រដ្ឋាភិបាល៖ កែលំអរក្រុងសៀមរាបជាមួយប្លង់គោលអភិវឌ្ឍន៍ថ្មី ដើម្បីសោភ័ណភាពនិងទាក់ទាញការវិនិយោគ

ដោយវុត្ថា

ភ្នំពេញៈ ក្រសួងរៀបចដែនដី នគរូបនីយកម្ម និងសំណង់ បានចាប់ផ្តើមកែលម្អប្លង់គោលប្រើប្រាស់ដីនៅក្នុងក្រុងសៀមរាប បន្ទាប់មានគម្រោងសាងសង់ផ្លូវចំនួន៣៨ខ្សែ ដែលត្រូវបានបើករដ្ឋានកាលពីពេលថ្មីៗនេះ ដោយសម្តេចតេជោ ហ៊ុន សែននាយករដ្ឋមន្ត្រីនៃកម្ពុជា។

លោកគង់ វិមាន អ្នកនាំពាក្យក្រសួងសាធារណការ និងដឹកជញ្ជូន បានប្រាប់ឱ្យដឹកាលពីថ្ងៃទី១៤ ខែធ្នូកន្លងមកនេះថា អន្តរក្រសួងបានបង្កើតក្រុមការងារចម្រុះចំនួន៩ ក្រុម ដោយក្នុងនោះមាន១ក្រុម មកពីក្រសួងរៀបចំដែននគរូបនីយកម្ម និងសំណង់ ក្នុងការរៀបចំពាក់ព័ន្ធនឹងសូរិយោដីនៅក្នុងក្រុង និងការកែលម្អប្លង់គោល។

លោកបន្តថា “ក្រុមមួយនេះ មានតួនាទីក្នុងការរៀបចំប្លង់គោល ទីក្រុងសៀមរាបទាំងមូល ដែលដឹកនាំដោយលោកលី រស្មី ជាអ្នកដឹកនាំធ្វើកិច្ចការនេះ ក្រៅពីនេះ៨ក្រុមទៀត ជាតួនាទីរបស់ក្រសួងសាធារណការ ចុះត្រួតពិនិត្យគម្រោងស្ថាបនាផ្លូវទាំងអស់” ។លោកថ្លែងថា “ជាធម្មតាទេ នៅពេលដែលមានការអភិវឌ្ឍន៍ហេដ្ឋារចនាសម្ព័ន្ធ វាមានការប្រែប្រួល អ៊ីចឹងទេ ក្រសួងត្រូវតែពិនិត្យមើល ក្នុងកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ជាពិសេសប្លង់គោល ក្រែងលោយើងធ្វើទៅ មានផលប៉ះពាល់ យើងត្រូវតែធ្វើអឺងចឹង ហើយការរៀបំកែលម្អក្រុងក្រសួងមានតួនាទីជាអ្នកចាត់ចែង” ។

គម្រោងកែលម្អហេដ្ឋារចនាសម្ព័ន្ធផ្លូវក្នុងទីក្រុងសៀមរាប ខេត្តសៀមរាបចំនួន៣៨ ខ្សែនេះ មានប្រវែងសរុប១០៨,៧៤ គីឡូម៉ែត្រ គ្រោងប្រើប្រាស់ថវិកាជាតិសរុបប្រមាណជាង១៤០លានដុល្លារអាមេរិក និងថវិកាប្រមាណជាង៩លានដុល្លារអាមេរិកទៀត សម្រាប់ការងារចាំបាច់ក្នុងការរៀបចំស្ថាបនា ប្រព័ន្ធបង្ហូរទឹកភ្លៀង និងទឹកកខ្វក់ដែលនៅក្រៅគម្រោង។

គម្រោងសាងសង់ខ្សែផ្លូវទាំង៣៨នេះ នឹងប្រើប្រាស់រយៈពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១ ត្រូវបានសម្ពោធបើកការដ្ឋានសាងសង់ កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលថ្មីៗកន្លងទៅនេះ៕

ចំណេះដឹងផ្នែកដីធ្លី! តើការធ្វើចំណាត់ថ្នាក់ដីរដ្ឋឡើងវិញមានប៉ុន្មានប្រភេទ?

ដោយ វុត្ថា

ភ្នំពេញៈ ការធ្វើចំណាត់ថ្នាក់ដីរឡើងវិញ មានន័យថាការប្តូរឋានៈដីរបស់រដ្ឋ ក្រោយពីធ្វើការចុះបញ្ជី និងការធ្វើចំណាត់ថ្នាក់លើកដំបូង។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់ស្តីពី គោនយោបាយស្តីពី ការគ្រប់គ្រងដីរដ្ឋបានឱ្យដឹងថា ការធ្វើចំណាត់ថ្នាក់ដីរដ្ឋឡើងវិញ មានបីប្រភេទដូចជា ទី១ ការធ្វើចំណាត់ថ្នាក់ទ្រព្យសាធារណៈរបស់រដ្ឋ ទៅជាទ្រព្យឯកជនរបស់រដ្ឋ ទី២ ការធ្វើចំណាត់ថ្នាក់ទ្រព្យសាធារណៈរបស់រដ្ឋ ពីការប្រើប្រាស់ជាប្រយោជន៍សាធារណៈមួយ ទៅជាប្រភេទបំរើប្រយោជន៍សាធារណៈមួយផ្សេងទៀត និងទី៣ ការធ្វើចំណាត់ថ្នាក់ព្រទ្យឯកជនរបស់រដ្ឋ ទៅជាទ្រព្យសាធារណៈរបស់រដ្ឋ។

ឯកសារដដែលបន្តថា ការធ្វើចំណាត់ថ្នាក់ដីរដ្ឋឡើងវិញ ត្រូវបានធ្វើឡើងតាមរយៈសំណើរជាលាយល័ក្ខអក្សរ ពីនិតិបុគ្គលសាធារណៈណាមួយ ទៅគណៈកម្មាធិការប្រើប្រាស់ និងបែងចែកដីថ្នាក់ខេត្តក្រុង។

សំណើរនេះត្រូវប្រកាស ឬបរិយាយអំពីទីតាំង ដែលស្នើសុំធ្វើចំណាត់ថ្នាក់ឡើងវិញ ពាក្យស្នើសុំធ្វើចំណាត់ថ្នាក់ឡើងវិញ និងហេតុផលនៃការស្នើសុំធ្វើចំណាត់ថ្នាក់ឡើងវិញ។

គណៈកម្មាធិការប្រើប្រាស់ និងបែងចែកដីខេត្តក្រុង នឹងតំរូវឱ្យស្ថាប័នបច្ចេកទេសជំនាញ (ចំរុះមន្ទីរ) ធ្វើការពិនិត្យឡើងវិញ នូវសំណើដែស្នើឡើងក្នុងរយៈពេល៤៥ថ្ងៃ។

