ដោយ ៖ ហ្សូលី

ភ្នំពេញ ៖ ព្រឹទ្ធសភាគ្រោងធ្វើការពិនិត្យ និងឱ្យយោបល់លើសេចក្តីព្រៀងច្បាប់ចំនួន ៦ បន្ទាប់ពីរដ្ឋសភាបានអនុម័តរួចជាផ្លូវការកាលពីសប្តាហ៍មុនកន្លងទៅ។ នេះបើតាមឱ្យដឹងតាមរយៈសេចក្តីប្រកាសព័ត៌មានដែលចេញផ្សាយនៅថ្ងៃទី១០ ខែវិច្ឆិកា ឆ្នាំ ២០២០នេះ។

រដ្ឋសភាបានអនុម័តសេចក្តីព្រាងច្បាប់ចំនួន ៦ រួចកាលពីសប្តាហ៍ទី១ ខែវិច្ឆិកា ឆ្នាំ២០២០។ សេចក្តីព្រាងច្បាប់ទាំង៦នោះ ព្រឹទ្ធសភាគ្រោងនឹងធ្វើការពិនិត្យ និងឱ្យយោបល់នៅថ្ងៃទី១២ ខែវិច្ឆិកា ឆ្នាំ២០២០ ក្នុងសម័យប្រជុំលើកទី៦ ព្រឹទ្ធសភានីតិកាលទី៤ ក្រោមអធិបតីភាពដ៏ខ្ពង់ខ្ពស់សម្តេច សាយ ឈុំ ប្រធានព្រឹទ្ធសភា។

ក្នុងសេចក្តីប្រកាសព័ត៌មាននោះបានឱ្យដឹងថា សេចក្តីព្រាងច្បាប់ទាំង៦ ដែលព្រឹទ្ធសភា នឹងធ្វើការពិនិត្យ និងឱ្យយោបល់នោះ រួមមាន៖

១- សេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោក រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។

២- សេចក្តីព្រាងច្បាប់ស្តីពី ការអនុម័តយល់ព្រមលើសន្ធិសញ្ញាស្តីពីការហាមឃាត់អាវុធនុយក្លេអ៊ែរ។

៣- សេចក្តីព្រាងច្បាប់ស្តីពីការអនុម័តយល់ព្រមលើពិធីសារទីមួយ ធ្វើវិសោធនកម្មកិច្ចព្រមព្រៀងស្តីពី ភាពជាដៃគូសេដ្ឋកិច្ចទូលំទូលាយ រវាងរដ្ឋជាសមាជិកសមាគមប្រជាជាតិអាស៊ីអាគ្នេយ៍ និងជប៉ុន។

៤- សេចក្តីព្រាងច្បាប់ស្តីពីការអនុម័តយល់ព្រមលើពិធីសារអនុវត្តកញ្ចប់សន្យាទី១០ ក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម។

៥- សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង ស្តីពីការវិនិយោគក្រោមកិច្ចព្រមព្រៀងក្របខ័ណ្ឌ ស្តីពីកិច្ចសហប្រតិបត្តិការ សេដ្ឋកិច្ចទូលំទូលាយ រវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា។

៦- សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង ស្តីពីការវិនិយោគរវាងបណ្តារដ្ឋសមាជិក នៃសមាគម ប្រជាជាតិអាស៊ីអាគ្នេយ៍ និងរដ្ឋាភិបាលនៃតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន៕

ដោយស៊ីវ ម៉េង

ភ្នំពេញៈ មិនខុសពីពាក្យពុំនោលលើកឡើងជារឿយៗនោះទេថា នៅក្នុងបញ្ហាតែងតែមានឳកាស ដូចគ្នានេះដែរក្នុងកំឡុងការរីករាលដាលនៃវិបត្តិជំងឺCovid-19 ដែលបណ្តាលឲ្យមានវិបត្តិសេដ្ឋកិច្ចពិភពលោក ក៏មានមុខរបរ និងអាជីវកម្មមួយចំនួនត្រូវប៉ាន់ផងដែរ ខណៈអាជីវកម្មភាពច្រើនប្រឈមមុខនឹងការដួលរលំ។

