អ្នកឧកញ៉ា លី ហួរ និយាយអ្វីខ្លះទាក់ទងនឹងស្ថានភាពសេដ្ឋកិច្ច និងអចលនទ្រព្យឆ្នាំ២០២១

ភ្នំពេញ៖ គេហទំព័រ Propertyarera.asia មានកិច្ចសម្ភាសន៍ពិសេសក្នុងកម្មវិធី ចក្ខុវិស័យសេដ្ឋកិច្ច និងអចលនទ្រព្យឆ្នាំ ២០២១ នឹងចាក់ផ្សាយកិច្ចសម្ភាសន៍ទាំងស្រុងរបស់អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជានៅព្រឹកថ្ងៃនេះ ម៉ោង ១១៖៣០ ហើយកិច្ចសម្ភាសន៍នេះនឹងផ្ដោតសំខាន់ទៅលើទស្សនទានរបស់អ្នកឧកញ៉ា ទាក់ទងនឹងការអភិវឌ្ឍន៍វិស័យសេដ្ឋកិច្ច អចលនទ្រព្យ និងគោលនយោបាយរបស់រាជរដ្ឋាភិបាល ដែលបានគាំទ្រដល់វិស័យឯកជន។

តើឆ្នាំ២០២១ នេះ ស្ថានភាពទីផ្សារលំនៅដ្ឋានមានការប្រែប្រួលយ៉ាងដូចម្ដេច? សូមរង់ចាំទស្សនាកិច្ចសម្ភាសន៍ពិសេសនេះទាំងអស់គ្នា ៕

ប្រធាន GRA ៖ អត្ថប្រយោជន៍បន្ថែមដែលទទួលបានពីការទិញលក់អចលនវត្ថុតាមរយៈភ្នាក់ងារ

ដោយ៖ រ៉ាណេត

ភ្នំពេញ៖ ប្រធានសមាគមអចលនទ្រព្យសកល (GRA) បានលើកទឹកចិត្តដល់អ្នកដែលស្វែងរក់ទិញ-លក់ក្នុងវិស័យអចលនទ្រព្យត្រូវជ្រើសរើសយកភ្នាក់ងារក្នុងការចរចា និងរៀបចំឯកសារបទដ្ឋានគតិយុត្តិនានា ដើម្បីជៀសវាងហានិភ័យ និងមានសុវត្ថិភាពទាំងគូភាគី ខណៈការវិនិយោគលើវិស័យនេះ ត្រូវបានប្រើប្រាស់ធនធានយ៉ាងសន្ធឹកសន្ធាប់។

លោកសំ សុខនឿន ប្រធានសមាគមអចលនទ្រព្យសកល (GRA) បានពន្យល់ថា ភ្នាក់ងារអចលនវត្ថុគឺជាអ្នកប្រឹក្សាយោបល់ដល់អ្នកលក់ និងអ្នកទិញដើម្បីឱ្យមានការយល់ដឹងកាន់តែច្បាប់ពីវិស័យអចលនទ្រព្យ និងដឹងពីព័ត៌មានទីផ្សារអចលនទ្រព្យកាន់តែទូលាយ ។

លោកបន្តថា ភ្នាក់ងារអចលនទ្រព្យមានព័ត៌មានសម្បូរបែប ហើយអាចទទួលយកបានតាមរយៈការផ្តល់នូវព័ត៌មាន និងឱកាសវិនិយោគប្រកបដោយចីរភាព។ ម្យ៉ាងទៀត ភ្នាក់ងារអចលនទ្រព្យ គឺជាបុគ្គលដែលមានសក្តានុពលក្នុងការចចារពីព្រោះពួគេធ្វើការដោយផ្ទាល់ជាមួយនឹងអ្នកលក់ ហើយដឹងពីលក្ខខណ្ឌនៃតម្រូវការជាក់ស្តែងនៃអ្នកលក់ ជាការលក់ប្រញាប់ លក់ធម្មតា ឬ លក់ក្នុងកម្រិតក្នុងការទទួលយកប្រាក់ចំណូលខ្ពស់ ។

លោកបន្ថែមថា ជាមួយគ្នានេះ ភ្នាក់ងារអចលនវត្ថុជាបុគ្គលកណ្តាលក្នុងរៀបចំកិច្ចសន្យាទិញ-លក់ និងការធ្វើឱ្យមានស្របច្បាប់សម្រាប់អ្នកលក់នៅក្នុងដំណើរការនៃទិញ-លក់។ បន្ថែមពីនេះ ភ្នាក់ងារក៏ជាអ្នកធ្វើការយ៉ាងជិតស្និទ្ធជាមួយនឹងធនាគារ ដែលអាចជួលសម្រប់សម្រួលដល់អ្នកទិញដែលមានបំណងខ្ចីនៅក្នុងលក្ខខណ្ឌណាមួយ។

លោកសំ សុខនឿនបានអំពាវនាវ និងលើកទឹកចិត្តដល់អ្នកទិញ-អ្នកលក់អចលនវត្ថុប្រើប្រាស់សេវាភ្នាក់ងារដែលស្របច្បាប់កំពុងបំរើនៅក្នុងទីផ្សារក្នុងវិស័យមួយនេះ ដែលមានក្រមសីលធម៌ និងវិជ្ជាជីវៈត្រឹមត្រូវជួយសម្របសម្រួលដើម្បីជៀសផុតពីហានិភ័យដែលកើតឡើងជាយថាហេតុណាមួយ នាំអោយប៉ះពាល់ដល់វិស័យអចលនទ្រព្យរួមនៅកម្ពុជា៕

អាមេរិកចាប់ផ្ដើមព្រមានមេដឹកនាំចិន កុំឱ្យមានមហិច្ឆតាវាទទីនិយម

ដោយ សុខុម

អន្តរជាតិ៖ យើងដឹងហើយថា អតីតប្រធានាធិបតីសហរដ្ឋអាមេរិក ដូណាល់ ត្រាំ បានបញ្ឆេះសង្គ្រាមពាណិជ្ជកម្មក្ដៅគកុកជាមួយចិន ដែលធ្វើឱ្យទំនាក់ទំនងការទូតរវាងប្រទេសទាំងពីរជួបតែភាពល្វីងជូរចត់នឹងគ្នា។ ហើយក្រុមអ្នកវិភាគរំពឹងថា ភាពតានតឹងនេះនឹងធូរស្រាលឡើងវិញ ក្រោយលោក ចូ បៃឌិន ឡើងកាន់តំណែងជាប្រធានាធិបតីថ្មី។

ទោះជាយ៉ាងណា ទើបតែឡើងកាន់អំណាចបានរយៈពេលមួយសប្តាហ៍ ប្រធានាធិបតី ចូ បៃឌិន បានបញ្ជូនសារព្រមានរដ្ឋាភិបាលក្រុងប៉េកាំង ចំៗថា កុំឱ្យមានបំណងវាទទីនៅអាស៊ីបូព៌ា និងអាស៊ីអាគ្នេយ៍ ឱ្យសោះ។ នេះបើយោងតាមសារព័ត៌មាន The Asean Post ចុះផ្សាយកាលពីថ្ងៃទី៣០ មករា។

