ដោយស៊ីវ ម៉េង

        ភ្នំពេញៈ នៅសល់ប៉ុន្មានថ្ងៃទៀតប៉ុណ្ណោះ យើងនឹងស្វាគមន៍ឆ្នាំ២០២១ទាំងអស់គ្នា ដែលគ្រប់គ្នាសង្ឃឹមថាអ្វីៗនឹងមានភាពល្អប្រសើរឡើង ខណៈឆ្នាំ២០២០បានធ្វើឲ្យមនុស្សទូទាំងពិភពលោករងការឈឺចាប់ បាត់បង់ញាតិមិត្ត ដែលមិនអាចវិលត្រលប់មកវិញ។

ប៉ុន្តែឆ្នាំ២០២១ បញ្ហាប្រឈមនៅតែកើតមានដដែល ទោះបីសេដ្ឋកិច្ចកម្ពុជានឹងងើបឡើងវិញក៏ដោយ ក៏ផ្នែកខ្លះនៃវិស័យអចលនទ្រព្យនៅតែប្រឈមបញ្ហានៅឡើយ។

ផ្សារទំនើបតូចៗ

        ដោយសារការប្រកួតប្រជែងខ្លាំង ទីផ្សារលក់រាយនៅតែបន្តប្រឈម ព្រោះកំនើនផ្សារសហគមន៍កើនឡើង ដែលនឹងធ្វើឲ្យផ្សារទំនើបតូចៗ ដែលគ្មានស្តង់ដាច្បាស់លាស់ នៅតែប្រឈមមុខនឹងបញ្ហា ក្នុងការទាក់ទាញអតិថិជន ខណៈរបាយការណ៍បានបង្ហាញថា ផ្សារទំនើបតូចៗប្រមាណ២០នឹងបើកដំណើរការនៅឆ្នាំ២០២១ខាងមុខនេះ។

ជាមួយនឹងកំនើនផ្សារទំនើប បានធ្វើឲ្យការប្រកួតប្រជែង ក្នុងទីផ្សារកាន់តែមានច្រើន បើទោះបីកំលាំងទិញកើនឡើងក៏ដោយ ប៉ុន្តែការរៀបចំស្តង់ដាតម្លៃ សេវាកម្ម និងការឌីសាញមិនសូវមានភាពទាក់ទាញ បានធ្វើឲ្យផ្នែកនេះនៅតែបន្តបញ្ហាប្រឈមសំរាប់ទីផ្សារនាពេលអនាគត។

ដីឡូត៍

        អ្នកជំនាញជាច្រើនបានទទួលស្គាល់ថា ទីផ្សារដីឡូត៍នឹងចាប់ផ្តើមប្រឈមមុខ នឹងកំនើននៃការលក់យឺត ដោយសារគំរោងបុរី លំនៅដ្ឋានកាន់តែច្រើនបាននិងកំពុងកើនឡើងនៅតំបន់ជាយក្រុង ដែលធ្វើឲ្យការលក់ដីឡូត៍តូចៗកាន់តែជួបការលំបាក ដោយសា​រការយល់ដឹងរបស់ប្រជាពលរដ្ឋប្រសើរជាងមុន ពិសេសលក្ខខ័ណ្ឌបង់ប្រាក់​ពីគំរោងលំនៅដ្ឋាន និងបុរីនានាមានភាពងាយស្រួល។

ប៉ុន្តែយ៉ាងណាដីឡូត៍បែបរីសត នឹងបន្តមានសញ្ញាល្អប្រសើរ ដោយសារប្រជាពលរដ្ឋកាន់តែមានជីវភាពល្អប្រសើរ ដែលពួកគេស្វែងរកកន្លែងលំហែរនៅតាមបណ្តាខេត្តកាន់តែច្រើន។

អាផាតម៉ិន

        ការជួលអាផាតម៉ិនបាន និងកំពុងដាំក្បាលចុះនៅឆ្នាំ២០២១នេះ និងបន្តអូសបន្លា​យដល់ឆ្នាំ២០២១ ដោយសារការកើនឡើងនូវការផ្គត់ផ្គង់អាផាតម៉ិន នៅតាមតំបន់នានានៃទីក្រុងភ្នំពេញ ដោយសារការមកដល់ នៃអ្នកវិនិយោគអន្តរជាតិមិនទាន់ខ្លាំង និងការប្រ​កួតប្រជែងបន្តកើនឡើងខ្ពស់។

