ស្ថាប័នទេសចរណ៍អាស៊ានដាក់ចេញយុទ្ធសាស្រ្តចំនួន៦ដើម្បីស្តារវិស័យនេះឡើងវិញ

ដោយ : គង់ សូរិយា

ភ្នំពេញៈ ដើម្បីស្តារវិស័យទេសចរណ៍អាស៊ានឡើងវិញ និងវិធាននានាសម្រាប់ជំរុញ និងទាក់ទាញទេសចរក្នុងតំបន់អាស៊ាន និងប្រទេសដៃគូអាស៊ាន ស្ថាប័នជាតិទេសចរណ៍អាស៊ានបានពិភាក្សាគ្នា និងដាក់ចេញនូវវិធានការណ៍សំខាន់ៗចំនួន៦។

កិច្ចប្រជុំកាលពីថ្ងៃម្សិលម៉ិញនេះ ដឹកនាំដោយលោកថោង រដ្ឋសក្តិ ប្រធានអង្គប្រជុំស្ថាប័នជាតិទេសចរណ៍អាស៊ានលើកទី៥៣ និងអគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានដឹកនាំកិច្ចប្រជុំស្ថាប័នជាតិទេសចរណ៍ អាស៊ានលើកទី៥៣តាមប្រព័ន្ធវីដេអូខនហ្វើរិន។

ស្ថាប័នពាក់ព័ន្ឋដែលចូលររួមក្នុងកិច្ចប្រជុំនេះបានផ្តោត លើរបៀបវារៈចំនួន៦រួមមាន ទី១ ការរៀបចំផែនការយុទ្ធសាស្ត្រទីផ្សារទេសចរណ៍អាស៊ាន ២០២១-២០២៥។ ផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិកូវីដ-១៩ (COVID-19) របស់ក្រសួងទេសចរណ៍កម្ពុជាបានគ្របដណ្តប់ នៅក្នុងផែនការយុទ្ធសាស្ត្រទីផ្សារទេសចរណ៍អាស៊ាន ២០២១-២០២៥ផងដែរ។

ទី២ ការៀបចំផែនការស្តារវិស័យទេសចរណ៍អាស៊ានឡើងវិញនៅក្រោយវិបត្តិកូវីដ-១៩ ដែលនឹងគ្រោងបញ្ចប់នៅចុងខែមីនា ឆ្នាំ២០២១ (ដឹកនាំដោយកម្ពុជា) ទី៣ ស្របតាមកិច្ចព្រមព្រៀងទទួលស្គាល់គ្នាទៅវិញទៅមក (MRA) ប្រទេសសមាជិកអាស៊ានមានការគាំទ្រការបណ្តុះបណ្តាលជំនាញ ទេសចរណ៍អាស៊ានតាមអនឡាញ ស្របតាមប្រព័ន្ធគុណវុឌ្ឍអាស៊ាន ហើយបានគាំទ្រក្រសួងទេសចរណ៍កម្ពុជា ក្នុងការដាក់ចុះនូវកម្មវិធីបណ្តុះបណ្តាលអនឡាញ តាមកម្មវិធីសិក្សាអាស៊ាន (ASEAN MRA E-Learning)។

ទី៤ ការជំរុញការវិនិយោគក្នុងវិស័យទេសចរណ៍ អាស៊ាននឹងដាក់ចេញឯកសារមគ្គុទ្ទេសក៏ ស្តីពីការវិនិយោគក្នុងវិស័យទេសចរណ៍អាស៊ាន។ ទី៥ ការរៀបចំឲ្យមានគំនិត ផ្តួចផ្តើមរួម ក្នុងការប្រើប្រាស់ប្រព័ន្ធឌីជីថល និងAIដើម្បីធ្វើការផ្សព្វផ្សាយទេសចរណ៍អាស៊ាន ស្របតាមសេចក្ដីថ្លែងការណ៍អាស៊ានស្ដីពីទេសចរណ៍ឌីជីថល ដែលបានដាក់ចុះដោយកិច្ចប្រជុំកំពូលអាស៊ានលើកទី៣៧ នៅប្រទេសវៀតណាម កាលពីថ្ងៃទី១២ ខែវិច្ឆិកា ឆ្នាំ២០២០ និងទី៦ ពិភាក្សា និងពិនិត្យលទ្ធភាព ធ្វើដំណើរតាមច្រករបៀងអាស៊ាន ប្រកបដោយសុវត្ថិភាព និងការទទួលខុសត្រូវ ស្របពេលជាមួយអាស៊ានកំពុងពិនិត្យមើលប្រសិទ្ធភាពវ៉ាក់សាំង ប្រឆាំងនឹងជំងឺកូវីដ-១៩ ក្នុងគោលបំណងបង្កើតភាពជឿជាក់ និងទំនុកចិត្តដល់ទេសចរណ៍ក្នុងតំបន់អាស៊ាន។

កិច្ចប្រជុំដំបូងនេះមានការចូលរួមពីថ្នាក់អគ្គនាយកទេសចរណ៍អាស៊ាន លេខាធិការដ្ឋានអាស៊ាន ក្រសួងសុខាភិបាល ក្រសួងការបរទេសនិងសហប្រតិបត្តិការអន្តរជាតិក្រសួងមហាផ្ទៃក្រសួងវប្បធម៌និងវិចិត្រសិល្បៈរដ្ឋលេខាធិការដ្ឋានអាកាសចរស៊ីវិល ក្រសួងសាធារណៈការ និងដឹកជញ្ជូន ក្រុមប្រឹក្សាអភិវឌ្ឍន៍កម្ពុជា មជ្ឍមណ្ឌលអាស៊ាន ចិន ជប៉ុន និងកូរ៉េ អង្គការទេសចរណ៍ពិភពលោក សមាគមធ្វើដំណើរអាស៊ីប៉ាស៊ីហ្វីក សមាគមទេសចរណ៍អាស៊ាន សមាគមស្រាវជ្រាវទេសចរណ៍អាស៊ាន និងក្រុមប្រឹក្សាធុរកិច្ចអាស៊ាន-អាមេរិក (VISA, Agoda and Google….) ដែលមានសមាសភាពប្រមាណ ៣០០នាក់៕

ទីផ្សារជួលអគារនៅក្រុងព្រះសីហនុចាប់ផ្តើមមានកំណើនបន្តិចឡើងវិញបណ្ដើរៗ

ដោយៈ រ៉ាណេត

ព្រះសីហនុៈ ក្រោយពីស្ថានការណ៍នៃភាពប្រឈមនឹងជំងឺឆ្លង ត្រូវបានកាត់បន្ថយ ជាពិសេសមានការប្រើប្រាស់វ៉ាក់សាំង នៅតាមបណ្តាប្រទេសមួយចំនួន វត្តមាននៃជនបរទេស ក៏ដូចជាជនជាតិចិន បានវិលត្រឡប់មកកាន់ខេត្តព្រះសីហនុជាបណ្តើរៗ និងក្លាយជាចលករជំរុញឱ្យតម្រូវការជួលអគារចាប់ផ្តើមកម្រើកឡើងវិញ។

