថ្មីច្បាស់លាស់ ពាក់ព័ន្ធនឹងការកាត់បន្ថយ ការបញ្ចេញឧស្ម័ន ប្រមាណ៣៨,៩លានតោនសមមូលឧស្ម័នកាបូនិក រួមបញ្ចូលទាំងក្នុងវិស័យព្រៃឈើ វិស័យ សំណល់ និងកសិកម្មឬស្មើនឹង១៨ភាគរយ ធៀបនឹងសេណារីយ៉ូតាមទម្លាប់ធម្មតា (Business As Usual) នៅត្រឹមឆ្នាំ២០៣០ ។

ស្ថិតនៅក្នុងគោលដៅខាងលើនេះ បច្ចុប្បន្នសម្រាប់វិស័យថាមពល កម្ពុជាបានគាំទ្រ និងអនុម័តលើគម្រោងស្នើសុំវិនិយោគ បង្កើតស្ថានីយផលិតអគ្គិសនីដើរដោយថាមពលពន្លឺព្រះអាទិត្យជាច្រើនគម្រោងជាបន្តបន្ទាប់ ស្ថិតនៅតាមបណ្តាខេត្តក្រុងមួយចំនួនដូចជាខេត្តព្រះសីហនុ កំពង់ស្ពឺ ពោធិ៍សាត់ កំពង់ឆ្នាំង កណ្តាល បន្ទាយមានជ័យ និងខេត្តឧត្តមានជ័យជាដើម។

ការអភិវឌ្ឍន៍ថាមពលកកើតឡើងវិញ គឺជាគោលនយោបាយមួយរបស់រាជរដ្ឋាភិបាលកម្ពុជា ក្នុងនោះការផ្តោតជាសំខាន់ ទៅលើការអភិវឌ្ឍន៍ថាមពលពន្លឺព្រះអាទិត្យ ស្ថិតក្នុងអាទិភាពមួយ។ បណ្តាញផ្គត់ផ្គង់នៅកម្ពុជា ដែលរួមមាន២៥ខេត្តក្រុង ក្នុងនោះ១៥ខេត្ត ក្រុងបានតភ្ជាប់ជាមួយនឹងបណ្តាញបញ្ជូនជាតិ ហើយគោលដៅរបស់កម្ពុជាកាលពីឆ្នាំ២០២០ កម្ពុជារំពឹងថាសម្រេចឲ្យបាននូវ ការផ្តល់អគ្គិសនីឲ្យបានទាំង២៥ខេត្ត ក្រុង ដោយថាមពលអគ្គិសនីក្នុងប្រភេទតុងស្យង់ខ្ពស់។

រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានមានប្រសាសន៍កាលពីពេលថ្មីៗនេះថា ប្រទេសកម្ពុជាបានធ្វើបច្ចុប្បន្នភាព ផែនការថាមពលរបស់ខ្លួន សម្រាប់ឆ្នាំ២០២០ ដល់ឆ្នាំ២០៣០ បន្ថែមពីលើគម្រោងវិនិយោគលើវិស័យថាមពល ពីវិស័យឯកជន រដ្ឋាភិបាលក៏បានគ្រោងប្រើឧស្ម័នធម្មជាតិ(Natural Gas) សម្រាប់ការផលិតថាមពលអគ្គិសនី ក្នុងចំណែកមួយដ៏ធំ ដែលមានអនុភាពសរុប៣៦០០មេហ្គាវ៉ាត ដោយអាចនឹងផ្តើមអនុវត្តចាប់ពីឆ្នាំ២០២៧ រហូតដល់ឆ្នាំ២០៣០ ។

លោកបន្តថា “សេដ្ឋកិច្ចរបស់ប្រទេសកម្ពុជា ត្រូវបានរំពឹងថា នឹងងើបឡើងវិញនៅឆ្នាំ២០២១ បន្ទាប់ពីថយចុះនៃការរីករាលដាលជាសកលនៃជម្ងឺកូវីដ១៩” ។ លោកបន្តថា “ដូច្នេះតម្រូវការថាមពលរបស់ប្រទេសកម្ពុជារំពឹងថា នឹងមានសន្ទុះឡើងវិញ ក្នុងនេះឧស្ម័នធម្មជាតិ នឹងដើរតួនាទីយ៉ាងសំខាន់ សម្រាប់ល្បាយប្រភពថាមពលនៅកម្ពុជា ពិសេសក្នុងវិស័យឧស្សាហកម្ម ដឹកជញ្ជូន ពាណិជ្ជកម្ម និងលំនៅដ្ឋាន” ៕

