អាស៊ានដាក់ទិសដៅជំរុញចលនាទេសចរឲ្យទៅដល់សហគមន៍ និងតំបន់ធម្មជាតិ

ដោយៈ គង់ សូរិយា

ភ្នំពេញៈ មេដឹកនាំទេសចរណ៍មកពីបណ្តាប្រទេសសមាជិកអាស៊ាន និងអគ្គលេខាធិការអាស៊ាន ពិគ្រោះគ្នាយ៉ាងយកចិត្តទុកដាក់ និងសម្រេចឯកភាពគ្នាដាក់ទិសដៅជំរុញ ចលនាទេសចរក្នុងស្រុករៀងៗខ្លួន ពិសេសគឺជំរុញឱ្យភ្ញៀវទេសចរបានទៅទស្សនាដល់សហគមន៍ទេសចរណ៍ តំបន់ទេសចរណ៍ធម្មជាតិ ក៏ដូចជាតំបន់ទេសចរណ៍ជនបទឱ្យកាន់តែខ្លាំងក្លាជាងមុន។

លោកទ្រី ឈីវប្រធាននាយកដ្ឋានសហប្រតិបត្តិការអន្តរជាតិ និងអាស៊ាននៃក្រសួងទេសចរណ៍ ក្រោយបញ្ចប់កិច្ចប្រជុំរដ្ឋមន្ត្រីទេសចរណ៍អាស៊ានលើកទី២៤ និងកិច្ចប្រជុំពាក់ព័ន្ធ ដែលបានធ្វើឡើងចាប់ពីថ្ងៃទី០៤-០៥ ខែកុម្ភៈ ឆ្នាំ២០២១ ក្រោមការរៀបចំរបស់ក្រសួងទេសចរណ៍កម្ពុជានៅសណ្ឋាគារសូហ្វីតែភ្នំពេញភូកេត្រា។

លោកបន្តថា “ក្នុងចំណោមផែនការដែលអាស៊ានដាក់ចេញ ដើម្បីស្ដារវិស័យទេសចរណ៍ឡើងវិញ ក៏មានការដាក់ទិសដៅសំខាន់មួយផងដែរ គឺការជំរុញចលនាទេសចរក្នុងស្រុករៀងៗខ្លួន ពិសេសគឺជំរុញឱ្យភ្ញៀវទេសចរ បានទៅទស្សនាដល់សហគមន៍ទេសចរណ៍ តំបន់ទេសចរណ៍ធម្មជាតិ ក៏ដូចជាតំបន់ទេសចរណ៍ជនបទឱ្យកាន់តែខ្លាំងក្លាជាងមុន”។

អាស៊ានបានជំរុញការអភិវឌ្ឍសហគ្រាសធុនតូច និងមធ្យម (SME) នៅក្នុងវិស័យទេសចរណ៍ ដែលជាយុទ្ធសាស្ត្រមួយបង្កើតឱកាសការងារផ្សេងៗ ជាពិសេសផ្ដោតលើតំបន់ជនបទ។ យុទ្ធសាស្ត្រនេះ គឺផ្ដោតលើការអភិវឌ្ឍផលិតផលទេសចរណ៍ធម្មជាតិនៅតាមសហគមន៍ និងទេសចរណ៍ព្រឹត្តិការណ៍ ដូចជាពិធីបុណ្យទេសចរណ៍ជាដើម។

សមាជិកអាស៊ានក៏បានឯកភាពគ្នាធ្វើការផ្លាស់ប្ដូរបទពិសោធន៍គ្នាទៅវិញទៅមកក្នុងការជំរុញទេសចរផ្ទៃក្នុងនៃប្រទេសរៀងៗខ្លួន ដើម្បីចែករំលែកបទពិសោធន៍ និងការអនុវត្ត។

នាពេលកន្លងមក កម្ពុជាក៏ដូចជាអាស៊ាន ក៏បានយកចិត្តទុកដាក់ខ្ពស់ដែរ ទៅលើការអភិវឌ្ឍសមាគមន៍ទេសចរណ៍ ឬទេសចរណ៍ធម្មជាតិនេះ គឺបានចាត់ទុកជាអាទិភាពមួយដែល ប៉ុន្ដែដោយឆ្លងនូវវិបត្តិកូវីដ១៩នេះ អាស៊ានឃើញថាជាឱកាស ព្រោះថាមិនអាចធ្វើដំណើរទៅក្រៅប្រទេសបាន ដូច្នេះវាជាឱកាសមួយដែលអាចជំរុញទេសចរក្នុងស្រុក ហើយការជំរុញនេះ ក៏អាចជួយសម្រាលដល់អ្នកធ្វើការក្នុងវិស័យទេសចរណ៍តាមសហគមន៍ ឬនៅតាមតំបន់ជនបទ។

ច្បាស់ណាស់ថា វិស័យទេសចរណ៍ក្នុងស្រុក មិនអាចប៉ះប៉ូវទៅនឹងការខាតបង់លើវិស័យទេសចរណ៍អន្តរជាតិ ប៉ុន្ដែវាជាវិធីសាស្ត្រមួយ ដើម្បីជួយឲ្យគាត់នៅរស់រៀនមានជីវិត ដោយពួកគាត់អាចនៅបន្តការងារគាត់បាន។

លោកទ្រី ឈីវ បានមានប្រសាសន៍ថា អាស៊ានបានបង្កើនការយកចិត្តទុកដាក់បន្ថែមទៅលើការអភិវឌ្ឍ គឺការជំរុញទេសចរណ៍ក្នុងស្រុកររៀងៗខ្លួនតាមរយៈការចែករំលែកបទពិសោធន៍ ហើយនឹងមានកិច្ចប្រជុំគ្នាតទៅមុខទៀត។

ជាធម្មតា កម្ពុជាត្រូវធ្វើជាម្ចាស់វេទិកា ទេសចរណ៍អាស៊ានឆ្នាំ២០២១នៅកម្ពុជា ប៉ុន្ដែដោយបញ្ហាកូវីដ អាស៊ានមិនអាចរៀបចំបានទល់មុខគ្នា រួមទាំងមិនអាចរៀបចំពិព័រណ៍ដែលវាជាព្រឹត្តិការណ៍មួយដ៏ធំ ដូច្នេះសមាជិកអាស៊ានក៏បានគាំទ្រកម្ពុជាឲ្យលើកការរៀបចំវេទិការទេសចរណ៍ពេញលក្ខណៈនេះទៅធ្វើនៅឆ្នាំ២០២២។

