អចលនទ្រព្យនៅខេត្តកោះកុងកើនតម្លៃ ស្របពេលគម្រោងផ្លូវជាតិលេខ១០ កំពុងស្ថាបនាយ៉ាងសកម្ម

ដោយ ៖ ហ្សូលី

ភ្នំពេញ ៖ ខេត្តកោះកុងដែលជាខេត្តជាប់មាត់សមុទ្រមួយក្នុងចំណោម៤ ថ្មីៗនេះហាក់រីកមុខរីកមាត់ចំពោះគម្រោងវិនិយោគខ្នាតធំៗជាច្រើន ដែលជាហេតុបណ្តាលឱ្យតម្លៃអចលនទ្រព្យក្នុងខេត្តចាប់ផ្តើមកើនតម្លៃ ស្របពេលផ្លូវជាតិលេខ១០ស្ថិតក្នុងតំណាក់កាលសាងសង់។

មន្ត្រីជំនាញនៃមន្ទីររៀបចំដែនដីនគរូបនីយកម្ម និងសំណង់ ខេត្តកោះកុង លោក ហ៊ាង ប៊ុណ្ណា បានមានប្រសាសន៍កាលពីថ្ងៃទី២៦ ខែវិច្ឆិកា ឆ្នាំ២០២០ថា ការអភិវឌ្ឍលើវិស័យដីធ្លី បច្ចុប្បន្ន កំពុងពង្រីកវិសាលភាពខ្លាំងក្លាគួរឲ្យព្រួយបារម្ភ ខណៈម្ចាស់អាជីកម្មមួយចំនួននៅពុំទាន់រត់ការច្បាប់មកដល់ដៃមន្ទីរនៅឡើយ។

លោកបន្តថា និយាយឱ្យចំគម្រោងធ្វើឡើង និងទទួលស្គាល់ត្រឹមភូមិ ឃុំ-សង្កាត់ និងក្រុងតែប៉ុណ្ណោះ ប៉ុន្តែទោះជាយ៉ាងណា ការលក់-ទិញ នៅតែមានដំណើរការបានដោយរលូន ពុំមានបញ្ហាទំនាស់អ្វីធំដុំកើតឡើងនោះឡើយ។ អ្នកវិនិយោគមានក្តីរំពឹងថា តម្លៃដីនឹងមានការហក់ឡើងទ្វេដង នៅពេលរាជរដ្ឋាភិបាលសម្ពោធដាក់ឲ្យប្រើប្រាស់ផ្លូវជាតិលេខ១០ ពីខេត្តបាត់ដំបង មកខេត្តកោះកុង។

ចលនានៃការទិញលក់ដីធ្លីនៅក្នុងខេត្តជាប់ឆ្នេរសមុទ្រ នាទិសនិរតីនៃប្រទេសកម្ពុជានេះកំពុងមានភាពផុសផុលគួរឲ្យកត់សម្គាល់។ កត្តាដែលធ្វើឲ្យវិស័យអចលនទ្រព្យកាន់តែរីកដុះដាលខ្លាំងឡើងៗនាពេលនេះ អាស្រ័យដោយកំណើនប្រជាជន ហើយភាគច្រើនមានការងារធ្វើ និងមានមុខរបរ ជាពិសេសគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ ក៏ដូចជាគម្រោងវិនិយោគធំៗពីបណ្តាក្រុមហ៊ុនក្នុងស្រុក និងបរទេស មកកាន់ទឹកដីតំបន់ឆ្នេរមួយនេះកាន់តែច្រើន។

ការរីកចម្រើនយ៉ាងឆាប់រហ័សនេះហើយ បានធ្វើឲ្យខេត្តកោះកុង កំពុងមានកង្វះខាត ផ្ទះជួល សម្រាប់ឲ្យកម្មករ និយោជិតជួលស្នាក់នៅ ខណៈចំនួនអ្នកមានការងារធ្វើកាន់តែមានចំនួនច្រើនឡើង ហើយពួកគេទាំងនោះភាគច្រើនពុំមានលទ្ធភាពទិញផ្ទះ និងដីជាទ្រង់ទ្រាយធំបានឡើយ។ ចំណែកសេវាកម្មសម្រាប់ទទួលភ្ញៀវទេសចរនៅមានកម្រិត ហើយផ្ទះសំណាក់ និងសណ្ឋាគារនៅមិនទាន់អាចបម្រើតាមសេចក្តីត្រូវការបានគ្រប់គ្រាន់ដល់ភ្ញៀវទេសចរនៅឡើយនៅក្នុងរដូវសំបូរភ្ញៀវ។

ខេត្តដែលនៅជាប់តំបន់ឆ្នេរសមុទ្រចំនួន៤រួមមាន ខេត្តព្រះសីហនុ កំពត កោះកុង និងកែប ដែលត្រូវបានគេទទួលស្គាល់ថា តម្លៃដីធ្លីនៅទីនោះពិតជាមានតម្លៃថ្លៃ និងហក់ឡើងជាបន្តបន្ទាប់។ ចំណែកខេត្តកោះកុងវិញក៏រំពឹងថាតម្លៃដីធ្លីក៏នឹងហក់ឡើងខ្លាំងនាពេលខាងមុខនេះ៕

ប្រាសាក់ ថ្លែងអំណរគុណអតិថិជនខណៈមានសមតុល្យប្រាក់បញ្ញើសន្សំ ២ ប៊ីលានដុល្លារ

ដោយ ស្រីណាង

ភ្នំពេញ ៖ ប្រាសាក់ ដែលជាគ្រឹះស្ថានមីក្រូហិរញ្ញវត្ថុមានអាជ្ញាប័ណ្ណទទួលប្រាក់បញ្ញើពីសាធារណជនពីធនាគារជាតិនៃកម្ពុជា និងជាគ្រឹះស្ថានចុះបញ្ជីនៅផ្សារមូលបត្រកម្ពុជាផងដែរនោះ បានសម្រេច លទ្ធផលថ្មីមួយទៀត គឺសមតុល្យប្រាក់បញ្ញើសន្សំសរុបមានចំនួន 2 ប៊ីលានដុល្លារ និងមានគណនីអតិថិជនចំនួន 800,000 គណនី។

នេះគឺជាសមិទ្ធផលថ្មីបន្ថែមពីលើលទ្ធផលដ៏ល្អប្រសើររបស់ប្រាសាក់រួមមាន ទ្រព្យសកម្មសរុប 3.39 ប៊ីលានដុល្លារ សម្ពៀតឥណទានច្រើនជាង 2.96 ប៊ីលានដុល្លារ អតិថិជនឥណទាន 440,000 នាក់ និងមានបុគ្គលិកច្រើនជាង 9,000 កំពុងបម្រើការងារ នេះបើយោងតាមស្ថិតិគិតត្រឹមខែតុលា ឆ្នាំ 2020 ។

