CDC អនុម័តគំរោងវិនិយោគមានតម្លៃទឹកប្រាក់ចំនួន ១១៤៤លានដុល្លារក្នុងខែធ្នូចុងឆ្នាំនេះ

ដោយៈ រ៉ាណេត

ភ្នំពេញៈ ក្រុមប្រឹក្សាអភិវឌ្ឍន៍កម្ពុជា បានអនុម័តគំរោងវិនិយោគចំនួន១២ មានទុន១១៤៤លានដុល្លារ ក្នុងរយៈពេល៤សប្ដាហ៍នៃខែធ្នូចុងឆ្នាំ២០២០ ដែលគំរោងវិនិយោគនេះស្ថិតនៅបណ្តាខេត្ត ក្រុងផ្សេងៗគ្នា។

ក្រុមហ៊ុនទាំង១២ ដែលបានស្នើសុំប្រតិបត្តិលើគម្រោងរបស់ខ្លួន ជួយបង្កើតឱកាសការងារបានជាង៦៥៥០នាក់ និងត្រូវបានរាជរដ្ឋាភិបាល តាមរយៈគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពររួមមានដូចខាងក្រោម ទី១- ក្រុមហ៊ុន CHUNTENG INDUSTRIAL (CAMBODIA) CO., LTD គម្រោងបង្កើតរោងចក្រផលិតសម្ភារៈពីក្រណាត់ សម្រាប់សត្វចិញ្ចឹម (ឆ្កែ និងឆ្មា) មានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ២,៦លានដុល្លារអាមេរិក និងអាចបង្កើតការងារបានចំនួន ៣៥៨កន្លែង។

ទី២- ក្រុមហ៊ុន BLISSFULL CAPITAL CO., LTD គម្រោងបង្កើតមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅដីឡូតិ៍៥៣២ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មានទុនវិនិយោគប្រមាណ ៩,៥លានដុល្លារអាមេរិក និងអាចបង្កើតការងារបានចំនួន ២០០កន្លែង។

ទី៣- ក្រុមហ៊ុន SING FU SUN (CAMBODIA) PLASTIC CO., LTD គម្រោងបង្កើតរោងចក្រផលិតផលិតផលពីប្លាស្ទិក (Preform, Cap, Bottle) ដែលមានទីតាំងវិនិយោគស្ថិតនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល មានទុនវិនិយោគប្រមាណ១១,៧លានដុល្លារអាមេរិក និងអាចបង្កើតការងារបានចំនួន៥២កន្លែង។

ទី៤- ក្រុមហ៊ុន RUIZEXING CHEMICAL TECHNOLOGY CO., LTD គម្រោងបង្កើតរោងចក្រផលិតថ្នាំកសិកម្ម ដែលមានទីតាំងវិនិយោគស្ថិតនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល មានទុនវិនិយោគប្រមាណ ២០,១លានដុល្លារអាមេរិក និងអាចបង្កើតការងារបានចំនួន១៧៤កន្លែង។

ទី៥- ក្រុមហ៊ុន INTER-MATTRID BEVERAGE (CAMBODIA) CO., LTD គម្រោងបង្កើតរោងចក្រផលិតស្រាបៀរ ដែលមានទីតាំងវិនិយោគស្ថិត នៅភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល មានទុនវិនិយោគចំនួន៧៨លានដុល្លារអាមេរិក និងអាចបង្កើតការងារបានចំនួន ៥៥០កន្លែង។

ទី៦- ក្រុមហ៊ុន BOTUM SAKOR ENERGY COMPANY LIMITED គម្រោងសាងសង់រោងចក្រអគ្គិសនីដុតធ្យូងថ្ម អានុភាព៧០០មេហ្គាវ៉ាត់ ដែលមានទីតាំងវិនិយោគស្ថិតនៅភូមិថ្មស និងភូមិចម្លងគោ ឃុំថ្មស ស្រុកបុទុមសាគរ ខេត្តកោះកុង មានទុនវិនិយោគប្រមាណ១ពាន់លានដុល្លារអាមេរិក និងអាចបង្កើតការងារបានចំនួន៣៦០កន្លែង។

ទី៧- ក្រុមហ៊ុន LAK SUN (CAMBODIA) CO., LTD គម្រោងបង្កើតរោងចក្រខារអំបោះគ្រប់ប្រភេទ ដែលមានទីតាំងវិនិយោគស្ថិតនៅភូមិជៃតាកូន ឃុំរកាកោះ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៣,២លានដុល្លារអាមេរិក និងអាចបង្កើតការងារបានចំនួន១៩៧កន្លែង។

ទី៨- ក្រុមហ៊ុន SINOKH PERFECT GARMENT CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិសេដា ឃុំវិហារសួគ៌ ស្រុកខ្សាច់កណ្តាល ខេត្តកណ្តាល មានទុនវិនិយោគប្រមាណ៥,៣លានដុល្លារអាមេរិក និងអាចបង្កើតការងារបានចំនួន១.៥៣៣កន្លែង។

ទី៩- ក្រុមហ៊ុន DONGNAN (CAMBODIA) WOOD CO., LTD គម្រោងបង្កើតរោងចក្រផលិតគ្រឿងសង្ហារឹម និងសម្ភារៈតុបតែងលម្អធ្វើអំពីឈើ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌានចេជាង ហ្គរ័ជី ខេត្តព្រះសីហនុ មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបាន២២០កន្លែង។

ទី១០- ក្រុមហ៊ុន CAMBODIAN TIANYUAN DINGWANG PET PRODUCTS CO., LTD គម្រោងបង្កើតរោងចក្រផលិតសម្ភារៈសត្វចិញ្ចឹមគ្រប់ប្រភេទ ដែលមានទីតាំងវិនិយោគស្ថិតនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ២,៣លានដុល្លារអាមេរិក និងអាចបង្កើតការងារបានចំនួន៣៣៨កន្លែង។

ទី១១- ក្រុមហ៊ុន NS INDUSTRIAL CO., LTD គម្រោងបង្កើតរោងចក្រផលិតកេសកាតុង ដែលមានទីតាំងវិនិយោគស្ថិតនៅភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ៣,៤លានដុល្លារអាមេរិក និងអាចបង្កើតការងារបានចំនួន១៣៦កន្លែង។

ទី១២- ក្រុមហ៊ុន LONSO (CAMBODIA) GARMENT CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិខ្នាចខាងត្បូង ឃុំបឹងត្រាញ់ខាងជើង ស្រុកសំរោង ខេត្តតាកែវ មានទុនវិនិយោគប្រមាណ៣លានដុល្លារអាមេរិក និងអាចបង្កើតការងារបានចំនួន២.៤៣៥កន្លែង។

ចំណេះដឹងអចលនទ្រព្យ! តើអ្វីជាវិធីសាស្ត្រក្នុងការបង្កើតទីផ្សារអចលនទ្រព្យ?

