ដោយៈ រ៉ាណេត

ភ្នំពេញៈ រដ្ឋាភិបាលប្រទេសអូស្ត្រាលី បានប្រកាសចូលរួមគាំទ្រហិរញ្ញប្បទានឥតសំណង ក្នុងទំហំទឹកប្រាក់៣០០លានដុល្លារអូស្ត្រាលី ដល់ប្រទេសដែលស្ថិតនៅក្នុងតំបន់អាស៊ីអាគ្នេយ៍ ដែលក្នុងនោះក៏មានប្រទេសកម្ពុជាផងដែរ ក្រោមកញ្ចប់ជំនួយវ៉ាក់សាំងបង្ការជំងឺកូវីដ១៩។

ឯកអគ្គរដ្ឋទូតអូស្ត្រាលីប្រចាំនៅកម្ពុជា លោក Pablo Chiho Kang នៅថ្ងៃទី២៣ ខែធ្នូ ឆ្នាំ២០២០ម្សិលមិញនេះ បានសម្តែងនូវសេចក្តីសោមនស្សរីករាយ និងសម្តែងនូវការកោតសរសើរ ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលសម្រេចបាននូវសមិទ្ធផលផ្លែផ្កាជាច្រើន ជាពិសេស ការចាត់វិធានការយ៉ាងល្អប្រសើរ ក្នុងការបង្ការ និង ទប់ស្កាត់ការរីករាលដាលនៃជំងឺកូវីដ-១៩។

លោកបានជម្រាបជូនថា “រដ្ឋាភិបាលអូស្ត្រាលីសន្យា នឹងជួយឧបត្ថម្ភគាំទ្រដល់រាជរដ្ឋាភិបាលកម្ពុជា តាមរយៈការផ្តល់ហិរញ្ញប្បទានឥតសំណង សម្រាប់អនុវត្តគម្រោង និងកម្មវិធីនានាដែល កំពុងប្រតិបត្តិការនៅកម្ពុជាបន្តទៀត សំដៅលើកកម្ពស់គុណភាពសេវាសុខាភិបាល វិស័យកសិកម្ម ការផ្គត់ផ្គង់ទឹកស្អាត និងហេដ្ឋារចនាសម្ព័ន្ធអគ្គិសនី និងគាំទ្ររាជរដ្ឋាភិបាល ក្នុងការអនុវត្តគោលនយោបាយគាំពាសង្គម និងធានាសមភាពក្នុងការទទួលបាននូវសេវាសង្គម ដល់ជនពិការ និងស្ត្រីងាយរងគ្រោះ”។

រដ្ឋាភិបាលអូស្ត្រាលី នឹងចូលរួមគាំទ្រហិរញ្ញប្បទាន មានទំហំទឹកប្រាក់៣០០លានដុល្លារអូស្ត្រាលី ដល់ប្រទេសនៅតំបន់អាស៊ីអាគ្នេយ៍ រួមមានប្រទេសកម្ពុជាផងដែរ ក្រោមកញ្ចប់ជំនួយ វ៉ាក់សាំងបង្ការជំងឺកូវីដ-១៩ ក្នុងន័យបង្ហាញពីគោលជំហររបស់រដ្ឋាភិបាលអូស្ត្រាលី ដើម្បីឆ្លើយតបទៅនឹងការបញ្ឈប់ ការរីករាលដាលនៃជំងឺកូវីដ-១៩ ប្រកបដោយប្រសិទ្ធភាពសម្រាប់ជាប្រយោជន៍ដល់កម្ពុជា និងប្រទេសក្នុងតំបន់អាស៊ីអាគ្នេយ៍ ។

លោកអគ្គបណ្ឌិតសភាចារ្យឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា រដ្ឋាភិបាលនិងប្រជាជនអូស្ត្រាលី តែងតែចូលរួមចំណែកជាមួយនឹងបណ្តាដៃតួអភិវឌ្ឍន៍នានា ជួយឧបត្ថម្ភគាំទ្រផ្តល់នូវជំនួយបច្ចេកទេស និងហិរញ្ញប្បទានឥតសំណងនានា ក្នុងការរួមចំណែកដល់ការអភិវឌ្ឍសេដ្ឋកិច្ច និងសង្គមនៅកម្ពុជា ជាពិសេស លើវិស័យអប់រំ សុខាភិបាល កសិកម្ម ថាមពល ហេដ្ឋារចនាសម្ព័ន្ធ និងអភិបាលកិច្ចជាដើម៕

