គម្រោង The Peninsula Private Residences នឹងបញ្ចប់ការសាងសង់នៅក្នុងពេលឆាប់ៗនេះ

ដោយ ៖ គង់ ម៉ាលីន

ភ្នំពេញ ៖ គម្រោង The Peninsula Private Residences ដែលជាគម្រោងទទួលបានពានរង្វាន់ឆ្នើមផ្នែករចនាផ្ទៃក្នុង (Best Interior Design) និងស្នាដៃឆ្នើមផ្នែកស្ថាបត្យកម្ម (Best Architectural Design) នៅក្នុងកម្មវិធីពានរង្វាន់អចលនទ្រព្យអាស៊ីកម្ពុជាប្រចាំឆ្នាំ២០១៩ នាឱកាសឆ្នាំថ្មី ២០២១នេះនឹងបញ្ចប់គម្រោងសាងសង់អគារទាំងមូលដែលនឹងលេចត្រដែតនៅច្រកចូលនៃខណ្ឌជ្រោយចង្វារ។

គម្រោងនេះបង្កើតឡើងដោយមានការគិតគូរយ៉ាងផ្ចិតផ្ចង់ពីម្ចាស់អភិវឌ្ឍនគម្រោងក្នុងការផ្តល់ជូននៅប្រណិតភាព និងភាពស៊ីវិល័យក្នុងការរស់នៅជាមួយនឹងការរៀបចំឱ្យមានហេដ្ឋារចនាសម្ព័ន្ធដ៏សម្បូរបែបក្នុងអគារទាំងមូលដើម្បីផ្តល់ជូននូវភាពងាយស្រួលក្នុងការរស់នៅបែបឯកជន និងការផ្តល់ជូននូវសេវាកម្មលំដាប់ខ្ពស់។

ជាមួយគ្នានេះ ក្រុមហ៊ុនអភិវឌ្ឍន៍គម្រោងបានបង្កើតកម្មវិធីសំខាន់ៗជាច្រើនដូចជាកម្មវិធី “Rolling with Passion” ដោយសហការជាមួយក្រុមហ៊ុន The Pacific Cigar Co (Cambodia), Partagas Cigar និង Fat Passion Restaurant និងមានបង្ហាញផ្ទាល់អំពីការមូរស៊ីហ្គាររបស់ Master Cigar Roller Señor Dariel Hernandez ដើម្បីផ្តល់ជូនអតិថិជននូវបទពិសោធន៍ថ្មីដ៏សម្បូរបែបផ្សេងទៀតពីកម្មវិធី។ ក្រៅពីនេះ សម្រាប់កម្មវិធី“The Peninsula Year-End Sharing Session” ក៏មានការអញ្ជើញឱ្យចូលរួមពីអ្នកជំនាញផ្សេងៗ ជាពិសេសអាជ្ញាធរមូលដ្ឋាន លោក ឃ្លាំង ហួត អភិបាលខណ្ឌជ្រោយចង្វារ លោក Yong Ching San ប្រធានផ្នែកគ្រប់គ្រងឥណទាននៅក្នុង RHB Cambodia និង លោក Tom O’Sullivan ដែលជាអគ្គនាយកក្រុមហ៊ុន realestate.com.kh ដើម្បីផ្តល់មតិយោបល ការធ្វើបទបង្ហាញលើការអភិវឌ្ឍក្នុងតំបន់ ក៏ដូចជាការអភិវឌ្ឍន៍ក្នុងប្រទេសកម្ពុជាទាំងមូល។ ដោយឡែកកម្មវិធី “Embracing the New Normal Together” ក៏បានរៀបចំឡើងនៅ Elephant Bar សណ្ឋាគារ Raffles Hotel Le Royal ដែលអតិថិជន និងដៃគូមានឱកាសជួបជុំគ្នាទទួលអាហារ និងភេសជ្ជៈដ៏ឆ្ងាញ់ពិសានៅក្នុងបរិយាកាសដ៏សែនមនោរម្យនៅបាដ៏ស្រស់ស្អាត។

ជាចុងក្រោយ យើងសូមស្វាគមន៍ដោយក្ដីសោមនស្សរីករាយចំពោះការចូលរួមរបស់ក្រុមហ៊ុន CBRE Cambodia ជាអ្នកពិគ្រោះយោបល់ផ្នែកគ្រប់គ្រងអចលនទ្រព្យរបស់គម្រោង Peninsula Private Residences។ ក្នុងឱកាសដែលយើងរីករាយឆ្នាំថ្មីនេះ ប្រសិនបើលោកអ្នកកំពុងស្វែងរក
លំនៅដ្ឋានថ្មី ឬប្រសិនបើលោកអ្នកមានសំណួរណាមួយអំពីការជួលអចលនទ្រព្យ សូមអញ្ជើញមកកាន់ការិយាល័យលក់ ស្ថិតនៅផ្លូវកែវ ចិន្ដា ដែលស្ថិតនៅជិតនឹងទីតាំងសំណង់របស់យើង ឬទាក់ទងមកយើងខ្ញុំតាមរយៈទូរសព្ទលេខ +855 (0)17 222 760។

ផ្សារហ៊ុននៅ Wall Street ដ៏ល្បីល្បាញរបស់អាមេរិកចាប់ផ្តើមងើបឡើងវិញ ខណៈលោកចូ បៃឌិនត្រៀមចូលកាន់តំណែង

ដោយៈសុខុម
ញូយ៉កៈ សង្កាត់ហិរញ្ញវត្ថុ Wall Street ក្នុងក្រុងញូវយ៉ក បានបោះជំហានឆ្ពោះទៅរកការចាប់ផ្ដើមដ៏រឹងមាំ កាលពីថ្ងៃអង្គារ ទី១២ ខែមករា នៅពេលការលក់ចេញសញ្ញាប័ណ្ណរបស់សហរដ្ឋអាមេរិកបានធ្វើឱ្យតម្រូវការរូបិយប័ណ្ណដុល្លារកើនឡើង។

យោងតាមការចុះផ្សាយរបស់ទីភ្នាក់ងារព័ត៌មាន Reuters បានឱ្យដឹងថា សកម្មភាពទិញចូលភាគហ៊ុនអឺរ៉ុបតិចតួចបូករួមគ្មានដំណឹងសំខាន់ៗអំពីក្រុមហ៊ុនសាជីវកម្ម ឬទិន្នន័យសេដ្ឋកិច្ចផងនោះ បានផ្ដល់សញ្ញាតិចតួចណាស់អំពីការតម្រង់ទិសទីផ្សារ។
លោកNed Rumpeltin ប្រធានផ្នែកយុទ្ធសាស្ត្ររូបិយប័ណ្ណនៅធនាគារ TD Securities ដែលជាធនាគារវិនិយោគពហុជាតិសាសន៍របស់ប្រទេសកាណាដាបានថ្លែងថា ទីផ្សារនានាកំពុងតែបញ្ជូនសារចម្រុះសម្រាប់ដើមឆ្នាំ២០២១នេះ នៅពេលដែលភាគហ៊ុនហក់ឡើងខ្ពស់ ហាងឆេងមាស និងរូបិយប័ណ្ណដុល្លារហាក់នៅទ្រឹង ហើយសញ្ញាប័ណ្ណធ្លាក់ចុះ។
លោកបានបន្ថែមថា “វាជាសប្ដាហ៍ដែលតានតឹងខ្លាំងនៅឡើយ សម្រាប់នយោបាយរបស់សហរដ្ឋអាមេរិក ហើយរយៈពេលពីរបីថ្ងៃខាងមុខ អ្វីៗក៏អាចកើតឡើងបានដែរ។ នោះនឹងធ្វើឱ្យបណ្ដាវិនិយោគិនប្រយ័ត្នប្រយែងបន្តិចហើយ”។