ដោយៈវុត្ថា

ភ្នំពេញៈ ការវិនិយោគគម្រោងណាមួយ មិនថាគម្រោងវិនិយោគលើវិស័យអចលនទ្រព្យ ទាមទាឱ្យមានយុទ្ធសាស្ត្រទីផ្សារឱ្យបានច្បាស់លាស់ ទើបឱ្យការលក់គម្រោងលក់ឆាប់ដាច់ និងបញ្ចប់ទៅតាមផែនការ។

ខាងក្រោមនេះគឺជាវិធីសាស្ត្រល្អៗ ដែលនឹងជួយអ្នកក្នុងការទទួលបានជោគជ័យខាងផ្នែកទីផ្សារអចលនទ្រព្យ។ អ្នកនឹងទទួលបានជោគជ័យ ប្រសិនបើអ្នកដឹងច្បាស់អំពីទីផ្សារដ៏មានប្រសិទ្ធិភាព។

ទី១ យល់ដឹងពីអតិថិជន: អតិថិជនគឺជាចំណុចបង្គោល នៃអាជីវកម្មអចលនទ្រព្យ ហេតុដូច្នេះ អ្នកចាំបាច់ត្រូវយល់អំពីពួកគេ និងអ្វីដែលជំរុញទឹកចិត្ដដល់ពួកគេ ហេតុដូច្នេះហើយអ្នកអាចបំពេញតម្រូវការរបស់អតិថិជនបានយ៉ាងងាយស្រូល។

ទី២ ពិចារណាលើអចលនទ្រព្យ: យុទ្ធសាស្ត្រទីផ្សាររបស់អ្នក សម្រាប់ការិយាល័យ ហាងលក់រាយ និងវិស័យអចលនទ្រព្យ លំនៅដ្ឋាននឹងមានភាពខុសគ្នា។ វាមានលក្ខណៈសំខាន់ខ្លាំងណាស់ ក្នុងការគិតអំពីគោលបំណងនៃអចលនទ្រព្យ ដើម្បីទស្សន៍ទាយនៅអ្វីដែលអតិថិជនរបស់អ្នកចង់បាន។

ទី៣ ប្រៀបធៀបអចលនទ្រព្យពាណិជ្ជកម្ម និងអចលនទ្រព្យលំនៅដ្ឋាន: ការផ្តោតតែមួយគត់ នៃអចលនទ្រព្យខាងពាណិជ្ជមក្មគឺប្រាក់ចំណេញ។ អចលនទ្រព្យពាណិជ្ជកម្ម ពាក់ព័ន្ធនឹងការលក់ ជួលឬក៏ការប្រើអចលនទ្រព្យ ដើម្បីបង្កើតការវិនិយោគឲ្យបានធំបំផុតតាមតែអាចធ្វើទៅបាន។

ទី៤ ធ្វើការវិភាគតាមរយៈយុទ្ធសាស្ត្រ SWOT: SWOT មានន័យថា ចំណុចខ្លាំង ចំណុចខ្សោយ ឱកាស និងការគំរាមកំហែងនៃអចលនទ្រព្យនោះ។

ទី៥ កំណត់គោលដៅ និងរៀបចំផែនការ: គោលដៅរបស់អ្នកទំនងជាមានប្រាក់ចំណូលដែលពាក់ព័ន្ធ ពីព្រោះយុទ្ធសាស្ត្ររួមរបស់អ្នកគឺដើម្បីលក់ / ជួលអចលនទ្រព្យឲ្យបានច្រើនតាមតែអាចធ្វើទៅបាន ឬក៏ទទួលបានកំរៃជើងសារឲ្យបានច្រើន តាមតែអាចធ្វើទៅបានផងដែរ៕

កូរ៉េ បានក្លាយជាដៃគូសំខាន់នៅក្នុងការអភិវឌ្ឍវិស័យសំណង់ និងអចលនទ្រព្យនៅកម្ពុជា

ដោយ ៖ រ៉ាណេត

ភ្នំពេញ ៖ បន្ទាប់ពីចិន ប្រទេសកូរ៉េបានក្លាយជាដៃគូយ៉ាងសំខាន់នៅក្នុងវិស័យពាណិជ្ជកម្ម ការវិនិយោគ ជាពិសេសការអភិវឌ្ឍនៅក្នុងវិស័យសំណង់ និងអចលនទ្រព្យនៅកម្ពុជា។
តាមរយៈបាយការណ៍បានបញ្ជាក់ទំហំពាណិជ្ជកម្មរវាងប្រទេសកម្ពុជា-កូរ៉េ បានបន្តកើនឡើងរហូតដល់ប្រមាណ១កោដិដុល្លារ ដែលក្នុងនោះទំហំនៃការវិនិយោគរបស់កូរ៉េនៅកម្ពុជាមានទំហំជាង ៥,៧ពាន់លានដុល្លារ ហើយមួយចំណែកធំបានចាក់បញ្ចូលទៅក្នុងវិស័យសំណង់ និងអចលនទ្រព្យ។

អគ្គនាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia បានមានប្រសាសន៍នៅព្រឹកថ្ងៃទី២៦ ខែធ្នូ ឆ្នាំ២០២០នេះថា កូរ៉េគឺជាប្រទេសដែលមានភាពសកម្មចូលមកវិនិយោគនៅកម្ពុជា ហើយក្នុងវិស័យសំណង់បានឈានមុខមុនគេ។

លោកស្រីបន្តថា “ជនជាតិកូរ៉េគឺវិនិយោគិនដែលបានចូលមកវិនិយោគដំបូងបំផុតនៅកម្ពុជា ហើយភាពច្រើនក្នុងរូបភាពជាក្រុមហ៊ុនសំណង់ ហើយក្រៅពីនេះក៏មានការវិនិយោគទៅលើផ្នែកដីធ្លី ធនាគារ និងក្រុមហ៊ុនអភិវឌ្ឍន៍គម្រោងសំណង់អគារពាណិជ្ជកម្ម ក៏ដូចជាគម្រោងអចលនទ្រព្យធំៗដែលមានទំហំទុនរាប់រយលានដុល្លារ”។

