ដោយៈ រ៉ាណេត

ភ្នំពេញៈ រាជរដ្ឋាភិបាលកម្ពុជា តាមរយៈក្រសួងធនធានទឹក និងឧតុនិយមបានអនុញាតឱ្យធនាគារអភិវឌ្ឍន៍អាស៊ី ដឹកនាំបណ្តាលស្ថាប័នស្រាវជ្រាវធំៗល្បីល្បាញ ផ្នែកគ្រប់​គ្រងវិស័យធនធានទឹក ក្នុងពិភពលោកធ្វើការស្រាវជ្រាវអាងទន្លេ និងប្រព័ន្ធធារាសាស្ត្រមួយចំនួននៅកម្ពុជា ដែលក្នុងរួមមានខេត្តចំនួនក្រុងចំនួន៤ដែលនឹងត្រូវសិក្សា។

លោកចាន់ ស៊ីណាត អនុរដ្ឋលេខាធិការ នៃក្រសួងធនធានទឹក និងឧតុនិយម បានមានប្រសាសន៍នៅព្រឹកថ្ងៃទី១៦ ខែធ្នូ ឆ្នាំ២០២០នេះថា នៅក្នុងការសិក្សាស្រាវជ្រាវពីសំណាក់បណ្តាស្ថាប័នធំៗ និងល្បីនៅលើសាកលលោកនេះ នឹងមានការចង់ក្រងជាឯកសារសំខាន់អំពីទិន្នន័យ ដោយប្រើប្រាស់ទិន្នន័យ ដែលថែរក្សាទុករយៈពេលយូររបស់ក្រសួងធនធានទឹក និងឧត្តុនិយម។

លោក ចាន់ ស៊ីណាត ដែលជានាយកគម្រោងនៃ PMU-ADB and WB MOWRAM បានប្រាប់ឱ្យដឹងថា ការធ្វើការត្រួតពិនិត្យ និងធ្វើការវាយតម្លៃ លើលទ្ធផលសិក្សាស្រាវ​ជ្រាវលើWater Accounting នៅក្នុងតំបន់អាងទន្លេទាំងអស់របស់ប្រទេសកម្ពុជា និង Water Productivity នៅក្នុងតំបន់ប្រព័ន្ធធារាសាស្រ្តអាងកំពីងពួយ ក្នុងខេត្តបាត់ដំបង នៅក្នុងតំបន់ប្រព័ន្ធធារាសាស្រ្តព្រែកពោធិ ក្នុងខេត្តកំពង់ចាម នៅក្នុងតំបន់ប្រព័ន្ធធារាសាស្រ្តប្រព័ន្ធប្រឡាយលេខ១៥ ក្នុងខេត្តតាកែវ និងតំបន់ប្រព័ន្ធធារាសាស្រ្តស្ទឹងជីនឹត ក្នុងខេត្តកំពង់ធំ នាពេលកន្លងមករបស់បណ្តាស្ថាប័នទាំងអស់ខាងលើ ដែលបានសហប្រតិបត្តិការល្អជាមួយនឹង ក្រសួងធនធានទឹក និងឧតុនិយម MOWRAM និងក្រសួងសេដ្ឋកិច្ច និងហិរញ្ញវត្ថុ MEF។

ជាមួយគ្នានេះ លោកក៏បានស្នើ និងណែនាំឱ្យ ADB និងបណ្តាស្ថាប័ន្ធស្រាវជ្រាវសំខាន់ៗក្នុងពិភពលោកខាងលើ ធ្វើការប្រមូលទិន្នន័យដើម Raw Data and Information ឲ្យបានគ្រប់គ្រាន់ មុននឹង Run Software Modelling, Computer Computing and Writing ត្រូវជៀសវាងប្រើតែការ Estimating Remote Sensing Settelize and Emerge ជាពិសេសត្រូវតែប្រើប្រាស់ទិន្នន័យដែលថែរក្សាទុករយៈពេលយូររបស់ក្រសួងធនធានទឹក និងឧតុនិយមជាកំហិត។

សម្រាប់អាងទន្លេ និងក្នុងបណ្តាប្រព័ន្ធធារាសាស្រ្ត ដែលនឹងត្រូវសិក្សាស្ថិតក្នុងខេត្តកំពង់ចាម ខេត្តបាត់ដំបង ខេត្តកំពង់ធំ និងក្នុងខេត្តតាកែវ ក្នុងកម្រិត៣០ម៉ែត្រ Spatial Resolutions ក្នុងនោះនឹងត្រូវធ្វើឯកសារមួយចំនួន ទី១ធ្វើផែនទី Evapotranspiration ២- ធ្វើផែនទី Biomass Productions និង៣ ធ្វើផែនទី Crop Water Productivity៕