ការពិនិត្យឡើងវិញជាលាយល័ក្ខណ៍អក្សរ ត្រូវពន្យល់ពីវិធីសាស្ត្រ ដែលបានប្រើប្រាស់ក្នុងការត្រួតពិនិត្យ ហើយដែលវិធីសាស្ត្រនេះ ត្រូវរាប់បញ្ចូលទាំងព័ត៌មានដែលបានទទួលពីភាគីស្នើសុំ ទាំងលទ្ធផលរកឃើញក្នុងការត្រួតពិនិត្យ និងអនុសាសន៍របស់ស្ថាប័នបច្ចេកទេសជំនាញពាក់ព័ន្ធ ទៅនឹងសំណើសុំធ្វើចំណាច់ថ្នាក់ឡើងវិញនេះ។

ការពិនិត្យឡើងវិញនេះ ត្រូវបញ្ចប់ក្នុងរយៈពេល៦០ថ្ងៃ គិតពីថ្ងៃចាប់ផ្តើមត្រួតពិនិ ត្យ លើកលែងតែមានការស្នើសុំពន្យាពេលបន្ថែមពីអ្នកត្រួតពិនិត្យ ដោយមានហេតុផលជាក់លាក់។ បន្ទាប់មកគណៈកម្មាធិការប្រើប្រាស់ និងបែងចែកដីខេត្តក្រុង នឹងធ្វើការសំរេចជាលាយលក្ខណ៍អក្សរ លើការធ្វើចំណាត់ថ្នាក់ឡើងវិញនេះ (យល់ព្រម ឬ បដិសេធ ឬ កែសម្រួល) ក្នុងរយៈពេល៦០ថ្ងៃ គិតចាប់ថ្ងៃទទួបានលទ្ធផលនៃការត្រួតពិនិត្យ។

ការកំណត់របស់គណៈកម្មាធិការប្រើប្រាស់ និងបែងចែកដីថ្នាក់ខេត្តក្រុង នឹងត្រូវស្នើសុំការសំរេចជាផ្លូវការ ពីក្រុងប្រឹក្សាគោលនយោបាយដីធ្លី តាមរយៈអគ្គលេខាធិការដ្ឋាននៃក្រុមប្រឹក្សាគោលនយោបាយដីធ្លី។

ការធ្វើចំណាច់ថ្នាក់ដីរដ្ឋឡើងវិញនេះ នឹងត្រូវបញ្ចូលទៅក្នុងផែនទី ឬប្រព័ន្ធទិន្ន័យដីរដ្ឋ ហើយសេចក្តីសម្រេចជាលាយលក្ខណ៍អក្សរត្រូវរក្សាទុកជាឯកសារ៕

ខុនដូៈការរស់នៅលអាគារសហកម្មសិទ្ឋ បញ្ហាប្រឈមនៃប្រព័ន្ធសុវត្ថិភាពអគ្គីភ័យ ត្រូវបានគិតដូចម្តេច?

ដោយៈ រ៉ាណេត

ភ្នំពេញៈ ប្រព័ន្ធសុវត្ថិភាព និងគុណភាពសំណង់អគារខ្ពស់ៗនានា ជាបញ្ហាសំខាន់បំផុត ដែលត្រូវបានយកចិត្តទុកដាក់ពីសំណាក់រាជរដ្ឋាភិបាលកម្ពុជា និងស្ថិតនៅក្រោមការឃ្លាំមើលរបស់ក្រសួងរៀបចំដែនដី នគរូបនីយកម្ម និងសំណង់។

ដោយឡែកសម្រាប់តែប្រព័ន្ធសុវត្ថិភាព ផ្នែកអគ្គីភ័យ ដែលអាចកើតមានជាយថាហេតុ ក៏ជាចំណុចសំខាន់ដែលត្រូវបង្កើនការយកចិត្តទុកដាក់ផងដែរ។

អគ្គនាយកក្រុមហ៊ុនភ្នាក់អចលនទ្រព្យអន្តរជាតិ ERA Cambodia លោកខន គង្គារ បានមានប្រសាសន៍តាមទូរស័ព្ទ នៅល្ងាចថ្ងៃទី១៤ ខែធ្នូ ឆ្នាំ២០២០នេះថា គ្រប់វត្តមាននៃសំណង់អគារខ្ពស់ៗ នៅពេលបច្ចុប្បន្នសុទ្ធតែមានការឃ្លាំមើល ពីសំណាក់មន្ត្រីជំនាញរបស់ក្រសួងរៀបចំដែនដី នគរូបនីយកម្ម និងសំណង់ ដើម្បីឱ្យប្រាកដថា អនុវត្តន៍លើការពង្រឹងគុណភាព ប្រព័ន្ធសុវត្ថិភាពដែលត្រូវបានកំណត់ដោយច្បាប់។

លោកបានបញ្ជាក់ថា “សម្រាប់អគារខ្ពស់ៗដូចជាអគារអាផាតម៉ិន ជាពិសេសសំណង់ខុនដូនៅកម្ពុជានាពេលបច្ចុប្បន្ន គឺមានការយកចិត្តទុកដាក់ខ្ពស់ទាំងគុណភាព ទាំងប្រព័ន្ធសុវត្ថិភាព”។ លោកបន្តថា “ប្រព័ន្ធការពារសុវត្ថិភាព ពេលមានគ្រោះអគ្គីភ័យនៅក្នុងអគារ នៅកម្ពុជាអ្នកសាងសង់គឺមានគ្រប់គ្រងទៅតាមបច្ចេកទេស ព្រោះបើខុសពីបច្ចេកទេស ដែលត្រូវបានកំណត់ដោយច្បាប់ ក៏រដ្ឋាភិបាលមិនអនុញ្ញាតឱ្យសាងសង់នោះដែរ”។

លោកខន គង្គារ បានបញ្ជាក់ទៀតថា “ប្រព័ន្ធសុវត្ថិភាពចំពោះគ្រោះអគ្គីភ័យ គឺអ្នកបច្ចេកទេសមានការរៀបចំប្រព័ន្ធ ដូចជា នៅគ្រប់ជាន់ទាំងអស់សុទ្ធ តែមានដាក់បំពង់ពន្លត់អគ្គីភ័យក្នុងកម្រិតបឋម មានបំពាក់កាំមេរ៉ាសុវត្ថិភាពនៅតាមជាន់នីមួយ និងច្រកចេញចូលរួម ដែលត្រូវបានឃ្លាំមើលដោយសន្តិសុខ២៤ម៉ោង។

ជាមួយគ្នានេះ ក៏មានការរៀបចំជាប្រព័ន្ធទឹកបាញ់ពន្លត់ភ្លើង ដោយស្វ័យប្រវត្តិ មានឧបករណ៍បន្លឺសំឡេងអាសន្ន មានទីធ្លាសម្រាប់សង្គ្រោះ មានជណ្ដើរជើងពេលមានអាសន្ន ហើយក៏មានជណ្ដើរយន្តសុវត្ថិភាពបញ្ចៀសគ្រោះថ្នាក់ផងដែរ។ ដូច្នេះប្រព័ន្ធការពារសុវត្ថិភាពនៅតាមអគារខុនដូគឺមានខ្ពស់”។

