ដោយៈ រ៉ាណេត

ភ្នំពេញៈ ការរស់នៅក្នុងអគារខុនដូដែលជាប្រភេទលំនៅដ្ឋានទំនើប ប្រណីតភាព និងទាន់សម័យ បានផ្តល់នូវអត្ថប្រយោជន៍យ៉ាងច្រើន ហើយក៏ជាប្រភេទលំនៅដ្ឋានសហកម្មសិទ្ធិ ដែលមានភាពពេញនិយម នៅតាមបណ្តាប្រទេសកំពុងអភិវឌ្ឍន៍ និងប្រទេសជឿនលឿនផងដែរ។

លោក Cooler Tan អគ្គនាយកក្រុមហ៊ុនភ្នាក់ងារអចលនទ្រព្យ YOUNGSIA Real Estate បានមានប្រសាសន៍នៅរសៀលថ្ងៃទី២៨ ខែធ្នូ ឆ្នាំ២០២០នេះថា មានហេតុផលជាច្រើន ដែលជំរុញឱ្យមនុស្សសម័យថ្មីមានតម្រូវការខ្ពស់ និងទំនោរទៅលើការស្នាក់នៅក្នុងខុនដូ។ នៅគ្រប់បណ្តាប្រទេសកំពុងអភិវឌ្ឍ និងមានការអភិវឌ្ឍទាំងអស់ នៅក្នុងទីក្រុងរបស់ប្រទេសនីមួយៗ មានកំណើនប្រជាជនច្រើន ដែលជំរុញឱ្យមានអគារខុនដូរីកដុះដាលឡើងដើម្បីបំពេញតម្រូវការរស់នៅ។

លោកបន្តថា “គម្រោងខុនដូភាគច្រើន ត្រូវបានអ្នកអភិវឌ្ឍន៍សិក្សាពីតម្រូវការ ទីតាំង​សំណង់ និងភាពចាំបាច់នៃតម្រូវការ របស់អ្នករស់នៅយ៉ាងច្បាស់លាស់ ទើបពួកគេសម្រេចបណ្តាក់ទុនវិនិយោគ និងសាសង់ឡើងដើម្បីបំពេញតម្រូវការទីផ្សារ”។ លោក​បន្តថា “សំណង់ខុនដូភាគច្រើន ត្រូវបានគេសាងសង់ឡើងនៅក្នុងពាណិជ្ជកម្មរបស់ទីក្រុង ដែលប្រមូលផ្តុំទៅដោយមជ្ឈមណ្ឌលពាណិជ្ជកម្ម និងជាបណ្តុំអាជីវកម្ម”។

លោកបន្តថា “មិនថាចំពោះប្រជាជនខ្មែរ ឬជនបរទេសនោះទេគឺតែងចង់រស់នៅក្នុងតំបន់ដែលមានការអភិវឌ្ឍន៍ មានសេដ្ឋកិច្ចល្អ ជាបណ្តុំទីផ្សារសេវាកម្មរួមមានសេវាថែទាំសុខភាព (មន្ទីរពេទ្យ គ្លីនិកឯកជន) ការអប់រំ តំបន់កម្សាន្ត អាហារដ្ឋាន ផ្សារទំនើប រួមជាមួយនឹងសេវាកម្មផ្សេងៗទៀតដែលពាក់ព័ន្ធទៅនឹងជីវភាពរស់នៅប្រចាំថ្ងៃរបស់ពួកគេ”។

លោក Cooler Tan បានមានប្រសាសន៍បន្តទៀតថា “ជាក់ស្ដែងដូចជាគម្រោងខុនដូរំដួលស៊ីធី(ROMDUOL City )គឺមានលក្ខណៈល្អប្រសើរជាច្រើន និងកាន់តែផ្តល់នូវភាពងាយស្រួលក្នុងការរស់នៅរបស់អតិថិជន។ បើយើពិនិត្យនៅក្នុងផែនទីឃើញថាគម្រោងមួយនេះ ស្ថិតនៅចំកណ្តាលនៃរាជធានីភ្នំពេញ និងហ៊ុមព័ទ្ធទៅដោយមជ្ឈម​ណ្ឌលពាណិជ្ជកម្មធំៗដូចជាគម្រោង PRINCE International Plaza គម្រោង Booyoung Towne ដែលជាគម្រោងក្រុងរណបរបស់កូរ៉េ ដែលគម្រោងលំដាប់អន្តរជាតិទាំង២នេះមានចម្ងាយត្រឹមជាង១០០ម៉ែត្រពីគម្រោងខុនដូ ROMDUOL City តែប៉ុណ្ណោះ និងបន្ថែមដោយដោយវត្តមានមន្ទីរពេទ្យអន្តរជាតិ ROYAL Phnom Penh ក៏ដូចជាផ្សារទំនើបផងដែរ”។