ដោយៈសុខុម

កង់បេរ៉ា: ប្រទេសអូស្ត្រាលីបានប្រកាសគួរឱ្យភ្ញាក់ផ្អើល កាលពីថ្ងៃទី១៦ ធ្នូនេះថា ខ្លួននឹងប្ដឹងទៅអង្គការពាណិជ្ជកម្មពិភពលោក (WTO) ឱ្យបើកការស៊ើបអង្កេតរឿងប្រទេ​សចិន យកពន្ធខ្ពស់កប់ពពកលើការនាំចូលស្រូវបាឡេ (Barley) ដែលបង្កឱ្យមានភាពតានតឹងកាន់តែខ្លាំងរវាងប្រទេសទាំងពីរ។ នេះបើយោងតាមសារព័ត៌មាន CNA ចុះផ្សាយក្នុងថ្ងៃដដែល។

លោក Simon Birmingham រដ្ឋមន្ត្រីពាណិជ្ជកម្មអូស្ត្រាលី ជាអ្នកប្រកាសសេចក្ដីសម្រេចចិត្តនេះ ដោយលើកឡើងថា ការយកពន្ធ៨០% ដោយរដ្ឋាភិបាលក្រុងប៉េកាំង លើការនាំចូលស្រូវបាឡេពីប្រទេសអូស្ត្រាលី ជាចំណាត់ការ “ខ្វះមូលដ្ឋាន” ហើយ “គ្មានអង្គហេតុ និងភ័ស្តុតាង”។

លោកបានបន្ថែមថា “អូស្រ្តាលីអាចនឹងមានវិធានការស្រដៀងគ្នាដែរ នៅក្នុងវិស័យផ្សេងទៀត”។

ទំនាក់ទំនងរវាងប្រទេសអូស្រ្តាលី និងប្រទេសចិន បានធ្លាក់ដល់កម្រិតទាបបំផុត ចាប់តាំងពីមានព្រឹត្តិការណ៍បង្ក្រាប នៅទីលានធានអានមិន (Tiananmen Square) ក្នុងឆ្នាំ១៩៨៩ ដោយរដ្ឋាភិបាលក្រុងប៉េកាំង បានដាក់ទណ្ឌកម្មសេដ្ឋកិច្ច ជាបន្តបន្ទាប់មកលើផលិតផលរបស់អូស្ត្រាលី។

រដ្ឋមន្ត្រីពាណិជ្ជកម្មអូស្ត្រាលី បានគូសបញ្ជាក់ថា “យើងមានជំនឿចិត្តយ៉ាងមុតមាំដែលផ្អែកលើភ័ស្តុតាង ទិន្នន័យ និងការវិភាគ ដែលយើងបានប្រមូលចងក្រងថា ប្រទេសអូស្ត្រាលី ជាករណីដ៏ច្បាស់ក្រឡែតមួយដែលស្ទើរមិនគួរឱ្យជឿ”។

ការនាំចេញស្រូវបាឡេរបស់អូស្រ្តាលី ទៅកាន់ប្រទេសចិន មានទំហំទឹកប្រាក់ប្រមា​ណ១ពាន់លានដុល្លារអាមេរិក ក្នុងមួយឆ្នាំ មុនពេលជួបគ្រោះរាំងស្ងួតកាលពីពេលថ្មីៗនេះ ហើយភាគច្រើនត្រូវបានប្រើប្រាស់ដើម្បីផលិតស្រាបៀរ។

ក្រុមអ្នកជំនាញនិយាយថា រដ្ឋាភិបាលក្រុងប៉េកាំង បានពិចារណារឹតបន្តឹងការនាំចូលស្រូវបាឡេរបស់អូស្រ្តាលី ចាប់តាំងពីឆ្នាំ២០១៨ ស្របពេលមានការព្រួយបារម្ភថា ប្រទេសចិន ពឹងផ្អែកលើការនាំចូលខ្លាំងពេក៕

ដោយៈ រ៉ាណេត

ព្រះសីហនុៈ កំពង់ផែក្រុងព្រះសីហនុ គ្រោងនឹងប្រើប្រព័ន្ធផ្លាស់ប្ដូរទិន្នន័យអេឡិចត្រូនិកថ្មី (Port EDI) ដែលអាចជួយសម្រួលដល់នីតិវិធីចេញ ចូលរបស់នាវាធំៗផ្ទុកទំនិញធុនធ្ងន់រហូតដល់ប្រមាណ៦ម៉ឺនតោន ស្មើនឹងប្រមាណ៩៣ភាគរយ នៃចំនួននាវាប្រចាំតំបន់អាស៊ី-ប៉ាស៊ីហ្វិក។

