អ្នកជំនាញ: កម្ពុជាមានសណ្ឋានដីល្អសម្រាប់ការសាងសង់ ទោះមានការប្រែប្រួលអាកាសធាតុលើពិភពលោក

ដោយៈម៉ាណេត

ភ្នំពេញៈ អ្នកជំនាញបានអះអាងថា ការប្រែប្រួលអាកាសធាតុលើពិភពលោក មិនបានបង្កប៉ះពាល់ដល់ការសាងសង់សំណង់ ឬសំណង់គ្រឹះនៅកម្ពុជានោះទេ ដោយសារតែកម្ពុជាមានភាពអំណោយផលចំពោះអាកាសធាតុ និងមានសណ្ឋានដីល្អសម្រាប់ការសាងសង់។

លោកសាស្ត្រាចារ្យទួស សាភឿន អគ្គលេខាធិការរងនៃគណៈស្ថាបត្យករកម្ពុជាបានថ្លែងប្រាប់Propertyarea.asia នៅថ្ងៃទី១២ ខែមករា ឆ្នាំ២០២០នេះថា ប្រទេសកម្ពុជាមានភាពអំណោយផលលើការអាកាសធាតុ ដោយសារកម្ពុជាមានប្រព័ន្ធអេកូឡូស៊ី និងមានដើមឈើច្រើន ហើយបានលក់កាបូនជាច្រើន ដើម្បីរក្សាព្រៃឈើ ដែលធ្វើឱ្យមានលំនឹងអាកាសធាតុ។

លោកបានថ្លែងថា “ការប្រែប្រួលអាកាសធាតុនេះ កើតឡើងនៅប្រទេសគេ ដូច្នេះវាមិនបង្កផលប៉ះពាល់ដល់ការសាងសង់សំណង់ ឬគ្រឹះសំណង់នៅកម្ពុជានោះទេ”។លោកបានថ្លែងថា “ខ្ញុំមើលឃើញថា ស្រទាប់ដីនៅក្នុងទីផ្សារក្រុងភ្នំពេញ ដូចជាព្រះប្រទានពរឱ្យ ព្រោះស្រទាប់ដីចាប់៣០ម៉ែត្រចុះទៅក្រោម គឺរឹងល្អសម្រាប់ការសាងសង់ ហើយចាប់ពី៤០ទៅ៥០ម៉ែត្រកាន់តែល្អ ដូច្នេះការសាងសង់កាន់តែខ្ពស់ គឺត្រូវខួងឱ្យចំណុច៤០ ទៅ៥០ម៉ែត្រ ដោយសារដីមានភាពរឹងមុំាល្អ ដូច្នេះការសាងសង់គ្រឹះអាគារនៅទីក្រុងភ្នំពេញមិនធ្វើឱ្យមានការព្រួយបារម្ភទេ”។

ជប៉ុនធ្លាប់ធ្វើការសិក្សាពីតំបន់បន្ទុះភ្នំភ្លើងនៅតំបន់អាស៊ី ក្នុងនោះ ថៃ ឡាវ និងមីយ៉ានម៉ាធ្លាប់ប្រវត្តិផ្ទុះភ្នំភ្លើង និងរញ្ជួយដី ហើយចាប់ពីឆ្នាំ១៩៣០ ដល់បច្ចុប្បន្ន បន្ទាត់ភ្នំភ្លើងគឺស្ថិតនៅជំវុញប្រទេសកម្ពុជា ប៉ុន្តែប្រទេសកម្ពុជាមិនស្ថិតនៅលើបន្ទាប់នោះទេ។

លោកសាស្ត្រាចារ្យបានថ្លែងថា “ទោះបីជាយ៉ាងណាក៏ដោយ អាគារខ្ពស់ៗរបស់យើងបច្ចុប្បន្ននេះ ក៏ត្រូវបានយកចិត្តទុកខ្ពស់ដែរក្នុងការសាងសង់ ហើយអាគារនិមួយៗត្រូវការទប់លំនឹងនៃអាគារខ្លួនឯង ដែលគេហៅថា “បន្ទុករស់ បន្ទុកងាប់”។

លោកបានពន្យល់ថា បន្ទុករស់ បន្ទុកងាប់ មានន័យថា បើគណនាពីរឿងគ្រឹះ គ្រឹះត្រូវសាងសង់ ដើម្បីទ្រទម្ងន់អាគារខ្លួន ដែលគេហៅបន្ទុករស់ ហើយទម្ងន់អាគារខ្លួនឯងនេះ គេហៅថា បន្ទុកងាប់។

លោកសាស្រ្តាចារ្យទួស សាភឿនបានពន្យល់ថា ឧទាហរណ៍ អាគារមានកម្ពស់៥០ជាន់ ស្មើនឹង៥០ម៉ឺនតោន ដែលជាបន្ទុកងាប់ ដូច្នេះគ្រឹះ (បន្ទុករស់) ត្រូវសាងសង់ដើម្បីទ្របានលើស៣០ភាគរយ នៃបន្ទុកងាប់ (អាគារទាំងមូល)៕

រដ្ឋបាលរាជធានីភ្នំពេញបន្តសិក្សាពីគម្រោងសាងសង់ស្ពានឆ្លងកាត់ទន្លេបាសាកថ្មីដើម្បីកាត់បន្ថយការកកស្ទះចរាចរណ៍

ដោយ ៖ រ៉ាណេត

ភ្នំពេញ ៖ រដ្ឋបាលរាជធានីភ្នំពេញកំពុងសិក្សាពីគម្រោងសាងសង់ស្ពានឆ្លងកាត់ទន្លេបាសាក់ថ្មីបន្ថែមទៀតដើម្បីកាត់បន្ថយជំនន់នៃការកក់ស្ទះចរាចរណ៍ដែលកើតមានជារៀងរាល់ថ្ងៃនៅផ្លូវជាតិលេខ១ និងតំបន់ទីប្រជុំជនច្បារអំពៅចូលមករាជធានីភ្នំពេញ។

មន្ត្រីរដ្ឋបាលរាជធានីភ្នំពេញបានបង្ហើបប្រាប់នៅព្រឹកថ្ងៃទី១២ ខែមករា ឆ្នាំ២០២១នេះថា រដ្ឋបាលរាជធានីភ្នំពេញ ក្រោមការគ្រប់គ្រង និងដឹកនាំដោយលោក ឃួង ស្រេងអភិបាលរាជធានីភ្នំពេញបានបង្កើតគណៈកម្មការសិក្សាពីគម្រោងនៃការសាងសង់ស្ពានឆ្លងកាត់ទន្លេបាសាក់ថ្មីមួយទៀត ដែលនឹងត្រូវធ្វើការតភ្ជាប់ពីតំបន់ព្រែកប្រាខណ្ឌច្បារអំពៅ មកកាន់ត្រើយម្ខាងស្ថិតនៅក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

មន្ត្រីដដែលបានបញ្ជាក់ថា “បើតាមគម្រោងក្នុងជំហានបឋមរដ្ឋបាលរាជធានីភ្នំពេញបានសម្រេចបង្កើតគណកម្មការសិក្សាពីគម្រោងសាងសង់ស្ពាននេះតាមរយៈសេចក្ដីប្រកាសលេខ ៣៨១/១៩ សសរ.រ ចុះហត្ថលេខាដោយលោកអភិបាលរាជធានីភ្នំពេញតាំងពីអំឡុងខែធ្នូ ឆ្នាំ២០១៩ ដោយមានសមាសភាពចំនួន២១នាក់ដែលជាមន្ត្រីជំនាញ និងមន្ត្រីអជ្ញាធរដែលពាក់ព័ន្ធ ប៉ុន្តែរហូតមកដល់ពេលនេះអាចនឹងមានការកែប្រែ និងបន្ថែមសមាសភាពមន្ត្រីជំនាញខ្លះទៀតតាមភាពជាក់ស្ដែងនៃតម្រូវ”។

