ផ្សារហ៊ុនលើពិភពលោកហក់ឡើងខ្ពស់មិនធ្លាប់មាន បន្ទាប់ពីដំណឹងវិជ្ជមានអំពីវ៉ាក់សាំងកូវីដ១៩

ដោយ៖ សុខុម

អន្តរជាតិ៖ តម្លៃភាគហ៊ុនអាស៊ី បានហក់ឡើងខ្ពស់មិនធ្លាប់មាន ហើយភាគហ៊ុនសហរដ្ឋអាមេរិក ក៏បានហក់ឡើងដែរនៅថ្ងៃទី៩ ខែធ្នូនេះ នៅពេលបណ្ដាវិនិយោគិនបានតាមដានជាប់នូវដំណឹងវិជ្ជមានអំពីវ៉ាក់សាំងកូវីដ-១៩ និងការបន្តប្រឹងប្រែងទម្លាក់កញ្ចប់ថវិកាបន្ថែមទៀតដើម្បីស្ដារសេដ្ឋកិច្ច។ នេះបើយោងតាមទីភ្នាក់ងារព័ត៌មាន Reuters ចុះផ្សាយនៅថ្ងៃនេះ។

សន្ទស្សន៍ផ្សារហ៊ុនចេញដោយក្រុមហ៊ុនហិរញ្ញវត្ថុអាមេរិក MSCI បង្ហាញថា ភាគហ៊ុនអាស៊ីប៉ាស៊ីហ្វិក ក្រៅពីប្រទេសជប៉ុន បានហក់ឡើង ០,៥១% ហើយនៅខណៈមួយ សន្ទស្សន៍បានហក់ឡើងខ្ពស់រហូតដល់ ៦៤៦,១០% ដែលខ្ពស់បំផុតមិនធ្លាប់មាន។ ទន្ទឹមនេះ ភាគហ៊ុនទូទាំងសកលលោកក៏បានឡើងថ្លៃខ្ពស់មិនធ្លាប់មានដែរ។

តួយ៉ាង ភាគហ៊ុនអូស្រ្តាលី បានហក់ឡើង ០,៦៩% ផ្សារភាគហ៊ុន Nikkei របស់ជប៉ុន បានហក់ឡើង ១,០១% ភាគហ៊ុននៅប្រទេសចិន បានហក់ឡើង ០,១៥% ភាគហ៊ុនរបស់កូរ៉េខាងត្បូង បានហក់ឡើង ១,២៦% ជិតដល់កម្រិតខ្ពស់មិនធ្លាប់មាន។

ភាគហ៊ុន S&P 500 E-Mini របស់សហរដ្ឋអាមេរិក បានហក់ឡើង ០,១១% ក្នុងពាណិជ្ជកម្មនៅអាស៊ី បន្ទាប់ពីភាគហ៊ុននៅ Wall Street ហក់ឡើងខ្ពស់មិនធ្លាប់មានកាលពីថ្ងៃអង្គារសប្ដាហ៍នេះ។ ស្ថានភាពល្អប្រសើរនេះកើតមានឡើងដោយសារដំណឹងវិជ្ជមានអំពីវ៉ាក់សាំងកូវីដ-១៩ និងវឌ្ឍនភាពវិជ្ជមាននៅក្នុងកិច្ចចរចាទម្លាក់កញ្ចប់ថវិកាបន្ថែមដើម្បីស្ដារសេដ្ឋកិច្ចរបស់សហរដ្ឋអាមេរិក។

ងាកមករូបិយប័ណ្ណផោនរបស់អង់គ្លេស វិញក៏បានប្រែប្រួលជាវិជ្ជមានបន្តិចដែរ នៅមុនពេលកិច្ចចរចាជុំវិញកិច្ចព្រមព្រៀងពាណិជ្ជកម្មរវាងប្រទេសអង់គ្លេស និងសហភាពអឺរ៉ុប។

កាលពីកាលពីថ្ងៃអង្គារដើមសប្ដាហ៍នេះ ភាគហ៊ុន Dow Jones Industrial Average បានហក់ឡើង ០,៣៥% ភាគហ៊ុន S&P 500 E-Mini បានហក់ឡើង ០,២៨% ចំណែកឯភាគហ៊ុន Nasdaq Composite បានហក់ឡើង ០,៥%។

ខណៈពេលនេះក្រុមអ្នកធ្វើគោលបាយរបស់សហរដ្ឋអាមេរិក កំពុងបន្តចរចាជុំវិញការទម្លាក់កញ្ចប់ថវិកាបន្ថែមដើម្បីស្ដារសេដ្ឋកិច្ចដែលរងផលប៉ះពាល់ធ្ងន់ធ្ងរដោយសារការឆ្លងរាតត្បាតវីរុសកូវីដ-១៩។
ក្រុមមេដឹកនាំនៃគណបក្សទាំងពីរបានប្រកាន់ជំហរមាំថា ចាំបាច់ត្រូវតែឈានដល់ការចុះកិច្ចព្រមព្រៀងមួយឱ្យខាងតែបាន ប៉ុន្តែនៅពិភាក្សាគ្នានៅឡើយលើចំណុចលម្អិតមួយចំនួនរួមមានកញ្ចប់ជំនួយទម្លាក់ទៅឱ្យរដ្ឋនីមួយៗ អាជ្ញាធរមូលដ្ឋាន និងការការពារបំណុលអាជីវកម្ម៕

អ្នកជំនាញ ៖ តម្រូវការទីផ្សារជួលខុនដូនៅចុងឆ្នាំ២០២០មានការធ្លាក់ចុះខ្លាំង

ដោយ ៖ រ៉ាណេត
ភ្នំពេញ ៖ ស្ថិតនៅក្នុងត្រីមាសទី៤ ជាពិសេសក្នុងអំឡុងដែលកំពុប្រឈមនឹងព្រឹត្តិការណ៍សហគមន៍២៨វិច្ឆិកា ដែលកំពុងបន្តកើតមាននៅចុងឆ្នាំ២០២០នេះ តម្រូវការទីផ្សារជួលខុនដូត្រូវបានគេមើលឃើញថា មានការធ្លាក់ចុះខ្លាំងបើធៀបទៅនឹងត្រីមាសទី២ និងត្រីមាសទី៣នៃឆ្នាំនេះ។