រដ្ឋលេខាធិកាក្រសួងសាធារណការ និងដឹកជញ្ជូន លោករស់ វណ្ណា បានមានប្រ សាសន៍ឲ្យដឹង នៅថ្ងៃទី១៥ ខែធ្នូ ឆ្នាំ២០២០ថា ការប្រើប្រាស់ប្រព័ន្ធព័ត៌មានវិទ្យា Port EDI ក្នុងការជួយសម្រួលដល់នីតិវិធីចេញ- ចូលកំពង់ផែកម្ពុជា សម្រាប់នាវាដឹកជញ្ជូនទំនិញអន្តរជាតិធំៗ សំដៅគ្រប់គ្រងសេវាដឹកជញ្ជូនតាមផ្លូវទឹក ប្រកបដោយប្រសិទ្ធភាព តម្លាភាព ចំណេញពេលវេលា និងកាត់បន្ថយការចំណាយផ្សេងៗ ជាពិសេសបង្កើនការទាក់ទាញការវិនិយោគផ្ទាល់ពីបរទេស និងបង្កើតការងារធ្វើជូនពលរដ្ឋកម្ពុជាផងដែរ។

លោកបញ្ជាក់ថា “គម្រោងPort EDIដែលជួយឱ្យការធ្វើជំនួញ តាមផ្លូវទឹកមានប្រសិទ្ធភាព និងតម្លាភាពកាន់តែខ្ពស់នេះ គឺជាគម្រោងជំនួយរបស់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន។ ក្រៅពីនេះ ក៏មានការផ្តល់ជំនួយផ្នែកហិរញ្ញវត្ថុ និងបច្ចេកទេសផងដែរ”។

ជាមួយនឹងគម្រោងនៃការអនុវត្ត ការប្រើប្រាស់ប្រព័ន្ធផ្លាស់ប្ដូរទិន្នន័យអេឡិចត្រូនិកថ្មី (Port EDI)  កម្ពុជាក៏គ្រោងនឹងពង្រីកសមត្ថភាព កំពង់ផែស្វយ័តក្រុងព្រះសីហនុបន្ថែមទៀត តាមរយៈការកសាងចំណតផែកុងតឺន័រថ្មីមួយ ដែលមានជម្រៅទឹក១៤,៥ម៉ែត្រ ប្រវែង៣៥០ម៉ែត្រ ដែលនឹងធានាដល់ការចូលចតនាវាដឹកកុងតឺន័រខ្នាតធំៗ មានចំណុះរហូតដល់ទៅ៦០.០០០តោនឬស្មើនឹង៩៣ភាគរយ នៃចំនួននាវាប្រចាំតំបន់អាស៊ី-ប៉ាស៊ីហ្វិកនៅដើមឆ្នាំ២០២៣ ដើម្បីឆ្លើយតបទៅនឹងការកើនឡើង នៃបរិមាណកុងតឺន័រ ឆ្លងកាត់កំពង់ផែមួយនេះ ក្នុងពេលបច្ចុប្បន្ន និងនាពេលអនាគត ដែលនឹងក្លាយទៅជាកំពង់ផែលំដាប់ថ្នាក់ខ្នាតមធ្យម ដែលនឹងមានបរិមា ណកុងតឺន័រឆ្លងកាត់លើសពី១លានTEUsក្នុងមួយឆ្នាំ។

ដោយឡែកសម្រាប់តម្លៃដឹកជញ្ជូនតាមសមុទ្រនៅកម្ពុជា នឹងកាន់តែចុះទាបប្រហា​ក់ប្រហែល នឹងថ្លៃដឹកជញ្ជូនតាមសមុទ្រនៃប្រទេសជិតខាង ដោយកន្លែងចំណតកំពង់ផែ ជាច្រកសេដ្ឋកិច្ចជាតិមួយយ៉ាងសំខាន់ ក្នុងការដោះដូរទំនិញ ផលិតផលកសិកម្មនិងកសិ-ឧស្សាហកម្មរបស់កម្ពុជា ទៅកាន់ទីផ្សារអន្តរជាតិផងដែរ៕

