ដោយៈ រ៉ា ណេត

ភ្នំពេញៈ អគ្គនាយកដ្ឋានពន្ឋដា បានប្រមូលប្រាក់ចំណូលបានជិត២,៧ពាន់លានដុល្លារគិតត្រឹមពាក់កណ្តាលខែធ្នូឆ្នាំនេះ  ដែលស្មើនឹងប្រមាណ៩៤ភាគរយ នៃផែនការឆ្នាំ២០២០នេះ បើទោះជារដ្ឋាភិបាលបានកាត់បន្ថយ និងលើកលែងការយកពន្ធអាជីវកម្មមួយចំនួនក៏ដោយ។

លោកគង់ វិបុល អគ្គនាយកនៃអគ្គនាយកដ្ឋានពន្ធដារបានមានប្រសាសន៍ ក្នុងកិច្ចប្រជុំតាមប្រព័ន្ឋអនឡាញនាព្រឹកថ្ងៃទី១៧ ធ្នូនេះថា ទោះស្ថិតនៅក្នុងស្ថានភាពវិបត្តិក្ដី ចំណូលពន្ធ នៅតែទទួលបានផលវិជ្ជមានដូច្នេះ គឺដោយសារតែកំសួលពីឆ្នាំ២០១៩កន្លងទៅ។ អាជីវករដែលរកស៊ីចំណេញនៅឆ្នាំ២០១៩ ហើយត្រូវបានដាក់ប្រកាសពន្ធ នៅឆ្នាំ២០២០ ដូច្នេះចំណូលឆ្នាំ២០២០ឃើញថានៅល្អ។

លោកបន្តថា ច្បាប់ស្ដីពីថវិកាឆ្នាំ ២០២០ ដែលត្រូវបានរដ្ឋាភិបាលអនុម័តតាំងពីមុនកូវីដ១៩ សម្រាប់ពន្ធដារគឺ ប្រមាណ២៨៥០លានដុល្លារអាមេរិក តែដោយសារតែកូវីដ១៩ ចំណូលសម្រាប់ពន្ធដារឆ្នាំ២០២០នេះ អាចនឹងជិតគ្រប់ផែនការ តែវាប្រហែលជាមិនលើសផែនការដូចឆ្នាំមុនៗនោះទេ។

គង់ វិបុលបានថ្លែងទៀតថា ដោយឡែកសម្រាប់ច្បាប់ថវិកាឆ្នាំ២០២១ តាមផែន​ការពន្ធដារត្រូវរកឱ្យបានប្រមាណ៧៨ភាគរយ នៃថវិកាឆ្នាំ ២០២០ ព្រោះថាឥទ្ធិពលនៃវិបត្តិគឺព្យាករណ៍ នឹងជះផលអាក្រក់៣ឆ្នាំយ៉ាងតិចទើបប្រសើរឡើងវិញ៕

ដោយៈ រ៉ាណេត

កំពតៈ រដ្ឋបាលខេត្តកំពតកំពុងសិក្សាទៅលើទីតាំងដី ដែលប្រជាពលរដ្ឋបានប្រើប្រាស់ និងអាស្រ័យផលជាក់ស្តែង នៅក្នុងតំបន់ការពារឧទ្យានជាតិព្រះមុនីវង្សបូគោ និងស្ថិតនៅក្នុងស្រុកក្រុងចំនួន៣ សរុបជិត៤០០០ក្បាលដី ដែលស្នើសុំធ្វើការកាត់ឆ្វៀលធ្វើជាកម្មសិទ្ធិ។

អភិបាលខេត្តកំពត លោកជាវ តាយ បានមានប្រសាសន៍នៅថ្ងៃទី១៧ ខែធ្នូ ឆ្នាំ២០២០នេះថា តាមរយៈមន្ទីរបរិស្ថានខេត្ត គិតចាប់ពីថ្ងៃទី២៧ ខែកក្កដា រហូតដល់ថ្ងៃទី៣ខែកញ្ញា ឆ្នាំ២០២០ មានប្រជាពលរដ្ឋចំនួន៣៣៨៦គ្រួសារ បានដាក់សំណើស្នើសុំឆ្វៀលដីអាស្រ័យផល និងប្រើប្រាស់នៅតំបន់ឧទ្យានជាតិព្រះមុនីវង្សបូកគោ ចំនួន៣៩១៣ក្បាលដី ស្ថិតនៅក្នុងភូមិសាស្ត្រ ស្រុកទឹកឈូ ស្រុកឈូក និងក្រុងកំពត។

