ដោយៈ រ៉ាណេត

ភ្នំពេញៈ ជាមួយនឹងការមើលឃើញពីការងើបឡើងវិញ នូវតម្រូវការទីផ្សារអចលនទ្រព្យគ្រប់ប្រភេទនាដើមឆ្នាំ២០២១ សម្រាប់តែទីផ្សារជួលអគារទូទៅ ត្រូវបានអ្នកជំនាញនៅក្នុងវិស័យនេះលើកឡើងថា អាចនឹងចំណាយពេលដល់អំឡុងពាក់កណ្តាលឆ្នាំ ឬក្នុងឆមាសទី២នៃឆ្នាំនេះទើបអាចមានសកម្មភាពឡើងវិញ។

នាយិកាប្រចាំប្រទេសក្រុមហ៊ុន CBRE Cambodia លោកស្រីអាន សុធីតា បានមានប្រសាសន៍ ប្រាប់តាមទូរស័ព្ទនារសៀលថ្ងៃទី១១ មករានេះថា មិនចំពោះតែទីផ្សារជួលអគារការិយាល័យ ឬទីផ្សារជួលទីតាំងសម្រាប់លក់រាយនោះទេ រហូតមកដល់ពេលបច្ចុប្បន្ននេះ គឺនៅតែមានការធ្លាក់ចុះ ហើយការធ្លាក់ចុះអាចនឹងបន្តរហូត ដល់ពាក់កណ្តាលឆ្នាំ២០២១។

លោកស្រីបានបន្តថា“ទាំងទីផ្សារការិយាល័យ ទាំងទីផ្សារជួលទីតាំងលក់រា​យ​នៅតាមបណ្តាផ្សារទំនើប ឬផ្សារសហគមន៍ គឺនៅបន្តជួបបញ្ហាឱនភាពដូចគ្នា”។ លោកស្រីបញ្ជាក់ថា “សម្រាប់តែទីផ្សារជួលការិយាល័យគ្រប់កម្រិត គឺនៅស្ថិតក្នុងសញ្ញាអវិជ្ជមានទាំងកម្រិតA កម្រិតB និងកម្រិតC ព្រោះតម្រូវការអគារការិយាល័យភាគច្រើនជាក្រុមហ៊ុនមកពីក្រៅស្រុក ហើយគម្រោងដែលប៉ះពាល់ធ្ងន់ធ្ងរជាងគេ គឺគម្រោងដែលទើបបញ្ចប់ និងដាក់បញ្ចូលទៅក្នុងទីផ្សារនៅក្នុងអំឡុងឆ្នាំ២០២០”។

ជាមួយនឹងការលើកឡើងខាងលើនេះ លោកស្រីអាន សុធីតា បានបញ្ជាក់ថា ទម្រាំទីផ្សារជួលអគារ អាចវិលត្រឡប់ទៅរកភាពល្អប្រសើរវិញ យ៉ាងហោចណាស់ត្រូចំណាយពេលរហូតដល់ឆមាសទី២ ឬឈានចូលដល់ចុងឆ្នាំ២០២១ខាងមុខនេះ។

ដោយឡែក លោកវ៉ន ចាន់ថនអគ្គនាយកក្រុមហ៊ុនភ្នាក់ងារអចលនទ្រព្យ TOWN CITY បានមានប្រសាសន៍ថា ទីផ្សារនៃការជួលអគារមិមែន ប៉ះពាល់ធ្ងន់ធ្ងរទាំងអស់នោះទេ នៅក្នុងនោះក៏មានទីផ្សារជួលអគារខ្លះ នៅតែមានតម្រូវការទីផ្សារ បើទោះជាស្ថិតនៅក្នុងកំឡុងពេលប្រឈមវិបត្តិក្នុងឆ្នាំ២០២០ក៏ដោយ។