ជាលទ្ធផលនៃការទន្ទឹងរង់ចាំរបស់ប្រទេសសមាជិកអាស៊ាន ចាប់ពីពេលនេះដល់ឆ្នាំ២០២២ ប្រទេសសមាជិកទាំងអស់គេទុកចិត្តកម្ពុជា ក្នុងការដឹកនាំនូវកិច្ចប្រជុំផ្សេងៗដើម្បីឲ្យស្ដារឡើងវិញនូវវិស័យទេសចរណ៍ក្នុងតំបន់៕

ក្រុមហ៊ុនសិង្ហបុរីដ៏ធំមួយទទួលបានការអនុម័តអភិវឌ្ឍន៍គម្រោងទីក្រុងរាមថ្មីតម្លៃ១៦ពាន់លានដុល្លារ

ដោយ៖ ប៊ី

ភ្នំពេញ៖ ក្រុមហ៊ុន Canopy Sands Development សមាជិកនៃក្រុមហ៊ុន Prince Holding Group បានអនុម័តប្លង់មេសម្រាប់ទីក្រុងរាមថ្មី ដែលនឹងត្រូវអភិវឌ្ឍដោយក្រុមហ៊ុន Surbana Jurong Group ដែលជាក្រុមហ៊ុនប្រឹក្សាហេដ្ឋារចនាសម្ព័ន្ធ និងនគរូបនីយកម្ម មានទីស្នាក់ការកណ្តាលនៅប្រទេសសិង្ហបុរី។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុន Canopy Sands Development នៅថ្ងៃទី៨ ខែកុម្ភៈ ឆ្នាំ២០២១។

គម្រោងទីក្រុងរាមថ្មីនេះនឹងអភិវឌ្ឍន៍លើផ្ទៃដីទំហំ៨៣៤ហិកតា ដែលមានទុនវិនិយោគសរុបប្រមាណ១៦ពាន់លានដុល្លារ ហើយនឹងត្រូវអភិវឌ្ឍលើតំបន់ ដែលចំណាយពេល១០នាទី ពីអាកាសយានដ្ឋានអន្តរជាតិក្រុងព្រះសីហនុ។

គម្រោងទីក្រុងរាមនេះនឹងដើរតួជាកត្តាលីករសម្រាប់ទស្សនវិស័យកំណើននៃខេត្តព្រះសីហនុទាំងមូល ដែលជាទីក្រុងធំទី៣ មានកំពង់ផែទឹកជ្រៅប្រចាំនៅក្នុងប្រទេសកម្ពុជា។

លោក Yeo Choon Chong នាយកប្រតិបត្តិក្រុមហ៊ុន Surbana Jurong ប្រចាំតំបន់អាស៊ានបានមានប្រសាសន៍ថា “កម្ពុជា បន្តទាក់ទាញរំហូរវិនិយោគផ្ទាល់ពីបរទេសឥតឈប់ឈរ។ ជាមួយដៃគូរបស់យើង យើងមើលឃើញសក្តានុពលដ៏ធំធេងក្នុងការជំរុញកំណើននៅក្នុងទីផ្សារដ៏សំខាន់នេះ តាមរយៈការចូលរួមរបស់យើងនៅក្នុងគម្រោងហេដ្ឋារចនាសម្ព័នរូបនេះ។

លោក Yeo បានបន្ថែមថា “សំណើរបស់យើងនេះ ផ្តល់អាទិភាពដល់ការធ្វើសមាហរណកម្មធម្មជាតិ ដើម្បីលើកកម្ពស់បរិស្ថាន។ ផ្នែកសំខាន់នៃផែនការរួមបញ្ចូលទាំងឆ្នេរខ្សាច់ដ៏ធំទូលាយ ដែលលាតសន្ធឹងលើសពី៦គីឡូម៉ែត្រ ដែលទាំងអស់នេះនឹងគាំទ្រដល់សកម្មភាពអភិវឌ្ឍន៍ដ៏ធំទូលាយ និងចាក់បញ្ចូលភាពរស់រវើកដល់សហគមន៍”។

លោកបានថ្លែងបន្តទៀតថា ផែនការនេះ ក៏រួមបញ្ចូលទាំងការកែលម្អហេដ្ឋារចនាសម្ព័ន្ធដល់សហគមន៍ផងដែរ ដើម្បីគាំទ្រដល់ពលរដ្ឋ និងកន្លែងសហគមន៍ ដូចជាសាលារៀន ឧទ្យាន កន្លែងលេងកីឡា និងសោភ័ណភាពក្នុងគម្រោង។ នៅពេលដែលមានការអភិវឌ្ឍពេញលេញ គម្រោងទីក្រុងរាមនឹងក្លាយជាគោលដៅដ៏អស្ចារ្យមួយសម្រាប់ការលក់រាយ ការងារ ការកម្សាន្ដ និងការរស់នៅ។

លោក MrKhong Weng Fook នាយកគ្រប់គ្រងក្រុមហ៊ុន Canopy Sands Development បានមានប្រសាសន៍ថា “យើងបានភ្ជាប់ទំនាក់ទំនងជាមួយក្រុមហ៊ុន Surbana Jurong ក្នុងរយៈពេលជាងមួយឆ្នាំមកហើយ ហើយយើងពិតជារីករាយណាស់ជាមួយនឹងគម្រោងមេ ដែលពួកគេបានស្នើសុំសម្រាប់ទីក្រុងរាម។

លោកបានបន្តទៀតថា ក្រុមហ៊ុន Surbana Juronghas បានធ្វើឱ្យអតិថិជននៅជុំវិញពិភពលោកកោតសរសើរជាប្រចាំ និងមានកេរ្តិ៍ឈ្មោះ ដោយសារបទពិសោធន៍ទូលំទូលាយរបស់ពួកគេ ក្នុងការអភិវឌ្ឍទីក្រុង ខណៈពួកគេបានអភិវឌ្ឍន៍គម្រោងធំៗជាច្រើននៅក្នុងប្រទេសជាង៣០។

លោកបានបន្ថែមថា “យើងទន្ទឹងរង់ចាំធ្វើការរួមគ្នា ដើម្បីផ្លាស់ប្តូរផែនការប្រើប្រាស់ដីធ្លី ដែលបានស្នើទៅជាការពិត និងបង្កើតដំណោះស្រាយប្រកបដោយចីរភាពសម្រាប់ការរស់នៅ ដើម្បីភាពប្រសើរឡើងនៃក្រុងព្រះសីហនុ និងប្រជាជនកម្ពុជា”។