ជាមួយនឹងការសិក្សាពីការស្នើសុំឆ្វៀលដី របស់ប្រជាពលរដ្ឋខាងលើនេះ រដ្ឋបាលខេត្តបានបង្កើតក្រុមការងារជំនាញ៣ក្រុមដើម្បីធ្វើការ និងទទួលខុសត្រូវនៅតាមស្រុក ក្រុងផ្សេងគ្នា។ បន្ថែមពីនេះ ក្រុមការងារថ្នាក់ខេត្តក៏ត្រូវរៀបចំ និងគូរផែនទីចំនួន៣សម្រា​ប់បង្ហាញពីទីតាំង ដែលប្រជាពលរដ្ឋបានស្នើសុំសម្រាប់ស្រុកទឹកឈូ ស្រុកឈូក និងក្រុងកំពត ដាច់ដោយឡែកពីគ្នា និងរៀបចំផែនទីររួមរបស់ខេត្ត ដើម្បីដាក់ជូនកិច្ចប្រជុំអន្តរក្រសួង ។

លោកសូត យា អនុរដ្ឋលេខាធិការក្រសួងបរិស្ថាន និងជាអនុប្រធានក្រុមការងារសិក្សាស្រាវជ្រាវអត្តសញ្ញាណមនុស្ស និងអត្តសញ្ញាណដីនៅខេត្តកំពតលើកឡើងផងដែរថា ធាតុចូលសំខាន់ៗដើម្បីឱ្យអង្គប្រជុំពិភាក្សា ដើម្បីរកដំណោះស្រាយមានទី៣សំខាន់ៗ រួមមានទី១ ដីដែលប្រជាពលរដ្ឋមានដំណាំដាំដុះជាក់ស្តែង និងអាស្រ័យផលយូរណាស់មកហើយ ទី២ ដីព្រៃគ្មានដាំដំណាំដាំដុះ ទី៣ ដីដែលស្ថិតនៅក្នុងឧទ្យានបូកគោ ហើយមានទំនាស់ និងទី៤ ដីព្រៃដែលបាននឹងកំពុងរានថ្មីៗ។

លោកអនុរដ្ឋលេខាធិការក៏បានបញ្ជាក់ផងដែរថា ក្រុមការងារថ្នាក់ជាតិ ខេត្ត ក្រុង ស្រុក ឃុំ សង្កាត់ ត្រូវអនុវត្តឱ្យបានត្រឹមត្រូវតាមគោលការណ៍ណែនាំ របស់សម្តេចអគ្គមហាសេនាបតីតេជោហ៊ុន សែន ក្នុងការឆ្វៀលដីចេញពីតំបន់ការពារជូនប្រជាពលរដ្ឋត្រូវពិនិត្យឱ្យបានហ្មត់ចត់ លើដីដែលអាស្រ័យផលជាក់ស្តែង រួមមានដំណាំដាំដុះយូរណាស់មកហើយ ត្រូវដោះស្រាយជូនប្រជាពលរដ្ឋ ។

ក្រៅពីនេះ សុំឱ្យក្រុមការងារចុះដកបទពិសោធន៍ លើការអនុវត្តការងារនៅឃុំ បឹងទូក ស្រុកទឹកឈូ មុនគេ ដើម្បីឲ្យក្រុមការងារទាំងអស់បានយល់ និងយកទៅអនុវត្តតាមក្រុមនីមួយៗ ។ ការងារនេះស្នើសុំលោកប្រធានមន្ទីរបរិស្ថានខេត្ត និងលោកប្រធានមន្ទីរដែនដី នគររូបនីយកម្ម  សំណង់  និងសុរិយោដីខេត្ត រៀបចំផែនការចុះអនុវត្ត ៕

