ដោយៈ រ៉ាណេត

ភ្នំពេញៈ ជាមួយនឹងទុនបម្រុងរបស់រដ្ឋក្នុងរង្វង់ ប្រមាណជាង១០០-២០០លានដុល្លារ ដើម្បីដោះស្រាយលើបញ្ហាកូវីដ១៩  រដ្ឋាភិបាលកម្ពុជាក៏ទទួលបាននូវថវិកា ដែលអាចប្រើប្រាស់បាន ក្នុងក្របខណ្ឌប្រយុទ្ធប្រឆាំងនឹងកូវីដ១៩ ក៏ដូចជាការស្ដារឡើងវិញនូវសេដ្ឋកិច្ចកម្ពុជាក្រោយវិបត្តិកូវីដ១៩ ចំនួន៥៣៨លានដុល្លារក្រោមជំនួយពីស្ថាប័ន និងប្រទេសជាដៃគូ។

សម្ដេចបានមានប្រសាសន៍ថា នៅព្រឹកថ្ងៃទី១៥ ខែធ្នូ ឆ្នាំ២០២០នេះថា “ប្រទេសយើង គឺជាសមាជិកនៃមជ្ឈមណ្ឌលកូវ៉ាក់ ដែលជាផ្នែកមួយនៃការគាំទ្រ នៃដំណើរការរបស់អង្គការសុខភាពពិភពលោក និងមានការគាំទ្រដោយអង្គការសហប្រជាជាតិ។ មជ្ឈ​មណ្ឌលកូវ៉ាក់ នឹងផ្តល់ឱ្យយើងនូវវ៉ាក់សាំង២០ភាគរយ នៃចំនួនប្រជាជនសរុប ដោយក្នុងដំណាក់ដំបូងនៃការផ្តល់បានត្រឹម៣ភាគរយ”។

សម្ដេចបានបន្តថា “បើកូវ៉ាក់ផ្តល់ឱ្យយើង២០ភាគរយនៃចំនួនប្រជាជនសរុប ចឹងយើងនឹងបានវ៉ាក់សាំង សម្រាប់ប្រជាជនចំនួន៣,២លាននាក់។ ការផ្តល់តាមកូវ៉ាក់ តម្រូវឱ្យកម្ពុជាមានថវិកាបដិភាគ៥ភាគរយ។ ដូច្នេះបើប្រជាជន៣,២លាននាក់ គឺត្រូវការ៦,៤លានដូស ចឹងយើងត្រូវបដិភាគ៥ភាគរយនៃតម្លៃនោះ”។

នៅក្នុងចំណោមប្រជាជនកម្ពុជា សរុបប្រមាណ១៦លាននាក់ នឹងត្រូរទទួលបានការចាក់វ៉ាក់សាំងការពារជំងឺកូដ១៩ ចំនួន៨០ភាគរយនៃចំនួនសរុប។ មានន័យថាប្រជាជនក្នុងរង្វង់១៣លាននាក់ នឹងត្រូវចាក់វ៉ាក់សាំង។ លើកលែងតែកុមារ និងវ័យជំទង់អាយុក្រោម១៥ឆ្នាំតែប៉ុណ្ណោះ ដែលអាចនឹងត្រូវលើកលែង។

សម្ដេចបានមានប្រសាសន៍ថា ក្រៅពីទុនរបស់រដ្ឋដែលត្រៀមបម្រុងក្នុងរង្វង់១០០-២០០លានដុល្លារទៅលើបញ្ហាវ៉ាក់សាំង បូកជាមួយនឹងថវិកាសប្បុរសជនជាង៤៨លានដុល្លារនោះ រដ្ឋាភិបាលបានទទួលរួចមកហើយ នូវថវិកាដែលអាចប្រើប្រាស់បានក្នុងក្របខណ្ឌប្រយុទ្ធប្រឆាំងនឹងកូវីដ១៩ ក៏ដូចជា ការស្ដារឡើងវិញនូវសេដ្ឋកិច្ច ថវិកាពីធនាគារអភិវឌ្ឍន៍អាស៊ី (ADB) ចំនួន២៥០លានដុល្លារ ត្រូវបានដកសាច់ប្រាក់យកមករក្សាទុកនៅធនាគារជាតិកម្ពុជារួចហើយ។

