ក្រុមហ៊ុន YOUNGSIA REAL ESTATE ចាប់ដៃសហការជាមួយគម្រោងខុនដូប្រណីត ROMDUOL CITY

ដោយៈ រ៉ាណេត

ភ្នំពេញៈ ក្រុមហ៊ុនភ្នាក់ងារអចលនទ្រព្យ ដ៏ល្បីឈ្មោះនៅកម្ពុជា YOUNGSIA REAL ESTATE បានសម្រេចសហការជាដៃគូយុទ្ធសាស្ត្រ គ្រប់ជ្រុងជ្រោយជាមួយគម្រោងខុនដូប្រណីត ដ៏ទាក់ទាញនៅបណ្តោយផ្លូវសហព័ន្ធរុស្ស៊ី គឺគំរោង ROMDUOL CITY ដើម្បីជំរុញការលក់នៅលើទីផ្សារឱ្យបានជោគជ័យខ្ពស់។

អគ្គនាយកក្រុមហ៊ុនភ្នាក់ងារអចលនទ្រព្យ YOUNGSIA REAL ESTATE លោក Cooler Tan បានមានប្រសាសន៍នៅក្នុងពិធីចុះហត្ថលេខា នៃកិច្ចអនុស្សារណៈយោគយល់ (MOU) ជាមួយក្រុមហ៊ុនអភិវឌ្ឍន៍គម្រោងខុនដូ ROMDUOL CITY នៅរសៀលថ្ងៃទី២១ ខែធ្នូ ឆ្នាំ២០២០ថា ទីផ្សារអចលនទ្រព្យនៅកម្ពុជានាពេលបច្ចុប្បន្ននេះ ជាពិសេសផ្នែកខុនដូ នៅតែបាននូវស្ថានភាពល្អប្រសើរ បើប្រៀបធៀបទៅនឹងផ្នែកដទៃទៀតដែលកំពុងទទួលរងនូវផលប៉ះពាល់ពីវិបត្តិកូវីដ១៩ ។

លោកបន្តទៀតថា “ដោយឡែកសម្រាប់តែគម្រោងខុនដូ ប្រណីតដែលបានក្លាយជាដៃគូយុទ្ធសាស្ត្រ ជាមួយក្រុមហ៊ុនភ្នាក់ងារអចលនទ្រព្យ YOUNGSIA REAL ESTATE នៅពេលនេះ គឺជាគម្រោងដែលមានភាពប្រណីត លេចធ្លោរក្នុងនាមជាអគារលំនៅដ្ឋានសហកម្មសិទ្ធិ ឬហៅថាខុនដូ ប្រចាំនៅក្នុងតំបន់ ស្ថិតនៅទីតាំងដែលមានសក្ដានុពល ផ្តល់ផាសុកភាពខ្ពស់ ក្នុងការរស់នៅតាមបែបសម័យទំនើបនៃតំបន់កណ្តាលក្រុង។

លោក Cooler Tan បានបន្តថា “ផ្អែកតាមបទពិសោធន៍ នៅក្នុងទីផ្សារអចលនទ្រព្យកម្ពុជា ជាពិសេសផ្នែកខុនដូប្រណីតគម្រោង ROMDUOL CITY តាមរយៈភាពជំនាញទីផ្សាររបស់ក្រុមហ៊ុន YOUNGSIA REAL ESTATE នឹងទទួលបានការគាំទ្រយ៉ាងច្រើនពីសំណាក់អតិថិជន ដែលឈានទៅរកភាពជោគជ័យក្នុងពេលដ៏ខ្លីជាក់ជាមិនខាន។

តំណាងក្រុមហ៊ុនអភិវឌ្ឍន៍គម្រោងខុនដូ ROMDUOL CITY អ្នកនាង Ly Hongmei បានមានប្រសាសន៍ផងដែរថា តាំងនាមឱ្យក្រុមហ៊ុនអភិវឌ្ឍន៍ខុនដូ ប្រណីតROMDUOL CITY យើងពិតជាសប្បាយរីករាយ នៅក្នុងកិច្ចសហការជាដៃគូយុទ្ធសាស្ត្រ ជាមួយក្រុមហ៊ុនភ្នាក់ងារអចលនទ្រព្យ YOUNGSIA REAL ESTAE ដែលជាក្រុមហ៊ុនមានកេរ្តិ៍ឈ្មោះល្បី មានជំនាញច្បាស់លាស់ និងប្រកបដោយក្រមសីលធម៌ វិជ្ជាជីវៈយ៉ាងពិតប្រាកដ” ។

អ្នកនាងបានបន្តថា “រំដួលស៊ីធីជាលំនៅដ្ឋានសហកម្មសិទ្ធិ ដែលរួមបញ្ចូលគ្នារវាងបែបបទ នៃជីវិតទាន់សម័យ និងភាពស្រស់បំព្រងនៃធម្មជាតិ និងត្រូវបានបំពាក់ដោយប្រព័ន្ធស្មាតហូម។បន្ថែមពីលើការរចនាម៉ូដដ៏ទាក់ទាញ ស្អាតប្លែកក្នុងនាមជាសហគមន៍អេកូធម្មជាតិដ៏ធំមួយ ដែលជាបែបផែននៃរស់នៅថ្មីក្នុងរាជធានីភ្នំពេញ” ។

នៅក្នុងគម្រោងទាំងមូលរួមមានចំនួន៤អគារ កម្ពស់សរុប២១ជាន់ និងមានចំនួនសរុប១១៩២យូនីត ហ៊ុមព័ទ្ធទៅដោយតំបន់សេវាកម្មសំខាន់ៗដ៏ច្រើន ដូចជា មានទំនើបរំដួលស៊ីធី មន្ទីរពេទ្យរ៉ូយ៉ាល់ភ្នំពេញ ផ្សារទំនើបរតនាផ្លាហ្សា ផ្សារម៉ាក្រូ ផ្សារទំនើបអ៉ីអនសែនសុខ និងសាលារៀនជាអន្តរជាតិល្បីៗជាង២០ ព្រមទាំងស្ថាប័នអប់រំរបស់រដ្ឋ មន្ទីរពេទ្យ និងសហគ្រាសផ្សេងៗទៀត ហើយសម្រាប់អតិថិជនដែលទិញនៅពេលនេះនឹងទទួលបានអត្ថប្រយោជន៍ និងផលចំណេញយ៉ាងច្រើន។