Facebook និង Twitter ផ្អាកគណនីលោកដូណាល់ ត្រាំ បន្ទាប់ពីមានអំពើហឹង្សានៅអគារកាប់ពីតូល សហរដ្ឋអាមេរិក

ដោយ៖ លក្ខិណា

អន្តរជាតិ៖ ក្រុមហ៊ុន Facebook និង Twitter បានផ្អាកគណនីរបស់ប្រធានាធិបតី លោកដូ ណាល់ត្រាំ ជាបណ្តោះអាសន្នដោយសារលោកប្រើប្រាស់ក្រុមហ៊ុនបច្ចេកវិទ្យាយក្សបានធ្វើឱ្យច្របូកច្របល់ក្នុងការទប់ស្កាត់ការទាមទារដោយគ្មានមូលដ្ឋានរបស់លោកអំពីការបោះឆ្នោតប្រធានាធិបតីសហរដ្ឋអាមេរិក ចំពេលមានកុបកម្មនៅក្នុងរដ្ឋធានី។

តាមការចុះផ្សាយរបស់សារព័ត៌មានជាច្រើនថា លោកដូណាល់ ត្រាំបាននិយាយទៅកាន់បាតុករថា “ខ្ញុំស្រលាញ់អ្នក មុននឹងលោកជំរុញឱ្យក្រុមបាតុករទាំងនោះត្រឡប់ទៅផ្ទះវិញ ដែលជាការជំរុញឱ្យបាតុករកាន់មានភាពក្លាហានក្នុងការទាមទារអ្វី ដែលពួកគេចង់បាន”។

ដើម្បីទប់ស្កាត់នូវការផ្ញើសាររបស់លោកដូណាល់ ត្រាំ ទៅកាន់ក្រុមបាតុករ ដែលគាំទ្រលោកនោះ ក្រុមហ៊ុន Twitter បានបិទគណនីរបស់លោកត្រាំ ក្នុងរយៈពេល១២ម៉ោង ។ មិនតែប៉ុណ្ណោះ ក្រុមហ៊ុន Facebook និង YouTube ដែលជាកម្មសិទ្ធិរបស់ក្រុមហ៊ុន Alphabet’s Google ក៏បានដកវីដេអូមួយ ដែលលោក Trump បានបន្តចោទប្រកាន់ការបោះឆ្នោតប្រធានាធិបតីថា ជាការក្លែងបន្លំ ទោះបីជាលោកបានជំរុញឱ្យក្រុមបាតុករត្រឡប់ទៅផ្ទះវិញក៏ដោយ។

ដំបូងឡើយ ទាំងក្រុមហ៊ុន Facebook និង Twitter បានបន្ថែមវិធានការដើម្បីបន្ថយការចែករំលែកវីដេអូ។ បុគ្គលិកក្រុមហ៊ុន Facebook ជាច្រើននាក់បានអំពាវនាវឱ្យនាយកប្រតិបត្តិបញ្ជាក់ច្បាស់ពីរបៀបដែលពួកគេកំពុងដោះស្រាយការបង្ហោះរបស់លោក Trump ដោយអ្នកខ្លះបានអំពាវនាវឱ្យគណនីរបស់លោកត្រូវបានដកចេញ ពីបទញុះញង់ឱ្យមានអំពើហឹង្សានៅអគារកាពីតូល ។

នៅមុនមានការតវ៉ាកើតឡើងយ៉ាងក្ដៅគគុកនេះ លោកត្រាំ បាននិយាយទៅកាន់អ្នកគាំទ្ររបស់លោកថា ការបោះឆ្នោតសហរដ្ឋកាលពីពេលថ្មីៗនេះគឺមានការលួចបន្លំ ។មិនយូរប៉ុន្មានអំពើហឹង្សាក៏បានកើនឡើង នៅក្រៅអគារកាពីតូល និងឈានកាន់តែខ្លាំងឡើងៗ ៕

ធនាគារកណ្តាលថៃព្រមាន ៖ ការផ្ទុះវីរុសកូវីដ-១៩ រលកថ្មីអាចធ្វើឱ្យប៉ះពាល់ដល់កំណើនសេដ្ឋកិច្ចថៃ

ដោយ ៖ សុខុម

បាងកក: ធនាគារកណ្ដាលថៃ (Bank of Thailand) បានព្រមានថា ចក្ខុវិស័យកំណើនសេដ្ឋកិច្ចរបស់ប្រទេសថៃ អាចនឹងរងផលប៉ះពាល់ខ្លាំង ដោយសារការកើនឡើងយ៉ាងគំហុកនូវករណីឆ្លងកូវីដ-១៩។ នេះបើយោងតាមសារព័ត៌មាន CNA ចុះផ្សាយក្នុងថ្ងៃដដែល។

