កម្ពុជាត្រៀមរៀបចំវេទិកា “សេដ្ឋកិច្ច និងធុរកិច្ចអាស៊ី-អឺរ៉ុបលំដាប់ពិភពលោកលើកទី១”

ដោយ វឌ្ឈនា

ភ្នំពេញៈ ក្រសួងពាណិជ្ជកម្ម បានរៀបចំកិច្ចប្រជុំពិភាក្សាអំពីវឌ្ឍនភាពការងាររបស់គណៈកម្មការ លេខាធិការដ្ឋាន និងក្រុមការងារសម្រាប់ត្រៀមរៀបចំវេទិកា “សេដ្ឋកិច្ច និងធុរកិច្ចអាស៊ី-អឺរ៉ុប លើកទី១” ។

លោកប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មនៅព្រឹកថ្ងៃទី២៦ ខែវិច្ឆិកា ឆ្នាំ២០២០ នេះបានមានប្រសាសន៍ថា វេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ ដែលក្រសួងពាណិជ្ជកម្មបានត្រៀមរៀបចំ គឺជាវេទិការបស់អ្នកដឹកនាំអាជីវកម្ម មកពីទ្វីបអាស៊ី និងទ្វីបអឺរ៉ុប ក្នុងគោលបំណងដើម្បីរួមចំណែក ពង្រឹងទំនាក់ទំនងពាណិជ្ជកម្ម និងវិនិយោគរវាងប្រទេសក្នុងតំបន់ទាំងពីរ (អាស៊ី និងអឺរ៉ុប) ។

កិច្ចប្រជុំវឌ្ឍនភាពស្ដីពី ការត្រៀមរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១នេះ មានការចូលរួមធ្វើបទបង្ហាញពីក្រុមការងារទាំង៣ គឺ១-ក្រុមការងារឯកសារ និងផ្សព្វផ្សាយព័ត៌មាន ២-ក្រុមការងារពិធីការ រៀបចំកន្លែងប្រជុំ ដឹកជញ្ជូន សិល្បៈ និងសន្តិសុខ និង៣-ក្រុមការងារផ្នែកផ្គត់ផ្គង់ និងហិរញ្ញវត្ថុ ដោយផ្ដោតជាសំខាន់ទៅលើ៖ ការពិនិត្យ កែសម្រួលខ្លឹមសារឯកសារពាក់ព័ន្ធ នឹងការរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបដែលកម្ពុជាគ្រោងនឹងធ្វើនៅពេលខាងមុខ។

លោករដ្ឋមន្ត្រីបានបន្ដថា ចំពោះវឌ្ឍនភាពការងារពិធីការ រៀបចំកន្លែងប្រជុំ ដឹកជញ្ជូន សិល្បៈ និងសន្តិសុខ ក្រុមការងារបានបែងចែកជា៨គឺ ទី១ ក្រុមការងារសម្របសម្រួល ទី២ ក្រុមការងារឯកសារ និងផ្សព្វផ្សាយព័ត៌មាន ទី៣ ក្រុមបង្ហាញផលិតផល និងតែងលម្អ ទី៤ ក្រុមមន្ត្រីទំនាក់ទំនង ទី៥ ក្រុមសិល្បៈ ទី៦ ក្រុមសន្តិសុខ ទី៧ ក្រុមដឹកជញ្ជូន ទី៨ ក្រុមពិធីការ ដោយក្នុងនោះដែរក្រុមការងារផ្នែកផ្គត់ផ្គង់ និងហិរញ្ញវត្ថុ បានដាក់លិខិតជូនទៅក្រសួងការបរទេស និងសហប្រតិបត្តិការអន្តរជាតិរួចហើយ នៅរង់ចាំតែការឆ្លើយតបពីក្រសួងតែប៉ុណ្ណោះ។

លោករដ្ឋមន្ត្រីបានសង្កត់ធ្ងន់ថា កិច្ចប្រជុំកំពូលអាស៊ី-អឺរ៉ុបលើកទី១៣ ពិតជាមានសារៈសំខាន់ណាស់សម្រាប់ប្រទេសកម្ពុជា មិនថាផ្នែកនយោបាយ សេដ្ឋកិច្ច ឬវប្បធម៌ឡើយ ហើយបច្ចុប្បន្ន ASEM មានដៃគូរចំនួន៥៣ ក្នុងនោះ២១ប្រទេសមកពីអាស៊ី ៣០ប្រទេសមកពីអឺរ៉ុប និងអគ្គលេខាធិការដ្ឋានអាស៊ាន ព្រមទាំងសហភាពអឺរ៉ុប លើសពីនេះ ASEM បានដើរតួនាទីយ៉ាងសំខាន់ក្នុងការលើកកម្ពស់ភាពជាដៃគូរ និងកិច្ចសហប្រតិបត្ដិការអាស៊ី-អឺរ៉ុប ដើម្បីលើកកម្ពស់សន្ដិភាព វិបុលភាពសេដ្ឋកិច្ច និងវឌ្ឍនភាពសង្គម។

លោកបញ្ជាក់ថា ប្រធានបទនៃការរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុប យើងបានសម្រេចកំណត់យកចំណងជើងថា “LEVERAGING GLOBAL VALUE CHAIN AND MULTILATERALISM FOR INCLUSIVE GROWTH IN THE 4IR AND NEW NORMAL TRANSITION” ។ ក្រុមការងារក៏បានត្រៀម អញ្ជើញវាគ្មិនជាតិ និងអន្ដរជាតិដែលជា CEO និង Moderator ដែលមានបទពិសោធន៍ មានកេរិ៍តឈ្មោះ និងទទួលជោគជ័យក្នុងអាជីវកម្មទាំងលើឆាកជាតិ និងអន្តរជាតិ ជាពិសេសតាមបណ្តាស្ថានីយទូរទស្សន៍មួយចំនួន ទាំងនៅក្នុងតំបន់អាស៊ី និងអឺរ៉ុប។

ម្យ៉ាងទៀត ដោយបច្ចុប្បន្នស្ថិតក្នុងបរិការណ៍ នៃការរាតត្បាតជំងឺ COVID-19 ក្រុមការងារក៏បានគិតគូពីឧបករណ៍សុវត្ថិភាព ដើម្បីត្រៀមរៀបចំកិច្ចប្រជុំដ៏មានសារៈសំខាន់នេះ ព្រមទាំងចំនួនភ្ញៀវចូលរួម បន្ទប់ប្រជុំ គម្លាតសុវត្ថិភាព ម៉ាស ទឹកអាល់កុល ឬជែលលាងដៃ និងឧបករណ៍ថតសីតុណ្ហភាព ដោយអនុលោមតាមវិធានការរបស់ក្រសួងសុខាភិបាលផងដែរ៕

តម្លៃនៃការដឹកជញ្ជូនទំនិញតាមនាវាមានការកើនឡើងខ្ពស់ដោយសារកំនើននៃការនាំចេញរបស់ចិន

ដោយវុត្ថា

ភ្នំពេញៈ ចាប់តាំងពីខែតុលា រហូតមកដល់ពេលបច្ចុប្បន្ននេះ តម្លៃឡើងនៃការដឹកជញ្ជូនតាមផ្លូវទឹក មានការឡើងខ្ពស់គួរឱ្យកត់សម្គាល់ ដោយសារតែប្រទេសទេសចិនមានការនាំចេញទៅក្រៅប្រទេសមានច្រើន និងតម្រូវការច្រើន។

លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានឱ្យដឹងកាលពីថ្ងៃទី ២៦ ខែវិច្ឆិកា ម្សិលមិញនេះឱ្យដឹងថា ប្រទេសចិនភាគច្រើនបាននាំចេញទៅកាន់ប្រទេសអាមេរិក អឺរ៉ុប និងប្រទេសមួយចំនួនទៀតនៅលើពិភពលោក ដោយសារប្រទេសទាំងនេះ បានបញ្ជាទិញច្រើន ខណៈត្រឡប់មកវិញ គឺមិនមានការផ្ទុកទំនិញទេ ដែលជាបញ្ហាធ្វើឱ្យការដឹកជញ្ជូនតាមផ្លូវទឹកមានកំណើនខ្ពស់ ។

លោកឧកញ៉ាបន្តថា កាលពីខែមិនា និងមេសា តម្រូវការនៅតាមកំពង់ផែ និងនៅតាមប្រទេសមួយចំនួនមានតម្រូវការតិចតួច និងកំពង់ផែខ្លះទៀតកាត់បន្ថយបុគ្គលិក ព្រមទាំងកាត់បន្ថយជើងកាប៉ាល់ជាដើម ដែលជាបញ្ហាធ្វើឱ្យមានតម្លៃខ្ពស់ផងដែរ។លោកបញ្ជាក់ទៀថា នាវាដឹកទំនិញពីប្រទេសចិនមកកាន់កម្ពុជា ក្នុងមួយកុងតឺនើរមានតម្លៃប្រមាណ៦០០ដុល្លារកាលពីពេលមុន ប៉ុន្តែបច្ចុប្បន្ននេះកើនដល់២០០០ដុល្លារ ឬច្រើនជាងនេះ ដែលស្ថានភាពនេះ អាចនឹងអូសបន្លាយរហូតដល់ ខែកុម្ភៈ និងខែមេសា ឆ្នាំ ២០២១ ខាងមុខទើបល្អប្រសើរឡើងវិញ។

លោកឧកញ៉ាថ្លែងថា “យើងក៏បានលើកឡើងបញ្ហានេះ ជាមួយភាគីពាក់ព័ន្ធដែរ ប៉ុន្តែមិនអាចធ្វើអ្វីបាននោះទេ និងគ្មានជម្រើស ព្រោះពេលនេះនាវាមានមូលហេតុច្បាស់លាស់ មានតម្រូវការខ្ពស់ និងក្រុមហ៊ុននាវាមួយចំនួនក្ស័យធន” ។

លោកឧកញ៉ាបញ្ជាក់ទៀថា កាលពីអំឡុងខែមីនា និងមេសាការដឹកជញ្ជូនទំនិញ បានប្រឈមទៅនឹងបញ្ហាយ៉ាងខ្លាំង ដែលតាមការប៉ាន់ស្មានគឺ មានប្រមាណ៦០ភាគរយ ដោយសារការរាតត្បាតនៃជំងឺកូវីដ១៩ ប៉ុន្តែចាប់តាំងពីខែកញ្ញា រហូតតុលានៃឆ្នាំ ២០២០កន្លងមកនេះ មានស្ថានភាពល្អប្រសើរឡើងវិញ ស្របពេលដែលប្រទេសចិនមានស្ថានភាពល្អប្រសើរ ។

លោកបញ្ជាក់ទៀតថា និយាយជារួម គឺមុនព្រឹត្តិការណ៍៣ វិច្ឆិកា ការដឹកជញ្ជូន គឺមានស្ថានភាពល្អប្រសើរជាងពីអំឡុងខែមីនា និងមេសា ហើយរហូតមកដល់ពេលនេះ ការដឹកជញ្ជូនតាមផ្លូវទឹក និងផ្លូវគោក គឺមិនមានបញ្ហាចោទនោះទេ ប៉ុន្តែសម្រាប់តាមផ្លូវអាកាសនូវតែជាបញ្ហាដដែល៕

ចំណេះដឹង! អ្វីជាការធ្វើចំណាត់ថ្នាក់ដីរដ្ឋឡើងវិញ?

ដោយ វុត្ថា

ភ្នំពេញៈ ការធ្វើចំណាត់ថ្នាក់ដីរឡើងវិញមានន័យថា ការផ្តូរឋានៈដីរបស់រដ្ឋ ក្រោយពីធ្វើការចុះបញ្ជី និងការធ្វើចំណាត់ថ្នាក់លើកដំបូង។

ការធ្វើចំណាត់ថ្នាក់ដីរដ្ឋឡើងវិញ មានបីទម្រង់ដូចជា ១) ការធ្វើចំណាត់ថ្នាក់ទ្រព្យសាធារណៈរបស់រដ្ឋ ទៅជាទ្រព្យឯកជនរបស់រដ្ឋ ២) ការធ្វើចំណាត់ថ្នាក់ទ្រព្យសាធារណៈរបស់រដ្ឋ ពីការប្រើប្រាស់ជាប្រយោជន៍សាធារណៈមួយ ទៅជាប្រភេទបំរើប្រយោជន៍សាធារណៈមួយផ្សេងទៀត និង៣) ការធ្វើចំណាត់ថ្នាក់ព្រទ្យឯកជនរបស់រដ្ឋ ទៅជាទ្រព្យសាធារណៈរបស់រដ្ឋ។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់ស្តីពី គោនយោបាយស្តីពី ការគ្រប់គ្រងដីរដ្ឋបានឱ្យដឹងថា ការធ្វើចំណាត់ថ្នាក់ដីរដ្ឋឡើងវិញ ត្រូវបានធ្វើឡើង តាមរយៈសំណើរជាលាយល័ក្ខអក្សរ ពីនិតិបុគ្គលសាធារណៈណាមួយទៅគណៈកម្មាធិការប្រើប្រាស់ និងបែងចែកដីថ្នាក់ខេត្តក្រុង។ សំណើរនេះ ត្រូវប្រកាសឬបរិយាយអំពីទីតាំង ដែលស្នើសុំធ្វើចំណាត់ថ្នាក់ឡើងវិញ ពាក្យស្នើសុំធ្វើចំណាត់ថ្នាក់ឡើងវិញ និងហេតុផលនៃការស្នើសុំធ្វើចំណាត់ថ្នាក់ឡើងវិញ។

គណៈកម្មាធិការប្រើប្រាស់ និងបែងចែកដីខេត្តក្រុង នឹងតំរូវឱ្យស្ថាប័នបច្ចេកទេសជំនាញ (ចំរុះមន្ទីរ) ធ្វើការពិនិត្យឡើងវិញនូវសំណើ ដែស្នើឡើងក្នុងរយៈពេល៤៥ថ្ងៃ។

ការពិនិត្យឡើងវិញជាលាយល័ក្ខណ៍អក្សរ ត្រូវពន្យល់ពីវិធីសាស្ត្រដែលបានប្រើប្រាស់ក្នុងការត្រួតពិនិត្យ ហើយដែលវិធីសាស្ត្រនេះត្រូវរាប់បញ្ចូលទាំងព័ត៌មាន ដែលបានទទួលពីភាគីស្នើសុំ ទាំងលទ្ធផលរកឃើញក្នុងការត្រួតពិនិត្យ និងអនុសាសន៍របស់ស្ថាប័នបច្ចេកទេសជំនាញពាក់ព័ន្ធ ទៅនឹងសំណើសុំធ្វើចំណាច់ថ្នាក់ឡើងវិញនេះ។