គម្រោងសាងសង់ស្ពាននេះអាចនឹងដាក់គល់ស្ពាននៅក្បែរតំបន់សិប្បកម្មផលិតទឹកកកក្នុងសង្កាត់ព្រែកប្រា ខណ្ឌច្បារអំពៅ ហើយត្រៀងម្ខាងនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដោយភ្ជាប់មកកាន់ផ្លូវ៦០ម៉ែត្រ ប៉ុន្តែនៅតំបន់នេះមានឧបសគ្គច្រើនដែលត្រូវដោះស្រាយផលប៉ះពាល់ជាមួយប្រជាពលរដ្ឋច្រើនគ្រួសារ។

ដោយឡែក គណៈកម្មការដែលចុះសិក្សាត្រូវកំណត់ពីទីតាំងដែលត្រូវសាងសង់ ចុះស្រង់ស្ថិតិប្រជាជនដែលរងនូវផលប៉ះពាល់ទៅនឹងគម្រោងសាងសង់ស្ពានឆ្លងកាត់ទន្លេបាសាក់មួយនេះរួមជាមួយនឹងការធ្វើរបាយការណ៍សំខាន់ដែលពាក់ព័ន្ធផងដែរ៕

ការព្យាករ៖ ប្រាក់ចំណេញប្រចាំត្រីមាសរបស់ធនាគារអាមេរិកធំៗនឹងដាំក្បាលចុះជាថ្មីម្តងទៀត

ដោយៈសុខុម

ញូវយ៉ក: នៅពេលធនាគារអាមេរិកធំៗ បានចាប់ផ្ដើមបញ្ចេញរបាយការណ៍របស់ខ្លួនសម្រាប់ត្រីមាសទី៤ កាលពីថ្ងៃសុក្រ សប្ដាហ៍មុន ជាលទ្ធផលមួយចំនួនបង្ហាញថា ប្រាក់ចំណេញរបស់ខ្លួន បានធ្លាក់ចុះរហូតដល់ទៅ៤០% គិតចាប់តាំងពីឆ្នាំ២០១៨ មុនពេលផ្ទុះការឆ្លងរាតត្បាតវីរុសកូវីដ-១៩ ។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃទី១១ មករា។

ទោះជាយ៉ាងណា បណ្ដាវិនិយោគិននឹងផ្តោត លើការស្វែងរកវិធីធ្វើយ៉ាងណាឱ្យប្រាក់ចំណេញកើនឡើងវិញក្នុងឆ្នាំ២០២១ ។

លោក Jason Goldberg អ្នកវិភាគប្រចាំធនាគារវិនិយោគ ពហុជាតិសាសន៍អង់គ្លេស Barclays បានលើកឡើងថា គួរចាត់ទុកត្រីមាសទី៤ ជាត្រីមាសអន្តរកាល ហើយសម្លឹងឆ្ពោះទៅរកស្ថានភាពប្រសើរឡើងក្នុងឆ្នាំ២០២១ ។

អ្នកវិភាគរូបនេះបន្ថែមទៀតថា “ការឆ្លងរាតត្បាតវីរុសកូវីដ-១៩ បានធ្វើឱ្យអត្រាការប្រាក់ និងប្រាក់ចំណេញធ្លាក់ចុះខ្លាំងមិនធ្លាប់មាន” ។ លោកបន្តថា “ការឆ្លងរាតត្បាតវីរុសកូវីដ-១៩ ក៏បានជំរុញឱ្យធនាគារអាមេរិកធំៗ បានលៃទុកថវិកាជាង៦៥ពាន់លានដុល្លារ សម្រាប់ការខាតបង់ឥណទានរំពឹងទុកផងដែរ។

យោងតាមការព្យាករណ៍របស់ក្រុមហ៊ុនផ្ដល់ទិន្នន័យ និងហេដ្ឋារចនាសម្ព័ន្ធទីផ្សារហិរញ្ញវត្ថុពិភពលោក Refinitiv ប្រាក់ចំណេញរបស់ធនាគារនានា នឹងកើនឡើងលើសទ្វេដងក្នុងត្រីមាសទី១ និងត្រីមាសទី២ ដើមឆ្នាំ២០២១ ។

ភាគហ៊ុនរបស់ធនាគារបានហក់ឡើង៣៥% គិតចាប់តាំងពីដើមខែវិច្ឆិកា ចុងឆ្នាំ២០២។ ចាប់តាំងពីពេលនោះមក វ៉ាក់សាំងកូវីដ-១៩ ដែលមានប្រសិទ្ធភាពត្រូវបានចាប់ផ្តើមចែកចាយ ហើយពួកគណបក្សប្រជាធិបតេយ្យ ក៏បានឈ្នះការបោះឆ្នោតប្រធានាធិបតីនៅសហរដ្ឋអាមេរិក ដោយគណបក្សឈ្នះឆ្នោត បានសន្យាបញ្ចេញកញ្ចប់ថវិកាស្ដារសេដ្ឋកិច្ចបន្ថែមទៀត។

ធនាគារកណ្ដាលអាមេរិកFederal Reserve និយាយថា ខ្លួននឹងអនុញ្ញាតឱ្យធនាគារនានា ទិញយកភាគហ៊ុនឡើងវិញជាថ្មីម្តងទៀត ដែលនឹងធ្វើឱ្យប្រាក់ចំណូលក្នុងមួយភាគហ៊ុនៗកើនឡើង។

គិតត្រឹមថ្ងៃសុក្រ សប្ដាហ៍មុន របាយការណ៍របស់ធនាគារCitigroup Inc បង្ហាញថា ប្រាក់ចំណេញរបស់ខ្លួន ប្រចាំត្រីមាសទី៤ បានធ្លាក់ចុះ៤២% ហើយប្រាក់ចំណេញរបស់ធនាគារ Wells Fargo & Co បានធ្លាក់ចុះ ៣៩% ចំណែកឯប្រាក់ចំណេញរបស់ធនាគារ JPMorgan Chase & Co បានធ្លាក់ចុះត្រឹមតែជាង៥% ប៉ុណ្ណោះ។

ធនាគារទាំងបីនេះ បានបញ្ចេញរបាយការណ៍របស់ខ្លួនកាលពីថ្ងៃសុក្រ សប្ដាហ៍មុន។ នៅសប្តាហ៍បន្ទាប់ ប្រាក់ចំណេញប្រចាំត្រីមាសរបស់ធនាគារ Bank of America Corp ត្រូវបានរំពឹងថានឹងធ្លាក់ចុះ៣៣% ។

តាមរំពឹងទុកថា ប្រាក់ចំណេញរបស់ធនាគារ Morgan Stanley នឹងកើនឡើង ១% ហើយប្រាក់ចំណេញរបស់ធនាគារ Goldman Sachs Group Inc នឹងកើនឡើងរហូតដល់៤៣% ដោយសារការឡើងថ្លៃភាគហ៊ុនក្នុងទីផ្សារមូលធន៕

សក្តានុពលខេត្តពោធិសាត់៖ ផ្លូវតភ្ជាប់ព្រំដែនថៃ-កម្ពុជាក្នុងស្រុកវាលវែងនឹងក្លាយជាច្រកសេដ្ឋកិច្ចថ្មីមួយទៀត

ដោយៈប៊ី

ពោធិ៍សាត់ៈ គម្រោងសាងសង់ផ្លូវមួយខ្សែ តភ្ជាប់រវាងភូមិថាសេន ឃុំឡែមកាត់ ស្រុមមឿង ខេត្តត្រាត ប្រទេសថៃ មកកាន់ច្រកព្រំដែនថ្មដា ស្រុកវាលវែង ខេត្តពោធិ៍សាត់ របស់ប្រទេសកម្ពុជា ក្រោមការចំណាយរបស់ថៃត្រូវបានបញ្ចប់ ការសាងសង់ជាស្ថាពរហើយ។

