ក្រុមហ៊ុនអាកាសចរណ៍ក្នុងស្រុកនឹងប្រតិបត្តិការហោះហើរឡើងវិញនៅពេលឆាប់ៗនេះ

ដោយៈវុត្ថា

ភ្នំពេញៈ មន្ត្រីជាន់ខ្ពស់នៃរដ្ឋលេខាធិការដ្ឋាន នៃអាកាសចរណ៍ស៊ីវិលបានអះអាងថា ក្រុមហ៊ុនវិស័យអាកាសចរណ៍នៅក្នុងប្រទេសកម្ពុជា នឹងបន្តហោះហើរឡើងវិញជាប្រក្រតីនៅប៉ុន្មានខែមុខទទៀត បន្ទាប់ពីពិភពលោក រួមជាមួយនឹងកម្ពុជាអាចទប់ស្កាត់ការរាត្បាតពីជំងឺកូវីដ១៩ ។

លោកខាន់ វណ្ណា អគ្គនាយកដ្ឋានបច្ចេកទេស នៃរដ្ឋលេខាធិការដ្ឋាននៃអាកាសចរណ៍ស៊ីវិលបានប្រាប់គេហទំព័រ Propertyarea.asia កាលពីពេលថ្មីៗនេះថា នៅមុនការផ្ទុះឡើងនូវជំងឺកូវីដ១៩ មានការហោះហើរ និងប្រតិបត្តិការច្រើនទាំងក្រុមហ៊ុននៅក្នុងស្រុក និងមកពីក្រៅស្រុកចូលមកកម្ពុជា ប៉ុន្តែត្រូវបានផ្អាកបណ្តោះអាសន្នទៅវិញ ក្នុងអំឡុងពេលវិបត្តិជំងឺកូវីដ១៩នេះ ។

លោកបន្តថា “ក្រុមហ៊ុនអាកាសចរណ៍ ដែលបានចុះបញ្ជីនៅក្នុងប្រទេសកម្ពុជាមានចំនួន៦ក្រុមហ៊ុនកំពុងប្រតិបត្តិនៅក្នុងប្រទេស ហើយក្រុមហ៊ុនទាំង៦ នេះនឹងប្រតិបត្តិការហោះហើរឡើងវិញ នៅក្នុងរយៈពេលប៉ុន្មាខែខាងមុខទៀត បន្ទាប់ពីមានការទប់ស្កាត់ពីជំងឺកូវីដ១៩បាន១០០ភាគរយ” ។

លោកបន្ថែមថា វិស័យអាកាសចរណ៍វិស៊ីវិលកម្ពុជា ក្នុងរយៈពេលប៉ុន្មានឆ្នាំចុងកន្លងមកនេះ មានការរីកចំរើនគួរឱ្យកត់សម្គាល់ ដោយសាររាជរដ្ឋាភិបាលបានបើកចំហរគោលនយោបាយជើងមេឃ និងអនុញ្ញាតឱ្យក្រុមហ៊ុនរបស់ចិនធំៗ មកវិនិយោគលើអា កាសយានដ្ឋាននៅក្នុងប្រទេស និងមានក្រុមហ៊ុនអាកាសចរណ៍ មកបណ្តាក់ទុនវិនិយោគផងដែរ។ ជាពិសេសប្រទេសកម្ពុជា របស់យើងមានសក្តានុពលខ្ពស់ សំរាប់បំរើឱ្យវិស័យ ទេសចរណ៍ ។

ជាមួយគ្នានេះ លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជាបានឱ្យដឹងដែរថា វិស័យទេសចរណ៍ ពឹងផ្អែកលើភ្ញៀវមកពីក្រៅស្រុក ជាពិសេសមកពីប្រទេសចិន ហើយនៅពេលដែលមានប្រតិបត្តិការហោះហើរឡើងវិញ មិនថាក្រុហ៊ុនអាសកាសចរណ៍នៅក្នុងស្រុក និងក្រៅស្រុក វិស័យទេសចរណ៍មានសង្ឃឹមឡើងវិញ។

លោកស្រីបន្តថា “ក្នុងអំឡុងពេលនៃវិបត្តិជំងឺកូវីដ១៩ វិស័យទេសចរណ៍កម្ពុជា បានធ្លាក់ចុះយ៉ាងខ្លាំង ជាពិសេសភ្ញៀវទេសចរបរទេស ដោយសារមានការបិទជើងហោះហើរមិនថាប្រទេសកម្ពុជា និងនៅក្នុងតំបន់ដោយសារព្រួយបារម្ភពីការឆ្លងជំងឺកូវីដ១៩” ។

លោកស្រីឆាយ ស៊ីវលីន បានបន្តថា កត្តាមួយទៀតវាជាសញ្ញាល្អមួយដែរ បន្ទាប់ពីរាជរដ្ឋាភិបាលកម្ពុជាបញ្ជាទិញវាក់សាំង និងពិភពលោក រកឃើងនូវថ្នាំវាក់សាំងប្រឆាំងនឹងជំងឺកូវីដ១៩នេះ ដែលនឹងធ្វើឱ្យសន្ទុះទេសចរណ៍នឹងងើបឡើងវិញ ព្រោះមនុស្សអាចធ្វើដំណើរ និងប្រទេសមួយចំនួនទៀតបើកចំហរប្រទេសឡើងវិញ៕

ក្រុមហ៊ុនយក្សជប៉ុនឈ្នះការដេញថ្លៃទឹកប្រាក់ ៦៦៣លានដុល្លារ លើការសាងសង់ផ្លូវដែកនៅមីយ៉ាន់ម៉ា

ដោយៈវុត្ថា

តូក្យូៈ ក្រុមហ៊ុនរបស់ជប៉ុន Mitsubishi Corp បានឈ្នះការដេញថ្លៃ និងបានចុះហត្ថលេខាលើកិច្ចសន្យាសាងសង់ផ្លូវដែកជាតិ របស់ប្រទេសមីយ៉ានម៉ាចំនួន២គម្រោង ដែលមានទឹកប្រាក់ចំនួន ៦៦៣លានដុល្លារអាមេរិក តាមរយៈកិច្ចព្រមព្រៀងប្រាក់កម្ចីបរទេសរវាងរដ្ឋាភិបាលជប៉ុន និងមីយ៉ាន់ម៉ា។

យោងតាមការចុះផ្សាយរបស់គេហទំព័រ motorworld.app បានឱ្យដឹងថា គំរោងទាំងពីនេះ បានមកពីយុទ្ធនាការដាក់ចេញនូវផែនការ នាំចេញហេដ្ឋារចនាសម្ព័ន្ធផ្លូវដែករបស់រដ្ឋាភិបាលជប៉ុន ក្នុងការពង្រីកមកាន់តំបន់អាស៊ីអាគ្នេយ៍។

តាមការរយៈកិច្ចព្រមព្រៀងនេះ ក្រុមហ៊ុន Mitsubishi នឹងបញ្ជូនទូររថភ្លើងចំនួន ៦៦ សម្រាប់តភ្ជាប់ផ្លូវដែក Circular Railway ដែលរត់នៅក្នុងទីក្រុង Rangon និងទូ១៨០ សម្រាប់ផ្លូវដែក Yangon-Mandalay Railway ដែលតភ្ជាប់ពីទីក្រុង Yangon ទីក្រុង Naypyitaw និងទីក្រុង Mandalay ។