អាជ្ញាប័ណ្ណជាគ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជនខាងលើនេះ អនុញ្ញាតឱ្យ ប្រាសាក់ផ្តល់សេវាប្រាក់បញ្ញើសន្សំជូនអតិថិជន និងសាធារណជនចាប់តាំងពីឆ្នាំ 2011 ។ សមតុល្យប្រាក់បញ្ញើសន្សំបានកើនឡើងយ៉ាងខ្លាំងពីមួយឆ្នាំទៅមួយឆ្នាំ ដោយសារតែទំនុកចិត្តរបស់អតិថិជន និងការប្ដេជ្ញាចិត្តរបស់ប្រាសាក់ក្នុងការផ្ដល់ជូនសេវាបម្រើដ៏ល្អជូនអតិថិជន។

លោក សាយ សូនី អនុប្រធាននាយកប្រតិបត្តិរបស់ប្រាសាក់ បានមានប្រសាសន៍ថា «ប្រាក់បញ្ញើសន្សំដែលកៀរគរបានដោយគ្រឹះស្ថានមីក្រូហិរញ្ញវត្ថុទទួលប្រាក់បញ្ញើបានដើរតួនាទីយ៉ាងសំខាន់ មិនត្រឹមតែជាប្រភពទុនដល់គ្រឹះស្ថានក្នុងការផ្ដល់ជាប្រាក់កម្ចីដល់អតិថិជននៅតាមទីជនបទនិងទីប្រជុំជននោះទេ ថែមទាំងជាឧបករណ៍សម្រាប់ជំរុញទម្លាប់នៃការសន្សំ និងការប្រើប្រាស់សេវាធនាគារសម្រាប់ប្រជាពលរដ្ឋផងដែរ។ ប្រាក់បញ្ញើសន្សំ ក៏បានរួមចំណែកធ្វើឱ្យសេដ្ឋកិច្ចជាតិយើងមានភាពរឹងមាំ និងស្ថិរភាពផងដែរ» ។

លោក សូនី បន្តទៀតថា «លទ្ធផលដ៏អស្ចារ្យនេះកើតឡើងពីការគាំទ្រយ៉ាងខ្លាំងក្លារបស់អតិថិជនទាំងអស់ ការផ្ដល់ជូនផលចំណេញខ្ពស់ជូនអតិថិជន ការបម្រើសេវាដ៏ល្អប្រសើរ និងការផ្ដល់មធ្យោបាយដ៏ងាយស្រួលក្នុងការទទួលបានសេវាធនាគារផ្សេងៗតាមរយៈការប្រើប្រាស់ប្រព័ន្ធធនាគារស្នូលដ៏ទំនើប សេវាម៉ាស៊ីនដកប្រាក់ (អេធីអឹម) ម៉ាស៊ីនដាក់ប្រាក់ Mobile Banking ឬ Internet Banking ម៉ាស៊ីនឆូតកាត ទូទាត់តាម QR កូដ នៅតាមបណ្ដាហាងទំនិញនានា ទូទាត់វិក្កយបត្រទឹកភ្លើង និងសេវាផ្ទេរប្រាក់ឆ្លងធនាគារនិងគ្រឹះស្ថានហិរញ្ញវត្ថុក្នុងប្រទេសកម្ពុជា» ។

លោក សូនី បន្ថែមទៀតថា «តាងនាមឱ្យថ្នាក់គ្រប់គ្រងប្រាសាក់ យើងខ្ញុំសូមថ្លែងនូវអំណរគុណយ៉ាងស្មោះអស់ពីដួងចិត្តចំពោះអតិថិជន និងភាគីពាក់ព័ន្ធទាំងអស់ រួមមាន និយ័តករ ចំពោះឱវាទ និងអនុសាសន៍ ចាប់តាំងពីប្រាសាក់ចាប់កំណើតដំបូង រហូតដល់ក្លាយជាគ្រឹះស្ថានហិរញ្ញវត្ថុធំជាងគេ និងទទួលបានទំនុកចិត្តខ្ពស់ដូចសព្វថ្ងៃនេះ។ នេះគឺជាការលើកទឹកចិត្តបន្ថែមសម្រាប់យើងខ្ញុំក្នុងការបន្តការប្ដេជ្ញាចិត្តផ្ដល់ជូនសេវាបម្រើអតិថិជនដ៏ល្អឯក និងផ្តល់ជូននូវបទពិសោធន៍ក្នុងការប្រើសេវាធនាគារតាមគ្រឹះស្ថានស្របច្បាប់» ។

ដើម្បីបំពេញតាមតម្រូវការរបស់អតិថិជន ប្រាសាក់ ផ្ដល់ជូនសេវាប្រាក់បញ្ញើនិងសន្សំគ្រប់ប្រភេទ ច្រើនជម្រើសនិងរយៈពេល ដូចជា គណនីសន្សំ គណនីចម្រើនគ្មានកាលកំណត់ គណនីសន្សំតាមផែនការ គណនីចម្រើនតាមលំដាប់ គណនីបញ្ញើមានកាលកំណត់ គណនីកូនចម្រើន និងគណនីសម្រាប់គ្រឹះស្ថានហិរញ្ញវត្ថុ។ សូមចូលទៅកាន់ https://bit.ly/3laigo6 ឬ អញ្ជើញមកសាខាប្រាសាក់ណាមួយដែលនៅជិតលោកអ្នកបំផុតficesិងរយ្យបត្រណាមួយដែលនៅជិតលោកអ្នកបំផុត ដើម្បីបើកគណនី ដោយទទួលបានអត្ថប្រយោជន៍លើសពីអត្រាការប្រាក់ខ្ពស់៕

ធនាគារអភិវឌ្ឍន៍អាស៊ីផ្តល់កម្ចី៧០លានដុល្លារ ដើម្បីពង្រឹងសុវត្ថិភាពផលិតផលកសិកម្មនៅកម្ពុជា

ដោយ ៖ គង់ ម៉ាលីន

ភ្នំពេញ ៖ ធនាគារអភិវឌ្ឍន៍អាស៊ី (ADB) បានអនុម័តលើការផ្តល់ប្រាក់កម្ចីចំនួន៧០លានដុល្លារដល់កម្ពុជា ដើម្បីពង្រឹងសមត្ថភាព កសិពាណិជ្ជកម្មក្នុងខេត្តចំនួន៦នៃព្រះរាជាណាចក្រកម្ពុជា ដើម្បីកែច្នៃផលិតផលកសិកម្មសំខាន់ៗឱ្យមានសុវត្ថិភាព ដូចជា ដំឡូងមី ស្វាយចន្ទី ស្វាយ បន្លែ និងមាន់ស្រែ ។

គម្រោងពង្រឹងការប្រកួតប្រជែងខ្សែសង្វាក់តម្លៃ និងសមត្ថភាពក្នុងវិស័យកសិកម្ម មានគោលបំណងផ្តល់អត្ថប្រយោជន៍ដល់សហករណ៍កសិកម្មចំនួន២៣០ និង សហគ្រាសកសិកម្មចំនួន៥០ក្នុងខេត្តកំពង់ចាម កំពង់ធំ ឧត្តរមានជ័យ ព្រះវិហារ សៀមរាប និងខេត្តត្បូងឃ្មុំ។

