ដោយៈ ប៊ី

ភ្នំពេញៈ លោកឧបនាយករដ្ឋមន្រ្តីជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានបង្ហាញនូវគ្រឿងលម្អអគារទីស្តី ការក្រសួងរៀបចំដែនដី នគរូបនីយកម្ម និងសំណង់ថ្មី ជាមួយការប្រមូលផ្តុំសា្នដៃ និងស្ថាបត្យកម្មបុរាណខ្មែរ។

អគារទីស្តីការក្រសួងរៀបចំដែនដី នគរូបនីយកម្ម និងសំណង់ថ្មីនេះ ត្រូវបានបើកការដ្ឋានសាង់សង់ ក្រោមអធិបតីភាពឯកឧត្តម ជា សុផារ៉ា កាលចុងខែមករា ឆាំ្ន២០២០។

អគារទីស្តីថ្មីនេះ មានទីតាំងស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ មានកម្ពស់៥ជាន់ សាងសង់នៅលើផ្ទៃដីទំហំ៣ហិកតា មានផ្ទៃក្រឡាសំណង់សរុប៤៩,៣៨៩ម៉ែត្រក្រឡា និងក្រឡាផ្ទៃប្រើប្រាស់សរុបប្រមាណ២៦,៥៦៧ម៉ែត្រក្រឡា មានផលធៀបក្រឡាផ្ទៃបាតសំណង់៣២.៥៣%។

អគារនេះ មានចំណតរថយន្តប្រមាណ៤៥០កន្លែង  ដែលអគារក្រសួងសព្វថៃ្ងខ្វះចំណតបង្កការលំបាកដល់ការធើ្វដំណើរ សាលបដិសណ្ឋារកិច្ច អាហារដ្ឋាន សម្រាប់មន្រ្តីបុគ្គលិក និងលម្ហសួនកណ្តាលអគារ សាលប្រជុំតូចៗមាន៣០០នាក់ និងសាលសន្និបាតចំណុះ១ ៥៨៤ នាក់ កន្លែងតម្កល់ឯកសារសុរិយោដី និងរដ្ឋបាល សាលបច្ចេកវិទ្យា មន្ទីរពិសោធន៍ជាតិសំណង់ បន្ទប់សិក្សាបណ្តុះបណា្តលវិជា្ជជីវៈ បណ្ណាល័យ កន្លែងកីឡា។

អគារទីស្តីការក្រសួងថ្មីនេះ មានរចនាបថខ្មែរ រចនាលម្អដោយបុស្បុកប្រាំពីរថ្នាក់ ដំបូលហោជាងមុខដាច់ ប្រកបដោយក្បូរក្បាច់ពិពិតវិចិត្ររចនា ដែលក្រុមការងារប្រមូលផ្តុំសិក្សាចង់លើកស្ទួយនូវសា្នដៃ លម្អស្ថាបត្យកម្មបុរាណខ្មែរ ដោយឡែកប្លង់បាតមានលម្ហសួនក្នុងអគារ។

សំណង់នេះជាផ្នែកមួយដ៏សំខា ន់ក្នុងការបង្ហាញអត្តសញ្ញាណខ្មែរ និងទម្រង់ស្ថាបត្យកម្មខ្មែរ ក្នុងសម័យតេជោដែលបងា្ហញពីសន្តិភាព ស្ថេរភាព ការវិវឌ្ឍ និងសង្គ្រោះសំ​ណង់ប្រភេទនេះ ឲ្យរស់ឡើងវិញជាសំណង់របស់រដ្នទុកតជំនាន់។ ចំណែកទីស្តីការក្រសួងសព្វថៃ្ងរាជរដ្ឋាភិបាល បានប្រគល់ឱ្យមន្ទីររៀបចំដែនដី នគរូបនីយកម្ម សំណង់ និងសុរិ​យោដីរាជធានីវិញ៕

