ក្រុមហ៊ុន​ដ៏​ធំ​មួយ​របស់​ថៃ​គ្រោង​ពង្រីក​សេវាកម្ម​ហិរញ្ញវត្ថុ​របស់ខ្លួន​មកា​ន់​កម្ពុជា

ដោយៈ ប៊ី

ភ្នំពេញៈ ក្រុមហ៊ុន Thai Group Holdings Plc (TGH) ដែល​ធានារ៉ាប់រង​អាយុជីវិត ហើយ​ជា​ក្រុមហ៊ុន​ផ្តល់​សេវា​កម្មជួល និង​ផ្តល់​សេវា​កម្ចី បានប្រកាសថា នឹង​ពង្រីក​ខ្លួន​មកកាន់​ប្រទេស​កម្ពុជា ដោយ​មើលឃើញ​ទីផ្សារ​កម្ពុជា មាន​សក្តានុពល​សម្រាប់​ការពង្រីក​អាជីវកម្ម​របស់ខ្លួន។ នេះ​បើ​យោងតាម​ការចេញផ្សាយរ​បស់​កាសែត​បាក​ប៉ុស្តិ៍ នៅ​ថ្ងៃទី៦ ខែមីនា ឆ្នាំ២០២១ ។

លោក Thakorn នាយក​ប្រតិបត្តិ​នៃ TGH ដែល​បាន​ចុះបញ្ជី​នៅ​ផ្សារ​ហ៊ុន​ថៃ បាន​ថ្លែងថា ក្រម​ហ៊ុន TGH បានកំណត់​ផែនការ ដើម្បី​ពង្រីក​សេវាកម្ម​ហិរញ្ញវត្ថុ​របស់ខ្លួន​នៅ​ទីផ្សារ​កៅ​ស្រុក ដោយ​ផ្តោតលើ​ប្រទេស​កម្ពុជា ឡាវ មី​យ៉ាន់​ម៉ា និង​វៀតណាម។

នាពេល​បច្ចុប្បន្ន​ក្រុមហ៊ុន​នេះ មិនទាន់មាន​មូលដ្ឋាន​ឈរជើង នៅក្រៅ​ប្រទេស​រឹងមាំ​នៅឡើយ​ទេ ព្រោះ​ក្រុមហ៊ុន​បានត្រឹមតែ​គាំទ្រ​សាជីវកម្ម Thai Charoen Corporation (TCC) ជាមួយ​សេវាកម្ម​ធានារ៉ាប់រង​នៅក្នុង​ទីផ្សារ​ខាងក្រៅ​ប្រទេស​ប៉ុណ្ណោះ។

ក្រុមហ៊ុន TCC និង​ក្រុមហ៊ុន TGH ដែល​គ្រប់គ្រង​ដោយ​លោក​មហា​សេដ្ឋកិច្ច Charoen Sirivadhanabhakdi មាន​អាជីវកម្ម​ជាច្រើន នៅក្នុង​ផលប័ត្រ​របស់​ក្រុមហ៊ុន​ទាំងនេះ ដែល​មានការ​គ្របដណ្តប់​លើ​វិស័យ​អចលនទ្រព្យ និង​សេវាកម្ម​ហិរញ្ញវត្ថុ។

ក្រុមហ៊ុន TGH អាច​ផ្តល់​សេវាកម្ម​ហិរញ្ញវត្ថុ រួមបញ្ចូល​គ្នា​ដោយ​ស្ថិត​ន​នៅក្រោម​ការគ្រប់គ្រង​រប​ស់​ក្រុមហ៊ុន TCC សម្រាប់​រយៈពេល​វែង ដោយ​ផ្អែកលើ​ផែនការ​ផ្លាស់ប្តូរ​ទៅរក​ប្រព័ន្ធ​ឌីជីថល​របស់ខ្លួន។

ក្រុមហ៊ុន TGH អាច​ក្លាយជា​ស្ថាប័ន​សេវាកម្ម​ហិរញ្ញវត្ថុ ឌីជីថល​របស់​ក្រុមហ៊ុន TCC ដើម្បី​គាំទ្រ​ដល់​ក្រុមហ៊ុន TCC ក្នុង​វិស័យ​សេវាកម្ម​ហិរញ្ញវត្ថុ និង​ពង្រីក​អាជីវកម្ម​ធានារ៉ាប់រង ដើម្បី​គ្របដណ្តប់​លើ​សុខភាព និង​ធានារ៉ាប់រងផ្សេងៗនាពេល​អនាគត។

លោក Thakorn បាន​និយាយថា “យើង​មាន​ផែនការ​ច្បាស់លាស់ ដើម្បី​ធ្វើឱ្យ​ប្រសើរឡើង​នូវ​ធានារ៉ាប់រង​នៅ​អាគ្នេយ៍ ដោយមាន​ការរួមបញ្ចូល​ជា​បច្ចេកវិទ្យា លើ​ធនា​រ៉ាប់រង និង​ប្រែក្លាយ TGH ទៅជា​ក្រុមហ៊ុន​ហិរញ្ញវត្ថុ​ឌីជីថល ក្នុង​រយៈពេល​ប្រាំ​ឆ្នាំ​ខាងមុខ។ បន្ទាប់ពីនោះ យើង​នឹង​ពិចារណា​ធ្វើ​មាត្រដ្ឋាន TGH ម្តងទៀត អាស្រ័យ​លើ​ការផ្លាស់ប្តូរ​ទិដ្ឋភាព​សេដ្ឋកិច្ច និង​ឱកាស​អាជីវកម្ម​នៅ​នោះ​តាម​ពេលវេលា​ជាក់ស្តែង” ៕

តើ​ច្បាប់​វិនិយោគ​ថ្មី​មាន​លក្ខណៈពិសេស​ដូចម្តេច ខណៈ​ភាគី​ជប៉ុន​បាន​ចូលរួមក្នុងការ​រៀបចំ​ច្បាប់​នេះ

ស៊ឹម វីរៈ ទីប្រឹក្សា​យុទ្ធសាស្ត្រ​នៃ​វិទ្យាស្ថាន​ចក្ខុវិស័យ​អាស៊ី (AVI)

ភ្នំពេញៈ ក្រុមប្រឹក្សា​អភិវឌ្ឍន៍​កម្ពុជា (CDC) បានបញ្ចប់​សេចក្តីព្រាង​ច្បាប់​ស្តីពី​ការវិនិយោគ ដែល​ត្រូវបាន​គេ​ទន្ទឹងរង់ចាំ​ជា​យូរ​មកហើយ។ សេចក្តីព្រាង​នេះ នឹងត្រូវ​បញ្ជូនទៅ​គណៈកម្មាធិការ​គោលនយោបាយ សេដ្ឋកិច្ច និង​ហិរញ្ញវត្ថុ មុននឹង​ដាក់ជូន​ទីស្តីកា​រ​គណៈរដ្ឋមន្ត្រី និង​អង្គនីតិបញ្ញត្តិ​ពិនិត្យ​ពិភាក្សា។

គេ​រំពឹងថា ច្បាប់​នេះ​អាច​នឹង​ចូល​ជា​ធរមាន នៅ​ដំណាច់​ឆមាស​ទី១ នៃ​ឆ្នាំ២០២១ នេះ ប្រសិនបើអ្វីៗដំណើរការ​ទៅដោយ​រលូន។

សេចក្តីព្រាងច្បាប់​នេះ ត្រូវបាន​គេ​រំពឹងថា នឹង​ជួយ​បង្កើន​ភាព​អាច​ព្យាករ​បាន និង​ជំរុញ​យន្តការ​លើកទឹកចិត្ត ដែលមាន​លក្ខណៈ​កាន់តែ​អំណោយផល បន្ថែម​លើ​អ្វី​ដែលមាន​ស្រាប់​នៅក្នុង​ច្បាប់​បច្ចុប្បន្ន។

ការលើកទឹកចិត្ត​ថ្មី​ត្រូវបាន​បង្កើតឡើង ដោយ​ផ្អែកលើ​ការពិគ្រោះ​យោបល់​រយៈពេល​វែង​ជាមួយ​វិស័យ​ឯកជន និង​ការពិភាក្សា​ផ្ទៃក្នុង ក្នុងចំណោម​ភាគី​ពាក់ព័ន្ធសំខាន់ៗរបស់​រាជរដ្ឋាភិបាល។ ជា​យន្តការ​ផ្ទៃក្នុង​រាល់​ការបញ្ចូល​ការលើកទឹកចិត្ត​ថ្មី​ណាមួយ គឺជា​ការ​តតាំង​ឥតឈប់ឈរ​រវាង​កាតព្វកិច្ច​ទ្វេ និង​ការ​អល់អែក​នៃ​ជម្រើស​រវាង​តម្រូវការ នៃ​ការរក្សា និង​បង្កើន​ការប្រមូល​ចំណូល​ជាតិ និង​តម្រូវការ​នៃ​ការចិញ្ចឹម​បីបាច់​អាជីវកម្ម​រយៈពេល​វែង និង​ការទាក់ទាញ​វិនិយោគថ្មី។

វា​ប្រៀបដូចជា​ការពិភាក្សា​អំពី “មាន់ និង​ស៊ុត” ថា តើ​មួយណា​កើតមុន ទន្ទឹមគ្នា​នឹង​ការព្យាយាម​មិន​ធ្វើឱ្យប៉ះពាល់​ធ្ងន់ធ្ងរ ដល់​កម្រិត​ចំណូល​ជាតិ​បច្ចុប្បន្ន។

ដើម្បី​ស្វែងយល់​ពី​ច្បាប់​នេះ ទិដ្ឋភាព​រួម​នៃ​កិច្ចប្រជុំ​លើក​ទី២១ នៃ​គណៈកម្មាធិការ​ចម្រុះ​កម្ពុជា-ជប៉ុន ដែល​បាន​ធ្វើឡើង​នៅ​ថ្ងៃទី ១១ ខែ កុម្ភៈ ឆ្នាំ ២០២១ អាច​បង្ហាញឱ្យឃើញ​នូវ​ការប្រើប្រាស់​ក្របខ័ណ្ឌ​ច្បាប់ ដើម្បី​ដោះស្រាយ​នូវ​សេចក្តី​កង្វល់​នានា​របស់​វិនិយោគិន។