សេដ្ឋវិទូជាន់ខ្ពស់ផ្នែកធនធានធម្មជាតិ និងកសិកម្ម លោក តាកេស៊ី យូអេដា ( Takeshi Ueda) បានមានប្រសាសន៍ថា “កសិកម្មអាចចូលរួមចំណែកដល់កំណើន និងការធ្វើពិពិធកម្មសេដ្ឋកិច្ចក្នុងប្រទេសកម្ពុជា ប្រសិនបើសហគ្រាសកសិកម្មធុនតូច និងមធ្យម អាចបង្កើនសមត្ថភាពរបស់ពួកគេក្នុងការកែច្នៃផលិតផលកសិកម្មដែលមានតម្លៃខ្ពស់ ហើយដាក់លក់លើទីផ្សារក្នុង និងក្រៅប្រទេស។

ការវិនិយោគឯកជនលើវិស័យកសិកម្ម រួមជាមួយការទទួលបានឥណទាន ព្រមទាំងផលិតផលកសិកម្មសម្រាប់កែច្នៃប្រកបដោយគុណភាពខ្ពស់នឹងជួយកសិពាណិជ្ជកម្មរបស់កម្ពុជាបញ្ចេញសក្តានុពលរបស់ខ្លួន បង្កើតការងារ និងលើកកម្ពស់ជីវភាពប្រជាពលរដ្ឋនៅទីជនបទ។
ពលរដ្ឋកម្ពុជាដែលរស់នៅតាមតំបន់ជនបទមានប្រមាណ៧៦% ដោយក្នុងនោះរួមចំណែកនៅក្នុងវិស័យកសិកម្មប្រមាណ ២០,៧% ស្មើនឹងប្រមាណ៣១,២%នៃផលិតផលក្នុងស្រុកសរុប(GDP)ក្នុងឆ្នាំ២០១៩។ ឧស្សាហកម្មនេះបានកើនឡើងជាមធ្យម១,៧% ជារៀងរាល់ឆ្នាំពីឆ្នាំ២០១០ ដល់ឆ្នាំ២០១៩ ។ ផលិតផលកសិកម្មកែច្នៃ បច្ចុប្បន្នមានចំនួនត្រឹមតែ៤.០% នៃ GDP ដោយសារតែកង្វះផលិតផលចម្រុះដែលផ្តល់តម្លៃបន្ថែម។

គម្រោងនេះក៏នឹងគាំទ្រដល់ការស្រាវជ្រាវ និងការអភិវឌ្ឍគ្រាប់ពូជ និងពូជបក្សីចញ្ចឹមដោយជួយសហករណ៍កសិកម្មទទួលបានគ្រាប់ពូជផ្តល់ទិន្នផលខ្ពស់ធន់នឹងគ្រោះរាំងស្ងួត ធន់នឹងជំងឺ ក៏ដូចជាការគាំទ្រសម្ភារៈដាំដុះផ្សេងទៀត។ លើសពីនេះទៀត គម្រោងនេះនឹងជួយកែលម្អផ្លូវជនបទប្រវែង១១០គីឡូម៉ែត្រ និងជួយភ្ជាប់កសិផលទៅទីផ្សារក្នុងតំបន់គោលដៅនៃគម្រោង ដែលនឹងសាកល្បងនូវយន្តការហិរញ្ញប្បទានបៃតង ដែលគាំទ្រដោយប្រាក់កម្ចីចំនួន៥លានដុល្លារពីមូលនិធិហេដ្ឋារចនាសម្ព័ន្ធអាស៊ាន (ASEAN Infrastructure Fund)។

ធនាគារអភិវឌ្ឍន៍អាស៊ីក៏នឹងគ្រប់គ្រងប្រាក់កម្ចី២៥លានដុល្លារពីទីភ្នាក់ងារអភិវឌ្ឍន៍របស់បារាំង (Agence Française de Développement) និងជំនួយ៣លានដុល្លារពីមូលនិធិជប៉ុនសម្រាប់ការកាត់បន្ថយភាពក្រីក្រ (Japan Fund for Poverty Reduction) រួមជាមួយនឹងការប្តេជ្ញាថានឹងសម្រេចបាននូវវិបុលភាព បរិយាប័ន្ន ភាពធន់ និងនិរន្តរភាពក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង៕

ផ្សារឃ្លាំងរំសេវថ្មីសែនសុខតម្លៃជាង ៣លានដុល្លារ បានចាប់ផ្តើមសម្ពោធបើកដំណើរការជាផ្លូវការនៅថ្ងៃនេះ

ដោយ ហ្សូលី

ភ្នំពេញ៖ ផ្សារឃ្លាំងរំសែវថ្មីសែនសុខ តម្លៃជាង ៣លានដុល្លារ ចំណាយរយៈពេលសាងសង់ប្រមាណ ៩ខែ បានចាប់ផ្តើមបើកសម្ពោធដំណើរការជាផ្លូវការនៅថ្ងៃទី ២៧ ខែវិច្ឆិកា ឆ្នាំ ២០២០នេះ ក្រោមអធិបតីភាពលោកជំទាវ ហ៊ុន សេងនី ឯកឧត្តមអភិបាលរងនៃគណៈអភិបាលរាជធានីភ្នំពេញ។

នៅក្នុងឱកាសពិធីសម្ពោធផ្សារឃ្លាំងរំសេវថ្មី សែនសុខនេះ អភិបាលរងរាជធានីភ្នំពេញ លោកជំទាវ កែវ សុខពិសី បានមានប្រសាសន៍ថា ការសម្ពោធបើកដំណើរការជាផ្លូវការផ្សារឃ្លាំងរំសេវថ្មីសែនសុខនេះ នឹងនាំមកនូវជោគជ័យថ្មីបន្ថែមទៀតសម្រាប់វិស័យឯកជនក្នុងរាជធានីភ្នំពេញ។ ការបង្កើតផ្សារឃ្លាំងរំសេវនេះគឺជាចលករជម្រុញកំណើនសេដ្ឋកិច្ចជាតិ និងការអភិវឌ្ឍរាជធានីភ្នំពេញឱ្យកាន់តែស៊ីវីល័យបន្ថែមទៀត។

លោកជំទាវបន្តថា បើទោះបីជាក្នុងឆ្នាំ ២០២០នេះ កម្ពុជាជួបប្រទះនូវវិបត្តិសកលកូវីដ១៩ក្តី តែក្រោមការដឹកនាំដ៏ឈ្លាសវៃរបស់ប្រមុខរដ្ឋាភិបាល ជាពិសេសសម្តេចតេជោ ហ៊ុន សែន នាយករដ្ឋមន្ត្រីកម្ពុជា កម្ពុជាអាចទប់ស្កាត់បាន ដែលធ្វើឱ្យប្រជាពលរដ្ឋមានភាពសប្បាយរីករាយនិងកក់ក្តៅក្រៃលែង។

