រាជរដ្ឋាភិបាលសម្រេចចេញអនុក្រឹត្យស្ដីពីលក្ខខណ្ឌ និងនីតិវិធីនៃការត្រួតពិនិត្យ និងបញ្ជាក់សំណង់ ដើម្បីពង្រឹងវិស័យសំណង់

ដោយ ៖ រ៉ាណេត

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានសម្រេចចេញអនុក្រឹត្យស្ដីពីលក្ខខណ្ឌ និងនីតិវិធីនៃការត្រួតពិនិត្យ និងបញ្ជាក់សំណង់ ដែលមានវិសាលភាពអនុវត្តចំពោះសំណង់គ្រប់ប្រភេទលើកលែងតែប្រភេទសំណង់ដែលមានកំណត់ក្នុងលិខិតបទដ្ឋានគតិយុត្តដោយឡែក ដើម្បីជួយជំរុញការវិនិយោគនៅក្នុងវិស័យសំណង់ និងទីផ្សារអចលនទ្រព្យប្រកបដោយប្រសិទ្ធភាពផ្នែកសេដ្ឋកិច្ច និងសង្គម។

នៅក្នុងអនុក្រឹត្យដែលត្រូវបានផ្សព្វផ្សាយនៅល្ងាចថ្ងៃទី១ ខែមករា ឆ្នាំ២០២១ មានចំនួន២២ទំព័រ ១២ជំពូក និង៥៩មាត្រា បានបញ្ជាក់យ៉ាងលម្អិតទៅលើសមត្ថកិច្ចនៃការគ្រប់គ្រង ការអនុញ្ញាត និងការសម្រេចផ្សេងៗពាក់ព័ន្ធទៅនឹងសកម្មភាពនៃការសាងសង់ និងអភិវឌ្ឍសំណង់ផ្សេងគ្រប់ប្រភេទដែលស្ថិតនៅក្រោមក្រសួងរៀបចំដែនដី នគរូបនីយកម្ម និងសំណង់ ដែលមានលោកឧបនាយករដ្ឋមន្ត្រី ជា សុផារ៉ា ជារដ្ឋមន្ត្រី។

នៅក្នុងអនុក្រឹត្យបានបញ្ជាក់ពីបទប្បញ្ញត្តិទូទៅ ស្ថិតនៅក្នុងមាត្រា១បានបញ្ជាក់ថា អនុក្រឹត្យនេះបានកំណត់ពីប្រភេទ និងកម្រិតនៃអាជ្ញាបណ្ណត្រួតពិនិត្យ និងបញ្ជាក់សំណង់ លក្ខខណ្ឌ និងនីតិវិធីនៃការផ្តល់ ការបញ្ចប់សុពលភាព ការបន្តសុពលភាព ការព្យួរ និងការដកហូតអាជ្ញារបណ្ណត្រួតពិនិត្យ និងបញ្ជាក់សំណង់ ក៏ដូចជាលក្ខខណ្ឌនៃការអនុវត្តការងារត្រួតពិនិត្យ និងបញ្ជាក់សំណង់ក្នុងគោលបំណងសំខាន់ៗដូចជា ធានាបាននូវគុណភាព សន្ដិសុខ សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ និងសាធារណៈជន។

បន្ថែមពីនេះនៅមានធានាដល់ការងារសិក្សាគម្រោងប្លង់ ការងារសាងសង់ និងការងាររុះរើអនុលោមតាមបទដ្ឋានគតិយុត្ត និងបទដ្ឋានបច្ចេកទេសសំណង់។ ធានាគណនេយ្យភាព និងប្រសិទ្ធភាពក្នុងការប្រកបវិជ្ជាជីវៈ និងការប្រកបអាជីវកម្មក្នុងវិស័យសំណង់ បង្កើនជំនឿទុកចិត្តរបស់សាធារណៈជនលើសំណង់ រួមជាមួយនឹងការជំរុញការវិនិយោគនៅក្នុងវិស័យសំណង់ និងទីផ្សារអចលនទ្រព្យប្រកបដោយប្រសិទ្ធភាពផ្នែកសេដ្ឋកិច្ច និងសង្គម។

នៅក្នុងអនុក្រឹត្យដដែលក៏បានបញ្ជាក់ថា វិសាលភាពអនុវត្តអាចប្រព្រឹត្តទៅចំពោះសំណង់គ្រប់ប្រភេទ លើកលែងតែប្រភេទសំណង់ដែលមានកំណត់នៅក្នុងលិខិតបទដ្ឋានគតិយុត្តដោយឡែក៕

ចំណេះដឹងពាណិជ្ជកម្ម! អ្វីជានិតិវិធីនៃការនាំចូលទំនិញ?

ដោយវឌ្ឍនៈ

ភ្នំពេញៈ ទំនិញនាំចូលទាំងអស់ ត្រូវបានរាយការណ៍នៅការិយាល័យគយ ឬទីកន្លែងផ្សេងទៀត ទៅតាមការកំណត់របស់នាយកទីចាត់ការគយនិងរដ្ឋាករ។

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ត្រូវចេញប្រកាសកំណត់ពេលវេលា របៀបរបបតម្រូវការឯកសារ កាលៈទេសៈ និងការលើកលែងនានា ពាក់ព័ន្ធនឹងការរាយការណ៍ ពីទំនិញនាំចូល(មាត្រា ១០) ។

គ្មានជនណាម្នាក់អាចរើទំនិញចេញ ពីមធ្យោបាយដឹកជញ្ជូនពេលមកដល់កម្ពុជាបានទេ មុនពេលដែលទំនិញទាំងនេះ ត្រូវបានរាយការណ៍ដល់គយស្របតាមច្បាប់នេះ លើកលែងតែក្នុងករណីដែលសុវត្ថិភាព មធ្យោបាយដឹកជញ្ជូនទំនិញ ជននានាលើមធ្យោបាយដឹកជញ្ជូន ឬតតិយជនផ្សេងទៀតត្រូវបានគំរាម កំហែងក្នុងល័ក្ខខ័ណ្ឌមានអាសន្ន ដូចចែងក្នុងប្រកាសរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ (មាត្រា ១២) ។

រដ្ឋបាលគយអាចអនុញ្ញាត ឲ្យទំនិញដូចមានចែងក្នុងមាត្រា១០ នៃច្បាប់នេះយកចេញពីកន្លែងបំពេញ បែបបទបញ្ចេញទំនិញពីគយមុនពេលបង់ពន្ធ អាករ និងកម្រៃនានាបន្ទាប់ពីបានបំពេញទម្រង់ការគយរួច និងនៅក្រោមការត្រួតពិនិត្យគយ ក្នុងគោលបំណង