លោកបន្តថា “ខ្ញុំទទួលស្គាល់ថា ទីផ្សារជួលអគារពិតមានទទួលនូវផលប៉ះពាល់ ប៉ុន្តែមិនធ្ងន់ធ្ងរទាំងអស់នោះទេ ក្នុងនោះដូចជាសណ្ឋាគារ និងផ្ទះសំណាក់មួយចំនួនបានប្ដូរយុទ្ធសាស្ត្ររបស់ខ្លួន ពីការជួលក្នុងរយៈពេលខ្លី ទៅជាការជួលរយៈពេលវែង និងជួលជាកញ្ចប់តែម្ដង”។ លោកបន្តថា “ក្រៅពីនេះ ដូចជាទីផ្សារជួលអគារអាផាតម៉ិន ក៏នៅតែមានតម្រូវការ គ្រាន់តែម្ចាស់អគារអាចបាត់បង់ចំណូលបន្តិចបន្តួច តាមរយៈការបញ្ចុះតម្លៃជូនអតិថិជនរបស់ខ្លួន ដែលរងគ្រោះដោយសារវិបត្តិសាកលចាប់ពី២០-៣០ភាគរយ”។

លោកវ៉ន ចាន់ថនបានបញ្ជាក់ថា “ទីផ្សារជួលអគារដែលរងគ្រោះធ្ងន់ធ្ងរ គឺផ្នែកជួលទីតាំងលក់រាយ ដូចជាតំបន់ក្បែរមាត់ទន្លេរ ដែលជាបណ្តុំអាហារដ្ឋាន កន្លែងស្នាក់នៅរយៈពេលខ្លីដែលផ្តោតសំខាន់លើជនបរទេស។ តំបន់ទាំងនេះ ទោះជានៅដើមឆ្នាំ២០២១ កម្ពុជាមានភាពធូរស្រាលពីកត្តាប្រឈមក្ដី ប៉ុន្តែនៅមិនទាន់អាចដំណើរការល្អនៅឡើយនោះទេ ពោលគឺយ៉ាងហោចចាប់ពីពាក់កណ្តាលឆ្នាំ២០២១ ឬដើមឆ្នាំ២០២២ ខណៈដែលប្រសិទ្ធិភាព នៃការប្រើប្រាស់វ៉ាក់សាំងទទួលបានលទ្ធផលល្អ គ្រប់គ្រាន់ ហើយនៅតាមបណ្តាប្រទេសនានា នៅលើសាកលចាប់ផ្តើមបើក ឱ្យមានការធ្វើដំណើរឆ្លងកាត់យ៉ាងទូលាយវិញ”៕

ដោយៈរ៉ាណេត

ភ្នំពេញៈ បង្កើតឡើងដោយសហស្ថាបនិកចំនូន៦រូប ក្រុមហ៊ុនភ្នាក់ងារអចលនទ្រព្យP78 បាននិងកំពុងឆ្ពោះទៅមុខដោយសុទិដ្ឋិនិយម ជាមួយនឹងការសម្លឹងនិងចាប់យកចំណែកទីផ្សារខុនដូ ដែលចាប់ផ្តើមមានការពេញនិយម ពីសំណាក់ប្រជាពលរដ្ឋក្នុងស្រុក។

បង្កើតឡើងនៅក្នុងឆ្នាំ២០២០ ក្រុមហ៊ុននេះមានសមាជិកសហស្ថាបនិក សុទ្ឋតែជាអ្នកមានជំនាញ ចំណេះដឹងពាក់ព័ន្ធទៅនឹងទីផ្សារអចនទ្រព្យយ៉ាងទូលំទូលាយ ជាមួយ​មូលដ្ឋានក្រមសីលធម៌វិជ្ជាជីវៈ ។