នាយិកាប្រចាំប្រទេសក្រុមហ៊ុនអន្តរជាតិ CBRE Cambodia លោកស្រី អាន សុធីតា បានមានប្រសាសន៍នៅរសៀលថ្ងៃទី៩ ខែធ្នូ ឆ្នាំ២០២០នេះថា ស្រដៀងគ្នាទៅនឹងទីផ្សារជួលអាផាតម៉ិនដែលកំពុងបង្ហាញពីសញ្ញាដាំក្បាលចុះនោះ ងាកមកការជួលខុនដូក៏កំពុងមានការធ្លាក់ចុះគួរឱ្យកត់សម្គាល់ផងដែរ ពោលគឺអត្រាបានធ្លាក់រហូតប្រមាណ៨០ភាគរយបើធៀបទៅនឹងចុងឆ្នាំ២០១៩។

លោកស្រីបានបញ្ជាក់ថា “យើងទទួលស្គាល់ថាទីផ្សារខុនដូចាប់ផ្តើមមានការទទួលស្គាល់ និងយល់ដឹងពីសំណាក់ប្រជាជនខ្មែរក្នុងស្រុកជាបណ្តើរៗ ប៉ុន្តែសម្រាប់ជនជាតិខ្មែរគឺមិនសូវចូលទៅរស់នៅនោះឡើយ ហើយតម្រូវការជាក់ស្ដែងគឺមានតែជនជាតិបរទេសតែប៉ុណ្ណោះ។ ដោយសារតែបញ្ហាប្រឈមនៃជំងឺជាសាកលដែលមានការបិទជើងហោះហើរ បិទប្រទេស បានធ្វើឱ្យជនបរទេសទាំងនោះផ្អាកចរាចរណ៍ ដូច្នេះហើយបានជាតម្រូវការជួលខុនដូមានការធ្លាក់ចុះ”។

លោកស្រីបន្តថា “អ្វីដែលសំខាន់នៅក្នុងដំណាក់កាលនេះ ដែលកម្ពុជាប្រឈមទៅនឹងព្រឹត្តិការណ៍សហគមន៍២៨វិច្ឆិកានៅចុងឆ្នាំនេះ មានជនបរទេសមួយចំនួនដែលកំពុងរស់នៅក្នុងប្រទេសកម្ពុជា និងស្នាក់នៅក្នុងខុនដូ បានសម្រេចចិត្តចេញទៅជួលផ្ទះនៅជាយក្រុងបើទោះជាកិច្ចសន្យានៃការជួលខុនដូមិនទាន់បញ្ចប់ក៏ដោយ ព្រោះពួកគេមានភាពភ័យខ្លាចក្នុងការប្រើប្រាស់អគាររួមគ្នា ប្រើជណ្តើរយន្តរួមគ្នាដែលបញ្ហាប្រឈម”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា “វាប្រាកដជាធ្លាក់ចុះ ព្រោះអ្នកជួលដែលជាជនជាតិបរទេសនោះបានចាកចេញទៅស្រុករបស់ពួកគាត់ និងមិនទាន់វិលត្រឡប់មកកម្ពុជាបានវិញនោះទេ”។

លោកបន្តថា “ក្នុងតំណាក់កាលនេះ មិនថាចំពោះតែការជួលនោះទេ ការលក់ក៏ធ្លាក់ចុះខ្លាំងដូចគ្នា ប៉ុន្តែវានឹងវិលទៅរកភាពល្អប្រសើរវិញ បន្ទាប់ពីការគ្រប់គ្រងត្រូវបានធ្វើឡើងប្រកបដោយប្រសិទ្ធភាព។ តាមការប៉ាន់ស្មានរបស់ខ្ញុំ អាចនៅពាកើកណ្តាលឆ្នាំ ឬចុងឆ្នាំ២០២១ ទើបទីផ្សារខុនដូចាប់មានដំណើរការឡើងវិញជាបណ្តើរៗបើទោះជាការចែកចាយវ៉ាក់សាំងត្រូវបានអនុវត្តជាផ្លូវការក៏ដោយ”៕

អូស្ត្រាលីផ្តល់ហិរញ្ញប្បទានឥតសំណងប្រមាណ ៨៥លានដុល្លារដល់កម្ពុជា

ដោយ៖ រ៉ាណេត

ភ្នំពេញ៖ រដ្ឋាភិបាលអូស្ត្រាលីគ្រោងផ្តល់ហិរញ្ញប្បទានឥតសំណងប្រមាណ ៨៥ លានដុល្លារអាមេរិកដល់កម្ពុជា ដែលជាផ្នែកមួយនៃកម្មវិធីសហប្រតិបត្តិការទ្វេភាគីដែលកំពុងអនុវត្ត។ តាមរយៈផែនការអភិវឌ្ឍន៍សម្រាប់ឆ្លើយតបនឹងជំងឺកូវីដ-១៩ នៅកម្ពុជា (Camboda COVID-19 Development Response Plan)នេះ នឹងជំរុញដល់ការវិនិយោគលើចង្កោមសកម្មភាពនៃសសរស្តម្ភទាំង៣ ដើម្បីស្តារសេដ្ឋកិច្ច និងសង្គមកម្ពុជា។

ឯកអគ្គរាជទូតអូស្ត្រាលីប្រចាំកម្ពុជា លោក ផាប្លូ កាង បានមានប្រសាសន៍ថ្ងៃទី៩ ខែធ្នូ ឆ្នាំ២០២០ ក្នុងកម្មពិធីការប្រកាសផ្សព្វផ្សាយ និងដាក់ឱ្យអនុវត្តផែនការអភិវឌ្ឍន៍សម្រាប់ឆ្លើយតបនឹងជំងឺកូវីដ-១៩ នៅកម្ពុជាថា រដ្ឋាភិបាលអូស្ត្រាលីនឹងវិនិយោគលើចង្កោមសកម្មភាពនៃសសរស្តម្ភទាំង ៣ ដើម្បីស្តារសេដ្ឋកិច្ច និងសង្គមកម្ពុជា ពីវិបត្តិជំងឺកូវី-១៩។
ផែនការនេះបានកំណត់អំពីការគាំទ្ររបស់អូស្រ្តាលីសម្រាប់ការស្ដារកម្ពុជា តាមរយៈសសរស្តម្ភ ៣ គឺការធានាសន្តិសុខផ្នែកសុខាភិបាល ស្ថិរភាពសង្គមនិងបរិយាប័ន្ន និងការស្តារសេដ្ឋកិច្ច។