វេទិកា​នេះ គឺជា​ការសន្ទនា​រវាង​វិស័យ​សាធារណៈ និង​ឯកជន​ស្តីពី​លក្ខខណ្ឌ​សម្រាប់​ការវិនិយោគ ហើយ​ពេលខ្លះ​ក៏​សឹងតែ​អាច​ក្លាយជា​ការពិភាក្សា ដេញដោល​អន្តរ​ភាគី​រវាង​ស្ថាប័ន​ពាក់ព័ន្ធ​នានា របស់​រាជរដ្ឋាភិបាល​ផងដែរ។ វេទិកា​នេះ គឺ​ផ្តោត​សំខាន់​ទៅលើ​វិនិយោគិន​ជប៉ុន ហើយ​ការពិភាក្សា​គឺមាន​កម្រិត​បច្ចេកទេស​ខ្ពស់ ហើយ​លម្អិត​ខ្លាំង​ដែល​បង្ហាញ​ពី​ទិដ្ឋភាព​ជាក់ស្តែង​នៃ​ការធ្វើ​អាជីវកម្ម និង​ការអនុវត្ត​ក្របខ័ណ្ឌ​ការពារ និង​ថែរក្សា​វិនិយោគ។

ភាគី​ជប៉ុន​ត្រូវបាន​តំណាង​ដោយ សមាគម​ធុរកិច្ច​ជប៉ុន​នៅ​កម្ពុជា (JBAC) ដែល​បច្ចុប្បន្ន​មាន​សមាជិក​ជា​ក្រុមហ៊ុន​ជប៉ុន​ចំនួន២៧០ ដែល​ធ្វើ​អាជីវកម្ម​លើ​វិស័យ​ជាច្រើន ដូចជា​ឧស្សាហកម្ម​កម្មន្តសាល សំណង់​អចលនទ្រព្យ ពាណិជ្ជកម្ម​ដឹកជញ្ជូន ហិរញ្ញវត្ថុ​ធានារ៉ាប់រង និង​សេវាកម្ម។

ក្រុមហ៊ុន​ទាំងនេះ សុទ្ធតែជា​ក្រុមហ៊ុន​ដែលមាន​ស្តង់ដា អនុលោមភាព​ខ្ពស់​ជាមួយនឹង​ច្បាប់​របស់​កម្ពុជា ហើយ​គោរព​ខ្ជាប់ខ្ជួន​តាម​បទ​ប្បញ្ញត្តិថ្មីៗ វិធាន​នៅក្នុង​សង្គម​ខ្មែរ និង​គោរព​លក្ខខណ្ឌ​ការងារ។ ដូច្នេះ​សេចក្តី​កង្វល់​ទាំងឡាយ​របស់​ពួកគេ តែងតែ​ទទួលបាន​ការយកចិត្ត​ទុកដាក់​យ៉ាងខ្លាំង ពី​សំណាក់​រាជរដ្ឋាភិបាល​ក​ម្ពុ​ជា។

ពិតណាស់ថា វេទិកា​បែបនេះ​មាន​ប្រយោជន៍ មិន​ត្រឹមតែ​សម្រាប់​វិនិយោគិន​ជប៉ុន​ប៉ុណ្ណោះ​ទេ ប៉ុន្តែ​វា​ផ្តល់​សារៈសំខាន់​ជារួម សម្រាប់​ការកែលម្អ​បរិយាកាស និង​ទំនុកចិត្ត​នៃ​ការវិនិយោគ​នៅ​កម្ពុជា​ផងដែរ។

ក្រៅពី​ក្រុមប្រឹក្សា​អភិវឌ្ឍន៍​កម្ពុជា ដែលមាន​តួនាទី​ជា​អ្នកសម្របសម្រួល អ្នកពាក់ព័ន្ធសំខាន់ៗរបស់​កម្ពុជា រួមមាន ក្រសួង​សេដ្ឋកិច្ច និង​ហិរញ្ញវត្ថុ អគ្គនាយកដ្ឋាន​ពន្ធដា​រ អគ្គនាយកដ្ឋាន​គយ និង​រដ្ឋាករ ក្រសួងពាណិជ្ជកម្ម ក្រសួង​រ៉ែ និង​ថាមពល អគ្គិសនី​កម្ពុជា ក្រសួង​សាធារណការ និង​ដឹកជញ្ជូន ក្រសួង​ការងារ និង​បណ្តុះបណ្តាល​វិជ្ជាជីវៈ ក្រសួងបរិស្ថាន និង​ក្រសួង​ស្ថាប័ន​ផ្សេងទៀត ដែល​អាច​ប្រែប្រួល​ទៅតាម​បញ្ហា​ប្រឈម​ដែល​លើកឡើង​ដោយ​ភាគី​ជប៉ុន។

ការពិភាក្សា​បាន​ផ្តោតលើ​បញ្ហា ដែលមាន​កម្រិត​បច្ចេក​ទេស​ខ្លាំង​ដូចជា (១) ការទូទាត់​ប្រាក់​បំណាច់​អតីតភាព​ការងារ (២) សំណើ​អនុវត្ត​ប្រព្រឹត្តិកម្ម​គណនេយ្យ​សម្រាប់​វិស័យ​កាត់ដេរ ជាមួយនឹង​វិស័យ​កម្មន្តសាល​ទាំងមូល (៣) ការអនុវត្ត​នីតិវិធី​នាំចូល​រថយន្ត និង​ការប្រកួតប្រជែង​មិន​ស្មើភាព (៤) តារាង​តម្លៃ​អគ្គិសនី​ថ្មី (៥) បញ្ហា “មូលនិធិ​ទេយ្យទាន​បរិស្ថាន” ដែលជា​យន្តការ​ស្ម័គ្រចិត្ត និង “មូលនិធិ​បរិស្ថាន និង​សង្គម” ដែលជា​យន្ត​ការជាប់​កាតព្វកិច្ច (៦) ការ​ព​ន្លឿ​ន​ការបើក​ឱ្យ​ដំណើរការ​ច្រកព្រំដែន​អន្តរជាតិ ស្ទឹង​បត់ និង (៧) ការអភិវឌ្ឍ​ធនធានមនុស្ស​បច្ចេកទេស ដែល​គាំទ្រ​ដោយ​រដ្ឋាភិបាល​ជប៉ុន។

ការពិភាក្សា​ទល់មុខ​គ្នា បាន​ជួយ​ឱ្យ​ភាគី​ទាំងសងខាង ស្រាយ​បំភ្លឺ​អំពី​គម្លាត​នៃ​ការបកស្រាយ និង​ការអនុវត្ត​បទ​ប្បញ្ញត្តិថ្មីៗ បង្ហាញ​ពី​សេចក្តី​កង្វល់​ទៅវិញទៅមក និង​ធ្វើ​បច្ចុប្បន្នភាព​លើ​បញ្ហា​គោលនយោបាយសំខាន់។

សេចក្តី​កង្វល់សំខាន់ៗមួយចំនួន សម្រាប់​ក្រុមហ៊ុន​ជប៉ុន គឺជា​បញ្ហា​ប្រឈម​ជា​លក្ខណៈ​រចនាសម្ព័ន្ធរ​បស់​កម្ពុជា ដូចជា​ថ្លៃ​អគ្គិសនី​នៅ​ថ្លៃ​នៅឡើយ ការលំបាក​ក្នុងការ​បណ្តុះបណ្តាល និង​ស្វែងរក​ធនធានមនុស្ស​ថ្នាក់​គ្រប់គ្រង គុណភាព និង​ផលិតភាព​បុគ្គលិក ការដំឡើង​ប្រាក់​ឈ្នួល​របស់​កម្មករ ហេដ្ឋារចនាសម្ព័ន្ធ​ដឹកជញ្ជូន ដែល​នៅមានកម្រិត​ទាប និង​ការលំបាក​ក្នុងការ​ស្វែងរក​វត្ថុធាតុដើម និង​គ្រឿងបន្លាស់​ក្នុងស្រុក។ ការផ្គត់ផ្គង់​វត្ថុធាតុដើម និង​គ្រឿងបន្លាស់​ក្នុងស្រុក​នៅ​កម្ពុជា មាន​កម្រិត​ទាប​ណាស់ បើ​ធៀប​ទៅនឹង​តំបន់។

យោងតាម​ការស្ទង់មតិ​ចុងក្រោយ ដែល​ធ្វើឡើង​ដោយ​អង្គការ​ពាណិជ្ជកម្ម​ក្រៅប្រទេស​របស់​ជប៉ុន (JETRO) បាន​បង្ហាញថា នៅ​កម្ពុជា ធាតុ​ចូលក្នុង​ស្រុក​មានតែ៥,៤ ភាគរយ​ប៉ុណ្ណោះ ដែល​អាច​ផ្គត់ផ្គង់​ទៅឱ្យ​ក្រុមហ៊ុន​ជប៉ុន បើ​ប្រៀបធៀប​ទៅនឹង​អត្រា​យ៉ាងហោចណាស់២០ភាគរយ សម្រាប់​ប្រទេស​ដទៃទៀត​នៅក្នុង​តំបន់។

បញ្ហា​ប្រឈម​ទាំងអស់​ខាងលើ​នេះហើយ ដែល​ផ្តល់​ជា​មូលដ្ឋានគ្រឹះ​សម្រាប់​ការតាក់តែង​បន្ថែម​នូវ​ខ្លឹមសារ នៃ​យន្តការ​លើកទឹកចិត្ត​ថ្មី នៃ​សេចក្តីព្រាងច្បាប់​ស្តីពី​ការវិនិយោគ​នេះ។

ឧទាហរណ៍​ជាក់ស្តែង សេចក្តីព្រាងច្បាប់​នេះ ផ្តល់នូវ​ការលើកលែង​អាករ​លើ​តម្លៃបន្ថែម​សម្រាប់​ការទិញ​ធាតុ​ចូល ផលិតកម្ម​ដែល​ផលិត​ក្នុងស្រុក។ សេចក្តីព្រាងច្បាប់​នេះ​ក៏​ផ្តល់នូវ​អត្រា​កាត់កង ចំណាយ​ពិសេស​ចំនួន១៥០ភាគរយ ពី​មូលដ្ឋាន​គិត​ពន្ធ​សម្រាប់​ការចំណាយ​របស់​ក្រុមហ៊ុន​លើ​ការស្រាវជ្រាវ ការអភិវឌ្ឍ និង​នវានុវត្តន៍ ការអភិវឌ្ឍ​ធនធានមនុស្ស តាមរយៈ​ការផ្តល់​ការបណ្តុះបណ្តាល​វិជ្ជាជីវៈ និង​ជំនាញ​ដល់​កម្មករនិយោជិត​ខ្មែរ ការធ្វើ​ទំនើបកម្ម​គ្រឿង​ម៉ាស៊ីន ដើម្បី​បម្រើ​ដល់​ខ្សែចង្វាក់​ផលិតកម្ម ការសាងសង់​កន្លែង​ស្នាក់នៅ អាហា​រដ្ឋា​ន ទារកដ្ឋាន ការផ្តល់​មធ្យោបាយ​ដឹកជញ្ជូន ប្រកបដោយ​ផាសុកភាព និង​ការចំណាយ​ផ្សេងទៀត ដែលមាន​គោលបំណង​លើកកម្ពស់ សុខុមាលភាព​របស់​ក​ម្មករ-និយោជិត​ខ្មែរ។

