ដោយគង់ សូរិយា

        ភ្នំពេញៈ ការវិនិយោគលើដដីធ្លី ដើម្បីទទួលបានផលចំណេញខ្ពស់ ពិតជាតម្រូវការរបស់អ្នកវិនិយោគ ប៉ុន្តែការវិនិយោគដែលគ្មានចំណេះដឹង នឹងធ្វើឲ្យលំហូរសាច់ប្រាក់របស់ខ្លួនជាប់គាំងមិនខាន។

ដោយមិនផ្តោតលើLand Banking ការទិញដីធ្លីដែលមានតម្លៃសមរម្យ ពិសេសរកបានដីក្រោមតម្លៃទីផ្សារជាជម្រើសល្អមួយផងដែរ។

អ្នកជំនាញផ្នែកដីធ្លីលោកកាង សុធីអគ្គនាយកក្រុមហ៊ុនCentury21 Land Stationបានមានប្រសាសន៍៍ថា អ្នកទិញដីទុកសំរាប់វិនិយោគភាគច្រើន ជាមនុស្សលោភលន់ ដោយពួកគេតែងតែចង់ចំណេញច្រើនខ្លាំង ប៉ុន្តែការពិតការទិញដីទុកសំរាប់វិនិយោគគួរតែលក់ចេញ បើចំណេញចន្លោះពី៥០ ទៅ១០០ភាគរយ ព្រោះការធ្វើបែបនេះ ធ្វើឲ្យយើងអាចពង្រីកទុនបន្ថែម ដោយអាចយកទៅទិញនៅកន្លែងផ្សេង ហើយយកប្រាក់ចំណេញខ្លះសំរាប់ការដើរលំហែរ។

លោកបន្តថា “បើលក់ដីចំណេញបាន៥០ទៅ១០០ភាគរយ យើងអាចយកទុនទៅទិញមួយកន្លែងឬពីកន្លែងទៀត ហើយលក់ទៀតបើបានចំណេញ។ ពេលនោះយើងអាចមានដីកើនដល់ពីរទៅបីកន្លែង ហើយកន្លែងណាចំណេញច្រើន យើងលក់ចេញជាបន្ត ដើម្បីវិនិយោគបន្តនៅកន្លែងផ្សេង ដើម្បីយកផលចំណេញទៀត”។

លោកកាង សុធីបានបន្តថា បើយើងលោភលន់ខ្លាំង មិនលក់ពេលចំណេញ ពេលខ្លះមិនប្រាកដថាបានលុយចំណេញទេ បើសិនជាជួបស្ថានភាពវិបត្តិសេដ្ឋកិច្ច ហេតុនេះការទិញដូរ លក់ចេញ ទិញចូលឲ្យបានញឹកញាប់ នៅពេលយើងទទួលបានចំណេញហើយ យើងនឹងមិនជាប់គាំងលំហូរសាច់ប្រាក់នោះទេ។

លោកបានផ្តល់ជាយោបល់បន្ថែមថា កាលណាយើងវិនិយោគ និងឆាប់លក់ចេញ​នៅពេលទទួលបានផលចំណេញ យកលុយចំណេញដើរកំសាន្តខ្លះ នឹងធ្វើឲ្យជីវិតយើងរីករាយ ហើយទ្រព្យរបស់យើងក៏កើន ជាជាងទុកចំណេញច្រើនពេក រហូតដល់ពេលជួប​វិបត្តោសេដ្ឋកិច្ច ពេលនោះដីលក់ក៏មិនចេញ ផលចំណេញក៏បាត់ ហើយគាំាំងលំហូរសាច់ប្រាក់ផងដែរ៕

ដោយៈ រ៉ាណេត

កែបៈ នៅក្នុងរយៈពេល១១ខែ ឆ្នាំ២០២០នេះ ខេត្តកែបបានទទួលស្វា​គមន៍ទេស​ចរចម្រុះជាតិសាសន៍នានា ជាពិសេសជនជាតិខ្មែរសរុបជាង១,៣លាននាក់ ដែលជាសញ្ញា​បង្ហាញពីសក្ដានុពល និងភាពទាក់ទាញរបស់ខេត្តក្នុងវិស័យទេសចរណ៍ ខណៈដែលវិស័យឯកជន កំពុងតែបណ្តាក់ទុនបន្ថែម ទៅលើការបង្កើតផលិតផលទេសចរណ៍ ថ្មីៗបន្ថែមទៀតនៅក្នុងខេត្តជាប់មាត់សមុទ្រមួយនេះ។