បក្សប្រជាធិបតេយ្យបានប្រកាសថា ខ្លួននឹងទុកឱកាសជាលើកចុងក្រោយឱ្យប្រធានាធិបតីដូណាល់ ត្រាំ ចុះចេញពីតំណែងមុនពេលកំណត់ ដោយមិនបាច់រង់ចាំដល់អាណត្តិរបស់លោកផុតជាផ្លូវការនៅថ្ងៃទី២០ មករា ដ៏ខ្លីខាងមុខនេះឡើយ ដោយសារតែលោកបានញុះញង់ឱ្យអ្នកគាំទ្ររបស់ខ្លួនធ្វើការប្រហារទៅលើវិមានរដ្ឋសភាកាពីតូលរបស់សហរដ្ឋអាមេរិកកាលពីថ្ងៃទី៦ មករា កន្លងទៅនេះ។

ក្រឡេកមកមើលផ្សារភាគហ៊ុនវិញឃើញថា ផ្សារភាគហ៊ុន Dow Jones បានហក់ឡើង០,២% ហើយផ្សារភាគហ៊ុន S&P 500 បានហក់ឡើង០,២៦%។ ចំណែកឯផ្សារភាគហ៊ុន Nasdaq បានហក់ឡើង០,៣%។
ក្រុមអ្នកវិភាគលើកឡើងថា ការលក់ចេញសញ្ញាប័ណ្ណរបស់សហរដ្ឋអាមេរិកធ្វើឡើងដោយសារមានការរំពឹងទុកថា រដ្ឋាភិបាលក្រោមការដឹកនាំរបស់លោកចូ បៃឌិន ដែលនឹងចូលកាន់តំណែងនៅសេតវិមានសប្ដាហ៍ក្រោយនឹងបញ្ចេញកញ្ចប់ថវិកាស្ដារសេដ្ឋកិច្ចបន្ថែមទៀត៕

ខេត្តកំពតប្រមូលចំណូលពន្ធសួយសារពីអាជីវកម្មរ៉ែបានជិត៥លានដុល្លារ

ដោយ ៖ រ៉ាណេត

កំពត ៖ ជាមួយនឹងកំណើននៃចំនួនគម្រោងវិនិយោគ និងអាជីវកម្មជាច្រើន ខេត្តកំពតបាន និងកំពុងបង្កើនសកម្មភាពអភិវឌ្ឍន៍ទាំងក្នុង និងក្រៅក្រុង ខណៈដែលការប្រមូលចំណូលពន្ធសួយសារពីអាជីវកម្មរ៉ែមិនរាប់បញ្ចូលអាជីវកម្មផ្សេងបានប្រមាណជិត៥លានដុល្លារ។

តាមការបញ្ជាក់របស់មន្ត្រីជំនាញឱ្យដឹងថា ក្នុងឆ្នាំ២០២០ ការគ្រប់គ្រង និងការប្រមូលចំណូលសួយសារពីការធ្វើអាជីវកម្មរ៉ែគ្រប់ប្រភេទនៅក្នុងខេត្តអនុវត្តន៍បាន៩៧ភាគរយនៃផែនការ ស្មើនឹងជាង៤លាន៩សែនដុល្លារ ដោយក្នុងនោះរាជរដ្ឋាភិបាលបានសម្រេចផ្តល់ថវិកា៥០ភាគរយពីការប្រមូលចំណូលសួយសារលើអាជីវកម្មរ៉ែដល់ថ្នាក់ខេត្ត។

លោកសោម វិចិត្រ ប្រធានមន្ទីររ៉ែ និងថាមពល បានប្រាប់ឱ្យដឹងនៅថ្ងៃទី១៣ ខែមករា ឆ្នាំ២០២១ថា សម្រាប់ឆ្នាំ២០២០កន្លងទៅនេះ ផែនការប្រមូលចំណូល មានជាង ៥លានដុល្លារ អនុវត្តន៍បានជាង៤លាន៩សែនដុល្លារ ស្មើនឹង៩៧ភាគរយ។ ក្នុងនោះប្រាក់ ចំណូលសម្រាប់ខេត្តអនុវត្តន៍បានចំនួនជាង៨៥០លានរៀល គឺស្មើ១០១ភាគរយនៃផែនការ។
លោកបានបញ្ជាក់ដែរថា ប្រាក់ចំណូលពីសួយសារលើអាជីវកម្មរ៉ែ ដែលផ្តល់អាជ្ញាប័ណ្ណដោយថ្នាក់ក្រសួង និងថ្នាក់ខេត្ត បានបែងចែកសម្រាប់រដ្ឋ ខេត្ត និងប្រាក់អំណោយលើកទឹកចិត្តដល់មន្ត្រីអនុវត្តន៍។

សម្រាប់ខេត្តកំពត ក្រៅពីមានអាជីវកម្មរ៉ែជាច្រើនប្រភេទ ក្នុងនោះក៏មានសក្ដានុពលនៅក្នុងវិស័យសំណង់ និងអចលនទ្រព្យផងដែរ ដែលភាគច្រើនជាការវិនិយោគ និងអភិវឌ្ឍន៍ជាតំបន់ទេសចរណ៍កែច្នៃបែបធម្មជាតិ ក៏ដូចជាសំណង់នៅដ្ឋានបែបលំហែរជាច្រើនគម្រោង៕

ការបន្តអភិវឌ្ឍហេដ្ឋារចនាសម្ព័ន្ឋធំៗរបស់រដ្ឋាភិបាល បានផ្តល់ទំនុកចិត្តដល់ទីផ្សារអចលនទ្រព្យ

ដោយៈ រ៉ាវី

ភ្នំពេញៈ គម្រោងអភិវឌ្ឍន៍របស់រាជរដ្ឋាភិបាល ដែលកំពុងសាងសង់នាពេលបច្ចុប្បន្ននេះ និងមិនត្រូវបានផ្អាក បាននឹងកំពុងជួយជំរុញឱ្យមានការរីកចំរើន លើវិស័យអចលនទ្រព្យកម្ពុជា នៅក្នុងមួយរយៈចុងក្រោយនេះ បើទោះបីកម្ពុជាកំពុងប្រឈមទៅនឹងវិបត្តិសេដ្ឋកិច្ចផ្ទួនៗយ៉ាងណាក្តី។

អគ្គនាយកក្រុមហ៊ុ Century 21 Advance លោកឡុង គឹមសួគ៌បានប្រាប់គេហទំព័រ Propertyarea.asia កាលពីចុងសប្តាហ៍មុនថា នៅក្នុងមួយរយៈចុងក្រោយនេះ វិស័យអចលនទ្រព្យមានស្ថានភាពល្អប្រសើរ ដោយសារតែគម្រោងសាងសង់ហេដ្ឋារចនាសម្ព័ន្ធរបស់រាជរដ្ឋាភិបាលមិនត្រូវបានផ្អាក បើទោះបីស្ថិតនៅក្នុងវិបត្តិជំងឺកូវីដ ១៩ ។