លោកបានថ្លែងថា “ចង្កោមសកម្មភាពទាំងនោះរួមមានការធ្វើឱ្យប្រសើរឡើងគុណភាព និងភាពងាយស្រួលក្នុងការទទួលបានសេវាសុខភាពតាមមន្ទីពេទ្រ ការលើកកម្ពស់យេនឌ័រ និងពិការភាព ការជំរុញផលិតកម្មស្បៀង ការគាំទ្រដល់ការផ្លាស់ប្តូរប្រភពថាមពល និងការចូលរួមរបស់ប្រជាពលរដ្ឋជាមួយអាជ្ញាធរមូលដ្ឋាន ដើម្បីឆ្លើយតបនឹងជំងឺកូវីដ-១៩”។

ក្នុងស្មារតីភាពជាដៃគូ រដ្ឋាភិបាលអូស្ត្រាលី ដោយសហការជាមួយរាជរដ្ឋាភិបាលកម្ពុជា តាមរយៈកិច្ចពិគ្រោះយោបល់ជាបន្តបន្ទាប់ បានរៀបចំផែនការនេះដែលមានសុពលភាពរហូតដល់ខែមិថុនា ឆ្នាំ២០២២ ដើម្បីតម្រង់ទិសការគាំទ្ររបស់អូស្ត្រាលី សម្រាប់ស្ថារសេដ្ឋកិច្ច-សង្គមកម្ពុជា ពីវិបត្តិជំងឺកូវី២១៩ ។

ដើម្បីអនុវត្តផែនការនេះ អូស្ត្រាលីគ្រោងផ្តល់ហិរញ្ញប្បទានឥតសំណងប្រមាណ ៨៥ លានដុល្លារអាមេរិក ដល់កម្ពុជា ដែលជាផ្នែកមួយនៃកម្មវិធីសហប្រតិបត្តិការទ្វេភាគីដែលកំពុងអនុវត្ត។ ហិរញ្ញប្បទាននេះជាការផ្តល់ បន្ថែមលើហិរញ្ញប្បទានប្រមាណ ១៧០ លានដុល្លារអាមេរិក ដែលលោក Scott Morrison នាយករដ្ឋមន្ត្រី អូស្ត្រាលី បានប្រកាសគាំទ្រដល់ការធ្វើសមាហរណកម្មសេដ្ឋកិច្ច និងការអភិវឌ្ឍរបស់បណ្តាប្រទេសក្នុងតំបន់ទន្លេមេគង្គ និងហិរញ្ញប្បទានប្រមាណ ៤៤៥ លានដុល្លារអាមេរិក ដែលអូស្ត្រាលីបានប្តេជ្ញាផ្តល់សម្រាប់ការ ចែកចាយវ៉ាក់សាំងជំងឺកូវីង-១៩ ក្នុងតំបន់អាស៊ីអាគ្នេយ៍ និងប៉ាស៊ីហ្វិក។

លោកឈៀង យ៉ាណារ៉ារដ្ឋមន្ត្រីប្រតិភូអមនាយករដ្ឋមន្ត្រី និងអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា បានលើកឡើងថា រាជរដ្ឋាភិបាលកម្ពុជាបានវាយតម្លៃខ្ពស់ចំពោះគោលដៅចម្បងនៃផែនការនេះ ក្នុងការជួយការពារប្រជាជនកម្ពុជា ដែលរងផលប៉ះពាល់ពីជំងឺកូវីដ-១៩ និងគាំទ្រការស្តារសេដ្ឋកិច្ច និងសង្គមកម្ពុជា ឆ្ពោះទៅកាន់ឋានៈជាប្រទេសមានចំណូលមធ្យម ប្រកបដោយភាពធន់នឹងវិបត្តិ និងបរិយាប័ន្ន ។

ក្នុងពិធីនេះ លោករដ្ឋមន្ត្រី និងលោកឯកអគ្គរាជទូត បានចុះហត្ថលេខាលើសេចក្តីថ្លែងការណ៍រួម ដើម្បីធានាប្រសិទ្ធភាពនៃការអនុវត្តផែនការអភិវឌ្ឍន៍សម្រាប់ឆ្លើយតបនឹងជំងឺភ្វី-១៩ នៅកម្ពុជា។

លោកឈៀង យ៉ាណារ៉ា បានបញ្ជាក់បន្ថែមថា អូស្ត្រាលី គឺជាដៃគូអភិវឌ្ឍន៍បុរេសកម្មមួយ ដែលបានចាត់វិធានការតាំងពីដើមដំបូង ក្នុងការរៀបចំផែនការអភិវឌ្ឍន៍សម្រាប់ឆ្លើយតបនឹងជំងឺកូវីដ-១៩នេះ។ ផែនការ
នេះបានបញ្ជាក់ពីកិច្ចសហការដ៍សំខាន់ក្នុងភាពជាដៃគូសម្រាប់ការអភិវឌ្ឍរវាងរាជរដ្ឋាភិបាលកម្ពុជា និងរដ្ឋាភិបាលអូស្ត្រាលី។

លោកបានថ្លែងបន្តថា “រាជរដ្ឋាភិបាលកម្ពុជា បានវាយតម្លៃខ្ពស់ចំពោះផែនការនេះ ពិសេសសកម្មភាពអាទិភាព ដែលផ្តោតលើវិស័យសំខាន់ទាំង៣ ដែលមានសង្គតិភាពជាមួយនឹងផែនការរបស់រាជរដ្ឋាភិបាល ក្នុងការស្តារសេដ្ឋកិច្ច និងសង្គមកម្ពុជា ក្រោយវិបត្តិជំងឺកូវីដ-១៩”៕

អភិបាលស្រុកបន្ទាយស្រី បញ្ជាក់ពីគម្រោងដីអភិវឌ្ឍន៍មានច្បាប់ និងគ្មានច្បាប់ដែលកំពុងកើតមាន