ធ្វើសន្និធិគយបណ្តោះអាសន្ន
ធ្វើសន្និធិគយមានដែនកំណត់
ដឹកជញ្ជូនបន្តក្នុងរង្វង់ ឬតាមដែនគយ ឆ្ពោះទៅគម្យដ្ឋានតាមតម្រាយផ្លូវស្របច្បាប់ និងក្នុងរយៈពេលកំណត់ដោយគយរួមមាន ការឆ្លងកាត់ ការផ្ទេរមធ្យោបាយដឹកជញ្ជូន ឬ ការដឹកជញ្ជូនឆ្ពោះទៅកាន់មកពីឬរវាងការិយាល័យ និងភណ្ឌាគារគយនានា (មាត្រា ១៣) ។

ទំនិញនាំចូលទាំងឡាយ អាចទទួលបានការអនុញ្ញាត ដោយរដ្ឋបាលគយឲ្យយកចេញតាមរបប ប្រវេសន៍កាលិក ប្រសិនបើក្នុងពេលនាំចូលអាចត្រូវបានបង្ហាញថា ទំនិញទាំងនោះនឹងត្រូវនាំចេញទៅវិញ។ ទំនិញនាំចូលបណ្តោះអាសន្ន ត្រូវស្ថិតនៅក្រោមការត្រួតពិនិត្យគយ រហូតដល់ពេលដែលល័ក្ខខ័ណ្ឌផ្សេងៗ តាមរបបប្រវេសន៍កាលិកត្រូវបានបំពេញរួច(មាត្រា ១៥)៕

ការចុះបញ្ជីដីធ្លីលក្ខណៈជាប្រព័ន្ធនៅខេត្តក្រចេះសម្រេចបានជាង ៧០ភាគរយ លើផ្ទៃដីសរុបជិត ៨០ម៉ឺនហិកតា

ដោយៈ រ៉ាណេត

ក្រចេះ គិតត្រឹមដំណាច់ខែធ្នូ ឆ្នាំ ២០២០ ជាលទ្ធផលនៃការចុះបញ្ជីដីធ្លីមានលក្ខណៈជាប្រព័ន្ធនៅក្នុងខេត្តក្រចេះ សម្រេចបានប្រមាណ ៧០ភាគរយ នៅលើផ្ទៃដីសរុបជិត ៨០ម៉ឺនហិកតា។

ការចុះបញ្ជីដីធ្លីជាប្រព័ន្ធនៅខេត្តក្រចេះ ក្នុងឆ្នាំ២០២០នេះ សម្រេចបានជាង៧០ភាគរយហើយ ដែលជួយសម្រួលដល់ការរស់នៅ របស់ប្រជាពលរដ្ឋឱ្យមានទំនុកចិត្តខ្ពស់ ជាពិសេសមានបណ្ណកម្មសិទ្ធិដីធ្លី ស្របច្បាប់ជួយកាត់បន្ថយវិវាទដីធ្លីផ្សេង។

លោកកៅ ម៉ាឌីឡែន ប្រធាន មន្ទីររៀបចំដែនដីនគរូបនីយ កម្មសំណង់ និងសុរិយោដីខេត្តក្រចេះបានឱ្យដឹងថា មន្ទីរបានអនុវត្តការងារចុះបញ្ជីដីធ្លីមានលក្ខណៈ ជាប្រព័ន្ធជូនប្រជាពលរដ្ឋចាប់តាំងពីឆ្នាំ២០១៤ រហូតមកដល់បច្ចុប្បន្ន គឺបានផ្តល់បណ្ណកម្មសិទ្ធិជូនប្រជាពលរដ្ឋចំនួន២១ភូមិ ក្នុងសង្កាត់ចំនួន៤និងឃុំចំនួន៥ របស់ស្រុកចំនួន៣និងក្រុង១ ដែលសរុបមាន១៥,៩៨៨បណ្ណ ស្មើនឹង១៣,៨០១គ្រួសារ លើផ្ទៃដីចំនួន៧៨២,២៦៥ ហិកតា។

លោកបន្តថា “មន្ទីរមានផែនការយ៉ាងច្បាស់លាស់ ក្នុងការចុះបញ្ជីដីធ្លីជូនប្រជាពលរដ្ឋដោយក្នុង១ឆ្នាំ សម្រេចឱ្យបាន១ម៉ឺនក្បាលដី ហើយឆ្នាំ២០២០នេះ សម្រេចជាង៧០០០ក្បាលដី បើទោះបីស្ថិតក្នុងបរិបទជំងឺកូវីដ-១៩ក៏ដោយ ក៏មិនមានការរាំងស្ទះដល់ក្រុមការងារឡើយ” ។

លោកបន្តទៀតថា ការចុះបញ្ជីដីធ្លីនេះ គឺបានជួយសម្រួលដល់ជីវភាពប្រជាពល រដ្ឋបានជាច្រើន ដូចជា មានកន្លែងរស់នៅមួយដែលពិតប្រាកដ អាចប្រកបមុខរបរចិញ្ចឹមជីវិតងាយស្រួល អាស្រ័យផលលើផ្ទៃដី ដែលជាកម្មសិទ្ធិរបស់គាត់ផ្ទាល់ពិសេសកាត់បន្ថយនូវទំនាស់ដីធ្លីដែលកើតឡើង ដោយសារការរស់នៅលើដី ដែលមិនច្បាស់លាស់ និងគ្មានបណ្ណកម្មសិទ្ធិជាដើម ។ ម្យ៉ាងទៀត គឺមានបណ្ណកម្មសិទ្ធិស្រប ច្បាប់អាចយកទៅខ្ចីលុយធ្វើដើមទុនរកស៊ីបានទៀតផង។

លោកបញ្ជាក់ថា ពាក់ព័ន្ធរឿងចុះបញ្ជីដីធ្លីជាប្រព័ន្ធនេះ យើងមានលក្ខណៈពិសេសមួយ គឺយើងចុះទៅដល់ទីតាំង យើងចុះបញ្ជីមួយភូមិម្តងៗ ហើយយើងឃើញថាប្រជាពលរដ្ឋនៅខេត្តក្រចេះនេះ គឺលោកសប្បាយចិត្ត ហើយលោកជំរុញឱ្យយើងខ្ញុំឱ្យទៅចុះបញ្ជីនៅភូមិរបស់លោក ដោយសារនៅទីនេះយើងមានតែ៣ក្រុម យើងចុះបញ្ជីបានតែ៣ភូមិ ក្នុងខណ:ដែលមានភូមិជាច្រើនបានស្នើសុំ។ គាត់យល់ដឹងពីការប្រើប្រាស់បណ្ណកម្មសិទ្ធិដីធ្លីនេះ គឺធានាដោយច្បាប់។

