សម្ដេចតេជោ ហ៊ុន សែន អនុញ្ញាតឱ្យមានរៀបពិធីអាពាហ៍ពិពាហ៍ និងដំណើរការអាជីវកម្មដែលបានផ្អាកមួយចំនួនឡើងវិញ

ដោយ ៖ រ៉ាណេត

ភ្នំពេញ ៖ បន្ទាប់ពីបានបញ្ចប់ព្រឹត្តិការណ៍៣វិច្ឆិកា ក្រោយការធ្វើតេស្តរកមេរោគជំងឺកូវីដ១៩ ទៅលើអ្នកពាក់ព័ន្ធ ១៤២២ ទទួលបានលទ្ធផលអវិជ្ជមាន សម្ដេចតេជោ ហ៊ុន សែន បានសម្រេចអនុញ្ញាតឱ្យមានការរៀបចំពិធីអាពាហ៍ពិពាហ៍ បើកសាលារៀន, បើកពហុកីឡដ្ឋានជាតិអូរឡាំពិក, បើកសារមន្ទីរ និងរោងភាពយន្តឡើងវិញហើយ តែត្រូវប្រកាន់ខ្ជាប់តាមវិធានណែនាំរបស់ក្រសួងសុខាភិបាលក្នុងការទប់ស្កាត់ការចម្លង និងរីករាលដាលជំងឺកូវីដ១៩។

តាមរយៈការផ្ញើសារជាសម្លេង នៅល្ងាចថ្ងៃទី១៨ ខែវិច្ឆិកា ឆ្នាំ២០២០ សម្ដេចតេជោ ហ៊ុន សែន បញ្ជាក់ថា បន្ទាប់ពីអ្នកប៉ះពាល់ផ្ទាល់ និងប្រយោលប្រមាណ ១,៤២២នាក់ ត្រូវបានធ្វើតេស្តរកមេរោគកូវីដ១៩ ជាលើកទី៤ ហើយមិនមាននរណាកើតមានជំងឺនេះនោះឡើយ។

ជាមួយគ្នានេះ សម្ដេចតេជោ ក៏បានណែនាំទៅដល់អជ្ញាធរពាក់ព័ន្ធថា “ខ្ញុំសូមស្នើឱ្យអាជ្ញាធរគ្រប់លំដាប់ថ្នាក់ គ្រប់ខេត្ត រាជធានី ស្រុក ឃុំ សង្កាត់ ដែលមានការរៀបអាពាហ៍ពិពាហ៍ គឺអនុញ្ញាតឱ្យបងប្អូនរៀបការទៅ។

ជាទម្លាប់ប្រពៃណីខ្មែររបស់យើងចាប់ពីខែនេះ រហូតដល់ចូលវស្សា ជាពិសេសរដូវរំហើយនេះ មានរៀបអាពាហ៍ពិពាហ៍។ ដូច្នេះសូមសម្រួលឱ្យមានការរៀបអាពាហ៍ពិពាហ៍ គ្រាន់តែឱ្យយកចិត្តទុកដាក់ទៅលើបញ្ហាទាក់ទងនឹងការអនាម័យ ទាក់ទងនឹងអ្វីជាតម្រូវការការណែនាំរបស់ក្រសួងសុខាភិបាលតែប៉ុណ្ណោះ”។

សម្តេចតេជោ បានបន្ថែមថា “ប្រយ័ត្ននៅតែប្រយ័ត្ន ក៏ប៉ុន្តែយើងមិនត្រូវបិទដង្ហើមសេដ្ឋកិច្ច និងចលនាសេដ្ឋកិច្ចសង្គមផ្សេងទៀតដែរទេ។ ត្រូវយកចិត្តទុកដាក់ដោះស្រាយបញ្ហាហ្នឹង ពិនិត្យមើលគ្រាន់តែជួយសម្រួល ដើម្បីរំលឹកឱ្យបងប្អូនជានិច្ចកាលឱ្យមានការប្រុងប្រយ័ត្ន ដូចជាការវាស់កម្តៅ ការលាងដៃ គម្លាតសុវត្ថិភាពជាដើម។ នេះជាតម្រូវការរបស់ប្រជាជនយើង ដែលត្រូវការរៀបការ”៕

គម្រោងតម្លៃ៧០០លានដុល្លារនៅទីក្រុងកោះពេជ្រចាប់ផ្តើមដំណើរការឡើងវិញបន្ទាប់ពីផ្អាកមួយរយៈ

ដោយគង់ សូរិយា

ភ្នំពេញៈ គំរោងមជ្ឈមណ្ឌលពាណិជ្ជកម្មតម្លៃ៧០០លានដុល្លារ D.I RIVIERA នៅទីក្រុងកោះពេជ្រ បានចាប់ផ្តើមសាងសង់ជាផ្លូវការហើយ បន្ទាប់ពីបានផ្អាកដំណើរការមួយរយៈមក។

អគ្គនាយករងក្រុមហ៊ុន OCIC ដែលជាម្ចាស់អភិវឌ្ឍន៍ទីក្រុងរណបកោះពេជ្រ លោកទូច សំណាងបានមានប្រសាសន៍ឲ្យដឹងថា គំរោងនេះបានផ្អាកមួយរយៈ ដោយសារវិបត្តិហិរញ្ញវត្ថុរបស់ក្រុមហ៊ុន ដែលបានទិញយកគំរោងនេះពីដំបូងឡើយ ប៉ុន្តែបច្ចុប្បន្ននេះសហគ្រាសកាណាឌីយ៉ា បានទិញយកគំរោងនេះមកវិញ និងបានចាប់ផ្តើមសាងសង់ជាថ្មី ដើម្បីបញ្ចប់គម្រោងនេះនាពេលខាងមុខ។

គំរោងនេះ ដើមឡើយត្រូវបានទិញដោយក្រុមហ៊ុន GREENLAND ដែលមានមូល ដ្ឋាននៅប្រទេសចិន ដើម្បីសាងសង់់ជាសណ្ឋាគារកម្រិតផ្កាយ៥ និងខុនដូ ប៉ុន្តែក្រុមហ៊ុននេះទំនងជាមានបញ្ហាអ្វីមួយ ទើបគំរោងនេះត្រូវបានផ្អាក។

យោងតាមប្រភពផ្ទៃក្នុងក្រុមហ៊ុនបានឲ្យដឹងថា ខុនដូនៅក្នុងគំរោងនេះ ត្រូវបានក្រុមហ៊ុនសាងសង់និងរៀបចំយូនីតនិមួយធំៗ ដែលមានការលំបាកលក់ ព្រោះវាមានតម្លៃថ្លៃ។

