ដោយស៊ីវ ម៉េង

        ភ្នំពេញៈ តំបន់ភាគខាងកើតក្រុងភ្នំពេញ ដែលបានដេកលក់អស់រយៈពេលជាច្រើ​នឆ្នាំ បាននិងកំពុងចាប់ផ្តើមកំរើកជាថ្មី ជាមួយនឹងដំណឹងនៃការសាងសង់ស្ពានមិត្តភាព​កម្ពុជា កូរ៉េនាពេលខាងមុខ។

ជាមួយភូមិសាស្រ្តអំណោយផល ដោយមានដងទន្លេព័ទ្ឋជុំវិញ តំបន់ស្វាយជ្រុំ និងអរិយក្សត្របាននិងកំពុងរះឡើង ជាមួយនឹងគំរោងបុរីជាច្រើនបានចាប់ផ្តើមរីកចម្រើននៅតំបន់នេះរួចហើយ ហើយបុរីធំៗជាច្រើនទៀត ដូចជា បុរីប៉េង ហួត បុរីអ័រគីដេ បុរីពិភពថ្មីជាដើម បានទិញដីនៅតំបន់នេះរួចហើយ។

បើផ្អែកលើផែនការអភិវឌ្ឍន៍ ហេដ្ឋារចនាសម្ព័ន្ឋរបស់រដ្ឋាភិបាល គំរោងអចលនទ្រព្យធំៗជាច្រើន នឹងបង្ហាញវត្តមាននៅតំបន់នេះ នៅរយៈពេលចន្លោះពី២ឆ្នាំទៅ៣ឆ្នាំខាងមុខ។

សហស្ថាបនិកនិងជាអគ្គនាយកគេហទំព័រPropertyarea.asia លោកយិន លាងគង់ ដែលបានតាមដានការវិវត្ត នៃសេដ្ឋកិច្ចសង្គមបានមានប្រសាសន៍ថា តាមរយៈផែន​ការអភិវឌ្ឈន៍ជាបន្តបន្ទាប់របស់រដ្ឋាភិបាល ការកសាងទីក្រុងថ្មីកោះនរា គំរោងសាងសង់ស្ពានមិត្តភាពកម្ពុជា កូរ៉េ និងផ្លូវក្រវ៉ាត់ក្រុងទី៣ និងទី៤ ដែលនឹងសាងសង់កាត់តំបន់នេះ បានធ្វើឲ្យតំបន់ភាគខាងកើតក្រុងភ្នំពេញលេចឡើងយ៉ាងរសរវើកនារយៈពេល៣ទៅ៥ឆ្នាំខាងមុខនេះ។

លោកបន្តថា “គ្រាន់តែប្រធានាធិបតីកូរ៉េប្រកាសជួយសាងសង់ស្ពាន បានធ្វើឲ្យតម្លៃដីនៅតំបន់នេះឡើងថ្លៃរួចទៅហើយ ខណ

ៈស្ពានមិនទាន់សាងសង់ផង”។លោកបន្តថា “នៅពេលស្ពានចាប់ផ្តើមសាងសង់ តំបន់នេះនឹងរីកចម្រើន ហើយគំរោងធំៗនឹងបង្ហា​ញ​វត្តមានដូចរដូវផ្ការីកមិនខាន”។

លោកយិន លាងគង់បានបន្តថា ផែនការអភិវឌ្ឍន៍ហេដ្ឋារចនាសម្ព័ន្ឋធំៗ បាននិងកំពុងជំរុញការអភិវឌ្ឍនៅជុំវិញរាជធានីភ្នំពេញ ដែលសម្តេចតេជោនាយករដ្ឋមន្រ្តីនៃកម្ពុជាធ្លាប់បានលើកឡើងថា អភិវឌ្ឍន៍៍ខាងលិច កុំភ្លេចខាងកើតកាលពីប៉ុន្មានឆ្នាំមុន ដែលជាលទ្ឋផលគឺតំបន់ភាគខាងកើតបាន និងកំពុងរះឡើងជាមួយសក្តានុពលដ៏សម្បើម៕