        ដោយស៊ីវ ម៉េង

        ភ្នំពេញៈ នៅសល់រយៈពេល៧ថ្ងៃទៀតប៉ុណ្ណោះ យើងស្វាគមន៍ឆ្នាំ២០២១ទាំងអស់គ្នា ហើយមានដដំណឹងរីករាយជាច្រើនក់តមានឡើង ដោយកិច្ចព្រមព្រៀងពាណិជ្ជកម្មជាច្រើននឹងត្រូវចាប់ផ្តើមអនុវត្តន៍ ដែលនឹងទាក់ទាញការវិនិយោគ ការនាំចេញនិងជំរុ​ញកំនើនសេដ្ឋកិច្ចនៅកាន់វិបុលភាពជាថ្មី។

កិច្ចព្រមព្រៀងសំខាន់ៗ ដែលនឹងចូលជាធរមាននៅឆ្នាំ២០២១ រួមមានកិច្ចព្រមព្រៀងពាណិជ្ជកម្មសេរីកម្ពុជា ចិន កិច្ចព្រមព្រៀងលើកលែងពន្ឋគយ ពីប្រទេសអង់់គ្លេសផ្តល់ជូនកម្ពុជា ច្បាប់វិនិយោគថ្មីនឹងអនុវត្តន៍ហើយចូលជាធរមាន និងការចុះហត្ថលេខាលើ​កិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយ(RCEP) ជាកិច្ចព្រមព្រៀងពាណិជ្ជ​កម្មធំបំផុតក្នុងពិភពលោក ដែលនឹងចូលជាធរមានផងដែរ។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍  ឲ្យដឹងតាមទូរស័ព្ទនារសៀលថ្ងៃទី២៤ ធ្នូនេះថា ការអនុវត្តន៍កិច្ចព្រមព្រៀងពាណិជ្ជកម្មសេរីរវាងកម្ពុជា ចិននឹងទាក់ទាញការវិនិយោគនៅកម្ពុជា កាន់តែច្រើនថែមទៀត ដោយក្រុមហ៊ុនចិន អាមេរិក ជប៉ុន កូរ៉េជាដើមនឹងចូលមកវិនិយោគនៅកម្ពុជា ដើម្បីនាំចេញទៅកាន់ប្រទេសចិនដោយរួចពន្ឋ។

លោកបន្តថា “តាមផែនការចិននឹងជ្រើសរើសប្រទេសកម្ពុជា ជាមូលដ្ឋានផលិត​កម្ម ដើម្បីនាំចេញទៅកាន់បណ្តាប្រទេសនានាក្នុងតំបន់អាស៊ាន ហើយចិនកំពុងវិនិយោគលពហុវិស័យនៅកម្ពុជា”។លោកបន្តថា “ចិនកំពុងប្រមូលទិញកសិផលកម្ពុជាយ៉ាងច្រើនដូចជា ចេក ស្វាយ ស្វាយចន្ទីរជាដើម ដែលនេះនឹងជួយជំរុញសេដ្ឋកិច្ចកម្ពុជាហក់ឡើងវិញកាន់តែលឿន”។

លោកឧកញ៉ាលឹម ហេងបានបន្តថា នៅឆ្នាំ២០២១នេះ មានរឿងវិជ្ជមានជាច្រើនសំរាប់កម្ពុជា ទាំងការអនុវត្តន៍កិច្ចព្រមព្រៀងពាណិជ្ជកម្មសេរីជាមួយចិន ការអនុវត្ត​កិច្ចព្រមព្រៀងRCEP ការអនុវត្តកិច្ចព្រមព្រៀងលើកលែងពន្ឋ(GSP)ពីអង់គ្លេសដល់កម្ពុជា ដែលនឹងធ្វើឲ្យកំនើននៃការនាំចេញកម្ពុជាកើនឡើង។

អ្នកស្រាវជ្រាវសេដ្ឋកិច្ចនៃរាជបណ្ឌិតកម្ពុជា លោកបណ្ឌិតហុង វណ្ណៈ

បានមានប្រ​សាសន៍ថា តាមរយៈកិច្ចព្រមព្រៀងពាណិជ្ជកម្មធំៗខាងលើ នឹងជំរុញសេដ្ឋកិច្ចកម្ពុជាកាន់​តែមានកំនើនថែមទៀតនៅឆ្នាំ២០២១ខាងមុខ ប្រសិនជាបញ្ហារីករាលដាលនៃកូវីដ​១៩អាចគ្រប់គ្រងបាន ប៉ុន្តែយើងមានសុទិដ្ឋិនិយម ដោយសារមានវ៉ាក់សាំងបានចេញលក់បណ្តើរៗហើយ។

