កាន់តែបារម្ភៈការបិទទីតាំងដើម្បីទប់ការរាតត្បាតជំងឺកូវីដ១៩កើនឡើងដល់២៩ទីតាំងនៅក្រុងព្រះសីហនុ

ដោយគង់ សូរិយា

ភ្នំពេញៈ រដ្ឋបាលខេត្តព្រះសីហនុ សម្រេចដាក់សណ្ឋាគារ ភោជនីយដ្ឋាន អគារស្នាក់នៅរួម ផ្សារទំនើប មន្ទីរពេទ្យឯកជន ចំនួន២៩ទីតាំងនៅក្រុងព្រះសីហនុ ខេត្តព្រះសីហនុដើម្បីទប់ស្កាត់ការរីករាលដាលជំងឺកូវីដ១៩។

រដ្ឋបាលខេត្តព្រះសីហនុ បានចេញលិខិតផ្អាកអាជីវកម្ម ជាបណ្តោះអាសន្នកន្លងទៅ សម្រាប់ប្រើប្រាស់ជាមណ្ឌលចត្តាឡីស័កនៅក្នុងមូលដ្ឋានរបស់ខ្លួន៕

តើអាកាសយានដ្ឋានធំជាងគេបំផុតលើពិភពលោកស្ថិតក្នុងប្រទេសណា?

ដោយៈ ប៊ី

ភ្នំពេញៈ អាកាសយានដ្ឋានអន្តរជាតិ King Fahd International Airport  (KFIA) ដែលត្រូវបានស្គាល់ថាជា អាកាសយានដ្ឋានអន្តរជាតិKing Fahd Airport គឺជាអាកាសយានដ្ឋានអន្តរជាតិ ដែលបម្រើដល់ទីក្រុងDammam ប្រទេសអារ៉ាប៊ីសាអូឌីត និងអាកា​សយានដ្ឋានធំជាងបំផុតនៅលើពិភពលោក។

អាកាសយានដ្ឋាននេះ មានទីតាំងស្ថិតនៅចម្ងាយ៣១គីឡូម៉ែត្រ ភាគពាយព្យនៃទីប្រជុំជនទីក្រុង Dammam និងត្រូវបានដាក់ឈ្មោះ តាមអតីតស្តេចអារ៉ាប៊ីសាអូឌីត Fahd ibn Abdulaziz។ អាកាសយានដ្ឋាននេះ ក៏បម្រើឱ្យប្រជាជននៅតំបន់ភាគខាងកើតនៃប្រទេសអារ៉ាប់ប៊ីសាអូឌីត និងជាអាកាសយានដ្ឋានអន្តរជាតិសំខាន់មួយ ក្នុងចំណោមអាកាសយានដ្ឋានអន្តរជាតិទាំងបីនៅប្រទេសនេះ។

King Fahd Internationalជាអាកាសយានដ្ឋានធំជាងគេបំផុត នៅលើពិភពលោកគិតលើផ្ទៃដី ដែលមានទំហំប្រមាណជា៧៧៦គីឡូម៉ែត្រម៉ែត្រការ៉េ (៣០០ម៉ាយការ៉េ) ទោះបីជាសំណង់ និងផ្លូវរត់របស់អាកាសយានដ្ឋាននេះ មានត្រឹមតែ៣៦.៧៥គីឡូម៉ែត្រមែត្រការ៉េ (១៤.១៩ ម៉ែលការ៉េ)។

អាកាសយានដ្ឋានទំហំធំជាងគេលើពិភពលោកនេះ មានអ្នកដំណើរត្រឹមរជាង១០លាន ដែលនាក់ប្រើប្រាស់ព្រលានយន្តហោះនេះក្នុងឆ្នាំ ហើយមានក្រុមហ៊ុនអាកាសចរណ៍ចំនួន៣៧ ប្រតិបត្តិការជើងហោះហើរចេញ និងចូលតាមរយៈព្រលានយន្តហោះនេះ​។

អាកាសយានដ្ឋាននេះ បម្រើជាមជ្ឈមណ្ឌលមួយដល់ក្រុមហ៊ុន សាឌីអារ៉ាប៊ីសាអូឌីតអ៊ែរឡាញ និងFlynas។

ព្រលានយន្តហោះនេះ ត្រូវបានគ្រប់គ្រង និងប្រិត្តិការណ៍ដោយ ក្រុមហ៊ុន Saudi Aramco ដែលជាក្រុមហ៊ុនប្រេងកាតរបស់រដ្ឋ ដែលប្រើវាមធ្យោបាយដឹកជញ្ជូននិយោជិកចូល និងចេញពីទីតាំងយុទ្ធសាស្ត្រ ដូចជាតំបន់ Yanbu តំបន់Tanajib and តំបន់ Shaybah។

អាកាសយានដ្ឋានត្រូវបានបម្រើដោយផ្លូវរត់ពីរ ប្រវែង៤គីឡូម៉ែត្រ (២,៥ ម៉ៃល) និងមានអគារស្ថានីយទទួលអ្នកដំណើរចំនួន៣ ក្នុងនោះមានស្ថានីយចំណតអ្នកដំណើរ ស្ថានីយ Aramco ត្រូវបានប្រើដោយបុគ្គលិកក្រុមហ៊ុន Aramco និងស្ថានីយបម្រុងទុកសម្រាប់ប្រើប្រាស់ដោយគ្រួសាររាជវង្សអារ៉ាប៊ីសាអូឌីត៕

រដ្ឋបាលខេត្តកំពតចាប់ផ្តើមពង្រឹងការគ្រប់គ្រងតំបន់ឆ្នេរ ដើម្បីបញ្ចៀសការអភិវឌ្ឍខុសច្បាប់

ដោយៈ រ៉ាណេត

កំពតៈ ជាមួយនឹងកំណើននៃគម្រោងអភិវឌ្ឍន៍ជាច្រើន ពីវិស័យឯកជនដែលភាគច្រើន ជាការកែច្នៃបង្កើតតំបន់ទេសចរណ៍កម្សាន្តធម្មជាតិ កម្រិតខ្ពស់នៅតាមតំបន់ដៃព្រែក តំបន់ព្រៃកោងកាង និងតំបន់ឆ្នេរនានានៅក្នុងខេត្តកំពត អាជ្ញាធរបានយកចិត្តទុកដាក់ពង្រឹងការគ្រប់គ្រងបន្ថែម ជៀសវាងមានការឆ្លៀតឱកាសពីជនខិលខូច បំពានដីតំបន់ហាមឃាត់យកធ្វើជាកម្មសិទ្ធិ ឬលក់បន្តដល់វិស័យឯកជនដោយខុសច្បាប់។