ការចុះធ្វើសកម្មភាពវាស់វែង ចុះបញ្ជីដីធ្លីជាលក្ខណៈប្រព័ន្ធនេះ ត្រូវសហការជាមួយអាជ្ញាធរមូល ដ្ឋានគ្រប់ថ្នាក់ ដើម្បីកំណត់ទិសដៅ ហើយបញ្ជូនរបាយ ការណ៍មកខេត្ត ឱ្យបានទាន់ពេលវេលា ដើម្បីត្រួតពិនិត្យ៕

រដ្ឋាភិបាលថៃគ្រោងធ្វើវិសោធនកម្មច្បាប់ថ្មីដើម្បីទាក់ទាញវិនិយោគក្រៅប្រទេស

ដោយៈវុត្ថា

បាងកកៈ រដ្ឋាភិបាលថៃគ្រោងធ្វើវិសោធនកម្ម បទប្បញ្ញត្តិផ្សេងៗក្នុងវិស័យអន្តោប្រវេសន៍ អាជីវកម្មបរទេស និងសម្រួលដល់ផ្នែកផ្សេងទៀត ដើម្បីទាក់ទាញការវិនិយោគផ្ទាល់ពីបរទេសកាន់តែច្រើននៅឆ្នាំក្រោយនេះ។

គេហទំព័រ hrmasia.com បានចុះផ្សាយថា ការធ្វើវិសោធនកម្មច្បាប់នេះ ក៏នឹងគ្របដណ្ដប់លើពលករបរទេស ពន្ធពិសេស ការធ្វើផែនការទីក្រុង ជីវចម្រុះ អាជីវកម្មភាពយន្ត និងវិស័យថាមពលរួមទាំងហេដ្ឋារចនាសម្ព័ន្ធ។

គេហទំព័រនេះបន្តថា រដ្ឋាភិបាលថៃកំពុងកំណត់គោលដៅ ដើម្បីសម្រេចឱ្យបានយ៉ាងហោចណាស់៨៥% នៃការធ្វើវិសោធនកម្ម ដែលបានស្នើឡើងក្រោមគ្រោងការណ៍“regulatory guillotine” នៅឆ្នាំក្រោយ។

គណៈកម្មការអភិវឌ្ឍន៍វិស័យសាធារណៈ បានដឹកនាំបេសកកម្មធ្វើជំនួញ នៅប្រទេសថៃឱ្យកាន់តែងាយស្រួលជាងសព្វថ្ងៃ។

ច្បាប់ និងបទប្បញ្ញត្តិពាក់ព័ន្ធនាពេលបច្ចុប្បន្ន បានដាក់បន្ទុកអ្នកធុរកិច្ច និងអ្នកប្រើប្រាស់ឱ្យមានចំណូល ប្រហែល១៤២ពាន់លានបាត (៤,៧ ពាន់លានដុល្លារ) ជារៀងរាល់ឆ្នាំ។

វិទ្យាស្ថានស្រាវជ្រាវអភិវឌ្ឍន៍ថៃបានព្យាករថា ការធ្វើវិសោធនកម្មច្បាប់ និងបទប្បញ្ញត្តិនានានឹងកាត់បន្ថយការចំណាយប្រចាំឆ្នាំ ៥៥,២% ឬ១៣៣ពាន់លានបាត (៤,៤ ពាន់លានដុល្លារអាមេរិក) សម្រាប់អតិថិជន និង២២,៤% ឬ៩ពាន់លានបាត (២៩៩ លានដុល្លារអាមេរិក) សម្រាប់អាជីវកម្ម។

រដ្ឋាភិបាលសង្ឃឹមថា ការកែប្រែទាំងនេះនឹងជួយលើកប្រទេសថៃ នៅក្នុងចំណាត់ថ្នាក់ “ភាពងាយស្រួលក្នុងការធ្វើធុរកិច្ច” របស់ធនាគារពិភពលោកពីចំណាត់ថ្នាក់ទី២១ របស់ខ្លួនទៅក្នុងចំណាត់ថ្នាក់១០ ។

អាជីវកម្មបរទេស និងក្នុងស្រុកបានត្អូញត្អែរជាយូរមកហើយ អំពីបន្ទុកថ្លៃដើមដែលបណ្តាលមកពីការអនុលោម តាមការិយាធិបតេយ្យថៃ ប៉ុន្តែរដ្ឋាភិបាលយឺតក្នុងការលុបឈ្មោះ។

កាសែត The Nation ប្រទេសថៃបាននិយាយថា វិនិយោគិនបរទេសបានជំរុញឲ្យ មានច្បាប់មិត្តភាពស្តីពី ជនអន្តោប្រវេសន៍អាជីវកម្មបរទេសនិងពន្ធ៕

ព្រលានយន្តហោះលំដាប់អន្តរជាតិចំនួន៣របស់កម្ពុជានឹងបញ្ចប់សាងសង់នៅឆ្នាំក្រោយ និងឆ្នាំ២០២៣

ដោយៈវុត្ថា

ភ្នំពេញៈ ព្រលានយន្តហោះរបស់កម្ពុជចំនួន២ ដែលមានទុនវិនិយោគរាប់ពាន់លានដុល្លារអាមេរិក នឹងបញ្ចប់ការសាងសង់ និងដាក់ឱ្យដំណើរការនៅក្នុងឆ្នាំ ២០២៣ ខាងមុខនេះ និងមួយទៀតនឹងបញ្ចប់នៅមុនបណាច់ឆ្នាំ ២០២១ ដែលនឹងជម្រុញកំណើនសេដ្ឋកិច្ចជាតិ ការបង្កើនការងារ និងប្រាក់ចំណូលជូនប្រជាពលរដ្ឋ និងរួមចំណែកការអភិវឌ្ឍន៏សង្គមប្រកបដោយចីរភាព។

១) គម្រោងអាកាសយនដ្ឋានអន្តរជាតិសៀមរាប

គម្រោងសាងសង់អាកាសយានដ្ឋានអន្តរជាតិថ្មី ក្នុងខេត្តសៀមរាប បានសម្រេចបានចំនួន៣៥%ហើយ និងគ្រោងបញ្ចប់នៅថ្ងៃទី១៤ ខែមិនា ឆ្នាំ២០២៣ខាងមុខ ដោយការសាងសង់ព្រលាននេះ បានចាប់ផ្តើចាប់តាំងពីថ្ងៃទី១៥ ខែមិនា ឆ្នាំ២០២០ មកម្លេះ ដែលមានរយៈពេល៣៦ខែ ដែលសាងសង់ដោយក្រុមហ៊ុន Angkor International Airport Investment (Cambodia) Co., Ltd.។

