ប្រធាន GRA អំពាវនាវឱ្យអតិថិជនប្រើសេវាកម្មរបស់ភ្នាក់ងារអចលនវត្ថុអាជីពជៀសវាងជួបហានិភ័យ

ដោយៈ រ៉ាណេត

ភ្នំពេញៈ ប្រធានសមាគមអចលនទ្រព្យសកល (GRA) លោក សំ សុខនឿន បានធ្វើការអំពាវនាវដល់អតិថិជន ក៏ដូចជាសាធារណៈជនទូទៅដែលមានបំណងទិញ-លក់អចលនវត្ថុ គួរតែប្រើប្រាស់សេវារបស់ក្រុមហ៊ុនភ្នាក់ងារអាជីពស្របច្បាប់ ដែលមានអាជ្ញាប័ណ្ណត្រឹមត្រូវទទួលស្គាល់ពីក្រសួងពាក់ព័ន្ធ ជៀសវាងជួបហានិភ័យ ឬខាតបង់ដោយប្រការណាមួយ។

លោកប្រធានសមាគមអចលនទ្រព្យសកល និងជាប្រធានក្រុមហ៊ុន Kw Sam Sn Realty បានលើកឡើងថា ដោយសារតែវិស័យអចលនទ្រព្យមានភាពទូលាយ និងមានឱកាសខ្ពស់ ក្នុងការទទួលបានចំណូលបានជំរុញ ឱ្យមនុស្សជាច្រើនចាប់អារម្មណ៍ចូលមកប្រឡូកនៅក្នុងវិស័យមួយនេះ ដែលក្នុងនោះមានទាំងអ្នកវិនិយោគ អ្នកអភិវឌ្ឍន៍ ជាពិសេសអ្នកបម្រើសេវាកម្មក្នុងនាមជាភ្នាក់ងារ។

លោកសំ សុខនឿន បានមានប្រសាសន៍ថា “នៅក្នុងទីផ្សារអចលនទ្រព្យកម្ពុជានាពេលបច្ចុប្បន្ននេះ មានការបង្កើតជាក្រុមហ៊ុន ជាក្រុមការងារ ក៏ដូចជានីតិបុគ្គលក្នុងនាមជាអ្នកផ្តល់សេវាក្នុងការទិញ-លក់ និងជួល ដើម្បីទទួលបានចំណូលតាមរយៈកម្រៃជើងសារ” ។ លោកបន្តថា “ប៉ុន្តែអ្វីដែលសំខាន់ នៅក្នុងចំណោមអ្នកទាំងអស់នោះ មានអ្នកខ្លះអនុវត្តស្របតាមក្រមសីលធម៌ មានវិជ្ជាជីវៈ និងមានអាជ្ញាប័ណ្ណទទួលស្គាល់ ដោយក្រសួងត្រឹមត្រូវ ហើយក៏មានអ្នកខ្លះអនុវត្តទីផ្សារ ទាំងដែលមិនអាជ្ញាប័ណ្ណផងដែរ ដែលអាចធ្វើឱ្យអតិថិជនរបស់ខ្លួនជួបហានិភ័យ ខាតបង់ខ្ពស់បំផុត” ។

លោកបានបន្តថា គុណសម្បត្តិនៃការប្រើប្រាស់សេវាកម្ម របស់ក្រុមហ៊ុនភ្នាក់ងារដែលមានអាជ្ញាប័ណ្ណត្រឹមត្រូវ ប្រកបដោយក្រមសីលធម៌ និងវិជ្ជាជីវៈ ក្រោមការទទួលបានកិច្ចបណ្តុះបណ្តាលចំណេះដឹង ជំនាញទីផ្សារអចលនទ្រព្យច្បាស់លាស់គឺមាន ទី១ ទទួលបានសុវត្ថិភាពខ្ពស់ ទាំងការទិញលក់ និងវិនិយោគ ទី២ ទទួលបានការប្រឹក្សាអំពីទីផ្សារ និងប្រភេទអចលនវត្ថុច្បាស់លាស់ ទាំងតម្លៃ និងភាពស្របច្បាប់។

ទី៣ រាល់ការទិញ លក់ តាមរយៈក្រុមហ៊ុនភ្នាក់ងារអាជីព ក៏ជាការចូលរួមចំណែកក្នុងការអភិវឌ្ឍន៍ប្រទេសជាតិផងដែរ ព្រោះក្រុមហ៊ុនស្របច្បាប់ មានកាតព្វកិច្ចបង់ពន្ធជូនរដ្ឋជាប់ជាប្រចាំ ដូច្នេះសរុបជារួម ការប្រើសេវាកម្មជាមួយ ក្រុមហ៊ុនភ្នាក់ងារអចលនទ្រព្យ ស្របច្បាប់គឺមានគុណសម្បត្តិច្រើនជាងគុណវិបត្តិ៕

កម្ពុជា៖ រដ្ឋាភិបាលបានធ្វើអ្វីខ្លះដើម្បីទាក់ទាញលំហូរ FDI និងកំនើនវិនិយោគក្នុងស្រុក

ដោយ ណែត

ភ្នំពេញៈ រដ្ឋាភិបាលកម្ពុជាបានធ្វើច្បាប់ គោលនយោបាយ និងផែនការចង្អុលបង្ហាញផ្លូវជាច្រើន ក្នុងរយៈពេលជាងពីរទសវត្សរ៍កន្លងមកនព ដើម្បីទាញលុយពីហោប៉ៅអ្នកវិនិយោគក្នុងស្រុក និងទាក់ទាញលំហូរទុនវិនិយោគផ្ទាល់ពីបរទេស (FDI)។

ប៉ុន្មានឆ្នាំកន្លងមកនេះ វិនិយោគិនទាំងក្នុង និងក្រៅស្រុកបានបានបណ្ដាក់ទុនវិនិយោគជាបន្តបន្ទាប់ នៅក្នុងប្រទេសកម្ពុជាក្នុងនោះវិស័យអចលនទ្រព្យ ក៏ទទួលបានការវិនិយោគច្រើន ពីសំណាក់វិនិយោគិនក្នុង និងក្រៅប្រទេស ដែលធ្វើឱ្យវិស័យនេះ រួមចំណែកសំខាន់ក្នុងសេដ្ឋកិច្ចជាតិ ។

