ដោយ ៖ រ៉ាណេត

ភ្នំពេញ ៖ រដ្ឋបាលក្រុងកំពត បាន និងកំពុងពង្រឹងការអនុវត្តតាមប្លង់គោលនៃហេដ្ឋារចនាសម្ព័ន្ធក្រុង រួមមានការវាស់វែង ចុះបញ្ជីក្បាលដីលក្ខណៈជាប្រព័ន្ធ ការកំណត់ព្រំដែនដែនផ្លូវថ្នល់ ផ្លូវទឹក និងទីតាំងលំនៅដ្ឋានកម្មសិទ្ធិ។

ប្រធានមន្ទីររៀបចំដែនដី នគរូបនីយកម្ម សំណង់និងសុរិយោដីខេត្តកំពត លោក ដាញ់ សារី បានមានប្រសាសន៍នៅថ្ងៃទី៣០ ខែធ្នូ ឆ្នាំ២០២០ បញ្ជាក់ថាការកំណត់ប្លង់គោលហេដ្ឋារចនាសម្ព័ន្ធ ផ្លូវថ្នល់ ផ្លូវទឹក ក្នុងដំណាក់កាល នៃការចុះបញ្ជីលក្ខណៈជាប្រព័ន្ធ គឺពិតជាមានលក្ខណៈពិបាកស្មុគស្មាញ មានផលប៉ះពាល់តិចតួច ប៉ុន្តែវាអាចបង្កលក្ខណៈងាយស្រួលនៅថ្ងៃខាងមុខ។

លោកបានបន្តថា “ដើម្បីសម្រេចដំណើរការបិទផ្សាយបានដោយជោគជ័យ រដ្ឋបាលខេត្ត មន្ត្រីជំនាញពាក់ព័ន្ធត្រូវប្រកាន់យកផ្លូវកណ្តាល (ពលរដ្ឋ អាជ្ញាធរ និងជំនាញទទួលយកបានដូចគ្នា)បានយកចិត្តទុកដាក់ក្នុងការចុះវាស់វែង និងកំណត់ទៅតាមប្លង់គោល។ តាមទិន្នន័យវាស់វែងក្នុងភូមិតាអង្គ សង្កាត់ត្រើយកោះ ក្រុងកំពត មានចំនួន ១.០៥១ក្បាលដី លំនៅឋាន ចំនួន ៨១៩ក្បាលដី និងដីកសិកម្មចំនួន ២១៧ក្បាលដី ហេដ្ឋារចនាសម្ព័ន្ធ ផ្លូវថ្នល់ ផ្លូវទឹក មានចំនួន ចំនួន ៣៩ខ្សែ”។

អភិបាលខេត្តកំពត លោក ជាវ តាយ បានណែនាំដល់មន្ត្រីជំនាញសុរិយោដី មន្ទីរពាក់ព័ន្ធ និងអាជ្ញាធរភូមិឃុំត្រូវរួមសហការគ្នា ចុះពិនិត្យ និងសិក្សាឱ្យបានច្បាស់លាស់ដល់ភូមិសាស្ត្រជាក់ស្តែង មុនសម្រេចកំណត់ហេដ្ឋារចនាសម្ព័ន្ធផ្លូវថ្នល់ ផ្លូវទឹក ក្នុងប្លង់គោលសុរិយោដី នៃការចុះបញ្ជីលក្ខណៈជាប្រព័ន្ធ ដើម្បីកាត់បន្ថយផលប៉ះពាល់ និងរក្សាបាននូវការអភិវឌ្ឍប្រកបដោយចីរភាព នាពេលអនាគត។

លោកបានមានប្រសាសន៍ថា “ការងារវាស់វែងដីធ្លីលក្ខណៈជាប្រព័ន្ធដើម្បីចេញបណ្ណកម្មសិទ្ធិដល់ប្រជាពលរដ្ឋ គឺជាការចាំបាច់ និងសំខាន់ខ្លាំងសម្រាប់ពលរដ្ឋគ្រប់រូប ពិសេសងាយស្រួលក្នុងការអភិវឌ្ឍ និងប្រើប្រាស់ដីឱ្យអស់សកត្តានុពល ក៏ដូចជាងាយក្នុងការអភិវឌ្ឍមូលដ្ឋានភូមិឃុំផងដែរ”។