        ដោយគង់ ម៉ាលីនណា

        ភ្នំពេញៈ ជាមួយនឹងទស្សនទានអភិរ័ក្ស ផ្សារភ្ជាប់ការអភិវឌ្ឍ ក្រុមហ៊ុនជីប ម៉ុងគ្រុប ដែលបានវិនិយោគសណ្ឋាគារលំដាប់ផ្កាយ៥ដ៏ល្បីល្បាញ បានសុខចិត្តចំណាយប្រាក់រហូតដល់៥លានដុល្លារ ដើម្បីរក្សាអាគារសម័យអាណានិគម នៅក្នុងអាគារសម័យទំនើបមួយ ដែលបានបញ្ចប់ការសាងសង់នាពេលថ្មីៗនេះ។

សណ្ឋាគារHyatt Regency Phnom Penh បានលេចត្រដែតកណ្ដាលបេះដូងរាជធានីភ្នំពេញ បញ្ចូលស្ថាបត្យកម្មចម្រុះខ្មែរ សម័យអាណានិគមនិងទំនើប។

អ្វីដែលធ្វើឲ្យសណ្ឋាគារនេះ លេចធ្លោជាងគេនោះគឺ ការអភិរក្សវីឡាសម័យអាណានិគមបារាំង ដែលមានអាយុជាងមួយសតវត្សរ៍កន្លងមកហើយ។

ក្រុមហ៊ុនជីប ម៉ុង បានចំណាយអស់ប្រមាណ៥លានដុល្លារអាមេរិក ដើម្បីអភិរក្សវីឡានេះ គឺក្នុងគោលបំណងរក្សាដាននៃប្រវត្តសាស្រ្ត ការវិវឌ្ឍនៃស្ថាបត្យកម្ម និងអត្តសញ្ញាណនៃសហគមន៍នោះ។

វីឡាសម័យអាណានិគមនេះ សម្រាប់ជាន់ទី១ ត្រូវបានអភិរក្សជាកន្លែងទទួលបដិសណ្ឋារកិច្ចភ្ញៀវ ដែលនឹងផ្ដល់ជូនភ្ញៀវនូវទស្សនីយភាពអំពីរចនាបទខ្មែរ និងសម័យអាណានិគមបារាំង មួយរំពេចនៅពេលពួកគេអញ្ជើញមកដល់ និងសម្រាប់ជាន់ទី២ ដែលជាArtic Bar ដើម្បីបម្រើភេសជ្ជៈផ្សេងៗ។

សណ្ឋាគារHyatt Regency Phnom Penh ត្រូវបានរចនាដោយក្រុមហ៊ុន SCDA Architects ដែល មានមូលដ្ឋាននៅសិង្ហបុរី និងក្រុមហ៊ុន PIA Interior ដែលមានមូលដ្ឋាននៅប្រទេសថៃ។

សណ្ឋាគារ ហៃយ៉ាត់ រីជិនស៊ី ភ្នំពេញ បានរួមចំណែករក្សាអត្តសញ្ញាណក្នុងតំបន់ ដែលជាបណ្ដុំនៃស្ថាប័នធំៗ ពាណិជ្ជកម្ម វប្បធម៌ និងសាសនា ដូចជាព្រះបរមរាជវាំង វាលព្រះមេរុ សារមន្ទីរជាតិ សាកលវិទ្យាល័យភូមិន្ទវិចិត្រសិល្បៈ ទន្លេចតុមុខ វត្តអារាម អគារសម័យអាណានិគមបារាំង ផ្សារបែបប្រពៃណី និងកន្លែងលក់ស្នាដៃសិល្បៈ។

រចនាបទពហុសម័យនៃសណ្ឋាគាHyatt Regency Phnom Penhនឹងផ្ដល់បទពិសោធន៍ លើផ្នែកបដិសណ្ឋារកិច្ចដ៏ល្អមួយជូនដល់ភ្ញៀវជាតិ និងអន្តរជាតិ៕

