ដោយ ៖ រ៉ាណេត

ភ្នំពេញ ៖ ក្នុងរយៈពេល១១ខែឆ្នាំ២០២០កន្លងទៅនេះទំហំពាណិជ្ជកម្មទ្វេភាគីរវាងកម្ពុជា និងអង់គ្លេសសម្រេចបាន ៨១៣លានដុល្លារ ខណៈដែលកាលពីឆ្នាំ២០១៩ មានទំហំសរុបចំនួន១០៥៧លានដុល្លារ។

របាយការណ៍ដែលបង្ហាញដោយក្រសួងពាណិជ្ជកម្មនៅរសៀលថ្ងៃទី១៨ ខែធ្នូ ឆ្នាំ២០២០បានឱ្យដឹងថា នៅក្នុងរយៈពេល១១ខែកន្លងទៅនេះ ទំហំពាណិជ្ជកម្មកម្ពុជា-អង់គ្លេស មានទំហំសរុប ៨១៧លានដុល្លារ ដោយក្នុងនោះកម្ពុជានាំទៅអង់គ្លេសមានចំនួន ៧៦៦លានដុល្លារអាមេរិក ខណៈអង់គ្លេសនាំមកកម្ពុជាជាង៤៦លានដុល្លារតែប៉ុណ្ណោះ។ នៅឆ្នាំ២០១៩ សម្រេច ១,០៥៧ លានដុល្លារ ក្នុងនោះកម្ពុជានាំចេញទៅអង់គ្លេសមាន ជាង៩៧៧លានដុល្លារ និងអង់គ្លេសនាំមកម្ពុជា មានជិត៨០លានដុល្លារ។

តាមរយៈសេចក្តីប្រកាសព័ត៌មានរបស់ក្រសួងការបរទេស នៅព្រឹកថ្ងៃទី១៨ ខែធ្នូ ឆ្នាំ២០២០ បានឱ្យដឹងថា ចក្រភពអង់គ្លេស បានប្រកាសថានឹងមិនបន្តអនុវត្តការព្យួរមួយផ្នែកនៃប្រពន្ធ័អនុគ្រោះពន្ធរបស់សហភាពអឺរ៉ុប ក្នុងក្របខ័ណ្ឌប្រព័ន្ធអនុគ្រោះពន្ធលើគ្រប់មុខទំនិញទាំងអស់លើកលែងតែសព្វាវុធ (EBA) មកលើកម្ពុជាទៀតទេ។

លោកស្រី Tina Redshaw ឯកអគ្គរាជទូត វិសាមញ្ញនិងពេញសមត្ថភាពនៃចក្រភពអង់គ្លេសនិងអៀឡង់ខាងជើង មានប្រសាសន៍ថា ចាប់ពីថ្ងៃ ទី០១ ខែមករា ឆ្នាំ២០២១ តទៅ ចក្រភពអង់គ្លេសនឹងអនុវត្តនូវគោលនយោបាយពាណិជ្ជកម្មឯករាជ្យ។

លោកស្រីបានថ្លែងទៀតថា “រដ្ឋមន្ត្រីទាំងអស់របស់អង់គ្លេសបានសំរេចថានឹងមិនបន្តអនុវត្តការព្យួរមួយផ្នែកនៃប្រពន្ធ័អនុគ្រោះពន្ធរបស់ សហភាពអឺរ៉ុបក្នុងក្របខ័ណ្ឌប្រព័ន្ធអនុគ្រោះពន្ធលើគ្រប់មុខទំនិញទាំងអស់លើកលែងតែសព្វាវុធ មកលើកម្ពុជាទៀតទេ ដោយហេតុថា ចក្រភពអង់គ្លេសបានមើលឃើញពីផលប៉ះពាល់នៃជំងឺកូវីឌ-១៩ មកលើក្រុមមនុស្សងាយរងគ្រោះជាច្រើននៃសង្គមកម្ពុជា ដែលក្នុងនោះរួមមានទាំងកម្មកររោងចក្រផងដែរ”។