ខ្សែរថភ្លើងថ្មីនេះ នឹងចួលរួមកាត់បន្ថយពេលវេលា តាមរយៈការធ្វើដំណើរតាមផ្លូវដែកនៅក្នុងទីក្រុង Yangon ដែលមានប្រវែង ៤៦គីឡូម៉ែត្រ ដោយប្រើពេលប្រហែល ១៧០ នាទីទៅ១១០ នាទី និងផ្លូវដែករវាង ទីក្រុង Rangon និង Mandalay មានចម្ងាយ ៦២០គីឡូម៉ែត្រ នឹងត្រូវចំណាយពី ១៥ម៉ោង ឬប្រហែល ៨ម៉ោងប៉ុណ្ណោះ។

ប្រទេសមីយ៉ាន់ម៉ា បានខកខានកែលម្អប្រព័ន្ធផ្លូវដែកជាតិរបស់ខ្លួន អស់ជាច្រើនទសវត្សរ៍ក្រោមការគ្រប់គ្រងរបស់កងទ័ព។ ការជួសជុលកែលំអនេះ នឹងពង្រីកការគ្រប់គ្រងរបស់រដ្ឋាភិបាល នៅជុំវិញស្ថានីយ៍កណ្តាលនៅក្នុងទីក្រុង។ នៅតាមស្ថានីយដឹកជញ្ជូនថ្មីនេះ ក៏នឹងមានអគារពាណិជ្ជកម្មខ្ពស់ៗដុះឡើងផងដែរ និងក៏ជាកន្លែងផ្សព្វផ្សាយពាណិជ្ជកម្មដ៏សំខាន់របស់ទីក្រុង។

ខ្សែផ្លូវដែករវាងទីក្រុង Yangon និងទីក្រុង Mandalay ដែលបន្សល់ទុកជាង៦០ ឆ្នាំរបស់ទីក្រុងធំបំផុតនៃប្រទេសនេះ នឹងក្លាយជាតំបន់មានឥទ្ធិពល ទៅតំបន់ភាគខាងជើងនៃទីក្រុង Mandalay ដែលជាកន្លែងផលិតផលិតផលកសិកម្ម និងធនធានរុក្ខជាតិឈានមុខគេរបស់ប្រទេស៕

ចក្ខុវិស័យថ្មី៖ ភាគខាងជើងក្រុងភ្នំពេញទាក់ទាញគំរោងវិនិយោគខុនដូកាន់តែច្រើន

ដោយៈ គង់ សូរិយា

ភ្នំពេញៈ ខុសប្លែកកាលពីប៉ុន្មានឆ្នាំមុន ដែលនៅពេលនិយាយពីវិស័យខុនដូ គេតែងនឹកឃើញដល់តំបន់កណ្តាលក្រុង ដូចជាខណ្ឌបឹងកេងកង ខណ្ឌដូនពេញ និងខណ្ឌ៧មករា ជាដើម ប៉ុន្តែពេលនេះទីផ្សារខុនដូបានប្ដូរទិសដៅ បាញ់ឆ្ពោះទៅកាន់តំបន់ភាគខាងជើងក្រុងវិញម្ដង ជាក់ស្ដែងដូចជាខណ្ឌសែនសុខ ដែលកំពុងមានសកម្មភាពច្រើនគម្រោង។

ប្រធានសមាគមអចលនទ្រព្យសកល លោកសំ សុខនឿន បានមានប្រសាសន៍ប្រាប់តាមទូរស័ព្ទនៅពេលថ្មីៗនេះថា បច្ចុប្បន្ននេះ ទីផ្សារខុនដូដែលមានតម្លៃមធ្យម បានចាប់ផ្តើមមានតម្រូវការជាបណ្តើរៗ ហើយក្នុងនោះអតិថិជនដែលជាជនជាតិខ្មែរ ក៏មានច្រើនដែរ។

លោកបញ្ជាក់ថា “ការជំរុញឱ្យមានកំណើននៃតម្រូវការទីផ្សារខុនដូ គឺបណ្តាលមកពីកត្តារួមផ្សំជាច្រើន រួមមានដូចជាការយល់ដឹងពីភាពល្អប្រសើរ នៃការរស់នៅបែបទំនើប កត្តាកំណើនប្រជាសាស្ត្រនៅក្នុងរាជធានីភ្នំពេញ ជាពិសេសកត្តានៃការកកស្ទះចរាចរណ៍ ហើយក្រៅពីនេះ ក៏មានការចូលរួមចំណែកពីការជួញដូ អចលនទ្រព្យដើម្បីចំណេញផងដែរ” ។

ដោយឡែកពាក់ព័ន្ធទៅនឹងទំនោរនៃការវិនិយោគ និងអភិវឌ្ឍន៍សំណង់ខុនដូនៅក្នុងខណ្ឌសែនសុខនាពេលបច្ចុប្បន្ន ត្រូវបានលើកបញ្ជាក់ប្រាប់ថា តម្លៃដីនៅកណ្តាលក្រុងបានឡើងខ្ពស់ដល់កម្រិត ដូច្នេះអ្នកអភិវឌ្ឍន៍តែងសិក្សាទៅលើទីតាំង ដែលមានតម្រូវជាក់ស្ដែង ជាពិសេសកត្តាតម្លៃដី ដែលអាចអនុគ្រោះដល់ការវិនិយោគរបស់ពួកគេ។

លោកបានបញ្ជាក់ថា តម្លៃដីនៅកណ្តាលក្រុងបានឡើងខ្ពស់ រហូតនៅតំបន់ខ្លះ ៨០០០ដុល្លារក្នុងមួយម៉ែត្រការ៉េ ដែលតម្លៃនេះមិនអនុគ្រោះដល់ការវិនិយោគ និងអភិវឌ្ឍន៍ប្រភេទខុនដូតម្លៃមធ្យមនោះទេ។ ផ្ទុយទៅវិញ តម្លៃដីដែលអាចផ្តល់ឱកាសចំណេញក្នុងការវិនិយោគខុនដូប្រភេទនេះ គឺស្ថិតក្នុងតម្លៃជាង១០០០-១៥០០ដុល្លារក្នុងម៉ែត្រការ៉េ។ លោកបន្តថា បច្ចុប្បន្ននៅខណ្ឌសែនសុខ បានក្លាយជាតំបន់គោលដៅក្នុងការវិនិយោគ និងអភិវឌ្ឍន៍សំណង់ខុនដូ ខណៈដែលតំបន់សែនសុខនេះ បានឆ្លងផុតពីគម្រោងវិនិយោគលើលំនៅដ្ឋានកម្រិតមធ្យមទៅហើយ។

ជាមួយគ្នានេះ លោក ខន គង្គា អគ្គនាយក្រុមហ៊ុនភ្នាក់ងារអចលនទ្រព្យ ERA Cambodia បានទទួលស្គាល់ពីភាពរីកចម្រើន នៃទីផ្សារខុនដូនៅក្នុងខណ្ឌសែនសុខ ដែលស្ថិតនៅភាគខាងជើងរាជធានីភ្នំពេញនាពេលបច្ចុប្បន្ននេះ។