ទាំងនេះ គឺជា​ការរក​ដំណោះស្រាយ តាម​លក្ខណៈ​គោលនយោបាយ​ជាក់ស្តែង ដែល​ត្រូវ​បានផ្តល់​ដោយ​សេចក្តីព្រាងច្បាប់​ថ្មី​នេះ ដើម្បី​លើកកម្ពស់​សមត្ថភាព​ប្រកួតប្រជែង​ក៏ដូចជា​ផ្តល់​ការគាំទ្រ​សុខុមាលភាព​ដល់ក​ម្មក​រ​ខ្មែរ ដែលជា​លទ្ធផល​ដំណោះស្រាយ​ទាំងនោះ​ក៏​អាចឆ្លើយតប​ផងដែរ ចំពោះ​បញ្ហា​ប្រឈម​នានា ដែល​ត្រូវ​បានលើកឡើង​ដោយ​ក្រុមហ៊ុន​ជប៉ុន​ដូចខាងលើ។

លើសពីនេះ​ទៀត ការលើកលែង​ពន្ធ​ត្រូវបាន​កែលម្អ ដើម្បី​ធ្វើឱ្យមាន​លក្ខណៈ​កាន់តែ​អំណោយផល សម្រាប់​គម្រោង​វិនិយោគ ដែលមាន​លក្ខណសម្បត្តិ​គ្រប់គ្រាន់ (QIPs) ដែល​អាច​ទទួលបានរ​យៈ​ពេល លើកលែង​ពន្ធ​លើ​ប្រាក់ចំណូល​ពី ៣ ទៅ៩ឆ្នាំ គិត​ចាប់ពី​ពេលដែល​ទទួលបាន​ប្រាក់ចំណូល​លើកដំបូង។

បន្ទាប់ពី​ផុត​រយៈពេល​លើកលែង​ពន្ធ​លើ​ប្រាក់ចំណូល គម្រោង​QIPs មាន​សិទ្ធិ​ទទួលបាន​ការលើកទឹកចិត្ត ឱ្យ​បង់ពន្ធ​លើ​ប្រាក់ចំណូល តាម​អត្រាកំណើន​តាម​ពេល​សម្រាប់​រយៈពេល៦ឆ្នាំ។ គម្រោង​ទាំងនោះ​មាន​សិទ្ធិ​នាំចូល​ដោយ​ពន្ធគយ អាករ​ពិសេស និង​អាករ​លើ​តម្លៃបន្ថែម​ជា​បន្ទុក​របស់​រដ្ឋ។

ទាក់ទង​នឹង​ទិដ្ឋភាព​ប្រតិបត្តិការ​សេចក្តីព្រាងច្បាប់​នេះ ក៏បាន​យកចិត្តទុកដាក់​លើ​ការលើកកម្ពស់​ការសម្របសម្រួល វិនិយោគ​ជាពិសេស តាមរយៈ​ការធ្វើឱ្យ​ប្រសើរឡើង​នូវ “យន្តការ​ច្រកចេញ-ចូល​តែមួយ” ។

ឆ្លងកាត់​មេរៀន បទពិសោធន៍​ពី​ស្ថានភាព​នៃ​ជំងឺ​កូ​វីដ១៩ សេចក្តីព្រាងច្បាប់​នេះ​ក៏បានផ្តល់​ដល់​រាជរដ្ឋាភិបាល​នូវ​ភាពបត់បែន ក្នុងការ​ផ្តល់​ការលើកទឹកចិត្ត​ពិសេស សម្រាប់​វិស័យ​អាទិភាព​ជាក់លាក់​ណាមួយ ដែល​យើង​មិនអាច​ព្រាង​ទុកជាមុន​បាន ឬ​វិស័យ​ឧស្សាហកម្ម​ទើប​កកើត​ថ្មី តាមរយៈ​ការដាក់បញ្ចូល​ទៅក្នុង​ច្បាប់​ស្តីពី ការគ្រប់គ្រង​ហិរញ្ញវត្ថុ ដែល​ត្រូវ​ឆ្លង​សភា​ជា​រៀងរាល់ឆ្នាំ។

ស្ថិរភាព និង​ភាព​អាច​ព្យាករ​បាន គឺជា​គន្លឹះ​សម្រាប់​ទំនុកចិត្ត​វិនិយោគ។ និយាយ​ផ្ទុយ​មកវិញ អស្ថិរភាព និង​ភាព​មិនអាច​ព្យាករ​បាន គឺជា​សត្រូវ​របស់​វិនិយោគិន។ ទោះបី​ជាមាន​ភាព​ទាក់ទាញ តាមរយៈ​យន្តការ​លើកទឹកចិត្ត​ក៏ដោយ វា​ជា​រឿង​ធម្មតា​ដែល​វិនិយោគិន​តែងតែ​ខិតខំ​ស្វែងយល់ ពី​ហានិភ័យ​ទុកជាមុន ហើយ​មានការ​ប្រុងប្រយ័ត្ន​ខ្ពស់បំផុត ចំពោះ​ការផ្លាស់ប្តូរ​គោលនយោបាយ ដែលមាន​លក្ខណៈ​ប្រញាប់ប្រញាល់ភ្លាមៗដែល​អាច​បង្ក​ជាការ​រំខាន​ធ្ងន់ធ្ងរ ដល់​ការរៀបចំ​ផែនការ វិនិយោគ​រយៈពេល​មធ្យ​ម និង​វែង។

cdc

ស្ថិរភាព​នយោបាយ​សង្គម និង​ម៉ាក្រូសេដ្ឋកិច្ច​រឹងមាំ គឺជា​ធនធាន​ដ៏​សមប្រកប និង​អំណោយផល​សម្រាប់​ប្រទេស​កម្ពុជា ក្នុង​រយៈពេល២ទសវត្សរ៍​ចុងក្រោយ​នេះ ដែលជា​កត្តា​ជំរុញ​កំណើន​ទំនុកចិត្ត​វិនិយោគ​កាន់តែខ្លាំង​ឡើង។

យ៉ាងណាក្តី កម្ពុជា​នៅតែ​ត្រូវខិតខំ​ប្រឹងប្រែង​បន្ថែមទៀត ដើម្បី​ទទួលបាន​ការទុកចិត្ត និង​ការជឿជាក់​ពី​វិនិយោគិន ជាពិសេស​នៅក្នុង​ទិដ្ឋភាព​នៃ​ការរៀបចំ​ក្របខ័ណ្ឌ​ច្បាប់ និង​ភាពប្រាកដប្រជា​ក្នុងការ​អនុវត្ត​ជាក់ស្តែង ដើម្បី​រក្សា និង​ពង្រឹងសមត្ថភាព​ប្រកួតប្រជែង​របស់​កម្ពុជា​នៅក្នុង​តំបន់៕

អ្នកជំនាញៈ មុនពេល​សម្រេចចិត្ត​ទិញ​លំនៅដ្ឋាន​ក្នុង​បុរី​ណាមួយ គ​ម្បី​ត្រូវ​សិក្សាលើ​ចំណុច​ចំនួន សំខាន់ៗ

ដោយៈ រ៉ា​ណេ​ត

ភ្នំពេញៈ ប្រាកដ​ណាស់​ថា គ្រប់​អតិថិជន​ទាំងអស់ ដែល​ស្វែងរក​ទិញ​លំនៅដ្ឋាន​សម្រាប់​ស្នាក់នៅ ប្រកបដោយ​ផាក​សុខភាព មាន​សុវត្ថិភាព និង​អាច​ទទួលបាន​ផលចំណេញ​បន្ថែម ដែលជា​អត្ថប្រយោជន៍​ពី​ការ​ចំណាយលុយ​ដើម​នោះ គឺអាច​បង្កើន​ទ្រព្យ​ក្រោយពេល​ស្នាក់នៅ។

អ្នកជំនាញ​នៅក្នុង​វិស័យ​អចលនទ្រព្យ និង​លំនៅដ្ឋាន​បែប​ទាន់សម័យ លោក សុខ ជា អគ្គនាយករង​ក្រុមហ៊ុន​ភ្នាក់ងារ​អចលនទ្រព្យ PAPA & MAMA បាន​បង្ហើប​ប្រាប់ថា បើ​ចង់បាន​នូវ​ចំណុច​ទាំងអស់ ដូច​បានលើកឡើង​ខាងលើនេះ ក្ដី​ប្រាថ្នា​របស់លោក​អ្នក​អាច​នឹង​សម្រេចបាន ប៉ុន្តែ​ត្រូវ​សិក្សា​ទៅលើ​កត្តាសំខាន់ៗចំនួន៤ ដូចខាងក្រោម​ជាមុនសិន។

ទី១-ទីតាំង​គម្រោង

យើងទាំងអស់គ្នា​សុទ្ធសឹងតែ​ដឹង​ហើយ​ថា ទីតាំង​គឺជា​ចំណុច​សំខាន់ ក្នុងការ​ជ្រើសរើស ឬ​វិនិយោគ​ទៅលើ​អចលនទ្រព្យនីមួយៗ ហើយ​លោកអ្នក​អាច​ជ្រើសរើស​ទីតាំង​ដែល​លោកអ្នក​ពេញចិត្ត និង​ផ្តល់​អាទិភាព​ក្នុងការ​រស់នៅ ដូចជា ជិត​កន្លែងធ្វើការ ផ្សារ ឬ​ជិត​សាលារៀនកូនៗ ឬ ស្ថិតនៅ​ក្បែរ​តំបន់​ពាណិជ្ជកម្មផ្សេង។ មួយវិញទៀត​លោកអ្នក​ក៏​អាច​ជ្រើសរើស និង​សម្លឹងមើល​បន្ថែម​នូវ​ភាព​រីកចម្រើន​នៅក្នុង​តំបន់​នោះ។