លោកថា “ពាក់ព័ន្ធនឹងការកំណត់ហេដ្ឋារចនាសម្ព័ន្ធ ផ្លូវថ្នល់ ផ្លូវទឹក ក្នុងប្លង់គោលសុរិយោដី នៃការចុះបញ្ជីលក្ខណៈជាប្រព័ន្ធ មន្ត្រីជំនាញ និងមន្ទីរពាក់ព័ន្ធ រួមនឹងអាជ្ញាធរ មិនអាចសម្រេចយកតាមប្លង់គូរនៅលើតុតាមគោលការណ៍របស់ស្ថាប័ន ឬមន្ទីរខ្លួនបានទេ គឺត្រូវចុះទៅពិនិត្យដល់ទីតាំងភូមិសាស្ត្រជាក់ស្តែង ដើម្បីធានាដល់ការកាត់បន្ថយផលប៉ះពាល់ឱ្យនៅតិចបំផុត និងធានាដល់ការអភិវឌ្ឍប្រកបដោយចីរភាពតទៅថ្ងៃមុខ ព្រោះតំបន់វិនិច្ឆ័យទាំងនោះស្ថិតនៅក្នុងក្រុង ហើយអនាគត នឹងក្លាយជាតំបន់លំនៅដ្ឋាន និងតំបន់អភិវឌ្ឍន៍សេដ្ឋកិច្ចផ្សេងៗ”៕

ដោយ ៖ វុត្ថា
ភ្នំពេញ ៖ ទីផ្សារខុនដូ គឺជានិន្នាការថ្មីស្រឡាងសម្រាប់ការរស់នៅទាន់សម័យ ដែលប្រជាជនកម្ពុជាកំពុងមានការចាប់អារម្មណ៍យ៉ាងខ្លាំងពីការរស់នៅបែបថ្មីនេះ។ អ្នកជំនាញបានបង្ហាញប្រាប់ពីចំនុចគួរប្រុងប្រយ័ត្ន និងត្រូវពិនិត្យឱ្យបានល្អិតល្អន់ មុននឹងសម្រេចចិត្តទិញឬវិនិយោគលើគម្រោងណាមួយ ជៀសវាងហានិភ័យទៅថ្ងៃមុខ។

អ្នកជំនាញលើផ្នែកខុនដូ និងជាអគ្គនាយកក្រុមហ៊ុន ERA Cambodia បានថ្លែងប្រាប់គេហទំព័រ Propertyarea.asia ថា ដើម្បីចៀសវាងទិញចំគម្រោងបោកប្រាស់ និងបង្កើនការប្រុងប្រយ័ត្ន ទី ១ អ្នកទិញឬចង់វិនិយោគគប្បីពិនិត្យឱ្យបានច្បាស់លាស់ទៅលើក្រុមហ៊ុនភ្នាក់ងារលក់។

លោកបន្តថា ព្រោះថាមិនគ្រប់គម្រោងលើទីផ្សារសុទ្ធតែល្អនោះទេ ហើយរបស់ថោកមិនប្រាកដថាល្អ ចំណែកឯរបស់ថ្លៃក៏មិនប្រាកដថាល្អដែរ អញ្ចឹងចាំបាច់ត្រូវមើលទៅលើក្រុមហ៊ុនភ្នាក់ងារលក់សិន ថាក្រុមហ៊ុននោះមានច្បាប់អនុញ្ញាត មានអាជ្ញាបណ្ណដែលហៅថា License មានបង់ពន្ធ ប៉ាតង់ ព្រោះភ្នាក់ងារលក់ខ្លះចេះតែលក់ទាំងគ្មានអាជ្ញាបណ្ណ។