ធនាគារកណ្តាលថៃ បានមើលឃើញថា រដ្ឋាភិបាលថៃ ចាំបាច់ត្រូវចាត់វិធានការឱ្យបានត្រឹមត្រូវ ប្រកបដោយប្រសិទ្ធភាពខ្ពស់បំផុត ព្រោះស្ថានការណ៍ឆ្លងវីរុសកូវីដ-១៩ រលកថ្មីនេះមានភាពមិនប្រាកដប្រជាខ្ពស់។

នៅក្នុងកំណត់ហេតុដដែល ធនាគារកណ្តាលថៃបានព្រមានថា “ការព្យាករអំពីកំណើនសេដ្ឋកិច្ចរបស់ប្រទេសថៃ នឹងទទួលរងផលប៉ះពាល់ខ្លាំង ដោយសារករណីឆ្លងវីរុសកូវីដ-១៩ កើនឡើងយ៉ាងគំហុក។ ដូចនេះ គណៈកម្មាធិការគោលនយោបាយរូបិយវត្ថុថៃ បានមើលឃើញថា ចាំបាច់ត្រូវតាមសង្កេតដានស្ថានការណ៍វិវឌ្ឍន៍ឱ្យស្អិត ហើយវាយតម្លៃថា រដ្ឋាភិបាលចាត់វិធានការគ្រប់គ្រាន់ដែរឬទេ”។

ក្នុងកិច្ចប្រជុំកាលពីខែធ្នូ ចុងឆ្នាំ២០២០ ធនាគារកណ្ដាលថៃ បានបន្ទាបការព្យាករអំពីកំណើនផលិតផលក្នុងស្រុកសរុប (GDP)របស់ថៃ សម្រាប់ឆ្នាំ២០២១ ពី ៣,៦% មកនៅត្រឹម៣,២% ខណៈព្យាករថា សេដ្ឋកិច្ចក្នុងឆ្នាំ២០២០ ធ្លាក់ចុះ ៦,៦%។

បន្ទាប់ពីគ្រប់គ្រងការឆ្លងរាលដាលវីរុសកូវីដ-១៩ ចូលក្នុងសហគមន៍បានភាគច្រើនរយៈពេលជាច្រើនខែមក ស្រាប់តែផ្ទុះការឆ្លងរលកថ្មីក្នុងខែធ្នូ ចុងឆ្នាំ២០២០ ទាក់ទិននឹងពលករចំណាកស្រុក និងបនល្បែងមួយកន្លែង ដែលបានបណ្ដាលឱ្យផ្ទុះការឆ្លងរលកថ្មីនៅក្នុងបណ្ដាខេត្តជាងពាក់កណ្ដាលរបស់ប្រទេសថៃ។

វិធានការរឹតបន្តឹងថ្មីៗដែលត្រូវបានដាក់ចេញ ដើម្បីទប់ការឆ្លងរាតត្បាតដ៏ធ្ងន់ធ្ងរបំផុតនេះ ទំនងជាប៉ះពាល់ដល់ការងើបឡើងនៃសេដ្ឋកិច្ច ដោយអ្នកវិភាគមួយចំនួនបានបន្ទាបការព្យាករណ៍អំពីកំណើនសេដ្ឋកិច្ចថៃ សម្រាប់ឆ្នាំ២០២១ នេះមកនៅត្រឹមក្រោម៣%។

ទន្ទឹមនេះ គណៈកម្មាធិការគោលនយោបាយរូបិយវត្ថុថៃ ក៏បានសម្ដែងការព្រួយបារម្ភដែរថា ការឡើងថ្លៃយ៉ាងឆាប់រហ័សនូវរូបិយប័ណ្ណថៃ ក៏អាចធ្វើឱ្យប៉ះពាល់ដល់សេដ្ឋកិច្ចផុយស្រួយមួយនេះផងដែរ៕

កែទម្រង់ទៀតហើយ ! Facebook បានដកបេតុង Like ចេញពី Facebook Page របស់ខ្លួន

ដោយ ៖ រ៉ាណេត

បរទេស ៖ ក្រុមហ៊ុន Facebook Inc បានធ្វើកំណែទម្រង់ថ្មីនៃរូបរាងរបស់ Facebook Page ដោយក្នុងនោះ Facebook បានដក «ប៊ូតុង Like» ចេញពី Facebook Page និងបានជំនួសមកវិញនូវប៊ូតុង Followers។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០៧ ខែមករា ឆ្នាំ២០២១។