លោកកៅ គយឈឿង សហស្ថាបនិក និងជាអគ្គនាយកក្រុមហ៊ុនភ្នាក់ងារអចលនទ្រព្យ P78 បានមានប្រសាសន៍ឲ្យដឹងកាលពីចុងសប្តាហ៍មុនថា ចាប់តាំងពីបើកដំណើរការរហូតមកដល់ពេលនេះ ក្រុមហ៊ុនភ្នាក់ងារអចលនទ្រព្យ P78 បានពង្រីកឥទ្ធិពល និងបង្កើនភ្នាក់ងារ បានជាង១០០នាក់នៅលើទីផ្សារមួយនេះ ហើយនៅតែបន្តបង្កើនចំនួនភ្នាក់ងារបន្ថែមទៀត ដើម្បីធ្វើយ៉ាងណាបំពេញតាមតម្រូវការរបស់អតិថិជន ក៏ដូចជាការចង់បានរបស់ម្ចាស់អភិវឌ្ឍន៍គម្រោងផងដែរ។

លោកបន្តថា ជាមួយគ្នានេះ ក្រុមហ៊ុនមានគោលដៅបង្កើនចំនួនភ្នាក់ងារឱ្យបានច្រើននៅទូទាំងប្រទេស និងផ្តល់ជូនការបណ្តុះបណ្តាលជំនាញបន្ថែមដល់ពួកគាត់ រួមជាមួយនឹងការផ្តល់នូវបទពិសោធន៍ ជាក់ស្ដែងនៅក្នុងវិស័យមួយនេះ ដើម្បីធ្វើយ៉ាងណាអាចជំរុញឱ្យភ្នាក់ងាររបស់យើងទាំងអស់ ប្រកបដោយគុណភាព មានសមត្ថភាពគ្រប់គ្រាន់នៅក្នុងការបម្រើសេវាកម្ម ដល់អតិថិជនប្រកបដោយទំនុកចិត្តខ្ពស់បំផុត។

លោកបន្តថា “គោលដៅ និងចក្ខុវិស័យរបស់ក្រុមហ៊ុន គឺផ្តោតសំខាន់ទៅលើការលក់គម្រោងខុនដូធំៗ ដោយសារតែយើងបានសម្លឹងឃើញយ៉ាងច្បាស់ ពីទីផ្សារខុនដូនៅកម្ពុជានាពេលបច្ចុប្បន្នមានស្ថានភាពល្អប្រសើរ ជាពិសេសទាក់ទងទៅនឹងកត្តាតម្លៃដែលត្រូវបានដាក់លក់នៅលើទីផ្សារ គឺមានភាពសមរម្យដែលស្របទៅនឹងលទ្ធភាពជាក់ស្ដែងរបស់ប្រជាពលរដ្ឋខ្មែរ ដែលកំពុងផ្តោតអារម្មណ៍យ៉ាងសំខាន់ នៅលើទីផ្សារមួយនេះ”។

លោកបានបន្តដោយលើកជាលក្ខខ័ណ្ឌប្រែប្រួលនៃសេដ្ឋកិច្ច សង្គមជាក់ស្តែងមកបញ្ជាក់ថា “ប្រសិនបើពួកគាត់ទិញផ្ទះ ស្ថិតនៅតំបន់ជាយក្រុង នឹងត្រូវចំណាយពេលវេលា ចំណាយធនធានជាច្រើន ក្នុងការធ្វើដំណើរចូលទីក្រុង ដែលជាទីកន្លែងគោលដៅនៃការប្រកបអាជីវកម្ម និងកន្លែងបម្រើការងាររបស់ពួកគាត់”។លោកបន្ថែមថា“មានពេលខ្លះអាចប៉ះពាល់ទៅដល់សតិអារម្មណ៍ នៅពេលមានការកកស្ទះចរាចរណ៍។ ដូច្នេះក្នុងនាមយើងខ្ញុំជាអ្នកជំនាញនៅក្នុងវិស័យនេះ សូមលើកទឹកចិត្តឱ្យពួកគាត់ជ្រើសរើសយកការរស់នៅក្នុងខុនដូ ដែលក្រៅពីជាការផ្លាស់ប្ដូររបៀបរបប នៃការរស់នៅតាមបែបសម័យថ្មី ថែមទាំងជួយសម្រាលភាពលំបាកប្រចាំថ្ងៃរបស់ពួកគាត់ផងដែរ”។

