ដោយ ៖ វុត្ថា

ភ្នំពេញ ៖ សមាគមរោងចក្រកាត់ដេរនៅកម្ពុជា (GMAC) បានចេញសារណែនាំដល់សមាជិកសមាគមទាំងអស់ស្តីពីកម្ពុជា និងប្រព័ន្ធអនុគ្រោះទូទៅ (GSP) របស់ចក្រភពអង់គ្លេស ដើម្បីមានភាពងាយស្រួលក្នុងការត្រៀមអនុវត្ត។

ក្នុងសារណែនាំរបស់ GMAC ដែលចេញជាសាធារណៈនៅរសៀលថ្ងៃទី១៩ ខែវិច្ឆិកា ឆ្នាំ២០២០នេះបានបញ្ជាក់ថា យោងទៅលើផ្នែកនៃអន្តរកាលនៃការចាកចេញពីសហភាពអឺរ៉ុប របស់ប្រទេសអង់គ្លេស (Brexit) វិធានថ្មីសម្រាប់ ឆ្នាំ២០២១ ដែលចេញដោយនាយកដ្ឋានពាណិជ្ជកម្មអន្តរជាតិ របស់អង់គ្លេស កាលពីថ្ងៃទី១០ ខែវិច្ឆិកា ឆ្នាំ២០២០។ ប្រទេសអង់គ្លេស បានចាកចេញពីសហភាពអឺរ៉ុប ហើយរយៈពេលអន្តរកាលបន្ទាប់ពី Brexit នឹងត្រូវបញ្ចប់នៅចុងឆ្នាំនេះ។

ចាប់ពីថ្ងៃទី១ ខែមករា ឆ្នាំ២០២១ ប្រទេសដែល មានលក្ខណៈសម្បត្តិជាប្រទេសកំពុងអភិវឌ្ឍ នឹងអាចទទួលបានការអនុគ្រោះពាណិជ្ជកម្មតាមរយៈ
ប្រព័ន្ធ GSP របស់អង់គ្លេស។ ប្រព័ន្ធ GSP របស់អង់គ្លេសនេះ ដំបូងនឹងផ្តល់ការអនុគ្រោះពាណិជ្ជកម្មទៅប្រទេសនានាដូច GSP របស់សហភាពអឺរ៉ុបដែរ។ ប្រព័ន្ធ GSP របស់អង់គ្លេស នឹងមានក្របខ័ណ្ឌចំនួន៣ ៖ ក្របខ័ណ្ឌប្រទេសអភិវឌ្ឍតិចតួចបំផុត, ក្របខ័ណ្ឌទូទៅ និងក្របខណ្ឌប្រសើរឡើង។

កម្ពុជា ដែលត្រូវបានចាត់ថ្នាក់ ដោយអង្គការសហប្រជាជាតិថា ជាប្រទេសអភិវឌ្ឍតិចតួចបំផុត គឺស្ថិតនៅក្នុងក្របខ័ណ្ឌប្រទេសអភិវឌ្ឍតិចតួចបំផុត។ ហេតុដូច្នេះ កម្ពុជា នឹងទទួលបានការនាំចេញដោយមិនជាប់ពន្ធ និងមិនជាប់ការកំរិតកូតា ទៅកាន់ប្រទេសអង់គ្លេស សម្រាប់ទំនិញទាំងអស់ លើកលែងតែអាវុធនិងគ្រឿងផ្ទុះ។ នេះគឺដូចគ្នានឹងគម្រោង EBA ក្រោមប្រព័ន្ធ GSP របស់សហភាពអឺរ៉ុប។

សមាគមរោងចក្រកាត់ដេរនៅកម្ពុជា (GMAC) កំពុងធ្វើការងារជាមួយក្រសួងពាណិជ្ជកម្មកម្ពុជា និងសមភាគីអង់គ្លេស ដើម្បីសុំការបំភ្លឺអំពីការផ្លាស់ប្តូរមួយចំនួន នៅក្នុងនីតិវិធីរដ្ឋបាល (ប្រសិនបើមាន) ដូចជាការបញ្ជាក់ប្រភពដើមកំណើតទំនិញ កាលបរិច្ឆេទចូលជាធរមាននៃការអនុវត្ត
(ថាតើកាលបរិច្ឆេទនៃការដឹកជញ្ជូន ឬកាលបរិច្ឆេទនៃការទៅដល់)៕