លោកបន្តថា “អ្វីដែលជាលក្ខណៈពិសេសរបស់គម្រោងខុនដូ ROMDUOL City គឺកត្តាតម្លៃដែលមានចាប់ពី១៧០០ -២០០០ដុល្លារក្នុងមួយម៉ែត្រ ដែលតម្លៃទាំងនេះមានមិនច្រើននោះទេនៅតំបន់សង្កាត់ទឹកថ្លា ខណ្ឌសែនសុខ ដែលស្ថិតនៅកណ្តាលភ្នំពេញ។ ក្រៅពីភាពល្អប្រសើរនៃតម្លៃនៅពេលនេះ ងាកទៅការរចនាម៉ូដវិញគឺត្រូវបានគូរឡើងដោយវិស្វករជំនាញជនជាតិសាំងហ្គាពួរ ដែលមានចំនួន៤អគារ ដោយអគារនីមួយៗត្រូវបានចាប់យកខ្នាត៤៥ដឺក្រេ ដែលអនុញ្ញាតឱ្យពន្លឺ ខ្យល់ ចេញចូលគ្រប់គ្រាន់ និងមិនមានបាំងទិដ្ឋភាព សោភ័ណភាពគ្នានោះទេ”។

ដោយឡែកពាក់ព័ន្ធ ទៅនឹងនិន្នាការនៃការទិញខុនដូរបស់ប្រជាជនខ្មែរ ត្រូវបានលោក Cooler Tan បញ្ជាក់ថា ទំនោរនៃតម្រូវការទីផ្សារខុនដូ សម្រាប់ប្រជាជនខ្មែរត្រូវបានបែងចែកជា៣ដំណាក់កាល ដោយដំណាក់ទី១ចាប់ពីឆ្នាំ២០០០-២០១០ ចំនួននៃតម្រូវការមានទាបបំផុត ពោលគឺមានត្រឹមចន្លោះពី៥-១០ភាគរយតែប៉ុណ្ណោះ ដោយសារតែគ្រានោះប្រជាជនខ្មែរភាគច្រើន នៅមិនទាន់ស្គាល់ច្បាស់ពីខុនដូនោះទេ។

ដំណាក់កាលទី២ចាប់ពីឆ្នាំ២០១០-២០១៥ ដែលចាប់ផ្តើមមាននិន្នាការកើនឡើងក្នុងចន្លោះពី១០-២០ភាគរយបន្ទាប់ ពួកគាត់មួយចំនួនបានស្វែងយល់ពីខុនដូខ្លះៗ។ ដំណាក់កាលទី៣ចាប់ពីឆ្នាំ២០១៥- ២០២០ កំណើននៃតម្រូវការខុនដូចាប់ផ្តើមមានការកើនឡើងគួរឱ្យសម្គាល់ ដែលអត្រានៃតម្រូវការបានកើនឡើង ចន្លោះពី២០-៤០ភាគរយ ដែលជាចំនួនច្រើនគួរឱ្យកត់សម្គាល់។

លោក Cooler Tan បានមានប្រសាសន៍បញ្ជាក់ថា “ចាប់ពីដំណាក់កាលនេះរហូតទៅ កំណើននៃនិន្នាការទិញខុនដូរបស់ប្រជាជនខ្មែរ នឹងបន្តកើនឡើងជាលំដាប់ក្រោមហេតុផលថា នៅពេលសេដ្ឋកិច្ចជាតិមានការកើនឡើង កំណើននៃចំណូលរបស់ប្រជាជនខ្មែរមានចំនួនច្រើនជាងមុន នោះការរស់នៅរបស់ពួកគាត់ក៏នឹងត្រូវផ្លាស់ប្ដូរផងដែរ។ នៅពេលពួកគាត់មានលុយ ពួកគាត់ក៏ចង់រស់នៅស្រួល ហូបឆ្ងាញ់ នៅកន្លែងស្អាតមានផាសុកភាពខ្ពស់”។