អាផាតម៉ិន ក៏ប្រឈមមុខនឹងការប្រកួតប្រជែងពីខុនដូ ដែលកំពុងកើនឡើងយ៉ាងគំហុកនៅទីក្រុងភ្នំពេញផងដែរ ព្រោះអ្នកវិនិយោគខុនដូមួយចំនួនបានទិញទុកសំរាប់ជួលជាជាងទិញសំរាប់រស់នៅ។

ការិយាល័យ

        ទំហំការិយាល័យសរុបនៅទីក្រុងភ្នំពេញ បាននិងកំពុងកើនឡើងដល់ប្រមាណ៤៥ម៉ឺនម៉ែត្រការ៉េ នៅក្នុងទីផ្សារដែលទើបនឹងមានភាពរីកចម្រើននេះ ប៉ុន្តែកំនើននៃការផ្គត់ផ្គង់បាននិងកំពុងធ្វើឲ្យទីផ្សារនេះ កាន់តែមានភាពប្រកួតប្រជែង ខណៈលំហហូរវិនិយោគិនអន្តរជាតិ មិនត្រូវបានគេមើលឃើញថាកើនឡើងគំហុកខ្លាំង នៅឆ្នាំ២០២១នោះទេ។

ប៉ុន្តែអាគារការិយាល័យកម្រិតB, និងកម្រិតC ជាប្រភេទការិយាល័យនឹងងើបឡើងលឿនជាងគេ ហើយការិយាល័យបែបសហកម្មសិទ្ឋ នឹងមានសញ្ញាល្អប្រសើរផងដែរ។

សណ្ឋាគារ

        ឆ្នាំ២០២១ នៅតែជាឆ្នាំមិនទាន់មានសញ្ញាល្អខ្លាំង សំរាប់វិស័យទេសចរណ៍នៅឡើយទេ ហេតុនេះវិស័យបដិសណ្ឋារកិច្ចនៅតែបន្តរងផលប៉ះពាល់នៅឡើយ ស្របពេល​ដែលសណ្ឋាគារភាគច្រើននៅក្រុងសៀមរាបបិទទ្វារ។

សណ្ឋាគារតូចៗ ដែលគ្មានស្តង់ដាច្បាស់លាស់ អាចបន្តប្រឈមមុខនឹងផលវិបាក​រយៈពេលយូរ ខណៈដែលសណ្ឋាគារធំៗក៏ប្រឈមមុខនឹងបញ្ហាផងដែរ ដោយសារថ្លៃ​ប្រតិបត្តិការខ្ពស់ ខណៈកំនើនភ្ញៀវទេសចរណ៍ត្រូវរំពឹងថា នឹងកើនឡើងយឺតនាឆ្នាំខាងមុខនេះ។

ប៉ុន្តែអ្នកជំនាញជាច្រើនបានអះអាងថា នៅត្រីមាសទី២ឆ្នាំ២០២១ អ្វីៗនឹងមានភាពល្អប្រសើរឡើងវិញ ដោយសារវ៉ាក់សាំងបង្ការជំងឺកូវីដ នឹងត្រូវចែកចាយនៅទូទាំងពិភពលោក៕

ដោយ ៖ រ៉ាណេត
ពោធិ៍សាត់ ៖ រដ្ឋបាលខេត្តពោធិ៍សាត់បានសម្រេចធ្វើការអភិវឌ្ឍ និងសាងសង់សំណង់រដ្ឋបាលប្រមូលផ្តុំគំរូនៅលើផ្ទៃដីសរុបទំហំប្រមាណ៧០ហិកតា ដើម្បីឱ្យមានសោភ័ណភាពប្រចាំតំបន់ និងសម្រាប់ជាទីផ្តល់សេវាសាធារណៈជូនប្រជាពលរដ្ឋ។