គម្រោងទីក្រុងរាមនេះ នឹងផ្លាស់ប្តូរមុខមាត់ក្រុងព្រះសីហនុ ជាមួយអភិវឌ្ឍន៍ប្រព័ន្ធអេកូឡូស៊ីទេសចរណ៍ ពាណិជ្ជកម្ម និងលំនៅដ្ឋានប្រកបដោយនិរន្តរភាព ដែលមានសក្តានុពលអាចផ្ទុកអ្នករស់នៅបាន រហូតដល់ទៅ១៣ម៉ឺននាក់។ នៅពេលបញ្ចប់គម្រោងមេផ្តោតលើការសាងសង់ភាពទាក់ទាញគ្រួសារ ខុនដូ ផ្ទះជាប់ដីក្បែរឆ្នេរខ្សាច់ និងតំបន់លំនៅដ្ឋាន ដែលមានតម្លៃសមរម្យ ផ្សារទំនើប កន្លែងលក់ទំនិញ មជ្ឈមណ្ឌលពាណិជ្ជកម្ម រមណីយដ្ឋានឆ្នេរសណ្ឋាគារខុនដូ និងទូកកម្សាន្តជាដើម។

ប្រទេសកម្ពុជាស្ថិតនៅចន្លោះប្រទេសថៃ និងប្រទេសវៀតណាម ហើយត្រូវបានចាត់ទុកជាទិសដៅវិនិយោគដ៏ទាក់ទាញសម្រាប់អាជីវកម្ម ដែលកំពុងសម្លឹងរកការពង្រីកខ្លួននៅក្នុងតំបន់អាស៊ាន៕

រដ្ឋមន្ត្រីក្រសួងកសិកម្ម នឹងលើកឡើងពីវឌ្ឍន ភាព បញ្ហាប្រឈមក្នុងវិស័យកសិកម្មនៅក្នុងកិច្ចសម្ភាសន៍ពិសេសថ្ងៃនេះ

ដោយ ៖ គង់ ម៉ាលីន
ភ្នំពេញ ៖ កម្មវិធីចក្ខុវិស័យសេដ្ឋកិច្ចឆ្នាំ២០២១ នៅវេលាម៉ោង១១៖៣០នាទីថ្ងៃទី៨ ខែកុម្ភៈ ឆ្នាំ២០២១នេះនឹងចាក់ផ្សាយកិច្ចសម្ភាសន៍ពិសេសជាមួយឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

កិច្ចសម្ភាន៍ពិសេសមួយនេះត្រូវបានធ្វើឡើងរវាងលោកយិន លាងគង់ សហស្ថាបនិក និងជាអគ្គនាយកគ្រប់គ្រងក្រុមហ៊ុនគេហទំព័រអចលនទ្រព្យ និងសេដ្ឋកិច្ច www.propertyarea.asia ជាមួយនឹងឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗកន្លងទៅនេះដោយឆ្លុះបញ្ចាំងពីវឌ្ឍនភាពក្នុងវិស័យកសិកម្ម ផែនការយុទ្ធសាស្ត្រ និងការដាក់ចេញនូវគោលនយោបាយថ្មីៗនៅក្នុងវិស័យមួយនេះ ដើម្បីជំរុញឱ្យមានភាពរីកចម្រើន ព្រោះវិស័យកសិកម្មគឺជាផ្នែកមួយយ៉ាងសំខាន់ក្នុងនាមជាកម្លាំងចលករជួយជំរុញ និងលើកកម្ពស់សេដ្ឋកិច្ចកម្ពុជា។

នៅក្នុងកិច្ចសម្ភាសន៍នេះផងដែរក៏បានលើកឡើងពីការរៀបចំខ្លួនរបស់កម្ពុជានៅក្នុងការធ្វើឱ្យមានផលិតផលកសិកម្ម និងកសិ ឧស្សាហកម្មកាន់តែច្រើនអាចនាំចេញទៅកាន់ប្រទេសចិន តាមរយៈកិច្ចព្រមព្រៀងពាណិជ្ជកម្មសេរីដែលរដ្ឋាភិបាលនៃប្រទេសទាំង២បានចុះហត្ថលេខាកាលពីពេលថ្មីៗនេះ។ ចង់ដឹងកិច្ចសម្ភាសន៍ពិសេសនេះលម្អិតមានខ្លឹមសារយ៉ាងណានោះសូមរង់ចាំតាមដានទស្សនានៅវេលាម៉ោង១១៖៣០នាទីថ្ងៃនេះ៕

អ្នកជំនាញ ក្រើនរំលឹកកុំឱ្យទិញអចលនវត្ថុទាំងឡាយណាដែលលើសពីសមត្ថភាពរបស់ខ្លួន

លោកឡុង គឹមសួគ៌ អគ្គនាយកក្រុមហ៊ុន Century 21 Advance

ដោយៈរ៉ាណេត

ភ្នំពេញៈ អ្នកជំនាញនៅក្នុងវិស័យមួយនេះបានណែនាំថា ការវិនិយោគនៅក្នុងវិស័យអចលនទ្រព្យ មានឱកាសទទួលបានចំណេញច្រើន ប៉ុន្តែមុនពេលទិញអចលនវត្ថុណាមួយគម្បីពិនិត្យទៅលើចរន្តសាច់ប្រាក់ ឬលទ្ធភាពរបស់ខ្លួន ជៀសវាងទិញលើសពីសមត្ថភាព ឬខ្ចីពីធនាគារទិញ ដែលអាចបង្កឱ្យមានហានិភ័យខ្ពស់សម្រាប់ជីវភាពប្រចាំថ្ងៃ។

លោកឡុង គឹមសួគ៌ អគ្គនាយកក្រុមហ៊ុន Century 21 Advance បានឱ្យដឹងថា ការទិញអចលនវត្ថុ ដោយមិនបានដឹងពីគោលបំណងច្បាស់លាស់ ដោយចេះតែទិញតាមគ្នា និងតាមការអូសទាញពីឈ្មួញជាដើម ដែលលើសពីលទ្ធភាពរបស់ខ្លួន អាចបង្កឱ្យមានហានិភ័យខ្ពស់ចំពោះជីវភាពប្រចាំថ្ងៃផងដែរ។

លោកបន្តថា “បើការទិញអចលនវត្ថុ សម្រាប់វិនិយោគបន្តយកផលចំណេញ គួរទិញតំបន់ណា ដែលមានការអភិវឌ្ឍន៍ និងចាប់ផ្តើមអភិវឌ្ឍ ទើបទទួលបានចំណេញខ្ពស់ ហើយបើទិញនៅតំបន់ឆ្ងាយ ឬតំបន់ដែលមិនមានគម្រោងអភិវឌ្ឍច្បាស់លាស់” ។ លោកបន្តថា “ការវិនិយោគបែបនេះ វានឹងចំណាយពេលយូរដែលនឹងធ្វើឱ្យកប់ដើម និងប្រឈមនឹងការទទួលបានចំណូលទាប” ។