រំដួលស៊ីធី ត្រូវបានរចនាម៉ូដយ៉ាងស្រស់ស្អាតទាន់សម័យ តាមបែបប្រទេសសិង្ហបុរី ដែលជាទីតាំងតែមួយគត់ រួមបញ្ចូលគ្នាយ៉ាងល្អឥតខ្ចោះ រវាងសោភ័ណ្ឌភាពស្ថាបត្យកម្ម និងគុណតម្លៃនៃជីវិត ក្នុងការរស់នៅដោយយូនីតនីមួយៗ មានទំហំចាប់ពីជាង៤២-៨៧ម៉ែត្រការ៉េ ដែលត្រូវបានបែងចែកកម្រិតប្រណីតភាពផ្សេងគ្នា ដូចជាបន្ទប់គេង ផ្ទះបាយ និងរានហាលនៅខាងក្រៅ សម្រាប់លំហែរយកខ្យល់អាកាសផងដែរ។

នៅក្នុងឱកាសនៃការបើលក់ ជាផ្លូវការនៃអគារទី១ ក្នុងចំនោមអគារទាំង៤ ដែលកំពុងសាងសង់ដល់ជាន់ទី២១ និងត្រៀមបញ្ចប់ក្នុងពេលឆាប់ៗខាងមុខនេះ ក្រុមហ៊ុនអភិវឌ្ឍន៍ ប្រកាសលក់ក្នុងតម្លៃពិសេសទាបជាងទីផ្សារ ដែលជាការផ្តលឱកាសចំណេញយ៉ាងច្រើន ចំពោះអតិថិជនដែលទិញសម្រាប់ស្នាក់នៅផ្ទាល់ ឬទិញទុកសម្រាប់វិនិយោគបន្ត ក៏ដូចជាក្រុមហ៊ុនភ្នាក់ងារផងដែរ ជាមួយនឹងតម្លៃត្រឹមជាង ១៧០០ដុល្លារក្នុងមួយម៉ែត្រការ៉េឡើងទៅ ឬជាង៧ម៉ឺនដុល្លារក្នុងមួយយូនីតតែប៉ុណ្ណោះ។

បន្ថែមពីលើកម្មវិធីបញ្ចុះតម្លៃយ៉ាងច្រើន នៅក្នុងអំឡុងចុងឆ្នាំ២០២០នេះ ក៏មានការផ្តល់ជូននូវការយ៉ាងសន្ធឹកសន្ធាប់ ដូចជា សម្ភារៈប្រើប្រាស់នៅក្នុងបន្ទប់ស្រាប់ ជាពិសេសការផ្តល់ជូននូវ លក្ខខណ្ឌបង់ប្រាក់យ៉ាងងាយស្រួល និងនៅក្នុងរយៈពេលយូរផងដែរ៕

តម្រូវការអគ្គិសនីប្រើប្រាស់នៅក្នុងឆ្នាំនេះធ្លាក់ចុះប្រមាណ ១០ភាគរយ

ដោយៈវុត្ថា

ភ្នំពេញៈ តម្រូវការប្រើប្រាស់អគ្គិសនី នៅក្នុងប្រទេសកម្ពុជាសម្រាប់ឆ្នាំ២០២០ នេះ បានធ្លាក់ចុះប្រមាណ១០ភាគរយ បើទៀបទៅនឹងឆ្នាំមុនេះ ដោយសារតែមានរោងចក្រ និងសហគ្រាសមួយចំនួនៅក្នុងប្រទេស មានការផ្អាកដំណើរការអាជីវកម្មបណ្តោះអាសន្នរបស់ខ្លួន ដែលបង្ករឡើងដោយជំងឺកូវីដ១៩ ។

លោកវិចទ័រ ហ្សូនា អគ្គនាយកនៃអគ្គនាយកដ្ឋានថាមពល នៃក្រសួងរ៉ែ និងថាមពល បានប្រាប់គេហទំព័រ Propertyaea.asia កាលពីថ្ងៃទី២២ ខែធ្នូម្សិលមិញថា អគ្គិសនីដែលមានបច្ចុប្បន្ននេះ គឺលើសពីតម្រូវការ ដោយសារមានរោងចក្រកសហគ្រាសមួយចំនួនបានផ្អាកដំណើរអាជីវកម្មរហើយបញ្ហានេះ មិនមែនតែកម្ពុជានោះទេ គឺជាបញ្ហាសកលដែលប្រទេសនានាក៏ទទួលផលប៉ះពាល់ផងដែរ។

លោកបន្ថែមថា “ប៉ុន្តែទោះបីជាយ៉ាងណា សម្រាប់គម្រោងរោងចក្រអគ្គិសនីជាច្រើនបានដាក់ឱ្យដំណើរការ និងបញ្ចប់ទៅតាមការគ្រោងទុកសម្រាប់ឆ្នាំ២០២០ នេះ ដោយមិនមានគម្រោងណាមួយ ទទួលរងនូវផលប៉ះពាលន៉នោះទេ” ។ លោកបន្តថា “តម្រូវការប្រើប្រាស់អគ្គិសនីនៅកម្ពុជា បានធ្លាក់ចុះប្រមាណ ១០ភាគរយ ទន្ទឹមគ្នានេះ សមត្ថភាពអគ្គិសនីផ្ទុក សម្រាប់ប្រើប្រាសមានការកើនឡើង មិនមានអ្វីជាការខ្វះខាតនោះទេ សម្រាប់ឆ្នាំនេះនិងឆ្នាំបន្តបន្ទាប់ទៀត” ។

លោកវិចទ័រ ហ្សូនា បញ្ជាក់ថា គម្រោងវិនិយោគលើវិស័យអគ្គិសនី នៅក្នុងប្រទេសកម្ពុជា មានច្រើមគម្រោងដែលបានដាក់ឱ្យដំណើរជាច្រើនកន្លែង រួមមានគម្រោងអគ្គិសនីដុតធ្យូងថ្ម នៅក្នុងខេត្តព្រះសីហនុ គម្រោងប្រេង និងគម្រោងសូឡា ដូចជានៅក្នុងខេត្តស្វាយរៀង កំពង់ស្ពឺ កំពង់ឆ្នាំ និងពោធិសាត់ជាដើម បាននឹងកំពុងដំណើរជាធម្មតា។

លោកបញ្ជាក់ទៀតថា វិស័យអគ្គិសនីនៅក្នុងប្រទេសកម្ពុជា បានចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ច និងការអភិវឌ្ឍន៍ប្រទេសឱ្យមានការរីកចំរើន ស្រមតាមគោលគោលនយោបាយរបស់រាជរដ្ឋាភិបាល ជាពិសេសបានកាត់បន្ថយភាពក្រីក្ររបស់ប្រជាពលរដ្ឋ តាមរយៈការប្រាស់អគ្គីសនីដែលបច្ចប្បន្ននេះ ស្ទើតែគ្រប់ភូមិនៅទូទាំងប្រទេសមានអគ្គិសនីប្រើប្រាស់៕

