ដោយ ហ្សូលី

ភ្នំពេញ៖ ភ្ជាប់ជាមួយនឹងគម្រោងនៃការអភិវឌ្ឍន៍តំបន់ឧទ្យានជាតិកែបឱ្យមានភាពទាក់ទាញក្នុងវិស័យទេសចរណ៍បន្ថែមទៀត រដ្ឋបាលខេត្តកែបក៏មានគម្រោងកែច្នៃតំបន់នេះឱ្យទៅជាតំបន់លម្ហែកាយសម្រាប់មនុស្សចាស់ ព្រោះតំបន់នេះអំណោយផលទៅលើទេសភាពធម្មជាតិ និងប្រកបដោយផាសុកភាពខ្ពស់។

លោក សោម ពិសិដ្ឋ អភិបាលខេត្តកែប បានមានប្រសាសន៍ឱ្យដឹងនៅព្រឹកថ្ងៃទី១៧ ខែវិច្ឆិកា ឆ្នាំ២០២០នេះថា រដ្ឋបាលខេត្តមានគម្រោងដាក់តំបន់ឧទ្យានជាតិនេះ កែច្នៃទៅជាកន្លែងសម្រាកលំហែសម្រាប់មនុស្សដែលមានវ័យចំណាស់ ដោយសារតែតំបន់នេះ មានអំណោយផលល្អទៅលើធម្មជាតិបរិស្ថាន ហើយ និងមានផាសុកភាពល្អ ដោយទាំងនេះពិតជាមានផលល្អ សម្រាប់មនុស្សចាស់ ឬនិវត្តន៍ជនទូទាំងពិភពលោក ក្នុងការមកសម្រាកលំហែក្នុងរយៈពេលណាមួយ។

លោកបន្តថា នេះគ្រាន់តែជាចក្ខុវិស័យនៅឡើយ យ៉ាងណាក៏ដោយលោកស្វាគមន៍ និងលើកទឹកចិត្ត អ្នកវិនិយោគទាំងឡាយណា ដែលមានចំណាប់អារម្មណ៍លើគម្រោងមួយនេះ។ ទោះបីជាយ៉ាងណាក៏ដោយ ឧទ្យាននេះនៅតែទទួលប្រជាពលរដ្ឋគ្រប់ភេទ គ្រប់វ័យ គ្រប់ជាន់ថ្នាក់ឱ្យមក សម្រាកកម្សាន្ត គ្រាន់តែគំនិតផ្តូចផ្តើមនេះ ធ្វើយ៉ាងណាឱ្យស៊ីនឹងមនុស្សដែលមានវ័យចំណាស់ ទាំងជាតិ និងអន្តរជាតិ ជាជាងក្រុមមនុស្សផ្សេងទៀត។

តំបន់ឧទ្យានជាតិកែប គឺជាបេះដូងទេសចរណ៍នៃខេត្តកែប មានចម្ងាយ ២,៥គីឡូម៉ែត្រពីទីរួមខេត្ត ជាប្រភេទរមណីយដ្ឋានធម្មជាតិសម្រាប់ដើរកម្សាន្ត និងថតរូប ទិដ្ឋភាពដ៏ស្រស់ត្រកាលនៃតំបន់ឧទ្យានជាតិកែប បានជួយទាក់ទាញភ្ញៀវទេសចរជាតិ និងអន្តរជាតិ ឱ្យនៅស្នាក់កម្សាន្តតំបន់នោះផងដែរ។ ក្រៅពីនោះតំបន់នេះក៏ធ្លាប់មានប្រវត្តិ ជាតំបន់ជម្រកធម្មជាតិដ៏សំខាន់សម្រាប់សត្វព្រៃ ដូចជាចតុប្បាទបក្សាបក្សីសម្បូរបែបប្រកបដោយជីវសាស្ត្រចម្រុះ និងសោភ័ណភាពទេសភាពស្រស់បំព្រង។

ឧទ្យានជាតិកែបមានផ្ទៃដី ៥.០០០ហិកតា មានព្រំប្រទល់ខាងជើងជាប់ នឹងផ្លូវជាតិលេខ១៦ ខាងត្បូងជាប់នឹងឆ្នេរសមុទ្រ ខាងកើត និងខាងលិចជាប់នឹងផ្លូវជាតិលេខ ១៦២៕