លោកនង ឌីណារ៉ា ប្រធានការិយាល័យទំនាក់ទំនងសាធារណៈ និងពិធីការនៃរដ្ឋបាលខេត្តព្រះសីហនុ បានឱ្យដឹងនៅថ្ងៃដើមសប្ដាហ៍នេះថា ចាប់តាំងពីដើមឆ្នាំ២០២១ បន្ទាប់ពីស្ថានភាពនៃជំងឺ Covid-19 មានភាពស្ងប់ស្ងាត់ ជាពិសេសនៅក្នុងប្រទេសកម្ពុជាមានការទប់ស្កាត់បានល្អនោះ កំណើនទេសចរក្នុងស្រុកចាប់ផ្តើម មានកំណើនជាបន្តបន្ទាប់។

លោកបន្តថា “ក្រៅពីកំណើនទេសចរក្នុងស្រុក បច្ចុប្បន្ននេះក៏មានវត្តមានរបស់ទេសចរ និងវិនិយោគិនចិន វិលត្រឡប់មកកាន់ក្រុងព្រះសីហនុវិញដែរ ដែលក្នុងនោះភាគច្រើនជាវិនិយោគិនចាស់ បានមកបញ្ចប់គម្រោងរបស់ពួកគេ ដែលបានបន្សល់ទុកមុនពេលកើតមានវិបត្តិជំងឺរាតត្បាត”។លោកបន្ថែមថា “ទាំងការវិលត្រឡប់របស់វិនិយោគិន និងទេសចរចិន បានជួយជំរុញឱ្យទីផ្សារជួលអាគារសម្រាប់ស្នាក់នៅ ក៏ដូចជាអាគារអាជីវកម្មដែលធ្លាប់ស្ងាប់ស្ងាត់នោះ ចាប់ផ្តើមមានតម្រូវការវិញបន្តិច។ វាក៏ជាសញ្ញាល្អមួយផ្នែកនៅក្នុងចំណោមផ្នែកដទៃទៀត នៃវិស័យអចលនទ្រព្យនៅក្នុងខេត្តព្រះសីហនុ ដែលនឹងងើបឡើងវិញផងដែរ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍នៅថ្ងៃទី៣ ខែកុម្ភៈ ឆ្នាំ២០២១នេះថា នៅឆ្នាំនេះទីផ្សារអចលនទ្រព្យ ក៏ដូចជាតម្រូវការទីផ្សារជួលអគារ នៅក្នុងខេត្តព្រះសីហនុនឹងមានកំណើនឡើងវិញ ប៉ុន្តែស្ថិតនៅក្នុងអត្រាតិចតួចនៅឡើយ ហើយកំណើននៃការជួលទាំងនេះភាគច្រើន ជាតម្រូវការរយៈពេលខ្លីពីសំណាក់ទេសចរដែលមកកម្សាន្តតែប៉ុណ្ណោះ។

លោកបានបន្តថា “យើងត្រូវមើលទៅលើភាពជាក់ស្ដែងនៃការវិលត្រឡប់របស់ពួកគាត់ តើជាទេសចរ ជាពាណិជ្ជករថ្មី ឬជាពាណិជ្ជករចាស់។ បើជាពាណិជ្ជករថ្មីទើបជាដំណឹងល្អដែលនឹងជួយចូលរួមទាំងវិស័យវិនិយោគ ពាណិជ្ជកម្ម និងគាំទ្រដល់វិស័យអចលនទ្រព្យ”។ លោកបន្តថា “ប្រសិនបើជាពាណិជ្ជករចាស់ ពួកគាត់សុទ្ធតែមានអគារ មានផ្ទះអាជីវកម្មរបស់ពួកគាត់រួចហើយ តាំងពីពេលមិនទាន់មានវិបត្តិម្លេះ ដូច្នេះវាមិនធ្វើឱ្យតម្រូវការទីផ្សារនៃការជួលអគារកើនឡើងខ្ពស់នោះទេ”។

លោកថា “តាមការរសង្កេតមើលយ៉ាងហោចណាស់ ក៏ពាក់កណ្តាលឆ្នាំ ឬចុងឆ្នាំ២០២១ ទើបអាចមានតម្រូវការជួល និងមានដំណើរការទីផ្សារអចលនទ្រព្យឡើងវិញបន្ទាប់ពីមានការគ្រប់គ្រង និងបើកឱ្យមានការធ្វើដំណើរឆ្លងប្រទេស ទូលំទូលាយឡើងវិញ៕

ចំនួនអ្នកប្រើប្រាស់Internetនៅកម្ពុជាកើនឡើងប្រមាណ១៦លាននាក់ និងfacebookជាង១០លាននាក់

ដោយ : គង់ សូរិយា

ភ្នំពេញៈ រដ្ឋមន្រ្តីក្រសួងប្រៃសណីយ៍បានអះអាងថា រហូតមកទល់ពេលនេះអ្នកប្រើប្រាស់បណ្តាញទំនាក់ទំនងសង្គម(facebook) កើនដល់១០លាននាក់ និងអ្នកប្រើប្រាស់សេវាInternetកើនឡើងដល់១៦លាននាក់នៅទូទាំងប្រទេស។

លោកជា វ៉ាន់ដេតរដ្ឋមន្រ្តីក្រសួងប្រៃសណីយ៍ និងទូរគមនាគមន៍៍បានមានប្រសាសន៍ឲ្យដឹងកាលពីដើមសប្តាហ៍នេះថា នៅទូទាំងប្រទេសកម្ពុជា មានអ្នកប្រើប្រាស់ទូរស័ព្ទចល័តចំនួនប្រមាណជាង២០លានស៊ីមកាត និងអ្នកប្រើប្រាស់គណនីហ្វេសប៊ុក (Facebook) សរុបប្រមាណជាង១០លានគណនី ខណៈក្រសួងបាននិងកំពុងប្រែក្លាយទៅជាក្រសួងនាំមុខខាងផ្នែកឌីជីថលនាឆ្នាំក្រោយនេះ។

លោករដ្ឋមន្រ្តីបន្តថា “ខ្ញុំនឹងដឹកនាំក្រសួងនេះឈានមុខគេលើផ្នែកបច្ចេកវិទ្យាឌីជីថល ពោលកម្ពុជានឹងឈប់ប្រើប្រាស់ក្រដាសដោយនឹងប្រើប្រាស់បច្ចេកវិទ្យា ឌីជីថល ដើម្បីជាជំនួយ និងការងារប្រចាំថ្ងៃ”។