ជប៉ុនគ្រោងផ្តល់ថវិកា ២,៤ពាន់លានដុល្លារសម្រាប់សាងសង់ទីក្រុងឆ្លាតវៃនៅក្នុងតំបន់អាស៊ាន

ដោយវុត្ថា

តូក្យូៈ រដ្ឋាភិបាលជប៉ុន គ្រោងនឹងផ្តល់ថវិកាចំនួន ២៥០ពាន់លានយ៉េន ដែលស្មើនឹង២,៤ពាន់លានដុល្លារអាមេរិក ដល់ក្រុមហ៊ុនជប៉ុន ដើម្បីអភិវឌ្ឍគម្រោងទីក្រុងវៃឆ្លាតតាមប្រទេសនៃអាស៊ីអាគ្នេយ៍ខាងមុខនេះ។

តាមការចុះផ្សាយរបស់ គេហទំព័រ www.pinsentmasons.com ចុះផ្សាយកាលពីម្សិលម៉ិញនេះថា ថវិកាទាំងនេះនឹងរួមបញ្ចូលទឹកប្រាក់ចំនួន៥០ពាន់លានយេន ស្មើនឹង៤៨៣.៥លានដុល្លារអាមេរិក ពីសាជីវកម្មវិនិយោគហេដ្ឋារចនាសម្ព័ន្ធ ក្រៅប្រទេសរបស់ជប៉ុនសម្រាប់ការដឹកជញ្ជូន និងអភិវឌ្ឍន៍ទីក្រុង (JOIN)និង ទឹកប្រាក់២០០យេន ស្មើនឹង ១,៩ពាន់លានដុល្លារ ពីធនាគារជប៉ុនសម្រាប់កិច្ចសហប្រតិបត្តិការអន្តរជាតិ (JBIC) ។

គេហទំព័រនេះបន្តថា រដ្ឋាភិបាលជប៉ុន នឹងលើកទឹកចិត្តដល់ក្រុមហ៊ុនជប៉ុន ឱ្យចូលរួមក្នុងគម្រោងនានា នៅក្នុងទីក្រុងចំនួន២៦នៅក្នុងប្រទេសចំនួន១០ នៃសមាគមប្រជាជាតិអាស៊ីអាគ្នេយ៍ (អាស៊ាន)រួមមានទីក្រុងហាណូយហូជីម៉ិញ ទីក្រុងហ្សាកាតា ទីក្រុងបាងកក សិង្ហបុរី និងទីក្រុងគូឡាឡាំពួរជាដើម។

ក្រុមហ៊ុនដែលមានចំណាប់អារម្មណ៍ នឹងអាចចូលរួមដេញថ្លៃគម្រោងនៅចុងឆ្នាំនេះ ហើយគម្រោងដែលមានលក្ខណៈសម្បត្តិគ្រប់គ្រាន់ នឹងត្រូវបានជ្រើសរើសនៅនិទាឃរដូវឆ្នាំ២០២១ ។

ពីសាជីវកម្មវិនិយោគហេដ្ឋារចនាសម្ព័ន្ធ ក្រៅប្រទេសរបស់ជប៉ុនសម្រាប់ការដឹកជញ្ជូន និងអភិវឌ្ឍន៍ទីក្រុង (JOIN) កំពុងពិចារណាលើវិធានការណ៍នានា ដើម្បីអនុញ្ញាតឱ្យក្រុមហ៊ុនជប៉ុន បង្កើតការបណ្តាក់ទុនរួមគ្នា ជាមួយក្រុមហ៊ុនក្នុងប្រទេសនៅក្នុងតំបន់អាស៊ាននេះ។ ចំណែក JBIC នឹងពង្រីកបណ្តាញឥណទាន ដល់កម្មវិធីបរិស្ថានរួមមានកម្មវិធីកាត់បន្ថយការបំភាយឧស្ម័នផ្ទះកញ្ចក់ បង្កើនការប្រើប្រាស់ថាមពលកកើតឡើងវិញនិងការពារការបំពុលខ្យល់និងទឹក។ មូលនិធិនេះ ត្រូវបានរៀបចំឡើង ដើម្បីជំរុញការប្រកួតប្រជែងរបស់ក្រុមហ៊ុនជប៉ុន ក្នុងគម្រោងទីក្រុងឆ្លាតក្នុងតំបន់។

អ្នកជំនាញផ្នែកហេដ្ឋារចនាសម្ព័ន្ធ លោក James Harris មកពីក្រុមហ៊ុន Pinsent Masons MPillay ដែលជាក្រុមហ៊ុនបណ្តាក់ទុនរួមគ្នា នៅប្រទេសសិង្ហបុរីរវាងក្រុមហ៊ុន MPillay និងក្រុមហ៊ុន Pinsent Masons ដែលជាក្រុមហ៊ុនច្បាប់ Out-Law បានឱ្យដឹងថា លោកបានឃើញមានការចាប់អារម្មណ៍យ៉ាងខ្លាំង លើការវិនិយោគទីក្រុងវៃឆ្លាតក្នុងរយៈពេល២ទៅ ៣ ឆ្នាំកន្លងមកនេះ មុនពេលមានការរាតត្បាត Covid-19 ។

លោកបន្តថា “បើទោះជាតំបន់អាស៊ាន កំពុងប្រឈមនឹងវិបត្តិជំងឺកូវីដ១៩ ក៏នឹងការវិនិយោគ លើទីក្រុងវៃឆ្លាតថែមទៀតផងដែរ នៅតាមប្រទេសនៃតំបន់នេះ” ។ លោកបន្តថា “វាគឺជាឱកាសសម្រាប់ក្រុមហ៊ុនជប៉ុន ក្នុងការចូលរួមក្នុងការអភិវឌ្ឍន៍ លើគម្រោងទាំងនេះ ដែលនឹងធ្វើឱ្យប្រទេសជប៉ុនឈានមុខគេ” ៕

អាផាតម៉ិននៅតំបន់មួយចំនួនមានភ្ញៀវស្នាក់នៅពេញៗ ខណៈតំបន់មួយចំនួនសល់បន្ទប់ច្រើន

ដោយគង់ សូរិយា

ភ្នំពេញៈ ទោះបីជាអាផាតតម៉ិននៅតែបន្តកើនឡើងក៏ដោយ ក៏ចំនួនអាផាតម៉ិននៅតំបន់មួយចំនួននៅតែមានភ្ញៀវស្នាក់នៅពេញៗ ស្របពេលនឹងតំបន់មួយចំនួនមិនមានភ្ញៀវស្នាក់នៅ ហើយម្ចាស់បានទម្លាក់តម្លៃចន្លោះពី២០ ទៅ ៣០ភាគរយ។