ដោយៈ រ៉ាណេត

ភ្នំពេញៈ រដ្ឋាភិបាលកម្ពុជាបានបង្ហាញ ពីគម្រោងសាងសង់ផ្លូវដែកថ្មីចំនួនខ្សែទៀត សម្រាប់តភ្ជាប់ពីព្រលានយន្ដហោះអន្តរជាតិភ្នំពេញថ្មី ចូលមកកាន់រាជធានីភ្នំពេញដើម្បីសម្រួលការដឹកជញ្ជូន បញ្ចៀសការកកស្ទះចរាចរណ៍។

ប្រធាននាយកដ្ឋានព័ត៌មាវិទ្យា និងទំនាក់ទំនងសាធារណៈនៃក្រសួងសាធារណៈការ និងដឹកជញ្ជូន លោក ហ៊ាង សុទ្ធាយុត្តិ បានមានប្រសាសន៍ប្រាប់គេហទំព័រ Property Area Asia នៅព្រឹកថ្ងៃទី១៦ ខែធ្នូ ឆ្នាំ២០២០នេះថា គម្រោងសាងសង់ផ្លូវដែកតភ្ជាប់ពីព្រលានយន្តហោះអន្តរជាតិ-ភ្នំពេញថ្មី មកកាន់រាជធានីភ្នំពេញ ត្រូវបានលើកឡើងដោយរដ្ឋមន្ត្រីក្រសួងសាធារណៈការ និងដឹកជញ្ជូនស៊ុន ចាន់ថុលកាលពីពេលកន្លងទៅ។

លោកបន្តថា “គម្រោងនេះ គឺជាទស្សនៈវិស័យរបស់ថ្នាក់ដឹកនាំ ដើម្បីចូលរួមចំណែ​កកាត់បន្ថយតម្លៃដឹកជញ្ជូន កាត់បន្ថយគ្រោះថ្នាក់ចរាចរណ៍”។ លោកបន្តថា “មកទល់ពេលនេះគម្រោងនេះ មិនទាន់ត្រូវបានសិក្សាលម្អិតនៅឡើយនោះទេ។ ក្រសួងក៏ដូចរាជរដ្ឋាភិបាល កំពុងសម្លឹងរកដៃគូដើម្បីចូលរួមសិក្សាលម្អិត និងអនុវត្តគម្រោងនេះ”។

ពាក់ព័ន្ធទៅនឹងការលើកឡើង ពីគម្រោងនៃការសាងសង់ផ្លូវដែក តភ្ជាប់ពីព្រលានយន្ដហោះអន្តរជាតិភ្នំពេញថ្មី មកកាន់រាជធានីភ្នំពេញ ដូចដែលបានលើកឡើងខាងលើនេះ សាធារណជនមួយចំនួនបានបង្ហាញពីក្ដីបារម្ភ និងលើកជាសំណូមពរថា ប្រសិនបើគម្រោងសាងសង់ផ្លូវដែកនេះ ត្រូវបានអនុវត្តគួរណាស់កុំប្រើផ្លូវដែកបែបបុរាណ ដែលអាចបង្កជាគ្រោះថ្នាក់ និងគ្មានសុវត្ថិភាព ផាសុកភាពនោះទេ ដែលជាបទពិសោធន៍ផ្លូវដែកតភ្ជាប់ពីព្រលានយន្តហោះពោធិ៍ចិនតុង មកកាន់រាជធានីភ្នំពេញ ដែលទើបត្រូវបានរុះរើចេញវិញកាលពីពេលកន្លងទៅថ្មីៗនេះ ដែលក្រៅពីមិនអាចសម្រួលការដឹកជញ្ជូន ការធ្វើដំណើរ ថែមទាំងខាតបង់ថវិការរបស់រដ្ឋថែមទៀត៕

ដោយៈ​ម៉ា​ណេ​ត

ភ្នំពេញៈ គេហទំព័រ Cambodiafinancialtimes.com និង​ហ្វេ​ក​ប៊ុ​ក​ផេ​ក​ផ្លូវការ Cambodia Financial Times នឹង​ចាប់ផ្តើម​ផ្សព្វផ្សាយ​វីដេអូ ទាក់ទង​នឹង​ចំណេះដឹង និង​ព័ត៌មាន​ហិរញ្ញវត្ថុ អចលនទ្រព្យ​នៅ​ដើមឆ្នាំ២០១២១ខាងមុខនេះ។

ការផលិត​វីដេអូថ្មីៗ នឹង​ផ្តោតលើ​មាតិកាសំខាន់ៗរបស់គេ​ទំព័រ​នេះ រួមមាន​វិស័យ​ធនា​ការ មីក្រូហិរញ្ញវត្ថុ អចលនទ្រព្យ ធានារ៉ាប់រង ផ្សា​រមូល​ប​ត្រ និង​វិស័យ SMEs ជាដើម។