ដោយៈហ្សូលី

ភ្នំពេញៈ សេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២១ ដែលស្ថិតក្នុងគម្រោងចំណាយប្រមាណ៧.៥០០លានដុល្លារអាមេរិក នឹងត្រូវពន្លឿនការអនុម័តឱ្យចប់សព្វគ្រប់នៅត្រឹមសប្តាហ៍ក្រោយនេះ។

លោកឡេង ប៉េងឡុង អ្នកនាំពាក្យរដ្ឋសភាបានឱ្យដឹងនៅថ្ងៃទី១៩ វិច្ឆិកានេះថា សេចក្តីព្រាងច្បាប់នេះ នឹងត្រូវរដ្ឋសភាអនុម័តនៅថ្ងៃទី២៥ ខែវិច្ឆិកា ដើម្បីបញ្ជូនសុំការឯកភាពពីព្រឹទ្ធសភា មុនដាក់ថ្វាយទៅអង្គព្រះមហាក្សត្រ បន្ទាប់ពីទទួលបានពីរាជរដ្ឋាភិបាល កាលពីដើមខែវិច្ឆិកានេះ។

ក្រោយកិច្ចប្រជុំគណៈកម្មាធិការអចិន្រ្តៃយ៍រដ្ឋសភា ដឹកនាំដោយសម្តេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃទី១៩ ខែវិច្ឆិកានេះ លោកបានបញ្ជាក់ថា សេចក្តីព្រាងច្បាប់នេះ ត្រូវបានរាជរដ្ឋាភិបាលស្នើសុំសភាអនុម័តជាការប្រញាប់ ដើម្បីដាក់ថ្វាយព្រះមហាក្សត្រព្រះហស្ថលេខា យ៉ាងយូរបំផុតឱ្យបានត្រឹមម៉ោង២៤ នៃថ្ងៃទី៣១ ខែធ្នូ ឆ្នាំ២០២០ និងបើកផ្លូវឱ្យរាជរដ្ឋាភិបាលអនុវត្តន៍ ការងារតាមផែនការគ្រោងទុក។

សេចក្តីព្រាងច្បាប់ហិរញ្ញវត្ថុឆ្នាំ២០២១ ត្រូវបានរាជរដ្ឋាភិបាល គ្រោងចំណាយថវិ​កាថ្នាក់ជាតិប្រមាណ៧.៥០០លានដុល្លារអាមេរិក ត្រូវជា៤៥,៨៥ភាគរយ នៃ ផលិតផលក្នុងស្រុកសរុប(ផ.ស.ស) ដែលថយចុះ១,៩ភាគរយ បើធៀបនឹងឆ្នាំ២០២០នេះ។

លោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា គម្រោងថវិកាឆ្នាំ២០២១ ជាឧបករណ៍ដ៏មានប្រសិទ្ធភាព ដែលអាចជួយរាជរដ្ឋាភិបាល ឆ្លើយតបទៅនឹងបញ្ហាប្រឈមនឹងសង្គម សេដ្ឋកិច្ច និងការពារអាយុជីវិតប្រជាជនពីការរាតត្បាតនៃជំងឺកូវីដ១៩។

យោងតាមសេចក្តីថ្លែងហេតុរបស់រាជរដ្ឋាភិបាលបានឱ្យដឹងថា ក្នុងឆ្នាំ២០២១ បៀវត្សអប្បបរមារបស់មន្ត្រីរាជការ ស៊ីវិល និងកងកម្លាំងប្រដាប់អាវុធ នឹងត្រូវរក្សាកម្រិតឆ្នាំ២០២០ ដើម្បីសន្សំថវិកាសម្រាប់ទប់ទល់ ការរាតត្បាតនៃជំងឺកូវីដ-១៩ និងគ្រោះមហន្តរាយទឹកជំនន់រដូវវស្សាឆ្នាំនេះ សំដៅធានាសុខសន្តិភាព ស្ថិរភាពសង្គម និងចីរភាពនៃកំណើនសេដ្ឋកិច្ច ព្រមទាំងភាពប្រកួតប្រជែងរបស់កម្ពុជា ជាមួយនឹងការបន្តលើកស្ទួយសុខុមាលភាពរបស់ប្រជាជន៕