        ដោយគង់ សូរិយា

        ភ្នំពេញៈ ក្រៅពីស្ថេរភាពនយោបាយ កំនើនសេដ្ឋកិច្ច ក្រុមហ៊ុនលំដាប់យក្សមុនឈានជើងចូលប្រទេសណាមួយ សុទ្ឋតែបានគិតគូរពិចារណាលើកត្តាជាច្រើន មុនពួកគេសម្រេចចិត្តបោះទុនវិនិយោគ។

លោកបណ្ឌិតអ៊ិន ចាន់នីប្រធានសមាគមធនាគារកម្ពុជា(ABC) ធ្លាប់បានមានប្រសាសន៍ឲ្យដឹងថា ក្រុមហ៊ុនធំៗមុនចូលមកវិនិយោគនៅកម្ពុជា ឬប្រទេសណាមួយ ពួកគេតែងតែពិនិត្យមើលលើកត្តាធំៗចំនួនបី ដូចជា កត្តាសុខសន្តិភាព ស្ថេរភាពនយោបាយ ស្ថេរភាពសង្គម និងកំនើនសេដ្ឋកិច្ចរ៉ឹងមាំ។

លោកបន្តថា “អ្វីដែលកាន់តែពិសេស គឺពួកគេសម្លឹងមើលប្រាក់ចំណូលរបស់មនុស្សម្នាក់ៗរបស់ប្រទេសនោះ ប្រសិនជានៅទាបពេក ពួកគេនឹងមិនមកវិនិយោគនោះទេ ព្រោះពួកគេវិនិយោគដើម្បីរកប្រាក់ចំណេញ”។លោកបន្តថា “អ្នកវិនិយោគពួកគេមិនទៅវិនិយោគនៅប្រទេសក្រីក្រខ្លាំងទេ ដោយសារអំណាចនៃការទិញមិនគាប់ប្រសើរ”។

លោកអ៊ិន ចាន់នីបានបន្តថា ផលចំណេញពីការវិនិយោគគឺជាកត្តាគន្លឹះ ពិសេសច្បាប់វិនិយោគ ច្បាប់ពន្ឋមានភាពអំណោយផលឬអត់ សុទ្ឋតែជាកត្តាសំខាន់ៗដែលអ្នក​វិនិយោគអន្តរជាតិធំៗពិនិត្យមើល។

ជាក់ស្តែងដូចជាក្រុមហ៊ុនផ្សារទំនើបEAON Mall Group ដែលបានវិនិយោគផ្សារទំនើបទី១ និងបើកដំណើរការកាលពីប៉ុន្មានឆ្នាំមុន មុនពួកគេសម្រេចចិត្តបោះទុន ពួកគេបានសិក្សានៅកម្ពុជាជាច្រើនឆ្នាំលើស្ថេរភាពនយោបាយ ប្រាក់ចំណូលរបស់ប្រជាជន នៅពេលកម្ពុជាមានប្រាក់ចំណូលមធ្យមកម្រិតខ្ពស់ ពួកគេបានចាប់ផ្តើមវិនិយោគភ្លាមនៅកម្ពុជា។

លោកស្រីអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានថ្លែងឲ្យដឹងផងដែរថា កំនើនប្រាក់ចំណូលរបស់ប្រជាពលរដ្ឋ បានធ្វើឲ្យមានការ​វិនិយោគផ្សារទំនើបច្រើននៅកម្ពុជា ដោយសារអំណាចនៃការទិញបានកើនឡើង ពិសេសប្រាក់ចំណេញពីការវិនិយោគលើផ្នែកនេះមានផលចំណេញខ្ពស់ ប៉ុន្តែអ្នកវិនិយោគលើផ្សារទំនើប ត្រូវតែធ្វើ់ការកែលំអរផ្សាររបស់ខ្លួន៥ឆ្នាំម្តង ទើបផ្សាររបស់ពួកគេអាចទាក់ទាញអតិថិជនច្រើន និងអាចឈរជើងលើទីផ្សារបាន។

លោកស្រីបន្តថា “ដោយសារការរីកចម្រើននៃសេដ្ឋកិច្ចបែបនេះហើយ ទើបបច្ចុប្ប​ន្ននេះ មានក្រុមហ៊ុនលំដាប់យក្សប្រមាណ៨០បានវិនិយោគនៅកម្ពុជា និងហូរចូលមកកាន់តែច្រើនទៀតនាពេលអនាគត”៕

