ដោយ ហ្សូលី

ភ្នំពេញ៖ កម្ពុជានាំចេញទំនិញទៅកាន់ទីផ្សារអន្តរជាតិមានទឹកប្រាក់សរុប ២២ពាន់លានដុល្លារ កើនឡើង ១៨ ភាគរយ គិតត្រឹមខែវិច្ឆិកា ឆ្នាំ ២០២០នេះ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍ថា តួលេខចុងក្រោយនៃការនាំចេញ របស់កម្ពុជាបង្ហាញថា មានកំណើន ១៨ ភាគរយ បើទោះបីកម្ពុជាប្រឈមនឹងការរីករាលដាលជំងឺកូវីដ ១៩ ។
ថ្លែងនៅក្នុងពិធីជួបសំណេះសំណាលជាមួយក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្តេចតេជោ នៅថ្ងៃទី ២៥ វិច្ឆិកា ឆ្នាំ ២០២០។

សម្តេចបន្តថា ចំណូលថវិកាចរន្តឆ្នាំ ២០២០ មានប្រមាណ ៤៥០០ លានដុល្លារ។ ចំណូលចរន្តនេះបានមកពី ចំណូលពន្ធដារប្រមាណ ២៥០០ លានដុល្លារ និងចំណូលពន្ធគយប្រមាណ ២១០០ លានដុល្លារ។

សម្តេចតេជោ ហ៊ុន សែន មានប្រសាសន៍ថា ចំណូលចរន្តឆ្នាំ ២០២០ អាចទៅកៀក ៥០០០ លានដុល្លារ នៃ ចំណូលថវិកាចរន្ត ទោះបីចំណូលឆ្នាំនេះមិនគ្រប់តាមផែនការក៏ដោយ ដោយសារការរីករាលជំងឺកូវីដ១៩ ។ ទន្ទឹមនឹងនេះ សម្តេចតេជោលើកឡើងថា រាជរដ្ឋាភិបាលមានសល់សាច់ប្រាក់សន្សំជាង ៣០០០ លានដុល្លារ សម្រាប់ចំណាយចាំបាច់នានា។

ផ្អែកតាមរបាយការណ៍អគ្គនាយកដ្ឋានគោលនយោបាយនៃក្រសួងសេដ្ឋកិច្ច និងហិរញ្ញវត្ថុ បានបង្ហាញថា ទំនិញដែលមានកំណើនលើការនាំចេញខ្ពស់ជាងគេ រួមមានដូចជា អង្ករ កង់ គ្រឿងអគ្គិសនី និងផលិតផលកសិកម្មមួយចំនួនទៀត ជាពិសេស សណ្តែក គ្រាប់ស្វាយចន្ទី និងចេក ។ ចំណែកពាណិជ្ជកម្មនៃការនាំចូលវិញ បើគិតត្រឹមរយៈពេល ៨ ខែ ឆ្នាំ២០២០ ការនាំចូលមានទំហំទឹកប្រាក់សរុបជាង ១១ ម៉ឺនលានដុល្លារអាមេរិក ដោយបានធ្លាក់ចុះក្នុងអត្រាអវិជ្ជមានប្រមាណ ១១,១៦ភាគរយ៕

ដោយៈ រ៉ាណេត

ភ្នំពេញៈ សភាពាណិជ្ជកម្មកម្ពុជាបានធ្វើការអះអាងថា តាមរយៈសហគ្រាសធុនតូច និងមធ្យម ដែលកំពុងតែមានភាពផុយស្រួយ និងប្រឈមទៅនឹងផលប៉ះពាល់ពីវិបត្តិសេដ្ឋកិច្ចនៅពេល បានចូលរួមចំណែកយ៉ាងសំខាន់ ក្នុងការផ្តល់ការងារដល់ប្រជាពលរដ្ឋប្រមាណ៧០ភាគរយ ជាពិសេសប្រជាជនដែលងាយរងគ្រោះ។

លោកឧកញ៉ាងួន ម៉េងតិច អគ្គនាយកសភាពាណិជ្ជកម្មកម្ពុជា បានមានប្រសាសន៍នៅថ្ងៃទី២៥ ខែវិច្ឆិកា ឆ្នាំ២០២០នេះថា រហូតមកដល់ពេលនេះ ជំងឺ Covid-19 បានធ្វើ   ឱ្យសេដ្ឋកិច្ចនៅទូទាំងពិភពលោក ធ្លាក់ចុះយ៉ាងគំហុក ហើយសកម្មភាពធុរកិច្ច និងអាជីវកម្មជាច្រើនត្រូវបានបិទ និងកំពុងប្រឈមហានិភ័យជាបន្តទៀត។

