ប្រទេសឡាវគ្រោងសាងសង់រោងចក្រអគ្គិសនីខ្នាតយក្សចំនួន២ឆាប់ៗនេះដើម្បីលក់អគ្គិសនីមកឱ្យកម្ពុជា

ដោយៈ សុខុម

វៀងចន្ទន៍: មន្ត្រីរដ្ឋាភិបាលជាន់ខ្ពស់មួយរូបបានទម្លាយឱ្យដឹងថា ការសាងសង់រោងចក្រអគ្គិសនីខ្នាតយក្សចំនួន២ ដែលដើរដោយថាមពលធ្យូងថ្ម នឹងចាប់ផ្ដើមដំណើរការត្រឹមដំណាច់ឆ្នាំនេះ នៅក្នុងខេត្តសេកុង (Xekong)ប្រទេសឡាវ។ នេះបើយោងតាមសារព័ត៌មាន The Star ចុះផ្សាយកាលពីថ្ងៃទី៥ កុម្ភៈ។

ក្រុមមន្ត្រីឡាវបាននិយាយថា ក្រោយការសាងសង់បញ្ចប់ជាស្ថាពរ រោងចក្រទាំង ២ នេះនឹងចាប់ផ្ដើមផ្គត់ផ្គង់អគ្គិសនី មកឱ្យប្រទេសកម្ពុជាក្នុងឆ្នាំ២០២៥ ដោយផ្អែកតាមកិច្ចព្រមព្រៀងមួយ ចុះហត្ថលេខារវាងក្រុមហ៊ុនអភិវឌ្ឍន៍ និងរដ្ឋាភិបាលឡាវ។

រដ្ឋលេខាធិកាក្រសួងរ៉ែ និងថាមពលឡាវ លោកDaovong Phonekeoបានប្រកាសថា គម្រោងរោងចក្រអគ្គិសនីទី១ ដែលមានសមត្ថភាពផលិតអគ្គិសនីបាន ១.៨០០ មេហ្គាវ៉ាត់ នឹងត្រូវសាងសង់នៅក្នុងស្រុកKaleum ដោយក្រុមហ៊ុនថៃPhonesack Group Company Limited។

លោកបានថ្លែងថា “ក្រុមហ៊ុននឹងបោះទុនវិនិយោគប្រមាណពី៣ ទៅ៤ពាន់លានដុល្លាអាមេរិក លើរោងចក្រអគ្គិសនីនេះ រួមទាំងការសាងសង់បណ្ដាញបញ្ជូនថាមពលអគ្គិសនីដើម្បីបញ្ជូនអគ្គិសនីទៅកាន់ប្រទេសកម្ពុជាផងដែរ”។ លោកបន្ថែមថា “បណ្ដាញបញ្ជូនអគ្គិសនីនេះ នឹងមានប្រវែង២០០គីឡូម៉ែត្រ”។

រោងចក្រអគ្គិសនីទី២ ដែលមានសមត្ថភាពផលិតអគ្គិសនី បានរហូតដល់៧០០មេហ្គាវ៉ាត់ នឹងត្រូវសាងសង់ក្រុងស្រុកLamam ដោយក្រុមហ៊ុនចិន មួយដែលមានគម្រោងបោះទុនវិនិយោគជាង១ពាន់លានដុល្លារអាមេរិក លើគម្រោងនេះ។

លោក Daovong Phonekeo បានលើកឡើងថា ផ្អែកតាមកិច្ចព្រមព្រៀង ក្រុមហ៊ុនចិន ត្រូវផ្គត់ផ្គង់អគ្គិសនីចំនួន៦០០មេហ្គាវ៉ាត់ មកដល់ប្រទេសកម្ពុជា។ ទោះជាយ៉ាងណា ក្រុមហ៊ុនចង់ធានានិរន្តរភាព នៃការផ្គត់ផ្គង់អគ្គិសនីដល់អ្នកទិញ ដូច្នេះហើយក៏សម្រេចចិត្តបង្កើនសមត្ថភាពផលិតដល់៧០០មេហ្គាវ៉ាត់។

ក្រុមហ៊ុនចិន នឹងមិនសាងសង់បណ្ដាញបញ្ជូនអគ្គិសនីនេះ ដោយខ្លួនឯងទេ ប៉ុន្តែនឹងចាប់ដៃគូ សហការជាមួយអគ្គិសនីឡាវ (EDL) នៅក្នុងការផ្គត់ផ្គង់អគ្គិសនីមកដល់ប្រទេសកម្ពុជា។

លោកបានគូសបញ្ជាក់ថា “ប្រទេសកម្ពុជា នឹងទិញអគ្គិសនីពីរោងចក្ររបស់យើងក្នុងតម្លៃ៧,៣សេនដុល្លារអាមេរិក ក្នុងមួយគីឡូវ៉ាត់ម៉ោង (kWh)”។

ប្រទេសឡាវ មានបំណងបង្កើនការផ្គត់ផ្គង់អគ្គិស នីមកឱ្យប្រទេសកម្ពុជា ព្រោះបណ្ដាញបញ្ជូនអគ្គិសនី ដែលមានស្រាប់មានសមត្ថភាព អាចបញ្ជូនអគ្គិសនីបានបន្ថែមទៀត៕

រដ្ឋាភិបាលសម្រេចអនុម័តគម្រោងវិនិយោគថ្មីចំនួន១០ក្រោមទុនជាង៦០០លានដុល្លារក្នុងសប្តាហ៍នេះ

ដោយ៖ ប៊ី

ភ្នំពេញ៖ រដ្ឋាភិបាល តាមក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តគម្រោងវិនិយោគថ្មីចំនួន១០គម្រោង ដែលបោះទុនវិនិយោគ៦០៥,៤លានដុល្លារក្នុងសប្តាហ៍នេះ ហើយគម្រោងទាំងនេះ នឹងបង្កើតការងាររាប់ពាន់កន្លែងដល់ប្រជាពលរដ្ឋនៅកម្ពុជា។ នេះបើយោងតាមសេចក្តីប្រកាសព័ត៌មានរបស់ CDC។

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- MAYCO FURNITURE COMPANY LIMITED : គម្រោងបង្កើតរោងចក្រផលិតគ្រឿងសង្ហារឹមគ្រប់ប្រភេទ (ពីឈើនាំចូល) ដែលមានទីតាំងវិនិយោគស្ថិតនៅភូមិព្រហែក ឃុំសូភី ស្រុកបាទី ខេត្តតាកែវ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន ១៨៨កន្លែង។

២- P P C H Y MACHINERY MANUFACTURING CO., LTD: គម្រោងបង្កើតរោងចក្រផលិតគ្រឿងបន្លាស់ (រថយន្ត គ្រឿងចក្រ គ្រឿងយន្ត) និងប៊ូឡុងគ្រប់ប្រភេទ ដែលមានទីតាំងវិនិយោគស្ថិតនៅភូមិឫស្សី ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៦,៩លានដុល្លារអាមេរិក និងអាចបង្កើតការងារបានចំនួន ២០០កន្លែង។