កញ្ញាឈុន ចរិយា អ្នករកអាផាតម៉ិនឲ្យភ្ញៀវកូរ៉េជាប្រចាំ បានមានប្រសាសន៍ឲ្យដឹងកាលពីថ្ងៃទី២២ ធ្នូកន្លងមកថា កញ្ញាបានរកអាផាតម៉ិនជួលជាប្រចាំ សំរាប់ភ្ញៀវកូរ៉េ ព្រោះកញ្ញាមានមិត្តភ័ក្ត និងទំនាក់ទំនងជាមួយជនជាតិកូរ៉េច្រើន។ កញ្ញាបន្តថា ប៉ុន្តែភ្ញៀវកូរ៉េនិយមស្នាក់នៅកន្លែងណាមួយ មិនលើសរយៈពេល៦ខែទេ ដោយសារពួកគេចង់ផ្លាស់ប្តូរបរិយាកាសរស់នៅ។

កញ្ញាបន្តថា “អាផាតម៉ិននៅតំបន់បឹងកេងកង១ មិនសូវមានសល់បន្ទប់នោះទេ ហើយសង្កាត់បឹងកេងកង២ ក៏ដូចគ្នា ប៉ុន្តែបើអាផាតម៉ិននៅតំបន់ទួលទំពូង ផ្សារដើមថ្កូវ ទួលស្វាយព្រៃជាដើម មាននៅសល់ច្រើន” ។ កញ្ញាបន្តថា “ដោយសារអាផាតម៉ិនកើនឡើង និងតម្រូវការធ្លាក់ចុះបានធ្វើឲ្យម្ចាស់អាផាតម៉ិនទម្លាក់តម្លៃ ដោយសារចង់រក្សាភ្ញៀវចាស់ និងរកភ្ញៀវថ្មី” ។

ជាមួយគ្នានេះ លោកឧកញ៉ាបណ្ឌិតគីម ហ៊ាង ប្រធាន KW Cambodia បានមានប្រសាសន៍ថា ទីផ្សារអាផាតម៉ិនមានការប្រកួតប្រជែងគ្នាខ្លាំងណាស់ ដោយសារចំនួនផ្គត់ផ្គង់កើនឡើងខ្ពស់ ពិសេសគម្រោងអាផាតម៉ិនចាស់ៗ តែងតែបាត់ភ្ញៀវ ដែលទាមទារឲ្យច្បាស់អាផាតម៉ិនរៀបចំកែលំអរឡើងវិញជាប្រចាំ ដើម្បីទាក់ទាញភ្ញៀវស្នាក់នៅ។

លោកបន្តថា “ពេលនេះទីផ្សារនេះបានឈានដល់ដំណាក់កាលត្រីធំ ស៊ីត្រីតូចហើយ ព្រោះអាផាតម៉ិនដែលមានកំពស់៥ជាន់ មិនមានសេវាកម្មសម្រួលដល់ការរស់នៅច្រើននឹងប្រឈមមុខនឹងការស្លាប់” ។ លោកបន្តថា “ផ្ទុយទៅវិញ អាផាតម៉ិនថ្មីៗបាននិងកំពុងសាងសង់ មានកំពស់ខ្ពស់ៗ និងបានផ្តល់សេវាកម្មដល់ការរស់នៅប្រកបដោយផាសុខភាពដល់អតិថិជន គំរោងបែបនេះនឹងលេចធ្លោ និងទាក់ទាញបានភ្ញៀវស្នាក់នៅច្រើន” ៕

ចំណេះដឹងច្បាប់! តើកិច្ចសន្យាបែបណាទើបជាកិច្ចសន្យាត្រឹមត្រូវតាមច្បាប់?

ដោយវុត្ថា

ភ្នំពេញៈ ជាទូទៅកិច្ចសន្យាគឺជាច្បាប់របស់គូភាគី ដែលបានសន្យាគ្នាទៅវិញទៅមក ឬជាកាសន្យារបស់ភាគីម្ចាងទៅភាគីម្ខាងទៀត ក្នុងគោលបំណងជាការផ្លាស់ប្តូរប្រយោជន៍ទៅវិញទៅមក។

ដើម្បីធ្វើកិច្ចសន្យាមួយ ទៅជាកិច្ចសន្យាដែលមានសុពលភាពអាចអនុវត្តបាន ឬជាកិច្ចសន្យា ដែលជាគោលការណ៍ទទួលស្គាល់ដោយច្បាប់ ដែលភាគីនីមួយៗនាំអោយកិច្ចសន្យាត្រូវតែគោរពនូវលក្ខខណ្ឌចំបងៗដូចជា៖

១) ឆន្ទៈរបស់គូភាគី

កិច្ចសន្យា ឬការសន្យាណាក៏ដោយ ក៏ត្រូវតែធ្វើឡើងដោយឆន្ទះរបស់គូភាគី ពោលគឺត្រូវតែធ្វើឡើងដោយស្ម័គ្រចិត្ត គ្មានការបង្ខិតបង្ខំពីសំណាក់ភាគី នៃកិច្ចសន្យាឬជនទីបីដែលពាក់ព័ន្ធ នឹងផលប្រយោជន៍ក្នុងកិច្ចសន្យានោះទេ។ ម្យ៉ាងទៀតច្បាប់ក៏មិនអាចយកជាការបានដែរ នៅពេលដែលភាគីណាម្នាក់ចុះកិច្ចសន្យា ដោយកាលៈទេសៈ ឬស្ថានភាពសេដ្ឋកិច្ចណាមួយមកបង្ខំ។

២) កម្មវត្ថុនៃកិច្ចសន្យា

ដើម្បីធ្វើកិច្ចសន្យាមួយបាន លុះត្រាតែកិច្ចសន្យានោះធ្វើឡើង ដោយមានកម្មវត្ថុច្បាស់លាស់ និងជាកម្មវត្ថុដែលស្ថិកក្នុងពាណិជ្ជកម្ម ពោលគឺជាកម្មវត្ថុដែលច្បាប់អនុញ្ញាតអោយមានការរកស៊ី ជួញដូរបានក្នុងទីផ្សារ។ ភាគីមិនអាចចុះកិច្ចសន្យា ទិញគ្រឿងញាណ កិច្ចសន្យាផ្ទាល់បាល់ ប្រដាល់ឬជលមាន់ គឺជាកិច្ចសន្យាដែលមានកម្មវត្ថុក្រៅកិច្ចសន្យា ពោលគឺវាត្រូវបានហាមឃាត់ដោយច្បាប់។