ដោយ ៖ រ៉ាណេត

សៀមរាប ៖ ស្របទៅនឹងគម្រោងអភិវឌ្ឍន៍របស់រដ្ឋបាលខេត្តសៀមរាបតាមរយៈរដ្ឋបាលស្រុកបន្ទាយស្រីដើម្បីប្រែក្លាយឱ្យទៅជាតំបន់ទីប្រជុំជនដ៏ទាក់ទាញ និងជាគោលដៅទេសចរណ៍ប្រចាំខេត្ត គម្រោងអភិវឌ្ឍន៍ដីឡូតិ៍បន្ទាយស្រីបាន និងកំពុងរៀបចំហេដ្ឋារចនាសម្ព័ន្ធនៅក្នុងគម្រោងដូចជាការដាំបង្គោលភ្ជាប់បណ្តាញអគ្គិសនី និងការបង្កប់លូជាដើម។

ជាមួយនឹងសកម្មភាព និងផែនការនៃការអភិវឌ្ឍរបស់រដ្ឋបាលស្រុកបន្ទាយស្រីដើម្បីឆ្លើយតបទៅនឹងកំណើនប្រជាពលរដ្ឋដែលបន្តចូលទៅរស់នៅរាប់រយគ្រួសារ ក៏ដូចជាការប្រែក្លាយឱ្យទៅជាគោលដៅទេសចរណ៍ដ៏ទាក់ទាញប្រចាំខេត្តសៀមរាប បច្ចុប្បន្នគម្រោងអភិវឌ្ឍន៍ដីឡូតិ៍បន្ទាយស្រីក៏កំពុងរៀបចំហេដ្ឋារចនាសម្ព័ន្ធនានានៅក្នុងគម្រោងដើម្បីបង្កភាពងាយស្រួលដល់បណ្តាអតិថិជនរបស់ខ្លួនដែលចង់សាងសង់លំនៅដ្ឋានស្នាក់នៅកម្មសិទ្ធិ។

តំណាងក្រុមហ៊ុនអភិវឌ្ឍន៍ដីឡូតិ៍បន្ទាយស្រី លោកស្រីជិន លក្ខិណា បានមានប្រសាសន៍នៅព្រឹកថ្ងៃទី៤ ខែកុម្ភៈ ឆ្នាំ២០២១ថា ដើម្បីបង្កភាពងាយស្រួលបច្ចុប្បន្នក្រុមហ៊ុនបាន និងកំពុងពន្លឿនការរៀបចំនូវហេដ្ឋារចនាសម្ព័ន្ធនានានៅក្នុងគម្រោងរួចរាល់ដើម្បីផ្តល់ភាពងាយស្រួលដល់អតិថិជនដែលមានបំណងចង់សាងសង់លំនៅដ្ឋានសម្រាប់ស្នាក់នៅក្នុងពេលខាងមុខនេះ។

លោកស្រីបន្តថា “នៅពេលមានហេដ្ឋារចនាសម្ព័ន្ធកាន់តែល្អ រួមមានការរៀបចំផ្លូវសម្រាប់ចរាចរណ៍នៅក្នុងគម្រោង មានការរៀបចំតភ្ជាប់បណ្តាញអគ្គិសនី ក៏ដូចជាការបង្កប់លូនៅក្នុងគម្រោងដែលស្ថិតនៅជាប់ផ្លូវហាយវេ៦០ម៉ែត្រ វាកាន់តែបង្កើននូវភាពទាក់ទាញក្នុងការវិនិយោគ ក៏ដូចជាការទិញទុកសម្រាប់សាងសង់លំនៅដ្ឋានស្នាក់នៅជាកម្មសិទ្ធិ”។