លោកទូច សំណាងបានបន្តថា គំរោងនេះដើមឡើយមានអាគារចំនួន៥ ដោយអាគារខាងមុខចំនួនពីរមានកំពស់២៨ជាន់ និងអាគារខាងក្រោយមានចំនួនបី ដែលមានកំពស់៣៨ជាន់ និងមានអាងទឹកអូសពីលើអាគារនេះប្រវែងជាង២០០ម៉ែត្រ ប៉ុន្តែការសាងសង់ឡើងវិញនាពេលនេះ ការសាងសង់អាងទឹកនៅខាងលើឬអត់ ក្រុមហ៊ុនមិនទាន់កំណត់ច្បាស់លាស់នៅឡើយទេ។

លោកបន្តថា “យើងបានចាប់ផ្តើមឡើងវិញ ប៉ុន្តែបញ្ចប់នាពេលណាមិនទាន់ច្បាស់នៅឡើយទេ វាអាស្រ័យលើស្ថានភាពទីផ្សារ ដែលយើងដឹងស្រាប់ហើយបច្ចុប្បន្នយើងមានវិបត្តិសេដ្ឋកិច្ច ដែលរងពីការរីករាលដាលជំងឺ Covid19” ។ លោកបន្តថា “ចំណែកផ្សារទំនើបស្ថិតនៅកណ្តាលគម្រោងនេះ ក៏មិនទាន់កំណត់ពេលវេលាជាក់លាក់ ដើម្បីបើកដំ ណើរការនោះដែរ” ។

ទីក្រុងកោះពេជ្រ ត្រូវបានអភិវឌ្ឈន៍ដោយក្រុមហ៊ុន OCIC ដែលមានផ្ទៃដីទំហំជាង ១០០ហិកតា បច្ចុប្បន្នផ្ទៃក្រឡារបស់កោះទាំងមូល ទើបអភិវឌ្ឈន៍៍បានប្រមាណ៥០ភាគរយប៉ុណ្ណោះ ខណៈក្រុមហ៊ុនគ្រោងនឹងរើសាលពិព៌ណ ទៅកាន់ទីក្រុងរណបជ្រោយចង្វារនាពេលខាងមុខ៕

លោកឡុងគឹម សួគ៌៖ ទិញអចលនទ្រព្យនៅតំបន់ណាក៏ដោយអត្រាផលចំណេញនៅតែមាន

ដោយវឌ្ឈនា

ភ្នំពេញៈ អ្នកជំនាញបានណែនាំថា មិនថាជាទិញអចលនទ្រព្យនៅតំបន់ជាយក្រុង ឬនៅតាមបណ្តាខេត្ត អត្រាទទួលបានចំណេញនៅតែមាន ប្រសិនបើអ្នកទិញមានភាពឆ្លាតវៃ ដោយបានសិក្សាលម្អិតពីតំបន់ និងគម្រោងអភិវឌ្ឍន៍នានាដែលពាក់ព័ន្ធ។

លោកឡុង គឹមសួគ៌ អគ្គនាយកក្រុមហ៊ុន Century21 Advance បានពន្យល់ថា មានអ្នកខ្លះ មានធនធានតិចតួច ប៉ុន្តែបានសម្រេចចិត្តឥតស្ទាក់ស្ទើរ ក្នុងការទិញដីនៅជាយក្រុងទុក ជាពិសេសនៅក្បែរគម្រោងអភិវឌ្ឍន៍ ដែលមានសកម្មភាព ដូច្នេះភាគរយចំណេញគឺមានច្រើន ហើយរហ័សទៀត។

លោកបន្ថែមថា “ប្រសិនបើពួកគាត់សម្រេចលក់ ក្នុងតម្លៃចរចាណាមួយ ដែលអាចទទួលបានចំណេញ ហើយយកទៅវិនិយោគនៅតំបន់ណាមួយផ្សេងទៀត ដែលមានគម្រោងអភិវឌ្ឍន៍ច្បាស់លាស់ នោះកំណើននៃភាគលាភរបស់គាត់ នឹងកើនឡើងច្រើនជាងអ្នកដែលមានលុយច្រើនដែលទិញដី ប៉ុន្តែនៅតំបន់ឆ្ងាយពីទីប្រជុំជន និងមិនមានគម្រោងអភិវឌ្ឍន៍” ។

លោកបានបញ្ជាក់ថា មិនថាទោះជានៅតំបន់ជាយក្រុង ឬនៅក្នុងខេត្តណាមួយនោះទេ ភាគរយចំណេញនៅតែមានដូចគ្នា សំខាន់ត្រង់ថាមុនពេលទិញ សម្រាប់ទុកវិនិយោគ ត្រូវតែចេះសិក្សាពីតម្រូវការទីផ្សារ និងគម្រោងនៃការអភិវឌ្ឍឱ្យបានគ្រប់ជ្រុងជ្រោយយ៉ាងលម្អិត ទើបការវិនិយោគមិនជួបភាពបរាជ័យ។

ប៉ុន្តែយ៉ាងណាក៏ដោយ លោកបញ្ជាក់ថា ចំណុចមួយទៀតដែលសំខាន់អ្នកវិនិយោគ មុននឹងសម្រេចិត្តទិញអចលនទ្រព្យវិនិយោគបន្ត គួរគិតពីំចំណូលរបស់ខ្លួនឱ្យបានច្បាស់លាស់សិន តើចំណូលរបស់ខ្លួនមានភាពរឹងមាំដែរឬទេ ? អ្នកខ្លះមានចំណូលមិនរឹងមាំទេ ពោលគឺបានមួយឆាវៗ ហើយវាបាត់បង់ទៅវិញ។

លោកឡុង គឹមសួគ៌បានពន្យល់ថា “កុំទិញអចលនទ្រព្យដែលលើសពីសមត្ថភាពខ្លួន (អ្នកខ្លះប្រាក់ខែ៥០០ ដុល្លារ តែទិញអស់៤០០ ដុល្លារ សល់តែ១០០ដុល្លារ) នេះ គឺមានហានិភ័យខ្ពស់ ចំពោះការចំណាយលើជីវភាពប្រចាំថ្ងៃ ដោយក្នុងការវិយោគលើវិស័យអចលនទ្រព្យ ចំពោះអ្នកដែលមានធនធានតិចតួច គួរទិញអចលនទ្រព្យក្នុងតម្លៃ៥០ ភាគរយនៃចំណូលរបស់ខ្លួន ទើបមិនមានហានិភ័យដល់ជីវភាពប្រចាំថ្ងៃ” ៕