នៅក្នុងនោះ សហគ្រាសធុនតូច និងមធ្យម គឺជាប្រភេទធុរកិច្ច ដែលទទួលរងផលប៉ះពាល់ខ្លាំងជាងគេ។

លោកឧកញ៉ាបានបន្តថា “ដើម្បីលើកស្ទួយសេដ្ឋកិច្ចជាតិ ក៏ដូចជាសេដ្ឋកិច្ចពិភពលោក ឱ្យត្រឡប់មកជាប្រក្រតីភាពតាមគន្លងថ្មីវិញ ចាំបាច់ត្រូវផ្ដល់ការគាំទ្រ និងការយកចិត្តដាក់ ជាពិសេសដល់សហគ្រាសធុនតូច និងមធ្យម”។លោកបន្តថា “សហគ្រាសធុនតូចនិងមធ្យម ជាកម្លាំងចលករដ៏សំខាន់ សម្រាប់ការអភិវឌ្ឍសេដ្ឋកិច្ច និងសង្គម។ សម្រា​ប់កម្ពុជា សហគ្រាស ធុនតូច និងមធ្យម បានចូលរួមចំណែកប្រមាណ ៧០% ក្នុងការផ្ដល់ការងារដល់ប្រជាជន”។

ជាមួយគ្នានេះ លោកឧកញ៉ា ងួន ម៉េងតិច បានជំរុញសហគ្រិនភាពទាំងអស់ត្រូវតែត្រៀមជាយុទ្ធសាស្ត្រ ក្នុងការពង្រឹងការប្រកួតប្រជែងរបស់ខ្លួន ក្រោយពីវិបត្តិជំងឺ Covid-19 ដោយផ្ដល់នូវគំនិតថ្មីៗ និងចំគោលដៅ ដោយផ្តោតលើប្រធានបទសំខាន់ៗ ដែលរួមមាន៖ ការគ្រប់គ្រងខ្សែសង្វាក់ផលិតកម្ម ការបង្កើនភាពប្រកួតប្រជែង ការលើកទឹកចិត្តផ្នែកគយ និងប្រព័ន្ធភស្តុភារកម្មជាដើម។  ក្នុងនោះ ក៏មានការចែករំលែកអំពីវិធីសាស្ត្រគណនា និងកំណត់មុខទំនិញ ដែលមានលទ្ធភាពប្រកួតប្រជែងខ្ពស់ ក្នុងទីផ្សារអន្តរជាតិ  រួមទាំងរបៀបប្រើប្រាស់គេហទំព័រTrademaps របស់មជ្ឈមណ្ឌលពាណិជ្ជកម្មអន្តរជាតិ៕

ដោយៈហ្សូលី

ភ្នំពេញៈ  អាគារខ្ពស់ៗប្លែកបំផុតនៅអាស៊ីអាគ្នេយ៍ សុទ្ធសឹងតែមានលក្ខណៈពិសេ​សរៀងៗខ្លួន ពីលក្ខណៈពិសេសមួយទៅមួយ មានរចនាបទខុសប្លែកពីអគារដទៃ។ សូមក្រឡេកមើលអាគារខ្ពស់ៗ មួយចំនួនស្ថិតក្នុងតំបន់អាស៊ីអាគ្នេយ៍ ដែលទទួលបានតំណែ​ងមានអគាររចនាបទប្លែក។

១.King Power MahaNakhon ប្រទេសថៃ

ជាមួយកម្ពស់៣១៤ម៉ែត្រ ស្ថិតនៅកណ្តាលទីក្រុងបាងកក មានរចនាបទប្លែក។ អគារនេះជាអគារប្រើប្រាស់ចម្រុះដូចជា ខុនដូ សណ្ឋាគារ និងស្កាយបារ។ King Power MahaNakhon គឺជារូបតំណាងនៃការរួមបញ្ចូលគ្នា និងលក្ខណៈពិសេសជាច្រើន និងបានបញ្ចប់ការសាងសង់ទាំងស្រុងនៅក្នុងឆ្នាំ២០១៦។

