ដំណឹងល្អ ! សាឡាងឆ្លងពីតំបន់កោះនរាមកកាន់ទីក្រុងកោះពេជ្រនឹងចាប់ផ្តើមនៅខែមីនាខាងមុខនេះ

ដោយ:គង់ សូរិយា

ភ្នំពេញៈ រដ្ឋបាលរាជធានីភ្នំពេញ នឹងអាចដាក់ដំណើរការសាឡាងឆ្លងពីតំបន់កោះនរា ភ្ជាប់មកកាន់ទីក្រុងកោះពេជ្រ នឹងចាប់ផ្តើមនៅកំឡុងខែមិនាខាងមុខនេះ ប្រសិនជាគ្មានការប្រែប្រួលទេនោះ។

អ្នកនាំពាក្យរដ្ឋបាលរាជធានីភ្នំពេញ លោកម៉េត មាសភ័ក្តីបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៩ កុម្ភៈនេះថា បច្ចុប្បន្នរដ្ឋបាលរាជធានីភ្នំពេញកំពុងរៀបចំនិតិវិធីលើការងារនេះ ដោយយើងអាចនឹងដាក់ដំណើរការសាឡាង ឆ្លងពីតំបន់ពយនៃកោះនរា មកកាន់ទីក្រុងកោះពេជ្រនាកំឡុងខែមិនាខាងមុខនេះ ប្រសិនជាមិនមានការប្រែប្រួលទេនោះ។

លោកបន្តថា “ការប្រើប្រាស់សាឡាងចំនួនប៉ុន្មាន យើងមិនទាន់ដឹងនៅឡើយទេ ព្រោះវាជាការងារបច្ចេកទេស ប៉ុន្តែនិតិវិធីកំពុងត្រូវបានរៀបចំ ដោយសារវាពាក់ព័ន្ឋចំណូលរបស់រដ្ឋ​ផងដែរ”។ លោកបន្តថា “ការរៀបចំឆ្លងសាឡាងនេះ នឹងអាចជួយសម្រួ​លការកកស្ទះមួយ​ចំណែក ដោយសារផ្លូវជាតិលេខ១ មានច្រកឆ្លងកាត់សំខាន់ គឺមានតែលើស្ពានព្រះមុនីវង្សប៉ុណ្ណោះ”។

ជាមួយគ្នានេះ លោកទូច សំណាងអគ្គនាយករងក្រុមហ៊ុនOCICបានមានប្រសា​សន៍ថា ខាងក្រុមហ៊ុនបានរៀបចំការងារនេះរួចហើយ ដោយរង់ចាំតែអាជ្ញាធរជាអ្នកចាប់ផ្តើម ដំណើរការនៅពេលណាប៉ុណ្ណោះ។ លោកបន្តថា ទីតាំងត្រូវឆ្លងពីកោះនរា មកកាន់ទីក្រុងកោះពេជ្រ គឺស្ថិតនៅក្បែរចំណុចសាងសង់ ស្ពានឆ្លងកាត់ពីទីក្រុងកោះពេជ្រ ទៅកាន់ទីក្រុងកោះនរា។

លោកបន្តថា “ទោះជាមានការឆ្លងបែបននេះក្តី ប៉ុន្តែវានឹងមិនបង្កបញ្ហាសណ្តាប់ធ្នាប់ ឬការកកស្ទះណាមួយលើទីក្រុងកោះពេជ្រនោះទេ”។លោកបន្តថា “យើងរំពឹងថាវានឹងជួយកាត់បន្ថយការកកស្ទះចរាចរណ៍ នៅលើផ្លូវជាតិលេខ១បានមួយចំណែក នៅពេល​សាឡាងនេះដាក់ឲ្យដំណើរការ”៕

លោកចូ បៃឌិននឹងជួបប្រជុំជាមួយក្រុមប្រទេស G7 ជាលើកដំបូងដើម្បីពិភាក្សាអំពីបញ្ហាវ៉ាក់សាំង សេដ្ឋកិច្ច និងមហាយក្សចិន

ដោយៈសុខុម

ក្រុងឡុងដ៍:  ប្រធានាធិបតីសហរដ្ឋអាមេរិក លោក ចូ បៃឌិន នឹងចូលរួមកិច្ចប្រជុំជាលើកដំបូងរបស់លោកជាមួយមេដឹកនាំ នៃប្រទេសដែលមានឧស្សាហកម្មជឿនលឿនទាំង ៧ (G7) នៅថ្ងៃសុក្រ ទី១៩ កុម្ភៈ នេះដើម្បីពិភាក្សាអំពីផែនការកម្ចាត់វីរុសកូវីដ-១៩ ការបើកទ្វារសេដ្ឋកិច្ចពិភពលោកឡើងវិញ និងការទប់ទល់បញ្ហាប្រឈមនានាដែលបង្កឡើងដោយមហាយក្សចិន។

យោងតាមសារព័ត៌មាន CNA ចុះផ្សាយក្នុងថ្ងៃដដែលឱ្យដឹងថា ការឆ្លងរាតត្បាតវីរុសកូវីដ-១៩ ដ៏កាចសាហាវបានឆក់យកអាយុជីវិតមនុស្ស អស់រហូតដល់ទៅ២,៤លាននាក់ទូទាំងពិភពលោក និងបានធ្វើឱ្យសេដ្ឋកិច្ចពិភពលោក ដាំក្បាលចុះធ្ងន់ធ្ងរបំផុតមិនធ្លាប់មានជាប្រវត្តិសាស្ត្រ ចាប់តាំងពីមហាវិបត្តិសេដ្ឋកិច្ច (Great Depression) អំឡុងទសវត្សរ៍ឆ្នាំ១៩៣០មក និងបានប៉ះពាល់ធ្ងន់ធ្ងរដល់ជីវភាពរស់នៅ របស់មនុស្សរាប់ពាន់លាននាក់។

លោកស្រី Jen Psaki អ្នកនាំពាក្យសេតវិមាន បានលើកឡើងកាលពីថ្ងៃព្រហស្បតិ៍ ទី១៨ កុម្ភៈថា លោកចូ បៃឌិន នឹងផ្តោតជាសំខាន់លើការឆ្លើយតបជាសកល ចំពោះការឆ្លងរាតត្បាតវីរុសកូវីដ-១៩ រួមមានទាំងការផលិត និងការចែកចាយវ៉ាក់សាំង និងកិច្ចប្រឹងប្រែងប្រយុទ្ធប្រឆាំងនឹងការផ្ទុះជំងឺថ្មីៗផងដែរ។

អ្នកនាំដដែលបានបន្តថា លោកចូ បៃឌិន ក៏នឹងពិភាក្សាអំពីការងើបឡើងវិញនៃសេដ្ឋកិច្ចពិភពលោក រួមមានទាំងសារៈសំខាន់ នៃប្រទេសឧស្សាហកម្មទាំងអស់ ការបន្តគាំទ្រផ្នែកសេដ្ឋកិច្ច ដើម្បីឈានទៅរកការងើបឡើងវិញនៃសេដ្ឋកិច្ច និងសារៈសំខាន់នៃការធ្វើបច្ចុប្បន្នភាពតួនាទីជាសកល ក្នុងការដោះស្រាយបញ្ហាប្រឈមនានា ផ្នែកសេដ្ឋកិច្ចដូចជាបញ្ហាប្រឈម ដែលបង្កឡើងដោយមហាយក្សចិនផងដែរ។

កិច្ចប្រជុំតាមរយៈ Video Call ជាមួយមេដឹកនាំនៃក្រុមប្រទេសG7 នៅថ្ងៃសុក្រនេះគឺជាឱកាសដ៏ល្អមួយសម្រាប់លោក ចូ បៃឌិន ដែលបានឡើងកាន់តំណែងជាផ្លូវការកាលពីថ្ងៃទី២០ មករា បញ្ជូនសារបញ្ជាក់ពីការចូលរួមសហប្រតិបត្តិការឡើងវិញ របស់សហរដ្ឋអាមេរិក ជាមួយពិភពលោក និងស្ថាប័ននានាទូទាំងពិភពលោក បន្ទាប់ពីអតីតប្រធា​នាធិបតី ដូណាល់ ត្រាំ បានអនុវត្តគោលនយោបាយ “អាមេរិក ជាអាទិភាព ” (America First) អស់រយៈពេល៤ឆ្នាំ។

យោងតាមសារព័ត៌មានដដែលឱ្យដឹងថា ក្រៅពីលោកចូ បៃឌិន លោកMario Draghi ដែលជានាយករដ្ឋមន្រ្តីថ្មីរបស់ប្រទេសអ៊ីតាលី ក៏នឹងមានវត្តមានចូលរួមកិច្ចប្រជុំនេះដែរ៕

