ដោយគង់ សូរិយា

        ភ្នំពេញៈ អ្នកជំនាញជាច្រើនបានលើកឡើងស្រដៀងគ្នាថា ការវិនិយោគដីធ្លីនៅតំបន់ជាយក្រុងនៅតែមានឳកាសចំណេញច្រើន និងងាយស្រួលលក់ ដោយសារដីនៅតំបន់បែបនេះនៅតែមានចរន្តទិញលក់ ទោះបីសេដ្ឋកិច្ចជួបវិបត្តិក្តី។

ហេតុអ្វី និងហេតុផលអ្វីខ្លះ ដែលជម្រុញឲ្យតម្លៃដីធ្លីនៅតំបន់ជាយក្រុងទទួលបានផលចំណេញច្រើន? យើងអាចសិក្សាទៅលើកត្តាសត្យានុម័តទាំងនេះ។

ជាតំបន់ងាយទទួលរងឥទ្ឋិពលពីការអភិវឌ្ឍន៍

        តាមធម្មតាសកម្មភាពសេដ្ឋកិច្ច តែងតែមានភាពរសរវើកនៅទីក្រុងឬរាជធានីរបស់ប្រទេសណាមួយ ហេតុនេះសកម្មភាពសេដ្ឋកិច្ច និងការវិនិយោគនៅក្នុងទីក្រុងតែងតែទទួលបានឥទ្ឋិពលលឿន។ ការរីកចម្រើននៃៃទីក្រុង តែងតែជះឥទ្ឋិពលដល់តំបន់ជាយក្រុង ដោយសារវាស្ថិតនៅកៀកនឹងទីក្រុង ហើយអ្នកវិនិយោគឆ្លាតវៃ តែងតែសម្លឹងមើលឳកាសនៅតំបន់ជិតៗក្រុង ព្រោះវាងាយទទួលបានការអភិវឌ្ឍលឿន និងសកម្មភាពទិញដូរច្រើន។

ងាយតភ្ជាប់ហេដ្ឋារចនាសម្ព័ន្ឋ

        នៅកម្ពុជាពេលហេដ្ឋារចនាសម្ព័នឋតភ្ជាប់ទៅដល់តំបន់ណា តំបន់នោះតែងតែមានភាពរីកចម្រើនលឿន ពិសេសតម្លៃដីធ្លីតែងតែកើនឡើងយ៉ាងឆាប់រហហ័ស។

ដូចគ្នានេះដែរ តំបន់ជាយៗរាជធានីភ្នំពេញ តែងតែទទួលបានគម្រោងវិនិយោគ   ថ្មីៗ ដែលធ្វើឲ្យការវិនិយោគហេដ្ឋារចនាសម្ព័ន្ឋរបស់រដ្ឋាភិបាល និងវិស័យឯកជនបានកើនឡើងយ៉ាងឆាប់រហ័ស និងតែងតែសិទ្ឋក្នុងគោលដៅ ឬកញ្ចប់អាទិភាពរបស់រដ្ឋាភិបាល។

កំនើននគរូបនីយកម្ម      

កត្តានគរូបនីយកម្ម តែងតែផ្សារភ្ជាប់នឹងប្រជាសាស្រ្ត ហេតុនេះនៅពេលមានមនុស្សកើនឡើងនៅតំបន់ណាច្រើន កត្តានគរូបនីយកម្មនឹងរីកចម្រើនលឿនទៅតាមនោះដែរ។

ដូច្នេះហើយបានជាទីក្រុងតែងតែរីកចម្រើនលឿន និងមានផែនការពង្រីកជាបន្តបន្ទា​ប់របស់រដ្ឋាភិបាល ជាក់ស្តែងផ្ទៃក្រឡារាជធានីភ្នំពេញ បានកើនឡើងពី៣០០គីឡូ​ម៉ែត្រក្រឡា ទៅទំហំ៧០០គីឡូមែត្រក្រឡា និងអាចពង្រីកថែមទៀតនាពេលអនាគត។

នគរូបនីយកម្ម ក៏មានភាពប្រទាក់ក្រឡាជាមួយនឹងហេដ្ឋារចនាសម្ព័ន្ឋ សង្គម សេដ្ឋកិច្ច និងការអភិវឌ្ឍន៍យ៉ាងស្អិតរមួតផងដែរ។

កត្តាប្រជាសាស្រ្ត

        ជាទូទៅនៅពេលប្រទេសរីកចម្រើន ប្រជាជនតែងតែរត់ចូលមករស់នៅក្នុងក្រុងភ្នំពេញ ដែលនិន្នាការនេះបានកើតមាននៅស្ទើរគ្រប់ប្រទេសនានានៅលើពិភពលោក។