ដោយឡែកសម្រាប់អ្នកមានធនធានគ្រប់គ្រាន់ មិនជាបញ្ហានោះទេ ប៉ុន្តែបើអ្នកមិនមានធនធានគ្រប់គ្រាន់ ឬខ្ចីបុលធនាគារបន្ថែមសម្រាប់ទិញទុកវិនិយោគ ទើបប្រឈមនឹង បញ្ហាធំ។

លោកឡុង គឹមសួគ៌បានបន្ថែមថា “ចំណុចមួយទៀតដែលសំខាន់ អ្នកវិនិយោគមុននឹងសម្រេចិត្តទិញអចលនវត្ថុណាមួយទុកវិនិយោគបន្ត គួរគិតពីចំណូលប្រចាំខែរបស់ខ្លួនឱ្យបានច្បាស់លាស់សិន តើចំណូលរបស់ខ្លួនមានភាពរឹងមាំដែរ ឬទេ អ្នកខ្លះមានចំណូលមិនរឹងមាំទេ ពោលគឺបានមួយឆាវៗ ហើយវាបាត់បង់ទៅវិញ” ។

លោកពន្យល់ថា កុំទិញអចលនទ្រព្យដែលលើសពីសមត្ថភាពខ្លួន (អ្នកខ្លះប្រាក់ខែ៥០០ ដុល្លារ តែទិញ អស់ ៤០០ ដុល្លារ សល់តែ ១០០ដុល្លារ) នេះ គឺមានហានិភ័យខ្ពស់ចំពោះការចំណាយលើជីវភាពប្រចាំថ្ងៃ ដោយក្នុងការវិយោគលើវិស័យអចលនទ្រព្យចំពោះអ្នកដែលមានធនធានតិចតួច គួរទិញអចលនទ្រព្យក្នុងតម្លៃ៥០ ភាគរយនៃចំណូលរបស់ខ្លួន ទើបមិនមានហានិភ័យដល់ជីវភាពប្រចាំថ្ងៃ” ៕

ការទិញខុនដូជាជម្រើសវិនិយោគមួយសមស្របក្នុងកំឡុងវិបត្តិសេដ្ឋកិច្ច

ដោយគង់ សូរិយា

ភ្នំពេញៈ ខុនដូជាផ្នែកថ្មីមួយនៃវិស័យអចលនទ្រព្យកម្ពុជា ដែលចាប់ផ្តើមានភាពពេញនិយមបណ្តើរៗ ក្នុងស្រទាប់មនុស្សសម័យថ្មីនៅកម្ពុជា ដែលចង់ផ្លាស់ប្តូរ Lifestyle របស់ពួកគេ។

ក្នុងកំឡុងវិបតិ្តសេដ្ឋកិច្ចសាកល ដែលបណ្តាលមកពីជំងឺ Covid-19 គម្រោងខុនដូជាច្រើនបានលក់បញ្ចុះតម្លៃចន្លោះពី១០ ទៅ៣០ភាគរយ ដើម្បីទាក់ទាញអតិថិជន ខណៈតម្លៃរបស់វានឹងកើនឡើងវិញ បន្ទាប់ពីវិបត្តិនេះបានបធូរស្រាល។

ការវិនិយោគដែលមានផលចំណេញខ្ពស់

ការវិនិយោគខុនដូទុកសំរាប់លក់យកចំណេញ និងទុកសំរាប់រស់នៅ វាពិតជាឳកាសកម្រ ដែលស្ថិតក្នុងអន្តរកាលបែបនេះ។ ការវិនិយោគនៅពេលនេះ ជាពេលដែលអ្នកវិនិយោគដឹងពីផលចំណេញត្រលប់ពីការវិនិយោគភ្លាមៗ ជាជាងទិញខុនដូ ដើម្បីទុកឲ្យពេលវាឡើងថ្លៃ ប៉ុន្តែស្ថានភាពបច្ចុប្បន្ន ការវិនិយោគខុនដូបានទទួលផលចំណេញ១០ទៅ៣០ភាគរយ នៃតម្លៃដែលដែលបានលក់ចេញ។

ហេតុនេះការវិនិយោគនាពេលនេះ ផ្តល់ឲ្យអ្នកនូវផលចំណេញផង ជ្រើសរើសគំរោងបានត្រឹមត្រូវផង ព្រោះខុនដូដែលមានអ្នកវិនិយោគ មានមូលដ្ឋានហិរញ្ញវត្ថុរ៉ឹងមាំ គំរោងពួកគេមិនជាប់គាំងនោះទេ។

ការរស់នៅក្នុងភាពស៊ីវិល័យ

ខុនដូជាលំនៅដ្ឋានបែបថ្មី ដែលគំរោងខ្លះមានលក្ខណៈជាសហគមន៍ ដែលផ្តល់ឲ្យអ្នកនូវសាច់ញាតិជិតខាងបានច្រើន ប៉ុន្តែអ្នករស់នៅខុនដូក៏ត្រូវបានដាក់កម្រិតលើផ្នែកមួយចំនួនផងដែរ ដូចជាមិនឲ្យចិញ្ចឹមសត្វ មិនអាចជួសជុលឬវាយដំអ្វីមួយដោយបន្លឺសម្លេងខ្លាំងៗរំខានអ្នកជិតខាង (ខុនដូខ្លះមិនឲ្យជក់បារី) មិនឲ្យជួបជុំផឹកស៊ីបង្កសម្លេងហ៊ោកញ្ចៀវជាដើម៕

សម្ដេចតេជោគ្រោងចរចាជាមួយចិនសម្រួលការធ្វើដំណើររវាងប្រទេសទាំង២ដើម្បីបង្កើនការធ្វើពាណិជ្ជកម្ម

ដោយៈ រ៉ាណេត

ភ្នំពេញៈ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហាញពីគម្រោងនៃកិច្ចចរចាជាមួយរដ្ឋាភិបាលចិន ក្នុងការសម្រួលដល់ការធ្វើដំណើរ រវាងប្រទេសទាំង២ឱ្យកាន់តែទូលាយ ជាពិសេសពិភាក្សា ទៅលើការកាត់បន្ថយចំនួនថ្ងៃធ្វើចត្តាឡីស័កបន្ទាប់ពីអនុវត្តន៍ នូវការចាក់វ៉ាក់សាំងការពារជំងឺកូវីដ១៩ ដើម្បីពង្រីកទំហំពាណិជ្ជកម្មនៅក្នុងឆ្នាំ២០២១នេះ។