លោកស្រីបញ្ជាក់ថា “គម្រោងអភិវឌ្ឍន៍ធំៗរបស់កូរ៉េដែលមានទំហំទុនច្រើនរាប់សិបលានដុល្លាររួមមានដូចជាគម្រោង Camko City គ្រោង Booyoung Town គម្រោង De Castle 1 ជាដើម ហើយក្រៅពីនេះនៅមានគម្រោងអភិវឌ្ឍន៍ជាខុនដូកម្រិតមធ្យម និងបុរីលំនៅដ្ឋានផងដែរ”។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា “កូរ៉េ គឺជាដៃគូអភិវឌ្ឍន៍យ៉ាងសំខាន់របស់កម្ពុជា ហើយក៏ជាប្រទេសដែលរួមចំណែកនៅក្នុងការជួយទ្រទ្រង់កំណើនសេដ្ឋកិច្ចកម្ពុជាផងដែរ។

លោកឧកញ៉ាបន្តថា “ក្រៅពីវិស័យសំណង់ កូរ៉េក៏មានការបណ្តាក់ទុនវិនិយោគនៅក្នុងវិស័យឧស្សាហកម្មកាត់ដេរ រោងចក្រកែច្នៃផលិតផលកសិឧស្សាហកម្មសម្រាប់នាំចេញទៅទីផ្សារក្រៅស្រុកជាច្រើនផងដែរ។ អ្វីដែលសំខាន់ក្នុងការជំរុញ និងពង្រីកទំហំវិនិយោគកូរ៉េនៅកម្ពុជាបន្ថែមទៀត គឺកិច្ចព្រមព្រៀងពាណិជ្ជកម្មសេរីដែលនឹងបញ្ចប់ក្នុងពេលឆាប់ៗខាងមុខនេះ។ នៅពេលមានការអនុវត្តនូវកិច្ចព្រមព្រៀងពាណិជ្ជកម្មសេរី នឹងមានកំណើនការវិនិយោគនៅកម្ពុជា ដែលមានតម្រូវសាងសង់សំណង់នានា និងសុទ្ធតែអាចជះឥទ្ធិពលល្អដល់វិស័យសំណង់ផងដែរ”៕

ស៊ុយអែតផ្តល់កម្ចី ២ ពាន់លានដុល្លារទៅឱ្យវៀតណាមសាងសង់អាកាសយានដ្ឋានធំជាងគេនៅអាស៊ីអាគ្នេយ៍

ដោយ ៖ វុត្ថា
ស៊ុយអែត ៖ រដ្ឋាភិបាលនៃប្រទេសស៊ុយអែត គ្រោងនឹងផ្តល់ប្រាក់កម្ចីរហូតដល់ ២ ពាន់លានដុល្លារដើម្បីជួយប្រទេសវៀតណាមសម្រាប់ការសាងសង់គម្រោងអាកាសយានដ្ឋាន Long Thanh International ក្នុងការប្រែក្លាយជាអាកាសយាសនដ្ឋានធំជាងគេនៅក្នុងតំបន់អាស៊ីអាគ្នេយ៍។

គេហទំព័រ www.globalconstructionreview.com បានចុះផ្សាយកាលពីពេលថ្មីៗនេះថា កម្ចីនេះ នឹងត្រូវផ្តល់ជូនតាមរយៈសាជីវកម្មឥណទាននាំចេញរបស់ស៊ុយអែត ហើយថវិកានះនឹងពង្រីកសមត្ថភាពគ្រប់គ្រងចរាចរណ៍ផ្លូវអាកាសរបស់ប្រទេសវៀតណាមលើការចំណាយសម្រាប់ការសាងសង់អាកាសយានដ្ឋាន Long Thanh International និងស្ថានីយទី៣នៅក្នុងអាកាសយានដ្ឋាន Tan Son Nhat International ។

គេហទំព័រនេះបន្តថា គម្រោងសាងសង់អាកាសយានដ្ឋាន Long Thanh International នៅក្នុងដំណាក់កាលទី១នឹងត្រូវចំណាយ ១៤,៨ ពាន់លានដុល្លារដែលបានចាប់ផ្តើមនៅខែនេះ។ វិស័យសំណង់អាកាសយានដ្ឋានរបស់ប្រទេសវៀតណាមកំពុងតែមានការរីកចំរើនដោយសារប្រទេសនេះជាគោលដៅទេសចរណ៍ដ៏សំខាន់ ដែលកាលពីឆ្នាំមុនអ្នកទេសចរអន្តរជាតិចំនួន ១៦,៣លាននាក់បានមកដល់ប្រទេសនេះគឺកើនឡើង ១៥ ភាគរយបើធៀបនឹងឆ្នាំមុន។

លោក Nguyen Xuan Phuc នាយករដ្ឋមន្រ្តីវៀតណាមបានកំណត់គោលដៅពង្រីកសមត្ថភាពអាកាសយានដ្ឋានទាំង ២២ របស់ប្រទេសខ្លួនដើម្បីឱ្យទទួលបានភ្ញៀវទេសចរឱ្យដល់ ១០០ លាននាក់ តាមរយៈការអភិវឌ្ឍន៍អាកាសយានដ្ឋាន Long Thanh ថ្មី និងគ្រោងអភិវឌ្ឍនព្រលានយន្តហោះខ្នាតតូចនៅខេត្តពាយ័ព្យប្រទេស Lao Cai ដែលជាគោលដៅទេសចរណ៍ភាគខាងត្បូងនៃកោះ Phu Quoc និងតំំបន់ Chu Lai នៃខេត្ត Quang Nam និងអាកាសយានដ្ឋានភាគខាងជើង Van Don ។

ប្រទេសស៊ុយអែតមានទំនាក់ទំនងល្អជាមួយវៀតណាមចាប់តាំងពីឆ្នាំ១៩៦៩ និងធ្លាប់ជាម្ចាស់ជំនួយសម្រាប់គម្រោងលើកកម្ពស់កំណែទម្រង់ប្រព័ន្ធយុត្តិធម៌ ការប្រឆាំងអំពើពុករលួយ តម្លាភាព និងសមភាពយេនឌ័រនៅក្នុងប្រទេសវៀតណាម៕

ក្រសួងពាណិជ្ជកម្មជំរុញឱ្យផលិតកររួសរាន់ស្នើសុំ CO ដើម្បីទទួលបានការនាំទំនិញទៅអង់គ្លេសរួចពន្ធ