ក្រុមហ៊ុនសាងសង់អាកាសយានដ្ឋានទាំងមូលនេះ ( Overall Schedule)បាន រាយការណ៍ អំពីវឌ្ឍនៈភាពគម្រោងសាងសង់អាកាសយានដ្ឋាន ឆ្នាំ២០២០ ( Project Progressin 2020) ផែនការសាងសង់អាកាសយានដ្ឋានឆ្នាំ២០២១ (Construction Plan for 2021) និងវិធានការត្រួតពិនិត្យ និងការបង្ការជម្ងឺឆ្លងកូវិដ១៩ ចំពោះបុគ្គលិក និងកម្មករដែលធ្វើការក្នុង។

ការសាងសង់ព្រលានយន្តហោះអន្តរជាតិសៀមរាបថ្មីនេះ នឹងចំណាយទុនវិនិយោគប្រមាណ៩០០លានដុល្លារ ដែលនឹងសាងសង់លើផ្ទៃដីប្រមាណ៧០០ហិកតា រួមជាមួយនឹងផ្ទៃដីនៃតំបន់សេដ្ឋកិច្ចពិសេសចំនួន១០០០ហិកតាទៀតផង។

២) គម្រោងសាងសង់អាកាសយានដ្ឋានអន្តរជាតិភ្នំពេញថ្មី

គម្រោងអាកាសយានដ្ឋានអន្តរជាតិភ្នំពេញថ្មី មានទីតាំងស្ថិតនៅក្នុង ស្រុកកណ្តាលស្ទឹង ស្រុកស្អាងខេត្តកណ្តាល និងស្រុកបាទី ខេត្តតាកែវ ស្ថាបនាលើដីទំហំប្រមាណ២ ៦០០ហិកតា មានបណ្តោយប្រមាណ៦គីឡូម៉ែត្រ និងទទឹងប្រមាណ៤គីឡូម៉ែត្រ។ ដំណើការ នៃការសាងសង់ព្រលានយានដ្ឋាន អន្តរជាតិភ្នំពេញថ្មីនេះ នឹងរួចរាល់នៅឆ្នាំ២០២៣ខាងមុខនេះ។

សមត្ថភាពអាកាសយានដ្ឋាន បន្ទាប់ពីសាងសង់រួច៖ឆ្នាំ២០២៣ ទទួលអ្នកដំណើរ ១៣លាននាក់ ឆ្នាំ២០៣០ ទទួលអ្នកដំណើរ៣០លាននាក់ ឆ្នាំ២០៥០ ទទួលអ្នកដំណើរ ៥០លាននាក់។

ព្រលានយន្តហោះថ្មីនេះ វិនិយោគក្នុងទឹកប្រាក់ប្រមាណ១៥០០លានដុល្លារ ដែលជាប្រភេទ 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្សរហូតដល់ Airbus A380-800 និងយន្តហោះ Boeing 747-800 ចុះចតបាន។

ក្រុមហ៊ុនវិនិយោគមានមហិច្ឆិតា អភិវឌ្ឍន៍ជាព្រលានយន្តហោះថ្មីនេះឲ្យធំ និងទំនើបជាងគេនៅតំបន់អាស៊ី។

៣) គម្រោងអាកាសយានដ្ឋានតារាសាគរខេត្តកោះកុង

គម្រោងអាកាសយានដ្ឋានតារាសាគរ មានទីតាំងស្ថិតនៅចន្លោះស្រុកថ្មបាំង និងស្រុកបទុមសាគរ ខេត្តកោះកុងត្រូវបានវិនិយោគការសាងសង់ ដោយក្រុមហ៊ុនចិន Union Development Group (UDG) សហការជាមួយក្រុមហ៊ុនMY និងក្រុមហ៊ុនស៊ីឈួន ហួយស៊ីងគ្រុប។

អាកាសយានដ្ឋានអន្តរជាតិតារាសាគរនេះ នឹងបើកឱ្យហោះហើរសាកល្បងមុន ខែមីនា ឆ្នាំ២០២១ ។ ការរៀបចំពេលវេលាសំខាន់ៗ របស់គម្រោងសាងសង់អាកាសយាន ដ្ឋានរួមមាន៖ ទី១- ការរៀបចំធ្វើសុពលភាពហោះហើរ ( Flight Validation) នឹងគ្រោងបញ្ចប់នៅខែធ្នូ ឆ្នាំ២០២០ ទី២- បញ្ចប់ សុពលភាពហោះហើរ ( Flight Validation)នឹងធ្វើនៅខែ កុម្ភៈ ឆ្នាំ២០២១ ។

ទី៣- ទទួលបញ្ចប់គម្រោងសាងសង់អាកាសយានដ្ឋាន មុនថ្ងៃទី២០ ខែមីនា ឆ្នាំ២០។ ទី៤- ការធ្វើការហោះហើរសាកល្បងនៅ មុនថ្ងៃទី៣១ ខែមីនា ឆ្នាំ២០២១ ។

ទី៥ – បំពេញទទួលបញ្ចប់គម្រោងអាកាសយានដ្ឋានផ្សេងៗទៀត មុនថ្ងៃទី៣០ ខែមេសា ឆ្នាំ២០២១ ទី៦- ទទួលគម្រោងអាកាសយានដ្ឋាន ដោយរដ្ឋលេខាធិការដ្ឋានអាកាសចរស៊ីវិល មុនថ្ងៃទី៣០ ខែឧសភា ឆ្នាំ២០២១ ។

ទី៧- ការបំពេញលក្ខខណ្ឌប្រតិបត្តិការអាកាសយានដ្ឋាន (សុំវិញ្ញាបនបត្រប្រតិបត្តិការអាកាសយានដ្ឋាន) និងចាប់ផ្តើមប្រតិបត្តិការអាកាសយានដ្ឋាន នាពាក់កណ្តាលឆមាសទី២ ឆ្នាំ២០២១ ។

តាមផែនការគម្រោងព្រលានយន្តហោះនេះ នឹងត្រូវចំណាយទឹកប្រាក់២០០លានដុល្លារ ដោយគម្រោងទាំងមូល រួមមាន ការស្ថាបនាផ្លូវសម្រាប់យន្តហោះរត់ ដែលមានប្រវែងបណ្តោយ៣២០០ម៉ែត្រ និងទទឹង៦០ម៉ែត្រ និងស្ថានីយ៍អ្នកដំណើរ។ ក្រោយសាងសង់រួច អាកាសយានដ្ឋានអន្តរជាតិតារាសាគរ នឹងអនុញ្ញាតឱ្យយន្តហោះធុនយក្សប្រភេទ ប៊ូអ៊ីង៧៧៧ និងអ៊ែរប៊ឹស A៣៤០ ចុះចតបាន៕

សារជូនពរឆ្នាំថ្មីពីផ្សារបៃតងស្រស់ ដល់អតិថិជនជាទីស្រលាញ់ ជាមួយនឹងស្នាមញញឹមនិងជោគជ័យថ្មី