តាមរយៈកិច្ចសន្ទនាតាមទូរស័ព្ទ និងសេចក្ដីថ្លែងការណ៍ជាច្រើន លោក ចូ បៃឌិន និងមន្ត្រីសន្តិសុខកំពូលៗរបស់លោកបានបង្ហាញជំហរគាំទ្របណ្ដាសម្ព័ន្ធមិត្តដូចជាជប៉ុន កូរ៉េខាងត្បូង កោះតៃវ៉ាន់ និងហ្វីលីពីន ដោយផ្ដល់សញ្ញាថា រដ្ឋាភិបាលក្រុងវ៉ាស៊ីនតោន ប្រឆាំងដាច់ខាតចំពោះការអះអាងសិទ្ធិកាន់កាប់របស់ចិន នៅក្នុងដែនសមុទ្រមានជម្លោះ។

កាលពីថ្ងៃពុធ ទី២៧ មករា លោក ចូ បៃឌិន បានប្រាប់នាយករដ្ឋមន្ត្រីជប៉ុន Yoshihide Suga ថា រដ្ឋាភិបាលរបស់លោកប្ដេជ្ញាការពារប្រទេសជប៉ុន រួមទាំងប្រជុំកោះ Senkaku Islands (ជាភាសាជប៉ុន) ឬ Diaoyu Islands (ជាភាសាចិន) ដែលទាំងជប៉ុន និងចិន សុទ្ធតែអះអាងសិទ្ធិកាន់កាប់ផងដែរ។

ជំហរនេះត្រូវបានបន្ទរដោយរដ្ឋមន្ត្រីការពារជាតិអាមេរិក Lloyd Austin ដែលបានប្រាប់សមភាគីជប៉ុន Nobuo Kishi កាលពីថ្ងៃសៅរ៍ ទី៣០ មករា ថា កោះមានជម្លោះទាំងនេះត្រូវបានគ្របដណ្តប់ការពារដោយសន្ធិសញ្ញាសន្តិសុខអាមេរិក-ជប៉ុន។

យោងតាមសេចក្ដីថ្លែងការណ៍របស់មន្ទីរបញ្ចកោណឱ្យដឹងថា រដ្ឋមន្ត្រីការពារជាតិរូបនេះបានអះអាងថា “សហរដ្ឋអាមេរិក ប្រឆាំងដាច់ខាតចំពោះការប៉ុនប៉ងជាឯកតោ (ភាគីតែម្ខាង) ណាមួយដើម្បីកែប្រែស្ថានភាពដើមនៅសមុទ្រចិនខាងត្បូង” ។

ទន្ទឹមនឹងនេះដែរ ក្រោយចូលកាន់តំណែងក្នុងរដ្ឋការរបស់លោក ចូ បៃឌិន បាន ៣ ថ្ងៃ អ្នកនាំពាក្យក្រសួងការបរទេស Ned Price បានព្រមានប្រទេសចិន ចំពោះការគំរាមកំហែងកោះតៃវ៉ាន់ ក្រោយចិន បញ្ជូនយន្តហោះចម្បាំង និងយន្តហោះទម្លាក់គ្រាប់បែកជាង ១០ គ្រឿងឆ្លងកាត់ដែនការពារផ្លូវអាកាសរបស់កោះតៃវ៉ាន់។

អ្នកនាំពាក្យរូបនេះបានលើកឡើងតាមរយៈសេចក្ដីថ្លែងការណ៍ថា “យើងនឹងក្រោកឈរជាមួយបណ្ដាមិត្ត និងសម្ព័ន្ធមិត្តដើម្បីរឹតបន្តឹងសន្តិសុខ និងលើកគុណតម្លៃរួមរបស់យើងនៅក្នុងតំបន់មហាសមុទ្រឥណ្ឌា-ប៉ាស៊ីហ្វិក និងដើម្បីរឹតចំណងទំនាក់ទំនងរបស់យើងជាមួយតៃវ៉ាន់ ប្រជាធិបតេយ្យផងដែរ។ ការប្ដេជ្ញារបស់យើងចំពោះកោះតៃវ៉ាន់ គឺរឹងដូចថ្ម” ។

ហើយរដ្ឋមន្ត្រីការបរទេស Antony Blinken បានប្រាប់សមភាគីហ្វីលីពីន កាលពីថ្ងៃពុធ ទី២៧ មករា ថា សន្ធិសញ្ញាការពារគ្នាទៅវិញទៅមកដែលតម្រូវឱ្យសហរដ្ឋអាមេរិក ការពារហ្វីលីពីន ប្រឆាំងការវាយប្រហារណាមួយនៅមហាសមុទ្រប៉ាស៊ីហ្វិក ក៏បានអនុវត្តចំពោះសមុទ្រចិនខាងត្បូង ដែលមានជម្លោះផងដែរ ជាអ្វីដែលរដ្ឋការរបស់លោក បារ៉ាក់ អូបាម៉ា មិនបានបញ្ជាក់។

ការលើកឡើងទាំងនោះសរបង្ហាញឱ្យឃើញថា រដ្ឋការថ្មីរបស់លោក ចូ បៃឌិន នឹងនៅតែរក្សាជំហរម៉ឺងម៉ាត់ចំពោះចិន ជុំវិញបញ្ហាសន្តិសុខ។

ជាយូរមកហើយដែលរដ្ឋាភិបាលក្រុងវ៉ាស៊ីនតោន បានឈរនៅខាងបណ្ដាសម្ព័ន្ធមិត្តរបស់ខ្លួនដូចជារ៉េខាងត្បូង ជប៉ុន វៀតណាម ហ្វីលីពីន និងម៉ាឡេស៊ី នៅក្នុងការច្រានចោលការអះអាងសិទ្ធិកាន់កាប់របស់ចិន នៅក្នុងសមុទ្រចិនខាងកើត និងសមុទ្រចិនខាងត្បូង៕

តើគម្រោងវិនិយោគធំៗរបស់ចិនបានរួមចំណែកយ៉ាងដូចម្ដេចដល់ការអភិវឌ្ឍសេដ្ឋកិច្ចកម្ពុជា?

ដោយ៖ សាវុធ

ភ្នំពេញ៖ វិទ្យាស្ថានចក្ខុវិស័យអាស៊ី (AVI) បានសិក្សាស្រាវជ្រាវលើគម្រោងវិនិយោគរបសក្រុមហ៊ុនចិនធំៗនៅកម្ពុជា ហើយបានរកឃើញថា គម្រោងទាំងនេះ បាននិងកំពុងចូលរួមចំណែកដល់ការអភិវឌ្ឍប្រកបដោយចីរភាពនៃសេដ្ឋកិច្ចជាតិ និងសង្គមនៅកម្ពុជា។

យោងតាមលោកបណ្ឌិតកែវ ពិសិដ្ឋប្រធានមជ្ឈមណ្ឌលការសិក្សាការអភិវឌ្ឍប្រកបដោយចីរភាព នៃវិទ្យាស្ថានចក្ខុវិស័យអាស៊ី ក្នុងកិច្ចសម្ភាសន៍តាមវីដេអូ ជាមួយអ្នកសារព័ត៌មានកាលពីថ្មីៗនេះ បានឱ្យដឹងថា វិទ្យាស្ថានចក្ខុវិស័យអាស៊ី បានសិក្សាស្រាវជ្រាវទៅលើក្រុមហ៊ុនចិន និងក្រុមហ៊ុនសហការវិនិយោករួមគ្នារវាងចិន និងកម្ពុជាធំៗនៅកម្ពុជា មានដូចជា៖ ក្រុមហ៊ុនសាងសង់ផ្លូវ ស្ពាន ធនាគារ ក្រុមហ៊ុនទំនិញរួចពន្ធ វារីអគ្គិសនី ដែលសុទ្ធសឹងជាក្រុមហ៊ុន ដែលនាំមុខក្នុងវិស័យវិនិយោគនៅកម្ពុជា។