អាជ្ញាធរខេត្តកំពតក្រោមការដឹកនាំដោយលោកជាវ តាយ អភិបាលខេត្តកំពតនៅថ្ងៃទី១ ខែមីនា ឆ្នាំ២០២១ម្សិលមិញនេះ  បានបើកកិច្ចប្រជុំពិសេសមួយ ដើម្បីធ្វើការត្រួតពិនិត្យទៅលើការងារគ្រប់គ្រងតំបន់សំខាន់ៗ ដែលជាដែនដីហាមឃាត់របស់រដ្ឋ ជាពិសេ​សផ្តោតសំខាន់ទៅលើតំបន់ឆ្នេរ តំបន់ដៃព្រែកមានព្រៃកោងកាង ដែលវិស័យឯកជនចង់ធ្វើការអភិវឌ្ឍជាតំបន់ទេសចរណ៍ធម្មជាតិ។

ក្រោមការចូលរួមពីសំណាក់មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ ប្រធានមន្ទីររៀបចំដែនដី នគរូបនីយកម្ម និងសំណង់ និងសូរិយោដី រួមជាមួយនឹងមន្ត្រីជំនាញស្ថាប័នដែលពាក់ព័ន្ធ លោកជាវ តាយបានក្រើនរំលឹកឱ្យមានការបង្កើនកិច្ចយកចិត្តទុកដាក់ឱ្យបានខ្លាំង ទៅលើការគ្រប់គ្រងនៅតាមតំបន់ហាមឃាត់មួយចំនួន ជាពិសេ​សតំបន់ ដែលមានព្រៃកោងកាងនៃតំបន់តំបន់ឆ្នេរ ដែលជាទីតាំងគោលដៅរបស់វិស័យឯកជនអភិវឌ្ឍន៍ជាតំបន់កម្សាន្ត ដែលធ្វើយ៉ាងណាបញ្ចៀសបញ្ហាដែលប្រាសចាកពីច្បាប់ដែលបានកំណត់ ឬអាចខូចខាតដល់វិស័យឯកជន។

អាជ្ញាធរខេត្ត រួមជាមួយមន្ត្រីជំនាញដែលពាក់ព័ន្ធ បានសម្រេចឯកភាពគ្នាទៅលើ ការប្រគល់ភារកិច្ច ជូនក្រុមការងារបច្ចេកទេសចុះពិនិត្យផ្ទៀងផ្ទាត់ ព្រៃកោងកាងដែលនៅសល់ជាក់ស្តែង ដូចជា ការកំណត់បោះបង្គោលព្រំដែនតំបន់ព្រៃកោងកាង រៀបចំចុះបញ្ជីដីព្រៃកោងកាងជូនក្រសួង ស្ថាប័នណាមួយគ្រប់គ្រងឲ្យបានច្បាស់លាស់ ធ្វើការផ្ទៀងផ្ទាត់ទិន្នន័យ ដែលគ្រប់គ្រងដោយរដ្ឋបាលជលផល និងមន្ទីរឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ ដើម្បីដឹងច្បាស់ថាទីតាំងណាខ្លះដែលពាក់ព័ន្ធ ឬត្រួតស៊ីគ្នា។

មួយរយៈចុងក្រោយនេះ ខេត្តកំពត បានក្លាយជាគោលដៅវិនិយោគលើវិស័យទេសចរណ៍របស់វិនិយោគិន ក្នុងស្រុកជាច្រើនគម្រោង ដែលគោលដៅសំខាន់នៃគម្រោងអភិវឌ្ឍន៍មាននៅតាមតំបន់ដៃព្រែក តំបន់ឆ្នេរ តំបន់ព្រៃកោងកាង ដែលភាគច្រើនពាក់ព័ន្ធទៅនឹងដែនអភិរក្សរបស់រដ្ឋ។ ដូច្នេះការកំណត់ និងពង្រឹងការគ្រប់គ្រងខាងលើនេះ អាចថែរក្សាបានទាំងដីសម្បត្តិរបស់រដ្ឋ និងបញ្ចៀសការខាតបង់ផលប្រយោជន៍របស់វិស័យឯកជន ដែលអាចចាញ់បោកជនខិលខូច ក្រោយពេលទិញប៉ះចំដីហាមឃាត់៕

តើ​ឈរ​មូលដ្ឋាន​អ្វីខ្លះ​ជម្រុញ​ឲ្យ​សេដ្ឋកិច្ច​ចិន​ហក់​ឡើងដល់ ៩ភាគរយ​នៅ​ឆ្នាំនេះ ខណៈ​ប្រទេស​ជាច្រើន​នៅមាន​បញ្ហា

ដោយៈ​ស៊ីវ ម៉េង

ភ្នំពេញៈ អ្នកវិភាគ និង​ការព្យាករន៍​របស់​សេដ្ឋវិទូ​នានា​បាន​រកឃើញថា ការកើនឡើង​នៃ​ផលទុនជាតិ​សរុប​របស់​ប្រទេស​ចិន​ដ៏​លឿន កំពុង​ធ្វើ​ឲ្យ​មនុស្ស​ជាច្រើន​ងឿងឆ្ងល់ ខណៈ​ប្រទេស​ភាគច្រើន កំពុង​ជួប​វិបត្តិ​នៅឡើយ។

អ្នកវិភាគ​បាន​ពន្យល់ថា ការកើនឡើង​នៃ​សេដ្ឋកិច្ច របស់​មហា​យក្ស​ចិន​នៅ​ឆ្នាំ២០២១នេះ ដោយសារ​កត្តាសំខាន់ៗ​ជាច្រើន​រួមមាន ទី៣ អំណាច​នៃ​ការទិញ​ក្នុងស្រុក ដោយសារ​ការ​ងើប​ឡើងវិញ​នៃ​សេដ្ឋកិច្ច​ចិន មាន​រង្វង់៥ភាគរយ​នៅ​ចុង​ត្រីមាស​ទី៤កាលពី​ឆ្នាំមុន ទី២ កំនើន​នៃ​ការវិនិយោគ​ពី​បរទេស​មកកាន់​ប្រទេស​ចិន ទី៣ កំនើន​នៃ​ការនាំចេញ ពិសេស​ទំហំ​ពាណិជ្ជកម្ម​របស់​ចិន ជាមួយ​បណ្តា​ប្រ​ទេ​ស្ថិតក្នុង​សហគមន៍​គឺ​រ៉ុ​ប បាន វ៉ា​ដាច់​សហរដ្ឋ​អាម​រិ​ក។