អភិបាលខេត្តពោធិ៍សាត់ លោកម៉ៅ ធនិន បានមានប្រសាសន៍នៅថ្ងៃទី១១ ខែមករា ឆ្នាំ២០២១នេះថា ការតភ្ជាប់ផ្លូវមួយខ្សែនេះ ជាការបង្កើតច្រកសេដ្ឋកិច្ចថ្មីមួយទៀតរវាងប្រទេសកម្ពុជា-ថៃ ជាពិសេសធ្វើឱ្យស្រុកវាលវែង ខេត្តពោធិ៍សាត់ មានសក្តានុពេលសេដ្ឋកិច្ចថែមមួយកម្រិតទៀត។

លោកបានថ្លែងថា “កំណាត់ផ្លូវមួយខ្សែនេះ ត្រូវបានសាងសង់ឡើងដោយក្រាលកៅស៊ូប្រភេទ AC មានទឹង១៤ម៉ែត្រ ប្រវែងជិត ២០០០ម៉ែត្រចែកចេញជា៤គន្លង” ។

លោកបន្តថា ការសម្រេចសាងសង់កំណាត់ផ្លូវនេះ គឺបន្ទាប់ពីសភាថៃបានអនុម័ត ក្រោមកិច្ចចុះហត្ថលេខារបស់លោកឆ័ត្រប្រឆៃ ផនម៉នឡឺដ រដ្ឋលេខាធិការក្រសួងមហាផ្ទៃ នៃព្រះរាជាណាចក្រថៃ ឯកភាពតាមសំណើរបស់អភិបាលខេត្តត្រាត កាលពីថ្ងៃទី២៧ ខែវិច្ឆិកា ឆ្នាំ២០១៩កន្លងទៅពាក់ព័ន្ធការពន្លឿនបើកច្រកព្រំដែនអន្តរជាតិនេះ។

លោកបានឱ្យដឹងទៀតថា “ការតភ្ជាប់កំណាត់ផ្លូវមួយខ្សែនេះ គឺជាការចង់ឃើញរបស់រាជរដ្ឋាភិបាលកម្ពុជា ក៏ដូចជារដ្ឋបាលខេត្តពោធិ៍សាត់ផ្ទាល់តែម្តង ដើម្បីបង្កើតនូវចរន្តសេដ្ឋកិច្ចថ្មីមួយទៀតរវាងប្រទេសថៃ និងប្រទេសកម្ពុជា” ។

ស្រុកវាលវែង ខេត្តពោធិ៍សាត់ ដែលជាតំបន់ដាច់ស្រយាលមួយ ពីអតីតកាលនោះ បាននិងកំពុងក្លាយទៅជាតំបន់ មានសក្តានុពលខ្ពស់លើវិស័យទេសចរណ៍ និងកសិកម្ម បន្ទាប់ពីផ្លូវមួយជាតិមួយខ្សែ គឺផ្លូវជាតិលេខ៥៥ ត្រូវបានសាងសង់រួចរាល់ និងដាក់សម្ពោធឱ្យប្រើប្រាស់កាលពីឆ្នាំ២០២០កន្លងទៅ។

ស្រុកនេះក៏ជាកន្លែងទេសចរណ៍ដ៏ទាក់ទាញ មានទឹកជ្រោះ និងជួរភ្នំ ខណៈស្រុកមឿង ខេត្តត្រាត ប្រទេសថៃ ជាតំបន់ទេសចរណ៍ជាប់មាត់សមុទ្រ។ ការតភ្ជាប់ផ្លូវធ្វើដំណើរកាន់តែងាយស្រួល រវាងខេត្តពោធិ៍សាត់របស់កម្ពុជា និងខេត្តត្រាត របស់ថៃ តាមច្រកថ្មដា នឹងទាក់ទាញកាន់តែខ្លាំងលើវិស័យទេសចរណ៍រវាងខេត្តទាំងពីរ។

បច្ចុប្បន្ននេះនៅច្រកថ្មដានេះ នៅខាងទឹកដីកម្ពុជា មានការវិនិយោគអភិវឌ្ឍលំនៅឋាន សណ្ឋាគារ និងកន្លែងលំហែកាយជាច្រើន។ ក្រៅតែពីវិស័យទេសចរណ៍ ការតភ្ជាប់ខេត្តទាំងពីរតាមរយៈច្រកថ្មដា នឹងបង្កភាពងាយស្រួល ក្នុងការផ្លាស់ប្តូរទំនិញរវាងប្រទេសទាំងពីរផងដែរ៕

ខេត្តកំពតនៅតែបន្តភាពទាក់ទាញលើគម្រោងវិនិយោគធំៗតម្លៃរាប់សិបលានដុល្លារ

ដោយៈ រ៉ាណេត

កំពតៈ ស្របទៅនឹងចក្ខុវិស័យរបស់រាជរដ្ឋាភិបាលកម្ពុជា ក្នុងការប្រែក្លាយខេត្តជាប់មាត់សមុទ្រ ឱ្យទៅជាតំបន់កម្សាន្តដ៏ទាក់ទាញលំដាប់អន្តរជាតិ បច្ចុប្បនេះ ខេត្តកំពត នៅតែបន្តភាពទាក់ទាញលើគម្រោងវិនិយោគ និងអភិវឌ្ឍន៍ធំៗជាច្រើនដែលមានតម្លៃរាប់សិបលានដុល្លារ ដែលបម្រើដល់វិស័យទេសចរណ៍។

ភ្ជាប់ជាមួយនឹងការទទួលបានគម្រោងវិនិយោគ និងអភិវឌ្ឍន៍ជាច្រើននៅទូទាំងខេត្តកំពត លោកបណ្ឌិត តេង រិទ្ធី ដែលជាអគ្គនាយកក្រុមហ៊ុនអចលទ្រព្យ R Investment Group នៅល្ងាចថ្ងៃទី១១ ខែមករា ឆ្នាំ២០២១នេះ បានបង្ហាញពីក្ដីសាទរ ទៅនឹងអ្វីដែលខេត្តកំពតទទួលបាននៅពេលនេះ ជាមួយនឹងការបញ្ជាក់ថា គម្រោងបណ្តាក់ទុនវិនិយោគដែលមានទំហំជាច្រើនលានដុល្លារខាងលើនេះ ដែលភាគច្រើនជាការវិនិយោគទៅលើការបង្កើតតំបន់កម្សាន្តទ្រង់ទ្រាយធំ រួមជាមួយនឹងការសាងសង់លំនៅដ្ឋានបែបលំហែរកាយ។

លោកបណ្ឌិតបានបន្តទៀតថា “បច្ចុប្បន្ននេះមានអ្នកវិនិយោគជាច្រើន បានទម្លាក់ទុនធ្វើការអភិវឌ្ឍតំបន់មួយចំនួន ឱ្យក្លាយទៅជាតំបន់កម្សាន្តបែបកែច្នៃ និងធម្មជាតិ ជាពិសេសតំបន់ដែលស្ថិតនៅជាប់មាត់ព្រែក ជាប់សមុទ្រ និងតំបន់ក្បែរជើងភ្នំ។ លោកបន្តថា “ជាមួយនឹងសកម្មភាពដែលកំពុងបន្តអភិវឌ្ឍន៍ ក៏មានគម្រោងថ្មីបន្តបន្ទាប់ទៀត ដែលមិនយូរមិនឆាប់ខេត្តកំពត នឹងក្លាយទៅជាទីតាំងគោលដៅទេសចរណ៍ ដ៏មានប្រជាប្រិយភាពជាក់មិនខាន” ។

ជាមួយនឹងការបង្ហាញពីសក្ដានុពល ក្នុងការវិនិយោគខាងលើនេះ លោកបណ្ឌិត តេង រិទ្ធី ក៏បានបញ្ជាក់ថា សម្រាប់ការអភិវឌ្ឍលើវិស័យលំនៅដ្ឋាន បែបលំហែរកាយនៅពេលបច្ចុប្បន្ន ត្រូវបានធ្វើឡើងជាច្រើនគម្រោង និងច្រើនកម្រិត ហើយតម្លៃក៏អាស្រ័យទៅតាមគម្រោងផងដែរ ដែលក្នុងនោះមានតម្លៃចាប់ពីជាង៣-៤ម៉ឺនដុល្លារឡើងទៅសម្រាប់លំនៅដ្ឋានបែបលំហែរមួយខ្នង។