លោកបន្តថា “កិច្ចព្រមព្រៀងទាំងនេះ នឹងលើកពង្រីកទំហំពាណិជ្ជកម្មរបស់កម្ពុជាឲ្យកាន់តែមានភាពល្អប្រសើរ ពិសេសការនាំចេញរបស់កម្ពុជានឹងកើនឡើង ប៉ុន្តែបញ្ហានៅត្រង់ថា តើយើងបានត្រៀមផលិតផលមានគុណភាព សវត្ថិភាពសំរាប់ការនាំាំចេញគ្រប់គ្រាន់ឬនៅ?”។លោកបន្តថា “វិស័យទេសចរណ៍កម្ពុជា ក៏នឹងងើបឡើងវិញ តាមរយៈការយកចិត្តទុកដាក់របស់រដ្ឋាភិបាល ពិសេសការកសាងហេដ្ឋារចនាម្ព័ន្ឋនៅខេត្តព្រះសីហនុ ខេត្តសៀមរាប ដែលនឹងបញ្ចប់នាពេលខាងមុខ”។

ទាក់ទងនឹងបញ្ហាGSPរបស់សហរដ្ឋអាមេរិក លោកបណ្ឌិតហុង វណ្ណៈបានមានប្រសាសន៍ថា កិច្ចព្រមព្រៀងនេះ មិនទំនងជាមានការគំរាមកំហែងណាមួយនោះទេ ដោយសារទំហំនាំចេញពីកម្ពុជានៅឆ្នាំនេះ សម្រេចបានកំនើន១៦ភាគរយ ដោយមានទំហំ​ជាង៥,៨ពាន់លានដុល្លារអាមេរិក បើទោះពិភពលោកក៏ដូចកម្ពុជាកំពុងរងវិបត្តិនៃជំងឺកូវីដ១៩ក្តី។

លោកបន្តថា រដ្ឋាភិបាលកម្ពុជាបានយកចិត្តទុកដាក់ និងកែទម្រង់ជាបន្តបន្ទាប់ ដែលផ្តល់ឳកាសយ៉ាងច្រើន ដល់អ្នកវិនិយោគក្នុងស្រុក និងអន្តរជាតិ ដែលជាការជំរុញកំនើន នៃការវិនិយោគបន្ថែមទៀតលើវិស័យជាច្រើន ទាំងកសិកម្ម ទេសច​រណ៍ សំណង់ជាដើម៕

ដោយៈ រ៉ាណេត

ភ្នំពេញៈ អាគារទីបញ្ជាការស្រាលមានទំហំ២១,៧ គុណនឹង៤២ម៉ែត្រ កម្ពស់៣ជាន់ និងបំពាក់គ្រឿងបរិក្ខារចាំបាច់នានា នៅលើផ្ទៃដីទំហំ១.៥៧១,១៨៩ម៉ែត្រក្រឡា ស្ថិ​តនៅក្នុងសង្កាត់ស្រះចកខណ្ឌដូនពេញ នឹងត្រូវសាងសង់ឡើងដោយថ្នូរ ជាមួយនឹងដីទំហំ២០ហិកតានៅបឹងតាមោក(កប់ស្រូវ)។

ទីស្តីការគណៈរដ្ឋមន្ត្រី កាលពីថ្ងៃទី២៣ខែធ្នូឆ្នាំ២០២០ បានជម្រាបជូនរដ្ឋមន្ត្រីក្រសួងសេដ្ឋកិច្ចហិរញ្ញវត្ថុ, រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រដ្ឋមន្ត្រីក្រសួងធនធានទឹកនិងឧតុនិយម និងរដ្ឋបាលរាជធានីភ្នំពេញ តាមរយៈលិខិតលេខ១០៩៩ សជណ.មយ អំពីការរៀបចំសាងសង់ទីបញ្ជាការស្រាល ទំហំ២១,៧គុណនឹង៤២ម៉ែត្រកម្ពស់៣ជាន់ និងបំពាក់គ្រឿងបរិក្ខារចាំបាច់នានា នៅលើផ្ទៃដីទំហំជិត១.៦ ម៉ែ​ត្រក្រឡារបស់លោក លន់ ហាក់ និងអ្នកស្រីឈុន ចាន់ធី ស្ថិតនៅសង្កាត់ស្រះចក ខណ្ឌដូនពេញ សម្រាប់ឱ្យកងកម្លាំងប្រើប្រាស់ ដើម្បីបំពេញការងារថែរក្សាសន្តិសុខ ការពា​រសុវត្ថិភាព ជូនថ្នាក់ដឹកនាំនៅចំណុចគោលដៅទីស្តីការគណៈរដ្ឋមន្ត្រី។

នៅក្នុងលិខិតដែលចុះហត្ថលេខាដោយលោក កែន សត្ថា រដ្ឋលេខាធិការទីស្តីការគណៈរដ្ឋមន្ត្រី បានសរសេរដោយយោងលិខិត០៦៨/២០ លស.គ ចុះថ្ងៃទី១៤ខែធ្នូឆ្នាំ២០២០ របស់រដ្ឋបាលរាជធានីភ្នំពេញ លិខិតលេខ៦៥៤ខន /០២០ សជណចុះថ្ងៃទី១៧ខែធ្នូឆ្នាំ២០២០ របស់ខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា,ចំណារដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ចុះថ្ងៃទី១៦ខែធ្នូឆ្នាំ២០២០។

