គម្រោងអភិវឌ្ឍន៍ដីឡូតិ៍បន្ទាយស្រី តម្លៃត្រឹម ៣០០០ដុល្លារផ្តល់ឱកាសចំណេញ ៧០០ដុល្លារភ្លាមៗដល់អតិថិជនដែលទិញផ្ទាល់

ដោយៈ រ៉ាណេត

សៀមរាបៈ គម្រោងអភិវឌ្ឍន៍ដីឡូតិ៍បន្ទាយស្រីដែលស្ថិតនៅក្នុងតំបន់កំពុងមានការអភិវឌ្ឍន៍ទៅជាក្រុងថ្មីមួយទៀត ស្ថិតនៅភូមិខ្នារ ឃុំខ្នារសណ្តាយ ស្រុកបន្ទាយស្រី ខេត្តសៀមរាប កំពុងទទួលបានការគាំទ្រពីសំណាក់អតិថិជនជាច្រើន បន្ទាប់ពីក្រុមហ៊ុនបានផ្តល់ជូននូវកម្មវិធីពិសេសដោយការបញ្ចុះតម្លៃចំនួន២០០ដុល្លារ បន្ថែមពីលើការបញ្ចុះថ្លៃដើម៥០០ដុល្លារ សម្រាប់អ្នកដែលមកទិញដោយផ្ទាល់មិនមែនតាមរយៈការណែនាំរបស់ភ្នាក់ងារ។

ស្ថិតនៅលើផ្លូវធំហាយវេ៦៦ ដែលមានចរាចរណ៍យ៉ាងមមាញឹក និងស្ថិតនៅក្បែរតំបន់ទេសចរណ៍ជាច្រើន គម្រោងអភិវឌ្ឍន៍ដីឡូតិ៍ អចលនទ្រព្យបន្ទាយស្រី បាន និងកំពុងលក់ក្នុងតម្លៃកាន់តែពិសេសត្រឹម៣០០០ដុល្លារ ក្នុងមួយឡូតិ៍ ជាមួយនឹងការទួលបានការបញ្ចុះតម្លៃជាច្រើន ដែលកាន់តែផ្តល់ឱកាសចំណេញយ៉ាងច្រើន រួមជាមួយនឹងលក្ខខណ្ឌបង់ប្រាក់យ៉ាងងាយស្រួល។

តំណាងក្រុមហ៊ុនអភិវឌ្ឍន៍ដីឡូតិ៍ អចលនទ្រព្យបន្ទាយស្រី លោកស្រី ជិន លក្ខិណា បានមានប្រសាសន៍ឱ្យដឹងតាមទូរស័ព្ទ កាលពីព្រឹកថ្ងៃទី២៤ ខែវិច្ឆិកា ឆ្នាំ២០២០ ថា បច្ចុប្បន្ននេះ នៅក្នុងស្រុកបន្ទាយស្រី មានគម្រោងអភិវឌ្ឍន៍ជាច្រើន ជាពិសេសទៅលើហេដ្ឋារចនាសម្ព័ន្ធនានា ដែលកាន់តែជំរុញវិស័យដីធ្លី នៅក្នុងតំបន់មានតម្រូវការ និងកើនតម្លៃជាបន្តបន្ទាប់។ ជាក់ស្ដែងដូចជាគម្រោងអភិវឌ្ឍន៍ដីឡូតិ៍ របស់លោកស្រីទើបតែចាប់ផ្តើមបើកលក់តែប៉ុណ្ណោះ ប៉ុន្តែលទ្ធផលនៃការលក់គឺទទួលបានជិត ៤៥ភាគរយនៃគម្រោង។

លោកស្រីបានបន្តថា “ហេតុផលដែលជំរុញឱ្យអតិថិជនគាំទ្រមកលើគម្រោង ព្រោះពួកគាត់បានមើលឃើញពីឱកាសចំណេញពីការទិញយ៉ាងច្រើន ដូចជាតម្លៃដីក្នុងមួយឡូតិ៍ ចាប់ពី ៣០០០ដុល្លារឡើងទៅតែប៉ុណ្ណោះ ហើយសម្រាប់អតិថិជនដែលទិញដោយការបង់ផ្តាច់នឹងទទួលបានការបញ្ចុះតម្លៃរហូតដល់ ៥០០ដុល្លារភ្លាមៗ ជាពិសេសសម្រាប់អតិថិជនដែលមកទិញដោយខ្លួនឯងផ្ទាល់នឹងទទួលបានការបញ្ចុះតម្លៃបន្ថែមពីលើ ចំនួន ២០០ដុល្លារទៀត ពោលគឺមួយឡូតិ៍នៅត្រឹមតែ ២៣០០ដុល្លារតែប៉ុណ្ណោះ ខណៈដែលនៅក្នុងគម្រោងមានការអភិវឌ្ឍហេដ្ឋារចនាសម្ព័ន្ធរួចរាល់ ដូចជាបណ្តាញអគ្គិសនី បណ្តាញបង្ហូរទឹក ជាពិសេសផ្លូវគ្រប់ខ្សែមានទំហំ ១០ម៉ែត្រ និងក្រាលថ្មមិចរួចរាល់ ។

គម្រោងមួយនេះ ស្ថិតនៅទីតាំងដែលមានសក្ដានុពលល្អ មិនជាប់ពាក់ព័ន្ធនឹងតបន់អប្សរា និងប៉ះពាល់តំបន់អភិរក្សធម្មជាតិនោះទេ ពោលគឺនៅជាប់ផ្លូវធំហាយវេ៦៦ និងមានផ្លូវរដ្ឋទំហំ ១៥ម៉ែត្រ នៅជាប់ចំហៀងដីគម្រោង ងាយស្រួលក្នុងការធ្វើដំណើរ មានចម្ងាយត្រឹម៣គីឡូម៉ែត្រពីរង្វង់មូល ដែលបំបែកទៅកាន់តំបន់ទេសចរណ៍កម្សាន្តផ្សេងៗ ដូចជា ភូមិព្រះដាក់ តំបន់ប្រាសាទបន្ទាយស្រី ភ្នំគូលេន តំបន់ រមណីយដ្ឋាន ក្បាល ស្ពាន ដែល មាន សួនសត្វជាច្រេីនប្រភេទ និងមានចម្ងាយត្រឹម៧គីឡូម៉ែត្រ ពីផ្លូវ ឆ្ពោះ ទៅ ព្រលានយន្តហោះថ្មី ក៏ដូចជាចេញទៅតាមបណ្តាខេត្តនានាផងដែរ។