២.Bitexco Financial Tower ប្រទេសវៀតណាម

ជាអគារខ្ពស់កប់ពពក ដែលគេស្គាល់ច្រើនជាងគេបំផុត នៅប្រទេសវៀតណាម ទោះបីវាមិនខ្ពស់ជាងគេក៏ដោយ។ លោកCarlos Zapata ដែលមានកេរ្តិ៍ឈ្មោះល្បីល្បាញជាងគេនៅលើពិភពលោក គឺជាស្ថាបត្យករនៅពីក្រោយអគារBitexco។ អគារខ្ពស់កប់ពពកនេះ មានការិយាល័យ ខណៈដែលកន្លែងសង្កេតការណ៍នៅជាន់ទី៤៩។

៣.Wisma ប្រទេសឥណ្ឌូនេស៊ី

អគារមានរូបរាងប្លែកមួយនេះ មានអាយុកាល២៥ឆ្នាំទៅហើយ។ វានៅតែជាអាគា​រមួយក្នុងចំណោមសំណង់ដ៏ល្បីបំផុត នៅក្នុងប្រទេសឥណ្ឌូនេស៊ី ដោយសារការរចនាប្លែកដែលមើលទៅដូចជាប៊ិច។ អគារនេះបានបើកដំណើរការនៅឆ្នាំ១៩៩៦ ប៉ុន្តែវាក៏ស្ថិតក្នុងចំណោមអគារខ្ពស់បំផុតនៅអឌ្ឍគោលខាងត្បូង។

៤.Komtar Tower ប្រទេសម៉ាឡេស៊ី

អគារ KOMTAR Tower ជាអគារខ្ពស់ជាងគេទាំង១០នៃប្រទេសម៉ាឡេស៊ី។ វាស្ថិតនៅក្នុងកោះPenang ហើយនៅតែជាអាគារខ្ពស់ជាងគេនៅលើកោះនេះ។ វាជាគម្រោងអគារចម្រុះមានលំនៅដ្ឋាន ការិយាល័យរដ្ឋាភិបាល និងកន្លែងលក់រាយ។

៥.Vattanac Capital ប្រទេសកម្ពុជា

មានកម្ពស់១៨៧ម៉ែត្រ នឹងបញ្ចប់ការសាងសង់នៅឆ្នាំ ២០១៤ អគារវឌ្ឍនៈគឺជាអគារទំនើប គួរឱ្យចាប់អារម្មណ៍បំផុតនៅក្នុងប្រទេសកម្ពុជា ហើយបានបង្ហាញពីការអភិ​វឌ្ឍសេដ្ឋកិច្ចនៅកម្ពុជា។ អាគារនេះ ជាមជ្ឈមណ្ឌលពាណិជ្ជកម្មចម្រុះ រួមមានការិយាល័យកម្រិតA ផ្សារទំនើប ភោជនីយដ្ឋាន ធនាគារ និងសណ្ឋាគារកម្រិតផ្កាយ៥ ដ៏ល្បីឈ្មោះរបស់អាមេរិកROSEWOOD៕

        ដោយស៊ីវ ម៉េង

        ភ្នំពេញៈ សម្តេចតេជោ ហ៊ុន សែននាយករដ្ឋមន្រ្តីនៃកម្ពុជាបានថ្លែងថា សេដ្ឋកិច្ចរបស់កម្ពុជានឹងងើបឡើងវិញ នៅឆ្នាំ២០២១ ខណៈមកដល់ពេលនេះការប្រមូលចំណូលពន្ធ សម្រេចបានទំហំទឹកប្រាក់៤៥០០លានដុល្លារ។

សម្តេចតេជោ ហ៊ុន សែនបានថ្លែងក្នុងពិធីជួបសំណេះសំណាលជាមួយក្រុមមេធាវីសម្តេចតេជោនាព្រឹកថ្ងៃទី២៥ វិច្ឆិកានេះថា សេដ្ឋកិច្ចកម្ពុជានឹងមានសន្ទុះឡើងវិញ នៅឆ្នាំ២០២១ខាងមុខ ខណៈឆ្នាំ២០២០នេះ សេដ្ឋកិច្ចរបស់កម្ពុជាធ្លាក់ចុះ ដល់ចំណុចអវិជ្ជមា​នដោយសារវិបត្តិកូវិដ១៩។