ប្រធានមន្ទីរទេសចរណ៍ខេត្តកំពត លោក សយ ស៊ីណុល បានមានប្រសាសន៍ផងដែរថា សព្វថ្ងៃនេះមានគម្រោងវិនិយោគ លើវិស័យបដិសណ្ឋារកិច្ចជាច្រើន នៅក្នុងខេត្តកំពត ជាពិសេស គម្រោងរមណីយដ្ឋាន សណ្ឋាគារ និងបឹងហ្គាឡូ នៅតាមដងព្រែកនានារបស់ខេត្តកំពត។

លោកបន្តថា “នៅពេលដែលមានគម្រោងវិនិយោគ ផ្នែកបដិសណ្ឋារកិច្ចច្រើននៅក្នុងខេត្តនាពេលនេះ បានឆ្លុះបញ្ចាំងនៃភាពល្អប្រសើរ និងជំរុញឱ្យមានការប្រកួតប្រជែងកាន់តែខ្លាំងក្លា នៅក្នុងវិស័យទេសចរណ៍របស់ប្រទេសកម្ពុជា និងធានាបាននូវគុណភាពខ្ពស់” ។លោកបន្ថែមថា “ធម្មតានៅក្នុងធ្វើពាណិជ្ជកម្ម ឬមុខជំនួញណាមួយដែលមានការប្រកួតប្រជែង វានឹងធានាបាននូវគុណភាព និងកម្រិតស្តង់ដារមួយ ហើយយើងក៏ចង់បានការប្រកួតប្រជែងបែបនេះឱ្យបានច្រើន ដើម្បីជំរុញទៅដល់ការលើកកម្ពស់កម្រិតគុណភាព” ។

លោកសយ ស៊ីណុល បានបញ្ជាក់ថា បច្ចុប្បន្ននេះកម្ពុជា មិនមែនមានការប្រកួតប្រជែងតែនៅក្នុងស្រុកនៅទេ គឺកម្ពុជាបាននិងកំពុងប្រកួតប្រជែងទាំងថ្នាក់តំបន់ និងពិភពលោក លើវិស័យបដិសណ្ឋារកិច្ចនេះ។ ការទាក់ទាញភ្ញៀវទេសចរទាំងក្នុងស្រុក និងក្រៅស្រុក គឺទាមទារឱ្យមានគុណភាព និងស្តងដារចាំបាច់បំផុត ដូច្នេះ នៅពេលមានការប្រកួតប្រជែងកាន់តែច្រើនវាកាត់តែល្អ ហើយឆ្លើយតបទៅនឹងតម្រូវការភ្ញៀវទេសចរ និងជាតិអន្តរជាតិ៕

Angkor Grace Resort បង្ហាញពីរតនសម្បត្តិថ្មីនៅក្នុងខេត្តសៀមរាប

ដោយ មករា

សៀមរាប៖ សៀមរាបគឺជាតំបន់ទេសចរណ៍ ដ៏សំខាន់ជាងគេរបស់ប្រទេសកម្ពុជា ដែលមានចំនួនភ្ញៀវទេសចរណ៍ជាតិជាង 2លាននាក់មកទស្សនាជារៀងរាល់ឆ្នាំ និងជាទីក្រុងដែលមានការរីកចម្រើនឆាប់រហ័សបំផុត បន្ទាប់ពីរាជធានីភ្នំពេញ។ ដោយមានប្រវត្តិសាស្ត្រដ៏យូរលង់តាំងពីឆ្នាំ802 សៀមរាប គឺជាទីក្រុងដែលមានទីតាំងនៅជិតបំផុត នៃប្រាសាទអង្គវត្តដ៏ល្បីល្បាញនៅក្នុងពិភពលោក ស្ថិតនៅភាគខាងជើង។

ទីក្រុងរបស់កម្ពុជានេះ មានភាពលេចធ្លោទាំងពីរ គឺអតីតកាលដ៏រុងរឿង និងបច្ចុប្បន្នកាលដ៏រស់រវើក។ បច្ចុប្បន្នទីក្រុងប្រវត្តិសាស្ត្រនេះ កំពុងស្ថិតនៅក្នុងដំណាក់កាលផ្លាស់ប្ដូរ ដែលជាការចាប់ផ្ដើមឡើងវិញដ៏ធំបំផុត នៅក្នុងប្រវត្តិសម័យទំនើបរបស់ខ្លួន តាមរយៈកម្មវិធីការងារដ៏ធំរបស់រដ្ឋាភិបាល ដែលមានឈ្មោះថា “គម្រោងសាងសង់ផ្លូវទាំង 38 ខ្សែ” និងការបង្កើតម្រោងវិនិយោគបរទេសធំ។

ការអភិវឌ្ឍឯកជនខ្នាតធំ ដែលភាគច្រើនដំណើរការ ដោយលំហូរមូលធនបរទេស រួមមាន បឹងអង្គរអច្ឆរិយ ជាគំរោងអភិវឌ្ឍដែលមានទឹកប្រាក់350លានដុល្លារ នៅឆាយណាថោនសៀមរាប ដែលមានហាងលក់ទំនិញ សួនទឹក សួនទស្សនីយភាពបច្ចេកវិទ្យាខ្ពស់ ប្រឡាយទឹក សណ្ឋាគារទំនើបៗ និងអាកាសយានដ្ឋានអន្តរជាតិសៀមរាប ដែលនឹងដំណើរការនាពេលខាងមុខ។ គំរោងនេះជាការវិនិយោគរបស់ប្រទេសចិន ក្នុងចំនួនទឹកប្រាក់ប្រមាណ 880លានដុល្លារ នៅលើផ្ទៃដីទំហំ 700ហិកតា។

ក្រៅពីនេះ ផែនការមេអភិវឌ្ឍទេសចរណ៍ខេត្តសៀមរាប ដែលកំពុងស្ថិតក្នុងដំណាក់កាលកំពុងអភិវឌ្ឍនៅឡើយ បច្ចុប្បន្នរដ្ឋាភិបាល កំពុងធ្វើការសិក្សាគម្រោងធំៗចំនួន20បន្ថែមទៀត។

គម្រោងសាងសង់ផ្លូវទាំង 38ខ្សែ ដែលមានប្រវែង 108.74 គីឡូម៉ែត្រ ដែលមានការសាងសង់ផ្លូវថ្មី ស្ដារស្ទឹងសៀមរាប និងកែលម្អរប្រព័ន្ធបង្ហូរទឹកកខ្វក់ កាមេរ៉ាសុវត្ថិភាព ប្រព័ន្ធលូ ចិញ្ចើមផ្លូវ និងបរិវេណសាធារណៈ។ ប្រសិនបើការបង្ហាញរៀបរាប់ខាងលើក្លាយជាការពិត នោះសៀមរាបនឹងស្ថិតក្នុងការផ្លាស់ប្ដូរ និងការធ្វើទំនើបកម្មកាន់តែអស្ចារ្យ។

នៅពេលស្ថានភាពជំងឺរាតត្បាតមានភាពប្រក្រតី នោះទេសចរណ៍ក្នុងខេត្តសៀមរាបនឹងមាន ការរីកចម្រើនឡើងវិញនៅក្នុងឆ្នាំ2021 ។ កត្តានេះគឺដោយសារតែអង្គរវត្តនៅតែត្រូវបានទទួលស្គាល់ថា ជាតំបន់ទេសចរណ៍មួយដែលមានភាពទាក់ទាញខ្លាំងនៅក្នុងពិភពលោក។

ជាងនេះទៅទៀត តម្រូវការដំណើរកម្សាន្តតាមនាវានា ដងទន្លេខេត្តសៀមរាបកាន់តែមានភាពពេញនិយម មុនពេលផ្ទុះឡើងនៃជំងឺរាតត្បាត ហើយត្រូវបានរំពឹងថា នឹងត្រូវបានដាក់ដំណើរការឡើងវិញនៅក្នុងឆ្នាំ2021 បន្ទាប់ពីផ្អាកដំណើរការមួយរយៈ។