ដោយ ៖ វុត្ថា

កែប ៖ កំណាត់ផ្លូវ DBST ក្នុងក្រុងកែបចំនួន៧កំណាត់ ដែលមានប្រវែងសរុប៣,៣៨២ម៉ែត្រ រួមជាមួយនឹងសំណង់សិល្បៈការ្យបានចាប់ផ្តើមបេីកការដ្ឋានសាងសង់ហើយ ដើម្បីបង្កភាពងាយស្រួលដល់ការធ្វើដំណើរ ដឹកជញ្ជូន និងបង្កើនសោភ័ណភាពនៅទូទាំងក្រុងកែប។

អភិបាលខេត្តកែប លោក សោម ពិសិដ្ឋ បានមានប្រសាសន៍នៅក្នុងពិធីបេីកការដ្ឋាននៅថ្ងៃទី២៣ ខែធ្នូ ឆ្នាំ២០២០នេះថា នៅក្នុងផែនការមេរបស់រដ្ឋបាលខេត្ត នឹងត្រូវស្ថាបនា និងស្ដារធ្វើឱ្យល្អប្រសើរឡើងវិញនូវហេដ្ឋារចនាសម្ព័ន្ធនៅទូទាំងខេត្តក្នុងនាមជាគោលដៅទេសចរណ៍កម្រិតខ្ពស់ប្រចាំប្រទេសកម្ពុជា។

លោកអភិបាលខេត្តបានបញ្ជាក់ថា “ដេីម្បីជួសជុលផ្លូវក្រាលក្រួសក្រហមចំនួន១ ខ្សែ និងជួសជុលផ្លូវក្រាលកៅស៊ូប្រភេទ DBSTចំនួន៧កំណាត់ខ្សែមានប្រវែង៣,៣៨២ម៉ែត្រ និងសំណង់សិល្បៈការ្យមួយចំនួនតាមបណ្តោយផ្លូវនៅមូលដ្ឋានភូមិកែប សង្កាត់កែប នេះគឺជាចំណងដៃថ្មីមួយទៀត ដេីម្បីជូនប្រជាពលរដ្ឋងាយស្រួលក្នុងការធ្វេីដំណេីរ និងដឹកជញ្ជូនកសិផលផ្សេងៗទៅកាន់ទីផ្សា ។

លោកបានបន្តទៀតថា “ក្រោមការដឹកនាំប្រកបដោយគតិបណ្ឌិត និងឈ្លៀសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើអោយប្រទេសជាតិ មានសុខសន្តិភាព មានការអភិវឌ្ឍ រីកចម្រើនលើគ្រប់វិស័យ។ ប្រទេសជាតិមានសុខសន្តិភាពនេះហេីយ ទេីបរដ្ឋបាលខេត្តមានឱកាសអភិវឌ្ឍន៍មូលដ្ឋានគ្រប់ទីកន្លែង”។

លោកបន្តថា “កំណាត់ផ្លូវដែលនឹងជួសជុលនៅពេលនេះ គឺជាសមិទ្ធផលថ្មីបន្ថែមទៀត ដែលរាជរដ្ឋាភិបាលក៏ដូចជារដ្ឋបាលខេត្តកែបបានផ្តល់ជូនប្រជាពលរដ្ឋ សម្រាប់ប្រើប្រាស់ក្នុងការធ្វេីដំណេីរ និងបញ្ចៀសការកកស្ទះចរាចរ ជាពិសេសដើម្បីភ្ញៀវទេសចរធ្វើដំណើរឆ្លងកាត់តំបន់នេះមានភាពងាយស្រួល ។ ការអភិវឌ្ឍន៍របស់រាជរដ្ឋាភិបាលនៅតែបន្តឥតឈប់ឈរ ដើម្បីប្រជាពលរដ្ឋមានជីវភាពកាន់តែប្រសេីរឡេីង។ ជាមួយគ្នានេះផងដែរលោកក៏បានសំណូមពរដល់ប្រជាពលរដ្ឋសូមមានការយោគយល់ចំពោះផលប៉ះដែលកេីតឡេីងពីការជួសជុលនេះ”៕

ដោយ ៖ វុត្ថា

សៀមរាប ៖ គម្រោងសាងសង់អាកាសយានដ្ឋានអន្តរជាតិសៀមរាបថ្មី បាន និងកំពុងសម្រុកសកម្មភាពសាងសង់យ៉ាងមមាញឹក ដើម្បីអាចបញ្ចប់ទៅតាមគម្រោង និងផែនការដែលបានគ្រោងទុក ខណៈដែលបច្ចុប្បន្នលទ្ធផលសម្រេចបានប្រមាណ៣៥ភាគរយ។