លោកស្រីបញ្ជាក់ឱ្យដឹងទៀតថា បច្ចុប្បន្ននៅក្នុងស្រុកបន្ទាយស្រីគឺកំពុងមានការអភិវឌ្ឍន៍យ៉ាងខ្លាំងក្រោមការយកចិត្តទុកដាក់ពីសំណាក់រដ្ឋបាលខេត្តតាមរយៈរដ្ឋបាលស្រុកបន្ទាយស្រី។ ជាក់ស្ដែង ទាំងហេដ្ឋារចនាសម្ព័ន្ធរួមមានផ្លូវថ្នល់ជាដើមត្រូវបានស្ថាបនាជាច្រើនខ្សែដើម្បីបង្កភាពងាយស្រួលដល់ពលរដ្ឋ ក៏ដូចជាទេសចរធ្វើដំណើរ។ បន្ថែមពីនេះ ស្រុកបន្ទាយស្រីក៏មានគម្រោងអភិវឌ្ឍប្រែក្លាយទៅជាគោលដៅទេសចរណ៍ដ៏ទាក់ទាញជាច្រើនទីតាំងដែលស្ថិតនៅក្បែរគម្រោងអភិវឌ្ឍន៍ដីឡូតិ៍បន្ទាយស្រីតែម្ដង។ ជាមួយគ្នានេះ ក្រុមហ៊ុនក៏មានលក់លំនៅដ្ឋានបែបលំហែរដ៏ស្រស់ស្អាតផងដែរជាមួយនឹងការផ្តល់ជូននូវតម្លៃសមរម្យ។

ជាការចូលរួមអបអរសាទរ និងថ្លែងអំណរគុណចំពោះអតិថិជនដែលបានគាំទ្រគម្រោងអភិវឌ្ឍន៍ដីឡូតិ៍ អចលនទ្រព្យបន្ទាយស្រី ដែលស្ថិតនៅក្នុងភូមិខ្នារ ឃុំខ្នារសណ្តាយ ស្រុកបន្ទាយស្រី ខេត្តសៀមរាប ដែលជាតំបន់កំពុងមានគម្រោងអភិវឌ្ឍន៍បានផ្តល់ជូននូវកម្មវិធីពិសេសដោយការលក់បញ្ចុះតម្លៃពី ៣០០០ដុល្លា មកនៅត្រឹម ២០០០ដុល្លាក្នុងមួយឡូតិ៍សម្រាប់អតិថិជនដែលទិញដោយការបង់ផ្តាច់រហូតឱកាសបុណ្យចូលឆ្នាំចិនខាងមុខនេះ។

លោកស្រីបញ្ជាក់ថា “ការបញ្ចុះតម្លៃជូនរហូតដល់ ១០០០ដុល្លារ ឬតម្លៃដីនៅត្រឹម ២០០០ដុល្លារក្នុងមួយឡូតិ៍នេះ គឺត្រូវធ្វើឡើងក្នុងលក្ខខណ្ឌផ្សេងគ្នា។ ជាធម្មតាតម្លៃដីនៅក្នុងគម្រោងគឺ ៣០០០ដុល្លារក្នុងមួយឡូតិ៍ ប៉ុន្តែសម្រាប់អតិថិជនដែលបានទិញ និងកក់ប្រាក់ ៥០ភាគនឹងទទួលបានការបញ្ចុះតម្លៃ ៥០០ដុល្លារ ហើយសម្រាប់ការកក់ប្រាក់ ៧០ភាគរយ នឹងទទួលបានការបញ្ចុះតម្លៃ ៨០០ដុល្លារ។ ដោយឡែកសម្រាប់អតិថិជនដែលមកទិញដីឡូតិ៍ដោយផ្ទាល់មិនមានឆ្លងកាត់ភ្នាក់ងារ នឹងទទួលបានប្រាក់លើកទឹកចំនួន ២០០ដុល្លា បន្ថែមទៀតផងដែរ។ ដូច្នេះមានន័យថា ដីដែលមានតម្លៃ ៣០០០ដុល្លា ក្នុងមួយឡូតិ៍បញ្ចុះតម្លៃនៅសល់ត្រឹមតែ២០០០ដុល្លាតែប៉ុណ្ណោះ ហើយកម្មវិធីត្រូវបានអនុវត្តចាប់ពីពេលនេះរហូតដល់ថ្ងៃចូលឆ្នាំចិនខាងមុខនេះតែប៉ុណ្ណោះ”។
សម្រាប់ព័ត៌មានលម្អិតសូមទាក់ទងតាមរយៈទូរស័ព្ទ 016 999 995 / 017 8 12345 / 097 8 123 456 ៕