ការងារទាំងនោះមានដូចជា ការចុះហត្ថលេខា និងការសម្រេចចិត្តនានាតាមរយៈឌីជីថលជំនួសវិញ។ ក្នុងនោះដើម្បីសម្រេចបានគោលដៅក្រសួងបានរៀបចំអភិវឌ្ឍន៍នូវគម្រោង២១ ដោយភាគច្រើនជាថវិការបស់ក្រសួង បានមកពីការសន្សំសំចៃ ហើយ២១គម្រោងនេះ មានគម្រោងខ្លះនឹងត្រូវបញ្ចប់នាពេលឆាប់ៗនេះ ហើយគម្រោងខ្លះទៀតបានដាក់ឱ្យប្រើប្រាស់សាកល្បង ដោយនឹងបន្តអភិវឌ្ឍរហូតដល់ខែមករា ឆ្នាំ២០២២ខាងមុខ ក្រសួងនឹងប្រកាសថាជាក្រសួងឌីជីថល។

លោកជា វ៉ាន់ដេត បានលើកឡើងថា នៅពេលដែលយើងទទួលបានជោគជ័យ គឺយើងនឹងគិតគូរពិចារណាថា តើក្រសួងណាដែលចង់ឱ្យក្រសួងប្រៃសណីយ៍ជួយក្នុងការជំរុញប្រើប្រាស់ឌីជីថលនេះ យើងនឹងជួយ។ យើងរៀបចំយន្តការឱ្យបានគ្រប់ជ្រុងជ្រោយក្នុងការអនុវត្តគម្រោង ឌីជីថល នៅក្រសួងប្រៃសណីយ៍ ដើម្បីធានាថាគម្រោងទាំងអស់ដាក់ឱ្យប្រើប្រាស់គឺមានចរន្តភាពជារៀងរហូត ពោលមិនឱ្យប្រើហើយដាច់ទៅវិញ ឬបរាជ័យទៅវិញនោះទេ៕

ឧកញ៉ាផន វណ្ណិតៈកត្តាសំខាន់ៗចំនួន៣នឹងធ្វើឲ្យវិស័យអចលនទ្រព្យមានសន្ទុះរ៉ឹងមាំឡើងវិញនៅឆ្នាំ២០២១នេះ

ដោយ : ស៊ីវ ម៉េង

ភ្នំពេញៈ ជាមួយនឹងក្តីសុទិដ្ឋិនិយមពីការររីកចម្រើន លើវិស័យអចលនទ្រព្យនៅឆ្នាំ២០២១នេះ ឧកញ៉ាផន វណ្ណិតបានមើលឃើញកត្តាសំខាន់ៗចំនួនបី ដែលវិស័យនេះនឹងសម្រេចបានកំណើនរ៉ឹងមាំឡើងវិញនៅឆ្នាំ២០២១នេះ។

អ្នកជំនាញអចលនទ្រព្យមួយរូប និងជាអនុប្រធានសមាគមអ្នកអភិវឌ្ឍន៍ដីឡូត៍កម្ពុជា ឧកញ៉ាផន វណ្ណិតបានមានប្រសាសន៍ឲ្យដឹងនាព្រឹកថ្ងៃទី៣ កុម្ភៈនេះថា កត្តាសេដ្ឋកិច្ច ពេលវេលា និងកត្តាប្រជាសាស្រ្តនឹងរុញវិស័យអចលនទ្រព្យនៅកម្ពុជា ឈានទៅកាន់កម្រិតរីកចម្រើនថ្មីមួយទៀតនៅឆ្នាំនេះ ដោយសារ ទី១ សេដ្ឋកិច្ចកម្ពុជាទោះបីជារងវិបត្តិកូវីដ១៩ក្តី ប៉ុន្តែមិនរងការខូចខាតខ្លាំងនោះទេ គឺវិស័យនេះនៅតែមានការរីកចម្រើន ខណៈដែលស្ថាប័នអន្តរជាតិធំៗបានព្យាករណ៍ថា សេដ្ឋកិច្ចកម្ពុជានឹងសម្រេចបានកំនើនចន្លោះពី៤ ទៅ៥ភាគររយនៅឆ្នាំនេះ។

លោកបន្តថា “ហេតុផលដែលខ្ញុំអះអាងបែបនេះ ដោយសារសេដ្ឋកិច្ចកម្ពុជានៅតែមានកំណើនថេរ ក្នុងរយៈពេលពីរទសវត្សរ៍ចុងក្រោយនេះ ពិសេសប្រទេសកម្ពុជាជាប្រទេសកំពុងមានការអភិវឌ្ឍ ហេតុនេះសេដ្ឋកិច្ចកម្ពុជានឹងវិវត្តន៍៍ទៅមុខរហូត”។ លោកបន្តថា “កត្តាប្រសាស្រ្ត គឺប្រជាជនកម្ពុជាមានចំនួនប្រមាណ១៦លាននាក់ ប្រាក់ចំណូលប្រជាជនមានការកើនឡើង ហេតុនេះបើយើងគិតប្រជាជនមួយគ្រួសារមានផ្ទះមួយ អ្នកទៅធ្វើការនៅក្រៅប្រទេសត្រូវការមានផ្ទះ មានដី វានឹងជាកំលាំាំងចលករជម្រុញឲ្យវិស័យនេះរីកចម្រើនខ្លាំងនៅពេលអនាគត”។

លោកបន្តថា កំនើនប្រាក់ចំណូល កំណើនតម្លៃដីធ្លីនេះហើយ នឹងធ្វើឲ្យសេដ្ឋកិច្ចកាន់តែរសរវើក និងធ្វើឲ្យចរន្តសាច់ប្រាក់ មានលំហូរទៅគ្រប់ផ្នែកនៃសេដ្ឋកិច្ច ដែលធ្វើឲ្យចរន្តទិញលក់ដីធ្លី លំនៅដ្ឋាននឹងកើនឡើង ហើយតម្លៃដីធ្លីនឹងបន្តកើនឡើងបន្ថែមទៀត។

លោកឧកញ៉ាផន វណ្ណិតបានបន្តថា “ការរីកចម្រើនសេដ្ឋកិច្ច កំនើនប្រជាសាស្រ្តនេះហើយ នឹងធ្វើឲ្យតម្រូវការលំនៅដ្ឋានកើនឡើង ស្របពេលទីក្រុងនឹងកាន់តែរីកធំនាពេលអនាគត”។