របាយការណ៍ស្រាវជ្រាវ ដែលចំណងជើងថា “អភិវឌ្ឍន៍ប្រកបដោយចីរភាពនៃសហគ្រាសចិននៅកម្ពុជា” បានបង្ហាញថា ការវិនិយោគរបស់ក្រុមហ៊ុនចិន បានចូលរួមចំណែកក្នុងការអភិវឌ្ឍនៅកម្ពុជា តាមរយៈការលើកកម្ពស់ជីវភាព ការលើកស្ទួយសេដ្ឋកិច្ច កិច្ចការពារបរិស្ថាន ការងារសង្គម និងកិច្ចការមនុស្សធម៌ដែលបានជួយកម្ពុជាកន្លងមកនេះ។

លោកបណ្ឌិតកែវ ពិសិដ្ឋបានឱ្យដឹងបន្តថា បានការសិក្សាស្រាវជ្រាវរបស់វិទ្យាស្ថានចក្ខុវិស័យអាស៊ី បានចាប់ផ្ដើមពីសីហា ដល់ខែតុលា បានសិក្សាទៅលើក្រុមហ៊ុនចិន និងក្រុមហ៊ុនសហការវិនិយោករួមគ្នារវាងចិន និងកម្ពុជាចំនួន៦ រួមមានក្រុមហ៊ុនវារីអគ្គីសនីសេសានក្រោម២ ក្រុមហ៊ុន China duty-free group ក្រុមហ៊ុន China Gezhouba Group Corporation, ធនាគារចិន Bank of China Phnom Penh Branch ក្រុមហ៊ុន China road and bridge corporation និងក្រុមហ៊ុន Yunann construction Investment Holding Group។ ក្នុងនោះក្រុមហ៊ុនវារីអគ្គីសនីសេសានក្រោម២ មាន China Huaneng Group ជាម្ចាស់ភាគហ៊ុនធំ និងក្រុមហ៊ុនរ៉ូយ៉ាល់គ្រុបជាម្ចាស់ភាគហ៊ុនធំទីពីរ។

បើតាមលោកបណ្ឌិតបានឱ្យដឹងទៀតថា ប្រទេសចិន គឺជាប្រទេសមួយដែលមានការវិនិយោគច្រើនជាងគេនៅកម្ពុជា បើគិតពីឆ្នាំ១៩៩៤ ដល់ឆ្នាំ២០១៩ តួលេខទំហំវិនិយោគរបស់ក្រុមហ៊ុន ចិនមានប្រមាណ ១ភាគ៥ នៃចំនួនទឹកប្រាក់វិនិយោគសរុបនៅកម្ពុជា។ បន្ទាប់ពីប្រទេសចិន គីក្រុមហ៊ុនវិនិយោគដែលមកពីសាធារណៈរដ្ឋកូរ៉េ អង់គ្លេស ម៉ាឡេ ជប៉ុន និងវៀតណាម៕

រដ្ឋបាលខេត្តព្រះសីហនុ ប្រកាសមិនទទួលស្គាល់ឯកសារសម្គាល់កម្មសិទ្ធិដីមួយចំនួន ក្នុងគម្រោងសាងសង់ព្រលានយន្ដហោះនៅកោះរ៉ុង

ដោយ ៖ រ៉ាណេត

ព្រះសីហនុ ៖ ក្រោយការសិក្សា និងពិនិត្យលម្អិតទៅលើភាពមិនប្រក្រតីលើការស្នើសុំកាន់កាប់ដីជាកម្មសិទ្ធិស្ថិតនៅក្នុងគម្រោសាងសង់ព្រលានយន្ដខ្នាតតូចដែលវិនិយោគ និងអភិវឌ្ឍដោយក្រុមហ៊ុនរ៉ូយ៉ាល់គ្រុបរបស់អ្នកឧកញ៉ាគិត ម៉េង នៅលើកោះរ៉ុង រដ្ឋបាលខេត្តព្រះសីហនុបានសម្រេចមិនផ្តល់វិញ្ញាបនបត្រសម្គាល់ម្ចាស់អចលនវត្ថុ និងមិនទទួលស្គាល់ទៅលើរាល់ឯកបញ្ជាក់ពីកម្មសិទ្ធីដីធ្លីចំនួន ៤៥ក្បាលដី និងបន្តចាត់វិធានការផ្លូវច្បាប់ទៅលើជនខិលខូច។

តាមរយៈសេចក្ដីជូនដំណឹងជាផ្លូវការរបស់រដ្ឋបាលខេត្តព្រះសីហនុ និងត្រូវបានចែកចាយយ៉ាងទូលាយនៅព្រឹកថ្ងៃទី១ ខែកុម្ភៈឆ្នាំ២០២១នេះបានបញ្ជាក់ថា ទីតាំងដីស្ថិតនៅសង្កាត់កោះរ៉ុង និងសង្កាត់កោះរ៉ុងសន្លឹមក្រុងកោះរ៉ុង ខេត្តព្រះសីហនុ ជាប្រភេទដីកោះដែលជាទ្រព្យសម្បត្តិសាធារណៈរបស់រដ្ឋ ត្រូវបានរាជរដ្ឋាភិបាលសម្រេចធ្វើអនុបយោគពីដីសាធារណៈរបស់រដ្ឋមកជាដីឯកជនរបស់រដ្ឋតាមអនុក្រឹត្យលេខ ០៥អនក្រ.បក ចុះថ្ងៃទី២១ ខែមករា ឆ្នាំ២០០៨ ដើម្បីធ្វើការអភិវឌ្ឍន៍ក្រោមលក្ខខណ្ឌជួលវិនិយោគ។

នៅថ្ងៃទី០៤ ខែមេសា ឆ្នាំ២០១៨រាជរដ្ឋាភិបាលបានចេញអនុក្រឹត្យលេខ ៤៨អនក្រ.បក សម្រេចកាត់ដីទំហំ ៥២៨,៣៧ហិកតា នៅសង្កាត់កោះរ៉ុង និងសង្កាត់កោះរ៉ុងសន្លឹម ក្រុងព្រះសីហនុ (បច្ចុប្បន្នក្រុងកោះរ៉ុង) ខេត្តព្រះសីហនុ ចេញពីដីឯកជនរបស់រដ្ឋកំណត់ដោយអនុក្រឹត្យលេខ ០៥អនក្រ.បក ចុះថ្ងៃទី២១ ខែមករា ឆ្នាំ២០០៨ ដើម្បីប្រទានកម្មជាកម្មសិទ្ធិជូនប្រជាពលរដ្ឋរស់នៅអចិន្ត្រៃយ៍នៅលើកោះរ៉ុងចំនួន២៩៨គ្រួសារស្មើនឹង ៦៣៧ក្បាលដី ស្មើនឹងទំហំ ៥២៨,៣៧ហិកតា។

ដោយឡែក ពាក់ព័ន្ធទៅនឹងបញ្ហាវិវាទដីធ្លីចំនួន៤៥ក្បាលដី ដែលក្នុងនោះមានប្រជាពលរដ្ឋមានអាស័យដ្ឋាននៅលើកោះចំនួន៣៦ក្បាលដី និងប្រជាពលរដ្ឋមានអាស័យដ្ឋានក្រៅកោះចំនួន៩ក្បាលដី គឺជាប្រភេទដីដែលស្ថិតនៅក្នុងចំណោម ៥៨៤ក្បាលដី ដែលរដ្ឋបាលខេត្តបានធ្វើការជូនដំណឹងពីការសម្រេចបដិសេធមិនចេញប័ណ្ណសម្គាល់កម្មសិទ្ធិនោះទេ។