៣- KHEMA GLOBAL CO., LTD: គម្រោងសាងសង់ និងអាជីវកម្មមន្ទីរពហុព្យាបាលអន្តរជាតិ ចំនួន ៨១គ្រែ ដែលមានទីតាំងវិនិយោគស្ថិតនៅផ្លូវជាតិលេខ១ ភូមិឫស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ មានទុនវិនិយោគប្រមាណ ៦,៣លានដុល្លារអាមេរិក និងអាចបង្កើតការងារបានចំនួន ២៨០កន្លែង។

៤- KHEMA GLOBAL CO., LTD: គម្រោងសាងសង់ និងអាជីវកម្មមន្ទីរពហុព្យាបាលអន្តរជាតិ ចំនួន ៥៤គ្រែ ដែលមានទីតាំងវិនិយោគស្ថិតនៅផ្លូវជាតិលេខ៥២៨ ភូមិ១២ សង្កាត់បឹងកក់ទី១ ខណ្ឌទួលគោក រាជធានីភ្នំពេញ មានទុនវិនិយោគប្រមាណ ៣,៦លានដុល្លារអាមេរិក និងអាចបង្កើតការងារបានចំនួន ១៨០កន្លែង។

៥- PRIME ROAD ALTERNATIVE (CAMBODIA) CO., LTD: គម្រោងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យ អានុភាព ៦០មេហ្កាវ៉ាត់ ដែលមានទីតាំងវិនិយោគស្ថិតនៅភូមិព្រៃជ្រៅ ឃុំក្បាលទឹក ស្រុកទឹកផុស ខេត្តកំពង់ឆ្នាំង មានទុនវិនិយោគប្រមាណ ៣៧,៤លានដុល្លារអាមេរិក និងអាចបង្កើតការងារបានចំនួន ១២កន្លែង។

៦- SYSG GARMENT COMPANY LIMITED: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅអគារលេខ A-០៧ ផ្លូវជាតិលេខ៤ ភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ ៤,៣លានដុល្លារអាមេរិក និងអាចបង្កើតការងារបានចំនួន ១.៣៥១កន្លែង។

៧- “VELONG (CAMBODIA) INDUSTRIES CO., LTD” គម្រោងបង្កើតរោងចក្រផលិតសម្ភារៈបរិក្ខារសម្រាប់ចង្ក្រាន BBQ, ផ្គុំតម្លើងបរិក្ខារអេឡិចត្រូនិក និងអំពូលភ្លើង ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀង ហ្គីហ្គា រីស៍ស, មានទុនវិនិយោគប្រមាណ ៣,៥លានដុល្លារអាមេរិក និងអាចបង្កើតការងារបានចំនួន ១២០កន្លែង។

៨- “ALLIED MAX INTERNATIONAL (CAMBODIA) CO., LTD” គម្រោងបង្កើតរោងចក្រផលិតក្រណាត់ និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស សានដុង សាន់សែល, មានទុនវិនិយោគប្រមាណ ៣២លានដុល្លារអាមេរិក និងអាចបង្កើតការងារបានចំនួន ៣៧០កន្លែង៕
តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

៩- “SHUN XIN LUGGAGE INDUSTRY (CAMBODIA) CO., LTD” គម្រោងបង្កើតរោងចក្ររោងចក្រផលិតកាបូប និងកាបូបក្លាសេគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៥ ភូមិស្ពានពោធិ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មានទុនវិនិយោគប្រមាណ ៣,៦លានដុល្លារអាមេរិក និងអាចបង្កើតការងារបានចំនួន ១.៦១៨កន្លែង។

១០-“ SHUNYING PULP AND PAPER COMPANY LIMITED” គម្រោងបង្កើតរោងចក្រផលិតក្រដាស ដែលមានទីតាំងវិនិយោគស្ថិតនៅភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត មានទុនវិនិយោគប្រមាណ ៥០៤លានដុល្លារអាមេរិក និងអាចបង្កើតការងារបានចំនួន ២.២៦១កន្លែង។

តើអ្វីជាបញ្ហាប្រឈមចម្បងចំនួន ៥ចំណុច ដែលកំពុងកើតមាននៅរាជធានីភ្នំពេញ?

ដោយគង់ សូរិយា

ភ្នំពេញៈ កំនើនប្រជាសាស្ត្រ យានយន្ត កំនើននៃកាកសំណល់ និងបញ្ហាជាច្រើនទៀតកំពុងជាកង្វល់ ដែលពីមួយឆ្នាំទៅមួយឆ្នាំទាំងក្រុមប្រឹក្សា ក៏ដូចគណៈអភិបាលរាជធានីភ្នំពេញ ត្រួវដោះស្រាយការងារបានយ៉ាងច្រើនសន្ធឹកសន្ធាប់ ធ្វើឲ្យរាជធានីភ្នំពេញ ដែលជាបេះដូងនៃប្រទេសជាតិ កាន់តែមានភាពរីកចំរើនជាបន្តបន្ទាប់។

ប៉ុន្តែទន្ទឹមនឹងលទ្ធផលទាំងនោះ ក៏នៅមានចំណុចអវិជ្ជមាន និងបញ្ហាប្រឈមមួយចំនួន ដែលត្រូវប្រមូលផ្តុំដោះស្រាយ ដូចជា ទី១-បញ្ហាសន្តិសុខ និងសណ្តាប់ធ្នាប់សង្គម ពិសេសករណីប្លន់ប្រដាប់អាវុធ ចោរកម្ម ក្មេងទំនើង និងបទល្មើស គ្រឿងញៀន ព្រមទាំងបញ្ហាគ្រោះអគ្គិភ័យ នៅតែជាចំណុចក្តៅរបស់រាជធានីភ្នំពេញ ទី២-បញ្ហាចរាចរណ៍ និងសណ្តាប់ធ្នាប់សាធារណៈ ទី៣-ប្រព័ន្ធដឹកជញ្ជូន និងប្រព័ន្ធផ្លូវ-លូ ក្នុងរាជធានីភ្នំពេញ ទី៤-ការតបណ្តាញអគ្គិសនី និងបណ្តាញទឹកស្អាត ជូនប្រជាពលរដ្ឋដែលរស់នៅតាមបណ្តាសង្កាត់ជាយ រាជធានីភ្នំពេញ នៅមិនទាន់បានទូលំទូលាយនៅឡើយ និងទី៥-ការងារគ្រប់គ្រងសំណល់រឹង-សំរាម ប្រព័ន្ធបង្ហូរសំណល់រាវ និងអនាម័យសាធារណៈ ក្នុងរាជធានីភ្នំពេញ។