រដ្ឋាភិបាលដាក់ចេញលក្ខខ័ណ្ឌចំនួន៥សម្រាប់អាជីវកម្មទេសចរណ៍ដែលត្រូវបើកដំណើរការឡើងវិញក្រោយបញ្ហាកូវីដ១៩

ដោយ:គង់ សូរិយា

ភ្នំពេញៈ ក្រសួងទេសចរណ៍បានដាក់ចេញនូវគោលការណ៍ណែនាំ និងលក្ខខ័ណ្ឌការងារចំនួន៥ សម្រាប់អាជីវកម្មទេសចរណ៍ ដែលត្រូវបើកដំណើរការឡើងវិញក្រោយវិបត្តិកូវីដ១៩។

កិច្ចប្រជុំ“ពិគ្រោះយោបល់ លើសេចក្តីព្រាងការអនុវត្តវិធានសុវត្ថិភាពទេ​សចរណ៍ សម្រាប់អាជីវកម្មម៉ាស្សាសុខភាព និងមណ្ឌលកម្សាន្តទេសចរណ៍មនុស្សពេញវ័យ” សម្រា​ប់ជំហានទី២ បានធ្វើឡើងក្រោមអធិបតតីភាព លោកណេប សាមុត អគ្គនាយកគ្រប់គ្រងឧស្សាហកម្មទេស​ចរណ៍ និងជាប្រធានលេខាធិការដ្ឋាននៃក្រុមការងារជំរុញ និងលើកស្ទួយវិស័យ ទេសចរណ៍ក្នុងដំណាក់កាល និងក្រោយវិបត្តិកូវីដ-១៩។

លោកបានបន្តថា វិធានសុវត្ថិភាពទេសចរណ៍ សម្រាប់ជំហានទី២នេះ ផ្តោតសំខាន់ទៅលើអាជីវកម្ម ដែលប្រកាសឱ្យផ្អាកមួយរយៈ ក្នុងដំណាក់កាលវិបត្តិជំងឺឆ្លងកូវីដ-១៩ ដូចនេះ ដើម្បីឱ្យអាជីវកម្ម បើកដំណើរការឡើងវិញបាន តម្រូវឱ្យអាជីវកម្មបំពេញបានតាមលក្ខណវិនិច្ឆ័យជាច្រើន។

លក្ខខ័ណ្ឌទាំងនោះរួមមាន ទី១ វិធានសុវត្ថិភាពទេសចរណ៍សម្រាប់អាជីវកម្មម៉ា ស្សាសុខភាពរួមមាន ០៩លក្ខខណ្ឌតម្រូវ ២១ កម្មវត្ថុនៃការវាយតម្លៃ ៧៤ចំនុចត្រូវត្រួតពិនិត្យ (ក្នុងនោះរួមមាន ៣៧ការអនុវត្តតម្រូវចាំបាច់ និង ៣៧ការ អនុវត្តជាជម្រើស)។  ទី២ វិធានសុវត្ថិភាពលទសចរណ៍សម្រាប់អាជីវកម្ម “ខារ៉ាអូខេ” រួមមាន៖ ១២លក្ខខណ្ឌតម្រូវ ១៤កម្មវត្ថុនៃការវាយតម្លៃ ៧១ចំនុចសម្រាប់ត្រួតពិនិត្យ (ក្នុងនោះរួមមាន ៥៥ ការអនុវត្តតម្រូវចាំបាច់ និង ១៦ការអនុវត្តជាជម្រើស) ។

ទី៣.វិធានសុវត្ថិភាពលទសចរណ៍សម្រាប់អាជីវកម្មក្លឹបកម្សាន្ត (រង្គសាល និងឌីស្កូតែក) រួមមាន៖ ១២លក្ខ- ខណ្ឌតម្រូវ ១៥កម្មវត្ថុនៃការវាយតម្លៃ ៦៦ចំនុចសម្រាប់ត្រួតពិនិត្យ (ក្នុងនោះរួមមាន ៤៩ការអនុវត្តតម្រូវចាំបាច់ និង ១៧ការអនុវត្តជាជម្រើស)។

ទី៤ វិធានសុវត្ថិភាពលទសចរណ៍ សម្រាប់អាជីវកម្មបៀរហ្គាឌិនរួមមាន ១៣លក្ខ​ខណ្ឌតម្រូវ ១៥កម្មវត្ថុនៃការវាយតម្លៃ ៧០ចំនុចសម្រាប់ត្រួតពិនិត្យ ក្នុងនោះមាន(ក្នុងនោះរួមមាន ៥២ការអនុវត្តតម្រូវចាំបាច់ និង ១៨ការអនុវត្តជាជម្រើស)។

អាជីវកម្មត្រូវចូលរួមអនុវត្ត និងបំពេញនូវគ្រប់ចំនុចការអនុវត្តតម្រូវចាំបាច់ នឹងទទួលបានឡាបិលទទួលស្គាល់អាជីវកម្ម ដែលមានសុវត្ថិភាពប្រឆាំងនឹងកូវីដ-១៩ និងអាចបើកអាជីវកម្មបាន (ត្រៀមដាក់អនុវត្តនៅពេលមានការអនុញ្ញាត ពីរដ្ឋាភិបាលឱ្យដំណើរការឡើងវិញ)៕

នាពេលកន្លងមកក្រសួងទេសចរណ៍ បានដាក់ចេញវិធានសុវត្ថិភាពទេសចរណ៍ក្នុងដំណាក់កាទប់ស្កាត់ ការរីករាលដាលនៃជំងឺកូវីដ-១៩ (ជំហានទី១) ចំនួន៦សេវាកម្ម សុទ្ធសឹងជាប្រភេទសេវាកម្ម ដែលកំពុងដំណើរការអាជីវកម្មរួមមាន ទី១.)សេវាកម្មស្នាក់នៅទេសចរណ៍  ទី២.)សេវាកម្មភោជនីយដ្ឋាន និងអាហារដ្ឋានទេសចរណ៍  ទី៣.)សេវាកម្មដឹកជញ្ជូនទេសចរណ៍ផ្លូវទឹក  ទី៤.)សេវាកម្មដឹកជញ្ជូនទេសចរណ៍ផ្លូវគោក ទី៥.)រមណីយដ្ឋានទេសចរណ៍ និងទី៦.)សហគមន៍ទេសចរណ៍៕

តើម៉ាកយីហោល្បីៗប៉ុន្មានបានហក់ចូលទីផ្សារកម្ពុជា និងម៉ាកយីហោប៉ុន្មានបានចាកចេញ

ដោយៈ ប៊ី

ភ្នំពេញៈ យោងតាមរបាយការណ៍របស់ក្រុមហ៊ុន CBRE Cambodia បានឱ្យដឹងថា ប៊្រែនផ្សារលក់រាយថ្មី មានចំនួន២៦ប៊្រែន និងពង្រីកសាខាចំនួន៤០កន្លែង នៅទីផ្សារកម្ពុជា ខណៈប៊្រែនផ្សារលក់រាយចំនួន៩ ត្រូវបានបិទ និងចំនួន៧បានចាក់ចេញ គិតរហូតដ់ដើមឆ្នាំនេះ។

លោកស្រីអាន សុធីតាអគ្គនាយកាក្រុមហ៊ុន CBRE Cambodia បានមានប្រសា​សន៍ប្រាប់កាលពីថ្មីៗនេះថា បញ្ហាចម្បង ដែលប្រ៊ែនត្រូវបានបិទ និងចាកចេញ គឺកត្តា “កម្លាំ​ងទិញ” ដោយសារឥទ្ធិពលនៃការទិញរបស់ប្រជាជនយើង នៅមានកម្រិតនៅឡើយ។ តួលេខខាងលើនេះ ជារបាយការណ៍ដែលបានកត់ត្រា កាលពីឆ្នាំ២០២០កន្លងមកនេះ ខណៈឆ្នាំ២០២១មិនទាន់ឃើញសញ្ញាវិជ្ជមាននៅឡើយទេ។

លោកស្រីបានព្រមានថា “ការផ្គត់ផ្គង់ទីផ្សារលក់រាយ នឹងអាចលើសតម្រូវការនៅឆ្នាំ២០២១ ខណៈអត្រាទីផ្សារលក់រាយនៅឆ្នាំ២០២១នេះ រំពឹងថានឹងមានកំណើនកើនដល់១៨៦ ០០០ម៉ែត្រការ៉េ ដែលជាទំហំមួយដ៏ធំ សម្រាប់ការផ្គត់ផ្គង់”។