ដោយៈ រ៉ាណេត

បន្ទាយមានជ័យៈ រដ្ឋាភិបាលកម្ពុជា និងរាជរដ្ឋាភិបាលប្រទេសថៃ បានយល់ព្រមគ្នាបើកច្រកព្រំដែនអន្តរជាតិប៉ោយប៉ែត រួមនឹងច្រកមួយចំនួនទៀតឡើងវិញ បន្ទាប់ពីបិទមួយរយៈដោយសារជំងឺកូវីដ-១៩។

យោងតាមរយៈលិខិតរបស់រដ្ឋបាល ខេត្តបន្ទាយមានជ័យ នៅរសៀលថ្ងៃទី១៧ ខែធ្នូ ឆ្នាំ២០២០នេះបានឱ្យដឹងថា រាជរដ្ឋាភិបាលកម្ពុជា-ថៃបានព្រមព្រៀងឯកភាពគ្នាបើកច្រកព្រំដែនអន្តរជាតិដំណើរការឡើងវិញ បន្ទាប់មានកិច្ចជំនួបពិភាក្សាលម្អិតរួមគ្នា នៅព្រឹកថ្ងៃដដែលនេះ ដោយអាចនឹងត្រូវចាប់អនុវត្តន៍៍នៅចុងខែធ្នូ ឆ្នាំ២០២០ខាងមុខនេះ។

ជាលទ្ធផលនៃកិច្ចប្រជុំ រវាងរដ្ឋបាលខេត្តបន្ទាយមានជ័យ ជាមួយភាគីថៃនៅព្រឹកថ្ងៃទី១៧ ខែធ្នូ ឆ្នាំ២០២០ស្តីពី ការបន្ធូរបន្ថយច្បាប់ស្តីពី ការគ្រប់គ្រងស្ថានការណ៍ក្នុងគ្រាអាសន្ន ដើម្បីជួយដោះស្រាយដំណើរការសេដ្ឋកិច្ច ក្នុងតំបន់បានឱ្យដឹងថាភាគីទាំពីរយល់ព្រមគ្នាលើ ៣ចំណុចដូចជា ទី១ យល់ព្រមឱ្យពលករកម្ពុជា ចូលទៅធ្វើការងារក្នុងវិស័យកសិកម្ម ក្នុងព្រះរាជាណាចក្រថៃ។

ទី២ យល់ព្រមឱ្យអាជីវករកម្ពុជា ចូលទៅប្រកបអាជីវកម្ម ក្នុងផ្សាររោងក្លឿ ស្រុកអារញ្ញប្រាថេត ខេត្តស្រះកែវ ព្រះរាជាណាចក្រថៃ។

ទី៣. យល់ព្រមបើកប្រើប្រាស់ច្រកទ្វារព្រំដែនអន្តរជាតិស្ទឹងបត់-បានណងអៀន បណ្តោះអាសន្ន ជាច្រកដឹកទំនិញ ដើម្បីកាត់បន្ថយការកកស្ទះ នៅច្រកទ្វារព្រំដែនអន្តរជាតិប៉ោយប៉ែត-ខ្លងឡឹក៕

ដោយៈ ម៉ាណេត

ភ្នំពេញៈ ក្រសួងការបរទេសសហរដ្ឋអាមេរិកកាលពីថ្ងៃម្សិលមិញ បានផ្តើមកម្មវិធីតាមដានទំនប់វារីអគ្គិសនីលើទន្លេមេគង្គ ដោយសហការជាមួយមជ្ឈមណ្ឌល Stimson Center និង Eyes on Earth។ នេះបើយោងតាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជានៅថ្ងៃទី១៧ ខែធ្នូ ឆ្នាំ២០២០។

កម្មវិធីថ្មីតាមដានទំនប់វារីអគ្គិសនី លើទន្លេមេគង្គគឺជាជំហ៊ានសំខាន់មួយ សម្រាប់បង្កើនការយល់ពីស្ថានភាពទឹក នៅក្នុងតំបន់អាងទន្លេមេគង្គ។ ប្រទេសទាំងឡាយមិនអាចគ្រប់គ្រងបានល្អឡើយ លើអ្វីដែលគេមិនអាចធ្វើការវាស់ស្ទង់បាន ហើយអស់រយៈពេលជាយូរមកហើយ ដែលប្រជាជននៅតំបន់ទន្លេមេគង្គ ខ្វះការក្តាប់បានលើធនធានទឹកនៃអាងទន្លេនេះ។