ទី៤ ការកើនឡើង​នូវ​កម្រិតជីវភាព​ររ​បស់​ប្រជាជន​ចិន ពោលគឺ​ជីវភាព​របស់​ប្រជាជន​ចិន​កាន់​តែមាន​ភាពល្អប្រសើរ​ឡើង និង​ការដាក់ចេញ​គោលនយោបាយ​អាទិភាព ដោយ​ពង្រឹង និង​កាត់បន្ថយ​ភាពក្រីក្រ​ក្នុងចំណោម​ប្រជាជន​ចិន និង​ទី៥ ការគ្រប់គ្រង​បានល្អ​បំផុត​នៃ​ជំងឺ​កូ​វីដ១៩ ។

មូលនិធិ​រូបិយវត្ថុ​អន្តរជាតិ (IMF) បាន​ព្យាករណ៍​ថា សេដ្ឋកិច្ច​មហា​យក្ស​ចិន​នឹង​កើនឡើង ក្នុង​រង្វង់​ជាង៨ភាគរយ​នៅ​ឆ្នាំ២០២១នេះ​ផងដែរ។

ជាមួយគ្នា​នឹង​ការកើនឡើង នូវ​ឥ​ទ្ឋិ​ពល​សេដ្ឋកិច្ច​របស់​ចិន​នៅលើ​ពិភពលោក សេដ្ឋវិទូ​នានា​ក៏បាន​ព្យាករណ៍​ថា សេដ្ឋកិច្ច​ចិន នឹង​វ៉ា​ដាច់​សហរដ្ឋអាមេរិក​នៅ​ឆ្នាំ២០២៨ខាងមុខនេះ។

អ្នកជំនាញ​សេដ្ឋកិច្ច​មួយរូប​មកពី Bank of America ដែលជា​ធនាគារ​វិនិយោគ​ពហុ​ជាតិ​សាសន៍ និង​ជា​ក្រុមហ៊ុន​ហិរញ្ញវត្ថុ ដ៏​ធំ​របស់​សហរដ្ឋអាមេរិក​បាន​លើកឡើងថា មហា​យក្ស​ចិន មានឱកាស​ដ៏​ល្អ ក្នុងការ​បង្កើន​ទំហំ​សេដ្ឋកិច្ច​របស់ខ្លួន​ទ្វេដង និង​វ៉ា​ឈ្នះ​សហរដ្ឋអាមេរិក ក្លាយជា​សេដ្ឋកិច្ច​ធំ​បំផុត​ក្នុង​ពិភពលោក។

ខណៈ​ប្រទេស​ចិន កំពុង​ព្យាយាម​ធ្វើយ៉ាងណា ឱ្យ​ក្លាយខ្លួនជា​ប្រទេស​ជឿនលឿន ប្រធានាធិបតី​ចិន លោក​ស៊ី ជីន​ភីង បានលើកឡើង​កាលពី​ខែវិច្ឆិកា ឆ្នាំ២០២០ ថា វា​អាចទៅរួច​ក្នុងការ​បង្កើន​ទ្វេដង នូវ​ផលិតផល​ក្នុងស្រុក​សរុប (GDP) និង​ចំណូល​ជា​មធ្យម​ក្នុង​មនុស្សម្នាក់ៗរបស់​ប្រទេស​ចិន នៅត្រឹម​ឆ្នាំ២០៣៥ ។

ការបង្កើន​ទំហំ​ទ្វេដង​នូវ GDP របស់​ប្រទេស​ចិន តម្រូវឱ្យ​សេដ្ឋកិច្ច​ទទួលបាន​កំនើន​ប្រចាំឆ្នាំ​ជា​មធ្យម ៤.៧% សម្រាប់​រយៈពេល ១៥ឆ្នាំ​ខាងមុខ ដែល​អ្នកសង្កេតការណ៍​មួយចំនួន​ជឿថា​ពិតជា​ពិបាក​សម្រេចបាន​ណាស់។

ទោះជា​យ៉ាងណា លោកស្រី Helen Qiao ប្រធាន​ផ្នែក​សិក្សា​ស្រាវជ្រាវ​អំពី​សេដ្ឋកិច្ច​អាស៊ី ប្រចាំ​ស្ថាប័ន​សិក្សា​ស្រាវជ្រាវ BofA Global Research ដែលជា​ផ្នែក​មួយ​របស់ Bank of America បាន​លើកឡើងថា វិធានការ​កែទម្រង់​មួយចំនួន នឹង​ជួយ​រុញច្រាន​ប្រទេស​ចិន​ឱ្យទៅដល់​ចំណុច​នោះ៕

ការសាងសង់​ព្រលានយន្ដហោះ​អន្តរជាតិ​សៀមរាប​អង្គរ​ថ្មី គ្រោង​នឹង​សម្រេច ៦៧ភាគរយ​នៅ​ចុងឆ្នាំ២០២១នេះ

ដោយៈ រ៉ា​ណេ​ត

សៀមរាបៈ ផ្អែក​តាម​ផែនការ​នៃ​ការសាងសង់ ព្រលានយន្ដហោះ​អន្តរជាតិ​សៀមរាប​អង្គរ​ថ្មី ដែល​កំពុង​សម្រុក​ការសាងសង់​យ៉ាងសកម្ម នាពេល​បច្ចុប្បន្ននេះ​គ្រោង​នឹង​សម្រេច​ឱ្យបាន ប្រមាណ៦៧ភាគរយ​នៅត្រឹម​ដំណាច់ឆ្នាំ២០២១ ។  នេះ​បើតាម​ការ​បង្ហើប​ឱ្យដឹងពី​អ្នកជំនាញ​នៃ​ក្រុមការងារ​ចិន ដែល​កំពុង​ប្រតិបត្តិការ​នៅ​ការដ្ឋាន​សាងសង់​នៅ​ព្រឹក​ថ្ងៃទី១ ខែមីនា ឆ្នាំ២០២១នេះ។