លោកថ្លែងថា “យើងសង្កេតឃើញថា គម្រោងធំៗរបស់រាជរដ្ឋាភិបាល ដូចជា ព្រះលានយន្តហោះអន្តរជាតិភ្នំពេញថ្មី ព្រលាយន្តហោះខេត្តសៀមរាប គម្រោងផ្លូវក្រវ៉ាត់ក្រុង មិនត្រូវបង្អាកដោយជំងឺកូវីដ១៩ នោះទេ” ។

លោកបន្តថា ក្រៅពីនេះដូចជាគម្រោងផ្លូវជាតិលេខ២ គម្រោងស្ថាបនាផ្លូវជាតិលេខ៣ គម្រោងផ្លូវល្បឿនលឿនភ្នំពេញ-ព្រះសីហនុ និងគម្រោងអភិវឌ្ឍន៍ជាច្រើនទីតាំងផ្សេងៗទៀតជាដើម មិនត្រូវបានបង្អាក់ ដែលទាំងនេះនឹងជួយជំរុញឱ្យវិស័យអចលនទ្រព្យមានការរីកចំរើន ជាពិសេសវិស័យដីធ្លី។

លោកបញ្ជាក់បន្ថែមទៀតថា “អ្វីដែលសំខាន់ជាងនេះ គឺរាជរដ្ឋាភិបាលបានដាក់ចេញនូវយុត្តសាស្ត្រច្បាស់លាស់ និងមានការប្តេជ្ញាចិត្តខ្ពស់ ចំពោះការអភិវឌ្ឍន៍ប្រទេស ឱ្យមានការរីកចំរើន ដូចគម្រោងអភិវឌ្ឍន៍នៅខេត្តព្រះសីនុ គម្រោងអភិវឌ្ឍន៍ទីក្រុងភ្នំពេញ សៀមរាប និងខេត្តកំពត-កែបជាដើម ក៏នឹងជួយឱ្យវិស័យអចលនទ្រព្យរីកចំរើនដែរ” ។

ជាមួយគ្នានេះ លោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាក៏បានធ្លាប់ទទួលស្គាល់ដែរថា ទោះស្ថិតនៅក្នុងវិបត្តិប្រឈមទៅនឹងជំងឺកូវីដ ១៩ និងជំនន់ទឹកភ្លៀងនៅក្នុងប្រទេស ក៏វិស័យអចលនទ្រព្យនៅក្នុងប្រទេសកម្ពុជា មិនមានការធ្លាក់ចុះមកនៅក្នុងកម្រិតសូន្យនោះទេ ពោះគឺកំពុងមានដំណើរការជាបណ្តើរ។

លោកបណ្ឌិតបន្តថា “វិស័យនេះ ក៏នឹងជួយឱ្យប្រជាពលរដ្ឋទិញបន្ថែមទៀត ដូចជា ផ្ទះល្វែង ខុនដូ និងដីធ្លីក្នុងតម្លៃដែលមានការគ្រោងទុក អ៊ីចឹង កាលណាតម្លៃអចលនទ្រព្យមិនទាន់បានឡើង និងមិនទាន់មានសន្ទុះឡើងលឿន ដោយសារកត្តាបែបនេះ។លោកបន្ថែមថា “ដូច្នេះការទិញលក់អចលនទ្រព្យ នៅក្នុងរដូវកាលនេះ ក៏ជាឱកាសចំណេញនៅថ្ងៃក្រោយផងដែរ” ។

ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជាលោកច្រឹក សុខនីមបានឱ្យដឹងដែរថា វិស័យអចលនទ្រព្យកម្ពុជា បានទទួលរងនូវផលប៉ះពាល់យ៉ាងខ្លាំង ចាប់តាំពីដើមឆ្នាំ ២០២០នេះ (ការរីករាលដាលនៃជំងឺកូវីដ ១៩ ) តាមរយៈការធ្លាក់ចុះនូវការទិញលក់ ហើយបច្ចុប្បន្ននេះ វិនិយោគិនក្នុងវិស័យអចលនទ្រព្យ មានតែនៅក្នុងស្រុក។

លោកបន្តថា “វិស័យអចលនទ្រព្យនៅក្នុងប្រទេសកម្ពុជា នៅតែមានសកម្មភាព ដោយសារមានការគាំទ្រពីអតិថិជននៅក្នុងស្រុក ជាពិសេសដោយសារមានការគាំទ្រ ពីរាជរដ្ឋាភិបាល តាមរយៈគោលនយោបាយដីធ្លី។លោកបន្ថែមថា “ការគាំទ្រពីធនគារនៅក្នុងស្រុក ដោយនៅតែបន្តផ្តល់កម្ចីនៅក្នុងវិស័យអចលនទ្រព្យ ហើយនេះគឺជារឿងល្អ ដែលធ្វើឱ្យវិស័យនេះនៅតែមានភាពល្អប្រសើរ បើទោះបីស្ថិតនៅក្នុងវិបត្តិយ៉ាងណាក៏ដោយ” ៕

ការចង្អុលបង្ហាញ៖ អ្នកជំនាញថាវិនិយោគដីនៅជាយក្រុង ឬតាមខេត្តសុទ្ធតែមានឱកាសចំណេញ

ដោយៈ រ៉ាណេត

ភ្នំពេញៈ ជម្រើសនៃការទិញអចលនទ្រព្យ ក៏ដូចជាដីធ្លីនៅតាមបន់ណា ដែលអាចទទួលបានចំណេញខ្ពស់ នៅតែជាប្រធានបទមួយ ដែលមានប្រជាប្រិយភាព និងជាការចង់ដឹងពីសំណាក់ អ្នកដែលប្រឡូកនៅក្នុងវិស័យមួយនេះដដែល។

អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុន Century21 Advance Property លោក ឡុង គឹមសួគ៌ បានមានប្រសាសន៍ប្រាប់តាមទូរស័ព្ទនៅក្នុងសប្ដាហ៍នេះថា មិនថាទោះជាទិញនៅតំបន់ជាយក្រុង ឬនៅតាមបណ្តាខេត្ត ដែលឃ្លាតឆ្ងាយពីក្រុងនោះទេ អត្រាទទួលបានចំណេញនៅតែមាន ប្រសិនបើអ្នកទិញមានភាពឆ្លាតវៃ និងបានសិក្សាលម្អិតពីតំបន់ និងគម្រោងអភិវឌ្ឍន៍នានាដែលពាក់ព័ន្ធ។

លោកបញ្ជាក់ថា “ខ្ញុំនិយាយតែផ្នែកដីធ្លី មានអ្នកទិញទុកសម្រាប់វិនិយោគបន្តយកចំណេញ បានជ្រើសទីតាំងផ្សេងៗគ្នាជាមួយនឹងក្ដីរំពឹងថា អាចទទួលបានចំណេញនៅពេលលក់ចេញវិញ” ។ លោកបន្តថា “មិនថាពួកគាត់ទិញទៅទីណានោះទេ អត្រាដែលទទួលបានចំណេញគឺសុទ្ធតែមាន ឱ្យតែពួកគាត់ទិញដោយការពិចារណា និងវិនិច្ឆ័យបានត្រឹមត្រូវ៛” ។