លោកបន្តថា សម្រាប់អ្នកទិញខុនដូមួយប្រភេទទៀតគឺដើម្បីវិនិយោគ។ ពួកគាត់ចង់ទិញខុនដូ ដែលមានតម្លៃទាប រយៈពេលបង់រំលោះបានយូរ និងងាយលក់ក្នុងពេលខ្លី ហើយអាចចំណេញបានច្រើន។ ការទិញបានក្នុងតម្លៃទាប គឺមានឱកាសចំនួន២ ទីមួយទិញនៅពេលដែលគម្រោង ចាប់ផ្តើមប្រកាសលក់លើកដំបូង ដែលការលក់មានតម្លៃពិសេស ទី២ ទិញនៅពេលដែលមានវិបត្តិសេដ្ឋកិច្ចក្នុងរយៈពេលខ្លី ជាក់ស្ដែងដូចជាទិញនៅក្នុងកំឡុងពេលនេះតែម្ដង អ្នកវិនិយោគនឹងមានឱកាសចំណេញច្រើន ខណៈដែលឱកាសទាំង២នេះមានមិនច្រើននោះទេ”៕

ដោយគង់ សូរិយា

        ភ្នំពេញៈ ដោយទទួលបានការគាំទ្រពីអ្នកអាន អ្នកស្តាប់់កើនឡើងជាប្រចាំ គេហ​ទំព័រPropertyarea.asia នឹងចាប់ផ្តើមកម្មវិធីកិច្ចសម្ភាសន៍ពិសេស ដោយផ្តោតលើទិដ្ឋភាពទូទៅពាក់ព័ន្ឋ នឹងបច្ចុប្បន្នភាពអចលនទ្រព្យនៅដើមឆ្នាំ២០២១ខាងមុខនេះ។

កិច្ចសម្ភាសន៍លើប្រធានបទថ្មី ទាក់ទងនឹងបច្ចុប្បន្នភាពអចលនទ្រព្យ នឹងចេញផ្សាយចាប់ពីថ្ងៃទី១ ខែមករា ឆ្នាំ២០២១ខាងមុខនេះ ជាមួយវាគ្មិនជាតិ អន្តរជាតិ ដែលមានបទពិសោធន៍ក្នុងវិស័យអចលនទ្រព្យ ការចាប់ផ្តើមជំនួញ និងទិដ្ឋភាពទូទៅនៃសេដ្ឋកិច្ចកម្ពុជា។

ជាមួយនឹងដំណើរវិវត្តន៍ឥតឈប់ឈរ គេហទំព័រPropertyarea.asia នឹងចេញផ្សាយកិច្ចសម្ភាន៍ពិសេសរៀងរាល់ថ្ងៃច័ន្ទ ថ្ងៃពុធ និងថ្ងៃសុក្រវេលាម៉ោង៧នាទីល្ងាច។

សហស្ថាបនិកនិងជាអគ្គនាយក នៃគេហទំព័រPropertyarea.asia និងfacebook Page ឈ្មោះ Property Area Asiaនិងគេហទំព័រ Cambodiafinancialtimes.com និងfacebook Page ឈ្មោះ Cambodia Finnancial Times លោកយិន លាងគង់បានមានប្រសា​សន៍ថាជាមួយនឹងដំណើរឆ្ពោះទៅមុខ​ និងការគាំទ្រកើនឡើងជាប្រចាំ បានធ្វើឲ្យ​ក្រុម​ការងារមានមានសម្ពាធ ដោយសារត្រូវគកិតរិះរកគំនិតថ្មីៗ ផ្តល់ជូន អ្នកអាន អ្នកស្តាប់ ដើម្បីទទួលបានគុណប្រយោជន៍ពីគេហទំព័រនេះកាន់តែច្រើន និងសម្បូរបែប។

លោកបន្តថា “យើងឈរលើមូលដ្ឋានវិជ្ជាជីវៈ និងរក្សាគុណតម្លៃស្នូលរបស់យើងក្នុងនាមជាអ្នកសារព៌តមានអាជីព ដែលផ្តល់នូវព៌តមានលឿន រហ័ស ពិត អាចទុកចិត្តបានដល់សាធារណៈជន”។ លោកបន្តថា “គេហទំព័ររបស់យើងបានដំណើរការ រហូតមកទល់់ពេលនេះ ទទួលបានការគាំទ្រពីអ្នកវិនិយោគជាតិ អ្​ន្តរជាតិ ដោយពួកគេបានប្រើប្រាស់មូលដ្ឋានព៌តមានរបស់យើងជាមូលដ្ឋាន ឬឯកសារជំនួយ ដើម្បីធ្វើជាមូលដ្ឋានវិភាគពិចារណា មុនសម្រេចចិត្តវិនិយោគលើអ្វីមួយផងដែរ”។