យោងតាមរបាយការណ៍ របស់រដ្ឋបាលរាជធានីភ្នំពេញបានឲ្យដឹងថា ក្នុងឆ្នាំ២០២០កន្លងមកនេះ ក្រោមការដឹកនាំផ្ទាល់របស់រាជរដ្ឋាភិបាល និងក្រសួងមហាផ្ទៃ រដ្ឋបាលរាជធានីភ្នំពេញ បានបន្តខិតខំជម្នះពុះពាររាល់ការលំបាកស្មុគស្មាញ ដោយអនុវត្តន៍គ្រប់វិធានការ ពិសេសការចាត់តាំងអនុវត្តគោល នយោបាយ “ភូមិ សង្កាត់ មានសុវត្ថិភាព” ឱ្យកាន់តែល្អប្រសើរ រក្សាបាននូវសភាពការណ៍សន្តិសុខទូទៅល្អក្នុង រាជធានីភ្នំពេញ។

ជាមួយគ្នានេះដែរ រដ្ឋបាលរាជធានីភ្នំពេញ បានចូលរួមយ៉ាងសកម្មក្នុងការអនុវត្តតាមវិធានការណែនាំ របស់រាជរដ្ឋាភិបាលកម្ពុជា ក៏ដូចជាក្រសួង ស្ថាប័នពាក់ព័ន្ធ ក្នុងការទប់ស្កាត់ការរីករាលដាលមេរោគកូវីដ-១៩ បានយ៉ាងល្អប្រសើរ។

របាយការណ៏ដដែលបានបញ្ជាក់ថា ទន្ទឹមនឹងលទ្ធផលដែលសម្រេចបាន ជាវិជ្ជមានខាងលើ ក៏នៅមានបញ្ហាប្រឈមមួយចំនួន ដែលត្រូវប្រមូលផ្តុំ ដោះស្រាយឱ្យបានល្អនាពេលខាងមុខ ដូចជា ១-បញ្ហាសន្តិសុខ និងសណ្តាប់ធ្នាប់សង្គម ពិសេសករណីប្លន់ប្រដាប់អាវុធ ចោរកម្ម ក្មេងទំនើង និងបទល្មើស គ្រឿងញៀន ព្រមទាំងបញ្ហាគ្រោះអគ្គិភ័យ នៅតែជាចំណុចក្តៅរបស់រាជធានីភ្នំពេញ។

២-បញ្ហាចរាចរណ៍ និងសណ្តាប់ធ្នាប់សាធារណៈ បញ្ហានេះ គឺជាការងារអាទិភាពដែលត្រូវយកចិត្តទុកដាក់ និងអនុវត្តជាប្រចាំ ដើម្បីឱ្យទទួលបានជោគជ័យ ដោយផ្តោតលើវិធានការចំនួនបីសំខាន់ៗ រួមមាន៖ សណ្តាប់ធ្នាប់ ចិញ្ចើមផ្លូវ សណ្តាប់ធ្នាប់សំណង់ និងសណ្តាប់ធ្នាប់លក់ដូរ។

៣-ប្រព័ន្ធដឹកជញ្ជូន និងប្រព័ន្ធផ្លូវ-លូ ក្នុងរាជធានីភ្នំពេញ នៅមិនទាន់បានឆ្លើយតបតាមតម្រូវការរបស់ ប្រជាពលរដ្ឋនៅឡើយ។ ៤-ការតបណ្តាញអគ្គិសនី និងបណ្តាញទឹកស្អាត ជូនប្រជាពលរដ្ឋដែលរស់នៅតាមបណ្តាសង្កាត់ជាយ រាជធានីភ្នំពេញ នៅមិនទាន់បានទូលំទូលាយនៅឡើយ។

៥-ការងារគ្រប់គ្រងសំណល់រឹង-សំរាម ប្រព័ន្ធបង្ហូរសំណល់រាវ និងអនាម័យសាធារណៈ ក្នុងរាជធានី នៅ តែជាក្តីបារម្ភ និងជាអាទិភាពសម្រាប់រដ្ឋបាលរាជធានីភ្នំពេញ ដែលត្រូវខិតខំដោះស្រាយឱ្យបានឆាប់រហ័ស ជាពិសេស ការផ្សព្វផ្សាយ និងអប់រំដល់ប្រជាពលរដ្ឋឱ្យបានយល់ដឹងពីការវេចខ្ចប់ ទុកដាក់សំណល់រឹង និងការបញ្ចេញចោល សំណល់ រាវគ្រប់ប្រភេទឱ្យត្រឹមត្រូវ។

របាយការណ៍ប្រចាំឆ្នាំ២០២០នេះ ត្រូវបានពិនិត្យ និងអនុម័តនៅក្នុងកិច្ចប្រជុំសាមញ្ញលើកទី២០ របស់ ក្រុមប្រឹក្សារាជធានីអាណត្តិទី៣ នាថ្ងៃទី១៣ ខែមករា ឆ្នាំ២០២១ ៕

កូរ៉េខាងត្បូងគ្រោងបោះទុន ៤៣ពាន់លានដុល្លារសាងសង់ស្ថានីយកង្ហារខ្យល់ផលិតអគ្គិសនីធំបំផុតក្នុងពិភពលោក

ដោយៈសុខុម

សេអ៊ូល: ប្រទេសកូរ៉េខាងត្បូង បានទម្លាយផែនការបោះទុនវិនិយោគ រហូតដល់ទៅ៤៨,៥ទ្រីលានវ៉ុន ស្មើនឹង៤៣ពាន់លានដុល្លារអាមេរិក ដើម្បីសាងសង់ស្ថានីយកង្ហារខ្យល់ផលិតអគ្គិសនីនៅឆ្នេរសមុទ្រ ដែលជាគំរោងធំបំផុតក្នុងពិភពលោក នៅត្រឹមឆ្នាំ២០៣០ ក្នុងកិច្ចប្រឹងប្រែងស្ដារសេដ្ឋកិច្ចពីការឆ្លងរាតត្បាតវីរុសកូវីដ-១៩ ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី៥ កុម្ភៈ។

គម្រោងនេះគឺជាផ្នែកដ៏ធំមួយ នៃគោលនយោបាយសេដ្ឋកិច្ច ផ្ដោតលើការប្រែប្រួលអាកាសធាតុ Green New Deal របស់ប្រធានាធិបតី Moon Jae-in ដែលបានផ្ដួចផ្ដើមឡើងកាលពីឆ្នាំមុន ដើម្បីទប់ការពឹងផ្អែកលើឥន្ធនៈហ្វូស៊ីល (ប្រេង ធ្យូងថ្ម និងឧស្ម័នធម្មជាតិ) នៅក្នុងសេដ្ឋកិច្ចធំបំផុតទី៤ របស់អាស៊ីមួយនេះ និងកាត់បន្ថយការបំភាយឧស្ម័នកាបូនទៅក្នុងបរិយាកាស ឱ្យមកនៅកម្រិតសូន្យត្រឹមឆ្នាំ២០៥០ ។

លោក Moon Jae-in បានអញ្ជើញចូលរួមក្នុងពិធីចុះហត្ថលេខា លើកិច្ចព្រមព្រៀងសាងសង់ស្ថានីយកង្ហារខ្យល់ ផលិតអគ្គិសនីនេះនៅក្នុងទីក្រុងមាត់ឆ្នេរ Sinan។ ពេលសាងសង់បញ្ចប់ជាស្ថាពរ ស្ថានីយនេះនឹងមានសមត្ថភាពផលិតអគ្គិសនី បានរហូតដល់ទៅ៨,២ជីហ្គាវ៉ាត់ (GW)។