តើកត្តាអ្វីដែលវិនិយោគិនបរទេស ត្រូវបណ្ដាក់ទុនវិនិយោគនៅក្នុងប្រទេសកម្ពុជា ជាពិសេសក្នុងវិស័យអលចនទ្រព្យ?។

អ្នកជំនាញក្នុងវិស័យអចលនវត្ថុកម្ពុជា បានលើកឡើងនិងធ្វើការប្រៀបធៀបលក្ខខ័ណ្ឌវិនិយោគរវាងប្រទេសកម្ពុ ជានិងប្រទេសនានាក្នុងតំបន់អាស៊ានដែលភាគច្រើនអះអាងថា ទីផ្សារកម្ពុជាមានភាពល្អប្រសើរ ហើយផលចំណេញពីការវិនិយោគនៅកម្ពុជា ខ្ពស់ជាងបណ្តាប្រទេសក្នុងតំបន់នេះ។

អ្វីដែលវិនិយោគិនបរទេស តែងតែចូលមកបណ្ដាក់ទុនវិនិយោគ ក្នុងប្រទេសកម្ពុជាគឺកម្ពុជាមានលក្ខខ័ណ្ឌបើកចំហរ ចំពោះរាល់វិនិយោគិនមកពីគ្រប់ទិសទី ព្រមទាំងអាចដាក់ទុនវិនិយោគ១០០ភាគរយ ដោយមិនចាំបាច់មានការចូលហ៊ុន ឬសហការជាមួយវិនិយោគិនក្នុងស្រុកឡើយ ពិសេសកត្តាសុខសន្តិភាព និងកំនើនសេដ្ឋកិច្ច ស្ថេរភាពនយោបាយនិងសង្គមជាផ្នែកដ៏សំខាន់ ដែលអ្នកវិនិយោគអន្តរជាតិតែងតែសម្លឹងឃើញ។

លោកឧកញ៉ាចេង ខេង ប្រធានក្រុមហ៊ុនអចលនទ្រព្យ CPL បានឱ្យដឹងកន្លងមកថា បើនិយាយពីស្ថានភាពនៅក្នុងប្រទេសកម្ពុជា គឺមានឱកាសនិងសក្ដានុពលខ្លាំងណាស់ ដែលធ្វើឱ្យវិនិយោគិនបរទេសចង់មកកម្ពុជា ក្នុងនោះកម្ពុជាជាប្រទេសមួយដែលស្ថិតនៅចំកណ្ដាលអាស៊ានហើយងាយស្រួល ក្នុងការដឹកជញ្ជូនទំនិញទៅកាន់ប្រទេស ក្នុងតំបន់ តាមផ្លូវគោក ផ្លូវអាកាសនិងផ្លូវទឹក ។

លោកបន្តថា “កម្ពុជាប្រៀបដូចជាកូនក្រមុំមួយរូបមិនទាន់តែងខ្លួន ហើយអ្នកណាៗក៏តែងតែចង់បាន” ។ លោកបន្តថា “អ្វីដែលធ្វើឱ្យវិនិយោគិនបរទេស តែងតែចង់មកបណ្ដាក់ទុនវិនិយោគនៅក្នុងប្រទេសកម្ពុជា ជាពិសេសអចលនទ្រព្យ បើប្រៀបធៀបទៅនឹងប្រទេសជិតខាងវិញឃើញថា តម្លៃអចលនទ្រព្យនៅកម្ពុជា នៅមានតម្លៃទាបជាងគេ ដូច្នេះពួកគេអាចស្វែងរកអចលនទ្រព្យ ដើម្បីដាក់ទុនវិនិយោគលើគម្រោងផ្សេងៗដែលបានគ្រោងទុក” ។

ជាមួយគ្នានេះលោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាក៏បានលើកឡើងផងដែរថា កម្ពុជានៅមានឱកាសខ្ពស់ ក្នុងការដាក់ទុនវិនិយោគ ហើយវិនិយោគបរទេសនៅតែចង់មកដាក់ទុនវិនិយោគ ក្នុងប្រទេសយើងទៅតាមជំនាញរបស់ពួកគេ។

លោកបន្តថា “អ្វីដែលកម្ពុជាត្រូវធ្វើត្រៀម ដើម្បីទទួលវិនិយោគិនដែលនឹងមកបន្តបន្ទាប់ជាពិសេសក្រោយចប់កូវីដ១៩ គឺធនធាន ហេដ្ឋារចនាសម្ព័ន្ធជាពិសេសនោះ គឺភាពស្របច្បាប់នៃអចលនទ្រព្យ” ។

ជាមួយគ្នានេះ លោកបណ្ឌិតអ៊ិន ចាន់នីប្រធានសមាគមធនាគារកម្ពុជាបានមានប្រសាសន៍ឲ្យដឹងផងដែរថា អ្នកវិនិយោគអន្តរជាតិ មុនពេលពួកគេទៅវិនិយោគនៅប្រទេសណាមួយ ពួកគេតែងតែសម្លឹងលើកត្តាចំនួនបី ដូចជា កំនើនសេដ្ឋកិច្ច ស្ថេរភាពនយោបាយ និងស្ថេរភាពសង្គម។លោកបន្តថា លើសពីនេះ ច្បាប់វិនិយោគច្បាប់ពន្ឋ ក៏ជាផ្នែកសំខាន់ដែលអ្នកវិនិយោគជាតិ អន្តរជាតិសិក្សាផងដែរ ដើម្បីធ្វើឲ្យប្រាកដថា ការបោះទុនវិនិយោគរបស់ពួកគេមិនមានហានិភ័យ។

លោកបន្តថា “ការប្រែក្លាយខ្លួនជាប្រទេសមានប្រាក់ចំណូលមធ្យមកម្រិតទាប ក៏ជាផ្នែកមួយទាក់ទាញអ្នកវិនិយោគអន្តរជាតិផងដែរ ព្រោះអ្នកវិនិយោគពួកគេតែងស្វែងរកប្រាក់ចំណេញ ហេតុនេះពួកគេមិនទៅកាន់ប្រទេសក្រីក្រនោះទេ” ។