លោកគឹមសួគ៌បានបន្តថា អ្នកខ្លះគាត់មិនបានដឹងលម្អិតពីព័ត៌មាន និងគម្រោងអភិវឌ្ឍន៍ ដែលជម្រុញឱ្យមានតម្រូវការទីផ្សារនោះទេ ហើយទិញតាមគេផ្អើល តែក៏អាចទទួលបានចំណេញដូចគេ ដែលការចំណេញនេះ វាគឺជារឿងចៃដន្យសម្រាប់គាត់។ ចំពោះករណីបែបនេះមិនមែនចេះតែទទួលបានរហូតនោះទេ” ។

លោកឡុង គឹមសួគ៌ បានបន្តថា មានអ្នកខ្លះ គាត់មានធនធានតិចតួច ប៉ុន្តែគាត់បានសម្រេចចិត្តឥតស្ទាក់ស្ទើរ ក្នុងការទិញដីនៅជាយក្រុងទុក ជាពិសេសនៅក្បែរគម្រោងអភិវឌ្ឍន៍ដែលមានសកម្មភាព ដូច្នេះភាគរយចំណេញរបស់ពួកគាត់គឺមានច្រើន ហើយរហ័សទៀត។ ប្រសិនបើពួកគាត់សម្រេចលក់ ក្នុងតម្លៃចរចាណាមួយ ដែលអាចទទួលបានចំណេញ ហើយយកទៅវិនិយោគនៅតំបន់ណាមួយផ្សេងទៀត ដែលមានគម្រោងអភិវឌ្ឍន៍ច្បាស់លាស់ នោះកំណើននៃភាគលាភរបស់គាត់ នឹងកើនឡើងច្រើនជាងអ្នកដែលមានលុយច្រើនដែលទិញដីទំហំ ប៉ុន្តែនៅតំបន់ឆ្ងាយពីទីប្រជុំជន និងមិនមានគម្រោងអភិវឌ្ឍន៍។

លោកបានបញ្ជាក់ថា មិនថាទោះជានៅតំបន់ជាយក្រុង ឬនៅក្នុងខេត្តណាមួយនោះទេ ភាគរយចំណេញនៅតែមានដូចគ្នា សំខាន់ត្រង់ថាមុនពេលទិញសម្រាប់ទុកវិនិយោគ ត្រូវតែចេះសិក្សាពីតម្រូវការទីផ្សារ និងគម្រោងនៃការអភិវឌ្ឍឱ្យបានគ្រប់ជុងជ្រោយយ៉ាងលម្អិត ទើបការវិនិយោគមិនជួបភាពបរាជ័យ៕

កត្តាភូមិសាស្ត្រ៖ ខេត្តកណ្តាលកំពុងបង្កើនល្បឿនយ៉ាងលឿនការអភិវឌ្ឍផ្នែកលំនៅដ្ឋាន

ដោយៈ រ៉ាណេត

កណ្តាលៈ ហេដ្ឋារចនាសម្ព័ន្ធធំៗជាច្រើន បានបង្ហាញខ្លួននៅខេត្តកណ្តាល ដែលបានធ្វើឲ្យខេត្តមានភូមិសាស្ត្រព័ទ្ឋជុំវិញរាជធានីនេះ ទាក់ទាញគំរោងអភិវឌ្ឍន៍លំនៅដ្ឋាន និងមជ្ឈមណ្ឌលពាណិជ្ជកម្មកាន់តែច្រើន។

លោកអភិបាលខេត្តកណ្តាល លោក គង់ សោភ័ណ្ឌ បានមានប្រសាសន៍ឲ្យដឹងកាលពីពេលថ្មីៗនេះថា ស្ទើរតែគ្រប់តំបន់នៅក្នុងខេត្តកណ្តាល ជាពិសេសនៅតាមតំបន់មួយចំនួន ដែលស្ថិតនៅហ៊ុព័ទ្ធជុំវិញរាជធានីភ្នំពេញ គឺកំពុងតែមានសក្ដានុពលក្នុងការវិនិយោគ និងអភិវឌ្ឍក្នុងវិស័យសំណង់គួរឱ្យកត់សម្គាល់ ដែលក្នុងនោះវិស័យលំនៅដ្ឋានកម្រិតមធ្យម និងសមរម្យបានដើរតួឈានមុខគេ ស្របពេលដែលកំណើន នៃចំនួនប្រជាជនបានកើនឡើងរហូតដល់ជាង១លាននាក់។

លោកបន្តថា “ក្រៅពីក្រុងតាខ្មៅ ដែលជាមណ្ឌលពាណិជ្ជកម្មប្រចាំខេត្ត គម្រោងអភិវឌ្ឍន៍ក្នុងវិស័យលំនៅដ្ឋានជាច្រើន បានបង្ហាញវត្តមាននៅតាមតំបន់ ដែលមានសក្ដានុពលនានា ជាពិសេសតំបន់ដែលស្ថិតនៅព័ទ្ធជុំវិញរាជធានីភ្នំពេញ” ។ លោកបានបន្តទៀតថា “ភាពរីកចម្រើននិងអភិវឌ្ឍន៍ទាំងអស់នេះ កើតឡើងដោយសារតែភាពល្អប្រសើរនៃកំណើនសេដ្ឋកិច្ចជាតិ ក៏ដូចជាក្នុងតំបន់ជ្រកក្រោមម្លប់សន្តិភាព ដែលដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា” ។

ជាក់ស្តែងបុរីថ្មី GB Resident ដែលគ្រោងសាងសង់លើផ្ទៃដីជាង១០ហិកតា បាននិងកំពុងបង្ហាញរូបរាងនៅតំបន់ផ្លូវក្រវ៉ាត់ក្រុងទី៣ ដែលជាតំបន់មានសក្តានុពល និងមានទីតាំងនៅជិតព្រលានយន្តហោះអន្តរជាតិភ្នំពេញថ្មី។

អគ្គនាយកក្រុមហ៊ុនអចលនទ្រព្យ R Investment Group លោកបណ្ឌិតតេង រិទ្ធី បានមានប្រសាសន៍ឲ្យដឹងផងដែរថា បច្ចុប្បន្ននេះ ស្ទើរតែគ្រប់តំបន់ទូទាំងខេត្តកណ្តាល សុទ្ធតែមានសក្ដានុពល ស្របពេលដែលគម្រោងនៃការអភិវឌ្ឍជាច្រើន ត្រូវបានចាប់អនុវត្ត។

លោកបណ្ឌិតបន្តថា “ក្រៅពីតំបន់កណ្តាលក្រុងតាខ្មៅ ដែលកំពុងតែមានសកម្មភាពអភិវឌ្ឍន៍ ទៅលើហេដ្ឋារចនាសម្ព័ន្ធរបស់រាជរដ្ឋាភិបាល និងគម្រោងអភិវឌ្ឍន៍វិស័យសំណង់ រួមមានគម្រោងលំនៅដ្ឋានកម្រិតមធ្យមនិងកម្រិតខ្ពស់ ក៏មានគម្រោងសាងសង់អគារពាណិជ្ជកម្មមួយចំនួនផងដែរ” ។