ហេតុនេះហើយបានជាចំនួនប្រជាជនរស់នៅក្រុងភ្នំពេញ បានកើនឡើងជាប្រចាំ ដោយបច្ចុប្បន្នមានប្រជាជនរស់នៅជាង៣លាននាក់ និងរំពឹងកើនដល់៥លាននាក់នៅឆ្នាំ២០៣០ខាងមុខ។

ជាមួយគ្នានេះ ការសិក្សារបស់ក្រសួងរៀបចំដែនដី នគរូបនីយកម្ម និងសំណ​ង់បានបង្ហាញថា ចំនួនប្រជាជនរស់នៅទីក្រុង និងតាមទីប្រជុំជននានានឹងកើនឡើងដល់៧លាននាក់នៅឆ្នាំ២០៣០ ហើយតម្រូវការលំនៅដ្ឋាននៅទីក្រុង នឹងកើនដល់ប្រមាណជិត១លានខ្នងផងដែរ។

ផ្អែកលើកត្តាទាំងអស់នេះហើយ បានជាសកម្មភាពនៃការអភិវឌ្ឍបានរីកទៅកាន់តំបន់ជាយក្រុងកាន់តែឆាប់រហ័ស តម្លៃដីធ្លីកើនឡើង ចំនួនប្រជាពលរដ្ឋបាននិងកំពុងកើនឡើង និងផ្នែកនគរូបនីយកម្មបានរីកចម្រើនស្របនឹងសេដ្ឋកិច្ចសង្គមផងដែរ៕

ដោយៈប៊ី

ភ្នំពេញៈ ស្ថាប័នអន្តរជាតិធំៗចំនួន២ ដែលរួមានធនាគារពិភពលោក(World Bank) និងធនាគារអភិវឌ្ឍន៍អាស៊ី (ADB) បានព្យាករណ៍ថា សេដ្ឋកិច្ចកម្ពុជានឹងស្ទុះទៅរកកំណើនវិជ្ជមាននៅឆ្នាំ២០២១ ខណៈបច្ចុប្បន្នសកម្មភាពសេដ្ឋកិច្ចកម្ពុជា កំពុងចាប់ផ្តើមកម្រើកឡើងវិញ។

យោងតាមរបស់របាយការណ៍ចុងក្រោយ World Bank ដែលបានចេញផ្សាយកាលពីពេលថ្មីៗនេះបានព្យាករណ៍ថា សេដ្ឋកិច្ចកម្ពុជាត្រូវបានរំពឹងទុកថា នឹងងើបឡើងវិញ ហើយលូតលាស់បានប្រហែលជិត៤ភាគរយ ក្នុងឆ្នាំ២០២១។ ប៉ុន្តែADB បានព្យាករថា សេដ្ឋកិច្ចកម្ពុជានឹងមានកំណើនស្ទុះឡើង៥.៩ ភាគរយនៅឆ្នាំក្រោយនេះ។

World Bank បានឱ្យដឹងនៅក្នុងរបាយការណ៍មួយឈ្មោះ Restrained Recovery ស្តីពី បច្ចុប្បន្នភាពសេដ្ឋកិច្ចកម្ពុជាថា សេដ្ឋកិច្ចត្រូវបានព្យាករណ៍ថា នឹងថយថយកំនើន ប្រមាណដក២ភាគរយ នៅក្នុងឆ្នាំ២០២០ ប៉ុន្តែត្រូវបានរំពឹងទុកថា នឹងងើបឡើងវិញហើយលូតលាស់បានប្រហែលជិត៤ភាគរយក្នុងឆ្នាំ២០២១។

ជាមួយគ្នានេះដែរ លោក David Freedman សេដ្ឋវិទូប្រចាំប្រទេសរបស់ADBកម្ពុជាបានលើកឡើងថា សេដ្ឋកិច្ចកម្ពុជានឹងធ្លាក់ចុះ ក្នុងរង្វង់-៤.០%ភាគរយ ក្នុងឆ្នាំ២០២០ ហើយកំណើននឹងស្ទុះឡើង៥.៩ ភាគរយនៅឆ្នាំ ២០២១។

លោកបានឱ្យដឹងទៀតថា“កម្ពុជាកំពុងធ្វើពិពិធកម្មសមត្ថភាព ក្នុងការនាំចេញរប​ស់​ខ្លួន ដែលនេះជាគន្លឹះនៃកំណើននាពេលអនាគត ពីព្រោះកំណើនរបស់កម្ពុជាត្រូវបានបង្កើតឡើង ដោយផ្អែកលើការបើកចំហពាណិជ្ជកម្ម”។