អ្នកជំនាញ និង​ជា​ថ្នាក់ដឹកនាំ​ផ្នែក​ការដ្ឋាន​បានបញ្ជាក់​ថា សម្រាប់​ឆ្នាំ២០២១នេះ លទ្ធផល​នៃ​ការសាងសង់ នឹងត្រូវ​មានការ​បែងចែក​ដាច់ដោយឡែក​ពីគ្នា ហើយ​មាន​ផ្នែក​ខ្លះ​សម្រេចបាន​ច្រើន ហើយ​ផ្នែក​ខ្លះទៀត​សម្រេចបាន​តិច ប៉ុន្តែ​ស្របតាម​ផែនការ​ដែល​បាន​គ្រោងទុក​ទាំងអស់។

ការសាងសង់​ស្ថានីយ​អ្នកដំណើរ គ្រោង​នឹង​សម្រេច​ឲ្យ​បាន ៧៨ភាគរយ ការកសាង​តំបន់​ហោះហើរ គ្រោង​នឹង​សម្រេច​ឲ្យ​បាន ៤៥ភាគរយ និង​សំណង់​ហេដ្ឋារចនាសម្ព័ន្ធ​ទូទៅ​របស់​អាកាសយានដ្ឋាន គ្រោង​នឹង​សម្រេច​ឲ្យ​បាន ៥០ភាគរយ។

ចាប់តាំងពី​ដំណើរការ​ការដ្ឋាន សាងសង់​ស្ថានីយ​អ្នកដំណើរ កាលពី​ពាក់កណ្តាល​ខែមីនា​ឆ្នាំ២០២០ មកដល់​ចុងឆ្នាំ២០២០ គឺ​សម្រេចបាន ១៥ភាគរយ។ ចំណែក​ការសាងសង់​តំបន់​ហោះហើរ ដែល​ចាប់ផ្តើម​ការដ្ឋាន​នា​ពាក់កណ្តាល​ខែតុលា មកដល់​ចុងឆ្នាំ២០២០ដូចគ្នា សម្រេចបាន​ប្រមាណ១០ភាគរយ។

ព្រលានយន្តហោះ​នេះ មាន​ផ្លូវ​រត់​ប្រវែង ៣,៦០០ម៉ែត្រ ទទឹង៤៥ម៉ែត្រ មាន៣៨ចំណត​យន្តហោះ  និង​មាន​ក្រឡា​ផ្ទៃ​ស្ថានីយ៍ អ្នកដំណើរ​ជាង៨ម៉ឺន​ម៉ែត្រក្រឡា ដែល​អាច​ទទួល​អ្នកដំណើ​រ​ជាប្រចាំ​ឆ្នាំ​ប្រមាណ​ជា ៧លាន​នាក់។

ព្រលានយន្ដហោះ​អន្តរជាតិ​សៀមរាប​ថ្មី គ្រោង​វិនិយោគ​ទឹកប្រាក់​ប្រមាណ៩០០លាន​ដុល្លារ​អាមេរិក។ ព្រលានយន្តហោះ​នេះ ទីតាំង​ស្ថិតនៅ​ឃុំ​ពពេល ស្រុក​សូទ្រនិគម ខេត្ដ​សៀមរាប មាន​វិសាលភាព​លើ​ផ្ទៃដី​ទំហំ​ប្រមាណ ៧០០ហិកតា បានចាប់ផ្តើម​សាងសង់​ពីថ្ងៃ​ទី១៥ ខែមីនា ឆ្នាំ២០២០ និង​គ្រោង​បញ្ចប់​នៅ​ថ្ងៃទី១៤ ខែមីនា ឆ្នាំ២០២៣ ៕

ការពង្រីក​ផ្លូវជាតិ​លេខ៤៨ ជា​បួន​គន្លង​រថយន្ត​នឹង​ចាប់់ផ្តើម​នៅ​ខែ​មិនា​នេះ

ដោយៈ​គង់ សូរិយា

ភ្នំពេញៈ អភិបាលខេត្ត​កោះកុង លោកស្រី​មិថុនា ភូ​ថង បាន​មានប្រសាសន៍ថា ការពង្រីក​ផ្លូវជាតិ​លេខ៤៨ ជា​បួន​គន្លង ក្រោម​ជំនួយ​របស់​សាធារណៈរដ្ឋ​កូរ៉េ នឹង​ចាប់ផ្តើម​នៅ​ខែ​មិនា​នេះ បើសិនជា​គ្មាន​ការប្រែប្រួល​អ្វី​ទេនោះ។

លោកស្រី​បាន​មានប្រសាសន៍ប្រាប់​ស្ថានីយ៍ទូរទស្សន៍ ក្នុងស្រុក​មួយ​កាលពី​សប្តាហ៍​មុន​ថា ក្រសួង​សាធារណៈការ និង​ដឹកជញ្ជូន​បាន​ដេញថ្លៃ​ក្រុមហ៊ុន ដើម្បី​ស្ថាបនា​ផ្លូវ​នេះ​រួចហើយ ដោយ​ការពង្រីក​ផ្លូវ​នេះ​នឹងធ្វើ​នៅក្នុង​ខែ​មិនា​នេះ ប៉ុន្តែ​យ៉ាងណាក៏ដោយ​លោកស្រី​មិន​បញ្ជាក់ថា ក្រុមហ៊ុន​ណា​ជា​អ្នកឈ្នះ​ការដេញថ្លៃ សាងសង់​និង​ពង្រីក​ផ្លូវ​ដ៏​សំខាន់​នេះ​នៅឡើយ​ទេ។

លោកស្រី​បន្តថា “ការពង្រីក​ផ្លូវជាតិ​លេខ៤៨នេះ នឹងធ្វើ​ឲ្យ​ខេត្តកោះកុង​កាន់តែ​រីកចម្រើន និង​មាន​សក្តានុពល​ថែមទៀត ខណៈ​ក្រុមហ៊ុន​កាន់តែច្រើន​បានមក​វិនិយោគ​នៅក្នុង​ខេត្ត​មួយ​នេះ” ។ លោកស្រី​បន្តថា “នៅ​ឆ្នាំ២០២០កន្លងមក បណ្តា​ខេត្ត​នានា​មានការ​វិនិយោគ​ធ្លាក់ចុះ តែ​ការវិនិយោគ​លើ​សេវាកម្ម​បដិសណ្ឋារកិច្ច​មានការ​កើនឡើង” ។