សម្តេចតេជោបានបញ្ចាក់ថា “ទោះបីនៅឆ្នាំ២០២០នេះ សេដ្ឋកិច្ចរបស់កម្ពុជាអវិ​ជ្ជ​មានដោយសារវិបត្តិនៃជំងឺកូវីដ១៩ ក៏ប៉ុន្តែទំហំនៃការនាំចេញរបស់កម្ពុជា បានកើនឡើងចំនួន១៨ភារគយ”។

យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ក្នុងរយៈពេល៨ខែឆ្នាំនេះ កម្ពុជានាំចេញទំនិញសម្រេច បានទំហំទឹកប្រាក់១១,៧១៤លានដុល្លារអាមេរិក កើនឡើងចំនួន១៨ភាគរយធៀបរយៈពេលដូចគ្នាកាលពីឆ្នាំមុន។

សម្តេចបានបន្ថែមទៀតថា “ខ្ញុំគិតថានៅឆ្នាំ២០២១ នឹងមានសន្ទុះឡើងវិញ។ឆ្នាំនេះបើជាចំណូលមានការបាត់បង់ ក៏ប៉ុន្តែមកដល់ពេលនេះ ចំណូលដែលយើងទទួលបាន គឺមានប្រមាណជាង៤៥០០លានដុល្លាររួចស្រេចទៅហើយ ក្នុងនោះចំណូលបានមកពីពន្ធដារប្រមាណ២៥០០លានដុល្លារ ចំណែកបានមកពីគយបានប្រមាណ ២ ១០០លានដុល្លារ”។ សម្តេចបន្ថែមថា “អីចឹងវាអាចទៅគៀកនឹង៥០០០លានដុល្លារនៅក្នុងឆ្នាំនេះ ឯសាច់ប្រាក់ដែលយើងសន្សំបានយកទៅចំណាយក្នុងចំនួនតិចតួច ឥឡូវបន្តឲ្យយើងនៅសល់ក្នុងដៃប្រមាណ៣ពាន់លានដុល្លារ»។

ជាមួយគ្នានេះ សម្តេចតេជោនាយករដ្ឋមន្ត្រី ក៏បានថ្លែងសូមការយោគយល់ពីមន្ត្រីរាជការ កងកម្លាំងប្រដាប់អាវុធគ្រប់ប្រភេទដែលឆ្នាំ២០២១ រាជរដ្ឋាភិបាលមិនអាចដំឡើ​ងប្រាក់បៀវត្សជូនបានទេ ដោយរក្សាទុកនូវអត្រាដដែលដូចឆ្នាំ២០២០ ប៉ុន្តែឆ្នាំ២០២១ រាជរដ្ឋាភិបាល ការរក្សាការដំឡើងប្រាក់ចូលនិវត្តន៍ សម្រាប់អតីតយុទ្ធជន និងអ្នកចូលនិវត្តន៍មុនៗ ដើម្បីឱ្យកាំប្រាក់ចូលនិវត្តន៍នេះ ប្រហាក់ប្រហែលអ្នកទើបចូលនិវត្តន៍៕

ដោយ ហ្សូលី

ភ្នំពេញ៖ ក្រុមហ៊ុនអាកាសចរណ៍ជប៉ុន ANA នឹងបើកជើងហោះហើរសារជាថ្មីមកកាន់ទីក្រុងភ្នំពេញ ប្រទេសកម្ពុជា តំបន់មួយចំនួនអាស៊ី អ៉ឺរ៉ុប និងអាមេរិកខាងជើងនៅខែក្រោយ បន្ទាប់ពីផ្អាកជើងហោះហើរដោយសារវិបត្តិជំងឺសកល។ នេះបើតាមឱ្យដឹងពីសេចក្តីប្រកាសព័ត៌មានរបស់ក្រុមហ៊ុនអាកាសចរណ៍ ANA។