ការពិនិត្យឡើងវិញនេះ ត្រូវបញ្ចប់ក្នុងរយៈពេល៦០ថ្ងៃ គិតពីថ្ងៃចាប់ផ្តើមត្រួតពិនិ ត្យ លើកលែងតែមានការស្នើសុំពន្យាពេលបន្ថែមពីអ្នកត្រួតពិនិត្យ ដោយមានហេតុផលជាក់លាក់។ បន្ទាប់មកគណៈកម្មាធិការប្រើប្រាស់ និងបែងចែកដីខេត្តក្រុង នឹងធ្វើការសំរេចជាលាយលក្ខណ៍អក្សរ លើការធ្វើចំណាត់ថ្នាក់ឡើងវិញនេះ (យល់ព្រម ឬ បដិសេធ ឬ កែសម្រួល) ក្នុងរយៈពេល៦០ថ្ងៃ គិតចាប់ថ្ងៃទទួបានលទ្ធផលនៃការត្រួតពិនិត្យ។

ការកំណត់របស់គណៈកម្មាធិការប្រើប្រាស់ និងបែងចែកដីថ្នាក់ខេត្តក្រុង នឹងត្រូវស្នើសុំការសំរេចជាផ្លូវការ ពីក្រុងប្រឹក្សាគោលនយោបាយដីធ្លី តាមរយៈអគ្គលេខាធិការដ្ឋាននៃក្រុមប្រឹក្សាគោលនយោបាយដីធ្លី។

ការធ្វើចំណាច់ថ្នាក់ដីរដ្ឋឡើងវិញនេះ នឹងត្រូវបញ្ចូលទៅក្នុងផែនទី ឬប្រព័ន្ធទិន្ន័យដីរដ្ឋ ហើយសេចក្តីសម្រេចជាលាយលក្ខណ៍អក្សរត្រូវរក្សាទុកជាឯកសារ៕

កង្វះខាតថាមពលអគ្គិសនីក្នុងខេត្តកណ្តាលលែងព្រួយបារម្ភ ខណៈរោងចក្រអគ្គិសនី នៅស្រុកល្វាឯម សាងសង់បាន៩៥ភាគរយ

ដោយ ៖ រ៉ាណេត

កណ្តាល ៖ រោងចក្រអគ្គិសនីដើរដោយប្រេងខ្មៅ ស្ថិតនៅស្រុងល្វាឯម ខេត្តកណ្តាល ត្រូវបានសាងសង់សម្រេចបានលទ្ធផលប្រមាណ៩៥ភាគរយ ដោយគ្រោងនឹងដាក់ឱ្យដំណើរនៅត្រឹមដើមឆ្នាំ២០២១ខាងមុខនេះ ដើម្បីផ្គត់ផ្គង់ការប្រើប្រាស់ និងលុបបំបាត់ភាពខ្វះខាតដែលធ្លាប់កើតមានកាលពីពេលកន្លងទៅនេះ ។

រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានប្រាប់ឱ្យដឹងថានៅថ្ងៃទី២៦ ខែវិច្ឆិកា ឆ្នាំ២០២០នេះថា រោងចក្រអគ្គិសនីមួយនេះ សាងសង់សម្រេចបានប្រមាណ៩៥ភាគរយ ហើយត្រៀមបញ្ចប់នៅពាក់កណ្ដាលខែធ្នូ ឆ្នាំ២០២០ខាងមុខនេះ។

លោករដ្ឋមន្រ្តីបានបញ្ជាក់ថា “ក្រោយសាងសង់រួច កម្ពុជា ជាពិសេសភូមិសាស្ត្រនៅក្នុងខេត្ត នឹងមិនខ្វះអគ្គិសនីប្រើប្រាស់នៅខែប្រាំងទៀតនោះទេ ហើយទាំងនៅសល់ថាមពលសម្រាប់ស្តុកទុកត្រៀមបំរុងថែមទៀតផង។ នេះគឺជាស្នាដៃដ៏ធំធេងរប់សប្រមុខដឹកនាំដែលមានសម្ដេចតេជោ ហ៊ុន សែន ជានាយករដ្ឋមន្ត្រី ដែលខំប្រឹងធ្វើយ៉ាងមិនឱ្យកម្ពុជា ខ្វះខាតអគ្គិសនីប្រើប្រាស់ ជាពិសេសមិនធ្វើឱ្យប្រជាពលរដ្ឋខ្វះអគ្គិសនីប្រើប្រាស់នោះទេ”។

ជាមួយគ្នានេះ លោកក៏បានប្រាប់ឱ្យដឹងផងដែរថា “កម្ពុជាយើងមានថាមពលអគ្គិសនីជាង ៣,៦០០មេហ្គាវ៉ាត់ តែយើងប្រើប្រាស់បច្ចុប្បន្នអស់តែប្រមាណជាង ១,៧០០មេហ្គាវ៉ាត់ប៉ុណ្ណោះ ដូច្នេះយើងនៅសល់ថាមពលអគ្គិសនី ជាងពាក់កណ្ដាលសម្រាប់ត្រៀមទុក។ ចាប់តាំងពីកូវីដ-១៩ បានវាយលុកចូលក្នុងប្រទេសកម្ពុជា មានការថយចុះការប្រើប្រាស់ថាមពលអគ្គិសនី ដោយសារតែសង្វាក់ផលិតកម្ម នានាត្រូវបានផ្អាក ឬត្រូវកាត់បន្ថយជាដើម ដែលនាំឱ្យអគ្គិសនីនៅសល់ច្រើន ហើយថាអគ្គិសនីកម្ពុជានឹងខាតបើសិនជាកង្វះខាតការប្រើប្រាស់ ខណៈដែលអគ្គិសនីកម្ពុជា មានប្រភពអគ្គិសនីច្រើន ហើយនឹងត្រូវប្រើប្រាស់ថាមពលអគ្គិសនីមួយណាដែលមានតម្លៃថោកជាងគេជាមុនសិន ដើម្បីសន្សុំសំចៃ”។

តាមផែនការរបស់អគ្គិសនីកម្ពុជា ក្នុងការផ្គត់ផ្គង់ឱ្យដល់គ្រប់ភូមិទូទាំងប្រទេសកម្ពុជា ខណៈតាមផែនការសម្រេចបាន ៩៨ភាគរយហើយ នៅសល់តែ ២៣៥ភូមិប៉ុណ្ណោះ ក្នុងនោះភូមិខ្លះអគ្គិសនីកម្ពុជា មិនអាចតខ្សែរភ្លើងដល់ឡើយ គឺមានតែប្រើប្រាស់ថាមពលភ្លើងសឡាសម្រាប់ផ្គង់ផ្គង់អ្នកភូមិទាំងនោះ៕