ជានិច្ចកាល តំបន់​ដែល​ទើបតែ​អភិវឌ្ឍន៍​ថ្មី តែងតែ​ផ្តល់ឱកាស​នូវ​ផលចំណេញ​លឿន​ជាង​តំបន់​ដែល​បាន​អភិវឌ្ឍន៍​រួចហើយ។

ទី២- ប្រវត្តិ​ក្រុមហ៊ុន និង​បទពិសោធន៍

យើង​គប្បី​គួរតែ​សិក្សា​ពី​ម្ចាស់​គម្រោង​មាន​ជីវប្រវត្តិ និង​ស្នាដៃ​យ៉ាងដូចម្តេច? ចំណុច​នេះ អាចធ្វើឱ្យ​យើង​ស្វែងយល់ អំពី​ទំនួល​ខុសត្រូវ​របស់​ក្រុមហ៊ុន។ជាក់ស្តែង​យើង​កត់សម្គាល់ឃើញ​មាន​គម្រោង​មួយចំនួន មានតែ​ច្បាប់​សាងសង់ ប៉ុន្តែ​ពុំមាន​វិញ្ញាបនបត្រ​អភិវឌ្ឍន៍​គម្រោង​នោះទេ ដែល​ធ្វើឱ្យ​គម្រោង​នេះ មិនមាន​លក្ខណៈ​ស្របច្បាប់​ពេញលេញ ហើយ​យើង​ក៏ត្រូវ​តែពិនិត្យ​មើល​បន្ថែ​ម​ទៀតថា គម្រោង​នេះ​មាន​ផ្តល់ជូន​នូវ​កម្មសិទ្ធិ​ប្លង់ រឹង​ជូន​ពេល​បញ្ចប់​ការសាងសង់​នេះដែរ​ឬទេ? ហើយ​យើង​ក៏ត្រូវ​សិក្សា​អំពី​កុងត្រា​ទិញ-លក់​របស់​ក្រុមហ៊ុន​ផងដែរ។

ទី៣- គុណភាព​សំណង់ និង​គម្រោង

គម្រោង​មេ​ដែល​រចនា​បានល្អ ពិតជា​ផ្តល់នៅ​គុណ​តម្លៃបន្ថែម​នាពេល​អនាគត។ ចំពោះ​សំណង់ផ្ទះ​ដែល​រឹងមាំ និង​មាន​ស្តង់ដារ​ធ្វើឱ្យ​ការរស់នៅ ប្រកបទៅដោយ​ផាសុកភាព។ លោកអ្នក​ក៏ត្រូវ​មើល​បន្ថែមថា តើ​នឹងមាន​ផ្តល់​អ្វីខ្លះ ដែល​បន្ថែម​ជូន​ដល់​អតិថិជន ដូចជា សម្ភារៈ​ក្នុងផ្ទះ គ្រឿង​បរិក្ខារ​ក្នុង​បុរី សេវាកម្ម​គ្រប់គ្រង​ថែរក្សា​ទូទៅ និង​សេវាកម្ម​គ្រប់គ្រង​សន្តិសុខ​ជាដើម។

ទី៤- ទិញ​ក្នុង​គម្រោង

បើ​និយាយ​ពី​ទិញ​ក្នុង​គម្រោង អតិថិជន​គាត់​អាច​ចំណេញ​ច្រើន ដោយសារតែ ទី១ អតិថិជន​អាច​បង់​រំ​លួស​ដោយ​អត់​ការប្រាក់ ហើយ​ទី២,អតិថិជន​អាច​តាមដាន​គុណភាព​សំណង់។

ជាក់ស្តែង លោក សុខ ជា ដែលជា​ប្រធាន​ផ្នែក​លក់ និង​ជា​អគ្គនាយករង​ក្រុមហ៊ុន Papa & Mama បាន​ណែនាំ​គម្រោង​បុរី​មួយ​ឈ្មោះ បុរី ណា​ឌី ។

បុរី ណា​ឌី គឺជា​បុរី​មួយ​ដែល​នៅ​ជិត​ផ្លូវជាតិ 6A ហ៊ុម​ដោយ​បុរីធំៗនៅ​ព័ទ្ធជុំវិញ នៅ​ជិត​សួនសត្វ​សា​ហ្វា​រី នៅ​ជិត​សួន​ទឹក នៅ​ជិត​ស្តា​ត​តេ​ជោ ជាពិសេស​ទៅទៀត​មាន​ទន្លេ​អម​សងខាង ស័ក្ដិ​សមជា​តំបន់​រស់នៅ​ប្រកបដោយ​សុភមង្គល ព្រោះ​មាន​ខ្យល់អាកាស​បរិសុទ្ធ​ពី​ធម្មជាតិ ចំណែក​ក្នុង​បុរី​មាន​សួនផ្កា​ត្របែកព្រៃ និង​ក្លឹប​ហាត់ប្រាណ។

ជាងនេះទៅទៀត បុរី ណា​ឌី បាន​យក​អ្នកគ្រប់គ្រង​បុរី គឺ​ក្រុមហ៊ុន Keystone ដែលជា​ក្រុមហ៊ុន​ល្បី​មក​គ្រប់គ្រង​បុរី។ លោក សុខ ជា បាន​បន្ថែមទៀតថា មូលហេតុ​ដែល​បុរី ណា​ឌី បាន​យក​ក្រុមហ៊ុន keystone មក​គ្រប់គ្រង មូលហេតុ​ដោយសារ​បុរី​មួយចំនួន​ការគ្រប់គ្រង​សន្តិសុខ​នៅមានកម្រិត ដូចនេះ​អតិថិជន​ដែល​ទិញ​បុរី គួ​សម្រេចចិត្ត​ទិញ​បុរី​ណា​ឌី ដើម្បី​សេចក្ដីសុខ សុវត្ថិភាព និង​មាន​ផាសុកភាព​ខ្ពស់។

សំរាប់​ព័ត៌មាន​លំអិត​អតិថិជន អាច​ទំនាក់ទំនង​តាមរយៈ​លេខ 011 72 51 51 / 016 72 51 51 ៕

អ្នកជំនាញៈ ការបង្កើត​រំហូរ​សាច់​ប្រាក់​ក្នុង​វិស័យ​អចលនទ្រព្យ​នឹង​ជួយ​ឱ្យ​វិស័យនេះ​ងាក​ចេញពី​វិបត្តិ​បាន​លឿន

ដោយៈ ម៉ា​ណេ​ត

ភ្នំពេញៈ វិបត្តិ​កូ​វីដ១៩បាននិងកំពុង​បង្ក​ផលប៉ះពាល់ ដល់​វិស័យ​ជាច្រើន​លើ​ពិភពលោក ហើយ​វិស័យ​អចលនទ្រព្យ​កម្ពុជា ក៏​គេច​មិន​រួច​ពី​ផលប៉ះពាល់ ពី​វិបត្តិ​ជំងឺ​រាតត្បាត​មួយ​នេះដែរ ប៉ុន្តែ​អ្នកជំនាញ​បានលើកឡើង​បាន​ថា អ្នកវិនិយោគ អ្នក​អភិវឌ្ឍន៍​គួរ​បង្កើត ឱ្យមាន​ដំណើរការ​ចរន្ត ឬ​រំហូរ​សាច់ប្រាក់​ក្នុង​វិស័យ​អចលនទ្រព្យ ដើម្បី​អាចឱ្យ​វិស័យ​មួយ​នេះ​ងើប​ឡើងវិញ​បាន​លឿន។

ប្រធាន​នាយក​ប្រតិបត្តិ​ក្រុមហ៊ុន Easy Property Investment លោក ​ម៉ម សេរី​បញ្ញា បាន​ថ្លែងប្រាប់​ក្នុង​សប្តាហ៍​នេះ​ថា ក្នុង​ស្ថានការណ៍​បច្ចុប្បន្ននេះ ពិភពលោក​កំពុង​ជួបប្រទះ​នឹង​បញ្ហា ហើយ​យើង​ក៏​ជួបនឹង​បញ្ហា​ដូចគ្នា ដោយសារ​វិបត្តិ​កូ​វីដ១៩ ។

លោក​បាន​ថ្លែងបន្តថា “ខ្ញុំ​អាច​និយាយបានថា វា​មាន​ផលប៉ះពាល់ ប៉ុន្តែ​យើង​មិនអាច​អង្គុយ​កាប់​បំពង់ រង់ចាំ​ទឹកភ្លៀង​នោះទេ ឬ​នៅក្នុង​រណ្តៅ​មួយ ដោយ​មិន​ប្រឹង​វារ​ឡើង​នោះទេ ព្រោះ​បើ​យើង​មិន​ធ្វើ​សកម្មភាព​អ្វី​សោះ យើង​នឹង​ដួល​ទាំងអស់គ្នា” ។

លោក​បាន​ថ្លែង​ទៀតថា “ដូច្នេះ​យើង​ត្រូវបានធ្វើ​យ៉ាងម៉េច ឱ្យមាន​ដំណើរការ​ចរន្ត​សាច់ប្រាក់ (cash flow) ហើយ​យើង​ឃើញថា អ្នកវិនិយោគ​មួយចំនួន នៅ​ប្រឹងប្រែង​ធ្វើ និង​អ្នកទិញ​នៅ​បន្ត​ទិញ ដែលជា​ឱកាស​មួយ​ល្អ ក្នុងការ​ទទួលបាន​តម្លៃ​ល្អ” ។

លោក​អំ​នាវ​ពា​វ​ដល់​វិនិយោគិន​ទាំងអស់ កុំឱ្យ​មានការ​ភិតភ័យ សម្រាប់​ការវិនិយោគ​នាពេល​បច្ចុប្បន្ន និង​បន្ត​អភិវឌ្ឍន៍ និង​វិនិយោគ​ទៅតាម​គម្រោង និង​ផែនការ​របស់ខ្លួន ប៉ុន្តែ​ត្រូវគោរព​តាម​ការណែនាំ​របស់​រដ្ឋ​ភិ​បាល តាមរយៈ​ការដាក់​គោលការណ៍​ណែនាំ​របស់​ក្រសួងសុខាភិបាល។

