ដោយ ៖ រ៉ាណេត

ភ្នំពេញ ៖ ផ្សារឃ្លាំងរំសែវថ្មីសែនសុខ បានធ្វើការសាងសង់រយៈពេល៩ខែដោយគិតចាប់ពីថ្ងៃសម្ពោធបុកគ្រឹះដែលចំណាយដើមទុនសាងសង់ប្រមាណជាង៣លានដុល្លាអាមេរិក។

នៅថ្ងៃ២៧ ខែវិច្ឆិកា ឆ្នាំ២០២០ខាងមុខនេះ ផ្សារឃ្លាំងរំសែវថ្មីសែនសុខ នឹងបើកសម្ពោធដំណើរការជាផ្លូវការក្រោមអធិបតីភាពលោកជំទាវ ហ៊ុន សេងនី ឯកឧត្តមអភិបាលរងនៃគណៈអភិបាលរាជធានីភ្នំពេញ នឹងឯកឧត្តមលោកជំទាវអ្នកមុខអ្នកការជាច្រើននាក់ទៀត។

ផ្សារឃ្លាំងរំសែវថ្មីសែនសុខ មានទីតាំងនៅចំកណ្តាលតំបន់ពាណិជ្ជកម្មទំនើប ជិតផ្សារ Aeon2 ទល់មុខផ្សារ Global House សាងសង់លើផ្ទៃដីចំនួន ២,៧ហិកតា ងាយស្រួលចតរថយន្ត និងម៉ូតូមានតូបលក់ផលិតផលរហូតដល់ ១០០០តូប អមជាមួយ Shophouse និងផ្សារបន្លែត្រីសាច់ធម្មជាតិ និងមានបន្ទប់ទឹកស្អាត មានអនាម័យ ។

ផ្សារឃ្លាំងរំសែវថ្មីសែនសុខ មានលក់ទំនិញជាច្រើនប្រភេទដូចជា ទូរស័ព្ទដៃ សំភារៈទូរស័ព្ទ គ្រឿងអេឡិចត្រូនិក សម្លៀកបំពាក់ ម្ហូបអាហារ គ្រឿងសម្អាង សាឡន និងថែសម្ផស្ស ព្រមទាំងហាងកាហ្វេប្រេនផ្សេងៗដែលមានគុណភាពខ្ពស់តម្លៃសមរម្យ ។

សូមបញ្ជាក់ថា រាល់ការជាវទំនិញក្នុងឱកាសបើកលក់ពីថ្ងៃទី២៧ ខែវិច្ឆកា ឆ្នាំ២០២០ ខាងមុខនេះ ផ្សារឃ្លាំងរំសែវថ្មីសែនសុខក៏មានកម្មវិធី Promotion និងការលក់បញ្ចុះតម្លៃយ៉ាងច្រើនសន្ធឹកសន្ធាប់ផងដែរ៕

ដោយ៖ ប៊ី

ភ្នំពេញ៖ ប្រជាជនបច្ចុប្បន្ន កំពុងរស់នៅជាមួយនឹងការផ្លាស់ប្ដូរដ៏សំខាន់ពាក់ពន្ធនឹងវិធីផលិតផលិតផលក្នុងបច្ចេកវិទ្យាឌីជីថល ដែលជាការផ្លាស់ប្ដូរដ៏គួរឲ្យមានការយកចិត្តទុកដាក់ ដែលត្រូវបានហៅថា ឧសហកម្ម ៤.០ ឬIndustry 4.0។

វាបង្ហាញពីបដិវត្តន៍ជំនាន់ទី៤ ដែលកើតឡើងក្នុងសង្វាក់ផលិតកម្ម។

ពីបដិវត្តន៍ឧស្សាហកម្មជំនាន់ទី១ដែលនិយាយអំពីការយន្តកម្មដំណើរការដោយចំហាយទឹកទៅកាន់ការប្រើប្រាស់អគ្គិសនីក្នុងបដិវត្តន៍ឧស្សាហកម្មជំនាន់ទី២។ បដិវត្តន៍ឧស្សាហកម្មជំនាន់ទី៤ នឹងជំនួសឱ្យបដិវត្តឧស្សាហកកម្មជំនាន់ទី៣ ដែលប្រើប្រាស់កុំព្យូរទ័រ និងម៉ាស៊ីនស្វ័យប្រវត្តិ ទៅជាការប្រើប្រាស់ប្រព័ន្ធម៉ាស៊ីនឆ្លាតវៃស្វ័យប្រវត្តិ។
ឧស្សាហកម្ម ៤.០ នឹងបង្កើនប្រសិទ្ធភាពនៃការប្រើប្រាស់កុំព្យូទ័រក្នុងឧស្សាហកម្ម ៣.០
នៅពេលដែលកុំព្យូទ័រត្រូវបានបង្ហាញវត្តមាននៅក្នុងឧស្សាហកម្ម ៣.០ គឺជាការបន្ថែមនូវបច្ចេកវិទ្យាថ្មីស្ទើរតែទាំងស្រុងនាពេលនោះ។