រដ្ឋបាលខេត្តព្រះសីហនុ សូមជម្រាបជូនបន្ថែមថា រាល់ឯកសារពាក់ព័ន្ធទាំងឡាយណា រួមមានឯកសារសម្គាល់លេខក្បាលដី (ចុងសន្លឹក) លិខិតផ្ទេរសិទ្ធិកាន់កាប់ប្រើប្រាស់ដីធ្លី ពាក្យស្នើសុំកាន់កាប់ប្រើប្រាស់ដីធ្លី កិច្ចសន្យាទិញ-លក់ដោយមានប្រថាប់ត្រាអាជ្ញាធរសង្កាត់ ឬប្រថាប់ត្រាមេធាវី ឬកិច្ចសន្យាផ្ទេរសិទ្ធិដីធ្លីជាលក្ខណៈឯកជន(រវាងគូភាគី) គំនូសបង្ហាញទីតាំងដី និងឯកសារពាក់ព័ន្ធផ្សេងៗទៀត រួមនឹងក្បាលដីក្នុងប្លង់សុរិយោដីចំនួន ៥៨៤ក្បាលដី ដែលគណៈកម្មការរដ្ឋបាល បានសម្រេចមិនផ្តល់ជូនជាកម្មសិទ្ធិ គឺជាឯកសារដែលគ្មានតម្លៃគតិយុត្តសម្រាប់ប្រើប្រាស់ ឬទាមទារសិទ្ធិលើដីធ្លីនៅលើកោះរ៉ុងនោះទេ។

ជាមួយគ្នានេះ រដ្ឋបាលខេត្តព្រះសីហនុ សូមបញ្ជាក់ជំហរយ៉ាងម៉ឺងម៉ាត់ថា នឹងចាត់វិធានការផ្លូវច្បាប់យ៉ាងតឹងរឹងបំផុតដោយមិនលើកលែងចំពោះជន ណាដែលបានប៉ះពាល់កម្មសិទ្ធិនៃទ្រព្យសម្បត្តិរបស់រដ្ឋ ដូចមានក្នុងមាត្រា២៥៩ នៃច្បាប់ភូមិបាល៕

មន្រ្តីរដ្ឋាភិបាល និងអ្នកជំនួញល្បីៗចំនួន៤រូបនឹងបង្ហាញវត្តមានក្នុងកម្មវិធីចក្ខុវិស័យសេដ្ឋកិច្ច និងអចលនទ្រព្យឆ្នាំ២០២១

ដោយ ៖ គង់ សូរិយា

ភ្នំពេញៈ មន្រ្តីរដ្ឋាភិបាល និងអ្នកជំនួញល្បីៗដែលមានឥទ្ឋិពលលើសេដ្ឋកិច្ចកម្ពុជា នឹងបង្ហាញវត្តមានក្នុងកម្មវិធី” ចក្ខុវិស័យសេដ្ឋកិច្ច និងអចលនទ្រព្យឆ្នាំ២០២១”ដែលនឹងចាប់ផ្តើមចាក់ផ្សាយនៅថ្ងៃទី១ កុម្ភៈ វេលាម៉ោង១១,៣០នាទីថ្ងៃត្រង់ខាងមុខនេះ។

កិច្ចសម្ភាសន៍ពិសេសនេះ នឹងផ្សព្វផ្សាយនៅលើគេហទំព័រPropertyarea.asia និងwww.cambodiafinancialtimes.com និងFacebook Pageរបស់គេហទំព័រទាំងពីរនេះ។

មន្រ្តីជាន់ខ្ពស់រាជរដ្ឋាភិបាល ដែលចូលរួមក្នុងកិច្ចសម្ភាសន៍នេះ គឺលោកវេង សាខុនរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ អ្នកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជា និងលោកឧកញ៉ាហួត អៀងតុងប្រធានអគ្គនាយកធនាគារហត្ថា និងជាអតីតប្រធានសមាគមមីក្រូហិរញ្ញវត្ថុកម្ពុជា។

សហស្ថាបនិក និងអគ្គនាយកនៃគេហទំព័រទាំងពីរលោកយិន លាងគង់បានមានប្រសាសន៍ឲ្យដឹងថា ការផ្តល់វត្តមានចូលរួមពីមន្រ្តីរដ្ឋាភិបាល និងអ្នកជំនួញល្បីៗមានឥទ្ឋពលនៅកម្ពុជា មិនត្រឹមតែជាគុណតម្លៃមួយនោះទេ ប៉ុន្តែអស់លោកពិតជាបានរួមចំណែកយ៉ាងសំខាន់ជាមួយរដ្ឋាភិបាល ក្នុងការចែករំលែកចំណេះដឹងដល់ប្រជាពលរដ្ឋ ដើម្បីឲ្យពួកគេបានយល់ដឹងពីការវវត្តនៃសេដ្ឋកិច្ច សង្គម និងគោលនយោបាយរបស់រដ្ឋាភិបាល នានា ដែលបានដាក់ចេញដើម្បីលើកស្ទួយកម្រិតជីវភាពរបស់ប្រជាពលរដ្ឋ។

លោកបន្តថា “កម្មវិធីនេះ ជាកម្មវិធីដែលបង្កើតឡើងមួយឆ្នាំម្តង ដើម្បីផ្តល់ព៌តមាននិងចំណេះដឹងដល់ប្រជាពលរដ្ឋ ដើម្បីឲ្យពួកគាត់បានយល់ដឹងពីព៌តមាននានា ទាក់ទងការវិវត្តនៃវិស័យអចលនទ្រព្យ កសិកម្ម និងការនាំចេញ”។លោកបន្តថា “ការផ្តល់ព៌តមានជាក់លាក់ ពិត ឥលលំអៀងនឹងអាចទុកចិត្តបាន ជាបេសកកម្មរបស់យើង ដើម្បីជម្រុញភាពរីកចម្រើនក្នុងសង្គម ហើយគេហទំព័រទាំងពីរកំពុងផ្តល់នូវពុទ្ឋីថ្មីៗ ដល់សង្គមជាតិ ដែលជាការរួមចំណែកជាមួយរដ្ឋាភិបាល ក្នុងការផ្តល់ព៌តមានពិត និងប្រឆាំងនឹងព៌តមានក្លែងក្លាយ”។

កម្មវិធី “ចក្ខុវិស័យសេដ្ឋកិច្ច និងអចលនទ្រព្យឆ្នាំ២០២១”សូមគោរពអរគុណដល់ឯកឧត្តមវេង សាខុន អ្នកឧកញ៉ាលី ហួរ លោកឧកញ៉ាលឹម ហេង និងលោកឧកញ៉ាហួត អៀងតុង ដែលបានផ្តល់កិត្តិយសចូលរួមក្នុងកម្មវិធីនេះ៕

អ្នកជំនាញបង្ហាញពីទីផ្សារអចលនវត្ថុដែលអាចងើបឡើងក្នុងល្បឿនលឿននៅឆ្នាំនេះ

ដោយៈ រ៉ាណេត

ភ្នំពេញៈ ជាមួយនឹងភាពសុទិដ្ឋិនិយម និងការរំពឹងទុកពីភាពល្អប្រសើរ នៃវិសយអចលនទ្រព្យក្នុងឆ្នាំ២០២១នេះ អ្នកជំនាញបានអះអាងថាការងើបឡើងវិញ នៃទីផ្សារលំនៅដ្ឋានតម្លៃក្រោម១០ម៉ឺនដុល្លារ នឹងមានល្បឿនលឿនជាងគេ។