ទីផ្សារខុនដូនៅពេលនេះ បានផ្តល់ជម្រើសជាច្រើនដល់អតិថិជន ខណៈដែលមានគម្រោងអភិវឌ្ឍន៍ជាច្រើន កំពុងបង្ហាញខ្លួននៅក្នុងទីផ្សាររួម​ ជាពិសេសនៅក្នុងដំណាក់កាលនេះ ម្ចាស់គម្រោងសុទ្ធតែបានផ្តល់នូវលក្ខខណ្ឌងាយស្រួល ដល់អតិថនរបស់ខ្លួនទាំងបញ្ហានៃតម្លៃ រយៈពេលនៃការបង់រំលោះ ក៏ដូចជាការបន្ថែមជូននូវសម្ភារៈប្រើប្រាស់មួយចំនួនផងដែរ ដែលស្ថិតនៅក្នុងយុទ្ធសាស្ត្រទីផ្សារជំរុញការលក់ ដែលទាំងអស់នេះសុទ្ធតែជាការផ្តល់ឱកាសចំណេញដល់អតិថិជន។

ជាមួយគ្នានេះលោក ឈុត ឆន សហស្ថាបនិកក្រុមហ៊ុនភ្នាក់ងារអចលនទ្រព្យ P78 (Property 78)បានមានប្រសាសន៍ឲ្យដឹងផងដែរថា វិស័យខុនដូនឹងនៅតែបន្តរីកចម្រើនទៀត ដោយសារតែគម្រោងអភិវឌ្ឍន៍ របស់អ្នកវិនិយោគពីក្រៅស្រុកបន្តចូលមក ហើយតម្រូវការរបស់ប្រជាជនក្នុងក្រុងក៏ចេះតែកើនឡើង។ បច្ចុប្បន្នសម្រាប់រាជធានីភ្នំពេញកាន់តែរីកចម្រើនជាលំដាប់ ដែលជំរុញតម្លៃអចលនវត្ថុកាន់តែឡើងថ្លៃ។

លោកបន្តថា ប្រសិនបើអតិថិជនគាត់មានលុយត្រឹម១០ម៉ឺនដុល្លារ គាត់អាចទិញបានផ្ទះល្វែងជាន់ផ្ទាល់ដីស្ថិតនៅជាយក្រុង ដែលស្ថិតនៅឆ្ងាយពីកន្លែងធ្វើការរបស់គាត់ ប៉ុន្តែបើគាត់យកលុយ១០ម៉ឺនដុល្លារទិញខុនដូ គាត់អាចរស់នៅបានក្នុងកណ្តាលក្រុង ដែលនៅជិតកន្លែងធ្វើការផង នៅជិតសាលារបស់កូនរៀនផង ហើយក៏នៅជិតមណ្ឌលពាណិជ្ជកម្មចំរុះ ដែលផ្តល់ភាពងាយស្រួលដល់ការរស់នៅប្រចាំថ្ងៃ ដូច្នេះការទិញខុនដូសម្រាប់ស្នាក់របស់ពួកគាត់គឺជាជម្រើសដ៏ល្អបំផុត។

រីឯលោកស្រី ម៉ៅ ច័ន្ទចរិយា សហស្ថាបនិកP78 បានមានប្រសាសន៍ថា នៅថ្ងៃខាងមុខនេះនិន្នាការទីផ្សារដីឡូតិ៍ នឹងជំនួសដោយទីផ្សារខុនដូវិញម្ដង ក្រោមហេតុផលថា ដីឡូត៍ភាគច្រើនច្រើន គឺស្ថិតនៅឆ្ងាយពីក្រុង ដោយឡែកខុនដូស្ថិតនៅក្នុងក្រុង ហើយអ្វីដែលសំខាន់គឺពេលនេះមនុស្សជាច្រើន ជាពិសេសយុវជនជំនាន់ថ្មី គឺពេញនិយមទៅនឹងការរស់នៅបែបទាន់សម័យ និងស៊ីវិល័យ ខណៈដែលខុនដូមានអ្វីៗគ្រប់យ៉ាងស្របទៅនឹងការចង់បានរបស់ពួកគាត់។