ទីក្រុងសេអ៊ូលក្លាយជាតំបន់មានទីផ្សារអចលនទ្រព្យឈានមុខគេនៅអាស៊ី

ដោយ ហ្សូលី

កូរ៉េខាងត្បូងៈ ទីក្រុងសេអ៊ូល បានក្លាយជាទីផ្សារឈានមុខគេរបស់អាស៊ី សម្រាប់ទីផ្សារការិយាល័យ និងលក់រាយ បន្ទាប់ពីប្រទេសកូរ៉េខាងត្បូង បានបញ្ចៀសការបិទទ្វារដោយការគ្រប់គ្រងការរីករាលដាលនៃ Covid-19 ។

ប្រតិបត្តិការការិយាល័យ មានចំនួនសរុបជិត ៩០០០លានដុល្លារ នៅទីក្រុងសេអ៊ូលក្នុងឆ្នាំនេះ គិតត្រឹមខែកញ្ញា ដែលមានទំហំទឹកប្រាក់ជាង៧,៧ពាន់លានដុល្លារ ប៉ុន្តែនៅទីក្រុងតូក្យូ ដែលជាអតីតមេដឹកនាំទីផ្សារក្នុងតំបន់ និងស៊ាងហៃដោយមានចំនួន៤,៨ ពាន់លានដុល្លារ។ ទីក្រុងសេអ៊ូលក៏ជាប់ចំណាត់ថ្នាក់លេខ១ផងដែរ នៅក្នុងប្រតិបត្តិការទិញលក់រាយ បន្ទាប់មកគឺក្វាងចូវ និងតូក្យូ។

ការធ្លាក់ចុះលើការវិនិយោគអចលនទ្រព្យ នៅទូទាំងតំបន់អាស៊ីប៉ាស៊ីហ្វិកមានចំនួន៣៨ភាគរយនៅក្នុងត្រីមាសទី៣ ធៀបនឹងឆ្នាំមុនដែលជាការធ្លាក់ចុះទាបជាង៤៣ ភាគរយនៅអឺរ៉ុប និង៥៧ភាគរយនៅសហរដ្ឋអាមេរិក ដែលវីរុសនៅតែបន្តរីករាលដាល។ កូរ៉េខាងត្បូង បានដឹកនាំអាស៊ីដោយមានទឹកប្រាក់ ៦,៨ ពាន់លានដុល្លារក្នុងត្រីមាសទី ៣ ដែលជាកំណើន ២២% ពីមួយឆ្នាំទៅមួយឆ្នាំ។

ទិន្នន័យនៅអាស៊ីបង្ហាញពីតំរូវការការិយាល័យ និងមជ្ឈមណ្ឌលទិញឥវ៉ាន់ ដោយប្រឆាំងនឹងការព្យាករណ៍ថា Covid-19 នឹងជំរុញការផ្លាស់ប្តូរ ដែលមិនអាចត្រឡប់វិញបាន ដែលគាំទ្រដល់ការធ្វើការងារពីផ្ទះ និងពាណិជ្ជកម្មតាមអ៊ីនធឺណេត។

ក្រុមហ៊ុន CBRE Group Inc បានរាយការណ៍ថា ប្រតិបត្តិការនៅត្រីមាសទី៣ បានធ្លាក់ចុះ២៥,៦ភាគរយ ពីមួយឆ្នាំមុននៅអាស៊ី ៣៣,៤ភាគរយនៅអឺរ៉ុប និង ៥៩,៥ ភាគរយនៅអាមេរិក ដោយផ្អែកលើរូបិយប័ណ្ណដែលត្រូវបានកែសម្រួល។

ការលក់នៅតែត្រូវបានរារាំង ដោយការរឹតត្បិតការធ្វើដំណើរដោយវីរុស ដែលកំណត់លទ្ធភាពរបស់វិនិយោគិនអន្តរជាតិ ក្នុងការរកមើលអចលនទ្រព្យឬចរចាទល់មុខ គ្នា។

របាយការណ៍របស់ក្រុមហ៊ុន Real Capital បាននិយាយថា“ ទីផ្សារដូចជាជប៉ុន ចិន និងកូរ៉េខាងត្បូង ដែលមានមូលដ្ឋានវិនិយោគក្នុងស្រុកធំៗ នឹងធ្លាក់ចុះនៅពេលមានបញ្ហាប្រឈមក្នុងការវិនិយោគ” ៕ Bloomberg៕

រាជធានីភ្នំពេញកំពុងប្រជែងសាងសង់អគារកប់ពពកជាមួយបណ្តាប្រទេសនានាក្នុងតំបន់

ដោយៈ រ៉ាណេត

ភ្នំពេញៈ រាជធានីភ្នំពេញបាន និងកំពុងក្លាយជាមជ្ឈមណ្ឌលពាណិជ្ជកម្ម លំដាប់អន្តរជាតិ ដោយទីក្រុងនេះកំពុងប្រជែង ជាមួយបណ្តាទីក្រុងនៃបណ្តាប្រទេស ក្នុងតំបន់ និងពិភពលោក ដើម្បីបង្ហាញកិត្យានុភាព តាមរយៈការសាងសង់អាគារកប់ពពកកាន់តែច្រើន។

បច្ចុប្បន្ននេះមានវត្តមានអាគារកំពស់ជាង ៥០០ម៉ែត្រ បាននិងបន្តសកម្មភាពដែលនឹងលេចចេញនាពេលខាងមុខ ដែលអាគារកប់ពពកទាំងនោះមានដូចជា

ទី១- អគារពាណិជ្ជកម្មភ្លោះ Thai Boon Roong Twin Tower World Trade Center

មជ្ឈមណ្ឌលពាណិជ្ជកម្មលំដាប់ពិភពលោក Thai Boon Roong Twin Tower World Trade Center មានកម្ពស់ ៥៦៨ម៉ែត្រ។ អគារនេះគ្រោងនឹងចំណាយអស់ទឹកប្រាក់ប្រមាណ៦០០០ពាន់លានដុល្លារ និងមានកម្ពស់១៣៣ជាន់បាននឹងកំពុងសាងសង់យ៉ាងសកម្ម។

អគារភ្លោះមួយនេះ នឹងក្លាយជា Land Mark មួយរបស់កម្ពុជា ដែលនឹងលើកមុខមាត់កម្ពុជា នៅក្នុងតំបន់និងឆាកអន្តរជាតិ បាននឹងកំពុងសាងសាង់ជញ្ជាំងទប់ដីព័ទ្ធជុំវិញមុននឹងចាប់តំណើការតួអាគារជាផ្លូវការ។