បន្ថែមពីនេះ រដ្ឋាភិបាលនៅមានជំនួយពីរដ្ឋាភិបាលជប៉ុន តាមរយៈទីភ្នាក់ងារJica ចំនួន២៥ពាន់លានយ៉េន ស្មើនឹងប្រមាណ២៣៨លានដុល្លារ ដែលកំពុងរៀបចំបំពេញបែបបទដកមកតម្កល់រក្សាទុកនៅធនាគារជាតិកម្ពុជា ហើយជំនួយពីរដ្ឋាភិបាលកូរ៉េខាងត្បូង តាមរយៈEDCSមានចំនួន៥០លានដុល្លារ បានដកសាច់ប្រាក់មករក្សាទុកនៅធនា​គារជាតិកម្ពុជារួចហើយ។ ដូច្នេះកម្ពុជាមានប្រាក់ក្នុងដៃសរុបជារួមចំនួន៥៣៨លានដុល្លារ ដោយមិនទាន់គិតពីប្រាក់សន្សំរបស់រដ្ឋាភិបាលនោះទេ៕

ដោយគង់ សូរិយា

        ភ្នំពេញៈ នៅសល់ថរយៈពេល១៦ថ្ងៃទៀតប៉ុណ្ណោះ ឆ្នាំ២០២១នឹងចូលមកដល់ ខណៈឆ្នាំ២០២០នេះ បានធ្វើឲ្យមនុស្សជាច្រើនឈឺចាប់ ក្រុមហ៊ុនដួលរលំ និងធ្វើឲ្យមនុស្សជាច្រើនបានធ្វើអត្តឃាត ក្នុងកលយុគដែលសេដ្ឋកិច្ចពិភពលោកបានដាំក្បាលចុះអាក្រក់បំផុត និងអាក្រក់ជាងវិបត្តិសេដ្ឋកិច្ចកំឡុងសង្រ្គាមលោកលើកទី២ ។

ដីធ្លីនៅតាមបណ្តាខេត្ត ដែលនឹងមានចរន្តទិញលក់សកម្មនៅឆ្នាំ២០២១ តើនឹងស្ថិតនៅខេត្តណាខ្លះ។

អ្នកវិភាគជាច្រើនបានលើកឡើងថា គ្រប់ទិសទាំងបួន នៃរាជធានីភ្នំពេញនៅតែមានសកម្មភាពទិញលក់ និងមានគំរោងអភិវឌ្ឍន៍ច្រើននឹងលេចឡើង ខណៈខេត្តដទៃទៀត ត្រូវបានគេសម្លឹងឃើញនៅតាមបណ្តាខេត្តជាប់តំបន់ឆ្នេរ ដូចជា

ខេត្តកំពត 

        ជាមួយនឹងសក្តានុពលនៃធនធានធម្មជាតិ កត្តាភូមិសាស្រ្ត និងភាពល្អប្រសើរនៃហេដ្ឋារចនាសម្ព័ន្ឋ នឹងធ្វើឲ្យខេត្តកំពតកាន់តែមានភាពរីកចម្រើន ពិសេសចរន្តនៃការទិញលក់ដីធ្លី និងតម្លៃដីធ្លីនឹងកើនឡើងនៅតាមតំបន់សំខាន់ៗជាច្រើន។

ជាមួយនឹងមជ្ឈមណ្ឌលពាណិជ្ជកម្មភ្លោះ ដែលកំពុងសាងសង់ដោយក្រុមហ៊ុនថៃ ប៊ុនរ៉ុង នឹងធ្វើឲ្យទីក្រុងកំពតកាន់តែទាក់ទាញអ្នកវិនិយោគជាតិ អន្តរជាតិកាន់តែច្រើននាពេលអនាគត។

ខេត្តកោះកុង

        ការបញ្ចប់ នូវការស្ថាបនាព្រលានយន្តហោះលំដាប់អន្តរជាតិ តារាសាគរ និងគំរោងដំណាក់កាលទី២របស់គំរោង ដែលវិនិយោគដោយក្រុមហ៊ុនUnion Development Group។ ខេត្តកោះកុង នៅមានគំរោងជាច្រើនទៀត ដែលបាននិងកំពុងវិនិយោគដោយ     រដ្ឋាភិបាល ដូចជាគំរោងផ្លូវជាតិលេខ៤៨ ដែលបាននិងកំពុងត្រៀមពង្រីកជាពីរគន្លងរថយន្តទៅមក កំពង់ផែទឹកជ្រៅ និងគំរោងសាងសង់ផ្លូវជាតិលេខ១០ ដែលតភ្ជាប់ពីស្រុកសំឡូត ខេត្តបាត់ដំបង ឆ្ពោះមកកាន់ខេត្តពោធិសាត់ និងតភ្ជាប់ទៅកាន់ខេត្តកោះកុង កំពុងសាងសង់យ៉ាងសកម្ម។