លោកបណ្ឌិតបានបន្តថា តំបន់ដែលត្រូវបានក្លាយជាគោលដៅវិនិយោគ ក្នុងវិស័យលំនៅដ្ឋាន រួមមានតំបន់ជាយក្រុងតាខ្មៅដូចជាតំបន់ព្រែកហូរ ព្រែកកំពឺស និងតំបន់ស្ថិតតាមបណ្តោយផ្លូវជាតិលេខ ២១A (ស្រុកស្អាង) ហើយក្រៅពីនេះនៅចមានតំបន់ផ្លូវជាតិលេខ២ (ម្ដុំរង្វង់មូលគួរស្រូវ) តំបន់ផ្លូវជាតិលេខ៣ ស្ថិតក្នុងស្រុកកណ្តាលស្ទឹង តំបន់ផ្លូវជាតិលេខ៤ ក្នុងស្រុកអង្គស្នួល តំបន់ផ្លូវជាតិលេខ៥ ស្រុកពញាឮ តំបន់ផ្លូវជាតិលេខ៦ ស្រុកមុខកំពូល និងតំបន់ផ្លូវជាតិលេខ១ ស្ថិតនៅក្នុងស្រុកកៀនស្វាយ” ។

ជាមួយគ្នានេះ លោកឧកញ៉ាឡាយ លន់ អគ្គនាយកក្រុមហ៊ុនអចលនទ្រព្យ Black Eagle International Co.,Ltd ធ្លាប់បានបង្ហាញពីសក្ដានុពល និងការអភិវឌ្ឍយ៉ាងលឿននៅទូទាំងខេត្តកណ្តាលកាលពីពេលកន្លងទៅថា ខេត្តកណ្តាកមានកត្តាភូមិសាស្ត្រល្អ ជាពិសេស បណ្តាស្រុកមួយចំនួនរបស់ខេត្ត គឺស្ថិតនៅព័ន្ធជុំវិញរាជធានីភ្នំពេញ ហើយនៅពេលបច្ចុប្បន្ននេះ មានតំបន់មួយចំនួនបានកាត់ចូលមកចំណុះរាជធានីភ្នំពេញ ហើយសល់ប៉ុន្មានបានក្លាយជាជាតំបន់ជាយក្រុង ដែលមានការអភិវឌ្ឍយ៉ាងឆាប់រហ័ស។

លោកឧកញ៉ាបន្តថា “ភាពរីកចម្រើន និងអភិវឌ្ឍន៍របស់ខេត្តកណ្តាល មានលក្ខណៈពិសេសខុសពីខេត្តផ្សេង ហើយតម្លៃក៏មានការកើនឡើងគួរឱ្យកត់សម្គាល់” ។ លោកបន្តថា “តម្លៃដីធ្លីដែលស្ថិតនៅក្នុងតំបន់មិនទាន់មានការអភិវឌ្ឍ គិតជាមធ្យមអាចឡើងក្នុងអត្រា១០ទៅ២៥ភាគរយ។ ដោយឡែកតម្លៃដី ដែលស្ថិតនៅក្នុងតំបន់មានការអភិវឌ្ឍ គិតជាមធ្យមមានកំណើនក្នុងចន្លោះចាប់ពី៥០-១២០ភាគរយក្នុងមួយឆ្នាំ” ៕

ប្រទេសចិនចំណាយប្រាក់ ១៧០០លានដុល្លារសាងសង់កីឡដ្ឋានធំជាងគេលើពិភពលោក

ដោយៈសហការី

ក្វាងចូវៈ ក្រុមហ៊ុនអចលនទ្រព្យអន្តរជាតិ EverGrande បានប្រកាសថា កីឡដ្ឋានបាល់ទាត់ធំជាងគេបំផុតនៅលើពិភពលោក ដែលមានទំហំវិនិយោគប្រមាណជា ១,៧ ពាន់លានដុល្លារ បានចាប់ផ្តើមដំណើរការសាងសង់ហើយ។

កីឡដ្ឋាននេះមានអាចផ្ទុកកន្លែងអង្គុយទស្សនា បានសរុបចំនួន ១០០,០០០កន្លែង ដែលនឹងក្លាយជាកីឡដ្ឋានបាល់ទាត់ ធំជាងគេបំផុតនៅលើពិភពលោក។ កីឡាដ្ឋានយក្សនេះ នឹងត្រូវបានរចនាឡើងជារូបរាងផ្កាឈូក ហើយគ្រោងនិងបញ្ចប់ការសាងសង់នៅចុងឆ្នាំ២០២២ ។

ការរចនានៃពហុកីឡាដ្ឋាននេះ គឺជាស្នាដៃរបស់អ្នករចនាជនជាតិអាមេរិក ដែលមានឈ្មោះថា Hasan Syed ដែលមានមូលដ្ឋាននៅសៀងហៃ ដោយធ្វើតាមគំនិតដំបូងពីប្រធានក្រុមហ៊ុន Evergrande Group Xu Jiayin ។ ការរចនាផ្កាឈូកមានប្រភពចេញពីទីក្រុងក្វាងចូវ ដែលត្រូវបានគេស្គាល់ថាជាទីក្រុងផ្កា។

ពហុកីឡាដ្ឋាននេះ រួមមានបន្ទប់ឯកជន VIP ចំនួន១៦ បន្ទប់ឯកជន VIP ចំនួន១៥២ តំបន់ FIFA តំបន់អត្តពលកម្មតំបន់ប្រព័ន្ធផ្សព្វផ្សាយ និងបន្ទប់សារព័ត៌មាន។

យោងតាមសារព័ត៌មាន ESPN បានឱ្យដឹងទៀតថា ក្រុមហ៊ុន Evergrande គ្រោងសាងសង់ពហុកីឡាដ្ឋានចន្លោះពី៣ ទៅ៥ទៀត ដែលមានសមត្ថភាពផ្ទុកដល់៨០,០០០ ទៅ១០០,០០០ នៅជុំវិញប្រទេសចិន។

ប្រធានក្រុមហ៊ុនអចលនទ្រព្យអន្តរជាតិ EverGrande លោក Xia HaiJun បានមានប្រសាសន៍ថា ការងារសាងសង់បានចាប់ផ្តើមដំណើរការ កាលពីសប្តាហ៍មុន ដោយមានគោលដៅ ដើម្បីក្លាយជា “និមិត្តសញ្ញាថ្មីលំដាប់ពិភពលោក ដែលអាចប្រៀបធៀបបានទៅនឹងអគារSydney Opera House និង អគារBurj Khalifa នៅឌូបៃ។

សមត្ថភាពនៃកីឡដ្ឋាននេះ នឹងបំបែកឯកទគ្គកម្មរបស់កីឡដ្ឋាន Camp Nou នៅទីក្រុង Barcelona ប្រទេសអេស្ប៉ាញ ដែលអាចផ្ទុកបានចំនួន៩៩,៣៥៤ កន្លែង៕ ប្រភព(CNN)

រដ្ឋមន្ត្រីកសិកម្ម៖ កម្ពុជាទទួបានចំណូលប្រមាណ ១២៦០លានដុល្លារពីការនាំចេញស្រូវ-អង្ករទៅកាន់ទីផ្សារអន្តរជាតិ