ជាមួយគ្នានេះ​លោក​សំ សុខ​នឿន​ប្រធាន​សមាគម​អចលនទ្រព្យ​សកល​បានឱ្យដឹង​កាលថ្មីៗថា ការរីក​រាលដាល​នៃ​ជំងឺ​កូ​វីដ១៩ ជា​សហគមន៍​ជាថ្មី​នៅ​ក្នុ​ប្រទេស​កម្ពុជា នាពេលនេះ គឺជា​រឿង​មិន​នឹកស្មាន​មួយ ក៏ប៉ុន្តែ​លោក​ជំ​រុញឱ្យ​វិនិយោគិន​នានា ក្នុង​វិស័យនេះ គួរតែ​បន្ត​គម្រោង​អភិវឌ្ឍន៍​របស់ខ្លួន​ប​ន្ត ដោយសារតែ​កូ​វីដ​សហគមន៍​នេះ នឹងត្រូវ​ទប់ស្កាត់បាន។

លោក​បាន​ថ្លែង​ទៀតថា “ជា​បទពិសោធន៍​កន្លង​មក កម្ពុជា​បាន​ទប់ស្កាត់​ការរីក​រាល​និង​គ្រប់គ្រង​បានល្អ លើ​ការឆ្លង​រាលដាល​នៃ​ជំងឺ​នេះ ហើយ​សម្រាប់​ការឆ្លង​សហគមន៍​លើក​នេះ លោក​ក៏​ជឿថា​អាច​ទប់ស្កាត់បាន​ដូចគ្នា ជាមួយនឹង​វត្តមាន​វ៉ាក់សាំង​នៃ​កូ​វីដ១៩ ដែល​កំពុង​ចាក់​ជូន​ពលរដ្ឋបណ្ដើរៗផងដែរ” ។

លោក​សំ សុខ​នឿន បាន​បន្តថា សម្រាប់​ពេលនេះ ប្រជាពលរដ្ឋ​ទាំង​សូម​ស្ដាប់​តាម​ការណែនាំ​របស់​ក្រសួងសុខាភិបាល ក៏ដូចជា​ប្រមុខ​រាជរដ្ឋាភិបាល ដើម្បី​ទប់ស្កាត់​ការឆ្លង​កាន់តែ​ធំ ដើម្បីឱ្យ​ការឆ្លង​សហគមន៍​នេះ បានបញ្ចប់​នៅពេលឆាប់ៗ និង​អាច​ស្ដារ​សេដ្ឋកិច្ចកម្ពុជា​បាន​ប្រសើរ​ឡើងវិញ៕

វិបត្តកូ​វីដ១៩ បានធ្វើ​ឲ្យ​ទីក្រុង​នៅ​កម្ពុជា​ចំនួន​ពីរ​ស្ងប់ស្ងាត់​ដូច​ចោរលួច​សេះ

ដោយ​ស៊ីវ ម៉េង

ភ្នំពេញៈ ការរីក​រាលដាល​ជំងឺ​កូ​វីដ១៩ បាននិងកំពុង​ធ្វើ​ឲ្យ​ទីក្រុង​ចំនួន​ពីរ​ស្ងប់ស្ងាត់​ដូច​ចោរលួច​សេះ​អញ្ចឹង វា​ពិតជា​គួរ​ឲ្យ​ស្រណោះ ប៉ុន្តែ​គេហទំព័រ Propertyarea.asia សង្ឃឹម និង​ជឿជាក់​លើ​ចំណាត់ការ​របស់​រដ្ឋាភិបាល​ថា នឹង​គ្រប់គ្រង​ការរីក​រាលដាល​ជំងឺ​នេះ និង​ធ្វើ​ឲ្យ​ស្ថានការណ៍​វិល​មកកាន់​ភាពប្រក្រតី​វិញ។

ទីក្រុង​ដែលមាន​សភាព​ដូច​ទីក្រុង​ខ្មោច នា​អតីតកាល បានមក​លងបន្លាច​ជដ​ថ្មី នោះ​គឺ​ក្រុងព្រះសីហនុ ដែល​មិនមាន​អ្នកធ្វើដំណើរ​ឆ្លងកាត់ ទោះបី​ផ្លូ​រលោង​ស្អាត ទើប​បញ្ចប់​ការសាងសង់​នៅពេលថ្មីៗនេះ​ក្តី។

ទីក្រុង​មួយទៀត គឺ​ក្រុង​បាវិត ក៏មាន​សភាព​ស្ងប់ស្ងាត់​ផងដែរ ដែល​នៅលើ​ដងផ្លូវ​នៃ​ទីក្រុង​ទាំងពីរ​នេះ ពិតជា​មិនសូវមាន​ចរាចរណ៍​ឆ្លងកាត់ និង​ស្ងប់ស្ងាត់​មិន​ធ្លាប់មាន​ចាប់តាំងពី​កម្ពុជា​បានបញ្ចប់​សង្គ្រាម ក្នុង​រយៈពេល​ជាង៣០ឆ្នាំ​មកនេះ។

សម្តេច​តេ​ជោ ហ៊ុន សែន កាលពីដើម​សប្តាហ៍​នេះ បាន​ជម្រុញ​ឲ្យ​អាជ្ញាធរ​ក្រុងព្រះសីហនុ ត្រូវ​បិទ​មិន​ឲ្យ​ប្រជាពលរដ្ឋ​ចេញចូល​ក្រុងព្រះសីហនុ ក្នុងករណី​មិនចាំបាច់ ដោយ​មិន​ឲ្យ​ឆ្លង​ទៅកាន់​ខេត្ត​ដទៃ លើកលែងតែ​អ្នកបើករថយន្ត​ដឹកទំនិញ។

ជាមួយគ្នានេះ ប្រមុខ​រដ្ឋាភិបាល ក៏​បន្ត​ប្រកាស​ផ្អាក​សាលារៀន​នៅ​រាជធានី​ភ្នំពេញ និង​ខេត្តកណ្តាល​រយៈពេល​ពីរ​សប្តាហ៍​បន្ថែមទៀត ខណៈ​ជំងឺ​នេះ​រីក​រាលដាល និង​ទីតាំង​រ៉ុ​រក​កាន់​ត​តែ​ធំ និង​មាន​សភាព​ស្មុ​គ្រ​ស្មាញ។

លោកស្រី​តាំ ង ហួរ នាយិកា​ក្រុមហ៊ុន AMATAK Property Service Co, Ltd បាន​មានប្រសាសន៍ថា វិបត្តិ​នៃ​ព្រឹត្តិការណ៍២០កុម្ភៈ បាននិងកំពុង​ធ្វើ​ឲ្យ​ចរន្ត​ទិញ​លក់​អចលនទ្រព្យ​មាន​សភាព​ស្ងប់ស្ងាត់ ប៉ុន្តែ​លោកស្រី​បានបង្ហាញ​ជំនឿ​ចិត្ត​ថា ប្រមុខ​រដ្ឋាភិបាល​កម្ពុ​ជា​នឹង​អាច​គ្រប់គ្រង​ជំងឺ​នេះ​បានឆាប់ៗ ដើម្បី​ឲ្យ​ស្ថានភាព​វិល​មករក​ភាពប្រក្រតី​វិញ។

លោកស្រី​បន្តថា “ខ្ញុំ​ជឿ​លើ​ប្រមុខ​រដ្ឋាភិបាល ពិសេស​សម្តេច​តេ​ជោ ដែល​លោក​មាន​សមត្ថភាព​នឹង​ដោះស្រាយ​បញ្ហា​នេះ​បាន” ។

ជាមួយគ្នានេះ លោក សំ សុខ​នឿន ប្រធាន​សមាគម​អចលនទ្រព្យ​សកល បាន​មានប្រសាសន៍ថា ការរីក​រាលដាល​ជំងឺ​កូ​វីដ១៩ ក្នុង​ព្រឹត្តិការណ៍២០កុម្ភៈ ជា​រឿង​មិន​នឹង​ស្មាន​ដល់ ខណៈដែល​វា​កំពុង​រីក​រាលដាល​នេះ លោក​ជឿថា ប្រមុខ​រដ្ឋាភិបាល​នឹង​អាច​គ្រប់គ្រង​ជំងឺ​នេះ​បាន ព្រោះ​ព្រឹត្តិការណ៍៣វិច្ឆិកា និង២៨ វិច្ឆិកា​កន្លងមក រដ្ឋាភិបាល​បាន​គ្រប់គ្រង​ជំងឺ​នេះ​បានល្អ៕

អ្នកជំនាញ​បង្ហើប​ពី​វិធីសាស្ត្រងាយៗទិញ​ដី​វិនិយោគ​បាន​ចំណេញ​ក្នុងសម័យ​កូ​វីដ១៩

ដោយៈ រ៉ា​ណេ​ត

ភ្នំពេញៈ នៅក្នុង​បរិបទ​ដែល​កំពុង​ញាំញី ដោយ​ការ​រាតត្បាត​នៃ​ជំងឺឆ្លង​កូ​វីដ១៩ បង្កឱ្យមាន​ផលប៉ះពាល់​ដល់​សេដ្ឋកិច្ច ស្ទើរ​គ្រប់​បណ្តា​ប្រទេស​នោះ មាន​មនុស្ស​ជាច្រើន​សម្ងំ​ទុក​លុយ​មិន​ហ៊ាន​ចំណាយ ទៅលើ​ការវិនិយោគ​នោះឡើយ សូម្បីតែ​វិស័យ​អចលនទ្រព្យ និង​ទីផ្សារ​ដីធ្លី​នៅ​តំបន់​ខ្លះ​ក៏ត្រូវ​ជាប់គាំង។

ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា លោក​ច្រឹ​ក សុខ​នី​ម​បានទទួល​ស្គាល់​នូវ​ឱនភាព នៃ​វិស័យ​អចលនទ្រព្យ​នៅ​កម្ពុជា ប៉ុន្តែ​មិនមែន​ធ្លាក់ចុះ ឬ​នៅ​ទ្រឹង​ទាំងអស់​នោះទេ ព្រោះ​ផ្នែក​ខ្លះ​នៅក្នុង​វិស័យ​មួយ​នេះ នៅតែ​អាច​បន្តដំណើរ​បាន​យ៉ាង​រលូន ជាពិសេស​មាន​អ្នកជំនួញ​ខ្លះ អាច​ទទួលបាន​ផលចំណេញ ពី​វិបត្តិ​មួយ​នេះ​យ៉ាងច្រើន​ថែមទៀត​ផង។