លោកប្រធានាធិបតីបានថ្លែងថា “ជាមួយគម្រោងនេះ យើងកំពុងតែពន្លឿនការផ្លាស់ប្ដូរថាមពល ដែលមិនបង្កផលប៉ះពាល់ដល់បរិស្ថាន និងជាការបោះជំហានបន្ថែមទៀតឆ្ពោះទៅរកការកាត់បន្ថយ ការបញ្ចេញកាបូនមកនៅកម្រិតសូន្យ” ។

ក្រុមហ៊ុនអគ្គិសនី និងវិស្វកម្មដែលបានចូលរួម ក្នុងពិធីចុះហត្ថលេខាខាងលើនេះរួមមាន ក្រុមហ៊ុន Korea Electric Power ក្រុមហ៊ុន SK E&S ក្រុមហ៊ុន Hanwha Engineering & Construction ក្រុមហ៊ុន Doosan Heavy Industries & Construction ក្រុមហ៊ុន CS Wind និងក្រុមហ៊ុន Samkang M&T ។

វិមានប្រធានាធិបតីបានគូសបញ្ជាក់ថា ក្រុមហ៊ុនទាំងនេះនឹងបោះទុន៤៧,៦ទ្រីលានវ៉ុន និងទឹកប្រាក់នៅសល់ ០,៩ ទ្រីលានវ៉ុនទៀត គឺរដ្ឋាភិបាលជាអ្នកចេញ។ វិមានប្រធានាធិបតីលើកឡើងទៀតថា គម្រោងនេះនឹងផ្ដល់ការងាររហូតដល់៥,៦០០ កន្លែង និងជួយសម្រេចគោលដៅបង្កើនសមត្ថភាព ផលិតថាមពលអគ្គិសនីពី១,៦៧ ជីហ្គាវ៉ាត់នាពេលបច្ចុប្បន្ន ឱ្យបានដល់១៦,៥ ជីហ្គាវ៉ាត់ ត្រឹមឆ្នាំ២០៣០ ។

គិតមកទល់បច្ចុប្បន្ន ស្ថានីយកង្ហារខ្យល់ផលិតអគ្គិសនី នៅឆ្នេរសមុទ្រដែលធំបំផុតក្នុងពិភពលោក គឺស្ថានីយ Hornsea 1 នៅប្រទេសអង់គ្លេស ដែលមានសមត្ថភាពផលិតអគ្គិសនីបាន១,១២ជីហ្គាវ៉ាត់៕

ក្រុមហ៊ុន OCIC បោះទុន ៨០លានដុល្លារវិនិយោគគំរោង BV Mansion នៅទីក្រុងរណបជ្រោយចង្វារ

ដោយស៊ីវ ម៉េង

ភ្នំពេញៈ ក្រុមហ៊ុន OCIC បានបោះទុនវិនិយោគទឹកប្រាក់ ប្រមាណ៨០លានដុល្លារអាមេរិក ដើម្បីសាងសង់គំរោង BV Mansion ដែលមានទីតាំងនៅក្នុងទីក្រុងរនបជ្រោយចង្វារ ជាទីក្រុងនៃអនាគត។

លោកស្រីអ៊ុក សុវត្តី ប្រធានផ្នែកលក់ប្រចាំទីក្រុងរណបជ្រោយចង្វារ បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៥ កុម្ភៈនេះថា គំរោងនេះបានចាប់់ផ្តើមសាងសង់កាលពីចុងឆ្នាំមុន និងគ្រោងបញ្ចប់រយៈពេល៣៦ខែ ជាមួយនឹងផ្ទះអាជីវកម្មចំនួន៥៤ ដែលសាងសង់លើផ្ទៃដី១,៥ហិកតា។ លោកស្រីបន្តថា គំរោងនេះមានកំពស់៩ជាន់រាប់ទាំងជាន់ផ្ទាល់ដី ដែលមានភាពអំណោយផលសំរាប់ការបើកការិយាល័យ ពាណិជ្ជកម្ម គ្លីនិក និងការិយាល័យកណ្តាលរបស់ក្រុមហ៊ុននានា។

លោកស្រីបន្តថា “រហូតមកទល់ពេលនេះផ្ទះនៅផ្លូវធំបានលក់អស់រួចហើយ នៅតែផ្ទះបែរមុខទៅផ្លូវម្ខាងទៀត ដោយផ្ទះនិមួយៗមានតម្លៃ១,៣៨លានដុល្លារអាមេរិក” ។ លោកស្រីបន្តថា “យើងដឹងហើយថា ទីក្រុងរណបជ្រោយចង្វារ ជាតំបន់មានការអភិវឌ្ឍន៍ចម្រុះទាំងសួនកំសាន្ត អាហារដ្ឋាន មជ្ឈមណ្ឌលពាណិជ្ជកម្ម និងលំនៅដ្ឋានជាច្រើនទៀត” ។

លោកស្រីអ៊ុក សុវត្តី បានបន្តទៀតថា គំរោងនេះស្ថិតនៅទន្ទឹមនឹងសាលពិព៌ណ និងសន្និបាតជ្រោយចង្វារ និងមានចម្ងាយប្រមាណ ១,៨គីឡូម៉ែត្រប៉ុណ្ណោះពីស្ពានជ្រោយចង្វារ។

ទីក្រុងរណបជ្រោយចង្វារមានទំហំជាង ១០០ហិកតា ដែលវិនិយោគដោយក្រុមហ៊ុន OCIC គំរោងទទីក្រុងរណបនេះ គ្រោងចំណាយទឹកប្រាក់វិនិយោគប្រមាណ៦០០០លានដុល្លារអាមេរិក ហើយទស្សនទាននៃការអភិវឌ្ឍតំបន់នេះ ធ្វើឡើងជាទីក្រុងបែបឆ្លាតវៃ និងជាបណ្តុំមជ្ឈមណ្ឌលពាណិជ្ជកម្ម ស្រដៀងគ្នានឹងមជ្ឈមណ្ឌលពាណិជ្ជកម្មលើមហាវិថីព្រះមុនីវង្ស។ នេះបើតាមលោកទូច សំណាងអគ្គនាយករងក្រុមហ៊ុន OCIC បញ្ជាក់ឲ្យដឹង។

លោកបន្តថា “ការរៀបចំហេដ្ឋារចនាសម្ព័ន្ឋទីក្រុងនេះ បានចំណាយទឹកប្រាក់រហូតដល់១៥០លានដុល្លារ ជាការចំណាយដ៏ច្រើនមួយ ដើម្បីធ្វើឲ្យហេដ្ឋារចនាសម្ព័ន្ឋនៅទីក្រុងនេះមានស្តង់ដា និងគោរពបានតាមបទដ្ឋានទីក្រុងឆ្លាតវៃ” ៕
ទំនាក់ទំនងទូរស័ព្ទលេខ ៖ 012 80 80 81 Tey (Khmer, English)
086 55 77 86 Vin (Khmer, English)
093 82 83 35 Ouy (Khmer, Chinese)

តើរាជធានីភ្នំពេញបានពង្រីកទំហំផ្ទៃដី និងវិវឌ្ឍន៍ដូចម្តេចក្នុងរយៈពេល ១៥ឆ្នាំចុងក្រោយនេះ?