✅ពត៌មានលម្អិតពីគម្រោងអភិវឌ្ឍន៍ដីឡូតិ៍ អចលនទ្រព្យបន្ទាយស្រី សូមទាក់ទងតាមទូរស័ព្ទលេខ ៖ 016 999 995 / 017 812 345 / 097 8 123 456 ៕

គម្រោងធ្វើឱ្យប្រសើរឡើងវិញផ្លូវជាតិលេខ ៥ តម្លៃ ៥០០លានដុល្លារ នឹងបញ្ចប់ក្នុងឆ្នាំ ២០២៣

ដោយ ហ្សូលី

ភ្នំពេញ៖ គម្រោងធ្វើឱ្យប្រសើរឡើងនូវផ្លូវជាតិលេខ ៥ នៅតែបន្តការកែលម្អតាមផែនការ ទោះបីជាមានការរាំងស្ទះដល់វិបត្តិកូវីដ១៩ក្តី ដែលគ្រោងនឹងចំណាយថវិកាប្រមាណ ៥០០លានដុល្លារ នឹងគ្រោងបញ្ចប់ការសាងសង់អំឡុងឆ្នាំ ២០២៣។

លោក ហ៊ាង សុទ្ធាយុទ្ធ អ្នកនាំពាក្យក្រសួងសាធារណការនឹងដឹកជញ្ជូន បានមានប្រសាសន៍ឱ្យដឹងថា គម្រោងកែលម្អផ្លូវជាតិលេខ ៥ នេះ នឹងធ្វើឱ្យប្រសើរនូវចម្ងាយផ្លូវប្រមាណ ៣៦៦ គីឡូម៉ែត្រ ដែលបែងចែកចេញជា ៣ ដំណាក់កាលធំៗ គ្រោងនឹងរួចរាល់នៅឆ្នាំ ២០២៣ និងត្រូវចំណាយថវិកាសរុប ៥០០លានដុល្លារអាមេរិក។

លោកបន្តថា តំណាក់កាលបែងចែកចំនួន ៣ ធំៗនោះមានដូចជា តំបន់ភាគខាងជើង តំបន់កណ្តាល និងតំបន់ភាគខាងត្បូង។ សម្រាប់តំបន់ភាគខាងជើងត្រូវបែកចែកជា ២ផ្នែកផ្សេងទៀត ដែលផ្នែកទី ១ សម្រេចបានប្រមាណ ៨២ ភាគរយ និងផ្នែកទី ២ សម្រេចបាន ៨៦ ភាគរយហើយ លើចម្ងាយផ្លូវ ៨៤ គីឡូម៉ែត្រ លាតសន្ធឹងលើខេត្តបាត់ដំបង និងខេត្តបន្ទាយមានជ័យ។

អ្នកនាំពាក្យរូបនេះបន្តថា ចំណែកតំបន់ផ្នែកខាងត្បូងចាប់ពីព្រែកក្តាម ខេត្តកណ្តាល ដល់ធ្លាម្អម ខេត្តពោធិ៍សាត់ មានប្រវែងសរុបជាង ១៣៥ គីឡូម៉ែត្រ កំពុងស្ថិតនៅក្នុងដំណាក់កាលកែលម្អយ៉ាងសកម្ម រីឯតំបន់កណ្តាលវិញចាប់ពីធ្លាម្អម ខេត្តពោធិ៍សាត់ ដល់ខេត្តបាត់ដំបងវិញ មានប្រវែងសរុប ១៤៦ គីឡូម៉ែត្រ ក៏ស្ថិតនៅក្នុងតំណាក់កាលកែលម្អដែរ គ្រាន់តែដំណើរការយឺតជាងគេបន្តិច។

គម្រោងធ្វើឱ្យប្រសើរឡើងនូវផ្លូវជាតិលេខ ៥ ឬហៅថាផ្លូវអាស៊ានហាយវេលេខ ១ មានប្រវែងសរុប ៣៦៦ គីឡូម៉ែត្រ លាតសន្ធឹងក្នុងខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ។ ដោយចាប់ពីរាជធានីភ្នំពេញគឺជាគម្រោងក្រោមឥណទាន សម្បទានរបស់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា។

ផ្លូវនេះត្រូវពង្រីកលើផ្លូវដែលមានស្រាប់ចំនួន ២ គន្លង ទៅជា ៤គន្លង មានទទឺង ២៣ ម៉ែត្រជាប្រភេទផ្លូវកៅស៊ូ AC និងមានសួនច្បារចំកណ្តាល ដែលត្រូវចំណាយរយៈពេលសាងសង់ចំនួន ៤៨ ខែ ពោលគឺនឹងបញ្ចប់នៅក្នុងឆ្នាំ ២០២៣៕

ប្រមុខដឹកនាំ៖ កម្ពុជា-វៀតណាមនឹងជម្រុញទំហំពាណិជ្ជកម្ម និងការវិនិយោគទ្វេរទិសរវាងប្រទេសទាំងពីរ

ដោយ ៖ ហ្សូលី

ភ្នំពេញ៖ កម្ពុជា-វៀតណាម នឹងខិតខំជម្រុញទំហំពាណិជ្ជកម្ម រួមទាំងការវិនិយោគទ្វេទិសរវាងប្រទេសទាំងពីរឱ្យកាន់តែរីកចម្រើនបន្ថែមទៀត។ នេះបើតាមការអះអាងរបស់សម្តេចតេជោ ហ៊ុន សែន ប្រមុខថ្នាក់ដឹកនាំប្រទេសកម្ពុជា និងលោក ង្វៀន សួនហ្វ៊ុក ប្រមុខដឹកនាំវៀតណាម នៅក្នុងជំនួបតាមរយៈប្រព័ន្ធវីដេអូអនឡាញ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអបអរសាទរចំពោះលទ្ធផលប្រកបដោយជោគជ័យនៃការចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ RCEP ដោយសម្តេចឯកភាពទៅនឹងការពង្រឹង ពង្រីកកិច្ចសហប្រតិបត្តិការមានស្រាប់កាន់តែស៊ីជម្រៅ និងស្ថិតស្ថេរយូរអង្វែង។

លោក ង្វៀន សួនហ្វ៊ុក បានកោតសរសើរកម្ពុជាក្នុងការថែរក្សាស្ថិរភាពសេដ្ឋកិច្ច និងសង្គមអំឡុងការរិករាលដាលនៃវិបត្តិជំងឺសកល។ កម្ពុជានិងវៀតណាម នឹងពន្លឿនការដោះស្រាយខ្សែព្រំដែននៅសេសសល់ចំនួន ១៦ ភាគរយ ក្នុងគោលបំណងប្រែក្លាយព្រំដែនកម្ពុជា-វៀតណាម ជាព្រំដែនមានកិច្ចសហប្រិបត្តិកា ការអភិវឌ្ឍ សន្តិភាព និងមានស្ថិរភាព។