តាមការចេញផ្សាយរបស់ Reuters បានឱ្យដឹងថា «ប៊ូតុង Like» ត្រូវបានដកចេញពី Facebook Page ជាប្រភេទ Artists, Public Figures និង Brands ដោយដាក់ជំនួសមកវិញនូវប៊ូតុង Followers ដើម្បីងាយស្រួលដល់ Fan ក្នុងការចូលរួម ឬភ្ជាប់នូវការ សន្ទនា ជាមួយនឹងម្ចាស់ Page។

ក្រុមហ៊ុន Facebook បានដាក់ឱ្យប្រើប្រាស់ «ប៊ូតុង Like» កាលពីឆ្នាំ២០០៩ ដោយក្នុងនោះ គឺប្រើបានទាំង Like
រាល់ការផុស និង Like Page ហើយនៅពេលនេះការដក «ប៊ូតុង Like» គឺដកចេញតែពី Facebook Page ប៉ុណ្ណោះ៕

រដ្ឋាភិបាលកំពុងត្រៀមក្រុមការងារសម្រាប់រៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកដំបូង

ដោយ ៖ លក្ខិណា

ភ្នំពេញៈ ដើម្បីត្រៀមស្វាគមន៍វិនិយោគិន និងធុរជនមកពីបណ្ដាប្រទេសអាស៊ី និងអឺរ៉ុប ចូលរួមក្នុងវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ កម្ពុជាបានត្រៀមក្រុមការងារបច្ចេកទេសចំនួន៤ក្រុម។

លោកជំទាវតឹក រ៉េតកំរងរដ្ឋលេខាធិការក្រសួងពាណិជ្ជកម្មបានមានប្រសាសន៍ថាក្រសួងពាណិជ្ជកម្ម បានបង្កើតគណៈកម្មការសម្រាប់រៀបចំ “វេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១” ដែលក្នុងនោះមានក្រុមការងារបច្ចេកទេសបួន(៤)រួមមាន ទី១ ក្រុមលេខាធិការដ្ឋាន ទី២ ក្រុមការងារឯកសារ និងផ្សព្វផ្សាយព័ត៌មាន ទី៣ ក្រុមការងារពិធីការ រៀបចំកន្លែងប្រជុំ ដឹកជញ្ជូន សិល្បៈ និងសន្តិសុខ និង៤ ក្រុមការងារផ្គត់ផ្គង់ និងហិរញ្ញវត្ថុ ។

រហូតមកដល់ពេលនេះ ក្រុមការងារនីមួយៗបានរាយការណ៍ និងពិភាក្សាអំពីវឌ្ឍនភាពការងារតាមក្រុមការងារនីមួយៗ ដែលបានរៀបចំកន្លងមក ដូចជា (១)រៀបចំ Check-List បែងចែកភារកិច្ចក្នុងក្រុមការងារនីមួយៗ(២)កែសម្រួលកម្មវិធីដោយបញ្ជាក់ពីសមាសភាពវាគ្មិន និងអ្នកសម្របសម្រួលកម្មវិធី និងរៀបចំទីតាំងសម្រាប់វេទិកា (៣)រៀបចំCheck-List កំណត់អ្នកចូលរួមវេទិកាសម្រាប់ពិធីការ និងបដិសណ្ឋារកិច្ចទទួលភ្ញៀវ (៤)រៀបចំខ្ទង់ចំណាយ និង(៥)ការងារពាក់ព័ន្ធមួយចំនួនទៀត ដើម្បីត្រៀមលក្ខណៈរៀបចំ “វេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១” ដែលគ្រោងប្រពឹ្រត្តទៅនៅថ្ងៃទី៣១ ខែឧសភា ឆ្នាំ២០២១ ទទួលជោគជ័យទទួលលទ្ធផលល្អប្រសើរ និងផ្តល់កិត្យានុភាពដល់ប្រទេសជាតិ។

លោកជំទាបានបញ្ជាក់ថា វេទិកា សេដ្ឋកិច្ចនិងធុរកិច្ចអាស៊ី អឺរ៉ុប នៅកម្ពុជានឹងអាចទាក់ទាញវិនិយោគ និងធុរជនមកពីប្រទេសអាស៊ី និងអឺរ៉ុបមកកាន់ប្រទេសកម្ពុជា ហើយក៏ជាឱកាស ក្នុងការបង្កើតការវិនិយោគមុខជំនួញ ជាមួយនៅក្នុងប្រទេសកម្ពុជា ក្នុងពេលរដ្ឋាភិបាល ក៏បានប្រកាសស្វាគមន៍បណ្ដាវិនិយោគិន មកពីគ្រប់ទិសទីដែលចង់វិនិយោគនៅក្នុងប្រទេសទៅលើវិស័យអាទិភាពជាច្រើន៕

តើការវិនិយោគអចលនវត្ថុរំពឹងថ្ងៃអនាគត មានកម្រិតជោគជ័យ និងទទួលបានចំណេញខ្ពស់បែបណា?