ដោយគង់ សូរិយា

ភ្នំពេញៈ រាជធានីភ្នំពេញបានធំធាត់ ដូចកុមារម្នាក់ផងដែរ និងរីកមាឌកាន់តែធំដូចសេដ្ឋកិច្ចកម្ពុជាកាន់តែរីកធំឡើងពីមួយឆ្ពាំទៅមួយឆ្នាំ ទាំងទំហំផ្ទៃដី ប្រជាសាស្ត្រនិងចំនួនយានយន្ត។

ពីមួយឆ្នាំទៅមួយឆ្នាំ ក្រោមការដឹកនាំប្រកបដោយគិតិបណ្ឌិតរបស់សម្តេច អគ្គមហាសេនាបតីតេជោ ហ៊ុន សែនជានាយករដ្ឋមន្ត្រី និងការដឹកនាំផ្ទាល់របស់ក្រុមប្រឹក្សាក៏ដូចគណៈអភិបាលរាជធានីភ្នំពេញ តែងបានខិតខំបំពេញ កសាង និងអភិវឌ្ឍន៏ធ្វើអោយរាជធានីភ្នំពេញ ដែលជាបេះដូងនៃប្រទេសជាតិកាន់តែមានភាពរីកចំរើន និងស៊ីវិល័យជាបន្តបន្ទាប់។ ទន្ទឹមនឹងការរីកចំរើនមិនឈប់ឈរបែបនេះ រាជធានីភ្នំពេញ ក៏បានពង្រីកខ្លួនរហូតមកដល់ឆ្នាំ២០២១នេះ មានកំណើនទ្វេរដងរាប់ទាំងផ្ទៃដី និងចំនួនប្រជាពលរដ្ឋ ។

យោងតាមរបាយការណ៏របស់រដ្ឋបាលរាជធានីភ្នំពេញ ដែលគ្រោងនឹងធ្វើសន្និបាតបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១នោះ បានឱ្យដឹងថា ភ្នំពេញ ជារាជធានីមួយក្នុងចំណោមរាជធានី ខេត្តសរុប២៥ ជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៍ និងការទូត ដែលមានការអភិវឌ្ឍលើគ្រប់វិស័យ។

រាជធានីភ្នំពេញស្ថិតនៅភាគខាងត្បូង នៃប្រទេសកម្ពុជា ត្រង់ទន្លេចតុមុខ ជាចំណុចប្រសព្វរវាង ទន្លេមេគង្គលើ ទន្លេមេគង្គក្រោម ទន្លេសាប និងទន្លេបាសាក់ ដែលមានព្រំប្រទល់ខាងលិចទល់នឹងស្រុកអង្គស្នួល ខាងកើតទល់នឹង ស្រុកកៀនស្វាយ ខាងជើងទល់នឹងស្រុកមុខកំពូល ខាងត្បូងទល់នឹងស្រុកកណ្តាលស្ទឹង ខេត្តកណ្តាល។

របាយការណ៍ដដែលបានបញ្ជាក់ថា ឆ្នាំ២០១៩កន្លងមកនេះរាជធានីភ្នំពេញមាន ផ្ទៃដីសរុប៦៩២,៤៦ គីឡូម៉ែត្រការ៉េ ចំនួនខណ្ឌ១៤ ចំនួនសង្កាត់១០៥ ចំនួនភូមិ១០៥ ចំនួនគ្រួសារ៣៩៩.២០៣ ចំនួនប្រជាពលរដ្ឋសរុប២.១២៩.៣៧១នាក់ ចំនួនស្រី្តសរុប១.០៩០.១៧៩នាក់ ។ នេះជារបាយការផ្លូវការជំរឿនឆ្នាំ២០១៩ ។

ទាក់ទិនទៅនឹងការពង្រីកខ្លួន របស់រដ្ឋបាលរាជធានីភ្នំពេញពីមួយឆ្នាំទៅមួយឆ្នាំនោះ មន្ត្រីរដ្ឋបាលរាជធានីភ្នំពេញបានឱ្យដឹងថា បើលោកចាំមិនច្រឡំទេនោះ នៅក្នុងឆ្នាំ២០០៦រាជធានីភ្នំពេញមានផ្ទៃដីសរុប៣៧៥ គីឡូម៉ែត្រការ៉េ មានខណ្ឌចំនួន៧ សង្កាត់ចំនួន៧៦ ប្រជាពលរដ្ឋសរុបចំនួន១.០៥០.៦១៦នាក់។

នៅឆ្នាំ២០០៩រាជធានីភ្នំពេញបានពង្រីកបន្ថែម ដែលកាត់ទាំងដី និងប្រជាពលរដ្ឋពីខេត្តកណ្តាល គឺមានផ្ទៃដីសរុប៣៧៧,៤៦ គីឡូម៉ែត្រការ៉េ ចំនួនខណ្ឌ៨ ចំនួនសង្កាត់៧៦ ចំនួនប្រជាពលរដ្ឋសរុប១.៣២៧.៦១៦នាក់។ នៅឆ្នាំ២០១២រាជធានីភ្នំពេញពង្រីកបន្ថែមដែលមានផ្ទៃដីសរុប៦៧៨,៤៦ គីឡូម៉ែត្រការ៉េ ចំនួនខណ្ឌ៩ ចំនួនសង្កាត់៩៦ ចំនួនប្រជាពលរដ្ឋសរុប១.៥០១.៧២៥នាក់។

នៅឆ្នាំ២០១៧រាជធានីភ្នំពេញ បានពង្រីកបន្ថែមដែលមានផ្ទៃដីសរុប៦៩២,៤៦ គីឡូម៉ែត្រការ៉េ មានខ័ណ្ឌចំនួន១២ ចំនួនសង្កាត់១០៥ ចំនួនប្រជាពលរដ្ឋសរុប១.៤៦១.៨៥៣នាក់។ នៅឆ្នាំ២០១៩រាជធានីភ្នំពេញ បានពង្រីកផ្ទៃដីសរុប៦៩២,៤៦ គីឡូម៉ែត្រការ៉េ ចំនួនខណ្ឌ១៤ ចំនួនសង្កាត់១០៥ ចំនួនប្រជាពលរដ្ឋសរុប២.១២៩.៣៧១នាក់ ដែលជាឆ្នាំបំបែកខណ្ឌ។