ការពង្រីក​ផ្លូវជាតិ​លេខ៤៨ ត្រូវបាន​ប្រកាស​ដោ​យស​ម្តេច​អគ្គមហាសេនាបតី​តេ​ជោ​ហ៊ុន សែន​នាយករដ្ឋមន្ត្រី​នៃ​កម្ពុជា កំឡុងពេល​សម្តេច​អញ្ជើញ​ជា​អធិបតី​ក្នុង​ពិធី​បើក​កម្មវិធី​បុណ្យ​សមុទ្រ​កាលពី​ឆ្នាំ២០១៩ ដែល​បាន​ប្រារ​ព​ធ្វើ​នៅ​ទី​រួម​ខេត្តកោះកុង។

លោក​វ៉ា​ស៊ីម សូរិយា អ្នកនាំពាក្យ​ក្រសួង​សាធារណៈការ និង​ដឹកជញ្ជូន​បាន​មានប្រសាសន៍ថា លោក​មិន​បានទទួល​របាយការណ៍​ពី​ការពង្រីក​ផ្លូវ​នេះ​ទេ ដោយ​លោក​អះអាងថា​មិន​បានទទួល​របាយការណ៍​នោះទេ ព្រោះ​លោក​ជាប់រវល់​ការងារ​បណ្តុះបណ្តាល​ច្រើនជាង។

លោក​សូរិយា​បាន​រុញ​ឲ្យ​សួរ​ទៅកាន់ លោក​សូ វិក​ទ័​រ ដែលជា​អ្នកទទួលបន្ទុក​ការងារ​ស្ថាបនា​និង​ពង្រីក​ផ្លូវ​នេះ៕

ព្រលានយន្តហោះ​ខេត្តមណ្ឌលគិរី គ្រោង​នឹង​ចំណាយ​ប្រាក់​ប្រមាណ ១០០លានដុល្លារ​អាមេរិក

ដោយៈ​គង់ សូរិយា

ភ្នំពេញៈ មន្ត្រីជាន់ខ្ពស់​នៃ​រដ្ឋលេខាធិការដ្ឋាន អាកាសចរណ៍​ស៊ីវិល​បាន​បង្ហើប​ឲ្យ​ដឹងថា ការសាងសង់​អាកាសយា​ន​ដ្ឋា​ន ខេត្តមណ្ឌលគិរី គ្រោង​នឹង​ចំណាយ​ទុនវិនិយោគ​ប្រមាណ ១០០លាន​ដុល្លារ​អាមេរិក។

លោក​ស៊ិន ចាន់​សិរី​វុត្ថា អ្នកនាំពាក្យ​និង​ជា​អនុរដ្ឋលេខាធិការ នៃ​រដ្ឋលេខាធិការដ្ឋាន​អាកាសចរណ៍​ស៊ីវិល បាន​មានប្រសាសន៍​ឲ្យ​ដឹង​តាម​ទូរស័ព្ទ នា​រសៀល​ថ្ងៃទី១ មិនា​កន្លងមក​ថា បច្ចុប្បន្ន​ក្រុមការងារ​បច្ចេកទេស និង​ក្រុមហ៊ុន Power China Group កំពុង​សិក្សា​រួមគ្នា មុន​ឈានដល់​ការចុះ កិច្ចព្រមព្រៀង​ជាមួយ​រដ្ឋាភិបាល ដើម្បី​អាច​ចាប់ផ្តើម​សាងសង់​គំរោង​នេះ​នៅ​ចុង​ឆ្នាំនេះ ឬ​ដើមឆ្នាំ២០២២ខាងមុខ។

លោក​បន្តថា “ផែនការ​នេះ​មិនមាន​ការប្រែប្រួល​នោះទេ ការសាងសង់​នឹង​ដំណើរការ​តាម​ការគ្រោងទុក ដោយ​ទុនវិនិយោគ​ព្រលាន​នេះ អាចមាន​ទំហំ​ទឹកប្រាក់​កើន​ដល់១០០លាន​ដុល្លារ” ។

នៅពេល​លើកឡើង​ពី​ភាពជោគជ័យ របស់​អាកាសយានដ្ឋាន​នេះ លោក​ស៊ិន ចាន់​សិរី​វុត្ថា បាន​ជំរុញ​ឲ្យ​ពិនិត្យមើល​ផែនការ អភិវឌ្ឍន៍​របស់​ក្រសួងទេសចរណ៍ ដែល​គ្រោង​ប្រែក្លាយ​ខេត្ត​នេះ​ជា​តំបន់កសិឧស្សាហកម្ម ផ្តល់​សេវាកម្ម​ផ្គត់ផ្គង់​បន្លែ បង្កា​ទៅកាន់​មូលដ្ឋាន​ទេសចរណ៍​ទូទាំងប្រទេស ក៏ដូចជា ការលើក​កំពស់​វិស័យ​អេកូ​ទេសចរណ៍។

ក្រសួងទេសចរណ៍ បានដាក់​ចេញ​នូវ​ផែនការមេ​របស់ខ្លួន ដោយ​គ្រោង​ប្រែក្លាយ​ខេត្តមណ្ឌលគិរី​ជា​តំបន់់​សេដ្ឋកិច្ច​ពហុ​បំណង គ្រោង​ប្រែក្លាយ​តំបន់​ជុំវិញ​ព្រលានយន្តហោះ​ជា​តំបន់ឧស្សាហកម្ម និង​គ្រោង​ប្រែក្លាយ​តំបន់​ធម្មជាតិ​ក្នុង​ខេត្ត ជា​មូលដ្ឋាន​សម្រាប់​ទាក់ទាញ​ភ្ញៀវ​ទេសចរណ៍​លំហែរ​កាយ​កម្រិត​ខ្ពស់​មួយ។

រដ្ឋាភិបាល​កម្ពុជា ក្រោម​ការដឹកនាំ​របស់​សម្តេច​តេ​ជោ​ហ៊ុន សែន​បាន​អនុ​ញ្ញា​ត្ត​ឲ្យ​ក្រុមហ៊ុន Power China Group វិនិយោគ​សាងសង់​គំរោង​នេះ តាមបែប BOT ហើយ​កាលពីពេលថ្មីៗនេះ សម្តេច​តេ​ជោ​បាន​បង្កើត​គណកម្មការ​អន្តរក្រសួង ដើម្បី​រៀបចំ​សហការ​ជាមួយ​ក្រុមហ៊ុន​ខាងលើ ក្នុង​គោលដៅ​ព​ន្លឿ​ន​ការសាងសង់​ព្រលានយន្តហោះ​នេះ៕