ដោយៈ រ៉ាណេត

ភ្នំពេញៈ សម្រាប់តែទីផ្សារ និងការវិនិយោគនៅក្នុងវិស័យអចលនទ្រព្យកម្ពុជាត្រូវបានគេមើលឃើញថា មានការបែងចែកជាច្រើនប្រភេទ ហើយក្នុងនោះក៏មានការវិនិយោគក្នុងរយៈពេលខ្លី និងការវិនិយោគរយៈវែង ជាមួយនឹងក្ដីរំពឹងទទួលបានប្រាក់ចំណេញត្រឡប់មកវិញ។

ការធ្វើវិនិយោគនៅក្នុងវិស័យអចលនទ្រព្យត្រូវបានធ្វើឡើងច្រើនរូបភាព ដូចជាការទិញអចលវត្ថុ(ដី)សម្រាប់គម្រោងអភិវឌ្ឍន៍ ការទិញអចលនទុកវិនិយោគបន្តយកចំណេញក្នុងរយៈពេលខ្លី និងការទិញទុកវិនិយោគ ក្នុងរយៈពេលយូរជាមួយនឹងក្ដីរំពឹងថានឹងអាចទទួលបានផលចំណេញត្រឡប់មកវិញយ៉ាងប្រាកដ។

នាយិកាក្រុមហ៊ុនភ្នាក់ងារអចលនទ្រព្យអន្តរជាតិ Century21 Cambodia លោកស្រីGrace Rachny Fong បានមានប្រសាសន៍ប្រាប់នៅរសៀលថ្ងៃទី៧ ខែមករា ឆ្នាំ២០២១នេះថា គ្រប់ការវិនិយោគទាំងអស់ នៅក្នុងវិស័យអចលនទ្រព្យកម្ពុជា គឺសុទ្ធតែស្ថិតនៅក្នុងគោលបំណងចម្បងតែមួយគត់ គឺការទទួលបានផលចំណេញត្រឡប់មកវិញ។

លោកស្រីបន្តឱ្យដឹងថា ការវិនិយោគត្រូវបានគេធ្វើឡើងជាច្រើន បែបច្រើនទម្រង់។ មានអ្នកខ្លះទិញចូល ហើយលក់ចេញវិញ ក្នុងរយៈពេលខ្លីទោះចំណេញតិចក៏យក អ្នកខ្លះទិញទុកអភិវឌ្ឍន៍”។ លោកស្រីបន្តថា “អ្នកខ្លះទៀតទិញទុករហូតមានតម្លៃខ្ពស់ ដែលអាចចំណេញបានច្រើន ទោះត្រូវចំណាយពេលយូរឆ្នាំក៏ដោយ ប៉ុន្តែសម្រាប់ការវិនិយោគដោយក្ដីរំពឹងថ្ងៃអនាគតគឺអាចមានឱកាសជោគជ័យ និងចំណេញបានខ្ពស់ជាងគេ ហើយការវិនិយោគបែបនេះ អាចធ្វើបានតែចំពោះអ្នកមានធនធាន និងមានចរន្តសាច់ប្រាក់គ្រប់គ្រាន់តែប៉ុណ្ណោះ។

លោកស្រីGrace Rachny Fong បានមានប្រសាសន៍បញ្ជាក់ថា “ខ្ញុំលើកឧទាហរណ៍ជាក់ស្ដែង ដូចជា ដីនៅតំបន់ទួលគោក កាលពីប៉ុន្មានឆ្នាំមុនតម្លៃដីស្ថិតនៅក្រោម២០០០ដុល្លារ ក្នុងមួយម៉ែត្រការ៉េតែប៉ុណ្ណោះ”។លោកស្រីបន្តថា “បច្ចុប្បន្នទោះជាស្ថិតនៅក្នុងស្ថានភាពប្រឈមនឹងវិបត្តិសេដ្ឋកិច្ច តម្លៃដីនៅតំបន់ដដែលបានឡើងរហូតដល់ចន្លោះពី៣៥០០-៣៧០០ដុល្លារក្នុងមួយម៉ែត្រការ៉េ ហើយតម្លៃនេះនឹងបន្តឡើងដល់ក្នុងរង្វង់៦០០០ដុល្លារ ក្នុងមួយម៉ែត្រការ៉េនៅត្រឹមរយៈពេលប្រមាណ៥ឆ្នាំខាងមុខនេះ”។