ជាមួយគ្នានឹងបញ្ហាដែលយើងកំពុងជួបប្រទះ នោះគឺការខិតខំបំពេញនូវរាល់ចំណុ​ចខ្វះខាត ដើម្បីធ្វើឲ្យគេហទំព័រនេះទទួលបានជោគជ័យ និងការគាំទ្របន្ថែមទៀតពីអ្នកអានជាតិ និងអន្តរជាតិ។

លោកយិន លាងគង់បានបញ្ជាក់ថា “យើងបាននិងកំពុងបន្តបដិសេធនូវការសរសរឬផ្តល់ព៌តមានមានលក្ខណៈបំភ្លៃ បំភ្លើស បំផ្លោង ដោយប្រាសចាកមូលដ្ឋានវិជ្ជាជីវៈ ព្រោះនៅពេលយើងដើរចេញពីមូលដ្ឋានវិជ្ជាជីវៈ នឹងធ្វើឲ្យយើងស្លាប់់ដោយខ្លួនឯង”។

លោកបន្តថា តាមរយៈកិច្ចសម្ភាសន៍ពិសេស ដោយផ្តោតលើបច្ចុប្បន្នភាពអចលនទ្រព្យកម្ពុជា និងអន្តរជាតិនាពេលខាងមុខនេះ យើងសង្ឃឹមថានឹងទទួលបានការគាំទ្រពីអ្នកស្តាប់កាន់តែច្រើនថែមទៀត និងអាចចូលរួមជាមួយរដ្ឋាភិបាលកម្ពុជា ក្នុងការលុបបំបាត់ព៌តមានក្លែងក្លាយ និងជំនួសវិញដោយព៌តមានពិត ឥតលំអៀង អាចទុកចិត្តបាន និងឈរលើមូលដ្ឋានវិជ្ជាជីវៈជាស្នូលរបស់យើង៕

ដោយស៊ីវ ម៉េង
ភ្នំពេញៈ ជាស្រ្តីកើតក្នុងគ្រួសារមានជីវភាពធូរធារមួយរូប អ្នកស្រី កែវ សុចិន្តា បានធំធាត់ជាមួយការថែរទាំយ៉ាងល្អ និងទទួលបានការលើកទឹកចិត្តពីក្រុមគ្រួសារ ពិសេសលោក អ្នកមានគុណរបស់ខ្លួន។

ជាមួយនឹងស្នាមញញឹមប្រកបដោយភាពជឿជាក់ អ្នកស្រី កែវ សុចិន្តា បានកើតនិងធំដឹងក្តីនៅខេត្តស្វាយរៀង កន្លែងដែលម្តាយរបស់ខ្លួន បានប្រកបរបរជាអាជីវករលក់មាស និងលោកឪពុកជាមន្រ្តីពន្ធដារខេត្ត។

ដោយសារកើតក្នុងគ្រួសារជាមន្រ្តីរាជការ អ្នកស្រីបានផ្លាស់ទីលំនៅជាមួយឳពុក ម្តាយ មករៀននៅវិទ្យាល័យព្រះសីហនុ ក្នុងខេត្តកំពង់ចាម ព្រោះពេលនោះឳពុកអ្នកស្រីបានផ្លាស់ពីខេត្តស្វាយរៀង មកកាន់តួនាទីជាប្រធានផ្នែកពន្ធដារ នៅខេត្តកំពង់ចាម និងបានបន្តរមកវិទ្យាល័យព្រះស៊ីសុវត្តិក្រុងភ្នំពេញ។