កម្មវិធីតាមដានទំនប់វារីអគ្គិសនីលើទន្លេមេគង្គ នឹងប្រើការស្វែងយល់ពីចម្ងាយ ពីប្រភពបើកចំហ រូបភាពតាមផ្កាយរណប និងការវិភាគតាមប្រព័ន្ធព័ត៌មានស្តីពី ភូមិសាស្រ្ត ដើម្បីផ្តល់ព័ត៌មានទាន់ពេល ស្តីពីលក្ខណៈអាកាសធាតុ លំហូរនៃទឹកទន្លេ និងស្ថានភាពនៃអាងទឹកទន្លេមេគង្គ។

មធ្យោបាយនេះ ដែលអាចមានសម្រាប់សាធារណៈ នឹងបង្កើនទិន្នន័យទឹកបានយ៉ាងច្រើនសម្រាប់តំបន់នេះ ដោយធ្វើឲ្យប្រជាជនដែលត្រូវការខ្លាំង ទទួលបានព័ត៌មានទាំងនេះ  ដើម្បីឲ្យគេអាចធ្វើការសម្រេចចិត្តបានល្អ ដែលមានផលទៅលើមុខរបរប្រកបជីវភាពរស់នៅ និងសន្តិសុខតំបន់។

ជាយូរមកហើយដែលសហរដ្ឋអាមេរិក បានគាំទ្រការអំពាវនាវរបស់សហគមន៍ នៅក្នុងតំបន់ទន្លេមេគង្គ ដែលចង់បានទិន្នន័យទឹកឲ្យបានច្រើន។ សហរដ្ឋអាមេរិក នឹងបន្តធ្វើជាដៃគូជាមួយគណកម្មការទន្លេមេគង្គ រដ្ឋាភិបាលនានា និងអាជ្ញាធរមូលដ្ឋាន ដើម្បីពង្រឹ​ងសមត្ថភាពរបស់គេ ក្នុងការទទួលបាន និងប្រើប្រាស់ទិន្នន័យល្អៗសម្រាប់ជួយដល់ការសម្រេចចិត្តធំៗផ្អែកលើវិទ្យាសាស្រ្ត។

តាមរយៈកម្មវិធីភាពជាដៃគូរវាងតំបន់ទន្លេមេគង្គ និងសហរដ្ឋអាមេរិក ក្រសួងការបរទេសអាមេរិកនឹងបន្តលើកកម្ពស់សន្តិសុខទឹកថែមទៀត។

កម្មវិធីតាមដានទំនប់វារីអគ្គិសនីលើទន្លេមេគង្គ ចូលរួមចំណែកដល់គំនិតផ្តួចផ្តើមដែលកំពុងអនុវត្ត នៅក្រោមគំនិតផ្តួចផ្តើមស្តីពីទិន្នន័យនៃទឹកទន្លេមេគង្គ ដោយសម្របសម្រួលការផ្លាស់ប្តូរគ្នា នូវការប្រតិបត្តិល្អៗ ជំរុញការសម្របសម្រួលគ្នានៃដៃគូអភិវឌ្ឍន៍ និងពង្រឹងវិបុលភាពរបស់សហគមន៍ និងរដ្ឋាភិបាល នៅតំបន់ទន្លេមេគង្គ តាមរយៈការមានធនធានទឹកដែលត្រូវបានគ្រប់គ្រង និងចែករំលែកប្រកបដោយនិរន្តភាព៕

ដោយៈសុខុម

សឹង្ហបុរី: ទិន្នន័យផ្លូវការពីEnterprise Singapore ដែលជាស្ថាប័នចំណុះឱ្យក្រសួងពាណិជ្ជកម្ម និងឧស្សាហកម្មនៃប្រទេសនេះ បានបង្ហាញកាលពីថ្ងៃព្រហស្បតិ៍ទី១៧ ធ្នូនេះថា ការនាំចេញទំនិញក្នុងស្រុកក្រៅពីប្រេងរបស់សិង្ហបុរី បានធ្លាក់ចុះរហូតដល់ទៅ ៤,៩% ឆ្នាំក្នុងខែវិច្ឆិកា។