អគារខ្ពស់លំដាប់ពិភពលោកមួយនេះ វិនិយោគដោយក្រុមហ៊ុន Thai Boon Roong និងក្រុមហ៊ុន Star City។

អគារភ្លោះដែលខ្ពស់កប់ពពក និងធំជាងគេនៅក្នុងតំបន់អាស៊ាន នឹងដុះឡើងនៅតាមបណ្តោយមាត់ទន្លេងមេគង្គ ទល់មុខអគារណាហ្គាវើល ក្នុងរាជធានីភ្នំពេញន នឹងត្រូវចំណាយពេលសាងសង់៥ឆ្នាំ។ អគារនេះមានកម្ពស់៥៦៨ម៉ែត្រ ស្ថិតនៅក្នុងទីក្រុងភ្នំពេញប្រទេសកម្ពុជា កំពុងស្ថិតនៅក្នុងដំណើរការសាងសង់។

នៅពេលសាងសង់បញ្ចប់អគារនេះ នឹងក្លាយជាអគារប្រើប្រាស់រួម មានទាំងការិយាល័យធ្វើការ ផ្សារទំនើប សណ្ឋាគារកម្រិតផ្កាយ៦ ខុនដូ អាផាតម៉ុនលំដាប់ផ្កាយប្រាំ និងកន្លែងកម្សាន្តផ្សេងៗទៀត។

ទី២- អគារពាណិជ្ជកម្ម Diamond Tower កម្ពស់៥៥៥ម៉ែត្រ

អគារនេះនឹងត្រូវសាងសង់នៅទីក្រុងកោះពេជ្រ ហើយអាចនឹងចាប់ផ្តើមសាងសង់នៅពេលឆាប់ៗខាងមុខ។ ដោយគំរោងនេះសហការវិនិយោគរវាងក្រុមហ៊ុន OCIC ជាមួយក្រុមហ៊ុនមកពីប្រទេសចិន ដែលក្រុមហ៊ុននេះមានវត្តមាន នៅប្រទេសកម្ពុជារួចហើយ។ គម្រោងអគារ Diamond Tower នឹងត្រូវសាងសង់តាមខ្សែស្របពិសេសមួយ ដោយវានឹងស្ថិតនៅនៅក្បាលទីតាំងកោះពេជ្រ ហើយអាគារនេះនឹងរត់ស្របគ្នា នឹងរូបសំណាកសម្តេចសង្ឃ ជួន ណាត និងរូបសំណាកព្រះបរមរតនកោដិ និងវិមានឯករាជ្យផងដែរ។

ការសាងសង់អាគារនេះ វាអាស្រ័យលើស្ថានភាពសេដ្ឋកិច្ច សង្គមរបស់កម្ពុជាផងដែរ ខណៈអ្នកវិនិយោគអន្តរជាតិនានាបាន និងកំពុងប្រជែងគ្នាសាងសង់ អាគារខ្ពស់ៗនៅទីក្រុងភ្នំពេញ។នេះបើតាមការឲ្យដឹងពីលោកទូច សំណាងអគ្គនាយករងក្រុមហ៊ុនOCIC។

លោកបន្តថា “ផែនការសាងសង់អាគារនេះ មិនមានការផ្លាស់ប្តូរនោះទេ យើងនឹងសាងសង់នាពេលខាងមុខនេះ។

ទី៣- Naga World3

ក្រុមហ៊ុន NagaCorp ដែលទទួលបានសិទ្ឋផ្តាច់មុខ ក្នុងអាជីវកម្មកាស៊ីណូនៅរាជធានីភ្នំពេញ បានធំធាត់យ៉ាងឆាប់រហ័ស ដោយបន្ទាប់ពីសាងសង់បញ្ចប់គំរោងទី២របស់ខ្លួន ក៏បាននិងកំពុងត្រៀមសាងសង់អាគារភ្លោះកំពស់៦៨ជាន់ នៅក្នុងសង្កាត់ទន្លេបាសាក់ក្បែរគំរោងទី២របស់ខ្លួនផងដែរ។

គម្រោង Naga3 នឹងភ្ជាប់ទៅនឹងទីតាំង ដែលមានស្រាប់ដោយការពង្រីកណាហ្គាស៊ីធីចន្លោះណាហ្គា១ និងណាហ្គា២ ។ ក្រុមហ៊ុន Naga បានឱ្យដឹងថា នឹងមានប្រព័ន្ធដឹកជញ្ជូនក្រោមដី និងពីលើដីរវាងបរិវេញគម្រោងទាំងបី។ នេះបើយោងតាមលោក Paul Steelman នាយកប្រតិបត្តិក្រុមហ៊ុន Steelman ដែលជាដៃសាងសង់របស់ក្រុមហ៊ុនNaga។

គំរោងនេះមានតម្លៃទុនវិនិយោគ៣,៥ពាន់លានដុល្លារ ហើយអាគារនេះមានកំពស់ជាង២៥០ម៉ែត្រ។

ទី៤ Mesong Tower

គម្រោងស្ថិតនៅលើទីក្រុងកោះពេជ្រនេះ បាននិងកំពុងសាងសង់ ដោយសកម្មភា ពបុកគ្រឹះបាននិងកំពុងធ្វើឡើងយ៉ាងសកម្ម។

MESONG Tower មានកំពស់ 69ជាន់ ស្មើនឹងកំពស់២៥២ម៉ែត្រ បាននិងកំពុងវិនិយោគដោយក្រុមហ៊ុន Wonder Prime One ដែលមានមូលដ្ឋាននៅទីក្រុងហុងកុង។

អាគារកប់ពពកនេះ ជាគំរោងអភិវឌ្ឍន៍ចម្រុះរួមមាន ផ្សារទំនើប ភោជនីយដ្ឋាន និង លំនៅដ្ឋានបែបសហកម្មសិទ្ឋសរុប១២៧០យូនីត។

គំរោងនេះ ស្ថិតនៅក្បែរនឹងស្ពាននាគទីក្រុងកោះពេជ្រ និងគ្រោងបញ្ចប់នៅចុងឆ្នាំ២០២។ គម្រោងអភិវឌ្ឍន៍អចលនទ្រព្យ ដែលចុះហត្ថលេខាដំបូងបង្អស់ ដោយក្រុមហ៊ុន WONDER DEVELOPMENT តំណាងឱ្យយុគសម័យថ្មី នៃការរស់នៅនិងជីវភាពរស់នៅប្រកបដោយកិត្យានុភាពបានកត់សម្គាល់នូវព្រឹត្តិការណ៍ថ្មីមួយ។