ក្រុមហ៊ុនអាកាសចរណ៍ ANA នឹងផ្លាស់ប្តូរប្រេកង់ហោះហើររបស់ខ្លួនជាបណ្តោះអាសន្ន ដើម្បីជ្រើសរើសទីក្រុងនានានៅអាស៊ី អឺរ៉ុប និងអាមេរិកខាងជើង ដោយផ្អែកលើការផ្លាស់ប្តូរគោលការណ៍ណែនាំស្តីពីអន្តោប្រវេសន៍។ ក្រុមហ៊ុននឹងបង្កើតនូវវិធានការដាច់ដោយឡែកពីសុខភាពសាធារណៈ និងតម្រូវការអ្នកដំណើរក្រុមហ៊ុនបានកែសម្រួលកាលវិភាគហោះហើររបស់ខ្លួន ចាប់ពីខែធ្នូដល់ខែមករា។

ក្រុមហ៊ុន ANA នឹងបន្តត្រួតពិនិត្យការរឹតបន្តឹងរបស់ជនអន្តោប្រវេសន៍ក្នុងស្រុក និងគោលការណ៍ណែនាំដាច់ដោយឡែកក៏ដូចជានិន្នាការតម្រូវការនិងលទ្ធភាពធ្វើដំណើរ។ លើសពីនេះទៀត ANA នឹងប្រកាន់ខ្ជាប់នូវស្តង់ដារផ្តល់នូវបរិស្ថានស្អាតនិងអនាម័យនៅតាមអាកាសយានដ្ឋាន និងនៅលើយន្តហោះ ដើម្បីឱ្យអតិថិជនអាចធ្វើដំណើរដោយសុវត្ថិភាពនិងមានផាសុខភាព។

ក្រុមហ៊ុន ANA Holdings កាលពីពេលកន្លងទៅនេះ បានប្រកាសពីការខាតបង់លុយសុទ្ធចំនួន ១០៨,៨ ពាន់លានយ៉េននៅក្នុងលទ្ធផលហិរញ្ញវត្ថុរួមរបស់ខ្លួននៅ ក្នុងអំឡុងពេលខែមេសា-មិថុនាឆ្នាំនេះ។

ដោយចំណាយថវិកាប្រមាណ ៦០ ពាន់លានយ៉េនក្នុងមួយខែ ដោយសារថ្លៃដើមពលកម្ម និងថ្លៃដើមថែទាំ ក្រុមហ៊ុនបានពិភាក្សាជាមួយស្ថាប័នហិរញ្ញវត្ថុ រួមមានធនាគារអភិវឌ្ឍន៍ជប៉ុន ដែលគាំទ្រដោយរដ្ឋាភិបាលក្រុមហ៊ុន MUFG Bank Ltd ក្រុមហ៊ុន Sumitomo Mitsui Banking Corp និងក្រុមហ៊ុន Mizuho Bank Ltd ដើម្បីប្រមូលថវិកាប្រមាណ ៥០០ ពាន់លានយ៉េនក្នុងការផ្តល់មូលនិធិ៕

ដោយៈ ម៉ាណេត

បាងកកៈ គណៈរដ្ឋមន្រ្តីថៃបានយល់ព្រមពីការចូលរួមរបស់ប្រទេសខ្លួន នៅក្នុងកម្មវិធី “ទីក្រុងបៃតងឆ្លាតវៃនៅអាស៊ានអាស៊ាន” ដែលជាគម្រោងក្នុងតំបន់ សម្របសម្រួ​លរួមគ្នាដោយសហភាពអឺរ៉ុប និងអាស៊ាន ខណៈកម្ពុជាក៏នឹងមានវត្តមាន ដើម្បីទាញយកប្រយោជន៍ពីគម្រោងទីក្រុងឆ្លាតនៃនេះដែរ។ នេះបើយោងតាមការចេញផ្សាយរបស់កាសែត Bangkok នៅថ្ងៃទី២៥ ខែវិច្ឆិកា ឆ្នាំ២០២០។

អ្នកនាំពាក្យរដ្ឋាភិបាលថៃលោកស្រី Rachada Dhnadirek បានថ្លែងនៅក្នុងសន្និសីទសារព័ត៌មានមួយកាលពីម្សិលមិញថា គណៈរដ្ឋមន្រ្តីថៃ បានយល់ព្រមកាលពីថ្ងៃច័ន្ទ ដើម្បីចូលរួមក្នុងគម្រោងនេះ ដែលមានគោលដៅគាំទ្រ ដល់ការធ្វើនគរូបនីយកម្មប្រកបដោយចីរភាព នៅក្នុងតំបន់អាស៊ានកាត់ បន្ថយការប៉ះពាល់ដល់បរិស្ថាននៃទីក្រុង និងលើកកម្ពស់គុណភាពជីវិតរបស់ប្រជាជន។