ចក្រភពអង់គ្លេស គឺជាដៃគូពាណិជ្ជកម្មដ៏សំខាន់មួយរបស់របស់ប្រទេសកម្ពុជា ក្នុងទីផ្សារអឺរ៉ុប។ កម្ពុជានាំចេញទំនិញទៅអង់គ្លេស ដូចជាសម្លៀកបំពាក់ ស្បែកជើង កង់ជិះ អង្ករ និងផលិតកសិកម្មផ្សេងទៀត៕

ដោយៈ រ៉ាណេត

ភ្នំពេញៈ រដ្ឋាភិបាលបានអនុម័តគម្រោងវិនិយោគថ្មីចំនួន៣ទៀត មានទុនសរុប ១៣,៥លានដុល្លារ ដែលអាចផ្តល់ឱកាសការងារបានជិត២០០០នាក់ បើទោះបីកម្ពុជាកំពុងប្រឈមបញ្ហាកូវីដ១៩ក្តី។

យោងតាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចជា ទី ១-ក្រុមហ៊ុន “LAK SUN (CAMBODIA) CO., LTD” គម្រោងបង្កើតរោងចក្រខារអំបោះគ្រប់ប្រភេទ ដែលមានទីតាំងវិនិយោគស្ថិតនៅភូមិជៃតាកូន ឃុំរកាកោះ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៣,២លានដុល្លារអាមេរិក និងអាចបង្កើតការងារបានចំនួន១៩៧កន្លែង។

ទី២-ក្រុមហ៊ុន “SINOKH PERFECT GARMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិសេដា ឃុំវិហារសួគ៌ ស្រុកខ្សាច់កណ្តាល ខេត្តកណ្តាល មានទុនវិនិយោគប្រមាណ៥,៣លានដុល្លារអាមេរិក និងអាចបង្កើតការងារបានចំនួន ១.៥៣៣កន្លែង។

ដោយឡែកតាមសំណើសុំវិនិយោគលើ គម្រោងបង្កើតរោងចក្រផលិតគ្រឿងសង្ហារឹម និងសម្ភារៈតុបតែងលម្អធ្វើអំពីឈើរបស់ក្រុមហ៊ុន DONGNAN (CAMBODIA) WOOD CO., LTD  គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គរ័ជី ខេត្តព្រះសីហនុ មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបានចំនួន ២២០កន្លែង៕

ដោយគង់ ម៉ាលីន

        ភ្នំពេញៈ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានអះអាងថា សម្តេចតេជោហ៊ុន សែននាយករដ្ឋមន្រ្តីនៃកម្ពុជា បានយល់ព្រមជាគោលការណ៍នៅក្នុងការបង្កើត “សភាកសិឧស្សាហកម្ម”នៅកម្ពុជាហើយ។

លោកវេង សាខុនរដ្ឋមន្រ្តីក្រសួងកសិកម្មបានមានប្រសាសន៍ឲ្យដឹងនៅព្រឹកថ្ងៃទី១៨ ធ្នូនេះថា តាមសេចក្តីជូនដំណឹងលេខ ១០៤០ សជណ.កឆ ចុះថ្ងៃទី០៣ ខែធ្នូ ឆ្នាំ២០២០ របស់ទីស្តីការគណ:រដ្ឋមន្រ្តីសម្តេចតេជោ បានយល់ព្រមឲ្យបង្កើត “សភាកសិឧស្សា​ហកម្មនៃព្រះរាជាណាចក្រកម្ពុជា”។

លោកបានបន្តថា ក្រោយទទួលបានការយល់ព្រមដ៏ខ្ពង់ខ្ពស់នេះ នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃសុក្រទី១៨ ខែធ្នូ ឆ្នាំ២០២០ លោក បានដឹកនាំកិច្ចប្រជុំបន្ទាន់មួយដើម្បីពិភាក្សា សុំយោបល់ និងផ្តល់ធាតុចូលសំខាន់ៗលើសេចក្តីព្រាងច្បាប់ស្តីអំពី “សភាកសិឧស្សាហកម្មកម្ពុជា” ធ្វើយ៉ាងណាឲ្យសេចក្តីព្រាងច្បាប់នេះ មានលក្ខណសុគតភាព ពេញលេញ គ្រប់ជ្រុងជ្រោយ និងអាចទទួលយកបានពីគ្រប់ភាគីពាក់ព័ន្ធ សំដៅបម្រើផលប្រយោជន៍ដ៏ជាក់លាក់ដល់ក្រុមហ៊ុន សមាគម សហគ្រិន សហព័ន្ធសហភាព សហគមន៍កសិកម្ម។ល។