សម្ដេចអគ្គមហាសេនាបតីតេជោហ៊ុន សែននាយរកដ្ឋមន្ត្រីនៃព្រះរាជាណាចកក្រកម្ពុជាក៏បានមានប្រសាសន៍កន្លងមកថា កម្ពុជាស្វាគមន៍រាល់វិនិយោគិន មកពីគ្រប់ទិសទីគ្រប់ប្រទេសលើពិភពលោក ហើយកម្ពុជាក៏ត្រៀមមន្ត្រី ដើម្បីរង់ចាំសម្រួលរាល់ការវិនិយោគទាំងឡាយនៅក្នុងប្រទេស ដោយផ្ដល់លក្ខខ័ណ្ឌងាយស្រួលដល់បណ្ដាធុរជននិងវិនិយោគិនផងដែរ៕

ទីក្រុងតៃប៉ិជាប់ចំណាត់ថ្នាក់ទី១១ ក្នុងការវិនិយោគលើវិស័យអចលទ្រព្យនៅក្នុងឆ្នាំ២០២១

ដោយ វុត្ថា

តៃវ៉ាន់ៈ ទីក្រុងតៃប៉ិនៃកោះតៃវាន់ត្រូវបានព្យាករថា នឹងឈរនៅលំដាប់លេខរៀងទី ១១ ក្នុងការវិនិយោគអចលនទ្រព្យ នៅតំបន់អាស៊ីប៉ាស៊ីហ្វិកសម្រាប់ឆ្នាំ២០២១ ។ នេះបើយោងតាមការស្ទង់មតិរួមគ្នាមួយ ដែលធ្វើឡើងដោយ PricewaterhouseCoopers (PwC) និងវិទ្យាស្ថាន Urban Land Institute ចេញផ្សាយកាលពីពេលថ្មីៗនេះ។

របាយការណ៍ស្តីពី នៅក្នុងចំណាត់ថ្នាក់កំពុងលេចធ្លោ ក្នុងការវិនិយោគលើវិស័យអចលនទ្រព្យអាស៊ី – ប៉ាស៊ីហ្វិកឆ្នាំ ២០២១ បញ្ជាក់ថា ទីក្រុងតៃប៉ិបានកើនឡើង៣ដងពីមួយឆ្នាំមុន ដោយឈានមកដល់ចំណាត់ថ្នាក់ទី១១ ក្នុងចំណោមទីក្រុងទាំង១២ ក្នុងតំបន់ ដោយផ្អែកលើកិច្ចប្រឹងប្រែងរបស់កោះតៃវ៉ាន់ ក្នុងការទប់ស្កាត់ផលប៉ះពាល់នៃជំងឺរាតត្បាតជំងឺកូវីដ១៩ ។

របាយការណ៍ដដែលបន្តថា “បញ្ហានេះបានធ្វើឱ្យទីក្រុងអាស៊ីមួយនេះ មានកំណើនសេដ្ឋកិច្ចប្រកបដោយស្ថេរភាព ស្របពេលដែលជំងឺកូវីដ១៩ កំពុងរាតត្បាតពាសពេញសកលលោក” ។

PwC បានឱ្យដឹងទៀតថា ទីក្រុងតៃប៉ិទទួលបាននូវលំហូរសាច់ប្រាក់ និងការវិនិយោគ នៅក្នុងទីផ្សារអចលនទ្រព្យនៅក្នុងទីក្រុង ត្រូវបានទទួលស្គាល់ដោយវិនិយោគិនជាច្រើន។ PwC បន្តថា ប្រាកដណាស់ នៅក្នុងទីក្រុងអាស៊ីប៉ាស៊ីហ្វិកមួយចំនួនតូច ដែលផលប៉ះពាល់ពីជំងឺកូវីដ១៩នាពេលបច្ចុប្បន្ន បានធ្វើឱ្យតម្រូវការមានតិចតួច ប៉ុន្តែសម្រាប់ទីក្រុងតៃប៉ិវិញ ទីផ្សារអចលនទ្រព្យនៅតែរឹងមាំ។

បើទោះបីជាការរាតត្បាតជំងឺកូវីដ១៩ បានបណ្តាលឱ្យការធ្លាក់ចុះ នៃទីផ្សារអចលនទ្រព្យ នៅក្នុងទីក្រុងមួយចំនួននៅក្នុងប្រទេសចិន ឥណ្ឌា និងអូស្ត្រាលីក៏ដោយ ក៏កោះតៃវ៉ាន់ ប្រទេសកូរ៉េខាងត្បូង និងជប៉ុនមានភាពប្រសើរជាង។

បើយោងតាម PwC បានបញ្ជាក់ថា វាជាការស្ទង់មតិប្រចាំឆ្នាំលើកទី១៥ នៃនិន្នាការកំពុងរីកចម្រើន នៅក្នុងវិស័យអចលនទ្រព្យនៅតំបន់អាស៊ីប៉ាស៊ីហ្វិក។ ទីក្រុងតៃប៉ិស្ថិតនៅបាតតារាងចំណាត់ថ្នាក់២២ ក្នុងឆ្នាំ ២០១៧ និង ២០១៨ និងជាប់ចំណាត់ថ្នាក់លេខ ២១នៅឆ្នាំ២០១៩ មុននឹងដណ្តើមយកចំណាត់ថ្នាក់ទី១៤ នៅឆ្នាំ ២០២០ និងលេខ ១១ នៅឆ្នាំ២០២១នេះ ។

លោក Jason Liu ប្រធានផ្នែកសេវាកម្មអចលនទ្រព្យរបស់ PwC Taiwan បានឱ្យដឹងថា វិនិយោគិនតៃវ៉ាន់កាន់តែច្រើន ជាមួយនឹងប្រតិបត្ដិការនៅក្រៅប្រទេស បានត្រឡប់ទៅទីក្រុងខ្លួនវិញ បានធ្វើវិស័អចលនទ្រព្យនៅតៃវ៉ាន់មានការរីកចំរើន។

លោកបន្តថា “ការជំរុញរបស់រដ្ឋាភិបាលតៃវ៉ាន់ ចំពោះការកែលម្អទីក្រុងលំនៅដ្ឋាន និងអចលនទ្រព្យពាណិជ្ជកម្ម ក៏បានធ្វើឱ្យវិស័យនេះមានការរីកចំរើន ទាំំងនៅកណ្តាលទីក្រុង និងភាគខាងត្បូងនៃកោះតៃវ៉ាន់” ៕

គម្រោងអភិវឌ្ឍន៍ដីឡូតិ៍ស្របច្បាប់ក្នុងស្រុកបន្ទាយស្រី លក់ក្នុងតម្លៃទាបបំផុតត្រឹម ៣០០០ដុល្លារ រួមនឹងការផ្តល់នូវប្រាក់ចំណេញ ៥០០ដុល្លារភ្លាមៗ