ជាមួយនឹងភាពកក់ក្តៅក្នុងគ្រួសារ អ្នកស្រីតែងតែទទួលបាននិទ្ទេសល្អ នៅក្នុងសាលា ដោយទទួលបានចំណាត់ថ្នាក់លេខ១ និងលេខ២ជាប់ជាប្រចាំ តាំងពីថ្នាក់ទី៩ ដល់ថ្នាក់ទី១២ ហើយពេលចូលដល់សាកលវិទ្យាល័យ អ្នកស្រីក៏បានជាប់ចំណាត់ថ្នាក់លេខ១ទៀត ពេលសិក្សាជំនាញគ្រប់គ្រងគណនេយ្យនៅសាកលវិទ្យាល័យន័រតុន។

ជាមនុស្សមានភាពជឿជាក់ និងការតាំងចិត្តខ្ពស់ អ្នកស្រីបានបន្តដោយស្នាមញញឹមថា “ដោយសារពេលរៀនបានលេខ១ និងលេខ២ឳពុករបស់ខ្ញុំតែងតែឲ្យរង្វាន់ បានធ្វើឲ្យខ្ញុំខិតខំប្រឹងប្រែងជាប្រចាំ ព្រោះខ្លាចធ្លាក់និទ្ទេស”។ អ្នកស្រីបន្ថែមថា “ពេលរៀននៅសាកលវិទ្យាល័យន័រតុន ខ្ញុំទទួលបានចំណាត់ថ្នាក់លេខ១ទៀត ក្នុងចំណោមនិស្សិតជាង២៥០នាក់ ហេតុនេះខ្ញុំត្រូវខំប្រឹងបន្ថែម ដើម្បីរក្សាចំណាត់ថ្នាក់ល្អ ព្រោះខ្លាចខ្មាស់គេ ពេលរៀនធ្លាក់និទ្ទេស”។

នៅពេលបញ្ចប់ថ្នាក់បរិញ្ញាបត្រនៅឆ្នាំ២០០៣ អ្នកស្រីបានប្រឡូកការងារដំបូងនៅអង្គការឌីស៊ីខេម ដោយទទួលបានប្រាក់ខែ៣០ដុល្លារប៉ុណ្ណោះ ប៉ុន្តែវាជាការងារដែលអ្នកស្រីសប្បាយចិត្ត ព្រោះបានអានឯកសារច្រើន និងវាយកុំព្យូទ័របានលឿនរហូតមកទល់ពេលនេះ។

លាលែងពីការងារកន្លែងចាស់ អ្នកស្រីបានបំពេញការងារ នៅក្រុងហ៊ុនថ្មីមួយទៀតរយៈពេល១ឆ្នាំ មុនពេលចេញទៅធ្វើការគ្រប់គ្រងផ្នែកគណនេយ្យ នៅក្រុមហ៊ុនខេភីអ៊ឹមជី។

ដោយសារស្រលាញ់ការសិក្សា កំឡុងពេលបំពេញការងារ អ្នកស្រី កែវ សុចិន្តា បានចូលរៀនបន្ថែមផ្នែកគណនេយ្យករសាធារណៈ(ACCA)បន្ថែមទៀត មុនពេលបន្តរថ្នាក់អនុបណ្ឌិតផ្នែកគ្រប់គ្រងពាណិជ្ជកម្ម នៅសាកលវិទ្យាល័យន័រតុន នៅឆ្នាំ២០០៥។

ជាមួយនឹងបទពិសោធន៍ការងារ និងសិក្សាបណ្តើរ ចង់ប្រឡូកជំនួញបណ្តើរ អ្នកស្រីបានចាប់ផ្តើមបើកហាងBaby & Lady ហើយហាង Baby Boutique ជាមួយមិត្តភក្តិ ជាមុខជំនួញលើកដំបូង ដែលអ្នកស្រីបានប្រឡូកនៅឆ្នាំ២០១០ ជាលទ្ឋផលមុខជំនួញដំបូងនេះ មិនសូវទទួលបានជោគជ័យទេ ដោយសារអ្នកស្រីមិនមានពេលវេលាផ្តោតគ្រប់គ្រាន់។

អ្នកស្រីបានបន្តដោយអស់សំណើចថា “បើកក្រុមហ៊ុនចូលគ្នាជាមួយមិត្តភក្តិ បោះ ទុន១ម៉ឺនដុល្លារម្នាក់ ចុងក្រោយសល់ម្នាក់១ពាន់ដុល្លារ ប៉ុន្តែវាបានធ្វើឲ្យយើងអាចរៀនសូត្របន្ថែមពីអាជីវកម្ម និងររបៀបនៃការរកស៊ីចូលគ្នា”។