ជាមួយគ្នានេះ ខេត្តកោះកុងក៏មានធនធានធម្មជាតិ ដែលបំរើឲ្យវិស័យទេសចរណ៍ ដ៏សម្បើមផងដែរ ដែលកម្ពុជាមិនទាន់បានទាញយកមកប្រើប្រាស់ អស់សក្តានុពលនៅឡើយ។​ តំបន់ទាំងនោះមានដូចជា តាតៃ ត្រពាំងរូង ជីផាត និងតំបន់រមណីយដ្ឋានធម្មជាតិ ពិសេសតំបន់ឆ្នេរដែលមានខ្សាច់ និងទេសភាពស្រស់ស្អាតលំដាប់ពិភពលោក ជាច្រើនទៀត។

ខេត្តកណ្តាល

        កណ្តាល ជាខេត្តដែលមានភូមិសាស្រ្តអំណោយផលជាងគេ ដោយសារទឹកដីខេត្តនេះព័ទ្ឋជុំវិញរាជធានីភ្នំពេញ ដែលធ្វើឲ្យខេត្តនេះទទួលឥទ្ឋិពល ពីការររីកចម្រើនពីរាជធានីភ្នំពេញយ៉ាងលឿន។

ខេត្តកណ្តាលមានមនុស្សរស់នៅច្រើន ភូមិសាស្រ្តល្អ និងកំពុងទទួលបានគំរោងអភិវឌ្ឍន៍ធំៗជាច្រើន ដូចជាព្រលានយន្តហោះអន្តរជាតិភ្នំពេញថ្មី គំរោងផ្លូវក្រវ៉ាត់ក្រុងទី៣ ផ្លូវក្រវ៉ាត់ក្រុងទី៤ ផ្លូវជាតិលេខ៤១ ផ្លូវជាតិលេខ៥១ជាដើម។

ខេត្តតាកែវ

        ពីមុនខេត្តនេះ ត្រូវបានគេមិនសូវនឹកនាដល់ ប៉ុន្តែខេត្តតាកែវមានសក្តានុពលមិនធម្មតាផងដែរ ដោយសារខេត្តនេះ មានផ្លូវតភ្ជាប់ជាមួយរាជធានីភ្នំពេញ និងស្ថិតក្នុងផែន​ការអភិវឌ្ឍន៍របស់រដ្ឋាភិបាល។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាធ្លាប់បានលើកឡើងពីសក្តានុពលរបស់ខេត្តតាកែវ កំពុងពេលសម្តេចអញ្ជើញបើកការដ្ឋានស្ថាបនា និងពង្រីកផ្លូវជាតិលេខ២កាលពីដើមឆ្នាំនេះ។

ខេត្តតាកែវទទួលបានគំរោងអភិវឌ្ឍន៍ច្រើនផងដែរ ដូចជាព្រលានយន្តហោះភ្នំពេ​ញថ្មី គំរោងរោងចក្រ សហគ្រាសថ្មីៗ និងគំរោងអភិវឌ្ឍន៍លំនៅដ្ឋានមួយចំនួនទៀត នៅពេលផ្លូវជាតិលេខ២ស្ថាបនា និងពង្រីករួច។

ខេត្តកំពង់ស្ពឺ

        ខេត្តនេះក៏មានសក្តានុពលសម្បើមផងដែរ ដោយសាររដ្ឋាភិបាលបានដាក់ចេញគោលនយោបាយថ្មី ដោយរុញរោងចក្រ សហគ្រាសនានាចេញពីរាជធានីភ្នំពេញ ឆ្ពោះទៅកាន់ខេត្តនេះ ពិសេសខេត្តនេះមានហេដ្ឋារចនាសម្ព័ន្ឋដ៏សម្បូរបែប ដែលតភ្ជាប់ជាមួយ ខេត្តព្រះសីហនុ ដែលជាខេត្តមានកំពង់ផែទឹកជ្រៅតែមួយគត់នៅកម្ពុជា។

ផ្លូវជាតិលេខ៤១ ផ្លូវជាតិលេខ៥១ ផ្លូវល្បឿនលឿនភ្នំពេញ ព្រះសីហនុ និងផ្លួវជាតិលេខ៤ជាដើម សុទ្ឋតែជាចរន្តសេដ្ឋកិច្ចជាតិ ដែលជំរុញកំនើនសេដ្ឋកិច្ចសង្គម។