ជាមួយគ្នានេះ លោកសាស្ត្រាចារ្យទួស សាភឿន អគ្គលេខាធិការរងនៃគណៈស្ថាបត្យករកម្ពុជា បានមានប្រសាសន៍ថា ច្រកសុវត្ថិភាពពេលមានគ្រោះអគ្គីភ័យ ក្រៅពីសំដៅលើប្រព័ន្ធបាញ់ទឹកដោយស្វ័យប្រវត្តិ ដែលត្រូវបានបំពាក់នៅក្នុងតួអគារ គឺគេត្រូវយកចិត្តទុកដាក់ទៅលើ២ចំណុចទៀត គឺច្រកជណ្ដើរថ្មើរជើងសុវត្ថិភាព និងច្រកជណ្ដើរយន្តសុវត្ថិភាព។

លោកបានបញ្ជាក់ថា “សម្រាប់ច្រកជណ្ដើរយន្តសុវត្ថិភាព គេធ្វើឡើងជាមួយប្រព័ន្ធអគ្គិសនីពិសេស (ប្រភពថាមពលអគ្គិសនីទី២) ដើម្បីជំនួសប្រព័ន្ធអគ្គិសនីក្នុងតួអគារដែលត្រូវបានកាត់ផ្ដាច់ដោយស្វ័យប្រវត្តិ។

លោកបន្តទៀតថា “ធម្មតានៅពេលដែលមានបញ្ហាអគ្គីភ័យកើតឡើង ប្រព័ន្ធបញ្ជាអគ្គិសនី ក្នុងតួអគារទាំងមូល នឹងត្រូវបានកាត់ផ្តាច់ដោយស្វ័យប្រវត្តិភ្លាមៗ ហើយជំនួសដោយបណ្តាញអគ្គិសនីបម្រុងពិសេស ដែលស្ថិតនៅក្រៅតួអគារ ដើម្បីបន្តសកម្មភាពរបស់ជណ្ដើរយន្តសុវត្ថិភាពឱ្យដំណើរការ”។

លោកទួស សាភឿនបានបន្តទៀតថា ភាគច្រើនប្រព័ន្ធបញ្ជាអគ្គិសនី ជំនួសបែបនេះ ហាក់មិនត្រូវបានប្រើនៅតាមអគារនានា ក្នុងប្រទេសកម្ពុជានោះទេ ដោយហេតុថា ប្រភពនៃបណ្តាញអគ្គិសនីហាក់នៅឆ្ងាយពីគ្នា ហើយផ្តល់ភាពស្មុគស្មាញច្រើនដល់អ្នកសាងសង់គម្រោង ប៉ុន្តែបើនៅតាមបណ្តាប្រទេសជិតខាង គឺគេមានប្រើគ្រប់គ្រាន់។

យ៉ាងណាក៏ដោយ លោកបានបង្ហាញពីក្ដីរំពឹងថា នៅថ្ងៃអនាគតខាងមុខនេះ គ្រប់វត្តមាននៃសំណង់អគារខ្ពស់ៗទាំងអស់នៅកម្ពុជា នឹងមានប្រើប្រាស់បច្ចេកទេសទាំងនេះ នៅពេលដែលថាមពលអគ្គិសនីកម្ពុជា មានការផ្គត់ផ្គង់គ្រប់គ្រាន់ ហើយការកំណត់ពីគុណភាពស្ដង់ដាសំណង់ ត្រូវបានអនុវត្តប្រកបដោយប្រសិទ្ធភាពខ្ពស់៕

ក្រុមហ៊ុនជប៉ុនធំៗចាប់ផ្ដើមមានទំនុកចិត្តឡើងវិញក្រោយធ្លាក់ចុះដោយសារ វីរុសកូវីដ-១៩

សុខុម

តូក្យូ: ការស្ទាបស្ទង់ដ៏សំខាន់មួយ បានបង្ហាញកាលពីថ្ងៃច័ន្ទទី១៤ ធ្នូថា ពេលនេះក្រុមហ៊ុនជប៉ុនធំៗ បានចាប់ផ្ដើមមានទំនុកចិត្តឡើងវិញកាន់តែខ្លាំង បន្ទាប់ពីធ្លាក់ចុះដោ យសារ ការឆ្លងរាតត្បាតវីរុសផ្លូវដង្ហើមប្រភេទថ្មីដ៏កាចសាហាវកូវីដ-១៩ ដែលឈានដល់កម្រិតអាក្រក់បំផុត ចាប់តាំងពីមានវិបត្តិហិរញ្ញវត្ថុសកលលោក។ នេះបើយោងតាមសារព័ត៌មាន CNA ចុះផ្សាយក្នុងថ្ងៃដដែល។

ការស្ទាបស្ទង់ពាណិជ្ជកម្មសម្រាប់ខែធ្នូ ដោយធនាគារជប៉ុន Bank of Japan ដែលបានស្ទង់មតិក្រុមហ៊ុនប្រមាណ១០.០០០ បានបង្ហាញពីរង្វាស់ដក១០ ក្នុងចំណោមរោងចក្រធំៗ ក្រោយការកត់ត្រារង្វាស់ដក២៧នៅក្នុងការស្ទាបស្ទង់លើកមុន និងរង្វាស់ដក ៣៤ នៅក្នុងការស្ទង់មតិខែមិថុនា។ តួលេខចុងក្រោយនេះបានប្រៀបធៀបជាមួយនឹងការស្ទង់មតិក្នុងទីផ្សារ ដែលមានរង្វាស់ដក ១៥។

តួលេខប្រចាំខែមិថុនា ជាតួលេខទាបបំផុតចាប់តាំងខែមិថុនា ឆ្នាំ២០០៩ ជាពេលដែលវិបត្តិហិរញ្ញវត្ថុពិភពលោក វាយប្រហារយ៉ាងធ្ងន់ធ្ងរ ទៅលើសេដ្ឋកិច្ចធំបំផុតទី៣ រប ស់ពិភពលោកមួយនេះ។

ការស្ទង់មតិពាណិជ្ជកម្មរយៈពេលខ្លីនេះ បង្ហាញពីភាពខុសគ្នារវាងភាគរយ នៃក្រុមហ៊ុន ដែលមានគំនិតវិជ្ជមាន និងក្រុមហ៊ុនដែលមើលឃើញស្ថានភាពថា មិនអំណោយផល។

លទ្ធផលរង្វាស់ស្ទង់មតិចុងក្រោយនេះទទួលបាន បន្ទាប់ពីរដ្ឋាភិបាលជប៉ុន កាលពីសប្តាហ៍មុនបានអនុម័តទម្លាក់កញ្ចប់ថវិកាថ្មី ដើម្បីស្ដារសេដ្ឋកិច្ចក្នុងទំហំទឹកប្រាក់ជាង ៧០០ពាន់លានដុល្លារអាមេរិក ដើម្បីជួយដល់គម្រោងនានារាប់ចាប់ ពីវិធានការប្រយុទ្ធប្រឆាំងវីរុសកូវីដ-១៩ រហូតដល់ការអភិវឌ្ឍបច្ចេកវិទ្យាបៃតង ហើយកញ្ចប់ថវិកាបែបនេះគឺជាកញ្ចប់ថវិកាធំបំផុតទី៣ របស់ជប៉ុនសម្រាប់ឆ្នាំសារពើពន្ធនេះ។