ដោយ ៖ វុត្ថា

ភ្នំពេញ ៖ រដ្ឋាភិបាលកម្ពុជា បានសហការជាមួយសហភាពអឺរ៉ុប ដើម្បីពង្រឹងពាណិជ្ជកម្ម និងបង្កើនការវិនិយោគទ្វេរភាគីឱ្យកាន់តែធំ ក្នុងគោលបំណងស្ដារនូវសេដ្ឋកិច្ចប្រទេសជាតិដែលបង្កដោយវិបត្តិសាកលឡើងវិញ។

នៅទីស្តីការក្រសួងពាណិជ្ជកម្ម នាល្ងាចថ្ងៃទី១៦ ខែវិច្ឆិកា ឆ្នាំ២០២០ម្សិលមិញនេះ លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម តំណាងដ៏ខ្ពង់ខ្ពស់ លោករដ្ឋមន្ត្រីក្រសួងពាណិជ្ជកម្ម បា៉ន សូរស័ក្ដិ បានដឹកនាំក្រុមការងារចូលរួមកិច្ចប្រជុំពិភាក្សាការងារតាមប្រព័ន្ធវីដេអូជាមួយ លោក ប៉េត្រូស ស៊ូម៉េលីស (Petros Sourmelis) ប្រធានផ្នែកពាណិជ្ជកម្ម និងវិនិយោគ នៃប្រតិភូសហភាពអឺរ៉ុបប្រចាំនៅប្រទេសថៃ។

កិច្ចប្រជុំពិសេសមួយនេះ បានធ្វើឡើងដើម្បីពិភាក្សាត្រៀមសម្រាប់កិច្ចប្រជុំរបស់អនុក្រុមស្តីពីពាណិជ្ជកម្មនិងវិនិយោគ ក្នុងកិច្ចប្រជុំគណៈកម្មាធិការចម្រុះកម្ពុជា-សហភាពអឺរុបលើកទី១១ ដែលនឹងប្រព្រឹត្តទៅនៅថ្ងៃទី២៦-២៧ ខែវិច្ឆិកា ឆ្នាំ២០២០ តាមប្រព័ន្ធវីដេអូ ដោយបានធ្វើបច្ចុប្បន្នភាពស្តីពីកំណើនពាណិជ្ជកម្មរវាងកម្ពុជា និងសហភាពអឺរ៉ុប និងបានលើកឡើងពីផលប៉ះពាល់នៃវិបត្តិកូវីដ-១៩ លើវិស័យពាណិជ្ជកម្ម និងវិនិយោគនៅកម្ពុជាផងដែរ។

កិច្ចពិភាក្សានេះក៏បានផ្លាស់ប្តូរបច្ចុប្បន្នភាពស្តីពីវិធានការក្នុងការស្តារសេដ្ឋកិច្ចកម្ពុជាក្នុងបរិបទកូវីដ-១៩ ការធ្វើវិសោធនកម្មច្បាប់កម្ពុជាទាក់ទងនឹងពាណិជ្ជកម្ម និងវិនិយោគ ការចរចារបស់កម្ពុជាក្នុងក្របខ័ណ្ឌពាណិជ្ជកម្មសេរីទ្វេភាគីនិងពហុភាគី ការវិវត្តនៃរបៀបវារៈក្នុងអង្គការពាណិជ្ជកម្មពិភពលោក ផលប៉ះពាល់នៃកិច្ចព្រមព្រៀងពាណិជ្ជកម្មសេរីអឺរ៉ុប-វៀតណាមលើកម្ពុជា ដំណើរការចរចាកិច្ចព្រមព្រៀងពាណិជ្ជកម្មសេរីរវាងអឺរ៉ុប និងប្រទេសក្នុងតំបន់អាស៊ាន ពិសេសហ្វីលីពីន ម៉ាឡេស៊ី ឥណ្ឌូនេស៊ី និងថៃ ព្រមទាំងបញ្ហាមួយចំនួនទៀត ដែលនឹងត្រូវលើកយកមកពិភាក្សាក្នុងកិច្ចប្រជុំរបស់អនុក្រុមនៅថ្ងៃទី២៧ ខែវិច្ឆិកានេះ៕