លោកស្រីបន្តថា “ការវិនិយោគក្នុងរយៈពេលវែង និងក្ដីរំពឹងចំណេញនៅថ្ងៃអនាគត់ មានអត្រាជោគជ័យខ្ពស់ និងមិនសូវមានហានិភ័យនោះទេ ព្រោះជាទូទៅតម្លៃដីពីមួយឆ្នាំទៅមួយឆ្នាំតែងមានការកើនឡើង ប៉ុន្តែមិនមានការធ្លាក់ចុះវិញនោះទេ”។

ស្រដៀងគ្នាទៅនឹងការលើកឡើងខាងលើនេះ អ្នកស្រីកែវ សុចិន្តា នាយិកាក្រុមហ៊ុន Reachny Property Co,.Ltd ដែលជាក្រុមហ៊ុនភ្នាក់ងារជំនាញ ក្នុងការលក់ខុនដូបានមានប្រសាន៍ថា គ្រប់ប្រភេទអចលនវត្ថុទាំងអស់ តែងតែមានការកើនឡើងនូវតម្លៃជាបន្តបន្ទាប់ មិនថាចំពោះតែដីធ្លី លំនៅដ្ឋាន ឬខុនដូនោះទេ។

អ្នកស្រីបានបន្តថា“សម្រាប់ទីផ្សារខុនដូននៅពេលនេះ គឺបានផ្តល់ឱកាសចំណេញសម្រាប់អតិថិជន មិនថាចំពោះអ្នកទិញសម្រាប់រស់នៅជាក់ស្ដែង ឬអ្នកទិញទុកសម្រាប់វិនិយោគយកចំណេញនៅថ្ងៃអនាគតនោះទេ”។

លោកស្រីបន្តថា “ជាក់ស្ដែងតម្លៃទីផ្សារខុនដូបច្ចុប្បន្នគឺនៅទាប ដូច្នេះវាជាឱកាសចំណេញសម្រាប់អ្នក ដែលចង់ទិញទុកវិនិយោគនៅថ្ងៃអនាគត។ ពេលនេះតម្លៃខុនដូកម្រិតមធ្យមភាគច្រើន ត្រូវបានគេដាក់លក់នៅលើទីផ្សារ ក្នុងរង្វង់ជាង១៨០០ដុល្លារក្នុងមួយម៉ែត្រការ៉េ ប៉ុន្តែបើបន្តរហូតដល់១ឬ២ឆ្នាំទៅមុខទៀត តម្លៃនឹងកើនឡើងខ្ពស់ជាងនេះជាក់ជាមិនខាន”៕

រដ្ឋមន្រ្តីពាណិជ្ជកម្ម ៖ កិច្ចព្រមព្រៀងពាណិជ្ជកម្មសេរីកម្ពុជា ចិន ត្រូវដាក់ស្នើសុំការអនុម័តពីសភាជាមុនសិន

ដោយ ៖ គង់ សូរិយា

ភ្នំពេញៈ រដ្ឋមន្រ្តីក្រសួងពាណិជ្ជកម្មលោកប៉ាន សូរស័ក្តិបានថ្លែងថា កិច្ចព្រមព្រៀងពាណិជ្ជកម្មសេរី (FTA) រវាងកម្ពុជា-ចិន និងកម្ពុជា-កូរ៉េខាងត្បូង នឹងបញ្ចប់ជាផ្លូវការនៅឆ្នាំ២០២១នេះហើយ ខណៈដែលពេលនេះកំពុងស្ថិតក្នុងការសម្រេចពីថ្នាក់លើ។

លោកបានមានប្រសាសន៍ឲ្យដឹងកាលពីថ្ងៃទី៦ ខែមករាកន្លងមកថា កិច្ចព្រមព្រៀងពាណិជ្ជកម្មសេរីកម្ពុជា ចិន (FTA) បច្ចុប្បន្នយើងបានទទួលលិខិតនូវការចុះហត្ថលេខារួចហើយ គ្រាន់តែមិនមែនច្បាប់ដោយផ្ញើមកហើយតាមសារអេឡិចត្រូនិច ដើម្បីឱ្យយើងរៀបចំជំរុញលិខិតបទដ្ឋានសុំសេចក្តីអនុម័តពីស្ថាប័ននីតិបញ្ញត្តិ រដ្ឋសភា និងព្រឹទ្ធសភា។