នៅឆ្នាំ២០២០រាជធានីភ្នំពេញ មាន ផ្ទៃដីសរុប៦៩២,៤៦ គីឡូម៉ែត្រការ៉េ ចំនួនខណ្ឌ១៤ ចំនួនសង្កាត់១០៥ ចំនួនគ្រួសារ៣៩៩.២០៣ ចំនួនប្រជាពលរដ្ឋសរុប២.២៨១.៩៥១នាក់ និងនៅឆ្នាំ២០២១នេះ រាជធានីភ្នំពេញ អាចមានកំណើនផ្ទៃដីដល់ទៅ ៦៩៥,៤៦ គីឡូម៉ែត្រការ៉េ ប្រជាពលរដ្ឋក៏មានការកើនឡើងទៅតាមនោះដែរ។

មន្ត្រីដដែលបានឱ្យដឹងទៀតថា ទាក់ទិនទៅនឹងកំណើនថ្មីៗនេះ និងបើយោងតាមព្រះរាជក្រឹត្យរបស់ចុះថ្ងៃទី២២ ខែតុលា ឆ្នាំ២០២០របស់ព្រះមហាក្សត្របានត្រាស់បង្គាប់ក្នុងមាត្រា១ ត្រូវបានកែសម្រួលព្រំប្រទល់រដ្ឋបាលរវាងរាជធានីភ្នំពេញ និងខេត្តកណ្តាល ដោយកាត់យកភូមិចំនួន៥គឺ ភូមិស្ទឹងជ្រៅ និងភូមិព្រែកតាពៅ នៃសង្កាត់ដើមមៀន ភូមិព្រែកអញ្ចាញ នៃសង្កាត់ព្រែកឫស្សី ភូមិព្រែកឡុង នៃសង្កាត់តាក្តុល និងភូមិបត្តាជី នៃសង្កាត់ព្រែកហូរ ដែលមានផ្ទៃដីទំហំ ៣០២ហិកតា ៩៣៩១ម៉ែត្រការ៉េ ពីក្រុងតាខ្មៅខេត្តកណ្តាល មកឱ្យស្ថិតក្រោមការគ្រប់គ្រងរបស់សង្កាត់ជើងឯក ខណ្ឌដង្កោ រាជធានីភ្នំពេញ និងកាត់យកផ្ទៃដីទំហំ ២ហិកតា៥១៥៥ម៉ែត្រការ៉េ(ចំណែកដីនៃវត្តបុទុមសាគរ ហៅវត្តទួលតាក្របៅ) ពីសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ឱ្យមកស្ថិតក្រោមការគ្រប់គ្រងរបស់សង្កាត់ដើមមៀន ក្រុងតាខ្មៅ ខេត្តកណ្តាល។

បើយោងតាមព្រះរាជក្រឹត្យ របស់ព្រះមហាក្សត្រខាងលើនេះ រាជធានីភ្នំពេញ អាចមានកំណើនផ្ទៃដីកើនឡើងបន្ថែមទៀត ព្រោះបានកាត់ផ្ទៃដីពីខេត្តកណ្តាល និងកាត់ខ្លះពីរាជធានីភ្នំពេញទៅឱ្យខេត្តកណ្តាលវិញ ដូចនេះអាចកើនដល់៦៩៥,៤៦៤ គីឡូម៉ែត្រការ៉េ ។

ប៉ុន្តែទោះជាយ៉ាងណាតួរលេខនេះ នៅមិនទាន់ច្បាស់លាស់នោះទេ ដោយសារមន្ត្រីជំនាញកំពុងតែបន្តអនុវត្តន៍នីតិវិធី ដែលនឹងអាចរួចរាល់យ៉ាងយូរនៅអំឡុងពាក់កណ្តាលឆ្នាំ២០២១នេះតែម្តង ៕

ក្រុមហ៊ុនមកពីប្រទសចំនួនបីទទួលសិទ្ធិក្នុងការប្រមូលសំរាមនៅរាជធានីភ្នំពេញ

ដោយស៊ីវ ម៉េង

ភ្នំពេញៈ ក្រោយពីស្វែងរកនិងចំរាញ់ជាង១ឆ្នាំ ពេលនេះសាលារាជធានីភ្នំពេញ រកបានហើយនូវក្រុមហ៊ុនឯកជនចំនួន៣ ដើម្បីធ្វើអាជីវកម្ម ប្រមូលសំរាម នៅក្នុងរាជធានីភ្នំពេញ។

ក្រុមហ៊ុនឯកជនទាំង៣នោះ រួមមាន ក្រុមហ៊ុនស៊ីនទ្រី (កម្ពុជា) ក្រុមហ៊ុន Mizuda Group Co.,Ltd (ជប៉ុន) និងក្រុមហ៊ុន 800 Super/GAEA (សឹង្ហបុរី)។

រដ្ឋបាលរាជធានីភ្នំពេញ បានធ្វើពិធីប្រគល់-ទទួលកិច្ចសន្យាស្តីពី ការផ្តល់សេវាប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញ ធ្វើនៅព្រឹកថ្ងៃទី៥ ខែកុម្ភៈ ឆ្នាំ២០២១ ។

លោកឃួង ស្រេង អភិបាលរាជធានីភ្នំពេញបានលើកឡើងថា ការប្រគល់ទទួលកិច្ចសន្យានេះ គឺជាលទ្ធផលមួយនៃកំណែទម្រង់លើការងារគ្រប់គ្រង និងប្រមូលសម្រាមក្នុង រាជធានីភ្នំពេញគឺក្រុមហ៊ុនចំនួន៣ ដែលបានដេញថ្លៃឈ្នះ ក្នុងការផ្តល់សេវាប្រមូល

និងដឹកជញ្ជូនសំរាម នៅរាជធានីភ្នំពេញ ដែលគណៈកម្មការ ភីអរស៊ី (PRC)ដែលមានតំណាងពីក្រសួងសេដ្ឋកិច្ច និងហិរញ្ញវត្ថុ និងតំណាងរដ្ឋបាលរាជធានីភ្នំពេញ បានប្រើពេលពេញ១ឆ្នាំ ក្នុងការជ្រើសរើសយ៉ាងម៉ត់ចត់ ដោយបានអនុវត្តទៅតាមដំណើរការ និងនីតិវិធីលទ្ធកម្មដេញថ្លៃ ដែលប្រកបដោយភាពយុត្តិធម៌ តម្លាភាព និងស្របតាមស្តង់ដារអន្តរជាតិ ដែលត្រូវបានបែងចែកតាមតំបន់ចំនួន០៣ នៅរាជធានីភ្នំពេញ។

លោកបន្តថា តំបន់ចំនួន៣នោះរួមមាន តំបន់ទី១ ផ្តោតលើខ័ណ្ឌចំនួន៥ គឺ៖ ខណ្ឌទួលគោក ខណ្ឌឫស្សីកែវ ខណ្ឌសែនសុខ ខណ្ឌជ្រោយចង្វារ និងខណ្ឌព្រែកព្នៅដែលដេញថ្លៃឈ្នះដោយក្រុមហ៊ុន 800 ស៊ូបភើ (SUPER) និងក្រុមហ៊ុន គួបប៊ីល អ៊ែកសិន ហ្វរអ៊ិនវ៉ាយរ៉ឺម៉ឺន អ៊ីវែរនេស ផាប់ប្រឹក លីមីតធីត។