តាមរយៈរបាយការណ៍មន្ទីរទេសចរណ៍ខេត្តកែប ដែលបានចេញផ្សាយនៅថ្ងៃទី៣០ ខែវិច្ឆិកា ឆ្នាំ២០២០នេះបានបញ្ជាក់ឱ្យដឹងថា នៅក្នុងរយៈពេល១១ខែ ឆ្នាំ២០២០កន្លងទៅនេះ ភ្ញៀវទេសចរជាតិ និងអន្តរជាតិ ដែលបានមកសម្រាកកម្សាន្តនៅតាមតំបន់ទេសចរណ៍នានា ជាពិសេសតំបន់ឆ្នេរមានចំនួនជាង១,៣លាននាក់ ដោយតួលេខនេះមានការថយចុះបន្តិចបន្តូច បើធៀបនឹងរយៈពេលដូចគ្នាកាលពីឆ្នាំមុន ដែលមានភ្ញៀវ​ទេសចរមកលេងកម្សាន្តជាង១,៤លាននាក់។

ចាប់តាំងពីដើមឆ្នាំ២០២០ ដែលកើតមានជំងឺកូវីដ១៩ វាយលុកលុយទូទាំងពិភពលោក ទេសចរចម្រុះជាតិសាសន៍ បានផ្អាករាល់គម្រោងដំណើរកម្សាន្តរបស់ខ្លួន ដែលធ្វើឱ្យវិស័យមួយនេះទទួលរងនូវផលប៉ះពាល់យ៉ាងធ្ងន់ធ្ងរ ដែលក្នុងកម្ពុជា ក៏ទទួលរងនូវឥទ្ធិពលអវិជ្ជមានផងដែរ។

ប៉ុន្តែទោះជាយ៉ាងណា តាមរយៈចលនាក្នុងស្រុក វិស័យទេសចរណ៍កម្ពុជានៅតែមានចលនា ជាពិសេសនៅតាមតំបន់ឆ្នេរ តំបន់ធម្មជាតិព្រៃភ្នំ ដែលជាតំបន់ទេសចរណ៍មានស្រាប់ និងទេសចរណ៍កែច្នៃដែលវិនិយោគដោយវិស័យឯកជន។

ដោយឡែកសម្រាប់តែខេត្តជាប់មាត់សមុទ្រ កែប នៅក្នុងរយៈពេល១១ខែកន្លងទភនេះ មានទេសចរចម្រុះជាតិសាសន៍ជាង១,៣លាននាក់ ចូលទៅកម្សាន្តនៅតាមរម​ណីយដ្ឋាននានាទូទាំងខេត្ត ដែលក្នុងនោះរួមមានដូចជា តំបន់ឆ្នេរអង្កោល ទីតាំងវត្តសមាធិ និងតំបន់ព្រៃកោងកាងជាដើម។

អភិបាលខេត្តកែប លោកសោម ពិសិដ្ឋបានថ្លែងដោយមោទនភាពថា “កែប ពិតជាខេត្តដែលមានលក្ខណៈពិសេស ដែលសម្រស់ដ៏ស្រស់ស្អាតរបស់ខេត្ត ហាក់មានបង្កប់នូវអាថកំបាំងកណ្តាលធម្មជាតិ ដែលធ្វើឱ្យទេសចរមានអារម្មណ៍ភ្ញាកផ្អើល និងមិនចង់ចាកចេញនោះទេ”។

លោកបញ្ជាក់ថា “ទេសចរជាច្រើន ហាក់ជាប់ចិត្តជាមួយនឹងខេត្តតូចច្រឡឹងនេះ។ ខេត្តកែបមានលក្ខណៈល្អពិសេស និងស័ក្តិសមជាកន្លែងសម្រាប់លំហែរកាយ ដែលក្រៅពីមានទឹក ដី និងខ្យល់ស្អាត ខេត្តក៏មានប្រៃកោងកាង ដើមឈើធំៗ និងរសជាតិអាហារសមុទ្រ ជាពិសេសក្តាមសមុទ្រ ដែលចង់ចិត្តទេសចរមិនអាចបំភ្លេចបាន”៕

ដោយ ហ្សូលី

ភ្នំពេញៈ ជាមួយការដាក់ចេញនូវយុទ្ឋសាស្រ្តកាទូតដ៏ប៉ិនប្រសព្វ ដើម្បៅវិបុលភាពរបស់ខ្លួន បានធ្វើឲ្យសហគមន៍អន្តរជាតិទទួលស្គាល់កម្ពុជា ខណៈការប្រើប្រាស់យុទ្ឋសាស្រ្តពាណិជ្ជកម្មស៊ីជម្រៅ បានធ្វើឲ្យប្រទេសទើបងើបឡើងពីវិបត្តិនេះ អាចក្តោបក្តាប់បាននូវសម្ព័ន្ឋមិត្តធំៗចំនួនបីលើពិភពលោក។

តាមគម្រោងប្រព័ន្ធផ្សព្វផ្សាយកំពុងដំណើរការ ដើម្បីចាប់ផ្តើមការចរចា FTA ជាមួយចក្រភពអង់គ្លេស សហរដ្ឋអាមេរិក ជប៉ុន ម៉ុងហ្គោលី និងឥណ្ឌា ដោយមានក្រុមការងារយ៉ាងតិច៨ក្រុម ដែលបង្កើតឡើងដោយប្រទេសកម្ពុជា ដើម្បីសិក្សាចរចានិងរៀបចំយុទ្ធសាស្ត្រFTA រួមរបស់ខ្លួន។