ប្រមុខដឹកនាំប្រទេសទាំងពីរបានសង្កត់ធ្ងន់នូវក្នុងការជម្រុញពាណិជ្ជកម្ម និងវិនិយោគទ្វេទិសរវាងប្រទេសទាំងពីរ ដើម្បីសម្រួលដល់ការធ្វើដំណើររបស់ធុរជន ក៏ដូចជាលើកកម្ពស់ការអនុវត្តវិធានការដោះស្រាយបញ្ហានានាតាមបណ្តោយព្រំដែនកម្ពុជា-វៀតណាម ឱ្យបានទាន់ពេលវេលា។ ថ្នាក់ដឹកនាំទាំងពីរបានគូសបញ្ជាក់ពី សារសំខាន់នៃកិច្ចប្រជុំថ្នាក់រដ្ឋមន្ត្រីនៃគណៈកម្មការចម្រុះកម្ពុជា-វៀតណាមលើកទី ១៨ គ្រោងនឹងប្រព្រឹត្តទៅ នៅថ្ងៃទី ២២ ខែធ្នូ ឆ្នាំ ២០២០ នៅទីក្រុងបាវិត ខេត្តស្វាយរៀង ប្រទេសកម្ពុជា។

នាយករដ្ឋមន្ត្រីទាំងពីរប្តេជ្ញាចិត្តយ៉ាងមុតមាំ ដើម្បីបន្តពង្រឹងកិច្ចសហប្រតិបត្តិការលើគ្រប់វិស័យ និងគាំទ្រគ្នា ទៅវិញទៅមកនៅក្នុងក្របខ័ណ្ឌតំបន់ និងពហុភាគីដូចជា អនុតំបន់មេគង្គ អាស៊ាន កិច្ចប្រជុំកំពូលអាស៊ី-អឺរ៉ុប និងអង្គការសហប្រជាជាតិ ។

កិច្ចសន្ទនាតាមប្រព័ន្ធវីដេអូត្រូវបានធ្វើឡើងកាលពីថ្ងៃទី២៤ ខែវិច្ឆិកា ឆ្នាំ ២០២០ កន្លងទៅ ក្នុងបរិយាកាសស្និទ្ធសា្នលបំផុតឆ្លុះបញ្ចាំងពីសាមគ្គីភាពជាភាតរភាព និងការយោគយល់គ្នាទៅវិញទៅមករវាងប្រទេសទាំងពីរ ៕

មន្ត្រីជំនាញប្រជុំត្រៀមរៀបពិធីចាក់បេតុងតភ្ជាប់ស្ពានមិត្តភាពកម្ពុជា -ចិន ស្ទឹងត្រង់-ក្រូចឆ្មារ នៅថ្ងៃទី៧ ខែធ្នូ ខាងមុខនេះ

ដោយ ៖ រ៉ាណេត
ភ្នំពេញ ៖ ក្រុមមន្ត្រីជំនាញនៃក្រសួងសាធារណៈការ និងដឹកជញ្ជូន បានប្រជុំត្រៀមរៀបចំពិធីចាក់បេតុងតភ្ជាប់ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នៅត្រឹមថ្ងៃទី៧ ខែធ្នូ ឆ្នាំ២០២០ ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

រដ្ឋលេខាធិការក្រសួងសាធារណៈការ និងដឹកជញ្ជូន លោក លឹម ស៊ីដេនីន នៅថ្ងៃទី២៤ ខែវិច្ឆិកា ឆ្នាំ២០២០ម្សិលមិញនេះ បានមានប្រសាសន៍ថា សមាជិកសមាជិកាគណៈកម្មការ និងអនុគណៈកម្មការត្រូវទទួលបន្ទុកត្រៀមរៀបចំពិធីនេះបំពេញភារកិច្ចរបស់ខ្លួនឱ្យបានត្រឹមត្រូវតាមការចាត់តាំង និងសហការឱ្យបានជិតស្និទ្ធជាមួយភាគីពាក់ព័ន្ធទាំងអស់ សំដៅធ្វើយ៉ាងណាឱ្យការរៀបចំពិធីចាក់បេតុងតភ្ជាប់មុខតំណស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ប្រព្រឹត្តទៅដោយរលូនតាមផែនការដែលបានគ្រោងទុក។

លោកបានបញ្ជាក់ថា “ពិធីចាក់បេតុងតភ្ជាប់មុខតំណស្ពានមិត្តភាពកម្ពុជា-ចិន នឹងត្រូវរៀបចំឡើងនៅថ្ងៃទី៧ ខែធ្នូ ឆ្នាំ២០២០ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា”។

ស្ពាននេះស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គទៅត្រើយខាងកើតស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ ជាស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ ដែលបានបើកការដ្ឋានកាលពី ថ្ងៃទី១ ខែធ្នូ ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី។

គម្រោងសាងសង់ស្ពាននេះមានប្រវែងសរុប ១.១៣១ម៉ែត្រ និងទទឹង១៣,៥០ម៉ែត្រ ជាប្រភេទស្ពានបេតុងអាម៉េ ប្រើរយៈពេលសាងសង់ចំនួន ៤២ខែ គិតត្រឹមថ្ងៃទី៧ ខែធ្នូ ឆ្នាំ២០២០ ស្ពាននេះសម្រេចបាន៩៦,៤ភាគរយ និងគ្រោងបញ្ចប់នៅដើមឆ្នាំ២០២១ខាងមុខ៕

ចំណេះដឹង! អ្វីជាភតិសន្យាពិសេស?