អាជីពមេធាវី

មេធាវីជាច្រើនកំពុងត្រូវប៉ាន់ ដោយការងារបានកើនឡើងកំឡុងវិបត្តិនេះ ហើយវាជាអាជីពមួយ ដែលដោះស្រាយរឿងឈឺក្បាលរបស់ប្រជាពលរដ្ឋ។

មេធាវីម្នាក់បាននិយាយថាគាត់ពិតជាមានការងារច្រើនត្រូវធ្វើដោយសារមានរឿងក្តីក្តាំកើនឡើងដែលធ្វើឲ្យសេវាកម្មមេធាវីមានភាពមមាញឹក។ក្នុងកំឡុងវិបត្តិសេដ្ឋកិច្ចបែបនេះរឿងក្តីទាក់ទងនឹងលុយកាក់ទាក់ទងនឹងកិច្ចសន្យាបង់ប្រាក់ទាក់ទងនឹងក្តីក្តាំជាច្រើនទៀតបានកើនឡើងដែលធ្វើឲ្យមេធាវីភាគច្រើនរកពេលសំរាកគ្មាន។

អាជីពគ្រូទាយ

នៅពេលមនុស្សជាច្រើន កំពុងវីវក់នឹងបញ្ហាសេដ្ឋកិច្ច និងវិបត្តិលុយកាក់ ជាធម្មតាបញ្ហានេះបានធ្វើឲ្យមនុស្សកើតជំងឺស្រ្តេសកើនឡើង ដែលធ្វើឲ្យពួកគេនឹងឃើញគ្រូទាយ ឬគ្រូហុងស៊ុយ ដើម្បីជួយពួកគេ ព្រោះអាជីពនេះក៏ជាផ្នែកមួយ ជួយសម្រាលផ្លូវអារម្មណ៍របស់មនុស្សបានមួយគ្រាៗដែរ។

ការព្យាបាលជំងឺផ្លូវចិត្តមិនអាចធ្វើឡើងតែមួយផ្នែកឬតែឯកទេសតែមួយនោះទេប៉ុន្តែការរកគ្រូទាយឬគ្រូហុងស៊ុយដើម្បីជួយក៏ជាផ្នែកមួយជួយសម្រាលការលំបាកផ្លូវចិត្តបានផងដែរ។

បើសិនជាជំនឿនេះមិនមានភាពស័ក្តិសិទ្ឋខ្លះទេវាក៏មិនអាចរស់រានបានរាប់ពាន់ឆ្នាំកន្លងមកដែរ។

អាជីពគ្រូពេទ្យ

គ្រូពេទ្យក៏ជាផ្នែកមួយនៃសង្គម ដែលជួយសម្រាលការលំបាកទាំងផ្លូវកាយ ផ្លូវចិត្តរបស់ប្រជាពលរដ្ឋផងដែរ ហេតុនេះនៅពេលមនុស្សកើតជំងឺស្រ្តេសច្រើន។ មនុស្សពិតជាប្រឈ​មមុខនឹងបញ្ហាច្រើនទាំងផ្លូវចិត្ត ផ្លូវកាយ។ ហេតុនេះអាជីពគ្រូពេទ្យមិនត្រឹមតែកាក់កបនោះទេ តែគ្រូពេទ្យក៏បានជួយការងារសង្គមកាន់តែច្រើន ដែលនេះជាគុណតម្លៃមួយមិនអាចមើលរំលងបាននោះទេ។

ហេតុនេះហើយទើបគ្រូពេទ្យរវល់ច្រើនដោយសារមានអ្នកឈឺច្រើនអ្នកកើតជំងឺផ្លូវចិត្តច្រើនកំឡុងពេលនេះ។

អាជីពលក់អាហារតាមអនឡាញ

ដោយសារប្រជាពលរដ្ឋមួយចំនួនភ័យខ្លាច មិនហ៊ានចាកចេញពីផ្ទះ ពួកគេបានកុំម៉ង់អាហារទទួលទានតាមអនឡាញផងដែរ ដែលធ្វើឲ្យអ្នកផ្គត់ផ្គង់អាហារមានភាពមមាញឹកខ្លាំងពីមួយថ្ងៃទៅមួយថ្ងៃ។