ដោយៈ ណេត

ភ្នំពេញៈ លោកឧបនាយករដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានថ្លែងថា ក្រសួងបានផ្តល់សិទ្ឋអាទិភាពដល់ក្រុមហ៊ុនសឹង្ហបុរី ដើម្បីក្លាយជាក្រុមហ៊ុនត្រួតពិនិត្យ និងបញ្ជាក់ពីគុណភាពសំណង់នៅកម្ពុជា។

ក្នុងជំនួបជាមួយលោកMichael Tan Keng Siong ឯកអគ្គរដ្ឋទូតសាធារណរដ្ឋសិង្ហបុរីប្រចាំប្រទេសកម្ពុជា លោកជា សុផារ៉ានៅថ្ងៃទី១៩ វិច្ឆិកានេះ  លោករដ្ឋមន្ត្រីក្រសួងរៀបចំដែនដីបានមានប្រសាសន៍ថា ដើម្បីរឹតបន្តឹងចំណងមិត្តភាពរវាងប្រទេសទាំងពីរ  ក្រសួងរៀបចំដែនដី នគរូបនីយកម្ម និងសំណង់ផ្តល់អាទិភាពទទួលយកក្រុមហ៊ុនសំណង់របស់សិង្ហបុរី ដើម្បីក្លាយជាក្រុមហ៊ុនត្រួតពិនិត្យ និងបញ្ជាក់សំណង់នៅកម្ពុជា បន្ទាប់ពីអនុក្រឹត្យស្តីពីលក្ខខណ្ឌ និងនីតិវិធីនៃការត្រួតពិនិត្យនិងបញ្ជាក់សំណង់ បានអនុម័តដោយគណៈរដ្ឋមន្ត្រីរួច។

លោកបន្តថា “ក្រសួងរៀបចំដែនដី នគរូបនីយកម្ម និងសំណង់ ក៏នឹងផ្តល់អាទិភាពសម្រាប់ក្រុមហ៊ុនត្រួតពិនិត្យ និងបញ្ជាក់សំណង់របស់សិង្ហបុរី និងជប៉ុន ដើម្បីធ្វើកិច្ចសន្យាជួលការិយាល័យនៅទីស្តីការថ្មីរបស់ក្រសួង”។

លោកឧបនាយករដ្ឋមន្រ្តីបានបន្តថា ក្នុងនាមក្រសួងរៀបចំដែនដី នគរូបនីយកម្ម និងសំណង់ លោកក៏បានបានបង្ហាញ ពីការចូលរួមអបអរសាទរខួបលើកទី៥៥ នៃទំនាក់ទំនងការទូតរវាងប្រទេសទាំង២កម្ពុជា សឹង្ហបុរី និងប្តេជ្ញាបន្តរឹតបន្តឹងចំណងមិត្តភាពជាមួយស្ថានទូតសិង្ហបុរី អោយកាន់តែរឹងមាំថែមទៀត ។

លោក Michael Tan Keng Siong ឯកអគ្គរដ្ឋទូតសាធារណរដ្ឋសឹង្ហបុរីប្រចាំកម្ពុជា បានមានប្រសាសន៍ថា ក្នុងនាមស្ថានទូតនៃសាធារណរដ្ឋសិង្ហបុរី សូមសម្តែងនូវការកោតសរសើរចំពោះរាជរដ្ឋាភិបាលកម្ពុជា ដែលបានរៀបចំវិធានការត្រឹមត្រូវ ទទួលបានជោគ​ជ័យក្នុងការប្រយុទ្ធប្រឆាំង និងទប់ស្កាត់នៃជំងឺរាតត្បាតជាសាកល Covid-19។

លោកបន្តថា មន្ត្រីគ្រប់លំដាប់ថ្នាក់របស់ស្ថានទូត នៃសាធារណរដ្ឋសិង្ហបុរីប្រចាំកម្ពុជាមានមោទនភាពយ៉ាងខ្លាំង ក្នុងការបំបេញបេសកកម្មនៅកម្ពុជា ដែលអាចទទួលបាននូវសុវត្ថិភាព និងសេរីភាពក្នុងការធ្វើដំណើរ និងប្រកបការងារប្រចាំថ្ងៃ ក្នុងខណៈពេលដែលប្រជាជនក្នុងបណ្តាប្រទេសជាច្រើន លើសាកលលោកកំពុងប្រយុទ្ធប្រឆាំងនឹងជំងឺរាតត្បាតជាសាកលCovid-19 នេះ ។