ប្រទេសជប៉ុន បានងើបចេញផុតពីឱនភាពសេដ្ឋកិច្ចជាផ្លូវការ កាលពីខែមុន បន្ទាប់ពីធ្លាក់ចុះ៣ត្រីមាសជាប់ៗគ្នា ប៉ុន្តែពេលនេះសេដ្ឋកិច្ចធំបំផុតទី៣ របស់ពិភពលោកមួយនេះកំពុងតែប្រឈម នឹងការកើនឡើងយ៉ាងឆាប់រហ័ស នូវករណីឆ្លងវីរុសកូវីដ-១៩ ដោយករណីឆ្លងថ្មីៗកើនឡើងខ្ពស់ មិនធ្លាប់មានក្នុងរយៈពេលប៉ុន្មានសប្តាហ៍ចុងក្រោយនេះ៕

ការបង្កើនកម្ពស់ពីជាន់មួយទៅជាន់មួយក្នុងគម្រោងខុនដូនឹងបន្ថែមភាព ទាក់ទាញដល់អ្នកទិញ

ដោយៈ ប៊ី

អាមេរិកៈ នៅក្នុងទីផ្សារខុនដូប្រណីត នៅទីក្រុងមានប្រជាជនច្រើន អ្នកអភិវឌ្ឍន៍ខុនដូ បានរឹះរកវិធីដើម្បីឆ្លើយតបនឹងការប្រកួតប្រជែង ដោយបន្ថែមកម្ពស់ពីជាន់មួយទៅមួយក្នុងគម្រោងរបស់ខ្លួន។

យោងតាមការសិក្សាមួយរបស់ក្រុមហ៊ុនRealtor.com ដែលមានមូលដ្ឋាននៅសហរដ្ឋអាមេរិកបានឱ្យដឹងកាលពីថ្មីៗនេះថា កម្ពស់ស្តង់ដារពីជាន់មួយទៅជាន់មួយ៨ ហ្វីត(២.៤៣ម៉ែត្រ) អាចនឹងមិនមានការអភិវឌ្ឍទៀតទេនាពេលខាងមុខ ព្រោះអ្នកអភិវឌ្ឍន៍បាននិងកំពុងផ្លាស់ប្តូរ ទៅរកការសាងសង់គម្រោងខុនដូ ដែលមានកម្ពស់ជាន់មួយទៅជាន់មួយចាប់ពី១១,១២ (៣.៣៨ម៉ែត្រ) ទៅ ២០ហ្វីត (៦ម៉ែត្រ) ខណៈអ្នកទិញក៏មានបំណងចង់ខុនដូប្រភេទនេះផងដែរ។

នៅទីក្រុងសាន់ហ្វ្រាន់ស៊ីស្កូ ខុនដូមួយក្នុងចំណោមខុនដូ ដែលថ្លៃជាងគេបំផុតនៅក្នុងទីក្រុង គឺ Penthouse តម្លៃ១៥លានដុល្លារ ដែលកំពុងសាងសង់នៅតំបន់ Lumina នឹងមានកម្ពស់ពីជាន់មួយ ទៅជាន់មួយរហូតដល់១៨ហ្វីត (៥.៤៨ម៉ែត្រ)។

នៅក្នុងទីក្រុងបូស្តុន Penthouse មានទំហំ ១៣,០០០ ហ្វីតការ៉េ (៣.៩៦២ម៉ែត្រការ៉េ)ដែលមានកម្ពស់ដល់ទៅ១៤ ហ្វីត (៤.២៦ម៉ែត្រ) នៅឯអគារ Millennium Tower មានតម្លៃរហូតដល់៣០លានដុល្លារ។ នៅក្រុងម៉ៃអាមី Penthouse មានទំហំ ៦.៦៤៤ ហ្វីតការ៉េ (២០២៥ម៉ែត្រការ៉េ) កម្ពស់១៨ហ្វីត (៥.៤៨ម៉ែត្រ) បានដាក់លក់នៅឆ្នាំនេះក្នុងតម្លៃ២១,៥លានដុល្លារ។

ក្រុមហ៊ុនRealtor.com បានរកឃើញថា ការបង្កើនកម្ពស់ស្តង់ដារ ពីជាន់មួយទៅជាន់មួយពី៨-៩ហ្វីត ទៅ ១០-១១ ហ្វីត (៣-៣.៣៥ម៉ែត្រ) ធ្វើឱ្យតម្លៃខុនដូកើនឡើង៥០ភាគរយក្នុងការចុះបញ្ជី

ក្រុមហ៊ុនចុះបញ្ជីអាជីវកម្មតាមប្រព័ន្ធ Online កើនឡើងដល់ជិត២៧០០ក្រុមហ៊ុន ខណៈដែលនាមករណ៍បម្រុងទុកមានជាង ៣១០០ឈ្មោះ

ដោយ ៖ រ៉ាណេត

ភ្នំពេញ ៖ ចាប់តាំងពីរាជរដ្ឋាភិបាលកម្ពុជា បានប្រកាសដាក់ដំណើរឱ្យដំណើរការជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន (ប្រព័ន្ធOnline) កាលពីពេលកន្លងទៅរហូតមកដល់ពេលនេះ មានក្រុមហ៊ុនអាជីកម្មចំនួន២៧០០ហើយបានអនុវត្តចុះបញ្ជីតាមប្រព័ន្ធនេះ ហើយនៅមាននាមករណ៍បម្រុងទុកជាង៣១០០ផ្សេងទៀតត្រូវបានពិនិត្យរួចរាល់។

តាមរយៈគណនីទំនាក់ទំនងអេឡិចត្រូនិកផ្លូវការរបស់ការិយាល័យចុះឈ្មោះអាជីវកម្មតាមថ្នាល់បច្ចេកវិទ្យាព័ត៌មាន (Online Business Registration Service) បានបង្ហាញថា គិតត្រឹមព្រឹកថ្ងៃទី១៤ ខែធ្នូ ឆ្នាំ២០២០ ចំនួនក្រុមហ៊ុនដែលបានចុះបញ្ជីបានកើនឡើងដល់ចំនួន២៦៩៣ ហើយពាក្យស្នើសុំរបស់ក្រុមហ៊ុនចំនួន៦២១ កំពុងតែធ្វើការត្រួតពិនិត្យ។