សម្ដេចតេជោ ហ៊ុន សែន បានមានប្រសាសន៍នៅក្នុងពិធីសន្និសិទសារព័ត៌មាននៃឱកាសទទួលវ៉ាក់សាំង ដែលជាជំនួយពីរដ្ឋាភិបាលចិននៅល្ងាចថ្ងៃទី៧ ខែកុម្ភៈ ឆ្នាំ២០២១កន្លងមកថា សម្ដេចកំពុងតែពិចារណា ដើម្បីឈានទៅរកកិច្ចព្រមព្រៀងមួយដែលអាចជួយសម្របសម្រួល ក្នុងការធ្វើដំណើរទៅមកតាមបែបណាមួយនោះ ដែលធ្វើយ៉ាងណាបង្កភាពងាយស្រួលប្រកបដោយសុវត្ថិភាព និងអាចជួយដល់បណ្តាធុរកិច្ចក្នុងការធ្វើពាណិជ្ជកម្ម ដោយបញ្ហានេះតម្រូវឱ្យមានការពិភាក្សាដោយម៉ត់ចត់។

សម្ដេចតេជោបានបញ្ជាក់ថា “ឧទាហរណ៍ ពេលដែលអ្នកវិនិយោគកម្ពុជាធ្វើដំណើរទៅប្រទេសចិន តើត្រូវបន្តឱ្យធ្វើចត្តាលីស័ក្តិ រយៈពេល១៤ថ្ងៃតទៅទៀត ហើយជនជាតិចិនមកកម្ពុជា ត្រូវបន្តធ្វើចត្តាឡីស័ករយៈពេល១៤ថ្ងៃ ឬត្រូវកាត់បន្ថយ។សម្តេចបន្តថា “ចំណុចអស់ទាំងនេះ គឺក្លាយជាប្រធានបទដ៏រសើប និងត្រូវតែយកចិត្តទុកដាក់” ។

សម្តេចបានបន្តថា បទពិសោធន៍ ឥឡូវកម្ពុជាបានរងនូវសម្ពាធ ហើយតាមរយៈនៃការរងសម្ពាធនោះ គឺយើងបានឃើញនូវចំណុចមួយចំនួន ដែលមិនអាចលើកលែងបាន។ចំណុចខ្លះដែលមិនអាចលើកលែងបាន។ សម្ពាធដែលកម្ពុជាទទួលបាន ក្នុងរយៈពេលមួយខែចុងក្រោយនេះ ពីទិសខាងលិច (ប្រទេសថៃ) ការឆ្លងក្នុងសហគមន៍ ដ៏លឿននៅក្នុងប្រទេសថៃ ដែលមុនការឆ្លងក្នុងសហគមន៍នោះ ប្រទេសថៃមានមនុស្សឆ្លងប្រមាណជាង៦ទៅ ៧ពាន់នាក់តែប៉ុណ្ណោះ ប៉ុន្តែតួលេខថ្ងៃនេះបានកើនប្រមាណ ២៣០០០នាក់។

ឯផ្នែកខាងកើត (ប្រទេសវៀតណាម) គឺឆ្លងក្នុងល្បឿនមួយលឿន ហើយបើតាមព័ត៌មានមានការឆ្លងកូវីដក្លែងភេទទៀតផង ដែលបានរីករាលដាលរហូតមកដល់ខេត្តមួយជាប់នឹងខេត្តព្រំដែនកម្ពុជា គឺខេត្តមណ្ឌលគីរី។

សម្តេចតេជោហ៊ុន សែនបានពន្យល់ថា “ដូច្នេះហើយទើបខ្ញុំប្រកាសអាសន្ន កុំឱ្យមានការឆ្លងកាត់ដើម្បីទប់ស្កាត់ការឆ្លងរាលដាល។ ទោះជាយ៉ាងណា ពេលនេះស្ថានភាពនៃការរាលដាល ក្នុងប្រទេសទាំង២ត្រូវបានកាត់បន្ថយ និងធូរស្រាយវិញហើយ” ។

ពាក់ព័ន្ធទៅនឹងការទទួលបានវ៉ាក់សាំង ការពារជំងឺកូវីដ១៩ ដែលជាជំនួយពីសំណាក់មហាមិត្តចិនចំនួន ១លានដូស ដែលក្នុងជំហានដំបូងបានមកដល់កម្ពុជាចំនួន៦០ម៉ឺនដូស និងបន្តមកពេលក្រោយទៀតចំនួន ៤០ម៉ឺនដូសទៀត គឺជាការបង្ហាញឱ្យឃើញពីគុណតម្លៃនៃកិច្ចទំនាក់ទំនង និងសហប្រតិបត្តិការទេ្វភាគីយ៉ាងជិតស្និទ្ធរវាងប្រទេស និងប្រជាជាតិនៃប្រទេសទាំង២ក្នុងនាមជាមហាមិត្តដែកថែប៕

ទិញដីជុំវិញក្រុងម្ងាយ ៣០គីឡូម៉ែត្រ នៅតែមានឱកាសចំណេញខ្ពស់នាពេលអនាគត

ដោយគង់ សូរិយា

ភ្នំពេញៈ ការវិនិយោគដីធ្លី ដែលមានឳកាសចំណេញខ្ពស់ និងមិនពិបាកធ្វើដំណើរទៅមើល គួរវិនិយោគដីនៅជាយក្រុង ដែលមានចម្ងាយចន្លោះពី៣០ ទៅ៤០គីឡូម៉ែត្រពីរាជធានីភ្នំពេញ។

ហេតុផលសំខាន់ៗ ដែលអ្នកជំនាញលើកយកមកបង្ហាញ ពីមូលហេតុគួរវិនិយោគដីនៅជាយក្រុងមានដូចជា៖

ជាតំបន់ងាយទទួលបានគំរោងអភិវឌ្ឍន៍

តាមធម្មតាទីក្រុងតែងតែរីកជាប្រចាំ ដោយសារកំនើនប្រជាពលរដ្ឋ កំនើននគរូបនីយកម្ម កំណើនយានយន្ត កំនើននៃការវិនិយោគ និងងាយទទួលបានផល ឬឥទ្ឋិពលនៃការរីកចម្រើនទីក្រុងភ្នំពេញ។

សម្រាប់ប្រទេសយើង រដ្ឋាភិបាលកម្ពុជាបច្ចុប្បន្នបាន និងកំពុងមានផែនការពង្រីកទីក្រុងតទៅទៀត និងនាំយកក្រសួងមន្ទីរ ឬស្ថាប័នមួយចំនួនទៅកាន់តំបន់ជាយក្រុង ដោយសារជាតំបន់មានដីទំនេរច្រើន ងាយរៀបចំហហេដ្ឋារចនាសម្ព័ន្ឋ ចំណតយានយន្ត ខណៈស្ទើរគ្រប់ក្រសួងមន្ទីរ មានការស្ទះចរាចរណ៍ ដោយសារកំនើនយានយន្តរបស់មន្ត្រីនានា។