អគ្គនាយករូបនេះបញ្ជាក់ថា ក្រៅពីនេះ អ្នកទិញត្រូវពិនិត្យមើលបន្ថែមទៅឯកសារ អាជ្ញាបណ្ណមួយចំនួនដែលបង្ហាញពីការអនុម័តរបស់រដ្ឋាភិបាល ជាពីសេសប្រវិត្តិនៃការអភិវឌ្ឍឱ្យបានច្បាស់លាស់ប្រាកដប្រជា។ ទី ៣ គឺនៅលើកត្តាទីតាំង និងសំណង់ ថាតើនៅតំបន់នោះមានការអភិវឌ្ឍលើហេដ្ឋារចនាសម្ព័ន្ធគ្រប់គ្រាន់ មិនមានហានិភ័យទិញនៅក្នុងតំបន់អភិវឌ្ឍរបស់រាជរដ្ឋាភិបាល ស៊ើបសួរលម្អិតពីគុណភាពសំណង់ និងគុណសម្បត្តិជាច្រើនទៀត។
ចុងក្រោយ ត្រូវសិក្សាពីតម្លៃរបស់គម្រោងថាតើល្អដែរឬយ៉ាងណា ជាពិសេសដំណើរការនៃការបង់ប្រាក់មានភាពងាយស្រួលឬស្មុគស្មាញដូចម្តេចខ្លះ។ ជាធម្មតាអ្នកមានបំណងចង់ទិញឬវិនិយោគ គប្បីប្រៀបធៀប និងសិក្សាពិនិត្យលើចំនុចទាំងអស់នេះ ជៀសវាងការទិញប៉ះចំគម្រោងមិនមានគុណភាព នាំឱ្យខកចិត្ត និងខាតបង់ថវិកា ព្រោះគម្រោងខុនដូនៅកម្ពុជាមានច្រើនខ្លាំងណាស់នៅក្នុងទីផ្សារក្រុងភ្នំពេញ។

របាយការណ៍របស់ក្រុមហ៊ុន CBRE Cambodia បានឱ្យដឹងថា នៅត្រីមាសទី៤ឆ្នាំនេះ នឹងឃើញការបញ្ចប់គម្រោងចំនួន៤បន្ថែមទៀត ដែលនឹងចូលរួមចំណែកក្នុងទីផ្សារ ប្រមាណ២,៦០០យូនីត ។ ទោះយ៉ាងណា ការពន្យាពេលនៃការសាងសង់ នៅតែបន្តកើតមាននៅក្នុងវិស័យនេះ ដោយបច្ចុប្បន្នមានគម្រោងចំនួន៦ ពន្យាពេលបញ្ចប់គម្រោងទៅឆ្នាំ២០២១៕

ដោយ ៖ រ៉ាណេត
ភ្នំពេញ ៖ នៅក្នុងការធ្វើជំនួញ ឬប្រកបអាជីវកម្មអ្វីមួយចាំបាច់បំផុតគឺការចេះស្គាល់ពីទីផ្សារច្បាស់បន្ថែមពីលើជំនាញដែលខ្លួនមាន បើមិនដូច្នោះទេ ភាពបរាជ័យនឹងតម្រង់ទិសបាញ់មករកខ្លួនជាមិនខាន ជាពិសេសចំពោះអ្នកដែលចេញរកស៊ីទាំងប្រថុយប្រថានដែលធ្វើតាមគេ។ នេះបើតាមការអះអាងរបស់លោកឧកញ៉ាបណ្ឌិត គីម ហ៊ាង ប្រធាន KW Cambodia ។

ប្រធាន KW Cambodia លោកឧកញ៉ាបណ្ឌិត គីម ហ៊ាង បានមានប្រសាសន៍នៅព្រឹកថ្ងៃទី៣០ ខែធ្នូ ឆ្នាំ២០២០នេះថា គ្រប់ការប្រកបអាជីវកម្មទាំងអស់គឺសុទ្ធតែមានគោលដៅយ៉ាងពិតប្រាកដ មានចំណេះដឹង និងជំនាញពាក់ព័ន្ធ ជាពិសេសត្រូវចេះមើល និងស្គាល់ពីទីផ្សារឱ្យបានច្បស់ទើបអាចជៀសផុតពីភាពបរាជ័យ។

លោកឧកញ៉ាបញ្ជាក់ថា “មិនថាជាការរកស៊ីនៅក្នុងទីផ្សារអចលនទ្រព្យ មិនថាចំណោះទីផ្សារបដិសណ្ឋារកិច្ច ឬអាជីវកម្មអ្វីផ្សេងនោះទេ សំខាន់បំផុតមុនពេលបោះទុនវិនិយោគចេញរកស៊ី ថាតើយើងបានស្គាល់ពីទីផ្សារច្បាស់លាស់ឬទេ ? មានគោលជំហរកម្រិតណា និងមានផែនការជាក់ច្បាស់គ្រប់គ្រាន់ហើយឬនៅ? អ្នកខ្លះថា អ្នកដែលអាចមានភាពជោគជ័យទៅលើអាជីវកម្មអ្វីមួយ ទាល់តែមានដើមទុនគ្រប់គ្រាន់ ជាពិសេសមានជំនាញច្បាស់។ ខ្ញុំថា ដើមទុនពិតជាសំខាន់ ប៉ុន្តែអ្វីដែលសំខាន់ខ្លាំងជាងនេះ គឺភាពវៃឆ្លាតចេះមើលពីតម្រូវការទីផ្សារ”។