នៅក្នុងរបាយការណ៍ដដែលបានបង្ហាញទៀតថា ជាមួយនឹងការកើនឡើងនូវចំនួនក្រុមហ៊ុនចុះបញ្ជីអាជិវកម្មតាមថ្នាក់បច្ចេកវិទ្យាព័ត៌មាន ឬតាមប្រព័ន្ធ Online ខាងលើនេះ ក៏មានការចុះឈ្មោះនាមករណ៍បម្រុងទុកផងដែរ ដោយក្នុងនោះនាមករណ៍ដែលទទួលបានជោគជ័យមានចំនួន៣១៦៧ឈ្មោះ ហើយនាមករណ៍ដែលកំពុងធ្វើការត្រួតពិនិត្យមានចំនួន១៨៤ឈ្មោះ។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ផាន់ ផល្លា បានប្រាប់ឱ្យដឹងកាលពីពេលថ្មីៗថា ការចុះបញ្ជីអាជីវកម្មតាមប្រព័ន្ធអនឡាញនេះ បានចំណាយពេលវេលាតិច និងមានភាពងាយស្រួលជាទីបំផុត គឺមុនដូចកាលពីពេលមុននោះទេ ខណៈពីមុនមានស្ថានភាពស្មុកស្មាញច្រើន ដោយរត់ការតាមដំណាក់កាលជាច្រើនស្ថាប័ន។

លោកបន្តថា “តាំងពីមុននេះនៅពេលចុះបញ្ជីអាជីកម្មរបស់ក្រុមហ៊ុន ត្រូវឆ្លង៣ ទៅ៤ស្ថាប័ន ប៉ុន្តែឥឡូវនេះគ្រាន់តែចូលទៅក្នុងវេបសាយរបស់ក្រសួង ហើយបញ្ចូលរាល់ឯកសារពាក់ព័ន្ធទៅក្នុងប្រព័ន្ធចុះបញ្ជីតែប៉ុណ្ណោះ ដោយក្នុងរយៈពេល៨ថ្ងៃនឹងទទួលបាន។ នេះជាឆ្លើយតបទៅនឹងកំណែទម្រង់ស៊ីជម្រៅរបស់រាជរដ្ឋាភិបាលកម្ពុជាក្នុងការទាក់ទាញការវិនិយោគ និងសម្រួលនិតិវិធីនៃការចុះបញ្ជីរឱ្យបានកាន់តែលឿនដល់ធុរកិច្ចនៅក្នុងប្រទេសដែលកំពុងជួបវិបត្តិនៃជំងឺ Covid-19 នាពលេនេះ”។

ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាននេះ បានដាក់ឱ្យដំណើរកាលពីថ្ងៃទី១៥ ខែមិថុនា ឆ្នាំ២០២០កន្លមកងនេះ គឺជាបង្គោលចរថ្មីមួយ នៃការកែទម្រង់មុត ស្រួចរបស់សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា ក្នុងគោលបំណងលើកកម្ពស់ ភាពប្រកួតប្រជែង និងធ្វើឲ្យប្រសើរឡើងនូវបរិយាកាសវិនិយោគនៅកម្ពុជា។

លើសពីនេះ ប្រព័ន្ធចុះបញ្ជីអាជីវកម្មថ្មីនេះ នឹងផ្តល់ឱកាសដ៏សំខាន់មួយទៀតផងដែរ ដល់ធុរជនដែលកំពុងស្វែងរកឯកសារគតិយុត្ត កំណត់អត្តសញ្ញាណ អាជីវកម្មរបស់ខ្លួន ដើម្បីពន្លឿន និងទទួលបានឥណទាន ពីកម្មវិធីហិរញ្ញប្បទានពិសេសរបស់រាជរដ្ឋាភិបាល ក្នុងវិធានការជួយដល់វិស័យឯកជន ដែលទទួលរងផល ប៉ះពាល់ពីការរីករាលដាលនៃជំងឺCovid-19៕

លំនៅដ្ឋានតម្លៃសមរម្យរបស់បុរីKC បង់ត្រឹមជាង៣០០ដុល្លារនឹងទទួលបានផ្ទះដ៏ស្រស់ស្អាតនិងអាចប្រកបអាជីវកម្មបាន

ដោយគង់ សូរិយា

ភ្នំពេញៈ បុរីKC បាននិងកំពុងបន្តផ្តល់ជម្រើសបង់ប្រាក់កាន់តែប្រសើរ ជាមួយនឹងកញ្ចប់ទឹកប្រាក់ជាង៣០០ដុល្លារប៉ុណ្ណោះ ដល់អតិថិជន ដែលពួកគេនឹងទទួលបានលំនៅដ្ឋានដ៏ស្រស់ស្អាត និងអាចប្រកបអាជីវកម្មបាន។

ក្នុងគោលដៅលើទឹកចិត្ត និងផ្តល់លំនៅដ្ឋានតម្លៃសមរម្យដល់ប្រជាពលរដ្ឋកម្ពុជា បុរីKCបាននិងកំពុងវិនិយោគ លើលំនៅដ្ឋានតម្លៃមធ្យមដល់ប្រជាពលរដ្ឋ ដែលមានជីវភាពមធ្យម។

បុរីដែលមានទីតាំងនៅក្បែរផ្សារព្រែកព្នៅថ្មីនេះ បាននិងងកំពុងសាងសង់លំនៅដ្ឋានតម្លៃមធ្យម និងខុនដូតម្លៃសមរមន្យផងដែរ។ បុរីខេ ស៊ី អំណោយផលដល់ការរស់នៅ និងប្រកអាជីវកម្មគ្រប់ប្រភេទ ដោយសារតែស្ថិតនៅជាប់ផ្លូវធំទំហំ៣០ម៉ែត្រ ជាផ្លូវតភ្ជាប់រវាងផ្លូវជាតិលេខ៥និងមហាវិថី ឈ្នះ ឈ្នះ នៃទីក្រុងមរតកសម្ដេចតេជោ ឆ្ពោះទៅកាន់ផ្លូវជាតិលេខ៤។

បន្ថែមពីនេះ ទីតាំងរបស់បុរីខេ ស៊ី មានហ៊ុព័ទ្ធទៅដោយទីប្រជុំជនជាច្រើន ដូចជា ខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន បន្ថែមដោយគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូ នៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាព របស់រដ្ឋបាលរាជធានីភ្នំពេញផងដែរ។

លំនៅដ្ឋាននៅក្នុង ខេស៊ី ត្រូវបានសាងសង់ឡើងជា៣ប្រភេទ រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។

សម្រាប់ព័ត៌មានបន្ថែម លោកអ្នកអាចទំនាក់ទំនងបានតាមរយៈទូរស័ព្ទលេខ ៖ ០៨៩ ៧៨៧ ៧២១ / ០៨៧ ៣៦ ៩៥ ៣៦ / ០១៦ ៦៨៥ ៨៥៨ ៕