លោក​ស៊ុំ ម៉ា​ណេ​ត និ​ព​ន្ឋ​នាយក​គេហទំព័រ​នេះ ដែល​ធ្លាប់​បំពេញការងារ​នៅ​សារ​ព៌​ត​មាន Phnom Penh Post, Khmer Times ជាច្រើន​ឆ្នាំ​បាន​មានប្រសាសន៍ថា គោលបំណង​នៃ​ការផលិត​វីដេអូ​ថ្មី​របស់គេ​ទំព័រ Cambodiafinancialtimes.com គឺ​ដើម្បី​ចូល​ចំណែក​ផ្សព្វផ្សាយ​ព័ត៌មានថ្មីៗ ទាក់ទង​នឹង​ទិដ្ឋភាព​សេដ្ឋកិច្ច​ទូទៅ ពិសេស​វិស័យ​ធនាគារ និង​ហិរញ្ញវត្ថុ​នៅ​កម្ពុជា អចលនទ្រព្យ និង​ចំណេះដឹងថ្មីៗទាក់ទង​នឹង​ហិរញ្ញវត្ថុ ដោយ​យើង​សង្ឃឹមថា ការចូលរួម​ទាំងនេះ​នឹង​ក្លាយជា ធាតុ​ចូល​សំខាន់ សម្រាប់​ប្រជាជន​កម្ពុជា​យក​ធ្វើ​មូលដ្ឋាន​នៃ​ការគិត​ក្នុង​ជីវិត​រស់នៅ​ប្រចាំថ្ងៃ។

លោក​បន្តថា ហេតុនេះហើយ ក្រុមការងារ​គេហទំព័រ​យើងខ្ញុំ បានសម្រេច​ចិត្ត​រួមគ្នា ដើម្បី​ផលិត​វីដេអូ​ព័ត៌មាន និង​ចំណេះដឹងថ្មីៗ ដើម្បី​បម្រើ​ជូន​ប្រជាពលរដ្ឋ​កម្ពុជា​សំរាប់​ប្រើប្រាស់​ជា​ចំណេះដឹង ដែល​អាច​យកទៅ​វិភាគ​ពិចារណា និង​ប្រើប្រាស់​ក្នុង​ជីវិត​ប្រចាំថ្ងៃ ក៏ដូចជា​ប្រើប្រាស់​ជា​ព៌​ត​មាន ដែល​អាច​ទុកចិត្តបាន មុន​សម្រេចចិត្ត​លើ​ការវិនិយោគ​អ្វីមួយ។

គេហទំព័រ Cambodiafinancialtimes.com ទើបតែ​ចាប់ផ្តើម​បោះ​ជំ​ហ៊ាន ក្នុង​វិស័យ​ព័ត៌មាន​នៅ​កម្ពុជា ប៉ុន្តែ​យើង​មាន​ធនធានមនុស្ស ដែលមាន​ចំណេះដឹង ជំនាញ បទពិសោធន៍​ខ្ពស់។

លោក​ស៊ុំ ម៉ា​ណេ​ត បាន​បន្តថា “យើង​ទៅមុខ​ជាមួយ​ចំណេះដឹង និង​ចក្ខុវិស័យ​ច្បាស់លាស់ ដើម្បី​ជាការ​តបស្នង​ដល់​សង្គម។ យើង​ស្វាគមន៍​ការរួមបញ្ចូល​នូវ​មូលធន​បញ្ញា តាមរយៈ​ការរិះគន់​ប្រកបដោយ​ស្ថាបនា ហើយ​យើង​រីករាយ​ធ្វើការ​ជាមួយ​អ្នក​ធុរកិច្ច​នានា ដើម្បី​ផ្សព្វផ្សាយ​ពី​គុណ​តម្លៃ និង​សេវាកម្ម​របស់​ពួកគេ” ។

ជាមួយគ្នានេះ យើង​ឈរលើ​មូលដ្ឋាន​ជោគជ័យ និង​ឈ្នះ ឈ្នះ​ទាំងអស់គ្នា ជា​អ្វីដែល​យើង​ទន្ទឹងរង់ចាំ​ជាមួយ​សេវាកម្ម និង​ការគាំទ្រ​ពីស​ម្តេច ឯកឧត្តម លោកជំទាវ អ្នកឧកញ៉ា លោក​ឧកញ៉ា​ទាំងអស់​ដោយ​ក្តី​រីករាយ៕