លោកស្រីអាន សុធីតាបានថ្លែងថា ការផ្គត់ផ្គង់ទីផ្សារលក់រាយទំហំ១៨៦ ០០០ម៉ែ​ត្រការ៉េ គឺតួលេខធំ ដែលពិបាក ក្នុងការទាញយកអត្រាប្រើប្រាស់ពីអតិថិជន ហើយកាលពីឆ្នាំ២០២០ មានប៊្រែនមួយចំនួនត្រូវបានបិទ ប៉ុន្តែប៊្រែនថ្មីៗមួយចំនួនបានចូលមកដែរ។

លោកស្រីបានលើកឡើងថា “ការផ្គត់ផ្គង់ថ្មីៗ មិនអាចឈរជំហររ៉ឹងមាំបានទេ ប្រសិ​ន បើការផ្គត់ផ្គង់នៅតែបន្តកើនឡើងដូច្នេះ ព្រោះមនុស្សម្នាក់អាចចូលផ្សារពីរក្នុងពេលតែមួយបានទេ ហើយអាចទៅផ្សារបានរាល់ថ្ងៃនោះទេ”។

លោកស្រីបានថ្លែងថា កន្លងមក ទីផ្សារលក់រាយ គឺជាទីផ្សារមួយ ដែលមានសក្តានុពលធ្វើឱ្យអ្នកអភិវឌ្ឍន៍ ស្រូបទាញផលចំណេញបានខ្ពស់ បើប្រៀបនឹងផ្នែកផ្សេងៗ។ ដោយឡែកផ្នែកនេះត្រូវការមានជំនាញ និងបច្ចេកទេស ជាមួយដើមទុនគ្រប់គ្រាន់ ដើម្បីអភិវឌ្ឍន៍ផ្សារមួយបាន ហើយគាត់ (អ្នកអភិវឌ្ឍន៍) ចាប់ផ្តើមប្រកួតប្រជែងអភិវឌ្ឍន៍ ប៉ុន្តែភ្លេចគិតពីចំនួននៃការផ្គត់ផ្គង់ និងអតិថិជនជួល។

លោកស្រីបានថ្លែងទៀតថា “ខ្ញុំមើលឃើញថា ទីតាំងខ្លះ មានផ្សាររហូតដល់ទៅ៣នៅទីតាំងក្បែរៗគ្នា ហើយនេះគឺជាកត្តាហានិភ័យ និងកត្តាព្រួយបារម្ភបំផុត ហើយអ្នកអភិវឌ្ឍន៍ ទោះបីដឹងថា ខ្លួនឯងអាចធ្វើផ្សារបាន តែមិនគួរធ្វើទេ បើសិនជាវាមានការផ្គត់ផ្គង់លើសតម្រូវការ”។

លោកស្រីបានបន្តទៀតថា គម្រោងទីផ្សារលក់រាយមានទំហំ១៨៦ ០០០ម៉ែត្រការ៉េក្នុង ដែលរពឹងទុកថានឹងបញ្ចប់ឆ្នាំ២០២១ នឹងត្រូវបានពន្យាពេល ប្រសិនបើអ្នកអភិវឌ្ឍន៍មិនអាចស្វែងរកអតិថិជនជួលបាន ហើយមានយឺតយ៉ាវក្នុងការសាងសង់ ដូច្នេះប្រហែ​លជាការផ្គត់ផ្គង់ មិនអាចមានទំហំដល់១៨៦ ០០០ម៉ែត្រការ៉េនោះទេក្នុងឆ្នាំ២០២១ និងអាចពន្យាពេលដល់២០២២ ឬ២០២៣៕

បុរី ប៉េង ហួត បើកសម្ពោធជាផ្លូវការ គម្រោងថ្មីបែបអេកូធម្មជាតិ 3 គម្រោងព្រមគ្នា ក្នុងព្រឹត្តិការណ៍ “សុភមង្គលថ្មីបែបធម្មជាតិ”

ដោយ:គង់ ម៉ាលីន
ភ្នំពេញ ៖ នាព្រឹកថ្ងៃទី19 ខែកុម្ភៈ ឆ្នាំ2021 បុរី ប៉េង ហួត បានប្រារព្ធកម្មពិធីបើកសម្ពោធជាផ្លូវការ គម្រោងថ្មី បែបអេកូធម្មជាតិ 3 គម្រោងព្រមគ្នា រួមមាន ​ គម្រោងដឹស្តាផ្លាទីនីម​ អេកូ វេរ៉ាន់ដា ដឹស្តាផ្លាទីនីម អេកូ រ៉ូម៉ែនស៍ និងដឹស្តាផ្លាទីនីម អេកូ សាន់រ៉ាយ វគ្គ2 ស្ថិតក្នុងគម្រោងហ្រេ្គនស្តាផ្លាទីនីម អេកូ ខូឡិកសិន ក្នុងព្រឹត្តិការណ៍ “សុភមង្គលថ្មីបែបធម្មជាតិ”។ ព្រឹត្តិការណ៍នេះប្រារព្ធឡើងនៅទីតាំងក្បែរផ្ទះគំរូវីឡា King A ស្ថិតនៅលើមហាវិថី ក្លាស្ទ័រ ក្នុងគម្រោង បុរី ប៉េង ហួត ហ្គ្រេនស្តាផ្លាទីនីម (បឹងស្នោ) ធ្វើដំណើរត្រឹមតែ5នាទី ប៉ុណ្ណោះពីស្ពានព្រះមុនីវង្ស(ច្បារអំពៅ) ចាប់ពីថ្ងៃទី19 ដល់ថ្ងៃទី21 ខែកុម្ភៈ ឆ្នាំ2021 វេលាម៉ោង 8:00 នាទីព្រឹក ដល់ម៉ោង 8:00 នាទីយប់។

ថ្លែងក្នុងពិធីបើកសម្ពោធជាផ្លូវការនេះ លោកជំទាវ ហុង ដានី អគ្គនាយិកា ក្រុមហ៊ុន បុរី ប៉េង ហួត បានមានប្រសាសន៍បញ្ជាក់ថា ”ជាថ្មីម្តងទៀត ក្រុមហ៊ុន​ បុរី ប៉េង ហួត មានមោទនភាពយ៉ាងក្រៃលែងក្នុងការនាំមកជូនអតិថិជនទាំងអស់ នូវគម្រោងអភិវឌ្ឍលំនៅឋានទំនើបចម្រុះ 3 បន្ថែមទៀតដ៏គួរឲ្យទាក់ទាញ និងពោរពេញដោយភាពច្នៃប្រឌិតខ្ពស់ ស្អាតប្លែក អមជាមួយធម្មជាតិពិតៗ។  គម្រោងថ្មីទាំង3  រួមាន គម្រោងដឹស្តាផ្លាទីនីម​ អេកូ វេរ៉ាន់ដា ដឹស្តាផ្លាទីនីម អេកូ រ៉ូម៉ែនស៍ និងដឹស្តាផ្លាទីនីម អេកូ សាន់រ៉ាយ វគ្គ2 ជាដំណាក់កាលទី2  នៃការអភិវឌ្ឍប្លង់មេ អេកូ ខូឡិកសិន  ដែលត្រូវបានសិក្សានិងរចនាយ៉ាងយកចិត្តទុកដាក់ ដោយក្រុមការងារ បុរី ប៉េង ហួត ជាមួយនឹងក្រុមហ៊ុន​ស្ថាបត្យកម្មអន្តរជាតិ ដ៏ល្បីឈ្មោះមួយដើម្បីផ្តល់ជូនអតិថិជនទាំងអស់នូវបទពិសោធន៍ដ៏ថ្មីសន្លាង ជាមួយនិររន្តភាពក្នុងការរស់នៅតាមបែបអេកូធម្មជាតិ។ លោកជំទាវបានបន្តទៀតថា “លក្ខណៈពិសេសរបស់គម្រោងថ្មីទាំង3 នេះ   គឺផ្តោតសំខាន់ទៅលើ ភាពទំនើបស៊ីវិល័យ ប្រណិតភាព ឧត្តមភាព ឯកជនភាព ផាកសុខភាព  និងសុភមង្គលគ្រួសារ ដែលផ្សារភ្ជាប់ជាមួយធម្មជាតិពិតៗ ដូចជា៖