ជាមួយគ្នានេះ អ្នកស្រីបានបើកក្រុមហ៊ុនផ្តល់សេវាកម្មEmerald Agencyនៅឆ្នាំ២០១៥ នៅពេលឈប់ពី KPMG និងបានបន្តរហូតដល់សព្វថ្ងៃនេះ ព្រមជាមួយគ្នានេះ អ្នកស្រីបានបំពេញការងារនៅក្រុមហ៊ុនធានារាប់រងអាយុជីវិត AIA ដោយទទួលបានតួនាទី ជាប្រធានផ្នែកគ្រប់គ្រងអាជីវកម្មជាន់ខ្ពស់។

ជាការងារដែលអ្នកស្រីស្រលាញ់ពេញចិត្ត និងការដាក់ចិត្តចង់បានលេខ១ ពេលធ្វើអាជីវកម្ម ឬរៀនសូត្រ ជាលទ្ឋផលអ្នកស្រីទទួលបានលទ្ឋផលល្អ ដោយលក់ធានារ៉ាប់រងបានល្អជាងគេ ដែលទទួលបានការកោតសរសើរ និងលើកទឹកចិត្តជាបន្តរបន្ទាប់ ពិសេសជាការងារ ដែលអ្នកស្រីស្រលាញ់ពេញចិត្ត ព្រោះជាការងារដែលអាចជួយប្រជាជនបានច្រើន។

ជីវិតអាពាហ៍ពិពាហ៍
ជាមួយនឹងភាគជោគជ័យលើមុខជំនួញ និងវ័យវឌ្ឈនាការ អ្នកស្រី កែវ សុចិន្តាបានសម្រេចចិត្តចូលខ្លោងទ្វារអាពាហ៍ពិពាហ៍ ជាមួយលោកសំឆន សុភ័ក្ត្រា ដែលជាមន្រ្តីរាជការនៅឆ្នាំ២០០៥។
រហូតមកទល់ពេលនេះ អ្នកស្រីទទួលបានចំណងដៃបុត្រចំនួន៣នាក់ ស្រី២នាក់ និងប្រុសម្នាក់ ដែលពួកគេកំពុងសិក្សា ស្របពេលកូនស្រីបងមានអាយុ១៥ឆ្នាំ កូនស្រីទី២ អាយុ១២ឆ្នាំ និងកូនប្រុសពៅអាយុ៧ឆ្នាំ។

ជាឆាកជីវិតពោរពេញដោយសុភមង្គល និងភាពកក់ក្តៅពីគ្រួសារ ដែលតែងតែគាំទ្រ និងលើកទឹកចិត្តបានធ្វើឲ្យអ្នកស្រី អាចចាប់ផ្តើមមុខជំនួញកាន់តែច្រើន ការងារក៏កាន់តែទទួលបានជោគជ័យផងដែរ។

ភាពជោគជ័យទទួលបាន
ភាពជោគជ័យ គឺមាននិយមន័យច្រើន ប៉ុន្តែកត្តាកំណត់ជាសត្យានុម័ត គឺការទទួលបានការគាំទ្រពីគ្រួសារ ភាពជោគជ័យលើអាជីវកម្ម និងសុភមង្គលក្នុងគ្រួសារ។

ដូចគ្នានេះដែរ អ្នកស្រីកែវ សុចិន្តា ជាមនុស្សមានសមត្ថភាពផ្ទាល់ខ្លួនផង និងទទួលបានការគាំទ្រពីគ្រួសារផង។

អ្នកស្រីបានមានប្រសាសន៍ថា ភាពជោគជ័យមកទល់ថ្ងៃនេះ ផ្តើមចេញពីការខិតខំប្រឹងប្រែងផ្ទាល់ខ្លួន និងការជ្រោមជ្រែងពីគ្រួសារ ព្រោះបើគ្មានការគាំទ្រពីគ្រួសារ ក៏យើងមិនអាចដើរហើរទៅណាទេ។ អ្នកស្រីបន្តថា “ ដោយសារខ្ញុំជាមនុស្សចូលចិត្តដើរកំសាន្ត និងមានក្តីស្រម័យដើរជុំវិញពិភពលោក អញ្ចឹងខ្ញុំតែងតែប្រាប់អ្នកផ្ទះថា ហេតុអីខ្ញុំចូលចិត្តធ្វើរឿងហ្នឹង និងមុនសម្រេចចិត្តវិនិយោគលើគំរោងThe Point Community Mall (ទល់មុខស្ថានទូតចិន)ជាមួយមិត្តភក្តិ និងបានចូលរួមសហការវិនិយោគលើគំរោងមួយចំនួនទៀតជាមួយមិត្តភក្តិ និងគម្រោងមួយចំនួនផងដែរ។