លោកស្រីបន្តថា “សម្រាប់ទីផ្សាររួមនៃអចលនទ្រព្យកម្ពុជា ជាពិសេសក្នុងរាជធានីភ្នំពេញ នៅក្នុងរយៈពេលត្រឹម៣ឆ្នាំខាងមុខទៀត ខុនដូ នឹងក្លាយជាផ្នែកមួយឈានមុខគេលើតម្រូវការស្នាក់នៅ ដោយសារតែទីផ្សារលំនៅដ្ឋានក្នុងបុរី ដែលស្ថិតនៅក្រុង ក៏ដូចជាទីផ្សារលំនៅដ្ឋានជាន់ផ្ទាល់ដី នៅតាមតំបន់ជាយក្រុងនឹងបន្តឡើងថ្លៃខ្ពស់ ដូច្នេះទីផ្សារខុនដូនឹងមានប្រជាប្រិយភាពខ្ពស់ជាក់ជាមិនខាន”៕

ដោយ៖ ម៉ាណេត

ភ្នំពេញ៖ អ្នកជំនាញអន្តរជាតិបានអះអាងថា ទីផ្សារក្នុងស្រុកបានក្លាយជាកម្លាំងស្នូល ក្នុងការជំរុញវិស័យអចលនទ្រព្យនៅកម្ពុជា អំឡុងពេលដែលម្ពុជាប្រឈមវិបត្តិកូវីដ១៩។

លោក James Hodge នាយកក្រុមហ៊ុន CBRE Cambodia បានមានប្រសាសន៍កាលថ្មីៗនេះថា ទីផ្សារអចលនទ្រព្យ បានជួបការលំបាកក្នុងឆ្នាំ២០២០ ប៉ុន្តែទីផ្សារស្រុកបានដើរតួនាទីយ៉ាងសំខាន់ ក្នុងការជំរុញសកម្មភាពទិញ-លក់អចលនទ្រព្យនៅកម្ពុជា។

លោកបានថ្លែងថា “តម្រូវការអចលនទ្រព្យគ្រប់ប្រភេទត្រូវបានធ្លាក់ចុះ ហើយមានវិស័យជាច្រើនទៀតបានរងផលប៉ះពាល់ ដោយសារវិបត្តិកូវីដ១៩ ក៏ពិតមែន តែទីផ្សារក្នុងស្រុកបានក្លាយជាកម្លាំងស្នូលនៃវិស័យលំនៅដ្ឋាន ពិសេសដោយសារតែផ្សារបូរី បានចាក់គ្រឹះយ៉ាងរឹងមុំា ក្នុងរយៈពេលប៉ុន្មានទសវត្សចុងក្រោយនេះ”។

ទោះយ៉ាងណា គ្រប់វិស័យទាំងអស់ បានទទួលយកគំនិតថ្មីៗ និងសម្របខ្លួនទៅនឹង “ការរស់នៅតាមគន្លងថ្មី” ជាពិសេសយើងបានឃើញថា កញ្ចប់លើកទឹកចិត្តថ្មីៗជាច្រើន ត្រូវបានបង្កើតឡើង ដូចការទទួលយកដំណោះស្រាយបច្ចេកវិទ្យាកាន់តែស៊ីជម្រៅ ការប្រើប្រាស់ទីភ្នាក់ងារជំនាញវិជ្ជាជីវៈកាន់តែទូលំទូលាយ គំនិតទីផ្សារច្នៃប្រឌិត ការបង្កើនភាពបត់បែននៅក្នុងលក្ខខណ្ឌនៃការទូទាត់ ការផ្តល់ជូននូវដំណោះស្រាយហិរញ្ញប្បទាន និងការបញ្ចុះតម្លៃកាន់តែច្រើន ក្នុងកំឡុងពេលចរចាជាដើម។