អគ្គនាយកក្រុមហ៊ុនភ្នាក់ងារអចលនទ្រព្យ TOWN CITY Real Estate លោកវ៉ន ចាន់ថន បានមានប្រសាសន៍នៅក្នុងសប្ដាហ៍នេះថា តាមការរំពឹងទុក វិស័យអចលនទ្រព្យនៅកម្ពុជា នឹងងាកមករកភាពល្អប្រសើរឡើងវិញ ជាពិសេសចាប់ពីពាក់កណ្តាលឆ្នាំ២០២១នេះសកម្មភាពទិញ លក់នឹងមានភាពមមាញឹកឡើងវិញ ខណៈដែលស្ថានភាពប្រឈមនឹងវិបត្តិជំងឺឆ្លងត្រូវបានទប់ស្កាត់ និងកាត់បន្ថយការរាលដាលក្រោយមានការប្រើប្រាស់វ៉ាក់សាំងប្រកបដោយប្រសិទ្ធភាព។

លោកបន្តថា “ពេលនេះសញ្ញាល្អៗនៅក្នុងវិស័យអចលនទ្រព្យ បានចាប់ផ្តើមបង្ហាញជាបណ្តើរៗ ដែលផ្តើមចេញចលនាក្នុងស្រុក ប៉ុន្តែសម្រាប់សកម្មភាពនៃការចូលរួមពីទីផ្សារក្រៅស្រុកនៅមិនទាន់នៅឡើយនោះទេ”។ លោកបញ្ជាក់ថា “ចលនានៃទីផ្សារអចលនទ្រព្យ ដែលផ្តើមចេញពីអ្នកក្នុងស្រុកនៅពេលនេះ គឺជាតម្រូវការពិតតម្រូវការជាក់ស្ដែង ជាពិសេសផ្នែកទីផ្សារលំនៅដ្ឋានជាន់ផ្ទាល់ដី ស្ថិតនៅតាមបណ្តាជាយរាជធានីភ្នំពេញ ដែលមានតម្លៃសមរម្យក្រោម១០ម៉ឺនដុល្លារ”។

លោកបន្តថា មិនមែនពួកគាត់មិនចង់ទិញផ្ទះ នៅក្នុងរាជធានីភ្នំពេញនោះទេ ប៉ុន្តែលុយត្រឹមជាង៧ម៉ឺន ឬ១០ម៉ឺន គឺរកផ្ទះនៅមិនបាននោះទេ ដូច្នេះជាជម្រើសពួកគាត់មានតែទិញនៅតាមជាយក្រុង។

លោកវ៉ន ចាន់ថនបានមានប្រសាសន៍បន្តទៀតថា “កាលពីឆ្នាំ២០២០ដែលប្រទេសកំពុងស្ថិតនៅក្នុងភាពប្រឈមខ្លាំង នៃវិបត្តិការទិញលក់លំនៅដ្ឋាន ក៏នៅតែមានសកម្មភាព ប៉ុន្តែមានការធ្លាក់ចុះបន្តិច ដោយសារតែបញ្ហានៃប្រាក់ចំណូលត្រូវបានកាត់បន្ថយ ប៉ុន្តែនៅឆ្នាំ២០២១នេះ ភាពប្រឈមត្រូវបានកាត់បន្ថយ ហើយអាជីវកម្ម និងកន្លែងបម្រើការងារផ្សេងៗ បានចាប់ដំណើរវិញជាធម្មតាឡើងវិញ។ ដូច្នេះពួកគាត់អាចមានលទ្ធភាពឡើងវិញ។

លោកបន្តថា “ជាមួយគ្នានេះរាជរដ្ឋាភិបាល ក៏បានអនុគ្រោះដោយការលើកលែងពន្ធប្រថាប់ត្រា លើការទិញលក់លំនៅដ្ឋាតម្លៃក្រោម៧ម៉ឺន រួមជាមួយនឹងការបន្តលើកលែងលើការយកពន្ធលើប្រាក់ចំណេញមូលធន នេះជាការជំរុញឱ្យមានការទិញលក់កាន់តែមានល្បឿនលឿន”។

អគ្គនាយកក្រុមហ៊ុន PREMIUM Group លោកម៉ាន់ ច័ន្ទឌីបានមានប្រសាសន៍ថា ទីផ្សារលំនៅដ្ឋាន ដែលមានតម្លៃក្រោម១០ម៉ឺនដុល្លារ ពិតជាអាចកក្រើកឡើងវិញក្នុងល្បឿនលឿនជាងទីផ្សារដទៃទៀត ប៉ុន្តែភាគច្រើនគឺជាទីផ្សារលំនៅដ្ឋាន ជាន់ផ្ទាល់ដីតែប៉ុណ្ណោះ សម្រាប់ទីផ្សារលំនៅដ្ឋានសហកម្មសិទ្ធិអាចនៅមានកម្រិត។

លោកបញ្ជាក់ថា“ផ្ទះជាប់ដីតម្លៃក្រោម១០ម៉ឺនដុល្លារ ឬក្រោម៧ម៉ឺនដុល្លារវាជាតម្រូវការពិតរបស់ប្រជាពលរដ្ឋក្នុងស្រុក ហើយវានឹងបន្តទៅមុខក្នុងចន្លោះ៥ឆ្នាំ ឬ១០ឆ្នាំទៀត ប៉ុន្តែសម្រាប់តម្រូវការលំនៅដ្ឋានសហកម្មសិទ្ធិ នៅមិនទាន់មានល្បឿនលឿននោះទេ”។លោកបន្តថា “មូលេហតុគឺដោយសារតែភាគច្រើន អ្នកដែលមានទំនោររស់នៅក្នុងលំនៅដ្ឋានសហកម្មសិទ្ធិ ឬហៅថាខុនដូគឺជាតម្រូវការទផ្សារមកពីក្រៅស្រុក”។

លោកបន្ថែមថា ដូច្នេះនៅក្នុងឆ្នាំ២០២១ ខណៈដែលពួកគាត់(ជនបរទេស)នៅមិនទាន់អាចវិលមកកាន់កម្ពុជាបានវិញនោះ ចរន្តទិញលក់នៅតែមានកម្រិត៕

សេដ្ឋកិច្ចហុងកុង សំយ៉ុងក្បាលចុះខ្លាំងមិនធ្លាប់មានរហូតដល់ ៦,១% ក្នុងឆ្នាំ២០២០

ដោយ ៖ សុខុម

ហុងកុង: យោងតាមការចុះផ្សាយរបស់សារព័ត៌មាន CNA បានឱ្យដឹងថា សេដ្ឋកិច្ចរបស់ក្រុងហុងកុង បានសំយ៉ុងក្បាលសចុះខ្លាំងមិនធ្លាប់មានរហូតដល់ ៦,១% ក្នុងឆ្នាំ២០២០ នៅពេលទីក្រុងមួយនេះបានរងផលប៉ះពាល់ខ្លាំងដោយសារការឆ្លងរាតត្បាតវីរុសកូវីដ-១៩ ដែលបានចាប់ផ្ដើមផ្ទុះឡើងនៅរយៈពេលប៉ុន្មានខែក្រោយ និងមានភាពចលាចលផ្នែកនយោបាយ។