ជាមួយនឹងទីតាំងយុទ្ធសាស្ត្រ នៅចំកណ្ដាលបេះដូងនៃទីក្រុង ដែលហ៊ុមព័ទ្ធទៅដោយសណ្ឋាគារផ្កាយ 5 និងស្ថិតក្នុងចម្ងាយត្រឹមតែ 10 នាទី ពីទីតាំងបេតិកភណ្ឌយូណេស្កូ ដែលមានតែមួយនៅក្នុងពិភពលោក គឺប្រាសាទអង្គរ។ រមណីយដ្ឋាន Angkor Grace Resort គឺជាកន្លែងកម្សាន្តសហសម័យ លក្ខណៈគ្រួសារដ៏អស្ចារ្យ នៅចំកណ្ដាលទីក្រុងដ៏រស់រវើក។ បែបបទស្ថាបត្យកម្មលក្ខណៈធម្មជាតិ របស់រមណីយដ្ឋាន Angkor Grace Resort បង្ហាញអំពីសម្បត្តិបេតិកភណ្ឌអង្គរ និងការរចនាបែបសហសម័យ នៃទីក្រុងសៀមរាបដ៏អស្ចារ្យ ដែលជាគោលដៅទេសចរណ៍ដ៏ល្អបំផុតនៅក្នុងពិភពលោក។ ជាពិសេសរមណីយដ្ឋាន Angkor Grace Resort គឺជាទីកន្លែងតភ្ជាប់ឡើងវិញនូវធម្មជាតិ ព្រមទាំងផ្ដល់នូវផាសុខភាព បែបទំនើប និងប្រណឹតភាព ដើម្បីការរស់នៅដ៏រីករាយ។

ដោយផ្អែកលើការមើលឃើញជាក់ស្តែង ដែលផ្ដោតទៅលើការសន្សំសំចៃថាមពល តាមរយៈការបង្កើនលំហូរខ្យល់នៅលើទីតាំងគម្រោងទាំងមូល និងផ្ដល់នូវពន្លឺព្រះអាទិត្យគ្រប់គ្រាន់ រួមជាមួយនឹងរុក្ខជាតិបៃតងត្រូពិក និងអាងទឹកនៅជុំវិញបរិវេណនៃការរស់នៅនីមួយៗ គម្រោង Angkor Grace Resort រៀបចំឡើងដើម្បីផ្ដល់ជូនលោកអ្នកនូវបទពិសោធន៍ ដ៏រីករាយជាមួយនឹងភាពស្រស់ស្អាត នៃបេតិកភណ្ឌជាតិខ្មែរ ដែលមាននៅក្នុងលំនៅដ្ឋាននីមួយៗរបស់អ្នក។

ជាមួយនឹងការបំពាក់គ្រឿងបរិក្ខារពេញលេញ នៅក្នុងបន្ទប់ទទួលភ្ញៀវ &ផ្ទះបាយ ដែលអ្នក នឹងទទួលបាននូវបទពិសោធន៍នៃការរស់នៅដ៏រីករាយ នាថ្ងៃឈប់សម្រាកជាមួយក្លឹបកំសាន្តផ្សេង និងទេសភាពដ៏ស្រស់ស្អាត នៅក្នុងទីក្រុងដូចជាពលរដ្ឋខ្មែរទូទៅ។ គម្រោងនេះ អាចឱ្យអ្នកទទួលបាននូវអារម្មណ៍ពិតប្រាកដនូវអ្វី ដែលប្រាសាទអង្គរ និងខេត្តសៀមរាប ផ្ដល់ជូនលោកអ្នកសម្រាប់ការសម្រាកវិស្សមកាលដ៏រីករាយ។

តាមរយៈការផ្ដល់ជូនពិសេសជាងគេ ដែលមានកម្មវិធីជួលត្រលប់មកវិញរយៈពេល10ឆ្នាំ ជាមួយនឹងអត្រាចំណេញសុទ្ធ6% សម្រាប់រយៈពេល5ឆ្នាំដំបូង និង7%សម្រាប់រយៈពេល5ឆ្នាំបន្ទាប់ និងតម្លៃទាបត្រឹមតែ145,000ដុល្លារអាមេរិក តែប៉ុណ្ណោះចំពោះការបើកលក់តំបូង។

គម្រោង Angkor Grace Resort ក៏ផ្ដល់ជូនផងដែរ នូវការស្នាក់នៅរយៈពេល14ថ្ងៃក្នុងមួយឆ្នាំ ជាមួយនឹងការប្រើប្រាស់ពេញលេញ នូវបរិក្ខាររបស់គម្រោង។ ចំណុចនេះផ្ដល់ជូននូវអត្ថប្រយោជន៍ពិសេស ចំពោះអ្នកធ្វើដំណើរ ដើម្បីការងារទៅកាន់ខេត្តសៀមជាច្រើនដងក្នុងមួយឆ្នាំ។

ជាងនេះទៅទៀត ប្រសិនបើអតិថិជនត្រូវការឥណទាន អតិថិជនអាចទទួលបាននូវកម្ចីឥណទានរហូតទៅដល់70%។ ក្នុងករណីដែលលោក អ្នកចង់បាននូវគ្រឿងបរិក្ខារពេញលេញប្រកប ដោយគុណភាពខ្ពស់តាមស្តង់ដារអន្តរជាតិ និងការរចនាផ្ទៃខាងក្នុងដ៏ស្រស់ស្អាត បន្ថែមទៅលើគ្រឿងសង្ហារឹមមួយចំនូន ដែលគម្រោងផ្តល់ជូន ដោយលោកអ្នកគ្រាន់តែចំណាយប្រាក់បន្ថែម ត្រឹមតែ10,000ដុល្លារអាមេរិកតែប៉ុណ្ណោះ។.

តាមរយៈការអភិវឌ្ឍគម្រោង ប្រកបដោយភាពល្បីល្បាញ និងឈ្នះពានរង្វាន់ស្នាដៃឆ្នើមដូចជា គម្រោងសាងសង់ខុនដូ240 Phnom Penh និងThe Peninsula Private Residences គម្រោងAngkor Grace Resort ធានាដល់ទំនុកចិត្ត និងផាសុខភាព សម្រាប់វិនិយោគិន និងអ្នកជួលអចលនទ្រព្យនាពេលខាងមុខ។ សម្រាប់អតិថិជនដែលចង់បានការរស់នៅបែបរីសត ក្នុងតម្លៃសមរម្យ ឬធ្វើវិនិយោគដែលមានផលចំណេញខ្ពស់ សូមស្វែងយល់បន្ថែមអំពីគម្រោង Angkor Grace Resort នៅថ្ងៃនេះ ដោយចូលមើលទំព័រ Facebook page ឬទាក់ទងតាមរយៈទូរសព្ទលេខ +855 (0)92 161 743/ +855 (0)15 693 445 ៕

ប្រធាន CVEA ប្រាប់ថា មុនសម្រេចចិត្តទិញលំនៅឋាន គួរពិចារណាលើចំណុច ៥យ៉ាង

ដោយៈ រ៉ាណេត

ភ្នំពេញៈ នៅក្នុងរយៈពេលប៉ុន្មានឆ្នាំចុងក្រោយនេះ តម្រូវការលំនៅឋានរបស់ពលរដ្ឋកម្ពុជាមានសន្ទុះយ៉ាងខ្លាំង ជាពិសេសគូរស្វាមី ដែលទើបរៀបអាពាហ៍ពិពាហ៍ហើយថ្មីថ្មោង ដែលគិតជាមធ្យមប្រមាណ៥ម៉ឺនខ្នងក្នុងមួយឆ្នាំ ដើម្បីបំពេញតាមតម្រូវការទីផ្សារ។