សម្ព័ន្ធភាពជាមួយចិន

នៅពេលដែលប្រទេសកម្ពុជា និងចិនបានប្រកាសកាលពីខែសីហាថា ភាគីទាំងពីរបានចរចាកិច្ចព្រមព្រៀងពាណិជ្ជកម្មសេរី (FTA) ត្រឹមតែមួយឆ្នាំ អ្នកវិភាគមួយចំនួនបាននិយាយថា វាជាសញ្ញាមួយដែលទីក្រុងប៉េកាំង នឹងពង្រឹងឥទ្ធិពលសេដ្ឋកិច្ចរបស់ខ្លួនបន្ថែមទៀត លើប្រជាជាតិអាស៊ីអាគ្នេយ៍មួយនេះ។ ពាណិជ្ជកម្មសរុបរវាងកម្ពុជា និងចិនបានកើនឡើងជាលំដាប់ ដោយបានកើនឡើង២៧,៧ភាគរយ ដែលមានទំហំទឹកប្រាក់សរុបដល់៩,៤៣ ពាន់លានដុល្លារចាប់ពីឆ្នាំ២០១៨ ដល់ឆ្នាំ ២០១៩ នេះបើយោងតាមតួលេខពីក្រសួងពាណិជ្ជកម្មចិន។

ចាប់តាំងពីការយកឈ្នះប្រទេសជប៉ុន ក្នុងនាមជាអ្នកផ្តល់ជំនួយដ៏ធំបំផុតរបស់ប្រទេសកម្ពុជានៅឆ្នាំ២០១០ ឥទ្ធិពលរបស់ប្រទេសចិន បានកើនឡើងជាលំដាប់តាមរយៈលំហូរនៃការវិនិយោគ កម្មករ និងភ្ញៀវទេសចរណ៍។

បើយោងតាមតួលេខរបស់ធនាគារពិភពលោក បច្ចុប្បន្នចិនបានផ្តល់ការផ្គត់ផ្គង់ប្រហែល៤០ភាគរយ នៃការវិនិយោគផ្ទាល់ពីបរទេសរបស់ប្រទេសកម្ពុជា និងកាន់កាប់បំណុលសាធារណៈចំនួនពាក់កណ្តាល ស្មើតម្លៃ៧០០០លានដុល្លារក្នុងឆ្នាំ ២០១៨ ។

ប្រទេសចិនក៏បានយកឈ្នះសហភាពអ៊ឺរ៉ុប ដែលជាប្រទេសនាំចូលអង្ករកម្ពុជាច្រើនជាងគេ ហើយកិច្ចព្រមព្រៀងពាណិជ្ជកម្មសេរី បានកើតឡើងដោយមានការសន្យាពីទីក្រុងប៉េកាំង នូវពាណិជ្ជកម្មមានទំហំទឹកប្រាក់១៤០លានដុល្លារជាប្រាក់កម្ចី និងជំនួយឥតសំណងសម្រាប់គម្រោងហេដ្ឋារចនាសម្ព័ន្ធ។

កាលពីសប្តាហ៍មុន ប្រទេសចិនបានធ្វើការអះអាងម្តងទៀត នៅក្នុងប្រទេសដែលមានប្រជាជនចំនួន១៦,៨លាននាក់ នៅពេលមានសេចក្តីរាយការណ៍ថា ចំណែកដ៏សំ​ខាន់នៃអាកាសយានដ្ឋានអន្តរជាតិថ្មី ដែលមានទំហំទឹកប្រាក់ចំនួន៤០៥លានដុល្លារអាមេរិក នៅទីក្រុងភ្នំពេញនឹងត្រូវបានសាងសង់ដោយសាជីវកម្ម Metallurgical នៃប្រទេសចិនដែលជាក្រុមហ៊ុនគ្រប់គ្រងដោយរដ្ឋ។

លោកយូ ហុង អ្នកស្រាវជ្រាវជាន់ខ្ពស់នៅវិទ្យាស្ថានអាស៊ីបូព៌ា នៃសាកលវិទ្យាល័យជាតិសិង្ហបុរី បានសរសេរនៅក្នុងទស្សនាវដ្តីអេឡិចត្រូនិច ជាភាសាអង់គ្លេសផ្តោតលើប្រទេសចិនថា នៅពេលដែលខ្សែចង្វាក់ផ្គត់ផ្គង់សកល បានកើតឡើងបន្ទាប់ពីមានវិបត្តិនោះ បណ្តាប្រទេសអាស៊ីអាគ្នេ យ៍គួរតែអនុវត្តន៍កំណែទម្រង់ក្នុងស្រុក ការអភិវឌ្ឍន៍វិស័យផលិតកម្មរបស់ពួកគេ និងបង្កើនឧស្សាហកម្មគាំទ្រ។