ករណីខាងលើទីស្តី ការគណៈរដ្ឋមន្ត្រីសូមជម្រាបជូនថា រាជរដ្ឋាភិបាលបានសម្រេ​ចធ្វើប្រទានកម្មជូនលោក លន់ ហាក់ និងអ្នកស្រី ឈុន ចាន់ធី នូវផ្ទៃដីបឹងតាមោក(កប់ស្រូវ) ទំហំ២០ហិកតា ស្ថិតនៅសង្កាត់គោករការ ខណ្ឌព្រែកព្នៅ រាជធានីភ្នំពេញ ដូចមានគំនូសប្លង់បង្ហាញ ទីតាំងភ្ជាប់ជាមួយដោយលោក លន់ ហាក់ និងអ្នកស្រី ឈុន ចាន់ធី ត្រូវប្រគល់ផ្ទៃដីកម្មសិទ្ធិទំហំ ១.៥៧១,១៨៩ ម៉ែត្រក្រឡា ស្ថិតនៅសង្កាត់ស្រះចក ខណ្ឌដូនពេញ រាជធានីភ្នំពេញ និងចំណាយថវិកាបន្ថែម ដើម្បីសាងសង់អគារទីបញ្ជាការស្រាលទំហំ ២១,៧ ម៉ែត្រ គុណនឹង៤២ម៉ែត្រ កម្ពស់៣ជាន់ និងបំពាក់សម្ភារៈបរិក្ខារចាំបាច់នានា នៅលើទីតាំងខាងលើ ជូនរដ្ឋបាលរាជធានីភ្នំពេញ។

នៅក្នុងលិខិតបានបញ្ជាក់ទៀតថា លោក លន់ ហាក់ និង អ្នកស្រី ឈុន ចាន់ធី ត្រូវផ្ទេរកម្មសិទ្ធិដីទំហំ ១.៥៧១,១៨៩ម៉ែត្រក្រឡានេះ មកជាទ្រព្យសម្បត្តិរបស់រដ្ឋបាលរាជធានីភ្នំពេញ និងត្រូវធ្វើការសាងសង់អគារទីបញ្ជាការស្រាល ទំហំ ២១,៧ ម៉ែត្រគុណនឹង៤២ម៉ែត្រកម្ពស់៣ជាន់និងបំពាក់សម្ភារៈបរិក្ខារចាំបាច់ នានា នៅលើទីតាំងខាងលើជូនរដ្ឋបាលរាជធានីភ្នំពេញឱ្យបានរួចរាល់ជាស្ថាពរ ក្នុងរយៈពេល១៨(ដប់ប្រាំបី)ខែ ក្រោយពីទទួលបានគោលការណ៍អនុញ្ញាតពីរាជរដ្ឋាភិបាល។ ការផ្ទេរកម្មសិទ្ធិអចលនទ្រព្យទាំងអស់ខាងលើ ពន្ធអាករ និងសេវាអន្តរក្រសួងនានាជាបន្ទុករបស់រដ្ឋ៕

ដោយ ៖ រ៉ាណេត

ភ្នំពេញ៖ ក្រសួងចំនួន៣ បាន និងកំពុងបើកកិច្ចប្រជុំពិភាក្សាលើការប្រមូលពន្ធលើសេវាឌីជីថល (Digital Services Tax) ដើម្បីព្រៀងច្បាប់អនុវត្តនៅពេលឆាប់ៗខាងមុខនេះ។

រដ្ឋលេខាធិការក្រសួងពាណិជ្ជកម្ម លោកសុខ សុភ័ក្រ្ត នៅថ្ងៃទី២៤ ខែធ្នូ ឆ្នាំ២០២០ បានដឹកនាំក្រុមការងារជំនាញចូលរួមកិច្ចប្រជុំអន្តរក្រសួងដើម្បីពិភាក្សាលើការប្រមូលពន្ធលើសេវាឌីជីថល (Digital Services Tax) ជាមួយក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច និងហិរញ្ញវត្ថុ តាមរយៈប្រព័ន្ធអនឡាញ។

លោកបានលើកឡើងអំពីនិន្នាការអន្តរជាតិ និងតំបន់ចំពោះការកំណត់ពន្ធលើផលិតផល និងសេវាឌីជីថល អំពីកាតព្វកិច្ចផ្នែកពន្ធដែលជាការប្តេជ្ញាចិត្តរបស់ព្រះរាជាណាចក្រកម្ពុជានៅក្រោមក្របខណ្ឌអង្គការពាណិជ្ជកម្មពិភពលោក (WTO) ក្របខណ្ឌគតិយុត្តពាក់ព័ន្ធនឹងការធ្វើពាណិជ្ជកម្មតាមប្រព័ន្ធអេឡិចត្រូនិកនៅក្នុងព្រះរាជាណាចក្រកម្ពុជា និងការធ្វើពាណិជ្ជកម្មតាមប្រព័ន្ធអេឡិចត្រូនិកឆ្លងដែន (Cross-border E-Commerce)។