ទី៥ អគារ Royal One កម្ពស់២៣០ម៉ែត្រ

អគារភ្លោះពាណិជ្ជកម្មកំពស់៦៨ជាន់ ស្មើនឹង ២៣០ម៉ែត្រនេះ មានទីតាំងស្ថិតនៅលើមហាវិថីសហព័ន្ធរុស្ស៊ី និងមហាវិថីមន្នីវង្ស ព្រមទាំងស្ថិតនៅក្នុងតំបន់ពាណិជ្ជកម្ម និងប្រជុំដោយអគារខ្ពស់ៗ ដូចជា អគារកាណាឌីយ៉ា អគារវឌ្ឍនៈថៅវើរ រួមទាំងអគារ Exchange Square ជាដើម។

មជ្ឈមណ្ឌលពាណិជ្ជកម្ម Royal One នឹងប្រើប្រាស់នូវសេវាកម្មចម្រុះដូចជា ខុនដូ, ផ្សារទំនើប សណ្ឋាគារ ក្លឹបកំសាន្ត ក្លឹបហាត់ប្រាណ ភោជនីយដ្ឋាន និងមជ្ឍមណ្ឌលកំសាន្តផ្សេងៗជាដើម។ គំរោងនេះ សាងសង់លើផ្ទៃដីទំហំ៤,០៣៦ម៉ែត្រការ៉េ និងប្រើប្រាស់រយៈពេលសាងសង់ចំនួន៥ឆ្នាំ។ តំណាងក្រុមហ៊ុន Royal Group ធ្លាប់បានបង្ហាញភាពជឿជាក់ថា វត្តមានអគារភ្លោះដ៏ប្រណិតនេះ នឹងចូលរួមចំណែកនៃមោទនភាពជាតិរបស់កម្ពុជា ដែលបង្ហាញឲ្យឃើញពីសមត្ថភាព និងភាពរីកចម្រើនរបស់មាតុប្រទេស និងផ្សព្វផ្សាយលើឆាកអន្ដរជាតិ។

ទី៦- អគារ Olympia City កម្ពស់ ២១៣ម៉ែត្រ

មជ្ឈមណ្ឌលពាណិជ្ជកម្ម Olympia Tower មានអាគារមេកំពស់២១៣ម៉ែត្រ និងមានកំពស់សរុប៥៥ជាន់ ដែលមជ្ឈមណ្ឌលពាណិជ្ជកម្ម និងលំនៅដ្ឋានដ៏ធំកណ្តាលក្រុងភ្នំពេញនេះ ត្រូវបានវិនិយោគដោយក្រុមហ៊ុន OCIC ក្នុងទឹកប្រាក់ប្រមាណ៥០០លានដុល្លារអាមេរិក។

អាគារមេនៃគំរោងនេះបាន និងកំពុងសាងសង់ដល់ជាន់ទី៧ហើយ វានឹងត្រូវប្រើប្រាស់ជាសណ្ឋាគារកម្រិតផ្កាយ៥ និងការិយាល័យប្រណីត។

ទី៧ Morgan Tower នៅតំបន់ជ្រោយចង្វារ

គំរោងនេះបាននិងកំពុងសាងសង់ផងដែរ ដោយមានអាគារជាច្រើន ដែលជាបណ្តុំ ទៅដោយទស្សនទាននៃការអភិវឌ្ឍន៍ចម្រុះ ដែលគំរោងនេះវិនិយោគដោយក្រុមហ៊ុន Morgan Group ដែលមានមូលដ្ឋាននៅប្រទេសចិន។

អាគារមេនៃគំរោងនេះមានកំពស់កប់ពពក ជាង២០០ម៉ែត្រផងដែរ ដែលបច្ចុប្បន្នការដ្ឋានសាងសង់បាននិងកំពុងដំណើរការ៕

អ្នកជំនាញ៖ គម្រោងអភិវឌ្ឍន៍អចលនទ្រព្យធំៗនៅតែបន្តមានសកម្មភាពសាងសង់

ដោយ វុត្ថា

ភ្នំពេញៈ ប្រធានក្រុមប្រឹក្សាភិបាល សមាគមអ្នកជំនាញអចលនទ្រព្យកម្ពុជា បានមើលឃើញថា បើទោះបីកម្ពុជាប្រឈមទៅនឹងវិបត្តិសេដ្ឋកិច្ចសកល រហូតមកដល់ពេលនេះក៏ដោយ ក៏គម្រោងអភិវឌ្ឍន៍អលចនទ្រព្យធំៗ នៅក្នុងប្រទេសកម្ពុជា នៅតែបន្តសកម្មភាពសាងសង់ដដែល។

លោកឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា បានប្រាប់គេហទំព័រ Propertyarea.asia កាលពីថ្ងៃទី១៨ ខែវិច្ឆិកា កន្លងមកនេះថា សម្រាប់គម្រោងអភិវឌ្ឍន៍អលចនទ្រព្យធំៗ ដូចជាគម្រោងខុនដូ ផ្សារទំនើប និងអគារការិយាល័យជាដើម នៅតែបន្តសកម្មភាពសាងសង់ ព្រោះគម្រោងទាំងនេះមានទុនគ្រប់គ្រាន់សម្រាប់អភិវឌ្ឍន៍គម្រោងរបស់គេ។

លោកបន្តថា “ជាធម្មតាគម្រោងអភិវឌ្ឍន៍ធំៗទាំងអស់ គេមានទុនគ្រប់គ្រាន់ បើទោះបីគេមិនទិញក៏ដោយ ក៏គេនៅតែបន្តសាងសង់ដែរជាមួយ នឹងភាពជឿជាក់លើរាជរ ដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ចឱ្យមានការរីកចំរើន” ។ លោកបន្ថែមថា “ជាមួយគ្នានេះ មុននឹងសម្រេចឱ្យមានការសាងសង់ ឬ អភិវឌ្ឍន៍គម្រោងអ្វីមួយនោះ រដ្ឋាភិបាលបានពិនិត្យយ៉ាងល្អិតល្អន់ ទៅលើប្រភពទុនរបស់ម្ចាស់គម្រោងអភវឌ្ឍន៍ និងជាក្រុមហ៊ុនសាងសង់ និងចុះបញ្ជីច្បាស់លាស់ណាស់ មិនមែនចេះតែអនុវញ្ញាតឱ្យសាងសង់នោះទេ” ។