លោកបានមានប្រសាសន៍ថា “សម្រាប់ទីផ្សារខុនដូ នៅមួយរយៈចុងក្រោយនេះ គឺមានសកម្មភាពឡើងវិញគួរឱ្យកត់សម្គាល់ ជាពិសេសប្រភេទខុនដូតម្លៃមធ្យម ដែលមានតម្លៃចាប់ពី ២០០០ដុល្លារក្នុងមួយម៉ែត្រការ៉េចុះក្រោម គឺមានតម្រូវការខ្ពស់” ។ លោកបន្តថា “អ្នកទិញខុនដូប្រភេទនេះមាន២ ទី១ អ្នកដែលបម្រើការងារ និងមានមុខជំនួញនៅក្នុងក្រុង ដែលមានតម្រូវការជាក់ស្ដែងសម្រាប់រស់នៅ ហើយទី២ គឺអ្នកជំនួញអចលនទ្រព្យ ទិញទុកវិនិយោគបន្តយកចំណេញ ដែលអតិថិជនទាំង២ប្រភេទនេះ ភាគច្រើនជាអ្នកក្នុងស្រុក” ។

លោកខន គង្គា បានបង្ហាញពីភាពជឿជាក់ថា តម្រូវការទីផ្សារខុនដូកម្រិតមធ្យម នឹងនៅតែបន្តមាន ជាពិសេសតម្រូវការជាក់ស្ដែង ពីសំណាក់អតិថិជនក្នុងស្រុក ដែលជាចំណែកមួយយ៉ាងសំខាន់នៅក្នុងវិស័យមួយនេះ៕

ការសិក្សា៖ ទីក្រុងភ្នំពេញបានក្លាយទៅជាទីក្រុងសម្រាប់ទីស្នាក់ការកណ្តាលរបស់វិស័យឯកជន និងសាធារណៈ

ដោយៈ ប៊ី

ភ្នំពេញៈ ខណៈការអភិវឌ្ឍទីក្រុងមានល្បឿនលឿន និងគម្រោងហេដ្ឋារចនាសម្ព័ន្ធធំៗ បានលាតសន្ធឹងនៅលើផ្តេកទន្លេមេគង្គរាជធានីភ្នំពេញ បានផ្លាស់ប្តូររូបរាងរបស់ខ្លួន ដែលពោរពេញទៅដោយតំបន់ពាណិជ្ជ អាជីវកម្ម និងទេសចរណ៍ប្រកបដោយសក្តានុពល។

របាយការណ៍ក្រុមហ៊ុន C9 Hotelworks បានបង្ហាញពីកំណើនប្រកបដោយចីរភាពផងដែរ ដោយសារតែការមកដល់របស់អ្នកដំណើរ បានកត់សំគាល់អត្រាកំណើនសេដ្ឋកិច្ចពីរខ្ទង់ពីឆ្នាំ២០១២ ដល់ឆ្នាំ២០១៨ ដោយអត្រាកំណើនប្រចាំឆ្នាំ CAGR (១៨ ភាគរយ)។

ច្បាស់ណាស់ កត្តាជំរុញសំខាន់នៃការផ្លាស់ប្តូរសម្រាប់ “ទីក្រុង”គឺជាទីស្នាក់ការកណ្តាលរបស់វិស័យឯកជន និងសាធារណៈ និងទីតាំងយុទ្ធសាស្ត្រសម្រាប់គម្រោងគំនិតផ្តួ ចផ្តើមខ្សែក្រវ៉ាត់ និងផ្លូវ (BRI) ដ៏មានមហិច្ឆតារបស់ចិន។ គម្រោង BRI ឥឡូវនេះលាតសន្ធឹងពាសពេញប្រទេសកម្ពុជា ហើយរត់ទៅខាងត្បូងឈូងសមុទ្រថៃ និងទៅដល់សមុទ្រចិនខាងត្បូង។

ការសិក្សានេះបានបង្ហាញថា អាស៊ី គឺជាប្រភពប្រភពអ្នកទេសចរលេចធ្លោ ដែលតំណាងឱ្យចំណែកទីផ្សារ ៧៩ភាគរយ។ ការសិក្សានេះបានបន្ថែមថា ៦៦ភាគរយ នៃចរាចរណ៍ក្នុងតំបន់មកពីប្រទេសចិនដីគោក។

ប្រទេសចិន បាននាំមុខទីផ្សារប្រភពភូមិសាស្ត្រខ្ពស់ជាងគេ ដោយគ្របដណ្តប់ចំនួន៥២ភាគរយ បន្ទាប់មកគឺប្រទេសម៉ាឡេស៊ី (៦ ភាគរយ) សហរដ្ឋអាមេរិក (៥ ភាគរយ) ជប៉ុន (៤ ភាគរយ) និងថៃ (៤ ភាគរយ) ។

ឆ្លុះបញ្ចាំងពីវិធីដែលអ្នកធ្វើដំណើរទៅក្រៅប្រទេស កំពុងធ្វើដំណើរទៅក្នុងវិស័យសេវាកម្មស្នាក់នៅរបាយការណ៍ C9 បានបង្ហាញថា មានសណ្ឋាគារចំនួន ៣១៣ មានបន្ទប់សរុប ១៩.៣៣៧ និងផ្ទះសំណាក់ចំនួន ៥២៣ នៅក្នុងរាជធានីភ្នំពេញ។

សញ្ញាច្បាស់អំពីការរីកចម្រើនយ៉ាងឆាប់រហ័ស ដែលជះឥទ្ធិពលដល់វិស័យបដិសណ្ឋារកិច្ចត្រូវបានបង្ហាញថា បច្ចុប្បន្នមានសណ្ឋាគារថ្មីចំនួន១៥ កំពុងដំណើរការជាមួយបន្ទប់ចំនួន ៧.៨៤៩ ខណៈគម្រោង ១៣ទៀត នឹងចូលទីផ្សារនាពេលខាងមុខ។

ចំពោះវិស័យសណ្ឋាគារនៅទីក្រុង មានបញ្ហាប្រឈមជាច្រើនទៀតចំពោះកំណើនសណ្ឋាគារថ្មី និងធំជាងមុន។

លោក Bill Barnett នាយកគ្រប់គ្រងរបស់ក្រុមហ៊ុន C9 បានមានប្រសាសន៍ថា “២ ឆ្នាំខាងមុខនឹងមានការផ្លាស់ប្តូរដ៏ធំមួយ នៅក្នុងការផ្គត់ផ្គង់កន្លែងស្នាក់នៅ ខណៈដែលយីហោថ្មី១០ ត្រូវបានគេព្យាករណ៍ថានឹងផ្គត់ផ្គ ង់នៅចន្លោះពេលនេះនិង ២០២។ ផ្នែកផ្សេងទៀតរួមមានភ្ញៀវទេសចរ និងវិស័យសាជីវកម្ម។

លោកបានបន្តថា “ទីក្រុងភ្នំពេញស្ថិតក្នុងទីតាំងកណ្តាល នៃច្រកចេញចូលពាណិជ្ជកម្មរបស់តំបន់អាស៊ី ដូចនឹងមណ្ឌលច្រកចេញចូលនៅទីក្រុងហ្សាការតា និងរ៉ង់ហ្គូន” ៕

បញ្ហាផលប្រយោជន៍៖ អាមេរិកព្រួយបាម្ភ ខណៈសហភាពអឺរ៉ុបត្រួសត្រាយផ្លូវសម្រាប់កិច្ចព្រមព្រៀងវិនិយោគជាមួយចិន

ដោយៈសុខុម

ក្រុងព្រុចសែល: បណ្ដាប្រទេសជាសមាជិកសហភាពអឺរ៉ុប បានផ្ដល់ការគាំទ្រផ្នែកនយោបាយ ដល់កិច្ចព្រមព្រៀងវិនិយោគរបស់ក្រុងព្រុចសែល ជាមួយប្រទេសចិន ដោយត្រួសត្រាយផ្លូវ ឈានទៅសម្រេចបានកិច្ចព្រមព្រៀងមួយ រវាងប្លុកសេដ្ឋកិច្ចធំបំផុតរបស់ពិភពលោកនេះ។