បច្ចុប្បន្ននេះ និងក្នុងពេលអនាគត នៅពេលដែលឧស្សាហកម្ម ៤.០ បង្ហាញខ្លួន កុំព្យូទ័រត្រូវភ្ជាប់គ្នានិងទំនាក់ទំនងគ្នាទៅវិញទៅមកដែលដើរតួនាទីយ៉ាងសំខាន់ក្នុងការធ្វើការសម្រេចចិត្តដោយមិនមានការចូលរួមពីមនុស្ស។
ការបញ្ចូលគ្នារវាងប្រព័ន្ធដែលគ្រប់គ្រងដោយកុំព្យូទ័រ (cyber-physical systems) និងការភ្ជាប់ទំនាក់ទំនងដើម្បីបញ្ចូន ប្រមូលទិន្នន័យ និងផ្លាស់ប្ដូរទិន្នន័យ (Internet of Things) និងប្រព័ន្ធអិនធឺណេត (Internet of Systems) បង្កើតឲ្យបាននូវឧស្សាហកម្ម៤.០។
ដោយសារតែបច្ចេកវិទ្យាឆ្លាតវៃធ្វើឲ្យកាន់តែបង្កឲ្យមានភាពងាយស្រួលនិងភាពឆ្លាតវៃ ការផលិតកាន់តែមានប្រសិទ្ធភាព ប្រសិទ្ធផល និងសន្សំសំចៃខ្ពស់ជាងមុន។ វាគឺជាបណ្ដាញនៃម៉ាស៊ីនដែលតភ្ជាប់គ្នាតាមប្រពន្ធឌីជីថលពីមួយទៅមួយ ដើម្បីបង្កើតនឹងចែករំលែកព័ត៌មាន ដែលនេះគឺជាលទ្ធផលនៃឧស្សាហកម្ម ៤.០។

មុខងាររបស់ឧស្សាហកម្ម៤.០
ខណៈក្រុមហ៊ុនមួយចំនួនមិនសូវចាប់អារម្មណ៍អំពីឥទ្ធិពលនៃឧស្សាហកម្ម៤.០ដែលអាចជះឥទ្ធិពលដល់អាជីវកម្មរបស់ពួកគេ ក្រុមហ៊ុនមួយចំនួនកំពុងតែអនុវត្តនូវការផ្លាស់ប្ដូរក្នុងថ្ងៃនេះ និងរៀបចំខ្លួនដើម្បីអនាគតដែលម៉ាស៊ីនឆ្លាតវៃអាចធ្វើឲ្យអាជីវកម្មពួកគេរីកចម្រើន។ ខាងក្រោមនេះគឺជាមុខងារមួយចំនួនរបស់ឧស្សាហកម្ម ៤.០ ដែលដកស្រង់ពីគេហទំព័រ forbes.com៖

១) កំណត់ឱកាស៖ ដោយសារតែម៉ាស៊ីនអាចប្រមូលទិន្នន័យបានយ៉ាងច្រើនដែលអាចមានឥទ្ធិពលទៅលើការថែទាំ ដំណើរការ និងការដោះស្រាយបញ្ហានានា និងវិភាគទិន្នន័យនោះដើម្បីកំណត់រូបរាង និងទស្សនៈដែលមនុស្សមិនអាចធ្វើបាន ឧស្សាហកម្ម៤.០ផ្ដល់នូវឱកាសទៅដល់អ្នកផលិតករដើម្បីបង្កើនដំណើរការផលិតបានលឿន ឆាប់រហ័ស និងកាន់តែមានប្រសិទ្ធភាពខ្ពស់ ដោយតាមរយៈការដឹងអំពីអ្វីដែលត្រូវការការយកចិត្តទុកដាក់។

តាមរយៈការប្រើប្រាស់ឧបករណ៍តាមដានការប្រែប្រួល (Sensors) ក្នុងគ្រឿងបរិក្ខារបស់ខ្លួន ក្រុមហ៊ុនជីករកត្បូងរបស់ប្រទេសអាហ្រិកមួយអាចកំណត់សម្គាល់នូវបញ្ហាកម្រិតអុកស៊ីសែនកំឡុងពេលចម្រោះរ៉ែ។ បន្ទាប់ពីធ្វើការជួលជុលរួចហើយ ក្រុមហ៊ុនអាចបង្កើនផលិតផលបាន ៣.៧% ដែលអាចជួយសន្សំសំចៃបាន ២០លានដុល្លារជាប្រចាំឆ្នាំ។

២) មនុស្សយន្ត (Robot)៖ មនុស្សយន្ត (រ៉ូបូត)កាន់តែមានតម្លៃសមល្មមដែលក្រុមហ៊ុនមួយចំនួនអាចទិញយកទៅប្រើប្រាស់បាន។ រូប៉ូតដឹកជញ្ចូនទំនិញពីឃ្លាំង និងរៀបចំដើម្បីឲ្យរួចរាល់ដើម្បីដឹកចេញ។ រូប៉ូតអាចជួយទៅដល់ការផលិតកាន់តែលឿននិងមានសុវត្តិភាព។ រូប៉ូតត្រូវបានគេប្រើប្រាស់ដើម្បីដឹកជញ្ជូនទំនិញពីឃ្លាំងស្ដុករបស់ក្រុមហ៊ុនអាម៉ាហ្សូន ដែលវាអាចជួយកាត់បន្ថយថ្លៃនិងធ្វើឲ្យមានកន្លែងស្ដុកទំនិញកាន់តែល្អសម្រាប់ចែកចាយ។

៣) បង្កើនការដឹកជញ្ជូននិងការផ្គត់ផ្គង់៖ សង្វាក់ផ្គត់ផ្គង់ដែលភ្ជាប់គ្នាអាចផ្លាស់ប្ដូរ កែប្រែនិងផ្គត់ផ្គង់នៅពេលដែលព័ត៌មានថ្មីៗបានបង្ហាញ។ ប្រសិនបើអាកាសធាតុពន្យារារាំងការដឹកជញ្ជូន បណ្ដាញដែលមានភ្ជាប់គ្នានោះអាចផ្លាស់ប្ដូរទៅតាមស្ថានការណ៍ពិតនិងកែប្រែឬផ្លាស់ប្ដូរការផលិត។

៤) ការព្រីន ៣D (3D Printing)៖ បច្ចេកវិទ្យាបានបង្កើនជួយបង្កើននិងបង្កភាពងាយស្រួលយ៉ាងខ្លាំងក្នុងរយៈពេលប៉ុន្មានសតវត្យកន្លងមកនេះ ហើយបានអភិវឌ្ឍពីការព្រីនក្រដាសធម្មតាទៅជាការព្រីនផលិតផលពិតៗ។ ការរីកចម្រើននៃការប្រើប្រាស់ការផលិតបន្ថែមបានបើកផ្លូវទៅដល់ការផលិតកាន់តែច្រើនសម្បូរបែបតាមរយៈការព្រីនរូប 3D។