សម្ព័ន្ធភាពជាមួយកូរ៉េ

រដ្ឋាភិបាលកម្ពុជា បានធ្វើកិច្ចចរចាពាណិជ្ជកម្មលើកទី៤ របស់ខ្លួនជាមួយកូរ៉េខាងត្បូងកាលពីសប្តាហ៍មុន ដោយផ្តោតលើច្បាប់ពាណិជ្ជកម្មទូទៅ ការបោសសំអាតគយ ការចូលទៅកាន់ទីផ្សារ និងបញ្ហាផ្សេងទៀត។ ទោះបីជាការចរចារលើកដំបូង ធ្វើឡើងនៅខែកក្កដាក៏ដោយ ក៏ភាគីទាំងពីរសង្ឃឹមថា នឹងបញ្ចប់សេចក្តីព្រាងកិច្ចព្រមព្រៀងនៅពេលឆាប់ៗនេះ។

នៅក្នុងសុន្ទរកថា ទៅកាន់ប្រព័ន្ធផ្សព្វផ្សាយក្នុងស្រុក កាលពីខែឧសភាកន្លងទៅនេះ លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មបានមានប្រសាសន៍ថា ការមាន FTA បន្ថែមទៀត នឹងមិនត្រឹមតែធ្វើឱ្យប្រសើរឡើង នូវការប្រកួតប្រជែងរបស់ប្រទេស និងពង្រឹ​ងយុទ្ធសាស្ត្រធ្វើពិពិធកម្មពាណិជ្ជកម្មប៉ុណ្ណោះទេ ពួកគេក៏នឹងធ្វើសមាហរណកម្មកម្ពុជាទៅក្នុងសេដ្ឋកិច្ច ក្នុងតំបន់និងពិភពលោកផងដែរ។

ទោះយ៉ាងណាលោក ប៉ូ សុដាលីន អ្នកស្រាវជ្រាវជាន់ខ្ពស់នៃវិទ្យាស្ថានសហប្រតិ​បត្តិការនិងសន្តិភាពកម្ពុជា និងជាបេក្ខជនបណ្ឌិតនៃសាកលវិទ្យាល័យហ្គ្រីហ្វីត នៃប្រទេសអូស្រ្តាលីបានមានប្រសាសន៍ថា ការផ្តោតរបស់ប្រទេសកម្ពុជាក្នុងការចរចា FTA ជាមួយប្រទេសដទៃទៀត គឺជាការធ្វើពិពិធកម្មភាពជាដៃគូពាណិជ្ជកម្មរបស់ខ្លួន បន្ទាប់ពីសហភាពអឺរ៉ុបកាត់បន្ថយសិទ្ធិពាណិជ្ជកម្ម និងមិនកាត់បន្ថយការពឹងផ្អែកសេដ្ឋកិច្ចរបស់ខ្លួនលើប្រទេសចិន។

សម្ព័ន្ធភាពជាមួយអាមេរិក

        ជាមួយគ្នានេះ កម្ពុជាក៏មានបញ្ហាប្រឈមផងងដែរ ដែលសហរដ្ឋអាមេរិកអាចពិចា​រណាដកហូតសិទ្ឋប្រព័ន្ឋអនុគ្រោះពន្ឋពីកម្ពុជានាពេលខាងមុខ ប៉ុន្តែយ៉ាងណាបញ្ហានេះទំនងជាអាចដោះស្រាយបាននាពេលអនាគត។

ប៉ុន្តែយ៉ាងណា នេះក៏ជាការគំរាមកំហែងពីសហរដ្ឋអាមេរិក ដែលដកហូតសិទ្ធិធ្វើពាណិជ្ជកម្ម ដោ​យមិនគិតពន្ធរបស់កម្ពុជា ក្រោមក្របខ័ណ្ឌអនុគ្រោះពន្ធទូទៅ (GSP) ដែលមានគោលបំណងលើកកម្ពស់ការអភិវឌ្ឍសេដ្ឋកិច្ច នៅក្នុងប្រទេសអភិវឌ្ឍន៍តិចតួចដោយលុបបំបាត់ពន្ធលើផលិតផលរាប់ពាន់។

ប្រធានសភាពាណិជ្ជកម្មអាមេរិកនៅកម្ពុជា លោក Allen Dodgson Tan បានមានប្រសាសន៍ថា វាជាកំហុសដ៏ធ្ងន់ធ្ងរមួយ សម្រាប់សហរដ្ឋអាមេរិក ក្នុងការដកហូតសិទ្ធិ GSP សម្រាប់កម្ពុជា ដោយសារពាណិជ្ជកម្មសេដ្ឋកិច្ចទ្វេភាគី បានដើរតួជាកម្លាំងតុល្យ​ភាពក្នុងការប្រកួតប្រជែង ដែលកំពុងបន្តសម្រាប់ឥទ្ធិពលនៅកម្ពុជានិងក្នុងតំបន់។

ទិន្នន័យការិយាល័យជំរឿនអាមេរិកបានបង្ហាញថា ការនាំចេញរបស់កម្ពុជាទៅកាន់ទីផ្សារសហរដ្ឋអាមេរិក បានកើនឡើង២៣ភាគរយដល់២,៧៥ពាន់លានដុល្លារនៅឆមាសទីមួយនៃឆ្នាំនេះ គឺកើនឡើងពី២,២៤ ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