ជាមួយនឹងកំណើននៃតម្រូវការទាំងនេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានលើកឡើងថា នាពេលបច្ចុប្បន្ន មានក្រុមហ៊ុនជាច្រើនកំពុងមានភាពមមាញឹក ក្នុងការសាងសង់លំនៅឋាន ដូចជាបុរី បណ្ដុំផ្ទះល្វែង និងខុនដូរជាដើម ដើម្បីផ្តល់ជាជម្រើសសម្រាប់អ្នក ដែលប្រាថ្នាចង់បានលំនៅដ្ឋានជាកម្មសិទ្ធិ ប៉ុន្តែអ្វីដែលសំខាន់នៅត្រង់ថា មុនពេលសម្រេចចិត្តគួរពិចារណាទៅលើចំណុចទាំង៥ជាចម្បងជាមុនសិន។

លោកបានបញ្ជាក់ថា សម្រាប់អតិថិជនដែលជាអ្នកទិញ ដើម្បីជៀសវាងនូវហានីភ័យផ្សេងៗ ក្រោយពេលទិញក៏ត្រូវតែយល់ដឹងគន្លឹះខ្លះៗ មុននឹងសម្រេចចិត្តទិញដូចជា

លំនៅឋាននៅជិតផ្សារ និង សាលារៀន

លោក-អ្នកទិញលំនៅដ្ឋាន ត្រូវគិតដល់ទីតាំងនៅឋានដែលជិតផ្សារ និងសាលារៀនដើម្បីមានភាពងាយស្រួលក្នុង ធ្វើដំណើរទៅផ្សារទិញរបស់របផ្សេងៗ និងមានភាពងាយស្រួលជូនកូនទៅសាលារៀន កុំឲ្យមានហានិភ័យទៅថ្ងៃក្រោយ។

២ លំនៅឋាននៅជិតកន្លែងធ្វើការ

លោក-អ្នកទិញលំនៅដ្ឋានត្រូវគិតដល់ទីតាំងនៅឋាន ដែលនៅជិតកន្លែងធ្វើការរបស់អស់លោក អ្នក ដើម្បីមានភាពងាយស្រួល ក្នុងការធ្វើដំណើរដំណើរ និងចំណាយពេលតិច ព្រោះថាបច្ចុប្បន្នបញ្ហាកកស្ទះចរាចរណ៍បង្ករ ឪ្យអស់លោកអ្នកខាតពេល និងចំណាយច្រើនជាដើម។

៣ លំនៅឋាននៅជាប់នឹងផ្លូវធំ

លំនៅឋាននៅជាប់នឹងផ្លូវធំមានភាពងាយស្រួល ក្នុងបង្កើតមុខរបរអាជីវកម្មផ្សេងៗ ព្រោះមានមនុស្សចេញចូល និងធ្វើដំណើរឆ្លងកាត់ច្រើន។

៤ លំនៅឋានមានសុវត្ថិភាព

បញ្ហាសុវត្ថិភាព គឺជារឿងចម្បងរបស់មនុស្សចឹងទេ លោកអ្នកត្រូវពិនិត្យមើលឲ្យបានល្អិតល្អន់ ទៅលើការសាងសង់លំនៅឋានមានលក្ខណៈគ្រប់គ្រាន់ និងបច្ចេកទេសត្រឹមត្រូវតាមស្តង់ស្តារ រួមទាំងប្រព័ន្ធលូ ទឹកនិងភ្លើងដែរឬទេ? ម្យ៉ាងទៀតត្រូវមើលជុំហ្នឹងមានបញ្ហាចោរកម្ម និងបញ្ហាផ្សេងៗទៀតដែលបង្ករឪ្យមានហានិភ័យទៅថ្ងៃក្រោយ។

៥ បរិយាកាសគួរអោយចង់រស់នៅ និងមានតំលៃសមរម្យ

ចំណុចក្រោយនេះ ពិតជាមានសារៈសំខាន់ណាស់ សម្រាប់អស់លោកអ្នកមានបំណងក្នុងការទិញលំនៅឋាន ត្រូវគិតពីបរិយាកាស និងបរិស្ថានជុំវិញល្អគួរឲ្យចង់រស់នៅដែរទេ? សម្រាប់តម្លៃលំនៅឋានវិញ សាកសមជាមួយនឹងលទ្ធភាព នៃចំណូលរបស់យើងដែរឬទេ?៕

អ្នកជំនាញ៖ ការវិនិយោគលើទីផ្សារដីធ្លី នៅតែមានឱកាសចំណេញ

ដោយៈ រ៉ាណេត

ភ្នំពេញៈ នៅក្នុងវិស័យអចលនទ្រព្យ ត្រូវបានបែងចែកចេញជាផ្នែកផ្សេងៗជាច្រើន ដែលក្នុងនោះអ្នកវិនិយោគបានសំឡឹងឃើញ ពីឱកាសដែលអាចទទួលបានផលចំណេញផ្សេងៗគ្នា មិនថាផ្នែកសំណង់ ដីធ្លី ការអភិវឌ្ឍន៍លំនៅដ្ឋាន ក៏ដូចជាការសាងសង់អគារសម្រាប់ជួល។

បើនិយាយពីឱកាសចំណេញ ដែលអាចទទួលបានពីការវិនិយោគនៅក្នុងវិស័យអចលនទ្រព្យ ត្រូវបានអ្នកប្រតិបត្តិនៅក្នុងវិស័យនេះអះអាងផ្សេងៗពីគ្នា ដោយការលើកយកហេតុផលមកបញ្ជាក់ផងដែរ។

ដោយឡែកសម្រាប់លោក ម៉ាន់ ច័ន្ទឌីអគ្គនាយកក្រុមហ៊ុន PREMIUM Group ដែលត្រូវបានគេស្គាល់ថាជាអ្នកជំនួញ ដែលមានបទពិសោធន៍ជាច្រើនឆ្នាំ និងច្រើនផ្នែកនៅក្នុងវិស័យអចលនទ្រព្យបានអះអាងថា សម្រាប់ទស្សនៈរបស់លោក ផលចំណេញពីការវិនិយោគ នៅក្នុងវិស័យអចលនទ្រព្យដែលអាចទទួលបានចមណេញច្រើន គឺការទិញលក់ដី។

លោកបន្តថា “នៅក្នុងវិស័យអចលនទ្រព្យ ខ្ញុំបានវិនិយោគទៅក្នុងផ្នែកជាច្រើន ដូចជាការវិនិយោគទៅលើការអភិវឌ្ឍន៍ បណ្តុំលំនៅដ្ឋានកម្រិតសមរម្យ ការវិនិយោគទៅលើការនាំចូលគ្រឿងសំណង់ ការវិនិយោគទៅលើការផ្តល់កម្ចី សម្រាប់ទិញលំនៅដ្ឋាន ក៏ដូចជាការវិនិយោគទៅលើផ្នែកដីធ្លី ទាំងដីសម្រាប់ជួល និងដីសម្រាប់លក់ចេញយកចំណេញ” ។ លោកបានបញ្ជាក់ថា “តាមការកត់សម្គាល់ និងជាទស្សនទានរបស់ខ្ញុំ ឱកាសនៃការទទួលបានផលចំណេញច្រើនជាងគេ នៅក្នុងចំណោមមុខជំនួញខាងលើ គឺការវិនិយោគទៅលើដីធ្លី(ទិញ-លក់) ដែលក្នុងរយៈពេលដ៏ខ្លី យើងអាចទទួលបានប្រាក់ចំណេញច្រើនស្ទើរតែ ១X ២ ឬ ១X៣ ក៏មានដែរ អាស្រ័យទៅតាមទីតាំង និងតម្រូវការជាក់ស្ដែងរបស់ទីផ្សារ” ។

នៅពេលសំណួរសួរថា បើវិនិយោគទៅលើដីធ្លី អាចទទួលបានចំណេញច្រើនជាងគេ តើហេតុអ្វីលោកត្រូវធ្វើការវិនិយោគទៅលើផ្នែកដទៃទៀត?