ជាមួយគ្នានេះ លោកស្រី អ៊ីងហ្គូណា ដូប្រាចា នាយិកាគ្រប់គ្រងប្រចាំប្រទេសរបស់ធនាគារពិភពលោកមានប្រសាសន៍ថា “ចក្ខុវិស័យកំណើនរបស់កម្ពុជា នៅប្រឈមនឹងភាពមិនប្រាកដប្រជាច្រើនណាស់”។ លោកស្រីបន្តថា “គោលដៅដ៏សំខាន់បំផុតនៃគោលនយោបាយនាពេលនេះ គឺជាបន្ទាន់ ត្រូវធ្វើយ៉ាងណាស្តារឡើងវិញនូវការងារដែលបាត់បង់ ឬដែលត្រូវព្យួរដោយសារតែការរាលដាលជំងឺនេះ”។

លោកស្រីបន្តទៀតថា ឆ្ពោះទៅពេលខាងមុខ ជាការចាំបាច់ដែលត្រូវជំរុញលើកទឹកចិត្តដល់ការវិនិយោគក្នុងស្រុក និងពីបរទេស ឱ្យទាញយកផលចំណេញពីកិច្ចព្រមព្រៀងពាណិជ្ជកម្មសេរីទ្វេភាគី និងក្នុងតំបន់ដែលត្រូវបានបង្កើតឡើង កាលពីពេលថ្មីៗនេះ។

លោកស្រីបានថ្លែងថា “លទ្ធភាពនេះអាចធ្វើទៅរួច តាមរយៈការដាក់ចេញឱ្យបានឆាប់រហ័ស នូវច្បាប់វិនិយោគដែលមានភាពប្រកួតប្រជែង និងប្រការលើកទឹកចិត្តនានាដល់ការវិនិយោគ អមដោយវិធានការទាំងឡាយ សំដៅបង្កភាពងាយស្រួលដល់ការធ្វើអាជីវកម្មផងដែរ”៕

ដោយៈ រ៉ាណេត

សៀមរាបៈ មន្ត្រីមន្ទីររៀបចំដែនដីនគរូបនីយកម្ម និងសំណង់ មន្ត្រីជំនាញមន្ទីរ និងរដ្ឋបាលខេត្តសៀមរាប បានចុះធ្វើការកំណត់អត្តសញ្ញាណកម្មដីធ្លី ជូនប្រជាពលរដ្ឋដែលរុះរើសំណង់លំនៅដ្ឋានជាប់ស្ទឹងសៀមរាប សរុបជាង៤០០គ្រួសារទៅកាន់ទីតាំងថ្មី ក្នុងតំបន់អភិវឌ្ឍន៍ភូមិធម្មជាតិតារុនឯក ឃុំតារុនឯក ស្រុកបន្ទាយស្រី ខេត្តសៀមរាប។

តាមរយៈសេចក្ដីរាយការណ៍លម្អិតរបស់រដ្ឋបាលខេត្តសៀមរាប ជម្រាបជូនលោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានបញ្ជាក់ថា នៅព្រឹកថ្ងៃទី២១ ខែធ្នូ ឆ្នាំ២០២០នេះ មន្ត្រីជំនាញដែនដី និងរដ្ឋបាលខេត្តសៀមរាប ចុះទៅកាន់ទីតាំងថ្មីនៃការដោះដូរ ជូនប្រជាពលរដ្ឋដែលស្នាក់នៅបណ្តោះអា​សន្នជាប់ស្ទឹងសៀមរាបជាង៤០០គ្រួសារ នឹងបោះបង្គោលកំណត់អត្តសញ្ញាណកម្មដីកម្មសិទ្ធិ។

លោកឧបនាយករដ្ឋមន្ត្រី បានសរសេរបណ្តាញទំនាក់ទំនងអេឡិចត្រូនិកថា“ឆ្លើ​យតបទៅនឹងការអំពាវនាវរបស់រដ្ឋបាលខេត្តសៀមរាប តាមការណែនាំរបស់ក្រសួងរៀបចំដែនដីនគរូបនីយកម្ម និងសំណង់ ប្រជាពលរដ្ឋដែលកំពុងរស់នៅ ក្នុងសំណង់បណ្តោះអាសន្នតាមស្ទឹងសៀមរាប ចាប់ពីគល់ស្ពាននាគដល់ស្ពានអង្គរ ចំនួន៤០៥គ្រួសារនៃចំនួនសរុបចំនួន៤៣០គ្រួសារ ស្មើនឹង៩៤,១៨ភាគរយ បានចូលរួមចាប់ឆ្នោតទទួលយកដីឡូតិ៍ទំហំ២០x ៣០ម៉ែត្រ ស្ថិតនៅក្នុងតំបន់អភិវឌ្ឍន៍ភូមិធម្មជាតិ រុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប”