ងាយទទួលបានការអភិវឌ្ឍហេដ្ឋារចនាសម្ព័ន្ឋលឿន

តាមធម្មតា ផែនការអភិវឌ្ឈន៍របស់រដ្ឋាភិបាល តែងតែគិតគូរនៅក្នុងទីក្រុង តំបន់ក្បែរទីក្រុងជាមុន ដោយសារវាស្ថិតនៅនឹងភ្នែក ច្រមុះរបស់រដ្ឋាភិបាល ពិសេសការពង្រីកទីក្រុង កសាងហេដ្ឋារចនាសម្ព័ន្ឋ ជារឿងចាំបាច់ ដើម្បីកាត់បន្ថយការកកស្ទះចរាចរណ៍ផង លើកស្ទួយជីវភាពប្រជាពលរដ្ឋផង និងជំរុញកំនើនសេដ្ឋកិច្ចផងដែរ។

ការរីកចម្រើនផ្នែកនគរូបនីយកម្ម គឺដោយសារការរីកចម្រើនសេដ្ឋកិច្ច និងកំនើនប្រជាពលរដ្ឋ ព្រោះប្រជាពលរដ្ឋភាគច្រើនរត់ចូលទីក្រុង ជាជាងចេញពីទីក្រុងទៅរស់នៅតាមបណ្តាខេត្ត ឬទីជនបទ។

គោលនយោបាយរដ្ឋាភិបាល

រដ្ឋាភិបាលប្រទេសណាមួយក៏ដោយ តែងតែដករោងចក្រ សហគ្រាសចេញពីទីក្រុងទៅនៅតំបន់ជាយក្រុង ជាក់ស្តែងរាជធានីភ្នំពេញបាន និងកំពុងជម្រុញនិងដាក់ចេញនូវផែនការជាក់លាក់ ដើម្បីឲ្យរោងចក្រ សហគ្រាសចេញពីទីក្រុង ទៅកាន់តំបន់ជនបទឬ ជាយក្រុង ដើម្បីទប់កុំឲ្យមានការធ្វើចំណាកស្រុកច្រើនពេក គឺឲ្យប្រជាជនរស់នៅមូល ដ្ឋានរបស់ខ្លួន ហើយអាចរកចំណូលបាន តាមរយៈផែនការអភិវឌ្ឍវិស័យឧស្សាហកម្មរបស់រដ្ឋាភិបាល។

រដ្ឋាភិបាលកម្ពុជាក៏បាន និងកំពុងដាក់ចេញផែនការអភិវឌ្ឍន៍ តំបន់ឧស្សាហកម្មនៅតាមប៉ូលសេដ្ឋកិច្ចសំខាន់ៗ របស់ប្រទេសបន្ថែមទៀត ដើម្បីជម្រុញល្បឿននៃការអភិវឌ្ឈ និងកាត់បន្ថយភាពក្រីក្ររបស់ប្រជាពលរដ្ឋ៕

ឧកញ៉ាម៉ន សុខា បង្ហាញពីហានិភ័យនៃអាជីវកម្មចំនួន៨ ដែលសហគ្រិន ឬធុរជនគួរស្វែងយល់

ដោយគង់ សូរិយា

ភ្នំពេញៈ គ្រប់មុខជំនួញ ឬអាជីវកម្ម តែងតែមានហានិភ័យ ដែលកើតឡើងតាមទម្រង់ផ្សេងៗគ្នា និងប្រើប្រាស់វិធីសាស្ត្រដោះស្រាយខុសៗគ្នាផងដែរ ដើម្បីទទួលបានជផោគជ័យ។

ប្រធានសមាគមអ្នកអភិវឌ្ឍន៍ដីឡូត៍កម្ពុជា ឧកញ៉ាម៉ន សុខា បានសរសេរលើប ណ្តាញទំនាក់ទំនងសង្គមរបស់ខ្លួន កាលពីចុងសប្តាហ៍មុនថា តាមបទពិសោធន៍ និងការស្រាវជ្រាវ បន្ថែមរបស់លោកផ្ទាល់ហានិភ័យនៃអាជីវកម្មមានដូចខាងក្រោម ដែលសហគ្រិន ធុរជនត្រូវដឹងដូចជា ទី១ ហានិភ័យ ផលិតផល សេវាកម្ម (មិនមានតម្រូវការទី ផ្សារ ឬ ខ្វះគុណភាព)។ ទី២ ហានិភ័យអតិថិជន (មិនស្គាល់អតិថិជន គោលដៅ លក់ មិនដាច់ )។

ទី៣ ហានិភ័យហិរញ្ញវត្ថុ (ខ្វះប្រភពទុនបម្រុង និងគ្រប់គ្រងលំហូរសាចប្រាក់ មិនបានល្អ) ទី៤ ហានិភ័យ អ្នក វិនិយោគ (ចង់បានចំណេញច្រើនពេក ចង់បានផល

លឿនពេក ការប្រាក់ខ្ពស់ ។ល) ទី៥ -ហានិភ័យគូរប្រកួតប្រជែង (លក់ បញ្ចុះតម្លៃ សេវាកម្មល្អ អូសទាញអតិថិជន អ្នកផ្គត់ផ្គង់បុគ្គលិក។ ល)។ ទី៦ ហានិភ័យ ក្រុមការងារ (បុគ្គលិក មិនយល់ពីទស្សនវិស័យក្រុមហ៊ុន មានជំងឺតួឯកមិនគោរពគោលការណ៍ ។ល)

ទី៧ហានិភ័យ ផ្លូវច្បាប់ និងពន្ធដារ ទី៨ ហានិភ័យ ភាគហ៊ុនក្រុមហ៊ុន (មិនយល់ច្បាស់ពីអភិបាលកិច្ច ម្ចាស់ក្រុមប្រឹក្សាភិបាល គណៈគ្រប់គ្រង។ល)។

ឧកញ៉ាម៉ន សុខាបានបន្តថា “ហេតុនេះមុនពេលចាប់រកស៊ី ឬ ក្នុងកំឡុង ពេលរកស៊ី សូមសិក្សាហានិភ័យទាំងអស់នេះ អោយបានច្បាស់លាស់ ជៀសវាងរកស៊ីមិនបាន យូរអង្វែង” ៕

គំរោងធំៗចំនួនបីកំពុងទាក់ទាញការវិនិយោគនៅតំបន់ជើងភ្នំបូកគោ ខណៈមានការគាំទ្រពីមន្ត្រីរដ្ឋាភិបាល