លោកបន្ថែមថា ក្នុងពេលឆាប់ៗខាងមុខនេះ បន្ទាប់ពីជំងឺរាតត្បាតជាសាកល Covid-19 មានភាពធូរស្រាល ស្ថានទូតសឹង្ហបុរីជឿជាក់ថា នឹងមានវិនិយោគគិនសិង្ហបុរីជាច្រើនធ្វើដំណើរមកប្រទេសកម្ពុជា ដើម្បីពិនិត្យមើលឱកាសវិនិយោគ ជាពិសេសលើវិស័យសំណង់ លំនៅឋាន និងអចលនទ្រព្យ៕

ដោយ៖ ប៊ី
អន្តរជាតិ៖ លោកស៊ី ជិនពីង ប្រធានាធិបតីចិន លើកឡើងថា សេដ្ឋកិច្ចដ៏ធំសម្បើមរបស់ចិនគឺជាមូលដ្ឋានដ៏សំខាន់សម្រាប់ផ្លាស់ប្តូរពាណិជ្ជកម្មសេរី ហើយលោកក៏បានព្រមានប្រឆាំងនឹង គំនិតគាំពារនិយម ដែលបានបង្កបញ្ហាដល់សេដ្ឋកិច្ចសកលលោក។

លោក ស៊ី ជិនពីង បានលើកឡើងដូច្នេះ នៅក្នុងឱកាសចូលរួមក្នុងកិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) រៀបចំឡើងតាមប្រព័ន្ធអនឡាញនៅថ្ងៃព្រហស្បតិ៍នេះ។ នេះបើតាមការចេញផ្សាយ ដោយសារព័ត៌មាន CNA នៅព្រឹកថ្ងៃព្រហស្បតិ៍ ទី១៩ ខែវិច្ឆិកា ឆ្នាំ២០២០។

លោក ស៊ី ជិនពីង បានថ្លែងនៅក្នុងសុន្ទរកថារបស់ថា ចិននឹងបើកចំហទីផ្សារ ហើយកាត់បន្ថយពន្ធ ក៏ដូចជាគាំទ្រប្រព័ន្ធសកលភាវូនីយកម្ម និងពហុភាគីនិយម។

លោកប្រធានាធិបតីចិនរូបនេះ បានអះអាងថា តំបន់អាស៊ីប៉ាស៊ីហ្វិក គឺជាកម្លាំងចលករឈានមុខគេ ក្នុងការជំរុញកំណើនសេដ្ឋកិច្ចសកល ដែលកំពុងប្រឈមមុខនឹងបញ្ហាជាច្រើន ជាពិសេសនោះគឺ COVID-19 តែម្ដង។
ដោយសារតែការឆ្លងរាតត្បាត COVID-19 កិច្ចប្រជុំកំពូល APEC ក្នុងឆ្នាំ២០២០នេះ ត្រូវបានរៀបចំឡើងតាមប្រព័ន្ធអនឡាញ។

ប្រទេសចំនួន ២១ ស្ថិតនៅជាប់ឆ្នេរនៃតំបន់ប៉ាស៊ីហ្វិក បូករួមទាំងសហរដ្ឋអាមេរិក និងចិន តំណាង ៦០ភាគរយនៃ GDP សកល។ ទោះជាយ៉ាងណាគេមិនទាន់ប្រាកដថា តើលោក ដូណាល់ ត្រាំ នឹងចូលរួមក្នុងកិច្ចប្រជុំកំពូលនេះដោយផ្ទាល់ ឬក៏បញ្ជូនមន្ត្រីជាន់ខ្ពស់របស់លោកណាម្នាក់ ឲ្យចូលរួមជំនួសលោកឡើយ៕

ដោយ ៖ វុត្ថា

ភ្នំពេញ ៖ គម្រោងសាងសង់ស្ពានអាកាស និងផ្លូវក្រោមដីនៅចំណុចរង្វង់មូលចោមចៅ ដើម្បីបញ្ចៀសជំនន់កកស្ទះចរាចរណ៍ដែលតែងកើតមានជារៀងរាល់ថ្ងៃនោះ ពេលនេះជាលទ្ធផលសម្រេចបានប្រមាណ៥៨ ភាគរយ ហើយនឹងឈានទៅរកការបញ្ចប់ទៅតាមផែនការដែលបានកំណត់ទុក។

