វិនិយោគិនសឹង្ហបុរីបាននិងកំពុងអភិវឌ្ឍន៍វិស័យសំណង់កាន់តែច្រើននៅកម្ពុជា

ដោយវុត្ថា

ភ្នំពេញៈ អនុប្រធានសភាពាណិជ្ជកម្មកម្ពុជាបានមើលឃើញថា វិនិយោគិនសឹង្ហបុរីបាននិងកំពុងអភិវឌ្ឍន៍លើផ្នែកសំណង់ជាច្រើននៅកម្ពុជា ជាពិសេសវិស័យខុនដូនិងផ្នែនកជាច្រើនទៀត។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់គេហទំព័រ Propertyarea.asia កាលពីថ្ងៃទី ២៣ ខែវិច្ឆិកាម្សិលមិញនេះឱ្យដឹងថា កន្លងមកនេះវិនិយោគិនសឹង្ហបុរី ធ្លាប់បានប្រាប់សភាពាណិជ្ជកម្មកម្ពុជាថា កម្ពុជាគឺជាប្រទេសទី៤ នៃគោលដៅវិនិយោគរបស់ខ្លួន នៅក្នុងតំបន់អាស៊ាន ប៉ុន្តែបច្ចុប្បន្ននេះមិនដឹងថាប្រទេសនេះ បានចាត់ចំណាត់ថ្នាក់កម្ពុជាទីប៉ុន្មាននោះទេ។

ទោះជាយ៉ាងណា លោកឧកញ៉ាបញ្ជាក់ថា “បច្ចុប្បន្ននេះ វិនិយោគិនសឹង្ហបុរីបាននឹងកំពុងសាងសង់ គម្រោងខុនដូជាច្រើននៅក្នុងប្រទេសកម្ពុជា។ ក្រៅពីនេះ ក៏មានការវិនិយោកនាំចូលនាំចេញ (Logistics) ច្រើនផងដែរ” ។

លោកឧកញ៉ា បន្ថែមថា កន្លងមកនេះ វិនិយោគិនសឹង្ហបុរីក៏បាននាំយកនូវតារាល្បីរបស់ខ្លួន មកធ្វើជាទូតសុឆន្ទៈសម្រាប់ផ្សព្វផ្សាយ ពីគម្រោងខុនដូរបស់នៅក្នុងប្រទេសកម្ពុជាផងដែរ។

លោកឧកញ៉ាបន្ថែមថា “វិនិយោគិនសឹង្ហបុរីនៅតែសំឡឹងមើលឃើញកម្ពុជា ជាគោលដៅវិនិយោគរបស់ខ្លួន ព្រោះប្រទេសសឹង្ហបុរី និងកម្ពុជានៅមិនឆ្ងាយនោះទេ ដោយធ្វើដំណើរតាមជើងយន្តហោះ ត្រូវចំណាយពេលប្រហែល២ម៉ោងកន្លះប៉ុណ្ណោះ នឹងដល់គោលដៅ” ។

លោកឧកញ៉ាបញ្ជាក់ទៀថា កម្ពុជា មានផ្ទៃដីសម្រាប់ឱ្យវិនិយោគិនសឹង្ហបុរី ធ្វើការវិនិយោគលើផលិកម្មកសិកម្ម សម្រាប់ធ្វើការនាំចេញទៅប្រទេសខ្លួនផងដែរ។

លោក Michael Tan Keng Siong ឯកអគ្គរដ្ឋទូតសាធារណរដ្ឋសឹង្ហបុរីប្រចាំកម្ពុជា នៅក្នុងជំនួបជាមួយនឹង លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងសាធារណការ និងដឹកជញ្ជូន កាលពីពេលថ្មីៗនេះឱ្យដឹងថា វិនិយោគិនសឹង្ហបុរីនឹងបន្តមកវិនិយោគនៅកម្ពុជាបន្ថែមទៀតលើវិស័យសំណង់ ក្រោយចប់ជំងឺកូវីដ១៩ ។

លោកថ្លែងថា “បន្ទាប់ពីជំងឺរាតត្បាតជាសាកល Covid-19 មានភាពធូរស្រាល ស្ថានទូតសឹង្ហបុរីជឿជាក់ថា នឹងមានវិនិយោគគិនសិង្ហបុរីជាច្រើន នឹងធ្វើដំណើរមកប្រទេសកម្ពុជា ដើម្បីពិនិត្យមើលឱកាសវិនិយោគ ជាពិសេសលើវិស័យសំណង់ លំនៅឋាន និងអចលនទ្រព្យ” ។

វិនិយោគិនសឹង្ហបុរីដែលវិនិយោគអចលនទ្រព្យលេចធ្លោជាងគេនៅកម្ពុជា មានដូចជាក្រុមហ៊ុន Oxley Holding ដែលបានសហការជាមួយក្រុមហ៊ុន World Bridge Land International របស់លោកឧកញ៉ាសៀ រិទ្ឋី សាងសង់គំរោង The Bridge, The PeAK, ផ្សារទំនើប The Capital ដែលនឹងបើកដំណើរការនៅក្នុងគំរោង The Bridge នាពេលខាងមុខ៕

រដ្ឋាភិបាលថៃមានមហិច្ឆិតាជម្រុញកំណើនសេដ្ឋកិច្ចឲ្យបាន៤ភាគរយនៅឆ្នាំ២០២១

ដោយ ហ្សូលី

បាងកកៈ រដ្ឋមន្ត្រីក្រសួងហិរញ្ញវត្ថុប្រចាំប្រទេសថៃ បានអះអាងមុតមាំថា សេដ្ឋកិច្ចរបស់ប្រទេសថៃ នឹងកើនឡើង៤ភាគរយនៅក្នុងឆ្នាំ២០២១ បន្ទាប់ពីការធ្លាក់ចុះក្នុងឆ្នាំនេះ។ គោលនយោបាយសារពើពន្ធ នឹងគាំទ្រដល់សេដ្ឋកិច្ច ពឹងផ្អែកលើវិស័យទេសចរណ៍ ដែលកំពុងជៀសផុតពីផលប៉ះពាល់នៃជំងឺរាតត្បាតនេះ។

ប្រទេសដែលមានសេដ្ឋកិច្ចធំលំដាប់ទី២ នៅអាស៊ីអាគ្នេយ៍មានកមំណើនធ្លាក់ចុះតិចជាងការរំពឹងទុក៦,៤ ភាគរយនៅក្នុងត្រីមាសទី៣ ធៀបនឹងឆ្នាំមុន បន្ទាប់ពីធ្លាក់ចុះ ១២,១ ភាគរយនៅក្នុងរយៈពេល៣ខែមុន។