ការអនុវត្តនូវការចាប់ឆ្នោតយកដីឡូតិ៍ ដែលជាការដោះដូរទីតាំងលំនៅដ្ឋានខាងលើនេះ គឺជាការដោះស្រាយនូវផលប៉ះពាល់នៃគម្រោងអភិវឌ្ឍន៍ និងស្ថាបនាហេដ្ឋារចនាសម្ព័ន្ធផ្លូវថ្នល់ចំនួន៣៨ខ្សែ រួមជាមួយនឹងការស្ដារឱ្យល្អប្រសើរឡើងវិញ នូវដងស្ទឹងសៀ​មរាប ដើម្បីបង្កើនសោភ័ណភាពនៅក្នុងក្រុង និងជាភាពទាក់ទាញទេសចរបន្ថែមទៀតក្រោមការវិនិយោគរបស់រាជរដ្ឋាភិបាលកម្ពុជា លើទំហំទឹកប្រាក់ចំនួន១៥០លានដុល្លារ ដែលមានសម្ដេចតេជោ ហ៊ុន សែនជាប្រមុខ ៕

ដោយ ៖ វុទ្ធី

អន្តរជាតិ ៖ ក្រសួងហិរញ្ញវត្ថុជប៉ុន បានបញ្ជាក់ថា នៅថ្ងៃទី២១ ខែធ្នូ ឆ្នាំ២០២០នេះ គណៈរដ្ឋមន្រ្តីជប៉ុនបានអនុម័តសេចក្តីព្រាងថវិកាចំនួន១,០៣ ទ្រីលានដុល្លារអាមេរិកសម្រាប់ឆ្នាំ២០២១ ខណៈដែលការឆ្លងមេរោគ និងការចំណាយផ្សេងៗបានដាក់សម្ពាធលើហិរញ្ញវត្ថុសាធារណៈ។

កញ្ចប់ថវិកាប្រចាំឆ្នាំចំនួន១០៦,៦ ទ្រីលានយ៉េន (១,០៣ទ្រីលានដុល្លារ) នេះ បានកើនឡើង៤ភាគរយនៅឆ្នាំនេះ និងកើនឡើងរយៈពេល៩ខែជាប់គ្នា ដោយបំណុលថ្មីមានទំហំទឹកប្រាក់៤៣,៦ទ្រីលានយ៉េន កើន ៤០,៩ ភាគរយនៃប្រាក់ចំណូល។

អ្នកនយោបាយនៅទូទាំងពិភពលោកបានបញ្ចេញសកម្មភាពជំរុញរូបិយវត្ថុ និងសារពើពន្ធ ដើម្បីទប់ស្កាត់ការធ្លាក់ចុះសេដ្ឋកិច្ចដ៏ជ្រៅ និងអូសបន្លាយពេល ដែលជំងឺរាតត្បាតធ្វើឱ្យមានការបិទព្រំដែនអន្តរជាតិ ហើយ មនុស្សជាច្រើនបានបាត់បង់ការងារ។

នៅប្រទេសជប៉ុន កំណែទម្រង់សារពើពន្ធត្រូវបានទុកចោលមួយរយៈ ខណៈដែលនាយករដ្ឋមន្រ្តី Yoshihide Suga បានផ្តល់អាទិភាពដល់កិច្ចខិតខំប្រឹងប្រែង ដើម្បីទប់ទល់នឹងជំងឺរាតត្បាត ជំរុញកំណើនសេដ្ឋកិច្ច និងបង្កើនប្រាក់ចំណូលពន្ធ។

ផែនការចំណាយ ដែលត្រូវនឹងរបាយការណ៍បណ្តាញសារព័ត៌មានរ៉យទ័រចេញផ្សាយកាលពីសប្តាហ៍មុន ត្រូវតែអនុម័តដោយសភានៅដើមឆ្នាំក្រោយ។