ដោយ ៖ រ៉ាណេត

ភ្នំពេញ ៖ ក្រសួងពាណិជ្ជកម្មកម្ពុជា បានចេញសេចក្តីជូនដំណឹងដល់ផលិតករ ឬអ្នកនាំចេញទាំងអស់ត្រូវធ្វើការស្នើសុំវិញ្ញាបនបត្របញ្ជាក់ដើមកំណើតទំនិញទម្រង់អេ (CO FORM A) ដើម្បីបញ្ជាក់នូវដើមកំណើតទំនិញរបស់ខ្លួន ដែលនឹងត្រូវធ្វើការនាំចេញទៅកាន់ចក្រភពអង់គ្លេសដោយរួចពន្ធចាប់ពីថ្ងៃទី១ ខែមករា ឆ្នាំ២០២១ ខាងមុខនេះតទៅ។

តាមរយៈសេចក្តីជូនដំណឹងកាលពីរសៀលថ្ងៃទី២៥ ខែធ្នូ ឆ្នាំ២០២០ បានបញ្ជាក់ថា ក្រសួងពាណិជ្ជកម្មអន្តរជាតិអង់គ្លេសបានជូនព័ត៌មានអំពីការផ្តល់ការអនុគ្រោះពន្ធដល់បណ្តាប្រទេសកំពុងអភិវឌ្ឍន៍ ដែលរួមមានប្រទេសអភិវឌ្ឍន៍តិចតូចផងដែរ។

សេចក្តីជូនដំណឹងបន្តថា ដើម្បីទទួលបាននូវការអនុគ្រោះពន្ធពីចក្រភពអង់គ្លេស និងអនុលោមតាមប្រកាសលេខ ៣១៩៨ ពណ.ខកល ចុះថ្ងៃទី២៦ ខែសីហា ឆ្នាំ២០១៦ ស្តីពីនីតិវិធីនៃការស្នើសុំ និងការចេញវិញ្ញាបនបត្របញ្ជាក់ដើមកំណើតទំនិញគ្រប់ទម្រង់តាមប្រព័ន្ធស្វ័យប្រវត្តិកម្មតាមរយៈគេហទំព័រ https://co.moc.gov.kh និងប្រកាសរួមរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្ម ស្តីពីការផ្តល់សេវាសាធារណៈរបស់ក្រសួងពាណិជ្ជកម្ម ផលិតករ ឬអ្នកនាំចេញទាំងអស់ត្រូវរួសរាន់ធ្វើការស្នើសុំវិញ្ញាបនបត្របញ្ជាក់ដើមកំណើតទំនិញទម្រង់ អេ (CO FORM A) ដើម្បីបញ្ជាក់នូវដើមកំណើតទំនិញរបស់ខ្លួន។

តាមសេចក្តីណែនាំគោលការណ៍ និងនីតិវិធីសម្រាប់ការអនុវត្តការចេញវិញ្ញាបនបត្របញ្ជាក់ដើមកំណើតទំនិញរបស់ក្រសួងពាណិជ្ជកម្ម ដដែលបានបន្តឲ្យដឹងទៀតថា នាយកដ្ឋាននាំចេញ-នាំចូល និងតំណាងក្រសួងពាណិជ្ជកម្មប្រចាំរដ្ឋបាលតំបន់សេដ្ឋកិច្ចពិសេស នៃអគ្គនាយកដ្ឋានសេវាពាណិជ្ជកម្ម ក្រសួងពាណិជ្ជកម្ម មានភារកិច្ចត្រួតពិនិត្យ តាមដានការអនុវត្តអនុលោមភាពវិធានដើមកំណើតទំនិញ និងនីតិវិធីប្រតិបត្តិនៃការបញ្ជាក់ដើមកំណើតទំនិញ សម្រាប់ការនាំចេញទៅកាន់ចក្រភពអង់គ្លេស៕

ការសិក្សាថ្មី ៖ ចិននឹងទាញទម្លាក់មហាអំណាចសេដ្ឋកិច្ចទី១ពិភពលោកចេញពីតំណែងនៅឆ្នាំ២០២៨

ដោយ៖ ប៊ី

ក្រុងឡុងដ៍ៈ ក្រុមអ្នកជំនាញបាននិយាយថា ប្រទេសចិននឹងវ៉ាដាច់សហរដ្ឋអាមេរិក ដើម្បីក្លាយជាប្រទេសមានសេដ្ឋកិច្ចធំបំផុតរបស់ពិភពលោកនៅឆ្នាំ២០២៨ ដែលមានរយៈត្រឹមតែ ៥ ឆ្នាំលឿនជាងការប៉ាន់ស្មានលើកមុន ដោយសារតែការស្ទុះងើបឡើងវិញពីវិបត្តិកូវិដ១៩ របស់ប្រទេសទាំងពីរមានភាពខុសគ្នា។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៦ ខែធ្នូ ឆ្នាំ២០២០។

មជ្ឈមណ្ឌលស្រាវជ្រាវសេដ្ឋកិច្ច និងពាណិជ្ជកម្មរបស់អង់គ្លេស (CEBR) បានឱ្យដឹងនៅក្នុងរបាយការណ៍ប្រចាំឆ្នាំមួយដែលចេញផ្សាយនៅថ្ងៃសៅរ៍នេះ ថា “មួយរយៈកាលមួយ ប្រធានបទដ៏សំខាន់មួយនៃសេដ្ឋកិច្ចសកលគឺការតស៊ូខាងសេដ្ឋកិច្ច និងអំណាចរវាងសហរដ្ឋអាមេរិក និងចិន”។

របាយការណ៍បានបន្តថា “វិបត្តិកូវីដ១៩ និងការឆ្លើយតបនឹងវិបត្តិសេដ្ឋកិច្ច ពិតជាបានផ្តល់ប្រយោជន៍ដល់ប្រទេសចិន”។

CEBR បានឱ្យដឹងថា “ការគ្រប់គ្រងដ៏ប៉ិនប្រសប់នៃជំងឺរាតត្បាត”របស់ប្រទេសចិន ជាមួយនឹងការបិទទ្វារប្រទេសយ៉ាងតឹងរឹង និងកំណើនសេដ្ឋកិច្ចរយៈពេលវែងនៅភាគខាងលិចប្រទេស មានន័យថា លទ្ធផលនៃសេដ្ឋកិច្ចរបស់ប្រទេសចិនមានភាពប្រសើរឡើង”។