អគ្គនាយកផ្សារឃ្លាំងរំសេវថ្មីសែនសុខ ឧកញ៉ា ផេត ពិសិដ្ឋ ថ្លែងថា នៅចុងឆ្នាំ ២០១៩ ក្នងនោះមានបុត្រសម្ព័ន្ធចំនួន ២ គឺ The Green Community Mall សាងសង់លើផ្ទៃដីជាង ៤ ហិកតា និងផ្សារឃ្លាំងរំសេវថ្មីចំនួន ២,៧ហិកតា សរុបផ្ទៃដីផ្សារទាំងពីរគឺ ៧ ហិកតា។

ឧកញ៉ាបានបញ្ជាក់ថា ហេតុផលដែលលោកសម្រេចបណ្តាក់ទុនសាងសង់ The green Community Mall និងផ្សារឃ្លាំងរំសេវថ្មីសែនសុខ ដោយសារកត្តាសុខសន្តិភាព សេដ្ឋកិច្ចរីកចម្រើន ក្រោមការដឹកនាំរបស់រាជរដ្ឋាភិបាលកម្ពុជា។

ផ្សារឃ្លាំងរំសែវថ្មីសែនសុខ មានទីតាំងនៅចំកណ្តាលតំបន់ពាណិជ្ជកម្មទំនើប ងាយស្រួលចតរថយន្ត និងម៉ូតូមានតូបលក់ផលិតផលរហូតដល់ ១០០០តូប អមជាមួយ Shophouse និងផ្សារបន្លែត្រីសាច់ធម្មជាតិ និងមានបន្ទប់ទឹកស្អាត មានអនាម័យ។ ផ្សានេះមានលក់ទំនិញជាច្រើនប្រភេទដូចជា ទូរស័ព្ទដៃ សំភារៈទូរស័ព្ទ គ្រឿងអេឡិចត្រូនិក សម្លៀកបំពាក់ ម្ហូបអាហារ គ្រឿងសម្អាង សាឡន និងថែសម្ផស្ស ព្រមទាំងហាងកាហ្វេប្រេនផ្សេងៗដែលមានគុណភាពខ្ពស់តម្លៃសមរម្យ។

បុរី ប៉េង ហួត បើកលក់វីឡាកូនកាត់ ម៉ូដថ្មី LV ទីតាំងថ្មីបន្ថែម បំពេញតម្រូវការអតិថិជន

បន្ទាប់ពីបានធ្វើការបើកលក់វីឡាកូនកាត់ ម៉ូដថ្មី LV ក្នុងគម្រោងហ្គ្រេនស្តាផ្លាទីនីម ដំណាក់កាលទី ២ អេកូ ខូឡិកសិន (បឹងស្នោ) ចាប់ពីថ្ងៃទី១៥ ដល់ថ្ងៃទី១៨ ខែតុលា ឆ្នាំ ២០២០ កន្លងទៅថ្មីៗនេះ ត្រឹមតែរយៈពេលបីថ្ងៃប៉ុណ្ណោះ វីឡាកូនកាត់ LV ម៉ូតថ្មី លក់អស់រហូតដល់ ១០០% ។ ប៉ុន្តែនៅតែមានសំណូមពរបន្ថែមពីអតិថិជន សម្រាប់វីឡាកូនកាត់ ប្រភេទនេះ បុរី ប៉េង ហួត សម្រេចបើកលក់ទីតាំងថ្មី ជាមួយការបញ្ចុះតម្លៃរហូតដល់ ១៥% ហើយចំនួនមានកំណត់ ដែលមានសុពលភាព ត្រឹមតែដំណាច’ខែវិច្ឆិកានេះតែប៉ុណ្ណោះ ។

កាន់តែពិសេសជាងនេះទៅទៀត អតិថិជនមានជម្រើសក្នុងការបង់ប្រាក់ជាច្រើនប្រភេទ ជាមួយបុរីផ្ទាល់ និងធនាគារដៃគូសហការ ដែលនឹងទទួលបានអត្រាការប្រាក់សមរម្យ ចាប់ពី 4.99% ឡើងទៅ ថែមទៀតផង។

វីឡាកូនកាត់ LV ម៉ូដថ្មី គឺជាប្រភេទផ្ទះវីឡាកូនកាត់ម៉ូដថ្មី មានរចនាបថបែបសហសម័យ ជាមួយនឹងមុខងារពិសេសៗរបស់បន្ទប់នីមួយៗដែលស័ក្ដិសមឥតខ្ចោះ សម្រាប់គ្រួសារសម័យថ្មី។ វីឡាកូនកាត់ LV នេះមានទំហំធំទូលាយប្រវែង 4.2m x 10m កម្ពស់៣ជាន់ មានបន្ទប់គេង៤ និងបន្ទប់ទឹក៥។

នៅជាន់ផ្ទាល់ដីទាំងមូលមើលទៅឃើញ បរិវេណធំទូលាយដែលមានរចនាម៉ូតអមជាមួយដណ្តើរដ៏ទាក់ទាញ ខុសពីប្រភេទវីឡាកូនកាត់ផ្សេងៗទៀត រួមមានបរិវេណទទួលភ្ញៀវយ៉ាងស៊ីវិល័យ បរិវេណចម្អិនអាហារ និងបរិវេណទទួលទានអាហារ អាចឱ្យខ្យល់អាកាសចេញចូលបានគ្រប់គ្រាន់តាំងពីខាងមុខរហូតដល់ខាងក្រោយ រួមនឹងកន្លែងចតឡាននៅខាងមុខផ្ទះធំទូលាយថែមទៀតផង។ ចំណែកនៅជាន់ទី១ មានបន្ទប់មេគ្រួសារ ១ ដ៏សាកសម សំរាប់គ្រួសារថ្មីថ្មោង និង បន្ទប់កូនស្រី ១ ។ ឯជាន់ទី២ មានបន្ទប់គេង២ធំទូលាយ និងបន្ទប់ទឹក២ ផ្តល់ផាសុកភាព និងភាពសុខដុមរមនាដល់ការរស់នៅរបស់លោកអ្នក។

រង់ចាំដល់ពេលណាទៀត ប្រញាប់រួសរាន់ឡើង មកមុនបានជម្រើសមុន ព្រោះចំនួនមានកំណត់។ សម្រាប់ព័ត៌មានបន្ថែម សូមទាក់ទងទូរស័ព្ទលេខ 098/ 016 / 017 596 789 ឬ រង់ចាំតាមដានគេហទំព័រ Facebook បុរី ប៉េង ហួត ឬ អាចអញ្ជើញមកសាកសួរព័ត៌មាន ពីគ្រប់ការិយាល័យលក់។