លោក​បញ្ជាក់ថា “ខ្ញុំ​និយាយ​តែ​ផ្នែក​មួយ ដែល​ស្ថិតនៅក្នុង​វិស័យ​អចលនទ្រព្យ នោះ​គឺ​ទីផ្សារ​ដីធ្លី។ ទីផ្សារ​ដីធ្លី​ទោះ​ជាមាន​វិបត្តិ​ជំងឺ​កូ​វីដ ក៏​ផ្នែក​មួយ​នេះ​នៅតែមាន​សកម្មភាព​ទិញ​លក់ ដូចជា​ទីផ្សារ​លំនៅដ្ឋាន​តម្លៃ​សមរម្យ​ដែរ ហើយ​អាច​មានឱកាស​ទទួលបាន​ចំណេញ​ពី​ការវិនិយោគ​យ៉ាងច្រើន​ថែម​ទៀតផង” ។

លោក​បន្តថា “សម្រាប់​អ្នកចេះ​វិនិយោគ​ដីធ្លី នៅក្នុង​កាលៈទេសៈ​នេះ គឺមាន​ឱកាស​ចំណេញ​ច្រើន នោះ​គឺ​ការចេះ​វាយតម្លៃ និង​ស្គា​ល់ពី​ស្ថានភាព​ទីតាំង។ ការវាយតម្លៃ​មុនពេល​សម្រេចចិត្ត​គឺ​សំខាន់បំផុត។ អ្នក​ត្រូវ​ដឹង​ឱ្យ​ច្បាស់​ពី​តម្លៃ​ដីធ្លី នៅលើ​ទីផ្សារ​ឱ្យបាន​ច្បាស់លាស់” ។ លោក​បន្តថា “បើ​មិនចេះ​វាយតម្លៃ គួរ​ប្រឹក្សា​ជាមួយ​ភ្នាក់ងារ​ជំនាញ ដែលមាន​ក្រមសីលធម៌ និង​វិជ្ជាជីវ ហើយ​ធ្វើការ​ប្រៀបធៀប​រវាង​តម្លៃ ដែល​ម្ចាស់​ដី​បាន​កាត់​លក់ និង​តម្លៃ​ទូទៅ​នៅលើ​ទីផ្សារ ជាពិសេស​នៅក្នុង​កំឡុងពេល ដែល​កំពុង​ប្រឈម​នឹង​វិបត្តិ​កូ​វីដ​នេះ​តែម្ដង។ ពេលនោះ​អ្នកនឹង​បានដឹងថា ដី​ដែល​អ្នក​ចង់​ទិញ​ទុក​វិនិយោគ​អាច​ផ្តល់ឱកាស​ចំណេញ​ដល់​មាន​អត្រា​ប៉ុន្មាន​ភាគរយ” ។

លោក​ច្រឹ​ក សុខ​នី​ម បាន​ប្រាប់ឱ្យដឹង​ផងដែរ​ថា នៅក្នុង​បរិបទ​នៃ​សម័យ​កូ​វីដ​នេះ ប្រសិនបើជា​អ្នកមាន​លុយ​គ្រប់គ្រាន់ មិន​ពាក់ព័ន្ធ​ទៅនឹង​បំណុល​របស់​ធនាគារ នឹង​អាច​មានឱកាស​ចំណេញ​បាន​ច្រើន ដោយសារតែ​រង់ចាំ​ទិញ​ដី​ទាំងឡាយ ដែល​ម្ចាស់​ត្រូវការ​លុយ​បង្វិល ហើយ​បង្ខំចិត្ត​លក់​ដី​ក្នុង​តម្លៃថោក ឬ​ទាប​ជាង​ទីផ្សារ លុះ​ពេល​ស្ថាន​ការ​ទៅជា​ល្អ​វិញ​ក្រោយ​វិបត្តិ​ត្រូវបាន​បញ្ចប់ នោះ​តម្លៃ​ដី​នឹង​ឡោះ​ង​ថ្លៃ​វិញ​ជាក់​ជា​មិ​ខាន។

លោក​បន្តថា “ដូច្នេះ សម្រាប់​អ្នកមាន​លុយ គួរ​ទិញ​ដី​ទុក​វិនិយោគ​នៅក្នុង​ពេលនេះ​អាច​មានឱកាស​ទទួលបាន​ចំណេញ​ច្រើន” ៕

ចំណេះដឹងវិនិយោគៈតើអ្វីទៅជាការវិនិយោគសកម្ម និងការវិនិយោគអកម្ម

ដោយៈវឌ្ឍនៈ

ភ្នំពេញៈ ក្នុងពេលបច្ចុប្បន្នគេមើលឃើញថា ការវិនិយោគលើទិញមូលបត្រ និងការ​វិ​និយោគអចលនទ្រព្យនៅក្នុងប្រទេសកម្ពុជា ចាប់ផ្ដើមកើនឡើងជាបន្តបន្ទាប់ ដោយមានក្រុមហ៊ុនជាតិ និងអន្តរជាតិជាច្រើនចូលក្នុងវិស័យទាំងពីរ។

នៅក្នុងការវិនិយោគនេះដែរ គេបានបែងចែកជាពីរ គឺការវិនិយោគសកម្ម និងការវិនិយោគសកម្ម ។ អ្វីទៅជាការវិនិយោគសកម្មនិងការវិនិយោគអកម្ម?។

ការវិនិយោគគឺជាសកម្មភាពនៃការទិញនូវប្រភេទមូលប័ត្រផ្សេងៗ និងអចលនទ្រព្យជាដើម ដើម្បីអាចទទួលបាននូវផលចំណេញត្រឡប់មកវិញ ក្នុងពេលវេលាណាមួយ។ ដើម្បីអាចវិនិយោគបាន គឺទាមទារឱ្យយើងមាននូវចំណេះដឹង និងវិធីសាស្រ្ដនានានៃការវិនិយោគនោះ។ ដែលថ្ងៃនេះ យើងនឹងស្វែងយល់ពីប្រភេទនៃការវិនិយោគចំនួនពីរ គឺការវិនិយោគសកម្ម (Active Investing) ជាសកម្មភាពដែលវិនិយោគិនទិញលក់ ឬជួញដូរនៅក្នុងទីផ្សារជាប្រចាំ រីឯការវិនិយោគអកម្ម (Passive Investing) ជាសកម្មភាពដែលវិនិយោគិនទិញលក់ ឬជួញដូរនៅក្នុងទីផ្សារដែរ ប៉ុន្ដែមិនសូវមានសកម្មភាពញឹកញាប់នោះទេ ។

មានកត្តាសំខាន់ៗ៥យ៉ាង ដែលបង្ហាញពីភាពខុសគ្នានៃការវិនិយោគសកម្ម និងការវិនិយោគអកម្មនេះ ដូចជា

ទី១ រយៈពេលនៃការវិនិយោគ

ការវិនិយោគអកម្ម គឺវិនិយោគិនទិញ និងរក្សាទុក (buy and hold) ដើម្បីទទួលបានប្រាក់ចំណេញនៅក្នុងរយៈពេលវែង។ ឧទាហរណ៍ វិនិយោគិនទិញភាគហ៊ុន និងរក្សាទុកក្នុងរយៈពេលវែង ដើម្បីទទួលបានប្រាក់ចំណេញឬភាគលាភរបស់ក្រុមហ៊ុន តាមរយៈការឡើងថ្លៃនៃភាគហ៊ុនដែលបានទិញនោះ។ ចំពោះការវិនិយោគសកម្ម វិនិយោគិនផ្ដោតទៅលើការវិនិយោគក្នុងរយៈពេលខ្លី ពោលគឺពួកគេអាចទទួលបានប្រាក់ចំនេញ ពីការប្រែប្រួលតម្លៃនៅក្នុងទីផ្សារក្នុងពេលដ៏ខ្លីនោះ។

ទី២ ផលចំណេញ កំហាត និងហានិភ័យ

ការវិនិយោគអកម្មអាចទទួលបានផលចំណេញខ្ពស់ ប្រសិនបើអ្នកសម្រេចចិត្តវិនិយោគត្រូវ។ ប៉ុន្ដែប្រសិនបើមានការប្រែប្រួលថ្លៃក្នុងរយៈពេលវែង នោះវាក៏នាំឱ្យកើតមាននូវហានិភ័យផងដែរ ដូចនេះដើម្បីបញ្ចៀសនូវហានិភ័យនេះ។ វិនិយោគិនប្រភេទនេះគួរជ្រើសរើសវិធីពិពិធកម្មផលបត្រ រីឯការវិនិយោគសកម្ម ទទួលបានការចំណេញខ្ពស់នៅពេលដែលតម្លៃទីផ្សារកើនក្នុងរយៈពេលខ្លី ប៉ុន្ដែក៏មានហានិភ័យខ្ពស់ ប្រសិនបើមានការធ្វេសប្រហែស ឬគិតខុសមួយពេល។

ទី៣ ការចំណាយផ្សេងៗ

ការវិនិយោគអកម្ម មិនទាមទារឱ្យមានការចំណាយច្រើនដង លើឈ្មួញជើងសារក្នុងការធ្វើប្រតិបត្តិការនោះទេ ព្រោះថាវិនិយោគិនបែបអកម្មនេះ មិនសូវមានសកម្មភាពច្រើនក្នុងទីផ្សារ។ រីឯការវិនិយោគសកម្ម ទាមទារឱ្យមានការចាយវាយ លើថ្លៃប្រតិបត្តិការនានា ដូចជាចំណាយលើឈ្មួញជើងសារជាដើម ដោយសារវិនិយោគិនត្រូវធ្វើសកម្មភាពប្រតិបត្តិការនៅលើទីផ្សារជាញឹកញាប់។

៤ ភាពបត់បែនក្នុងការវិនិយោគ

ការវិនិយោគអកម្ម មិនសូវមានភាពបត់បែនច្រើននោះទេ ដោយសារការទិញនិងលក់ផ្អែកលើការប្រែប្រួលថ្លៃ ក្នុងរយៈពេលវែងមួយ ខណៈពេលដែលការវិនិយោគសកម្ម តម្រូវឱ្យមានភាពបត់បែនខ្ពស់ ដោយវិនិយោគិនសម្រេចចិត្ត ក្នុងការវិនិយោគដើម្បីទទួលបានផលចំណេញក្នុងរយៈពេលខ្លី ដូចជា ការជួញដូររូបិយប័ណ្ណបរទេស (FOREX) ដែលវិនិយោគិនត្រូវសម្រេចចិត្តទិញ និងលក់វិញភ្លាមៗទៅការតាមឡើងចុះ នៃតម្លៃរូបិយប័ណ្ណនោះ។