ស្ថិតក្រោមក្របខ័ណ្ឌនេះ សហភាពអឺរ៉ុបនឹងផ្តល់ថវិកាសរុប៥លានអឺរ៉ូ (ប្រហែល ១៨០លានបាត) ដល់ទីក្រុងអាស៊ានដែលត្រូវបានជ្រើសរើស ដើម្បីអភិវឌ្ឍតំបន់ទីក្រុងឆ្លាតវៃប្រកបដោយនិរន្តរភាព និងអំណោយផលដល់បរិស្ថាន។

គម្រោងនេះគ្រោងនឹងចាប់ផ្តើមនៅចុងឆ្នាំនេះ ហើយនឹងត្រូវពិនិត្យឡើងវិញបន្ទាប់ពីរយៈពេល៦ឆ្នាំក្រោយ។ បច្ចុប្បន្ន ប្រទេសចូលពីសមាជិកអាស៊ាន រួមមាន កម្ពុជា ឥណ្ឌូនេស៊ី ឡាវ ម៉ាឡេស៊ី ភូមា ថៃ ហ្វីលីពីន និងវៀតណាម។

លោកស្រីបានមានប្រសាសន៍ថា “កិច្ចសហប្រតិបត្តិការនេះ គឺស្របតាមគោលនយោបាយរបស់រដ្ឋាភិបាល ក្នុងការអភិវឌ្ឍទីក្រុងរបស់ប្រទេសថៃ ឱ្យទៅជាតំបន់ទីក្រុងឆ្លាតវៃ និងប្រកបដោយនិរន្តរភាព”។ លោកស្រីបន្តថា “ក្របខ័ណ្ឌនេះនឹងនាំឱ្យមានការកសាងសមត្ថភាព និងការចែករំលែកនូវការអនុវត្តល្អៗ ដែលអាចនាំឱ្យមានភាពប្រសើរឡើងនៃគុណភាពជីវិតរបស់អ្នករស់នៅទីក្រុង”។

ក្នុងគម្រោងនេះ មិនត្រឹមតែថៃទេ ប៉ុន្តែទាំងកម្ពុជា និងបណ្តាប្រទេសចូលរួមនឹងទទួលបានអត្ថប្រយោជន៍ ពីបទពិសោធន៍របស់អឺរ៉ុបស្តីពី ការគ្រប់គ្រងកាកសំណល់ក្នុងទីក្រុង ដែលនឹងនាំឱ្យប្រទេសទៅរកសេដ្ឋកិច្ចល្អប្រសើរ និងកាត់បន្ថយអត្រានៃការប្រែប្រួលអាកាសធាតុ។

ក្របខ័ណ្ឌនេះមានសកម្មភាពធំៗចំនួន៣ ដូចជា ទី១ នឹងផ្តោតលើការលើកកម្ពស់ និងការពង្រឹងសមត្ថភាពផែនការទីក្រុង ដែលរួមបញ្ចូលដំណោះស្រាយបរិស្ថាន និងដំណោះស្រាយប្រកបដោយចីរភាព។ ទី២ នឹងផ្តោតលើការសំរបសម្រួល ដល់ការចែករំលែកការអនុវត្ត និងចំណេះដឹងល្អបំផុតរវាងដៃគូអឺរ៉ុប និងអាស៊ាន ហើយទី៣ នឹងមានកម្មវិធីផ្លាស់ប្តូរជាផ្លូវការ ស្តីពីការគ្រប់គ្រងបរិស្ថាន និងទីក្រុងឆ្លាត៕

ដោយ ហ្សូលី

ភ្នំពេញៈ រដ្ឋមន្រ្តីក្រសួងពាណិជ្ជកម្ម លោកប៉ាន សូរស័ក្តិបានថ្លែងថា កម្ពុជានឹងក្លាយទៅជាសេដ្ឋកិច្ចឌីជីថលនាពេលអនាគត ក៏ដូចជា រួមចំណែកដល់ការសម្រេចបាននូវចក្ខុវិស័យរបស់កម្ពុជា ក្នុងការវិវត្តន៍ទៅជាប្រទេស មានចំណូលមធ្យមកម្រិតខ្ពស់ក្នុងឆ្នាំ២០៣០ និងប្រទេសមានចំណូលខ្ពស់ក្នុងឆ្នាំ២០៥០។