ដោយគង់ សូរិយា

ភ្នំពេញៈ បុរីKC បាននិងកំពុងបន្តផ្តល់ជម្រើសបង់ប្រាក់កាន់តែប្រសើរ ជាមួយនឹងកញ្ចប់ទឹកប្រាក់ជាង៣០០ដុល្លារប៉ុណ្ណោះ ដល់អតិថិជន ដែលពួកគេនឹងទទួលបានលំនៅដ្ឋានដ៏ស្រស់ស្អាត និងអាចប្រកបអាជីវកម្មបាន។

ក្នុងគោលដៅលើទឹកចិត្ត និងផ្តល់លំនៅដ្ឋានតម្លៃសមរម្យដល់ប្រជាពលរដ្ឋកម្ពុជា បុរីKCបាននិងកំពុងវិនិយោគ លើលំនៅដ្ឋានតម្លៃមធ្យមដល់ប្រជាពលរដ្ឋ ដែលមានជីវភាពមធ្យម។

បុរីដែលមានទីតាំងនៅក្បែរផ្សារព្រែកព្នៅថ្មីនេះ បាននិងងកំពុងសាងសង់លំនៅដ្ឋានតម្លៃមធ្យម និងខុនដូតម្លៃសមរមន្យផងដែរ។ បុរីខេ ស៊ី អំណោយផលដល់ការរស់នៅ និងប្រកអាជីវកម្មគ្រប់ប្រភេទ ដោយសារតែស្ថិតនៅជាប់ផ្លូវធំទំហំ៣០ម៉ែត្រ ជាផ្លូវតភ្ជាប់រវាងផ្លូវជាតិលេខ៥និងមហាវិថី ឈ្នះ ឈ្នះ នៃទីក្រុងមរតកសម្ដេចតេជោ ឆ្ពោះទៅកាន់ផ្លូវជាតិលេខ៤។

បន្ថែមពីនេះ ទីតាំងរបស់បុរីខេ ស៊ី មានហ៊ុព័ទ្ធទៅដោយទីប្រជុំជនជាច្រើន ដូចជា ខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន បន្ថែមដោយគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូ នៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាព របស់រដ្ឋបាលរាជធានីភ្នំពេញផងដែរ។

លំនៅដ្ឋាននៅក្នុង ខេស៊ី ត្រូវបានសាងសង់ឡើងជា៣ប្រភេទ រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។

សម្រាប់ព័ត៌មានបន្ថែម លោកអ្នកអាចទំនាក់ទំនងបានតាមរយៈទូរស័ព្ទលេខ ៖ ០៨៩ ៧៨៧ ៧២១ / ០៨៧ ៣៦ ៩៥ ៣៦ / ០១៦ ៦៨៥ ៨៥៨ ៕

ការសិក្សាថ្មីៈ កម្ពុជាជាទីផ្សារល្អបំផុតមួយសម្រាប់វិនិយោគិនអចលនទ្រព្យនៅអាស៊ី

ដោយៈ វុទ្ធី

ភ្នំពេញៈ ប្រទេសកម្ពុជាគឺជាទីផ្សារល្អបំផុតមួយនៅអាស៊ី សម្រាប់វិនិយោគិនអចលនទ្រព្យ។ សេដ្ឋកិច្ចរបស់ប្រទេសនេះមានទំហំតូចមែន ប៉ុន្តែមានភាពធន់ ហើយមិនដែលមានវិបត្តិសេដ្ឋកិច្ចក្នុងរយៈពេលជាង២០ឆ្នាំមកហើយ។

យោងតាមការសិក្សារបស់គេហទំព័រInvestAsian ដែលជាគេហទំព័រអង្កេតទាក់ ទងនឹងចរន្ត នៃការវិនិយោគនៅតំបន់អាស៊ីបានបង្ហាញថា ទីក្រុងភ្នំពេញមានការរីកចម្រើ នគួរឱ្យភ្ញាក់ផ្អើល ដែលទាក់ទាញការចាប់អារម្មណ៍ពីធុរកិច្ចអន្តរជាតិ។ មនុស្សជាច្រើន បានប្រៀបធៀបទីក្រុងភ្នំពេញ ទៅនឹងទីក្រុងបាំងកកកាលពី៣០ឆ្នាំមុន។ការប្រៀបធៀបនេះ ដោយមើលឃើញពីកំណើនដ៏ខ្លាំងនៃទីក្រុងបាងកកនេះ វិនិយោគិនគួរតែកត់សម្គាល់ពីទីក្រុងនេះ សម្រាប់ជាទិសដៅវិនិយោគ។

ទីក្រុងនេះ ក៏ទាក់ទាញជនជាតិបរទេស ជាមួយនឹងផ្សារតាមដងផ្លូវដ៏រស់រវើក ស្ថាបត្យកម្មបារាំងដ៏អស្ចារ្យ និង អាគារបុរាណ។ ដោយមើលឃើញពីចំណុចទាំងនេះ បានធ្វើ ឱ្យវិនិយោគិន ដែលមានបទពិសោធន៏ បានចាប់ផ្តើមសម្រុកមកភ្នំពេញ ដើម្បីទទួលបានផលចំណេញក្នុងតម្លៃទាបគួរឱ្យភ្ញាក់ផ្អើល។

ជាធម្មតា ជនបរទេសទិញអចលនទ្រព្យពីរប្រភេទ រួមមាន shophouse និងខុនដូ។ Shophouse ជាទូទៅអាចធ្វើកែលម្អឡើងវិញ ជួល និងលក់បន្ត ដើម្បីដើម្បីបានផលចំណេញ ខណៈខុនដូមិនមានផលចំណេញច្រើនទេដូច Shophouseនោះទេ ប៉ុន្តែខុនដូងាយនឹងកាន់កាប់ និងគ្រប់គ្រង។

ប្រទេសកម្ពុជា គឺជាប្រទេសមួយក្នុងចំណោមប្រទេស នៅអាស៊ីអាគ្នេយ៍ ដែលអាចឱ្យជនបរទេស មានកម្មសិទ្ធិកាន់កាប់អចលនទ្រព្យពីជាន់ទី១។ កម្ពុជាជាប្រទេសស្វាគមន៍បំផុតមួយ សម្រាប់វិនិយោគិនអន្តរជាតិនៅក្នុងតំបន់ទាំងមូល។

ការចូលមកប្រទេសកម្ពុជា ហើយបង្កើតអាជីវកម្មនៅទីនេះ មានលក្ខណៈសាមញ្ញ និងមានប្រសិទ្ធភាព។ ទិដ្ឋាការរយៈពេលមួយឆ្នាំ មានតម្លៃត្រឹមតែ២៥០ដុល្លារ ហើយអាជីវកម្មនៅកម្ពុជា អាចមានកម្មសិទ្ធិ១០០ភាគរយដោយជនជាតិបរទេស។

ការទិញអចលនទ្រព្យ អាចមានភាពស្មុគស្មាញបន្តិចអាស្រ័យលើអ្វី ដែលអ្នកកំពុងរក។ ជនបរទេស អាចទិញខុនដូយូនីត ដែលមានប័ណ្ណសហកម្មសិទ្ធ ដូច្នេះមនុស្សជាច្រើនមានទំនោរទៅរកការអភិវឌ្ឍទាំងនោះ។