អ្នកស្រីបានបន្ថែមថា “ខ្ញុំបានពិភាក្សាជាមួយស្វាមី និងលោកឳពុកក្មេក ដោយលោកបានផ្តល់យោបល់ គំនិតល្អៗ និងគាំទ្រផ្នែកហិរញ្ញវត្ថុ ទីបំផុតខ្ញុំបានវិនិយោគគំរោងនេះបានរហូតមកដល់ពេលនេះដោយជោគជ័យ”។

ផ្តើមចេញពីការគាំទ្រពីគ្រួសារពេញលេញ អញ្ចឹងខ្ញុំធ្វើអ្វីបាន ពួកគាត់មិនហាមឃាត់នូវអ្វីខ្ញុំចង់ធ្វើទេ ទាំងលោកឳពុកផ្ទាល់ និងលោកឳពុកក្មេក។ ហេតុនេះគេថាខ្ញុំជោគជ័យ គឺផ្តើមចេញពីការខិតខំខ្លួនឯង និងការគាំទ្រពីគ្រួសារហ្នឹងឯង។

អ្នកស្រី កែវសុចិន្តា បានបន្តរថា “កត្តាជោគជ័យមួយទៀត គឺការមានទំនាក់ទំនងល្អ ភាពរួសរាយរាក់ទាក់ និងការមិនប្រកាន់ខ្លួន ដែលខ្ញុំជាមនុស្សចូលចិត្តការងារសង្គមច្រើន មិនប្រកាន់អ្នកធំ អ្នកតូចឡើយ ហើយខ្ញុំចូលចិត្តរៀនអ្វីដែលថ្មីនៅជុំវិញខ្លួនជាប្រចាំ”។អ្នកស្រីបានបន្តថា “ភាគជោគជ័យមួយទៀត នៃការធ្វើជំនួញ គឺយើងត្រូវសួរខ្លួនឯងថា តើយើងចង់បានលុយ ចង់បានកិត្តិយស ការទទួលស្គាល់ ឬចង់ឲ្យគេស្គាល់យើងច្រើន??។

បើសំដៅតែយើងប្រាក់ចំណេញ ខ្ញុំមិនអាចនៅក្នុងផ្នែកធានារ៉ាប់រងយូរបានឡើយ ព្រោះនៅក្នុងផ្នែកនេះ មានការបដិសេធពីភ្ញៀវច្រើន។ អ្នកខ្លះពេលយើងនិយាយទៅគេពីបញ្ហានេះ គេបដិសេធ គេលែងរាប់រកយើងក៏មាន ហេតុនេះយើងត្រូវរ៉ឹងមាំ និងត្រូវប្រឹងប្រែងលើអ្វីដែលយើងចង់បានអ្វីពិតប្រាកដ។

ដូចពេលចូលបំពេញការងារនៅក្រុមហ៊ុនAIAដំបូង ខ្ញុំលក់មិនសូវបាន ខ្ញុំមិនបានខ្វល់ពីវាទេ(ដោយសារមានចំណូលផ្នែកផ្សេងទប់) តែខ្ញុំគិតពីគោលដៅ គឺចង់ឲ្យប្រជាជនយើងយល់ពីធានារ៉ាប់រងថា តើវាមានសារៈសំខាន់បែបណា?។អ្នកស្រីបញ្ជាក់។

អ្នកស្រី កែវ សុចិន្តា បានបន្តថា មានអ្នកនិយាយថា តើអ្នកស្រីខំធ្វើអ្វី ព្រោះបើផ្អែកពីចំណូលរបស់ខ្លួន គឺមិនមានអ្វីត្រូវលំបាកនោះទេ ប៉ុន្តែខ្ញុំនៅតែចុះនៅតាមបណ្តាខេត្ត ដែលមានការអត់ធ្មត់ និងហត់នឿយច្រើន។