លោកឧកញ៉ាបន្តថា “ខ្ញុំលើកឧទាហរណ៍ថា មនុស្សម្នាក់ដែលគាត់មានជំនាញផ្នែកចុងភៅ១០ឆ្នាំ គាត់ឈប់ធ្វើការឱ្យគេ ហើយមកបើករកស៊ីខ្លួឯង ភាគរយចំណេញគឺមានអត្រាខ្ពស់។ ដោយឡែក អ្នកដែលធ្លាប់ធ្វើការងារជាភ្នាក់ងារនៅក្នុងទីផ្សារអចលនទ្រព្យច្រើនឆ្នាំ មានបទពិសោធន៍ និងមានបណ្តាញច្រើននោះ នៅពេលដែលគាត់ចេញមកបើកក្រុមហ៊ុនដោយខ្លួនឯង គឺមានភាគរយជោគជ័យខ្ពស់។ ដូច្នេះការធ្វើអាជីវកម្ម ឬមុខជំនួញណាមួយដែលស្របនឹងជំនាញរបស់ខ្លួន គឺមានឱកាសចំណេញ។ ផ្ទុយទៅវិញ សម្រាប់អ្នកដែលមិនមានជំនាញ និងមិនចេះមើលពីទីផ្សារ ហើយចេះតែបើកតាមគេ ទាំងដែលខ្លួនមិនមានជំនាញផងនោះ ភាពបរាជ័យនឹងរត់មករកនៅក្នុងអត្រាខ្ពស់រហូតដល់ប្រមាណ៩០ភាគរយ”៕

ដោយ ៖ រ៉ាណេត
ភ្នំពេញ ៖ អ្នកជំនាញនៅក្នុងវិស័យអចលនទ្រព្យកម្ពុជាបានធ្វើការព្យាករណ៍ថា ទីផ្សារនៃការជួលអាផាតមិននឹងវិលត្រឡប់ទៅរកស្ថានភាពល្អប្រសើរឡើងវិញនៅក្នុងឆមាសទី២ឆ្នាំ២០២១ បន្ទាប់ពីវិបត្តិនៃជំងឺសាកលត្រូវបានទប់ស្កាត់បានជោគជ័យ ខណៈដែលបច្ចុប្បន្នទីផ្សារមួយនេះកំពុងធ្លាក់ដាំក្បាលចុះខ្លាំង។

នាយិកាប្រចាំប្រទេសក្រុមហ៊ុនអន្តរជាតិ CBRE Cambodia លោកស្រី អាន សុធីតា បានមានប្រសាសន៍នៅព្រឹកថ្ងៃទី៣០ ខែធ្នូ ឆ្នាំ២០២០នេះថា សម្រាប់ទីផ្សារនៃការទិញ-លក់អចលនទ្រព្យនៅពេលបច្ចុប្បន្ន ទាំងផ្នែកដីធ្លី លំនៅដ្ឋានកម្រិតមធ្យម ក៏ដូចជាផ្នែកខុនដូកម្រិតមធ្យម គឺនៅតែបន្តមានសកម្មភាពធម្មតា ហាក់មិនជួបបញ្ហាធ្ងន់ធ្ងរនោះទេ ប៉ុន្តែទីផ្សារដែលជួបបញ្ហាខ្លាំង គឺការជួលអាផាតមិនមានការធ្លាក់ចុះខ្លាំងនៅចុងឆ្នាំ២០២០នេះ។

លោកស្រី អាន សុធីតា បានបញ្ជាក់ថា “សម្រាប់ទីផ្សារផ្នែកដទៃក៏មានការប៉ះពាល់ខ្លះដែរ ប៉ុន្តែមិនសូវជាធ្ងន់ធ្ងរខ្លាំងដូចជាទីផ្សារអាផាតមិននោះទេ ជាពិសេសនៅក្នុងត្រីមាសទី៤ ចុងឆ្នាំ២០២០តែម្ដង”។