អ្នកជំនាញ៖ ទីផ្សារ​អចលនទ្រព្យ​កម្ពុជា​នឹង​ងើប​ឡើងវិញ​ប្រមាណ ៧០ភាគរយនៅ​ចុង​ឆ្នាំនេះ

ដោយៈ រ៉ា​ណេ​ត

ភ្នំពេញៈ វិស័យ​អចលនទ្រព្យ​នៅក្នុង​ប្រ​ទេ​កស​ម្ពុ​ជា បានទទួល​រង​នូវ​ផលប៉ះពាល់​ពី​ការបញ្ជាទិញ និង​វិនិយោគ​មកពី​ក្រៅប្រទេស ដែល​បង្កឡើង​ដោយ​ការរីក​រាល​នៃ​ជំងឺ​កូ​វីដ ១៩  រហូត​ម​ដល់​បច្ចុប្បន្ន ប៉ុន្តែ​អ្នកជំនាញ​មើលឃើញថា  វិស័យនេះ​នឹង​ងើបឡើង​វិញ ប្រមាណ​ពី៦០ ទៅ៧០ភាគរយ​នៅ​ចុងឆ្នាំ​នេះ។

លោកស្រី Grace Rachny Fong អគ្គនាយិកា​ក្រុមហ៊ុន Century 21 Cambodia បាន​ទទួលស្គាល់ថា  វិស័យ​អ​លន​ទ្រព្យ ពិតជា​ទទួលរង​នូវ​ផលប៉ះពាល់ ពី​ជំងឺ​កូ​វីដ១៩ ដូច​ទៅនឹង​វិ​ស័​ផ្សេងទៀត ប៉ុន្តែ​នៅ​ចុងឆ្នាំ​នេះ​នឹង​ប្រសើរ​ឡើងវិញ បន្ទាប់ពី​កម្ពុជា​បើក​យុទ្ធនា​ការចាក់​វ៉ាក់សាំង​នៅ​ទូទាំងប្រទេស និង​ប្រទេស​មួយចំនួន នៅក្នុង​តំបន់​អាស៊ាន​ក៏បាន​ចាប់ផ្តើម​ចាក់​វ៉ាក់សាំង​ប្រឆាំងនឹង​ជំងឺ​កូ​វីដ១៩ដែរ។

លោកស្រី​បន្តថា “ខ្ញុំ​រំពឹងថា​នៅ​ចុង​ឆ្នាំនេះ គឺ​នៅក្នុង​ខែ១១ ឬ​ខែ១២ អ្នកធ្វើដំណើរ​នៅតាម​បណ្តា​ប្រទេសជិតខាង​របស់​យើង​សឹង្ហ​បុរី មា​ឡេ​ស៊ី និង​ប្រទេស​ជប៉ុន។ គាត់​នឹងមាន​ទំនុកចិត្ត​កាន់តែខ្លាំង ហើយ​ធ្វើការ​ហោះហើរ​ពី​ប្រទេស​គាត់ មក​ប្រទេស​យើង ដោយសារ​ប្រទេស​ទាំងសងខាង​មាន​វ៉ាក់សាំង​ការពារ” ។

បើតាម​លោកស្រី  Grace Rachny Fong វិស័យ​អ​លន​ទ្រព្យ​នៅក្នុង​ប្រទេស​កម្ពុជា​នឹងមាន​ភាពល្អ​ប្រសើរឡើង​ចន្លោះ​ពី៦០ ទៅ៧០ ភាគរយ​នៅ​ចុងឆ្នាំ២០២១ នេះ ព្រោះ​ប្រទេស​ទាំង​នៅ​កម្ពុជា និង​តំបន់​បានទទួល​ការចាក់​វ៉ា​ក់​ជំងឺ​កូ​វីដ១៩ ។

លោក​ច្រឹ​ក សុខ​នី​ម ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា បានឱ្យដឹងថា វិស័យ​អចលនទ្រព្យ​នៅក្នុង​ប្រទេស​កម្ពុជា បាន​ជួប​បញ្ហា​ប្រឈម​ទៅនឹង​វិបត្តិ​នៃ​ជំងឺ​កូ​វីដ១៩ ប៉ុន្តែ​ភា​ប្រឈម​នេះ មិនអាច​រាំងខ្ទប់​មិនឱ្យ​វិស័យនេះ មិន​ឲ្យ​មានការ​រីកចំរើន​ទេ។

លោក​បន្តថា “បញ្ហា​ប្រឈម​នេះ ត្រូវបាន​ពិភពលោក​ដោះស្រាយ តាមរយៈ​ការប្រើប្រាស់​បច្ចេកវិទ្យា​អន​ឡាញ ។ ជាមួយគ្នានេះ វិស័យ​អចលនទ្រព្យ ក៏បាន​ពឹងពាក់​បច្ចេកវិទ្យា​នេះ ក្នុង​ការទិញ​លក់​វិស័យ​អ​លន​ទ្រព្យ​ទាំង នៅក្នុង​ប្រទេស​កម្ពុជា តំបន់​អាស៊ាន និង​ពិភពលោក​ទាំងមូល” ។

លោក​សុខ​នី​ម​បាន​ថ្លែងថា ជារួម​យើង​មើលឃើញថា ប្រទេស​កម្ពុជា ជា​ប្រទេស​សំណាង​មួយ ដែលមាន​ការគ្រប់គ្រង​បានល្អ​លើ​ជំងឺ​កូ​វីដ១៩ ពី​សំណាក់​រាជរដ្ឋាភិបាល​ក​ម្ពុ​ជា ដែលមាន​សម្តេច​ជោ​ហ៊ុន សែន បាន​ដោះស្រាយ​ទៅ​វិបត្តិ​នេះ ក្នុង​រយៈពេល២ដង​រួចមកហើយ។

ទោះជា​យ៉ាង លោក​ច្រឹ​ក សុខ​នី​ម​ថា នៅក្នុង​វិបត្តិ​នេះ ក៏​ជា​ឱកាស​សម្រាប់ធ្វើ​ការវិនិយោគ​លើ​វិស័យ​អចល​ទ្រព្យ បើទោះបី​មិនមាន​វិនិយោគ​មកពី​ក្រៅប្រទេស ប៉ុន្តែ សម្រាប់​វិនិយោគិន​នៅក្នុង​ស្រុក នៅតែ​បន្ត​ចាប់យក​ឱកាស​នេះ ដើម្បី​ធ្វើការ​វិនិយោគ​បន្ត ហើយ​វិស័យនេះ នៅតែ​បន្ត​ឆ្ពោះទៅមុខ៕