ដោយ មករា

ភ្នំពេញៈ ជាមួយនឹងការលើកទឹកចិត្តដល់កសិករកម្ពុជា ឲ្យមានទីផ្សារលក់ផលិតផលរបស់ខ្លួន និងរួមចំណែកលើកកំពស់ជីវភាពសហគមន៍ “ផ្សារបៃតងស្រស់” បាននិងកំពុងរួមចំណែកជាមួយរដ្ឋាភិបាល ក្នុងការបង្កើតការងារ និងលើកស្ទួយជីវភាពប្រជាពលរដ្ឋនៅតាមតំបន់ជនបទ។

ឈរលើទស្សនវិស័យចង់ឲ្យប្រជាពលរដ្ឋ មានម្ហូបអាហារ បន្លែ ផ្លែឈើ ត្រីសាច់់ធម្មជាតិទទួនទាន ទទួលបានសុខភាពល្អ សុវត្ថិភាព ផ្សារបៃតងស្រស់ បាននិងកំពុងដើរតួនាទីជាអន្តរការី ក្នុងការនាំាំមកនូវផលិតផល កសិផល ម្ហូបអាហារពីសហគមន៍មកជូនដល់អ្នកប្រើប្រាស់ ជាមួយផលិតផលមានគុណភាព សុវត្ថិភាព និងរសជាតិឆ្ងាញ់ដល់អតិថិជន។

រហូតមកទល់ពេលនេះ ផ្សារបៃតងស្រស់ បានដំណើរការរយៈពេល៥ឆ្នាំមកហើយ និងបានទទួលបានការគាំទ្រ កើនឡើងជាប្រចាំពីអតិថិជន ដោយសារយើងបានធ្វើការជាមួយម្ចាស់ចំការ អ្នកចិញ្ចឹមមាន់ ទា ត្រី បន្លែ ដែលសុទ្ឋតែដាំដុះនៅសហគមន៍ជាផលិតផលបែបសរីរាង្គ។ អ្វីកាន់តែពិសេសបន្លែ ផ្លែឈើ ដែលបានដាក់លក់នៅផ្សារបៃតងស្រស់ សុទ្ឋតែបានឆ្លងកាត់មណ្ឌលត្រួតពិនិត្យចំណីអាហារ ដែលស្ថិតក្រោមចំណុះក្រសួងកសិកម្ម រុក្ខាប្រមាញ់ និងនេសាទ ស្ថិតក្រោមគំរោងជំនួយពីប្រទេសជប៉ុន ដែលផលិតផលឆ្លងកាត់មណ្ឌលត្រួតពិនិត្យនេះ សុទ្ឋតែអាចនាំចេញទៅកាន់ប្រទេសនានាបាន។

អ្វីដែលផ្សារធ្វើការជាមួយអ្នកផលិត កសិករ អ្នកចិញ្ចឹមសត្វ បានធ្វើឡើងដោយគោរពតាមគោលការណ៍ច្បាស់លាស់ លើការត្រួតពិនិត្យ តាមដាន ពិសេសមានការប្តេជ្ញាចិត្តពីប្រជាកសិករនៅសហគមន៍មូលដ្ឋានផ្ទាល់ ក្នុងការអនុវត្តន៍ស្តង់ដាអនាម័យ និងមិនប្រើប្រាស់សាធារធាតុគីមី ដែលនាំាំឲ្យប៉ះពាល់ដល់សុខភាពអ្នកបរិភោគ។

គុណតម្លៃរបស់ផ្សារ គឺចង់យើងផ្តល់ឲ្យអតិថិជននូវផលិតផល និងសេវាកម្មល្អបំផុត មានសុវត្ថិភាពបំផុតដល់អតិថិជន។

ជាមួយនឹងការទទួលបានការគាំទ្រនេះ ផ្សារបៃតងស្រស់ នឹងផ្តល់នូវកាដូនូវកញ្ចប់លើកទឹកចិត្តជាថវិកា តាមរយៈ Vouchers ដែលអតិថិជនទទួលបានតម្លៃលើកទឹកចិត្ត(ការបញ្ចុះតម្លៃ) ដើម្បីជាការថ្លែងអំណរគុណជាពិសេសដល់អតិថិជន ដែលបានគាំទ្រផ្សារកន្លងមក និងអតិថិជនថ្មី។

ធ្មេចបើកៗ ឆ្នាំ២០២១បានឈានមកដល់ ផ្សារបៃតងស្រស់ ដែលតំណាងឲ្យកសិករនៅក្នុងសហគមន៍ សមាគម បន្លែ ផ្លែឈើ ត្រីសាច់ សូមថ្លែងអំណរគុណដល់អតិថិជនជាទីស្រលាញ់ ដែលបានជួយគាំទ្រនូវផលិតផលរបស់យើងខ្ញុំកន្លងមកនេះ។ ការគាំទ្ររបស់លោក អ្នកពិតជាបានផ្តល់នូវកម្លាំងចិត្ត ការតាំងចិត្ត សេចក្តីអំណរនិងជួយដល់សេដ្ឋកិច្ចគ្រួសារ និងសហគមន៍ឲ្យកាន់តែមានភាពប្រសើរឡើង។

នាឱកាសឆ្នាំថ្មីមកដល់ អ្នកតំណាងតំណាងសហគមន៍ផ្សារបៃតងស្រស់ សូមគោរពជូនពរអតិថិជនគ្រប់រូប សូមទទួលបានសុខសំណាងល្អ សុវត្ថិភាពក្នុងការធ្វើដំណើរ ជួបប្រទះតែសេចក្តីសុខ គ្រប់ក្រុមគ្រួសារជាមួយនឹងអំណរឆ្នាំថ្មី និងប្រាថ្នាអ្វីៗបានសម្រេចជោគជ័យគ្រប់បំណង ពិសេសជួបប្រទះតែនឹងពុទ្ឋពរទាំងបួនប្រការ គឺអាយុ វណៈ សុខៈ និងពលៈកុំបីឃ្លៀងឃ្លាតឡើយ៕

សញ្ញាវិជ្ជមានៈ ទីបំផុតមេដឹកនាំចិន និងសហភាពអឺរ៉ុបសម្រេចបានកិច្ចព្រមព្រៀងវិនិយោគដ៏ធំ

ដោយៈ សុខុម

អន្តរជាតិៈ នៅទីបំផុតប្រទេសចិន និងសហភាពអឺរ៉ុប សម្រេចបានកិច្ចព្រមព្រងព្រៀងវិនិយោគដ៏សំខាន់មួយ ហើយកាលពីរាត្រីថ្ងៃពុធ ទី៣០ ធ្នូម្សិលម៉ិញនេះ។