ដោយ ៖ រ៉ាណេត

សៀមរាប ៖ គម្រោងអភិវឌ្ឍន៍ដីឡូតិ៍ស្របច្បាប់មានបណ្ណកម្មសិទ្ធិត្រឹមទទួលស្គាល់ដោយអជ្ញាធរ និងមិនមានពាក់ព័ន្ធតំបន់ហាមឃាត់អប្សរាស្ថិតនៅក្នុងភូមិខ្នារ ឃុំខ្នារសណ្តាយ ស្រុកបន្ទាយស្រី ខេត្តសៀមរាប ដែលស្ថិតក្នុងតំបន់មានគម្រោងអភិវឌ្ឍន៍ត្រូវបានដាក់លក់នៅក្នុងតម្លៃទាបបំផុតបើធៀបទៅនឹងគម្រោងដទៃទៀតត្រឹម៣០០០ដុល្លារ រួមជាមួយនឹងការផ្តល់ជូននូវប្រាក់ចំណេញចំនួន ៥០០ដុល្លារភ្លាមៗសម្រាប់អតិថិជនបង់ផ្តាច់។

តំណាងក្រុមហ៊ុនអភិវឌ្ឍន៍ដីឡូតិ៍អចលនទ្រព្យបន្ទាយស្រី លោកស្រី ជិន លក្ខិណា បានមានប្រសាសន៍ឱ្យដឹងនៅព្រឹកថ្ងៃទី១៥ ខែធ្នូ ឆ្នាំ២០២០នេះថា បច្ចុប្បន្ននេះ នៅក្នុងស្រុកបន្ទាយស្រី មានគម្រោងអភិវឌ្ឍន៍ជាច្រើន ជាពិសេសផ្នែកហេដ្ឋារចនាសម្ព័ន្ធនានា ដែលកាន់តែជំរុញវិស័យដីធ្លីនៅក្នុងតំបន់មានតម្រូវការ និងកើនតម្លៃជាបន្តបន្ទាប់ ខណៈដែលមានអ្នកវិនិយោគមួយចំនួនចាប់ផ្តើមចុះធ្វើសកម្មភាពទីផ្សារទិញលក់យកចំណេញ ដោយសម្រាប់ការបង់រំលោះត្រឹម៦៦ដុល្លារក្នុងមួយខែ។

លោកស្រីបានបន្តថា “សម្រាប់គម្រោងដីឡូតិ៍បន្ទាយស្រីដែលស្ថិតលើទីតាំងមានសក្ដានុពលល្អ អំណោយផលដល់ការរស់នៅ ក៏ដូចជាការធ្វើអាជីវកម្មផ្សេងៗនៅថ្ងៃខាងមុខនេះមានតម្លៃត្រឹមតែ ៣០០០ដុល្លារក្នុងមួយឡូតិ៍ឡើងទៅតែប៉ុណ្ណោះ ហើយសម្រាប់អតិថិជនដែលទិញដោយការបង់ផ្តាច់នឹងទទួលបានការបញ្ចុះតម្លៃរហូតដល់ ៥០០ដុល្លារភ្លាម។

ពិសេសជាងនេះ សម្រាប់អតិថិជនដែលមកទិញដោយខ្លួនឯងផ្ទាល់នឹងទទួលបានការបញ្ចុះតម្លៃបន្ថែមពីលើចំនួន ២០០ដុល្លារទៀត ពោលគឺមួយឡូតិ៍នៅត្រឹម ២៣០០ដុល្លារតែប៉ុណ្ណោះ ខណៈដែលនៅក្នុងគម្រោងមានការអភិវឌ្ឍហេដ្ឋារចនាសម្ព័ន្ធរួចរាល់ ដូចជាបណ្តាញអគ្គិសនី បណ្តាញបង្ហូរទឹក ជាពិសេសផ្លូវគ្រប់ខ្សែមានទំហំ១០ម៉ែត្រ និងក្រាលថ្មមិចរួចរាល់” ។

ទីតាំងគម្រោងមួយនេះ មិនជាប់ពាក់ព័ន្ធនឹងតបន់អប្សរា និងប៉ះពាល់តំបន់អភិរក្សធម្មជាតិនោះទេ ពោលគឺមានច្បាប់ត្រឹមត្រូវនៅជាប់ផ្លូវធំហាយវេ ៦៦ និងមានផ្លូវរដ្ឋទំហំ១៥ម៉ែត្រ នៅជាប់ចំហៀងដីគម្រោងងាយស្រួលក្នុងការធ្វើដំណើរ មានចម្ងាយត្រឹម៣គីឡូម៉ែត្រពីរង្វង់មូល ដែលបំបែកទៅកាន់តំបន់ទេសចរណ៍កម្សាន្តផ្សេងៗ ដូចជា ភូមិព្រះដាក់ តំបន់ប្រាសាទបន្ទាយស្រី ភ្នំគូលេន តំបន់រមណីយដ្ឋានក្បាលស្ពាន ដែលមានសួនសត្វជាច្រេីនប្រភេទ និងមានចម្ងាយត្រឹម៧គីឡូម៉ែត្រពីផ្លូវឆ្ពោះទៅព្រលានយន្តហោះថ្មី ក៏ដូចជាចេញទៅតាមបណ្តាខេត្តនានាផងដែរ។

ព័ត៌មានលម្អិតពីគម្រោងអភិវឌ្ឍន៍ដីឡូតិ៍ អចលនទ្រព្យបន្ទាយស្រី សូមទាក់ទងតាមទូរស័ព្ទលេខ ៖ 016 999 995 / 017 812 345 / 097 8 123 456 ៕

ផ្សារទំនើប៖ ការប្រកួតប្រជែងកើនឡើង តើដល់ពេលដែលផ្សារតូចៗបង្កើតភាពយូនីករបស់ខ្លួនឬនៅ?