អាជីពដែលមានតម្រូវការប្រចាំថ្ងៃនេះជាអាជីពដ៏កាក់កបនៅគ្រប់សម័យកាលពិសេសពេលសេដ្ឋកិច្ចរីកចម្រើនមនុស្សកាន់តែរវល់ពួកគេមិនចំណាយពេលដើររកអាហារនោះទេជំនួសវិញពួកគេកុំម៉ង់អាហារទទួលទាននៅការិយាល័យធ្វើការកាន់តែច្រើនឡើង។

អាជីពលក់តាមអនឡាញ

ការលក់តាមអនឡាញ ក៏មិនធម្មតាដែរ ជាក់ស្តែងកាលពីពេលថ្មីៗនេះ មានម្ចាស់អាជីវកម្មលក់តាមអនឡាញជាច្រើន បានក្លាយជាឧកញ៉ា។ ការលក់តាមអនឡាញ ពិតជាជួយច្រើនដល់សកម្មភាពសេដ្ឋកិច្ច កំឡុងពេលការរីករាលដាលមេរោគCovid-19 ដែលបណ្តាលឲ្យមានវិបត្តិសេដ្ឋកិច្ចពិភពលោកដ៏អាក្រក់បំផុត ពិសេសអាក្រក់ជាងកំឡុងវិបត្តិសេដ្ឋកិច្ចនៃសង្រ្គាមលោកលើកទី២ទៅទៀត។

ការលក់តាមអនឡាញជាបដិវត្តន៍នៃសកម្មភាពសេដ្ឋកិច្ចថ្មីមួយនៅកម្ពុជាដែលយុវជនខ្មែរកាន់តែច្រើនបានចាប់យកមុខរបរនេះដើម្បីបង្កើនប្រាក់ចំណូលរបស់ពួកគេ៕

ដោយ ៖ រ៉ាណេត

ភ្នំពេញ ៖ ស្របពេលនឹងការព្រួយបារម្ភអំពីស្ថានភាពកូវីដ១៩ ក្រោយព្រឹត្តិការណ៍ ៣វិច្ឆិកា ពីសំណាក់ប្រមុខរាជរដ្ឋាភិបាល សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ក្រសួងសុខាភិបាលបានដាក់ចេញនូវវិធានការ១០ចំណុចសំខាន់ៗសម្រាប់ការធ្វើចត្តាឡីស័ក ដើម្បីទប់ស្កាត់ការរាល់ដាលនៃជំងឺរាតត្បាតមួយនេះ ។

នៅព្រឹកថ្ងៃទី១០ ខែវិច្ឆិកា ឆ្នាំ២០២០ មុននេះបន្តិច ក្រសួងសុខាភិបាលបានដាក់ចេញនូវវិធានការសំខាន់ៗចំនួន១០ សម្រាប់អនុវត្តលើការធ្វើចត្តាឡីស័ក។ វិធានការសំខាន់ៗទាំង១០ ដែលតម្រូវឱ្យអនុវត្តរួមមាន ៖

១៖ នៅក្នុងផ្ទះដាច់ដោយឡែកគ្រប់ពេលជារៀងរាល់ថ្ងៃ ក្នុងអំឡុងពេល១៤ថ្ងៃ (មានដាច់ខាតដើរចេញក្រៅផ្ទះ ឬទីកន្លែងធ្វើចត្តាឡីស័ក)។

២៖ តាមដានរោគសញ្ញានៃជំងឺ ដោយវាស់កម្តៅជារៀងរាល់ថ្ងៃ នៅពេលព្រឹក និងពេលល្ងាច។ បើកម្តៅលើពី៣៧.៥អង្សារ ឬមានរោគសញ្ញាណាមួយ ដូចជាក្អក ឈឺបំពង់ក ពិបាកដកដង្ហើម ត្រូវទាក់ទងទៅកាន់ទូរស័ព្ទទាន់ហេតុការណ៍ ១១៥។

៣៖ នៅដាច់ដោយឡែកពីសមាជិកគ្រួសារ

– រស់នៅក្នុងបន្ទប់មួយដាច់ដោយឡែក ដែលមានខ្យល់ចេញចូលគ្រប់គ្រាន់ និងប្រើប្រាស់បន្ទប់ទឹក/បង្គន់ផ្សេងពីគ្រួសារ។ បរិភោគអាហារដាច់ដោយឡែកពីសមាជិកគ្រួសារ។