លោកបណ្ឌិត ម៉ៅ ហាវណ្ណាល់ រដ្ឋមន្ត្រីប្រតិភូអមទទួលបន្ទុករដ្ឋលេខាធិការដ្ឋានអាកាសចរស៊ីវិល នៅក្នុងដំណើរចុះត្រួតពិនិត្យការដ្ឋានសាងសង់អាកាសយានដ្ឋានអន្តរជាតិសៀមរាបអង្គរថ្មី នៅថ្ងៃទី២៣ ខែធ្នូ ឆ្នាំ២០២០ បានមានប្រសាសន៍ថា គម្រោងសាងសង់អាកាសយានដ្ឋានលំដាប់អន្តរជាតិមួយនេះបានសម្រេចបានចំនួន៣៥ហើយ ដែលនឹងគ្រោងបញ្ចប់នៅថ្ងៃទី១៤ ខែមិនា ឆ្នាំ២០២៣ ខាងមុខ ។

លោកបានបន្តថា “រយៈពេលនៃការសាងសង់អាកាសយានដ្ឋានអន្តរជាតិសៀមរាបមួយនេះ គ្រោងចំណាយពេល៣៦ខែ រាប់គិតចាប់ពីថ្ងៃបើកការដ្ឋានតាំងពីថ្ងៃទី១៥ ខែមិនា ឆ្នាំ២០២០ ដោយក្រុមហ៊ុនជំនាញ Angkor International Airport Investment (Cambodia) Co., Ltd. ។

ជាមួយគ្នានេះ លោកក៏បានបញ្ជាក់ផងដែរថា ប្រទេសកម្ពុជា ជាពិសេសខេត្តសៀមរាប នឹងទទួលបាននូវអាកាសយានអន្តរជាតិថ្មីមួយនាឆ្នាំ២០២៣ ឆាប់ៗខាងមុខ ដែលនឹងចូលរួមចំណែកក្នុងការទាក់ទាញភ្ញៀវទេសចរមកទស្សនាខេត្តសៀមរាប សំដៅជម្រុញកំណើនសេដ្ឋកិច្ចជាតិ ការបង្កើនការងារ និងប្រាក់ចំណូល ជូនប្រជាពលរដ្ឋ និងរួមចំណែកការអភិវឌ្ឍន៏សង្គមប្រកបដោយចីរភាព។

នៅក្នុងក្នុងបេសកម្មនៃការសាងសង់ ក្រុមហ៊ុន Angkor International Airport Investment (Cambodia) Co., Ltdបានដាក់ផែនការចំនួន៤ រួមមានទី១ ផែនការសាងសង់អាកាសយានដ្ឋានទាំងមូល ( Overall Schedule)។ ទី២ រាយការណ៏ អំពីវឌ្ឍនៈភាពគម្រោងសាងសង់អាកាសយានដ្ឋាន ឆ្នាំ២០២០ ( Project Progress in 2020)។ ទី៣ ផែនការសាងសង់អាកាសយានដ្ឋានឆ្នាំ២០២១ (Construction Plan for 2021) និង
៤ វិធានការត្រួតពិនិត្យ និងការបង្ការជម្ងឺឆ្លង កូវិដ១៩ ចំពោះបុគ្គលិក និងកម្មករដែលធ្វើការក្នុងគម្រោងសាងសង់អាកាសយានដ្ឋានទាំងមូល ( Pandemic Prevention and Control) ៕

ដោយ ៖ រ៉ាណេត

ព្រះសីហនុ ៖ រដ្ឋបាលខេត្តព្រះសីហនុបានធ្វើការជូនដំណឹង និងព្រមានម្ចាស់សំណង់ទាំងឡាយណាដែលមិនព្រមរុះរើសំណង់ប៉ះពាល់គម្រោងសាងសង់ផ្លូវល្បឿនលឿន ដោយដាក់កំណត់ត្រឹមថ្ងៃទី២៩ ខែធ្នូ ឆ្នាំ២០២០ជាកំហិត ត្រូវតែអនុវត្តជាចាំបាច់។