តំបន់ទី២ រួមមានខ័ណ្ឌចំនួន៥ គឺ៖ ខណ្ឌដូនពេញ ខណ្ឌ៧មករា ខណ្ឌ ដង្កោ ខណ្ឌពោធិ៍សែនជ័យ និងខណ្ឌកំបូល ដែលដេញថ្លៃឈ្នះដោយក្រុមហ៊ុន ម៉ីស៊ូដា គ្រុប (Mizuda Group Co., Ltd) ។ តំបន់ទី៣ មានខ័ណ្ឌចំនួន៤ គឺ៖ ខណ្ឌចំការមន ខណ្ឌបឹងកេងកង ខណ្ឌមានជ័យ និងខណ្ឌច្បារអំពៅ ដែលដេញថ្លៃឈ្នះ ដោយក្រុមហ៊ុន ស៊ិនទ្រី (Cintri_Cambodia)/អេវើបាយ (Everbright China) ។

លោកឃួង ស្រេង បានជម្រុញដល់ប្រតិបត្តិករក្រុមហ៊ុនទាំង៣ សូមប្រតិបត្តិការផ្តល់សេវា ប្រមូល និងដឹកជញ្ជូនសំរាមសំណល់រឹង នៅតាមតំបន់របស់ខ្លួនឱ្យបានល្អអស់ពីសមត្ថភាព អស់ពីកម្លាំងកាយចិត្ត ប្រកបដោយប្រសិទ្ធភាព និងទំនួលខុសត្រូវខ្ពស់ និងសូមអាជ្ញាធរខណ្ឌទាំង១៤ មន្ទីរអង្គភាពជំនាញពាក់ព័ន្ធទាំងអស់ សូមសហការជាមួយប្រតិបត្តិករថ្មីទាំង៣នេះឱ្យបានល្អ។

កាលពីថ្ងៃទី ២៥ ខែតុលា ឆ្នាំ ២០១៩ សម្តេចតេ ជោ ហ៊ុន សែន បានប្រកាស ជា ផ្លូវការក្នុងកិច្ចប្រជុំពេញអង្គ គណៈរដ្ឋមន្ត្រីសម្រេចដកសិទ្ធិប្រមូលសំរាម នៅរាជធានី ភ្នំពេញពីក្រុមហ៊ុនស៊ិន ទ្រី ដោយដាក់ឲ្យស្ថិតក្រោមការគ្រប់គ្រង របស់រដ្ឋជាបណ្តោះអាសន្ន។

សម្តេចតេជោ ក៏បានប្រកាសឲ្យក្រសួងសេដ្ឋកិច្ច និងហិរញ្ញវត្ថុ និងអាជ្ញាធររាជធានីភ្នំពញ រៀបចំបែងចែកតំបន់ គ្រប់គ្រង និងប្រមូលសំរាម យ៉ាងហោចណាស់៤តំបន់ ហើយដាក់ ឲ្យក្រុមហ៊ុនឯកជន ដេញថ្លៃប្រមូល និងគ្រប់គ្រងសំរាម នៅរាជធានីភ្នំពេញ ដោយក្រុមហ៊ុន១ មានសិទ្ធិទទួលបានតែ១តំបន់ប៉ុណ្ណោះ។

ការដក សិទ្ធិ ពី ក្រុមហ៊ុន ស៊ីន ទ្រី ឈប់ ឲ្យ ប្រមូល សំរាម នៅ ភ្នំពេញ ដោយសារតែ ក្រុមហ៊ុន ផ្តាច់មុខយូរឆ្នាំមកហើយមួយនេះ មិនអាចគ្រប់គ្រង ប្រមូល និងដឹកជញ្ជូន សំរាម ទាន់ពេលវេលា។ ចំពោះការងារ គ្រប់ គ្រង និងប្រមូលសំរាមនេះ ត្រូវអនុវត្តន៍ ចាប់ពីថ្ងៃទី១ខែឧសភា ឆ្នាំ២០២១នេះតទៅ៕

មន្ត្រីកម្ពុជា-ជប៉ុននឹងពិភាក្សាគ្នាដើម្បីស្វែងរកឱកាសវិនិយោគ និងធុរកិច្ចនៅកម្ពុជាសប្ដាហ៍ក្រោយ

ដោយ ៖ រ៉ាណេត

ភ្នំពេញ ៖ មន្ត្រីជាន់ខ្ពស់តំណាងរដ្ឋាភិបាលកម្ពុជា-ជប៉ុន នឹងបើកកិច្ចប្រជុំលើកទី២១នៃគណៈកម្មាធិការចម្រុះរវាងប្រទេសទាំងពីរនៅថ្ងៃទី១១ ខែកុម្ភៈ សប្ដាហ៍ក្រោយនេះ ក្នុងគោលបំណងបង្កើនបរិយាកាសវិនិយោគ និងធុរកិច្ចរវាងប្រទេសទាំង២ឱ្យកាន់តែមានភាពល្អប្រសើរបន្ថែមទៀត។

តាមរយៈសេចក្ដីជូនដំណឹងរបស់ក្រុមប្រឹក្សាអភិវឌ្ឍន៍កម្ពុជានៅរសៀលថ្ងៃទី៥ ខែកុម្ភៈ ឆ្នាំ២០២១នេះបានបញ្ជាក់ថា កិច្ចប្រជុំ លើកទី២១ នៃគណៈកម្មាធិការចម្រុះ កម្ពុជា-ជប៉ុន ខាងលើនេះ នឹងដឹកនាំដោយលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោក ម៉ាសាហ៊ីរ៉ូ មីខាមី (Masahiro MIKAMI) ឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសជប៉ុនប្រចាំកម្ពុជា។

កិច្ចប្រជុំនេះ ធ្វើឡើងក្រោមក្របខណ្ឌ នៃកិច្ចព្រមព្រៀងរវាង ប្រទេសកម្ពុជា និងជប៉ុន ស្តីពីសេរីភាវូបនីយកម្ម ការជំរុញ និងការការពារវិនិយោគ ដែលត្រូវបានចុះហត្ថលេខា ដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក ស៊ីនហ្សូ អាបេ (Shinzo Abe) នាយករដ្ឋមន្ត្រីនៃជប៉ុន កាលពីថ្ងៃទី១៤ ខែមិថុនា ឆ្នាំ២០០៧។

កិច្ចប្រជុំទ្វេភាគីនេះ គឺជាផ្នែកមួយ នៃយន្តការថែទាំអ្នកវិនិយោគ ដែលបានផ្តល់ឱកាស ឲ្យអ្នកវិនិយោគជប៉ុន លើកឡើងដោយផ្ទាល់នូវបញ្ហាប្រឈម និងសំណូមពរ ជូនតំណាងរាជរដ្ឋាភិបាលកម្ពុជាពិនិត្យ និងរកដំណោះស្រាយ ក្នុងគោលបំណងជំរុញការវិនិយោគជប៉ុននៅកម្ពុជា ក៏ដូចជាធ្វើឲ្យប្រសើរឡើងនូវ បរិយាកាសវិនិយោគ និងធុរកិច្ចនៅកម្ពុជា៕