លើសពីនេះទៀត ប្រទេសកម្ពុជាប្រើប្រាស់ប្លង់រឹង និងប្លង់ទន់សម្រាប់ដី និងអគារ។ ប័ណ្ណកម្មសិទ្ធិប្លង់រឹង ត្រូវបានចុះបញ្ជីជាផ្លូវការ ដោយអជ្ញាធរជាតិ។ ចំណែក ប្លង់ទន់ ត្រូវបានចុះបញ្ជី ដោយអជ្ញាធរមូលដ្ឋាន៕ Investasian៕

សិក្សាលើផែនការរដ្ឋាភិបាល និងចំណុចទាំងនេះសិន បើចង់វិនិយោគលើដីធ្លី ទទួលបានផលចំណេញ

ដោយស៊ីវ ម៉េង

ភ្នំពេញៈ ដើម្បីទទួលបានផលចំណេញខ្ពស់ពីការវិនិយោគ មិនមែនជាការប្រថុយប្រថាននោះទេ ប៉ុន្តែវាជាការវិនិយោគដោយឈ្លាសវៃ តាមរយៈការទទួលបានព៌តមានច្បាស់លាស់ និងដាក់ចេញផែនការត្រឹមត្រូវ។

ហេតុនេះមុនវិនិយោគលើដីធ្លី តើអ្នកត្រូវពិនិត្យទៅលើកត្តាអ្វីខ្លះ និងដឹងអ្វីខ្លះពីផែនមការអភិវឌ្ឍន៍របស់រដ្ឋាភិបាល។

គេហទំព័រPropertyarea.asiaសូមលើកយកចំណុចមួយចំនួន សំរាប់អ្នកអាន អ្នកវិនិយោគយកធ្វើជាមួលដ្ឋានសំរាប់ពិចារណា។

ព៌តមានពីផែនការអភិវឌ្ឍន៍របស់រដ្ឋាភិបាល

រដ្ឋាភិបាលកម្ពុជាតែងតែដាក់ចេញនូវផែនការ គោលនយោបាយថ្មីៗជារៀងរាល់៥ទៅ១០ឆ្នាំម្តង ដែលជាផែនទីចង្អុលបង្ហាញផ្លូវ ដើម្បីសម្រេចបានកំនើនសេដ្ឋកិច្ច សង្គមតាមចក្ខុវិស័យរបស់ខ្លួន។ ហេតុនេះ ការតាមដានព៌តមានរបស់រដ្ឋាភិបាលឲ្យបានជាប់លាប់ នឹងធ្វើឲ្យយើងមានព៌តមានច្រើនសំរាប់ពិចារណា និងដាក់ចេញផែនការវិនិយោគ ដើម្បីទទួលបានផលប្រយោជន៍ពីការអភិវឌ្ឍន៍នានា។

ជាក់ស្តែងរដ្ឋាភិបាលកម្ពុជា បានដាក់ចេញគោលនយោបាយ កសាងហេដ្ឋារចនាសម្ព័ន្ឋ គោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ជាលទ្ឋផលក្រុងចំនូន៣ ដែលបានដាក់ចេញក្នុងគោលនយោបាយនេះ មានការរីកចម្រើនយ៉ាងលឿន ដូចជាក្រុងព្រះសីហនុ ក្រុងប៉ោយប៉ែត និងក្រុងបាវិត។

ផែនការអភិវឌ្ឍន៍ហេដ្ឋារចនាសម្ព័ន្ឋរបស់រដ្ឋាភិបាល

ដើម្បីបង្កើនសន្ទុះសេដ្ឋកិច្ច និងកាត់បន្ថយបញ្ហាសង្គម រដ្ឋាភិបាលបានដាក់ចេញផែនការកសាងហេដ្ឋារចនាសម្ព័ន្ឋជាបន្តបន្ទាប់ ដូចជា គម្រោងផ្លូវល្បឿនលឿនភ្នំពេញ ព្រះសីហនុ គំរោងផ្លូវល្បឿនលឿនភ្នំពេញ បាវិត គម្រោងសាងសង់ផ្លូវក្រវ៉ាត់ក្រុងទី៣ ផ្លូវក្រវ៉ាត់ក្រុងទី៤ ព្រលានយន្តហោះអន្តរជាតិភ្នំពេញថ្មី ព្រលានយន្តហោះអន្តរជាតិខេត្តសៀមរាប ព្រលានយន្តហោះតារាសាគរ ខេត្តកោះកុង ព្រលានយន្តហោះខេត្តមណ្ឌលគិរីជាដើម។

ជាមួយនឹងផែនការសកម្មភាពទាំងនេះ ជាក់ស្តែងតំបន់ស្ថិតនៅក្បែរគំរោងធំៗ បានធ្វើឲ្យតម្លៃដីធ្លីកើនឡើងយ៉ាងគំហុក ហើយអ្នកទទួលបានផលប្រយោជន៍ផ្ទាល់គឺប្រជាជននៅមូលដ្ឋាន និងអ្នកវិនិយោគដែលក្តាប់ព៌តមានបានលឿន និងជាប់លាប់។

ផែនការអភិវឌ្ឍន៍៍តំបន់ឧស្សាហកម្ម

ដោយសារការរីកចម្រើននៃនគរូបនីយកម្ម ដែលប្រជាជនមានការកើនឡើងនៅក្នុងទីក្រុង កំនើនការកកស្ទះចរាចរណ៍៍ កំនើននៃការអភិវឌ្ឍន៍លំនៅដ្ឋាន និងមជ្ឈមណ្ឌលពាណិជ្ជកម្មនានា បានធ្វើឲ្យរដ្ឋាភិបាលបានដាក់ចេញគោលនយោបាយថ្មី ដោយរុញរោងចក្រ សហគ្រាសនានាចេញពីទីក្រុង ទៅកាន់តំបន់ជាយក្រុង ដូចជាតំបន់រោងចក្រសហ គ្រាសនៅតាមផ្លូវជាតិលេខ២ ម្តុំចក្រអង្រែលើ ចក្រអង្រែក្រោមជាដើម ត្រូវផ្លាស់ប្តូរទៅកាន់ផ្លូវជាតិលេខ៤១ និង៥១ ដែលចាលទ្ឋផលបានធ្វើឲ្យតម្លៃដីធ្លី នៅតំបន់នោះកើនឡើងយ៉ាងគំហុក។

ជាលទ្ឋផលតំបន់នោះ មានការរីកចម្រើនលឿន ជាមួយគម្រោងលំនៅដ្ឋាន បុរី រោងចក្រ សហគ្រាស។

តំបន់ព្រំដែន
ដោយដាក់ចេញគោលនយោបាយ ប្រែក្លាយតំបន់ព្រំដែន ជាតំបន់សន្តិភាព កិច្ចសហប្រតិបត្តិការ និងការអភិវឌ្ឍរបស់សម្តេចតេជោហ៊ុន សែនប្រមុខរដ្ឋាភិបាលកម្ពុជា បានធ្វើឲ្យតំបន់ព្រំដែននានាមានការរីកចម្រើនលឿន ដូចជាព្រំដែនបាវិត ព្រំដែនជ្រៃធំ ព្រំដែនកម្ពុជា ថៃប៉ោយប៉ែតជាដើម។