កិច្ចព្រមព្រៀងនេះ ទំនងជាធ្វើឱ្យសហរដ្ឋអាមេរិក មិនសប្បាយចិត្តនេះនឹងផ្ដល់លទ្ធភាព ចូលទៅកាន់ទីផ្សារកាន់តែទូលំទូលាយសម្រាប់ភាគីទាំង២ និងអនាគតកាន់តែត្រចះត្រចង់ សម្រាប់កិច្ចសហប្រតិបត្តិការចិន-សហភាពអឺរ៉ុប។ នេះបើយោងតាមប្រធានាធិបតីចិន លោក ស៊ី ជីនភីង បានបញ្ជាក់ក្នុងថ្ងៃដដែល។

នៅក្នុងលេខចុះផ្សាយនៅថ្ងៃទី៣១ ធ្នូ កាសែត China Daily បានដកស្រង់សម្ដីក្រុមអ្នកចរចាដូច្នេះថា កិច្ចព្រមព្រៀងនេះបានឈានដល់ការព្រមព្រៀងគ្នា “ជាគោលការណ៍” ហើយ។

ក្នុងសន្និសីទវីដេអូ ឬVideo Conference លោកស្រីអធិការបតីអាល្លឺម៉ង់ Angela Merkel)ប្រធានាធិបតីបារាំង លោកEmmanuel Macron ប្រធានក្រុមប្រឹក្សាអឺរ៉ុប លោក Charles Michel ប្រធានគណៈកម្មការអឺរ៉ុប លោកស្រីUrsula von der Leyen ប្រធានាធិបតីចិន លោកស៊ី ជីនពីង និងថ្នាក់ដឹកនាំផ្សេងៗទៀតរបស់អឺរ៉ុប បានប្រកាសរួមគ្នា នូវការបិទបញ្ចប់ដំណើរការចរចានេះដោយជោគជ័យ ក្រោយអូសបន្លាយអស់រយៈពេលជាង៧ឆ្នាំ។

លោកស៊ី ជីនពីងបានថ្លែងថា កិច្ចព្រមព្រៀងដែលប្រកបដោយតុល្យភាព គុណភាពខ្ពស់ និងផ្ដល់អត្ថប្រយោជន៍ដល់គ្នាទៅវិញទៅមកនេះ ឆ្លុះបញ្ចាំងពីការប្ដេជ្ញាចិត្ត និងទំនុកចិត្តរបស់ប្រទេសចិន នៅក្នុងការលើកកម្ពស់ការបើកទូលាយកម្រិតខ្ពស់។

លោកបានបន្ថែមថា កិច្ចព្រមព្រៀងនេះ នឹងជួយជំរុញការងើបឡើងនៃសេដ្ឋកិច្ចពិភពលោក ក្នុងសម័យក្រោយការឆ្លងរាតត្បាតវីរុសកូវីដ-១៩ ជួយសម្រួលដល់ពាណិជ្ជកម្ម និងសេដ្ឋកិច្ចពិភពលោក បង្កើនទំនុកចិត្តរបស់សហគមន៍អន្តរជាតិ ចំពោះសកលភាវូបនីយកម្ម និងពាណិជ្ជកម្មសេរី និងជាការរួមចំណែកដ៏ធំ នៅក្នុងការកសាងសេដ្ឋកិច្ចពិភពលោកដែលមានលក្ខណៈបើកទូលាយ។

ការចរចាកិច្ចព្រមព្រៀងវិនិយោគចិន-សហភាពអឺរ៉ុប នេះបានចាប់ផ្តើមនៅខែតុលា ឆ្នាំ២០១៣ ជាមួយនឹងគោលបំណង សម្រេចឱ្យបានកិច្ចព្រមព្រៀងកម្រិតខ្ពស់ ដែលគ្របដណ្តប់ការការពារការវិនិយោគ និងការចូលទៅកាន់ទីផ្សារ។ ភាគីទាំង២បានរៀបចំកិច្ចចរចាជុំទី៣៥ កាលពីដើមខែធ្នូ ឆ្នាំ២០២០។

លោកស៊ី បានធ្វើការកត់សម្គាល់ថា “ប្រទេសចិន ប្ដេជ្ញាបង្កើតគំរូអភិវឌ្ឍន៍ថ្មីមួយដែលនឹងនាំមកនូវឱកាសទីផ្សារច្រើនជាងមុន និងទូលំទូលាយជាងមុនសម្រាប់កិច្ចសហប្រតិបត្តិការជាមួយអឺរ៉ុប និងពិភពលោកទាំងមូល”។លោកបាមសម្តែងសុទិដ្ឋិនិយមថា“ សហភាពអឺរ៉ុប នឹងលើកកម្ពស់ពាណិជ្ជកម្មសេរី និងពហុភាគីនិយម និងបង្កបរិយាកាសធ្វើពាណិជ្ជកម្មបើកទូលាយ ត្រឹមត្រូវ និងមិនរើសអើងសម្រាប់បណ្ដាវិនិយោគិនចិន”។

លោកបានរំលឹកថា ឆ្នាំ២០២០ ជាឆ្នាំដ៏លំបាកសម្រាប់ប្រទេសចិន អឺរ៉ុប ក៏ដូចជាពិភពលោកទាំងមូល ដែលបានបង្កឱ្យមានស្ថានភាពមិនប្រាកដប្រជា ដោយសារតែការ ផ្ទុះវីរុសកូវីដ-១៩ និងការផ្លាស់ប្ដូរយ៉ាងធំសម្បើម មិនធ្លាប់ជួបក្នុងរយៈពេលមួយសតវត្សរ៍មកនេះ។

លោកបានបន្ថែមថា “ប្រទេសចិន និងអឺរ៉ុបបានជម្នះគ្រប់ការលំបាក ហើយសម្រេចបានសមិទ្ធផលជាផ្លែផ្កា នៅក្នុងការពង្រឹងទំនាក់ទំនងទ្វេភាគី”៕

សារជូនពរឆ្នាំថ្មីៈ យើងបានចេញពីចំណុចលំបាកមកកាន់គុណតម្លៃមួយលើវិស័យសារគមនាគមន៍

ដោយ ៖ យិន លាងគង់ស្ថាបនិកនិងអគ្គនាយកគេហទំព័រPropertyarea.asia

ភ្នំពេញៈ ធ្មេចបើកៗ ឆ្នាំ២០២១បានរំកិលមកដល់ ជាមួយនឹងក្តីសង្ឃឹម និងស្នាមញញឹមថ្មី ហើយរីករាយជាមួយនឹងអំណរនៃពន្លឺព្រះទិនករថ្មីសំរាប់ឆ្នាំថ្មី ដែលមនុស្សម្នានៅជុំវិញពិភពលោក មានសុទិដ្ឋិនិយមជាងឆ្នាំ២០២០ដ៏កលយុគ។