លោកឃាង ពុទ្ធី បានបញ្ជាក់ទៀតថា គម្រោងអភិវឌ្ឍន៍ទាំងអស់នៅក្នុងប្រទេសកម្ពុជា នឹងបន្តបញ្ចប់បផែនការនៃសាងសង់របស់ខ្លួន តាមរយៈការត្រួតពិនិត្យយ៉ាងយកចិត្តទុកដាក់ពីរាជរដ្ឋាភិបាល និងអាជ្ញាធរពាក់ព័ន្ធក្នុងការសម្រប់សម្រួលឱ្យក្រុមហ៊ុនរស់។

ប្រមុខនៃរាជរដ្ឋាភិបាលកម្ពុជា សម្តេចតេជោហ៊ុន សែន ធ្លាប់បានមានប្រសាសន៍កាលពីពេលថ្មីៗនេះថា សម្រាប់ក្រុមហ៊ុនអភិវឌ្ឍន៍គម្រោងសាងសង់សំណង់ និងលំនៅឋានផ្សេងៗនៅក្នុងប្រទេសកម្ពុជា នៅតែបន្តមានសកម្មភាព ស្របពេលដែលកម្ពុជាកំពុងប្រឈមទៅនឹងវិបត្តិនាពេលនេះ។

សម្តេចតេជោបន្តថា “ការមិនផ្អាកសកម្មភាពសាងសង់ របស់ក្រមហ៊ុនសំណង់នេះ បានផ្តល់ឱកាសការងារ និងចំណូលយ៉ាងច្រើនដល់កម្មករ កម្មការិនី នៅក្នុងវិស័យនេះ ដើម្បីលើកស្ទួយជីវភាពប្រចាំថ្ងៃ និងជួយសម្រួលដល់ការលំបាក របស់រាជរដ្ឋាភិបាលកម្ពុជាផងដែរ” ៕

ចំណេះដឹង! តើអ្វី «ប័ណ្ណស្លាបមាន់» ឬចុងសន្លឹក?

ដោយ វុត្ថា

ភ្នំពេញៈ ប័ណ្ណសម្គាល់សិទ្ធិកាន់កាប់ប្រើប្រាសដីធ្លី ឬគេនិយមហៅថា«ប័ណ្ណស្លាបមាន់»ឬចុងសន្លឹក ដែលប័ណ្ណប្រភេទនេះ ជាប័ណ្ណដីធ្លីដែលចេញមុនគេបង្អស់ ក្រោយរបបខ្មែរក្រហមបានដួលរលំ។

ប័ណ្ណប្រភេទនេះ ត្រូវបានចេញនូវចន្លោះឆ្នាំ១៩៨៩ ដល់ឆ្នាំ១៩៩៥ ដែលចេញដោយអតីតការិយាល័យសុរិយោដីខេត្ត-ក្រុង ហើយការិយាល័យសុរិយោដី កាលនោះ ស្ថិតនៅក្រោមក្រសួងកសិកម្ម រុក្ខាប្រមាញ់ និងនេសាទ។

ប័ណ្ណប្រភេទនេះ គេឃើញអាជ្ញាធរសុរិយោដី ចេញជូនអ្នកកាន់កាប់ដីនៅទូទាំងប្រទេសកម្ពុជា ទាំងប្រភេទដីកសិកម្ម ដីភូមិ ឬដីលំនៅឋានគ្រប់ប្រភេទ ហើយប្លង់ប្រភេទនេះ នៅមានសុពលភាពប្រើប្រាស់រហូតដល់បច្ចុប្បន្ន។

ប្រសិនបើដីនៅតំបន់នោះ មិនទាន់ស្នើសុំចុះបញ្ជីដីលក្ខណៈដាច់ដោយដុំ និងមិនទាន់បានចុះបញ្ជីដី ជាលក្ខណៈប្រព័ន្ធទេនោះ គឺប័ណ្ណឬប្លង់ប្រភេទនេះ នៅមានសុពលភាពប្រើប្រាស់ ទាំងការបញ្ជាក់ពីភោគៈ ស្របច្បាប់ ការដាក់បញ្ចាំ ដាក់ហ៊ីប៉ូតែក ផ្ទេរ ចែកមរតក និងការដាក់ធានាគ្រប់ប្រតិបត្តិការបាន ប៉ុន្តែវាមានសុពលភាព ត្រឹមតែជាប័ណ្ណភោគៈប៉ុណ្ណោះ៕

អាគារសហកម្មសិទ្ឋចំនួនបីដែលមានកំពស់ជាង២០០ម៉ែត្រនឹងបញ្ចប់ នៅចុងឆ្នាំ២០២១

ដោយគង់ សូរិយា

ភ្នំពេញៈ អាគារសហកម្មសិទ្ឋ និងពាណិជ្ជកម្មធំៗចំនួនបី ដែលមានកំពស់ជាង២០០ម៉ែត្រ នឹងបញ្ចប់ការសាងសង់់និងអាចដាក់ឲ្យដំណើរការនៅចុងឆ្នាំ២០២១ខាងមុខនេះ។

អាគារពាណិជ្ជកម្ម និងសហកម្មសិទ្ឋទាំងនោះរួមមាន អាគារGolden Tower42, Morgan Towerនៅលើទីក្រុងកោះពេជ្រ និងអាគារThe PeAkដែលដំណើរការសាងសង់យឺតជាងការគ្រោងទុក។

គំរោងGold Tower

អាគារពាណិជ្ជកម្មចម្រុះនេះ ជាអាគារដែលសាងសង់យូរជាងគេ នៅទីក្រុងភ្នំពេញ ដោយសារវិបត្តិសេដ្ឋកិច្ចពីរលើកគឺនៅឆ្នាំ២០០៨ និងវិបត្តិពាណិជ្ជកម្មនៅឆ្នាំ២០២០ បានលងអាគារនេះម្តងទៀត ដែលធ្វើឲ្យគំរោងនេះបានពន្លឺតការសាងសង់។

គំរោងនេះ បានវិនិយោគដោយក្រុមហ៊ុនYUNWOOរបស់សាធារណៈរដ្ឋកូរ៉េ ដែលគ្រោងចំណាយទុន២៤០លានដុល្លារ។ គំរោងនេះគ្រោងបញ្ចប់ចុងឆ្នាំ២០២០ ប៉ុន្តែផ្អែកលើល្បឿននៃការសាងសង់ ធ្វើឲ្យគំរោងនេះពន្យាពេលក្នុងការបញ្ចប់តាមផែនការរបស់ខ្លួន។