កត្តាទាំងនេះហើយ នឹងធ្វើឲ្យខេត្តកំពង់ស្ពឺមានភាពលេចធ្លោ និងកំពុងទាក់ទាញការវិនិយោគ ហើយចរន្តនៃការទិញលក់ដីធ្លី បានកើតមានយ៉ាងសកម្មនៅក្នុងឆ្នាំនេះ ទោះ​បីកម្ពុជាបានរងវិបត្តិសេដ្ឋកិច្ចបណ្តាលមកពីជំងឺកូវីដ១៩ក្តី។

ខេត្តមណ្ឌលគិរី

        មណ្ឌលគិរី ស្ថិតនៅក្នុងចំណោមខេត្តចំនួន៤ នៃភូមិភាគឥសាន្តប្រទេស ដែលមានសកម្មភាពទិញលក់ដីធ្លីសកម្មជាងគេ ដោយសាររដ្ឋាភិបាលបាន និងកំពុងរៀបចំផែនការកសាងព្រលានយន្តហោះអន្តរជាតិ នៅក្នុងខេត្តនេះនាពេលឆាប់ៗខាងមុខ ដើម្បីប្រែក្លាយខេត្តនេះ ជាតំបន់ទេសចរណ៍ដ៏ទាក់ទាញ ពិសេសរៀបចំខេត្តនេះជាកន្លែងដាំផ្កា បន្លែ ដើម្បីផ្គត់ផ្គង់មកកាន់សេវាកម្មបដិសណ្ឋារកិច្ច នៅរាជធានីភ្នំពេញ និងតាមបណ្តាខេត្តដទៃទៀត។

ជាមួយនឹងតំបន់ខ្ពង់រាប បានធ្វើឲ្យខេត្តមណ្ឌលគិរី ជាខេត្តមានអាកាសធាតុត្រជា​ក់ជាងគេនៅកម្ពុជា មានទេសភាពវាលស្មៅខៀវស្រងាត់ដាច់កន្ទុយភ្នែកជាងគេនៅកម្ពុជា ដែលស័ក្តិសមជាតំបន់ទេសចរណ៍លំហែរកាយដ៏ឆើតឆាយមួយ នៃទឹកដីភូមិភាគឥសាន្ត ពិសេសតំបន់នេះ ស្ថិតនៅក្នុប៉ូលសេដ្ឋកិច្ចធំទី៤ ដែលបានដាក់ចេញដោយប្រមុខរដ្ឋាភិបាលកម្ពុជាផងដែរ៕

ដោយៈ រ៉ាណេត

ភ្នំពេញៈ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហាញពីក្ដីរំភើបជាមួយនឹងទឹកចិត្តមនុស្សធម៌ របស់បងប្អូនជនរួមជាតិ ក្នុងការចូលរួមបរិច្ចាកថវិកា ដែលជាធនធានផ្ទាល់ខ្លួន សម្រាប់ទិញវ៉ាក់សាំងសម្រាប់ចាក់ជូនប្រជាជន នៅទូទាំងប្រទេសដោយឥតគិតថ្លៃដោយសម្តេចបានចាត់ទុកថា “ជាចលនាជាតិដ៏ធំទូលាយមហាសាល និងជាខឿនការពារសុខភាពប្រជាជនយ៉ាងសំខាន់បំផុត”។

សម្ដេចតេជោ ហ៊ុន សែន បានមានប្រសាសន៍នៅក្នុងពិធីថ្លែងសារពិសេសជូនជនរួមជាតិ ពាក់ព័ន្ធនឹងស្ថានភាពជំងឺកូវីដ១៩ និងការទិញវ៉ាក់សាំងជំងឺកូវីដ១៩នៅព្រឹកថ្ងៃទី១៥ ខែធ្នូ ឆ្នាំ២០២០នេះថា សកម្មភាពនៃការចូលរួមយ៉ាងច្រើន ពីសំណាក់បងប្អូនប្រជាពលរដ្ឋ ក្នុងទឹកចិត្តមនុស្សធម៌ទាំងនេះ គឺការបង្ហាញពីស្មារតីសាមគ្គីភាព ឯកភាពជាតិសាសន៍ ក្នុងចំនួនដ៏លើសលប់បំផុតដែលនឹកស្មានមិនដល់។

សម្ដេចតេជោបន្តថា “ជាមួយនឹងសកម្មភាពនៃស្មារតីសាមគ្គីភាព របស់ជនរួមជាតិទាំងអស់នេះ ក្នុងនាមរដ្ឋាភិបាលសូមថ្លែងអំណរគុណយ៉ាងជ្រាលជ្រៅ ហើយតាមរយៈសកម្មភាពទាំងនេះ បានបង្ហាញពីទឹកចិត្តស្នេហាជាតិ ស្រឡាញ់ប្រជាជាតិកម្ពុជាគួរជាទីមោទនក្រៃលែង”។