សណ្ឋាគារផ្កាយ៥ តម្លៃជិត១៨០លានដុល្លារ គ្រោងបើកដំណើរការនៅភ្នំពេញឆាប់ៗនេះ

ដោយ៖ ប៊ី

ភ្នំពេញ៖ សណ្ឋាគារលំដាប់ផ្កាយប្រាំដ៏ស្កឹមស្កៃដែលវិនិយោគ ក្នុងទំហំទឹកប្រាក់ជិត ១៨០លានដុល្លារ (ទាំងតម្លៃសាងសង់ និងទីតាំង) ឈ្មោះ ហៃយ៉ាត់ រីជិនស៊ី ភ្នំពេញ ដោយក្រុមហ៊ុន ជីប ម៉ុង ត្រៀមបើកដំណើរការក្នុងពេលឆាប់ៗនេះ ដើម្បីបម្រើវិស័យទេសចរណ៍ បដិសណ្ឋារកិច្ច ក៏ដូចជាធុរកិច្ច។

សណ្ឋាគារបែបប្រណិត ដែលមានដល់ទៅ ២៤៧បន្ទប់ស្នាក់នៅនេះ និងស្ថិតនៅចំកណ្តាលបេះដូង នៃរាជធានីភ្នំពេញផ្សារភ្ជាប់ភ្ញៀវទេសចរ និងធុរជនពីគ្រប់ទិសទី នៃសកលលោកមកកាន់ប្រទេសកម្ពុជា លើកមុខមាត់វិស័យបដិសណ្ឋារកិច្ច បម្រើតម្រូវការស្នាក់នៅបែបប្រណិត ក្នុងវិស័យទេសចរណ៍ ជាពិសេសបង្កើតឱកាសការងារ ដ៏សន្ធឹកសន្ធាប់សម្រាប់ប្រជាជនកម្ពុជា។

ការយកចិត្តទុកក្នុងការងារអភិរក្សសម្បត្តិបតិកភណ្ឌ តាមរយៈការរក្សាទុក និងការជួសជុលអគារសម័យបារាំងកម្ពស់ពីរជាន់នៅកណ្តាលសណ្ឋាគារ ហៃយ៉ាត់ រីជិនស៊ី ភ្នំពេញ ដើម្បីបង្ហាញពីតុល្យភាព នៃសម័យបុរាណ និងសម័យទំនើបរបស់ប្រទេសកម្ពុជា។ សណ្ឋាគារ ហៃយ៉ាត់ រីជិនស៊ី ជាគម្រោងសណ្ឋាគារ និងបដិសណ្ឋារកិច្ចដំបូងបង្អស់របស់ក្រុមហ៊ុន ជីប ម៉ុង ដែលជាក្រុមហ៊ុនក្នុងស្រុកខ្នាតយក្សមួយ ដែលតែងតែផ្តោតទៅលើការចូលរួមបរិច្ចាគ ទៅកាន់សង្គមវិញ។

មិនទាន់នឹងចាប់ផ្តើមដំណើរការផង សណ្ឋាគារ ហៃយ៉ាត់ រីជិនស៊ី ភ្នំពេញ បាននាំមកនូវការកែលម្អហេដ្ឋារចនាសម្ព័ន្ធ ក្នុងមូលដ្ឋានជុំវិញគម្រោង ដើម្បីជាប្រយោជន៍រួម សម្រាប់សហគមន៍។ វត្តមានរបស់សណ្ឋាគារ ហៃយ៉ាត់ រីជិនស៊ី ភ្នំពេញ នឹងនាំមកនូវការធ្វើឲ្យកាន់តែប្រសើរឡើងសោភ័ណភាពរាជធានីភ្នំពេញ ក្នុងតំបន់ប្រវត្តិសាស្ត្រ វប្បធម៌ និងពាណិជ្ជកម្ម ដ៏សម្បូរបែបមួយនេះ។

ហៃយ៉ាត រីជិនស៊ី ជាយីហោមួយរបស់ ហៃយ៉ាត់ ហូថេល ខបភើរិសិន ដែលជាក្រុមហ៊ុនសណ្ឋាគារសហរដ្ឋអាមេរិក មានវត្តមានក្នុងទីផ្សារអន្តរជាតិរយៈពេល ជាង៦ទសវត្ស ហើយដែលមកដល់ពេលបច្ចុប្បន្ននេះ សណ្ឋាគារ ហៃយ៉ាត់ មានចំនួនសរុប ៩៥០ នៅក្នុង ៦៧ប្រទេស ក្នុង៦ទ្វីប លើពិភពលោក៕

ឆ្នាំ២០២០ កម្ពុជាជាប់ចំណាត់ថ្នាក់គោលដៅទេសចរណ៍ល្អបំផុតក្នុងពិភពលោក

ដោយ ៖ វុត្ថា

ភ្នំពេញ ៖ ប្រទេសកម្ពុជា នៅក្នុងឆ្នាំ២០២០នេះ នៅតែជាគោលដៅទេសចរណ៍ដ៏ទាក់ទាញ និងជាប់ចំណាត់ថ្នាក់ល្អបំផុតនៅក្នុងពិភពលោក ដោយមានក្រុមហ៊ុនបម្រើសេវាទេសចរណ៍អន្តរជាតិល្បីៗធ្វើកត់សម្គាល់នៅក្នុងទិន្នន័យប្រចាំឆ្នាំរបស់ខ្លួន។

តាមរយៈក្រសួងទេសចរណ៍កម្ពុជា នៅរសៀលថ្ងៃទី២៦
ខែវិច្ឆិកា ឆ្នាំ២០២០នេះបានបង្ហាញថា ឆ្នាំ២០២០នេះ ប្រទេសកម្ពុជានៅតែជាគោលដៅទេសចរណ៍ល្អបំផុតសម្រាប់មកទស្សនា និងរស់នៅប្រកបដោយសុខុមាលភាពខ្ពស់ ដោយមានស្ថាប័ន និងក្រុមហ៊ុនអន្តរជាតិមួយចំនួនបានធ្វើកំណត់ត្រា។

សម្រាប់កំណត់ត្រារបស់ក្រុមហ៊ុនអន្តរជាតិល្បីៗទាំងនោះរួមដូចតទៅ៖

ថ្ងៃទី៩ ខែតុលា ឆ្នាំ២០២០ ក្រុមហ៊ុនអន្តរជាតិ Big 7 Travel បានចុះផ្សាយពីគោលដៅទេសចរណ៍ល្អបំផុតសម្រាប់ ការសម្រាកលំហែចំនួន ៧ កន្លែង លើពិភពលោក (The 7 Most Relaxing Locations In The World) ដោយខេត្តសៀមរាប នៃព្រះរាជាណាចក្រកម្ពុជា ក៏ជាកន្លែងមួយក្នុងនោះផងដែរ។ បើយោងតាមព័ត៌មានរបស់វេបសាយ Big 7 Travel បានបង្ហាញថា សៀមរាបជាទីក្រុងស្ងប់ស្ងាត់ដ៏សែនមនោរម្យ ដោយមានរមណីយដ្ឋាន និងប្រាសាទដ៏ទាក់ទាញជាច្រើនកន្លែង ជាពិសេសប្រាសាទអង្គរវត្ត។

ថ្ងៃទី០៥ ខែមីនា ឆ្នាំ២០២០ កម្ពុជាក៏ត្រូវបានជ្រើសរើសជាជ័យលាភីពានរង្វាន់ទេសចរណ៍អន្តរជាតិប្រចាំឆ្នាំ២០២០ (International Travel Award 2020) ដោយសមាគមអ្នកនិពន្ធទេសចរណ៍អាស៊ីប៉ាស៊ីហ្វិក (Pacific Area Travel Writers Association) ដែលមានស្នាក់ការនៅប្រទេសឥណ្ឌា ដោយបានចាត់ទុក “កម្ពុជា៖ គោលដៅដ៏ល្អបំផុតសម្រាប់បេតិកភណ្ឌវប្បធម៌” (Cambodia-Best Destination for Heritage)។