រដ្ឋបាលពិសេសក្រុងហុងកុង កាលពីថ្ងៃសុក្រ ទី២៩ មករា និយាយថា ផលិតផលក្នុងស្រុកសរុប (GDP) របស់ក្រុងនេះបានធ្លាក់ចុះ ១% ក្នុងត្រីមាសទី១ ដើមឆ្នាំ២០២០ ដែលបានឈានទៅដល់ការធ្លាក់ចុះខ្លាំងមិនធ្លាប់មានក្នុងឆ្នាំកន្លងទៅទាំងមូល។

អ្នកនាំពាក្យរដ្ឋបាលពិសេសក្រុងហុងកុងបានលើកឡើងតាមរយៈសេចក្ដីថ្លែងការណ៍ថា “ខណៈស្ថិរភាពសង្គមនៅហុងកុងត្រូវបានស្ដារឡើងវិញ សេដ្ឋកិច្ចបានធ្លាក់ចុះធ្ងន់ធ្ងរកាលពីឆ្នាំមុនដែលភាគច្រើនធ្លាក់ចុះដោយសារការឆ្លងរាតត្បាតវីរុសកូវីដ-១៩”។

សេដ្ឋកិច្ចរបស់ក្រុងហុងកុងបានធ្លាក់ចុះខ្លាំងរយៈពេល ២ ឆ្នាំជាប់ៗគ្នា។ ក្នុងឆ្នាំ២០១៩ ក្រុងនេះត្រូវបានធ្វើឱ្យកក្រើកដោយសារពលរដ្ឋ ដែលគាំទ្រលទ្ធិប្រជាធិបតេយ្យបានផ្ទុះបាតុកម្មអូសបន្លាយរយៈពេល ៧ ខែជាប់គ្នានៅក្នុងការប្រឆាំងនឹងការគ្រប់គ្រងរបស់ចិនប៉េកាំង មកលើក្រុងមួយនេះ។ មិនយូរប៉ុន្មានក្រោយពីនោះ ក្រុងហុងកុង បានក្លាយជាកន្លែងទី១ ដែលបានកត់ត្រាការផ្ទុះករណីឆ្លងវីរុសកូវីដ-១៩ ក្រោយពីវីរុសនេះផ្ទុះនៅចិនប៉េកាំង។

ទីក្រុងដែលមានប្រជាជនរស់នៅច្រើនកកកុញមួយនេះ អាចទប់ការឆ្លងរាតត្បាតឱ្យស្ថិតនៅកម្រិតទាបគួរឱ្យកត់សម្គាល់ ដោយមានតែករណីឆ្លងតែជាង ១០.០០ ករណី និងស្លាប់ប្រមាណ ១៨០ ករណីប៉ុណ្ណោះ។ ប៉ុន្តែក្រុងនេះបានដាក់ចេញវិធានការរក្សាគម្លាតសុវត្ថិភាពយ៉ាងម៉ឺងម៉ាត់ ហើយផាកពិន័យជាប្រាក់ចំពោះអ្នកបំពានវិធានការនេះស្ទើរតែមួយឆ្នាំពេញកាលពីឆ្នាំ២០២០។

អ្នកនាំពាក្យរដ្ឋបាលពិសេសនេះបានលើកឡើងថា “សេដ្ឋកិច្ចរបស់ក្រុងនេះបានធូរស្រាលជាលំដាប់” ក្នុងត្រីមាសទី៤ នៃឆ្នាំ២០២០។ តាមការរំពឹងទុកថា សេដ្ឋកិច្ចក្រុងហុងកុង នឹងទទួលបានកំណើនជាវិជ្ជមានសម្រាប់ឆ្នាំ២០២១ ទាំងមូល ប៉ុន្តែស្ថានភាពសេដ្ឋកិច្ចក្នុងឆមាសទី១ នៃឆ្នាំនេះនឹងនៅតែមានបញ្ហាប្រឈម ហើយកម្រិតនៃការងើបឡើងវិញស្ថិតក្នុងភាពមិនប្រាកដប្រជាយ៉ាងច្រើន ជាពិសេសភាពមិនប្រាកដប្រជាអំពីស្ថានភាពឆ្លងរាតត្បាតវីរុសកូវីដ-១៩”។

យោងតាមទិន្នន័យបង្ហាញថា ការចំណាយរបស់ពលរដ្ឋបានធ្លាក់ចុះ ១០,២% ពីឆ្នាំ២០១៩។ ចំណែកឯការនាំចេញបានធ្លាក់ចុះ ៣៦,៨% ហើយការនាំចូលបានធ្លាក់ចុះ ៣៥,២%។ ទន្ទឹមនេះ អត្រាគ្មានការងារធ្វើនាពេលបច្ចុប្បន្នមាន ៦,៦% ដែលជាកម្រិតខ្ពស់បំផុតរបស់ខ្លួនក្នុងរយៈពេល ១៦ ឆ្នាំមកនេះ៕

រដ្ឋបាលខេត្តព្រះសីហនុសម្រេចមិនផ្តល់វិញ្ញាបនបត្រសម្គាល់ម្ចាស់អចលនវត្ថុចំនួន៥៨៤ក្បាលដីនៅលើកោះរ៉ុង

ដោយ ៖ រ៉ាណេត

ព្រះសីហនុ ៖ ក្រោយការសិក្សា និងពិនិត្យលម្អិតទៅលើភាពមិនប្រក្រតីលើការស្នើសុំកាន់កាប់ដីជាកម្មសិទ្ធិនៅលើកោះរ៉ុងដែលកំពុងមានគម្រោងអភិវឌ្ឍន៍យ៉ាងសម្បើមពីសំណាក់ក្រុមហ៊ុនរ៉ូយ៉ាល់គ្រុប រដ្ឋបាលខេត្តព្រះសីហនុបានសម្រេចមិនផ្តល់វិញ្ញាបនបត្រសម្គាល់ម្ចាស់អចលនវត្ថុទៅលើដីចំនួន៥៨៤ក្បាលដី និងបន្តចាត់វិធានការផ្លូវច្បាប់ទៅលើជនណាដែលប៉ះពាល់ដីកម្មសិទ្ធិទ្រព្យសម្បត្តិរបស់រដ្ឋ។

តាមរយៈសេចក្ដីជូនដំណឹងរបស់រដ្ឋបាលខេត្តព្រះសីហនុដែលផ្សព្វផ្សាយនៅព្រឹកថ្ងៃទី៣០ ខែមករា ឆ្នាំ២០២១នេះបានបញ្ជាក់ថា ទីតាំងដីស្ថិតនៅសង្កាត់កោះរ៉ុង និងសង្កាត់កោះរ៉ុងសន្លឹមក្រុងកោះរ៉ុង ខេត្តព្រះសីហនុ ជាប្រភេទដីកោះដែលជាទ្រព្យសម្បត្តិសាធារណៈរបស់រដ្ឋ ត្រូវបានរាជរដ្ឋាភិបាលសម្រេចធ្វើអនុបយោគពីដីសាធារណៈរបស់រដ្ឋមកជាដីឯកជនរបស់រដ្ឋតាមអនុក្រឹត្យលេខ ០៥អនក្រ.បក ចុះថ្ងៃទី២១ ខែមករា ឆ្នាំ២០០៨ ដើម្បីធ្វើការអភិវឌ្ឍន៍ក្រោមលក្ខខណ្ឌជួលវិនិយោគ។