ដោយស៊ីវ ម៉េង

ភ្នំពេញៈ ទាំងទំហំនិងចំនួនផ្សារទំនើប បានកើនឡើងកាន់តែច្រើននៅកម្ពុជា ពិសេសក្រុងភ្នំពេញ ដែលធ្វើឲ្យទីផ្សារនេះ ប្រឈមការប្រកួតប្រជែងកាន់តែខ្លាំង ហើយទីផ្សារលកាន់តែមានភាពសម្បូរបែប។

ការមកដល់របស់ផ្សារទំនើបលំដាប់ពិភពលោក EAON MALL1, EAON MALL2, និងផ្សារទំនើប EAON MALL3 បាននិងកំពុងសាងសង់យ៉ាងសកម្ម នៅភាគខាងត្បូងរាជធានីភ្នំពេញ។ ការមកដល់របស់ក្រុមហ៊ុនលំដាប់ពិភពលោកនេះ មិនមែនជារឿងចៃដន ន្យនោះទេ ហើយភាពជោគជ័យរបស់ពួកគេ ក៏មិនមែនជារឿងយល់សប្តិនោះដែរ ប៉ុន្តែក្រុមហ៊ុននេះបានសិក្សាទាំងសេដ្ឋកិច្ច សង្គម វប្បធ៌ម ចំណង់ចំណូលចិត្ត និងចំណុចខ្វះប្រហោងនានា ដែលផ្សារទំនើបតូចៗនៅកម្ពុជាមាន។

ជាលទ្ឋផលការបើកផ្សារទំនើបទាំងពីរ បានធ្វើឲ្យផ្សារទំនើបក្នុងស្រុក ដែលមិនសូវមានស្តង់ដាស្ទើរតែបិទទ្វារ និងផ្សារខ្លះបិទទ្វារ។

អ្នកជំនាញអចលនទ្រព្យជើងចាស់មួយរូប បាននិយាយឲ្យដឹងកាលពីពេលថ្មីៗនេះថា នៅពេលការប្រកួតប្រជែងបែបនេះ កើតមានឡើងម្ចាស់ឬអ្នកអភិវឌ្ឍន៍ផ្សារទំនើបតូចៗ គួរតែប្រែក្លាយផ្សាររបស់ខ្លួនលក់ទំនិញបែបយូនីក មានន័យថា ពួកគេអាចលក់ផលិតផលតែមួយមុខ ដូចជាសម្លៀកបំពាក់ ស្បែកជើង គ្រឿងសំអាងតែមួយមុខគត់ នៅផ្សាររបស់ខ្លួន ជាជាងប្រកួតប្រជែងជាមួយផ្សារទំនើបធំៗ ដែលទទួលបានជោគជ័យខ្លាំងរួចទៅហើយ។

លោកបន្តថា “នៅប្រទេសជឿនលឿនមួយចំនួន គេបានរៀបចំបែបនេះ ដើម្បីទាក់ទាញអតិថិជនទៅតាមសក្តានុពល និងផលិតផលបែបយូនីករបស់ពួកគេ ហើយវាក៏ផ្តល់ភាពងាយស្រួលដល់អតិថិជនរកទិញផលិតផល ដែលពួកគេចង់បានផងដែរ” ។ លោកបន្តថា “ផ្សារទំនើបនៅកម្ពុជាភាគច្រើនមិនសូវមានស្តង់ដានោះទេ ទាំងផលិតផល និងតម្លៃដាក់លក់ផលិតផលណាមួយ។ ហេតុនេះការដាក់តម្លៃឲ្យបានជាក់លាក់ និងបង្កើតភាពយូនីកសំរាប់ផ្សាររបស់ខ្លួនជារឿងល្អ ដើម្បីទាញយកអតិថិជនដែលខ្លួនចង់បាន និងផ្តល់ ជម្រើសកាន់តែច្រើនដល់អតិថិជនគោលដៅ” ។

យោងតាមការសិក្សារបស់ក្រុមហ៊ុន CBRE Cambodia បានរកឃើញថា ផ្សារទំនើបប្រមាណ២០បានត្រៀមបើកដំណើរការនៅឆ្នាំនេះ ប៉ុន្តែដោយសារវិបត្តិសេដ្ឋកិច្ចបានធ្វើ ឲ្យគំរោងមួយចំនួន ពន្យាពេលបើកដំណើរការរហូតមកទល់ពេលនេះ” ។

ជាក់ស្តែងផ្សារទំនើប Phnom Penh Mega Mall ស្ថិតនៅលើមហាវិថីសហព័ន្ឋរុស្ស៊ី ក្បែរខ្លោងទ្វារចូលវត្តនាគវ័ន្ត បានពន្យាពេលបើកដំណើរការ និងផ្សារជាច្រើនទៀតក៏មិនដំណើរការ បើទោះដំណើរការក៏ពួកគេមិនទទួលបានជោគជ័យដែរ។

ជាមួយគ្នានេះ លោកស្រីអាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ថា ពិតហើយទីផ្សារលក់រាយ នៅតាមផ្សារទំនើបបានប្រកួតប្រជែងខ្លាំង ខណៈទំហំផ្សារបានកើនឡើង ហើយផ្សារជាច្រើនបានប្រឈមមុខនឹងផលវិបាក ដោយសារការប្រកួតប្រជែង។

លោកស្រីបន្តថា “ខ្ញុំផ្តល់ជាយោបល់ថា អ្នកសាងសង់ផ្សារទំនើប មិនគួរធ្វើធំពេកទេ ដើម្បីកុំឲ្យមានបញ្ហានៅពេលអនាគត ដោយសារចំនួនផ្សារទំនើប និងផ្សារបែបសហគមន៍បានកើនឡើងកាន់តែច្រើន” ។ លោកស្រីបន្តថា “ការវិនិយោគផ្សារទទួលបានផលចំណេញពីការវិនិយោគខ្ពស់ ប៉ុន្តែម្ចាស់ផ្សារឬអ្នកអភិវឌ្ឈន៍ត្រូវធ្វើការកែលំអរផ្សាររៀងរាល់៥ឆ្នាំម្តង ដើម្បីបង្កើនភាពទាក់ទាញអតិថិជន” ៕

រដ្ឋាភិបាល៖ កែលំអរក្រុងសៀមរាបជាមួយប្លង់គោលអភិវឌ្ឍន៍ថ្មី ដើម្បីសោភ័ណភាពនិងទាក់ទាញការវិនិយោគ

ដោយវុត្ថា

ភ្នំពេញៈ ក្រសួងរៀបចដែនដី នគរូបនីយកម្ម និងសំណង់ បានចាប់ផ្តើមកែលម្អប្លង់គោលប្រើប្រាស់ដីនៅក្នុងក្រុងសៀមរាប បន្ទាប់មានគម្រោងសាងសង់ផ្លូវចំនួន៣៨ខ្សែ ដែលត្រូវបានបើករដ្ឋានកាលពីពេលថ្មីៗនេះ ដោយសម្តេចតេជោ ហ៊ុន សែននាយករដ្ឋមន្ត្រីនៃកម្ពុជា។