ថ្ងៃទី៣០ ខែមករា ឆ្នាំ២០២០ គេហទំព័រ OUTRAGE Travel បានចុះផ្សាយអំពីប្រទេសដ៏មានសុវត្ថិភាពបំផុតទាំង៥ សម្រាប់មកទស្សនានៅក្នុងតំបន់អាស៊ី (Five of the safest places to visit in Asia) ដោយកម្ពុជាត្រូវបាន ជាប់ជាប្រទេសដែលមានសុវត្ថិភាពបំផុត និងបង្ហាញថាជាប្រទេសដែលមានវប្បធម៌ ព្រមទាំងបុរាណស្ថានបែបសាសនាដ៏សម្បូរបែប។

ថ្ងៃទី២៨ ខែមករា ឆ្នាំ២០២០ ក្រុមហ៊ុន My International Movers ដែលមានទីស្នាក់ការកណ្ដាលនៅប្រទេសអង់គ្លេស អាមេរិក និង អូស្ត្រាលី បានចុះផ្សាយពីប្រទេសរួសរាយបំផុតទំាង ១០ សម្រាប់មកទស្សនា និងរស់នៅទូទាំងពិភពលោក (Top 10 Friendliest Countries in the World to Move To)។ ទិន្នន័យដែលក្រុមហ៊ុនទទួលពីការស្រាវជ្រាវបានបញ្ជាក់ថា ព្រះរាជាណាចក្រកម្ពុជាគឺជាគោលដៅដ៏ល្អបំផុត ដោយមានប្រជាជនរួសរាយរាក់ទាក់ និងដំណើរកម្សាន្តដែលមានតម្លៃសមរម្យ។

ការផ្តល់នូវចំណាត់ថ្នាក់ទាំងនេះបានបង្ហាញអំពីសុខសន្តិភាព ការអភិវឌ្ឍលើគ្រប់វិស័យរបស់កម្ពុជា ជាពិសេស ភាពរឹងមាំនៃប្រព័ន្ធសុខាភិបាល និងការចូលរួមរបស់ប្រជាពលរដ្ឋកម្ពុជាគ្រប់រូបក្នុងការទប់ស្កាត់ គ្រប់គ្រងការឆ្លងរាលដាលនៃជំងឺកូវីដ-១៩ បានយ៉ាងល្អ ព្រមទាំងរួមចំណែកយ៉ាងសំខាន់ក្នុងការផ្សព្វផ្សាយទាក់ទាញអ្នកទេសចរ និងវិនិយោគិនអន្តរជាតិឱ្យមកទស្សនា និងវិនិយោគនៅកម្ពុជា កាន់តែច្រើនឡើងថែមទៀត ក្នុង និងក្រោយដំណាក់កាលនៃវិបត្តិកូវីដ-១៩ ។

ជាមួយនឹងកំណត់ខាងលើនេះ បច្ចុប្បន្នក្រសួងទេសចរណ៍បានផ្សព្វផ្សាយអំពីវិធានសុវត្ថិភាពស្ដីពីការធ្វើដំណើរ និងទេសចរណ៍ ហើយក្រសួងក៏បាននឹងកំពុងរៀបចំផែនទីបង្ហាញផ្លូវដើម្បីស្តារឡើងវិញវិស័យទេសចរណ៍ ឆ្នាំ២០២១- ២០២៥ ផងដែរ ៕

ហេតុផលចំនួន ៣ ដែលខេត្តកោះកុងជាតំបន់គួរវិនិយោគលើវិស័យអចលនទ្រព្យ

ដោយ ហ្សូលី

ភ្នំពេញ៖ ខេត្តកោះកុងជាខេត្តជាប់មាត់សមុទ្រមួយដែលមានសក្តានុពលទៅលើវិស័យជាច្រើន ដែលវិនិយោគិនមួយចំនួនអាចក្រឡេកមើលលើចំនុចខ្លះមកពិចារណា មុននឹងដាក់ចិត្តវិនិយោគ ក្រោមហេតុផលចំនួន ៣។

សក្តានុពលទេសចរណ៍ខ្ពស់
បើប្រៀបធៀបក្នុងខេត្តជាប់មាត់សមុទ្រទាំង ៤ ដូចជា ព្រះសីហនុ កំពត កែប ខេត្តកោះកុងជាខេត្តដែលមានឆ្នេរសមុទ្រវែងជាងគេសរុប ៤៤០គីឡូម៉ែត្រ ហើយជាខេត្តដែលកោះធំជាងគេបំផុតមានទំហំសរុប ១០៣ គីឡូម៉ែត្រការ៉េ មានទឹកជ្រោះ ១០កន្លែង សាកសមអាចវិនិយោគជាកន្លែងទេសចរណ៍ និងទាក់ទាញភ្ញៀវជាតិ-អន្តរជាតិមកកម្សាន្ត។

ហេដ្ឋារចនាសម្ព័ន្ធគ្រប់គ្រាន់
ក្រោយផ្លូវជាតិលេខ ៤៨ ត្រូវបានស្ថាបនារួចនឹងធ្វើឲ្យខេត្តសមុទ្រមានព្រំដែនគោកតភ្ជាប់ជាមួយប្រទេសថៃនេះមានការអភិវឌ្ឍកាន់តែខ្លាំង និងក្លាយជាឋានសួគ៌សម្រាប់ភ្ញៀវទេសចរចូលចិត្តធម្មជាតិ។ ក្រៅពីនេះ កោះកុងក៏មានស្ពានកោះកុងប្រវែង ១៩០០ ម៉ែត្រ ត្រូវបានដាក់ឲ្យប្រើប្រាស់ក្នុងឆ្នាំ ២០០២ តភ្ជាប់ទៅច្រកចាំយាម ព្រំដែនខ្មែរ-ថៃ ជាស្ពានឆ្លងសមុទ្រវែងជាងគេនៅក្នុងប្រទេសកម្ពុជា។

មានគម្រោងវិនិយោគធំៗ
កាលពីថ្មីៗនេះ ក្រុមហ៊ុនរបស់អ្នកឧកញ៉ា គិត ម៉េង បាននិងកំពុងបម្រុងទុនវិនិយោគបង្កើតតំបន់សេដ្ឋកិច្ចពិសេសមួយទៀតស្ថិតនៅទីតាំងរួមគ្នាក្នុងតំបន់ឧទ្យានបុទុមសាគរ ខេត្តកោះកុង។ មន្ត្រីជំនាញពាក់ព័ន្ធថ្នាក់ខេត្តបានបើកកិច្ចប្រជុំពិភាក្សាសិក្សាលម្អិតអំពីទីតាំង ដែលក្រុមហ៊ុន Royal Group Co., Ltd បានស្នើសុំក្នុងឧទ្យានជាតិបូទុមសាគរ ភូមិសាស្ត្រ ឃុំតានូន និងឃុំថ្មស ស្រុកបុទុមសាគរ ខេត្តកោះកុង។