សូមបញ្ជាក់ផងដែរថា វីឡាកូនកាត់ ប្រភេទថ្មីនេះ ស្ថិតក្នុងគម្រោងដ៏ធំមួយ ដែលមានឈ្មោះថា ហ្គ្រេនស្តាផ្លាទីនីម ដំណាក់កាលទី2 “អេកូ ខលឡិកសិន” គឺជាគម្រោងអភិវឌ្ឍលំនៅឋានទំនើបចម្រុះ រួមមានឧទ្យានដ៏ធំអស្ចារ្យអមទៅដោយរុក្ខជាតិចម្រុះខៀវស្រងាត់ ទីធ្លាកម្សាន្ត ហ៊ុមព័ទ្ធដោយបឹងធម្មជាតិ ផ្លូវជិះកង់ ផ្លូវរត់ហាត់ប្រាណ និងកន្លែងក្មេងលេង ដែលពោរពេញទៅដោយបរិយាកាសបែបធម្មជាតិពិតៗ ដែលនឹងផ្តល់ជូននូវ បទពិសោធន៍ថ្មីប្លែក និង ភាពសម្បូរបែបនៃការរស់នៅបែបថ្មី។

សម្ដេចតេជោ ហ៊ុន សែន ៖ ការអភិវឌ្ឍសេដ្ឋកិច្ចឌីជីថល និងសង្គមឌីជីថល មានភាពចាំបាច់បំផុតសម្រាប់ជំរុញសេដ្ឋកិច្ច

ដោយ ៖ រ៉ាណេត

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា បច្ចេកវិទ្យាឌីជីថល បាន និងកំពុងដើរតួនាទីយ៉ាងសំខាន់ក្នុងការសម្របខ្លួនទៅក្នុងបរិការថ្មីនៃការរស់នៅ និងការអនុវត្តការងារដោយបានជួយសម្រួលដល់ការប្រាស្រ័យទាក់ទងគ្នាក្នុងតំបន់ និងសាកល ជាពិសេស ការតភ្ជាប់សកម្មភាពសេដ្ឋកិច្ចពាណិជ្ជកម្ម និងវិនិយោគ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍នៅក្នុងពិធីបើកពិព័រណ៍ចិន-អាស៊ាន លើកទី១៧ ក្រោមមូលបទ «រួមគ្នាកសាងខ្សែក្រវាត់ និងផ្លូវ និងពង្រឹងកិច្ចសហប្រតិបត្តិការសេដ្ឋកិច្ចឌីជីថល» ថា ស្ថិតនៅក្នុងកំឡុងពេលដែលកំពុងជួបវិបត្តិនៅពេលនេះ បានជំរុញឱ្យឃើញកាន់តែច្បាស់នៃភាពចាំបាត់លើការជំរូញ និងអភិវឌ្ឍន៍សេដ្ឋកិច្ច សង្គម ឌីជីថល។

សម្ដេចបានមានប្រសាសន៍បន្តទៀតថា “ប្រាកដណាស់ថា ការអភិវឌ្ឍ ការតភ្ជាប់ឌីជីថលតំបន់ និងការប្រែក្លាយសង្គមសេដ្ឋកិច្ច ឱ្យទៅជាសង្គមសេដ្ឋកិច្ចឌីជីថល និងក្លាយជាកម្លាំងចលករដ៏សំខាន់ក្នុងការស្តារសេដ្ឋកិច្ចឡើងវិញក្រោយវិបត្តិ Covid-19 និងការអភិវឌ្ឍប្រកបដោយចិរភាព និងភាពធន់នាពេលអនាគត”។

ប្រទេសចិន គឺជាប្រទេសមួយដែលដឹកមុខក្នុងការអភិវឌ្ឍវិនិយោគ និងប្រើប្រាស់បច្ចេកវិទ្យាឌីជីថលក្នុងសាកលលោក។ ក្នុងន័យនេះ ការជំរុញកិច្ចសហប្រតិបត្តិការនៅក្នុងវិស័យបច្ចេកវិទ្យាឌីជីថលក្រោមក្របខណ្ឌនៃគំនិតផ្តួចផ្ដើមខ្សែក្រវាត់ និងផ្លូវ នឹងក្លាយទៅជាប្រធានបទដ៏សំខានន់នាពេលអនាគត់។

រាជរដ្ឋាភិបាលកម្ពុជា បាន និងកំពុងលើកកម្ពស់ការធ្វើឌីជីថលលូបនីយកម្មទាំងក្នុងវិស័យផលិតកម្ម ឧស្សាហកម្ម សេវាកម្ម និងរដ្ឋាភិបាលឌីជីថល កម្ពុជានឹងដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គមឌីជីថលនាពេលឆាប់ៗខាងមុខនេះ។ ដោយឡែក រាជរដ្ឋាភិបាលបានដាក់ចេញនូវវិធានការកែទម្រង់មុតស្រួចជាបន្តបន្ទាប់ ដើម្បីកែលម្អបរិយាកាសធុរកិច្ច និងវិនិយោគ រួមមាន ៖

ទី១ការដាក់ឱ្យអនុវត្តនូវថ្នាល់ចុះបញ្ជីពាណិជ្ជកម្មតាមប្រព័ន្ធអេឡិចត្រូនិក ដោយចំណាយពេលតែ៨ថ្ងៃប៉ុណ្ណោះក្នុងការបើកក្រុមហ៊ុនអាជីវកម្ម។
ទី២បានចុះកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលនឹងចូលជាធរមានចាប់ពីថ្ងៃទី១ ខែមករា ឆ្នាំ២០២១។
ទី៣ ការរៀបចំផែនការមេដើម្បីអភិវឌ្ឍន៍ខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង។

ជាងនេះទៅទៀត កម្ពុជា នឹងដាកចេញនូវច្បាប់វិនិយោគថ្មី ដែលមានលក្ខណៈគ្រប់ជ្រុងជ្រោយ និងមានភាពទាក់ទាញតាមរយៈការលើកទឹកចិត្តជាកញ្ចប់ដល់ការវិនិយោគលើវិស័យឧស្សាហកម្ម អេឡិចត្រូនិក បង្គុំ កសិឧស្សាហកម្ម គ្រឿងបន្លាស់ បច្ចេកវិទ្យា និងហេដ្ឋារចនាសម្ព័ន្ធឌីជីថល។ល។ ៕

វាគ្មឹនសំខាន់ៗចំនួន៤រូបនឹងបង្ហាញពីបច្ចុប្បន្នភាពវិស័យអចលនទ្រព្យកម្ពុជានៅក្នុងសិក្ខាសាលាពិសេសមួយ

ដោយៈ រ៉ាណេត

ភ្នំពេញៈ បន្ទាប់ពីបានពន្យារពេលអស់រយៈពេល២សប្ដាហ៍កន្លងទៅ ក្រោមការអនុវត្តតាមការណែនាំរបស់រាជរដ្ឋាភិបាល ដែលមានសម្ដេចតេជោ ហ៊ុន សែន នាយករដ្ឋម ន្ត្រីនៃកម្ពុជា ជាប្រមុខដឹកនាំ ក្នុងការទប់ស្កាត់ និងលុបបំបាត់ព្រឹត្តិការណ៍៣វិច្ឆិកាកន្លងទៅនេះ នៅត្រឹមរសៀលថ្ងៃទី១២ ខែធ្នូ ឆ្នាំ២០២០ សមាគមអចលនទ្រព្យសកល (GRA) នឹងរៀបចំកម្មវិធីសិក្ខាសាលាសាជាថ្មីស្ដីពី បច្ចុប្បន្នភាពវិស័យអចលនទ្រព្យ ក្រោមការចូលរួមពីសំណាក់វាគ្មិនជំនាញចំនួន៤រូប។