អ្នកជំនាញៈ សកម្មភាពវិនិយោគលើវិស័យអចលនទ្រព្យគ្រប់ផ្នែកកំពុងជួយជម្រុញវិស័យនេះឆ្ពោះទៅមុខ

ដោយៈរ៉ាណេត

ភ្នំពេញៈ ទោះជាស្ថិតនៅក្នុងបរិបថ ដែលកំពុងប្រឆាំងជាមួយនឹងព្រឹត្តិការណ៍ផ្ទុះជំងឺកូវីដ១៩ ក្នុងសហគមន៍នាពេលបច្ចុប្បន្ន គេសង្កេតឃើញថាសកម្មភាពនៃការទិញលក់លំនៅដ្ឋានតម្លៃសមរម្យ ជាពិសេសគម្រោងដីឡូតិ៍នៅតែបន្តមាន ដែលជាចរន្តមួយជួយទ្រទ្រង់ និងជំរុញឱ្យទីផ្សារអចលនទ្រព្យនៅកម្ពុជានៅតែបន្តភាពរឹងមាំ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍នៅរសៀថ្ងៃទី១ ខែមីនា ឆ្នាំ២០២១ថា គ្រប់សកម្មភាពទិញលក់ជួលនៃផ្នែកណាមួយក្នុងទីផ្សារអចលនទ្រព្យ សុទ្ធតែជាចំណុចល្អ ដែលជួយធ្វើឱ្យវិស័យមួយនេះមានភាពរឹងមាំ ជាពិសេសចូលរួមជួយទ្រទ្រង់ទីផ្សារអចលនទ្រព្យ ដែលកំពុងប្រឈមនឹងវិបត្តិនាពេលបច្ចុប្បន្ន។

លោកបន្តថា “ទោះស្ថិតនៅក្នុងវិបត្តិនឹងជំងឺកូវីដ១៩ ក៏វិស័យអចលនទ្រព្យនៅក្នុងប្រទេសកម្ពុជា មិនការធ្លាក់ចុះមកនៅក្នុងកម្រិតសូន្យនោះទេ ពោលវាបាននឹងកំពុងមានដំណើរការទៅមុខ និងមានការគាំទ្រពីប្រជាពលរដ្ឋ”។លោកបន្ថែមថា “វិស័យអចលនទ្រព្យបានទទួលរងនូវផលប៉ះពាល់យ៉ាង ខ្លាំងចាប់តាំពីដើមឆ្នាំ២០២០នេះ(ការរីករាលដាលនៃជំងឺកូវីដ១៩) តាមរយៈការធ្លាក់ចុះនូវការទិញលក់ ប៉ុន្តែមិនធ្លាក់ថ្លៃ ហើយបច្ចុ​ប្បន្ននេះវិនិយោគិន ក្នុងវិស័យនេះក្នុងស្រុកនៅតែបន្តសកម្មភាពដដែល”។

ជាមួយនឹងការលើកឡើងខាងលើនេះ លោកច្រឹក សុខនីម បានបញ្ជាក់ថា សម្រាប់វិស័យអចលនទ្រព្យនៅក្នុងប្រទេសកម្ពុជា នៅតែមានសកម្មភាព ដោយសារមានការគាំទ្រពីអតិថិជននៅក្នុងស្រុក ជាពិសេសដោយសារមានការគាំទ្រពីរាជរដ្ឋាភិបាល តាមរយៈគោលនយោបាយដីធ្លី និងមួយទៀត ការគាំទ្រពីធនគារនៅក្នុងស្រុក ដោយនៅតែបន្តផ្តល់កម្ចីនៅក្នុងវិស័យអចលនទ្រព្យ ហើយនេះគឺជារឿងល្អ ដែលធ្វើឱ្យវិស័យនេះនៅតែមានភាពល្អប្រសើរ បើទោះបីស្ថិតនៅក្នុងវិបត្តិយ៉ាងណាក៏ដោយ។

លោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងប្រាប់គេហទំព័រPropertyarea.asia កាលពីពេលថ្មីៗនេះថា ការចូលរួមទិញ និងវិនិយោគគ្រប់រូបភាព នៅក្នុងវិស័យអចលនទ្រព្យ ពីសំណាក់ប្រជាពលរដ្ឋ ដូចជា ទិញផ្ទះល្វែង ខុនដូ ទិញដីឡូតិ៍ និងដីធ្លីសម្រាប់បម្រើដល់ឧស្សាហកម្ម ក្នុងតម្លៃណាមួយនោះនឹងធ្វើឱ្យវិស័យនេះនៅតែឆ្ពោះទៅមុខ។

លោកបណ្ឌិតបន្តថា “ជាទូទៅយើងមើលឃើញថា តម្លៃអចលនទ្រព្យគ្រប់ប្រភេទនៅក្នុងដំណាក់កាលនេះ ហាក់មិនឡើងថ្លៃនោះទេ  ឬមានអ្នកខ្លះដែលបន្ទាន់លុយអាចលក់ក្នុងតម្លៃមួយក្រោមទីផ្សារ”។លោកបន្តថា “ដូច្នេះកាលណាតម្លៃអចលនទ្រព្យមិនទាន់បានឡើង និងមិនទាន់មានសន្ទុះឡើងលឿន ដោយសារកត្តាបែបនេះ(កូវីដ១៩) វាក៏ជាឱកាសសម្រាប់អ្នករកស៊ីក្នុងវិស័យនេះ ដែលមានលុយគ្រប់គ្រាន់ទិញទុកលក់បន្តយកចំណេញ ក្រោយពេលដែលវិបត្តិត្រូវបានបញ្ចប់”។

លោកបន្តថា ក្រោយពេលបញ្ហាត្រូវបានបញ្ចប់ទាំងស្រុង លោកជឿជាក់ថា១០០ភាគរយ តម្លៃអចលនទ្រព្យនឹងឡើងថ្លៃខ្ពស់ ដូច្នេះការទិញលក់អចលនទ្រព្យ នៅក្នុងរដូវកាលនេះ គឺជាឱកាសចំណេញនៅថ្ងៃក្រោយ៕

ចំណេះដឹងអចលនទ្រព្យៈ មុនចេញធ្វើជំនួញវិស័យអចលនទ្រព្យ តើអ្នកត្រូវចេះវិជ្ជាគុនអ្វីខ្លះ?