លោក ម៉ាន់ ច័ន្ទឌី បញ្ជាក់ថា “ថ្វីត្បិតការវិនិយោគទៅលើដីធ្លី អាចទទួលបានប្រាក់ចំណេញច្រើន ប៉ុន្តែយើងក៏ត្រូវការផ្នែកដទៃទៀត មកធ្វើការរួមផ្សំផងដែរ។ លោកបន្តថា “ខ្ញុំទិញ-លក់ដី បើចំណេញច្រើនខ្ញុំនឹងលក់ចេញភ្លាមៗ បើចំណេញតិច ឬអាចវិនិយោគទៅផ្នែកដទៃទៀត ដែលអាចទទួលចំណេញច្រើនជាង ដូចជាការសង់ផ្ទះលក់ជាដើម ខ្ញុំក៏ត្រូវពិចារណា” ។

លោកបានបន្តពន្យល់ថា “បើត្រូវសាងសង់ផ្ទះលក់ លោកក៏មានក្រុមហ៊ុនសាងសង់ បើត្រូវការគ្រឿងសំណង់ លោកក៏មានក្រុមហ៊ុនផ្គត់ផ្គង់ ហើយបើត្រូវការស្ថាប័នហិរញ្ញវត្ថុសម្រាប់ជួយជ្រោមជ្រែង ដល់ការផ្តល់លក្ខខណ្ឌបង់រំលស់លោកក៏មាន ដូច្នេះ អ្វីៗទាំងអស់នេះ ជាបណ្តុំនៃមុខជំនួញពាក់ព័ន្ធរបស់ តែប៉ុណ្ណោះ។

លោកបន្ថែមថា “ប៉ុន្តែបើសួរថា មួយណាចំណេញជាង ខ្ញុំនៅតែអះអាងថាការទិញ-លក់ដីគឺមានឱកាសចំណេញច្រើន និងក្លាយជាអ្នកមានលឿនជាងគេ” ៕

សូចនាករឆ្នាំឆ្នាំ២០២១ រាជរដ្ឋាភិបាលបាននិងកំពុងជំរុញធ្វើពិពិធកម្មពាណិជ្ជកម្ម ដើម្បីជម្រុញកំនើនសេដ្ឋកិច្ច

ដោយៈ រ៉ាណេត

ភ្នំពេញៈ គម្រោងធំៗដែលជាយុទ្ធវិធីនៃការជំរុញ និងពង្រីកទំហំពាណិជ្ជកម្ម ដើម្បីទ្រទ្រង់កំណើនសេដ្ឋកិច្ចកម្ពុជា ត្រូវបានរាជរដ្ឋាភិបាលយកចិត្តទុកដាក់យ៉ាងខ្លាំង ក្នុងការអនុវត្ត ដើម្បីធ្វើយ៉ាងអាចសម្រេចបានទៅតាមផែនការដែលបានគ្រោងទុក។

ស្ថិតនៅក្នុងផែនការយុទ្ធសាស្ត្ររបស់រដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច គម្រោងអភិវឌ្ឍន៍ធំៗជាច្រើន បាននឹងកំពុងដំណើរការយ៉ាងរលូន ដែលក្នុងនោះរួមមានការអភិវឌ្ឍលើហេដ្ឋារចនាសម្ព័ន្ធនានា នៅទូទាំងប្រទេសដូចជាផ្លូវជាតិសំខាន់ៗ ការពង្រីកកំពង់ផែទឹកជ្រៅ គម្រោងសាងសង់អាកាសយានដ្ឋាន ការចុះកិច្ចព្រមព្រៀងពាណិជ្ជកម្មសេរី រួមជាមួយនឹងការធ្វើវិសោធនកម្មច្បាប់វិនិយោគថ្មី នៃព្រះរាជាណាចក្រកម្ពុជាជាដើម។

លោកបណ្ឌិតហុង វណ្ណៈ អ្នកវិភាគ និងស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានមានប្រសាសន៍នៅរសៀលថ្ងៃទី១១ ខែមករា ឆ្នាំ២០២១នេះថា គ្រប់គម្រោងទាំងអស់ដូច ដែលបានលើកឡើងខាងលើនេះ គឺជាយុទ្ធវិធីយ៉ាងសំខាន់របស់រាជរដ្ឋាភិបាលកម្ពុជាបង្កើតឡើង និងកំពុងអនុវត្តទៅតាមជំហានដែលគ្រោងទុក ក្នុងគោលបំណងកែប្រែ និងធ្វើពិពិធកម្មសេដ្ឋកិច្ចកម្ពុជាឱ្យមានភាពល្អប្រសើរ។

លោកបានបញ្ជាក់ថា “ដូចដែលយើងបានឃើញហើយថា នៅក្នុងយុទ្ធវិធីក៏ដូចជាវិធីសាស្ត្ររបស់រាជរដ្ឋាភិបាល គឺធ្វើយ៉ាងណាអាចបង្កភាពងាយស្រួល ដល់បណ្តាវិនិយោគិនទាំងអស់ ដែលមានបំណងចងសម្ព័ន្ធវិនិយោគ ពាណិជ្ជកម្មជាមួយកម្ពុជាតាម រយៈការយកចិត្តទុកដាក់ លើការសម្រួលដល់ច្បាប់វិនិយោគថ្មី ការកសាងហេដ្ឋារចនាសម្ព័ន្ធសម្រាប់ធ្វើដំណើរ និងដឹកជញ្ជូន ការចងសម្ព័ន្ធជាដៃគូយុទ្ធសាស្ត្រ ជាមួយបណ្តាប្រទេសនាននៅក្នុងតំបន់ ក៏ដូចជានៅលើសាកលលោក តាមរយៈកិច្ចព្រមព្រៀងពាណិជ្ជកម្មសេរី”។

លោកបន្តថា នៅក្នុងឆ្នាំ២០២១នេះ ក្រៅពីកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសមួយចំនួន ដូចជា មហាអំណាចសេដ្ឋកិច្ចចិន កូរ៉េ ជប៉ុន ឥណ្ឌ ក៏ដូចជាចក្រភពអង់គ្លេង ជាពិសេសកិច្ចព្រមព្រៀងពាណិជ្ជកម្មដៃគូសាកល(RCEP) ដែលជាទីផ្សារដ៏ធំជាសាកល រាជរដ្ឋាភិបាលបាន និងកំពុងយកចិត្តទុកដាក់លើការស្ថាបនាផ្លូវជាតិសំខាន់ៗជាច្រើន ដូចជា ផ្លូវជាតិលេខ៣ ផ្លូវជាតិលេខ៥ ផ្លូវជាតិលេខ១០ ផ្លូវជាតិលេខ៤៨ ផ្លូវជាតិលេខ៣៣ លេខ៤១ លេខ២ ក៏ដូចជាផ្លូវនៅទូទាំងក្រុងព្រះសីហនុ និងផ្លូវ៣៨ខ្សែនៅក្រុងសៀមជាដើម។

បន្ថែមពីនេះនៅមានផ្លូវល្បឿនលឿនភ្នំពេញ-ព្រះសីហនុ គម្រោងផ្លូវល្បឿនលឿនភ្នំពេញ-បាវិត រួមជាមួយនឹងផ្លូវដែកឆ្លងប្រទេសផងដែរ។

លោកបណ្ឌិតហុង វណ្ណៈ បានបញ្ជាក់ឱ្យដឹងទៀតថា ក្រៅពីគម្រោងខាងលើនេះ បច្ចុប្បន្នរាជរដ្ឋាភិបាល ក៏កំពុងអភិវឌ្ឍន៍ពង្រីកវិសាលភាពរបស់ខ្លួន តាមរយៈការអភិវឌ្ឍគម្រោងអាកាសយានដ្ឋានជាច្រើនទីតាំង រួមមាន អាកាសយានដ្ឋានភ្នំពេញអន្តរជាតិថ្មី អាកាសយានដ្ឋានអន្តរជាតិសៀមរាបអង្គរ អាកាសយានដ្ឋានកងកេង គម្រោងអាកាសយានដ្ឋានចំនួន២នៅខេត្តកោះកុង គម្រោងអាកាសយាដ្ឋាននៅខេត្តបាត់ដំបង រួមជាមួយនឹងគម្រោងអាកាសយានដ្ឋាន ក្នុងតំបន់ខេត្តមណ្ឌលគីរី ដែលកំពុងទទួលសិទ្ធិសិក្សាដោយក្រុមហ៊ុនចិននាពេលបច្ចុប្បន្ន។