អភិបាលខេត្តពោធិ៍សាត់ លោក ម៉ៅ ធនិន បានមានប្រសាសន៍ឱ្យដឹងនៅថ្ងៃទី១៧ ខែធ្នូ ឆ្នាំ២០២០ថា គម្រោងសាងសង់រដ្ឋបាលប្រមូលផ្តុំរបស់ស្រុកតាលោសែនជ័យ និងស្រុកភ្នំក្រវាញ នឹងក្លាយជារដ្ឋបាលគំរូដ៏ល្អមួយ ដែលមានភាពទាក់ទាញ និងស្រស់ស្អាត ស័ក្ដិសមជាទីកន្លែងផ្តល់សេវាសាធារណៈជូនប្រជាពលរដ្ឋ។

លោកបានបន្តថា សំណង់អគាររដ្ឋបាលប្រមូលផ្តុំនេះនឹងបម្រើសេវានៅក្នុងស្រុកតាលោសែនជ័យ និងស្រុកភ្នំក្រវាញ លើផ្ទៃដីបម្រុងទុករបស់រដ្ឋប្រមាណជាង៧០ហិកតា ក្នុងភូមិសាស្ត្រឃុំផ្ទះរុង ស្រុកតាលោសែនជ័យ និងស្រុកភ្នំក្រវាញ ជាប់ផ្លូវជាតិលេខ៥៥ ស្ថិតក្នុងភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។

លោក ម៉ៅ ធនិន បានឱ្យដឹងថា ការរៀបចំរដ្ឋបាលប្រមូលផ្តុំ របស់សាលាស្រុកតាលោសែនជ័យ និងសាលាស្រុកភ្នំក្រវាញនេះឡើង គឺជាគំរូមួយដ៏ល្អ សម្រាប់បណ្តាស្រុកដទៃទៀត ក្នុងការបម្រើសេវាសាធារណៈ ជូនដល់ប្រជាពលរដ្ឋ ឱ្យមានភាពងាយស្រួល និងកាត់បន្ថយនូវពេលវេលាក្នុងការមកទំនាក់ទំនង ជាពិសេសក៏ជាកន្លែងប្រមូលផ្តុំគ្រប់ស្ថាប័នអង្គភាព ចំណុះឱ្យរដ្ឋបាលស្រុកផងដែរ។

ទីតាំងរដ្ឋបាលប្រមូលផ្តុំរបស់សាលាស្រុកតាលោសែនជ័យ ដែលត្រូវសាងសង់នៅលើផ្ទៃដីបម្រុងទុករបស់រដ្ឋ ប្រមាណជាង៧០ហិកតា រួមមានរចនាសម្ព័ន្ធរូបវ័ន្ត ដែលសាងសង់ឡើងឱ្យមើលពីលើឃើញថា ក្នុងសម័យតេជោសែន ក្នុងនោះមានអគាររដ្ឋបាល មានការិយាល័យនានាជុំវិញស្រុក មានពហុកីឡាដ្ឋាន សម្រាប់ច្រតព្រះនង្គ័ល មានកន្លែងប្រណាំងគោក្របី មានប្រព័ន្ធធារាស្ត្រ សម្រាប់កម្រិតនៃការអុំទូកថ្នាក់ខេត្ត ៕

ដោយ៖ វុទ្ធី

អន្តរជាតិ៖ សារព័ត៌មាន New York Times បានរាយការណ៍កាលពីថ្ងៃពុធថា ទោះបីជាការដាក់ពន្ធរបស់រដ្ឋបាល Trump លើទំនិញចិន និងវិបត្តិជំងឺកូវីដ១៩ ក៏ដោយ ក៏ការនាំចូលរបស់សហរដ្ឋអាមេរិកពីប្រទេសចិន កំពុងកើនឡើង ខណៈឆ្នាំ២០២០ ខិតជិតនឹងបញ្ចប់។

បើតាមរបាយការណ៍ បានឱ្យដឹងថា ការកើនឡើងនៃការនាំចូលមានផលិតផលជាច្រើន ដោយជនជាតិអាមេរិកអាចចំណាយលើការកំសាន្ត ភាពយន្ត អាហារ របស់របរប្រើប្រាស់ក្នុងផ្ទះ ដូចជាភ្លើងសម្រាប់ការិយាល័យ និងផ្ទះ ឧបករណ៍ហាត់ប្រាណ និងប្រដាប់ប្រដាក្មេងលេង ដើម្បីឱ្យកូនៗលេងកំសាន្តនៅផ្ទះ។