ប៉ុន្តែទីបំផុតខ្ញុំធ្វើបានច្រើន និងទទួលបានលទ្ឋផលល្អ។
ទីបំផុតមានអ្នកចូលរួមរីករាយជាមួយយើង ដោយហៅខ្ញុំ “អ្នកស្រីAIA” ដែលនេះជាសមិទ្ឋផលមួយ ដែលវាជាមោទនភាពមួយ នោះគឺផ្តើមចេញពីការផ្តោតលើគោលដៅ នៃអ្វីដែលយើងចង់បានពិតប្រាកដ។

អនុសាសន៍
មនុស្សមានការគិតផ្សេងៗគ្នា ប៉ុន្តែការគិតវិជ្ជមាន នឹងនាំយើងដើរទៅមុខលឿន ខណៈបច្ចុប្បន្ន សហគ្រិនស្រ្តីលេចធ្លោជាច្រើន បាននិងកំពុងបង្ហាញមុខក្នុងសង្គម និងទទួលបានការបណ្តុះបណ្តាល លើកទឹកចិត្តបន្ថែម។

សម្រាប់អ្នកស្រី កែវ សុចិន្តា បានលើកទឹកចិត្តដល់ស្រ្តីផងដែរថា ស្រ្តីដែលចង់ប្រឡូកក្នុងជំនួញទាមទារការគាំទ្រពីគ្រួសារ ព្រោះបច្ចុប្បន្ននៅតែមានអ្នកគិតថា “រៀនច្រើនធ្វើអី រៀបការហើយឲ្យប្តីចិញ្ចឹមទៅ”។

អ្នកស្រីបន្ថែមថា ហេតុនេះទាមទារអ្នកផ្ទះ(ស្វាមី)ផ្លាស់ប្តូរផ្នត់គំនិត និងអង្គុយជជែកគ្នាថា តើគាត់ចង់បានអ្វី និងធ្វើជំនួញបែបណា ពិសេសទាមទារការគាំទ្រពីកម្លាំងកាយ កម្លាំងចិត្តពីគ្រួសារ ដើម្បីឲ្យស្រ្តីសម្រេចបានតាមគោលដៅរបស់ខ្លួន។

អ្នកស្រីបានលើកជាឧទាហរណ៍ថា “ដូចខ្ញុំចឹង ពេលខ្ញុំកំពុងរៀនគណនេយ្យ លោកឪពុកខ្ញុំ តែងតែទៅយកជាប្រចាំពេលចេញពីសាលា ហើយខ្ញុំប្រាប់គាត់ថា“កូនចង់ធ្វើនេះ ធ្វើនោះ ជាលទ្ឋផលគាត់បានផ្តល់យោបល់ និងការណែនាំផ្សេងៗ ដើម្បីយើងអាចសម្រេចបានគោលដៅរបស់ខ្លួន”។

ញញឹមបណ្តើរ អ្នកស្រីបានបន្តលើកឡើងថា ដូចពាក្យចាស់លោកពោលថា “ថោកអ្វីនឹងដៃ ថ្លៃអ្វីនឹងមាត់” នៅពេលយើងយកពាក្យនេះជាប់នឹងខ្លួន ពេលទៅណាក៏គេស្រលាញ់ គេចូលចិត្តយើងដែរ ដូច្នេះពេលយើងទៅដល់ណា មានអ្វីយើងសួរគេ មានអ្វីយើងជួយគេបាន ជារឿងល្អ”។

អ្នកស្រីបានបន្តរដោយម៉ឺងមាត់ថា “អ្វីដែលជាកត្តាដំបូងគេ គឺយើងត្រូវលើកទឹកចិត្តខ្លួនឯងជាមុន មុនពេលគេលើកទឹកចិត្តយើង ព្រោះបើយើងមិនលើកទឹកចិត្តខ្លួនឯង មិនខិតខំខ្លួនឯង ចាំតែគេលើកទឹកចិត្តក៏លំបាកដែរ”។

ជាមួយស្នាមញញឹម និងភាពរួសរាយរាក់ទាក់ អ្នកស្រីបន្ថែមថា “អ្វីសំខាន់មួយទៀតគឺការហ្វឹកហាត់កីឡា និងការធ្វើសមាធិ ក៏ជាកត្តាសំខាន់មួយ ដែលធ្វើឲ្យយើងស្ងប់អារម្មណ៍ និងទទួលបានសុខភាពល្អ ពិសេសអានសៀវភៅ ដើម្បីយើងទទួលបានចំណេះដឹងថ្មីបន្ថែម”៕