៣) សមត្ថភាពរបស់គូភាគី

បុគ្គលដែលជាអ្នកធ្វើកិច្ចសន្យា គឺត្រូវតែជាបុគ្គលដែលមានសមត្ថភាព ដែលទទួលស្គាល់ដោយច្បាប់ ពោលគឺជាភាគី ឬបុគ្គល ដែលមានមនុស្សមានស្មារតីត្រឹមត្រូវ មនុស្សដែលមានអាយុចាប់ពី ១៨ឆ្នាំឡើងទៅ និងជាបុគ្គលដែលត្រូវបានអនុញ្ញាតដោយច្បាប់ថាពិតជាមានសមត្ថភាពក្នុងការចុះកិច្ចសន្យាបាន។

ក្នុងករណីនេះ មនុស្សដែលមានវិប្បល្លាស់ស្មារតី និងមនុស្សចាស់ជរាវង្វេងម្តងម្កាល គឺមិនអាចចាតុទុកថា ជាមនុស្សដែលមានសមត្ថភាពដើម្បីចុះកិច្ចសន្យាបានទេ។

សរុបសេចក្តីមក កិច្ចសន្យាប្រភេទណាក៏ដោយ គឺត្រូវតែគោរពគោលការទាំងបីនេះ ពីព្រោះវាគឺជាគោលការណ៍គ្រិៈដែលគ្រប់ភាគី នៃកិច្ចសន្យាត្រូវតែមានជាដាច់ខាតនៅពេលដែលចុះកិច្ចសន្យា៕

ខេត្តក្រចេះបង្ហាញពីគម្រោងអភិវឌ្ឍ និងបង្កើតតំបន់ឆ្នេរកម្សាន្តកម្រិតខ្ពស់

ដោយ ៖ រ៉ាណេត

ក្រចេះ ៖ ក្រោមការចូលរួមចំណែកពីសំណាក់វិស័យឯកជនក្នុងការអនុវត្តនូវផែនការនៃអភិវឌ្ឍ និងលើកកម្ពស់វិស័យទេសចរណ៍នៅតំបន់ប៉ែនឥសាននៃប្រទេសកម្ពុជាឱ្យកាន់តែល្អប្រសើរក្នុងនាមជាគោលដៅទេសចរណ៍កម្រិតខ្ពស់ ខេត្តក្រចេះបានបង្ហាញពីគម្រោងកែច្នៃតំបន់ឆ្នេរកម្សាន្តដ៏ស្រស់ស្អាត និងទាក់ទាញលើកដំបូងប្រចាំខេត្តមួយនេះ។

តាមរយៈមន្ត្រីមន្ទីរទេសចរណ៍ខេត្តក្រចេះនៅថ្ងៃទី២២ ខែធ្នូ ឆ្នាំ២០២០នេះបានឱ្យដឹងថា បានជួបជាមួយអ្នកគ្រប់គ្រងតំបន់រមណីយដ្ឋានថ្មី ឆ្នេរខ្សាច់វត្តវិហារសសរ១០០ ដើម្បីពិភាក្សាពិគ្រោះយោបល់លើកិច្ចដំណើរការរៀបចំរមណីយដ្ឋានថ្មីនេះឱ្យមានដំណើរការរលូន ដោយផ្តោតសំខាន់លើការសុំអាជ្ញាបណ្ណទេសចរណ៍ វិធានសុវត្ថិភាពទេសចរណ៍ ការគ្រប់គ្រងអនាម័យបរិស្ថាន ការកំណត់នូវទីតាំងសុវត្ថិភាព ការរក្សានូវសន្តិសុខសណ្តាប់ធ្នាប់ ការគ្រប់គ្រងលើតម្លៃសេវា ដើម្បីត្រៀមទទួលស្វាគមន៍ភ្ញៀវទេសចរមកកំសាន្តនាពេលខាងមុខឆាប់ៗនេះ។

ប្រធានទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានមានប្រសាសន៍ថា គម្រោងនៃការអភិវឌ្ឍន៍បង្កើតតំបន់ឆ្នេរកម្សាន្តបែបប្រណីតប្រចាំនៅក្នុងខេត្តក្រចេះគឺជារឿងល្អ និងសាទរ ដែលវាជាការបង្កើតនូវផលិតផលទេសចរណ៍ថ្មីពីលើអ្វីដែលមានស្រាប់ ក៏ដូចជាបង្កើននូវភាពទាក់ទាញផងដែរ។

លោកស្រីបានបញ្ជាក់ថា “ប្រសិនបើគម្រិងនជពិតជាត្រូវបានអនុវត្តយ៉ាងប្រាកដវាគឺជារឿងល្អសម្រាប់វិស័យទេសចរណ៍នៅក្នុងខេត្ត ជាពិសេសផ្តោតសំខាន់ទៅលើអូកូទេសចរណ៍ដែលក្រសួងកំពុងយកចិត្តទុកដាក់ និងជំរុញឱ្យមានស្ទើរគ្រប់បណ្តាខេត្តដែលអាចមានលទ្ធភាពធ្វើទៅបាន”។

លោកស្រី ឆាយ ស៊ីវលីន បានមានប្រសាសន៍បន្តថា “សម្រាប់ទីតាំងគម្រោងខាងលើនេះ គឺមានភាពស្រស់ស្អាតម្យ៉ាងម្នាក់ពីឆ្នេរសមុទ្រ ហើយប្រសិនគម្រោងអភិវឌ្ឍន៍ដូចដែលបានលើកខាងលើអាចសម្រេចទៅបាន វានឹងក្លាយជាតំបន់ឆ្នេរទន្លេទឹកសាបទេសចរណ៍ដ៏ទាក់ទាញ ព្រោះមនុស្សជាច្រើននៅពេលដែលនិយាយពីឆ្នេរតែងនឹកគិតដល់ឆ្នេរសមុទ្រ ប៉ុន្តែតំបន់ឆ្នេរទឹកសាបកម្រិតខ្ពស់នៅមិនទាន់មាននោះទេ។ ប៉ុន្តែទោះជាយ៉ាងណា សុំឱ្យគម្រោងអភិវឌ្ឍន៍យកចិត្តទុកដាក់ទៅលើការរក្សាបរិស្ថានស្អាត មានសុវត្ថិភាពខ្ពស់ ហើយធានាបានថាជាតំបន់ដែលមានសក្ដានុពលខ្ពស់យូរអង្វែង រួមជាមួយនឹងការយកចិត្តទុកដាក់ខ្ពស់ទៅលើការផ្តល់សេវាផងដែរ” ៕

ការសិក្សាៈតម្លៃដីធ្លីនឹងបន្តកើនឡើងជាមធ្យម៧ភាគរយក្នុងមួយឆ្នាំក្នុងរយៈ ពេល១០ឆ្នាំខាងមុខ