លោកបានថ្លែងបែបនេះ នៅក្នុងកម្មវិធីសម្ពោធជាផ្លូវការយុទ្ធសាស្រ្តពាណិជ្ជកម្មតាមប្រព័ន្ធអេឡិចត្រូនិក (E-Commerce Strategy) នៅថ្ងៃទី២៥ ខែវិច្ឆិកា ឆ្នាំ ២០២០ នេះថា កម្ពុជានឹងក្លាយទៅជាសេដ្ឋកិច្ចឌីជីថលនាពេលអនាគត។ ក្នុងបរិបទបដិវត្តន៍ឧស្សា​ហកម្ម៤.០, បច្ចេកវិទ្យាឌីជីថល គឺជាគន្លឹះដ៏សំខាន់ក្នុងការជំរុញភាពប្រកួតប្រជែងរបស់សហគ្រាសពាណិជ្ជកម្ម លើកកម្ពស់ផលិតភាព បង្កើនការនាំចេញ បង្កើតការងារ និងជំរុញកំណើនសេដ្ឋកិច្ចជាតិ។

លោកបន្តថា “ពាណិជ្ជកម្មតាមប្រព័ន្ធអេឡិចត្រូនិក នឹងក្លាយជាផ្នែកមានសក្តានុពលខ្ពស់ នឹងបង្កើតជាប្រភពកំណើនថ្មីសម្រាប់សេដ្ឋកិច្ចកម្ពុជា”។ លោកបានបន្តថា “វិស័យនេះ ជាវិស័យថ្មីទើបនឹងលេចឡើង ប៉ុន្តែជាវិស័យប្រកបដោយសក្តានុពលខ្ពស់ ក្នុងការបង្កើតប្រភពកំណើនថ្មីសម្រាប់សេដ្ឋកិច្ចកម្ពុជា”។

លោកបន្ថែមថា ទោះជាយ៉ាងនេះក្ដី ក៏មានបញ្ហាប្រឈមមួយចំនួនដែលត្រូវដោះស្រាយ និងត្រូវបានសិក្សាវិភាគយ៉ាងល្អិតល្អន់ នៅក្នុងយុទ្ធសាស្រ្តពាណិជ្ជកម្មតាមប្រព័ន្ធអេឡិចត្រូនិក។

ទន្ទឹមនេះត្រូវដាក់ចេញនូវអនុសាសន៍ និងផែនការសកម្មភាព  ដែលទាមទារឲ្យមានការយកចិត្តទុកដាក់ខ្ពស់ និងការចូលរួមយ៉ាងសកម្មពីគ្រប់ភាគីពាក់ព័ន្ធ ទាំងវិស័យសាធារណៈ វិស័យឯកជន និងដៃគូអភិវឌ្ឍន៍ផងដែរ។

ជាមួយនោះផងដែរ ក្នុងពេលបច្ចុប្បន្ន ជំងឺកូវីដ-១៩ បាននិងកំពុងរាតត្បាតទូទាំងពិភពលោក និងប៉ះពាល់ដល់អាយុជីវិតមនុស្ស ព្រមទាំងរាំងស្ទះដល់សកម្មភាពសេដ្ឋកិច្ចពាណិជ្ជកម្ម។ ក្នុងបរិបទនេះ ពាណិជ្ជកម្មតាមប្រព័ន្ធអេឡិចត្រូនិក មានសារៈសំខាន់យ៉ាងខ្លាំង ក្នុងការផ្តល់ជាគំរូអាជីវកម្មថ្មីមួយប្រកបដោយប្រសិទ្ធិភាព និងភាពប្រកួតប្រជែងខ្ពស់ ដោយប្រើប្រាស់បច្ចេកវិទ្យាឌីជីថល ដែលសមស្របទៅនឹងបរិបទសេដ្ឋកិច្ចឌីជីថល និងលក្ខខណ្ឌតម្រូវការទីផ្សារក្នុងស្ថានភាពកូវីដ-១៩ និងក្រោយជំងឺកូវីដ-១៩៕