ប្រទេសចិនត្រូវបានព្យាករថានឹងកំណើនសេដ្ឋកិច្ចជាមធ្យម ៥,៧ ភាគរយក្នុងមួយឆ្នាំពីឆ្នាំ ២០២១ ដល់ឆ្នាំ ២០២៥ មុនពេលធ្លាក់ចុះដល់ ៤,៥ ភាគរយក្នុងមួយឆ្នាំពីឆ្នាំ២០២៦ ដល់ឆ្នាំ២០៣០ ។

ខណៈពេលដែលសេដ្ឋកិច្ចសហរដ្ឋអាមេរិកទំនងជាមានការស្ទុះងើបឡើងវិញនៅឆ្នាំ២០២១ កំណើនសេដ្ឋកិច្ចរបស់ខ្លួននឹងធ្លាក់ចុះដល់ ១,៩ ភាគរយក្នុងមួយឆ្នាំរវាងឆ្នាំ២០២២ និង២០២៤ ហើយបន្ទាប់មកដល់ ១,៦ ភាគរយបន្ទាប់ពីនោះ។

ប្រទេសជប៉ុននឹងនៅតែជាប្រទេសមានសេដ្ឋកិច្ចធំទី៣ លើពិភពលោករហូតដល់ដើមទសវត្សឆ្នាំ ២០៣០ នៅពេលដែលប្រទេសឥណ្ឌានឹងវ៉ាដាច់ប្រទេសអាល្លឺម៉ង់ពីលេខ៤ ដល់លេខ៥។

ចក្រភពអង់គ្លេស ដែលបច្ចុប្បន្នជាប្រទេសមានសេដ្ឋកិច្ចធំជាងគេទី៥ នឹងធ្លាក់ចុះមកចំណាត់ថ្នាក់លេខ៦ ចាប់ពីឆ្នាំ២០២៤៕

ចំណេះដឹងអចលនទ្រព្យ! តើត្រូវមានឯកសារអ្វីខ្លះសម្រាប់ចុះបញ្ជីសារពើពន្ធអចលនទ្រព្យ?

ដោយៈវុត្ថា

ភ្នំពេញៈ អ្នកជាប់ពន្ធដែលមានអចលនទ្រព្យ មានតម្លៃលើសពី ១០០លានរៀលឡើងទៅ ត្រូវមានកាតព្វកិច្ចចុះបញ្ជីនៅរដ្ឋបាលសារពើពន្ធ ក្នុងភូមិសាស្ត្រដែលអចលនទ្រព្យនោះស្ថិតនៅ យ៉ាងយឺតបំផុតត្រឹមថ្ងៃទី៣០ខែកញ្ញានៃឆ្នាំជាប់ពន្ធ។

យោងតាមការសចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ការចុះបញ្ជីនៅរដ្ឋបាលសារពើពន្ធ អ្នកជាប់ពន្ធត្រូវបំពេញ ទម្រង់ចុះបញ្ជីអចលនទ្រព្យ ដែលបានផ្តល់ជូនដោយឥតគិតថ្លៃ និងភ្ជាប់មកជាមួយនូវឯកសារ ថតចម្លងដូចខាងក្រោម ដូចជា ទី១ អត្តសញ្ញាណបណ្ណសញ្ជាតិខ្មែរ ឬសំបុត្របញ្ជាក់កំណើត ឬលិខិតឆ្លងដែនសម្រាប់ជនបរទេស។ ទី ២សៀវភៅគ្រួសារ ឬសៀភៅស្នាក់នៅ ឬលិខិតបញ្ជាក់ទីលំនៅ។

ទី៣ បណ្ណសម្គាល់សិទ្ធិ ឬបណ្ណសម្គាល់សិទ្ធិកាន់កាប់អចលនវត្ថុ ឬវិញ្ញាបនបត្រសម្គាល់ម្ចា់ស់អចលនវត្ថុ ដែលចេញដោយរដ្ឋបាលសុរិយោដី ឬឯកសារពាក់ព័ន្ធនឹងការកាន់កាប់អចលនទ្រព្យ ដែលបញ្ជាក់ដោយអាជ្ញាធរឃុំ-សង្កាត់ឡើងទៅ។

នៅពេលបានចុះបញ្ជី អ្នកជាប់ពន្ធត្រូវបានទទួលលិខិតបញ្ជាក់ ពីការចុះបញ្ជីពន្ធលើចលនទ្រព្យ ដែលមានការចុះលេខអត្តសញ្ញាណកម្មពន្ធ លើអចលនទ្រព្យសម្រាប់សម្គាល់អចលនទ្រព្យនីមួយៗ ដែលចេញដោយរដ្ឋបាលសារពើពន្ធ។

អ្នកជាប់ពន្ធត្រូវប្រើប្រាស់លេខអត្តសញ្ញាណកម្មនេះ លើឯកសារទាក់ទិនទៅនឹងពន្ធលើអចលនទ្រព្យ។អចលនទ្រព្យដែលបានចុះបញ្ជីរួចហើយ មិនត្រូវបានចុះបញ្ជីឡើងវិញនៅឆ្នាំបន្តបន្ទាប់។

ក្នុងករណីអចលនទ្រព្យត្រូវបំបែកដើម្បីលក់ ឬផ្ទេរឬផ្តល់ជាអំណោយ អ្នកជាប់ពន្ធត្រូវផ្តល់ព័ត៌មានជូនរដ្ឋបាលសារពើពន្ធ ដើម្បីរៀបចំលេខអត្តសញ្ញាណកម្មពន្ធ លើអចលនទ្រព្យជាថ្មី (ឧទាហរណ៍ អ្នកជាប់ពន្ធ មានដីមួយកន្លែង ហើយត្រូវបានពុះជាឡូតិ៍ ដើម្បីលក់ ផ្ទេរ ឬផ្តល់ជាអំណោយ)៕

ក្រុមហ៊ុន CRCC របស់ចិន ឈ្នះការដេញថ្លៃសាងសង់ផ្លូវដែកល្បឿនលឿនរបស់ថៃក្នុងទំហំទឹកប្រាក់ ៤១៥លានដុល្លារ

ដោយៈវុត្ថា

ទីក្រុងប៉េកាំងៈ ក្រុមហ៊ុនបុត្រសម្ព័ន្ធចំនួនពីររបស់ក្រុមហ៊ុន China Railway Construction Corp ដែលជាក្រុមហ៊ុនម៉ៅការសាងសង់ផ្លូវដែក ដែលគ្រប់គ្រងដោយរដ្ឋចិនបានឈ្នះការដេញថ្លៃ គម្រោងសាងសង់ផ្លូវដែកល្បឿនលឿនចិន – ថៃ ក្នុងទំទឹកប្រាក់ចំនួន៤១៥លានដុល្លារអាមេរិក។