លោកវេង សាខុនបានបន្ថែមថា ជាងនេះទៅទៀត សេចក្តីព្រាងច្បាប់នេះ អាចចាត់ទុកបានថាជាវិធានការគន្លឹះ និងចាំបាច់មួយសម្រាប់ដោះស្រាយបញ្ហាប្រឈមឲ្យ បានសមស្រប ទាន់ពេលវេលា និងមានប្រសិទ្ធភាព ស្របតាមទស្សនវិស័យរបស់រាជរដ្ឋាភិបាលក្នុងការធ្វើកំណែទម្រង់ស៊ីជម្រៅ ដើម្បីជម្រុញកំណើនសេដ្ឋកិច្ច ដែលបានដាក់ចេញកន្លងមក”។លោកបន្តថា “ពិតណាស់យន្តការដោះស្រាយបញ្ហានេះ សមស្របតាមបរិបទនៃវិបត្តិជំងឺឆ្លងកូវីដ-១៩ ដែលសមាជិកសភាកសិឧស្សាហកម្ម ត្រូវច្បាមយកកាលានុវត្តភាពនេះ ធ្វើជាឱកាសមាសសម្រាប់ធ្វើការអភិវឌ្ឍ ខ្សែច្រវ៉ាក់ផលិតកម្មកសិកម្ម ការធ្វើអាជីវកម្មរបស់ខ្លួនឲ្យកាន់តែរីកចម្រើន បង្កើតការងារ បង្កើនប្រាក់ចំណូលក្នុងគ្រួសារកសិ​ករ និងទ្រទ្រង់ខឿងសេដ្ឋកិច្ចជាតិ”។

កិច្ចប្រជុំដ៏មានសារសំខាន់នេះ ក៏មានវត្តមានតំណាងឲ្យក្រសួងពាណិជ្ជកម្ម លោកឧកញ៉ាអនុប្រធានសភាពាណិជ្ជកម្ម  ថ្នាក់ដឹកនាំអង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ លោកឧកញ៉ា អ្នកឧកញ៉ា ដែលជានាយកក្រុមហ៊ុន សមាគម សហគ្រិន សហព័ន្ធ សហភាពសហគមន៍ ដែលប្រតិបត្តិការលើវិស័យកសិកម្ម និងកសិឧស្សា​ហកម្ម៕

ដោយ ៖ រ៉ាណេត
ភ្នំពេញ៖ ថ្នាក់ដឹកនាំចក្រភពអង់គ្លេសបានសម្រេចប្រកាសពីគម្រោងនៃការលុបចោលលើការអនុវត្តព្យួរមួយផ្នែកនៃប្រពន្ធ័អនុគ្រោះពន្ធរបស់សហភាពអឺរ៉ុបក្នុងក្របខ័ណ្ឌប្រព័ន្ធអនុគ្រោះពន្ធលើគ្រប់មុខទំនិញទាំងអស់លើកលែងតែសព្វាវុធ (EBA) មកលើកម្ពុជាទៀតហើយ។

នៅក្នុងសេចក្ដីប្រកាសព័ត៌មានរបស់ក្រសួងការបរទេសនៅថ្ងៃទី១៨ ខែធ្នូ ឆ្នាំ២០២០នេះបានបញ្ជាក់ថា ចក្រភពអង់គ្លេសនឹងអនុវត្តនូវគោលនយោបាយពាណិជ្ជកម្មឯករាជ្យ ចាប់ពីដើមឆ្នាំ២០២១តទៅ ដោយចក្រភពអង់គ្លេសកំពុងរិះរកវិធី ដើម្បីបង្កើតកិច្ចសន្ទនាទៀងទាត់ជាមួយអាជ្ញាធរមានសមត្ថកិច្ចកម្ពុជាលើបញ្ហាផ្សេងៗពាក់ព័ន្ធនិងវិស័យសិទ្ធិមនុស្ស និងសេរីភាពផ្សេងៗទៀត។ នេះជាការលើកឡោះងរបស់លោកស្រី Tina Redshaw ឯកអគ្គរាជទូត វិសាមញ្ញនិងពេញសមត្ថភាពនៃចក្រភពអង់គ្លេសនិងអៀឡង់ខាងជើង។

រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន បានថ្លែងថា “រដ្ឋមន្ត្រីទាំងអស់របស់អង់គ្លេសបានសំរេចថានឹងមិនបន្តអនុវត្តការព្យួរមួយផ្នែកនៃប្រពន្ធ័អនុគ្រោះពន្ធរបស់ សហភាពអឺរ៉ុបក្នុងក្របខ័ណ្ឌប្រព័ន្ធអនុគ្រោះពន្ធលើគ្រប់មុខទំនិញទាំងអស់លើកលែងតែសព្វាវុធ មកលើកម្ពុជាទៀតទេ ដោយហេតុថា ចក្រភពអង់គ្លេសបានមើលឃើញពីផលប៉ះពាល់នៃជំងឺកូវីឌ-១៩ មកលើក្រុមមនុស្សងាយរងគ្រោះជាច្រើននៃសង្គមកម្ពុជា ដែលក្នុងនោះរួមមានទាំងកម្មកររោងចក្រផងដែរ”។

លោករដ្ឋមន្ត្រី ប្រាក់ សុខុន បានសម្តែងការកោតសរសើរយ៉ាងខ្លាំង ចំពោះការសំរេចចិត្តរបស់ចក្រភពអង់គ្លេសនេះ ដោយបានចាត់ទុកការសំរេចចិត្តនេះថា ជាការជំរុញ និងលើកទឹកចិត្តដល់រាជរដ្ឋាភិបាលកម្ពុជា ហើយថា ការសំរេចចិត្តនេះគឺពិតជាដំណឹងល្អសំរាប់កម្មករកម្ពុជានៅពេល ដែលពួកគេកំពុងទទួលរងផលប៉ះពាល់ពីមហន្តរាយនៃជំងឺកូវីដ-១៩។ កម្ពុជាប្ដេជ្ញាយ៉ាងមុតមាំ ក្នុងការកសាងទំនាក់ទំនង ដែលផ្តល់ផលប្រយោជន៍ទៅវិញទៅមកជាមួយចក្រភពអង់គ្លេសទាំងលើវិស័យទ្វេភាគី និងពហុភាគី៕

ដោយ៖ ប៊ី
អន្តរជាតិ៖ គម្រោងផ្លូវរថភ្លើងឡាវ-ចិន ដែលមានប្រវែង ៤២២.៤ គីឡូម៉ែត្រ ជាមួយនឹងការសាងសង់ផ្លូវរូងក្រោមដីប្រវែងជាង ១៩៨ គីឡូម៉ែត្រ និងស្ពានប្រវែង ៦២ គីឡូម៉ែត្រ គ្រោងនឹងបញ្ចប់ និងបើកឱ្យប្រើប្រាស់នៅខែធ្នូ ឆ្នាំ២០២១ ខណៈគម្រោងនេះនឹងធ្វើឱ្យប្រទេសឡាវបង្កើនការតភ្ជាប់ក្នុងតំបន់កាន់តែប្រសើរ។

លោក Xiao Qianwen អគ្គនាយកក្រុមហ៊ុនផ្លូវដែកឡាវ-ចិនបាននិយាយថា គិតត្រឹមថ្ងៃទី១០ ខែធ្នូ ការងារផ្លូវរូងក្រោមដី និងស្ពានបានបញ្ចប់ប្រហែល ៩៥ ភាគរយ ខណៈផ្លូវដែកបានបញ្ចប់ ៤១,៣ ភាគរយ។

ផ្លូវដែកប្រវែង ៤២២.៤ គីឡូម៉ែត្រ ដែលតភ្ជាប់ពីទីក្រុងវៀងចន្ទន៍ទៅព្រំដែនចិន ឆ្លងកាត់ខេត្តវៀងច័ន្ទ ហ្លួងប្រាបាង ខេត្ត Oudomxay និងហ្លួងណាមថា ដោយឆ្លងកាត់ផ្លូវរូងក្រោមដីចំនួន ៧៥ ដែលមានប្រវែងសរុប ១៩៧.៨៣ គីឡូម៉ែត្រ។