ជាមួយគ្នានេះលោកក៏បានបង្ហាញនូវការគាំទ្រចំពោះគំនិតផ្តួចផ្តើមរបស់ក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ចនិងហិរញ្ញវត្ថុ នៅក្នុងការបង្កើតក្រុមការងារអន្តរក្រសួង ដើម្បីសិក្សាស្វែងយល់ឱ្យកាន់តែច្បាស់ និងស៊ីជម្រៅអំពីយន្តការ និងនីតិវិធីនៅក្នុងការប្រមូលពន្ធលើសេវាឌីជីថលក្នុងកម្រិតសកល និងតំបន់ ដោយនឹងសហការជាមួយនឹងក្រសួង-ស្ថាប័នពាក់ព័ន្ធ ក៏ដូចជាវិស័យឯកជនផងដែរ។

លោកសុខ សុភ័ក្ត្រ បានជំរុញឲ្យមានការសិក្សាអោយលម្អិតបំផុត ទាំងការប្រមូលទិន្នន័យសម្រាប់វិភាគ និងការវាយតម្លៃលើផលប៉ះពាល់ និងកាលានុវត្តភាពចេញពីការយកពន្ធលើសេវាឌីជីថលនេះ ដើម្បីធានាថា គោលនយោបាយប្រមូលពន្ធលើសេវាឌីជីថលនេះ ផ្តល់តម្លាភាព សមធម៌ និងតុល្យភាព ជូនក្រុមហ៊ុនឯកជនផ្តល់សេវាឌីជីថល អ្នកប្រើប្រាស់សេវាឌីជីថល និងស្ថាប័នអនុវត្តគោលនយោបាយនេះ ៕

ដោយ ៖ គង់ ម៉ាលីន

ភ្នំពេញ៖ គិតត្រឹមចុងឆ្នាំ២០២០នេះ សមាគមសម្ព័ន្ធខ្មែរចិននៅកម្ពុជា បានបង្កើតឡើង ដោយបងប្អូនខ្មែរខ្សែស្រឡាយចិន និងបងប្អូនខ្មែរដើមកំណើតចិន កាលពី៣០ឆ្នាំមុន បានចូលរួមចំណែកក្នុងការជួយទ្រទ្រង់ និងអភិវឌ្ឍន៍សេដ្ឋកិច្ចកម្ពុជាបានយ៉ាងល្អប្រសើរបំផុត។

តាមរយៈលិខិតអបអររបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសខួបទី៣០ នៃថ្ងៃបង្កើតសមាគមសម្ព័ន្ធខ្មែរចិននៅកម្ពុជា បានឱ្យដឹងថា រយៈពេល៣០ឆ្នាំកន្លងមកនេះ សមាគមបានរីកចម្រើនយ៉ាងឆាប់រហ័ស ដោយមានសមាគមនិកាយទាំង៥ រួមមាន សមាគមនិកាយទាជីវ សមាគមនិកាយខិ សមាគមនិកាយកាតាំង សមាគមនិកាយហុកគៀន និងសមាគមនិកាយចិនហៃណាំ។

នៅក្នុងលិខិតដដែលនេះ សម្ដេចតេជោបានឱ្យដឹងទៀតថា សមាគមត្រកូល សមាគមខ្មែរ ចិនតាមបណ្ដាខេត្តក្រុងស្រុកនិងសមាគមពាណិជ្ជកម្មចិនផ្សេងទៀតរួមសាមគ្គីគ្នា កសាង និងអភិវឌ្ឍសង្គមជាតិកម្ពុជា តាមរយៈការចូលរួមរក្សាទំនៀមទំលាប់និងវប្បធម៌រស់នៅរបស់បងប្អូនខ្មែរចិន ការចូលរួមបណ្ដុះបណ្ដាលធនធានមនុស្ស ដោយបង្កើតសាលារៀនខ្មែរ ចិន ការទាក់ទងធ្វើពាណិជ្ជកម្ម និងវិនិយោគជាមួយបរទេសជាដើម។

សមាគមខ្មែរចិន បានរៀបចំកម្មវិធីជួបជុំបងប្អូនខ្មែរចិនរាប់ពាន់នាក់ រៀបចំវេទិកាវិនិយោគនិងធុរកិច្ចនៅកម្ពុជា ដោយមានវិនិយោគិនពីបរទេសរាប់រយនាក់ចូលរួម បានធ្វើស្ពានសម្រាប់ភ្ជាប់ទំនាក់ទំនងប្រជាជនកម្ពុជា និងប្រជាជនចិន ដោយនាំមកនូវផលប្រយោជន៍បសម្រាប់ធ្វើការអភិវឌ្ឍន៍សេដ្ឋកិច្ច និងសង្គមកម្ពុជា។