ដោយៈ តារា

ភ្នំពេញៈ ភតិសន្យាពិសេស គឺជាកិច្ចសន្យាមួយដែលភាគីម្ខាងហៅថាភតិបតីឱ្យភាគីម្ខាងទៀតដែលជាកម្មករ សិស្ស និស្សិត ហៅថាភតិក ប្រើប្រាស់ក្នុងការស្នាក់នៅដោយយកថ្លៃ។

បើនិយាយឱ្យងាយយល់ ភតិសន្យាពិសេសនេះ គឺជាកិច្ចសន្យារវាងម្ចាស់អចលនទ្រព្យដែលមានដូចជា ម្ចាស់ផ្ទះជួល ឬម្ចាស់បន្ទប់ជួល និងកម្មករ សិស្ស និស្សិត ក្នុងការជួលបន្ទប់ សម្រាប់ការប្រើប្រាស់ស្នាក់នៅដោយយកថ្លៃឈ្នួល។

លក្ខណៈពិសេសនៃភតិសន្យានេះគឺ៖

ក. ភាគីនៃកិច្ចសន្យា (មាត្រា៣)

ភតិបតី(អ្នកឱ្យជួល) អាចជាម្ចាស់បន្ទប់ជួល ឬអ្នកយកថ្លៃឈ្នួលលើបន្ទប់ជួលជាលក្ខណៈអាជីប។ ខុសពីភតិសន្យា(កិច្ចសន្យាជួល) ដែលមានចែងក្នុងក្រមរដ្ឋប្បវេណី(ហៅថា កិច្ចសន្យាធម្មតា)ព្រោះនៅក្នុងភតិសន្យាទូទៅ មិនកំណត់ចំពោះអ្នកម្ចាស់បន្ទប់ជួលនោះទេ។

ភតិកៈ(អ្នកជួល)៖ កម្មករ សិស្ស និស្សិត ដែលមានការលំបាកខ្លាំងក្នុងការទ្រទ្រង់ជីវភាព។ ខុសពីភតិសន្យាធម្មតាត្រង់ថា ភតិសន្យាធម្មតាមិនកំណត់ លក្ខណៈរបស់អ្នកជួលទេ នរណាក៏អាចក្លាយជាអ្នកជួលបានដែរ។

ខ. កម្មវត្ថុនៃកិច្ចសន្យា

បន្ទប់ជួលស្នាក់នៅ(មាត្រា៣)។ មិនមែនជា ដី ឬអគារពាណិជ្ជកម្ម ជាដើម។ ខុសពីភតិសន្យាធម្មតាត្រង់ថា កម្មវត្ថុនៃភតិសន្យាទូទៅ អាចជាចលនវត្ថុ ឬអចលនវត្ថុ។

គ.លក្ខណៈនៃកិច្ចសន្យា

ត្រូវធ្វើឡើងជាលាយលក្ខណ៍អក្សរ និងមានសេចក្តីបញ្ជាក់របស់មេឃុំ ឬចៅសង្កាត់។ មានន័យថា មិនអាចឡើងដោយមាត់ទទេរបានទេ(មាត្រា៥)។ នៅក្នុងភតិសន្យាធម្មតា ភាគីអាចបង្កើតកិច្ចសន្យា ដោយគ្រាន់តែមានការព្រមព្រៀងរវាងគូភាគីប៉ុណ្ណោះ ប៉ុន្តែដើម្បីតតាំងជាមួយតតិយជនបាន ដែលគាត់ត្រូវកាន់កាប់ និងប្រើប្រាស់វត្ថុជួលនោះ(មាត្រា៥៩៧ និង៥៩៨ នៃក្រមរដ្ឋប្បវេណីឆ្នាំ២០០៧) ។

ឃ.អត្ថិភាពនៃកិច្ចសន្យា

មិនតិចជាង២ឆ្នាំ ទោះបីជាមិនបានកំណត់ ឬកំណត់តិចជាង២ឆ្នាំក៏ដោយ ត្រូវចាត់ទុកថាមានអត្ថិភាព២ឆ្នាំ(មាត្រា៦) ក្នុងគោលបំណងមិនឱ្យម្ចាស់បន្ទប់ជួលតម្លៃថ្លៃឈ្នួលក្នុងអំឡុងពេល២ឆ្នាំ (មាត្រា៨)។

ផ្ទុយទៅវិញភតិសន្យាធម្មតា អាចធ្វើឡើងដោយកំណត់ ឬមិនកំណត់អំឡុងពេលបាន ប៉ុន្តែបើអំឡុងពេលជួលលើសពី ១៥ឆ្នាំ នោះនឹងក្លាយជាសិទ្ធិជួលអចិន្ត្រៃយ៍វិញ៕

ការព្យាករណ៍៖ ទីក្រុចំនួន២ត្រូវបានព្យាករណ៍ថាតម្លៃអលចនទ្រព្យកើនឡើងខ្ពស់ជាងគេ

ដោយៈវុត្ថា

ពិភពលោកៈ តំលៃអចលនទ្រព្យនៅក្នុងទីក្រុងចំនួន២ គឺទីក្រុងក្រុង Cape Town និងទីក្រុង Shanghai នឹងកើនឡើង៥ដងនៅក្នុងឆ្នាំ ២០២១ខាងមុខនេះ ព្រោះតម្រូវការ លំនៅឋានមានការកើនឡើងខ្ពស់ ប៉ុន្តែការផ្គត់ផ្គង់នឹងស្ថិតនៅក្នុងសភាពទ្រឹងក្នុងទីក្រុង Cape Town និងធ្លាក់ចុះបន្តិចនៅសៀងហៃ។

យោងតាមការព្យាករណ៍ពិភពលោកចុងក្រោយ ដែលបានចេញផ្សាយកាលពីថ្ងៃច័ន្ទដោយក្រុមហ៊ុន Knight Frank បានអោយដឹងថា នៅឆ្នាំក្រោយនេះ ទីក្រុងចំនួន២០ ក្នុងចំណោមទីក្រុង២២ ត្រូវបានគេរំពឹងថាតម្លៃនៅតែមានស្ថានភាពដដែល ឬកើន២ ភាគរយ។

ទោះបីជាមានភាពចលាចលផ្នែកហិរញ្ញវត្ថុ ដែលបណ្តាលមកពីការឆ្លងរាលដាលនៃជំងឺឆ្លងកូវីដ១៩ក៏ដោយ ក៏ទីផ្សារអចលនទ្រព្យមានភាពរឹងមុំាង និងគាំទ្រដោយកម្ចីដែលមានតម្លៃទាប។

របាយការណ៍ដដែលន្តថា នៅក្នុងទីក្រុងឡុងដ៍នាពេលបច្ចុប្បន្ននេះ អ្នកទិញកំពុងទទួលបានអត្ថប្រយោជន៍ពីថ្ងៃឈប់សម្រាក ពន្ធត្រា ដែលកាត់បន្ថយពន្ធលើការលក់លំនៅឋានរហូតដល់ ៥០០,០០០ផោន (៦៦៦,៤២៧ ដុល្លារអាមេរិក) មានការកើនកើនឡើង៤ភាគរយ ដែលជួយដល់ការកាត់បន្ថយពន្ធបន្ថែមលើតម្រូវការ និងមូលដ្ឋានគ្រឹះទីផ្សារក្រុមហ៊ុន។