លោក Arkhom Termpittayapaisith រដ្ឋមន្ត្រីក្រសួងហិរញ្ញវត្ថុបានមានប្រសាសន៍ថា សេដ្ឋកិច្ចបានធ្លាក់ចុះប៉ុន្តែការងើបឡើងវិញមិនលឿនទេ ដោយសារតែវិស័យទេសចរណ៍ដែលមានចំនួនប្រហែល១២ភាគរយ នៃផលិតផលក្នុងស្រុកសរុប បានធ្វើឱ្យប៉ះពាល់ដល់សង្វាក់ផ្គត់ផ្គង់ផងដែរ” ។ លោកបន្តថា “បើគ្មានគម្រោងនេះទេ សេដ្ឋកិច្ចរបស់យើងអាចនឹងកើនឡើង៣ភាគរយនៅឆ្នាំនេះ។ យើងរំពឹងថានឹងមានការធ្លាក់ចុះ៦ភាគរយនៅឆ្នាំនេះគម្លាតនៃទិន្នផល៩ភាគរយ” ។

លោក Arkhom បន្តថា ឆ្នាំក្រោយយើងរំពឹងថា នឹងមានការកើនឡើង៤ភាគរយប៉ុន្តែមិនប្រាកដ១០០ភាគរយឡើយ។ វាអាចចំណាយពេលរហូតដល់ឆ្នាំ២០២២ ដើម្បីវិលត្រឡប់ទៅរកស្ថានភាពមុនពេលមានជំងឺរាតត្បាត។

គោលនយោបាយសារពើពន្ធ ដើម្បីជួយដល់កំណើនពីថវិកា សារពើពន្ធនៅឆ្នាំនេះ និងខ្លះទៀតពីការចំណាយសម្រាប់ការស្តារនីតិសម្បទា។ ថវិកាសម្រាប់សារពើពន្ធបន្ទាប់នឹងនៅតែផ្តោតលើការជំរុញសកម្មភាពក្នុងស្រុក ហើយបំណុលសាធារណៈបច្ចុប្បន្នចំនួន៤៩ភាគរយ នៃផលិតផលក្នុងស្រុកសរុបអាចគ្រប់គ្រងបាន។

ក្នុងចំណោមផែនការប្រាក់កម្ចីចំនួន១ទ្រីលានបាត (៣៣ ពាន់លានដុល្លារ) របស់រដ្ឋាភិបាលចំនួន៤០០ពាន់លានដុល្លារ នឹងត្រូវបានសម្រាប់ការស្តារសេដ្ឋកិច្ចឡើងវិញដែលក្នុងនោះប្រមាណ១២០ពាន់លាន ទៅ១៣០ពាន់លានបាតត្រូវបានអនុម័ត។

លោកចង់ឲ្យធនាគារថៃ ចាត់វិធានការរយៈពេលខ្លីបន្ថែមទៀតលើប្រាក់បាត ដែលបានបន្តកើនឡើងកាលពីថ្ងៃចន្ទ ទោះបីជាវិធានការរបស់ធនាគារកណ្តាល បានប្រកាស ដើម្បីទប់ស្កាត់កម្លាំងរូបិយប័ណ្ណក្តី៕ Arab News៕

ដីធ្លីស្ថិតនៅក្នុងស្ថានភាពទាំង៥នេះ មិនគួរវិនិយោគនោះទេ ប្រយ័ត្នជាប់គាំង

ដោយគង់ ម៉ាលីនណា

ភ្នំពេញៈ ការវិនិយោគលើដីធ្លីមិនប្រាកដថាចំណេញនោះទេ ព្រោះដីធ្លីខ្លះទិញហើយក៏ជាប់គាំង ហើយធ្វើឲ្យស្ទះចរន្តសាច់ប្រាក់របស់លោកអ្នកផងដែរ ហេតុនេះអ្នកជំនាញ បានណែនាំលើស្ថានភាពដីធ្លីមួយចំនួន ដែលអ្នកវិនិយោគគួរពិចារណាឲ្យបានច្រើនបំផុតមុនសម្រេចចិត្តវិនិយោគ។

លោកកាង សុធី អគ្គនាយកក្រុមហ៊ុន Century21 Land Station បានមានប្រសាសន៍ឲ្យដឹងថា ការទិញដីធ្លី ពិតជាការវិនិយោគមួយដ៏ល្អ ប៉ុន្តែក៏មានបញ្ហាផងដែរ បើយើងទិញប៉ះដីធ្លីស្ថិតនៅក្នុងស្ថានភាពទីតាំងមិនអំណោយផលមួយចំនួនដូចជា

ដីធ្លីស្ថិតនៅក្បែរវត្តអារ៉ាម

ពិតហើយ! ប្រជាពលរដ្ឋខ្មែរនិយមទៅវត្តអារ៉ាម ប៉ុន្តែដីធ្លីនៅជាប់ឬកៀកវត្តអារ៉ាមពេក មិនងាយឡើងថ្លៃ និងពិបាករកម៉ូយទិញណាស់ ដោយសារអតិថិជនឬអ្នកវិនិយោគមានអារម្មណ៍ថា រងការរំខានពីឧបករណ៍បំពងសម្លេង ឬឧគ្ឃោសនសព្ទ៍ពេលមានបុណ្យទានម្តង។

ដីនៅក្បែរផ្នូរខ្មោច

មនុស្សណាក៏ស្លាប់ដែរ ពេលនៅរស់គេស្រលាញ់ រាប់អានច្រើន ប៉ុន្តែពេលស្លាប់ទៅគេមិនសូវហ៊ាននៅជិតទេ ទោះជានៅប្រទេសណាក៏ដោយ ហេតុនេះការទិញដីនៅជិតផ្នូរ ឬចេតិយនានា មិនគួរទិញឡើយ ព្រោះវាពិបាករកម៉ូយ ហើយអតិថិជនឬអ្នកវិនិយោគ ពិតជាមានអារម្មណ៍៍រំខាន នៅពេលពួកគេមើលឃើញកន្លែងដាក់សាកសពបែបនេះ។

ដីមានរូបរាងមិនស្អាត

ពិតមែនហើយ ដីខ្លះមានទីតាំងល្អ ប៉ុន្តែពិបាកលក់ ឬពិបាករកម៉ូយយកមកដាក់ និងមិនសូវមានតម្លៃថ្លៃ ដោយសារដីខ្លះមានរូបរាងមិនសមស្រប ក្រវិកក្រវ៉ក់ច្រើន ឬមានសណ្ឋានមិនច្បាស់លាស់តាមបែបចតុកោណ ឬត្រីកោណ។

ដីបែបនេះពិបាកលក់ ព្រោះវាពិបាករៀបចំសំរាប់លំនៅដ្ឋាន ក៏ដូចជាផែនការអភិវឌ្ឍន៍ផ្សេងៗទៀត។