កំណើននេះ បានកើតឡើងដោយសារការកើនឡើង នៃការដឹកជញ្ជូនផលិតផលទាក់ទងនឹងការធ្វើដំណើរដូចជា កាបូបដៃ កាបូបស្ពាយ និងវ៉ាលី ដែលត្រូវបានអនុគ្រោះពន្ធក្រោមការធ្វើវិសោធនកម្ម GSP ដែលចូលជាធរមានកាលពីខែកក្កដាឆ្នាំ២០១៦ ។

ខណៈដែលមានកិច្ចព្រមព្រៀង ពាណិជ្ជកម្មសេរីបន្ថែមទៀត ទំនងជានឹងកាត់បន្ថ​យ​ការពឹងផ្អែកសេដ្ឋកិច្ចរបស់ប្រទេសកម្ពុជា ទៅលើទីក្រុងប៉េកាំង។ ស្ថានភាពរបស់ប្រទេ​សចិន ក្នុងនាមជាវិនិយោគិនដៃគូពាណិជ្ជកម្ម និងម្ចាស់ជំនួយធំជាងគេនៅរាជធានីភ្នំពេ​ញ ត្រូវបានគេរំពឹងថានឹងនៅដដែល។

សម្រាប់ការចរចាFTA ជាមួយសហរដ្ឋអាមេរិក អង់គ្លេស និងជប៉ុន ឧបសគ្គសំខាន់​ៗ នៅតែមានចាប់តាំងពីសេដ្ឋកិច្ចជឿនលឿនទាំងនេះ ទាមទារស្តង់ដារខ្ពស់នៃតម្លាភាពនិងគណនេយ្យភាព។

ដើម្បីឆ្លើយតបនឹងស្តង់ដារ ប្រទេសកម្ពុជា មិនត្រឹមតែត្រូវការកែលម្អគុណភាពទំនិញប៉ុណ្ណោះទេ ប៉ុន្តែថែមទាំងដោះស្រាយបញ្ហាមួយចំនួនជាដើម៕ South Morning China Post៕

        ដោយគង់ សូរិយា

        ភ្នំពេញៈ សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃកម្ពុជាបានសម្រេចផ្អាក មិនឲ្យមានការជួបជុំជាលក្ខណៈទ្រង់ទ្រាយធំ នៅរាជធានីភ្នំពេញ និងខេត្តសៀមរាបដូចជាពិធីមង្គលការ ការជប់លៀងផ្សេងៗ។

សម្តេចតេជោបានមានប្រសាសន៍ក្នុងវីដេអូពិសេស ដែលបានចេញផ្សាយមុននេះបន្តិចថា  យោងតាមការសំណូមពរពីរដ្ឋបាលរាជធានីភ្នំពេញ ក្រសួងសុខាភិបាល និងការផ្តល់មតិពីអង្គការសុខភាពពិភពលោក តម្រូវឲ្យយើងមានការយកវិធានការណ៍បន្ថែមសំរាប់រាជធានី និងខេត្តសៀមរាប ដែលការផ្អាកមានរយៈពេល១៥ថ្ងៃ ដែលចាប់ផ្តើមពីថ្ងៃទី៣០វិច្ឆិកានេះ។

សម្តេចបន្តថា “បើសិនជាមានការជួបប្រជុំ និងការរៀបចំអាពាហ៍ពិពាហ៍ក៏សុំខន្តីអភ័យទទោស សូមផ្អាកសិនពីថ្ងៃទី៣០វិច្ឆិកា ដល់ថ្ងៃទី១៥ឬ១៦ធ្នូខាងមុខ”។ សម្តេចបន្តថា “មនុស្សលើសពី២០នាក់ទៅមិនគួរឲ្យមានការជួបជុំទេ តែបើ២០នាក់ចុះអាចជួបជុំ តែរក្សាគម្លាត និងរក្សាតាមការណែនាំ ពីក្រសួងសុខាភិបាល”។

សម្តេចបន្តទៀតថា ក្រសួងអប់រំ យុវជន និងកីឡាត្រូវធ្វើបន្ទាន់ចាប់ពីថ្ងៃនេះ សូមចាប់ផ្តើមផ្អាកការចូលរៀន និងការប្រលងសញ្ញាបត្រមធ្យមសិក្សាទុតិយភូមិ សាលាប ណ្តុះបណ្តាលវិជ្ជាជីវៈក៏ត្រូវផ្អាកដែរ។ សូមអនុវត្តន៍និងផ្អាកជាបន្ទាន់”៕