ដោយៈ រ៉ាណេត

ភ្នំពេញៈ រដ្ឋមន្ត្រីក្រសួងកសិកម្មបានថ្លែងថា នៅក្នុងឆ្នាំ២០២០កន្លងទៅនេះ វិស័យកសិកម្ម បាននាំចំណូលដល់កម្ពុជាជាង ១២៦០លានដុល្លារ តាមរយៈការនាំចេញស្រូវ-អង្ករទៅកាន់ទីផ្សារអន្តរជាតិ ជាពិសេសទីផ្សារប្រទេសចិន។

លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ក្នុងកិច្ចសម្ភាសន៍៍ពិសេសនាព្រេកថ្ងៃទី១២ មករានេះថា កម្ពុជាបានឆ្លងផុតក្នុងនាមប្រទេសខ្វះស្បៀងមុនឆ្នាំ១៩៩៥ ហើយបានក្លាយទៅជាប្រទេស ដែលមានស្បៀងគ្រប់គ្រាន់ តាមរយៈគោលនយោបាយឈ្នះឈ្នះរបស់រាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្ត្រី ដែលទទួលបាននូវសុខសន្ដិភាព យ៉ាងពេញលេញ និងឈានដល់ការដាក់ចេញ នូវគោលនយោបាយនាំចេញស្រូវ អង្ករទៅកាន់ទីផ្សារអន្តរជាតិ។

លោបន្តថា “នៅត្រឹមឆ្នាំ២០១០យើងបាននាំចេញអង្ករជាជំហានៗ ដែលទទួលបានភាពជោគជ័យជាបន្តបន្ទាប់ ហើយជាពិសេសនៅមុនពេលមាន ការរីករាលដាលនូវជំងឺកូវីដ១៩ វិស័យកសិកម្មបានចូលរួមទ្រទ្រង់កំណើនសេដ្ឋកិច្ចជាតិ ក្នុងរង្វង់ជាង៧ភាគរយក្នុងមួយឆ្នាំ ដែលធ្វើឱ្យស្ថានភាពនៅកម្ពុជាមានការផ្លាស់ប្ដូរមុខមាត់ច្រើន ទាំងជីវភាពនៃការរស់នៅ ក៏ដូចជាការហូបចុកប្រកបដោយសុវត្ថិភាព” ។

ដោយឡែកស្ថិតនៅក្នុងអំឡុងពេល នៃការរីករាលដាលនៃជំងឺកូវីដ១៩ ជាពិសេសនៅថ្ងៃទី១៨ ខែកុម្ភៈ ឆ្នាំ២០២០សម្ដេចតេជោហ៊ុន សែន នាយករដ្ឋមន្ត្រីនៃកម្ពុជាបានដាក់ចេញនូវវិធានការមួយចំនួន រួមជាមួយនឹងការណែនាំដល់បងប្អូនប្រជាពលរដ្ឋ ដែលជាអ្នកផលិតផ្នែកកសិកម្ម ពង្រឹងសន្ដិសុខស្បៀងឱ្យបានរឹងមាំ ដើម្បីទ្រទ្រង់ និងដោះស្រាយបញ្ហាសេដ្ឋកិច្ចកម្ពុជា ក្នុងកាលទេសៈដែលលំបាក ដែលកើតមានឡើងនៅក្នុងវិបត្តិសេដ្ឋកិច្ចជាសាកល ដោយធ្វើយ៉ាងណាប្រែក្លាយពីវិបត្តិ ឱ្យទៅជាឱកាសមាសសម្រាប់កសិករកម្ពុជា។

លោកបន្តថា បន្ថែមពីនេះ នៅថ្ងៃទី១៤ ខែកក្កដា ឆ្នាំ២០២០ សម្ដេចតេជោ ហ៊ុន សែន បានរំលឹកឡើងវិញនូវការប្រែក្លាយពីឱកាសដ៏លំបាក នៃភាពប្រឈមទៅជាឱកាសមាស ដែលអាចជួយសម្រួលដល់កម្រិតជីវភាព អាចទទួលបាននូវប្រាក់ចំណូលបន្ថែមនៅក្នុងកំឡុងពេលនៃវិបត្តិ។

លោករដ្ឋមន្ត្រីបានបញ្ជាក់ថា “ជាលទ្ធផល នៅក្នុងឆ្នាំ២០២០កន្លងទៅនេះ បើទោះបីជាកម្ពុជា មានបញ្ហាប្រឈមជាមួយនឹងកូវីដ១៩ និងគ្រោះរាំងស្ងួតនៅដើមរដូវវស្សា រួមជាមួយនឹងគ្រោះជំនន់ទឹកភ្លៀង ដែលបានកើតឡើងនៅចុងឆ្នាំ២០២០យ៉ាងណាក្ដី ប៉ុន្តែយើងបានរៀនសូត្រពីកត្តាធម្មជាតិ ហើយថែមទាំងអាចដោះស្រាយបញ្ហាបាន” ។ លោកបន្តថា “ក្រោមបទបញ្ជាដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា យើងឃើញថាផលដំណាំស្រូវទាំងរដូវ និងរដូវវស្សាក្នុងឆ្នាំ២០២០កន្លងទៅសម្រេចបាននូវភាពល្អប្រសើរក្នុងកំណើន០,២៤ភាគរយធៀបទៅនឹងឆ្នាំ២០១៩” ។

លោកវេង សាខុនបានបន្តថា ជារួមនៅក្នុងឆ្នាំ២០២០ យើងផលិតបានស្រូវសរុបចំនួន ១០,៩លានតោន ហើយស្បៀងដែលនៅសល់មានប្រមាណ៥,៩តោន។ ដោយឡែកការនាំចេញអង្ករ កាលពីឆ្នាំ២០២០មានចំនួន៦៩ម៉ឺនតោន កើនឡើង ១១,៣១ភាគរយ ធៀបទៅនឹងឆ្នាំ២០១៩ ដែលមានត្រឹម៦២ម៉ឺនតោនតែប៉ុណ្ណោះ ខណៈដែលការនាំស្រូវចេញទៅក្រៅប្រទេសបានប្រមាន២,៩លានតោន ហើយគិតជាចំណូលសរុបពីការនាំចេញស្រូវ-អង្ករសរុបបានប្រមាណ ១២៦០លានដុល្លារ” ។

លោក វេង សាខុន បានមានប្រសាសន៍បន្តថា គ្រប់គ្នាបានដឹងហើយថា អ្វីជាទស្សនៈវិស័យរបស់សម្ដេចតេជោហ៊ុន សែន ដែលបានដាក់ចេញជាយុទ្ធសាស្ត្រ ក្នុងការអភិវ ឌ្ឍសេដ្ឋកិច្ចកម្ពុជា ក្រសួងកសិកម្មបានចាប់ច្បាមយកនូវអ្វី ដែលជាទស្សនៈវិស័យរបស់សម្ដេចមកអនុវត្ត និងធ្វើជាផែនការយុទ្ធសាស្ត្ររបស់ក្រសួងក្នុងចូលរួមជំរុញ និងទ្រទ្រង់កំណើនសេដ្ឋកិច្ចកម្ពុជា ឱ្យឈានទៅជាប្រទេសមួយ ដែលមានចំណូលមធ្យមកម្រិតខ្ពស់នៅក្នុងឆ្នាំ២០៣០ និងចំណូលកម្រិតខ្ពស់នៅត្រឹមឆ្នាំ២០៥០ ខណៈដែលក្រសួងក៏បានរៀបចំផែនការមេ សម្រាប់អនុវត្តរហូតដល់ឆ្នាំ២០៣០ ពីការធ្វើទំនើបកម្មកសិកម្មប្រកបដោយការប្រកួតប្រជែងបរិយាបន្ន ធនជាមួយការប្រែប្រួលអាកាសធាតុក្នុងគោលបំណងជំរុញផលិតកម្មស្បៀង និងអាហារូបត្ថម្ភកម្ពុជា រួមជាមួយនឹងការជំរុញការផលិតប្រកបដោយវិបុលភាព និងសុខុមាលភាពរបស់ប្រជាជន។