សម្ដេចតេជោ មានប្រសាសន៍ថា សម្ដេចជឿថា សមាជិកសមាជិកាទាំងអស់ក្នុងសម្ព័ន្ធ ខ្មែរចិន បងប្អូនខ្មែរចិន នឹងបន្តរួមគ្នា រួមចំណែកថែរក្សាសុខសន្តិភាពដែលជាកត្តាចាំបាច់សម្រាប់ការអភិវឌ្ឍន៍សេដ្ឋកិច្ចសង្គម ដើម្បីកសាងជីវភាពរស់នៅកាន់តែប្រសើររបស់បងប្អូនខ្មែឬចិន និងបងប្អូនខ្មែរទូទាំងប្រទេសកម្ពុជា៕

សុខុម

គូឡាឡាំពួ: ការងើបវិញនៃសេដ្ឋកិច្ចរបស់ប្រទេសម៉ាឡេស៊ី ត្រូវបានវាស់ស្ទង់តាមរយៈសន្ទស្សន៍ដ៏គួរឱ្យអបអរសាទរពីវិស័យលក់រាយ វិស័យទេសចរណ៍ និងទំនិញឧស្សាហកម្ម។ នេះបើយោងតាមគេហទំព័រ themalaysianreserve.com ចុះផ្សាយកាលពីថ្ងៃទី២២ ធ្នូ។

ឧបនាយករដ្ឋមន្រ្តី Arthur Joseph Kurup ថ្លែងទៅកាន់សភាជាន់ខ្ពស់របស់ម៉ាឡេស៊ី កាលពីថ្ងៃច័ន្ទ ទី២១ ធ្នូថា វិស័យលក់រាយកំពុងចាប់ផ្ដើមងើបឡើងវិញជាលំដាប់។

លោកបន្ថែមថា អត្រាជួលសណ្ឋាគារទូទាំងប្រទេសបានកើនឡើង ២៣,៤% បន្ទាប់ពីបទបញ្ជាគ្រប់គ្រងការចល័តរបស់មនុស្សហៅកាត់ MCO ត្រូវបានដកចេញវិញ និងការធ្វើដំណើរឆ្លងកាត់ពីរដ្ឋមួយទៅរដ្ឋមួយត្រូវបានអនុញ្ញាត។

លោកគូសបញ្ជាក់ថា តម្លៃប្រេងដូងឆៅបានឡើងដល់ ៣.៤២២ រីងហ្គីត (៨៤៣ ដុល្លារអាមេរិក) ក្នុងមួយតោនក្នុងខែវិច្ឆិកា ចំណែកឯតម្លៃជ័រកៅស៊ូក្រែបបានឡើងថ្លៃដល់កម្រិតខ្ពស់បំផុតដល់ ១,៥៦ ដុល្លារអាមេរិក ក្នុងមួយគីឡូក្រាម។

លោកថ្លែងបន្តថា “ការឆ្លងរាតត្បាតវីរុសកូវីដ-១៩ បានជះផលប៉ះពាល់ដល់កំណើនសេដ្ឋកិច្ចរបស់ម៉ាឡេស៊ី នៅឆ្នាំនេះ។ GDP (ផលិតផលក្នុងស្រុកសរុប) បានធ្លាក់ចុះ ២,៧% ក្នុងត្រីមាសទី៣ នៃឆ្នាំ២០២០។ វិស័យសំខាន់ៗទាំងអស់នៃសេដ្ឋកិច្ចម៉ាឡេស៊ី បានរងផលប៉ះពាល់ និងធ្លាក់ចុះ ជាពិសេសវិស័យសេវាកម្មបានធ្លាក់ចុះ ៤% ផលិតកម្មធ្លាក់ចុះ ១២,៤% កសិកម្មធ្លាក់ចុះ ០,៧% និងរ៉ែ ធ្លាក់ចុះ ៦,៨%”។

លោកបានបន្តទៀតថា ការធ្លាក់ចុះភាគច្រើនបណ្ដាលមកពីការអនុវត្តបទបញ្ជាគ្រប់គ្រងការចល័តរបស់មនុស្សហៅកាត់ MCO។ លោកគូសបញ្ជាក់ថា “ទោះជាយ៉ាងណា ផលប៉ះពាល់ជាអវិជ្ជមានមកលើកំណើនសេដ្ឋកិច្ចគ្រាន់តែជាស្ថានភាពបណ្តោះអាសន្នប៉ុណ្ណោះ ហើយរំពឹងថានឹងងើបឡើងវិញនៅឆ្នាំ ២០២១”។