មន្ត្រីការទូតមួយរូបបានលើកឡើងថា នៅក្នុងកិច្ចប្រជុំនៃក្រុមមន្ត្រីការទូត ភាគីអាល្លឺម៉ង់ ដែលជាប្រធានឆ្លាស់វេនរបស់សហភាពអឺរ៉ុប បានធ្វើការកត់សម្គាល់ថា គ្មានប្រទេសជាសមាជិកណាមួយ “លើកសញ្ញារារាំងឡើយ ហេតុដូចនេះផ្លូវឆ្ពោះទៅរកការអនុម័តផ្នែកនយោបាយត្រូវបានត្រួសត្រាយហើយ” ។

មន្ត្រីការទូតបានធ្វើការកត់សម្គាល់អំពី “ស្ថានភាពវិវឌ្ឍន៍ជាវិជ្ជមានថ្មីៗនេះ” នៅក្នុងដំណើរការចរចា ដោយភាគីចិន បានសម្ដែងការព្រួយបារម្ភអំពី ការប្រើប្រាស់ពលកម្មដោយបង្ខំនៅកសិដ្ឋានរបស់ខ្លួន។

ស្ថានភាពវិវឌ្ឍន៍ចុងក្រោយនេះ បានកើតមានឡើង ក្រោយពីក្រសួងការបរទេសចិន បានលើកឡើងកាលពីសប្ដាហ៍មុនថា “ការចរចាបានឈានដល់ដំណាក់កាលចុងក្រោយហើយ” ។

មន្ត្រីការទូតមួយរូបទៀតបានលើកឡើងថា កិច្ចព្រមព្រៀងមួយ អាចនឹងត្រូវប្រកាសជាផ្លូវការនៅសប្ដាហ៍នេះ។

មន្ត្រីប្រេសិតជាន់ខ្ពស់រូបនោះ បានប្រាប់ទីភ្នាក់ងារព័ត៌មាន AFP ថា “យើងត្រូវតែប្រយ័ត្នប្រយែង ប៉ុន្តែប្រទេសចិន បានព្រមព្រៀងរួចហើយ ដែលអាចនឹងមានការប្រកាសជាផ្លូវការពីក្រុងព្រុចសែល និងរដ្ឋាភិបាលក្រុងប៉េកាំង ត្រឹមដំណាច់សប្ដាហ៍នេះ” ។

នៅក្នុងកិច្ចប្រជុំ គ្មានប្រទេសជាសមាជិកណាមួយ ចេញមុខអន្តរាគមន៍រារាំងកិច្ចព្រមព្រៀងនេះឡើយ ប៉ុន្តែក្រោយមកឯកអគ្គរដ្ឋទូតប៉ូឡូញ Andrzej Sados បានលើកឡើងថា លោកបានសម្ដែងមន្ទិល ក្រោយពីភាគីអាល្លឺម៉ង់ ដាក់វាចូលក្នុងរបៀបវារៈនៃកិច្ចប្រជុំ។

កិច្ចព្រមព្រៀងនេះគឺជាការលើកកម្ពស់ និងពង្រឹងទំនាក់ទំនងរវាងភាគីទាំងពីរ មុនពេលប្រធានាធិបតី ទើបជាប់ឆ្នោតរបស់សហរដ្ឋអាមេរិក លោកចូ បៃឌិន ចូលកាន់តំណែងជាផ្លូវការនៅខែមករា ឆ្នាំ២០២១ ។

ប្រធានាធិបតីជិតចប់អាណត្តិរបស់សហរដ្ឋអាមេរិក លោក ដូណាល់ ត្រាំ បានចាប់ផ្ដើមធ្វើសង្គ្រាមពាណិជ្ជកម្មជាមួយប្រទេសចិន ប៉ុន្តែលោកចូ បៃឌិន ក៏បានសម្ដែងការព្រួយបារម្ភ អំពីចំណាត់ការរបស់សហភាពអឺរ៉ុប ដោយក្រុមរបស់លោកបានជំរុញឱ្យក្រុងព្រុចសែល ពិគ្រោះយោបល់ជាមួយរដ្ឋាភិបាលក្រុងវ៉ាស៊ីនតោន ឱ្យបានល្អិតល្អន់ ដោយលើកឡើងថា ការពន្លឿនដំណើរការចរចាយ៉ាងតក់ក្រហល់ និងមិនសមហេតុផលទាក់ទិនបញ្ហាដ៏សំខាន់បែបនេះ ពិតជាបង្កការព្រួយបារម្ភដល់ទំនាក់ទំនងអន្តរជាតិ។

ប្រទេសអាល្លឺម៉ង់ ដែលជាប្រទេសមានសេដ្ឋកិច្ចឈានមុខគេ របស់សហភាពអឺរ៉ុប និងជាប្រធានឆ្លាស់វេនរបស់ប្លុកនេះ រហូតដល់ដំណាច់ឆ្នាំនេះ បានយកបញ្ហាធ្វើយ៉ាង ណាសម្រេចឱ្យបានកិច្ចព្រមព្រៀងនេះ ជាការងារអាទិភាពរបស់ខ្លួន។

គណៈកម្មការអឺរ៉ុប ដែលជាផ្នែកប្រតិបត្តិរបស់សហភាពអឺរ៉ុប បានលើកឡើងកាលពីមុនបុណ្យណូអែលថា សេចក្ដីព្រាងនៃ “កិច្ចព្រមព្រៀងនយោបាយនេះ សម្រេចបាន ៩៥% ហើយ” ហើយត្រូវការតែការឱ្យភ្លើងខៀវពីក្រុងព្រុចសែលប៉ុណ្ណោះ៕

តំបន់ជ្រោយចង្វារផ្លូវជាតិលេខ៦A កំពុងក្លាយជាទីតាំងបណ្តុំលំនៅដ្ឋានទាន់សម័យកម្រិតខ្ពស់

ដោយៈ រ៉ាណេត

ភ្នំពេញៈ តំបន់ជ្រោយចង្វារ ស្ថិតនៅតាមផ្លូវជាតិលេខ៦ បច្ចុប្បន្ននៅតែជាទីតាំងដែលប្រមូលផ្តុំ ទៅដោយសំណង់លំនៅដ្ឋានបែបទំនើប និងមានតម្លៃថ្លៃចាប់ពីជិត២០ម៉ឺន រហូតដល់ជាង១លានដុល្លារ ដែលស្ថិតនៅក្នុងគម្រោងបុរីធំជាច្រើន។

ចាប់តាំងពីតំបន់គល់ស្ពានជ្រោយចង្វារ ឆ្ពោះទៅទិសខាងជើងស្របតាមបណ្តោយផ្លូវជាតិលេខ៦A មានគម្រោងអភិវឌ្ឍន៍លំនៅដ្ឋានធំៗជាច្រើន ដែលកំពុងបង្ហាញរូបរាងជាបន្តបន្ទាប់ ដូចជាគម្រោងទីក្រុងរណប និងមជ្ឈមណ្ឌលពាណិជ្ជកម្មរបស់ក្រុមហ៊ុន OCIC គម្រោងរបស់ក្រុមហ៊ុនលី យ៉ុងផាត់ គម្រោងសំណង់បុរីលំនៅដ្ឋានបែបទំនើប និងប្រណីតជាច្រើន ក្រោមទុនវិនិយោគរាប់សិបពាន់លានដុល្លារ។