៥) ការភ្ជាប់ទំនាក់ទំនងដើម្បីបញ្ចូន ប្រមូលទិន្នន័យ និងផ្លាស់ប្ដូរទិន្នន័យ ឬមុខងារអ៊ីនធឺណិតសម្បូរបែប(Internet of Things) និងកន្លែងរក្សាទុកទិន្នន័យ (Cloud)៖ ធាតុផ្សំដ៏សំខាន់មួយនៃឧស្សាហកម្ម៤.០គឺការបញ្ចូន ប្រមូលទិន្នន័យ និងផ្លាស់ប្ដូរទិន្នន័យ ឬដែលគេហៅថា Internet of Things ដែលវាត្រូវបានកំណត់តួនាទីដោយឧបករណ៍ដែលចងភ្ជាប់គ្នា។ វាមិនត្រឹមតែជួយទៅដល់ការប្រតិបត្តិការណ៍នៅក្នុងនោះទេ តែថែមទាំងការប្រើប្រាស់ពពកដើម្បីផ្ទុកទិន្នន័យថែមទៀតផង។

ដំណើរការនិងសម្ភារៈបរិក្ខាត្រូវបានជួយបង្កើនដោយការបង្កើននូវការដឹងអំពីអ្នកដទៃដែលប្រើប្រាស់សម្ភារៈបរិក្ខាដូចគ្នា និងអាចធ្វើឲ្យសហគ្រាសធុនតូចអាចប្រើប្រាស់នូវបច្ចេវិទ្យា។ ខណៈពេលដែលឧស្សាហកម្ម៤.០កំពុងតែវិវត្តទៅមុខ អ្នកប្រហែលជាមិនអាចដឹងអំពីរូបភាពពេញលេញនៅឡើយនោះទេ ទាល់តែអ្នកក្រលែកមើលទៅ៣០ឆ្នាំទៅមុខទៀតថា ក្រុមហ៊ុនដែលប្រើប្រាស់បច្ចេកវិទ្យានឹងដឹងអំពីសក្ដានុពលរបស់ឧស្សាហកម្ម៤.០ខ្លាំងយ៉ាងណា៕

ដោយ ៖ រ៉ាណេត

ភ្នំពេញ ៖ អភិបាលខេត្តសៀមរាប តាមរយៈរដ្ឋបាលខេត្ត បានធ្វើសេចក្ដីជូនដំណឹងបន្ទាន់មួយសម្រាប់អ្នកដែលសាងសង់សំណង់បំពាន និងប៉ះពាល់ដល់គម្រោងសាងសង់ផ្លូវទាំង៣៨ខ្សែ ជាពិសេសប៉ះពាល់គម្រោងរៀបចំបណ្តាញបង្ហូរទឹកភ្លៀងចំនួន២៥ខ្សែ ត្រូវរុះរើជាបន្ទាន់ក្នុងរយៈពេល១០ថ្ងៃ គិតចាប់ពីថ្ងៃជូនដំណឹងនេះតទៅ។

នៅថ្ងៃចុងសប្ដាហ៍កន្លងទៅនេះ រដ្ឋបាលខេត្តសៀមរាបបានចេញសេចក្ដីជូនដំណឹងបន្ទាន់មួយស្ដីពីការរៀបចំបណ្តាញលូទឹកភ្លៀង និងលូទឹកកខ្វក់នៃគម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ ខ្សែ ក្នុងក្រុងសៀមរាប បន្ទាប់ពីទទួលបានការអនុញ្ញាតពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា សម្រាប់គម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ ក្នុងក្រុងសៀមរាប ពេលនេះការអនុវត្តគម្រោងកំពុងដំណើរការជាបណ្តើរៗ។

ជាមួយគ្នានេះរដ្ឋបាលខេត្តថ្លែងអំណរគុណដល់បងប្អូនប្រជាពលរដ្ឋ និងសាធារណជន ដែលបានរុះរើដោយខ្លួនឯងនូវសំណង់លំនៅឋានតូបលក់ដូរ របង និងសំណង់ការ្យផ្សេងៗទៀតក្នុងគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ ក៏មានការៀបចំស្ថាបនាហេដ្ឋា រចនាសម្ព័ន្ធបណ្ដាញលូទឹកភ្លៀង និងទឹកកខ្វក់ចំនួន២៥ ខ្សែ ដូចមានក្នុងផែនទីភ្ជាប់មកជាមួយ។

នៅក្នុងសេចក្ដីជូនដំណឹងដដែលបានបញ្ជាក់ថា ក្នុងគោលបំណងរៀបចំបណ្តាញបង្ហូរទឹកភ្លៀង និងទឹកកខ្វក់ចំនួន២៥ខ្សែ អាចប្រព្រឹត្តបានដោយរលូន និងសម្រេចបានទៅតាមផែនការដែលបានគ្រោងទុក រដ្ឋបាលខេត្តសូបជូមជូនដំណឹងដល់ប្រជាពលរដ្ឋដែលសាងសង់សំណង់លំនៅឋាន តូបលក់ដូរ របង និងសំណង់ផ្សេងៗទៀតដែលបានសាងសង់រំលោភបំពានកន្លងមក ត្រូវចូលរួមសហការដោយការរុះរើដោយខ្លួនឯងក្នុងរយៈពេល១០ ជាកំហិត ហើយមន្ត្រីនឹងចុះវាស់វែងតាមការសម្រេចចុះបញ្ជីដីមានលក្ខណៈជាប្រព័ន្ធ(LMAP)។ ក្នុងករណីមិនរុះរើ រដ្ឋបាលខេត្តនឹងចុះអនុវត្តតាមនិតិវិធី ដោយមិនទទួលខុសត្រូវទៅលើរាល់ការខូចខាត និងបាត់បង់ទ្រព្យសម្បត្តិនោះទេ៕