លោក James Hodge បានថ្លែងថា “ក្នុងរយៈពេលប៉ុន្មានខែចុងក្រោយនេះ មានសញ្ញាកើនឡើង សម្រាប់វិស័យមួយចំនួន ជាពិសេសនៅក្នុងវិស័យអចលនទ្រព្យបែបពាណិជ្ជកម្ម និងការវិនិយោគ យើងសង្កេតឃើញមានការកើនឡើងនូវសកម្មភាពពីអ្នកជួល និងអ្នកវិនិយោគ បើទោះអ្នកមកពីបរទេស ដែលមានគម្រោងធ្វើដំណើរមកប្រទេសកម្ពុជា បានពន្យាពេលធ្វើដំណើររបស់គេក្នុងរយៈពេល១២ខែ ចុងក្រោយនេះ”។

វិស័យ ដែលពឹងផ្អែកយ៉ាងខ្លាំងលើជនបរទេស ឬភ្ញៀវទេសចរ នៅតែរងផលប៉ះពាល់ខ្លាំងបំផុត ហើយបញ្ហានេះហាក់ដូចជាមិនមានភាពធូរស្បើយទេ រហូតដល់ការធ្វើដំណើរត្រឡប់មកភាពប្រក្រតីឡើងវិញ។

លោកបានបន្តថា “រហូតដល់ពេលនេះ យើងមិនអាចកំណត់បានថា តើពេលណាវិស័យអចលនទ្រព្យទាំងមូល នឹងវិលត្រឡប់ទៅភាពដើម ដូចមុនវិបត្តិកូវីដ១៩នោះទេ ដោយយើងគ្រាន់តែអាច មើលឃើញថា ផ្នែកមួយចំនួននៅក្នុងវិស័យនេះ នឹងកើនឡើងលឿនគេ”៕

ដោយៈ រ៉ាណេត

ភ្នំពេញៈ គ្រាន់តែចាប់ផ្តើមចូលដល់ដើមឆ្នាំ២០២១ភ្លាម បណ្តាអ្នកជំនួញ ក៏ដូចជាអ្នកអភិវឌ្ឍន៍ នៅក្នុងវិស័យអចលនទ្រព្យកម្ពុជាភាគច្រើន សុទ្ធតែបានបង្ហាញពីភាពសុទិ​ដ្ឋិនិយម ជាមួយនឹងការជឿជាក់ថាទីផ្សារអចលនទ្រព្យ នឹងអាចងាកទៅរកស្ថានភាពល្អប្រសើរវិញជាបណ្ដើរៗ ខណៈដែលភាពប្រឈមនឹងវិបត្តិសាកល ត្រូវបានធូរស្រាលបន្តិចម្ដងៗ។

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោក ឃាង ពុទ្ធី បានមានប្រសាសន៍នៅព្រឹកថ្ងៃទី១១ ខែមករា ឆ្នាំ២០២១នេះថា ជាទូទៅទីផ្សារអចលនទ្រព្យអាចមានស្ថានភាពល្អប្រសើរ និងមានភាពរីកចម្រើនបានគឺអាស្រ័យទៅលើកត្តាសំខាន់ៗចំនួន៥ដែលកើតឡើងព្រមគ្នា។

លោកបានបញ្ជាក់ថា “ជាទូទៅវិស័យអចលនទ្រព្យអាចមានការរីកចម្រើន និងអភិ​វឌ្ឍបានគឺត្រូវពឹងផ្អែកលើកត្តាចំនួន៥ព្រមគ្នា ដែលក្នុងនោះរួមមានដូចជា ផ្នែកហិរញ្ញវត្ថុ ហេដ្ឋារចនាសម្ព័ន្ធ សង្វាក់ផលិតកម្ម ដង់ស៊ីតេប្រជាជន រួមជាមួយនឹងកត្តាសន្ដិសុខសង្គម និងស្ថិរភាពនយោបាយ”។

លោកបន្តថា ដោយឡែកសម្រាប់តែប្រទេសកម្ពុជា កត្តាដែលចម្បងនៅក្នុងការជំរុញឱ្យវិស័យអចលនទ្រព្យមានភាពរីកចម្រើនខ្លាំង និងការអភិវឌ្ឍគឺមានចំនួន២ រួមមានទី១ កត្តាសន្ដិភាព សន្ដិសុខសង្គម និងស្ថិរភាពនយោបាយ ទី២ ហេដ្ឋារចនាសម្ព័ន្ធ។