ដោយស៊ីវ ម៉េង

កំពត៖ គម្រោងវិនិយោគធំៗចំនួន៣បន្ថែមទៀត នៅតំបន់ភ្នំបូកគោបាននិងកំពុង ចូលរួមប្រែក្លាយជាទីក្រុងទាក់ទាញថ្មីរបស់កម្ពុជា ខណៈដែលរដ្ឋាភិបាលបានសម្រេចដាក់ឲ្យអភិវឌ្ឍតំបន់នេះជាទីក្រុងឆ្លាតវៃ និងជាទីក្រុងទេសចរណ៍ប្រវត្តិសាស្ត្រ ហើយវានឹងក្លាយជាទីតាំង ផ្សារភ្ជាប់តំបន់ឆ្នេរនៃច្រករបៀងទេសចរណ៍ភាគខាងត្បូង។

បន្ទាប់ពីរាជរដ្ឋាភិបាលដាក់ចេញនូវផែនការអភិវឌ្ឍន៍ និងប្លង់គោលប្រើប្រាស់ដីគម្រោងអភិវឌ្ឍក្រុងបូកគោនេះ កន្លងមក មានគម្រោងវិនិយោគធំ និងថ្មីជាច្រើន បានតម្រង់ទិសទៅកាន់ទីនោះ ដើម្បីចូលរួមចំណែកអភិវឌ្ឍ និងប្រែក្លាយតំបន់បូកគោនេះទៅជាទីក្រុងថ្ម សម្រាប់បំរើដល់វិស័យទេសចរណ៍ ពាណិជ្ជកម្ម និងវិនិយោគជាតិ និងអន្តរជាតិ។

១) គម្រោងវិនិយោគតម្លៃជិត២២លានដុល្លារលើវិស័យកសិ-ឧស្សាហកម្ម

រដ្ឋាភិបាលបានអនុម័តគម្រោងវិនិយោគថ្មី ដែលមានតម្លៃជិត២២លានដុល្លារនេះ នឹងបង្ហាញខ្លួនក្នុងរូបភាពក្នុងវិស័យកសិ-ឧស្សាហកម្ម បង្កើតជាកសិដ្ឋាន ដូងប្រេង កៅស៊ូ និងល្ហុងប្រេង របស់ក្រុមហ៊ុន VIRTUS GREEN PLANTATIONS (CAMBODIA) PTE., LTD. ដោយមានទីតាំងវិនិយោគ ស្ថិតនៅតំបន់ប្រើប្រាស់ដោយចីរភាព នៃឧទ្យានជាតិព្រះមុនីវង្ស “បូកគោ” ស្រុកជុំគីរី និងស្រុកទឹកឈូ ខេត្តកំពត អាចបង្កើតការងារបានចំនួន២.០៧០កន្លែង។

២) គម្រោងសាងសង់សារមន្ទីរថាមពលកើតឡើងវិញ និងឧទ្យានជាតិសម្ដេច ហ៊ុន សែន

គម្រោងសាងសង់សារមន្ទីរថាមពលកើតឡើងវិញ និងឧទ្យានជាតិសម្ដេច ហ៊ុន សែន កំពតនេះ គឺជាគម្រោងមួយដែលអនុវត្តផ្អែកតាមអនុក្រិត្យ របស់រាជរដ្ឋាភិបាលផ្ដល់ជូនអគ្គិសនីកម្ពុជា ដើម្បីអនុវត្តដំណើរការគម្រោងសាងសង់ នៅក្នុងឆ្នាំ២០២០នេះ នឹងអាចត្រូវបញ្ចប់នៅឆ្នាំ២០២២ខាងមុខ ។

ទីតាំងនៃគម្រោង គឺស្ថិតនៅតំបន់សហគមន៍ នៃឧទ្យានជាតិព្រះមុនីវង្ស “បូកគោ” លើផ្ទៃដីកោះទំហំ៨,៦០ហិចតា នៅក្នុងភូមិសាស្ត្រ ភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូខេត្តកំពត។ ទំហំការកសាងនូវហេដ្ឋារចនាសម្ព័ន្ធ មានច្រើនគួរសមដែលបម្រើឱ្យការសិក្សាស្រាវជ្រាវបទពិសោធន៍ និងចង់ដឹងពីបច្ចេកវិទ្យាវិស័យវារីអគ្គិសនីនៅកម្ពុជា ក៏ដូចជាបំរើឱ្យវិស័យទេចរណ៍ក្នុងតំបន់នៃខេត្តកំពតនេះផងដែរ ។

៣) គម្រោងអភិវឌ្ឍន៍លំនៅដ្ឋាន “មរតកឋានសួគ៌”

គម្រោងអភិវឌ្ឍន៍លំនៅដ្ឋានទីក្រុងថ្មី ដែលមានឈ្មោះថា “មរតកឋានសួគ៌” ក្នុងតម្លៃរាប់សិបលានដុល្លារ ដែលជាការវិនិយោគដោយក្រុមហ៊ុនសុខា អូតែលត្រូវបានសម្ពោធបើកការរដ្ឋានកាលពីដើមឆ្នាំ ២០២០ ក្រោមវត្តមានរបស់លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។

ម្រោងវិនិយោគលើការអភិវឌ្ឍ ក្នុងវិស័យលំនៅដ្ឋានបែបទំនើបមួយនេះ បានក្លាយជាការគម្រោងវិនិយោគដ៏ធំ និងលើកដំបូងគេនៅតំបន់រមណីយដ្ឋាន ឧទ្យានជាតិព្រះមុនីវង្ស ក្រោមការបោះទុនដោយក្រុមហ៊ុនសុខាអូតែល ដែលជាក្រុមហ៊ុននាំមុខមួយនៃវិស័យបដិសណ្ឋារកិច្ច ក្នុងចំណោមក្រុមហ៊ុនធំៗ នៅព្រះរាជាណាចក្រកម្ពុជា និងជាក្រុមហ៊ុនដែលទទួលបាន សិទ្ធិសម្បទានធ្វើវិនិយោគអភិវឌ្ឍ នៅឧទ្យានជាតិព្រះមុនីវង្ស “បូកគោ។

ជាមួយនឹងផែនការ និងដាក់ចេញទស្សនទានអភិវឌ្ឍន៍ដោយរដ្ឋាភិបាលនាពេលកន្លងមកនេះ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដី នគររូបនីយកម្ម និងសំណង់ ធ្លាប់បានអំពាវនាវឱ្យអ្នកវិនិយោគជាតិ និងអន្តរជាតិលើសំណង់លំនៅដ្ឋាន បោះទុនវិនិយោគ នៅលើកំពូលភ្នំបូកគោទៅតាមលទ្ធភាព ដើម្បីធ្វើឱ្យតំបន់ទេសចរណ៍កាន់តែមានភាពទាក់ទាញបន្ថែម។