ឧកញ៉ាបានបន្តថា កត្តាពេលវេលា ដែលយើងដឹងហើយថា រដ្ឋាភិបាលកំពុងរៀបចំកសាងហេដ្ឋារចនាសម្ព័ន្ឋ រៀបចំច្បាប់បទដ្ឋានគតិយុត្តិ និងកែទម្រង់ស៊ីជម្រៅលើស្ថាប័ននានា ដើម្បីទាក់ទាញការវិនិយោគ ដើម្បីជម្រុញកំនើនសេដ្ឋកិច្ចជាតិ ស្របពេលដែលអ្នកវិនិយោគបររទេស នឹងចូលមកកាន់កម្ពុជាកាន់តែច្រើន ដោយសារកម្ពុជាបានចុះកិច្ចព្រមព្រៀងពាណិជ្ជកម្មសេរីជាមួយប្រទេសចិន។ កម្ពុជាបានបញ្ចប់ការចចារពាណិជ្ជកម្មសេរី ជាមួយសាធារណៈរដ្ឋកូរ៉េ ហើយកម្ពុជាក៏បានចុះកិច្ចព្រមព្រៀង ក្នុងការបង្កើតតំបន់សេដ្ឋកិច្ចគ្រប់ជ្រុងជ្រោយកម្រិតតំបន់(RCEP) និងកិច្ចព្រមព្រៀងពាណិជ្ជកម្មជាច្រើនទៀត ដែលផ្តល់នូវកាលានុវត្តន៍ភាព សម្រាប់ការឈានឡើងរបស់កម្ពុជា។

លោកបន្តថា “ទន្ទឹមនឹងនេះ កម្ពុជានឹងរៀបចំស៊ីហ្គេមនៅឆ្នាំ២០២៣ ហេតុនេះ ដើ ម្បីធ្វើឲ្យមុខមាត់ប្រទេសកាន់តែមានកិត្យានុភាព និងមានសោភ័ណភាព ដែលជំរុញ ឲ្យសេដ្ឋកិច្ចកាន់តែមានការរីកចម្រើន ធ្វើឲ្យអ្នកវិនិយោគដីធ្លីទទួលបានផលចំណេញនៅឆ្នាំ២០២៣ខាងមុខនេះ ដោយសារកត្តាសំខាន់ៗទាំងបីខាងលើនេះ”៕

ខេត្តកំពង់ស្ពឺក្លាយជាគោលដៅវិនិយោគលំដាប់ទី២ប្រចាំប្រទេសបន្ទាប់ពីរាជធានីភ្នំពេញ

ដោយៈ រ៉ាណេត

ភ្នំពេញៈ បន្ទាប់ពីរាជធានីភ្នំពេញដែលជាមជ្ឈមណ្ឌលពាណិជ្ជកម្ម ពិសេសប្រចាំប្រទេសកម្ពុជា ខេត្តកំពង់ស្ពឺបានឈរនៅលំដាប់ទី២ ដែលទទួលបានទុនវិនិយោគប្រមាណ២០ភាគរយនៃទុនវិនិយោគសរុបប្រចាំប្រទេស។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា ខេត្តកំពង់ស្ពឺបានឈរនៅលំដាប់ទី២ បន្ទាប់ពីរាជធានីភ្នំពេញ ដែលទទួលបានទុនវិនិយោគប្រមាណ២០ភាគរយ នៃទុនវិនិយោគសរុបប្រចាំប្រទេស៨២៥០លានដុល្លារកាលពីឆ្នាំ២០២០។

អភិបាលខេត្តកំពង់ស្ពឺ លោកវ៉ី សំណាង បានមានប្រសាសន៍នៅព្រឹកថ្ងៃទី៣ ខែមករា ឆ្នាំ២០២១នេះថា ក្នុងនាមជាអាជ្ញាធរខេត្ត លោកពិតជាមានក្ដីរីករាយ ជាមួយនឹងលទ្ធផលក៏ល្អប្រសើរ ដែលទទួលបានគម្រោងវិនិយោគជាច្រើននៅក្នុងខេត្ត។

លោកបានបន្តថា “បច្ចុប្បន្នខេត្តកំពង់ស្ពឺ ដែលធ្លាប់តែមានជីវភាពក្រីក្រជាងគេបានប្រែក្លាយជាខេត្ត មានសក្ដានុពលក្នុងការវិនិយោគ និងអភិវឌ្ឍស្ទើរគ្រប់វិស័យជាពិសេសវិស័យឧស្សាហកម្ម កសិ-ឧស្សាហកម្ម និងវិស័យអចលនទ្រព្យផងដែរ”។ លោកបញ្ជាក់ថា “សម្រាប់វិស័យឧស្សាហកម្ម ខេត្តទទួលបានរាប់រយគម្រោង ដែលគិតទាំងសហគ្រាសតូចធំ រួមទាំងរោងចក្រនានាមានមិនក្រោយ៧០០ទីតាំងនោះទេ”។

ខេត្តមានតំបន់សេដ្ឋកិច្ចពិសេសចំនួន២ ទីតាំងស្ថិតនៅផ្លូវជាតិលេខ៣ ក្នុងស្រុក

គង់ពិសី និងមួយទីតាំងទៀតនៅផ្លូវជាតិលេខ៤៤ ស្រុកឱត៉ាល់ ដោយមិនទាន់រាប់ពីគម្រោងអភិវឌ្ឍន៍តំបន់សេដ្ឋកិច្ច និងសួនឧស្សាហកម្មដ៏ធំរបស់លោកឧកញ៉ពុង ឃាវសែរ នៅឡើយនោះទេ។

លោកបានបន្តថា នេះគឺជាមោទនភាពបំផុតចំពោះខេត្តកំពង់ស្ពឺ ដែលបាននឹងកំពុងទទួលបាននូវការអភិវឌ្ឍន៍ រោងចក្រសហគ្រាសរីកដុះដាលដូចផ្សិត នៅពេលនេះ ដោយបច្ចប្បន្នខេត្តកំពង់ស្ពឺ មិនដូចពីអតីតកាលទៀតទេ ហើយខេត្តមួយនេះកំពុងទាក់ទាញអ្នកវិនិយោគជាបន្តបន្ទាប់ និងកំពុងតែស្រូបយកម្លាំងពលកម្ម ពីបណ្តាខេត្តផ្សេងៗរាប់ម៉ឺនកន្លែងផងដែរ។

លោកអភិបាលបានបញ្ជាក់ថា ការបង្រួបបង្រួមជាតិ ឯកភាពជាតិខ្មែរ និងបានដាក់ចេញនូវគោលនយោបាយ ឈ្នះឈ្នះ ធ្វើឱ្យប្រទេសជាតិជ្រកក្រោមដំបូលសុខសន្តិភាព ស្ថិរភាពនយោបាយ និងមានការអភិវឌ្ឍរីកចម្រើន ស្មើមុខស្មើមាត់ ដូចបណ្ដាប្រទេសក្នុងតំបន់ និងលើឆាកអន្តរជាតិ ក្រោមការដឹកនាំដ៏ប៉ិនប្រសព្វ ប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា។

បច្ចុប្បន្នតំបន់សំខាន់ៗ ដែលកំពុងមានភាពទាក់ទាញ ក្នុងការដាក់ទីតាំងវិនិយោគនៅក្នុងវិស័យឧស្សាហកម្ម នៃខេត្តកំពង់ស្ពឺ កំពុងរីកសាយភាយនៅតាមបណ្តោយផ្លូវជាតិលេខ៤ ផ្លូវជាតិលេខ៥១ ផ្លូវលេខ៤១ ផ្លូវជាតិលេខ៤៤ រួមជាមួយគម្រោងនៃបង្កើតសួនឧស្សាហកម្ម និងតំបន់សេដ្ឋកិច្ចពិសេសផងដែរ ដែលមានតម្លៃសរុបរាប់រយលានដុល្លារ៕