ដោយ ៖ ហ្សូលី

ភ្នំពេញ ៖ កម្ពុជាបានចុះអនុស្សារណៈយោគយល់គ្នា (MOU) ជាមួយភាគីប្រទេសចិន ក្នុងគោលបំណងបង្កើនការវិនិយោគ ទំនាក់ទំនងពាណិជ្ជកម្មអន្តរជាតិ និងជម្រុញវិស័យដឹកជញ្ជូនឱ្យកាន់តែល្អប្រសើរ។

លោក ជា ចាន់ដារា ប្រធានសមាគមពាណិជ្ជករដឹកជញ្ជូនទំនិញ បានមានប្រសាសន៍ឱ្យដឹងថា គោលដៅសំខាន់នៃការចុះអនុស្សារណៈយោគយល់គ្នា MOU នៅពេលថ្មីៗនេះ គឺដើម្បីរឹតបន្តឹងទំនាក់ទំនងឱ្យកាន់តែស៊ីជម្រៅរវាងវិនិយោគិនចិន និងកម្ពុជា។ ចំនុចដែលភាគីចិនចង់បាននោះ គឺចង់ឱ្យមានការណែនាំពីការនាំទំនិញពីប្រទេសចិនចូលមកកាន់កម្ពុជា ហើយសមាគមពាណិជ្ជករដឹកជញ្ជូនទំនិញកម្ពុជា ក៏ចង់ឱ្យមានការណែនាំទំនិញពីកម្ពុជាចូលទៅកាន់ប្រទេសចិនវិញដូចគ្នា។

លោកបន្តថា ចំពោះកិច្ចសហប្រតិបត្តិការនេះ បន្ទាប់ពីជំងឺវិបត្តិសកល ភាគីទាំងពីរមានបំណងចង់ឱ្យមានការដឹកនាំក្រុមដែលចង់វិនិយោគទៅប្រទេសចិន ឬចង់ទិញទំនិញពីប្រទេសចិន អាចធ្វើដំណើរដល់រោងចក្រនៅចិនផ្ទាល់។ ចំណែកភាគីចិនក៏នឹងធ្វើសកម្មភាពនេះដែរ ពោលវិនិយោគិនដែលចង់វិនិយោគនៅកម្ពុជា ឬចង់ទិញទំនិញពីកម្ពុជា អាចទៅដល់រោងចក្រផ្ទាល់បាន។

ការចុះអនុស្សារណៈយោគយល់គ្នាមួយនេះ គឺជាស្ពានចម្លងសម្រាប់ឱ្យមានជំនួបរវាងអ្នកវិនិយោគនៃប្រទេសទាំងពីរ ដើម្បីពិភាក្សាលើការងារវិនិយោគផងដែរ ខណៈពេលដែលវិស័យដឹកជញ្ជូនទំនិញមានការធ្លាក់ចុះដោយសារ Covid-19។

ប្រធានសមាគមពាណិជ្ជករដឹកជញ្ជូនទំនិញរូបនេះបានណែនាំបន្ថែមថា សម្រាប់អ្នកចង់បញ្ជាទិញទំនិញពីប្រទេសក្រៅ ត្រូវព្យាយាមទាក់ទងឱ្យបានច្បាស់លាស់ រវាងអ្នកទិញ និងអ្នកលក់ ព្រោះការហោះហើរទៅប្រទេសដទៃក្នុងកំឡុងពេលនេះ គឺមិនមានទេ ដែលធ្វើឱ្យការទិញ-លក់អាចប៉ះពាល់ ឬមានការបោកប្រាស់ជាដើម។

ការចុះអនុស្សារណៈនៃការយោគយល់គ្នា MOU នេះ បានប្រព្រឹត្តឡើងនៅថ្ងៃទី ២០ ខែវិច្ឆិកា ឆ្នាំ ២០២០ តាមប្រព័ន្ធវីដេអូអនឡាញរវាងសមាគមពាណិជ្ជករដឹកជញ្ជូនប្រទេសកម្ពុជា និងសភាពាណិជ្ជកម្មនិងឧស្សាហកម្ម អាមេរិក-អ៉ឺរ៉ុបរបស់ប្រទេសចិន៕

ដោយ ៖ រ៉ាណេត

ភ្នំពេញ ៖ គម្រោងសាងសង់ព្រលានយន្តហោះអន្តរជាតិភ្នំពេញថ្មីដែលស្ថិតនៅក្នុងខេត្តកណ្តាល កំពុងតែបន្តសកម្មភាពយ៉ាងមមាញឹកក្នុងការកសាងនូវហេដ្ឋារចនាសម្ព័ន្ធនានានៅក្នុងគម្រោង រួមជាមួយនឹងការចាក់ដីបំពេញ ដែលរហូតមកដល់ពេលនេះសម្រេចបានលទ្ធផលប្រមាណ១៥ភាគរយនៃគម្រោងសរុបទាំងមូល។

លោក ស៊ីន ចាន់សេរីវុត្ថា អ្នកនាំពាក្យរដ្ឋលេខាធិកាអាកាសចរស៊ីវិលបានមានប្រសាសន៍ប្រាប់គេហទំព័រPpropertyarea.asia នៅថ្ងៃទី២៣ ខែវិច្ឆិកា ឆ្នាំ២០២០នេះថា គិតត្រឹមចុងខែវិច្ឆិកានេះ លទ្ធផលនៃការសាងសង់ព្រលានយន្ដហោះអន្តរជាតិភ្នំពេញថ្មីសម្រេចបានប្រមាណ១៥ភាគរយ ដែលតាមការប៉ាន់ស្មានអាចនឹងចប់សព្វគ្រប់តាមផែនការដែលមានកំណត់ក្នុងឆ្នាំ២០២៣ខាងមុខនេះ។