ដីនៅផ្លូវតូចៗ ឬផ្លូវទាល់

តំបន់ខ្លះមានដីទំនេរច្រើនណាស់ ហើយម្ចាស់ដីនៅតំបន់ទាំងនោះសុទ្ឋតែមានដីធំៗ ប៉ុន្តែពួកគេស្រលាញ់ដីខ្លាំងពេក បានសាងសង់របងមកកៀកនឹងផ្លួវ ដែលធ្វើឲ្យពិបាកធ្វើដំណើរចេញ ចូល ពេលខ្លះជៀសរថយន្តគ្នាសឹងមិនរួច។ ដីនៅតំបន់បែបនេះ មិនងាយឡើងថ្លៃឡើយ ហើយក៏ពិបាករកម៉ូយទិញផងដែរ។

ចំណែកដីមួយបែបទៀត គឺដីស្ថិតនៅលើផ្លូវទាល់ ក៏ជាប្រភេទដីមិនសូវមានហាងឆេងដែរ ពិសេសគឺពិបាករកម៉ូយទិញ ដោយសារអ្នកវិនិយោគភាគច្រើនកាន់តែឆ្លាតវៃ ពួកគេមិនងាយទិញតាមការចង់បាននោះទេ។

ដីមិនទាន់មានផ្លូវច្បាស់លាស់

ដីធ្លីស្ថិតក្នុងទីតាំងដែលមិនទាន់មានផ្លូវ ឬនៅក្រោយដីរបស់គេ ជាដីដែលមិនសូវមានហាងឆេង និងពិបាករកម៉ូយសំរាប់ទិញផងដែរ ព្រោះមិនដឹងរកផ្លូវឯណាចូលបាន ហើយពិបាកក្នុងការចចាជាមួយម្ចាស់ដីនៅផ្នែកខាងមុខ ដែលមានផ្លូវជាប់ខ្លាំងណាស់។

ដីស្ថិតក្នុងស្ថានភាពបែបនេះ ម្ចាស់ច្រើនតែបង្ខំចិត្តក្នុងការលក់ ព្រោះម្ចាស់ដីខាងមុខតែងតែបង្អាប់ ឬធ្វើរបងព័ទ្ឋមិនឲ្យម្ចាស់ដីនៅខាងក្រោយចូលរួចតែម្តង (ករណីមានជម្លោះណាមួយ) ហេតុនេះដីនៅទីតាំងដែលគ្មានផ្លូវច្បាស់លាស់បែបនេះ មិនគួរទិញឬវិនិយោគនោះទេ បើវិនិយោគប្រយ័ត្នជាប់គាំងទាំងដីលក់មិនចេញ ទាំងគាំងលំហូរសាច់ប្រាក់ផងដែរ៕

តើការកាន់កាប់អចលនវត្ថុដោយគ្មានបណ្ណកម្មសិទ្ធិអាចធ្វើបានឬទេ?

ដោយៈវុត្ថា

ភ្នំពេញៈ បញ្ហាដីធ្លី នៅតែជារឿងចម្រូងចម្រាស់មួយ នៅប្រទេសកម្ពុជា។ របបកម្មសិទ្ធិចាស់មុនឆ្នាំ១៩៧៩ ត្រូវបានលុបចោល។ អ្នកដែលកាន់កាប់ដីធ្លី ក្រោយឆ្នាំ១៩៧៩ នៅតែមានច្រើន ដែលកាន់កាប់ដោយគ្មានប័ណ្ណសម្គាល់កម្មសិទ្ធិ។ វិវាទបានកើតឡើងជាញឹកញាប់ជុំវិញបញ្ហាដីធ្លីនេះ។

ខាងក្រោមនេះ គឺសំនួរ និងចម្លើយពាក់ព័ន្ធ នឹងការកាន់កាប់អចលនវត្ថុដោយគ្មានបណ្ណកម្មសិទ្ធិ។

១-ខ្ញុំកាន់កាប់ដីមួយកន្លែងតាំងពីឆ្នាំ១៩៧៩មក។ ជាការកាន់កាប់ដោយស្របច្បាប់ ក៏ប៉ុន្តែមិនមានប័ណ្ណកម្មសិទ្ធិ តើខ្ញុំមានសិទ្ធិជាអ្វីលើដីនេះ?

ចម្លើយៈ អ្នកដែលបានកាន់កាប់ដី ឬអចលនវត្ថុផ្សេងទៀតពីឆ្នាំ១៩៧៩មក បើសិនជាមិនទាន់មានប័ណ្ណកម្មសិទ្ធិ ចេញដោយអាជ្ញាធរមានសមត្ថកិច្ចទេ អ្នកនោះមិនមែនជាម្ចាស់កម្មសិទ្ធិលើអចលនវត្ថុនេះទេ គឺមានសិទ្ធិត្រឹមតែជាភោគី (អ្នកកាន់កាប់ស្របច្បាប់) ប៉ុណ្ណោះ។

២-ក្នុងឋានៈជាភោគី តើខ្ញុំមានសិទ្ធិអ្វីខ្លះលើដីនេះ?

ចម្លើយៈ ភោគី មានសិទ្ធិប្រហាក់ប្រហែលនឹងម្ចាស់កម្មសិទ្ធិដែរ ពោលគឺមានសិទ្ធិប្រើប្រាស់ អាស្រ័យនៅ ដាំដុះ ប្រវាស់ ជួល បញ្ចាំ លក់ ឬផ្ទេរទៅឲ្យកូនចៅ ។ល។នៅក្នុងករណីមានការផ្ទេរកម្មសិទ្ធិនេះ អ្នកទទួលអចលនវត្ថុពីភោគី គឺទទួលបានត្រឹមតែសិទ្ធិជាភោគីដដែល មិនមែនជាម្ចាស់កម្មសិទ្ធិនោះទេ។

ភោគី និងកម្មសិទ្ធិករ មានទំហំសិទ្ធិដូចគ្នា។ អ្វីដែលខុសគ្នា គឺនៅត្រង់ថា សិទ្ធិជាកម្មសិទ្ធិករគឺជាសិទ្ធិស្ថាពរ ហើយអាចទទួលបានការគាំពារពីច្បាប់ ដោយពេញលេញ។ ចំណែកសិទ្ធិជាភោគីវិញ គឺជាសិទ្ធិ ដែលមានលក្ខណៈបណ្ដោះអាសន្ន ដែលអាចមានការជំទាស់តវ៉ាបានទៅថ្ងៃក្រោយ។

៣-តើភោគីអាចក្លាយជាកម្មសិទ្ធិករបានដែរឬទេ?