ផ្តើមចេញពីដំណើរដ៏លំបាកមួយ ដើរលើផ្លូវរលាក់ ដំណើរយឺត ប៉ុន្តែយើងមិនឈប់ដើរនោះទេ ជាពិសេសយើងនៅតែបន្តផ្តល់ព័ត៌មានពិត ឥតលំអៀង លឿន រហ័ស ឈរលើក្រមសីលធម៌ វិជ្ជាជីវៈ និងគុណតម្លៃនៃក្រមសីលធម៌ជាស្នូលរបស់យើង។

ជាមួយនឹងការមិនបោះបង់ ជាមួយនឹងការហ៊ានប្រឈមមុខនឹងសម្ពាធកើនឡើងពីការប្រកួតប្រជែង យើងនៅតែរក្សាជំហ៊ានឆ្ពោះទៅមុខ ជាមួយទស្សនវិស័យវិជ្ជមាន ដើម្បីរួមចំណែកផ្តល់ព័ត៌មានពិត ប្រឆាំងជាមួយព័ត៌មានក្លែងក្លាយ ដែលរដ្ឋាភិបាលបាននិងកំពុងប្រយុទ្ឋប្រឆាំង។

គេហទំព័រPropertyarea.asia និងfacebook Pageឈ្មោះ Property Area Asiaបានទទួលការគាំទ្រពីមិត្តអ្នកអាន អ្នកស្តាប់ជាតិ និងអន្តរជាតិកើនឡើងជាប្រចាំ ដោយសារការរក្សាបាននូវគុណតម្លៃរបស់យើង។

យើងបានរកឃើញគុណតម្លៃមួយ ប៉ុន្តែយើងមិនដែលមោទនភាព នឹងសមិទ្ឋផលនេះទេ តែយើងបានដាក់សម្ពាធសំរាប់ខ្លួនឯងឲ្យប្រឹងប្រែងថែមទៀត ដើម្បីផ្តល់ជូនអ្នកអាន អ្នកស្តាប់នូវចំណេះដឹង និងបទវិភាគស៊ីជម្រៅ ដើម្បីផ្តល់ជូនអ្នកអាន អ្នកស្តាប់យកទៅពិចារណា ដើម្បីប្រើប្រាស់ជាមូលដ្ឋានចំណេះដឹងប្រចាំថ្ងៃ និងសំរាប់ធ្វើជាមូលដ្ឋានសំរាប់ការវិនិយោគរបស់ខ្លួន។

ជាមួយនឹងការទទួលបានការគាំទ្រពីដៃគូពាណិជ្ជកម្មក្នុងស្រុក និងអន្តរជាតិកើនឡើងជាប្រចាំ នៅឆ្នាំ២០២១នេះ យើងនឹងមានផលិតផលថ្មី តាមរយៈកិច្ចសម្ភាសន៍ពិសេសជាមួយវាគ្មិនជាតិ និងអន្តរជាតិ លើប្រធានបទថ្មីៗទាក់ទងនឹងបច្ចុប្បន្នភាពអចលទ្រព្យនៅកម្ពុជា ដើម្បីពង្រីកការយល់ដឹងដល់សាធារណៈជន ក៏ដូចជារួមចំណែកជាមួយរដ្ឋាភិបាល ក្នុងការលើកស្ទួយបរិយាកាសវិនិយោគនៅកម្ពុជា ឲ្យកាន់តែមានភាពប្រសើរឡើង។

ឆ្នាំថ្មី! ជោគជជ័យថ្មី !ស្វាគមន៍ឆ្នាំ២០២១ សង្ឃឹមយើងលែងភ័យព្រួយដូចឆ្នាំចាស់ សូមគោរពជូនពរដៃគូពាណិជ្ជកម្មទាំងអស់ មិត្តអ្នកអានជាតិ និងអន្តរជាតិជួបប្រទះតែសេចក្តីសុខ សេចក្តីចម្រើន សុវត្ថិភាពក្នុងការធ្វើដំណើរ ជាពិសេសជួបប្រទះនឹងពុទ្ឋពរទាំងបួនប្រការ គឺអាយុ វណ្ណៈ សុខៈ ពលៈកុំបីឃ្លៀងឃ្លាតឡើយ៕

កម្ពុជា-ថៃ កំណត់យកវិស័យអាទិភាពចំនួន៥រួមគ្នា ដើម្បីអភិវឌ្ឍ និងជំរុញកំណើនសេដ្ឋកិច្ច

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលកម្ពុជា និងព្រះរាជាណាចក្រថៃ បានសម្រេចរួមគ្នាដោយកំណត់យកវិស័យអាទិភាពចំនួន៥បន្ថែមទៀតក្នុងការអនុវត្តក្របខណ្ឌកិច្ចសហប្រតិបត្តិការអភិវឌ្ឍន៍សម្រាប់រយៈពេល៣ឆ្នាំបន្ទាប់ ដើម្បីជំរុញការអភិវឌ្ឍ និងទ្រទ្រង់កំណើនសេដ្ឋកិច្ចនៃប្រទេសទាំង២។

គណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍកម្ពុជានៅថ្ងៃទី៣០ ខែធ្នូ ឆ្នាំ២០២០បានយល់ព្រម និងឯកភាពជាមួយរដ្ឋាភិបាលថៃកំណត់យកវិស័យអាទិភាពចំនួន៥បន្ថែមទៀត ដើម្បីដំណើរការអភិវឌ្ឍន៍ និងជំរុញកំណើនសេដ្ឋកិច្ចនៃប្រទេសទាំង២។

ក្រោមវត្តមានរបស់លោក អុឹម សួរ អគ្គលេខាធិការងគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា និងលោកស្រី Pattarat Hongtong អគ្គនាយកទីភ្នាក់ងារសហប្រតិបត្តិការអន្តរជាតិថៃឡង់ដ៍ បានរៀបចំកិច្ចប្រជុំពិសេសរួមគ្នាដើម្បីកំណត់ និងអនុវត្តនូវកិច្ចសហប្រតិបត្តិការបច្ចេកទេសលើកទី១៥ ដោយជាលទ្ធផលបានចាត់បន្ថែមនូវវិស័យអាទិភាពចំនួន៥បន្ថែមទៀត។