គិតត្រឹមថ្ងៃទី១៤ ខែធ្នូ ឆ្នាំ២០២០ ថវិកាដែលទទួលបានពីការបរិច្ចាករបស់បងប្អូនជនរួមជាតិ និងការព្រះរាជទានរបស់ព្រះមហាក្សត្រ និងសម្ដេចម៉ែ សរុបមានចំនួនជាង៤៨លានដុល្លារ និងជាង៣៩០០លានរៀល សម្រាប់ចូលរួមជាមួយរាជរដ្ឋាភិបាលត្រៀមទិញវ៉ាក់សាំងចាក់ ជូនប្រជាជនកម្ពុជានៅដោយឥតគិតថ្លៃនៅទូទាំងប្រទេស។

ក្នុងដំណាក់កាលដំបូងរដ្ឋាភិបាល ត្រៀមទិញវ៉ាក់សាំងចំនួន១លានដូស (មួយលានដូស) ដើម្បីចាក់ជូនចំពោះអ្នកដែលធ្វើការ នៅកន្លែងដែលមានហានិភ័យខ្ពស់ និងអ្នកដែលមានហានិភ័យ។ ក្នុងចំណោមវ៉ាក់សាំង១លានដូស ចាក់បានត្រឹមតែមនុស្ស៥០ម៉ឺននាក់ប៉ុណ្ណោះ (ព្រោះម្នាក់ត្រូវការចាក់២ដង) ក្នុងចំណោមប្រជាជនសរុបចំនួន១៦លាននាក់ ទាំងចាស់ទាំងក្មេង ដែលក្នុងនោះអាចមានមនុស្សប្រមាណ១០លាននាក់ត្រូវការចាក់វ៉ាក់សាំង។

ដំណាក់បន្ទាប់ រដ្ឋាភិបាលនឹងបន្តបញ្ជេញកញ្ចប់ថវិកា ក្នុងការទិញវ៉ាក់សាំងចាក់ជូនប្រជាជនទូទាំងប្រទេសជាបន្តបន្ទាប់ ៕

ដោយ ៖ សុខុម

ប្រទេសចិន ៖ យោងតាមសារព័ត៌មាន CGTN ចុះផ្សាយកាលពីថ្ងៃចុងសប្ដាហ៍កន្លងទៅនេះបានឱ្យដឹងថា ប្រទេសចំនួន១៥ បានចុះកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (Regional Comprehensive Economic Partnership) ឬហៅកាត់ RCEP រួចទៅហើយ ហើយដំណាក់កាលបន្ទាប់គឺការផ្ដល់សច្ចាប័នដែលនឹងត្រូវការប្រទេសជាសមាជិកអាស៊ានយ៉ាងតិចចំនួន៦ និងប្រទេសមិនមែនជាសមាជិកអាស៊ានចំនួន៣។

ទោះជាយ៉ាងណា វានៅតែតម្រូវឱ្យប្រទេសទាំង១៥ ឯកភាពគ្នាជាឯកច្ឆ័ន្ទចុងក្រោយលើនីតិវិធីនេះ។ កិច្ចព្រមព្រៀង RCEP នឹងចូលជាធរមាននៅខែកក្កដា ឆ្នាំ២០២១ បើឆាប់បំផុត មុនពេលមានប្រសិទ្ធភាពអនុវត្តន៍ត្រឹមដំណាច់ឆ្នាំ២០២១។ នេះជាការព្យាករបែបសុទិដ្ឋិនិយមរបស់លោក ចាង សាវកាង (Zhang Shaogang) អនុប្រធានក្រុមប្រឹក្សាចិន សម្រាប់ការលើកកម្ពស់ពាណិជ្ជកម្មអន្តរជាតិ (China Council for the Promotion of International Trade) ឬហៅកាត់ CCPIT ដែលជាស្ថាប័នលើកកម្ពស់ពាណិជ្ជកម្មធំបំផុតក្នុងប្រទេសចិន។

ស្ថាប័ននេះលើកកម្ពស់ពាណិជ្ជកម្មសេរីសម្រាប់អាជីវកម្មក្នុងស្រុក ហើយព្យាយាមបញ្ចុះបញ្ចូលឱ្យបណ្ដារដ្ឋាភិបាលបរទេសចូលរួមជាមួយខ្លួន។ ប៉ុន្តែស្ថាប័ននេះក៏ដើរតួនាទីជាអ្នកចរចាបង្កើតតំបន់ពាណិជ្ជកម្មសេរី (Free Trade Area) ហៅកាត់ FTA សម្រាប់បម្រើផលប្រយោជន៍ទាំងសម្រាប់រដ្ឋាភិបាល និងក្រុមហ៊ុនសាជីវកម្មផងដែរ។