លោកបន្តថា “នៅពេលណាដែលយើងរៀបចំរួច សភានឹងអញ្ញើញដើម្បីឡើងការពារ និងសាកសួរបន្ថែមអំពីលក្ខខណ្ឌទីផ្សារសេរី មុននឹងសម្រេចអនុម័ត និងដាក់ឱ្យអនុវត្តន៍ផ្លូវការបាន”។

ដោយឡែក FTA កម្ពុជា-កូរ៉េខាងត្បូង លោករដ្ឋមន្រ្តីប៉ាន សូរស័ក្តិ បានបញ្ជាក់ថា នឹងចប់សព្វគ្រប់ក្នុងរយៈពេលដ៏ខ្លីខាងមុខដូចគ្នាដែរ ខណៈដែលពេលនេះក្រុមការងារពាក់ព័ន្ធបានត្រៀមការងារជាច្រើន ដើម្បីពិនិត្យមើល និងយកទៅពិភាក្សាបន្ថែមជាមួយគណៈកម្មាធិការជាតិគោលនយោបាយសេដ្ឋកិច្ច និងហិរញ្ញវត្ថុ។

កិច្ចព្រមព្រៀងពាណិជ្ជកម្មសេរី កម្ពុជា-ចិន ត្រូវបានចុះហត្ថលេខាជាផ្លូវការនាខែតុលា ឆ្នាំ២០២០កន្លងទៅ។ បន្ទាប់ពីចុះហត្ថលេខារួច រដ្ឋាភិបាលកម្ពុជារំពឹងថាការនាំចេញទៅកាន់ប្រទេសចិននឹងកើនឡើង ដោយក្នុងចំណោមមុខទំនិញជាង៣៤០មុខ គឺផលិតផលកសិកម្ម៩៥ភាគរយ ពីកម្ពុជាត្រូវរួចពន្ធសម្រាប់ការនាំចេញទៅចិន ដែលភាគច្រើនជាទំនិញកសិកម្ម និងប្រភេទទំនិញនៅក្នុងឧស្សាហកម្មកែច្នៃ។

ដោយឡែក កិច្ចព្រមព្រៀងពាណិជ្ជកម្មសេរី កម្ពុជា-កូរ៉េ ជាលទ្ធផលការចរចាផ្ដោតទៅលើការបើកច្រកទីផ្សារ និងអត្ថបទកិច្ចព្រមព្រៀងទាំងមូល ដែលគ្របដណ្ដប់លើជំពូកស្ដីពីកិច្ចសហប្រតិបត្តិការសេដ្ឋកិច្ច ពាណិជ្ជកម្មផ្នែកទំនិញ វិធានប្រភពដើមទំនិញ វិធានជាក់លាក់សម្រាប់ផលិតផល បែបបទគយ និងកិច្ចសម្រួលពាណិជ្ជកម្ម និងបញ្ហាច្បាប់ និងស្ថាប័ន៕

រដ្ឋាភិបាលចាប់ផ្តើមពិនិត្យលើសេចក្ដីព្រាងច្បាប់វិនិយោគថ្មី ដើម្បីបង្ករភាពងាយស្រួលដល់វិនិយោគិន

ដោយ ៖ រ៉ាណេត

ភ្នំពេញ ៖ សេចក្ដីព្រាងច្បាប់ស្ដីពីការវិនិយោគថ្មីនៃព្រះរាជាណាចក្រកម្ពុជាត្រូវបានលើកយកមកពិនិត្យ និងពិភាក្សាលម្អិតដើម្បីធ្វើយ៉ាងណាកាន់តែបង្កភាពងាយស្រួលដល់វិនិយោគិនជាតិ និងអន្តរជាតិ ជាពិសេសបង្កើនភាពទាក់ទាញ សំដៅលើកកម្ពស់អភិវឌ្ឍន៍សង្គម និងសេដ្ឋកិច្ចជាតិកម្ពុជា។

ក្រុមប្រឹក្សាអភិវឌ្ឍន៍កម្ពុជា នៅល្ងាចថ្ងៃទី៦ ខែមករា ឆ្នាំ២០២០ម្សិកមិញនេះបានបើកកិច្ចប្រជុំពិគ្រោះយោបល់លើសេចក្ដីព្រាងច្បាប់ស្ដីពីការវិនិយោគថ្មីនៃព្រះរាជាណាចក្រកម្ពុជាដោយមានការចូលរួមពីក្រុមការងាររៀបចំច្បាប់វិនិយោគរបស់ក្រសួងសេដ្ឋកិច្ច និងហិរញ្ញវត្ថុ ព្រមទាំងអ្នកតំណាងមកពីស្ថាប័នពាក់ព័ន្ធផងដែរ។