ទី៥ តម្រូវការជំនាញ

ការវិនិយោគអកម្ម វិនិយោគិនអាចនឹងមិនទាមទារពេលវេលា ដិតដល់ច្រើនលើជំនាញបច្ចេកទេស ដ្បិតថាវិនិយោគិនបែបអកម្មនេះកម្រ នឹងចូលធ្វើប្រតិបត្តិការវិនិយោគ និងមិនសូវតាមដាន ពីស្ថានភាពទីផ្សារជាប្រចាំទេ។ ពួកគេតែងតែមានឈ្មួញជើងសារ ឬអ្នកជំនាញហិរញ្ញវត្ថុ ជួយសម្រេចចិត្តក្នុងការវិនិយោគរបស់ពួកគេ។ រីឯការវិនិយោគ​សកម្ម តម្រូវឱ្យវិនិយោគិនមានជំនាញ ក្នុងការវិភាគពីទីផ្សារ តម្លៃ និងការវិភាគបច្ចេកទេ​សផ្សេងៗទៀត ដើម្បីអាចទទួលបានផលចំណេញច្រើន ក្នុងរយៈពេលខ្លី និងជៀសផុតពីហានិភ័យនានា។

សរុបសេចក្តីមក ការវិនិយោគសកម្ម និងការវិនិយោគអកម្មគឺសុទ្ធតែជាវិធីសាស្រ្ដដ៏ពេញនិយម ដែលត្រូវបានគេប្រើប្រាស់ដើម្បីវិនិយោគ។ ប្រសិនបើអ្នកចង់សម្រេចចិត្តវិនិយោគ អ្នកគួរស្វែងយល់ពីវិធីសាស្រ្ដទាំងពីរនេះ ឱ្យបានស៊ីជម្រៅ ឬក៏ប្រឹក្សាជាមួយអ្នកជំនាញ និងពិចារណាលើសមត្ថភាព ក៏ដូចជាពេលវេលាផ្ទាល់ខ្លួន និងការត្រៀមខ្លួនក្នុងការប្រឈមនឹងហានិភ័យនានាជាមុនសិន ដើម្បីឱ្យសម្រេចចិត្តវិនិយោគដោយត្រឹមត្រូវ៕

ការនាំចេញដំឡូងមីកម្ពុជាកំពុងមានទីផ្សារល្អប្រសើរ ខណៈទំហំនាំចេញកសិផលសរុបកើនដល់១,៦លានតោន

ដោយ: គង់ សូរិយា

ភ្នំពេញ: ក្រៅពីផលិតផលអង្ករ ការនាំចេញផលិតផលកសិកម្មរបស់កម្ពុជាគិតត្រឹមរយៈពេល២ខែ ដើមឆ្នាំ២០២១ មានទំហំប្រមាណជិត១,៦លានតោន កើនឡើងជាង ៥៦ម៉ឺនតោន ស្មើប្រមាណជាង៥៥ភាគរយ ក្នុងនោះទីផ្សារនាំចេញ ដំឡូងមីទាំងស្រស់និងក្រៀមក៏មានភាពល្អប្រសើរផងដែរ។

យោងតាមរបាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមា​ញ់ និងនេសាទបានឱ្យដឹងថា ផលិតផលដែលបានទទួលការបញ្ជាទិញច្រើនជាងគេ រួមមាន៖ ដំឡូងមីក្រៀមចំនួនប្រមាណជាង៨០ម៉ឺនតោន ដំឡូងមីស្រស់ជាង១៥ម៉ឺនតោនស្រូវជាង២៨ម៉ឺនតោន ក្នុងនោះមិនបានឆ្លងកាត់ច្រកភូតគាមអនាម័យ មានចំនួនជិត៥៦ម៉ឺនតោន គ្រាប់ស្វាយចន្ទីជាង៧៩ពាន់តោន គ្រាប់ពោតក្រហមជាង៧៨ពាន់តោន ផ្លែចេកស្រស់ជាង៧៥ពាន់តោន ផ្លែស្វាយស្រស់ជាង ៤៣ពាន់តោនជាដើម។

លោក នី កាណ ប្រធានសម្ព័ន្ធសមាគមដំឡូងមីខេត្តបាត់ដំបង នៅព្រឹកថ្ងៃទី៤ ខែមីនា ឆ្នាំ២០២១កន្លងមកបានឱ្យដឹងថា កាលពីចុងឆ្នាំ២០២០ ប្រជាកសិករបានជួបបញ្ហាដោយសារទឹកជំនន់ ធ្វើឲ្យផលដំណាំជាពិសេសដំឡូងមី ខូចខាតក្នុងរង្វង់ប្រមាណ៣០ទៅ៤០ភាគរយ ប៉ុន្តែអ្វីដែលជាលទ្ធផលការនាំចេញ ដំឡូងមីឆ្នាំនេះមានទីផ្សារល្អ។ ជាក់ស្តែងការនាំចេញដំឡូងមីក្រៀម ក្នុងខេត្តបាត់ដំបង មានប្រមាណ៣០ម៉ឺនតោន ក្នុងមួយគីឡូក្រាមទទួលបានជិត៦បាត។

លោកមានសុទិដ្ឋិនិយមថា “តម្លៃនេះនឹងកើនឡើងថែមទៀត ខណៈដែលបរិមាណដំឡូងមីឆ្នាំនេះ ទទួលបានផលតិចជាងឆ្នាំមុនៗ និងកំពុងស្ថិតនៅចុងដៃនៃការប្រមូលផល”។ លោកបញ្ជាក់ទៀតថា “ទីផ្សារនាំចេញ ផលិតផលកសិកម្មរបស់កម្ពុជា និងមានទីផ្សារកាន់តែល្អប្រសើរ ខណៈដែលរាជរដ្ឋាភិបាល បានខិតខំប្រឹងប្រែងស្វែងរកទីផ្សារថ្មីៗបន្ថែមចូលជា ការចុះកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េជាដើម”។

លោកបន្តថា សម្ព័ន្ធសមាគមដំឡូងមី បានរៀបចំឯកសារដាក់បញ្ចូលទៅក្នុងក្រមខណ្ឌពាណិជ្ជកម្មសេរីជាមួយចិន -កម្ពុជា ដើម្បីនាំចេញទៅកាន់ខេត្តក្វាងទុង និងខេត្តសាន់ស៊ី ក្រោមការសម្របសម្រួលដោយក្រសួងពាណិជ្ជកម្ម។

គិតត្រឹមរយះពេល២ខែ ដើមឆ្នាំ២០២១នេះ ការនាំចេញផលិតផលកសិកម្មក្រៅពីអង្ករ ដោយផ្អែកលើប្រព័ន្ធទិន្នន័យគ្រឹះភូតគាមអនាម័យ ក្នុងនោះការនាំចេញផលិតផលកសិកម្មក្រៅពីអង្ករ ដែលបាននាំចេញទៅកាន់គោលដៅចំនួន២៥ប្រទេស មានចំនួនជិត១,៦តោន កើនឡើងចំនួនជាង៥៦ម៉ឺនតោន ស្មើជាង៥៥ភាគរយ ប្រៀបធៀបរយះពេលដូចគ្នានិងឆ្នាំមុន៕

ក្រុមហ៊ុនអន្តជាតិកាន់តែច្រើននឹងចូលមកវិនិយោគនៅកម្ពុជាក្រោមការផ្តល់លក្ខខណ្ឌពិសេស

ដោយៈ រ៉ាណេត

ភ្នំពេញៈ ក្រោមការជួយសម្របសម្រួលពីសំណាក់រាជរដ្ឋាភិបាល និងការអនុវត្តច្បា​​ប់វិនិយោគថ្មី កម្ពុជានឹងកាន់តែទាក់ទាញបណ្តាក្រុមហ៊ុនអន្តរជាតិ ក៏ដូចជាជនបរទេ​សនានាចូលមកវិនិយោគ បន្ថែមនៅកម្ពុជាកាន់តែច្រើនទៀត ខណៈដែលនៅតាមបណ្តាប្រទេសជិតខាងក្នុងតំបន់មួយចំនួន មិនបានការផ្តល់ជូនលក្ខខណ្ឌពិសេស សម្រាប់ជនបរទេសនោះឡើយ។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍នៅថ្ងៃទី៥ ខែមីនា ឆ្នាំ២០២១នេះថា ភាពទាក់ទាញលើការវិនិយោគពីសំណាក់ក្រុមហ៊ុនអន្តរជាតិ ក៏ដូចជាបណ្តាជនបរទេសនានាមកកម្ពុជា នឹងកាន់តែមានកំណើនជាបន្តបន្ទាប់ ខណៈដែលទទួលបានការជួយសម្របសម្រួល និងលើកទឹកចិត្តពីសំណាក់រាជរដ្ឋាភិបាលកម្ពុជា ជាពិសេសការអនុវត្តនូវច្បាប់វិនិយោគថ្មី ដែលកាន់តែផ្តល់នូវអត្ថប្រយោជន៍ជាច្រើនដល់ពួកគេ។

លោកឧកញ៉ាបញ្ជាក់ថា “បច្ចុប្បន្នកម្ពុជាបានធ្វើកំណែទម្រង់ និងដាក់ឱ្យអនុវត្តនូវច្បាប់វិនិយោគថ្មី ដែលកាន់តែផ្តល់ភាពងាយស្រួល ដល់បណ្តាក្រុមហ៊ុនអន្តរជាតិ ក៏ដូចជាបណ្តាជនបរទេសនានាផងដែរ”។ លោកបន្តថា “នៅក្នុងប្រទេសកម្ពុជា ជនបរទេសអាចមានសិទ្ធិវិនិយោគផ្ទាល់១០០ភាគរយ ដោយមិនចាំបាច់សហការកម្មសិទ្ធិជាមួយអ្នកវិនិយោគក្នុងស្រុក(៥១%+៤៩%) ដូចជាបណ្តាប្រទេសជិតខាង ក្នុងតំបន់មួយចំនួននោះឡើយ មានន័យថា ជនបរទេសមានសិទ្ធិធ្វើជាម្ចាស់អាជីវកម្ម ឬម្ចាស់ក្រុមហ៊ុនដោយឯកតោភាគី១០០ភាគរយ”។