លោកឃាង ពុទ្ឋីបានបន្តថា “បើគ្មានសន្តិភាពទេ គឺគ្មានការវិនិយោគ គ្មានការអភិវឌ្ឍន៍ដែលជាឆ្អឹងខ្នងនៃសេដ្ឋកិច្ចនោះទេ ហើយនៅពេលដែលគ្មានការអភិវឌ្ឍតម្លៃដីក៏មិនអាចឡើងបានដូចពេលបច្ចុប្បន្ននោះដែរ”។

កត្តាទី២ ដែលមានលក្ខណៈខុសពីបណ្តាប្រទេសមួយចំនួន នៅលើសាកលលោកនោះគឺកត្តាហេដ្ឋារចនាសម្ព័ន្ធ។ បច្ចុប្បន្ន រាជរដ្ឋាភិបាលខិតខំសាងសង់យ៉ាងសកម្ម ដែលក្នុងនោះរួមមានដូចជាផ្លូវគោក ផ្លូវដែក ផ្លូវអាកាស រួមជាមួយនឹងការសម្រួលដល់ការដឹកជញ្ជូនតាមរយៈផ្លូវទឹក ការតភ្ជាប់បណ្តាញអគ្គិសនី រួមជាមួយនឹងបណ្តាញទឹកស្អាតផងដែរ ហើយនៅពេលដែលបណ្តាញហេដ្ឋារចនាសម្ព័ន្ធ មានភាពល្អប្រសើរ វានឹងជំរុញឱ្យការអភិវឌ្ឍន៍ផ្សេងទៀតកើតមានជាបន្តបន្ទាប់។

លោកឃាង ពុទ្ធី បានបន្តទៀតថា “នៅក្នុងឆ្នាំ២០២១នេះ សម្រាប់ទីផ្សារអចលនទ្រព្យនៅកម្ពុជា យើអាចនិយាយបានថា វាកំពុងតែងាកទៅរកស្ថានភាពល្អប្រសើរវិញជាបណ្តើរៗ ដោយផ្តើមចេញពីអ្នកអភិវឌ្ឍន៍ក្នុងស្រុក រួមជាមួយនឹងតម្រូវការជាក់ស្ដែងរបស់ប្រជាជនខ្មែរផងដែរទៅលើផ្នែកលំនៅដ្ឋាន ប៉ុន្តែសម្រាប់វត្តមាននៃវិនិយោគិនអន្តរជាតិហា​ក់នៅមិនទាន់មានសន្ទុះខ្លាំងឡើងវិញនោះទេ ដែលវាតម្រូវការពេលវេលាយូរទៀត”៕

បរិមាណនៃការលក់គឺជាភស្តុតាងបញ្ជាក់យ៉ាងច្បាស់ពីភាពជោគជ័យ និងភាពល្បីល្បាញអំពីគម្រោងអចលនទ្រព្យ។ ក្នុងឆ្នាំ​២០២០ មានគម្រោងជាច្រើនត្រូវបានជៈឥទ្ធិពលអវិជ្ជមានយ៉ាងខ្លាំងពីកូវីដ១៩ ប៉ុន្តែគម្រោង Le Condé BKK1 ដែលជាគម្រោងលំនៅឋានបែបប្រណិតមួយក្នុងទីក្រុងភ្នំពេញបានធ្វើរឿងដ៏អស្ចារ្យមួយ ជាមួយនឹងការបំបែកកំណត់ត្រាលក់ដល់ទៅ ២២,៤៥០,០០០ដុល្លា ក្នុងរយៈពេល៥ខែ។