តាមរយៈការជូនដំណឹងរបស់រដ្ឋបាលខេត្តព្រះសីហនុ នៅថ្ងៃទី២៣ ខែធ្នូ ឆ្នាំ២០២០នេះ បានបញ្ជាក់ថា ប្រជាពលរដ្ឋដែលប៉ះពាល់ទៅនឹងគម្រោងសាងសង់ផ្លូវល្បឿនលឿនមានចំនួន៤៩គ្រួសារ ដែលបានចូលទន្ទ្រានកាន់កាប់ដីគម្របព្រៃឈើតាំងពីឆ្នាំ២០០២ ក្នុងភូមិពូធឿង ភូមិចំណោតរាម ឃុំបិតត្រាំង ស្រុកព្រៃនប់។

នៅក្នុងលិខិតដដែលបានបញ្ជាក់ទៀតថា ដើម្បីអនុញ្ញាតឱ្យក្រុមហ៊ុនស្ថាបនាផ្លូវល្បឿនលឿនអាចដំណើរការសាងសង់ និងឈានទៅបញ្ចប់គម្រោងតាមផែនការដែលបានគ្រោងទុក សូមប្រជាពលរដ្ឋដែលពាក់ព័ន្ធទាំងអស់ត្រូវរុះរើសំណង់របង ដំណាំ ឬសំណង់ផ្សេងៗចេញពីទីតាំងដោយខ្លួនឯងឱ្យបានរួចរាល់មុនថ្ងៃទី២៩ ខែធ្នូ ឆ្នាំ២០២០ជាកំហិត ។ ក្នុងករណីដែលមិនរុះរើដូចសេចក្ដីណែនាំ កម្លាំងរដ្ឋបាលស្រុកនឹងចាត់វិធានការរុះរើដោយមិនទទួលខុសត្រូវទៅលើការខូចខាត ឬបាត់បង់ទ្រព្យសម្បត្តិនោះឡើយ។

ផ្លូវល្បឿនលឿនដែលតភ្ជាប់រវាងតំបន់ពាណិជ្ជកម្មរាជធានីភ្នំពេញ និងកំពង់ផែអន្តរជាតិខេត្តព្រះសីហនុ បានចាប់ផ្តើមបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីកម្ពុជា ដោយទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន(CRBC)ពីប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd ។

គម្រោងផ្លូវល្បឿនលឿននេះ មានប្រវែងសរុបជាង១៩០គីឡូម៉ែត្រ តភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ដោយឆ្លងកាត់ទឹកដីរាជធានីភ្នំពេញ ប្រវែង៨,៣០គីឡូម៉ែត្រ ខេត្តកណ្តាលប្រវែង៩,១០គីឡូម៉ែត្រ ខេត្តកំពង់ស្ពឺប្រវែង៨០,៨០គីឡូម៉ែត្រ ខេត្តកោះកុងប្រវែង១,៩២គីឡូម៉ែត្រ និងខេត្តព្រះសីហនុប្រវែង៨៩,៨៩ គីឡូម៉ែត្រ។

តាមគម្រោងផ្លូវល្បឿនលឿននេះ មានទទឹងតួផ្លូវ២៤,៥ម៉ែត្រ និងក្រាលបេតុងកៅស៊ូ (AC) កម្រាស់១០សង់ទីម៉ែត្រ ដោយគន្លងផ្លូវធ្វើចរាចរចែកជា៤គន្លង (២គន្លងទៅ ២គន្លងមក) ដែលអនុញ្ញាតឱ្យយានយន្តគ្រប់ប្រភេទ អាចបើកបរក្នុងល្បឿនរហូតដល់១០០គីឡូម៉ែត្រ ក្នុងមួយម៉ោង និងកន្លែងខ្លះអាចបើកបរ ក្នុងល្បឿនដល់១២០គីឡូម៉ែត្រ ក្នុងមួយម៉ោង។

រាជរដ្ឋាភិបាល បានសម្រេចឱ្យមានការវិនិយោគផ្លូវនេះ តាមរូបភាពសាងសង់-អាជីវកម្ម និងផ្ទេរ (BOT) ជំនួសវិញ ដើម្បីសម្រួលការដឹកជញ្ជូនផលិតផល ដំណាំកសិផល និងផលិតផលកសិ-ឧស្សាហកម្ម របស់ក្រុមហ៊ុនវិនិយោគទៅកាន់ទីផ្សារក្នុងស្រុក និងជាពិសេសទៅកាន់ទីផ្សារអន្តរជាតិ តាមរយៈកំពង់ផែសមុទ្រអន្តរជាតិទឹកជ្រៅរបស់កម្ពុជា និងការធ្វើដំណើររបស់ប្រជាពលរដ្ឋមកពីគ្រប់តំបន់នៅទូទាំងប្រទេស ដោយចំណាយពេលវេលាតិច និងឆាប់រហ័ស៕