គណកម្មាធិការទីក្រុងស្អាតឲ្យសាធារណៈជនចូលរួមវាយតម្លៃពីទីក្រុង ខ័ណ្ឌរបស់ខ្លួន

ដោយ : គង់ សូរិយា

ភ្នំពេញៈ គណៈកម្មាធិការជាតិវាយតម្លៃទីក្រុងស្អាត បានសម្រេចអំពាវនាវឲ្យសាធារណៈជនភ្ញៀវទេសចរណ៍ជាតិ អន្តរជាតិទាំងអស់ ចូលរួមវាយតម្លៃពីមូលដ្ឋានទីក្រុង ខ័ណ្ឌដែលពួកគរស់នៅទាក់ទងនឹងសុវត្ថិភាពទេសចរណ៍។

យោងសេចក្ដីសម្រេចលេខ០០៧ សសរ.គជវទ ចុះថ្ងៃទី២០ ខែវិច្ឆិកា ឆ្នាំ២០២០ ស្ដីពីលក្ខណវិនិច្ឆ័យ និងនីតិវិធីនៃការផ្ដល់វិញ្ញាបនបត្របញ្ជាក់ ចំពោះរដ្ឋបាលថ្នាក់ក្រោមជាតិ ដែលអនុវត្តវិធានសុវត្ថិភាពទេសចរណ៍បានល្អ ក្នុងចលនាប្រឡងប្រណាំង “ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ” និងសេចក្ដីជូនដំណឹងលេខ ០១០ សជណ.គជវទ ចុះថ្ងៃទី២០ ខែវិច្ឆិកា ឆ្នាំ២០២០ ស្ដីពីការប្រឡងប្រណាំង “ការអនុវត្តវិធានសុវត្ថិភាពទេសចរណ៍” ចំពោះរដ្ឋបាលថ្នាក់ក្រោមជាតិ ក្នុងចលនាប្រឡងប្រណាំង “ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ”។

ការវាយតម្លៃនេះធ្វើឡើង ស្របតាមឧបសម្ព័ន្ធ១នៃសេចក្ដីសម្រេចលេខ ០០៧ សសរ.គជវទ ចុះថ្ងៃទី២០ ខែវិច្ឆិកា ឆ្នាំ២០២០ ត្រង់លក្ខណវិនិច្ឆ័យទី៤ ស្ដីពី “កម្រិតភាពពេញចិត្តរបស់ភ្ញៀវទេសចរ ចំពោះលក្ខខណ្ឌសុវត្ថិភាពទេសចរណ៍ នៅតាមគោលដៅក្រុង ខណ្ឌនីមួយៗ”។

សាធារណៈជនទាំងអស់ចូលរួមវាយតម្លៃដល់ក្រុង ខណ្ឌ បេក្ខភាពទាំង៤១ អាស្រ័យហេតុនេះ គណៈកម្មាធិការជាតិវាយតម្លៃទីក្រុងស្អាត សូមអំពាវនាវដល់សាធារណៈជនទាំងអស់ ក៏ដូចជាភ្ញៀវទេសចរជាតិ និងអន្តរជាតិចូលរួមវាយតម្លៃដល់បេក្ខភាពក្រុង ខណ្ឌ ដែលបានអនុវត្តវិធានសុវត្ថិភាពទេសចរណ៍បានល្អ ដោយចុចទៅលើប៊ូតុង “ពេញចិត្ត” ឬ “មិនពេញចិត្ត” ចំពោះមូលដ្ឋានអាជីវកម្មទេសចរណ៍តាមក្រុង ខណ្ឌ ដែលលោកអ្នកបានធ្លាប់បានប្រើប្រាស់សេវាកម្ម (បញ្ជាក់លោកអ្នកអាចវាយតម្លៃលើសពីមួយដង) តាមរយៈស្កេនកូដ(QR Code) ឬចុចតំណ Link: http://cambodiacleancity.gov.kh/kh/tourismsafetymeasure៕

ស្ពានតភ្ជាប់ពីផ្លូវជាតិលេខ៥ទៅកាន់ទីក្រុងរណបជ្រោយចង្វារសម្រេចបានជាង៣០ភាគរយហើយ

ដោយ : គង់ សូរិយា

ភ្នំពេញៈ ការសាងសង់ស្ពានតភ្ជាប់រវាងផ្លូវជាតិលេខ៥ និងទីក្រុងរណបជ្រោយចង្វារសម្រេចបានប្រមាណ៣០ភាគរយហើយ រហូតមកទល់ពេលនេះ ខណៈដំណើរការសាងសង់កំពុងប្រព្រឹត្តទៅដោយរលូន។

អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៥ កុម្ភៈនេះថា ដំណើរការសាងសង់ស្ពានបាន បានវិវត្តន៍ទៅមុខតាមការគ្រោងទុក ដោយមិនមានការពន្យាពេលនោះទេ ព្រោះក្រុមការងារជំនាញកំពុងធ្វើការងារនេះយ៉ាងសកម្ម ដែលរហូតមកទល់ពេលនេះ តាមការប៉ាន់ស្មានដំណើរការសាងសង់សម្រេចបានប្រមាណ៣០ភាគរយហើយ។

លោកបន្តថា “តាមការស្មាន ខ្ញុំគិតថាស្ពាននេះសម្រេចបាន៣០ភាគរយហើយ ព្រោះពេលនេះសរសរស្ពានបានផុសចេញពីទឹកហើយ”។

ស្ពាននេះជាប្រភេទស្ពានសាងសង់ យោងដោយខ្សែកាបនេះ នឹងមានប្រវែងជាង៥០០ម៉ែត្រ និងចំណាយថវិកាសាងសង់៣៥លានដុល្លារអាមេរិក ដែលបានមកពីគំរោងជួលដីទីក្រុងរណបជ្រោយចង្វាររបស់រដ្ឋាភិបាលដល់ក្រុមហ៊ុនOCIC។

លោកបណ្ឌិតវ៉ាន់ វ៉ាតអ្នកឯកទសផ្នែកនគរូបនីយកម្មបានថ្លែងថា ការសាងសង់ស្ពានវាជាជម្រើសល្អប្រសើរមួយ ដើម្បីកាត់បន្ថយការកកស្ទះចរាចរណ៍ ព្រោះវាផ្តល់ជម្រើសកាន់តែច្រើនសម្រាប់ប្រជាពលរដ្ឋធ្វើដំណើរ។

លោកបន្តថា “តំបន់នេះមានចរាចរណ៍មមាញឹក ហេតុនេះការសាងសង់ស្ពានថ្មីបន្ថែមទៀត ពិតជាអាចជួយដោះស្រាយបញ្ហាកកស្ទះចរាចរណ៍នៅតំបន់នេះបាន”៕