លទ្ធិផលនេះប្រហែលជាគួរឲ្យភ្ញាក់ផ្អើលសម្រាប់មនុស្សទូទៅ ប៉ុន្តែតាមយោបល់របស់អ្នកជំនាញអចលនទ្រព្យ ជាក់ស្តែងវាស្ថិតក្នុងការរំពឹងទុករបស់យើង។ ស្ថិតនៅទីតាំងដ៏ល្អបំផុត បូករួមជាមួយបរិក្ខាដ៏ទំនើបជាច្រើន ជាមួយនឹងការរចនាដ៏ស្រស់ស្អាតផ្នែកខាងក្នុង គម្រោង Le Condé BKK1 ពិតជាសាកសមសម្រាប់ភាពជោគជ័យនេះ។

Le Condé BKK1 ប្រហែលជាគម្រោងដែលបានអនុវត្តបានយ៉ាងល្អបំផុត ក្នុងការប្រើប្រាស់យុទ្ធសាស្ត្រអាជីវកម្ម សម្រាប់ប្រជាជនក្នុងតំបន់។ ៨៤% នៃអតិថិជនគឺជាប្រជាជនខ្មែរ។ លទ្ធផលនេះបង្ហាញយ៉ាងច្បាស់ថា ពីការមើលឃើញរបស់អ្នកអភិវឌ្ឍគម្រោង ទៅលើតម្រូវការរបស់អតិថិជនក្នុងស្រុក។ នៅពេលដែលទីផ្សារខុនដូភាគច្រើនមានលក្ខណៈដូចៗគ្នា Le Condé BKK1 បានសម្រេចចិត្តផ្តល់នូវអ្វីដែលខុសប្លែកអ្វីដែលធ្លាប់មានតាំងពីដើមមក។ ឧទាហរណ៍ជាក់ស្តែង សួនច្បារអាកាស ដែលមានតម្រូវការជាច្រើន ប្រាថ្នាចង់បានសួនច្បារផ្តល់ម្លប់ដែលមិនធ្លាប់មាន នេះហើយជំរុញឲ្យ Le Condé BKK1 បង្កើតឲ្យមានសួនច្បារអាកាសក្នុងអគារដែលមានទំហំធំទូលាយដល់ទៅ ១០០០ ម៉ែតការ៉េ ធំដំបូងគេនៅរាជធានីភ្នំពេញ។ នេះសបញ្ជាក់យ៉ាងច្បាស់ពីទស្សនៈនៃការអភិវឌ្ឍគម្រោងរបស់ Le Condé BKK1 ដើម្បីអភិវឌ្ឍសមស្របទៅនឹងតម្រូវការជាក់ស្តែងរបស់ប្រជាជន។

សម្រាប់ Le Condé BKK1 រង្វាន់ដ៏ល្អប្រសើរ ពីការតាំងចិត្តក្នុងការបង្កើតគម្រោងដ៌អស្ចារ្យចំកណ្តាលក្រុងភ្នំពេញនោះគឺ អតិថិជនជាច្រើនចូលទស្សនាការិយាល័យលក់ឥតឈប់ឈរ។ តាំងពីការបើកគម្រោងដំបូងមក អតិថិជនជាច្រើនបង្ហាញពីចំណាប់អារម្មណ៍ និងស្រលាញ់គម្រោងយើង។ មកដល់ពេលនេះ ការិយាល័យលក់ Le Condé BKK1 នៅតែជាកន្លែងសំខាន់មួយ​ សម្រាប់អ្នកដែលចង់ទិញផ្ទះប្រភេពទំនើប។

ដើមឆ្នាំនៃឆ្នាំថ្មីនេះ, Le Condé BKK1 បានដាក់ចេញនូវគោលការណ៍បញ្ចុះតម្លៃពិសេស ដើម្បីបង្ហាញពីការដឹងគុណទៅកាន់សហគមយើង និងអតិថិជនផងដែរ។ សម្រាប់អ្នកដែលកំពុងស្វែងរកលំនៅឋានបែបទំនើប ស៊ីវីល័យស្ថិតនៅកណ្តាលក្រុងរាជធានីភ្នំពេញ នេះប្រហែលជាឱកាសល្អបំផុតសម្រាប់អ្នកហើយ។