លោកបានបញ្ជាក់ថា “កាលពីប៉ុន្មានថ្ងៃមុនមានការអាក់ខានបន្តិចដោយសារតែជំនន់ទឹកភ្លៀង ប៉ុន្តែវាមិនមែនជាឧបសគ្គធំនោះទេ ព្រោះពេលនេះពួកគាត់កំពុងតែបន្តសកម្មភាព ដែលវាមិនមានអីរាំងស្ទះ ឬយឺតយ៉ាវនោះទេ ពួកគាត់កំពុងតែមមាញឹកក្នុងការសាងសង់ ទៅតាមផ្នែករបស់ពួកគាត់ផ្សេងគ្នា”។ លោកបន្តថា “នៅក្នុងសាងសង់នេះ មានការបែងចែកផ្នែកផ្សេងៗគ្នា ដោយផ្នែកខ្លះធ្វើបានច្រើន ហើយផ្នែកខ្លះទៀតធ្វើបានតិច ប៉ុន្តែជារួមខ្ញុំបូកសរុបជាលទ្ធផលឃើញថាវឌ្ឍនភាពនៃហេដ្ឋារចនាសម្ព័ន្ធនៃគម្រោងទាំងមូលសម្រេចបានលទ្ធផលប្រមាណ១៥ភាគរយ”។

អភិបាលខេត្តកណ្តាល លោក គង់ សោភ័ណ្ឌ ធ្លាប់បានមានប្រសាសន៍កាលពីពេលកន្លងទៅនេះថា គម្រោងព្រលានយន្តហោះអន្តរជាតិភ្នំពេញថ្មីនេះ បានសាង់សង់លើផ្ទៃដីទំហំ ២៦០០ ហិកតា ស្ថិតនៅខេត្តកណ្តាល និងតាកែវ។ ទំហំដីនៅខេត្តកណ្ដាល ២២២៧ ក្បាលដី = ២៤៤១ ហិកតា និងខេត្តតាកែវ ៣៦០ ក្បាលដី = ១៥៨ ហិកតា ជាមួយនឹងទុនវិនិយោគ ១៥០០លានដុល្លារ របស់ក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ដោយដំណាក់កាលទីមួយ នឹងត្រូវបញ្ចប់ការសាងសង់ក្នុងឆ្នាំ២០២៣។

ពាក់ព័ន្ធទៅនឹងផលប៉ះពាល់នៃគម្រោង រដ្ឋបាលខេត្តកណ្តាល បានដោះស្រាយបញ្ហាសំណង់មិនរៀបរយជាមួយប្រជាពលរដ្ឋនៅក្នុងដីព្រលានសរុប ១៧៦ គ្រួសារ ក្នុងនោះ ១១គ្រួសារ ទទួលប្រាក់គោលនយោបាយ ២០០០$ក្នុង១គ្រួសារ និង១៦៥ គ្រួសារទៀត ទទួលយកការដោះដូរដីទៅកន្លែងផ្សេងសម្រាប់សង់លំនៅដ្ឋានរស់នៅ ដោយរាល់ការដោះស្រាយផលប៉ះពាល់ពីគម្រោងព្រលានយន្តហោះនៅក្នុងខេត្តកណ្តាល ឈរលើការយោគយល់ និង ដោះស្រាយដោយសន្តិវិធី ដោយពុំឱ្យប្រជាពលរដ្ឋរូបណាម្នាក់ពិបាកនោះទេ។

ព្រលានយន្តហោះថ្មីនេះ ត្រូវបានរចនាឡើងលំដាប់ថ្នាក់ 4F ជាអាកាសយានដ្ឋានធំបំផុតលំដាប់ទី៩ នៅក្នុងពិភពលោក ដែលស្ថិតនៅលំដាប់ពីក្រោយអាកាសយានដ្ឋាន Chicago O’Hare និងលំដាប់មុខអាកាសយានដ្ឋានអន្តរជាតិ ទីក្រុងប៉េកាំងរបស់ប្រទេសចិន។ នៅពេលសាងសង់ចប់ អាកាសយានដ្ឋានថ្មីនេះ នឹងសមត្ថភាពទទួលយន្តហោះដឹកជញ្ជូនធុនធ្ងន់ផ្លូវឆ្ងាយ ដែលប្រើប្រាស់ទុនវិនិយោគសរុប ១,៥០០ លានដុល្លារអាមេរិក ក្នុងនោះទឹកប្រាក់១,១០០លានដុល្លារជាកម្ចីពីធនាគារបរទេស និង២៨០លានដុល្លារទៀតជារបស់ក្រុមហ៊ុន CAIC របស់លោកឧកញ៉ា ពុង ខៀវសែ ។ អាកាសយានដ្ឋានអន្តរជាតិមួយនេះ អាចនឹងទទួលអ្នកដំណើរបានប្រមាណ១៣លាននាក់នៅក្នុងឆ្នាំ២០២៣ ហើយ៣០លាននាក់នៅក្នុងឆ្នាំ២០៣០ និង៥០លាននាក់នៅក្នុងឆ្នាំ២០៥០៕

ដោយៈ​ប៊ី

ភ្នំពេញៈ ផលិតផល​ថ្នាំលាប ថេ​ម​ភល (Temple) របស់​ក្រុមហ៊ុន IMCT Co., Ltd ដែលជា​ផលិតផល បង្កើតឡើង​ដោយ​កូន​ខ្មែរ​សុទ្ធសាធ និង​កំពុង​ចរាចរណ៍​នៅលើ​ទីផ្សារ​កម្ពុជា បាននិងកំពុង​ទទួល​បានការ​ទទួលស្គាល់​ពី​អ្នកប្រើប្រាស់ និង​អតិថិជន​ពី​គុណភាព​របស់​ផលិតផល​ថ្នាំលាប ថេ​ម​ភល។