ទន្ទឹមនេះ លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា ធ្លាប់បានឱ្យដឹងថា នៅពេលណាលំហូរវិនិយោគបរទេសចូលមកកាន់ខេត្តកោះកុងនេះកាន់តែច្រើន នឹងជំរុញឱ្យមានចរន្តនៃ ការទិញលក់ដីធ្លីកាន់តែច្រើនហើយតម្លៃដីក៏មានតម្លៃថ្លៃដូចខេត្តព្រះសីហនុផងដែរ៕

អ្នកជំនាញ៖ វិស័យអចលនទ្រព្យកម្ពុជានឹងត្រឡប់មានភាពល្អប្រសើរមិនចាំដល់ឆ្នាំ ២០២២ ទេ

ដោយ ហ្សូលី

ភ្នំពេញ៖ វិស័យអចលនទ្រព្យកម្ពុជាបច្ចុប្បន្នកំពុងស្ថិតនៅក្នុងស្ថានភាពស្រពេចស្រពិល ដោយសារការអូសបន្លាយពេលនៃវិបត្តិកូវីដ១៩ ប៉ុន្តែអ្នកជំនាញបានលើកឡើងថា វិស័យអចលនទ្រព្យនឹងត្រឡប់មករកសភាពដើមវិញនៅឆ្នាំក្រោយ ដែលមិនចាំបាច់រង់ចាំដល់ឆ្នាំ ២០២២ឡើយ។

លោកឧកញ៉ា នួន រិទ្ធី អគ្គនាយកក្រុមហ៊ុន Khmer Foundation Appraisal បានថ្លែងប្រាប់គេហទំព័រ Propertyarea.asia នៅក្នុងកិច្ចសម្ភាសមួយថា បើទោះបីជាមានការញាំញ៉ីដោយបញ្ហាកូវីដយ៉ាងណាក្តី កីមិនទាន់មានការគំរាមកំហែងធ្ងន់ធ្ងរ ដែលធ្វើឱ្យរង្គោះរង្គើដល់វិស័យអចលនទ្រព្យនៅក្នុងប្រទេសកម្ពុជានោះឡើយ។

លោកឧកញ៉ាបន្តថា ការវិនិយោគនិងបណ្តាញទីផ្សារនៅតែបន្តដោយសារតែមានដៃគូខាងក្នុងប្រទេសនៅឈរយ៉ាងរឹងមាំក្នុងការជំនួសមុខឱ្យដៃគូបរទេសដែលពួកគេមិនបានមកព្រោះវិបត្តិកូវីដ។ ចំណែកឯយុទ្ធសាស្រ្តរាជរដ្ឋាភិបាលវិញ ក្នុងដំណាក់កាលដែលវិស័យទេសចរណ៍ស្ងប់ស្ងាត់ ទាំងរដ្ឋាភិបាល វិនិយោគិន នាំគ្នាសម្រុកអភិវឌ្ឍនិងកែលម្អនូវគម្រោងរួមទាំងហេដ្ឋារចនាសម្ព័ន្ធផ្សេងៗ ដើម្បីទ្រទ្រង់សោភ័ណភាពខេត្ត-ក្រុង បន្ទាប់ពីវិបត្តិ។ នេះជាការបង្ហាញពីស្មារតីរួបរួមថា វិស័យសំណង់និងអចលនទ្រព្យនៅកម្ពុជាមិនមានការថមថយទេ មានតែការវិវត្តទៅមុខទៀត។

ទន្ទឹមនេះ ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោក ឃាង ពុទ្ធី បានមានប្រសាសន៍ថា ទីផ្សារអចលនទ្រព្យនឹងមានទីផ្សារល្អមកវិញនៅដើមឆ្នាំក្រោយនេះហើយ គឺមិនចាំបាច់រង់ចាំរហូតដល់ឆ្នាំ ២០២២នោះទេ ព្រោះដំណឹងនៃការបង្កើតវ៉ាក់សាំងសម្រាប់វិបត្តិកូវីដ ១៩ ក៏ឃើញថាមានលទ្ធផលជោគជ័យ និងប្រសិទ្ធភាពដែរ។

ប្រធានក្រុមប្រឹក្សាភិបាលរូបនេះបានថ្លែងថា សូមកុំវិភាគលឿនពេកអំពីហានិភ័យ តែគួររង់ចាំពិនិត្យមើលលទ្ធផលនិងវិធានការផ្សេងៗរបស់ក្រសួងសុខាភិបាល និងចំណាត់ការដ៏ខ្ពស់ខ្ពស់ពីប្រមុខរាជរដ្ឋាភិបាល រួមទាំងអាជ្ញាធរពាក់ព័ន្ធទាំងអស់ជាមុនសិន៕

Le Conde BKK1 ជាជម្រើសដ៏ឆ្លាតវៃបំផុតសម្រាប់មនុស្សជំនាន់ថ្មី

ដោយ ៖ រ៉ាណេត

ភ្នំពេញ ៖ រាជធានីភ្នំពេញ ជាតំបន់ដែលមានសក្ដានុពលសេដ្ឋកិច្ចខ្លាំងជាងគេក្នុងប្រទេសកម្ពុជា ហើយក៏កំពុងមានការវីកចម្រើនខ្លាំងលើវិស័យអចលនទ្រព្យថ្មី ថែមទាំងទាក់ទាញម្ចាស់គម្រោងអភិវឌ្ឍន៍ថ្មីៗកាន់តែច្រើន។

អគារដ៏ខ្ពស់ជាច្រើនកំពុងលិចរូបរាងឡើង ហើយខ្លះទៀតបានឡើងខ្ពស់កប់ពពករួចទៅហើយ ប៉ុន្តែមានតែគម្រោងមួយចំនួនតូចប៉ុណ្ណោះដែលប្រើប្រាស់បច្ចេកវិទ្យាទំនើបៗទាន់សម័យ។ ក្នុងពេលឆាប់ៗនេះ ក្ដីស្រមៃដែលចង់ធ្វើជាម្ចាស់របស់ផ្ទះប្រណិត បំពាក់បច្ចេកវិទ្យាឆ្លាតវៃ និងលក្ខខណ្ឌផ្សេងជាច្រើនទៀត លោកអ្នកអាចរកបាននៅគម្រោង Le Condé BKK1។

ខុនដូ Le Condé BKK1 បានចាប់ផ្ដើមសាងសង់នាខែកក្កដា ឆ្នាំ២០២០ ដែលធ្វើឲ្យគម្រោងនេះក្លាយជាគម្រោងចុងក្រោយគេបង្អស់នៅក្នុងទីក្រុង។ រាជធានីភ្នំពេញ ត្រូវបានគេស្គាល់ថាជាទីក្រុងប៉ារីសនៃប៉ែកបូព៌ា តាមរយៈបណ្តុំអគារដែលមានចរិតលក្ខណៈស្ថាបត្យកម្មបារាំង ស្ថិតនៅពាសពេញតំបន់បឹងកេងកង១។ តំបន់នេះប្រមូលផ្ដុំទៅដោយហាងកាហ្វេ ផាប់ និងភោជនីយដ្ឋាននានាជាច្រើននៅគ្រប់ច្រកល្ហក ដែលមើលទៅហាក់បីដូចជាទីប្រជុំជននៅ ប្រទេសលោកខាងលិច។ ជាមួយគ្នានេះដែរ តំបន់នេះត្រូវបានហ៊ុមព័ទ្ធដោយហាងម៉ាកសញ្ញាអន្តរជាតិល្បីៗជាច្រើន រួមមាន ភោជនីយដ្ឋាន Topaz ភោជនីយដ្ឋាន Terrazza ហាង Hops Beer និងប្រោនកាហ្វេ (Brown Coffee)ជាដើម ដែលអាចឱ្យលោកអ្នកភ្លក្សរសជាតិថ្មីប្លែកនៃម្ហូបចម្រុះមកពីទូទាំងពិភពលោក។