ដោយ ហ្សូលី

ភ្នំពេញៈ សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា បានមានប្រសាសន៍ថា ការសាងសង់ផ្លូវ នឹងត្រូវស្ថាបនាគ្រប់ខេត្តទាំងអស់ គ្រាន់តែការស្ថាបនានេះអាចមានមុននិងក្រោយតែប៉ុណ្ណោះ។ នេះបើតាមឱ្យដឹងនៅថ្ងៃទី៣០ ខែធ្នូ ក្នុងឱកាសពិធីបើកការដ្ឋានសាងសង់ និងកែលំអរផ្លូវ៣៨ខ្សែនៅក្រុងសៀមរាប។

នាយករដ្ឋមន្ត្រីនៃកម្ពុជា សម្តេចតេជោ ហ៊ុន សែនបានឱ្យដឹងនាព្រឹកថ្ងៃទី៣០ វិច្ឆិកានេះក្នុងពិធីបើកការដ្ឋានស្ថាបនាផ្លូវចំនួន៣៨ខ្សែ និងកែលំអរស្ទឹងសៀមរាបថា ដូច្នេះហើ​យសង្ឃឹមថា ប្រជាពលរដ្ឋនៅក្នុងខេត្តសៀមរាបរបស់យើង និយាយដោយឡែក និងប្រ​ជា​ជនទូទាំងប្រទេស ក៏នឹងទទួលផលប្រយោជន៍ពីការសាងសង់ផ្លូវនៅទីនេះ។

សម្តេចតេជោបន្តថា «ពិតមែនហើយថាគ្រប់ខេត្តទាំងអស់ យើងត្រូវតែធ្វើ ក៏ប៉ុន្តែយើងត្រូវធ្វើឯណាមុន ត្រូវធ្វើឯណាក្រោយ។ការបោះទុននៅទីក្រុងភ្នំពេញ ត្រូវធ្វើជាប្រចាំ ហើយការបោះទុនទៅកាន់ខេត្តព្រះសីហនុ ក៏បានធ្វើរួចហើយ”។ សម្តេចបន្តថា “យើងនៅសល់ថវិកា៥លានដុល្លារ ក៏ត្រូវបញ្ជូនមកកាន់ទីនេះ បន្ថែមលើថវិកាជាតិប្រមាណ១៥០លានដុល្លារ ឥលូវនេះបានបុរេប្បទាន២០ភាគរយមកកាន់ការដ្ឋាននេះ”។

សម្តេចបញ្ជាក់ថា «ថ្ងៃនេះបើទោះបីជាយើងខកខាន មិនបានបើកការដ្ឋានក៏ដោយចុះ ក៏ប៉ុន្តែតាំងពីថ្ងៃទី១៦វិច្ឆិកាមក គឺសកម្មភាពនៃបណ្តាក្រុមហ៊ុន សាងសង់ទាំងឡាយក៏បានចាប់ផ្តើមដែរ តែថ្ងៃនេះក៏សូមអធ្យាស្រ័យខ្ញុំកាត់បន្ថយចំនួនអ្នកចូលរួម”។

គម្រោងហេដ្ឋារចនាសម្ព័ន្ធធំៗចំនួន៨ នឹងត្រូវចាប់ផ្តើមសាងសង់ និងដាក់ឱ្យដំណើរការនៅក្នុងឆ្នាំ២០២១ ខាងមុខនេះផងដែរ រួមមានដូចជា ផ្លូវជាតិលេខ៣១ គម្រោ​ងធ្វើឱ្យប្រសើរឡើងផ្លូវជាតិលេខ៣៣ ផ្លូវជាតិលេខ៤១ សាងសង់ស្ពានទន្លេមេគង្គខេត្តក្រចេះ គម្រោងលើកកម្ពស់ផ្លូវជាតិលេខ៧ (ស្គន់-កំពង់ចាម) គម្រោងរៀបចំច្រកទ្វារអន្ត​រជាតិស្ទឹងបត់ គម្រោងសាងសង់ផ្លូវវាងក្រុងសៀមរាប គម្រោងសាងសង់ស្ពានមិត្តភាពកម្ពុជា-កូរ៉េជាដើម៕

ដោយ ៖ រ៉ាណេត
សៀមរាប ៖ ក្នុងគោលបំណងលើកស្ទួយ និងស្ដារឡើងវិញនូវហេដ្ឋារចនាសម្ព័ន្ធនានានៅតាមបណ្តាខេត្ត ជាពិសេសនៅតំបន់ប៉ូលសេដ្ឋកិច្ចសំខាន់ៗចំនួន៣ប្រចាំប្រទេសកម្ពុជា រាជរដ្ឋាភិបាលបានឆ្លៀតយកឱកាសដែលកំពុងប្រឈមជាមួយនឹងវិបត្តិ Covid-19 ជំរុញក្នុងការស្ដារ និងធ្វើការអភិវឌ្ឍបណ្តាញហេដ្ឋារចនាសម្ព័ន្ធឱ្យប្រសើរឡើងវិញ ជាពិសេសនៅខេត្តព្រះសីហនុ និងខេត្តសៀមរាប។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍នៅក្នុងពិធីបើកការដ្ឋានសាងសង់ហេដ្ឋារចនាសម្ព័ន្ធចំនួន៣៨ខ្សែនៅទូទាំងក្រុងសៀមរាបនៅព្រឹកថ្ងៃទី៣០ ខែវិច្ឆិកា ឆ្នាំ២០២០នេះថា បើទោះជាកម្ពុជាកំពុងទទួលរងនូវការគំរាមកំហែងពីCovid-19 វាមិនមែនជាឧបសគ្គក្នុងកិច្ចការអភិវឌ្ឍន៍របស់កម្ពុជានោះទេ។