លោកស្រីថា “នៅចុងឆ្នាំ២០២០នេះ បើធៀបទៅនឹងទៅចុងឆ្នាំ២០១៩ ទីផ្សារនៃការជួលអាផាតមិនត្រូវបានធ្លាក់ចុះតម្រូវការប្រមាណ៨០ភាគរយ ពោលគឺឧទាហរណ៍ថានៅចុងឆ្នាំ២០១៩ មានអ្នកជួលស្នាក់នៅចំនួន១០០នាក់ បច្ចុប្បន្ននៅសល់ត្រឹមតែប្រមាណ២០នាក់តែប៉ុណ្ណោះ។ ហេតុផលដែលធ្វើឱ្យមានការធ្លាក់ចុះចំនួននៃតម្រូវការគឺបណ្តាលមកពីវិបត្តិដែលកំពុងកើត”។

នាយិកាប្រចាំប្រទេសក្រុមហ៊ុនភ្នាក់អចលនទ្រព្យអន្តរជាតិរូបនេះបញ្ជាក់ថា “ទីផ្សារមួយចំណែកធំគឺជាជនជាតិបរទេស ហើយពេលនេះពួកគេមិនអាចចេញពីប្រទេសរបស់ខ្លួននោះទេ ដែលជាមូលហេតុមួយកាត់បន្ថយនូវតម្រូវការជួល។ ម៉្យាងវិញទៀតសូម្បីតែអតិថិជនដែលមានស្រាប់នៅក្នុងស្រុកមួយចំនួនបើទោះជាស្ថិតនៅក្នុងកិច្ចសន្យាជួលមិនទាន់បញ្ចប់ ក៏មានអ្នកខ្លះចំណាយថវិកាបន្ថែមជួលផ្ទះស្នាក់នៅតំបន់ជាយក្រុង ដើម្បីកាត់បន្ថយភាពប្រឈមដូចជាការស្នាក់នៅក្នុងអគាររួម ការប្រើប្រាស់ជណ្ដើរយន្តរួមគ្នាដើម”។

ជាមួយនឹងការលើកឡើងពីផលប៉ះពាល់ខាងលើនេះ លោកស្រី អាន សុធីតា ក៏បានបង្ហាញពីការព្យាករណ៍ផងដែរថា ទីផ្សារជួលអាផាតមិននឹងវិលទៅរកភាពល្អប្រសើរវិញនៅត្រឹមឆមាសទី២ឆ្នាំ២០២១ក្រោយពិភពលោកមានលទ្ធភាពគ្រប់គ្រាន់ក្នុងការទប់ស្កាត់ការរាតត្បាតនៃជំងឺដែលកំពុងកើតមាននៅពេលនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា នៅក្នុងកាលទេសៈដែលកំពុងប្រឈមនឹងការរាតត្បាតក្នុងសហគមន៍នាពេលនេះ សកម្មភាពនៅលើទីផ្សារអចលនទ្រព្យរួមគឺមានភាពស្ងប់ស្ងាត់បន្តិច បន្តែសម្រាប់ការផ្សព្វផ្សាយពីគម្រោង ក៏ដូចជាវិធីសាស្ត្រនៃការជំរុញទីផ្សារលក់ក្នុងស្រុកគឺនៅតែបន្តមានតាមរយៈប្រព័ន្ធបច្ចេកវិទ្យា។

ទោះជាយ៉ាងណាក៏ដោយ លោក ច្រឹក សុខនីម បានសង្កត់ធ្ងន់ថា អ្វីដែលជាកត្តាចាំបាច់ត្រូវខ្វាយខ្វល់ និងត្រូវធ្វើនៅពេលនេះគឺការចូលរួមអនុវត្តជាមួយរាជរដ្ឋាភិបាលកម្ពុជាក្នុងការទប់ស្កាត់ការរាលដាលឆ្លងនៅក្នុងសហគមន៍។ ក្រោយពេលភាពប្រឈមមួយនេះត្រូវបានទប់ស្កាត់ប្រកបដោយប្រសិទ្ធភាពខ្ពស់ នោះវានឹងជួយជំរុញឱ្យទីផ្សារអចលនទ្រព្យក្នុងស្រុកចាប់ផ្តើមមានសន្ទុះឡើងវិញជាមិនខាន៕