ដោយ ៖ រ៉ាណេត
សៀមរាប ៖ ស្របទៅនឹងផែនការនៃការអភិវឌ្ឍន៍ប្រែក្លាយស្រុកបន្ទាយស្រីពីតំបន់ដាច់ស្រយ៉ាលទៅជាក្រុងថ្មីនៃខេត្តសៀមរាប សម្រាប់តែនៅក្នុងស្រុកបន្ទាយស្រីបានកើតមានគម្រោងអភិវឌ្ឍន៍ប្រែក្លាយដីកសិកម្មទៅជាដីលំនៅដ្ឋានជាច្រើនគម្រោង ដែលក្នុងនោះមានគម្រោងខ្លះស្របច្បាប់ត្រឹមត្រូវ ហើយគម្រោងខ្លះទៀតមិនទាន់មានច្បាប់អនុញ្ញាតនោះឡើយ។

អភិបាលស្រុកបន្ទាយស្រី លោក ឃឹម ហ្វីណង់ តាមរយៈបណ្តាញទំនាក់ទំនងនាថ្ងៃទី៩ ខែធ្នូ ឆ្នាំ២០២០បានលើកឡើងថា កន្លងមករដ្ឋបាលស្រុកបន្ទាយស្រីបានផ្អាករាល់គម្រោងអភិវឌ្ឍដីទាំងអស់នៅក្នុងស្រុកជាបណ្តោះអាសន្នសិន ដោយសារតែបានរកឃើញថាសុទ្ធតែមិនទាន់មានច្បាប់អនុញ្ញាតត្រឹមត្រូវ។

លោកបន្តថា ការហាមឃាត់នេះ គឺដើម្បីធានា និងការពារផលប្រយោជន៍របស់ប្រជាពលរដ្ឋតែប៉ុណ្ណោះ ជៀសវាងទទួលរងផលប៉ះពាល់ ខាតបង់ទ្រព្យសម្បត្តិ ពីការទិញ ឬវិនិយោគទៅលើគម្រោងដែលមិនមានបទដ្ឋានត្រឹមត្រូវ ឬជាគម្រោងដែលជាប់គាំងមិនដំណើរការ។

លោក ឃឹម ហ្វីណង់ បានបញ្ជាក់ថា “ជំហរតឹងរុឹងរបស់រដ្ឋបាលស្រុក គ្រាន់តែដើម្បីធានាភាពគ្រប់ជ្រុងជ្រោយនៃគោលការណ៍បច្ចេកទេស និងលក្ខខណ្ឌតម្រូវនៃច្បាប់តែប៉ុណ្ណោះ មិនមែនមានន័យថាស្រុកបន្ទាយស្រីមិនស្វាគមន៍អ្នកវិនិយោគនោះទេ ហើយក៏មិនមានន័យថា គ្រប់គម្រោងអភិវឌ្ឍន៍ដីទាំងអស់សុទ្ធតែជាគម្រោងដែលមានបញ្ហានោះដែរ។ តួយ៉ាង ដូចជាគម្រោងរបស់ក្រុមហ៊ុន អង្គរលែនម៉ាក ក្រុមហ៊ុន ឡេង ណាវ៉ាត្រា ក្រុមហ៊ុនក្រវ៉ាន់សៀមរាបរេសុីដិន និងក្រុមហ៊ុនមួយចំនួនទៀត ដែលសុទ្ធសឹងតែជាគម្រោងខ្នាតធំ មានភាពច្បាស់លាស់ត្រឹមត្រូវ និងបានផ្តល់ការសហការយោគយល់តាមសំណូមពររបស់រដ្ឋបាលស្រុក និងយល់ព្រមរង់ចាំបំពេញនីតិវិធីខាងផ្លូវច្បាប់រួចជាមុនសិន មុននឹងប្រកាសលក់ជាផ្លូវការ”។

រដ្ឋបាលស្រុកតែងព្យាយាមលើកទឹកចិត្តដល់រាល់ការវិនិយោគមកក្នុងបន្ទាយស្រី និងផ្តល់កិច្ចសហប្រតិបត្តិការជាដៃគូយ៉ាងជិតស្និទ្ធ ព្រោះគោលដៅចុងក្រោយនៃការអភិវឌ្ឍ គឺគ្មានអ្វីក្រៅពីការទាក់ទាញអ្នកវិនិយោគមកក្នុងស្រុក ដើម្បីផ្លាស់ប្តូរជីវភាពរបស់ប្រជាពលរដ្ឋតាមរយៈការបង្កើតការងារ និងមុខរបរនោះឡើយ។ ហេតុដូច្នេះហើយទើបរដ្ឋបាលស្រុកបានសម្រួល និងអនុញ្ញាតឱ្យក្រុមហ៊ុនអភិវឌ្ឍន៍ដីមួយចំនួនដាក់ពាក្យស្នើសុំសាងសង់សំណង់ក្រោម ៥០០ម៉ែត្រការ៉េ នៅលើដីកម្មសិទ្ធិរបស់ខ្លួន ព្រមទាំងរៀបចំប្រព័ន្ធផ្លូវ-ភ្លើងនៅក្នុងបរិវេណដីគម្រោងរបស់ខ្លួនជាបណ្តើរៗ ដើម្បីចំណេញពេលវេលាក្នុងអំឡុងពេលដែលត្រូវរង់ចាំលិខិតអនុញ្ញាតជាផ្លូវការ៕

ក្រុមហ៊ុន AirAsia បង្ហាញសុទិដ្ឋិនិយមចំពោះវិស័យអាកាសចរណ៍ក្នុងតំបន់អាស៊ាននៅឆ្នាំក្រោយ

ដោយ៖ ប៊ី
អន្តរជាតិ៖ លោក Tony Fernandes នាយកប្រតិបត្តិក្រុមហ៊ុន AirAsia Group បាននិយាយនៅក្នុងបទសម្ភាសន៍នៅលើទូរទស្សន៍ Bloomberg កាលពីថ្មីៗនេះថា ក្រុមហ៊ុន AirAsia Group កំពុងផ្តោតលើការពង្រីកមូលដ្ឋានរបស់ខ្លួននៅក្នុងតំបន់អាស៊ីអាគ្នេយ៍ និងកំពុងពិភាក្សាអំពីការចាប់ផ្តើមក្រុមហ៊ុនអាកាសចរណ៍ថ្មីចំនួនបីនៅក្នុងតំបន់។