លោកឧបនាយករដ្ឋមន្ត្រីបានលើកឡើងថា គម្រោងលំនៅដ្ឋានកំណប់ឋានសួគ៌ នៅលើភ្នំបូកគោនេះ គឺមានការគាំទ្រជាផ្លូវច្បាប់ ដោយពីរាជរដ្ឋាភិបាល ដោយគម្រោងនេះអាចចាត់ទុកថា ជាគម្រោងមួយជួយកែលំអរអភិវឌ្ឍន៍ តំបន់ទេសចរណ៍ប្រវត្តិសាស្ត្ររបស់កម្ពុជាឲ្យក្លាយទៅជាតំបន់ទេសចរណ៍ មានភាពទាក់ទាញកាន់តែខ្លាំងចំពោះភ្ញៀវទេសចរជាតិ និងអន្តរជាតិ ដែលនាំមកនូវចំណូលជូនជាតិកាន់តែច្រើន បានមកពីវិស័យទេចរណ៍។

លោកជា សុផារ៉ា បានបញ្ជាក់ថា កាលណាតំបន់ប្រវត្តិសាស្ត្រនេះ មានប្រជាពលរដ្ឋរស់នៅច្រើនមានផ្សារ មានមន្ទីរពេទ្យ និងសាលារៀន អ្នកទេសចរណ៍ជាតិ និងអន្តរជាតិក៏មានទំនុកចិត្ត ក្នុងការមកស្នាក់នៅសម្រាកកម្សាន្តនៅទីនេះដែរ។ លោលក៏បានស្នើឲ្យទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូនសិក្សាលើហេដ្ឋារចនាសម្ព័ន្ធផ្លូវឡើងមកកាន់តំបន់ទេសចរណ៍មួយនេះផងដែរ៕

សេដ្ឋកិច្ចកម្ពុជានឹងចាប់ផ្តើមបង្ហាញសញ្ញាវិជ្ជមានបន្ទាប់ពីទទួលបានវ៉ាក់សាំងកូវីដ១៩

ដោយៈ សាវុធ

ភ្នំពេញៈ សេដ្ឋវិទូនៅកម្ពុជាបានអះអាងថា សេដ្ឋកិច្ចកម្ពុជា នឹងមានសញ្ញាវិជ្ជមានជាងមុននៅឆ្នាំនេះ បន្ទាប់ពីកម្ពុជាទទួលបានវ៉ាក់សាំងកូវីដ១៩ នាពេលខាងមុខនេះ។

លោកបណ្ឌិតម៉ី កល្យាណទីប្រឹក្សាជាន់ខ្ពស់ នៃឧត្ដមក្រុមប្រឹក្សាសេដ្ឋកិច្ចជាតិបានប្រាប់ទូរទស្សន៍ក្នុងស្រុកមួយកាលពីម្សិលម៉ិញថា សេដ្ឋកិច្ចកម្ពុជារំពឹងថា នឹងមានសញ្ញាវិជ្ជមានឡើងវិញនៅឆ្នាំនេះ បន្ទាប់ពីកម្ពុជា ទទួលបានវ៉ាក់សាំងកូវីដ១៩ ពីប្រទេសចិន។

លោកបណ្ឌិតបានថ្លែងទៀតថា“ការទទួលបានវ៉ាក់នេះ គឺអាចជួយរក្សាជីវិតមនុ ស្ស ដែលជាកត្តាសំខាន់បំផុត ក្នុងការអភិវឌ្ឍសេដ្ឋកិច្ច”។

ទោះលោកបណ្ឌិត មិនទាន់អាចសន្និដ្ឋានបានថា សេដ្ឋកិច្ចកម្ពុជា នឹងមានការរីកចម្រើនកម្រិតណានោះទេ ក្នុងឆ្នាំ២០២១ ព្រោះថាជំងឺកូវីដ១៩ នៅតែជាបញ្ហាប្រឈមនៅជុំវិញពិភពលោក។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានសរសេរលើផេកFacebook ផ្លូវការរបស់សម្តេច កាលពីថ្ងៃទី៥ ខែកុម្ភៈ ឆ្នាំ២០២១ថា វ៉ាក់សាំង ដែលជាជំនួយរបស់សាធារណរដ្ឋប្រជាមានិតចិន តាមរយៈក្រសួងការពារជាតិចិន មកកាន់ក្រសួងការពារជាតិកម្ពុជា នឹងដឹកមកដល់កម្ពុជាចំនួន៦០ម៉ឺនដូស នៅល្ងាចថ្ងៃអាទិត្យទី៧ កុម្ភៈ ២០២១ ដែលជាដំណាក់កាលដំបូងនៃជំនួយចំនួន១លានដូស។

សម្តេចតេជោបានថ្លែងទៀតថា “ម៉ោង៨និង៣០នាទីថ្ងៃទី១០ កុម្ភៈ២០២១ ដំនើរការចាក់វ៉ាក់សាំងនឹងចាប់ផ្តើមជាផ្លូវការ នៅមន្ទីរពេទ្យកាល់ម៉ែត្រ ដែលខ្លួនខ្ញុំនឹងទទួលមុនគេជាមួយមន្ត្រីជាន់ខ្ពស់ផ្សេងទៀត”។

លោកវង្សី វិស្សុតរដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានព្យាករថា សេដ្ឋកិច្ចកម្ពុជាក្នុងឆ្នាំ២០២១នេះ នឹងងើបឡើងវិញក្នុងរង្វង់៤ភាគរយ ដោយសារតែការខិតខំប្រឹងប្រែង និងការអន្ដរាគមន៍យ៉ាងខ្លាំងខ្លា របស់រដ្ឋាភិបាលកម្ពុជា។

លោកវង្សី វិស្សុត បានឱ្យដឹងថា “ឆ្នាំ២០២១នេះ សេដ្ឋកិច្ចកម្ពុជាងើបឡើងវិញក្នុងរង្វង់៤ភាគរយ ងើបគ្រប់វិស័យទាំងអស់។ ការងើបឡើងវិញនៃកំណើនសេដ្ឋកិច្ចកម្ពុជា ក្នុងរង្វង់៤ភាគរយនេះ មិនមែនជាកំណើនអាក្រក់នោះទេ ជាកំណើនមួយដែលស្ទុះងើបពី-៣.១ភាគរយ ពីឆ្នាំ២០២០”៕