GDP របស់ម៉ាឡេស៊ី ត្រូវបានរំពឹងថានឹងកើនឡើងចន្លោះពី ៦,៥% ទៅ ៧,៥% ក្នុងឆ្នាំ២០២១ ដោយសារស្ថានភាពល្អប្រសើរឡើងនៅក្នុងកំណើនសេដ្ឋកិច្ចសកលលោក និងពាណិជ្ជកម្មអន្តរជាតិ៕

រដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជាកំពុងរៀបចំឯកសារស្នើដាក់បញ្ចូលប្រាសាទកោះកេរទៅជាសម្បត្តិបេតិកភ័ណ្ឌពិភពលោករបស់អង្គការ UNISCO ខណៈពេលដែលបច្ចុប្បន្ន ក្រសួងវប្បធម៌កំពុងសហការជាមួយអ្នកជំនាញការជាតិ-អន្តរជាតិដើម្បីរៀបចំឯកសារ ហើយនឹងដាក់ជូនគណៈកម្មាធិការបេតិកភណ្ឌពិភពលោកពិនិត្យ និងសម្រេចក្នុងពេលឆាប់ៗខាងមុខនេះ។

រដ្ឋមន្ត្រីក្រសួងវប្បធម៌ លោក ស្រី ភឿង សកុណា បានបញ្ជាក់ពីគម្រោងនៃការស្នើសុំខាងលើនេះនៅក្នុងកិច្ចប្រជុំពេញអង្គលើកទី៦ នៃគណៈកម្មាធិការសម្របសម្រួលអន្តរជាតិសម្រាប់ការអភិរក្ស និងការលើកតម្លៃព្រះវិហារ (ICC-Preah Vihear) ដែលបានរៀបចំឡើងនៅថ្ងៃទី២២ ខែធ្នូ ឆ្នាំ២០២០ តាមរយៈប្រព័ន្ធ Video Conference ជាមួយលេខាធិការដ្ឋានរៀបចំរបស់អាជ្ញាធរជាតិព្រះវិហារ ដឹកនាំដោយសហប្រធាននៃប្រទេសចិន និងប្រទេសឥណ្ឌា រួមជាមួយបណ្តាប្រទេសជាសមាជិកចំនួន ៥ ទៀត ដូចជាប្រទេសប៊ែលហ្ស៉ិក បារាំង ជប៉ុន ថៃ និងសហរដ្ឋអាមេរិក។

លោកស្រី ភឿង សកុណា បានបញ្ជាក់ថា “ក្រសួងវប្បធម៌កំពុងសហការជាមួយអ្នកជំនាញការជាតិ និងអន្តរជាតិ ដើម្បីរៀបចំឯកសារដាក់បញ្ចូលប្រាសាទកោះកេរជាសម្បត្តិបេតិកភណ្ឌពិភពលោក ហើយនឹងដាក់ជូនគណៈកម្មាធិការបេតិកភណ្ឌពិភពលោកពិនិត្យ និងសម្រេចក្នុងពេលឆាប់ៗខាងមុខនេះ”។

កាលពីឆ្នាំ២០១៨ កម្ពុជាបានចុះសិក្សាស្រាវជ្រាវនៅតំបន់ប្រាសាទកោះកេរ ខេត្តព្រះវិហារ និងប្រាសាទបន្ទាយឆ្មារ ខេត្តបន្ទាយមានជ័យ ដើម្បីស្នើដាក់ប្រាសាទខ្មែរទាំងពីរនេះទៅក្នុងបញ្ជីសម្បត្តិបេតិកភណ្ឌពិភពលោក បន្ទាប់ពីប្រាសាទអង្គរវត្តបានចុះបញ្ជីជាសម្បត្តិបេតិកភណ្ឌពិភពលោកនៅឆ្នាំ១៩៩២ ប្រាសាទព្រះវិហារនៅឆ្នាំ២០០៨ និងតំបន់ប្រាសាទសំបូរព្រៃគុកនៅឆ្នាំ២០១៧។

ប្រាសាទកោះកេរមានទីតាំងស្ថិតនៅក្នុងភូមិស្រយ៉ង់ជើង ឃុំស្រយ៉ង់ ស្រុកគូលេន ខេត្តព្រះវិហារ មានចម្ងាយប្រមាណ ៧២ គីឡូម៉ែត្រពីទីរួមខេត្តសៀមរាប បើធ្វើដំណើរតាមផ្លូវលេខ ២១១ ហើយបើធ្វើដំណើរពីទីរួមខេត្តព្រះវិហារមានចម្ងាយ ៤៩ គីឡូម៉ែត្រប៉ុណ្ណោះ។