ដោយ៖ ប៊ី

អន្តរជាតិ៖ វិធានការបិទទ្វារប្រទេស និងគម្លាតសង្គមត្រូវបានព្យាករថា ជារារាំងដល់កំណើនសេដ្ឋកិច្ចរបស់ពិភពលោកនៅឆ្នាំនេះ ខណៈកំណើនសេដ្ឋកិច្ចនិងសកម្មភាពពាណិជ្ជកម្មនឹងវិលទៅរកសភាពដើមវិញនៅមុនចុងឆ្នាំ២០២១។ នេះបើយោងតាមការចេញផ្សាយរបស់សារព័ត៌មាន Malay Mail នៅថ្ងៃទី២៣ ខែធ្នូ ឆ្នាំ២០២០។

ការសិក្សារបស់វិទ្យាស្ថានអង់គ្លេសនិងវែល (ICAEW) បានឱ្យដឹងនៅថ្ងៃនេះថា កំណើនសេដ្ឋកិច្ចនៅតំបន់អាស៊ីអាគ្នេយ៍ ទំនងជាត្រូវបានរារាំងដោយវិធានការគម្លាតសង្គម ប៉ុន្តែការរឹតបន្តឹងនេះនឹងត្រូវបានបន្ធូរបន្ថយនៅឆ្នាំក្រោយ ដោយសារប្រទេសមួយចំនួននៅក្នុងតំបន់ អាចទទួលបានចាក់វ៉ាក់សាំងបានយ៉ាងឆាប់រហ័ស។
ការសិក្សាបានឱ្យដឹងថា “ភាពមិនប្រាកដប្រជានៅតែមាន ហើយប្រទេសជាច្រើននឹងចំណាយពេលដើម្បីស្តារការបាត់បង់សេដ្ឋកិច្ចរបស់ខ្លួន។ ហានិភ័យត្រូវបានកាត់បន្ថយ ដោយសារនឹងព័ត៌មានវិជ្ជមានថ្មីៗស្តីពីវ៉ាក់សាំង និងចក្ខុវិស័យកំណើនសេដ្ឋកិច្ចវិជ្ជមានក្នុងតំបន់អាស៊ីអាគ្នេយ៍ត្រូវបានរំពឹងទុកថានឹងកើតឡើងក្នុងរយៈពេលមធ្យម និងវែង”។

របាយការណ៍ទស្សនវិស័យសេដ្ឋកិច្ចចុងក្រោយពី Oxford Economics ដែលដឹកនាំស្រាវជ្រាវដោយវិទ្យាស្ថាន ICAEW បានព្យាករណ៍ថា ផលិតផលក្នុងស្រុកសរុបនៅអាស៊ីអាគ្នេយ៍នឹងធ្លាក់ចុះ៤,១ភាគរយ នៅឆ្នាំ២០២០ មុនពេលការស្ទុះងើបឡើងវិញយ៉ាងខ្លាំងដល់៦,២ភាគរយ នៅឆ្នាំ២០២១។

វិទ្យាស្ថាននេះបានឱ្យដឹងទៀតថា របាយការណ៍ចក្ខុវិស័យសេដ្ឋកិច្ចបានរកឃើញថា ការស្ទុះងើបឡើងវិញនៃសេដ្ឋកិច្ចក្នុងឆ្នាំ២០២១ នៅតែបន្តពឹងផ្អែកលើការបន្ធូរបន្ថយលើការរឹតត្បិតការបិទទ្វារប្រទេស សន្ទុះនៃការស្ទុះងើបឡើងវិញនៃសេដ្ឋកិច្ចសកល និងការចែកចាយវ៉ាក់សាំងកូវីដ១៩។

ដូច្នេះ វឌ្ឍនភាពលើការចាក់វ៉ាក់សាំងនឹងក្លាយជាឧបករណ៍វាស់ស្ទង់ដ៏សំខាន់មួយសម្រាប់កំណើននៅឆ្នាំ២០២១ ហើយសេដ្ឋកិច្ចនឹងល្អប្រសើរឡើងវិញ នៅពេលវ៉ាក់សាំងត្រូវបានចែកចាយគ្រប់គ្រាន់៕