1.  មហាវិថី អេកូ ខូឡិកសិន ជាមហាវិថីសាធារណៈក្រៅគម្រោង ដែលអ៊ុតកៅស៊ូ ប្រវែងប្រមាណជាង 2 គីឡូម៉ែត្រ ដែលអមទៅដោយសួនច្បារដ៏ស្រស់ស្អាត មានហាងកាហ្វេ ភោជនីយដ្ឋានប្រណិតៗ ដ៏សម្បូរបែបជាច្រើន។
2.  ផ្លូវសម្រាប់ជិះកង់ និងរត់ម៉ារាតុនស្តង់ដា មានតែមួយគត់ ក្នុងប្រទេសកម្ពុជាដែលមានប្រវែងជិត 3 គីឡូម៉ែត្រ។
3.  ក្លឹបហាត់ប្រាណVIP ដ៏ទំនើបដែលមានកម្ពស់ដល់ទៅ 7ជាន់ រួមមាន Skybar និងមានកន្លែងសម្រាប់លម្ហែកម្សាន្ត ដ៏សំម្បូរបែបជាច្រើន ហើយពិសេសជាងគេក្នុងប្រទេសកម្ពុជា។
4. សួនដ៏ស្រស់ស្អាត នឹងសម្បូរបែបដែលរំលេចដោយផ្កាចម្រុះពណ៌ និងដើមឈើជាច្រើនប្រភេទ  សម្រាប់លម្ហែកម្សាន្ត និង ហាត់កីឡាប្រកបដោយផាសុកភាព។

ក្រៅពីនេះ គម្រោង ដឹស្តាផ្លាទីនីម អេកូ សាន់រ៉ាយ វគ្គ2 ជាបណ្តុំលំនៅឋាន បែបអាជីវកម្មចម្រុះ​ជាមួយ សក្តានុពលពាណិជ្ជកម្មដ៏មមាញឹក និងជាស្នូលនៃការផ្តត់ផ្គង់តម្រូវការរបស់អ្នករស់នៅ រាប់ម៉ឺនគ្រួសារនៅក្នុងគម្រោង អេកូ ខូឡិកសិន និងគម្រោង ហ្គ្រេនស្តាផ្លាទីនីម សរុបជាង 400 ហិចតា”។​

សូមបញ្ជាក់ផងដែរថាក្នុងព្រឹត្តិការណ៍ដ៏ពិសេសនេះ អតិថិជនគ្រាន់តែជាវផ្ទះពីគម្រោងថ្មី ដឹស្តាផ្លាទីនីម អេកូ រ៉ូមែនស៍ ដឹស្តា ផ្លាទីនីម អេកូ វេរ៉ាន់ដា និង ដឹស្តាផ្លាទីនីម អេកូ សាន់រ៉ាយ វគ្គ2 ដែលមានទីតាំងស្ថិតក្នុងគម្រោងធំ ហ្គ្រេនស្តាផ្លាទីនីម ដំណាក់កាលទី2 “អេកូ ខូឡិកសិន” លោកអ្នកនឹងទទួលបានសំណាងផ្ទួនៗគ្នា ដែលរួមមាន

– ទទួលបានការបញ្ចុះតម្លៃរហូតដល់ 11% ភ្លាមៗ

– ទទួលបានកង់ស្ព័រម៉ាកល្បី Giant ភ្លាមៗចំពោះការទិញគ្រប់ប្រភេទផ្ទះ

– ចំណេញបន្ថែមរហូតដល់ $20,000

កាន់តែពិសេសថែមទៀត អ្វីដែលលោកអ្នក នឹកស្មានមិនដល់ នោះគឺឱកាសឈ្នះដំណើរកម្សាន្ត VVIP ទៅកាន់កោះសង្សារជាមួយមនុស្សជាទីស្រលាញ់យ៉ាងរ៉ូមែនទិកជាច្រើនរង្វាន់។ សូមរួសរាន់ឡើង ការផ្តល់ជូនពិសេសនេះ មានកំណត់ត្រឹមតែ3ថ្ងៃតែប៉ុណ្ណោះ គឺចាប់ពីថ្ងៃទី19 ដល់ថ្ងៃទី21 ខែកុម្ភៈ ឆ្នាំ2021 ខាងមុខនេះ។

ព្រឹត្តិការណ៍ខាងលើនេះ បើកជូនសាធារណជន ចូលរួមដោយសេរី ហើយអ្វីកាន់តែពិសេសជាងនេះទៅទៀត លោកអ្នកក៏អាចមានឱកាសឈ្នះរង្វាន់ iPhone 12 pro max និងរង្វាន់ពិសេសផ្សេងៗទៀត យ៉ាងច្រើនសន្ធឹកសន្ធាប់។ កុំភ្លេចមកចូលរួមទាំងអស់គ្នាណា រង្វាន់យ៉ាងច្រើនសន្ធឹកសន្ធាប់ កំពុងរងចាំលោកអ្នក!

រង់ចាំដល់ពេលណាទៀត ប្រញាប់រួសរាន់ឡើង មកមុនបានជម្រើសមុន ព្រោះចំនួនមានកំណត់។ សម្រាប់ព័ត៌មានបន្ថែម សូមទាក់ទងទូរស័ព្ទលេខ 098/ 016 / 017 596 789 ឬ រង់ចាំតាមដានគេហទំព័រ Facebook បុរី ប៉េង ហួត ។

មន្ត្រីជាន់ខ្ពស់ចក្រភពអង់គ្លេស នឹងជំរុញវិនិយោគិនមកឈ្វេងយល់ពីសក្ដានុពលបន្ថែមសម្រាប់ការវិនិយោគនៅកម្ពុជា

ដោយ ៖ រ៉ាណេត

ភ្នំពេញ ៖ ជាមួយនឹងការទទួលស្គាល់ពីភាពរីកចម្រើន កំណើនសេដ្ឋកិច្ចប្រចាំឆ្នាំ និងសក្តានុពលនាំចេញរបស់កម្ពុជា ព្រមទាំងធ្វើការកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការជួយសម្របសម្រួលប្រតិបត្តិការពាណិជ្ជកម្មរបស់ធុរជន និងវិនិយោគិនអង់គ្លេស មន្ត្រីជាន់ខ្ពស់ដែលជាប្រេសិតរបស់នាយករដ្ឋមន្ត្រីនៃចក្រភពអង់គ្លេសបានសន្យាជួយផ្សព្វផ្សាយពីសក្ដានុពលកម្ពុជា ដើម្បីអូសទាញវិនិយោគិនអង់គ្លេសមកកាន់ទឹកដីកម្ពុជា។

លោកស្រីHeather Wheeler ប្រេសិតពាណិជ្ជកម្មរបស់នាយករដ្ឋមន្ត្រីចក្រភពអង់គ្លេសនៅថ្ងៃទី១៨ ខែកុម្ភៈ ឆ្នាំ២០២១បានមានប្រសាសន៍ថា នឹងខិតខំប្រឹងប្រែងបន្តទាក់ទាញវិនិយោគិនអង់គ្លេសមកឈ្វេងយល់បន្ថែមពីសក្តានុពល ដែលកម្ពុជាកំពុងសម្រេចបាននាពេលបច្ចុប្បន្ន។ លោកស្រីបានទទួលស្គាល់ពីភាពរីកចម្រើន កំណើនសេដ្ឋកិច្ចប្រចាំឆ្នាំ និងសក្តានុពលនាំចេញរបស់កម្ពុជា ព្រមទាំងធ្វើការកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការជួយសម្របសម្រួលប្រតិបត្តិការពាណិជ្ជកម្មរបស់ធុរជន និងវិនិយោគិនអង់គ្លេសនៅកម្ពុជានាពេលកន្លងមក។

លោកស្រីបានសន្យាថានឹងខិតខំប្រឹងប្រែងបន្តទាក់ទាញវិនិយោគិនអង់គ្លេសមកស្វែងយល់បន្ថែម ពីសក្តានុពលដែលកម្ពុជាកំពុងសម្រេចបាននាពេលបច្ចុប្បន្ន។

លោករដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ បានថ្លែងអំណរគុណដល់រាជរដ្ឋាភិបាលចក្រភពអង់គ្លេស សម្រាប់ការចូលរួមចំណែកយ៉ាងសំខាន់ក្នុងការអភិវឌ្ឍធនធានមនុស្ស និងលើកស្ទួយសេដ្ឋកិច្ចកម្ពុជា តាមរយៈការផ្តល់ហិរញ្ញប្បទានក្នុងការអភិវឌ្ឍវិស័យអាទិភាពមួយចំនួន ជាពិសេសវិស័យអប់រំ សេដ្ឋកិច្ចនិងពាណិជ្ជកម្ម ព្រមទាំងតាមរយៈការផ្តល់ប្រព័ន្ធអនុគ្រោះពន្ធពាណិជ្ជកម្ម ដែលនឹងចូលជាធរមានចាប់ពីខែមករា ឆ្នាំ២០២១នេះ ក្រោយពីអង់គ្លេសចាកចេញពីសហភាពអឺរ៉ុប។