ជាមួយនឹងទិដ្ឋភាពជាក់ស្ដែង នៃការអភិវឌ្ឍឥតឈប់ឈរ នៅក្នុងវិស័យសំណង់លំនៅដ្ឋានទាំងនេះ លោកឧកញ៉ានួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានមានប្រសាសន៍ឲ្យដឹងនៅល្ងាចថ្ងៃទី២៩ ខែធ្នូ ឆ្នាំ២០២០ កន្លងមក ដោយបានបង្ហាញពីក្ដីសាទរ ជាមួយនឹងសកម្មភាពរីកចម្រើនទាំងអស់នេះ។

លោកបានមានប្រសាសន៍ថា “វាមិនមែនជារឿងចម្លែកនោះទេ នៅពេលដែលប្រទេសជាតិមានភាពរីកចម្រើន និងអភិវឌ្ឍន៍ ជាពិសេសតំបន់ក្រុងភ្នំពេញមានការកើនឡើងនូវ ចំនួនអគារធំៗ ដូចជាសំណង់ខុនដូ អាផាតមិនជាដើម នោះតំបន់ដែលស្ថិតនៅជាប់ក្រុង គឺត្រូវតែមានតម្រូវការខ្ពស់” ។

ជាក់ស្ដែង ដូចជាតំបន់ជ្រោយចង្វារជាដើម ដែលពីមុនមានភាពទូលាយល្ហល្ហេវ ប៉ុន្តែបច្ចុប្បន្ននេះ បានក្លាយទៅជាតំបន់ដ៏មានសក្ដានុពល ជាពិសេសលើផ្នែកសំណង់លំនៅដ្ឋានតែម្ដង ដែលជំរុញឱ្យតម្លៃដីមានការកើនឡើងខ្ពស់ ។

លោកឧកញ៉ានួន រិទ្ធី បានបញ្ជាក់ថា កាលពីប៉ុន្មានឆ្នាំមុន តម្លៃដីនៅតំបន់ជ្រោយចង្វារមានកម្រិតទាបនៅឡើយ ពោលគឺប្រមាណ ១០០០ទៅ១៥០០ដុល្លារ ក្នុងមួយម៉ែត្រការ៉េតែប៉ុណ្ណោះ ប៉ុន្តែឥឡូវបានកើនឡើងខ្ពស់រហូតដល់២៥០០ ទៅដល់ ៣៥០០ដុល្លារក្នុងមួយម៉ែត្រ ហើយទីតាំងខ្លះអាចមានតម្លៃថ្លៃជាងនេះ។

លោកបន្តទៀតថា “ប្រសិនបើបរិយាកាសសេដ្ឋកិច្ចកម្ពុជា នៅតែមានភាពល្អប្រសើរ មិនយូរទៀតនោះទេវានឹងក្លាយជាតំបន់ពិសេស អំណោយផលលើវិស័យលំនៅដ្ឋាន ក៏ដូចជាមណ្ឌលពាណិជ្ជកម្មផ្សេងៗ ដែលកើតមានអគារធំៗ និងខ្ពស់ៗមិនក្រោម១៥ -២០ ជាន់នោះទេ” ។

បច្ចុប្បន្ននេះ វត្តមាននៃគម្រោងបុរីលំនៅដ្ឋាន បែបទំនើបជាច្រើនកំពុងតែបង្ហាញខ្លួននៅតំបន់ខាងលើនេះ ដែលកាន់តែបង្ហាញពីសក្ដានុពលនៃតំបន់កាន់ខ្លាំង និងទាក់ទាញបំផុត ដូចជា សំណង់បុរីសុភមង្គល បុរី The Mekong Royal បុរី ហេង ហ៊ាង ស៊ីធី បុរី ប៉េង ហួត, បុរី New Town បុរី អរគីដេវីឡា បុរី រុងរឿង បុរី The Flora, បុរីមង្គលភ្នំពេញ បុរី ភ្នំពេញផាក បុរី ដឹមេគង្គរ៉ូយ៉ាល់ បុរីហាយលែន និងបុរីវិមានភ្នំពេញជាដើម។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ដែរថា បច្ចុប្បន្ននេះតំបន់ខាងលើ បានក្លាយជាតំបន់មុំត្រIកោណស័ក្ដិសម ទៅនឹងការអភិវឌ្ឍជាទីក្រុងរណប ដោយសារតែវាមានកត្តាភូមិសាស្ត្រល្អ និងអំណោយផលពីធម្មជាតិ ដែលព័ទ្ធជុំវិញទៅទន្លេមេគង្គ និងទន្លេសាប ។

លោកបានបន្តទៀតថា “ក្រៅពីមានភាពអំណោយផលពីធម្មជាតិ សមស្របទៅនឹងលំនៅដ្ឋានរស់នៅ ថែមទាំងមានបណ្តាញហេដ្ឋារចនាសម្ព័ន្ធធំៗជាច្រើន ដែលរាជរដ្ឋាភិបាល ក៏ដូចជា វិស័យឯកជនបានអភិវឌ្ឍន៍ ជាពិសេសផ្លូវជាតិលេខ ៦A តែម្ដង ដែលផ្តល់ភាពងាយស្រួលក្នុងការធ្វើដំណើរ និងដឹកជញ្ជូន” ៕

រដ្ឋាភិបាលកម្ពុជាគ្រោងបង្កើតក្រុមហ៊ុនថ្នាលទូរទស្សន៍ឌីជីថលថ្មី”

ដោយៈ គង់ សូរិយា

ភ្នំពេញ: រដ្ឋាភិបាល ដែលមានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ គ្រោងបង្កើតក្រុមហ៊ុនថ្នាលទូរទស្សន៍ឌីជីថលថ្មីមួយ ដើម្បីដើម្បីស្វែងយល់ពីស្ថានភាពបច្ចុប្បន្ន វឌ្ឍនភាព និងបញ្ហាប្រឈមពាក់ព័ន្ធ នឹងការផ្លាស់ប្តូរការផ្សាយទូរទស្សន៍ ពីប្រព័ន្ធអាណាឡូកទៅជាប្រព័ន្ធឌីជីថល។

កិច្ចប្រជុំកាលពីថ្ងៃទី២៨ ខែ ធ្នូ ឆ្នាំ ២០២០កន្លងមក ក្រោមអធិបតីភាពលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការ គោលនយោបាយសេដ្ឋកិច្ច និងហិរញ្ញវត្ថុ (គ.ស.ហ) បានដឹកនាំកិច្ចប្រជុំអន្តរក្រសួង ដើម្បីពិនិត្យ និងពិភាក្សា លើសំណើសុំគោលការណ៍អនុញ្ញាត “បង្កើតក្រុមហ៊ុនថ្នាលទូរទស្សន៍ឌីជីថលថ្មី”។

អ្នកនាំពាក្យក្រសួងសេដ្ឋកិច្ចបានប្រាប់ថា ស្របតាមបរិបទនៃការវិវឌ្ឍជាក់ស្តែងនៃឌីជីថលូបនីយកម្មរបស់កម្ពុជា កិច្ចប្រជុំនេះ មានគោលបំណងប្រមូលធាតុចូលបន្ថែម និងផ្លាស់ប្តូរទស្សនទាន ដើម្បីស្វែងយល់ពីស្ថានភាពបច្ចុប្បន្ន វឌ្ឍនភាព និងបញ្ហាប្រឈមពាក់ព័ន្ធនឹងការផ្លាស់ប្តូរការផ្សាយទូរទស្សន៍ ពីប្រព័ន្ធអាណាឡូកទៅជាប្រព័ន្ធឌីជីថល។