Gold Tower42 ដំបូងឡើយគ្រោងសាងសង់កំពស់៤២ជាន់ ប៉ុន្តែក្រោយមកបានបង្កើនជំនួនជាន់ដល់៤៧ជាន់ និងមានកំពស់ជាង២០០ម៉ែត្រ។ គំរោងនេះរួមមានផ្សារទំនើប ការិយាល័យ មន្ទីរពេទ្យ និងអាគារសហកម្មសិទ្ឋ។

គំរោងThe PeAk

គំរោងនេះ បានប្រកាសចំណាយទុនវិនិយោគ រហូតដល់៥០០លានដុល្លារ មានអាគារចំនួនបី កំពស់៥៥ជាន់ ដែលរួមបញ្ចូលនូវការិយាល័យ ខុនដូ ផ្សារទំនើបThe Capital មកពីប្រទេសសឹង្ហបុរី និងសណ្ឋាគារកម្រិតផ្កាយ៥ Shangri-La ដែលជាសណ្ឋាគារល្បីឈ្មោះនៅអាស៊ី។

មជ្ឈមណ្ឌលពាណិជ្ជកម្មចម្រុះនេះ ត្រូវបានវិនិយោគដោយក្រុមហ៊ុនWorld Bridge International និងក្រុមហ៊ុនOxley Holding ដែលជាក្រុមហ៊ុនលំដាប់យក្សមកពីប្រទេសសឹង្ហបុរី។

តាមផែនការគំរោងនេះ នឹងបញ្ចប់ចុងឆ្នាំនេះ ប៉ុន្តែដោយសារការផ្លាស់ប្តូរក្រុមហ៊ុនសាងសង់ បានធ្វើឲ្យគំរោងនេះយឺតជាងផែនការគ្រោងទុក។

The PeAk ជាImageមួយ នឹងជួយលើកកំពស់សោភ័ណភាព និងផ្តល់ទំនុកចិត្តបន្ថែមទៀតដល់វិនិយោគិនអន្តរជាតិ។

គំរោងMorgan Tower

Morgan Towerស្ថិតនៅលើទីក្រុងកោះពេជ្រ បានពន្លឿនការសាងសង់ទាំងយប់ទាំងថ្ងៃ ដែលវានឹងបញ្ចប់តាមផែនការរបស់ខ្លួននៅចុងឆ្នាំ២០២១។ គម្រោងនេះ ត្រូវបានវិនិយោគដោយក្រុមហ៊ុនMorgan Groupដែលបោះទុនវិនិយោគប្រមាណ២០០លានដុល្លារអាមេរិក។

គំរោងនេះក៏ជាគំរោងប្រើប្រាស់ចម្រុះ ប៉ុន្តែភាគច្រើនជាយូនីតខុនដូ។ គំរោងនេះមានកំពស់សរុបជាង២០០ម៉ែត្រផងដែរ៕

អភិបាលខេត្តកំពង់ចាម ជំរុញឱ្យម្ចាស់បុរីនិងម្ចាស់គម្រោងដីឡូតិ៍រៀបចំឯកសារឱ្យបានត្រឹមត្រូវមុនពេលប្រកាសលក់

ដោយៈ វុត្ថា

កំពង់ចាមៈ អភិបាលខេត្តកំពង់ចាមបានព្រមាន និងជំរុញឱ្យគ្រប់ម្ចាស់អភិវឌ្ឍន៍គម្រោងបុរីលំនៅដ្ឋាន ក៏ដូចជាគម្រោងដីឡូតិ៍ ត្រូវបង្កើនការយកចិត្តទុកដាក់ក្នុងការរៀបចំឯកសារគតិយុត្តិឱ្យបានត្រឹមត្រូវ មុនពេលលក់ទៅឱ្យអតិថិជន ឱ្យស្របតាមការណែនាំរបស់ក្រសួងរៀបចំដែន នគរូបនីយកម្មនិងសំណង់ ជាពិសេសជៀសវាងកើតមានវិវាទ។

លោក អ៊ុន ចាន់ដាអភិបាលខេត្តបានមានប្រសាសន៍នៅក្នុងកិច្ចប្រជុំពិភាក្សាជាមួយម្ចាស់គម្រោងបុរី បណ្តុំលំនៅដ្ឋាន និងម្ចាស់គម្រោងដីឡូតិ៍នៅក្នុងក្រុងកំពង់ចាម នាព្រឹកថ្ងៃទី១៨ ខែវិច្ឆិកា ឆ្នាំ២០២០ បានមានប្រសាសន៍ថា គ្រប់អ្នកវិនិយោគ និងអភិវឌ្ឍន៍នៅក្នុងវិស័យអចលនទ្រព្យ និងសំណង់ត្រូវតែធ្វើឡើង ដោយការគោរពតាមច្បាប់របស់ក្រសួងជាធរមាន។

លោកបានបញ្ជាក់ថា ប្រកាសលេខ០៨៧ ដ.ន.ស ប្រក/នីក. របស់ក្រសួងរៀបចំដែនដី នគរូបនីយកម្ម និងសំណង់ ស្តីពីការអភិវឌ្ឍដី និងប្រកាសលេខ ០៨៩ សហវ.ប្រក ចុះថ្ងៃទី ២០ ខែមករា ឆ្នាំ២០២០ របស់ក្រសួងសេដ្ឋកិច្ច និងហិរញ្ញវត្ថុ ស្តីពីការគ្រប់គ្រងអាជីវកម្មអភិវឌ្ឍអចលនវត្ថុ គឺត្រូវតែអនុវត្តជាចាំបាច់ ហើយក៏សូមកោតសរសើរដល់មន្ត្រីជំនាញពាក់ព័ន្ធ ដែលបំពេញការងារប្រកបដោយស្មារតីទទួលខុសត្រូវ មានឆន្ទៈក្នុងការបម្រើសេវាគ្រប់រូបភាពជូនប្រជាពលរដ្ឋ។

ប៉ុន្តែក៏នៅមានចំណុចខ្វះខាតមួយចំនួនតូច ដែលសំណូមពរឱ្យបងប្អូនយើងទាំងអស់ មានការអធ្យាស្រ័យយោគយល់ សម្រាប់ការយឺតយាវក្នុងប្រការណាមួយ។