ក្រុមហ៊ុនអូស្រ្តាលីនឹងចាប់ផ្តើមទាញយករ៉ែមាសនៅមណ្ឌលគីរីក្នុងត្រីមាសទី២ឆ្នាំនេះ

ដោយ៖ ប៊ី

ភ្នំពេញ៖ ក្រុមហ៊ុន Renaissance Minerals (Cambodia) Ltd ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources NL ចុះបញ្ជីនៅអូស្រ្តាលី បានឱ្យដឹងកាលពីថ្មីៗនេះថា ទុនវិនិយោគរបស់វា គឺគ្រប់គ្រាន់ហើយ ដើម្បីអភិវឌ្ឍគម្រោងរ៉ែមាសអូខ្វាវ នៅខេត្តមណ្ឌលគីរី និងឈានដល់ផលិតកម្មលើកដំបូងនៅត្រីមាសទី២ ឆ្នាំនេះ។

ក្រុមហ៊ុន Renaissance បានឱ្យដឹងនៅក្នុងរបាយការណ៍ប្រចាំត្រីមាសទី៤ របស់ខ្លួនថា ស្ថិតនៅក្នុងតំបន់អូខ្វាវ ក្នុង ស្រុកកែវសីម៉ា ខេត្តមណ្ឌលគីរី គម្រោងនេះមានការរីកចម្រើនគួរឱ្យកត់សម្គាល់ ស្របតាមពេលវេលា និងថវិកាអភិវឌ្ឍន៍។

ក្រុមហ៊ុនបានឱ្យដឹងទៀតថា សាច់ប្រាក់រួមរបស់ខ្លួន គិតត្រឹមថ្ងៃទី៣១ ខែធ្នូ ឆ្នាំមុន មានប្រមាណ៧៧លានដុល្លារអូស្រ្តាលី (៥៨,៦ លានដុល្លារអាមេរិក) ដែលបានកត់សម្គាល់ថា ក្រុមហ៊ុនមានមូលនិធិយ៉ាងពេញលេញ ដើម្បីអភិវឌ្ឍគម្រោង។

ក្រុមហ៊ុនមិនទាន់បានប្រកាសពីការពន្យារពេល ឬការផ្លាស់ប្តូរកាលវិភាគសំខាន់ៗនៅឡើយទេ ទោះបីជំងឺរាតត្បាតនៅតែបន្តរារាំងប្រតិបត្តិការ។

ក្រុមហ៊ុនបានឱ្យដឹងថា “ការប្តេជ្ញាចិត្ត និងការតាំងចិត្តរបស់ក្រុមហ៊ុន និងកម្លាំងប្រតិបត្តិការប្រតិបត្តិការរបស់ក្រុមហ៊ុន បានធ្វើឱ្យផលប៉ះពាល់នៃជំងឺកូវីដ១៩ ស្ថិតកម្រិតមួយ មិនមានការពន្យាពេលគម្រោងរហូតមកដល់បច្ចុប្បន្ននេះ”។

ក្រុមហ៊ុនបានឱ្យដឹងទៀតថា “ភាពមិនប្រាកដប្រជាជុំវិញទំនិញដឹកទំនិញអន្តរជាតិ បានបង្កការព្រួយបារម្ភជាបន្ត ចំពោះការអភិវឌ្ឍន៍គម្រោង ប៉ុន្តែបើគិតពីការអភិវឌ្ឍហើយឥឡូវនេះសម្រេចបានប្រមាណ៧៥ភាគរយ ក្នុងការរៀបចំឧបករណ៍ សម្រាប់ផលិតកម្មនៅទីតាំងផ្ទាល់”។

លោក Morgan Hart នាយកគ្រប់គ្រងក្រុមហ៊ុន Emerald បានមានប្រសាសន៍ថា ក្រុមហ៊ុនបានបន្តជំរុញសកម្មភាពអភិវឌ្ឍន៍នៅគម្រោងរ៉ែអូខ្វាវ ដោយដំណើរការការងាររៀបចំដី និងការងារបេតុង ស្របគ្នានឹងកាលវិភាគ និងទាន់ពេលវេលាអភិវឌ្ឍន៍។

លោកបានថ្លែងថា “ការអភិវឌ្ឍគម្រោងបានជឿនលឿនគួរឱ្យកត់សំគាល់ ស្របតាមការរំពឹងទុក ដោយសារការខិតខំប្រឹងប្រែងរបស់ក្រុមការងាររបស់យើង”៕

គម្រោងកំពង់ផែកោះទន្សាយនឹងបញ្ចប់ការសាងសង់នៅត្រឹមដើមត្រីមាសទី៣នៃឆ្នាំនេះ

ដោយ ៖ រ៉ាណេត

កែប ៖ កំពង់ផែកោះទន្សាយស្ថិតក្នុងខេត្តកែប កំពុងដំណើរការសាងសង់យ៉ាងរលូនតាមការគ្រោងទុកដែលរហូតមកដល់ពេលនេះជាលទ្ធផលសម្រេចបានប្រមាណ៥៥ភាគរយ និងគ្រោងបញ្ចប់ការសាងសង់ជាស្ថាពរនៅត្រឹមចុងខែសីហា ឆ្នាំ២០២១ខាងមុខនេះ។

លោកម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប បានមានប្រសាសន៍ឱ្យដឹងនៅព្រឹកថ្ងៃទី៣ ខែមករា ឆ្នាំ២០២១នេះថា កំពង់ផែកោះទន្សាយដែលបានកសាងនេះ ចាប់ផ្ដើមនៅឆ្នាំ២០២០ ហើយបានពន្យាពេល (នៅចុងឆ្នាំ២០២០) រហូតមកដល់បច្ចុប្បន្ននេះ ដោយសារកត្តាពីរ ទី១ ដោយសារកូវីដ និងទី២ ដោយសារលក្ខណៈបច្ចេកទេស តែទោះជាយ៉ាងណា ផែននេះនឹងត្រូវបញ្ចប់នៅចុងខែសីហា ឆ្នាំ២០២១នេះ។

លោកបានបន្ដទៀតថា កំពង់ផែកោះទន្សាយនេះ បានសាងសង់ឡើងមានផ្ទៃទំហំ ៣,៤៧០ម៉ែត្រការ៉េ ជម្រៅទឹក៤.៧ម៉ែត្រ ដែលអនុញ្ញាតឲ្យតែនាវាដឹកអ្នកដំណើរប្រភេទលេខ១ និងប្រភេទលេខ២ប៉ុណ្ណោះដែលអាចចូលចតបាន ហើយនាវាធំជាងនេះមិនអាចចូលបាននោះឡើយ។