សិក្ខាសាលានេះ ធ្វើឡើងក្នុងគោលបំណងបង្កើន ការយល់ដឹងពីស្ថានភាពជាក់ស្ដែងនៃវិស័យអចលនទ្រព្យកម្ពុជាពិតប្រាកដ ជាពិសេសផ្តោតទៅលើទីផ្សារលំនៅដ្ឋាន ទីផ្សារខុនដូ និងទីផ្សារដីឡូតិ៍ ក្រោមប្រធានបទ “បច្ចុប្បន្នភាពអចលនទ្រព្យនៅកម្ពុជា” នៅសាលសន្និសីទ Factory Phnom Penh (Urban Village) នៅថ្ងៃទី១២ ខែធ្នូ ឆ្នាំ២០២០ ដោយកំណត់វត្តមានអ្នកចូលរួមត្រឹម២០០នាក់តែប៉ុណ្ណោះ។

ប្រធានសមាគមអចលនទ្រព្យសកល លោ សំ សុខនឿន ដែលជាអ្នកផ្តួចផ្តើមបង្កើតសិក្ខាសាលានេះ បានមានប្រសាសន៍នៅព្រឹកថ្ងៃទី២៧ ខែវិច្ឆិកា ឆ្នាំ២០២០នេះថា តាមរយៈសិក្ខាសាលាដ៏មានសារសំខាន់នេះ នឹងធ្វើឱ្យអ្នកចូលរួមមានការយល់ដឹងកាន់តែច្បាស់ អំពីទីផ្សារអចលនទ្រព្យនៅកម្ពុជា ជៀសវាងការទទួលបានព័ត៌មានបំផុសពីភ្នាក់ងារមួយចំនួនដែលគ្មានការពិត។

លោកបន្តថា “យើងចង់ឱ្យអ្នកចូលរួម បានយល់ដឹងកាន់តែច្បាស់ពីទីផ្សារអចលនទ្រព្យ ដោយផ្តោតសំខាន់ទៅលើផ្នែកបុរីលំនៅដ្ឋាន ទីផ្សារខុនដូ ទីផ្សារដីឡូតិ៍ នាពេលបច្ចុប្បន្ន រួមជាមួយនឹងការផ្តល់ជូននូវគន្លឹះខ្លះៗ ដែលអាចជំរុញដល់ការអចលនទ្រព្យផងដែរ” ។

លោកបញ្ជាក់ថា ភ្នាក់ងារអចលនទ្រព្យខ្លះ ដើម្បីអាចទទួលប្រយោជន៍ពីការលក់ បានបំផុសព័ត៌មានមិនពិត ទៅដល់អតិថិជនគោលដៅរបស់ខ្លួន ហើយអ្នកខ្លះដែលចង់ចូលរួមនៅក្នុងទីផ្សារអចលនទ្រព្យ ដោយការទិញអចលនវត្ថុទុកលក់បន្តយកចំណេញ ចេះតែធ្វើឡើងតាមគេ ដោយគ្មានការយល់ដឹងច្បាស់វិស័យនេះ ដែលវាជាការប្រឈមខ្ពស់ទៅនឹងហានិភ័យ។ ដូច្នេះអ្វីៗដែលជាចំណេះដឹងទាំងអស់នេះ នឹងមានបង្ហាញនៅក្នុងសិក្ខាសាលាដែលនឹងធ្វើនៅត្រឹមថ្ងៃទី១២ ខែធ្នូ ឆ្នាំ២០២០ ខាងមុខនេះ។

អង្គសិក្ខាសាលាមួយនេះ រៀបចំឡើងក្រោមកិច្ចសហការ រវាងសមាគមអចលនទ្រព្យសកល ក្រុមហ៊ុនភ្នាក់ងារអចលនទ្រព្យ Kw Sam Sn Realty Co,.Ltd និងក្រុមហ៊ុនអភិវឌ្ឍន៍គម្រោងខុនដូរប្រណីតUrban Village ក្រោមការចូលរួមធ្វើបទបង្ហាញពីសំណាក់អ្នកជំនាញចំនួន ៤រូប រួមមានលោក សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន Kw Sam Sn Realty Co,.Ltd លោកយិន លាងគង់ អគ្គនាយកគេហទំព័រ Propertyrea.asia លោក ឡោ វិចិត្រ អនុប្រធានសមាគមអចលនទ្រព្យសកលរាជធានីភ្នំពេញ និងលោកវ៉េង វណ្ណនី ប្រធានក្រុមឯកទេសលក់ខុនដូ។

ដោយឡែកលក្ខខណ្ឌនៃការចូលរួម សម្រាប់សិក្ខាកាមចុះឈ្មោះចំនួន៥០នាក់ដំបូងឥតគិតថ្លៃ។ ៥០នាក់បន្ទាប់នឹងត្រូវចំណាយ១៥ដុល្លារក្នុងម្នាក់ ហើយ១០០នាក់បន្ទាប់ត្រូវចំណាយ២០ដុល្លារក្នុងម្នាក់ ហើយថវិកាដែលប្រមូលបានទាំងអស់ នឹងយកទៅបរិច្ចាកជូនកម្មវិធីមនុស្សធម៌។

ព័ត៌មានលម្អិតសូមទាក់ទងតាមរយៈទូរស័ព្ទលេខ ៖ ០៩៣ ៣១០ ៧៣៧ / ០៧៧ ៣៩១ ០០០ ៕

ទីក្រុង Quito នៃប្រទេសអេក្វាឌ័រនឹងមានអគារលំនៅឋានខ្ពស់ជាលើកដំបូង

ដោយ វុត្ថា

ពិភពលោកៈ ទីក្រុង Quito នៃ ប្រទេសអេក្វាឌ័រ នឹងសាងសង់អគារលំនៅឋានប្រើប្រាស់ចម្រុះជាលើកដំបូងរស់ខ្លួន ដែលរចនាប្លង់ដោយស្ថាបត្យករ លោក Carlos Zapata ដែលគ្រោងសាងសង់នៅទីតាំង ស្ថិតនៅផ្នែកខាងជើងនៃឧទ្យាន La Carolina។

លោក Carlos Zapata បានរចនាអគារនេះ បានក្លាយជាអគារខ្ពស់ជាងគេមួយក្នុងចំណោមទីក្រុងនានារបស់ប្រទេសអេក្វាឌ័រ ។ អគារនេះមាន២៤ជាន់ មានទាំងអាងហែលទឹករួម និងកន្លែងលំហែកាយក៏ដូចជាសួនដឆើតឆាយ។ អគារថ្មីត្រូវនេះ បានបង្កើតឡើង ដើម្បីបើកចំហជើងមេឃរបស់ទីក្រុង Quito និង គយគន់ទេសភាពពីលើភ្នំ Andes ។