លោក ចាង គឺជាសមាសភាពមួយរូបក្នុងក្រុមតំណាងចិន ដែលបានចរចាបង្កើតតំបន់ពាណិជ្ជកម្មសេរីចិន-អាស៊ាន (China-ASEAN FTA) ហើយពេលនេះកំពុងចរចាកិច្ចព្រមព្រៀង RCEP។ លោកបញ្ជាក់ថា លោកបានជួបជាមួយមិត្តៗអ្នកចរចាពាណិជ្ជកម្មមកពីបណ្ដាប្រទេសនៅអាស៊ីប៉ាស៊ីហ្វិកជាង១០ លើករួចមកហើយក្នុងរយៈពេលមួយឆ្នាំមកនេះ។

អ្នកនាង ធាន វួយ (Tian Wei) ពិធីការិនីប្រចាំបណ្ដាញស្ថានីយទូរទស្សន៍ (China Global Television Network) ហៅកាត់ CGTN បានជជីកសួរលោក ចាង ដើម្បីចង់ដឹងឱ្យកាន់តែច្បាស់ថា តើកិច្ចព្រមព្រៀង RCEP អាចជំរុញពាណិជ្ជកម្មសេរីទូទាំងសកលលោកដោយវិធីណា។

ជាការឆ្លើយតប លោក ចាង បានពន្យល់ថា កិច្ចព្រមព្រៀង RCEP ប្រសូត្រចេញពីការប្រឹងប្រែងបង្កើតកិច្ចព្រមព្រៀងតូចៗក្នុងរយៈពេលរាប់ទសវត្សរ៍មកនេះ។ លោកបន្តថា “តំបន់ពាណិជ្ជកម្មសេរីចិន-អាស៊ាន ជាកិច្ចព្រមព្រៀងដំបូងបែបនេះសម្រាប់ប្រទេសចិន។ ការចរចាបានចាប់ផ្តើមក្នុងឆ្នាំ២០០២ ហើយទទួលបានជោគជ័យក្នុងការបង្កើតតំបន់ពាណិជ្ជកម្មសេរីក្នុងឆ្នាំ២០១០”។

តំបន់ពាណិជ្ជកម្មសេរីនេះបានជំរុញឱ្យពាណិជ្ជកម្មផ្នែកមុខទំនិញរវាងប្រទេសចិន និងអាស៊ី
អាគ្នេយ៍កើនឡើង៤ដង ហើយពាណិជ្ជកម្មផ្នែកសេវាកម្មកើនឡើង១,៥ដង ចាប់តាំងពីមានប្រសិទ្ធភាពអនុវត្តន៍មក។ ទោះជាយ៉ាងណា តំបន់ពាណិជ្ជកម្មសេរីចិន-អាស៊ាន មិនមែនត្រឹមតែជាតំបន់ពាណិជ្ជកម្មសេរីដែលមាននៅក្នុងតំបន់ឡើយ ពោលគឺចិនថែមទាំងមានតំបន់ពាណិជ្ជកម្មសេរីជាមួយកូរ៉េខាងត្បូង និងនូវែសេឡង់ទៀតផង។ លោក ចាង គូសបញ្ជាក់ថា “កិច្ចព្រមព្រៀង RCEP នឹងនាំទម្លាក់ការយកពន្ធ ៩០% ឱ្យមកដល់ ០% នៅពេលកិច្ចព្រមព្រៀងនេះមានប្រសិទ្ធភាពអនុវត្តន៍”៕

ដោយ ណែ​ត

ភ្នំពេញៈ រដ្ឋាភិបាល​កម្ពុជា​បានធ្វើ​ច្បាប់ គោលនយោបាយ និង​ផែនការ​ចង្អុល​បង្ហាញផ្លូវ​ជាច្រើន ក្នុង​រយៈពេល​ជាង​ពីរ​ទសវត្សរ៍​កន្លងមក​នព ដើម្បី​ទាញ​លុយ​ពី​ហោប៉ៅ​អ្នកវិនិយោគ​ក្នុងស្រុក និង​ទាក់ទាញ​លំហូរ​ទុនវិនិយោគ​ផ្ទាល់​ពី​បរទេស (FDI)។