ដោយស៊ីវ ម៉េង

ភ្នំពេញ ការសិក្សាថ្មីមួយបានរកឃើញថា តម្លៃដីធ្លីនៅកម្ពុជាបានកើនឡើង២២៥ភាគរយ ក្នុងរយៈពេលមួយ១០ឆ្នាំកន្លងមកនេះ និងបន្តកើនឡើង៧ភាគរយជាមធ្យមក្នុងមួយឆ្នាំបន្ថែមទៀត សម្រាប់រយៈពេលមួយទសវត្សរ៍ខាងមុខ។

នាយិកាប្រចាំប្រទេសនៃក្រុមហ៊ុនCBRE Cambodia អ្នកនាងអាន សុធីតាបានមានប្រសាសន៍ ក្នុងកិច្ចសម្ភាសន៍កាលពីពេលថ្មីៗនេះថា តម្លៃដីធ្លីនៅកម្ពុជានឹងបន្តកើនឡើងបន្ថែមទៀត ដែលយើងអាចព្យាករណ៍ថា កំនើនតម្លៃដីធ្លីនឹងកើន៧ភាគរយក្នុងមួយឆ្នាំសម្រាប់មួយទសវត្សរ៍ខាងមុខ ប៉ុន្តមិនមែនមានន័យថា តម្លៃដីធ្លីនឹងកើនឡើងថេរ៧ភាគរយនោះទេ គឺឆ្នាំខ្លះអាចតិចជាងនេះ និងឆ្នាំខ្លះអាចច្រើនជាងនេះ ប៉ុន្តែតួលេខ៧ភាគរយ ជាតួលេខដែលគិតជាមធ្យម។

អ្នកនាបន្តថា “ការព្យាករណ៍បែបនេះ ដោយយើងឈរលើមូលដ្ឋានសំខាន់ៗដូចជាតម្រូវការទិញលក់ក្នុងទីផ្សារ ការសិក្សាប្រៀបធៀបជាមួយប្រទេសថៃ និងវៀតណាមជាដើម ព្រោះប្រទេសទាំងនេះមានស្ថានភាពស្រដៀងគ្នានឹងកម្ពុជា”។

អ្នកនាងអាន សុធីតាបានបន្តឲ្យដឹងផងដែរថា បើគិតរយៈពេល១០ឆ្នាំកន្លងមកនេះ តម្លៃដីធ្លីបានកើនឡើងយ៉ាងខ្លាំង ដោយកាលពីឆ្នាំ២០០៨តម្លៃដីធ្លី ដែលខ្ពស់ជាងគេគឺមានតម្លៃជាមធ្យម២០០០ដុល្លារក្នុងមួយម៉ែត្រការ៉េប៉ុណ្ណោះ។

ការវិភាគរបស់អ្នកជំនាញមួយចំនួនទៀតបានអះអាងឲ្យដឹងថា តម្លៃដីធ្លីនៅកម្ពុជាកើនឡើដោយសារកត្តាសំខាន់ៗជាច្រើន ដូចជា កត្តាសន្តិភាព ស្ថិរភាពនយោបាយ កំនើនសេដ្ឋកិច្ច ការអភិវឌ្ឍហេដ្ឋារចនាសម្ព័ន្ឋរបស់រដ្ឋាភិបាល និងកត្តាប្រជាសាស្រ្ត៕

គម្រោងសាងសង់របងថ្មទល់មុខទីស្ដីការគណៈរដ្ឋមន្ត្រីជិតបញ្ចប់១០០ភាគរយហើយ

ដោយៈ រ៉ាណេត

ភ្នំពេញៈ គម្រោងសាងសង់របងថ្ម នៅតាមបណ្តោយផ្លូវសហព័ន្ធរុស្ស៊ី មុខទីស្តីការគណៈរដ្ឋមន្ត្រី ដែលមានប្រវែងជិត១០០០ម៉ែត្រ ចាប់ពីការាសសាំងតូតាល់ ជិតស្តុបBKC (កាណាឌីយ៉ា) រហូតដល់ស្តុបវត្តនាគវ័ន បានដំណើរការស្ថាបនាជិតរួចរាល់១០០ភាគរយហើយ ខណៈដែលរដ្ឋបាលរាជធានីភ្នំពេញ បានរៀបចំការ៉ូឡាចាប់ពីផ្លូវR៦ បានរួចរាល់ទៅហើយនោះ។

មន្ត្រីរដ្ឋបាលរាជធានីភ្នំពេញ បានប្រាប់ឱ្យដឹងនៅរសៀលថ្ងៃទី២២ ធ្នូ ឆ្នាំ២០២០នេះថា ការសាងសង់ និងរៀបចំក្រាលឥដ្ឋការ៉ូឡា នៅតាមបណ្តោយផ្លូវសហព័ន្ធរុស្ស៊ីដែលមានប្រែវជិត១០០០ម៉ែត្រនេះ ត្រូវបានបែងចែកជាដំណាក់កាលផ្សេងគ្នា។

ដំណាក់កាលទី១ ចាប់ផ្ដើមអនុវត្តការដ្ឋានចេញពីការាសសាំងតូតាល់ រហូតដល់ផ្លូវR៦ (ស្តុបក្តាន់២) មានប្រវែង៦៥០ម៉ែត្រ កម្ពស់២ម៉ែត្រ។ នៅក្នុងដំណាក់កាលទី១នេះដែរ ក្រុមការងារស្ថាបនារបងបានប្រមាណជា៤០ភាគរយ ពោលគឺបានលេចចេញជារូបរាងថ្មីហើយ (ចាប់ពីការាសសាំងតូតាល់រហូតដល់ជិតការាសលក់រថយន្ត) ។

ដំណាក់កាលទី២ ចាប់ផ្ដើមពីផ្លូវR៦ (ស្តុបក្តាន់២)នេះ រហូតដល់ផ្លូវបត់ទៅវត្តនាគវ័នដែលមានប្រវែង៤៣៧ម៉ែត្រ។

បើតាមមន្ត្រីជំនាញបានបញ្ជាក់ថា ការរៀបចំធ្វើរបងថ្ម និងការរៀបចំការ៉ូឡាសម្រាប់អ្នកថ្មើរជើង ធ្វើឡើងដើម្បីសំរួលការធ្វើដំណើរ របស់ប្រជាពលរដ្ឋ និងមួយផ្នែកទៀត គឺលើកសោភ័ណភាពរាជធានីភ្នំពេញ ឲ្យកាន់តែល្អប្រសើរមួយកំរិតទៀត។ ម្យ៉ាងវិញទៀតដោយសារតែផ្លូវសហព័ន្ធរុស្ស៊ីនេះ គឺជាផ្លូវមួយដែលមានការធ្វើដំណើរ យ៉ាងមមាញញឹករាល់ថ្ងៃ។