លោកម៉ម ទូច បានបញ្ជាក់ថា “នាវាប្រភេទលេខ១ អាចចេញពីឆ្នេរបានចម្ងាយប្រមាណ៥៦គីឡូម៉ែត្រ ផ្ទុកអ្នកដំណើរចាប់ពី៣០នាក់ ទៅ១០០នាក់ ខណៈនាវាប្រភេទលេខ២ អាចធ្វើដំណើរចេញពីឆ្នេរបានចម្ងាយពី ១៦១ ទៅ១៩៣គីឡូម៉ែត្រ អាចផ្ទុកអ្នកដំណើរពី១០០នាក់ ទៅ៣០០នាក់”។

កំពង់ផែកោះទន្សាយនេះ ត្រូវបានសាងសង់ឡើងដើម្បីបម្រើឲ្យតែវិស័យទេសចរណ៍ប៉ុណ្ណោះ ដោយឡែកការដឹកជញ្ជូនទំនិញផ្សេងៗ មិនអាចប្រើប្រាស់បាននោះទេ ព្រោះកំពង់ផែនេះ មានទម្ងន់ផ្ទុកមិនអាចលើសទី១៥តោនបានឡើយ។ កំពង់ផែនេះ បានកំពុងសាងសង់នៅលើទីតាំងផែចាស់ ស្ថិតក្នុងភូមិកែប សង្កាត់កែប ក្រុងកែប ខេត្តកែប ដែលមានចម្ងាយពីដីគោក ចូលទៅក្នុងសមុទ្រប្រមាណ ៣០៦ម៉ែត្រ ទទឹង៦៨ម៉ែត្រ ប្រើប្រាស់ថវិការសាងសង់សរុបជិត៥ពាន់លានរៀល៕

សមាគមដីឡូត៍ចុះ MOU ជាមួយ CREA ដើម្បីពង្រីកកិច្ចសហការដើម្បីលើកកំពស់វិស័យអចលនទ្រព្យ

ដោយគង់ សូរិយា

ភ្នំពេញៈ សមាគមអ្នកអភិវឌ្ឍន៍ដីឡូត៍កម្ពុជា បានចុះអនុស្សរណៈនៃការយោគយល់គ្នា ជាមួយសមាគមអ្នកជំនាញអចលនទ្រព្យកម្ពុជា (CREA) ដើម្បីពង្រីកកិច្ចសហការនិងចូលរួមលើកស្ទួយវិស័យអចលនទ្រព្យកម្ពុជា។

ពិធីចុះហត្ថលេខានេះបានធ្វើឡើងកាលពីថ្ងៃទី២ កុម្ភៈកន្លងមកនេះ ដោយមានការចូលរួមពីឧកញ៉ាម៉ន សុខាប្រធានសមាគមអ្នកអភិវឌ្ឍន៍ដីឡូត៍កម្ពុជា និងលោកជឹង សុខម៉េងប្រធានសមាគមអ្នកជំនាញអចលនទ្រព្យកម្ពុជា។

យោងតាមខ្លឹមសារនៃអនុស្សរណៈនេះបានឲ្យដឹងថា កិច្ចព្រមព្រៀងនេះធ្វើឡើងក្នុងគោលបំណងពង្រីកកិច្ចសហប្រតិបត្តិការងារ និងផ្លាស់ប្តូរព៌តមានគ្នាទៅវិញទៅមក លើការអភិវឌ្ឍអចលនវត្ថុ ដីឡូត៍ និងផលប្រយោជន៍ដទៃទៀតរបស់ភាគីទាំងសងខាង។

យោងតាមខ្លឹមសារនៃ MOU បានឲ្យដឹងទៀតថា កិច្ចព្រមព្រៀងនេះផ្តោតសំខាន់លើការអភិវឌ្ឍវិស័យអចលនទ្រព្យឲ្យមានស្តង់ដា បើកវគ្គបណ្តុះបណ្តាលបន្ថែមដល់ម្ចាស់អាជីវកម្ម ភ្នាក់ងារអចលនទ្រព្យ ដីឡូត៍ឲ្យបានយល់ច្បាប់ពីច្បាប់ បទដ្ឋានគតិយុត្តិនានានៅតាមបណ្តាប្រទេសអភិវឌ្ឍន៍នានា និងផ្តល់ការបណ្តុះបណ្តាល ឳកាសការងារដល់យុវជន ដើម្បីទ្រទ្រង់ជីវភាពគ្រួសារ ព្រមទាំងរួមចំណែកជាមួយរាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាពលរដ្ឋជាដើម។

MOU ក៏បានផ្តោតលើការសហការគ្នា បញ្ជូនវាគ្មិនចូលរួមវគ្គបណ្តុះបណ្តាល សិក្ខាសាលាពីគ្នាទៅវិញទៅមក ដែលសមាគមទាំងពីរនឹងរៀបចំឡើងប្រចាំខែ ឬប្រចាំឆ្នាំផងដែរ៕

បុរីសាគូរ៉ាផ្តល់ជូននូវលក្ខខណ្ឌបង់ប្រាក់ពិសេសដល់អតិថិជនត្រឹមចន្លោះពី២០០ ទៅ៣០០ដុល្លារប៉ុណ្ណោះក្នុងមួយខែ

ដោយៈគង់ សូរិយា

កណ្ដាល៖ ជាមួយនឹងសំណង់លំនៅដ្ឋានប្រកបដោយគុណភាព និងផ្តល់ផាសុកភាពដល់ការរស់នៅបុរីសាគូរ៉ា នៅតំបន់ឧដុង្គបាននិងកំពុងផ្តល់នូវលក្ខខណ្ឌបង់ប្រាក់ពិសេសដល់អតិថិជន ត្រឹម១ខែជាង២០០ទៅ៣០០ដុល្លារប៉ុណ្ណោះ។

ក្នុងឱកាសចូលឆ្នាំប្រពៃណីជាតិចិនខាងមុខនេះ បុរីសាគូរ៉ាក៏ផ្តល់នូវការបញ្ចុះតម្លៃពិសេស រហូតដល់៩០០០ដុល្លារអាមេរិក និងថែមជូននូវសម្ភារៈក្នុងលំនៅដ្ឋានជាច្រើនទៀត។

តាមសេចក្តីប្រកាសព័ត៌មានរបស់ក្រុមហ៊ុន Sakura Real Estate, Co, Ltdបានឲ្យដឹងនារសៀលថ្ងៃទី២ កុម្ភៈនេះថា បុរីសាគូរ៉ាបានសាងសង់ឡើង នូវលំនៅដ្ឋានចំនួនបីប្រភេទ ទី១ វាជាប្រភេទផ្ទះអាជីវកម្មមានទំហំ៤,៥ គុណនឹង១៤ម៉ែត្រ មាន២បន្ទប់គេង ៣បន្ទប់ទឹក សល់មុខផ្ទះ៤,៥ម៉ែត្រ និងក្រោយផ្ទះ១,៥ម៉ែត្រ និងប្លង់សេចំនួន២សន្លឹក ទី២ ប្រភេទវីឡាទោល ទំហំដី១០គុណនឹង២០ម៉ែត្រ សាច់ផ្ទះ៨គុណនឹង១២ម៉ែត្រ សល់មុខផ្ទះ៦ម៉ែត្រ និងក្រោយផ្ទះ២ម៉ែត្រ មាន៣បន្ទប់គេង និង៣បន្ទប់ទឹក និងប្រក់ដំបូលស៊ីប្រូ បន្ទប់ទទួលភ្ញៀវ១ ផ្ទះបាយ១ ។