នេះបើយោងតាមក្រុមហ៊ុនផ្លូវដែកឡាវ-ចិន។
លោក Xiao បានឱ្យដឹងថា ការសាងសង់ផ្លូវដែកតម្លៃ ៥,៩៨ ពាន់លានដុល្លារអាមេរិក (៣៧,៤ពាន់លានយ័ន) នេះ បានចាប់ផ្តើមនៅខែធ្នូ ឆ្នាំ២០១៦ ហើយគ្រោងនឹងបញ្ចប់និងបើកឱ្យប្រើប្រាស់នៅខែធ្នូ ឆ្នាំ២០២១។

ផ្លូវដែកឡាវ-ចិនគឺជាផ្នែកយុទ្ធសាស្ត្រមួយនៃគំនិតផ្តួចផ្តើមខ្សែក្រវ៉ាត់និងផ្លូវរបស់ប្រទេសចិន ហើយផែនការរបស់រដ្ឋាភិបាលក្នុងការប្រែក្លាយប្រទេសឡាវមានទំនាក់ទំនងនៅក្នុងតំបន់កាន់តែខ្លាំង។

នៅពេលដំណើរការ ផ្លូវដែកនេះនឹងកាត់បន្ថយថ្លៃដើមដឹកជញ្ជូនឆ្លងកាត់ភាគពាយព្យប្រទេសឡាវពី ៣០ ទៅ ៤០ ភាគរយ បើប្រៀបធៀបទៅនឹងការដឹកជញ្ជូនតាមផ្លូវគោក។

ផ្លូវដែកមានប្រវែង ៤២២.៤ គីឡូម៉ែត្ររត់ពីច្រកព្រំដែនប៊ិនថេននៅភាគខាងជើងប្រទេសឡាវជាប់នឹងប្រទេសចិនទៅទីក្រុងវៀងចន្ទន៍ ដោយរថភ្លើងមានល្បឿនអតិបរមា ១៦០ គីឡូម៉ែត្រក្នុងមួយម៉ោង។

រដ្ឋាភិបាលជឿជាក់ថា ផ្លូវដែកនេះ នឹងជំរុញការអភិវឌ្ឍសេដ្ឋកិច្ចសង្គមនិងធ្វើឱ្យប្រទេសឡាវមានការរីកចម្រើនកាន់តែខ្លាំងឡើង។
កាលពីថ្មីៗនេះ រដ្ឋាភិបាលឡាវ និងក្រុមហ៊ុនផ្លូវដែកឡាវ-ចិន (Laos-China Railway) ចិន បានចុះហត្ថលេខាលើអនុស្សរណៈនៃការយោគយល់គ្នាស្តីពីការអភិវឌ្ឍតំបន់ជុំវិញស្ថានីយ៍រថភ្លើងក្នុងរាជធានីវៀងចន្ទន៍ និងហ្លួងព្រះបាងក្នុងគោលបំណងជំរុញឧស្សាហកម្មនិងភ័ស្តុភារ។

កិច្ចព្រមព្រៀងត្រូវបានចុះហត្ថលេខានៅទីក្រុងវៀងចន្ទន៍កាលពីថ្ងៃសុក្រ (ថ្ងៃទី ១១ ខែធ្នូ) រវាងអនុរដ្ឋមន្រ្តីក្រសួងផែនការនិងវិនិយោគ លោក Khamchan Vongsenboun អគ្គនាយកក្រុមហ៊ុនផ្លូវដែកឡាវ-ចិនលោក Xiao Qianwen និងតំណាងនៃតំបន់ទាំង ៤ ដែលពាក់ព័ន្ធ។

ការចុះហត្ថលេខានេះ ត្រូវបានធ្វើជាសាក្សីដោយ អនុរដ្ឋមន្រ្តីក្រសួងសាធារណការនិងដឹកជញ្ជូនលោកបណ្ឌិត Viengsavath Siphandone អនុរដ្ឋមន្រ្តីក្រសួងកសិកម្មនិងរុក្ខាប្រមាញ់លោក Thongphat Vongmany អនុរដ្ឋមន្រ្តីក្រសួងធនធានទឹកនិងបរិស្ថានលោក Bounmy Phouttongong និងភ្ញៀវដទៃទៀត។