ថេ​ម​ភល (Temple) ជា​ភាសា​អន្តជាតិ ដែល​បាន​ន័យ​ជា​ភាសាជាតិ​ថា “ប្រាសាទ” ឬ​កន្លែង​ទី​គោរព​សក្ការៈ របស់​មនុស្ស​និង​ទេព្ដា ។ ដើម្បី​ជាទីគោរព​ដឹងគុណ​ដល់​បុព្វបុរស​ខ្មែរ ដែល​បាន​លះបង់​សាច់​ស្រស់ ឈាម​ស្រស់ បន្សល់ទុក​ស្នាដៃ​ដ៏​ម​ហ​ស្សចារ គ្មាន​ពីរ​ក្នុង​លោក ក្រុមហ៊ុន IMCT Co., Ltd បានទទួល​ការអនុញ្ញាតិ ពី​រាជរដ្ឋាភិបាល​កម្ពុជា តាមរយៈ​ក្រសួងពាណិជ្ជកម្ម និង​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ដើម្បី​បាន​ប្រើ​ឈ្មោះ​ប្រាសាទអង្គរវត្ត ជាទីគោរព​សក្ការៈ នៅក្នុង​ម៉ាក​យី​រហោ ផលិតផល​ថ្នាំលាប របស់​ក្រុមហ៊ុន IMCT Co., Ltd ដែលជា​ផលិតផល បង្កើតឡើង​ដោយ​កូន​ខ្មែរ​សុទ្ធសាធ ដើម្បី​ទុកជា​ការ​តបស្នង​សងគុណ នូវ​ឧបការៈគុណ ចំពោះ​បុព្វបុរស​ខ្មែរ ដើម្បីឱ្យ​មនុស្ស​ក្នុង​លោក​ចងចាំ​នូវ​ឈ្មោះ​ប្រាសាទ​នានា ដែលជា​កេ​រិ៍​ដំណែល​ដូនតា​ខ្មែរ​យើង។

លោក​ធួន ស៊ីណាន ប្រធាន​ក្រុមហ៊ុន IMCT Co., Ltd បាន​ថ្លែង​ប្រាប់ថា “យើង​មាន​រោងចក្រ​នៅទីនេះ ដែលមាន​ទីតាំងនៅ​ផ្លូវ២០០៤ ហើយ​ផលិតផល​របស់​យើង​ដាក់ឱ្យ​ចរាចរណ៍​នៅលើ​ទីផ្សារ​រយៈពេល​ពី​បីរ​ខែ​ចុង​ក្រោយនេះ” ។ លោក​បន្តថា “ផលិតផល​របស់​យើង​ចរាចរ​នៅលើ​ទីផ្សា​រយៈពេល​ខ្លី​ក្តី ប៉ុន្តែ​យើង​ទទួល​បានការ​គ្រាំទ្រ​ច្រើន​ពី​អតិថិជន” ។

លោក​បាន​បន្តថា “ក្រុមហ៊ុន​យើងខ្ញុំ​បាន ទទួល​ការអនុញ្ញាត​ពី​ក្រសួង​ឧស្សាហកម្ម វិទ្យា​សាស្ត្រា បច្ចេកទេស និង​នវានុវត្តន៍ មាន​អនុញ្ញាត​ដំណើរការ​ផលិតផល ថ្នាំលាប​ស្ពេ​ត្រូ​ជា​ចំបង” ។

វត្ថុបំណង​នៃ​ម៉ាក​យី​រហោ នៃ​ផលិតផល​ថ្នាំលាប (ខាងក្នុង)៖ ផលិតផល នេះ​បាន​ផលិត​តាម​រូ​ម​បន្ត​ចុងក្រោយបង្អស់ នៃ​បច្ចេកវិទ្យា​ទំនើប​របស់​ប្រទេស​អាឡឺម៉ង់  ដែរ​មាន​ភាពរឹងមាំ រលោង ជាងនេះទៅទៀត​ជា​ប្រភេទ​ថ្នាំ​ដែល​ធន់​នឹង​ទឹក អាច​លាង​សម្អាត​បាន ដើម្បីអោយ​ផ្ទៃ​ជញ្ជាំង​ទាំងមូល រក្សា​នូវ​ភាព​ស្អាត និង​រឹងមាំ​បានយូរ​អង្វែង គ្មាន​ធាតុ​ផ្សំ APEO ដែល​បង្ករ​ផល​ប៉ៈ​ពាល់​ទៅដល់ បរិស្ថាន អាច​ប្រើប្រាស់​បាន​នៅក្នុង​សំណង់​ច្រើន​ប្រភេទ មានដូចជា បេតុង ជញ្ជាំង​ឥដ្ឋ ដែល​បាន​បូក​ស៊ីម៉ង់ រួចជាស្រេច និង ម្នាងសិលា គ្រប់​ប្រភេទ រួមទាំង​ពិ​ដាន ឬ​ប្រើប្រាស់​សម្រាប់​ការ​តុង​តែងផ្សេងៗ ការពារ​ជញ្ជាំង​ផ្នែក​ខាងក្នុង​ជាមួយនឹង សារធាតុ​ផ្សំ​មូលដ្ឋាន​ដ៏ទៃទៀត​បាន។

កម្រិត​បរិមាណ​នៃ​ការប្រើប្រាស់៖ ក្នុង ១លីត្រ (១គីឡូ) អាច​ប្រើប្រាស់​បាន​ពី ៣-៤ ម៉ែត​ការ៉េ ទៅតាម​សណ្ឋាន​ជាក់ស្ដែង (ក្នុងការ​លាប២ ជាន់)។

ការធានា ទៅលើ​គុណភាព៖ ការធានា​លើ​គុណភាព ក្នុង​រយៈពេល១០ឆ្នាំ តែ​ត្រូវ​ចាំបាច់​អនុវត្តន៍​អោយបាន​ខ្ចា​ប់​ខ្ជួន ទៅតាម​បទដ្ឋាន​បច្ចេកទេស។