– ពាក់មាស់ជាប់ជានិច្ច និងត្រូវនៅឃ្លាតពីគ្នាយ៉ាងតិច១.៥ម៉ែត្រ

៤៖ ប្រើប្រាស់សម្ភារៈដោយឡែកពីសមាជិកគ្រួសារ

– ហាមប្រើសម្ភារៈរួមគ្នាជាមួយសមាជិកគ្រួសារ។ លាងសម្អាតសម្ភារៈទាំងនោះជាមួយទឹកស្អាត និងសាប៊ូ ឱ្យបានស្អាតល្អបន្ទាប់ពីប្រើរួច។ បោកគក់សំលៀកបំពាក់ឱ្យបានស្អាត និងហាលថ្ងៃឱ្យបានល្អ

៥៖ លាងដៃជាមួយសាប៊ូ និងទឹកស្អាតឱ្យបានញឹកញាប់

– លាងសម្អាតដៃ ដោយប្រើសាប៊ូ និងទឹកស្អាត ឬប្រើអាល់កុល ឬជែលលាងដៃឱ្យបានញឹកញាប់ មុន និងក្រោយពេលចម្អិតអាហារ មុននិងក្រោយបរិភោគអាហារ និងក្រោយពេលប្រើបង្គន់

៦៖ ខ្ទប់មាត់ ច្រមុះ នៅពេលក្អក ឬកណ្តាស់

– ខ្ទប់មាត់ ច្រមុះខ្លួនឯង ដោយម៉ាស់ ក្រម៉ា កន្សែង ក្រដាសអនាម័យ ឬខ្ទប់នឹងកែងដៃ នៅពេលក្អក ឬកណ្តាស រួចត្រូវចោលក្រដាសនោះទៅក្នុងធុងសំរាម ហើយលាងសម្អាតដៃភ្លាមៗ។

៧៖ បរិភោគម្ហូបអាហារដែលចម្អិតបានល្អ

– ម្ហូបអាហារត្រូវចម្អិតឱ្យបានល្អ។ បរិភោគអាហារមានជាតិត្រី សាច់ បន្លែ ផ្លែឈើ បន្ថយជាតិខ្លាញ់ ជាតិប្រៃ និងជាតិផ្អែម ដើម្បីជួយពង្រឹងប្រព័ន្ធការពារសារពាង្គកាយ។

៨៖ អនាម័យល្អក្នុងកន្លែងរស់នៅ និងរក្សាអារម្មណ៍នឹងនរ

– ធ្វើកិច្ចការផ្សេងៗជាធម្មតា ហាត់ប្រាណក្នុងផ្ទះ

– សម្អាតបន្ទប់រស់នៅផ្ទះខ្លួន បន្ទប់ទឹក ព្រមទាំងសម្ភារៈប្រើប្រាស់ផ្សេងៗជារៀងរាល់ថ្ងៃ។

៩៖ បញ្ចប់ការអនុវត្តចត្តាឡីស័ក

– អនុញ្ញាតឱ្យបញ្ចប់ការធ្វើចត្តាឡីស័ក ប្រសិនអ្នកបានអនុវត្តត្រឹមត្រូវ តាមវិធានការចត្តាឡីស័កដោយនៅផ្ទះរាល់ពេលគ្រប់កាលកំណត់១៤ថ្ងៃ ហើយគ្មានចេញរោគសញ្ញាជំងឺ និងត្រូវបានបញ្ជាក់ដោយលទ្ធផលតេស្តកូវីដ១៩ «អវិជ្ជមាន» ដោយមន្ទីរពិសោធន៍ នៅថ្ងៃទី១៣ នៃការធ្វើចត្តាឡីស័ក។

១០៖ ទំនាក់ទំនងក្នុងករណីចាំបាច់ និងបន្ទាន់

– បើអ្នកត្រូវការពិគ្រោះយោបល់ ឬជំនួយវេជ្ជសាស្រ្ត សូមទាក់ទងមកទូរស័ព្ទទាន់ហេតុការណ៍ ១១៥ របស់ក្រសួងសុខាភិបាល ដោយមិនគិតថ្លៃសេវា៕