លោក Xiao Qianwen បានមានប្រសាសន៍ថា ការអភិវឌ្ឍតំបន់ជុំវិញស្ថានីយ៍រថភ្លើងទាំងនេះនឹងទាញសក្តានុពលនៅក្នុងទីតាំងទាំងនេះ សម្រាប់ការរីកចម្រើននៃឧស្សាហកម្មដឹកជញ្ជូនភ័ស្តុភារពាណិជ្ជកម្ម និងសេដ្ឋកិច្ចក្នុងស្រុក៕

ដោយៈ សុខុម

អន្តរជាតិៈ រដ្ឋាភិបាល​អង់គ្លេស បានចាប់ផ្ដើម​ចរចា​ជាមួយ​ក្រុមហ៊ុន​អគ្គិសនី​បារាំង EDF (Électricité de France) ជុំវិញ​គម្រោង​សាងសង់​រោងចក្រ​ថាមពលនុយក្លេអ៊ែរ​មួយ ក្នុង​ទំហំ​ទឹកប្រាក់​វិនិយោគ២០ពាន់​លាន​ផោន ដែល​ស្មើនឹង២៦,៨ពាន់​លាន​ដុល្លារ​អាមេរិក នៅ​តំបន់​សាប់​ហ្វូ​ល (Suffolk) ប្រទេស​អង់គ្លេស។

គម្រោង​រោងចក្រ​ថាមពលនុយក្លេអ៊ែរ ដែលមាន​ឈ្មោះថា Sizewell C នេះ នឹង​ផលិត​អគ្គិសនី បាន​រហូតដល់​ទៅ៣,២ជី​ហ្គា​វ៉ា​ត់ ដែល​នឹង​ផ្គត់ផ្គង់​បាន៧%នៃ​តម្រូវការ​ថាមពល​សរុប​របស់​អង់គ្លេស។

ប៉ុន្តែ​គម្រោង​នេះ បាន​បង្ក​ភាពចម្រូងចម្រាស់ ជាមួយ​ក្រុម​អ្នកធ្វើ​យុទ្ធនាការ ដោយ​ពួកគេ​លើកឡើងថា វា “ថ្លៃ​ហួស​គួរឱ្យ​អស់សំណើច” ។

រដ្ឋាភិបាល​និយាយថា “រាល់​កិច្ចព្រមព្រៀង​ត្រូវ​ឆ្លងកាត់​ដំណើរការ​អនុម័ត ដ៏​ហ្មត់ចត់​លើ​ចំណុចសំខាន់ៗដូចជា ទំហំ​ទឹកប្រាក់ និង​លទ្ធភាព​ដែល​អាចទៅរួច” ។

រដ្ឋាភិបាល​បាន​បន្តថា ការចរចា​នឹង​ពឹង​ផ្អែកលើ​វឌ្ឍនភាព នៃ​រោងចក្រ​ថាមពលនុយក្លេអ៊ែរ Hinkley Point C នៅ​តំបន់​សូ​មឺ​សិត (Somerset) ប្រទេស​អង់គ្លេស ដែល​កំពុង​ស្ថិតក្រោម​ដំណើរការ​សាងសង់ ដោយ​ក្រុមហ៊ុន​អគ្គិសនី​បារាំង​EDF សហការ​ជាមួយ​ក្រុមហ៊ុន​ថាមពលនុយក្លេអ៊ែរ​ចិន China General Nuclear Power ។

រដ្ឋាភិបាល​អង់គ្លេស តែងតែ​ប្រកាន់​ជំហរ​ច្បាស់​រហូតមក​ថា ខ្លួន​នៅតែ​ប្ដេជ្ញាចិត្ត​លើ​គម្រោង​សាងសង់​រោងចក្រ​ថាមពលនុយក្លេអ៊ែរថ្មីៗ ដើម្បី​សម្រេច​គោលដៅ​កាត់បន្ថយ​ការ​បំ​ភាយ​ឧស្ម័ន​កាបូ​និក ទៅក្នុង​បរិយាកាស​ឱ្យមក​នៅ​កម្រិត​សូន្យ​ត្រឹម​ឆ្នាំ២០៥០ ៕