អគារនេះ មានលក្ខណៈប្លែកខុសពីគេ ហើយមានអាផាតម៉ិនចំនួន៩៩យូនីត ដែលមានជញ្ជាំងបំពាក់កញ្ចក់ និងអាលុយមីញ៉ូមដើម្បីបង្កើនប្រសិទ្ធភាពពន្លឺ និងភាពឯកជននៅក្នុងអាផាតមិន។

លោក Carlos Zapata បានឱ្យដឹងថា “ ក្នុងនាមជាអគារលំនៅដ្ឋានដំបូងបង្អស់នៅប្រទេសអេក្វាឌ័រ នឹងត្រូវសាងសង់នក្នុងទីក្រុង Quito ក្បែរជ្រលងភ្នំព័ទ្ធជុំវិញ និងជាកន្លែងដែលមមាញឹកនៃការធ្វើដំណើរ ព្រមជាមួយនឹងតំបន់បៃតង” ។ លោកបន្តថា “អគារនេះនឹងក្លាយជាតំណាងរបស់ទីក្រុង និងក្រសោបយកតំបន់ជុំវិញ និងសហគមន៍ប្រកបដោយថាមពល” ។

អគារនេះរចនាប្លង់ឡើង មានលក្ខណៈពិសេសប្លែកៗជាច្រើន រួមទាំងអាងហែលទឹកនៅខាងក្រោម និងអាងហែលទឹកនៅលើដំបូល បន្ទប់ហាត់ប្រាណ ដែលមានស្ទូឌីយោវិល ស្ប៉ា សូណា បន្ទប់ចំហុយ និងបន្ទប់ម៉ាស្សា។ ក្រៅពីនេះក៏កន្លែងកំសាន្ត និងកន្លែងសាច់អាំងសាច់ កន្លែងលេងហ្គេម និងកន្លែងសម្រាប់កុមារលេង កន្លែងមើលកុន មជ្ឈមណ្ឌលពាណិជ្ជកម្មក៏ដូចជាកន្លែងទទួលភ្ញៀវ៕

សំណង់ប្រកបអាជីវកម្មទេសចរណ៍ក្នុងខេត្តកែបមិនមានច្បាប់អាចប្រឈមនឹងការផ្អាកអាជីវកម្ម

ដោយ ហ្សូលី

កែបៈ មន្ទីរក្រសួងដែនដី នគររូបនីយកម្ម និងសំណង់ខេត្តកែប នឹងចាប់ផ្តើមចាត់វិធានការតឹងរឹងទៅលើ សំណង់សម្រាប់អាជីវកម្មទេសចរណ៍ ដែលសាងសង់គ្មានច្បាប់ត្រូវគោរពច្បាប់ឲ្យបានគ្រប់គ្នា។

អភិបាលនៃគណៈអភិបាលខេត្តកែប លោក សោម ពិសិដ្ឋ បានមានប្រសាសន៍ក្នុងកិច្ចប្រជុំនេះ គណៈកម្មការរដ្ឋបាលពិនិត្យ ពិភាក្សាលើលទ្ធផលនៃការវាស់វែងដីធ្លីចុះបញ្ជីជាលក្ខណៈប្រព័ន្ធ នៅភូមិកោះសោម ឃុំអង្កោល ស្រុកដំណាក់ចង្អើរ ខេត្តកែប កាលពីរសៀលថ្ងៃទី២៦ ខែវិច្ឆិកា ឆ្នាំ២០២០កន្លងមក ដោយបានណែនាំដល់ប្រធានមន្ទីររៀបចំដែនដី នគររូបនីយកម្ម និងសំណង់ ជាពិសេសអាជ្ញាធរក្រុង-ស្រុក ត្រូវចុះត្រួតពិនិត្យឡើងវិញនៅផ្ទះសំណាក់ សណ្ឋាគារ បឹងកាឡូ មិនមានច្បាប់នានា ដែលកំពុងធ្វើអាជីវកម្ម ដោយត្រូវជូនដំណឹងឲ្យម្ចាស់សំណង់បានដឹងថា បើនៅរឹងទទឹងមិនគោរពតាមច្បាប់ នឹងត្រូវផ្អាកអាជីវកម្មតែម្តង។

លោកបញ្ជាក់ថា “បច្ចុប្បន្ននេះផ្ទះសំណាក់ សណ្ឋាគារមានរាប់រយកន្លែង យើងមិនអាចចាំបានអស់នោះទេ ដូចនេះការជំរុញឲ្យពួកគាត់ គោរពតាមច្បាប់ទម្លាប់នានា គឺផ្តល់ភាពងាយស្រួលសម្រាប់អាជ្ញាធរក្នុងការគ្រប់គ្រង” ។

អភិបាលខេត្តរូបនេះបន្តថា លោកមិនតឹងតែងទេ ចំពោះអ្នកដែលចង់មកអភិវឌ្ឍន៍ តែត្រូវមានច្បាប់ទម្លាប់ត្រឹមត្រូវ និងធ្វើដោយប្រាកដប្រជា។ លោកថា លោកក៏មិនចង់ទុកឲ្យទីតាំងមួយនៅទំនេរ ដោយមិនផ្តល់ផលអីសោះដល់ពលរដ្ឋក្នុងតំបន់នោះទេ។ ដូចនេះត្រូវចាត់ចែងអភិវឌ្ឍន៍ ដោយប្រៀបធៀបសេដ្ឋកិច្ច ជីវភាពប្រជាជន ចំពោះទីតាំងដែលត្រូវអភិវឌ្ឍន៍ តើផ្តល់ផលអ្វីខ្លះឲ្យពលរដ្ឋ បើយើងទុកកន្លែងនោះឲ្យនៅទំនេរ។

លោកបានលើកឧទាហរណ៍ ករណីរំលោភយកដីគម្របព្រៃឈើ សហគមន៍អ្នកតាឈរ នៅតំបន់ភ្នំវល្លិ៍ ហើយសង់បឹងកាឡូនៅលើនោះ ដោយលោកអភិបាលខេត្ត បានដាក់ជាសំណួរថា ពេលនេះអង្ករក្លាយទៅជាបាយទៅហើយ តើត្រូវវាយកម្ទេចចោល ឬយ៉ាងណា?