កិច្ចប្រជុំក៏បានពិភាក្សាលើចំណុចសំខាន់ៗចំនួន៤ រួមមាន ទី១ ការអនុវត្តផែនការផ្លាស់ប្តូរ ការផ្សាយទូរទស្សន៍ពីប្រព័ន្ធអាណាឡូក ទៅជាប្រព័ន្ធឌីជីថលឱ្យបានមុនឆ្នាំ ២០២៣ ទី២ ការគ្រប់គ្រងនូវការប្រើប្រាស់បន្ទារហ្វ្រេកង់ស៍៧០០MHz ក្នុងវិស័យសោតទស្សន៍ រួមមានទូរទស្សន៍ឌីជីថល ប្រព័ន្ធអ៊ីនធើណេត និងទូរស័ព្ទចល័ត ទី៣ យន្តការគ្រប់គ្រង និងវិនិយោគ លើថ្នាលទូរទស្សន៍ឌីជីថលថ្មី និងទី៤ ការធ្វើបច្ចុប្បន្នកម្មលើវឌ្ឍនភាពពាក់ព័ន្ធនឹងការរៀបចំ និងការគ្រប់គ្រងហេដ្ឋា-រចនាសម្ព័ន្ធប្រព័ន្ធឌីជីថលក្នុង រយៈពេលមធ្យម និងវែង ក៏ដូចជាពិភាក្សាពីលទ្ធភាព នៃការបង្កើតគំរូពាណិជ្ជកម្មសម្រាប់ ការវិនិយោគក្នុងវិស័យពាក់ព័ន្ធនឹងប្រព័ន្ធឌីជីថល។

លទ្ធផលនៃកិច្ចប្រជុំនេះ បានសម្រេចលើយន្តការគ្រប់គ្រង និងការវិនិយោគលើថ្នាលទូរទស្សន៍ឌីជីថលថ្មី អង្គប្រជុំបានពិនិត្យ ពិភាក្សា និងប្រៀបធៀបនូវជម្រើសយន្តការចំនួន៣ផ្សេងគ្នា រួមមាន ទី១ យន្តការគ្រប់គ្រង និងវិនិយោគដោយវិស័យឯកជនទាំងស្រុង។យន្តការសហការចម្រុះរវាងវិស័យរដ្ឋ-ឯកជន និងយន្តការគ្រប់គ្រង និងវិនិយោគដោយរដ្ឋទាំងស្រុង។

លោកអូន ព័ន្ឋមុនីរ័ត្នបានមានប្រសាសន៍ថា ការអភិវឌ្ឍ និងការគ្រប់គ្រងប្រព័ន្ធសោតទស្សន៍ ប្រកបដោយជោគជ័យ គឺជាកិច្ចការដ៏មានសារ-សំខាន់សម្រាប់ការអភិវឌ្ឍប្រទេសកម្ពុជាទាំងមូល ដែលការណ៍នេះ មិនត្រឹមតែអាចជួយជំរុញវិស័យសេដ្ឋកិច្ចឱ្យមានភាពរីកចម្រើន តាមរយៈការបង្កើនភាពប្រកួតប្រជែង ដែលទ្រទ្រង់ដោយប្រព័ន្ធប ច្ចេកវិទ្យាទំនើប និងការធ្វើពិពិធកម្មសេដ្ឋកិច្ចតែប៉ុណ្ណោះទេ ថែមទាំងអាចជួយលើកកម្ពស់យន្តការនៃការគ្រប់គ្រងទិន្នន័យ និងប្រព័ន្ធឃោសនាការក្នុងប្រទេស ក្នុងន័យធានាបាននូវសន្តិសុខជាតិ និងសុវត្ថិភាពសង្គម-សេដ្ឋកិច្ចប្រកបដោយប្រសិទ្ធភាពខ្ពស់៕

គម្រោងអភិវឌ្ឍធំៗចំនូន៩នៅក្រុងព្រះសីហនុនឹងចាប់អនុវត្តនៅដើមឆ្នាំ២០២១

ដោយៈ រ៉ាណេត

ព្រះសីហនុៈ គម្រោងអភិវឌ្ឍន៍ខេត្ត និងក្រុងព្រះសីហនុចំនួន៩នឹងចាប់ផ្តើមអនុវត្តន៍នៅឆ្នាំ២០២១ខាងមុខនេះ ដើម្បីបង្កើនសោភ័ណភាព និងភាពទាក់ទាញទេសចរណ៍ និងវិនិយោគបន្ថែម។

លោកគួច ចំរើន អភិបាលខេត្តព្រះសីហនុ បានមានប្រសាសន៍នៅថ្ងៃទី២៩ ខែធ្នូ ឆ្នាំ២០២០នេះថា រដ្ឋបាលខេត្តព្រះសីហនុ នៅមានគម្រោងអភិវឌ្ឍន៍ថ្មីៗចំនួន៩ផ្សេងទៀត ដែលនឹងត្រូវចាប់អនុវត្តនៅដើមឆ្នាំ២០២១ខាងមុខតទៅ។ លោកបានបន្តថា គម្រោងទាំង៩ ដែលនឹងត្រូវអនុវត្តនៅដើមឆ្នាំ២០២១ រួមមានហេដ្ឋារចនាសម្ព័ន្ធសំខាន់ៗដូចជា គម្រោងថែទាំសួនច្បារសាធារណៈ ស្ពានបេតុង បណ្តាញលូអ៊ុយ ថែទាំបណ្ដាញភ្លើងបំភ្លឺសាធារណៈ សាងសង់ផ្លូវបេតុង និងបណ្តាញលូទឹកភ្លៀង លូទឹកសំអុយជាដើម។

លោកបន្តថា គម្រោងត្រូវសិក្សាបន្ថែមរួមមានគម្រោងទី៣ កែសម្រួលស្ពានឱ្យបានធំទូលាយ ដើម្បីបញ្ចៀសជំនន់ទឹកភ្លៀង, គម្រោងទី៥ កែសម្រួលទទឹងផ្លូវឱ្យតាមស្តង់ដារ និងគម្រោងទី៦ កែសម្រួលមកដាក់លូអ៊ុយ ដោយឡែកគម្រោង ផ្សេងទៀតយើងបានឯកភាព។ ដូចនេះមន្ត្រីជំនាញរបស់យើងត្រូវចុះសិក្សាបន្ទាន់ ដើម្បីដាក់ឆ្លងកិច្ចប្រជុំក្រុមប្រឹក្សាខេត្តនៅថ្ងៃទី៥ ខែមករា ឆ្នាំ២០២១ខាងមុខ។

លោកបញ្ជាក់ថា “គម្រោងថវិកាអភិវឌ្ឍន៍ខេត្តសម្រាប់ឆ្នាំ២០២១ ដែលរដ្ឋបាលខេត្តបានស្នើសុំទៅក្រសួងសេដ្ឋកិច្ច និងហិរញ្ញវត្ថុ ក្រសួងបានធ្វើការកាត់ថវិកាអភិវឌ្ឍន៍ជា៣ដំណាក់កាល បន្តបន្ទាប់ធ្វើឱ្យគម្រោងមួយចំនួន ត្រូវលុបចោលក្នុងផែនការអភិវឌ្ឍន៍ឆ្នាំ២០២១។ ដូច្នេះយើងត្រូវជ្រើសរើសយកគម្រោងណា ដែលជាគម្រោងអាទិភាព ដើម្បីអភិវឌ្ឍន៍ជាមុន និងជាតម្រូវការចាំបាច់របស់មូលដ្ឋាន។ ទន្ទឹមនោះយើងត្រូវកៀរគរផ្នែកឯកជនចូលរួមអភិវឌ្ឍន៍ក្រុងរបស់យើងបន្ថែមទៀត។