លោក Fernandes រំពឹងថា ការធ្វើដំណើរតាមផ្លូវអាកាសនឹងវិលត្រឡប់ទៅរកសភាពដើមវិញក្នុងរយៈពេល ៦ ទៅ ១២ខែខាងមុខ។ លោកបានមានប្រសាសន៍ថា ប្រជាជនចង់ធ្វើដំណើរ និងតម្រូវការគឺនៅទីនោះស្រាប់ ដែលជារឿងសំខាន់បំផុត។

លោកបានបន្តថា ឧទាហរណ៍ទីផ្សារក្នុងស្រុករបស់ប្រទេសថៃបានវិលត្រឡប់ទៅរកសភាពដើមវិញមុនខែធ្នូ ឆ្នាំក្រោយ។ ថ្លៃសំបុត្រធ្វើដំណើរនឹងនៅដដែល។

លោក បានថ្លែងថា “ផែនការរបស់ក្រុមហ៊ុនអាកាសចរណ៍នេះ ដើម្បីបង្កើនថវិកាដល់ ២,៥ ពាន់លានរីងហ្គីដ គឺស្ថិតនៅក្នុងកាលវិភាគរបស់ខ្លួន។ យើងកំពុងមានសុទិដ្ឋិនិយមសម្រាប់ឆ្នាំ២០២១”។

ក្រុមហ៊ុន AirAsia កំពុងបំលែងយន្ដហោះជាច្រើនទៅក្នុងយន្ដហោះដឹកទំនិញ ដើម្បីបំពេញបន្ថែមអាជីវកម្មអ្នកដំណើរ។
លោក Fernandes បាននិយាយថា ក្រុមហ៊ុនកំពុងវាយតម្លៃក្រុមហ៊ុនបណ្តាក់ទុន AirAsia India របស់ខ្លួនជាមួយក្រុមហ៊ុន Tata ខណៈពេលមានការពង្រីកទំនាក់ទំនងរបស់ពួកគេនៅក្នុងអាជីវកម្មឌីជីថល។

លោក បានថ្លែងថា “នៅពេលត្រឹមត្រូវមួយមកដល់ យើងនឹងធ្វើសេចក្តីប្រកាស ប៉ុន្តែកម្លាំងរបស់យើងគឺនៅអាស៊ីអាគ្នេយ៍ ហើយនោះជាកន្លែងដែលការពង្រីករបស់យើងក្នុងរយៈពេល ២ ទៅ ៣ ឆ្នាំខាងមុខទៀត”៕

ក្រុមហ៊ុនអភិវឌ្ឍន៍ឆ្នេរមាសតេជោសែនកំពុងពន្លឿនសកម្មភាពសាងសង់ និងបញ្ចប់ឱ្យបានឆាប់រហ័សតាមផែនការ

ដោយ ៖ រ៉ាណេត
កំពត ៖ ឆ្នេរមាសតេជោសែន ជាឆ្នេរកម្សាន្តដ៏ធំលើកដំបូងបង្អស់របស់ខេត្តកំពត ដែលត្រូវបានបង្កើតឡើងដោយកិច្ចសហការរវាងរដ្ឋបាលខេត្តជាមួយក្រុមហ៊ុនដៃគូអភិវឌ្ឍន៍ក្នុងរយៈពេលប្រមាណ២ឆ្នាំនៃការស្ថាបនា ស្ថិតនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត។

អភិបាលខេត្តកំពត លោក ជាវ តាយ បានមានប្រសាសន៍ឱ្យដឹងនៅថ្ងៃទី៩ ខែធ្នូ ឆ្នាំ២០២០ថា ដោយសំអាងផ្អែកលើតួនាទីភារកិច្ចរបស់អនុគណៈកម្មការនីមួយៗដែលសម្រេចនៅពេលខាងមុខនេះ នឹងបង្កឱ្យមានភាពងាយស្រួលក្នុងការអនុវត្តន៍ការងារត្រួតពិនិត្យ និងគ្រប់គ្រងការអភិវឌ្ឍរបស់ក្រុមហ៊ុន ( IGB) សំដៅធ្វើយ៉ាងណាឱ្យគម្រោងមួយនេះមានការអភិវឌ្ឍបានឆាប់រហ័ស។

បន្ទាប់ពីសម្រេចបានលទ្ធផលលេចចេញជារូបរាងឡើងពិតប្រាកដក្រោយការស្ថាបនា តំបន់ឆ្នេរមាសតេជោសែន នឹងអាចទាក់ទាញប្រជាពលរដ្ឋក៏ដូចជាភ្ញៀវទេសចរជាតិ-អន្តរជាតិ មកសម្រាកលំហែកម្សាន្តនៅពេលខាងមុខឆាប់ៗនេះជាក់ជាមិនខាន។

លោកអភិបាលខេត្តបានមានប្រសាសន៍ថា ភ្ញៀវទេសចរ និងប្រជាពលរដ្ឋជាច្រើន កំពុងទន្ទឹងរង់ចាំមើល ថាតើឆ្នេរខ្សាច់កម្សាន្តរបស់ខេត្តកំពត ស្អាត និងទាក់ទាញដល់កម្រិតណា ស្របពេលដែលកន្លែងកម្សាន្ត ដ៏ទាក់ទាញថ្មីៗជាច្រើន ត្រូវបានបង្កើត ឡើងជាហែហូរ។ ប៉ុន្តែមកដល់ថ្ងៃនេះ ឆ្នេរសិប្បនិម្មិត ដែលត្រូវបានកំណត់ឈ្មោះថាឆ្នេរមាសសម្តេចតេជោ នោះនៅមិនទាន់ស្ថាបនារួចរាល់នៅឡើយទេ។

ជាមួយគ្នានេះ លោកក៏បានបញ្ជាក់ផងដែរថា អ្វីដែលរាជរដ្ឋាភិបាលបានសម្រេចថា ត្រូវអភិវឌ្ឍហើយ ត្រូវនាំគ្នាសហការ ជំរុញដល់ដំណើរការអភិវឌ្ឍន៍នោះ ដោយត្រូវធ្វើជាបណ្តើរៗ មិនអាចរង់ចាំ ឬប្រើលេសច្រើនបានទេ ព្រោះនៅក្នុងកិច្ចសន្យាសុំធ្វើការអភិវឌ្ឍ ក៏បានកំណត់ពេលច្បាស់លាស់រួចហើយដែរ។