កិច្ចសហប្រតិបត្តិការអភិវឌ្ឍន៍កម្ពុជា-ថៃឡង់ដ៍ក្នុងទម្រង់កិច្ចសហប្រតិបត្តិការបច្ចេកទេសក្នុងរយៈពេល៣ឆ្នាំកន្លងមកនេះ(២០១៧-២០១៩) ទទួមបាននូវវឌ្ឍនភាពគួរឱ្យកត់សម្គាល់ ដោយក្នុងនោះបានផ្តោតសំខាន់ទៅលើវិស័យសំខាន់ៗចំនួន៣រួមមាន វិស័យកសិកម្ម វិស័យសុខាភិបាល និងវិស័យអប់រំតាមរយៈការបណ្តុះបណ្តាលវិជ្ជាជីវៈ ការពង្រឹងសមត្ថភាពដល់មន្ត្រីរបស់រាជរដ្ឋាភិបាលកម្ពុជា និងការផ្តល់វគ្គបណ្តុះបណ្តាលរយៈពេលវែង និងខ្លី។

ជាមួយគ្នានេះក៏មានការជំរុញ និងពន្លឿនការអនុវត្តគម្រោងសាងសង់អគារវិទ្យាស្ថានអភិវឌ្ឍន៍មុខជំនាញកម្ពុជា-ថៃ ការសាងសង់អគារកំពស់៣ជាន់សម្រាប់ដេប៉ាតឺម៉ង់ភាសាថៃនៃសាកលវិទ្យាល័យភូមិន្ទភ្នំពេញ និងការសាងសង់អគារក្នុងមណ្ឌលសំចត និងទទួលជនរងគ្រោះដោយសារការជួញដូរមនុស្សនៅខេត្តបន្ទាយមានជ័យ។

ដោយឡែកសម្រាប់វិស័យអាទិភាពចំនួន៥ដែលត្រូវបានកំណត់បន្ថែមសម្រាប់ការអនុវត្តរយៈពេល៣ឆ្នាំបន្ទាប់២០២១-២០២៣ រួមមានការអភិវឌ្ឍន៍សេដ្ឋកិច្ច ការអភិវឌ្ឍន៍សហគមន៍ និងជនបទ ការអភិវឌ្ឍន៍សង្គម វិស័យបរិស្ថាន និងការអភិវឌ្ឍន៍ធនធានមនុស្ស។ បន្ថែមពីនេះ ភាគីថៃក៏បាប្ដេជ្ញាផ្តល់អាហារូបករណ៍ និងវគ្គបណ្តុះបណ្តាលរយៈពេលវែង និងខ្លីសម្រាប់ឆ្នាំ២០២១-២០២៣មកដល់កម្ពុជាផងដែរ៕

អាមេរិក ដំឡើងពន្ធលើគ្រឿងបន្លាស់យន្តហោះ ស្រាបារាំង និងអាល្លឺម៉ង់ ខណៈជម្លោះជាមួយសហភាពអឺរ៉ុបមិនទាន់ចប់

ដោយ ៖ សុខុម

វ៉ាស៊ីនតោន: ក្រុមមន្ត្រីពាណិជ្ជកម្មសហរដ្ឋអាមេរិកបានប្រកាសកាលពីថ្ងៃពុធ ទី៣០ ធ្នូថាពួកគេនឹងដំឡើងពន្ធលើផលិតផលមួយចំនួនរបស់សហភាពអឺរ៉ុប ដោយក្នុងនោះរួមទាំងគ្រឿងបន្លាស់យន្តហោះ និងស្រានាំចូលពីប្រទេសបារាំង និងអាល្លឺម៉ង់ផងដែរ អំឡុងពេលជម្លោះរវាងរដ្ឋាភិបាលក្រុងវ៉ាស៊ីនតោន និងក្រុងព្រុចសែល ជុំវិញការឧបត្ថម្ភធនដល់ក្រុមហ៊ុនផលិតយន្តហោះមិនទាន់បញ្ចប់។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី៣១ ធ្នូ ឆ្នាំ២០២០នេះ។

ការិយាល័យតំណាងពាណិជ្ជកម្មសហរដ្ឋអាមេរិក (Office of the US Trade Representative) ហៅកាត់ USTR បានចេញសេចក្ដីថ្លែងការណ៍ថា ខ្លួននឹងដំឡើងពន្ធលើគ្រឿងបន្លាស់យន្តហោះ និងប្រភេទស្រាមួយចំនួនព្រមទាំងស្រាគោញាក់ (Cognac) និងស្រាប៊្រែនឌី (Brandy) ផ្សេងៗទៀតដែលនាំចូលពីប្រទេសបារាំង និងអាល្លឺម៉ង់។

ទោះជាយ៉ាងណា ការិយាល័យតំណាងពាណិជ្ជកម្មសហរដ្ឋអាមេរិកមិនបានបញ្ជាក់ថា ការដំឡើងពន្ធនេះនឹងចូលជាធរមាននៅពេលណាឱ្យប្រាកដឡើយ ប៉ុន្តែបានធ្វើការកត់សម្គាល់ថា ព័ត៌មានបន្ថែមជុំវិញការដំឡើងពន្ធនេះនឹងផ្ដល់ជូនក្នុងពេលដ៏ខ្លីខាងមុខនេះ។

ការយកពន្ធថ្មីៗទាំងនេះគឺជាវិធានការចុងក្រោយនៅក្នុងជម្លោះរាងសហរដ្ឋអាមេរិក និងសហភាពអឺរ៉ុប ដែលបានអូសបន្លាយអស់រយៈពេល ១៦ ឆ្នាំជុំវិញការឧបត្ថម្ភដល់អាកាសចរណ៍ស៊ីវិលពាក់ព័ន្ធនឹងក្រុមហ៊ុនផលិតយន្តហោះអឺរ៉ុប Airbus និងក្រុមហ៊ុនផលិតយន្តហោះអាមេរិក Boeing ដែលជាគូប្រជែងធំនឹងគ្នា។

ការិយាល័យតំណាងពាណិជ្ជកម្មសហរដ្ឋអាមេរិក បានលើកឡើងក្នុងថ្ងៃដដែលថា សហភាពអឺរ៉ុប បានគណនាពន្ធដោយមិនត្រឹមត្រួវប្រឆាំងសហរដ្ឋអាមេរិក ដែលត្រូវបានអនុញ្ញាតដោយសេចក្ដីសម្រេចរបស់អង្គការពាណិជ្ជកម្មពិភពលោក (WTO) កាលពីខែកញ្ញា នៅក្នុងជម្លោះដែលមិនទាន់បញ្ចប់។ ការិយាល័យនេះបានបន្ថែមថា “សហភាពអឺរ៉ុប ត្រូវតែចាត់វិធានការមួយចំនួនដើម្បីប៉ះប៉ូវសងសម្រាប់ភាពមិនត្រឹមត្រូវនេះ”។

ភ្លាមៗ តំណាងសហភាពអឺរ៉ុបមិនអាចទាក់ទងសុំការបំភ្លឺបានទេជុំវិញចំណាត់ការរបស់ការិយាល័យតំណាងពាណិជ្ជកម្មសហរដ្ឋអាមេរិក៕