វត្ថុបំណង​នៃ​ម៉ាក​យី​រហោ នៃ​ផលិតផល​ថ្នាំលាប (ខាងក្រៅ) ជា​ប្រភេទ​ថ្នាំលាប​ផ្ទៃ​ខាងក្រៅ ដែល​បាន​ផលិត​ចេញពី អាស៊ីត Acrylic ។

គុណសម្បត្តិ មាន​ទម្រង់​នៃ​ស្រ​ទ្រាប់​ការពារ​ភាពរឹងមាំ​មិន​ជ្រាប​ទឹក ជាប់​ស្អិត​ល្អ ជា​ផលិតផល​ល្អ  សម្រាប់ ការតុបតែង​លម្អ ជញ្ជាំង​ផ្នែក​ខាងក្រៅ។

បទដ្ឋាន​បច្ចេកទេស៖ Alkalia ស្រទាប់​មុខ  (១ ស្រទាប់) + បូក​នឹង​ថ្នាំលាប​ខាងក្រៅ  (២ ស្រទាប់) ។

បរិមាណ​នៃ​ការប្រើប្រាស់៖ ក្នុង១លីត្រ (១គីឡូ) អាច​ប្រើ​បាន​ពី៣ ដល់៥ម៉ែត្រការ៉េ ទៅតាម​សណ្ឋាន​ជាក់ស្ដែង។

រយៈពេល​នៃ​ការធានា៖ ធានា​គុណភាព រយៈពេល១០ឆ្នាំ តែ​ត្រូវតែ​អនុវត្ត​អោយបាន​ខ្ជាប់ខ្ជួន ទៅតាម​បទដ្ឋាន បច្ចេកទេស ដូច​ដែរ​បាន​រៀបរាប់​ខាងលើ។

ចំណុះ និង ទម្ងន់៖ ធុង​ថ្នាំលាប មាន​ចំណុះ ២០លីត្រ ដោយ​ប្រហាក់ប្រហែល​ទៅ ២៣គីឡូ​ក្រោម ឬ អាច​លើស​នេះ។

ការរក្សា​ទុក ផលិតផល​នេះ​មាន​អាយុកាល ២៤ខែ (ក្នុងករណី មិនទាន់បាន​បើក​គំរប​ធុង) ហើយ​ផលិតផល​របស់​យើង​មិនមាន​ប៉ៈ​ពាល់​ដល់​បរិស្ថាន និង ផ្លូវដង្ហើម​ឡើយ។

វត្ថុបំណង​នៃ​ម៉ាក​យី​រហោ នៃ​ផលិតផល​ម្សៅ​បៀក​ខាងក្នុង និង​ខាងក្រៅ ជា​ប្រភេទ​ម្សៅ​បៀក​ខាំ​ជាប់​បានល្អ ការពារ​ជម្រាប​ទឹក ជៀសវាង​មាន​ស្នាម​ប្រះ មិន​បង្ករ​អោយមាន​ផលប៉ះពាល់​ដល់ ផ្លួ​វ​ដង្ហើម មិន​ប៉ៈ​ពាល់​ដល់​បរិស្ថាន និង​ងាយស្រួល​ក្នុងការ​សាងសង់។

ទំហំ​នៃ​ការប្រើប្រាស់ៈ ប្រើប្រាស់​បាន​យ៉ាង​ទូ​រលំ​ទូលាយ ក្នុងការ​បៀក​ទៅលើ​ជញ្ជាំង ពិ​ដាន គេហដ្ឋាន រួមទាំង​សំណង់​អគារ​ទូទៅ ហើយ​មាន​ប្រសិទ្ធភាព​កាន់តែ​ល្អ​សម្រាប់​ជញ្ជាំង​ដែលមាន​សណ្ឋាន​ខ្ពស់ ។

វិធី​នៃ​ការប្រើប្រាស់​ដូចជា ទី១ ត្រូវ​សម្អាត​ផ្ទែ​ដែល​បៀក អោយបាន​ស្អាត​ជាមុនសិន  ទី២ សម្រាប់​ម្សៅ​បៀក 25គីឡូ អាច​យកមក​លាយ​ជាមួយ​ទឹកស្អាត 11-12 លីត្រ រួច​កូរ​អោយ​ស្មើ​រសាច់ ទី៣. នៅពេល​យកមក​បៀក​លើ​ផ្ទៃ​ត្រូវមាន​កំរាស់​មិន​លើសពី 0.3-01 មី​លី​ម៉ែត​ក្នុង១ជាន់ ទី៤ ដើម្បីអោយ​ផ្ទៃ​រលោង ត្រូវ​ទុក​អោយបាន 4-6 ម៉ោង​បន្ទាប់ពី​បៀក មុនពេល​ខាត់​ម្សៅ​បៀក​ចេញ និង​ទី៥ បន្ទាប់ពី​ខាត់​ចេញ​អោយបាន​ស្អាត​នឹង បោសសម្អាត​សិន មុន​និង​ធ្វើការ​លាបថ្នាំ​ពណ៌៕

ដោយៈ វុត្ថា

ភ្នំពេញៈ ប្រព័ន្ធ​អនុគ្រោះ​ទូទៅ (GSP) របស់​ចក្រភព​អង់គ្លេស ដែលជា​ទីផ្សារ​ដ៏​ធំ​បំផុត និង​សំខាន់​របស់​កម្ពុជា​លើ​ការនាំចេញ​ទំនិញ នឹង​ជួយ​ធ្វើឱ្យ​ទំនិញ​ទាំងអស់​ដែល​ជាប់​កម្រិត​កូតា​ក្រោម​បន្ទាត់​គយ​ត្រូវ​រួច​ពន្ធ និង​កាន់តែ​ផ្តល់នូវ​លទ្ធភាព​ខ្ពស់​សម្រាប់​កម្ពុជា​ក្នុងការ​ជំរុញ​ការនាំចេញ​បន្ថែមទៀត។