លោកបន្តថា “ដើម្បីឱ្យមានការគាំទ្រ និងជំនឿជាក់ពីអតិថិជនរបស់ខ្លួន អ្នកនិយោគ ត្រូវរៀបចំឯកសារគតិយុត្តិឱ្យបានសមស្រប តាមនិតិវិធី និងបច្ចេកទេសដែលបានណែនាំ។ ជាមួយគ្នានេះ ម្ចាស់ដីឡូត៍ និងម្ចាស់សំណង់ផ្ទះល្វែង ត្រូវរៀបចំ និងចងក្រងឯកសារឱ្យបានត្រឹមត្រូវ មុនដាក់មកជំនាញ ព្រោះឯកសារដែលត្រឹមត្រូវជាមូលដ្ឋានគ្រឹះនៃការជំរុញការផ្តល់សេវាឱ្យបានលឿន និងបង្កើនជំនឿទុកចិត្តដល់អតិថិជនរបស់ខ្លួន”។

ជាមួយគ្នានេះ លោកក៏បានស្នើ និងលើកទឹកចិត្តឱ្យម្ចាស់ដីឡូតិ៍ ម្ចាស់សំណង់ផ្ទះល្វែង និងបងប្អូនប្រជាពលរដ្ឋ ប្រើប្រាស់យន្តការច្រកចេញចូលតែមួយ ក្នុងការមកទទួលសេវាសាធារណៈរបស់រដ្ឋ។ ដោយឡែកសម្រាប់មន្ត្រីជំនាញពាក់ព័ន្ធ ត្រូវប្រកាន់ខ្ជាប់យន្តការច្រកចេញចូលតែមួយ ដែលបានកំណត់ដោយរាជរដ្ឋាភិបាល និងមិនត្រូវចាត់ការលើឯកសារណាមួយ ដែលមិនបានប្រើប្រាស់យន្តការច្រកចេញចូលតែមួយ ដើម្បីជៀសវាងការការចោទប្រកាន់អំពើពុករលួយមកលើមន្ត្រីជំនាញរបស់ខ្លួន៕

គម្រោងរោងចក្រចម្រាញ់ប្រេងកាតលើកដំបូងនៅកម្ពុជាតម្លៃ ៦២០លានដុល្លារ ដំណាក់កាលទី១ ប្រកាសផ្អាកការសាងសង់

ដោយ ហ្សូលី

ភ្នំពេញ៖ គម្រោងសាងសង់រោងចក្រចម្រាញ់ប្រេងកាតលើកដំបូងនៅប្រទេសកម្ពុជាដំណាក់កាលទី ១ ដែលស្ថិតនៅខេត្តព្រះសីហនុ តម្លៃប្រមាណ ៦២០លានដុល្លារ គ្រោងបញ្ចប់ការសាងសង់ឆ្នាំ ២០២២ បានប្រកាសថា ផ្អាកការសាងសង់បណ្តោះអាសន្ន ដោយសារជួបបញ្ហាហិរញ្ញវត្ថុ ។

អគ្គនាយកនៃអគ្គនាយកដ្ឋានប្រេងកាតក្រសួងរ៉ែ និងថាមពល លោក ជៀប សួរ បានថ្លែងប្រាប់ថា ក្រុមហ៊ុន វិនិយោគលើរោងចក្រចម្រាញ់ប្រេងកាត បាននាំចូលដែកពោង ប្រេង និងសម្ភារៈផ្សងៗទៀតជាច្រើន នៅក្នុង ដំណើរការសាងសង់កន្លងមក។ ប៉ុន្តែមកដល់ពេលនេះគម្រោងនៃការសាងសង់រោងចក្រនោះ ត្រូវបានផ្អាក បណ្តោះអាសន្ន ដោយសារភាគីដៃគូវិនិយោគជួបបញ្ហាហិរញ្ញវត្ថុ ។

លោក ជៀប សួរ បន្តថា អំឡុងពេលនៃការផ្អាកសកម្មភាពសាងសង់ ក្រុមហ៊ុនកំពុងស្ថិតក្នុងដំណាក់កាលពិភាក្សាជាមួយដៃគូវិនិយោគផ្សេងទៀត ដើម្បីបន្តសាងសង់គម្រោងរោងចក្រនេះ។ ចំពោះដំណើរការជជែកពិភាក្សាការងារ ថ្មីនៃគម្រោងសាងសង់ឬក៏លទ្ធផលនៃការពិភាក្សា ក្រសួងរ៉ែ និងថាមពលមិនទាន់ទទួលបាន ព័ត៌មានលម្អិតនៅឡើយទេ ។

រោងចក្រចម្រាញ់ប្រេងកាតស្ថិតនៅខេត្តព្រះសីហនុបានបើកការដ្ឋានសាងសង់កាលពីថ្ងៃទី ០៤ ខែឧសភា ឆ្នាំ ២០១៧ ដោយដំណាក់កាលទី ១ ទុនវិនិយោគក្នុងរង្វង់ ៦២០ លានដុល្លារ។ រោងចក្រនេះគឺជាការវិនិយោគរវាង ក្រុមហ៊ុនវិនិយោគក្នុងស្រុកគឺក្រុមហ៊ុន Cambodian Petrochemical Co.,Ltd និង ក្រុមហ៊ុន CNPC Northeast Refining and Chemical Engineering Co.,Ltd មកពីប្រទេសចិន។

ចំណែកដំណាក់កាលទី២ នឹងត្រូវចាប់ផ្ដើមការសាងសង់ពីឆ្នាំ២០២២ ដោយប្រើទុនវិនិយោគចំនួន១ពាន់លានដុល្លារអាមេរិក និងមានសមត្ថភាពផលិតប្រេងកាតបាន៣លានតោនក្នុងមួយឆ្នាំ សម្រាប់ផ្គត់ផ្គង់តម្រូវការក្នុងស្រុក និងការនាំចេញទៅក្រៅប្រទេស។

ការប្រកាសផ្អាកដំណើរការសាងសង់ រោងចក្រចម្រាញ់ប្រេងកាតលើកដំបូងនៅក្នុងប្រទេសនេះ ជួនចំពេលដែលតម្លៃប្រេង នៅលើទីផ្សារអន្តរជាតិធ្លាក់ធ្លៃ ជាពិសេសការពន្យាពេលជាថ្មីម្តងទៀត ការបូមប្រេងឆៅក្នុង ដែនសមុទ្រកម្ពុជា ដោយក្រុមហ៊ុន KrisEnergy បានស្នើសុំរាជរដ្ឋាភិបាលកម្ពុជាពន្យាពេលបួនខែបន្តទៀត ចាប់ចុងឆ្នាំ ២០២០ ដល់ ខែមេសា ឆ្នាំ ២០២១៕