ដោយ ៖ រ៉ាណេត

ភ្នំពេញ ៖ ក្នុងគោលបំណងជំរុញ និងពង្រីកទំហំពាណិជ្ជកម្ម និងសេដ្ឋកិច្ចឱ្យកាន់តែមានភាពល្អប្រសើរ រដ្ឋាភិបាលកម្ពុជា និងអូស្ត្រាលី គ្រោងនឹងមានការរៀបចំឱ្យមានកិច្ចចុះហត្ថលេខារវាងសភាពាណិជ្ជកម្មនៃប្រទេសទាំង២ក្នុងពេលដ៏ខ្លីខាងមុខនេះ។

លោកឧកញ៉ា លឹម ហេង អនុប្រធានសភាពណាិជ្ជកម្មកម្ពុជា បានមានប្រសាសន៍នៅរសៀលថ្ងៃទី២៣ ខែធ្នូ ឆ្នាំ២០២០នេះថា គម្រោងនៃការរៀបចំឱ្យមានកិច្ចចុះហត្ថលេខារវាងសភាពាណិជ្ជកម្មកម្ពុជា និងសភាពាណិជ្ជកម្មប្រទេសអូស្ត្រាលីនេះគឺមានយូរហើយ ប៉ុន្តែនៅមិនទាន់បានអនុវត្តនៅឡើយ។

លោកឧកញ៉ាបានបន្តថា “ក្នុងគោលដៅពង្រីកទំហំពាណិជ្ជកម្មឱ្យកាន់តែល្អប្រសើរ កាលពីពេលកន្លងទៅនេះយើងបានចុះហត្ថលេខានៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលកម្ពុជា និងអូស្ដ្រាលីជាសមាជិកកាលពីអំឡុងខែវិច្ឆិកាកន្លងមករួចហើយ។ ជាជំហានបន្ទាប់អាចនឹងឈានដល់ការចុះហត្ថលេខារវាងសភាពាណិជ្ជកម្មខាងមុខនេះ ខណៈដែលកម្ពុជាក៏មានបំណងដាក់ស្ថាប័នតំណាងធុរកិច្ច និងការវិនិយោគនៅក្នុងប្រទេសអូស្ត្រាលីផងដែរ”។

លោកបានបញ្ជាក់ថា “ក្រោយកិច្ចចុះហត្ថលេខា យើងអាចនឹងមានការចរចាបន្តទៅលើការដោះស្រាយបញ្ហារាំងស្ទះមួយចំនួនទៅលើការធ្វើពាណិជ្ជកម្ម និងវិនិយោគរវាងប្រទេសទាំង២ ពោលគឺធ្វើយ៉ាងណារកវិធីដែលអាចទទួលបាននូវរីកចម្រើនទាំងវិស័យឯកជន ទាំងរដ្ឋាភិបាលនៃប្រទេស”។

លោកឧកញ៉ា លឹម ហេង បានបញ្ជាក់ថា “សម្រាប់ទំហំពាណិជ្ជកម្មរវាងកម្ពុជា និងប្រទេសអូស្ត្រាលីកាលពីពេលកន្លងទៅនេះគឺនៅមានកម្រិតនៅឡើយ ដោយក្នុងនោះផលិតផលដែលនាំចេញពីកម្ពុជាទៅកាន់ទីផ្សារប្រទេសអូស្ត្រាលីរួមមានដូចជា សម្លៀកបំពាក់ បរិក្ខាអគ្គិសនី សម្ភារៈប្រើប្រាស់ និងផលិតផលកសិផលផងដែរ ខណៈដែលការនាំចូលមកពីប្រទេសអូស្ត្រាលីមកកាន់កម្ពុជាវិញរួមមានដូចជាគ្រឿងបរិក្ខាពេទ្យ ផលិតផលកសិកម្ម និងគ្រឿងតុបតែងផងដែរ”។

ជាមួយនឹងការលើកឡើងខាងលើនេះ លោកឧកញ៉ា លឹម ហេង ក៏បានបង្ហាញពីក្ដីរំពឹងនឹងអាចឈានដល់ការចរចាលើកិច្ចព្រមព្រៀងព្រៀងពាណិជ្ជកម្មសេរីរវាងប្រទេសទាំង២ផងដែរ៕