អភិបាលរាជធានីភ្នំពេញ លោក ឃួង ស្រេង កាលពីពេលថ្មីៗនេះបានដឹកនាំអាជ្ញាធរខណ្ឌដូនពេញ និងមន្ទីរជំនាញចុះពិនិត្យមើលពីស្ថានភាព គម្រោងសាងសង់របងនេះម្តងរួចមកហើយ។ ក្នុងនោះលោកបានស្នើរឱ្យប្រជាពលរដ្ឋមានការយោគយល់ និងចូលរួមសហការជាមួយរដ្ឋបាលរាជធានីភ្នំពេញ ឱ្យបានល្អដើម្បីជំរុញឱ្យការសាងសង់មានភាពរលូន បង្កើនសោភណ្ឌភាព និងសណ្ដាប់ធ្នាប់ល្អប្រសើរ៕

កូរ៉េបោះទុន១០០លានដុល្លារអភិវឌ្ឍន៍តំបន់ឧស្សាហកម្មធំមួយនៅប្រទេសមីយ៉ាន់ម៉ា

ដោយៈសុខុម

មីយ៉ាន់ម៉ាៈ វិនិយោគិនកូរ៉េបានបោះទុនរាប់លានដុល្លារ ដើម្បីបង្កើតគំរោងឧស្សាហកម្មធំមួយនៅប្រទេសមីយ៉ាន់ម៉ា ដែលកំពុងទទួលបានការចាប់អារម្មណ៍ពីវិនិយោគិនអន្តរជាតិ។

កាសែត Myanmar Times បានចុះផ្សាយកាលពីថ្ងៃទី២២ ធ្នូ នេះថា ដំណាក់កាលទី១ នៃការសាងសង់តំបន់ឧស្សាហកម្មកូរ៉េ-មីយ៉ាន់ម៉ា (Korea-Myanmar Industrial Complex) ហៅកាត់ថា KMIC នៅតំបន់Hlegu ក្រុងរ៉ង់ហ្គូន ប្រទេសមីយ៉ាន់ម៉ា នឹងចាប់ផ្ដើមនៅថ្ងៃទី២៤ ធ្នូដ៏ខ្លីខាងមុខនេះ។

លោក U Han Zaw រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់មីយ៉ាន់ម៉ាន៍បានថ្លែងថា “យើងកំពុងព្យាយាមអនុវត្តន៍៍ ផែនការអភិវឌ្ឍគម្រោងKMIC ឱ្យបានទាន់ពេលវេលា ដើម្បីឱ្យបណ្ដាវិនិយោគិនអន្តរជាតិ អាចមកបង្កើតក្រុមហ៊ុននៅតំបន់ឧស្សាហកម្មនេះ”។លោកបន្តថា “”យើងជឿជាក់ថា អាជីវកម្មរបស់ពួកគេនៅទីនេះនឹងទទួលបានលទ្ធផលល្អ”។

តាមការរំពឹងទុក ការស្ថាបនាហេដ្ឋារចនាសម្ព័ន្ធមូលដ្ឋានដូចជាផ្លូវថ្នល់ និងសេវាកម្មចាំបាច់ផ្សេងៗ សម្រាប់គម្រោងដែលនឹងទទួលបានជំនួយហិរញ្ញវត្ថុពី “មូលនិធិសហប្រតិបត្តិការអភិវឌ្ឍន៍សេដ្ឋកិច្ចកូរ៉េ” (Korean Economic Development Cooperation Fund)នេះគ្រោងនឹងបញ្ចប់ជាស្ថាពរត្រឹមឆ្នាំ២០២៣។ ទំហំទុនវិនិយោគសរុបមានចំនួន ១០០លានដុល្លារអាមេរិក ដែលនឹងផ្ដល់ការងារថ្មីៗប្រមាណ១០០.០០០កន្លែង។

គម្រោងKMIC នឹងអនុវត្តន៍រួមគ្នាដោយក្រសួងរៀបចំដែនដី នគរូបនីយកម្ម និងសំណង់ និងក្រុមហ៊ុន Korea Land and Housing Corporation ដែលគ្រប់គ្រងដោយរដ្ឋនៅលើផ្ទៃដីទំហំ ២២៦ ហិកតានៅភូមិ Nyaung-nhit-pin នៃតំបន់ Hlegu។ គម្រោងនេះនឹងគ្រប់គ្រងដោយក្រុមហ៊ុនអភិវឌ្ឍន៍ KMIC Development Company Ltd ហើយនឹងដាក់បញ្ចូល “ប្រព័ន្ធកក់ប្លង់ដីតាមអនឡាញ” (Online Land Reservation System) ជាលើកដំបូងរបស់មីយ៉ាន់ម៉ាផងដែរ។

តម្លៃជួលដីមានអត្រាចន្លោះពី៦៩ ដុល្លារអាមេរិក ទៅ៧៥ដុល្លារអាមេរិក ក្នុងមួយម៉ែត្រការ៉េ ហើយបណ្ដាវិនិយោគិនអាចចាប់ផ្ដើម ដាក់ពាក្យកក់ប្លង់ដី ដែលខ្លួនពេញចិត្តចាប់ពីថ្ងៃទី២ មករា ឆ្នាំ២០២១។

នៅពេលគម្រោងKMICបញ្ចប់ជាស្ថាពរ វានឹងមានតម្លៃរហូតដល់ទៅ៤,៧ពាន់លានដុល្លារអាមេរិក ហើយនឹងផ្ដល់ការងារជាង៥០០.០០០ កន្លែង។

លោករដ្ឋមន្ត្រី U Han Zaw បានថ្លែងថា “វាពិតជាសំខាន់ណាស់ ក្នុងការបង្កើតតំបន់ឧស្សាហកម្ម ដែលអាចជួយឱ្យវិនិយោគិនមកធ្វើពាណិជ្ជកម្ម នៅក្នុងប្រទេសមីយ៉ាន់ម៉ា។ លោកបន្ថែមថា “វាក៏នឹងជួយជំរុញការវិនិយោគក្នុងស្រុក និងការវិនិយោគបរទេសផងដែរ”៕

តម្លៃដីធ្លីនៅខេត្តរតនគិរីកើនឡើងតិចតួចក្រោយគម្រោងបង្កើតហេដ្ឋារចនាសម្ព័ន្ធថ្មីៗ

ដោយៈ រ៉ាណេត

រតនគីរីៈ ក្រោយការប្រកាសពីគម្រោងអភិវឌ្ឍន៍ សាសង់សំណង់អគារនានានៅជុំវិញបឹងកន្លែង រួមទាំងតំបន់កម្សាន្តថ្មីៗបន្ថែមទៀតនៅក្រុងបានលុង ខេត្តរតនគីរីកាលពីពេលកន្លងទៅ ពេលនេះតម្លៃដីធ្លីដែលស្ថិតនៅតែក្នុង និងក្បែរតំបន់គម្រោងអភិវឌ្ឍន៍ត្រូវបានគេមើលឃើញថា ហាក់មិនមានការកម្រើកឡើងខ្លាំងនោះទេ បើមានគឺស្ថិតនៅក្នុងកម្រិតតិចតួចបំផុត។