ដោយ ហ្សូលី

ភ្នំពេញ៖ រដ្ឋមន្រ្តីក្រសួងការបរទេសជប៉ុនក៏បានសន្យាថា នឹងបង្កើតមជ្ឈមណ្ឌលសម្រាប់ជំងឺបន្ទាន់អាស៊ាននិងសុខភាពសាធារណៈ ដើម្បីកាត់បន្ថយផលប៉ះពាល់សុខភាពនៃជំងឺរាតត្បាតនេះ និងកំពុងសហការគ្នាក្នុងវិស័យពាណិជ្ជកម្ម ខ្សែសង្វាក់ផ្គត់ផ្គង់ សន្តិសុខ ហេដ្ឋារចនាសម្ព័ន្ធ។

កិច្ចព្រមព្រៀងពាណិជ្ជកម្មសេរីពហុភាគីន បានជួយសម្រួលដល់ឱកាសវិនិយោគនិងពាណិជ្ជកម្មរវាងជប៉ុននិងអាស៊ាន។ នៅឆ្នាំ ២០១៩ អាស៊ានគឺជាដៃគូពាណិជ្ជកម្មធំទី ៣ របស់ជប៉ុន។ យោងតាមក្រសួងហិរញ្ញវត្ថុជប៉ុនការនាំចេញរបស់ជប៉ុនទៅកាន់អាស៊ានមានតម្លៃ ១១,៥៨ ទ្រីលានយ៉េន ខណៈការនាំចូលពីអាស៊ានមានចំនួន ១១,៧៦ ទ្រីលានយ៉េន។

នៅខែសីហាឆ្នាំ ២០២០ លោក Toshimitsu Motegi រដ្ឋមន្រ្តីក្រសួងការបរទេសជប៉ុនបានធ្វើទស្សនកិច្ចនៅកម្ពុជា និងបានសង្កត់ធ្ងន់ថា ប្រទេសជប៉ុននឹងបន្តជួយដល់ប្រទេសកម្ពុជាក្នុងគំនិតផ្តួចផ្តើមហេដ្ឋារចនាសម្ព័ន្ធ។

ជាក់ស្តែង រដ្ឋាភិបាលជប៉ុនបានផ្តល់ប្រាក់កម្ចី ២០៩ លានដុល្លារដល់ប្រទេសកម្ពុជាសម្រាប់គម្រោងធ្វើទំនើបកម្មកំពង់ផែនៅក្រុងព្រះសីហនុដែលជាច្រកពាណិជ្ជកម្មដ៏សំខាន់មួយ។

ដោយនិរន្តរភាពប្រកបដោយចីរភាពរដ្ឋមន្ត្រីការបរទេសជប៉ុនថ្មីៗនេះបានសន្យាតាមទូរស័ព្ទជាមួយឧបនាយករដ្ឋមន្ត្រីកម្ពុជា ដើម្បីគាំទ្រប្រទេសកម្ពុជាក្នុងការដោះស្រាយបញ្ហាបំពុលបរិស្ថាន ជាពិសេសការបំពុលផ្លាស្ទិច។ ដូច្នេះវាមានសារៈសំខាន់បំផុតសម្រាប់បណ្តាប្រទេសអាស៊ានក្នុងការបន្តធ្វើការជាមួយគ្នាយ៉ាងជិតស្និទ្ធនិងជាមួយប្រទេសជប៉ុនក្នុងវិស័យសេដ្ឋកិច្ចនិងសុខាភិបាល។

ប្រទេសជប៉ុនពឹងផ្អែកយ៉ាងខ្លាំងលើទីផ្សារបរទេស និងបណ្តាញផ្គត់ផ្គង់សម្រាប់ប្រភពវត្ថុធាតុដើមនិងទំនិញ។

ជប៉ុនព្យាយាមកាត់បន្ថយការពឹងផ្អែករបស់ខ្លួនលើការនាំចូលរបស់ចិនតាមរយៈការធ្វើពិពិធកម្មខ្សែសង្វាក់ផ្គត់ផ្គង់របស់ខ្លួននិងធ្វើជាដៃគូជាមួយអាស៊ានក្នុងផលិតកម្មនិងចង្វាក់ផ្គត់ផ្គង់។ អាស៊ានគឺជាទីផ្សារដ៏សំខាន់សម្រាប់ប្រទេសជប៉ុនដែលជាធាតុផ្សំដ៏សំខាន់នៃបណ្តាញផ្គត់ផ្គង់សម្រាប់ក្រុមហ៊ុនជប៉ុន។