លោក Tom Bill ប្រធានផ្នែកស្រាវជ្រាវលំនៅដ្ឋាននៅទីក្រុងឡុងដ៍ នៃក្រុមហ៊ុន Knight Frank បានឱ្យដឹងថា ទីក្រុងនេះហួសរយៈពេលនៃការកើនឡើង តម្លៃអចលនទ្រព្យ និងជាពិសេសទីក្រុងនេះ នឹងទទួលបានអត្ថប្រយោជន៍ពីរលក នៃតម្រូវការពីអ្នកវិនិយោគអន្តរជាតិផងដែរ ដោយសារការធ្វើដំណើរ និងការដាក់ឲ្យនៅដាច់ពីគេត្រូវបានបន្ធូរបន្ថយ។

ដោយឡែក នៅក្នុងទីក្រុង Vancouver និងទីក្រុង Miami ការកើនឡើងនៃសកម្មភាពលក់ ដែលមើលទៅដូចជាត្រៀមខ្លួនជាស្រេច ក្នុងការធ្វើឱ្យតតម្លៃអចលនទ្រព្យកើន ៣ភាគរយ និង ៤ភាគរយនៅឆ្នាំ២០២១ នៃទីក្រុងនីមួយ។

នៅក្នុងទីក្រុង Monaco នឹងកើនឡើង៣ភាគរយនៅឆ្នាំក្រោយនេះ ព្រោះមានការចាប់អារម្មណ៍ពីអ្នកទិញ ប៉ុន្តែនៅក្នុងរយៈពេលចុងក្រោយនេះ នៃទីផ្សារត្រូវបានរងផលប៉ះពាល់ដោយអ្នកទិញអន្តរជាតិជាច្រើន មិនអាចធ្វើដំណើរបាន ខណៈតម្លៃអចលនទ្រព្យនៅទីក្រុងញូវយ៉ក ដែលនៅពេលនេះត្រូវបានគេព្យាករណ៍ថា នឹងធ្លាក់ចុះ៣ភាគរយ និងបន្តធ្លាក់ចុះនៅឆ្នាំ២០២១ ៕

តើស្ត្រីចិត្តដែកដែលចេញមុខប្រឆាំងជាមួយមេដឹកនាំចិនយ៉ាងស្រូចស្រាវជាអ្នកណា?

ដោយៈប៊ី

អន្តរជាតិៈ ជាមួយនឹងជ័យជម្នះភ្លូកទឹក ភ្លូកដីនៃការបោះឆ្នោតកាលពីដើមឆ្នាំ ដើម្បីឈានមកកាន់អំណាច នៅអាណត្តិទី២នៃដែនដីកោះតៃវ៉ាន់ ដែលចិនតែងតែចាត់ទុកជាផ្នែកមួយនៃទឹកដីរបស់ខ្លួន លោកស្រីត្សៃ អ៊ឹងវិន ជាមេដឹកនាំតៃវ៉ាន់មានភាពលេចធ្លោខ្លាំង ដោយសារតែមានទំនាក់ទំនងជាមួយអាមេរិកយ៉ាងជិតស្និទ្ឋ និងតែងតែបង្ហាញមហិច្ឆតាដើម្បីឲ្យតៃវ៉ាន់ទទួលបានឯករាជ្យពីប្រទេសចិន។

ជាអ្នកនយោបាយឆ្នើមមួយរូប លោកស្រី Tsai Ing-wen (កើតថ្ងៃទី ៣១ ខែសីហាឆ្នាំ ១៩៥៦) គឺជាអ្នកនយោបាយ និងជាអ្នកសិក្សានៅតៃវ៉ាន់ ដែលបានក្លាយជាប្រធានាធិបតីទី៧ នៃសាធារណរដ្ឋចិន (តៃវ៉ាន់) ចាប់តាំងពីឆ្នាំ២០១៦ ។ ជាសមាជិកម្នាក់នៃគណបក្ស Democratic Progressive Party (DPP) លោកស្រី Tsai គឺជាប្រធានាធិបតីស្ត្រីដំបូងបង្អស់របស់តៃវ៉ាន់។

លោកស្រីធ្លាប់ធ្វើជាប្រធានគណបក្ស DPP ពីមុនពីឆ្នាំ២០០៨ ដល់ឆ្នាំ២០១២ និងឆ្នាំ២០១៤ ដល់ឆ្នាំ២០១៨ រហូតដល់ឆ្នាំ២០២០ ។

លោកស្រី Tsai បានសិក្សាផ្នែកច្បាប់ និងពាណិជ្ជកម្មអន្តរជាតិ ហើយក្រោយមកបានក្លាយជាសាស្ត្រាចារ្យច្បាប់ នៅសាលាច្បាប់នៃសាកលវិទ្យាល័យ Soochow University និងសាកលវិទ្យាល័យជាតិ Chengchi បន្ទាប់ពីទទួលបានសញ្ញាប័ត្រផ្នែកច្បាប់ (LLB) ពីសាកលវិទ្យាល័យជាតិតៃវ៉ាន់ និងអនុបណ្ឌិតច្បាប់ (LLM) មកពីសាលាច្បាប់ Cornell ។

លោកស្រីបានសិក្សាផ្នែកច្បាប់នៅសាលាសេដ្ឋកិច្ច និងវិទ្យាសាស្ត្រនយោបាយនៅទីក្រុងឡុង ហើយទទួលបានសញ្ញាប័ត្របណ្ឌិត។

នៅឆ្នាំ១៩៩៣ ក្នុងនាមជាអ្នកឯករាជ្យ (ដោយគ្មានការចូលរួមពីគណបក្ស) លោកស្រីត្រូវបានតែងតាំង ក្នុងតំណែងជាច្រើនរបស់រដ្ឋាភិបាលជាបន្តបន្ទាប់ រួមមានអ្នកចរចាពាណិជ្ជកម្ម សម្រាប់កិច្ចការអង្គការពាណិជ្ជកម្មពិភពលោកជាដើម។

បន្ទាប់ពីប្រធានបក្ស DPP ដែលលោក Chen Shui-bian បានឡើងកាន់អំណាចនៅឆ្នាំ២០០០ លោកស្រី Tsai បានបម្រើការជារដ្ឋមន្ត្រី នៃក្រុមប្រឹក្សាកិច្ចការដីគោកពេញមួយអាណត្តិដំបូងរបស់លោក Chen ក្នុងនាមជាអ្នកមិនប្រកាន់បក្សពួកនិយម។