ប៉ុន្មាន​ឆ្នាំ​កន្លងមកនេះ វិនិយោគិន​ទាំង​ក្នុង និង​ក្រៅ​ស្រុក​បាន​បាន​បណ្ដាក់​ទុនវិនិយោគ​ជា​បន្តបន្ទាប់ នៅក្នុង​ប្រទេស​កម្ពុជា​ក្នុងនោះ​វិស័យ​អចលនទ្រព្យ ក៏​ទទួលបាន​ការវិនិយោគ​ច្រើន ពី​សំណាក់​វិនិយោគិន​ក្នុង និង​ក្រៅប្រទេស ដែល​ធ្វើឱ្យ​វិស័យនេះ រួមចំណែក​សំខាន់​ក្នុង​សេដ្ឋកិច្ចជាតិ ។

តើ​កត្តា​អ្វីដែល​វិនិយោគិន​បរទេស ត្រូវ​បណ្ដាក់​ទុនវិនិយោគ​នៅក្នុង​ប្រទេស​កម្ពុជា ជាពិសេស​ក្នុង​វិស័យ​អ​ល​ចនទ្រ​ព្យ?។

អ្នកជំនាញ​ក្នុង​វិស័យ​អចលនវត្ថុ​កម្ពុជា បានលើកឡើង​និង​ធ្វើការ​ប្រៀបធៀប​លក្ខ​ខ័​ណ្ឌ​វិនិយោគ​រវាង​ប្រទេស​កម្ពុ ជា​និង​ប្រទេស​នានា​ក្នុង​តំបន់​អាស៊ាន​ដែល​ភាគច្រើន​អះអាងថា ទីផ្សារ​កម្ពុជា​មាន​ភាព​ល្អប្រសើរ ហើយ​ផលចំណេញ​ពី​ការវិនិយោគ​នៅ​កម្ពុជា ខ្ពស់ជាង​បណ្តា​ប្រទេស​ក្នុង​តំបន់​នេះ។

អ្វីដែល​វិនិយោគិន​បរទេស តែងតែ​ចូលមក​បណ្ដាក់​ទុនវិនិយោគ ក្នុងប្រទេស​កម្ពុជា​គឺ​កម្ពុ​ជាមាន​លក្ខ​ខ័​ណ្ឌ​បើកចំហរ ចំពោះ​រាល់​វិនិយោគិន​មកពី​គ្រប់ទិសទី ព្រមទាំង​អាចដាក់​ទុនវិនិយោគ១០០ភាគរយ ដោយ​មិនចាំបាច់​មានការ​ចូល​ហ៊ុន ឬ​សហការ​ជាមួយ​វិនិយោគិន​ក្នុងស្រុក​ឡើយ ពិសេស​កត្តា​សុខសន្តិភាព និង​កំនើនសេដ្ឋកិច្ច ស្ថេរភាព​នយោបាយ​និង​សង្គម​ជា​ផ្នែក​ដ៏​សំខាន់ ដែល​អ្នកវិនិយោគ​អន្តរជាតិ​តែងតែ​សម្លឹង​ឃើញ។

លោក​ឧកញ៉ា​ចេង ខេង ប្រធាន​ក្រុមហ៊ុន​អចលនទ្រព្យ CPL បានឱ្យដឹង​កន្លងមក​ថា បើ​និយាយ​ពី​ស្ថានភាព​នៅក្នុង​ប្រទេស​កម្ពុ​ជា គឺមាន​ឱកាស​និង​សក្ដានុពល​ខ្លាំងណាស់ ដែល​ធ្វើឱ្យ​វិនិយោគិន​បរទេស​ចង់​មក​កម្ពុជា ក្នុងនោះ​កម្ពុជា​ជា​ប្រទេសមួយ​ដែល​ស្ថិតនៅ​ចំ​កណ្ដាល​អាស៊ាន​ហើយ​ងាយស្រួល ក្នុងការ​ដឹកជញ្ជូន​ទំនិញ​ទៅកាន់​ប្រទេស ក្នុង​តំបន់ តាមផ្លូវ​គោក ផ្លូវអាកាស​និង​ផ្លូវទឹក ។

លោក​បន្តថា “កម្ពុជា​ប្រៀបដូចជា​កូនក្រមុំ​មួយរូប​មិនទាន់​តែងខ្លួន ហើយអ្នកណាៗក៏​តែងតែ​ចង់បាន” ។ លោក​បន្តថា “អ្វីដែល​ធ្វើឱ្យ​វិនិយោគិន​បរទេស តែងតែ​ចង់​មក​បណ្ដាក់​ទុនវិនិយោគ​នៅក្នុង​ប្រទេស​កម្ពុជា ជាពិសេស​អចលនទ្រព្យ បើ​ប្រៀបធៀប​ទៅនឹង​ប្រទេសជិតខាង​វិញ​ឃើញថា តម្លៃ​អចលនទ្រព្យ​នៅ​កម្ពុជា នៅមាន​តម្លៃ​ទាប​ជាងគេ ដូច្នេះ​ពួកគេ​អាច​ស្វែងរក​អចលនទ្រព្យ ដើម្បី​ដាក់ទុន​វិនិយោគ​លើ​គម្រោងផ្សេងៗដែល​បាន​គ្រោងទុក” ។