ដោយឡែកសម្រាប់ក្រុមហ៊ុនត្រូវយកចិត្តទុកដាក់បង្កើនល្បឿនការងារ បង្កើនកម្លាំង គ្រឿងចក្រឱ្យ បានច្រើន ដើម្បីបញ្ចប់ការងារតាមផែនការ ដែលបានកំណត់ទុក ប៉ុន្តែត្រូវគោរពតាមគំនូសប្លង់បច្ចេកទេស ដែលមានការចូលរួមសហការពីជំនាញពាក់ព័ន្ធ ដើម្បីកាត់បន្ថយផលប៉ះពាល់ឱ្យនៅតិចបំផុត។

គម្រោងអភិវឌ្ឍបង្កើតតំបន់ឆ្នេរខ្សាច់ថ្មីសិប្បនិមិត្តនេះ រដ្ឋបាលខេត្តកំពត បានចាប់ដៃគូជាមួយនឹងក្រុមហ៊ុនវិនិយោគឯកជន (IGB) Cambodia CO.LTD ដែលបានអនុវត្តអស់រយៈពេលប្រមាណ ២ឆ្នាំរួចមកហើយ លើផ្ទៃដីប្រមាណ ២៣៤ហិកតា ដោយមានការបែងចែកផលប្រយោជន៍តាមសមាមាត្រផ្ទៃដី៦០ភាគរយ សម្រាប់ក្រុមហ៊ុន IGB Cambodia CO.LTD និងផ្ទៃដី៤០ភាគរយទុកជូនរដ្ឋក្រោមការ គ្រប់គ្រងរបស់រដ្ឋបាលខេត្តកំពត ពោលគឺក្រុមហ៊ុន IGB គ្រប់គ្រងលើផ្ទៃដីទំហំ១២០ហិកតា រដ្ឋបាលខេត្តកំពតទំហំផ្ទៃដី ៨០ហិកតា និង៣៤ហិកតាទៀតសម្រាប់កសាងហេដ្ឋារចនាសម្ព័ន្ធ៕

អគារមជ្ឈមណ្ឌលពាណិជ្ជកម្មតម្លៃជាង១ពាន់លានដុល្លារនៅក្នុងទីក្រុងឡុងបញ្ចប់ការសាងសង់

ដោយវុត្ថា

ទីក្រុងឡុងដ៏ៈ ផែនការសាងសង់គម្រោងអគារពាណិជ្ជកម្មធំៗ មួយចំនួននៅក្នុងលើពិភពលោកសម្រាប់ឆ្នាំ២០២០ ប្រហែលជាត្រូវផ្អាកបណ្តោះអាសន្ន ដែលបង្កឡើងដោយជំងឺកូវីដ១៩ ប៉ុន្តែសម្រាប់ការាអគារខ្ពស់ជាងគេមួយ ក្នុងទីក្រុងឡុងដ៏ត្រូវបានបញ្ចប់ការសាងសង់។

យោងតាមការចុះផ្សាយពីគេហទំព័រ www.timeout.com បានឱ្យដឹងថា គម្រោងសាងសងអគារមជ្ឈមណ្ឌល 22 Bishopsgate បានឈានដល់ដំណាក់កាលបញ្ចប់ ដែលធ្វើឱ្យអាគារខ្ពស់ជាងគេនេះ នៅទីក្រុងឡុងមានកម្ពស់២៧៨ ម៉ែត្រ។

មជ្ឈមណ្ឌលនេះ ត្រូវបានប្រើប្រាស់មុខងារជាអគារិយាល័យ ដែលខ្ពស់ជាងគេបំផុតនៅក្នុងប្រទេសអឺរ៉ុប។ អគារនេះមានលក្ខណៈពិសេសជាច្រើន រួមមាន កន្លែងហាត់ប្រាណ ឧទ្យានមួយដែលមានទីធ្លា១.៧០០ម៉ែត្រការ៉េ ផ្សារទំនើប អាហារដ្ឋាន ដែលនឹងក្លាយជាវិចិត្រសាលទស្សនាសាធារណៈ ដោយឥតគិតថ្លៃខ្ពស់បំផុតនៅទីក្រុងឡុង។

អគារ 22 Bishopsgate មានកំពស់២៧៨ ម៉ែត្រ ស្មើនឹងកំពស់៦២ ជាន់ ត្រូវបានគេស្គាល់ថា TwentyTwo រចនាឡើងដោយ ក្រមហ៊ុន PLP Architecture ដែលបានរៀបចំផែនការរចនាប្លង់សំរាប់អាគារ Nova ដែលមានលក្ខណៈស្រដៀងនឹងអាគារ Victoria ។

អគារ 22 Bishopsgate នេះបានចាប់ផ្តើមសាងសង់នៅឆ្នាំ២០១៧ ហើយគ្រោងនឹងបើកដំណើរការជាផ្លូវការ នៅក្នុងឆ្នាំ២០២១ខាងមុខនេះ ដែលធ្វើឱ្យទីក្រុងឡុងដ៏កាន់តែមានភាពទាក់ទាញកាន់ខ្លាំង៕

ខេត្តកំពតបន្តភាពទាក់ទាញលើគម្រោងវិនិយោគធំៗតម្លៃរាប់សិបលានដុល្លារ

ដោយៈ រ៉ាណេត

កំពតៈ ស្របទៅនឹងចក្ខុវិស័យរបស់រាជរដ្ឋាភិបាលកម្ពុជា ក្នុងការប្រែក្លាយខេត្តជាប់មាត់សមុទ្រ ឱ្យទៅជាតំបន់កម្សាន្តដ៏ទាក់ទាញលំដាប់អន្តរជាតិ បច្ចុប្បនេះ ខេត្តកំពត បានបន្តភាពទាក់ទាញលើគម្រោងវិនិយោគ និងអភិវឌ្ឍន៍ធំៗជាច្រើនដែលមានតម្លៃរាប់សិបលានដុល្លារ ដែលបម្រើដល់វិស័យទេសចរណ៍។