នៅថ្ងៃទី០៤ ខែមេសា ឆ្នាំ២០១៨រាជរដ្ឋាភិបាលបានចេញអនុក្រឹត្យលេខ ៤៨អនក្រ.បក សម្រេចកាត់ដីទំហំ ៥២៨,៣៧ហិកតា នៅសង្កាត់កោះរ៉ុង និងសង្កាត់កោះរ៉ុងសន្លឹម ក្រុងព្រះសីហនុ (បច្ចុប្បន្នក្រុងកោះរ៉ុង) ខេត្តព្រះសីហនុ ចេញពីដីឯកជនរបស់រដ្ឋកំណត់ដោយអនុក្រឹត្យលេខ ០៥អនក្រ.បក ចុះថ្ងៃទី២១ ខែមករា ឆ្នាំ២០០៨ ដើម្បីប្រទានកម្មជាកម្មសិទ្ធិជូនប្រជាពលរដ្ឋរស់នៅអចិន្ត្រៃយ៍នៅលើកោះរ៉ុងចំនួន២៩៨គ្រួសារស្មើនឹង ៦៣៧ក្បាលដី ស្មើនឹងទំហំ ៥២៨,៣៧ហិកតា។

ដោយឡែកទីតាំងដីចំនួន ៥៨៤ក្បាលដី (ដូចមានក្នុងតារាងឧបសម្ព័ន្ធភ្ជាប់មកជាមួយ) គណៈកម្មការរដ្ឋបាល បានសម្រេចមិនផ្តល់វិញ្ញាបនបត្រសម្គាល់ម្ចាស់អចលនវត្ថុ ជូនបងប្អូនប្រជាពលរដ្ឋ ដោយយោងលើហេតុផលទី១. ប្រជាពលរដ្ឋមិនមានអាសយដ្ឋានអចិន្ត្រៃយ៍លើកោះ មានចំនួន ៣៦០ក្បាលដី។ ទី២. ទីតាំងដីគ្មានទិន្នន័យ មានចំនួន ៧២ក្បាលដី។ ទី៣. ទីតាំងដីទំនាស់មានចំនួន ១០៧ក្បាលដី ក្នុងនោះប្រជាពលរដ្ឋមានអាសយដ្ឋានលើកោះចំនួន ៤៧ក្បាលដីប្រជាពលរដ្ឋនៅក្រៅកោះចំនួន ៦០ក្បាលដី និងទី៤. ទីតាំងដីពាក់ព័ន្ធនឹងគម្រោងព្រលានយន្តហោះចំនួន ៤៥ក្បាលដី ក្នុងនោះប្រជាពលរដ្ឋមានអាសយដ្ឋានលើកោះចំនួន ៣៦ក្បាលដីនិងប្រជាពលរដ្ឋនៅក្រៅកោះចំនួន ០៩ក្បាលដី។

រដ្ឋបាលខេត្តព្រះសីហនុ សូមជម្រាបជូនបន្ថែមថា រាល់ឯកសារពាក់ព័ន្ធទាំងឡាយណា រួមមានឯកសារសម្គាល់លេខក្បាលដី (ចុងសន្លឹក) លិខិតផ្ទេរសិទ្ធិកាន់កាប់ប្រើប្រាស់ដីធ្លី ពាក្យស្នើសុំកាន់កាប់ប្រើប្រាស់ដីធ្លី កិច្ចសន្យាទិញ-លក់ដោយមានប្រថាប់ត្រាអាជ្ញាធរសង្កាត់ ឬប្រថាប់ត្រាមេធាវី ឬកិច្ចសន្យាផ្ទេរសិទ្ធិដីធ្លីជាលក្ខណៈឯកជន(រវាងគូភាគី) គំនូសបង្ហាញទីតាំងដី និងឯកសារពាក់ព័ន្ធផ្សេងៗទៀត រួមនឹងក្បាលដីក្នុងប្លង់សុរិយោដីចំនួន ៥៨៤ក្បាលដី ដែលគណៈកម្មការរដ្ឋបាល បានសម្រេចមិនផ្តល់ជូនជាកម្មសិទ្ធិ គឺជាឯកសារដែលគ្មានតម្លៃគតិយុត្តសម្រាប់ប្រើប្រាស់ ឬទាមទារសិទ្ធិលើដីធ្លីនៅលើកោះរ៉ុងនោះទេ។

ម្យ៉ាងទៀតរដ្ឋបាលខេត្តព្រះសីហនុ មិនទទួលស្គាល់លើការផ្ទេរសិទ្ធិ ការទិញ-លក់ ជួល បញ្ចាំ ហ៊ីប៉ូតែកប្រទានកម្មអច្ច័យទាន សន្តតិកម្ម ។ល។ និងសិទ្ធិទាំងឡាយដែលពាក់ព័ន្ធទៅនឹងទីតាំងទាំង ៥៨៤ក្បាលដី និងដីដែលកាន់កាប់ខុសច្បាប់ដទៃផ្សេងទៀតដូចមានឯកសាររៀបរាប់ខាងលើ លើកលែងក្បាលដីដែល ត្រូវបានចុះបញ្ជីដីធ្លី និងចេញវិញ្ញាបនបត្រសម្គាល់ម្ចាស់អចលនវត្ថុដោយរដ្ឋបាលសុរិយោដីរួចហើយ ។

រដ្ឋបាលខេត្តព្រះសីហនុ សូមបញ្ជាក់ជំហរយ៉ាងម៉ឺងម៉ាត់ថា នឹងចាត់វិធានការផ្លូវច្បាប់យ៉ាងតឹងរឹងបំផុតដោយមិនលើកលែងចំពោះជន ណាដែលបានប៉ះពាល់កម្មសិទ្ធិនៃទ្រព្យសម្បត្តិរបស់រដ្ឋ ដូចមានក្នុងមាត្រា២៥៩ នៃច្បាប់ភូមិបាលចែងថា «ការប៉ះពាល់កម្មសិទ្ធិនៃទ្រព្យសម្បត្តិសាធារណៈ ត្រូវផ្តន្ទាទោសពិន័យជាប្រាក់ពី ៥.០០០.០០០(ប្រាំលានរៀល ដល់ ៥០.០០០.០០០ (ហាសិបលាន) រៀល ឬរនិងផ្តទោសដាក់ពន្ធនាគារពី ១(មួយ)ឆ្នាំ ដល់ ៥(ប្រាំ)ឆ្នាំ និងមាត្រា ៨១ នៃច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរបស់រដ្ឋចែងថា រាល់អំពើរំលោភកាន់កាប់ទ្រព្យសម្បត្តិរដ្ឋ ជាអចលនទ្រព្យដោយខុសច្បាប់ដូចមានចែងក្នុងមាត្រា៧១ «រាល់ការចូលកាន់កាប់អចលនទ្រព្យរបស់រដ្ឋជាភោគៈក្រោយច្បាប់ភូមិបាលឆ្នាំ២០០១ចូលជាធរមាន ឬរាល់ការកាន់កាប់ជាភោគៈនៅលើអចលនទ្រព្យរបស់រដ្ឋដែលត្រូវបានកំណត់រួចហើយ ជាទ្រព្យសម្បត្តិសាធារណៈរបស់រដ្ឋ ទោះជាមុន ឬក្រោយច្បាប់ភូមិបាលឆ្នាំ២០០១ ចូលជាធរមាន” ត្រូវផ្តន្ទាទោសដាក់ពន្ធធនាគារពី ២(ពីរ)ឆ្នាំ ដល់ ៥(ប្រាំ)ឆ្នាំ និងពិន័យជាប្រាក់ពី ៤.០០០.០០០(បួនលាន)រៀល ដល់ ១០.០០០.០០០(ដប់លាន)រៀល និងជនណានៅពីក្រោយខ្នងនៃអំពើញុះញង់ និងការបំផុសចលនាបង្កឱ្យមានភាពចលាចល និងអនាធិបតេយ្យប្រឆាំងតបតនឹងអ្នករាជការសាធារណៈ៕