យោងតាមសេចក្តីប្រកាសពត៌មានរបស់ក្រុមហ៊ុន China Railway Construction Corp ត្រូវបានចុះផ្សាយដោ សារព័ត៌មានចិន (chinadaily) កាលពីពេលថ្មីនេះ ឱ្យដឹងថា ក្រុមហ៊ុនបុត្រសម្ព័ន្ធទាំងពីរនោះរួមមាន China Railway 11 Bureau Group Co Ltd និងក្រុមហ៊ុន China Railway 23 Bureau Group Co Ltd នឹងសាងសង់គម្រោងផ្លូវដែកប្រវែង ៣៩,៧៩គីឡូម៉ែត្រ រួមទាំងផ្លូវរថភ្លើង ស្ពាន និងស្ថានីយ៍រថភ្លើង សម្រាប់ដំណាក់កាលទីមួយចម្ងាយ ២៥០គីឡូម៉ែត ដែលតភ្ជាប់ពីទីក្រុងថៃបាងកក ទៅកកាន់ខេត្ត Nakhon Ratchasima ។

ខ្សែបណ្តាញមួយទៀតភ្ជាប់ពីខេត្ត Nakhon Ratchasima ទៅព្រំដែនថៃនៅខេត្ត Nong Khai និងស្ពានដែកមួយខ្សែទៀតតភ្ជាប់ពីខេត្ត Nong Khai ទៅកាន់ទីក្រុងវៀងចន្ទរបស់ប្រទេសឡាវ នឹងត្រូវតភ្ជាប់ប្រទេសទាំងពីរ ក្នុងល្បឿនកំណត់ ២៥០គីឡូម៉ែត្រក្នុងមួយម៉ោង និង ៩០០គីឡូម៉ែត្រក្នុងមួយម៉ោង។

គម្រោងតភ្ជាប់ផ្លូវដែកដ៏សំខាន់មួយនេះ (ចិននិងថៃ) ក្រោមគំនិតផ្តួចផ្តើមខ្សែក្រវ៉ាត់ និងផ្លូវ ដែលជាគោលនយោបាយរបស់ប្រធានាធិបតី ស៊ី ជីនពីង។

លោក Feng Hao អ្នកស្រាវជ្រាវនៅវិទ្យាស្ថានគមនាគមន៍ដឹកជញ្ចូន និងអភិវឌ្ឍន៍ជាតិបានឱ្យដឹងថា ផ្លូវដែកនេះគឺជាផ្លូវដែកល្បឿនលឿន ដំបូងគេរបស់ប្រទេសថៃ ដែលកំពុងរត់ឆ្លងកាត់ប្រទេស និងតភ្ជាប់ជាមួយវៀងច័ន្ទរបស់ឡាវ រហូតដល់ទៅដល់ទីក្រុងគុនមីងរបស់ខេត្តយូណាន។

លោកបន្តថា ផ្លូវដែកនេះ គឺជាផ្នែកមួយនៃផែនការរបស់ប្រទេស ពាក់ព័ន្ធសម្រាប់បណ្តាញតភ្ជាប់ នៅទូទាំងប្រទេសនៅតំបន់អាស៊ីអាគ្នេយ៍ ដែលបានចាប់ផ្តើមនៅក្នុងអនុ ស្សរណៈនៃការយោគយល់គ្នាស្តីពី កិច្ចសហប្រតិបត្តិការផ្លូវដែក ដែលបានចុះហត្ថលេខាដោយរដ្ឋាភិបាលចិននិងថៃកាលពីឆ្នាំ២០១៤ ។

យោងតាមព័ត៌មានដែលចេញផ្សាយ ដោយស្ថានទូតចិននៅទីក្រុងបាងកកបានឱ្យដឹងថា តាមការស្នើសុំរបស់ប្រទេសថៃ ប្រទេសចិន ក៏នឹងប្រើវិស្វករនិងស្ថាបត្យករថៃមួយចំនួនផងដែរ ដើម្បីជួយផ្ទេរជំនាញក្នុងការថែរក្សាប្រតិបត្តិការ និងការគ្រប់គ្រងផ្លូវដែកល្បឿនលឿន។

CRCC បានឱ្យដឹងថា នេះគឺជារបកគំហើញដ៏សំខាន់មួយ របស់ប្រទេសទាំងពីរ ដើម្បីរួមគ្នាអភិវឌ្ឍន៍ក្រុមហ៊ុនចិន ដែលអាចពង្រីកទីផ្សារនៅបរទេស។ វាមិនត្រឹមតែពង្រីកអាជីវកម្មរបស់ក្រុមហ៊ុន នៅប្រទេសថៃដោយជោគជ័យប៉ុណ្ណោះទេ ថែមទាំងបង្កើនកិច្ចសហប្រតិបត្តិការ និងការជឿទុកចិត្តគ្នាទៅវិញទៅមក ជាមួយដៃគូក្នុងស្រុក និងបង្កើតមូលដ្ឋានរឹងមាំ សម្រាប់ការពង្រីកអនាគតរបស់ក្រុមហ៊ុននៅក្នុងប្រទេសថៃ៕

ក្រសួងសាធារណការគ្រោងបណ្តុះបណ្តាលយុវជនឱ្យមានជំនាញសាងសង់ហេដ្ឋារចនាសម្ព័ន្ធធំៗ

ដោយៈវុត្ថា

ភ្នំពេញៈ ក្រសួងសាធារណការ និងដឹកជញ្ជូន គ្រោងបណ្តុះបណ្តាលយុវជនកម្ពុជាឱ្យមានជំនាញពិតប្រកដ ក្នុងការសាងសង់ស្ពានឆ្លងកាត់ទន្លេមេគង្គ និងផ្លូវល្បឿនលឿន (Expressway) នៅក្នុងប្រទេសកម្ពុជានាឆ្នាំក្រោយនេះ ដើម្បីប្រកួតប្រជែងជំនាញសាងសង់របស់យុវជនកម្ពុជានៅលើឆាក់អន្តរជាតិ។