ដោយ : គង់ សូរិយា

ភ្នំពេញៈ ស្របពេលរដ្ឋាភិបាលបានប្រកាសពីការបង្កើតទីក្រុងឆ្លាតវៃនៅជើងភ្នំបូកគោកាលពីឆ្នាំមុន គំរោងនេះបានធ្វើឲ្យអ្នកវិនិយោគក្នុងស្រុក និងអន្តរជាតិជាច្រើនបានសម្លឹងឃើញសក្តានុពលនៅតំបន់នេះ។

លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៤ ខែកុម្ភៈនេះថា ជើងភ្នំបូកគោ ជាតំបន់មានទីតាំងល្អ អាកាសធាតុល្អ និងលក្ខខ័ណ្ឌបង់ប្រាក់មានភាពអំណោយផល ប៉ុន្តែដោយសារវិបត្តិកូវីដ១៩បានធ្វើឲ្យគំរោងនេះដំណើរការយឺត ហេតុនេះយើងត្រូវការពេលវេលាដែលកូវីដ១៩បញ្ចប់ នឹងធ្វើឲ្យតំបន់នេះមានការអភិវឌ្ឍ និងរីកចម្រើនលឿន។

លោកបន្តថា “ដើម្បីធ្វើឲ្យដីតំបន់នេះឡើងថ្លៃ អ្នកវិនិយោគដែលមានដី គេរៀបចំការអភិវឌ្ឍន៍នៅតំបន់នោះ ព្រោះដីនឹងមិនឡើងថ្លៃទេ បើផែនការអភិវឌ្ឍន៍មិនបានរៀបចំបានល្អ”។លោកបន្តថា “ឧទាហរណ៍អ្នកវិនិយោគម្នាក់មានដី១០០ហិកតា គេបានយក៥ហិកតាសាងសង់រោងចក្រ ដោយជួលឲ្យឯកជនមិនគិតប្រាក់ អ្នកវិនិយោគនឹងហូរចូលទៅ​តំបន់នោះ បន្ទាប់គេនឹងយកដី១ហិកតាសាងសង់ផ្សារ ដែលការរៀបចំបែបនេះនឹងធ្វើឲ្យមនុស្សទៅរស់នៅច្រើន មានសកម្មភាពសេដ្ឋកិច្ច នឹងធ្វើឲ្យដីតំបន់នោះឡើងថ្លៃជាស្វ័យ​ប្រវត្តិ”។

លោកបណ្ឌិតគីម ហ៊ាងបានបន្តថា សម្រាប់ផែនការអភិវឌ្ឈន៍របស់រដ្ឋាភិបាលប្រ​កាសនៅតំបន់ណាមួយ ដីនៅតំបន់នោះតែងតែឡើងថ្លៃ ប៉ុន្តែរដ្ឋាភិបាលមិនបានវិនិយោគ​ច្រើនទេ គឺវិស័យឯកជនជាអ្នកវិនិយោគ ហេតុនេះមានតែអ្នកវិនិយោគក្នុងស្រុក និងបរទេសចូលមកទេ ទើបធ្វើឲ្យដីឡើងថ្លៃ និងការអភិវឌ្ឍនៅតំបន់ណាមួយដីនឹងឡើងថ្លៃលឿន។

លោកបន្តថា “សំរាប់ការរៀបចំទីក្រុងនៅជើងភ្នំបូកគោ វាត្រូវការពេលវេលាដែលកូវីដ១៩បញ្ចប់ ទើបតំបន់នេះមានការអភិវឌ្ឍលឿន ដោយសារលក្ខខ័ណ្ឌមួយចំនួន​ដែលបានលើកឡើងខាងលើ”។