ទិន្នន័យពាណិជ្ជកម្មក្នុងរយៈពេល ១០ខែដំបូង ឆ្នាំនេះ ដែលត្រូវបានប្រមូលពីទិន្នន័យគយសហរដ្ឋអាមេរិកដោយក្រុមហ៊ុន IHS Markit បង្ហាញថា ការនាំចូលមានដូចជាគ្រឿងអេឡិចត្រូនិក ម៉ាស និងឧបករណ៍ការពារផ្ទាល់ខ្លួនដទៃទៀតពីប្រទេសចិន ដែលមានសន្ទុះខ្លាំង នៅពេលមានការរីករាលខ្លាំង។
នៅក្នុងខែវិច្ឆិកា ការនាំចេញរបស់ចិនទៅកាន់សហរដ្ឋអាមេរិក បានកើនឡើង ៤៦,១ ភាគរយ ក្នុងទំហំទឹកប្រាក់ ៥១,៩៨ ពាន់លានដុល្លារអាមេរិក។
ការកើនឡើងនៃការនាំចូលរបស់សហរដ្ឋអាមេរិកពីប្រទេសចិន ផ្ទុយពីការរំពឹងទុករបស់អ្នកនយោបាយអាមេរិកនៃគណបក្សទាំងពីរ ដែលកាលពីដើមឆ្នាំនេះ បានព្យាករណ៍ថា ជំងឺរាតត្បាតនឹងក្លាយជាពេលវេលាសម្រាប់ការកាត់បន្ថយពាណិជ្ជកម្មជាមួយប្រទេសចិន ហើយទីបំផុតនឹងនាំរោងចក្រត្រឡប់ទៅកាន់សហរដ្ឋអាមេរិកវិញ។
របាយការណ៍បានរកឃើញថា “មានសញ្ញាតិចតួចណាស់ ដែលសង្វាក់ផ្គត់ផ្គង់សកល នឹងវិលត្រឡប់មកសហរដ្ឋអាមេរិកវិញ” ទោះបីជារដ្ឋបាលរបស់លោក Trump ដាក់ពន្ធលើការនាំចូលរបស់ចិន ដែលមានតម្លៃជាង ៣៦០ពាន់លានដុល្លារក៏ដោយ។ ផ្ទុយទៅវិញផលប៉ះពាល់ ដែលបានអូសបន្លាយពេលនៃជំងឺរាតត្បាតលើសហរដ្ឋអាមេរិក ហាក់ដូចជាបានផ្ដល់ផលវិជ្ជមានឱ្យចិនទៅវិញ។

សារព័ត៌មាន The New York Times បានដកស្រង់សម្តី Mary E. Lovely សមាជិកជាន់ខ្ពស់នៅវិទ្យាស្ថាន Peterson សម្រាប់សេដ្ឋកិច្ចអន្តរជាតិថា “សរុបមកវិញ ការស្ទុះងើបឡើងវិញនៃសេដ្ឋកិច្ចយ៉ាងឆាប់រហ័សរបស់ប្រទេសចិន និងផលិតផលរបស់ដែលជនជាតិអាមេរិកចង់បាន កំឡុងពេលមានរោគរាតត្បាត មានផលប៉ះពាល់លើគោលនយោបាយពន្ធគយរបស់លោក Trump៕

ដោយៈ ប៊ី

ភ្នំពេញៈ ធនាគារពិភពលោក​បាន​ផ្តល់​អនុសាសន៍ ឲ្យ​រដ្ឋាភិបាល​កម្ពុជា​ត្រូវការ​ជា​ចាំបាច់ ក្នុង​ការជំរុញ​លើកទឹកចិត្ត​ដល់​ការវិនិយោគ ក្នុងស្រុក និង​ពី​បរទេស​ឱ្យ​ទាញយក​ផលចំណេញ ពី​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​និង​ក្នុង​តំបន់ ដែល​ត្រូវបាន​បង្កើតឡើង​កាលពីពេលថ្មីៗនេះ ដើម្បីឱ្យ​ឆាប់​រើខ្លួន​ចេញពី​វិបត្តិ​ជំងឺ​កូ​វីដ១៩ ។ នេះ​បើ​យោងតាម​ការ​អនុសាសន៍​របស់​ធនាគា​រ​ពិភពលោក (World Bank) កាលពី​ម្សិលមិញ។