ចម្លើយៈ បាន! ប្រសិនបើការកាន់កាប់នេះ ធ្វើឡើងដោយស្របច្បាប់ ដោយគោរពតាមល័ក្ខខ័ណ្ឌទាំង៥នេះ ដែលមានដូចជា៖

-កាន់កាប់ដោយពិតប្រាកដ ពោលគឺ មិនមែនជាការកាន់កាប់ ក្នុងឋានៈជាអ្នកចាំដី ចាំផ្ទះ ឬចាំចម្ការឲ្យគេ។

-កាន់កាប់ដោយគ្មានហិង្សា ពោលគឺមិនប្រើកម្លាំងចូលទៅដណ្តើមកាន់កាប់។

-កាន់កាប់ដោយមានការដឹងឮជាសាធារណៈ ពោលគឺមិនមែនចូលកាន់កាប់ដោយលួចលាក់មិនឲ្យគេដឹង។

-កាន់កាប់ដោយគ្មានការអាក់ខាន ពោលគឺ មិនបានបោះបង់អចលនវត្ថុនេះចោល ក្នុងគម្លាតមួយធំ។

-កាន់កាប់ដោយសុចរិត ពោលគឺពេលចូលកាន់កាប់ ភោគីមិនបានដឹងថា អចលនវត្ថុនេះមានម្ចាស់រួចទៅហើយនោះទេ។

ភោគី ដែលបំពេញតាមល័ក្ខខ័ណ្ឌទាំង ៥ ខាងលើនេះ អាចក្លាយជាម្ចាស់កម្មសិទ្ធិបាន ក្រោយពីបានកាន់កាប់អចលនវត្ថុ រយៈពេល៥ឆ្នាំជាប់ៗគ្នាឥតដាច់។

៤- ក្រោយពីបានកាន់កាប់តាមល័ក្ខខ័ណ្ឌ និងគ្រប់រយៈពេលដែលកំណត់ដោយច្បាប់ហើយ តើខ្ញុំអាចក្លាយជាម្ចាស់កម្មសិទ្ធិដោយស្វ័យប្រវត្តិឬទេ?

សិទ្ធិ ជាកម្មសិទ្ធិករ មិនអាចទទួលបានដោយស្វ័យប្រវត្តិនោះទេ។ ភោគីអាចក្លាយជាម្ចាស់កម្មសិទ្ធិស្ថាពរ លុះត្រាតែអាជ្ញាធរមានសមត្ថកិច្ច ចេញប័ណ្ណសម្គាល់កម្មសិទ្ធិឲ្យ ក្រោយមានការចុះបញ្ជីដីធ្លីមានលក្ខណៈជាប្រព័ន្ធ។

៥-ក្នុងពេលរង់ចាំ ការទទួលបានប័ណ្ណកម្មសិទ្ធិស្ថាពរ តើភោគីអាចទទួលបានប័ណ្ណអ្វី ដែលសម្គាល់ការកាន់កាប់អចលនវត្ថុនេះដែរឬទេ?

ចម្លើយៈ បាន អាជ្ញាធរមានសមត្ថកិច្ច ត្រូវចេញប័ណ្ណសម្គាល់សិទ្ធិកាន់កាប់អចលនវត្ថុ ទៅឲ្យភោគីដែលកាន់កាប់ស្រប់ច្បាប់។ ក៏ប៉ុន្តែប័ណ្ណនេះ គ្រាន់តែជាភស្តុតាងបញ្ជាក់អំពីសិទ្ធិកាន់កាប់ប៉ុណ្ណោះ មិនមែនជាប័ណ្ណកម្មសិទ្ធិ ដែលតវ៉ាមិនបាននោះទេ។

៦-ប្រសិនបើខ្ញុំឃើញមានអចលនវត្ថុទំនេរគ្មានម្ចាស់ តើខ្ញុំអាចចូលកាន់កាប់ធ្វើជាភោគីបានគ្រប់ពេលឬ?

ចម្លើយៈ ការកាន់កាប់ អចលនវត្ថុ ក្នុងនាមជាភោគី ដែលច្បាប់ទទួលស្គាល់ គឺមានតែការកាន់កាប់ មុនពេលច្បាប់ភូមិបាលចូលជាធរមានប៉ុណ្ណោះ ពោលគឺមុនឆ្នាំ២០០។ រាល់ការចូលកាន់កាប់អចលនវត្ថុ នៅក្រោយច្បាប់ភូមិបាលចូលជាធរមាន គឺជាការកាន់កាប់ខុសច្បាប់ ដែលអាចទទួលទោសព្រហ្មទ័ណ្ឌ។ ប្រជាជនក្រីក្រដែលចង់បានដី ត្រូវតែធ្វើពាក្យសុំទៅអាជ្ញាធរ តាមរយៈយន្តការ “សម្បទានដីសង្គមកិច្ច” ៕

អ្នកអភិវឌ្ឍន៍ដីឡូតិ៍អះអាងថាតម្រូវការដីឡូតិ៍នៅតែមាននាពេលបច្ចុប្បន្ននេះ

ដោយៈវុត្ថា

ភ្នំពេញៈ អ្នកអភិវឌ្ឍន៍ដីឡូតិ៍បានលើកឡើងថា បើទោះបីកម្ពុជាប្រឈមទៅនឹងវិបត្តិជំងឺកូវីដ១៩រហូតមកដល់ពេលនេះ ក៏តម្រូវការដីឡូតិ៍នៅតែមានជាបន្តបន្ទាប់ ប៉ុន្តែស្ថិតនៅក្នុងកម្រិតទាប។

លោក អ៊ុ វុទ្ធី អគ្គនាយកក្រុមហ៊ុន Top Investment (Cambodia) Realty Co.,Ltd បានប្រាប់គេហទំព័រ propertyarea.asia កាលពីថ្ងៃទី ២៣ ខែវិច្ឆិកា ម្សិលមិញនេះថា ទីផ្សារអចលនទ្រព្យដែលមានតម្លៃធូថ្លៃ នៅតែមានដំណើរការជាធម្មតាមជាពិសេសអចលនទ្រព្យប្រភេទដីឡូតិ៍ ដែលមានតម្លៃចាប់ពីតម្លៃ ៣០០០ដុល្លារ ទៅ៦០០០ ដុល្លារអាមេរិក ។

លោកបន្តថា “ក្រុមហ៊ុនរបស់លោកនៅតែលក់ដីឡូតិ៍ បានជាបន្តបន្ទាប់ រហូតមកដល់ពេលនេះ បើទោះបីការលក់ចេញវាមិនសូវមានសន្ទុះខ្លាំយ៉ាងណាក្តី ប៉ុន្តែអាចទទួលយកបាន” ។ លោកបន្ថែមថា “បើនិយាយជារួមលើវិស័យអចលនទ្រព្យនេះ ក៏មានហានិភ័យដែរព្រោះកម្ពុជា មិនទាន់រួចផុតពីជំងឺកូវីដ១៩ នៅឡើយ” ។