អ្វីដែលកាន់តែពិសេស គឺកម្ពុជាបានក្លាយជាប្រទេសផ្តល់សេវាកម្ម ក្នុងនាមជាភ្នាក់​ងារចែកចាយទំនិញ ផលិតផលចម្រុះ ទៅកាន់ទៅផ្សារដ៏ធំរបស់ប្រទេសចិន ដែលជាង១៤០០លាននាក់ រួមជាមួយនឹងទីផ្សារនៃបណ្តាប្រទេសមួយចំនួនទៀត ដែលនឹងចុះកិច្ចព្រមព្រៀងពាណិជ្ជកម្មសេរីជាមួយកម្ពុជា ដូចជាប្រទេសកូរ៉េ ជប៉ុន ឥណ្ឌា ហុងកុង ជាដើម។ បន្ថែមពីនេះ ជនបរទេសក៏មានសិទ្ធិក្លាយជាម្ចាស់អចលនវត្ថុផងដែរ ដោយអាចទិញអាគារធ្វើជាកម្មសិទ្ធិចាប់ជាន់ទី១ឡើងទៅ។

ពាក់ព័ន្ធទៅនឹងការអនុគ្រោះដល់បណ្តាជនបរទេសមានសិទ្ធិក្លាយជាម្ចាស់អចលនវត្ថុនៅកម្ពុជា លោកឧកញ៉ាបណ្ឌិតគីម ហ៊ាង ប្រធានKw Cambodia ធ្លាប់បានមានប្រសាសន៍កាលពីពេលកន្លងទៅថ្មីៗនេះថា ការផ្តល់សិទ្ធិដល់ជនបរទេសក្លាយជាម្ចាស់អចលនវត្ថុចាប់ពីជាន់ទី១ឡើង វាគឺជារឿងមួយដែលលើកទឹកចិត្តដល់ជនបរទេសដែលចូលមករស់នៅ និងប្រអាជីវកម្មនៅក្នុងកម្ពុជា។ ប៉ុន្តែប្រសិនបើរាជរដ្ឋាភិបាលកម្ពុជា មានបង្កើត និងបែងចែកទីតាំងនៅតំបន់ណាមួយ ដែលអាចអនុញ្ញាតឱ្យជនបរទេសទិញអចលនទ្រព្យជាន់ផ្ទាល់ដី ធ្វើជាកម្មសិទ្ធិបានគឺកាន់តែល្អជាងនេះទៅទៀត។

លោកឧកញ៉ាបញ្ជាក់ថា “កម្ពុជាគួរបង្កើតតំបន់អចលនទ្រព្យពិសេស សម្រាប់ជនបរទេស។ នៅពេលដែលមានការបង្កើត តំបន់អចលនទ្រព្យពិសេសណាមួយ ដែលអនុ​ញ្ញាតឱ្យជនបរទេសមានសិទ្ធិក្នុងការទិញដី និងកាន់កាប់ជាកម្មសិទ្ធិស្របច្បាប់ ដើម្បីធ្វើការអភិវឌ្ឍផ្សេងៗ វានឹងជះឥទ្ធិពលល្អដល់តំបន់ដែលស្ថិតនៅក្បែរ ដែលយ៉ាងហោចណាស់ក៏ស្ថិតនៅក្នុងរង្វង់១០គីឡូម៉ែត្រជុំតំបន់អភិវឌ្ឍន៍នោះដែរ”។

លោកបន្តថា ជាធម្មតាជនបរទេសដែលមកទិញដី ទិញអចលនទ្រព្យនៅប្រទេសណាមួយគឺជាអ្នកមានលុយ ដូច្នេះនៅពេលប្រទេសណាមួយ មានអ្នកមានរស់នៅច្រើន កំណើននៃការអភិវឌ្ឍន៍នឹងកើតមាន ហើយការអភិវឌ្ឍនេះទៀតសោត គឺជាចលករមួយដែលជំរុញឱ្យមានតម្រូវការអចលនទ្រព្យ ដែលនឹងធ្វើឱ្យតម្លៃនៅលើទីផ្សារឡើងថ្លៃ ដោយ​ស្វ័យប្រវត្តិ៕

ក្រុមហ៊ុនCentury21 Cambodia តំរង់ទិសចាប់យកទីផ្សារចិន ដើម្បីចាប់ចំណែកទីផ្សារអចលនទ្រព្យកាន់តែធំ

ដោយៈ ស៊ីវ ម៉េង

ភ្នំពេញៈ ក្រុមហ៊ុន Century 21 Allwin Realty ដែលជាសមាជិកមួយរបស់ Century 21 Cambodia ផ្តោតលើទីផ្សារវិនិយោគិនចិន បានសម្រេចចុះកិច្ចព្រមព្រៀងពង្រីកប្រតិបត្តិការរបស់ខ្លួននៅកម្ពុជា ដើម្បីចាប់យកចំណែកទីផ្សារកាន់តែធំ ដោយជឿជាក់ថាស្ថានភាពទីផ្សារអចលនទ្រព្យកម្ពុជា នឹងល្អប្រសើរឡើងនៅឆ្នាំនេះ។

លោកGao Shan នាយកប្រតិបត្តិក្រុមហ៊ុន Century 21 Allwin Realty បានមាន​ប្រសាសន៍ថា កម្ពុជាគឺជាទីតាំងសក្តានុពលសម្រាប់វិនិយោគិនចិន ដាក់ទុនវិនិយោគដោយសារស្ថិរភាពនយោបាយ និងសេដ្ឋកិច្ច និងអំណោយផលនៃទំនាក់ទំនងល្អរវាងរដ្ឋាភិបាលនៃប្រទេសទាំងពីរ។ លោកបន្តថា ភាពងាយស្រួលនៃការធ្វើដំណើរ ដោយមានការតភ្ជាប់ជើងហោះហើរផ្ទាល់ពីកម្ពុជា ទៅស្ទើរគ្រប់ទីក្រុងសំខាន់ៗនៃប្រទេសចិន ក៏ជាអំណោយផលយ៉ាងសំខាន់ ហើយកត្តានេះធ្វើឲ្យការធ្វើដំណើរ តភ្ជាប់ប្រទេសទាំងពីរចំណាយត្រឹមចន្លោះពី២ ទៅ៥ម៉ោងប៉ុណ្ណោះ នៅពេលដែលស្ថានភាពជំងឺឆ្លងគ្រប់គ្រងបាន និងសុវត្ថិភាពត្រូវបានធានា។

លោកបន្តថា “វិនិយោគិនចិននៅកម្ពុជា មានការកើនឡើងយ៉ាងខ្លាំងនៅប៉ុន្មានឆ្នាំចុងក្រោយនេះ ហើយនឹងបន្តកើនឡើងនាពេលខាងមុខ។ កន្លងមកវិនិយោគិនទាំងនោះតែងមានបញ្ហាប្រឈមទាក់ទង នឹងការរកទីតាំងវិនិយោគនិងការទិញដី សម្រាប់ធ្វើប្រតិបត្តិការអាជីវកម្ម”។

លោកបន្តថា ពេលនេះក្រុមហ៊ុន Century 21 Allwin Realty គឺជាសមាជិកមួយរបស់ក្រុមហ៊ុនCentury 21 Cambodia ដែលជាក្រុមហ៊ុនអចលនទ្រព្យមានបណ្តាញធំទូលាយនៅកម្ពុជា ហើយប្រតិបត្តិការក្រុមហ៊ុនលោក នឹងជួយសម្រួលដោះស្រាយបញ្ហាប្រឈមដែលវិនិយោគិនចិនធ្លាប់ជួបប្រទះកន្លងមក។

ការពង្រីកខ្លួនរបស់ក្រុមហ៊ុន Century 21 Allwin Realty នាពេលនេះក៏សមស្របតាមការលើកឡើងរបស់ ជំនាញក្នុងវិស័យអចលនទ្រព្យ ដែលបានអះអាងថាទីផ្សារក្នុងវិស័យនេះ កំពុងមានសញ្ញាវិជ្ជមានឡើងវិញ នៅដើមឆ្នាំ២០២១នេះ បន្ទាប់ពីវត្តមានវ៉ាក់សាំងការពារជំងឺCovid19 ចាប់ផ្តើមមានហើយកំពុងចាក់ជូនក្រុមអទិភាព ដែលជួយបង្កើនទំនុកចិត្តវិនិយោគិន ជាពិសេសក្នុងចំណោមពាណិជ្ជករចិន ដែលជាវិនិយោគិនសក្តានុពល។

អ្នកស្រីGrace Rachny Fong នាយិកាក្រុមហ៊ុន Century 21 Cambodia បានឲ្យដឹងថា វិស័យអចលនទ្រព្យកម្ពុជា និងលំហូរវិនិយោគិនចិននៅកម្ពុជា នឹងស្ទុះឡើងប្រកប ដោយភាពវិជ្ជមាននៅឆ្នាំ ២០២១នេះ ដោយសារការរួមចំណែកនៃជំនួយវ៉ាកសាំង Covid 19 រហូតទៅដល់១លានដូសពីរដ្ឋាភិបាលចិនមកកម្ពុជា។

អ្នកស្រីថ្លែងថា #ឆ្នាំ ២០២១លំហូរវិនិយោគិនចិននៅកម្ពុជា នឹងបង្កើន ហើយការពង្រីកខ្លួនរបស់ក្រុមហ៊ុន Century 21 Allwin Realty ដែលជាក្រុមហ៊ុនផ្តោតសំខាន់លើទីផ្សារចិននាពេលនេះ នឹងជួយឲ្យពាណិជ្ជករចិនវិនិយោគនៅកម្ពុជា ទទួលបានផលចំណេ ញ និងវិនិយោគដោយសុវត្ថិភាព”។

គិតមកទល់ពេលនេះ ក្រុមហ៊ុនCentury 21 Cambodia កំពុងដំណើរការដោយមានការិយាល័យ២៣នៅភ្នំពេញ និង៣៨សាខានៅគ្រប់បណ្តាខេត្តនៅកម្ពុជា ហើយមានភ្នាក់ងារអចលនទ្រព្យប្រកបដោយជំនាញ និងវិជ្ជាជីវៈសរុបដល់ទៅជិត៧០០នាក់៕