លោកស្រីបានចូលរួមជាមួយបក្ស DPP ក្នុងឆ្នាំ២០០៤ ហើយបានបម្រើការជាសមាជិក ដែលត្រូវបានតែងតាំងដោយបក្ស DPP ។ ចាប់តាំងពីពលបំរើការងារនៅទីនោះ លោកស្រីត្រូវបានតែងតាំងជាអនុប្រធានាធិបតី ក្រោមការដឹកនាំរបស់លោកនាយករដ្ឋមន្ត្រី Su Tseng-chang ។

លោកស្រីត្រូវបានបោះឆ្នោតជ្រើសរើស និងទទួលតំណែងជាមេដឹកនាំគណបក្ស DPP ក្នុងឆ្នាំ២០០៨ បន្ទាប់ពីគណបក្សរបស់លោកស្រី បានចាញ់នៅក្នុងការបោះឆ្នោតប្រធានាធិបតីឆ្នាំ២០០៨ ។ លោកស្រីបានលាលែងពីតំណែងជាប្រធាន បន្ទាប់ពីចាញ់ការបោះឆ្នោតប្រធានាធិបតីឆ្នាំ២០១២ ។

លោកស្រី Tsai បានឈរឈ្មោះបោះឆ្នោតជ្រើសរើសអភិបាលក្រុង New Taipei ក្នុងការបោះឆ្នោត សាលាក្រុងខែវិច្ឆិកា ឆ្នាំ២០១០ ប៉ុន្តែត្រូវបានបរាជ័យក្រោមអតីតឧបនាយករដ្ឋមន្ត្រីម្នាក់ទៀតគឺលោក Eric Chu (KMT) ។

នៅខែមេសាឆ្នាំ ២០១១ លោកស្រី Tsai បានក្លាយជាបេក្ខជនប្រធានាធិបតីស្ត្រីដំបូងបង្អស់ នៃគណបក្សដ៏ធំមួយនៅក្នុងប្រវត្តិសាស្ត្រ នៃសាធារណរដ្ឋចិន បន្ទាប់ពីបានផ្តួលអតីតមេដឹកនាំជាន់ខ្ពស់របស់លោកស្រី គឺលោកស្រី Su Tseng-chang ។

លោកស្រីធ្លាប់បានចាញ់បេក្ខជនគួបក្ខដិបក្ស ជាតិនិយមចិន លោក Ma Ying-jeou ក្នុងងការបោះឆ្នោត ជ្រើសរើសប្រធានាធិបតីដោយផ្ទាល់លើកទី៥ ក្នុងឆ្នាំ២០១២ ប៉ុន្តែត្រូវបានជាប់បោះឆ្នោត យ៉ាងភ្លូកទឹកភ្លូកដី៤ឆ្នាំក្រោយមក នៅក្នុងការបោះឆ្នោតប្រធានាធិបតីផ្ទាល់លើកទី៦ ក្នុងឆ្នាំ២០១៦ ។

លោកស្រីគឺជាប្រធានាធិបតីដំបូង ដែលមិនធ្លាប់កាន់តំណែងនាយកប្រតិបត្តិជាប់ឆ្នោតមុនពេលធ្វើជាប្រធានាធិបតី និងជាប្រធានាធិបតីដំបូង ដែលត្រូវបានបោះឆ្នោតជ្រើសរើស ដោយគ្មានការកាន់តំណែងជាអភិបាលក្រុងតៃប៉ិ។

លោកស្រី Tsai បានជាប់ឆ្នោតជាប្រធានាធិបតីម្តងទៀត ជាមួយនឹងការកើនឡើងនូវសំឡេងឆ្នោត នៅក្នុងការបោះឆ្នោតប្រធានាធិបតីឆ្នាំ២០២០ ។

កាលពីថ្មីៗនេះ រដ្ឋាភិបាលប្រទេសចិនបានប្រកាសថា ខ្លួននឹងដាក់ទណ្ឌកម្មទៅលើក្រុមហ៊ុន Lockheed Martin ក្រុមហ៊ុន Boeing Defense ក្រុមហ៊ុន Raytheon ព្រមទាំងបុគ្គល ឬក្រុមហ៊ុនអាមេរិកណាមួយ ដែលទាក់ទងទៅនឹងផែនការផ្គត់ផ្គង់អាវុធរបស់ក្រុងវ៉ាស៊ីនតោនទៅកោះតៃវ៉ាន់។

ក្រុមហ៊ុនទាំង៣នេះ បានចូលរួមក្នុងការលក់មីស៊ីល រត់ចម្ងាយឆ្ងាយចំនួន១៣៥ ប្រព័ន្ធបាញ់មីស៊ីលចំនួន១២ និងប្រព័ន្ធចាប់សញ្ញាឃ្លាំមើលមួយចំនួន ទៅឱ្យកោះតៃវ៉ាន់ ដែលឧបករណ៍ទាំងនេះមានតម្លៃសរុប ១,៨ ពាន់លានដុល្លារ។

ចិនបានទាមទារឱ្យអាមេរិកបញ្ឈប់ការលក់នេះ ហើយបានប្រកាសការដាក់ទណ្ឌកម្ម ក្រោយក្រសួងការបរទេសអាមេរិកបានអនុញ្ញាតឱ្យការលក់ និងផ្គត់ផ្គង់អាវុធនេះដំណើរការទៅមុខ។

សហរដ្ឋអាមេរិក ក៏ដូចជាប្រទេសភាគច្រើន គឺមិនមានទំនាក់ទំនងការទូតជាផ្លូវការជាមួយកោះតៃវ៉ាន់ទេ ប៉ុន្តែទីក្រុងវ៉ាស៊ីនតោនមានកាតព្វកិច្ចតាមផ្លូវច្បាប់ ក្នុងការផ្ដល់ឱ្យកោះនេះនូវមធ្យោបាយការពារខ្លួន។

ភាពតានតឹងនៅច្រកសមុទ្រតៃវ៉ាន់ បានកើនឡើងយ៉ាងខ្លាំងនៅក្នុងរយៈពេលប៉ុន្មានឆ្នាំចុងក្រោយ ខណៈពេលទីក្រុងប៉េកាំង បានបង្កើនសកម្មភាពសមយុទ្ធយោធារបស់ខ្លួន ជាមួយនឹងសកម្មភាពរបស់រដ្ឋបាលលោក Trump ក្នុងការបង្កើនចំណងទាក់ទងផ្នែកយោធា និងសេដ្ឋកិច្ចជាមួយកោះតៃវ៉ាន់ ហើយជាពិសេសក្រោយពីប្រធានាធិបតីកោះតៃវ៉ាន់ លោកស្រី Tsai Ingwen បានឡើងកាន់អំណាចនៅឆ្នាំ២០១៦ ដោយលោកស្រីមានគោលនយោបាយ ធ្វើឱ្យតៃវ៉ាន់ទទួលបានឯករាជ្យភាព និងមិនទទួលយកគោលការណ៍ចិនតែ១ ៕