លោក គង់ វិមាន នាយកខុទ្ធកាល័យនៃក្រសួងសាធារណការ និងដឹកជញ្ជូន បានប្រាប់គេហទំព័រ Propertyear.asia កាលពីថ្ងៃទី២៥ ខែធ្នូម្សិលមិញថា ផែនការការសម្រា ប់បណ្តុះបណ្តាលរបស់ក្រសួងសាធារណការ និងដឹកជញ្ជូនដល់យុវជនកម្ពុជា លើជំនាញសាងសង់ស្ពាន និងផ្លូវល្បឿននេះ ក្រសួងបាននឹងកំពុងរៀបចំ ក្រុមការងារចំពោះកិច្ចមួយ ដើម្បីធ្វើការ និងជជែកជាមួយនឹងវិទ្យាស្ថានជាតិបច្ចេកវិទ្យា និងក្រសួងអប់រំ។

លោកបន្តថា “ការជជែក និងពិភាក្សាគ្នានេះ ដើម្បីឈានទៅធ្វើកិច្ចព្រមព្រៀងរួមមួយ ដើម្បីធ្វើយ៉ាងណាឱ្យវិទ្យាស្ថាន របស់ក្រសួងមានលក្ខណៈស្តង់ដារខ្ពស់របស់ជាតិ ខណៈបច្ចុប្បន្ននេះ ក្រុមការងារបាននឹងកំពុងពិភាក្សាគ្នាអំពីក្រមខណ្ឌនិតិវិធី” ។

លោកបន្ថែមថា បន្ទាប់ពីមានការរៀបចំ គោលការណ៍សព្វគ្រប់អស់ហើយ និងមានកិច្ចព្រមព្រៀង និងមានការអនុញ្ញាតពីក្រសួងអប់រំ យុវជន និងកីឡារួចហើយ ការបណ្តុះបណ្តាលនឹងចាប់ផ្តើមហើយ ព្រោះនៅក្នុងក្រសួងបណ្តុំទៅដោយមនុស្ស ដែលមានធនធានស្រាប់ និងទទួលបានសញ្ញាបត្រ និងជំនាញច្បាស់លាស់មកពីក្រៅប្រទេស និងសហការជាមួយវិទ្យាស្ថានបច្ចេកវិទ្យា ក្នុងការបណ្តុះនិស្សិត ដែលមានបំណងរៀនជំនាញវិស្វករសំណង់។

លោក វ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូន ក៏បានឱ្យដឹងដែរថា បច្ចុប្បន្ននេះក្រសួងក៏មានមន្ត្រីជំនាញសាងសង់ស្ពាន និងផ្លូវច្រើនដែរ ប៉ុន្តែមិនទាន់ឆ្លើយតបទៅនឹង ការរីកចំរើន និងសេចក្តីត្រូវការនោះទេ ដោយពួកគាត់មានលទ្ធភាពក្នុងការសាងសង់ផ្លូវ និងស្ពានក្នុងកម្រិតធម្យម តែមិនទាន់អាចសាងសង់ស្ពានឆ្លងកាត់ទន្លេមេគង្គ និងផ្លូវល្បឿនបាននោះទេ។

លោកថ្លែងថា ភាគច្រើនគម្រោងស្ពាន និងផ្លូវ Expressway ធំៗ ត្រូវបានសិក្សា និងសាងសង់ដោយវិស្វករ និងក្រុមហ៊ុនមកពីក្រៅប្រទេសស្ទើតែងទាំងអស់” ។ លោកបន្តថា “ដូច្នេះហើយបានជា ឯកឧត្តមទេសរដ្ឋមន្ត្រី ស៊ុន ចាន់ថុល បានដាក់ចេញនូវផែនការយ៉ាងមុតស្រួច ធ្វើយ៉ាងណាបណ្តុះបណ្តាលជំនាញទាំងនេះ ដល់យុវជនកម្ពុជានៅឆ្នាំក្រោយនេះ” ។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងកិច្ចប្រជុំថ្នាក់ដឹកនាំក្រសួង ប្រចាំសប្ដាហ៍តាមរយៈប្រព័ន្ធវីដេអូ ពីចម្ងាយកាលពីពេលថ្មីៗនេះបានឱ្យដឹងថា ក្រសួងបាន និងកំពុងអនុវត្តអនុស្សរណៈ នៃការយោគយល់គ្នាជាមួយវិទ្យាស្ថានបច្ចេកវិទ្យាកម្ពុជា ដើម្បីសហការគ្នារៀបចំកម្មវិធី បណ្ដុះបណ្ដាលថ្នាក់បរិញ្ញាបត្រទាក់ទងនឹងផ្លូវថ្នល់ និងស្ពានដល់កូនខ្មែរ ឱ្យក្លាយទៅជាវិស្វករនៅវិទ្យាស្ថានជាតិបណ្ដុះបណ្ដាលបច្ចេកទេសរបស់ក្រសួង។

លោករដ្ឋមន្ត្រី ក៏បានជំរុញឱ្យក្រុមការងារ ចំពោះកិច្ចពិនិត្យលទ្ធភាពដំណើរការកម្មវិធីបណ្ដុះបណ្ដាលចាប់ពីខែមករា ឆ្នាំ២០២១ នេះតទៅ ក្នុងការចូលរួមលើកកម្ពស់សមត្ថភាពកូនខ្មែរ ឱ្យកាន់តែខ្ពស់ត្រដែតលើឆាកអន្តរជាតិ ស្របតាមគោលនយោបាយអាទិភាពរបស់រាជរដ្ឋាភិបាលគឺ មនុស្ស ផ្លូវ ភ្លើង ទឹក។

រដ្ឋាភិបាលកម្ពុជា បានដាក់ចេញនូវផែនការអភិវឌ្ឍន៍ ហេដ្ឋារចនាសម្ព័ន្ធ មានផ្លូវ និងស្ពានឆ្លងកាត់ទន្លេជាច្រើន គម្រោង ដើម្បីឆ្លើយតបទៅនឹងការរីកចំរើនរបស់ប្រទេស និង ការដឹកជញ្ជូននៅក្នុងប្រទេស ព្រមទាំងបង្កើននូវទំហំពាណិជ្ជកម្ម សេដ្ឋកិច្ច ឱ្យកាន់តែមានការរីកចំរើនបន្ថែមទៀត ខណៈបច្ចុប្បមានគម្រោងធំជាច្រើនទាំងផ្លូវល្បឿនលឿន ផ្លូវក្រវ៉ាត់ក្រុង និងស្ពានឆ្លងកាន់ទន្លេ បាននឹងកំពុងសាងសង់ និងត្រៀមសាងសង់នាពេលខាងមុខ៕