ចំណែកលោកម៉ន សុខា ប្រធានសមាគមអ្នកអភិវឌ្ឍន៍ដីឡូតិ៍កម្ពុជាបានឱ្យដឹង កាលពីពេលថ្មីៗនេះឱ្យដឹងថា ចាប់តាំងពីមានការផ្ទុះឡើងនូវជំងឺកូវីដ១៩ រហូតមកដល់បច្ចុប្បន្ននេះ ខេត្តមួយចំនួនមានការថយចចុះនៃអភិវឌ្ឍដីឡូតិ៍ និងការពុះដីឡូតិ៍លក់ជាបន្តបបន្ទាប់។

លោកបន្តថា ប៉ុន្តែបើទោះបីជាមានការថយចុះនៅខេត្តមួយចំនួនមែន សម្រាប់ខេត្តក្រុងមួយចំនួន ជាពិសេសខេត្តកំពង់ស្ពឺនៅតែមាសកម្មភាពពុះដីឡូតិ៍ ឬមានការអភិវឌ្ឍន៍ឡូតិ៍យ៉ាងខ្លាំងក្លា មិនត្រឹមតែប៉ុណ្ណោះគម្រោងអភិវឌ្ឍន៍ធំៗ និងសំណង់ជាច្រើនមានសកម្មភាពអភិវឌ្ឍន៍យ៉ាងផុលផុស ។

លោកបន្ថែមថា “ខេត្តកំពង់ស្ពឺ ជាខេត្តដែលមានសក្តានុពលខ្ពស់ លើវិស័យសេដ្ឋកិច្ច និងអចលនទ្រព្យអចលនទ្រព្យ ព្រោះថាខេត្តនេះត្រូវបានដាក់ចេញ ដោយរាជរដ្ឋាភិបាលក្នុងការអភិវឌ្ឍន៍ បន្ទាប់ពីរាជធានីភ្នំពេញ ខេត្តកំណ្តាល និងខេត្តបន្ទាប់គឺខេត្តកំពង់ស្ពឺ” ។

លោកច្រឹក សុខនីមប្រធានសមាគមភ្នាក់ងារ និងវាយតម្លៃអចលវត្ថុកម្ពុជា បានឱ្យដឹងដែរថា តម្រូវការអចលនទ្រព្យនៅក្នុងប្រទេសកម្ពុជា នៅតែមានសកម្មភាពធម្មតា ប៉ុន្តែសម្រាប់លំហូចូល នៃវិនិយោគពីក្រៅប្រទេសនៅតែជាបញ្ហាប្រឈម ។

លោកបន្តថា “ការវិនិយោគលើវិស័យអចលនទ្រព្យ នៅក្នុងប្រទេសនាពេលបច្ចុប្បន្ននេះ គឺមិនមានទំហំធំៗនោះទេ ហើយវិនិយគិនភាគច្រើន ជាវិនិយោគិននៅក្នុងស្រុក” ៕

ក្រុមហ៊ុនអ្នកឧកញ៉ា គិត ម៉េង កំពុងពន្លឿនការសាងសង់ហេដ្ឋារចនាសម្ព័ន្ធនានានៅក្រុងកោះរ៉ុង

ដោយ ៖ រ៉ាណេត
ព្រះសីហនុ ៖ ក្រុមហ៊ុនរ៉ូយ៉ាល់គ្រុបកោះរ៉ុង របស់អ្នកឧកញ៉ា គិត ម៉េង និងក្រុមហ៊ុន ស៊ីណូ ហៃដ្រូ ដែលទទួលម៉ៅការលើការសាងសង់ផ្លូវបេតុងប្រវែង៧០គីឡូម៉ែត្រ ទទឹង៨ម៉ែត្រ នៅលើតំបន់អភិវឌ្ឍន៍កោះរ៉ុង ក្រុងកោះរ៉ុង ខេត្តព្រះសីហនុ ក្រោមទុនវិនិយោគ ៣៥ លានដុល្លារ ដែលគ្រោងចំណាយពេលសាងសង់ ១៦ខែ បច្ចុប្បន្នកំពុងតែពន្លឿនសកម្មភាព និងលេចចេញជាលទ្ធផលជាបណ្តើរៗហើយ។

ពាក់ព័ន្ធទៅនឹងសកម្មភាពនៃការសាងសង់ខាងលើនេះ លោក គួច ចំរើន អភិបាលខេត្តព្រះសីហនុ បានលើកឡើងកាលពីសប្ដាហ៍កន្លងទៅថា សកម្មភាពនៃការអភិវឌ្ឍន៍ ក៏ដូចជាការសាងសង់ហេដ្ឋារចនាសម្ព័ន្ធនានា ជាពិសេសផ្លូវថ្នល់របស់ក្រុមហ៊ុននៅពេលនេះ នឹងកាន់តែធ្វើឱ្យមានភាពទាក់ទាញកាន់តែខ្លាំង ហើយក៏ជាការចូលរួមចំណែកយ៉ាងសំខាន់ក្នុងជួយលើកកម្ពស់វិស័យទេសចរណ៍ផងដែរ។

លោកបានបន្តថា “លោក បានបន្តថា “យើងខ្ញុំជាមួយនឹងមន្ត្រីជំនាញ និងអង្គភាពពាក់ព័ន្ធត្រៀមខ្លួនដើម្បីផ្តល់កិច្ចសហការទាំងបច្ចេកទេស និងកិច្ចសម្រួល ដើម្បីឱ្យក្រុមហ៊ុនទាំងពីបើកបានដំណើរការអនុវត្តនូវសកម្មភាពរបស់ខ្លួនឱ្យបានជោគជ័យ ទៅតាមពេលវាដែលបានកំណត់”។

លោក បានឱ្យដឹងទៀតថា “យើងខ្ញុំពិតជាចង់ឃើញសមិទ្ធផលនេះ កើតឡើងក្នុងរយៈពេល ១៦ ខែទៀតនៅលើកោះរ៉ុងរបស់យើង ហើយសកម្មភាពកសាងនេះក៏នឹងបានចូលរួមចំណែកផ្តល់ការងារទៅធ្វើការជាកម្មករ អ្នកបច្ចេកទេស និងវិស្វករនៅទីនោះ បានយ៉ាងច្រើននាក់ផងដែរ”។ លោកថា “ខ្ញុំជឿជាក់ថា ដើម្បីបម្រើការអភិវឌ្ឍន៍លើកោះរ៉ុង យើងពិតជាមានសេចក្តីត្រូវការអភិវឌ្ឍន៍ធំធេងជាជាងនេះបន្ថែមទៀត ដើម្បីសោភ័ណភាពលើកោះរ៉ុងនេះ”។