អគ្គលេខាធិការរង​នៃ​សមាគម​រោងចក្រ​កាត់ដេរ​នៅ​កម្ពុជា (GMAC) លោក កាំ​ង ម៉ូ​នី​កា បាន​មានប្រសាសន៍ថា​នៅ​ថ្ងៃ​ចុង​សប្ដាហ៍​កន្លងទៅនេះ​ថា សម្រាប់​សហភាព​អឺរ៉ុប ប្រទេស​អង់គ្លេស​គឺជា​ទីផ្សារ​ធំ​បំផុត នៃ​ការនាំចេញ​របស់​កម្ពុជា ក្នុងនោះ​ចំពោះ​ការចាកចេញ​របស់​អង់គ្លេស​ពី​សហភាព​អឺរ៉ុប ហើយ​បាន​បង្កើត​ផ្តល់​ភាព​ប្រព័ន្ធ​អនុគ្រោះ (GSP) វា​នឹងធ្វើ​ឲ្យ​ទំនិញ ដែល​ជាប់​កម្រិត​កូតា​ក្រោម​បន្ទាត់​គយ ត្រូវ​រួច​ពន្ធ​ទាំងអស់។

លោក​បាន​បន្តថា “នៅ​ក្នុងនោះ​ប្រព័ន្ធ​អនុគ្រោះ​ទូទៅ (GSP) នឹង​ផ្តល់ឱ្យ​កម្ពុជា​មានលទ្ធភាព​កាន់តែ​ប្រសើរ ដើម្បី​ជំរុញ​ការនាំចេញ គឺ​កម្ពុជា​អាច​នាំចេញ​ទំនិញ​គ្រប់បែបយ៉ាង​ទៅ​ប្រទេស​អង់គ្លេស ដោយ​មិន​ជាប់ពន្ធ​នាំចូល ជាពិសេស​ការផ្តល់​ការ​រូ​ច​ពន្ធ​លើ​មុខទំនិញ​ចំនួន៤០មុខ​ផ្សេងទៀត ដែល​ជាប់​កម្រិត​កូតា នៅក្រោម​បន្ទាត់​ពន្ធគយ” ។

លោក​ឧកញ៉ា លឹម ហេង អនុប្រធាន​សភាពាណិជ្ជកម្ម​កម្ពុជា បាន​មានប្រសាសន៍ប្រាប់​តាមរយៈ​ទូរស័ព្ទ​ថា ពាក់ព័ន្ធ​ការផ្តល់​ប្រព័ន្ធ​អនុគ្រោះ​ទូទៅ (GSP) របស់​អង់គ្លេស​នេះ កន្លងមក​ប្រទេស​អង់គ្លេស បាន​សន្យា​ផ្តល់​ភាពអនុគ្រោះ​ពន្ធ បន្ទាប់ពី​ប្រទេស​ខ្លួន​បាន​ចាក​ចេញពី​សហភាព​អឺរ៉ុប ជាក់ស្តែង​មកដល់ពេលនេះ ប្រទេស​អង់គ្លេស​បាន​ឆ្លើយតប​តាម​កិច្ចសន្យា​ពិតប្រាកដ ដោយ​ការប្រកាស​ផ្តល់​អនុគ្រោះ​ពន្ធ​នេះ មាន​ក្របខ័ណ្ឌ​ចំនួន ៣ គឺ៖ ក្របខ័ណ្ឌ​ប្រទេស​អភិវឌ្ឍ​តិចតួច​បំផុត ក្របខ័ណ្ឌ​ទូទៅ និង​ក្របខណ្ឌ​ប្រសើរឡើង ក្នុងនោះ​កម្ពុជា​ក៏​នៅក្នុង​ក្របខណ្ឌ​ទាំងនេះ​ផងដែរ។

លោក​ឧកញ៉ា​បន្តថា “តាមរយៈ​នៃ​ការប្រកាស​ផ្តល់​ប្រព័ន្ធ​អនុគ្រោះ​ទូទៅ (GSP) របស់​អង់គ្លេស​នេះ វា​ជាការ​ជម្រុញ​លើកទឹកចិត្ត​ដល់​អ្នកវិនិយោគ និង​ជាការ​ទាក់ទាញ​អ្នកវិនិយោគថ្មីៗបន្ថែម ឱ្យមក​បណ្តាក់ទុន​រក​ស៊ី​ទទួលទាន​នៅ​កម្ពុជា តាមរយៈ​ការផ្តល់​នូវ​លក្ខណៈពិសេស​ទាំងនេះ ខណៈដែល​ប្រព័ន្ធ​អនុគ្រោះ​ពន្ធ EBA និង​កិច្ចព្រមព្រៀង​ពាណិជ្ជកម្ម​សេរី FTA នៅជាប់​លក្ខខណ្ឌ​ជាច្រើន នៃ​ការកំណត់​កូតា​សម្រាប់​ការនាំចេញ​ទំនិញ”  ។

តាមរយៈ​បាយ​ការណ៍​របស់​អគ្គនាយក​ដ្ឋា​ន គោលនយោបាយ​នៃ​ក្រសួង​សេដ្ឋកិច្ច និង​ហិរញ្ញវត្ថុ​បាន​បញ្ជាក់ថា ជុំវិញ​ការនាំចេញ​ផលិតផល​របស់​កម្ពុជា កាលពីពេល​កន្លងទៅ ក្នុង​ឆ្នាំ២០១៩ កម្ពុជា​បាន​នាំចេញ​ទៅកាន់​ប្រទេស​អង់គ្លេស សរុប​ជិត១ពាន់​លាន​ដុល្លារ​អាម​រិ​ក ក្នុងនោះ ការនាំចេញ​វិស័យ​កាត់ដេរ​ជិត៩០០លាន​ដុល្លារ និង​ការនាំចេញ​អង្ករ​មាន​ចំនួន​ជិត៩លាន​ដុល្លារ​អាមេរិក៕