លោកស្រី​អ៊ីង​ហ្គូ​ណា ដូ​ប្រា​ចា នាយិកា​ប្រចាំ​ប្រទេស​កម្ពុជា របស់​ធនាគារពិភពលោក មានប្រសាសន៍ថា “ឆ្ពោះទៅ​ពេលខាងមុខ ជាការ​ចាំបាច់​ដែល​ត្រូវ​ជំរុញ​លើកទឹកចិត្ត​ដល់​ការវិនិយោគ​ក្នុងស្រុក និង​ពី​បរទេស ឱ្យ​ទាញយក​ផលចំណេញ​ពី​កិច្ចព្រមព្រៀង​ពាណិជ្ជកម្ម​សេរី​ទ្វេភាគី និង​ក្នុង​តំបន់​ដែល​ត្រូវបាន​បង្កើតឡើង​កាលពីពេលថ្មីៗនេះ” ។

លោកស្រី​បន្តទៀតថា “លទ្ធភាព​នេះ​អាចធ្វើ​ទៅរួច តាមរយៈ​ការដាក់ចេញ​ឱ្យបាន​ឆាប់រហ័ស​នូវ​ច្បាប់ វិនិយោគ​មាន​ភាព​ប្រកួតប្រជែង និង​ប្រការ​លើកទឹកចិត្ត​នានា​ដល់​ការវិនិយោគ អមដោយ​វិធានការ​ទាំងឡាយ សំដៅ​បង្ក​ភាពងាយស្រួល​ដល់​ការធ្វើ​អាជីវកម្ម ផងដែរ” ។

ក្នុង​គោលបំណង​ជួយ​សេដ្ឋកិច្ចកម្ពុជា ឱ្យ​ឆាប់​រើខ្លួន​ចេញពី​ការ​រាតត្បាត​ជំងឺ​នេះ ជា​អនុសាសន៍ របាយការណ៍​របស់ World Bank បាន​ស្នើឱ្យ​បង្កើន​ការវិនិយោគ​សាធារណៈ​ស​ម្រា​ប់​ជួយ​ដល់​ជន​ក្រី​ក្រី និង​សម្រាប់​ជំរុញ​កំណើន រួមមាន​ទាំង​កម្មវិធី​បង្កើត​ការងារ​ជា​ថ្នូរ​យកប្រាក់​កម្រៃ​ប្រចាំថ្ងៃ (cash-for-work projects) ទន្ទឹមគ្នានេះ លើកកម្ពស់​វិស័យ​អតិពលកម្ម​នានា ដើម្បី​បង្កើត​ការងារ​ក្នុងឱកាស ដែល​មានការ​ងើបឡើង​ឆាប់រហ័ស​នៃ​តម្រូវការ​ទំនិញប្រើប្រាស់​ក្នុងស្រុក។

របាយការណ៍​ក៏បាន​លើកឡើង​ដែរ នូវ​ឱកាស​នានា​សម្រាប់​សម្រួល​ការពង្រីក ការវិនិយោគ​ក្នុងស្រុក និង​ពី​បរទេស ដោយ​ផ្អែកលើ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី និង​ក្នុង​តំបន់​ក្នុងពេលថ្មីៗនេះ រួមមាន កិច្ចព្រមព្រៀង​ពាណិជ្ជកម្ម​សេរី​រវាង​កម្ពុជា និង​ចិន និង កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​តំបន់ (RCEP)។

របាយការណ៍​នេះ បានចង្អុលបង្ហាញ​ដែរ អំពី​សារៈសំខាន់​ចាំបាច់​បំផុត​នៃ​ការរៀបចំ​បង្កើន​ឱ្យមាន​ហេដ្ឋារចនាសម្ព័ន្ធ​រឹងមាំ​មួយ សម្រាប់​វ៉ាក់សាំង​កូ​វី​ឌ១៩ ក៏ដូចជា​ការតាមដាន​ឱ្យបាន​ដិតដល់​ផងដែរ នូវ​ភាព​ងាយ​រងគ្រោះ​ផ្នែក​សេដ្ឋកិច្ច ដែល​អាច​បង្កដោយ​កំណើន​អូសបន្លាយ​យូរពេក របស់​វិស័យ​សំណង់ និង​អចលនទ្រព្យ។