ដើម្បីពន្លឿនកិច្ចប្រឹងប្រែងធ្វើពិពិធកម្មរដ្ឋាភិបាលជប៉ុនថែមទាំងនឹងឧបត្ថម្ភធនដល់ក្រុមហ៊ុនជប៉ុនចំនួន ២២០ លានដុល្លារ ក្នុងគម្រោងឧបត្ថម្ភធនសម្រាប់ពួកគេដើម្បីបង្កើតរោងចក្រផលិតនៅអាស៊ាន។ យោងតាមអង្គការពាណិជ្ជកម្មក្រៅប្រទេសរបស់ជប៉ុនក្រុមហ៊ុនជប៉ុនចំនួន ៣០ នឹងទទួលបានមូលនិធិជំនួយពីរដ្ឋាភិបាលជប៉ុនដើម្បីបង្កើតមូលដ្ឋានផលិតកម្មនៅអាស៊ីអាគ្នេយ៍។

ប្រទេសជប៉ុនក៏បើកចំហចំពោះការវិនិយោគពីវិនិយោគិនអាស៊ានផងដែរ។ ក្នុងចំណោមដៃគូអាស៊ានទាំងអស់ជប៉ុនបានវិនិយោគច្រើនបំផុតនៅក្នុងគម្រោងហេដ្ឋារចនាសម្ព័ន្ធនៅអាស៊ាន៕ Chiangrai Times

ដោយៈ ប៊ី

ភ្នំពេញៈ ផ្សារ​ហ៊ុន​សកល និង​អាមេរិក​បាន​កើនឡើង​កាលពី​ថ្ងៃ​ចន្ទ បន្ទាប់ពី​ក្រុមហ៊ុន​ផលិត​ឱសថ Pfizer  បានប្រកាសថា​វ៉ាក់សាំង​ដំបូង​របស់ខ្លួន អាច​ការពារ​មនុស្ស​កុំ  ឱ្យ​ឆ្លង​ជំងឺ​រាតត្បាត​សកល COVID-19 បាន​រហូតដល់​ជាង ៩០% ។ នេះ​បើ​យោងតាម​ការចេញផ្សាយរ​បស់​ទូរទស្សន៍ CNN នៅ​យប់​ថ្ងៃទី៩ ខែវិច្ឆិកា ឆ្នាំ២០២០ ។

ភាគហ៊ុន​ក្រុមហ៊ុន​Dowរបស់​អាមេរិក បាន​ហក់​ឡើងដល់១.២៧២ពិន្ទុ ឬ​ប្រហែល ៤.៥ភាគរយ។ ក្រុមហ៊ុន S&P 500 (SPX) បាន​កើនឡើង​ប្រហែល៣.៥% ហើយ​ក្រុមហ៊ុន​របស់ Nasdaq (COMP) បាន​កើនឡើង១,៥%។ ការកើនឡើង​ខ្ពស់​នេះ កើតឡើង បន្ទាប់ពី​ភាគហ៊ុន បានបញ្ចប់​កាលពី​ថ្ងៃ​សុក្រ​ភាគច្រើន​មិនមាន​ការផ្លាស់ប្តូរ។

ក្រុមហ៊ុន FTSE 100 (UKX) នៅ​ទីក្រុង​ឡុង​ដ៏ បាន​កើនឡើង៤,៧% ខណៈពេលដែល​ក្រុមហ៊ុន DAX  របស់​អាល្លឺម៉ង់ បាន​កើនឡើង ៥,៤% និង​ក្រុមហ៊ុន​បារាំង CAC 40 កើនឡើង​ខ្ពស់​ជិត ៧% ។ តម្លៃ​ប្រេង​ឆៅ​ប្រភេទ បាន​ឡើង​ជិត៨ភាគរយ ដល់៤២,៤៥ ដុល្លារ​ក្នុង​មួយ​បារ៉ែល ដែល​ឈានដល់​ចំណុចកំពូល​ជិត៤៥,៨៦ដុល្លារ ក្នុង​មួយ​បារ៉ែល គិត​ចាត់​តាំងពី​ថ្ងៃទី២៥ ខែសីហា។