ដោយ​វុត្ថា

ភ្នំពេញៈ រាជរដ្ឋាភិបាល​កម្ពុជា​បានដាក់​ចេញ​នូវ​ចក្ខុវិស័យ រយៈពេល​វែង​សម្រាប់​ប្រទេស​គឺ “ការធានាបាន​ស្ថិរភាព​ម៉ាក្រូសេដ្ឋកិច្ច និង​កំណើនសេដ្ឋកិច្ច​ខ្ពស់ ប្រកបដោយ​ចីរភាព បរិ​យាប​ន្ន និង​សមធម៌ សំដៅ​លើកកម្ពស់​ជីវភាព​ប្រជាពលរដ្ឋ និង​កាត់បន្ថយ​ភាពក្រីក្រ” ។

ក្នុងន័យនេះ ការអភិវឌ្ឍ​វិស័យ​ហិរញ្ញវត្ថុ រួមមាន​វិស័យ​ធនាគារ និង​វិស័យ​មិនមែន​ធនាគារ បាន​ដើរតួនាទី​យ៉ាងសំខាន់ ក្នុងការ​គាំទ្រ​ដល់​ការ​កៀរគរ​និង​បែងចែក​ធនធាន​ហិរញ្ញវត្ថុ សម្រាប់​ទ្រទ្រង់​កំណើនសេដ្ឋកិច្ច។ ក្នុង​ក្របខ័ណ្ឌ​នេះ រាជរដ្ឋាភិបាល បាន​ដាក់ឱ្យអនុវត្ត​នូវ “យុទ្ធសាស្ត្រ​អភិវឌ្ឍន៍​វិស័យ​ហិរញ្ញវត្ថុ ឆ្នាំ២០១៦-២០២៥” ដើម្បី​បន្ត​អភិវឌ្ឍន៍​វិស័យ​ហិរញ្ញវត្ថុ​ប្រកបដោយ​ប្រសិទ្ធភាព។

យុទ្ធសាស្ត្រ​អភិវឌ្ឍន៍​វិស័យ​ហិរញ្ញវត្ថុ​ឆ្នាំ២០១៦-២០២៥ ត្រូវបានធ្វើ​បច្ចុប្បន្ន​កម្ម​ពី យុទ្ធសាស្ត្រ​អភិវឌ្ឍន៍​វិស័យ​ហិរញ្ញវត្ថុ​ឆ្នាំ២០១១ – ២០២០ ដើម្បី​ឆ្លើយតប​នឹង​ការវិវត្ត​នៃ​ស្ថានភាព​បច្ចុប្បន្ន​និង​តម្រូវការ​ជាក់ស្តែង។ ការធ្វើ​បច្ចុប្បន្ន​កម្មនេះ គឺជា​លើក​ទី៣ហើយ​ចាប់តាំងពី​ឯកសារ​យុទ្ធសាស្ត្រ​ទី១ ត្រូវបាន​បង្កើតឡើង​កាលពី​ឆ្នាំ២០០១ ។

គោលដៅ​ចម្បង​របស់​យុទ្ធសាស្ត្រ​អភិវឌ្ឍន៍ វិស័យ​ហិរញ្ញវត្ថុ​ឆ្នាំ២០១៦-២០២៥គឺ​សម្រេច​ឲ្យ​បាន​ប្រព័ន្ធ​ហិរញ្ញវត្ថុ​មួយ ប្រកបដោយ​ប្រសិទ្ធភាព ដោយ​ផ្អែកលើ​គោលការណ៍​ទីផ្សារ ហើយ​មាន​លក្ខណៈ​ពិពិធ​ភាព ភាពរឹងមាំ និង​បរិ​យា​ប័ន្ន ដែល​ផ្តល់​លទ្ធភាព​ទូលំទូលាយ ក្នុងការ​បំពេញតម្រូវកា​រ​សេវា​ហិរញ្ញវត្ថុ​នៅក្នុង​ប្រទេស ដើម្បី​ទ្រទ្រង់​កំណើនសេដ្ឋកិច្ច​ប្រកបដោយ​ចីរភាព និង​ប្រសិទ្ធភាព កាត់បន្ថយ​ភាពក្រីក្រ បង្កើន​ចំណូល​របស់​ប្រជាជន ព្រមទាំង​ឆ្លើយតប​ទៅនឹង​តម្រូវការ នៃ​ការធ្វើសមាហរណកម្ម​សេដ្ឋកិច្ច និង​ហិរញ្ញវត្ថុ​នៅក្នុង​តំបន់៕