លោកអភិបាលខេត្តកែប ចោទសួរថា “តើយើងចង់បានការអភិវឌ្ឍរក្សា អភិរក្សឬក៏អភិរក្សគាំទ្រនូវការអភិវឌ្ឍ?” ៕

ក្រសួងទេសចរណ៍៖ ប៉ូលទេសចរណ៍ធំ៦ត្រូវបានកំណត់ក្នុងផែនការមេអភិវឌ្ឍន៍ទេសចរណ៍ខេត្តមណ្ឌលគិរី

ដោយវុត្ថា

ភ្នំពេញៈ ផែនការអភិវឌ្ឍប៉ូលទេសចរណ៍ធំៗចំនួន៦ ត្រូវបានគណៈកម្មការអន្តរក្រសួងជ្រើសរើសកំណត់ និងដាក់បញ្ចូលក្នុងផែនការមេអភិវឌ្ឍន៍ វិស័យទេសចរណ៍ខេត្តមណ្ឌលគិរីឆ្នាំ២០២០-២០៣៥ ខណៈតំបន់ប៉ូលទេសចរណ៍ទាំងនេះ មានទីតាំងភូមិសាស្ត្រ និងសក្ដានុពលសំខាន់ផ្សេងៗគ្នា។

លោជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍បានថ្លែងយ៉ាងដូច្នេះក្រោយបញ្ចប់កិច្ចប្រជុំគណៈកម្មការអន្តរក្រសួង ដើម្បីពិគ្រោះយោបល់លើសេចក្ដីព្រាងលើកទី៣ នៃផែនការមេអភិវឌ្ឍន៍វិស័យទេសចរណ៍ ខេត្តមណ្ឌលគិរី ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ នាថ្ងៃទី២៦ ខែវិច្ឆិកា ឆ្នាំ២០២០ នៅទីស្ដីក្រសួងទេសចរណ៍។

លោកបន្តថា ក្នុងកិច្ចប្រជុំខាងលើនេះអង្គប្រជុំបានពិគ្រោះ និងលើកឡើងយោបល់ជាច្រើន ដើម្បីជាធាតុចូលបន្ថែមពាក់ព័ន្ធ នឹងវិស័យទឹកស្អាត អគ្គសនី កសិកម្ម រ៉ែ និងថាមពល អគ្គិសនី ដែនដី អាកាសយានដ្ឋាន សហគ្រាសធនតូច និងមធ្យម ហេដ្ឋារចនាសម្ពន្ធ ការរៀបចំនូវនវានុវត្តន៍ អាកាសធាតុ សោភ័ណភាពវាលស្មៅ និងព្រៃព្រឹក្សា ទីក្រុងវៃឆ្លាតជាដើម ដើម្បីឱ្យគោលដៅទេសចរណ៍ខេត្តមណ្ឌលគិរី ក្លាយទៅជាគោលដៅទេសចរណ៍លំដាប់អន្តរជាតិ និងដើម្បីឱ្យមានលក្ខណៈសង្គតភាព។

លោរដ្ឋមន្ត្រី ថោង ខុន បានឱ្យដឹងថា ការបំពេញនូវធាតុចូលទាំងនេះ គឺដើម្បីចូលរួមអភិវឌ្ឍវិស័យទេសចរណ៍ នៅខេត្តមណ្ឌលគិរី ឱ្យកាន់តែមានភាពទាក់ទាញ សំដៅទាក់ទាញភ្ញៀវទេសចរអន្តរជាតិ នឹងកើនឡើងប្រមាណ៩០ម៉ឺននាក់ និងភ្ញៀវទេសចរក្នុងស្រុកប្រមាណជាង២លាននាក់ផងដែរនៅឆ្នាំ២០៣៥ ជាមួយនឹងការអភិវឌ្ឍផលិតផលទេសចរណ៍ថ្មីៗស្របតាមស្មារតីនៃផែនការមេនេះ។

លោករដ្ឋមន្ត្រីបានបញ្ជាក់បន្ថែមថា “នៅក្នុងផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរីនេះ បានបែងចែកប៉ូលទេសចរណ៍ធំៗចំនួន៥ ទៅតាមទីតាំងភូមិសាស្ត្រ និងសក្ដានុពលផ្សេងគ្នា” ។

ទីតាំងទាំងនោះរូមមានដូចជា

*តំបន់អេកូទេសចរណ៍ក្នុងដែនជម្រកសត្វព្រៃៈ ដោយសារនៅក្នុងខេត្តមណ្ឌលគិរីមានដែនជម្រកសត្វព្រៃចំនួន៥ ដែលស្ថិតក្រោមការគ្រប់គ្រងរបស់ក្រសួងបរិស្ថាន និងពោរពេញដោយសក្ដានុពលក្នុងវិស័យអេកូទេសចរណ៍។

*តំបន់របៀងអេកូទេសចរណ៍ និងទេសចរណ៍ជនជាតិដើមភាគតិចៈ ដែលប៉ូលទេសចរណ៍ទីពីរនេះ នឹងត្រូវភ្ជាប់ពីតំបន់ប៊ូស្រាទៅកាន់តំបន់ដាក់ដាំ។

* តំបន់ក្រុងសែនមនោរម្យៈ នឹងអភិវឌ្ឍក្រុងនេះទៅជាតំបន់ អភិវឌ្ឍន៍ពហុបំណង ដែលមានសកម្មភាពកម្សាន្តផ្សេងៗមានលក្ខណៈសម្បូរបែប។

*តំបន់ប្រជុំជនស្រុកកោះញែកៈ មានសក្ដានុពលជាតំបន់កសិទេសចរណ៍ ពិសេសអាចរៀបចំជាចំណតយន្តហោះលើទឹក (Water Plan) នៅទន្លេស្រែពកនៃស្រុកកោះញែក។ ថ្វីដ្បិតទន្លេស្រែពក មិនអំណោយផលដល់ការធ្វើនាវាចរទេសចរណ៍ ឬដឹកជញ្ជូនមិនបានក៏ពិតមែន (ដោយសារសម្បូរថ្មប៉ប្រះទឹក) តែគេអាចរៀបចំជាចំណតយន្តលើទឹកដូចបណ្ដាប្រទេសមួយចំនួន ដែលឱ្យយន្តហោះហោះហើរមកកាន់តំបន់បឹងទន្លេសាប ឬទៅកាន់កោះរ៉ុងបានទៀតផង។

* តំបន់អាកាសយានដ្ឋានមណ្ឌលគិរី នៅស្រុកអូររាំង៖ ដែលនឹងត្រូវអភិវឌ្ឍជាទីក្រុងរណបនៃក្រុងសែនមនោរម្យ។

* តំបន់សមាហណកម្មច្រកទ្វារព្រំដែនៈ នៅខេត្តមណ្ឌលគិរីមានច្រកទ្វារព្រំដែនទ្វេភាគីជាមួយវៀតណាមចំនួន៤កន្លែង ដែលអាចជំរុញឱ្យមានសកម្មភាពអភិវឌ្ឍន៍ និងទេសចរណ៍នៅតាមច្រកព្រំដែននេះ។

លោកថោង ខុន បានបន្តថា ក្រោយទទួលបានការផ្ដល់យោបល់ខាងលើនេះហើយ ក្រុមការងារជំនាញ នឹងសរសេរបន្ថែមនូវធាតុចូលសំខាន់ៗមួយចំនួនទៀត ពីអន្តរក្រសួង-ស្ថាប័ន ដើម្បីរៀបចំជាសេចក្ដីព្រាងចុងក្រោយ នឹងបន្តដាក់ជូនគណៈកម្មការអភិវឌ្ឍទេសចរណ៍ថ្នាក់ជាតិនៅចុងខែធ្នូ ឆ្នាំ២០២០ ។ បន្ទាប់ពីបានឯកភាពពីគណៈកម្មការនេះហើយ នឹងបន្តដាក់ឆ្លងរាជរដ្ឋាភិបាលនៅដើមឆ្នាំ២០២១ខាងមុខតែម្ដង៕