លោកគង់ វិមាន អ្នកនាំពាក្យក្រសួងសាធារណការ និងដឹកជញ្ជូន បានប្រាប់ឱ្យដឹកាលពីថ្ងៃទី១៤ ខែធ្នូកន្លងមកនេះថា អន្តរក្រសួងបានបង្កើតក្រុមការងារចម្រុះចំនួន៩ ក្រុម ដោយក្នុងនោះមាន១ក្រុម មកពីក្រសួងរៀបចំដែននគរូបនីយកម្ម និងសំណង់ ក្នុងការរៀបចំពាក់ព័ន្ធនឹងសូរិយោដីនៅក្នុងក្រុង និងការកែលម្អប្លង់គោល។

លោកបន្តថា “ក្រុមមួយនេះ មានតួនាទីក្នុងការរៀបចំប្លង់គោល ទីក្រុងសៀមរាបទាំងមូល ដែលដឹកនាំដោយលោកលី រស្មី ជាអ្នកដឹកនាំធ្វើកិច្ចការនេះ ក្រៅពីនេះ៨ក្រុមទៀត ជាតួនាទីរបស់ក្រសួងសាធារណការ ចុះត្រួតពិនិត្យគម្រោងស្ថាបនាផ្លូវទាំងអស់” ។លោកថ្លែងថា “ជាធម្មតាទេ នៅពេលដែលមានការអភិវឌ្ឍន៍ហេដ្ឋារចនាសម្ព័ន្ធ វាមានការប្រែប្រួល អ៊ីចឹងទេ ក្រសួងត្រូវតែពិនិត្យមើល ក្នុងកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ជាពិសេសប្លង់គោល ក្រែងលោយើងធ្វើទៅ មានផលប៉ះពាល់ យើងត្រូវតែធ្វើអឺងចឹង ហើយការរៀបំកែលម្អក្រុងក្រសួងមានតួនាទីជាអ្នកចាត់ចែង” ។

គម្រោងកែលម្អហេដ្ឋារចនាសម្ព័ន្ធផ្លូវក្នុងទីក្រុងសៀមរាប ខេត្តសៀមរាបចំនួន៣៨ ខ្សែនេះ មានប្រវែងសរុប១០៨,៧៤ គីឡូម៉ែត្រ គ្រោងប្រើប្រាស់ថវិកាជាតិសរុបប្រមាណជាង១៤០លានដុល្លារអាមេរិក និងថវិកាប្រមាណជាង៩លានដុល្លារអាមេរិកទៀត សម្រាប់ការងារចាំបាច់ក្នុងការរៀបចំស្ថាបនា ប្រព័ន្ធបង្ហូរទឹកភ្លៀង និងទឹកកខ្វក់ដែលនៅក្រៅគម្រោង។

គម្រោងសាងសង់ខ្សែផ្លូវទាំង៣៨នេះ នឹងប្រើប្រាស់រយៈពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១ ត្រូវបានសម្ពោធបើកការដ្ឋានសាងសង់ កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលថ្មីៗកន្លងទៅនេះ៕

ចំណេះដឹងផ្នែកដីធ្លី! តើការធ្វើចំណាត់ថ្នាក់ដីរដ្ឋឡើងវិញមានប៉ុន្មានប្រភេទ?

ដោយ វុត្ថា

ភ្នំពេញៈ ការធ្វើចំណាត់ថ្នាក់ដីរឡើងវិញ មានន័យថាការប្តូរឋានៈដីរបស់រដ្ឋ ក្រោយពីធ្វើការចុះបញ្ជី និងការធ្វើចំណាត់ថ្នាក់លើកដំបូង។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់ស្តីពី គោនយោបាយស្តីពី ការគ្រប់គ្រងដីរដ្ឋបានឱ្យដឹងថា ការធ្វើចំណាត់ថ្នាក់ដីរដ្ឋឡើងវិញ មានបីប្រភេទដូចជា ទី១ ការធ្វើចំណាត់ថ្នាក់ទ្រព្យសាធារណៈរបស់រដ្ឋ ទៅជាទ្រព្យឯកជនរបស់រដ្ឋ ទី២ ការធ្វើចំណាត់ថ្នាក់ទ្រព្យសាធារណៈរបស់រដ្ឋ ពីការប្រើប្រាស់ជាប្រយោជន៍សាធារណៈមួយ ទៅជាប្រភេទបំរើប្រយោជន៍សាធារណៈមួយផ្សេងទៀត និងទី៣ ការធ្វើចំណាត់ថ្នាក់ព្រទ្យឯកជនរបស់រដ្ឋ ទៅជាទ្រព្យសាធារណៈរបស់រដ្ឋ។

ឯកសារដដែលបន្តថា ការធ្វើចំណាត់ថ្នាក់ដីរដ្ឋឡើងវិញ ត្រូវបានធ្វើឡើងតាមរយៈសំណើរជាលាយល័ក្ខអក្សរ ពីនិតិបុគ្គលសាធារណៈណាមួយ ទៅគណៈកម្មាធិការប្រើប្រាស់ និងបែងចែកដីថ្នាក់ខេត្តក្រុង។

សំណើរនេះត្រូវប្រកាស ឬបរិយាយអំពីទីតាំង ដែលស្នើសុំធ្វើចំណាត់ថ្នាក់ឡើងវិញ ពាក្យស្នើសុំធ្វើចំណាត់ថ្នាក់ឡើងវិញ និងហេតុផលនៃការស្នើសុំធ្វើចំណាត់ថ្នាក់ឡើងវិញ។

គណៈកម្មាធិការប្រើប្រាស់ និងបែងចែកដីខេត្តក្រុង នឹងតំរូវឱ្យស្ថាប័នបច្ចេកទេសជំនាញ (ចំរុះមន្ទីរ) ធ្វើការពិនិត្យឡើងវិញ នូវសំណើដែស្នើឡើងក្នុងរយៈពេល៤៥ថ្ងៃ។