លោកបណ្ឌិតគីម ហ៊ាងបានបន្តដោយលើកឧទាហរណ៍ជាក់ស្តែង មកបញ្ជាក់ថា តំបន់បឹងកក់ អ្នកវិនិយោគគម្រោងនេះ បានលក់ដីក្នុងតម្លៃទាបនៅពេលដំបូង ដើម្បីទាក់ទាញអ្នកវិនិយោគ ចូលទៅវិនិយោគគំរោងច្រើននៅទីនោះ ជាលទ្ឋផលពីមុនដីមានតម្លៃ៧០០ ទៅ៨០០ដុល្លារក្នុងមួយម៉ែត្រការ៉េ ប៉ុន្តែបច្ចុប្បន្នដីនៅតំបន់បឹងកក់តម្លៃបានកើនដល់៤០០០ទៅ៥០០០ដុល្លារក្នុងមួយម៉ែត្រការ៉េ។ ចំណែកដីនៅតំបន់ផ្លូវ៦០ម៉ែត្រពីមុនមានតម្លៃ១០០ទៅ២០០ដុល្លារ ប៉ុន្តែបច្ចុប្បន្នបានកើនឡើងតម្លៃ១៣០០ទៅ១៥០០ដុល្លារក្នុងមួយម៉ែត្រការ៉េ៕

ដោយៈរ៉ាណេត

ភ្នំពេញៈ រាជរដ្ឋាភិបាលសម្រេចកាត់ដីបឹងតាមោក ទំហំ៤ហិកតាសម្រាប់ការសាងសង់ទីស្ដីការក្រសួងមុខងារសាធារណៈ ដែលមានទីតាំងស្ថិតនៅភាគខាងលិចនៃទីតាំងក្រសួងយុត្តិធម៌។

យោងតាមសេចក្ដីជូនដំណឹងរបស់ទីស្ដី ការគណៈរដ្ឋមន្ត្រីដែលចុះហត្ថលេខាដោយលោកកែន សត្ថា លេខ៦៣ សជណ ចុះថ្ងៃទី២៨ ខែមករា ឆ្នាំ២០២១ ដែលត្រូវបានផ្សព្វផ្សាយនៅព្រឹកថ្ងៃទី៤ ខែកុម្ភៈ ឆ្នាំ២០២១នេះបានបញ្ជាក់ថា ក្រោមចំណារក៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា រដ្ឋាភិបាលសម្រេចកាត់ផ្ទៃដីបឹងតាមោកទំហំ៤ហិកតា សម្រាប់សាងសង់អាគារទីស្ដី ការក្រសួងមុខងារសាធារណៈដែលស្ថិតនៅភាគខាងលិច នៃទីតាំងក្រសួងយុត្តិធម៌ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ។

បច្ចុប្បន្ន តំបន់នៃផ្ទៃដីបឹងតាមោក កំពុងត្រូវបានធ្វើការអភិវឌ្ឍលើគម្រោងសាងសង់សំណង់ធំៗជាច្រើន ដែលក្នុងនោះរួមមានទាំងគម្រោងដែលអភិវឌ្ឍ និងវិនិយោគដោយរាជរដ្ឋាភិបាល ដូចជា ការសាងសង់អគារស្ថាប័នរដ្ឋ និងការវិនិយោគរបស់វិស័យឯកជនផងដែរ។

បឹងតាមោក ឬបឹងកប់ស្រូវ គឺជាបឹងធម្មជាតិធំជាងគេនៅរាជធានីភ្នំពេញ ដែលមានទីតាំងនៅភាគខាងលិចឈៀងខាងជើង តាមបណ្តោយមហាវិថីឈ្នះ-ឈ្នះ និងមានទំហំសរុបចំនួន៣២៣៩,៧ហិកតា លាតសន្ធឹងលើខណ្ឌចំនួន២ សង្កាត់ចំនួន៦ និងភូមិចំនួន ២៥។

បើផ្អែកតាមប្លង់គោលប្រើប្រាស់ដី របស់សាលារាជធានីភ្នំពេញឆ្នាំ២០៣៥ ផ្ទៃបឹងដែលត្រូវរក្សាទុកទំហំប្រមាណតែ២១៤០ហិកតាប៉ុណ្ណោះ ដែលយើងអាចសន្និដ្ឋានបានថាផ្ទៃបឹងប្រមាណ៥០០ហិកតា បន្ថែមទៀតអាចនឹងត្រូវកាត់ចេញពីផ្ទៃបឹងដើម៕