បើនិយាយពីការកម្សាន្ត និងការដើរទិញឥវ៉ាន់វិញ តំបន់នេះក៏ផ្ដល់ជូនជម្រើសយ៉ាងសម្បូរបែបផងដែរ រួមមាន ផ្សារទំនើប អ៊ីអនម៉ល ផ្សារទំនើប Noro Mall ហាងលក់សម្លៀកបំពាក់ Zando ហាងស្ប៉ា Bodia Spa និងទិសដៅកម្សាន្តជាច្រើនទៀត សម្រាប់ជីវិតរស់នៅទំនើបបែបអភិជន។ បន្ថែមពីលើនេះ ទៀត នៅជុំវិញតំបន់បឹងកេងកង១ ក៏សម្បូរទៅដោយសាលាអន្តរជាតិផងដែរ ជាក់ស្ដែងដូចជា សាលាអន្តរជាតិលំដាប់ខ្ពស់ Raffles Montessori International School of Phnom Penh ជាដើម។

ខុនដូដ៏ប្រណិតមួយនេះឈរនៅចំកណ្ដាលនៃខណ្ឌដែលមានភាពមមាញឹកមួយនេះ ធ្វើឲ្យខ្លួន ឯងមានភាពចាប់អារម្មណ៍ដោយសារការរចនាម៉ូដយ៉ាងសមសួនរបស់វា។ គម្រោងនេះត្រូវបាន បញ្ចប់ការតុបតែងផ្នែកខាងក្នុងរួចរាល់ និងមានបំពាក់នូវបច្ចេកទេសផ្ទះឆ្លាតវៃដែលជា បច្ចេកវិទ្យាជំនាន់ថ្មីបំផុត។

អគាររចនាម៉ូដយ៉ាងទាក់ទាញ

Le Condé BKK1 ជាគម្រោងអភិវឌ្ឍន៍ចម្រុះរបស់ក្រុមហ៊ុន Wangfu International Real Estate Development Co., Ltd. បង្កើតឡើងក្រោមផ្នត់គំនិត «បេះដូងនៃរាជធានីភ្នំពេញ» គម្រោងអភិវឌ្ឍន៍ចម្រុះនេះ នឹងក្លាយទៅជាទីសម្គាល់ថ្មីដ៏អស្ចារ្យ ស្ថិតនៅចំកណ្ដាលរាជធានី ភ្នំពេញ។

ការរចនាស្ថាបត្យកម្មរបស់អគារ Le Condé BKK1 ត្រូវបានបំផុសគំនិតចេញពី ទិដ្ឋភាពជនបទដ៏ស្រស់បំព្រងនៃតំបន់អាស៊ីអាគ្នេយ៍ ដោយលាយបញ្ចូលគ្នារវាងទេសភាពត្រូពិក ដ៏ស្រស់ត្រកាល និងសិល្បៈបូព៌ាដ៏ឆើតឆាយ។ ផុសឡើងយ៉ាងត្រដែតទៅលើលំហវេហាដ៏ធំល្វឹង ល្វើយ សំណង់ដ៏វិសេសវិសាលនេះមានកម្ពស់ ៤៣ជាន់ ស្មើនឹង ១៤៥ម៉ែត្រ។ មុនពេលប្រគល់លំនៅឋានជូនអតិថិជន គ្រប់យូនីតត្រូវបានបំពាក់ដោយគ្រឿងសង្ហារឹមយ៉ាងពេញលេញស្របតាមរបត់ថ្មី នៃទីផ្សារលំនៅឋានសម័យទំនើប។

ការរចនាម៉ូដដែលមានគុណភាពខ្ពស់

រចនាម៉ូដខាងក្រៅរបស់ខុនដូ Le Condé BKK1 ក៏អាចឆក់យកការចាប់អារម្មណ៍របស់លោក អ្នកបាន រួចស្រាចទៅហើយ ប៉ុន្តែអ្វីដែលកាន់តែពិសេសទៅទៀតនោះគឺការរចនាផ្នែកខាងក្នុងរបស់អគារ។ ផ្នែកកោងខាងក្រៅរបស់វាហូរនៅខាងក្នុងបង្កើតជាជញ្ជាំងពណ៌សដែល តម្រង់ផ្លូវដ៏ធំទូលាយសម្រាប់ម្ចាស់ផ្ទះទាំងឡាយ។ សួនច្បារនៅសងខាងផ្លូវដើរ និងដាក់ពន្យួរ ខាងលើបង្កើតឲ្យមានបរិយាកាសល្អត្រកាល និងបំពេញបន្ថែមដោយអារម្មណ៍ធម្មជាតិ។ កញ្ចក់ដើរតួយ៉ាង សំខាន់ក្នុងការរចនារបស់អគារ វាអាចអនុញ្ញាតឲ្យលោកអ្នកទទួលបាននូវ ទស្សនីយភាពទីក្រុងយ៉ាងពេញលេញ និងត្រជាក់ភ្នែកគយគនមិនចេះជិនណាយ លើសពីនេះវាជួយការពារពន្លឺព្រះអាទិត្យដ៏ក្ដៅដែលជះចូលមកពីខាងក្រៅ។

ស្ថិតក្នុងតំបន់ដែលមានភាពមមាញឹកខ្លាំង

រាជធានីភ្នំពេញមានការរីកចម្រើនគួរឲ្យកត់សំគាល់ ដោយអភិវឌ្ឍន៍ខ្លួនឯងពីទីក្រុងតូចមួយទៅជាមជ្ឈមណ្ឌលសេដ្ឋកិច្ចដ៏មមាញឹកមួយ។ ដែលវាបង្ហាញនូវបរិបទការងារយ៉ាងសកម្មរបស់ អ្នករស់នៅក្នុងតំបន់ ហើយ Le Condé BKK1 នឹងផ្ដល់ជូនលោកអ្នកនូវលំនៅដ្ឋានដ៏កក់ក្ដៅ ដែលផ្ដល់ភាពងាយស្រួលដល់អ្នករស់នៅដោយគ្រាន់តែប្រើប្រាស់ជាមួយម្រាមដៃរបស់ពួក គេប៉ុណ្ណោះ។
យូនីតរបស់ Le Condé BKK1 សាងសង់ក្រោមបទដ្ឋានច្បាស់លាស់ដែលអាចឲ្យពន្លឺជះចូលក្នុងអគារ បានគ្រប់គ្រាន់។ បរិយាកាសក្នុងយូនីតនីមួយៗអនុញ្ញាតឲ្យលោកអ្នកអាចសម្រាកលំហែកាយបែបឯកជន ឬជាមួយគ្រួសារយ៉ាងមានក្ដីសុខ និងអាចធ្វើអ្វីៗគ្រប់យ៉ាងដែលចង់ធ្វើនៅ ក្នុងផ្ទះរបស់ខ្លួនដោយមិនត្រូវក្រែងចិត្តនរណា។ បន្ទប់ត្រូវបានរៀបចំឡើងយ៉ាងស្ទាត់ជំនាញ អនុញ្ញាតឲ្យការបម្លាស់ទីពីបន្ទប់មួយ ទៅបន្ទប់មួយ កាន់តែមានភាពងាយស្រួល។