ក្រុមហ៊ុនបានចុះហត្ថលេខាលើកិច្ចសន្យាជួលតាំងពីថ្ងៃទី២៨ ខែកុម្ភៈ ឆ្នាំ ២០០៨ និងក្រុមប្រឹក្សាអភិវឌ្ឍន៍កម្ពុជា បានប្រគល់កោះរ៉ុងជាផ្លូវការនៅថ្ងៃទី៣ ខែតុលា ឆ្នាំ២០០៨ ដើម្បីធ្វើការអភិវឌ្ឍ ដូចជា ការសាងសង់សណ្ឋាគារ កាស៊ីណូ និងរីសតផ្សេងៗ ការសាងសង់ផ្លូវ ផែ ស្ពាន និងអគ្គិសនី អ៊ីនធើណេត និងទឹកស្អាត។ល។ ក្រុមហ៊ុនបានចាប់ផ្តើមស្ថាបនាប្រព័ន្ធផ្លូវថ្នល់តាមប្លង់មេ និងធ្វើការដឹកជញ្ជូនសម្ភារៈសាងសង់ប្រព័ន្ធផ្លូវថ្នល់ចែកចេញជា៥ដំណាក់កាលផ្សេងគ្នា៕

ការកើនឡើងនៃកម្ចីអចលនទ្រព្យបង្ហាញថា វិស័យនេះនៅតែដើរឆ្ពោះទៅមុខ ទោះស្ថិតក្នុងពេលមានវិបត្តិ

ដោយ៖ ប៊ី

ភ្នំពេញ៖ កម្ចីអចលនទ្រព្យ មានទំហំទឹកប្រាក់ដល់ទៅ ៤,៦៩ពាន់លានដុល្លារគិតរហូតដល់ត្រីមាសទី៣ ឆ្នាំ២០២០នេះ ដែលបញ្ជាក់ថា វិស័យអចលនទ្រព្យនៅកម្ពុជា នៅតែបន្តដំណើរទៅមុខ បើទោះបីជាវិស័យនេះរងផលប៉ះពាល់វិបត្តិជំងឺកូវីដ១៩។

យោងតាមរបាយការណ៍របស់ក្រុមហ៊ុនក្រេឌីត ប្យួរ៉ូ (ខេមបូឌា) ចេញផ្សាយកាលថ្មីៗនេះ បានឱ្យដឹងថា នៅចុងត្រីមាសនេះសមតុល្យឥណទានលក្ខណៈបុគ្គលចំនួន ៩,១១ ពាន់លានដុល្លារ ដែលក្នុងនោះកម្ចីអចលនទ្រព្យមានលើសពីពាក់កណ្តាលនៃសមតុល្យឥណទានលក្ខណៈបុគ្គលសរុប ៥១,៥១% ឬស្មើនឹង៤,៦៩ពាន់លានដុល្លារ ចំណែកឯ សមតុល្យឥណទានហិរញ្ញវត្ថុផ្ទាល់ខ្លួនមានចំណែក ៤៧,៩០%។

បើទោះបីជា ចំនួនគណនីនៃកម្ចីអចលនទ្រព្យមានចំនួនត្រឹម ១០,៥៨% នៃចំនួនគណនីសរុប, ក៏ប៉ុន្តែចំនួននេះមានទំហំច្រើនជាងពាក់កណ្តាលនៃសមតុល្យឥណទានសរុប។ សមតុល្យប័ណ្ណឥណទានមានចំណែកតូចគឺត្រឹមតែ០,៥៨% ប៉ុណ្ណោះ។
ចំនួនអតិថិជនដែលព្យាយាមស្នើសុំឥណទានក្នុងទម្រង់៣ផ្សេងៗគ្នាដូចជា ឥណទានសម្រាប់ប្រើប្រាស់ផ្ទាល់ខ្លួន (Personal Finance) , ប័ណ្ណឥណទាន (Credit Cards) និងកម្ចីអចលនទ្រព្យ (Mortgage) បានកើនឡើងជារួម ៥៣% នៅត្រឹមត្រីមាសទី៣នៃឆ្នាំ២០២០នេះ។

លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានប្រាប់កាលពីថ្មីៗនេះថា កាលពីចុងខែតុលា ឆ្នាំ ២០២០ ធនាគាររបស់លោកមានកម្ចីសរុបចំនួន ៤១៥ ២០២ ដោយទឹកប្រាក់កម្ចីសរុបមានចំនួន ៤ ០៨៨ ១៩៤ ២៩៤ ដុល្លារអាមេរិក ក្នុងចំណោមនោះកម្ចីទិញផ្ទះមានចំនួន ៦ ៥០១ (ឬ ១,៥៧ ភាគរយនៃកម្ចីសរុប) និងផលបត្រកម្ចីទិញផ្ទះស្មើនឹង ១៦២ ៧៣១ ៦៦៩ ដុល្លារអាមេរិក ឬ ៣,៩៨ ភាគរយនៃកម្ចីសរុប។

ទំហំកម្ចីជាមធ្យមសម្រាប់កម្ចីទិញផ្ទះគឺ ២៥ ០៣២ ដុល្លារអាមេរិក។
ធៀបនឹងរយៈពេលដូចគ្នាកាលពីឆ្នាំមុន (ខែតុលា ឆ្នាំ ២០១៩) ធនាគារនេះមានកម្ចីសរុបចំនួន ៣៩៩ ៧០៨ ជាមួយនឹងកម្ចីសរុបមានចំនួន ៣ ៦៥៦ ០០៨ ៤០៧ ដុល្លារអាមេរិក ក្នុងចំណោមនោះកម្ចីទិញផ្ទះមានចំនួន ៧ ៥២២ ឬ ១,៨៨ ភាគរយនៃកម្ចីសរុប និងផលបត្រកម្ចីទិញផ្ទះមានចំនួន ១៨៨ ០៦០ ៣៨៥ ដុល្លារអាមេរិក ឬ ៥,១៤ ភាគរយនៃកម្ចីសរុប។ ទំហំកម្ចីជាមធ្យមមានចំនួន ២៥ ០០១ ដុល្លារ។

លោក ចាន់នី បានថ្លែងថា “យើងឃើញថា ធនាគារអេស៊ីលីដា មានការតឹងរ៉ឹងយ៉ាងខ្លាំង ហើយធនាគារមិនបានផ្ដល់កម្ចីច្រើនសម្រាប់ហិរញ្ញវត្ថុទិញផ្ទះនោះទេ។ នៅឆ្នាំនេះ កម្ចីនេះតិចជាងកាលពីឆ្នាំមុន”។
លោក បានឱ្យដឹងទៀតថា “កម្ចីទិញផ្ទះគឺជាកម្ចីរយៈពេលវែង ដូច្នេះបើសិនជាយើងផ្ដល់កាន់តែច្រើន វានឹងបង្កឱ្យមានភាពមិនស៊ីគ្នានៃទ្រព្យសកម្មរបស់យើង និងបំណុលរបស់យើង។ នេះគឺជាមូលហេតុមួយក្នុងចំណោមមូលហេតុជាច្រើនដែលយើងមិនបានផ្ដល់កម្ចីទិញផ្ទះចំនួនច្រើននោះទេ។ ម្យ៉ាងវិញទៀតធនាគារអេស៊ីលីដាផ្ដោតការយកចិត្តទុកដាក់លើហិរញ្ញវត្ថុកម្ចីទិញផ្ទះដែលជាម្ចាស់ដើម”។