លោករដ្ឋមន្ត្រីពាណិជ្ជកម្មបានបញ្ជាក់ថា រាជរដ្ឋាភិបាលកម្ពុជាបានធ្វើកំណែទម្រង់ស្ថាប័ន និងបទបញ្ញត្តិនានា សម្រាប់ការធ្វើសមារណកម្មសេដ្ឋកិច្ច និងបង្ហាញពីឆន្ទៈដ៏មោះមុតក្នុងការពង្រីកដៃគូរពាណិជ្ជកម្ម តាមរយៈការបង្កើតកិច្ចព្រមព្រៀងពាណិជ្ជកម្មសេរីជាមួយដៃគូពាណិជ្ជកម្មសំខាន់ៗនៅក្នុងតំបន់។

ជាមួយគ្នានេះលោកក៏បានបង្ហាញអំពីការគាំទ្រចំពោះវឌ្ឍនភាពនៃកិច្ចការដៃគូសន្ទនារវាងចក្រភពអង់គ្លេស និងអាស៊ានដែលជាតំបន់មានសក្តានុពលខ្លាំង ហើយបានជម្រាបភាគីអង់គ្លេសថា កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុបលើកទី១៣ នៅឆ្នាំ២០២១ និងធ្វើជាប្រធានកិច្ចប្រជុំកំពូលអាស៊ានលើកទី៤០ នៅឆ្នាំ២០២២ ខាងមុខ៕

អ្នកជំនាញព្រមានថា ការផ្គត់ផ្គង់ទីផ្សារលក់រាយនឹងអាចលើសតម្រូវការនៅឆ្នាំនេះ

ដោយៈ ប៊ី

ភ្នំពេញ៖ អ្នកជំនាញព្រមានថា ការផ្គត់ផ្គង់ទីផ្សារលក់រាយនឹងអាចលើសតម្រូវការនៅឆ្នាំ២០២១ ខណៈអត្រាទីផ្សារលក់រាយនៅឆ្នាំ២០២១នេះ រំពឹងថានឹងមានកំណើនកើន១៨៦ ០០០ម៉ែត្រការ៉េ ដែលជាទំហំមួយដ៏ធំ សម្រាប់ការផ្គត់ផ្គង់។

លោកស្រីអាន សុធីតាអគ្គនាយកាក្រុមហ៊ុន CBRE Cambodia បានមានប្រសាសន៍ប្រាប់កាលពីថ្មីៗនេះថា ទីផ្សារលក់រាយនៅឆ្នាំ២០២១ នឹងមានកំណើន កើនឡើង១៨៦ ០០០ម៉ែត្រការ៉េ ហើយនេះគឺតួលេខធំ ដែលពិបាក ក្នុងការទាញយកអត្រាប្រើប្រាស់ពីអតិថិជន ដោយសារនៅក្នុងឆ្នាំ២០២០ មានប៊្រែនមួយចំនួនត្រូវបានបិទ ប៉ុន្តែប៊្រែនៗមួយចំនួនបានចូលមកដែរ។

លោកស្រីបានថ្លែងថា ទីផ្សារលក់រាយ គឺជាទីផ្សារមួយ ដែលមានសក្តានុពលធ្វើឱ្យអ្នកអភិវឌ្ឍន៍ស្រូបទាញផលចំណេញបានខ្ពស់ បើប្រៀបនឹងផ្នែកផ្សេងៗ ដោយឡែកផ្នែកនេះត្រូវការមានជំនាញ និងបច្ចេកទេស ជាមួយដើមទុនគ្រប់គ្រាន់ ដើម្បីអភិវឌ្ឍន៍ផ្សារមួយបាន ហើយគាត់ (អ្នកអភិវឌ្ឍន៍) ចាប់ផ្តើមប្រកួតប្រជែងអភិវឌ្ឍន៍ ប៉ុន្តែភ្លេចគិតពីចំនួននៃការផ្គត់ផ្គង់ និងអតិថិជនជួល។

លោកស្រីបានថ្លែងទៀតថា “ខ្ញុំមើលឃើញថា ទីតាំងខ្លះ មានផ្សាររហូតដល់ទៅ៣នៅទីតាំងក្បែរៗគ្នា ហើយនេះគឺជាកត្តាហានិភ័យ និងកត្តាព្រួយបារម្ភបំផុត ហើយអ្នកអភិវឌ្ឍន៍ ទោះបីដឹងថា ខ្លួនឯងអាចធ្វើផ្សារបាន តែមិនគួរធ្វើទេ បើសិនជាវាមានការផ្គត់ផ្គង់លើសតម្រូវការ”។

លោកស្រីបានបន្តទៀតថា គម្រោងទីផ្សារលក់រាយមានទំហំ១៨៦ ០០០ម៉ែត្រការ៉េក្នុង ដែលរពឹងទុកថានឹងបញ្ចប់ឆ្នាំ២០២១ នឹងត្រូវបានពន្យាពេល ប្រសិនបើអ្នកអភិវឌ្ឍន៍មិនអាចស្វែងរកអតិថិជនជួលបាន ហើយមានយឺតយ៉ាវក្នុងការសាងសង់ ដូច្នេះប្រហែលជាការផ្គត់ផ្គង់មិនអាចមានទំហំដល់១៨៦ ០០០ម៉ែត្រការ៉េនោះទេក្នុងឆ្នាំ២០២១ និងអាចពន្យាពេលដល់២០២២ ឬ២០២៣។

យោងតាមលោកស្រីអាន សុធីតាបានឱ្យដឹងថា ប៊្រែនផ្សារលក់រាយ ដែលចូលថ្មី មានចំនួន២៦ប៊្រែន និងពង្រីកសាខាចំនួន៤០ ដោយឡែកប៊្រែនដែលត្រូវបានបិទចំនួន៩ និងចាក់ចេញចំនួន៧។

លោកបានឱ្យដឹងថា បញ្ហាចម្បង ដែលប្រ៊ែនត្រូវបានបិទ និងចាកចេញ គឺកត្តា “កម្លាំងទិញ” ដែលឥទ្ធិពលនៃការទិញរបស់ប្រជាជនយើង នៅមានកម្រិតនៅឡើយ ហើយាការផ្គត់ផ្គង់ថ្មីៗ មិនអាចឈរជំហររឹងមាំបានទេ ប្រសិនបើការផ្គត់ផ្គង់នៅតែបន្តកើនឡើងដូច្នេះ ព្រោះមនុស្សម្នាក់អាចចូលផ្សារពីរក្នុងពេលតែមួយបានទេ ហើយអាចទៅផ្សារបានរាល់ថ្ងៃនោះទេ៕

អ្នកជំនាញ ៖ បញ្ហាប្រឈម៧ចំណុចដែលភ្នាក់ងារអចលនទ្រព្យថ្មីៗតែងតែជួប

ដោយ ៖ គង់ ម៉ាលីន

ភ្នំពេញ ៖ ឆ្លងផុតឆ្នាំដែលលំបាក២០២០ដោយសារតែជំងឺកូវីដ១៩បានវាយប្រហាអាជីវកម្មជាច្រើនជុំវិញពិភពលោកឱ្យទន់ដៃជើង ខ្លះងើបលែងរួច រួមទាំងកម្ពុជា​យើង​ផងដែរ។ ឆ្នាំ២០២១នេះ ថ្វីដ្បិតតែមិនទាន់វិលទៅរកស្ថានភាពល្អដូចដើមវិញ តែយើងសង្កេតឃើញថាចរន្តសេដ្ឋកិច្ច អាជីវកម្មជាច្រើនបាននិងកំពុងស្ទុះស្ទាងើប​ឡើងវិញស្ទើរគ្រប់វិស័យរួមទាំងវិស័យអចលនទ្រព្យផងដែរ។

នៅក្នុងប្រទេសកម្ពុជា វិស័យអចលនទ្រព្យ ការអភិវឌ្ឍលំនៅដ្ឋាន សំណង់អាគារផ្សេងៗ រួមទាំងការអភិវឌ្ឍន៍ដីឡូតិ៍ផងដែរនោះ ហាក់កំពុងតែបន្តដំណើរល្អឡើងវិញ​គួរឱ្យ​គត់សម្គាល់នៅដើមឆ្នាំ២០២១នេះ។ គម្រោងកាន់តែច្រើនត្រូវការទីផ្សារ ជាពិសេសភ្នាក់ងារលក់ក៏កាន់តែមានតម្រូវការច្រើន យុវជន យុវតីក៏កំពុងហក់ប្រឡូក​ចូល​ក្នុងវិស័យមួយនេះកើនឡើងគួរឱ្យកត់សម្គាល់ផងដែរ។