លំនៅឋាននាអនាគត

ខុនដូ Le Condé BKK1 បានបញ្ចូលនូវលក្ខណៈពិសេសទាំងអស់នេះចូលគ្នា ជាមួយនឹងប្រព័ន្ធផ្ទះឆ្លាតវៃ។ ប្រព័ន្ធគ្រប់គ្រងផ្ទះនេះត្រូវបានបង្កើតឡើងដោយ ក្រុមហ៊ុន Xiaomi Techologies ដែលជាក្រុមហ៊ុនបច្ចេកវិទ្យាធំបំផុតមួយរបស់ប្រទេសចិន។ ប្រព័ន្ធលំនៅឋានឆ្លាតវៃនេះ នឹងផ្សារភ្ជាប់ទៅនឹងឧបករណ៍ប្រើប្រាស់ក្នុងផ្ទះ ដែលអនុញាតឱ្យម្ចាស់អាផាតមិនធ្វើការគ្រប់គ្រង និងបញ្ជាឧបករណ៍ក្នុងផ្ទះពីចម្ងាយ ដូចជា ការគ្រប់គ្រងសីតុណ្ហភាពក្នុងបន្ទប់ ការបិទបើកអំពូលភ្លើង ការកំណត់ម៉ោងរោទិ៍សម្រាប់ការងារផ្ទះ និងបច្ចេកវិទ្យាសន្សំសំចៃ ថាមពលដោយស្វ័យប្រវត្តិ ដោយគ្រាន់តែចុចប៊ូតុងនៅលើទូរស័ព្ទតែប៉ុណ្ណោះ។ តើអ្នកណាដឹងថាការរស់នៅទំនើបបែបនេះមកដល់រាជធានីភ្នំពេញឆាប់ ដល់ថ្នាក់នេះ?

គម្រោង Le Condé BKK1 ជាឧទាហរណ៍មួយនៃការអភិវឌ្ឍន៍ជាច្រើនដែលអ្នកអាចរកបាន នៅភ្នំពេញ។ យើងសុទ្ធតែដឹងអំពីវិបត្តិសេដ្ឋកិច្ចដែលកើតមាននៅក្នុងឆ្នាំ២០២០ ដែលវាបានជះ ឥទ្ធិពលយ៉ាងខ្លាំងដល់អ្នកវិនិយោគមួយចំនួន ប៉ុន្តែគម្រោង Le Conde បានឈរជើងយ៉ាង រឹងមាំបើទោះបីជាមានការប៉ះទង្គិចបន្តិចបន្ទួចពីទីផ្សារនេះក៏ដោយ។ តើលោកអ្នកត្រៀមខ្លួនរស់នៅក្នុងយុគសម័យនៃការរស់នៅថ្មីនេះហើយឬនៅ?

ចង់ដឹងព័ត៌មានលម្អិតបន្ថែមជាមួយគម្រោង Le Condé BKK1 នៅថ្ងៃនេះ

ផ្លូវទាំង៣៤ខ្សែក្នុងក្រុងព្រះសីហនុ នឹងត្រូវអ៊ុតបេទីម ចាប់ពីថ្ងៃទី២ ខែធ្នូ និងឆ្ពោះទៅបញ្ចប់ការសាងសង់

photo_2020-11-26_13-19-58 — រូបភាព ៖ Cambodia Skyline

ដោយ ៖ រ៉ាណេត

ព្រះសីហនុ ៖ ផ្លូវទាំង៣៤ខ្សែនៅក្នុងក្រុងព្រះសីហនុ នឹងត្រូវចាប់ផ្តើមធ្វើការអ៊ុតបេទីមនៅដើមសប្ដាហ៍ខែធ្នូខាងមុខនេះ ក្រោមការឯកភាពពីសំណាក់លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា។

លោក គួច ចំរើន អភិបាលខេត្តព្រះសីហនុ បានមានប្រសាសន៍នៅថ្ងៃទី២៥ ខែវិច្ឆិកា ឆ្នាំ២០២០ ដោយមានការឯកភាពពីលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា នៅត្រឹមថ្ងៃទី២ ខែធ្នូ ឆ្នាំ២០២០ ខាងមុខនេះ ក្រុមហ៊ុនជំនាញនឹងចាប់ផ្តើមចុះធ្វើការអ៊ុតបេទីមនៅលើផ្លូវធំៗក្នុងចំណោមផ្លូវទាំង៣៤ខ្សែជាជំហានដំបូង។

លោកអភិបាលបានបញ្ជាក់ថា “ក្រុមហ៊ុនស្ថាបនាផ្លូវ និងក្រុមហ៊ុនអ៊ុតបេទីមអាចដំណើរការបានតាមកិច្ចសន្យារវាងរដ្ឋបាលខេត្ត ជាមួយក្រុមហ៊ុនអ៊ុតបេទីមទាំង៣ក្រុមហ៊ុន។ ជំហានដំបូងយើងធ្វើការអ៊ុតបេទីមលើខ្សែផ្លូវធំៗជាមុន និងបន្តទៅខ្សែផ្លូវផ្សេងទៀតតាមផែនការ និងពេលវេលាដែលបានគ្រោងទុក”។

ជាមួយនឹងការលើកឡើងខាងលើនេះ លោកអភិបាលខេត្តក៏បានធ្វើការណែនាំដល់ក្រុមហ៊ុនស្ថាបនាផ្លូវទាំងអស់ត្រូវធ្វើការសំអាតខ្សែផ្លូវ ដើម្បីបង្កលក្ខណៈងាយស្រួលឱ្យក្រុមហ៊ុនអ៊ុតបេទីមមានលទ្ធភាពបំពេញការងារតាមផែនការបានរលូន ព្រមទាំងបានសំណូមពរឱ្យក្រុមហ៊ុនទាំងអស់គឺក្រុមហ៊ុនស្ថាបនាផ្លូវ និងក្រុមហ៊ុនអ៊ុតបេទីមត្រូវសហការគ្នាដើម្បីឱ្យដំណើរការស្ថាបនា និងអ៊ុតបេទីមធានាបាននូវបរិមាណ គុណភាព និងសោភ័ណភាព ក្នុងខេត្តព្រះសីហនុ ក្នុងទិសដៅបម្រើឱ្យវិស័យទេសចរណ៍ និងវិនិយោគនាពេលខាងមុខ។

ក្រុមហ៊ុនទាំង៣ ដែលទទួលអ៊ុតបេទីម នឹងត្រូវធ្វើការបែងចែកទីតាំង និងចំនួនផ្លូវផ្សេងៗពីគ្នា រួមមាន ៖ ទី១. ក្រុមហ៊ុន CCES Engineering Services Co., LTD ទទួលបានផ្លូវចំនួន០៥ខ្សែ។ ទី២.ក្រុមហ៊ុន TCM Engineering Co., LTD ទទួលបានផ្លូវចំនួន១២ខ្សែ និងទី៣. ក្រុមហ៊ុន LS Construction (Lee Service Cambodia) PTC., LTD ទទួលបានផ្លូវចំនួន១៧ខ្សែ៕

1...2,1622,1632,164...3,259 Page 2,163 of 3,259