តាមរយៈមន្ទីរសាធារណៈការ និងដឹកជញ្ជូនរាជធានីភ្នំពេញនៅរសៀលថ្ងៃទី១៩ ខែវិច្ឆិកា ឆ្នាំ២០២០នេះបានបង្ហាញឱ្យឃើញថា ក្រោមសកម្មភាពសាងសង់យ៉ាងមមាញឹកទាំងយប់ទាំងថ្ងៃរបស់ក្រុមអ្នកជំនាញសាងសង់ ជាលទ្ធផលរហូតមកដល់ពេលនេះសម្រេចបានជាងពាក់កណ្តាលនៃគម្រោងសាងសង់ទាំងស្រុង ពោលគឺសម្រេចបានប្រមាណ៥៨ភាគរយ។

មន្ត្រីមន្ទីរសាធារណៈការ និងដឹកជញ្ជូនរាជធានីភ្នំពេញបានប្រាប់ឱ្យដឹងថា បច្ចុប្បន្ន ជំនន់នៃការកកស្ទះចរាចរណ៍នៅចំណុចរង្វង់មូលចោមចៅ រហូតដល់ផ្លូវបំបែកជម្ពូរវ័ននៅលើផ្លូវជាតិលេខ៤ និងនៅតំបន់ក្បែររង្វង់មូលមុខបញ្ជាការដ្ឋានទ័ពនៅលើផ្លូវជាតិលេខ៣ ក្បែររង្វង់មូលចោមចៅត្រូវបានកាត់បន្ថយបានមួយចំនួន បន្ទាប់ពីសម្ដេចតេជោ ហ៊ុន សែន សម្រេចប្រកាសឱ្យប្រើប្រាស់ផ្លូវក្រោមដីជាបណ្តោះអាសន្ន។

មន្ត្រីរូបដដែលបានអះអាងថា ផ្អែកតាមសកម្មភាពនៃការសាងសង់យ៉ាងយកចិត្តទុកដាក់ និងយ៉ាងសកម្មនាពេល មិនយូរទៀតទេ គម្រោងសាងសង់មួយនេះនឹងអាចរួចរាល់ទាំងស្រុកស្របទៅតាមផែនការដែលកំណត់ ពោលគឺនៅត្រឹមគម្រោងស្ពានអាកាសនិងផ្លូវក្រោមដីចោមចៅ ដែលជាគម្រោងអភិវឌ្ឍន៍របស់សាលារាជធានីភ្នំពេញ និងសាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC នេះគ្រោងនឹងបញ្ចប់ការសាងសង់នៅចុងឆ្នាំ ២០២១ ខាងមុខនេះ។

បច្ចុប្បន្នរាជធានីភ្នំពេញ មានស្ពានអាកាសចំនួន៦កន្លែង រួមមាន ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសស្តុបផ្សារដីហុយ និងស្ពានអាកាសចោមចៅ ដែលស្ពាននេះក្រុមការងារបាននិងកំពុងសម្រុកដំណើរការសាងសង់យ៉ាងសកម្មផងដែរ។

អ្នកនាំពាក្យសាលារាជធានីភ្នំពេញ លោក ម៉េត មាសភក្តី ធ្លាប់បានមានប្រសាសន៍ថា ការស្ថាបនាស្ពាននេះមានគោលបំណងដើម្បីកាត់បន្ថយការស្ទះចរាចរណ៍ក្នុងរាជធានីភ្នំេពញ ព្រោះនៅចំណុចរង្វង់មូលចោមចៅនេះមានភាពកកស្ទះចរាចរណ៍ស្ទើរតែរាល់ថ្ងៃ ទោះបីជាមានការអន្តរាគមន៍ប្រចាំការពីនគរបាលចរាចរណ៍ក៏ដោយ។ លោកថា ចំណុចរង្វង់មូលមានសារៈសំខាន់ណាស់ ព្រោះវាជាផ្លូវដ៏សមខាន់ក្នុងការជួយទ្រទ្រង់ការដឹកជញ្ជូន និងកំណើនសេដ្ឋកិច្ចកម្ពុជា៕

ដោយ ៖ រ៉ាណេត

ភ្នំពេញ ៖ ក្រោមកម្មវិធីគាំទ្របន្ទាន់ ដើម្បីឆ្លើយតបទៅនឹងវិបត្តិសេដ្ឋកិច្ចដែលបណ្តាលមកពីជំងឺ Covid-19 រាជរដ្ឋាភិបាលជប៉ុន បានបន្តផ្តល់ជំនួយដល់កម្ពុជាសម្រាប់ដោះស្រាយ និងទ្រទ្រង់សេដ្ឋកិច្ចជាតិឡើងវិញចំនួន ២៥ពាន់លានយ៉េន ស្មើនឹងប្រមាណ ២៣៤,៦លានដុល្លារអាមេរិក។