ប្រភេទផ្ទះទី៣ ផ្ទះវីឡាកូនកាត់ប្រភេទE០ ទំហំផ្ទះ៤,២ម៉ែត្រ គុណនឹង១៣ម៉ែត្រ សល់មុខផ្ទះ៤ម៉ែត្រ និងក្រោយផ្ទះ១ម៉ែត្រ មានបន្ទប់គេង២ និងបន្ទប់ទឹក១ ផ្ទះបាយ១ និងបន្ទប់ទទួលភ្ញៀវ១ ។

បុរីសាគូរ៉ាមានទូតាំងនៅភូមិផ្សារដែកក្រោម ឃុំផ្សារដែក ស្រុកពញាឮ ខេត្តកណ្តាល និងធ្វើដំណើរចេញពីរាជធានីភ្នំពេញចំណាយពេល១៥នាទីប៉ុណ្ណោះ។

លោកប៊ុត សូវៀត តំណាងផ្នែកលក់នៃបុរីសាគូរ៉ាបានមានប្រសាសន៍ឲ្យដឹងថា គំរោងបុរីសាគូរ៉ា ជាទីតាំងពោរពេញដោយសក្តានុពល មានរោងចក្រ សហគ្រាសព័ទ្ឋជុំវិញ ដោយមានផ្លូវទំហំ៣០ម៉ែត្រកាត់មុខបុរី ពិសេសគំរោងនេះមានទីតាំងស្ថិតនៅទល់មុខតំបន់រមណីយដ្ឋានលំហែរកាយរបស់ឧកញ៉ាស្រីចាន់ថន ដែលមានផ្ទៃដីទំហំ៨ហិកតា។ លោកបន្តថា អ្វីកាន់តែពិសេស គឺក្នុងគំរោងនេះមានការរៀបចំជាសួនផ្កាឈូករ័ត្ន អាហារដ្ឋាន កញ្ចុះលើទឹក ទារទឹកជិះកម្សាន្ត និងសេវាកម្មកំសាន្តសម្រាប់កុមារផងដែរ ហើយមានចម្ងាយត្រឹម១៥០ម៉ែត្រប៉ុណ្ណោះពីជើងភ្នំឧដុង្គ។

លោកបន្តថា “នៅជុំវិញតំបន់នេះមានគំរោងអភិវឌ្ឍន៍លំនៅដ្ឋាន មជ្ឈមណ្ឌលពាណិជ្ជកម្មជាច្រើនទៀត ពិសេសផ្ទះមានតម្លៃសមរម្យបំផុតដែលអតិថិជនអាចទិញទុកវិនិយោគយកចំណេញ និងសម្រាប់ស្នាក់នៅប្រកបដោយផាសុខភាព” ។

ទំនាក់ទំនងលេខទូរស័ព្ទ 077530358 (Cellcard) 060878768 (Metfone) 0966878768 (Smart) ៕

តើអ្នកត្រៀមខ្លួនដូចម្តេចនឹងកំនើនកកស្ទះចរាចរណ៍នៅពេលប្រជាជនទីក្រុងភ្នំពេញកើនដល់ ៤,៥លាននាក់នៅឆ្នាំ២០៣០?

ដោយគង់ សូរិយា

ភ្នំពេញៈ តើអ្នកធ្លាប់ស្រម័យពីការរកកស្ទះចរាចរណ៍រាប់ម៉ោង ទៅមុខមិនរួច ត្រលប់ក្រោយមិនបានហើយឬនៅ? កំនើនប្រជាសាស្ត្រ និងយានយន្តក្រុងភ្នំពេញនឹងបង្កើតនូវបញ្ហានេះនាពេលអនាគត ខណៈចំនួនប្រជាជននៅទីក្រុងនេះកើនដល់៥លាននាក់នៅឆ្នាំ២០៣០ខាងមុខ។

ខណៈបច្ចុប្បន្ន លំហូរនៃជំនន់ចរាចរណ៍នៅទីក្រុងនេះ បានចាប់់ផ្តើមបង្កការកកស្ទះខ្លាំងបណ្តើរៗហើយ ស្របពេលចំនួនមនុស្សរស់នៅមានត្រឹមប្រមាណ៣លាននាក់ ប៉ុន្តែនៅឆ្នាំ២០៣០ខាងមុខ ចំនួនប្រជាពលរដ្ឋរស់នៅក្រុងភ្នំពេញ នឹងកើនដល់៤,៥ទៅ៥លាននាក់។

យោងតាមការសិក្សារបស់ក្រុមហ៊ុន Urban Living Solution បានឲ្យដឹងថា នៅពេលចំនួនមនុស្សរស់នៅកើនឡើងដល់៥លាននាក់ ប្រជាពលរដ្ឋនឹងសម្រេចចិត្តរស់នៅតាមខុនដូកាន់តែច្រើន ដោយសារហេតុផលមួយចំនួន។

ប៉ុន្តែជាក់ស្តែងតាមការសង្កេតជាទូទៅ គឺបច្ចុប្បន្ននេះប្រជាពលរដ្ឋខ្មែរបានចាប់ផ្តើមរស់នៅតាមខុនដូកាន់តែច្រើនបណ្តើរៗហើយ ដោយនិន្នាការនេះបាននិងកំពុងផ្លាស់ប្តូរបែបផែនជីវិតរស់នៅរបស់ប្រជាពលរដ្ឋខ្មែរ។

ជាមួយគ្នានេះ ក្រសួងរៀបចំដែនដី នគរូបនីយកម្មនិងសំណង់បានរកឃើញថា ប្រជាជនរស់នៅទីក្រុង និងតាមទីប្រជុំជននានា នឹងកើនដល់៧លាននាក់នៅឆ្នាំ២០៣០ខាងមុខ។

តាមរបាយការណ៍របស់ក្រសួងរៀបចំដែនដីនរគរូបនីយកម្ម និងសំណង់ដែលបានចេញផ្សាយកាលពីកំឡុងឆ្នាំ២០១៧កន្លងមកបានឲ្យដឹងថា បើគិតចាប់ពីឆ្នាំ២០១៥ដល់ឆ្នាំ២០៣០ចំនួនប្រជាជននៅតាមទីប្រជុំជន និងទីក្រុងធំៗ និងកើនពី៤ទៅ៧លាននាក់។ កំណើនប្រជាសាស្ត្រនេះ នឹងទាមទារឲ្យមានការផ្តត់ផ្គង់លំនៅដ្ឋាន ដ៏ច្រើនរហូតដល់៨៥ម៉ឺនខ្នងដល់ឆ្នាំ២០៣០ ពោលគឺការផ្គត់ផ្គង់ប្រចាំឆ្នាំត្រូវមានប្រមាណជាង៥ម៉ឺនខ្នង។