អគ្គនាយិកាក្រុមហ៊ុនភ្នាក់ងាតអចលនទ្រព្យ KAT Appraisal អលោកស្រី ចេវ សុឃុន បានមានប្រសាសន៍ប្រាប់តាមទូរស័ព្ទនៅរសៀលថ្ងៃទី២២ ខែធ្នូ ឆ្នាំ២០២០នេះថា គ្រប់គម្រោងអភិវឌ្ឍន៍ទាំងអស់ សុទ្ធតែផ្តល់ភាពល្អប្រសើរដល់សេដ្ឋកិច្ចក្នុងតំបន់ ទាំងអស់ ហើយក្នុងនោះទីផ្សារអចលនទ្រព្យ ក៏ទទួលបានផលផ្លែផ្ការួមជាមួយគ្នាផងដែរ។

លោកស្រីបានបន្តថា “នៅក្នុងខេត្តរតនៈគីរី ដែលជាមណ្ឌលទេសចរណ៍ដ៏ស្រស់ស្អាត ស្ថិតនៅប៉ែកឥសាននៃប្រទេសមួយនេះ មានភាពល្អប្លែកមិនចាញ់ទេសភាពស្ថិតនៅតាមបណ្តាប្រទេសនានាក្នុងតំបន់នោះឡើយ ដែលបង្កើនភាពទាក់ទាញការវិនិយោគនៅក្នុងវិស័យ ច្រើនជាងការធ្វើពាណិជ្ជកម្ម ដូចបណ្តាខេត្តមួយចំនួនក្នុងប្រទេសកម្ពុជា”។

លោកស្រីបានបន្តថា ជាមួយនឹងគម្រោងនៃការអភិវឌ្ឍថ្មី របស់រាជរដ្ឋាភិបាល បន្ថែមពីលើគម្រោងវិនិយោគរបស់វិស័យឯកជន វានឹងក្លាយជាចលករយ៉ាងសំខាន់ ក្នុងការជំរុញឱ្យកិច្ចអភិវឌ្ឍន៍នៅក្នុងខេត្តមួយនេះ មានភាពរលូន និងឆាប់រហ័សបំផុត។ នៅពេលមានការអភិវឌ្ឍន៍ និងទេសចរណ៍ វិស័យសេដ្ឋកិច្ចនៅក្នុងតំបន់នឹងមានភាពល្អប្រសើរ ហើយកត្តារួមផ្សំ នៅក្នុងវិស័យទេសចរណ៍ដូចជាផ្ទះសំណាក់ ផ្ទះលំហែរកាយ សណ្ឋាគារ ជាពិសេសតំបន់កម្សាន្ត កែច្នៃពីវិស័យឯកជននឹងរីកចម្រើន ដែលទាំងអស់នេះសុទ្ធតែជាកត្តាជំរុញឱ្យតម្រូវការនៃការប្រើប្រាស់កើនឡើងជាបន្តបន្ទាប់។

ដោយឡែកពាក់ព័ន្ធទៅនឹងគម្រោងសាងសង់ និងបង្កើតកោះសិប្បនិម្មិតនៅបឹងកន្សែង ស្ថិតក្រុងបានលុង នៅពេលបច្ចុប្បន្ននេះ លោកស្រីបានអះអាងថា នៅមិនទាន់អាចជះឥទ្ធិពលអ្វី ឬធ្វើឱ្យដីឡើងថ្លៃនោះទេ ព្រោះវាទើបតែជាតំណាក់កាលចាប់ផ្ដើមតែប៉ុណ្ណោះ ហើយវាត្រូវការពេលវេលាយូរបន្ថែមទៀត ដែលយ៉ាងហោចណាស់ក្នុងចន្លោះ៣-៥ឆ្នាំ ទម្រាំមានការផ្សព្វផ្សាយទូលាយពីភាពអស្ចារ្យនៃការកែច្នៃ និងសាងសង់ទាំងអស់នេះ។

ជាមួយគ្នានេះ លោកសៅ សាខុំ អនុប្រធានក្រុមប្រឹក្សាភិបាលក្រុមហ៊ុនអចលនទ្រព្យCambodian Estate Alliance (CEA) Co.,Ltd ធ្លាប់បានមានប្រសាសន៍ថា បច្ចុប្បន្ននេះមានគម្រោងវិនិយោគ និងអភិវឌ្ឍន៍ជាច្រើនបានបង្ហាញវត្តមាន នៅក្នុងខេត្តរតនគីរី ដែលភាគច្រើនបម្រើដល់វិស័យទេសចរណ៍ និងកម្សាន្តបែបធម្មជាតិ។

លោកបានបញ្ជាក់ថា “ខេត្តនេះមានភាពទាក់ទាញទៅលើវិស័យទេសចរណ៍ ដែលសូម្បីតែគម្រោងវិនិយោគ និងអភិវឌ្ឍន៍វិស័យអចលនទ្រព្យ ក៏ផ្តោតសំខាន់ទៅលើការបម្រើសេវាដល់វិស័យទេសចរណ៍ដែរ ដែលក្នុងនោះរួមមានដូចជាផ្ទះសំណាក់ សណ្ឋាគារនិងផ្ទះលំហែរកាយជាដើម”។

លោកសាខុំបានបន្តថា ជាធម្មតា នៅពេលមានតម្រូវការសាងសង់ ឬអភិវឌ្ឍន៍ណាមួយដែលមានតម្រូវការប្រើប្រាស់ដី គឺតែងជម្រុញតម្លៃដីមានការកើនឡើង។ តម្លៃដីនៅកណ្តាលក្រុងស្ថិតនៅចន្លោះចាប់ពី៣០០- ទៅ៥០០ដុល្លារក្នុងមួយម៉ែត្រការ៉េ។ ដោយឡែកសម្រាប់ដី ដែលមានទំហំធំសម្រាប់អភិវឌ្ឍន៍ ជាតំបន់លំហែរកាយផ្សេងៗគិតជាមធ្យមមានតម្លៃស្ថិតនៅក្នុងចន្លោះ១០-២០ដុល្លារ ក្នុងមួយម៉ែត្រការ៉េ ប៉ុន្តែបើជាទូទៅការទិញលក់ដីនៅតំបន់នេះគឺគេគិតជាម៉ែត្រដើរ៕