ដោយសារតែមើលឃើញពីការចាប់អារម្មណ៍ប្រឡូកក្នុងវិស័យអចលនទ្រព្យរបស់យុវជនខ្មែរកាន់តែច្រើន លោក វង្ស ភក្ដី ដែលជាស្ថាបនិកបណ្តុះបណ្តាលHome Business Research និងជាសហគ្រិនអចលនទ្រព្យផងដែរនោះបានយល់ឃើញពីបញ្ហាមួយចំនួនដែលភ្នាក់ងារលក់អចលនទ្រព្យថ្មីថ្មោងតែងតែជួបប្រទះនោះគឺ ៖

១- ខ្វះចំណេះដឹងក្នុងវិស័យអចលនទ្រព្យ ៖ ដោយសារតែមានការអូសទាញពីមិត្តភក្ដិ បងប្អូន រួមទាំងចិត្តចង់ខ្លួនឯងផងនោះ ភ្នាក់ងារអចលនទ្រព្យថ្មីមួយចំនួនបាន​ប្រឡូក​ទាំងមិនមានបទពិសោធន៍ និងចំណេះដឹង ចេះតែទៅលក់តាមគ្នា អ្នកខ្លះក៏ចូលទៅលក់ចំគម្រោង ឬម្ចាស់គម្រោងដែលមិនមានភាពច្បាស់លាស់ក៏មាន ដែល​ជាបញ្ហាប្រឈមមួយគួរឱ្យព្រួយបារម្ភ។

២- លក់គម្រោងដែលមិនមានស្តង់ដារត្រឹមត្រូវ ៖ មិនមែនឱ្យតែឮគេឱ្យកម្រៃជើងសារខ្ពស់សប្បាយចិត្តចុះទៅថតរូបផុសផ្សព្វផ្សាយភ្លាមនោះទេ ភ្នាក់ងារលក់ទាំងអស់​ត្រូវពិនិត្យមើលលក្ខខណ្ឌផ្លូវច្បាប់បើកក្រុមហ៊ុន លិខិតអនុញ្ញាសាងសង់ បានសុំច្បាប់អភិវឌ្ឍន៍ពីម្ចាស់គម្រោងផង។ មួយវិញទៀតយើងក៏ត្រូវមើលទៅលើ​ហេដ្ឋា​រចនា​សម្ព័ន្ធ ការបែងចែកទំហំផ្លូវ ទំហំឡូតិ៍ ឬល្វែងនីមួយៗ ប្រសិនបើគម្រោងដីឡូតិ៍ ឬផ្ទះល្វែងណាមួយដែលមានផ្លូវក្រោម៨ម៉ែត្រគឺខុសស្តង់ដារដែល​ខាង​ក្រសួងបាន​កំណត់ ភ្នាក់ងារទាំងអស់មិនគួរលក់គម្រោងនោះឡើយ បើសិនជាលក់គម្រោងបែបនោះនឹងធ្វើឱ្យយើងខាតពេលវេលា ហើយអាចនឹងប្រឈមនូវបញ្ហាឈឺក្បាល​ជា​ច្រើន។

៣-ខ្វះភាពតស៊ូ ឆាប់បោះបង់ ៖ គ្មានការងារណាដែលមិនមានការលំបាកនោះទេ ឬនិយាយឱ្យស្រួលស្ដាប់ការរកលុយវាមិនស្រួលដូចយើងចាយលុយនោះទេ។ បើសិនជាយើងពិតជាស្រឡាញ់អាជីពមួយនេះមែន ទោះបីមានការលំបាកយ៉ាងណាគួរតែបន្តធ្វើវាទៅមុខទៀត ការលំបាកពិតប្រាកដគឺជាការដែលយើងមិនព្រមបើក​ចិត្ត​ទទួលយកការពិត បំលែងការងារទាំងអស់នោះឱ្យទៅជារឿងសាមញ្ញៗ ការអភិវឌ្ឍចំណេះដឹងថ្មីៗជាប្រចាំ ស្វែងរករៀមច្បងដែលមានបទពិសោធន៍ដើរ​ជាមួយ​រៀន​សូត្រពីគាត់ឱ្យបានច្រើន នោះយើងនឹងរកឃើញវិធីងាយៗដែលអាចបន្តដំណើរទៅមុខទៀតបានជាក់ជាមិនខាន។

៤-ភាពភ័យខ្លាច ៖ ឃើញគេធ្វើបានលុយច្រើនចិត្តក៏ចង់ធ្វើដែរ តែស្ដាប់រឿងមិនល្អច្រើនក៏កើតទៅជាអារម្មណ៍ភ័យខ្លាច ភ័យរហូតទាំងដែលរឿងមិនដែល​បាន​ជួប​ក៏មាន ការខ្លាចវាជាជំងឺមួយដែលរារាំងក្ដីសុបិនរបស់យើង ហើយថ្នាំដែលអាចព្យាបាលបានគឺមានតែការអនុញ្ញាតឱ្យខ្លួនឯកបានសាកល្បងអ្វីដែលថ្មី បើគិតថាខ្លួនឯង​ទៅ​មិនរួចទេមិនមែនបានន័យថាយើងអសមត្ថភាពនោះទេ ប្រហែលជាយើងមិនទាន់បានស្វែងយល់ការងារនេះឱ្យស៊ីជម្រៅតែប៉ុណ្ណោះ។ យើងសាកស្រមៃមើលថា​ផ្ទះដែលយើងមែនដែលស្គាល់ឱ្យយើងគេងម្នាក់ឯងមួយយប់ ច្បាស់ណាស់អារម្មណ៍យើងពិតជាមិនមានក្ដីសុខ និងរសាប់រសល់ពេញមួយយប់មិនខាន មិនដូចផ្ទះ​ដែលយើងធ្លាប់គេងជារៀងរាល់ថ្ងៃនោះទេ។

៥- លក់គម្រោងស្របច្បាប់តែខុសតំបន់ ៖ ឧស្សាហ៍ព្យាយាមគឺជារឿងល្អ តែបើឧស្សាហ៍ខុសរឿងនឹងធ្វើឱ្យយើងខាតពេលវេលា ខាតលុយកាក់មិនខានឡើយ ជាក់ស្ដែងខ្លួនខ្ញុំផ្ទាល់ដែលបានប្រឡូកក្នុងវិស័យដីឡូតិ៍ឆ្នាំ២០១៦ កាលណោះមិនចេះមិនដឹងស្អី ឱ្យតែគេហៅទៅលក់គឺលក់ហើយ ទៅអង្គុយនៅខ្ចុះពីព្រឹកទល់ល្ងាចដូចអ្នកតាចំតូបអញ្ចឹងគ្មានភ្ញៀវណាម្នាក់មកសួរនាំទេ តែពេលក្រោយមានបទពិសោធន៍ខ្លះទើបដឹងថាគម្រោងនោះគឺជាការអភិវឌ្ឍន៍ខុសតំបន់។ តំបន់ដែលយើងគួរចុះកុងត្រាលក់គម្រោងគឺជាតំបន់ដែលមានការអភិវឌ្ឍន៍ច្រើនដែលស្របជាមួយនឹងចក្ខុវិស័យរបស់រាជរដ្ឋាភិបាល ឬយើងអាចមើលបានតាមរយៈគម្រោងធំៗដែលមាននៅក្បែរគម្រោងដែលយើងចង់លក់នោះ បើមានគម្រោងធំៗនៅជិតនោះយើងអាចសន្មត់បានថាតំបន់នោះប្រាកដជាមានការអភិវឌ្ឍន៍ធំទៅថ្ងៃខាងមុខជាក់ជាមិនខានឡើយ។

៦- ភ្នាក់ងារនាំភ្នាក់ងារ ៖ ចាប់អាជីពជាភ្នាក់ងារអចលនទ្រព្យដំបូង យើងមិនចេះមើលទេថានរណាជាអ្នកទិញ នរណាជាអ្នកលក់ដូចគ្នានោះ ពេលខ្លះខាតពេលវេលាមួយថ្ងៃពេញដោយសារតែនាំអ្នកលក់ដូចគ្នាដើរមើលដី ប៉ាវបាយប៉ាវកាហ្វេទៀត ព្រោះស្មានតែជាអ្នកទិញមែនទែន។ ជាភ្នាក់ងារលក់អចលនទ្រព្យត្រូវតែច្បាស់ថានរណាជាអតិថិជនគោលដៅរបស់យើង នរណាជាភ្នាក់ងារស៊ីកម្រៃជើងសារ ទើបមិនធ្វើឱ្យខាតពេលវេលានាំគេឱ្យស្គាល់ទីតាំងដែលយើងកាន់អស់។ កុំខ្លាច សួរត្រង់ៗក៏បាន បើជាភ្នាក់ងារដូចគ្នាជួយរកភ្ញៀវដាក់មកកម្រៃជើងសារយើងចែកគ្នាតាមនឹង ប្រសើនបើអ្នកទិញមែនឱ្យគាត់ប្រាប់ពីគោលបំណង់ច្បាស់លាស់ និងលទ្ធភាពដែលអាចទិញបាន យើងក៏កាន់តែងាយស្រួលរកដី ឬផ្ទះឱ្យត្រូវជាមួយនឹងតម្រូវការរបស់អតិថិជនតែម្ដង។

