ដោយវឌ្ឈនា
ភ្នំពេញៈ ប្រទេសកម្ពុជាគឺជាប្រទេសមួយ ក្នុងចំណោមប្រទេសនៅទូទាំងពិភពលោក នឹងមានអត្រាពន្ធទាបបំផុតពាក់ព័ន្ធនឹងវិស័យល្បែងស៊ីសង ក្រោមច្បាប់ថ្មីដែលមន្ត្រីរាជរដ្ឋាភិបាលបញ្ជាក់ថា នឹងធ្វើឱ្យវិស័យមួយនេះមានសុត្ថិភាព និងជួយទាក់ទាញវិនិយោគិន។
លោករស់ ភារុន មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ បានប្រាប់សារព័ត៌មាន Nikkei Asia កាលពីថ្ងៃច័ន្ទនេះថា ច្បាបថ្មីនេះនឹងផ្តល់ឱ្យវិស័យល្បែងពាណិជ្ជកម្មមាន សុវត្ថិភាពខ្ពស់ និងការប្រកួតប្រជែង និងត្រូវបានបង្កើតឡើង ដើម្បីទាក់ទាញការអភិវឌ្ឍល្បែងពាណិជ្ជកម្មចម្រុះបន្ថែមទៀត ជាជាងការប្រើប្រាស់វិស័យកាស៊ីណូតែមួយ។
លោកមានប្រសាសន៍ថា “យើងចង់អោយសកម្មភាពទាំងអស់រួមគ្នា សម្រាប់ប្រជាជន មិនមែនគ្រាន់តែសំរាប់ការលេងល្បែងប៉ុណ្ណោះទេ ប៉ុន្តែសំរាប់ការកម្សាន្តផងដែរ។ ដូច្នេះហើយ ទើបយើងមានគោលបំណងលើកទឹកចិត្ត ដល់ការបង្កើតរមណីយដ្ឋានចម្រុះ” ។
ប្រទេសកម្ពុជាបានចេញអាជ្ញាបណ្ណកាស៊ីណូចំនួន៩៣ ដែលភាគច្រើនត្រូវបានប្រមូលផ្តុំគ្នានៅជុំវិញទីប្រជុំជនព្រំដែន និងទីក្រុង ឆ្នេរសមុទ្រក្រុងព្រះសីហនុ និងផ្តល់សេវាកម្ម ដល់ភ្ញៀវទេសចរបរទេស ព្រោះប្រជាពលរដ្ឋក្នុងស្រុក ត្រូវបានរារាំងមិនអោយបង្កើតកន្លែងលេងល្បែង។
យោងតាមច្បាប់ថ្មីនេះ ការរួមបញ្ចូលរម្មណីយដ្ឋាន និងកាស៊ីណូតែមួយនឹងត្រូវបង់ពន្ធដោយផ្អែកលើប្រាក់ចំណូលសរុបពីការលេងល្បែង។ លើសពីនេះទៀតកន្លែងចម្រុះនេះ នឹងមានសិទ្ធិទទួលបានអាជ្ញាប័ណ្ណរហូតដល់២០ឆ្នាំ ខណៈដែលអាជ្ញាប័ណ្ណដែលមានកាស៊ីណូតែមួយ ត្រូវបានកំណត់ត្រឹមរយៈពេល៥ឆ្នាំប៉ុណ្ណោះ។
អត្រាចំណូលពន្ធពីច្បាប់ថ្មីនេះ ចូលជាធរមាននៅឆ្នាំក្រោយ ប្រៀបធៀបទៅនឹងទីក្រុងម៉ាកាវ៣៩.៥ភាគរយ នៅវៀតណាម៣៥ ភាគរយ និង១៥ ភាគរយនៅសិង្ហបុរីដែលនឹងដាក់អត្រាខ្ពស់ជាងនេះនៅឆ្នាំ ២០២២ ។ ទោះបីជាមានការដាក់បញ្ចូលអត្រាពន្ធទាបបំផុតមួយនៅលើពិភពលោកក៏ដោយ ក៏អ្នកជំនាញនិយាយថា បទប្បញ្ញត្តិថ្មីនេះទំនងជាមិនផ្លាស់ប្តូរវិស័យល្បែង នៅកម្ពុជានៅពេលឆាប់ៗនេះទេ។
ច្បាប់ស្តីពី ការគ្រប់គ្រងការលេងល្បែងពាណិជ្ជកម្មនេះ ត្រូវបានអនុម័តកាលពីខែមុន មាន៩៧ មាត្រាដែលរួមបញ្ចូលទាំងអត្រាពន្ធ និងតម្រូវការអាជ្ញាប័ណ្ណក៏ដូចជាបទប្បញ្ញត្តិថ្មី ដើម្បីត្រួតពិនិត្យឧស្សាហកម្មនេះ៕