យោងតាមសេចក្តីប្រកាសព័ត៌មានរបស់ទីភ្នាក់ងារសហប្រតិបត្តិការជប៉ុនប្រចាំកម្ពុជា (JICA) ចេញផ្សាយនៅថ្ងៃទី១៩ ខែវិច្ឆិកា ឆ្នាំ២០២០ បានឱ្យដឹងថា ការផ្តល់ជំនួយនូវចំនួនទឹកប្រាក់ដ៏សន្ធឹកសន្ធាប់ដូចដែលបានបង្ហាញជូនខាងលើនេះ គឺអនុវត្តតាមកិច្ចព្រមព្រៀង ដែលត្រូវបានចុះហត្ថលេខាដោយ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Yuichi Sugano ប្រធានស្តីទីនៃទីភ្នាក់ងារ សហប្រតិបត្តិការជប៉ុនប្រចាំកម្ពុជា នៅថ្ងៃទី១០ ខែវិច្ឆិកា ឆ្នាំ២០២០។

រាជរដ្ឋាភិបាលជប៉ុន បាន និងកំពុងផ្តល់ឥណទានសម្បទានសម្រាប់កម្មវិធីគាំទ្របន្ទាន់ដើម្បីឆ្លើយតបទៅនឹងវិបត្តិនៃជំងឺ Covid-19 ដល់រាជរដ្ឋាភិបាលកម្ពុជា ក្នុងគោលបំណងលើកកម្ពស់ស្ថេរភាពសេដ្ឋកិច្ច និងកិច្ចខិតខំប្រឹងប្រែងអភិវឌ្ឍន៍ផ្សេងៗរបស់របស់រដ្ឋាភិបាលកម្ពុជា រួមមាន ការពង្រឹងប្រព័ន្ធសុខាភិបាល កម្មវិធីជំនួយសង្គម បណ្តាញភស្តុភារកម្ម ហេដ្ឋារចនាសម្ព័ន្ធរូបវ័ន្ត ដែលបានរងផលប៉ះពាល់ពីវិបត្តិនៃជំងឺ Covid-19 ។

នៅក្នុងសេចក្ដីប្រកាសដដែលបានបញ្ជាក់ថា ក្នុងនាមជាដៃគូរអភិវឌ្ឍន៍ JICA តែងតែប្រកាន់ភ្ជាប់នូវអភិក្រមរួម ដើម្បីគាំទ្ររដ្ឋាភិបាលកម្ពុជាក្នុងការដោះស្រាយបញ្ហាប្រឈមនានា និងបន្តរួមដៃជាមួយប្រទេសកម្ពុជាប្រយុទ្ធទៅនឹងជំងឺ Covid-19 ។ ក្នុងបរិបទនេះ JICA បាន និងកំពុងជួយគាំទ្រកែលម្អអគារមន្ទីរពេទ្យ និងបំពាក់បរិក្ខារពេទ្យថ្មីនៅមន្ទីរពេទ្យបង្អែកខេត្តបាត់ដំបង និងមន្ទីរពេទ្យបង្អែកខេត្តសៀមរាប ផ្តល់សម្ភារអនាម័យ ដល់មជ្ឈមណ្ឌលសហប្រតិបត្តិការកម្ពុជា-ជប៉ុន បំពាក់ម៉ាស៉ីនទែម៉ូម៉ែត្រវាស់កម្តៅ និងផ្តល់សម្ភារមួយចំនួនដល់រថយន្តក្រុងក្នុងរាជធានីភ្នំពេញដើម្បីបង្ការការឆ្លងជំងឺ។

ជាមួយគ្នានេះ JICA បានកំពុងអនុវត្តន៍គម្រោងកិច្ចសហប្រតិបត្តិការបច្ចេកទេស ដើម្បីពង្រឹងសមត្ថភាពមន្ត្រីដែលកំពុងបម្រើការក្នុងវិស័យសុខាភិបាល តាមរយៈការបញ្ជូនជំនាញការមកប្រទេសកម្ពុជា និងរៀបចំការបណ្តុះបណ្តាលដល់មន្ត្រីជំនាញកម្ពុជាបន្ថែមផងដែរ៕