សម្ដេចតេជោបានបន្តថា “កូវីដ អាចរារាំងនូវដំណើរការរបស់យើង ប៉ុន្តែមិនអាចបញ្ឈប់នូវកិច្ចខិតខំប្រឹងប្រែងរបស់យើងក្នុងការស្ថាបនាផ្លូវទាំងអស់នោះទេ។ ដូចដែលឯកឧត្តមទេសចរដ្ឋមន្ត្រី ស៊ុន ចាន់ថុល បានលើកឡើងនៅក្នុងរបាយការណ៍ កាលពីថ្ងៃទី៤ ខែកញ្ញា ឆ្នាំ២០២០ នៅក្នុងពេលប្រជុំគណៈរដ្ឋមន្ត្រីពេញអង្គ ខ្ញុំបានប្រកាសអំពីការបញ្ចុះកញ្ចប់ថវិកាក្នុងរង្វង់ពី១០០-១៥០លានដុល្លារ ដើម្បីសាងសង់ផ្លូវចំនួន៣៨ខ្សែសម្រាប់ទីក្រុងសៀមរាបរបស់យើងនេះ”។

សម្ដេចបានបន្តថា “បន្ថែមលើនោះដោយមានការសិក្សាជាក់លាក់របស់ឯកឧត្តម ជា សុផារ៉ា ទៅលើបញ្ហានៃការកែលម្អដងស្ទឹងសៀមរាបរបស់យើង យើងថ្ងៃនេះក៏មានការបង្កើតឱ្យមាននូវការរដ្ឋានមួយទៀតសម្រាប់ការកែលម្អដងស្ទឹងសៀមរាប ដែលនៅទាំងសង់ខាងប្រវែង៨៨៤៤០ម៉ែត្រ ដើម្បីឱ្យក្លាយទៅជាទីកន្លែងដើរកម្សាន្តរបស់ប្រជាពលរដ្ឋ ក៏ដូចជាទេសចរដែលមកកាន់ខេត្តសៀមរាបរបស់យើងនេះ”។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបញ្ជាក់ទៀតថា “បន្ទាប់ពីសម្រេចបាននូវជិតបញ្ចប់ការដ្ឋាននៅខេត្តព្រះសីហនុដែលយើងបានចំណាយទុនជិត៣០០លានដុល្លារនោះទីនោះ យើងក៏ត្រូវបញ្ចុះទុនបន្ថែមមកសាងសង់នៅទីនេះ ដែលជាទីកន្លែងមួយដែលខ្ញុំធ្លាប់បានហៅថាជាប៉ូលសេដ្ឋកិច្ចរបស់កម្ពុជាដែលមានចំនួន៣ ប៉ូលទី១គឺភ្នំពេញ ប៉ូលទី២គឺក្រុងព្រះសីហនុ និងប៉ូលទី៣គឺខេត្តសៀមរាបរបស់យើង”។

សម្ដេចបញ្ជាក់ថា “ខេត្តសៀមរាបរបស់យើងគឺជាតំបន់ទេសចរណ៍ដ៏ទាក់ទាញ មានសណ្ឋាគារ មានផ្ទះសំណាក់ និងមានអគារដទៃទៀតល្អៗ ក៏ប៉ុន្តែផ្លូវរបស់យើងមិនសមល្មមនឹងការឆ្លើយតបជាមួយនឹងទីក្រុងដ៏ស្រស់ស្អាតមួយនេះទេ ដូច្នះនៅក្នុងឱកាសដែលមានកូវីដនេះ និងក្នុងឱកាសនៅពេលដែលយើងមានសន្សំសាច់ប្រាក់ដែលបានធ្វើប៉ុន្មានឆ្នាំមកហើយនោះ គឺយើងមានលទ្ធភាពដើម្បីនឹងបញ្ចុះកញ្ចប់ថវិកាមកសាងសង់ផ្លូវទាំអ៣៨ខ្សែនៅទីក្រុងសៀមរាបរបស់យើងនេះ ហើយថវិកាដែលនៅសល់ពីការសាងសង់នៅខេត្តព្រះសីហនុចំនួន៥លានដុល្លារនោះ ក៏នឹងត្រូវយកមកកែលម្អនៅតាមដងស្ទឹងសៀមរាបនេះ”។