ប្រធាន​អ្នក​យុទ្ធសាស្ត្រ​ទីផ្សារ​សកល នៅ​ក្រុមហ៊ុន Axi លោក Stephen Innes បាន​និយាយថា “ វ៉ាក់សាំង​នេះ​នឹង​ផ្លាស់ប្តូរ​មួយ ដែលជា​ដំណោះស្រាយ​សម្រាប់​វិបត្តិ​កូ​វីដ១៩ និង​អ្វីដែល​ដែល​ទីផ្សារ​ប្រេង​កំពុង​រង់ចាំ​ដំណោះស្រាយ​នេះ” ។

ក្រុមហ៊ុន​ផលិត​ឱសថ Pfizer របស់​អាល្លឺម៉ង់​នៅ​ថ្ងៃ​ចន្ទ​នេះ​បានប្រកាសថា ផ្អែកលើ​លទ្ធផល នៃ​ការធ្វើ​តេស្ត​វ៉ាក់សាំង COVID-19 បាន​បង្ហាញថា វ៉ាក់សាំង​ដំបូង​របស់ខ្លួន អាច​ការពារ​មនុស្ស កុំឱ្យ​ឆ្លង​ជំងឺ​រាតត្បាត​សកល COVID-19 បាន​រហូតដល់​ជាង៩០% ។ នេះ​យោងតាម​ការចេញផ្សាយ​ដោយ សារព័ត៌មាន BBC នៅ​យប់​ថ្ងៃ​ចន្ទ ទី០៩ ខែវិច្ឆិកា ឆ្នាំ២០២០ ។

វ៉ាក់សាំង​នេះ ត្រូវបាន​ធ្វើតេស្ត​លើ​មនុស្ស​ចំនួន៤៣,៥០០នាក់ នៅក្នុង​ប្រទេស​ចំនួនផ្សេងៗគ្នា ដោយ​លទ្ធផល​បាន​បង្ហាញថា មិនមាន​អ្វី​ជាការ​ព្រួយបារម្ភ ចំពោះ​សុវត្ថិភាព​របស់​វា​ឡើយ ហើយ​ក្រុមហ៊ុន​គ្រោង នឹងដាក់​ពាក្យសុំ​ការយល់ព្រម​ជាបន្ទាន់ ដើម្បី​ប្រើប្រាស់​វ៉ាក់សាំង​នេះ​នៅ​ចុងខែ​នេះ​តែម្តង។

ការចាក់​វ៉ាក់សាំង​នេះ​ទៀតសោត ត្រូវការ​ចំនួន២ដូ​ស ខណៈ​រយៈពេល​ពី​ដូ​ស​ទី១ ទៅ​ទី២ មាន​ចំនួន ៣សប្តាហ៍។ ការ​តេស្ត​សាកល្បង​នៅ​សហរដ្ឋអាមេរិក អាល្លឺម៉ង់ ប្រ​ស៊ី​ល អា​ហ្ស​ង់​ទីន អា​ហ្រិ​ក​ខាងត្បូង និង​ប្រទេស​តួ​ក​គី​បាន​បង្ហាញថា វ៉ាក់សាំង​នេះ​មាន​ប្រសិទ្ធភាព៩០% ក្នុងការ​ការពារ​មនុ​ស្ស​កុំ​ឲ្យ​ឆ្លង​ជំងឺ COVID-19 បន្ទាប់ពី​ដូ​ស​ទី២ រយៈពេល៧ថ្ងៃ។

ក្រុមហ៊ុន Pfizer ជឿជាក់ថា ខ្លួន​នឹង​អាច​ផ្គត់ផ្គង់​ដល់៥០លាន​ដូ​ស នៅ​ដំណាច់​ឆ្នាំនេះ និង​ប្រហែល១.៣ប៊ី​លាន​ដូ​ស​នៅ​ចុងឆ្នាំ២០២១ ។ ទោះយ៉ាងណា មាន​បញ្ហា​ប្រឈម​មួយចំនួន ខាង​ផ្នែក​ដឹកជញ្ជូន ត្បិត​ថា​វ៉ាក់សាំង COVID-19 នេះ ត្រូវតែ​រក្សាទុក​ក្នុង​កន្លែង​ត្រជាក់​ខ្លាំង រហូត​ទៅដល់​ក្រោម -៨០អង្សា​សេ​ឯណោះ៕