សួរ៤សំណួរទៅខ្លួនឯងជាមុនសិន មុនវិនិយោគលើដីធ្លីដើម្បីបានផលចំនេញច្រើន

ដោយគង់ សូរិយា

ភ្នំពេញៈ វិស័យអចលនទ្រព្យមានការរីកចំរើនយ៉ាងខ្លាំងនៅកម្ពុជា ជាក់ស្តែងវត្តមានអាគារខ្ពស់ៗជាច្រើន បានរីកដូចផ្សិតនៅរាជធានីភ្នំពេញ ពិសេសតំលៃដីធ្លីក៏បានកើនឡើងយ៉ាងគំហុកផងដែរ ដែលតំបន់ខ្លះកើនឡើងទ្វេរដង និងតំបន់ខ្លះទៀតកើនឡើងមួយគុណនឹងបីឬបួនដងក៏មាន។

តើអ្នកមានបំណងវិនិយោគលើដីធ្លីដែរឬទេ? Propertyarea.asia ដែលជាគេហទំព័រព៌តមានអចលនទ្រព្យនាំមុខគេនៅកម្ពុជា បានលើកយកមូលដ្ឋានចំណេះដឹងចំនួន៦ ដើម្បីឲ្យអ្នកវិនិយោគដីធ្លី សូមសាកសួរខ្លួនឯងជាមុន ដើម្បីយកមកធ្វើជាមូលដ្ឋានយកមកគិតពិចារណា និងវិភាគថាគួរវិនិយោគដីធ្លីនៅទីណា កន្លែងណាដែលទទួលបានប្រាក់ចំណេញច្រើននិងឆាប់រហ័ស។

ទិញដីក្នុងគោលបំណងអ្វី?

តើអ្នកមានបំណងទិញដី ដើម្បីទុកលក់យកប្រាក់ចំណេញ ឬទុកសាងសង់សំណង់នានា? លោកគីម ហ៊ាង ប្រធាន KW Cambodia បានថ្លែងថា ប្រសិនជាលោក អ្នកចង់ទិញដីដើម្បីសាងសង់ខុនដូ សាងសង់អាគារការិយាល័យ ឬសម្រាប់សាងសង់សណ្ឋាគារ សូមទិញដីនៅក្នុងខ័ណ្ឌចំការមន។

ការទិញដីធ្លីជាការវិនិយោគត្រឹមត្រូវ និងមិនត្រឹមត្រូវ

លោកគីម ហ៊ាងបានថ្លែងថា ការវិនិយោគដីធ្លី ជាការវិនិយោគដ៏ត្រឹមត្រូវ ប្រសិនជាលោក អ្នកសល់លុយដោយខ្លួនឯង មិនដឹងយកទៅវិនិយោគអ្វី ប៉ុន្តែប្រសិនជាយកលុយបង្វិល ឬយកលុយពីធនាគារដើម្បីទិញដីវិនិយោគ អ្នកជំនាញរូបនេះបាននិយាយថា “កុំអី” ព្រោះអ្នកខ្លះគិតថា ការប្រាក់ធនាគារ១ឆ្នាំ៨ភាគរយ ហើយដីឡើងថ្លៃ ២០ភាគរយក្នុងមួយឆ្នាំ គឺអាចខ្ចីឥណទានពីធនាគារយកមកទិញបាន ប៉ុន្តែវាជាការយល់ច្រឡំ ព្រោះដីមិនងាយលក់ភ្លាមៗនោះទេ និងអាចមានភាពជាប់គាំងរយៈពេលពីរឬបីឆ្នាំ ពោលគឺត្រូវការពេលវេលា។

ការវិនិយោគដីធ្លីមិនសុទ្ធជាជម្រើសល្អ

ការវិនិយោគលើវិស័យដីធ្លី មិនសុទ្ឋតែជាជម្រើសល្អនោះទេ ព្រោះក្នុងវិស័យសំណង់ និងអចលនទ្រព្យមានវិស័យផ្សេងៗទៀត ដែលអាចប្រមូលប្រាក់បានលឿនជាងវិស័យដីធ្លី។

លោកគីម ហ៊ាង បានថ្លែងថា ប្រសិនជាអ្នកមានអាយុ៥០ឆ្នាំ ជាពេលដល់អាយុជិតចូលនិវត្តន៍ មិនគួរវិនិយោគលើវិស័យដីធ្លីនោះទេ គឺគួរទិញខុនដូ ទិញដីសាងសង់ផ្ទះជួល ឬទិញផ្ទះល្វែងសម្រាប់ជួល ដែលអាចបានប្រាក់ភ្លាមៗត្រលប់មកវិញ។ ផ្ទុយទៅវិញប្រសិនជាលោក អ្នកមានអាយុចន្លោះពី៣០ទៅ៤០ឆ្នាំ គួរវិនិយោគលើវិស័យដីធ្លី ព្រោះទិញដីមានផលចំណេញខ្ពស់ និងជាវ័យដែលលោក អ្នកកំពុងរកលុយបានច្រើន។

តើមានលុយអ្នកប៉ុន្មាន?

តើលោក អ្នកមានប្រាក់ប៉ុន្មាន មានស្ថានភាពជីវិតយ៉ាងដូចម្តេច? ព្រោះការសម្រេចចិត្តក្នុងលក្ខខ័ណ្ឌនេះមានសារៈសំខាន់ មុនធ្វើការវិនិយោគក្នុងវិស័យនេះ។

លោកបណ្ឌិតគីម ហ៊ាងបានថ្លែងថា ការវិនិយោគលើវិស័យអ្វីមួយ ក៏គួរមានលក្ខខ័ណ្ឌជាក់លាក់ទាក់ទងនឹង ចំនួនទុនវិនិយោគ លក្ខខ័ណ្ឌការងារ លក្ខខ័ណ្ឌជីវិត ជាដើម ដោយលោកបានថ្លែងថា ប្រសិនជាអ្នកទើបរៀបការ ហើយសល់លុយ១០ម៉ឺនដុល្លារ គួរទិញផ្ទះសម្រាប់ស្នាក់នៅសិន ប្រសិនជាមានផ្ទះ ហើយសល់លុយគួរទិញដីទុក ហើយប្រសិនជាមានផ្ទះស្នាក់នៅ និងមានដីរួចហើយ គួរទិញខុនដូ ព្រោះខុនដូជាវិស័យថ្មីមួយដែលកំពុងមានការពេញនិយម និងបង្ហាញពីភាពស៊ីវិល័យ៕