លោកបន្តទៀតថា ដោយសារឆ្នាំកន្លងមកជំនន់ទឹកភ្លៀង នៅតែបន្តជន់លិចក្រុងរបស់យើង ដោយសារតែសំរាមបានហូរមកកកស្ទះ នៅតាមស្ពានចំនួន៤ តម្រូវឱ្យរដ្ឋបាលខេត្ត ធ្វើការកែលម្អ សាងសង់ពង្រីកស្ពានទាំងនោះឡើងវិញ ដូចជាស្ពាន L.V ស្ពានស្តេចមឹក និងស្ពាន ០២ទៀត នៅអង្គការម្លប់តាប៉ាង។ ស្ពានទាំង៤ ស្ថិតក្នុងនៅ សង្កាត់លេខ ៤ ក្រុងព្រះសីហនុ ដើម្បីបញ្ចៀសការជន់លិចនៅរដូវវស្សាឆ្នាំ២០២១ខាងមុខ។

នៅក្នុងផែនការលម្អិត ដែលបង្ហាញពីគម្រោងដែលត្រូវអនុវត្តមាន ដូចជា១.ជួសជុលសួនច្បារវិមានឯករាជ្យ សួនកូនសោរ និងសួនច្បារតោពីរសង្កាត់លេខ៣។ ២.ជួសជុលបណ្ដាញភ្លើង និងភ្លើងបំភ្លឺ សាធារណៈតាមបណ្ដោយផ្លូវលេខ៨០០ ក្រុងព្រះសីហនុ។ ៣.ជួសជុលស្ពានបេតុងបុក ស៊ីផាយ មុខអង្គការម្លប់តាប៉ាងចំនួន ០១កន្លែង សង្កាត់ ៤។ ៤.ជួសជុលផ្លូវបេតុង ផ្លូវទៅវត្តលើ ចាក់បេតុង និងដាក់លូទឹកភ្លៀងមុខកាត់០,៦ម៉ែត្រ ម្ខាងស្របផ្លូវ និងលូមូលកាត់ទទឹងផ្លូវ០,៨ម៉ែត្រ ចាប់ពីផ្លូវលេខ៧០១ ដល់វត្តលើ សង្កាត់លេខ៣។

៥.ជួស ជុលផ្លូវលេខ៨០២ ចាក់ក្រាលបេ តុង លូទឹកភ្លៀងមុខកាត់ ០,៦ម៉ែត្រ និងលូទឹកស្អុយមុខកាត់ ០,២ម៉ែត្រ សងខាងផ្លូវ (ចាប់ពីផ្លូវលេខ៨០០ ផ្លូវលេខ២១១) សង្កាត់លេខ២។ ៦.ជួសជុល បណ្តាញលូ ផ្លូវលេខ ២១៣ ដាក់លូទឹកភ្លៀងមុខកាត់ ០,៨ម៉ែត្រ លូទឹកស្អុយមុខកាត់ ០,២ម៉ែត្រ សងខាងផ្លូវ(ចាប់ពីផ្លូវលេខ២០០ ផ្លូវលេខ ២០៩)។ ៧.ជួសជុលបណ្ដាញលូអ៊ុយ (1mx1m) មានគម្របសងខាងផ្លូវ សង្កាត់លេខ៤ ចាប់ពីផ្លូវលេខ១០៤ តភ្ជាប់កំណាត់ លូអង្គការម្លប់តាប៉ាង (គម្រោងឆ្នាំ២០២០)។ ៨.ជួសជុលផ្លូវលេខ១០៥ ចាក់បេតុង លូទឹកភ្លៀងមុខកាត់ ០,៨ ម៉ែត្រ និងលូទឹកស្អុយមុខកាត់ ០,២ម៉ែត្រ សងខាងផ្លូវ(ពីផ្លូវលេខ ១០០ ដល់ផ្លូវលេខ១០៣៤)។ ៩.ជួសជុលផ្លូវលេខ១០៣៤ ចាក់បេតុង លូទឹកភ្លៀងមុខកាត់ ០,៨ ម៉ែត្រ លូទឹកស្អុយមុខ កាត់០,២ ម៉ែត្រ សងខាងផ្លូវ (ពីផ្លូវលេខ ១០៣ ដល់ផ្លូវលេខ១០៥)៕

សណ្ឋាគារចំនួន១១៨ទីតាំងបន្តរងផលប៉ះពាល់ពីវិបត្តិនៃជំងឺកូវីដ-១៩

ដោយៈ រ៉ាណេត

ភ្នំពេញៈ រហូតមកដល់ដំណាច់ឆ្នាំ២០២០នេះ អាជីវកម្មនៅក្នុងវិស័យទេសចរណ៍ផ្នែកសេវាស្នាក់នៅរួមមានសណ្ឋាគារ និងផ្ទះសំណាក់តូចធំចំនួន១១៨ទីតាំង បានបន្តទទួលរងនូវផលប៉ះពាល់ដោយសារបញ្ហានៃវិបត្តិជំងឺកូវីដ១៩។

សម្ដេចតេជោហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍នៅក្នុងឱកាសថ្លែងសារផ្ញើជូនជនរួមជាតិកម្ពុជា ពាក់ព័ន្ធទៅនឹងការបិទបញ្ចប់ព្រឹត្តិការណ៍សហគមន៍២៨វិច្ឆិកា នៅព្រឹកថ្ងៃទី២៩ ខែធ្នូ ឆ្នាំ២០២០នេះថា ដោយសារតែបញ្ហានៃវិបត្តិជំងឺកូដជាសាកល រហូតមកដល់ពេលនេះសម្រាប់តែផ្នែកសណ្ឋាគារ និងផ្ទះសំណាក់ សរុបចំនួន១១៨ទីតាំងនៅបន្តព្យួរ ដែលប៉ះពាល់ដល់បុគ្គលិកសរុបប្រមាណ៩៤០៣នាក់។

សម្ដេចតេជោបានបញ្ជាក់ថា “ការផ្អាកអាជីវកម្មខាងលើនេះ បានប៉ះពាល់ដល់បុគ្គលិករហូតដល់៩៤០៣នាក់ ដូចដែលបានលើកឡើងខាងលើនេះ រាជរដ្ឋាភិបាលនៅបន្តជួយឧបត្ថម្ភថវិកាចំនួន៣ខែទៀត”។សម្តេចបន្តថា “សម្រាប់អ្នកដែលបាត់បង់ការងារនឹងទទួលបានថវិកា ពីរាជរដ្ឋាភិបាលកម្ពុជាចំនួន៤០ដុល្លារក្នុងម្នាក់ ដូចគ្នាទៅនឹងកម្មកររោងចក្រ សហគ្រាសដែលបាត់បង់ការងារដូចគ្នា ដោយចាប់អនុវត្តចាប់ពីខែមករា រហូតដល់ខែមីនា ឆ្នាំ២០២១”។

ជាមួយគ្នានេះ សម្ដេចក៏បានលើកឡើងផងដែរថា ទឹកប្រាក់ចំណាយរបស់រដ្ឋាភិបាលសម្រាប់ជួយដល់នយោជិក ដែលបាត់បង់ការងារក្នុងវិស័យខាងលើនេះ មានទំហំប្រមាណ២០,២០ពាន់លានដុល្លារ។