ដោយ ៖ប៊ី

ភ្នំពេញ ៖ កិច្ចប្រជុំស្តីពីការចរចាពាណិជ្ជកម្មសេរីរវាងកម្ពុជា និងកូរ៉េខាងត្បូង ជុំទី ៤មានរយៈពេល៣ថ្ងៃដោយចាប់ផ្តើមពីថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០២០ ដែលភាគីទាំងពីរមានបំណងពន្លឿនដើម្បីបញ្ចប់សេចក្តីព្រាងនៅចុងឆ្នាំនេះ។

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង នឹងផ្តោតលើច្បាប់ទូទៅប្រភពដើមនៃទំនិញ ការលុបបំបាត់គយ ការចូលទៅកាន់ទីផ្សារ និងបញ្ហាផ្សេងទៀត។ ភាគីទាំងពីរបានធ្វើកិច្ចចរចាចំនួន៣លើករួចមកហើយស្តីពីកិច្ចព្រមព្រៀងពាណិជ្ជកម្មសេរីទ្វេភាគី (FTA) នៅឆ្នាំនេះ ដោយមានគោលដៅបញ្ចប់សេចក្តីព្រាងនៅចុងឆ្នាំនេះ។

ការចរចាលើកទី១ រវាងប្រទេសទាំងពីរ បានធ្វើឡើងក្នុងខែកក្កដា ការចរចារជុំទី២ ចាប់ពីថ្ងៃទី៣១ ខែសីហា ដល់ថ្ងៃទី២ ខែកញ្ញា និងកិច្ចប្រជុំលើកទី៣ នៅដើមខែតុលាកន្លងមនេះ។

មន្ត្រីជាន់ខ្ពស់របស់កូរ៉េត្បូងមួយរូបបាននិយាយថា “កិច្ចព្រមព្រៀងពាណិជ្ជកម្មសេរីជាមួយប្រទេសកម្ពុជា នឹងអនុញ្ញាតឱ្យក្រុមហ៊ុនកូរ៉េខាងត្បូង នូវការចូលទៅកាន់ទីផ្សារកម្ពុជាដែលកំពុងរីកចម្រើន”។
ប្រទេសកម្ពុជា បានបង្ហាញអត្រាកំណើនសេដ្ឋកិច្ច ប្រចាំឆ្នាំជាង៧ភាគរយចាប់តាំងពីឆ្នាំ២០១១ និងមានសក្តានុពលកំណើនខ្ពស់ ដោយសារប្រហែល៧២ភាគរយនៃប្រជាជនមានអាយុក្រោម៣៥ឆ្នាំ។

កូរ៉េខាងត្បូង និងកម្ពុជា បានចាប់ផ្តើមការសិក្សារួមគ្នាស្តីពី កិច្ចព្រមព្រៀងពាណិជ្ជកម្មសេរីពីខែមករា ដល់ខែឧសភា ឆ្នាំនេះ ដោយប្រកាសជាផ្លូវការពីការចាប់ផ្តើមកិច្ចចរចាកិច្ចព្រមព្រៀងពាណិជ្ជកម្មសេរីក្នុងខែកក្កដា។
ពាណិជ្ជកម្មទ្វេភាគី មានទំហំទឹកប្រាក់ដល់ ១,០៣ពាន់លានដុល្លារក្នុងឆ្នាំ២០១៩ កើនឡើង៦ ភាគរយបើប្រៀបធៀបទៅនឹងឆ្នាំ២០១៨ ។ ការនាំចេញបានកើនឡើង ៥,៥ ភាគរយដល់៦៩៧ លានដុល្លារ ដែលធ្វើឲ្យកម្ពុជាក្លាយជាទិសដៅនាំចេញធំទី៥៨ របស់កូរ៉េខាងត្បូង។

ទីក្រុងសេអ៊ូល បានយកចិត្តទុកដាក់ ក្នុងការជំរុញទំនាក់ទំនងជាយុទ្ធសាស្ត្រ និងសេដ្ឋកិច្ចជាមួយដៃគូអាស៊ី ដែលកំពុងរីកចម្រើន ក្នុងកិច្ចខិតខំប្រឹងប្រែង ដើម្បីកាត់បន្ថយការពឹងផ្អែកយ៉ាងខ្លាំងរបស់ខ្លួនលើប្រទេសចិន និងសហរដ្ឋអាមេរិក៕ Yonhap News