ហេដ្ឋារចនាសម្ព៏ន្ឋទាំងអស់នេះ គឺជាផ្នែកមួយនៃគម្រោងផែនការរបស់រាជរដ្ឋាភិបាលក្នុងការធ្វើពិពិធកម្មសេដ្ឋកិច្ច ឱ្យកាន់តែមានភាពល្អប្រសើរជាងពេលបច្ចុប្បន្ន។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ថា សម្រាប់តែកិច្ចព្រមព្រៀងពាណិជ្ជកម្មសេរី កម្ពុជាទទួលបានអត្ថប្រយោជន៍ជាច្រើនតាមរយៈការធ្វើពិពិធកម្ម នៃការផលិតសម្រាប់នាំចេញ ថែមទាំងអាចអាចទាក់ទាញប ណ្តាក្រុមហ៊ុនអន្តរជាតិជាច្រើនមកកាន់កម្ពុជាផងដែរ។

លោកឧកញ៉ាបញ្ជាក់ថា “បច្ចុប្បន្នរាជរដ្ឋាភិបាល បាននិងកំពុងសិក្សាទៅលើសេចក្ដីព្រាងច្បាប់វិនិយោគថ្មីនៅកម្ពុជា ដើម្បីផ្តល់ភាពងាយស្រួល ក៏ដូចជាជំរុញលើកទឹកចិត្តដល់អ្នកវិនិយោគជាតិ និងអន្តរជាតិនានានៅលើសាកលលោក ឱ្យចូលមកកាន់កម្ពុជាបន្ថែម តាមរយៈការកាត់បន្ថយនូវនិតិវិធីកាត់បន្ថយពេលវេលា និងផ្តល់ឱកាសចំណេញច្រើន”។

លោកឧកញ៉ាលឹម ហេងបានបន្តថា អ្វីដែលកាន់តែជាឱកាសមាស ចំណេញលើចំណេញទៀតនោះគឺ ការទទួលបានកិច្ចព្រមព្រៀងពាណិជ្ជកម្មសេរី ជាមួយប្រទេសមហាអំណាចសេដ្ឋកិច្ចចិន ដែលមានទីផ្សាររហូតដល់ប្រមាន១៤០០លាននាក់ រួមជាមួយនឹងកិច្ចព្រមព្រៀងពាណិជ្ជកម្មសេរី ជាមួយបណ្តាប្រទេសផ្សេងៗនៅក្នុងអាស៊ាន ដែលមានប្រជាជនជាង ៦០០លាននាក់។

បន្ថែមពីនេះ ក៏មានការរៀបចំកិច្ចព្រមព្រៀងពាណិជ្ជកម្មសេរី ជាមួយប្រទេសមានសេដ្ឋកិច្ចរីកចម្រើនខ្លាំងដូចជា ប្រទេសកូរ៉េខាងត្បូង ជប៉ុន ហុងកុង និងឥណ្ឌា ជាដើម ដែលទាំងអស់នេះ សុទ្ធតែជាចំណុចខ្លាំងរបស់កម្ពុជា ក្នុងការទាក់ទាញវិនិយោគិនអន្តរជាតិទាំងអស់៕

តើវឌ្ឈនភាពនៃការសាងសង់ផ្លូវល្បឿនលឿនភ្នំពេញ ព្រះសីហនុសម្រេច បានបែបណាហើយ

ដោយៈលក្ខិណា

ភ្នំពេញៈ គម្រោងស្ថាបនាផ្លូវល្បឿនលឿនភ្នំពេញ ទៅក្រុងព្រះសីហនុ ដែលបានចាប់ផ្ដើមបើកការដ្ឋានសាងសង់ តាំងពីអំឡុងខែមីនាឆ្នាំ២០១៩ កន្លងទៅ គឺមានរយៈពេលជិត២ឆ្នាំហើយ តែលទ្ធផលដែលសម្រេចបានលើគម្រោងមួយនេះ គឺទើបតែបានជាង៣០ភាគរយប៉ុណ្ណោះ គិតត្រឹមដើមឆ្នាំ ២០២១នេះ។

លោកវ៉ាស៊ឹម សូរិយា អ្នកនាំពាក្យក្រសួងសាធារការ និងដឹកជញ្ជូនបានឱ្យដឹងតាមទូរស័ព្ទនារសៀលថ្ងៃទី១១ មករានេះថា កត្តាមួយចំនួនដែលធ្វើឱ្យគម្រោងផ្លូវនេះ ទើបតែសម្រេចបានជាង៣០ភាគរយ ក្នុងរយៈពេលជិត២ឆ្នាំមកនេះ ។

លោកបន្តពន្យល់ថា “ការសាងសង់ផ្លូវឬអ្វីមួយ ពិបាកបំផុតនិងយូរនោះ គឺបាតគ្រឹះរបស់វា ហើយនៅពេលបាតគ្រឹះត្រូវបានធ្វើរួចរាល់ វាប្រើពេលមិនយូរទេ ក្នុងការស្ថាបនា ។ ជាក់ស្ដែងគម្រោងផ្លូវល្បឿនលឿនភ្នំពេញ ក្រុងព្រះសីហនុ ក៏ត្រូវពង្រឹងគុណភាពបាតគ្រឹះផងដែរ ទើបក្នុងរយៈពេលជិត២ឆ្នាំមកនេះ សម្រេចបានជាង៣០ភាគរយ”។

លោកសូរិយាបានបន្តថា ក្នុងឆ្នាំ២០២០កន្លងទៅនេះ កម្ពុជានិងពិភពលោកក៏បានជួបវិបត្តិ ដោយសារតែជំងឺរាតត្បាតកូវីដ១៩ផងដែរ ហើយកម្មករមួយចំនួនក៏ត្រូវបានដាក់ធ្វើចត្តាឡីស័ក ដែលធ្វើឱ្យខ្វះកំលាំងក្នុងការស្ថាបនា តែយ៉ាងណាក៏មិនបានផ្អាកគម្រោងដែរ គឺនៅតែបន្តទៅមុខជាលំដាប់ ដើម្បីឱ្យបញ្ចប់នៅតាមការគ្រោងទុក របស់ក្រុមការងារ ។ នៅពេលគេធ្វើបាតគ្រឹះរួចរាល់ ជំហានបន្ទាប់គឺនឹងលឿនជាងធម្មតា។

គម្រោងផ្លូវល្បឿនលឿនពីភ្នំពេញ ក្រុងព្រះសីហនុ បានចំណាយទឹកប្រាក់ប្រមាណជិត២ពាន់លានដុល្លារអាមេរិក ដែលមានប្រវែងជាង១៩០គីឡូម៉ែត្រ។ នៅពេលគម្រោងនេះស្ថាបនារួចរាល់ សសៃឈាមសេដ្ឋកិច្ចនេះ នឹងជំរុញការដឹកជញ្ជូន ការធ្វើដំណើរបានឆាប់រហ័សរវាងភ្នំពេញ និងក្រុងព្រះសីហនុ។

បើតាមអ្នកជំនាញបច្ចេកទេសផ្លូវនេះបានឲ្យដឹងថា ពេលដាក់ដំណើរការ នឹងអនុញ្ញាតសម្រាប់តែយានយន្ត ដែលមានកំលាំងម៉ាស៊ីនលើសពី១២៥ សេសេឡើងទៅចរាចរណ៍លើវិថីនេះ ក្រៅពីនោះមិនអនុញ្ញាតឡើយ៕