ហេតុនេះការក្តាប់ព៌តមានបានលឿន ឆាប់រហ័ស និងច្បាស់លាស់ នឹងធ្វើឲ្យការអភិវឌ្ឍឬការវិនិយោគរបស់យើងទទួលបានផលប្រយោជន៍។

តំបន់កៀកទីក្រុង

ដោយសារទីក្រុងមានការរីកចម្រើនលឿន ការរីកចម្រើនផ្នែកនគរូបនីយកម្មទីក្រុង កាន់តែបង្កភាពស្មុគ្រស្មាញ ហេតុនេះរដ្ឋាភិបាលត្រូវតែរៀបចំ ផែនការពង្រីកទីក្រុងរៀងរាល់៥ទៅ១០ឆ្នាំម្តង អាស្រ័យលើស្ថានភាពជាក់ស្តែង។

ហេតុនេះដីធ្លីនៅតំបន់ជាយក្រុង នៅតែមានចរន្តទិញលក់សកម្ម តម្លៃដីធ្លីនៅតែកើនឡើង ដោយសារការកសាងហេដ្ឋារចនាសម្ព័ន្ឋរបស់រដ្ឋាភិបាល ភាពងាយស្រួលនៃការតភ្ជាប់លំហីរចរាចរណ៍ និងកំនើនប្រជាជនចូលមករស់នៅទីក្រុង កើនឡើងជារៀងរាល់ឆ្នាំ។

តំបន់មានមនុស្សរស់នៅច្រើន

តាមធម្មតាតម្លៃដីធ្លីមានការកើនឡើងលឿនឬយឺត វាអាស្រ័យលើកត្តាមនុស្ស កត្តាហេដ្ឋារចនាសម្ព័ន្ឋ កត្តាសេដ្ឋកិច្ច ពោលគឺសេដ្ឋកិច្ចមានការកើនឡើង និងស្ថេរភាពនយោបាយ។ ហេតុនេះ តម្លៃដីធ្លីនៅតាមតំបន់និមួយៗតែងតែឡើងថ្លៃ ឬស្ថិតនៅទ្រឹងអាស្រ័យលើកត្តាទាំងនេះ។

តម្លៃដីធ្លីនឹងមិនកើនឡើងខ្ពស់នោះទេ បើតំបន់នោះគ្មានមនុស្សរស់នៅច្រើន និងគ្មានហេដ្ឋារចនាសម្ព័ន្ឋតភ្ជាប់ល្អប្រសើរ។

អានព៌តមានឲ្យបានច្រើន

ដើម្បីក្តាប់ដឹងព៌តមានទាក់ទងនឹងគោលនយោបាយ ផែនការអភិវឌ្ឍន៍របស់រដ្ឋាភិបាល សេដ្ឋកិច្ចមានស្ថានភាពបែបណា ការអានព៌តមានជាប្រចាំពិតជាមានសារៈសំខាន់ ណាស់ ដើម្បីអាចឲ្យលោក អ្នកបានដឹងព៌តមានច្រើន លំអិត ស៊ីជម្រៅ ដើម្បីប្រើប្រាស់ជាមូលដ្ឋានសំរាប់ការវិភាគ ពិចារណាគ្រប់ជ្រុងជ្រោយ មុនសម្រេចចិត្តវិនិយោគ និងធ្វើឲ្យការវិនិយោគរបស់ខ្លួនមិនប្រឈមនឹងហានិភ័យខ្ពស់៕

ទុនវិនិយោគក្នុងវិស័យសំណង់ទូទាំងប្រទេសសម្រេចបានទំហំទឹកប្រាក់ ៦៤០០លានដុល្លារ

ដោយៈ រ៉ាណេត

ភ្នំពេញៈ ទុនវិនិយោគក្នុងវិស័យសំណង់ក្នុងរយៈពេល១០ខែ ឆ្នាំ២០២០កន្លងទៅនេះ សម្រេចបានទំហំទឹកប្រាក់៦៤០០លានដុល្លារអាមេរិក ក្នុងសំណើសាងសង់សរុបចំនួន៤០៨០គម្រោង ស្ថិតនៅលើផ្ទៃដីសរុបប្រមាណ១៤លានម៉ែត្រការ៉េ។

យោងតាមរបាយការណ៍ស្តីពី និន្នាការសេដ្ឋកិច្ចសង្គម នៃក្រសួងសេដ្ឋកិច្ច និងហិរញ្ញវត្ថុបានឲ្យដឹងថា នៅក្នុងរយៈពេល ១០ខែ ដើមឆ្នាំ ២០២០នេះ ក្រសួងរៀបចំដែនដី នគរូបនីយកម្ម និងសំណង់ បានសម្រេចលើសំណើសុំការសាងសង់ សរុបទូទាំងប្រទេសមានចំនួន៤០៨០គម្រោង ដែលជាកំពុងមានសក្ដានុពលរួមមាន គម្រោងវិនិយោគលំនៅឋាន និងភូមិគ្រឹះមានជាង៣៤០០គម្រោង សំណង់ពាណិជ្ជកម្ម៣១១គម្រោង សំណង់ឧស្សាហកម្ម១៧២គម្រោង សំណង់ទាក់ទងវិស័យទេសចរ៨២ គម្រោង និងសំណង់ផ្សេងៗទៀតមាន២គម្រោង។

ដោយឡែកគម្រោងសាងសង់សំណង់សាធារណៈវិញ ក្រសួងរៀបចំដែនដី នគរូបនីយកម្ម និងសំណង់ បានសម្រេចលើសំណើសុំសាងសង់សរុបមាន៦៨គម្រោង ដោយក្នុងនោះបានប្រើប្រាស់ថវិការបស់រាជរដ្ឋាភិបាល មានចំនួន៤០គម្រោង និងថវិកាឯកជនមានចំនួន២៨គម្រោង។

អ្នកជំនាញនៅក្នុងវិស័យអចលនទ្រព្យកម្ពុជា ក៏ដូចជាបណ្តាអ្នកអភិវឌ្ឍន៍គម្រោងសាងសង់នៅតែមានសុទិដ្ឋិនិយម ចំពោះសំណង់លំនៅដ្ឋាន ខណៈដែលតម្រូវការនៃទីផ្សារមួយនេះ នៅតែបន្តរក្សាបាននូវសញ្ជាវិជ្ជមាន ក្នុងកម្រិតខ្ពស់នៅឡើយ ជាពិសេសតម្រូវការលំនៅដ្ឋាន នៅតាមតំបន់ជាយរាជធានីភ្នំពេញ ដែលកំពុងកកើតឡើងយ៉ាងមមាញឹក៕