ការពិនិត្យឡើងវិញជាលាយល័ក្ខណ៍អក្សរ ត្រូវពន្យល់ពីវិធីសាស្ត្រ ដែលបានប្រើប្រាស់ក្នុងការត្រួតពិនិត្យ ហើយដែលវិធីសាស្ត្រនេះ ត្រូវរាប់បញ្ចូលទាំងព័ត៌មានដែលបានទទួលពីភាគីស្នើសុំ ទាំងលទ្ធផលរកឃើញក្នុងការត្រួតពិនិត្យ និងអនុសាសន៍របស់ស្ថាប័នបច្ចេកទេសជំនាញពាក់ព័ន្ធ ទៅនឹងសំណើសុំធ្វើចំណាច់ថ្នាក់ឡើងវិញនេះ។

ការពិនិត្យឡើងវិញនេះ ត្រូវបញ្ចប់ក្នុងរយៈពេល៦០ថ្ងៃ គិតពីថ្ងៃចាប់ផ្តើមត្រួតពិនិ ត្យ លើកលែងតែមានការស្នើសុំពន្យាពេលបន្ថែមពីអ្នកត្រួតពិនិត្យ ដោយមានហេតុផលជាក់លាក់។ បន្ទាប់មកគណៈកម្មាធិការប្រើប្រាស់ និងបែងចែកដីខេត្តក្រុង នឹងធ្វើការសំរេចជាលាយលក្ខណ៍អក្សរ លើការធ្វើចំណាត់ថ្នាក់ឡើងវិញនេះ (យល់ព្រម ឬ បដិសេធ ឬ កែសម្រួល) ក្នុងរយៈពេល៦០ថ្ងៃ គិតចាប់ថ្ងៃទទួបានលទ្ធផលនៃការត្រួតពិនិត្យ។

ការកំណត់របស់គណៈកម្មាធិការប្រើប្រាស់ និងបែងចែកដីថ្នាក់ខេត្តក្រុង នឹងត្រូវស្នើសុំការសំរេចជាផ្លូវការ ពីក្រុងប្រឹក្សាគោលនយោបាយដីធ្លី តាមរយៈអគ្គលេខាធិការដ្ឋាននៃក្រុមប្រឹក្សាគោលនយោបាយដីធ្លី។

ការធ្វើចំណាច់ថ្នាក់ដីរដ្ឋឡើងវិញនេះ នឹងត្រូវបញ្ចូលទៅក្នុងផែនទី ឬប្រព័ន្ធទិន្ន័យដីរដ្ឋ ហើយសេចក្តីសម្រេចជាលាយលក្ខណ៍អក្សរត្រូវរក្សាទុកជាឯកសារ៕

ខុនដូៈការរស់នៅលអាគារសហកម្មសិទ្ឋ បញ្ហាប្រឈមនៃប្រព័ន្ធសុវត្ថិភាពអគ្គីភ័យ ត្រូវបានគិតដូចម្តេច?

ដោយៈ រ៉ាណេត

ភ្នំពេញៈ ប្រព័ន្ធសុវត្ថិភាព និងគុណភាពសំណង់អគារខ្ពស់ៗនានា ជាបញ្ហាសំខាន់បំផុត ដែលត្រូវបានយកចិត្តទុកដាក់ពីសំណាក់រាជរដ្ឋាភិបាលកម្ពុជា និងស្ថិតនៅក្រោមការឃ្លាំមើលរបស់ក្រសួងរៀបចំដែនដី នគរូបនីយកម្ម និងសំណង់។

ដោយឡែកសម្រាប់តែប្រព័ន្ធសុវត្ថិភាព ផ្នែកអគ្គីភ័យ ដែលអាចកើតមានជាយថាហេតុ ក៏ជាចំណុចសំខាន់ដែលត្រូវបង្កើនការយកចិត្តទុកដាក់ផងដែរ។

អគ្គនាយកក្រុមហ៊ុនភ្នាក់អចលនទ្រព្យអន្តរជាតិ ERA Cambodia លោកខន គង្គារ បានមានប្រសាសន៍តាមទូរស័ព្ទ នៅល្ងាចថ្ងៃទី១៤ ខែធ្នូ ឆ្នាំ២០២០នេះថា គ្រប់វត្តមាននៃសំណង់អគារខ្ពស់ៗ នៅពេលបច្ចុប្បន្នសុទ្ធតែមានការឃ្លាំមើល ពីសំណាក់មន្ត្រីជំនាញរបស់ក្រសួងរៀបចំដែនដី នគរូបនីយកម្ម និងសំណង់ ដើម្បីឱ្យប្រាកដថា អនុវត្តន៍លើការពង្រឹងគុណភាព ប្រព័ន្ធសុវត្ថិភាពដែលត្រូវបានកំណត់ដោយច្បាប់។

លោកបានបញ្ជាក់ថា “សម្រាប់អគារខ្ពស់ៗដូចជាអគារអាផាតម៉ិន ជាពិសេសសំណង់ខុនដូនៅកម្ពុជានាពេលបច្ចុប្បន្ន គឺមានការយកចិត្តទុកដាក់ខ្ពស់ទាំងគុណភាព ទាំងប្រព័ន្ធសុវត្ថិភាព”។ លោកបន្តថា “ប្រព័ន្ធការពារសុវត្ថិភាព ពេលមានគ្រោះអគ្គីភ័យនៅក្នុងអគារ នៅកម្ពុជាអ្នកសាងសង់គឺមានគ្រប់គ្រងទៅតាមបច្ចេកទេស ព្រោះបើខុសពីបច្ចេកទេស ដែលត្រូវបានកំណត់ដោយច្បាប់ ក៏រដ្ឋាភិបាលមិនអនុញ្ញាតឱ្យសាងសង់នោះដែរ”។

លោកខន គង្គារ បានបញ្ជាក់ទៀតថា “ប្រព័ន្ធសុវត្ថិភាពចំពោះគ្រោះអគ្គីភ័យ គឺអ្នកបច្ចេកទេសមានការរៀបចំប្រព័ន្ធ ដូចជា នៅគ្រប់ជាន់ទាំងអស់សុទ្ធ តែមានដាក់បំពង់ពន្លត់អគ្គីភ័យក្នុងកម្រិតបឋម មានបំពាក់កាំមេរ៉ាសុវត្ថិភាពនៅតាមជាន់នីមួយ និងច្រកចេញចូលរួម ដែលត្រូវបានឃ្លាំមើលដោយសន្តិសុខ២៤ម៉ោង។