ទោះបីជាយ៉ាងណាក៏ដោយ ប្ររធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីម ធ្លាប់មានប្រសាសន៍ថា ក្នុងដំណាក់កាលនៃកម្ពុជាកំពុងជួបវិបត្តិនេះ រាល់ដំណើរសេដ្ឋកិច្ច ពាណិជ្ជកម្ម និងការវិនិយោគមានការថមថយខ្លះ ក្នុងចំណោមនេះ កាវិនិយោគអាចនឹងមានផលប៉ះពាល់ខ្លះក្នុងរយៈពេលខ្លី។
លោកបន្តថា “យ៉ាងណាក៏ដោយស្ថាប័នធនាគារ និងហិរញ្ញវត្ថុមានតួនាទីយ៉ាងសំខាន់ក្នុងផ្តល់កញ្ចប់កម្ចីពិសេសណាមួយ សម្រាប់ជូនដល់អ្នករកស៊ី ក្នុងវិស័យអចលនទ្រព្យ និងអ្នករកស៊ីអាជីវកម្មផ្សេងៗ ដើម្បីស្រោចស្រងវិស័យអចលនទ្រព្យ និងអាជីវកម្មនានាអាចរស់បាន”។
លោកសុខនីមថ្លែងថា ធនាគារ និងស្ថាប័នមីក្រូហរិញ្ញវត្ថុ អាចចូលរួមជួយស្រោចស្រង់ និងដោះស្រាយវិបត្តិនេះបាន ដោយការមានយន្តការបង្កើតកញ្ចប់កម្ចីពិសេស រយៈពេលខ្លីក្នុងសម័យវិបត្តិកូវីដ១៩នេះ ជូនដល់ក្រុមហ៊ុនភ្នាក់ងារអចលនវត្ថុ ក្រុមហ៊ុនបុរី ក្រុមហ៊ុនអភិវឌ្ឍន៍លំនៅដ្ឋាន និងអាជីវកម្មដទៃទៀត ដើម្បីដោះស្រាយការស្ទះសាច់ប្រាក់បង្វិលរយៈពេលខ្លីរបស់ម្ចាស់អាជីវកម្ម។ កញ្ចប់កម្ចីពិសេសនេះ អាចជាកម្ចីរយៈពេលខ្លី៣ ទៅ៦ខែ ក្នុងអាត្រាការប្រាក់ទាប ឬពិសេសណាមួយ៕

ខេត្តកោះកុង និងខេត្តសានស៊ីប្រទេសចិន ភ្ជាប់ទំនាក់ទំនងលើការអភិវឌ្ឍក្រុងរួមគ្នា

ដោយ ៖ រ៉ាណេត
កោះកុង ៖ ខេត្តកោះកុង បានធ្វើកិច្ចភ្ជាប់ទំនាក់ទំនងជិតស្និទ្ធជាមួយក្រុងវៃណាន ខេត្តសានស៊ីនៃសាធារណរដ្ឋប្រជាមានិតចិន លើការអភិវឌ្ឍទីក្រុងរួមគ្នា ដោយផ្តោតលើចំណុចសំខាន់ចំនួន៥។

ខេត្តកោះកុងនឹងត្រូវបានធ្វើការអភិវឌ្ឍក្នុងទិសដៅរួមគ្នាជាមួយក្រុងវៃណាន ខេត្តសានស៊ីប្រទេសចិន ជាបងប្អូនបន្ទាប់ពីពិភាក្សា ដើម្បីឈានដល់ការចុះហត្ថលេខានៅព្រឹកថ្ងៃទី២៣ ខែវិច្ឆិកា ឆ្នាំ២០២០ ដោយលោកស្រី មិថុនា ភូថង អភិបាលខេត្តកោះកុង និងថ្នាក់ដឹកនាំខេត្តសានស៊ី។

តាមរយៈកិច្ចប្រជុំ Video Conference រវាងខេត្តកោះកុង នៃព្រះរាជាណាចក្រកម្ពុជា និងក្រុងវៃណាន ខេត្តសានស៊ី នៃសាធារណរដ្ឋប្រជាមានិតចិន ដេីម្បីចុះហត្ថលេខាលើខ្លឹមសារព្រៀងកំណត់ហេតុ ស្ដីពីការអភិវឌ្ឍទំនាក់ទំនងទីក្រុងជាបងប្អូន រវាងខេត្តកោះកុង នៃព្រះរាជាណាចក្រកម្ពុជា និងក្រុងវៃណាន ខេត្តសានស៊ី នៃសាធារណរដ្ឋប្រជាមានិតចិន និងបានពិភាក្សាទៅលើវិស័យសំខាន់ៗចំនួន៥ រួមមាន វិស័យទេសចរណ៍ ពាណិជ្ជកម្ម វប្បធម៌
អប់រំ និងវិស័យកសិកម្ម។

ទី១. វិស័យទេសចរណ៍ ភាគីទាំងពីរគាំទ្រគ្នាទៅវិញទៅមក ក្នុងការរៀបចំផ្សព្វផ្សាយជាសាធារណៈ ស្ដីពីវិស័យទេសចរណ៍ នៃខេត្ត-ក្រុងទាំងពីរ ហើយនិងផ្ដល់ភាពងាយស្រួល និងគោលនយោបាយអនុគ្រោះសម្រាប់ពលរដ្ឋក្នុងការធ្វើដំណើទៅវិញទៅមក។

ទី២. វិស័យពាណិជ្ជកម្ម : ផ្ដល់នូវការគាំទ្រពេញលេញទៅលើធនធានផ្សេងៗ និងគុណសម្បត្តិផ្នែកឧស្សាហកម្មនៃ ភាគីទាំងពីរ និងពង្រឹងកិច្ចសហប្រតិបត្តិការបច្ចេកទេសកសិកម្ម និងពាណិជ្ជកម្មផ្នែកផលិតផល។

ទី៣. វិស័យវប្បធម៍ : ជំរុញផ្សព្វផ្សាយទេសភាពទេសចរណ៍ជាយក្រុងទៅវិញទៅមក និងលក្ខណៈពិសេសផ្នែកឧស្សហកម្ម និងពង្រីកភាពជឿជាក់ ការយោគយល់ និងកិច្ចសហប្រតិបត្តិការរវាងខេត្ត-ក្រុងទាំងពីរ។

ទី៤. វិស័យអប់រំ : ពង្រឹងការផ្លាស់ប្ដូរការសិក្សា កិច្ចសហការបង្រៀនអោយ បានកាន់តែច្រើនតាមដែលអាចធ្វើទៅបាន និងពង្រឹងកម្មវិធីសម្រាប់ការធ្វើទស្សនកិច្ចសិក្សារបស់និស្សិតក្រោមលក្ខខណ្ឌណាមួយសមរម្យ។