ជាមួយនឹងការធ្វើពិពិធម្ម នៃវិស័យកសិកម្មបែបទំនើបកម្ម ស្របតាមផែនការមេដែលជាយុទ្ធសាស្ត្រនេះ តាមរយៈក្រសួងកសិកម្ម រុក្ខាប្រមាញ់ និងនេសាទ កម្ពុជាបានសហការជាមួយបណ្តាប្រទេសដៃគូអភិវឌ្ឍន៍ជាច្រើន ក៏ដូចជាស្ថាប័នកំពូលពិភពលោកដូចជាមូលនិធិអន្តរជាតិ ដើម្បីអភិវឌ្ឍន៍វិស័យកសិកម្មនៅកម្ពុជា ធនាគារអភិវឌ្ឍន៍អាស៊ី ធនាគារពិភព លោកជាដើម ដើម្បីធ្វើយ៉ាងណាអាចប្រមូលផ្តុំ និងការផ្សារភ្ជាប់ជាខ្សែច្រវ៉ាក់ផលិតកម្មចេញពីមួយទៅមួយ ដើម្បីធានាបង្កើនទំនុកចិត្តដល់ប្រជាកសិករ ដែលជាអ្នកផលិតមានទីផ្សារល្អ រួមជាមួយនឹងការទទួលបានតម្លៃខ្ពស់៕

ឆ្លងកាត់បីសម័យកាលធំៗបានធ្វើឲ្យកម្ពុជាមានប័ណ្ណកម្មសិទ្ឋអចលនទ្រព្យជាច្រើន តើវានៅមានសុពលភាពឬទេ

ដោយគង់ សូរិយា

ភ្នំពេញៈ បន្ទាប់ពីយុគសម័យដ៏ងងឹត កម្ពុជាបានឆ្លងកាត់សម័យកាលធំៗចំនួនបី ដែលធ្វើឲ្យមានការផ្លាស់ប្តូរប័ណ្ណកម្មសិទ្ឋជាបន្តបន្ទាប់ ប៉ុន្តែតើប័ណ្ណកម្មសិទ្ខចាស់ៗនៅមានសុពលភាពឬទេ?។

គេហទំព័រ Propertyarea.asia សូមលើកយកចំណេះដឹងពីផ្នែកនេះ ដើម្បីផ្តល់ជូនអ្នកអានបានសិក្សាស្បវែងយល់បន្ថែម។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ឲ្យដឹងថា ការគ្រប់គ្រងតាមរយៈប័ណ្ណសម្គាល់ ឬវិញ្ញាបនបត្រគ្រប់គ្រងអចលនទ្រព្យនៅកម្ពុជា ពិតជាមានច្រើនប្រភេទនៅកម្ពុជា ដែលប័ណ្ណឬវិញ្ញាបនបត្រទាំងនោះមាន ដូចជា ទី១ ចន្លោះឆ្នាំ១៩៧៩ ដល់ឆ្នាំ១៩៨៥ កម្ពុជាមានប័ណ្ណសម្គាល់អចលនទ្រព្យ ដែលគេហៅថា “ប័ណ្ណសាធារណៈរដ្ឋប្រជាមានិតកម្ពុជា” ។ ប័ណ្ណប្រភេទនេះនៅបន្សល់ទុកតិតចតួចប៉ុណ្ណោះ ក្នុងករណីម្ចាស់ដីមិនផ្លាស់ប្តូរប័ណ្ណ និងភាគច្រើនស្ថិតនៅតំបន់ជនបទដាច់ស្រយាល។

ទី២ គិតចាប់ពីកំឡុងឆ្នាំ១៩៨៥ ដល់ដើមទសវត្សរ៍១៩៩០ កម្ពុជាបានផ្លាស់ប្តូរប័ណ្ណកម្មសិទ្ឋអចលនទ្រព្យថ្មីមួយទៀត ដែលគេនិយមហៅថា “ប័ណ្ណស្លាបមាន់” ដែលប័ណ្ណប្រភេទនេះ នៅតែមានការប្រើប្រាស់រហូតដល់បច្ចុប្បន្ននេះផងដែរ។ ទី៣ ប្លង់កាន់កាប់ឬគ្រប់គ្រងអចលនទ្រព្យ ដែលមានការចេញឲ្យប្រើប្រាស់កំឡុងឆ្នាំ១៩៩៣ មកដល់បច្ចុប្បន្ន (ហៅថាប្លង់ទន់) ដែលប័ណ្ណប្រភេទនេះមានការពេញនិយម ប្រើប្រាស់ច្រើនជាងគេនាពេលបច្ចុប្បន្ននេះ។

ប័ណ្ណប្រភេទនេះ មានការទទួលស្គាល់ត្រឹមអាជ្ញាធរមូលដ្ឋានឃុំ សង្កាត់ និងតាមបណ្តាស្រុកនានា។

ទី៤ បច្ចុប្បន្នមានប័ណ្ណមួយទៀត ដែលហៅថាប្លង់រ៉ឹង ឬវិញ្ញាបនបត្រដែលមានការទទួលស្គាល់ពីមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់រាជធានី ខេត្ត។ប័ណ្ណនេះមានពីរយ៉ាង ដែលខ្លះគេហៅថា L MAP និងខ្លះទៀតហៅប័ណ្ណបំបែកក្បាលដី។

រហូតមកទល់ពេលនេះ ដើម្បីទប់ស្កាត់ទំនាស់ដីធ្លី និងប័ណ្ណនិមួយៗមានសុពលភាពផ្លូវច្បាប់ គឺពេលចុះវាស់វែងដីធ្លី តែងតែមានមន្ត្រីជំនាញក្រសួងរៀបចំដែនដីចូលរួម ទោះជាធ្វើប្លង់ឬប្លង់រ៉ឹងក៏ដោយ។

ប័ណ្ណទាំង៤ប្រភេទខាងលើនេះ សុទ្ឋតែមានសុពលភាពផ្លូវច្បាប់ ប៉ុន្តែដើម្បីបញ្ចៀសហានិភ័យពីការរំលោភបំពានដីធ្លី អ្នកកាន់កាប់អចលនទ្រព្យដែលមានប្លង់របបសាធារណៈរដ្ឋ ប័ណ្ណស្លាបមាន់ និងប្លង់ទន់គួរតែរៀបចំឯកសាររបស់ខ្លួន ដើម្បីស្នើសុំធ្វើប្លង់រ៉ឹង ដែលមានការទទួលស្គាល់ពីមន្ទីរ និងក្រសួងជំនាញជាក់លាក់” ។