៧- ប្រឡូកក្នុងវិស័យអចលនទ្រព្យតែមិនដឹងលក់ផ្នែកណាមួយ ៖ ជាការពិតណាស់ ពេលចូលប្រឡូកក្នុងវិស័យអចលនទ្រព្យដំបូង យើងពិតជាពិបាកនៅក្នុងការសម្រេចចិត្តថាតើយើងគួធ្វើផ្នែកណាមួយឱ្យត្រូវនឹងចំណង់ចំណូលចិត្តយើងណាស់ ដោយសារតែផលិតផលនៅក្នុងវិស័យអចលនទ្រព្យមានច្រើនប្រភេទ ឱ្យតែមានគម្រោងគេហៅទៅលក់ក៏ចេះតែទៅលក់ហើយ ពេលខ្លះលក់គ្រប់មុខ តែលទ្ធផលខ្លះក៏អត់បានផលគ្រប់មុខដែរ។ សម្រាប់ភ្នាក់ងារថ្មីថ្មោងជាជម្រើសល្អបំផុតគួរលក់គម្រោងណាដែលមានតម្លៃធូរលក្ខខណ្ឌសាមញ្ញៗ និងងាយស្រួលនៅក្នុងការស្វែងរកអតិថិជនគោលដៅ មិនសាំញ៉ាំច្រើន ងាយនៅក្នុងការដកលុយកម្រៃជើងសារដើម្បីជាកម្លាំងចិត្តបន្តទៅមុខទៀត។

លោក វង្ស ភក្ដី ដែលជាគ្រូបណ្តុះបណ្តាលផ្នែកលក់គម្រោងក៏បានបន្តទៀតថា បើចង់ប្រឡូកក្នុងវិស័យអចលនទ្រព្យឈរជើងឱ្យបានរឹងមាំ ភ្នាក់ងារអចលនទ្រព្យថ្មីៗទាំងអស់ត្រូវតែមានការតាំងចិត្តអត់ធ្មត់ខ្ពស់ តស៊ូកុំបោះបង់ ព្រោះវិស័យមួយនេះមិនមែនធ្វើមួយថ្ងៃ ឬមួយខែទទួលបានលទ្ធផលល្អដូចដែលយើងស្រមៃចង់បាននោះទេ ទាមទារឱ្យយើងបំពេញនូវលក្ខខណ្ឌកត្តាជាច្រើន ការអភិវឌ្ឍខ្លួនជាប្រចាំ កុំថ្នមខ្លួនពេកព្រោះកន្លែងដែលយើងបានលុយមិននៅក្នុងបន្ទប់ការិយាល័យម៉ាស៊ីនត្រជាក់នោះទេ ៕

គម្រោងស្ថាបនាផ្លូវជាតិលេខ២និងផ្លូវជាតិលេខ២២ តម្លៃជាង៥៦លានដុល្លារសម្រេចបាន២៧,១០ភាគរយ

ដោយ៖ ប៊ី

ភ្នំពេញៈ វឌ្ឍនភាពនៃគម្រោងស្ថាបនាផ្លូវជាតិលេខ២ និង២២ដែលគ្រោងចំណាយថវិកា៥៦,១លានដុល្លាសហរដ្ឋអាមេរិក សម្រេចបាន២៧,១០%ហើយគិតត្រឹមថ្ងៃទី១៨ ខែកុម្ភៈ ឆ្នាំ២០២១។

នេះបើយោងតាមរបាយការណ៍របស់អគ្គនាយកដ្ឋានសាធារណការនៃក្រសួងសាធារណការ និងដឹកជញ្ជូន ដែលបានជម្រាបជូនលោកស៊ុន ចាន់ថុលដ្ឋមន្ត្រីក្រសួងសាធារណការ និងដឹកជញ្ជូន អំឡុងពេលចុះពិនិត្យគុណភាពនៃការសាងសង់ផ្លូវជាតិលេខ២ និងផ្លូវជាតិលេខ២២ នៅថ្ងៃទី១៩ ខែកុម្ភៈ ឆ្នាំ២០២១។

ការចុះពិនិត្យនេះធ្វើឡើងក្នុងគោលបំណងពិនិត្យមើលគុណភាព និងវឌ្ឍនភាពនៃការសាងសង់ថាតើ ក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេសអនុវត្តតាមបទដ្ឋានបច្ចេកទេស និងសៀវភៅបន្ទុក ដែលបានកំណត់ដែរឬយ៉ាងណា និងលើសពីនេះទៀត ដើម្បីស្វែងរកដំណោះស្រាយ និងផ្ដល់អនុសាសន៍ បន្ថែមដល់ភាគីសាងសង់ ដែលអាចធានាដល់ការសាងសង់ផ្លូវបានរឹងមាំ ប្រើប្រាស់បានយូរអង្វែង។

គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ២ និងផ្លូវជាតិលេខ២២នេះ បានបើកការដ្ឋានសាងសង់នៅថ្ងៃទី១១ ខែកុម្ភៈ ឆ្នាំ២០២០ ក្រោមអធិបតី ភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា ហើយគម្រោងផ្លូវនេះមានប្រវែងសរុប ៧២,១៧ គីឡូម៉ែត្រ ដែលក្នុងនោះកំណាត់ផ្លូវជាតិលេខ២ ចាប់ពីរង្វង់មូលតាខ្មៅ ដល់អូរចំបក់ មានប្រវែង ៦២,៥៦ គីឡូម៉ែត្រ និងផ្លូវជាតិលេខ២២ ពីអូរចំបក់ ដល់ អង្គតាសោម មានប្រវែង ៩,៦១គីឡូម៉ែត្រ ស្ថិតក្នុងភូមិសាស្រ្ត ខេត្តតាកែវ។

ការស្ថាបនាផ្លូវជាតិទាំងពីរខ្សែខាងលើ ចែកចេញជាបីផ្នែក រួមមាន៖ ផ្នែកទី១- កំណាត់ផ្លូវជាតិលេខ២ ចាប់ពីរង្វង់មូលតាខ្មៅ ដល់ផ្លូវប្រសព្វមហាវិថី សម្តេចតេជោហ៊ុនសែន មានប្រវែង ៤,៣៤គីឡូម៉ែត្រ ដែលនឹងត្រូវពង្រីកទទឹងតួផ្លូវរហូតដល់ ២០ម៉ែត្រ ដោយក្រាលបេតុងកៅស៊ូ AC ទទឹង ១៥ម៉ែត្រ ចែកចេញជាបួនគន្លង (២គន្លងទៅ ២គន្លងមក) ខ័ណ្ឌដោយគំនូសចែកទ្រូងផ្លូវ។

ចិញ្ចើមផ្លូវសង ខាងទទឹង ០,៥ម៉ែត្រ ផ្លូវថ្មើរជើងសងខាងទទឹង ២,៥ម៉ែត្រ ប្រព័ន្ធរំដោះទឹក បំពាក់ផ្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ បង្គោលសុវត្ថិភាព និងអំពូលអគ្គិសនីបំភ្លឺផ្លូវ នៅតាមទីប្រជុំជន។

ផ្នែកទី២- កំណាត់ផ្លូវជាតិលេខ២ ចាប់ពីផ្លូវប្រសព្វមហាវិថី សម្តេចតេជោហ៊ុនសែន ដល់រង្វង់មូលកួរស្រូវ ប្រវែង ៤,៤១គីឡូម៉ែត្រ ត្រូវពង្រីកទទឹងតួផ្លូវរហូតដល់ ២០,៥០ម៉ែត្រ ក្រាលបេតុងកៅស៊ូ AC ទទឹង ២០,៥០ម៉ែត្រ មានបួនគន្លង (២គន្លងទៅ ២គន្លងមក) រួមមាន គន្លងផ្លូវធ្វើចរាចរណ៍សម្រាប់រថយន្ដ ទទឹងសរុប ១៤ម៉ែត្រ និងម៉ូតូទទឹងសរុប ៥ម៉ែត្រ ខ័ណ្ឌដោយរបាំងថ្មពុះចែកទ្រូងផ្លូវ បំពាក់ផ្លាកសញ្ញាចរា ចរណ៍ គំនូសចរាចរណ៍ បង្គោលគីឡូម៉ែត្រ បង្គោលសុវត្ថិភាព និងអំពូលអគ្គិសនីបំភ្លឺផ្លូវ នៅតាមទីប្រជុំ ជន។