យោងតាមសារព័ត៌មានCNA បានចុះផ្សាយក្នុងថ្ងៃនេះឱ្យដឹងថា ការធ្លាក់ចុះនេះដែលកើតមានឡើងក្រោយធ្លាក់ចុះ ៣,១% ក្នុងខែតុលា ភាគច្រើនលើទំនិញ ដូចជា សារធាតុគីមី ដែលចម្រាញ់ចេញពីប្រេងឥន្ធនៈ ឱសថ និងមាស បន្ទាប់មកគឺគ្រឿងអេឡិចត្រូនិក។

ពាណិជ្ជកម្មសរុបរបស់សិង្ហបុរី បានធ្លាក់ចុះរហូតដល់ទៅ៨,៧% ក្នុងខែវិច្ឆិកា ក្រោយធ្លាក់ចុះ ៩% ក្នុងខែតុលា។ ការធ្លាក់ចុះនេះភាគច្រើនបណ្ដាលមកពីពាណិជ្ជកម្មប្រេងដែលនៅតែបន្តធ្លាក់ចុះ ស្របពេលតម្លៃប្រេងធ្លាក់ចុះកាន់តែទាប បើធៀបទៅមួយឆ្នាំមុន ក្រោយធ្លាក់ចុះក្នុងខែតុលា។

ចំណែកឯការនាំចេញសរុបបានធ្លាក់ចុះ៨% ក្នុងខែវិច្ឆិកា បន្ទាប់ពីធ្លាក់ចុះ៨,៧% ក្នុងខែតុលា។ ការនាំចូលសរុបក៏បានធ្លាក់ចុះ៩,៤% ផងដែរក្នុងខែវិច្ឆិកា ក្រោយធ្លាក់ចុះ ៩,៣%ក្នុងខែតុលា។

ការដឹកជញ្ជូនផលិតផលគ្រឿងអេឡិចត្រូនិក បានធ្លាក់ចុះ៣,៨% ក្នុងខែវិច្ឆិកា ក្រោ​យធ្លាក់ចុះ០,៥% ក្នុងខែតុលា។ ក្នុងនោះផលិតផលបន្ទះឈីប និង Disk Drive បានធ្លាក់ចុះ៧,៩% ហើយគ្រឿងបង្គុំកុំព្យូទ័របានធ្លាក់ចុះ១២,១%។

ការដឹកជញ្ជូនទំនិញ ក្រៅពីគ្រឿងអេឡិចត្រូនិកបានធ្លាក់ចុះ៥,២% ក្នុងខែវិច្ឆិកា បន្ទាប់ពីធ្លាក់ចុះ៤%ក្នុងខែតុលា។ ការធ្លាក់ចុះការនាំចេញសារធាតុគីមី ដែលចម្រាញ់ចេញពីប្រេងឥន្ធនៈដែលធ្លាក់ចុះ១៨,៥% គឺរួមចំណែកធំជាងគេ បន្ទាប់មកឱសថដែលធ្លាក់ចុះ១៣,៤ ហើយមាសធ្លាក់ចុះ ១៥,១%។

ការនាំចេញទៅកាន់ទីផ្សារកំពូលៗជារួម បានធ្លាក់ចុះក្នុងខែវិច្ឆិកា ទោះបីជាការនាំចេញទៅកាន់សហរដ្ឋអាមេរិក ជប៉ុន កោះតៃវ៉ាន់ ម៉ាឡេស៊ី ថៃ និងក្រុងហុងកុង បានកើនឡើងក្ដី។

ទិន្នន័យផ្លូវការដដែលបានបង្ហាញថា ការធ្លាក់ចុះខ្លាំងជាងគេគឺការនាំចេញទៅកាន់ប្រទេសចិន សហភាពអឺរ៉ុប និងឥណ្ឌូនេស៊ី៕