ជាមួយគ្នានេះ​លោក​ច្រឹ​ក សុខ​នី​ម​ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា​ក៏បាន​លើកឡើង​ផងដែរ​ថា កម្ពុជា​នៅមាន​ឱកាស​ខ្ពស់ ក្នុងការ​ដាក់ទុន​វិនិយោគ ហើយ​វិនិយោគ​បរទេស​នៅតែ​ចង់​មក​ដាក់ទុន​វិនិយោគ ក្នុងប្រទេស​យើង​ទៅតាម​ជំនាញ​របស់​ពួកគេ។

លោក​បន្តថា “អ្វីដែល​កម្ពុជា​ត្រូវធ្វើ​ត្រៀម ដើម្បី​ទទួល​វិនិយោគិន​ដែល​នឹង​មក​បន្តបន្ទាប់​ជាពិសេស​ក្រោយ​ចប់​កូ​វីដ១៩ គឺ​ធនធាន ហេដ្ឋារចនាសម្ព័ន្ធ​ជាពិសេស​នោះ គឺ​ភាពស្របច្បាប់​នៃ​អចលនទ្រព្យ” ។

ជាមួយគ្នានេះ លោក​បណ្ឌិត​អ៊ិន ចាន់នី​ប្រធាន​សមាគម​ធនាគារ​កម្ពុជា​បាន​មានប្រសាសន៍​ឲ្យ​ដឹងផង​ដែរ​ថា អ្នកវិនិយោគ​អន្តរជាតិ មុនពេល​ពួកគេ​ទៅ​វិនិយោគ​នៅ​ប្រទេស​ណាមួយ ពួកគេ​តែងតែ​សម្លឹង​លើក​ត្តា​ចំនួន​បី ដូចជា កំនើនសេដ្ឋកិច្ច ស្ថេរភាព​នយោបាយ និង​ស្ថេរភាព​សង្គម។លោក​បន្តថា លើសពីនេះ ច្បាប់​វិនិយោគ​ច្បាប់​ព​ន្ឋ ក៏​ជា​ផ្នែក​សំខាន់​ដែល​អ្នកវិនិយោគ​ជាតិ អន្តរជាតិ​សិក្សា​ផងដែរ ដើម្បី​ធ្វើ​ឲ្យ​ប្រាកដថា ការបោះ​ទុនវិនិយោគរ​បស់​ពួកគេ​មិនមាន​ហានិភ័យ។

លោក​បន្តថា “ការ​ប្រែ​ក្លាយខ្លួនជា​ប្រទេស​មាន​ប្រាក់ចំណូល​មធ្យម​កម្រិត​ទាប ក៏​ជា​ផ្នែក​មួយ​ទាក់ទាញ​អ្នកវិនិយោគ​អន្តរជាតិ​ផងដែរ ព្រោះ​អ្នកវិនិយោគ​ពួកគេ​តែង​ស្វែងរក​ប្រាក់ចំណេញ ហេតុនេះ​ពួកគេ​មិន​ទៅកាន់​ប្រទេស​ក្រីក្រ​នោះទេ” ។

សម្ដេច​អគ្គមហាសេនាបតី​តេ​ជោ​ហ៊ុន សែន​នាយ​រក​ដ្ឋ​មន្ត្រី​នៃ​ព្រះរាជា​ណា​ចក​ក្រ​កម្ពុជា​ក៏បាន​មានប្រសាសន៍​កន្លងមក​ថា កម្ពុជា​ស្វាគមន៍​រាល់​វិនិយោគិន មកពី​គ្រប់ទិសទី​គ្រប់​ប្រទេស​លើ​ពិភពលោក ហើយ​កម្ពុជា​ក៏​ត្រៀម​មន្ត្រី ដើម្បី​រង់ចាំ​សម្រួល​រាល់​ការវិនិយោគ​ទាំងឡាយ​នៅក្នុង​ប្រទេស ដោយ​ផ្ដល់​លក្ខ​ខ័​ណ្ឌ​ងាយស្រួល​ដល់​បណ្ដា​ធុរជន​និង​វិនិយោគិន​ផងដែរ៕