ការកាន់កាប់អចលនវត្ថុអ្វីមួយ ដែលមានវិញ្ញាបនបត្រទទួលស្គាល់ច្បាស់លាស់ពីសំណាក់អាជ្ញាធរជំនាញ ពិតជាមានសារៈសំខាន់ណាស់ ដើម្បីបញ្ចៀសហានិភ័យនាពេលអនាគត” ។

ទោះជាយ៉ាងណាបច្ចុប្បន្ននេះ ក្រសួងរៀបចំដែនដី នគរូបនីយកម្មនិងសំណង់បាននិងកំពុងបញ្ជូនមន្ត្រីជំនាញរបស់ខ្លួន ចុះធ្វើប័ណ្ណកម្មសិទ្ឋដីធ្លីថ្មី ជូនប្រជាពលរដ្ឋនៅគ្រប់ភូមិ ឃុំនៃបណ្តារាជធានី ខេត្តទាំង២បណ្តើរៗហើយ៕

អបអរសាទរគម្រោងខុនដូUrban Village ឈ្នះពានរង្វាន់ គម្រោងអភិវឌ្ឍន៍ខុនដូល្អបំផុតនៅអាស៊ី

ដោយ ៖ រ៉ាណេត
ភ្នំពេញ ៖ ជាការអបអរសាទរគម្រោងអភិវឌ្ឍន៍ខុនដូUrban Village ទទួលបានពានរង្វាន់ Best Condo Development Cambodia 2019/2020 និង Best Condo Development Asia 2019/2020 ដែលផ្តល់ដោយស្ថាប័នភ្នាក់ងារនិងវាយតម្លៃអចលនៈទ្រព្យអន្តរជាតិ Property Guru ក្រុមហ៊ុនភ្នាក់ងារអចលនទ្រព្យ DNZ Realty បានសហការជាមួយក្រុមហ៊ុនអភិវឌ្ឍន៍ខុនដូ Urban Village រៀបចំពិធីជួបជុំជប់លៀងទទួលទានអាហារ និងភេសជ្ជៈចម្រុះ ជាលក្ខណៈគ្រួសារស្និទ្ធស្នាល ដោយមានការប្រគំតន្ត្រីសម័យ មានកន្លែងក្មេងលេង និងការចាប់ឆ្នោតយករង្វាន់ជាច្រើន។

កម្មវិធីនេះ នឹងប្រព្រឹត្តទៅនៅថ្ងៃទី២៤ ខែមករា ឆ្នាំ២០២១ ចាប់ពីម៉ោង១០ព្រឹក រហូតដល់ម៉ោង៥ល្ងាច ដោយភ្ញៀវកិត្តិយសទាំងអស់ដែលត្រូវបានអញ្ជើញ ក៏ដូចជាភ្ញៀវដែលចុះឈ្មោះចូលរួមដោយផ្ទាល់ សុទ្ធតែមិនត្រូវបានចំណាយថវិកានោះឡើយ ហើយថែមទាំងមានឱកាសចាប់ឆ្នោតផ្សងសំណាង ទទួលបានរង្វាន់អនុស្សាវរីយ៍ ជាពិសេសអាចទទួលបានការបញ្ចុះតម្លៃ លើការទិញខុនដូប្រណីតរបស់គម្រោង Urban Village ថែមទៀតផង។

នាយកក្រុមហ៊ុនភ្នាក់ងារអចលនទ្រព្យ DNZ Realty លោក រិន ច័ន្ទរិទ្ធិ បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១២ ខែមករានេះថា កម្មវិធីដ៏អធិកអធអធមនេះ ក្រៅពីត្រូវបានប្រារព្ធធ្វើឡើងដើម្បីអបអរសាទរចំពោះគម្រោងខុនដូរUrban Villageដែលបានដើរតួនាទីជាគម្រោងអភិវឌ្ឍន៍ខុនដូល្អជាងគេ២ឆ្នាំជាប់គ្នា(២០១៩-២០២០) ក៏មានមានការជួបជុំ ជជែកពិភាក្សាការងារលើមុខជំនួញផ្សេងៗ ក៏ដូចជាជំនួញនៅក្នុងវិស័យអចលនទ្រព្យ។ អ្នកចូលរួមទាំងអស់នឹងបានជ្រាប ពីទីផ្សារអចលនទ្រព្យនាពេលបច្ចុប្បន្ន ក៏ដូចជាឱកាសវិនិយោគនៅពេលអនាគតផងដែរ ក្រោមការធ្វើបទបង្ហាញដោយអ្នកជំនាញជាតិ និងអន្តរជាតិដោយផ្ទាល់។

លោកបានបញ្ជាក់ថា “កម្មវិធីរបស់យើងខ្ញុំមានការជួបពិភាក្សា សំណេះសំណាលបង្កើនភាពស្និទ្ធស្នាលជាមួយគ្នា អមដោយការប្រគំតន្ត្រីសម័យ ក្រោមវត្តមានរបស់លោក សុះ ម៉ាច លោក សាន ផាននិត កញ្ញា គង់ វង្សយ៉ាទី ព្រមទាំងតារាចម្រៀងជាច្រើននាក់ទៀត”។ លោកបន្តថា “ក្រៅពីនេះក៏មានការរៀបចំជាកន្លែងក្មេងលេង និងសកម្មភាពកម្សាន្តនានា រួមជាមួយនឹងការបម្រើសេវាម្ហូបអាហារដ៌ឆ្ងាញ់ពិសា ស្រាបៀរស្រស់ៗ និងស្រាក្រហមជាដើម”។

បន្ថែមពីនេះ លោកអ្នកក៏បានស្គាល់ច្បាស់ពីលក្ខណៈពិសេស និងប្រណីតភាពរបស់គម្រោងខុនដូ Urban Village ដែលកំពុងបន្តដំណើរការសាងសង់យ៉ាងសកម្ម ដើម្បីបំពេញតាមតម្រូវការទីផ្សារផងដែរ។ លោកអ្នកគ្រាន់តែបង់ប្រាក់១០% មុនតែប៉ុណ្ណោះ នឹងក្លាយជាម្ចាស់កម្មសិទ្ធិ នៃខុនដូដ៏ប្រណីត ស្ថិតនៅកណ្តាលរាជធានីភ្នំពេញ លើផ្លូវ៦០ម៉ែត្រ ដែលជាមជ្ឈមណ្ឌលពាណិជ្ជកម្ម ហើយកាន់តែពិសេសគឺទទួលបានទូរស័ព្ទស្មាតហ្វូន IPHONE 12 ចំនួន១គ្រឿងភ្លាមៗ។

សម្រាប់អ្នកមានចំណាប់អារម្មណ៍ ចូលកម្សាន្តនៅក្នុងកម្មវិធីដ៏រីករាយនេះ អាចទាក់ទងបានតាមរយៈទូរស័ព្ទលេខ ៖ 016 596 906 / 092 596 906។

ទីតាំងនៃកម្មវិធី ៖ ទល់មុខវត្តចាក់អង្រែលើ ក្នុងបរិវេណ Factory Phnom Penh ឬទីតាំងគម្រោងអភិវឌ្ឍន៍ខុនដូ Urban Village