ដោយៈ រ៉ាណេត
ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា នៅក្នុងឆ្នាំ២០២១ខាងមុខនេះ ចំណូលរបស់កម្ពុជានឹងមានសន្ទុះឡើងវិញ បើទោះជាចំណូលសម្រាប់ឆ្នាំ២០២០ មានការធ្លាក់ចុះមិនគ្រប់តាមផែនការ ដែលបានកំណត់ដោយសារបញ្ហានៃវិបត្តិជំងឺ Covid-19 ដែលបាននិងកំពុងបន្តគំរាមកំហែងក៏ដោយ។
សម្ដេចតេជោហ៊ុន សែន បានថ្លែងនៅក្នុងពិធីសំណេះសំណាលជាមួយ “មេធាវីស្ម័គ្រចិត្តសម្ដេចតេជោ” នៅព្រឹកថ្ងៃទី២៥ ខែវិច្ឆិកា ឆ្នាំ២០២០ថា នៅឆ្នាំ២០២១ខាងមុខនេះ ចំណូលរបស់ប្រទេសកម្ពុជា នឹងមានសន្ទុះឡើងវិញជាមិនខាន បើទោះជាបច្ចុប្បន្នចំណូលត្រូវបានធ្លាក់ចុះបន្តិចខុសពីផែនការដែលកំណត់។
សម្ដេចតេជោបន្តថា “ ខ្ញុំគិតថាសន្ទុះនៅឆ្នាំ២០២១នឹងមានឡើងវិញ…ឆ្នាំនេះបើទោះបីជាចំណូលត្រូវមានការបាត់បង់ ក៏ប៉ុន្តែមកដល់ពេលនេះ ចំណូលដែលយើងទទួលបានគឺមានប្រមាណ៤៥០០លានដុល្លារ។ ចំណូលដែលយើងទទួលបាន បើទោះបីវាមិនគ្រប់ផែនការ ក៏ប៉ុន្តែចំណូលដែលយើងទទួលបាប្រមាណ៤៥០០លានដុល្លាររួចស្រេចទៅហើយ”។ សម្តេចបន្តថា “ក្នុងនោះចំណែកបាន មកពីពន្ធដារមានលើស២៥០០លាន ចំណែកចំណូលទទួលបានមកពីគយ បានសម្រេចបានប្រមាណ២១០០លាន។ ចឹងវាអាចទៅគៀក ជាមួយនឹងផែនការប្រមូលចំណូលឲ្យបាន៥០០០លានដុល្លារ នៅឆ្នាំនេះនៃចំណូលថវិកាចរន្ត”។
សម្ដេចតេជោបានមានប្រសាសន៍បន្តថា សាច់ប្រាក់ដែលយើងសល់សន្សំ យើងបានយកចំណាយក្នុងចំនួនតិចតួច។ ឥឡូវក៏នៅបន្តឱ្យយើងនៅសល់ក្នុងដៃ ប្រមាណ៣០០០លានដុល្លារ ដូច្នេះបានជាយើងហ៊ានជួយមិត្តភក្ដិនៅមីយ៉ាន់ម៉ា ហើយមិនចាំបាច់ឱ្យមិត្តភក្ដិព្រួយបារម្ភទេ យើងដឹកតាមជើងយន្តហោះពិសេសជូនទៅ ដោយក្រុមហ៊ុនយន្តហោះមិនយកថ្លៃឈ្នួលទៀត គេចូលរួមក្នុងសកម្មភាពមនុស្សធម៌។
នៅក្នុងឱកាសនេះ សម្ដេចតេជោ ហ៊ុន សែន ក៏បានថ្លែងអំណរគុណក្រុមហ៊ុនយន្តហោះដែលបានជួយដឹកជញ្ជូនសម្ភារៈ ម៉ាស ក្នុងការចូលរួមជាសកម្មភាពមនុស្សធម៌ ក៏ដូចជាថ្លែងអំណរគុណ ដល់បណ្តាមន្ត្រីរាជការគ្រប់លំដាប់ថ្នាក់ ព្រមទាំងបណ្តាសប្បុរសជននានាដែលបានចូលរួមបរិច្ចាកថវិកា និងធនធានផ្ទាល់ខ្លួនក្នុងការរួមចំណែកជួយស ង្គ្រោះនៅក្នុងវិបត្តិជំងឺ Covid-19 ក៏ដូចជា វិបត្តិនៃគ្រោះទឹកជំនន់កាលពីពេលកន្លងទៅថ្មីៗនេះផងដែរ៕