ភ្ជាប់ជាមួយនឹងការទទួលបានគម្រោងវិនិយោគ និងអភិវឌ្ឍន៍ជាច្រើននៅទូទាំងខេត្តកំពត លោកឧកញ៉ា តេង រិទ្ធី ដែលជាអគ្គនាយកក្រុមហ៊ុនអចលទ្រព្យ R Investment Group នៅល្ងាចថ្ងៃទី៨ ខែធ្នូ ឆ្នាំ២០២០បានបង្ហាញពីក្ដីសាទរ ទៅនឹងអ្វីដែលខេត្តកំពតទទួលបាននៅពេលនេះ ជាមួយនឹងការបញ្ជាក់ថា គម្រោងបណ្តាក់ទុនវិនិយោគដែលមានទំហំជាច្រើនលានដុល្លារខាងលើនេះ ភាគច្រើនជាការវិនិយោគ ទៅលើការបង្កើតតំបន់កម្សាន្តទ្រង់ទ្រាយធំ រួមជាមួយនឹងការសាងសង់លំនៅដ្ឋានបែបលំហែរកាយ។

លោកឧកញ៉ាបន្តទៀតថា “បច្ចុប្បន្ននេះមានអ្នកវិនិយោគជាច្រើន បានទម្លាក់ទុនធ្វើការអភិវឌ្ឍតំបន់មួយចំនួន ឱ្យក្លាយទៅជាតំបន់កម្សាន្តបែបកែច្នៃ និងធម្មជាតិ ជាពិសេសតំបន់ដែលស្ថិតនៅជាប់មាត់ព្រែក ជាប់សមុទ្រ និងតំបន់ក្បែរជើងភ្នំ” ។ លោកបន្តថា “ជាមួយនឹងសកម្មភាពដែលកំពុងបន្តអភិវឌ្ឍន៍ ក៏មានគម្រោងថ្មីបន្តបន្ទាប់ទៀត ដែលមិនយូរមិនឆាប់ខេត្តកំពត នឹងក្លាយទៅជាទីតាំងគោលដៅទេសចរណ៍ ដ៏មានប្រជាប្រិយភាពជាក់មិនខាន” ។

ជាមួយនឹងការបង្ហាញពីសក្ដានុពល ក្នុងការវិនិយោគខាងលើនេះ លោកឧកញ៉ា តេង រិទ្ធី ក៏បានបញ្ជាក់ថា សម្រាប់ការអភិវឌ្ឍលើវិស័យលំនៅដ្ឋាន បែបលំហែរកាយនៅពេលបច្ចុប្បន្ន ត្រូវបានធ្វើឡើងជាច្រើនគម្រោង និងច្រើនកម្រិត ហើយតម្លៃក៏អាស្រ័យទៅតាមគម្រោងផងដែរ ដែលក្នុងនោះមានតម្លៃចាប់ពីជាង៣ ទៅ៤ម៉ឺនដុល្លារឡើងទៅសម្រាប់លំនៅដ្ឋានបែបលំហែរមួយខ្នង។

ប្រធានមន្ទីរទេសចរណ៍ខេត្តកំពត លោក សយ ស៊ីណុល បានមានប្រសាសន៍ផងដែរថា សព្វថ្ងៃនេះមានគម្រោងវិនិយោគ លើវិស័យបដិសណ្ឋារកិច្ចជាច្រើន នៅក្នុងខេត្តកំពត ជាពិសេស គម្រោងរមណីយដ្ឋាន សណ្ឋាគារ និងបឹងហ្គាឡូ នៅតាមដងព្រែកនានារបស់ខេត្តកំពត។

លោកបន្តថា “នៅពេលដែលមានគម្រោងវិនិយោគ ផ្នែកបដិសណ្ឋារកិច្ចច្រើននៅក្នុងខេត្តនាពេលនេះ បានឆ្លុះបញ្ចាំងនៃភាពល្អប្រសើរ និងជំរុញឱ្យមានការប្រកួតប្រជែងកាន់តែខ្លាំងក្លា នៅក្នុងវិស័យទេសចរណ៍របស់ប្រទេសកម្ពុជា និងធានាបាននូវគុណភាពខ្ពស់” ។ លោកបញ្ជាក់ថា “ធម្មតានៅក្នុងធ្វើពាណិជ្ជកម្ម ឬមុខជំនួញណាមួយដែលមានការប្រកួតប្រជែង វានឹងធានាបាននូវគុណភាព និងកម្រិតស្តង់ដារមួយ ហើយយើងក៏ចង់បានការប្រកួតប្រជែងបែបនេះឱ្យបានច្រើន ដើម្បីជំរុញទៅដល់ការលើកកម្ពស់កម្រិតគុណភាព” ។

លោកសយ ស៊ីណុល បានបញ្ជាក់ថា បច្ចុប្បន្ននេះកម្ពុជា មិនមែនមានការប្រកួតប្រជែងតែនៅក្នុងស្រុកនៅទេ គឺកម្ពុជាបាននិងកំពុងប្រកួតប្រជែងទាំងថ្នាក់តំបន់ និងពិភពលោក លើវិស័យបដិសណ្ឋារកិច្ចនេះ។ ការទាក់ទាញភ្ញៀវទេសចរទាំងក្នុងស្រុក និងក្រៅស្រុក គឺទាមទារឱ្យមានគុណភាព និងស្តងដារចាំបាច់បំផុត ដូច្នេះនៅពេលមានការប្រកួតប្រជែងកាន់តែច្រើនវាកាត់តែល្អ ហើយឆ្លើយតបទៅនឹងតម្រូវការភ្ញៀវទេសចរ និងជាតិអន្តរជាតិ៕

គម្រោងសាងសង់ខ្សែរថភ្លើងលើអាកាសអាចចំណាយទឹកប្រាក់ជាង ១៤០០លានដុល្លារប៉ុន្តែការបរិច្ឆេទសាងសង់មិនទាន់កំណត់

ដោយស៊ីវ ម៉េង

ភ្នំពេញៈ គំរោងសាងសង់រថភ្លើងលើអាកាស ឬក្រោមដីអាចចំណាយទឹកប្រាក់រហូតដល់១០០០ទៅ១៥០០លានដុល្លារអាមេរិក ប៉ុន្តែការចាប់ផ្តើមសាងសង់នៅពេលណាមិនទាន់កំណត់ពេលវេលាជាក់លាក់ទេ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់មានប្រសាសន៍ឲ្យដឹង កាលពីពេលកន្លងមកថ្មីៗនេះថា គម្រោងសិក្សារថភ្លើងលើអាកាស គឺខាង JICA បានសិក្សារួចហើយ ហើយក្រសួងនៅរង់ចាំលទ្ធផលសិក្សា។ ដោយឡែក គម្រោងរថភ្លើង Monorail និងរថភ្លើងក្រោមដី ក្រុមហ៊ុនចិនជាអ្នកសិក្សា។