តម្រូវការលំនៅដ្ឋានទូទាំងរាជធានីភ្នំពេញនឹងកើនឡើងដល់ជិតកន្លះលានខ្នងនៅឆ្នាំ២០៣០

ដោយៈហ្សូលី

ភ្នំពេញៈ នៅឆ្នាំ២០៣០ខាងមុខ តម្រូវការលំនៅដ្ឋានទូទាំងរាជធានីភ្នំពេញ នឹងហក់ឡើងដល់កន្លះលានខ្នង។ នេះបើតាមឱ្យដឹងពីរបាយការណ៍ របស់ក្រុមអ្នកជំនាញស្រាវជ្រាវរបស់ក្រុមហ៊ុនវាយតម្លៃអចលនទ្រព្យ Vtrust Appraisal កាលពីថ្មីៗនេះ។

យោងតាមឯកសារដែលមានចំណងជើងថា “ភ្នំពេញ ឆ្នាំ 2030 ” បានបង្ហាញថា លំនៅឋានដែលបាននិង កំពុងសាងសង់នឹងកើនឡើង៣ដង ក្នុងរយៈពេល១៣ឆ្នាំខាងមុខ។ ក្រុមហ៊ុនវាយតម្លៃខាងលើបានអះអាងថា បច្ចុប្បន្នចំនួនលំនៅឋានសរុបមានចំនួន ១៥០,០០០ខ្នង ប៉ុន្តែនឹងកើនឡើងដល់ ៤៥០,០០០ខ្នងនៅឆ្នាំ២០៣០ ។

របាយការណ៍ដដែលបន្តថា នៅក្នុងចំណោមខណ្ឌទាំង១៤ នៅរាជធានីភ្នំពេញមានខណ្ឌចំនួន៧បាន និងកំពុងមានសកម្មភាពមមាញឹក ក្នុងការសាងសង់សំណង់លំនៅឋាន ដើម្បីផ្គត់ផ្គង់ទៅតាមតម្រូវការ ដែលនឹងធ្វើឱ្យកើនឡើងរហូតដល់ជិតកន្លះ លានខ្នងនៅឆ្នាំ២០៣០ ។

កំណើននេះ អាចបណ្តាលមកពីការអភិវឌ្ឍ គម្រោងរៀបចំហេដ្ឋារចនាសម្ព័ន្ធនានា ដែលកាន់តែបង្កភាពងាយស្រួលក្នុងការធ្វើដំណើរ ចេញចូលក្រុង ជាពិសេសការតភ្ជាប់បណ្តាញផ្លូវនានា រួមជាមួយលំហូរនៃចំនួន ប្រជាសាស្ត្រចូលកាន់តែច្រើន ។

លោក ង៉ែត ជូ អ្នកជំនាញសេដ្ឋកិច្ច បានមានប្រសាសន៍ឱ្យដឹងថា កំណើនលំនៅ ដ្ឋានកាន់តែច្រើនឡើងៗ នឹងបណ្តាលឱ្យតម្លៃអចលនទ្រព្យកាន់តែខ្ពស់ ក្នុងរយៈពេលប៉ុន្មានឆ្នាំចុងក្រោយនេះ។ តម្លៃដីធ្លីមានការកើនឡើងចន្លោះពី ៧-១០ភាគរយក្នុងមួយឆ្នាំអាស្រ័យទៅតាមទីតាំង។

លោកបន្តថា “ការផ្គត់ផ្គង់លំនៅឋានតម្លៃសមរម្យនាពេលបច្ចុប្បន្ន មិនឆ្លើយតបនឹងកម្រិតជីវភាពរបស់កម្មករទេ ព្រោះផ្ទះមួយខ្នងត្រូវចំណាយប្រាក់យ៉ាងតិច២៥,០០០ ដុល្លារ។ វិបត្តិនេះកើតឡើងរួចហើយនៅហុងកុង ដូច្នេះកម្ពុជាគួរតែរៀមខ្លួនជាមុន” ។

របាយការណ៍របស់ក្រសួងសេដ្ឋកិច្ច និងហិរញ្ញវត្ថុបានចេញផ្សាយកាលពីពេលថ្មីៗនេះថា គម្រោងសំណង់លំនៅឋាននៅតែបន្ត មានកំណើនល្អដែលនៅក្នុងរយៈពេល៨ខែ ឆ្នាំ២០២០នេះ មានចំនួន២,៨១៩ គម្រោង ឬ ស្មើនឹង៨៤% នៃ គម្រោងសាងសង់សរុប ។ គម្រោងសំណង់លំនៅឋាននេះកើនឡើង ៦.៥% បើធៀបនឹងរយៈពេលដូចគ្នា កាលពីឆ្នាំមុន៕

តំបន់វេងស្រេងនឹងក្លាយទៅជាតំបន់ពាណិជ្ជកម្មទំនើបនាពេលខាងមុខ

ដោយៈវុត្ថា

ភ្នំពេញៈ តំបន់នៅតាមបណ្តោយផ្លូវវេងស្រេងបាន និងកំពុងវិវឌ្ឍន៍ខ្លួនបណ្តើរៗទៅរកតំបន់ពាណិជ្ជកម្ម ទំនើបនាពេលខាងមុខដ៏ខ្លី បន្ទាប់ពីមានគម្រោងវិនិយោគផ្សារទំនើប និងគម្រោងផ្សេងៗទៀតកំពុងមានវត្តមាននៅ់ទីនោះ។

លោកឡុង គីមសួគ៌ អគ្គនាយកក្រុមហ៊ុន Century21 Advance បានប្រាប់គេហទំព័រ Propertyarea.asia កាលពីថ្ងៃទី២៤ ខែវិច្ឆិកា ឆ្នាំ ២០២០កន្លងមកថា តំបន់ផ្លូវវេងស្រេងនាពេលបច្ចុប្បន្ននេះ កំពុងមានតែមានសក្តានុពលខ្ពស់ ព្រោះតែតំបន់ជុំវិញនេះមានការការអភិវឌ្ឍន៍ ដូចជាគម្រោងស្ពានអាកាសចោម និងក្បែរគម្រោងផ្លូវក្រវ៉ាត់ក្រុងជាដើម។