ដោយៈលក្ខិណា

ភ្នំពេញៈ ក្នុងវិស័យអចលនទ្រព្យកម្ពុជាបច្ចុប្បន្ននេះ គេសង្កេតឃើញថា មានអ្នកកំពុងធ្វើជំនួញ ក្នុងវិស័យនេះកាន់តែច្រើនឡើងៗ ហើយក៏មានអ្នកទទួលបានជោគជ័យជាច្រើនផងដែរ ហើយក៏មានអ្នកជំនួញថ្មីៗបន្តបន្ទាប់ ចាប់ផ្ដើមធ្វើជំនួញក្នុងវិស័យអច​លនទ្រព្យនេះដែរ។

ប៉ុន្តែការប្រឡូកក្នុងវិស័យនេះ មិនប្រាកដជោគជ័យគ្រប់គ្នានោះទេ ដូច្នេះមុនចេញធ្វើជំនួញវិស័យអចលនទ្រព្យគួរមានចំណេះដឹងអ្វីខ្លះ?។

យោងសារគេហទំព័រហិរញ្ញវត្ថុបានឱ្យដឹងថា មុនចេញនឹងរកស៊ីលើវិស័យអចលនទ្រព្យ អ្នកគួរតែយល់ដឹងនូវចំណុចមួយចំនួនសិនដូចជា

១ ចំណេះដឹងទីផ្សារក្នុងវិស័យអចលនទ្រព្យ

ចំណេះដឹងទីផ្សារ ក្នុងវិស័យអចលនទ្រព្យភាពខុសប្លែក ពីទីផ្សារផលិតកម្ម សេវាកម្ម ក្នុងវិស័យផ្សេងទៀត។ ចំណេះដឹងទីផ្សារអចលនទ្រព្យ គឺសំដៅលើការចេះជ្រើសរើសទីតាំងរបៀបរង្វាយតម្លៃអចលនទ្រព្យ និងគោលដៅនៃការបញ្ចុះទុន។ ការជ្រើសរើសទីតាំងពិតជាមានសារសំខាន់ខ្លាំង ព្រោះទាំងការទិញ ទុកជួល ឬលក់បើសិនជាគ្មានតម្រូវការនឹងត្រូវកប់ដើម។

របៀបរង្វាយតម្លៃអចលនទ្រព្យ ក៏ត្រូវមានបច្ចេកទេសខ្ពស់ បទពិសោធន៍ និងជំនា​ញ ។ អ្នកត្រូវដឹងពីតម្រូវការទីផ្សារ ស្ថានភាពសេដ្ឋកិច្ច កត្តារុញច្រើនឱ្យមានតម្រូវការនិងហាងឆេង ទើបការរង្វាយតម្លៃនោះមានប្រសិទ្ធភាព។

ចំណែកគោលដៅនៃការដាក់ទុនៈ មុននឹងសម្រេចចិត្តរកស៊ី ក្នុងវិស័យនេះ សាម៉ីខ្លួន ត្រូវដឹងថាខ្លួនចង់ធ្វើអ្វី ជាឈ្មួញកណ្ដាលជាភ្នាក់ងារ ឬជាអ្នកវិនិយោគ។

២ ច្បាប់ភូមិបាលនិងនីតិវិធី

មុនចេញរកស៊ី ក៏ត្រូវដឹងពីចំណុចនេះជាមុនសិន ព្រោះបើមិនបានយល់ដឹងពីនីតិវិធីនេះ អ្នករកស៊ីអាចពិបាកក្នុងការសុំសិទ្ធិទំនាក់ទំនង និងអាចជួបប្រទះនឹងវិវាទដីធ្លី ។ ការសុំសិទ្ធិ នឹងអាជ្ញាប័ណ្ណពាក់ព័ន្ធក៏សំខាន់ដែរ ទោះបីជាភ្នាក់ងាររបស់ឈ្មួញកណ្ដាលអចលនទ្រព្យ ក៏ត្រូវសុំអាជ្ញាប័ណ្ណទទួលស្គាល់ពីសមាគមអចលនទ្រព្យងដែរ ។

៣ ការគ្រប់គ្រងលំហូរសាច់ប្រាក់

សម្រាប់វិស័យអចលនទ្រព្យ ការរៀបចំប្រតិបត្តិការហិរញ្ញវត្ថុ ឱ្យបានត្រឹមត្រូវពិតសំខាន់ណាស់ ព្រោះអ្នករកស៊ីអចលនទ្រព្យ ត្រូវការសាច់ប្រាក់ច្រើន ក្នុងប្រតិបត្តិការនីមួយៗ។ ដូច្នេះកាលណាអ្នកអាចគ្រប់គ្រង និងរៀបចំហិរញ្ញវត្ថុរបស់ ការរកស៊ីបានល្អនោះវាធ្វើឱ្យអ្នកមានស្ថេរភាពក្នុងវិស័យនេះ។

ការបណ្ដាក់ទុនក្នុងវិស័យ ក្នុងវិស័យអចលនទ្រព្យគឺមានចំនួនច្រើន ដូច្នេះលំហូរសាច់ប្រាក់ ដែលត្រូវទូទាត់កម្ចី ឬការប្រាក់ត្រូវមានតុល្យភាពជាមួយនឹងចំណូល។

៤ ចេះជ្រើសរើសដៃគូសហការ

ការចាប់ដៃគូរសហការពិតជាមានលំបាក ដោយសារគ្រប់គ្នាអាចមើលឃើញភាពខុសគ្នាក្នុងការរកស៊ី ។ មុននឹងចេញរកស៊ីក្នុងវិស័យនេះ ត្រូវស្វែងយល់និងសិក្សាលម្អិត វាមិនអាស្រ័យទៅលើដើមទុនតែមួយនោះទេ ។

យ៉ាងណាចំណុចទាំង៤ខាងលើនេះ គ្រាន់តែជាចំណុចមួយចំនួនជាគ្រឹះសម្រាប់សហគ្រិនមុននឹងចេញធ្វើជំនួញ ក្នុងការវិនិយោគនិងដាក់ទុនក្នុងវិស័យនេះ ។ មានបុគ្គលជោគជ័យជាច្រើនទៀត ក៏បានយកទ្រឹស្តីផ្សេងមកអនុវត្តន៍ សម្រាប់ជំនួញរបស់ខ្លួនផងដែរ៕