រដ្ឋមន្ត្រីប្រតិភូអមនាយករដ្ឋមន្ត្រី លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ថា សេចក្ដីព្រាងច្បាប់ស្ដីពីការវិនិយោគថ្មីនៃព្រះរាជាណាចក្រកម្ពុជានេះត្រូវបានរៀបចំឡើងតាមការអង្អុលបង្ហាញរបស់ឯកសារគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ និងប្រសាសន៍ណែនាំដ៏ខ្ពង់ខ្ពស់របស់សម្ដេចតេជ ហ៊ុន សែន នាយករដ្ឋមន្ត្រីនៃកម្ពុជា នៅក្នុងវេទិការាជរដ្ឋាភិបាល-ផ្នែកឯកជនលើកទី១៨ ដែលបានប្រព្រឹត្តទៅកាលពីថ្ងៃទី២៩ ខែមីនា ឆ្នាំ២០១៩ ក្នុងគោលបំណងធ្វើឱ្យច្បាប់វិនិយោគនៅកម្ពុជាកាន់តែមានភាពទាក់ទាញ និងប្រកួតប្រជែង សំដៅអភិវឌ្ឍន៍សង្គម-សេដ្ឋកិច្ចនៅក្នុងព្រះរាជាណាចក្រកម្ពុជា។

លោកបានបញ្ជាក់ទៀតថា នៅក្នុងសេចក្ដីព្រាងច្បាប់នេះក៏ត្រូវបានក្រុមការងារផ្នែកនីតិកម្ម ពន្ធដារ និងអភិបាលកិច្ច (ក្រុម ឃ) នៃវេទិការាជរដ្ឋាភិបាល-ផ្នែកឯកជន ក្រោមអធិបតីភាពឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាសហប្រធានក្រុម(ឃ)យកមកពិភាក្សាជាមួយតំណាងផ្នែកឯកជន ដើម្បីទទួលធាតុចូលជាយថាហេតុ។

ច្បាប់ស្ដីពីការវិនិយោគនៃព្រះរាជាណាចក្រកម្ពុជាត្រូវបានអនុម័តឱ្យប្រើប្រាស់ជាលើកដំបូងនៅឆ្នាំ១៩៩៤ និងបានធ្វើវិសោធនកម្មកាលពីឆ្នាំ២០០៣។

ទីប្រឹក្សាជាន់ខ្ពស់នៅឧត្តមក្រុមប្រឹក្សាសេដ្ឋកិច្ចជាតិ លោក ម៉ី កល្យាណ ធ្លាប់បានមានប្រសាសន៍កាលពីពេលកន្លងទៅនេះថា ការធ្វើវិសោធនកម្មលើច្បាប់ស្ដីពីការវិនិយោគនេះត្រូវបានវិស័យឯកជនរង់ចាំរយៈពេលយូរមកហើយ។ ច្បាប់នេះគឺដើម្បីឆ្លើយតបនឹងតម្រូវការរបស់ក្រុមវិនិយោគិន និងដើម្បីឆ្លុះបញ្ចាំងពីការផ្លាស់ប្តូរនៃបរិយាកាសវិនិយោគអាជីវកម្មពេលបច្ចុប្បន្ន។

លោកបន្ថែមថា “ច្បាប់វិនិយោគរបស់កម្ពុជាចាំបាច់ត្រូវកែតម្រូវ ដើម្បីស្របតាមបរិយាកាសសេដ្ឋកិច្ចថ្មី។ ការមានច្បាប់វិនិយោគដែលមានការទាក់ទាញមួយ គឺសំខាន់ណាស់ ប៉ុន្តែការមានការអនុវត្តល្អជាការចាំបាច់ផងដែរ”។

លោកបញ្ជាក់ថា “ជំហានដំបូង យើងចាំបាច់ត្រូវមានច្បាប់ល្អ និងគោលនយោបាយល្អ ហើយក្រោយមក យើងត្រូវការការអនុវត្តល្អ។ យើងចាំបាច់ត្រូវមានច្បាប់ និងគោលនយោបាយល្អមួយជាដំបូង បន្ទាប់មកយើងនឹងកែតម្រូវការងាររបស់យើងជាបណ្ដើរៗឆ្ពោះទៅរកយុទ្ធសាស្ដ្រដ៏ល្អ” ៕

1...2,1062,1072,108...3,259 Page 2,107 of 3,259