លោកបន្តថា “នៅក្នុងតំបន់នេះនឹងកាន់តែរីកចំរើន ហើយនៅថ្ងៃខាងមុខវានឹងក្លាយទៅជាតំបន់ពាណិជ្ជកម្មទំនើប និងអាចប្រកួតប្រជែង ជាមួយនឹងតំបន់ផ្សេងទៀតរបស់ទីក្រុងភ្នំពេញ ដោយសារទីក្រុងភ្នំពេញនឹងកាន់តែរីកធំ ហើយតំបន់នឹងមិនមែនជាយក្រុងទៀតទេ” ។

លោកឡូង គឹមសួគ៌ បានបន្ថែមថា ការរីកចំរើននេះ ស្របទៅនឹងផែនការរបស់រដ្ឋាបាលក្នុងការពង្រីកក្រុង និងការអភិវឌ្ឍន៍ប្រព័ន្ធហេដ្ឋារចនាសម្ព័ន្ធក្រុង កាន់តែប្រសើរ និងមានសេវាដឹកជញ្ជូនកាន់តែប្រសើរផងដែរ ដែលជំរុញការធ្វើដំណើរកាន់តែមានភាពងាយស្រួល។

លោកស្រី តាំង ហួរ នាយិកាក្រុមហ៊ុន Amatak Property Service បានឱ្យដឹងថា តំបន់នេះ លែងជាតំបន់ជាយក្រុង ដែលបណ្តុំទៅដោយរោងចក្រ សហគ្រាសច្រើនហើយ វាបានក្លាយជាតំបន់កណ្តាលក្រុង និងជាតំបន់ពាណិជ្ជកម្ម។

លោកស្រីបន្តថា “យើងមិនបាច់ប្រើពេលយូទៀតទេ ដោយបច្ចុប្បន្ននេះ វាបាននឹងកំពុងប្រែក្លាយបន្តិចម្តងៗ ទៅជាតំបន់ស៊ីវិល័យ នឹងទំនើប ហើយអ្វីៗនៅតំបន់នេះទាំងដីធ្លី និងអចលនទ្រព្យផ្សេងៗ នឹងកាន់តែឡើងថ្លៃខ្ពស់បន្ថែមទៀត” ។

ទោះជាយ៉ាងណាលោកស្រីបញ្ជាក់ទៀតថា តំបន់នេះមិនអាចអនុញ្ញាតឱ្យសាងសង់អគារខ្ពស់ៗបាននោះទេ ព្រោះតំបន់នេះ ក៏នៅក្បែព្រលានយន្តហោះអន្តរជាភ្នំពេញ ប៉ុន្តែប៉ុន្មានឆ្នាំចុងក្រោយនេះ តំបន់នេះមានការរីកចំរើនទាំងវិស័យអចលនទ្រព្យសំណង់ និង មានសក្តានុពលខ្ពស់លើវិស័យសេដ្ឋកិច្ច៕

វិវាទដីធ្លីនៅខេត្តព្រះសីហនុកើតឡើងរហូតដល់ជាង១០១៦ករណី

ដោយៈ រ៉ាណេត

ព្រះសីហនុៈ នៅទូទាំងខេត្តព្រះសីហនុ ដែលកំពុងការអភិវឌ្ឍន៍ទៅលើវិស័យសំណង់យ៉ាងឆាប់រហ័ស និងមានតម្រូវការប្រើប្រាស់ដីយ៉ាងច្រើន បានកើតមានវិវាទដីធ្លីរបស់ប្រជាពលរដ្ឋ រួមជាមួយនឹងសំណើពាក់ព័ន្ធ ទៅនឹងការគ្រប់គ្រងរបស់ស្ថាប័ននានាមានចំនួនរហូតដល់១០១៦ករណី ដែលរហូតមកដល់ពេលនេះ រដ្ឋបាលខេត្តកំពុងយកចិត្តទុកដាក់ក្នុងការដោះស្រាយ និងសម្របសម្រួល។

លោក គួច ចំរើន អភិបាលខេត្តព្រះសីហនុ បានមានប្រសាសន៍នៅរសៀលថ្ងៃទី២៤ ខែវិច្ឆិកា ឆ្នាំ២០២០ថា គិតត្រឹមថ្ងៃទី២០ ខែវិច្ឆិកា ឆ្នាំ២០២០ រដ្ឋបាលខេត្តព្រះសីហនុ បានទទួលឯកសារពាក់ព័ន្ធសំណើដីធ្លី និងវិវាទដីធ្លីមកពីស្ថាប័នពាក់ព័ន្ធ និងប្រជាពលរដ្ឋ មកដាក់ពាក្យស្នើសុំនៅរដ្ឋបាលខេត្តមានចំនួន ១០១៦ករណី។

លោកបញ្ជាក់ថា ជាមួយនឹងការទទួលបានពាក្យបណ្តឹង និងសំណើដោះស្រាយទាំងនេះ រដ្ឋបាលខេត្តបានឆ្លើយតប ទៅម្ចាស់សំណើបានចំនួន១៨៣ករណី ធ្វើរបាយការណ៍ទៅក្រសួង ស្ថាប័នពាក់ព័ន្ធចំនួន៦០ករណី។ បញ្ជូនទៅស្ថាប័នពាក់ព័ន្ធ ដើម្បីជាសមត្ថកិច្ចចំនួន៨៤ករណី ដោះស្រាយ និងសម្របសម្រួលចប់ចំនួន១៥ករណី។ សរុបមានចំនួន៣៤២ករណី ក្នុងនោះបណ្តឹងមកពីគណ:កម្មាធិការសិទ្ធិមនុស្ស២ករណី ដោយករណីទី១ ស្ថិតក្នុងសមត្ថកិច្ចតុលាការ ហើយទី២ មន្ទីរបរិស្ថានកំពុងពិនិត្យស្រាវជ្រាវ។

លោកកែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី បានកោតសរសើរដល់លោកអភិបាលខេត្តព្រះសីហនុ និងសមត្ថកិច្ចពាក់ព័ន្ធ បានខិតខំបំពេញការងារសិទ្ធិមនុស្សបានល្អក្នុងខេត្ត ថ្វីត្បិតតែពាក់ពន្ធ័នឹងបណ្តឹងមានការកើនឡើង គឺមហាជនមានជំនឿទុកចិត្តមកលើការដឹកនាំរបស់រដ្ឋបាលខេត្ត ក្នុងការដោះស្រាយឆ្លើយតបបានទាន់ពេលវេលា។

លោកបានបន្តថា “ប្រទេសជាតិមានសន្តិភាព មានការអភិវឌ្ឍន៍ បញ្ហាទំនាស់ដីធ្លីវាតែងតែកើតមានជាក់ជាមិនខាន” ៕