ទី៥. វិស័យកសិកម្ម : ស្វែងរកធនធានជាលក្ខណៈពិសេសផ្នែកកសិកម្ម ផ្ដល់គុណសម្បត្តិឱ្យភាគីទាំងពីរ និងពង្រឹងមធ្យោបាយថ្មីនៃកិច្ចសហប្រតិបត្តិការក្នុងវិស័យកសិកម្ម ដូចជា ធនធានបំពេញបន្ថែមកម្រិតខ្ពស់ និងការច្នៃប្រឌិតផ្នែកបច្ចេកវិទ្យាកសិកម្ម។ ក្រុងវៃណាន និងខេត្តកោះកុង នឹងជំរុញបង្កើតចំណងមិត្តភាពខេត្ត-ក្រុងយ៉ាងសកម្មជាលក្ខណៈអន្តរជាតិ៕

World Bank៖ មនុស្សជិត ១១៥ លាននាក់ នឹងធ្លាក់ចូលបន្ទាត់ក្រីក្រខ្លាំង ដោយសារវិបត្តិសកល

អន្តរជាតិ៖ បញ្ហាវិបត្តិសកលកូវីដ១៩
អាចបណ្តាលឲ្យប្រជាជនប្រមាណជា ៨៨លានទៅ ១១៥ លាននាក់ ធ្លាក់ចូលទៅក្នុងបន្ទាត់ក្រីក្រខ្លាំង។ នេះបើយោងតាមរបាយការណ៍ភាពក្រីក្រ និងវិបុលភាពឆ្នាំ2020 (PSPR2020) របស់ធនាគារពិភពលោក WORLD BANK។

របាយការណ៍ភាពក្រីក្រនិងវិបុលភាពចែករំលែកឆ្នាំ ២០២០ (PSPR២០២០) បានឱ្យដឹងថា ជំងឺកូវីដ ១៩ ទំនងជាជំរុញប្រជាជនពី ៨៨ ទៅ ១១៥ លាននាក់ ឲ្យ ធ្លាក់ចូលក្នុងភាពក្រីក្រខ្លាំង ពោលគឺអ្នកដែលមានចំណូលក្រោម ១,៩០ ដុល្លារក្នុងមួយថ្ងៃ – នៅជុំវិញពិភពលោកក្នុងឆ្នាំ ២០២០។

ក្នុងនោះផងតួលេខក៏អាចឲ្យយើងឃើញបានដែរថា ពលរដ្ឋនៅអាស៊ីខាងត្បូងគឺមានចំណែក 63 ភាគរយនៃចំនួនព្យាករណ៍ខាងលើនេះ ពោលគឺ
ពួកគេរស់នៅដោយទទួលបានប្រាក់ចំណូលទាបជាង ១.៩០ ដុល្លារអាមេរិកក្នុងមួយថ្ងៃប៉ុណ្ណោះ។

ការប៉ាន់ស្មាននេះត្រូវបានធ្វើឡើងផ្អែកទៅលើរបាយការណ៍ទស្សនៈលើវិស័យសេដ្ឋកិច្ចជាសកល ឬ Global Economic Prospects (GEP)
កាលពីខែមិថុនា ប៉ុន្តែនឹងមានការផ្លាស់ប្តូរនៅក្រោយពេលដែលរបាយការណ៍របស់ GEP នឹងចេញផ្សាយម្តងទៀតនាខែមករាឆ្នាំ2021 ខាងមុខ៕

ដោយឡែកការព្យាករណ៍ដដែលរបស់ PSPR 2020 ក៏បានបង្ហាញដែរថា ពលរដ្ឋក្រីក្រដែលនឹងរស់នៅក្រោមសន្ទស្ស ៣.២ ដុល្លារអាមេរិកក្នុងមួយថ្ងៃក៏មាន
កើនឡើងខ្លាំងដូចគ្នាដែរគឺពី ១២៥ លាននាក់កាលពីខែមេសា ឆ្នាំនេះទៅដល់ ២៤២ ឬ២៥៧ លាននាក់ក្នុងខែតុលា ហើយអាស៊ីខាងត្បូងដដែលនឹងចាប់យកចំណែក
71 ភាគរយនៃចំនួនសរុបនេះ៕ World Economic Forum

តំណាងក្រុមហ៊ុន CSA Real Estate លោកស្រី តាំង ហ៊ួរ រៀបរាប់ពីភាពវិជ្ជមាននិងឱកាសវិនិយោគអចលនទ្រព្យ ក្នុងកិច្ចសម្ភាសពិសេសថ្ងៃនេះ

ដោយ ហ្សូលី

ភ្នំពេញ៖ លោកស្រី តាំង ហ៊ួរ តំណាងក្រុមហ៊ុនអចលនទ្រព្យ CSA Real Estate ផ្តល់កិច្ចសម្ភាសន៍ពិសេសនៅថ្ងៃនេះជាមួយគេហទំព័រ Propertyarea.asia។

លោកស្រីនឹងរៀបរាប់ពីចរន្តទីផ្សារអចលនទ្រព្យនៅកម្ពុជា ដែលបន្តបង្ហាញសញ្ញាវិជ្ជមានទោះបីជាវិបត្តិសកលកូវីដ ១៩ អូសបន្លាយពេលយ៉ាងណាក្តី។ ជាពិសេស លោកស្រីលើកទឹកចិត្តថា នេះជាឱកាសវិនិយោគអចលនទ្រព្យល្អបំផុត អនុញ្ញាតឱ្យអ្នកវិនិយោគឬអ្នកទិញ ជាវបានក្នុងតម្លៃសមរម្យ និងទទួលផលចំណេញច្រើន។

ចង់ដឹងលម្អិតបែបណាខ្លះ សូមរង់ចាំតាមដានទស្សនាកិច្ចសម្ភាសន៍នេះ ដែលចេញផ្សាយនៅម៉ោង៧ល្ងាច ថ្ងៃទី ២៣ វិច្ឆិកា ឆ្នាំ ២០២០នេះ ធ្វើឡើងដោយគេហទំព័រ Propdertyarea.asia និង Cambodiafinancialtimes.com ផ្តាច់មុខ។

កិច្ចសម្ភាសនេះនឹងមានផ្សាយនៅលើទំព័រហ្វេសប៊ុកផេក Property Area Asia ,Cambodia Financial Times និងផេក អ្នកជំនាញលក់អចលនទ្រព្យ។

កម្មវិធីនេះបានទទួលបានការឧបត្ថម្ភពី គម្រោងខុនដូ Urban Village ធនាគារហត្ថា ក្រុមហ៊ុន KW Sam SN ក្រុមហ៊ុន CEA និងក្រុមហ៊ុន Khmer Foundation Appraisal៕