ដោយៈគង់ សូរិយា
កណ្តាលៈ អ្នកជំនាញបានអះអាងថា ផែនការរៀបចំហេដ្ឋារចនាសម្ព័ន្ឋ និងប្លង់គោលអភិវឌ្ឍន៍នៅគ្រប់ក្រុង ស្រុកក្នុងខេត្តកណ្តាលមានតម្លៃរាប់ពាន់លានដុល្លារ។
លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្ម និងជាអនុប្រធានមន្ទីររៀបចំដែនដី នគរូបនីយកម្ម និងសូរិយោដីខេត្តកណ្តាល ដែលបានដឹកនាំរៀបចំផែនការរៀបចំហេដ្ឋារចនាសម្ព័ន្ឋ និងប្លង់គោលអភិវឌ្ឍន៍នៅទូទាំងក្រុង និងស្រុកទាំងអស់ក្នុងខេត្តក ណ្តាលបានមានប្រសាសន៍ឲ្យដឹងកាលពីពេលថ្មីៗនេះថា ការរៀបចំផែនការមេលើការកសាងហេដ្ឋារចនាសម្ព័ន្ឋ និងប្លង់គោលអភិវឌ្ឍន៍នៅតាមបណ្តាក្រុង ស្រុកទាំងអស់បានបញ្ចប់ និងអនុម័តដោយអភិបាលខេត្តរួចហើយ។
លោកបន្តថា “ការរៀបចំរួចហើយ បើសិនជាក្រសួងពាក់ព័ន្ឋយកមកអនុវត្តន៍ និងប្រើប្រាស់តាមប្លង់ ដែលបានរៀបចំរួច វាចំណេញថវិកាជាតិរាប់ពាន់លានដុល្លារអាមេរិក” ។ លោកបន្តថា “ផែនការហេដ្ឋារចនាសម្ព័ន្ឋ និងប្លង់គោលអភិវឌ្ឍន៍ នឹងជួយរដ្ឋាភិបាល ក៏ដូចជាអាជ្ញាធរខេត្តអាចរៀបចំ តំបន់អភិវឌ្ឍន៍បានច្បាស់លាស់ និងងាយស្រួល ដោយដឹងថាតំបន់ណាគួររៀបចំជាតំបន់លំនៅដ្ឋាន តំបន់ណាគួររៀបចំជាមជ្ឈមណ្ឌលពាណិជ្ជកម្ម ឧស្សាហកម្មជាដើម” ។
លោកបណ្ឌិតបានបន្តទៀតថា តាមធម្មតានៅប្រទេសណាក៏ដោយ តែងតែមានផែនការអភិវឌ្ឍន៍ច្បាស់លាស់ ដើម្បីបញ្ចៀសបញ្ហាស្មុគ្រស្មាញនាពេលអនាគត ពិសេសវានឹងជួយរដ្ឋាភិបាលប្រទេសនិមួយៗ មានផែនទីចង្អុលបង្ហាញផ្លូវត្រឹមត្រូវ លើការអភិវឌ្ឍន៍តាមមូលដ្ឋានណាមួយ។
ជាមួយគ្នានេះ លោកស្រីអាន សុធីតាអ្នកឯកទេសអចលនទ្រព្យអន្តរជាតិបានថ្លែងថា ការអភិវឌ្ឍន៍ទីក្រុងភ្នំពេញបច្ចុប្បន្ន បានធ្វើឡើងដោយគ្មានផែនការច្បាស់លាស់ឡើយ ព្រោះមិនមានការបែងចែកច្បាស់លាស់ថា តំបន់ណាគួរសាងសង់អាគារខ្ពស់ តំបន់ណាគួរជាតំបន់លំនៅដ្ឋាន និងតំបន់ណាគួរជាតំបន់ឧស្សាហកម្ម។
លោកស្រីបន្តថា “ដោយសារគ្មានផែនការមេបែបនេះ បានធ្វើឲ្យអាគារខ្ពស់ៗមួយចំនួនសាងសង់គ្មានស្តង់ដា និងគ្មានគម្លាតត្រឹមត្រូវ ដែលធ្វើឲ្យប៉ះពាល់ដល់ការអភិវឌ្ឍន៍ប្រកបដោយចីរភាព និងសុខមាលភាពអ្នករស់នៅផងដែរ” ៕