ដោយបំណុលសាធារណៈមានចំនួនច្រើនជាងទ្វេដងរបស់ប្រទេស ដែលមានទំហំសេដ្ឋកិច្ច៥ទ្រីលានដុល្លារនេះ កំណែទម្រង់សារពើពន្ធ គឺជាកិច្ចការបន្ទាន់ជាងប្រទេសដទៃទៀត៕

ដោយៈ រ៉ា​ណេ​ត

កណ្តាលៈ  នៅក្នុង​រយៈពេល៣សប្ដាហ៍​នៃ​ខែធ្នូ ចុងឆ្នាំ២០២០កន្លងទៅនេះ ខេត្តកណ្តាល ទទួលបាន​គម្រោង​វិនិយោគ​បន្ថែម ពីលើ​គម្រោង​ចាស់​ដែលមាន​ស្រាប់​ចំនួន ៤គម្រោង ដែលមាន​ទំហំ​ទុន​សរុប​ជាង ១១៥លាន​ដុល្លារ និង​បង្កើត​ឱកាស​ការងារ​ជាង ២៣០០នាក់។

បន្ទាប់ពី​បាន​ពិនិត្យ ទៅលើ​សំណើ​របស់​ក្រុមហ៊ុន​ចំនួន៤ លើ​ការវិនិយោគ​នៅក្នុង​ស្រុក​ចំនួន២ នៃ​ខេត្តកណ្តាល រួមមាន​ស្រុក​ខ្សាច់កណ្តាល និង​ស្រុក​កៀនស្វាយ រាជរដ្ឋាភិបាល​កម្ពុជា តាមរយៈ​គណៈកម្មការ​វិនិយោគ​ក្រុមប្រឹក្សា​អភិវឌ្ឍន៍​កម្ពុជា បានសម្រេច​គាំទ្រ និង​អនុម័ត​ចុះបញ្ជី​ជា​ផ្លូវការ​ដោយ​ក្រុមហ៊ុន​ទាំងនោះ​រួមមាន ទី១- ក្រុមហ៊ុន SINOKH PERFECT GARMENT CO., LTD គម្រោង​បង្កើត​រោងចក្រ​កាត់ដេរ​សម្លៀកបំពាក់ ដែលមាន​ទីតាំង​វិនិយោគ​ស្ថិតនៅ​ភូមិ​សេ​ដា ឃុំ​វិហារ​សួគ៌ ស្រុក​ខ្សាច់កណ្តាល ខេត្តកណ្តាល មាន​ទុនវិនិយោគ​ប្រមាណ៥,៣លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ១.៥៣៣កន្លែង។

ទី២ ក្រុមហ៊ុន SING FU SUN (CAMBODIA) PLASTIC CO., LTD គម្រោង​បង្កើត​រោងចក្រ​ផលិត​ផលិតផល​ពី​ប្លា​ស្ទិ​ក (Preform, Cap, Bottle) ដែលមាន​ទីតាំង​វិនិយោគ​ស្ថិតនៅ​ភូមិ​ព្រែក​តាន​ប់២ ឃុំ​កំពង់ស្វាយ ស្រុក​កៀនស្វាយ ខេត្តកណ្តាល មាន​ទុនវិនិយោគ១១,៧លាន​ដុល្លារ​អាមេរិក និង​អាចបង្កើត​ការងារ​បាន​ចំនួន៥២កន្លែង។

ទី៣- ក្រុមហ៊ុន RUIZEXING CHEMICAL TECHNOLOGY CO., LTD គម្រោង​បង្កើត​រោងចក្រ​ផលិត​ថ្នាំ​កសិកម្ម ដែលមាន​ទីតាំង​វិនិយោគ ស្ថិតនៅ​ភូមិ​ព្រែកត្រែង ឃុំ​សំរោង​ធំ ស្រុក​កៀនស្វាយ ខេត្តកណ្តាល មាន​ទុនវិនិយោគ​ប្រមាណ ២០,១លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ១៧៤កន្លែង។

ទី៤- ក្រុមហ៊ុន INTER-MATTRID BEVERAGE (CAMBODIA) CO., LTD គម្រោង​បង្កើត​រោងចក្រ​ផលិត​ស្រា​បៀរ ដែលមាន​ទីតាំង​វិនិយោគ ស្ថិតនៅ​ភូមិ​ស្តៅ​កន្លែង២ ឃុំ​ដីឥដ្ឋ ស្រុក​កៀនស្វាយ ខេត្តកណ្តាល មាន​ទុនវិនិយោគ​ចំនួន ៧៨លាន​ដុល្លារ​អាមេរិក និង​អាចបង្កើត​ការងារ​បាន​ចំនួន ៥៥០កន្លែង៕