គម្រោងអចលនទ្រព្យធំៗចំនួន៣ប្រកាសបញ្ចប់ការសាងសង់ ទោះសិ្ថតក្នុងអំឡុងមានវិបត្តិ

ដោយៈ សាវុធ

ភ្នំពេញៈ ទោះបីសិ្ថតក្នុងអំឡុងមានវិបត្តិកូវីដ១៩ ដែលបង្កផលប៉ះពាល់សេដ្ឋកិច្ចពិភពលោក រួមានទាំងកម្ពុជាក៏ដោយ ក៏គម្រោងអភិវឌ្ឍន៍អចលនទ្រព្យធំៗចំនួន៣ នៅទីក្រុងភ្នំពេញ បានប្រកាសបញ្ចប់ការសាងសង់របស់ខ្លួន នៅចុងឆ្នាំ២០២០ និងដើមឆ្នាំ២០២១ ដើម្បីត្រៀមបម្រើឱ្យទីផ្សារ និងសេវាកម្មអចលនទ្រព្យនាពេលមុខឆាប់។

គម្រោងអភិវឌ្ឍន៍អចលនទ្រព្យធំៗចំនួន៣ ដែលបានប្រកាសបញ្ចប់ការសាងសង់នេះ មានដូចជា ទី១) ក្រុមហ៊ុន ម៉ារីថាម អសិត ដែលជាបុត្រសម្ព័ន្ធរបស់ក្រុមហ៊ុន ម៉ារីថាម គ្រុប នៅរសៀលថ្ងៃទី២៦ ខែមករា ឆ្នាំ២០២១នេះ បានរៀបចំពិធីបិទបញ្ចប់ការសាងសង់ គ្រោងអគារការិយាល័យទំនើបរបស់ខ្លួន ដែលមានឈ្មោះថា «Maritime Tower» ។

អគារការិយាល័យទំនើបនេះ មានកម្ពស់២៦ជាន់ និងវិនិយោគទឹកប្រាក់៣០លានដុល្លារអាមេរិក ស្ថិតនៅតាមបណ្ដោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) នឹងក្លាយទៅជាតំបន់ធុរកិច្ចដ៏មានសក្តានុពល ប្រមូលផ្ដុំទៅដោយអគារទំនើបៗមជ្ឈមណ្ឌលពាណិជ្ជកម្មខ្នាតអន្តរជាតិ។

អគារការិយាល័យលំដាប់អន្តរជាតិ តម្លៃ៣០លានដុល្លារ «Maritime Tower» ត្រូវបានប្រារព្ធពិធីបញ្ចុះបឋមសិលា បើកការដ្ឋានសាងសង់កាលពីថ្ងៃទី២៧ ខែមករា ឆ្នាំ២០១៩ ហើយគ្រោងបញ្ចប់ដាក់ឲ្យប្រើប្រាស់នៅឆ្នាំ២០២១នេះ។

ទី២) ដោយមានកម្ពស់ជាង៣០ជាន់ គម្រោងសណ្ឋាគារផ្កាយប្រាំ និងខុនដូ វីនដាម (Wyndham) របស់មជ្ឈមណ្ឌលលីស៊ីន CEO ដែលស្ថិតនៅក្នុង សង្កាត់វាលវង់ ខណ្ឌ៧មករា រាជធានីភ្នំពេញ បានបញ្ចប់គ្រោងអគារ និងកសាងដល់ជាន់ដំបូល នៅឆ្នាំ២០២២ គ្រោងនឹងបញ្ចប់ការសាងសង់ជាស្ថាពរ។

ជាក់ស្ដែង នៅថ្ងៃទី២៥ ខែមករា មជ្ឈមណ្ឌលលីស៊ីន CEO បានប្រារព្ធពិធីបញ្ចប់ ការសាងសង់គ្រោងអគារដោយ មានការប្រសិទ្ធិពរពីព្រះសង្ឃ និងការសម្តែង ម៉ុងសាយអមដោយសំឡេងម៉ាស៊ីន របារដែកចុងក្រោយត្រូវបានបិទជិត។

យោងតាមផែនការក្នុងការសាងសង់ បន្ទាប់របស់ក្រុមហ៊ុនលីស៊ីន CEO បានផ្តោតសំខាន់ទៅលើ រូបរាងខាងក្រៅនៃដំបូលអាគារ ដែលមានរូបរាងពពក និងសំណង់ខាងក្នុង នៃសណ្ឋាគារលំដាប់ផ្កាយ៥ WYDHAM នឹងបញ្ចប់ក្នុងពេលឆាប់ៗនេះ តាមការគ្រោងទុក។

ទី៣ នៅថ្ងៃទី១៦ ខែធ្នូ ឆ្នាំ ២០២០ ជាមួយនឹងការរៀបចំចាក់សាបចុងក្រោយបង្អស់ Morgan Tower ត្រូវបានបញ្ចប់ការសាងសងជាស្ថាពរ។ ចាប់តាំងពីការបុកគ្រឹះនៃ Morgan Tower នៅខែសីហា ឆ្នាំ២០១៨ រហូតដល់បានបញ្ចប់៤៨ជាន់ អស់រយៈពេល២៨ខែ ហើយវាបានផ្តល់នៅចម្លើយដ៏ល្អឥតខ្ចោះ ដល់ម្ចាស់វិនិយោគិន និងដៃគូអាជីវកម្មជាច្រើន។

Morgan ជឿជាក់ថាសកម្មភាពជាក់ស្តែង ជាពាក្យដែលមានឥទ្ធិពលបំផុត ដោយទទូចឲ្យបកស្រាយគោលគំនិត ជាមួយនឹងសកម្មភាពប្រកបដោយប្រសិទ្ធភាព និងមើលឃើញពីភាពរឹងមាំប្រកបដោយគុណភាពខ្ពស់។

ស្ថិតក្រោមបរិយាកាសពិសេស នៃការរីករាលដាលនៃជំងឺ Covid 19 ឆ្នាំ២០២០ Morgan បានទប់ទល់នឹងហានិភ័យ នៃការរីករាលដាលនៃជំងឺ Covid19 សម្ភារសំណង់ខ្វះខាត ថ្លៃពលកម្មកើនឡើង និងការលំបាកក្នុងការសាងសង់ក្នុងរដូវវស្សា ហើយបានប្រកាន់ខ្ជាប់យ៉ាងម៉ឺងម៉ាត់ នូវវឌ្ឍនភាពនៃសំណង់ និងស្តង់ដារសំណង់ ហើយខិតខំធ្វើឲ្យសំណង់ នឹងផលិតផលល្អបំផុតតាមស្តង់ដាដ៏តឹងរឹង។

Morgan សង្ឃឹម Morgan Tower នឹងបញ្ជប់ការសាងសង់បានយ៉ាងជោគជ័យ ក្នុងពេលដំណាលគ្នានេះដែរ ក្រុមហ៊ុនត្រៀមនឹងប្រគល់ជូន នៅអគារការិយាល័យ ភាពរ៉ុងរឿង នៃអាជីវកម្មនាពេលអនាគត របស់រាជធានីភ្នំពេញ បានចាប់ផ្តើមលេចចេញជារូបរាង៕