ផ្នែកទី៣- កំណាត់ផ្លូវជាតិលេខ២ និងផ្លូវជាតិលេខ២២ ចាប់ពីរង្វង់មូលកួរស្រូវ ដល់ផ្លូវបំបែកផ្លូវជាតិ លេខ៣ (អង្គតាសោម) ប្រវែង ៦៣,៤២គីឡូម៉ែត្រ ត្រូវពង្រីកទទឹងផ្លូវរហូតដល់ ១៣ម៉ែត្រ ដោយក្រាល បេតុងកៅស៊ូ AC ទទឹង ១៣ម៉ែត្រ ចែកចេញជាពីរគន្លង (១គន្លងទៅ ១គន្លងមក) ក្នុងនោះរួមមាន គន្លងផ្លូវធ្វើចរាចរណ៍សម្រាប់រថយន្ដទទឹងសរុប ៧ម៉ែត្រ និងម៉ូតូទទឹងសរុប ៦ម៉ែត្រ ខ័ណ្ឌដោយ គំនូសចែកទ្រូងផ្លូវ សាងសង់ប្រព័ន្ធរំដោះទឹកនៅតាមទីប្រជុំជន បំពាក់ផ្លាកសញ្ញាចរាចរណ៍ គំនូស ចរាចរណ៍ បង្គោលគីឡូម៉ែត្រ បង្គោល សុវត្ថិភាព និងអំពូលអគ្គិសនីបំភ្លឺផ្លូវ នៅតាមទីប្រជុំជន។

គម្រោងធ្វើឱ្យប្រសើរឡើងវិញនេះគ្រោងចំណាយថវិកា ៥៦,១លានដុល្លាសហរដ្ឋអាមេរិក ដែលជា ហិរញ្ញប្បទានពីរដ្ឋាភិបាលនៃសាធារណរដ្ឋកូរ៉េខាងត្បូង និងថិវកាបដិភាគរបស់រាជរដ្ឋាភិបាលកម្ពុជា។ គម្រោងនេះ សាងសង់ដោយយក្រុមហ៊ុន Hasan Engineering & Constructions Co., Ltd និងត្រួតពិនិត្យបច្ចេកទេសសាងសង់ដោយសម្ព័ន្ធក្រុមហ៊ុន Dasan Constructions Co., Ltd, Dong II Engineering Consultants Co., Ltd និង Seoyoung Engineering Co., Ltd Join Venture ប្រើប្រាស់រយៈពេល៣០ខែ គឺពីខែតុលា ឆ្នាំ២០១៩ ដល់ខែមេសា ឆ្នាំ២០២២៕

កម្ពុជាត្រៀមចូលរួមពិព័រណ៍លំដាប់អន្តរជាតិនៅទីក្រុងឌូបៃ ដែលរំពឹងថានឹងមានទេសចរជាង២៥លានមកពីជុំវិញពិភពលោកចូលរួមនៅក្នុងព្រឹត្តិការណ៍នេះ

ដោយ ៖ រ៉ាណេត
ភ្នំពេញ ៖ កម្ពុជាបាននិងកំពុងត្រៀមរៀបចំមហាព្រឹត្តិការណ៍ជាប្រវត្តិសាស្ត្រនៃពិព័រណ៍ឌូបៃ២០២០ ដោយមានការដាក់បង្ហាញនូវហេដ្ឋារចនាសម្ព័ន្ធ ការអភិវឌ្ឍន៍ និងវប្បធម៌ដ៏ល្បីល្បាញតាំងពីសម័យបុរាណរហូតមកដល់ពេលបច្ចុប្បន្នជូនដល់បណ្តាក្រុមហ៊ុន និងទេសចរអន្តរជាតិប្រមាណ២៥លាននាក់ដែលបានចូលរួមដើម្បីបង្កើនភាពទាក់ទាញដល់ការវិនិយោគបន្ថែមនៅកម្ពុជា។

រដ្ឋមន្ត្រីក្រសួងពាណិជ្ជកម្ម លោកប៉ាន សូរស័ក្តិ ជាប្រធានគណៈកម្មការអន្តរក្រសួង ដើម្បីរៀបចំនិងចូលរួមពិព័រណ៍ពិភពលោក មួយនេះបានមានប្រសាសន៍ឱ្យដឹងនៅថ្ងៃទី១៨ ខែកុម្ភៈ ឆ្នាំ២០២១ថា ពិព័រណ៍ពិភពលោកមួយនេះមានសារៈសំខាន់ណាស់សម្រាប់បង្ហាញអំពីសក្តានុពលរបស់ប្រទេសកម្ពុជា។

លោកបានបញ្ជាក់ថា “វាគឺជាការបង្ហាញឲ្យពិភពលោកបានស្គាល់ ជាពិសេសជម្រុញទាក់ទាញភ្ញៀវទេសចរអន្តរជាតិចូលមក និងអ្នកវិនិយោគតាមរយៈនៃការបង្ហាញអំពីការអភិវឌ្ឍន៍រីកចម្រើនរបស់យើង ដូច្នេះត្រូវប្រាកដថាធ្វើយ៉ាងណា ដើម្បីរៀបចំព្រឹត្តិការពិព័រណ៍ពិភពលោកឌុយបៃ ២០២០ នៅពេលខាងមុខ ឲ្យទទួលបានជោគជ័យត្រចះត្រចង់ ដោយរចនាប្លង់ពន្លាជាតិកម្ពុជា និងជ្រើសរើសក្រុមហ៊ុនសាងសង់ដែលមានគុណភាព”។

លោកកៅ កោសល អគ្គនាយកនៃអគ្គនាយកដ្ឋានជម្រុញពាណិជ្ជកម្ម បានមានប្រសាសន៍ថា ពិព័រណ៍ពិភពលោកឌុយបៃ២០២0នេះ ត្រូវបានលើកពេល រហូតដល់ថ្ងៃទី១ ខែតុលា ឆ្នាំ២០២១ខាងមុខ ដែលមានរយៈពេល១៨២ថ្ងៃ នៅក្នុងសង្កាត់ឌុតបៃខាងត្បូង នៃរាជរដ្ឋាភិបាលសហភាពអារ៉ាប់រួម ដោយក្នុងព្រឹត្តិការនោះ នឹងមានប្រទេសជាង ២០០ ចូលរួម នឹងមានអង្គការអន្តរជាតិធំៗជាច្រើនទៀតបានចូលរួមផងដែរ ហើយត្រូវបានរំពឹងថា និងមានភ្ញៀវចូលទស្សនាប្រមាណជា២៥លាននាក់ ។

លោកបន្តថា ពាក់ព័ន្ធកិច្ចការខាងលើ អ្វីដែលក្រុមការងារលេខាធិការដ្ឋានបានកំពុងបំពេញ និងដំណើរការ គឺការត្រៀមរៀបចំ និងចូលរួមទិវាអាស៊ាន និងវេទិការ Gloal Business Forum នៅថ្ងៃទី ៨ និង ៩ ខែធ្នូ ឆ្នាំ២០២១ ការត្រៀមរៀបចំទិវាកម្ពុជា នៅថ្ងៃទី ២៤ ខែមករា ឆ្នាំ២០២២ និងការត្រៀមរៀបចំព្រឹត្តិការណ៍នានា ដែលរៀបចំដោយគណៈកម្មការរៀបចំពិព័រណ៍ពិភពលោក និងចូលរួមតាមការអញ្ជើញរបស់ប្រទេសទាំងអស់នៅក្នុងព្រឹត្តិការណ៍នោះផងដែរ ក្រៅពីនេះយើងក៏បានត្រៀមរៀបចំនូវកម្មវិធីផ្សេងជាច្រើនទៀត។

នៅក្នុងព្រឹត្តិការណ៍ពិព័រណ៍ពិភពលោកឌុយបៃ២០២0 កម្ពុជានឹងរៀបចំទិវាកម្ពុជា នៅថ្ងៃទី២៤ ខែ មករា ឆ្នាំ ២០២២ ក្នុងនោះ ការប្រារព្ធពិធីនៅពេលព្រឹក គឺថ្លែងសន្ទរកថារួមគ្នារវាងកម្ពុជា និងសហភាពអារ៉ាប់រួម, ទស្សនាពន្លាជាតិសហភាពអារ៉ាប់រួម និងពន្លាជាតិប្រទេសជប៉ុន, ការបង្ហាញមុខម្ហូបខ្មែរ សម្តែង និងរៀបចំសមាគមន៍ចុងភៅកម្ពុជា, ការរៀបចំក្បូនដង្ហែ, ការរៀបចំវេទិការជម្រុញពាណិជ្ជកម្ម និងការសម្តែងសិល្បៈវប្បធម៌ខ្មែរជាដើម៕