ការស្ទង់មតិ​តាម​ទូរស័ព្ទ ដែល​ធនាគារពិភពលោក​បានធ្វើ​ពីរដង ក្នុង​រយៈពេល​កន្លងទៅ​បានឱ្យដឹងថា ចំនួន​អ្នកផ្តល់​ចម្លើយ ដែល​កំពុងធ្វើការ​ក្នុងពេល​ស្ទង់​មតិ មានការ​ធ្លាក់ចុះ​ពី៨២ភាគរយ នៅពេល​មានការ​ផ្ទុះ​ជំងឺ​កូ​វីដ១៩ដំបូង មក​នៅត្រឹម៧១ភាគ​ក្នុង​ខែឧសភា ឆ្នាំ២០២០ ហើយ​តួលេខ​នេះ ហាក់ដូចជា​នៅ​ដដែល​ក្នុង​ខែសីហា ឆ្នាំ២០២០ ។

ការ​រាតត្បាត​ជំងឺ​នេះ នៅតែ​បន្ត​ជះ​ផល​អវិជ្ជមាន ទៅលើ​សកម្មភាព​ធុរកិច្ច ដែល​មិនមែនជា​ការដាំដុះ ប៉ុន្តែ​ក្នុង​សភាព​មួយ​ដែល​មិនសូវ​ធ្ងន់ធ្ងរ​ណាស់ណា​ទេ បើ​ប្រៀបធៀប​ទៅនឹង​ពេលដែល​វិបត្តិ​នេះ​បាន​ផ្ទុះឡើងភ្លាម។

ការបាត់បង់​ចំណូល នៅតែមាន​ទំហំធំធេង​នៅឡើយ បើទោះជា​ការធ្លាក់ចុះ​ចំណូល​គ្រួសារ​ថយ​ល្បឿន​បន្តិច​វិញ ក្រោយពី​រដ្ឋាភិបាល​បាន​ដាក់ចេញ​កម្មវិធី​ថ្មី​មួយ សម្រាប់​ផ្ទេរ​សាច់ប្រាក់​ទៅ​ជួយ​គ្រួសារ​ក្រីក្រ និង​ងាយ​រងគ្រោះ។ ការស្ទង់មតិ​ទាំងនោះ​បង្ហាញថា ជិត៩០ភាគរយ​នៃ​ក្រុមគ្រួសារ ដែល​ត្រូវ​បានកំណត់​អត្តសញ្ញាណ​ថា ជា​អ្នក​ក្រក្រី ដែល​ពួកគេ​បាន​រាយការណ៍​ថា បានទទួល​ប្រាក់​សង្គ្រោះ​នៅក្នុង​ខែសីហា និង​កញ្ញា។

របាយការណ៍​នេះ មាន​ជំពូក​ពិ​សេសមួយ​ផ្តោតទៅលើ ការស្ទង់មតិ​លើ​សកម្មភាព​ធុរកិច្ច​កម្ពុជា (Cambodia Business Pulse Surveys/BPS) ដែល​ត្រូវបាន​ធ្វើឡើង​សម្រាប់​ស្វែងយល់​អំពី ផលប៉ះពាល់​របស់​កូ​វីដ១៩ទៅលើ​ធុរកិច្ច។ ការស្ទង់មតិ​លើ​សកម្មភាព​ធុរកិច្ច​នេះ ត្រូវបានធ្វើ​ជាមួយ​ក្រុម​ហ៊ុន​ជាង៥០០ក្រុមហ៊ុន ដែល​បានចាប់ផ្តើម​ពី​ខែមិថុនា​ដល់​ខែកញ្ញា ហើយ​លទ្ធផល​បង្ហាញថា អាជីវកម្ម​ជាច្រើន​បាន​បើកទ្វារ​ឡើងវិញ​ហើយ​តាំងពី​ខែមិថុនា​មក។

យ៉ាងណាក្តី ការលក់​នៅមានកម្រិត​ទាប​ខ្លាំង ពិសេស​សម្រាប់​អាជីវកម្ម​ខ្នាត​មីក្រូ តូច និង​មធ្យម និង​សម្រាប់​បណ្តា​ក្រុមហ៊ុន​ជាច្រើន​នៅ​ខេត្តសៀមរាប៕