ការសិក្សារបស់ក្រុមហ៊ុន Urban Living Solution កាលពីឆ្នាំ២០១៨ក៏បានរកឃើញផងដែរថា ប្រជាពលរដ្ឋរស់នៅក្រុងភ្នំពេញ នឹងកើនដល់៤,៥លាននាក់ទៅ៥លាននាក់ ជាពេលវេលាដែលធ្វើឲ្យប្រជាជនកាន់តែច្រើន នឹងរស់នៅតាមខុនដូ ដោយសារទី១ កំនើនប្រជាសាស្ត្រធ្វើឲ្យមានការកកស្ទះចរាចរណ៍ខ្លាំង ទី២ តម្លៃអចលនទ្រព្យ ពិសេសលំនៅដ្ឋាននឹងមានតម្លៃខ្ពស់ ដែលប្រជាពលរដ្ឋថ្នាក់កណ្តាលមិនមានលទ្ឋភាពទិញលំនៅដ្ឋាននៅក្នុងទីក្រុងបាន តែពួកគេអាចទិញនៅជាយក្រុង ដែលលំបាកក្នុងការធ្វើដំណើរ។

ទី៣ ការរីកចម្រើនបច្ចេកវិទ្យានឹងធ្វើឲ្យគុណភាពជីវិតប្រសើរឡើង ដោយអ្នករស់នៅតាមខុនដូ ឬលំនៅដ្ឋាននានាអាចកុំម៉ង់ អាហារទទួលទានកាន់តែងាយស្រួល និងទី៤ លក្ខខ័ណ្ឌកន្លែងការងារ ដែលប្រជាពលរដ្ឋមិនចង់រស់នៅឆ្ងាយពីការងារ ហើយពួកគេងាកមករស់នៅខុនដូ ដែលស្ថិតនៅជិតកន្លែងការងាររបស់ពួកគេ។

នាយិកាប្រចាំប្រទេសនៃក្រុមហ៊ុន CBRE Cambodia លោកស្រីអាន សុធីតាបានមានប្រសាសន៍ថា ប្រជាពលរដ្ឋរស់នៅក្រុងភ្នំពេញ មិនមានចំនួនច្រើននោះទេ គឺមួយគីឡូម៉ែត្រមានតង់ស៊ីតេត្រឹមជាង២០០០នាក់ ប៉ុន្តែបញ្ហាកកស្ទះចរាចរណ៍មានការកើនឡើងខ្ពស់ ខុសពីបណ្តាប្រទេសក្នុងតំបន់ដូចជាទីក្រុងបាងកក ប្រទេសថៃ ទីក្រុងហូជីម៉ិញប្រទេសវៀតណាម ដែលមានប្រជាជនរស់នៅចន្លោះ៤០០០ ទៅ៥០០០នាក់ក្នុងមួយគីឡូម៉ែត្រ តែបញ្ហាចរាចរណ៍ហាក់មិនអាក្រក់ណាស់ណានោះទេ។

អ្នកនាងបន្តថា “រដ្ឋាភិបាលគួរចាត់វិធានការណ៍ ទៅលើបញ្ហាសណ្តាប់ធ្នាប់ចរាចរ ណ៍ តាមរយៈការដាក់ចេញវិធានការណ៍អប់រំ និងជំរុញឲ្យអ្នកបើកបរគោរពច្បាប់ តាមរយៈការធ្វើយ៉ាងណាឲ្យពួកគេយល់ដឹងពីច្បាប់” ។

យ៉ាងណាតាមការសង្កេតជាក់ស្តែង ការធ្វើចរាចរណ៍របស់ប្រជាលរដ្ឋខ្មែរនៅតាមដងផ្លូវនានាទាំងក្នុងរាជធានីភ្នំពេញ និងតាមបណ្តាខេត្តពិតជាមិនសូវមានរបៀបរៀបរយ និងមិនសូវគោរពច្បាប់ចរាចរណ៍ផងដែរ ដែលបានធ្វើឲ្យស្ថានភាពនៃការធ្វើដំណើរតាមដងផ្លូវកំពុងកកស្ទះយ៉ាងខ្លាំងនាពេលបច្ចុប្បន្ននេះ ពិសេសផ្លូវជាតិសំខាន់ៗចូលមកកាន់រាជធានីកំពុងកកស្ទះយ៉ាងខ្លាំងដូចជា ផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ និងផ្លូវជាតិលេខ៤ ។

ទីប្រឹក្សាសមាគមអចលនទ្រព្យសកល លោកយិន លាងគង់បានថ្លែងថា ការកើនឡើងនូវចំនួនយានយន្ត នឹងក្លាយជាបញ្ហាប្រឈមធំមួយសម្រាប់អនាគត ប៉ុន្តែបើគ្មានការអប់រំប្រជាពលរដ្ឋពីសីលធ៌មនៃការបើកបរ មិនអប់រំប្រជាពលរដ្ឋឲ្យយល់ដឹងពីច្បាប់ចរាចរ ណ៍ និងគោរពច្បាប់ចរាចរណ៍ទេ បញ្ហានឹងកាន់តែធ្ងន់ធ្ងរជាងនេះទៅទៀត ព្រោះវាមិនត្រឹមតែមានភាពអនាធិបតេយ្យលើដងផ្លូវប៉ុណ្ណោះទេ តែវាបង្ហាញពីសង្គមមួយយគ្មានសណ្តាប់ធ្នាប់ផងដែរ។

លោកបន្តថា “រដ្ឋាភិបាលនឹងវិនិយោគលើហេដ្ឋារចនាសម្ព័ន្ឋ ស្ពានអាកាស Sky Train ជាដើម នាពេលអនាគត ដែលវាអាចដោះស្រាយបញ្ហាបានមួយចំនែក ប៉ុន្តែនេះវានឹងមិនមាននិរន្តរភាពទេ។លោកបន្ថែមថា “ប៉ុន្តែយ៉ាងណាក៏ដោយប្រជាជន នឹងរៀនទទួលយកនូវបញ្ហានេះដោយខ្លួនឯង ហើយឥរិយាបទនៃការរស់នៅនិងធ្វើដំណើររបស់ពួកគេនឹងផ្លាស់ប្តូរ ព្រោះបញ្ហាកកស្ទះចរាចរណ៍ តែងតែកើតឡើងនៅស្ទើរគ្រប់ប្រទេសទាំងអស់នៅលើពិភពលោក” ៕

1...2,1272,1282,129...3,315 Page 2,128 of 3,315