ទីតាំងប្រជុំប្រាសាទកោះកេរនេះ គឺជាអតីតរាជធានី «ឆោកគគ៌្យរ» របស់ព្រះបាទជ័យវរ្ម័នទី៤ ដែលត្រូវបានកសាងឡើងក្នុងសតវត្សទី១០ (៩២៨-៩៤២)។ ព្រះអង្គបានផ្លាស់ប្តូររាជធានីពីក្រុងយសោធរបុរៈ (ក្រុងអង្គរ) ទៅកាន់តំបន់កោះកេរនេះក្រោយពេលដណ្ដើមរាជបល្ល័ង្កពីក្មួយរបស់ព្រះអង្គ គឺព្រះបាទយសោវរ្ម័នទី២ ដែលសោយរាជ្យនៅក្រុងអង្គរ៕

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលកម្ពុជា បានសម្រេចអនុវត្តនូវវិធានការជុំទី៧ ដើយធ្វើការលើកលែងការបង់ពន្ធអាជីវកម្មសេវាកម្ម និងទេសចរណ៍គ្រប់ប្រភេទរហូតដល់ដំណាច់ខែមីនា ឆ្នាំ២០២១ខាងមុខនេះ ដើម្បីជួយសម្រួល និងទ្រទ្រង់ដល់វិស័យទេសចរណ៍ឱ្យនៅរក្សាបានភាពល្អប្រសើរ។

បន្ទាប់ពីពិនិត្យ និងថ្លឹងថ្លែងទៅលើស្ថានភាពសង្គម សេដ្ឋកិច្ច ពាណិជ្ជកម្ម និងការវិនិយោគទាំងក្នុងក្របខណ្ឌសកលលោក តំបន់ និងក្នុងស្រុក រាជរដ្ឋាភិបាលកម្ពុជាបានសម្រេចដាក់ចេញនូវវិធានការបន្ថែមជុំទី៧ក្នុងគោលបំណងរក្សាលំនឹងអាជីវកម្មខណៈដែលកម្ពុជាកំពុងបន្តប្រឈមនឹងវិបត្តិកូវីដ១៩ ក៏ដូចជាទ្រទ្រង់ និងស្ដារអាជីវកម្ម និងធុរកិច្ចឱ្យងើបឡើងវិញ ដើម្បីចូលរួមជំរុញកំណើនសេដ្ឋកិច្ចក្រោយបញ្ចប់វិបត្តិមួយនេះ។

នៅក្នុងសេចក្ដីសម្រេចរបស់រាជរដ្ឋាភិបាលកម្ពុជាដែលបានផ្សព្វផ្សាយនៅព្រឹកថ្ងៃទី២៤ ខែធ្នូ ឆ្នាំ២០២០នេះ បានបញ្ជាក់ថា រដ្ឋាភិបាលបានបន្តលើកលែងការបង់ពន្ធប្រចាំខែគ្រប់ប្រភេទចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មនៅក្នុងរាជធានីភ្នំពេញ ខេត្តសៀមរាប ព្រះសីហនុ កែប កំពត ក្រុងបាវិត និងក្រុងប៉ោយប៉ែត សម្រាប់រយៈពេល៣ខែបន្ថែមទៀត រាប់គិតចាប់ពីខែមករារហូតដល់ខែមីនា ឆ្នាំ២០២១ខាងមុខនេះ។
អាជីវកម្មទាំងអស់ដូចបានរៀបរាប់ខាងលើនេះ នៅតែបន្តមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញសម្រាប់គ្រប់គ្រងអាករលើតម្លៃបន្ថែម(E-VAT) ជារៀងរាល់ខែក្នុងអំឡុងពេលនៃការលើកលែងការបង់ពន្ធនេះ។

ជាមួយគ្នានេះ រដ្ឋាភិបាលក៏បានបន្តអនុវត្តការលើកលែងការបង់ពន្ធប៉ាតង់ និងពន្ធលើស្លាកយីហោ ចំពោះក្រុមហ៊ុនភ្នាក់ងារទេសចរណ៍ និងប្រតិបត្តិករក្នុងវិស័យទេសចរណ៍ដទៃទៀត។ អ្នកជាប់ពន្ធទាំងនេះ មានកាតព្វកិច្ចធ្វើបច្ចុប្បន្នភាពប៉ាតង់។

ដោយឡែកសម្រាប់អ្នកជាប់ពន្ធក្នុងវិស័យទេសចរណ៍រួមមានដូចជា សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មនៅក្នុងរាជធានីភ្នំពេញ ខេត្តសៀមរាប ព្រះសីហនុ កែប កំពត ក្រុងបាវិត និងក្រុងប៉ោយប៉ែត ត្រូវដាក់លិខិតប្រកាសពន្ធលើប្រាក់ចំណូលប្រចាំឆ្នាំ២០២០យ៉ាងយឺតបំផុតឱ្យបានមុនដំណាច់ខែមីនា ឆ្នាំ២០២១ ប៉ុន្តែមិនតម្រូវឱ្យបង់ពន្ធនោះទេ៕