ក្រោយការស្ដារ និងស្ថាបនាឡើងវិញនូវបណ្តាញហេដ្ឋារចនាសម្ព័ន្ធនានានៅទូទាំក្រុងសៀមរាបដែលការបណ្តាក់ទុនដោយផ្ទាល់ពីសំណាក់រាជរដ្ឋាភិបាលកម្ពុជានៅពេលនេះ ខេត្តសៀមរាប នឹងក្លាយជាមជ្ឈមណ្ឌលទេសចរណ៍ដ៏ទាក់ទាញ និងស័ក្ដិសមជាប៉ូលសេដ្ឋកិច្ចពិសេសប្រចាំព្រះរាជាណាចក្រកម្ពុជា៕

ដោយ ហ្សូលី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចលុបចោលជាផ្លុវការនូវកម្មវិធីតភ្ជាប់ស្ពានស្ទឹងត្រង់-ក្រូចឆ្មារ ដែលគ្រោងនឹងប្រព្រឹត្តនៅថ្ងៃទី ៧ ខែធ្នូខាងមុខនេះ ដោយហេតុថាការពារការរីករាលដាលជំងឺកូវីដ ១៩ នៅក្នុងសហគមន៍។

ថ្លែងឱ្យដឹងនៅក្នុងឱកាសអញ្ជើញបើកការដ្ឋានសាងសង់ និងកែលំអរផ្លូវ ៣៨ខ្សែនៅក្រុងសៀមរាប និងង ស្តារ-កែលម្អ ដងស្ទឹង សៀមរាបនៅថ្ងៃទី ៣០ ខែ វិច្ឆិកា ឆ្នាំ ២០២០នេះ សម្តេចតេជោបានមានប្រសាសន៍ថា «មេកងហោះហើររបស់ខ្ញុំសម្រាប់ឧត្ថម្ភាគចក្រនេះ បានទទួលទានអាហារជាមួយអ្នកពាក់ព័ន្ធ អញ្ចឹងទេម្សិលមិញនេះ ខ្ញុំបញ្ជាឱ្យឧបម្ភាគចក្រទាំង៤ តូច២ធំ២ ត្រឡប់ទៅទីក្រុងភ្នំពេញ ហើយបាញ់ថ្នាំសម្លាប់មេរោគ។ មនុស្សទាំងអស់ត្រូវធ្វើតេស្តយកសំណាករួចហើយដាក់ខ្លួនធ្វើចត្តាឡីស័ក។ អញ្ចឹងពីឡុតនៃការហោះហើរសម្រាបឥស្សារជនជាន់ខ្ពស់ មិនត្រូវប្រើប្រាស់ក្នុងរយៈពេល ១៤ ថ្ងៃ។»

សម្តេចតេជោបន្តថា «អញ្ចឹងបានជាខ្ញុំស្នើដល់ឯកឧត្តម ស៊ុន ចាន់ថុល លុបចោលកម្មវិធីនៃការតភ្ជាប់ស្ពានស្ទឹងត្រង់-ក្រូចឆ្មារ នៅខេត្តកំពង់ចាម ត្បូងឃ្មុំ នៅថ្ងៃទី ៧ នេះ ព្រោះខ្ញុំត្រូវធ្វើដំណើរតាមឧត្ថម្ភាគចក្រ ខ្ញុំអត់ធ្វើដំណើរទៅបានទេ។ ពិតមែនហើយយើងមានកងទ័ពអាកាសរបស់យើងអាចធ្វើការហោះហើរបាន ក៏ប៉ុន្តែគឺវាមិនមែនជាការចាំបាច់ពេកទេ។ គ្រាន់តែជាដំណើរការនិមិត្តរូបនៃការតភ្ជាប់ស្ពាន ឱ្យគេធ្វើសិនទៅ។ ធ្វើទៅហើយ ជួនកាលគេតភ្ជាប់មុនសម្ពោធត្រឹម ៥ថ្ងៃក៏បានដែរ អត់មានបញ្ហាទេ មុនសម្ពោធដាក់ឱ្យប្រើប្រាស់ត្រឹមតែ ៥ថ្ងៃក៏វាមិនអីដែរ។»

ស្ពានស្ទឹងត្រង់-ក្រូចឆ្មារនេះស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គទៅត្រើយខាងកើតស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ ជាស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ ដែលបានបើកការដ្ឋានកាលពី ថ្ងៃទី១ ខែធ្នូ ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី។

គម្រោងសាងសង់ស្ពាននេះមានប្រវែងសរុប ១.១៣១ម៉ែត្រ និងទទឹង១៣,៥០ម៉ែត្រ ជាប្រភេទស្ពានបេតុងអាម៉េ ប្រើរយៈពេលសាងសង់ចំនួន ៤២ខែ ចំណាយថវិកាជិត ៥៧លានដុល្លារ ដែលជាហិរញ្ញប្បទានសម្បទាន ពីរដ្ឋាភិបាលចិន រួមជាមួយថវិកា បដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់។ គិតត្រឹមថ្ងៃទី៧ ខែធ្នូ ឆ្នាំ២០២០ ស្ពាននេះសម្រេចបាន៩៦,៤ភាគរយ និងគ្រោងបញ្ចប់នៅដើមឆ្នាំ២០២១ខាងមុខ៕