លោកបន្តថា “ក្រោយការសិក្សាចប់ ក្រសួងនឹងប្រៀបធៀប ដើម្បីជ្រើសរើសយកគម្រោងណាមួយដែលមានតម្លៃសមរម្យ និងឆ្លើយតបទៅនឹងការអភិវឌ្ឍន៍” ។ លោកបន្តថា “គម្រោងនេះ អាចនឹងប្រើប្រាស់ថវិកាចន្លោះពី ១០០០លានដុល្លារ ទៅ១,៤០០ពាន់លានដុល្លារអាមេរិក។

ការសិក្សាលទ្ធភាពសាងសង់គម្រោងរថភ្លើងលើអាកាស នៅភ្នំពេញនៅតែបន្ត ដោយមានមួយបានបញ្ចប់រួច និង២ផ្សេងទៀតកំពុងរង់ចាំលទ្ធផល។ អំឡុងពេលនេះរដ្ឋាភិបាលក៏កំពុងស្វែងរកប្រភពហរិញ្ញប្បទាន ដើម្បីយកមកអនុវត្តន៍គម្រោងនេះផងដែរ។

ជាមួយគ្នានេះ លោកលី បូរិន អនុរដ្ឋលេខាធិការ ក្រសួងសាធារណការ និងដឹកជញ្ជូនទទួលបន្ទុកផ្នែកផ្លូវដែកបានឱ្យដឹងផងដែរថា តាមការប៉ាន់ស្មាន គម្រោងរថភ្លើងលើអាកាសនេះ មានតម្លៃខ្ពស់ណាស់សម្រាប់វិនិយោគ។

លោកបានឲ្យដឹងថា “ការសិក្សារថភ្លើងលើអាកាស យើងបានសិក្សារួចហើយ ប៉ុន្តែគម្រោងនឹងវាអស់ច្រើនពេក។ ហេតុនេះទាល់តែរដ្ឋាភិបាលជាអ្នកសម្រេច។

សម្រាប់គម្រោងហេដ្ឋារចនាសម្ព័ន្ធ នៅរាជធានីភ្នំពេញ ក្រសួងសាធារណការ និងដឹកជញ្ជូនបានបង្ហាញថា ក្រសួងកំពុងជ្រើសរើសរវាង រថភ្លើងលើអាកាស រថភ្លើង Mono Rail និងរថភ្លើងក្រោមដី៕

រដ្ឋមន្ត្រីសាធារណៈការបង្កើតក្រុមការងារជំនាញដើម្បីធ្វើការជាមួយភាគីកូរ៉េលើគំរោងសាងសង់ស្ពានមិត្តភាពរវាងប្រទេសទាំងពីរ

ដោយគង់ សូរិយា

ភ្នំពេញៈ ទេសរដ្ឋមន្ត្រី រដ្ឋមន្ត្រីក្រសួងសាធារណៈការនិងដឹកជញ្ជូនលោកស៊ុន ចាន់ថុលបានបង្កើតក្រុមការងារបច្ចេកទេស ដើម្បីធ្វើការជាមួយអ្នកជំនាញការកូរ៉េ សំរាប់ពិភាក្សាគ្នាឈានទៅសាងសង់ស្ពានមិត្តភាពកម្ពុជា កូរ៉េនាពេលខាងមុខនេះ។

អ្នកនាំពាក្យក្រសួងសាធារណៈការ លោកវ៉ាស៊ីម សូរិយា បានមានប្រសាសន៍ឲ្យដឹងតាមទូរស័ព្ទនាល្ងាចថ្ងៃទី៨ ធ្នូកន្លងមកថា ផែនការសាងសង់ស្ពាននេះ ត្រូវបានបង្ហើបដោយប្រធានាធិបតីកូរ៉េ លោកម៉ូន ជេអ៊ីន ក្នុងកិច្ចប្រជុំកំពូលអាស៊ាននៅប្រទេសវៀតណាមកាលពីកំឡុងខែវិច្ឆិកាកន្លងមកនេះ។លោកបន្តថា បច្ចុប្បន្នលោកទេសរដ្ឋមន្ត្រីបានបង្កើតក្រុមការងារ ដើម្បីធ្វើការងារនេះជាមួយអ្នកជំនាញការ នៃទីភ្នាក់ងារសហប្រតិបត្តិការនៃសាធារណៈរដ្ឋកូរ៉េ (koica) ដើម្បីធ្វើការងារនេះ។

លោកបន្តថា “ខ្ញុំមិនបានដឹងថាគំរូស្ពាននេះបានសិក្សារួចឬនៅនោះទេ ប៉ុន្តែនៅពេលអ្នកជំនាញការកូរ៉េមកដល់នាពេលខាងមុខ ពួកគេអាចបង្ហាញពីទម្រង់ស្ពាននេះតែម្តងក៏ថាបាន ដោយសារកន្លងមកភាគីកូរ៉េបានសិក្សារួចហើយ” ។

លោកសូរិយាបានបន្តឲ្យដឹងផងដែរថា តាមធម្មតាគំរោងធំៗបែបនេះ យើងមិនទាន់កំណត់ពេលវេលាជាក់លាក់បានទេ ដោយសារវានៅត្រូវការពេលវេលានិងនិតិវិធីច្រើន លើកលែងតែសម្តេចប្រមុខរដ្ឋាភិបាល អញ្ជើញបើកការដ្ឋានតែម្តងទើបយើងអាចដឹងបានជាក់លាក់។

ក្នុងកំឡុងដំណើរទស្សនកិច្ចរបស់ប្រមុខរដ្ឋាភិបាលកម្ពុជា ទៅកាន់់ប្រទេសកូរ៉េ សម្តេចតេជោហ៊ុន សែនបានស្នើភាគីកូរ៉េជួយសាងសង់ស្ពានមិត្តភាព សម្រាប់ប្រទេសទាំងពីរ ខណៈមិត្តចិន និងជប៉ុនបានសាងសង់ស្ពានមិត្តភាពសំរាប់កម្ពុជា ជាច្រើនរួចមកហើយ៕

1...2,1462,1472,148...3,259 Page 2,147 of 3,259