ដោយឡែកសម្រាប់កម្មករ និយោជិត ដែលបាត់បង់ការងារដោយសាររោងចក្រដែលបានព្យួរចំនួន៤៤ទីតាំង ស្មើនឹងចំនួន១៤៥៧៨នាក់ ក៏នឹងទទួលបានការឧបត្ថម្ភសាច់ប្រាក់រយៈពេល៣ខែទៀតដូចគ្នា ដោយរាជរដ្ឋាភិបាលត្រូវផ្តល់៤០ដុល្លារក្នុងម្នាក់ សម្រាប់អ្នកដែលបាត់បង់ការងារ ហើយម្ចាស់រោងចក្រសហគ្រាសចំនួន៣០ដុល្លារ ដែលសរុបកម្មករម្នាក់ត្រូវទទួលបាន៧០ដុល្លារក្នុងម្នាក់៕

អ្នកអភិវឌ្ឍន៍មួយចំនួនចាប់ផ្តើមឆក់យកឱកាសវិនិយោគលើវិស័យលំនៅដ្ឋាន លំហែរកាយតម្លៃក្រោម៥ម៉ឺនដុល្លារ

ដោយៈ រ៉ាណេត

ភ្នំពេញៈ ស្ថិតនៅក្នុងបរិបទនៃវិបត្តិជំងឺឆ្លងជាសាកល ដែលកំពុងបន្តកើតមាននៅពេលបច្ចុប្បន្ន ដែលបណ្តាប្រទេសនានានៅបន្តបិទទ្វារនោះ សម្រាប់តែអ្នកវិនិយោគ និងអភិវឌ្ឍន៍ផ្នែកលំនៅដ្ឋានកម្ពុជាមួយចំនួន បានឆក់យកឱកាសនេះ ធ្វើការអភិវឌ្ឍន៍ផ្នែកលំនៅដ្ឋានបែបលំហែរ នៅតាមបណ្តាខេត្តមួយចំនួនដែលជាគោលដៅទេសចរណ៍។

លោកឧកញ៉ានួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal ដែលជាអ្នកអភិវឌ្ឍន៍ក្នុងវិស័យលំនៅដ្ឋាន បានមានប្រសាសន៍នៅរសៀលថ្ងៃទី២៩ ខែធ្នូ ឆ្នាំ២០២០នេះថា វិបត្តិកូវីដបានធ្វើឱ្យប្រជាជនខ្មែរភាគច្រើន មានការផ្លាស់ប្ដូររបៀបរបបរស់នៅ និងការប្រកបមុខរបរអាជីវកម្មថ្មីៗជាច្រើនប្រកបដោយភាពវិជ្ជមាន។

លោកឧកញ៉ាបន្តថា “ជាមួយនឹងដំណើរសេដ្ឋកិច្ចរលូនរបស់កម្ពុជា បានអនុញ្ញាតឱ្យប្រជាជនខ្មែរ នៅតែមានឱកាសប្រកបអាជីវកម្ម និងទទួលបានចំណូលដដែល ហើយ មួយចំណែកធំ បានជំរុញឱ្យពួកគាត់មានទំនោរ ទៅលើដំណើរកម្សាន្តនៅតាមតំបន់ទេសចរណ៍ធម្មជាតិនានាជាច្រើនផងដែរ”។លោកបន្តថា “វាក៏ចំណុចមួយជួយជំរុញទឹកចិត្តអ្នកអភិវឌ្ឍន៍មួយចំនួន ងាកទៅចាប់អារម្មណ៍ក្នុងការបណ្តាក់ទុន អភិវឌ្ឍន៍ប្រភេទលំនៅដ្ឋានបែបលំហែរផងដែរ”។

លោកឧកញ៉ាបន្តថា “ការវិនិយោគ និងអភិវឌ្ឍន៍លំនៅដ្ឋានបែបលំហែរនៅពេលនេះ វាមិនមានភាពទូលំទូលាយដូចការអភិវឌ្ឍ និងមានទីផ្សារធំធេងដូចលំនៅដ្ឋានអចិ ន្ត្រៃយ៍នោះទេ ប៉ុន្តែសម្រាប់អ្នកអភិវឌ្ឍន៍ ដែលកំពុងធ្វើសកម្មភាពនៅតាមបណ្តាខេត្តគោលដៅទេសចរណ៍ធម្មជាតិនាពេលបច្ចុប្បន្ននេះ គឺជាការឆ្លៀតឱកាសរបស់អ្នករកស៊ីនៅក្នុងវិស័យមួយនេះ ក្នុងរយៈពេលខ្លីតែប៉ុណ្ណោះ ដែលវាមិនមែនជាការបណ្តាក់ទុនវិនិយោគ និងអភិវឌ្ឍន៍ដែលមាននិរន្តរភាពនោះទេ”។

លោកបណ្ឌិត តេង រិទ្ធី អគ្គនាយកក្រុមហ៊ុន R’ Investment Group បានមានប្រសាសន៍ថា ការវិនិយោគប្រភេទលំនៅដ្ឋានបែបលំហែរ ត្រូវបានគេបែងចែកជា២ប្រភេទសម្រាប់ការទទួលបានផលចំណេញវិញត្រឡប់មកវិញ។

លោកបន្តថា “សម្រាប់អ្នកដែលអភិវឌ្ឍន៍សម្រាប់លក់ គឺត្រូវការដើមទុនមិនច្រើននោះការអភិវឌ្ឍន៍សម្រាប់ជួលនោះទេ ព្រោះនៅពេលដែលគេអភិវឌ្ឍន៍បណ្តើរ គេអាចលក់បានបណ្តើរ”។ លោកបន្តថា “ការយកចំណូលពីការលក់ធ្វើជាទុនបង្វិល ក្នុងកិច្ចដំណើរការអភិវឌ្ឍរបស់ពួកគេ ដែលផ្ទុយពីការអភិវឌ្ឍន៍សម្រាប់ជួល តម្រូវឱ្យមានដើមទុនគ្រប់គ្រាន់ជាចាំបាច់ ព្រោះពួកគេអាចទទួលបានចំណូល ពីជួលត្រឡប់មកវិញបន្ទាប់ពីបញ្ចប់គម្រោងសាងសង់ទាំងស្រុង”។

លោកបណ្ឌិត តេង រិទ្ធី បានមានប្រសាសន៍បញ្ជាក់ថា សម្រាប់ការបណ្តាក់ទុនវិនិយោគនៅក្នុងផ្នែកនេះ គេក៏ត្រូវមើលពីហេដ្ឋារចនាសម្ព័ន្ធដូចជាផ្លូវថ្នល់ បណ្តាញទឹកស្អាត និងបណ្តាញអគ្គិសនីផងដែរ ដើម្បីជៀសវាងបង្កើនចំណាយទុនថ្លៃដើមបន្ថែម ទៅលើការរៀបចំ។ ជាទូទៅលំនៅដ្ឋានលំហែរដែលមានទីផ្សារទូលាយ និងងាយស្រួលលក់គឺស្ថិតក្នុងក្រោមក្រោម៥ម៉ឺនដុល្លារចុះក្រោម និងមានទំហំមិនលើស២០០ម៉ែត្រការ៉េនោះទេ បើធំជាងនេះ និងមានតម្លៃថ្លៃជាងនេះ ទីផ្សារមានភាពចង្អៀត ពិបាករកអតិថិជនបំផុត៕