ជាមួយគ្នានេះ ក៏មានការរៀបចំជាប្រព័ន្ធទឹកបាញ់ពន្លត់ភ្លើង ដោយស្វ័យប្រវត្តិ មានឧបករណ៍បន្លឺសំឡេងអាសន្ន មានទីធ្លាសម្រាប់សង្គ្រោះ មានជណ្ដើរជើងពេលមានអាសន្ន ហើយក៏មានជណ្ដើរយន្តសុវត្ថិភាពបញ្ចៀសគ្រោះថ្នាក់ផងដែរ។ ដូច្នេះប្រព័ន្ធការពារសុវត្ថិភាពនៅតាមអគារខុនដូគឺមានខ្ពស់”។

ជាមួយគ្នានេះ លោកសាស្ត្រាចារ្យទួស សាភឿន អគ្គលេខាធិការរងនៃគណៈស្ថាបត្យករកម្ពុជា បានមានប្រសាសន៍ថា ច្រកសុវត្ថិភាពពេលមានគ្រោះអគ្គីភ័យ ក្រៅពីសំដៅលើប្រព័ន្ធបាញ់ទឹកដោយស្វ័យប្រវត្តិ ដែលត្រូវបានបំពាក់នៅក្នុងតួអគារ គឺគេត្រូវយកចិត្តទុកដាក់ទៅលើ២ចំណុចទៀត គឺច្រកជណ្ដើរថ្មើរជើងសុវត្ថិភាព និងច្រកជណ្ដើរយន្តសុវត្ថិភាព។

លោកបានបញ្ជាក់ថា “សម្រាប់ច្រកជណ្ដើរយន្តសុវត្ថិភាព គេធ្វើឡើងជាមួយប្រព័ន្ធអគ្គិសនីពិសេស (ប្រភពថាមពលអគ្គិសនីទី២) ដើម្បីជំនួសប្រព័ន្ធអគ្គិសនីក្នុងតួអគារដែលត្រូវបានកាត់ផ្ដាច់ដោយស្វ័យប្រវត្តិ។

លោកបន្តទៀតថា “ធម្មតានៅពេលដែលមានបញ្ហាអគ្គីភ័យកើតឡើង ប្រព័ន្ធបញ្ជាអគ្គិសនី ក្នុងតួអគារទាំងមូល នឹងត្រូវបានកាត់ផ្តាច់ដោយស្វ័យប្រវត្តិភ្លាមៗ ហើយជំនួសដោយបណ្តាញអគ្គិសនីបម្រុងពិសេស ដែលស្ថិតនៅក្រៅតួអគារ ដើម្បីបន្តសកម្មភាពរបស់ជណ្ដើរយន្តសុវត្ថិភាពឱ្យដំណើរការ”។

លោកទួស សាភឿនបានបន្តទៀតថា ភាគច្រើនប្រព័ន្ធបញ្ជាអគ្គិសនី ជំនួសបែបនេះ ហាក់មិនត្រូវបានប្រើនៅតាមអគារនានា ក្នុងប្រទេសកម្ពុជានោះទេ ដោយហេតុថា ប្រភពនៃបណ្តាញអគ្គិសនីហាក់នៅឆ្ងាយពីគ្នា ហើយផ្តល់ភាពស្មុគស្មាញច្រើនដល់អ្នកសាងសង់គម្រោង ប៉ុន្តែបើនៅតាមបណ្តាប្រទេសជិតខាង គឺគេមានប្រើគ្រប់គ្រាន់។

យ៉ាងណាក៏ដោយ លោកបានបង្ហាញពីក្ដីរំពឹងថា នៅថ្ងៃអនាគតខាងមុខនេះ គ្រប់វត្តមាននៃសំណង់អគារខ្ពស់ៗទាំងអស់នៅកម្ពុជា នឹងមានប្រើប្រាស់បច្ចេកទេសទាំងនេះ នៅពេលដែលថាមពលអគ្គិសនីកម្ពុជា មានការផ្គត់ផ្គង់គ្រប់គ្រាន់ ហើយការកំណត់ពីគុណភាពស្ដង់ដាសំណង់ ត្រូវបានអនុវត្តប្រកបដោយប្រសិទ្ធភាពខ្ពស់៕

ក្រុមហ៊ុនជប៉ុនធំៗចាប់ផ្ដើមមានទំនុកចិត្តឡើងវិញក្រោយធ្លាក់ចុះដោយសារ វីរុសកូវីដ-១៩

សុខុម

តូក្យូ: ការស្ទាបស្ទង់ដ៏សំខាន់មួយ បានបង្ហាញកាលពីថ្ងៃច័ន្ទទី១៤ ធ្នូថា ពេលនេះក្រុមហ៊ុនជប៉ុនធំៗ បានចាប់ផ្ដើមមានទំនុកចិត្តឡើងវិញកាន់តែខ្លាំង បន្ទាប់ពីធ្លាក់ចុះដោ យសារ ការឆ្លងរាតត្បាតវីរុសផ្លូវដង្ហើមប្រភេទថ្មីដ៏កាចសាហាវកូវីដ-១៩ ដែលឈានដល់កម្រិតអាក្រក់បំផុត ចាប់តាំងពីមានវិបត្តិហិរញ្ញវត្ថុសកលលោក។ នេះបើយោងតាមសារព័ត៌មាន CNA ចុះផ្សាយក្នុងថ្ងៃដដែល។

ការស្ទាបស្ទង់ពាណិជ្ជកម្មសម្រាប់ខែធ្នូ ដោយធនាគារជប៉ុន Bank of Japan ដែលបានស្ទង់មតិក្រុមហ៊ុនប្រមាណ១០.០០០ បានបង្ហាញពីរង្វាស់ដក១០ ក្នុងចំណោមរោងចក្រធំៗ ក្រោយការកត់ត្រារង្វាស់ដក២៧នៅក្នុងការស្ទាបស្ទង់លើកមុន និងរង្វាស់ដក ៣៤ នៅក្នុងការស្ទង់មតិខែមិថុនា។ តួលេខចុងក្រោយនេះបានប្រៀបធៀបជាមួយនឹងការស្ទង់មតិក្នុងទីផ្សារ ដែលមានរង្វាស់ដក ១៥។

តួលេខប្រចាំខែមិថុនា ជាតួលេខទាបបំផុតចាប់តាំងខែមិថុនា ឆ្នាំ២០០៩ ជាពេលដែលវិបត្តិហិរញ្ញវត្ថុពិភពលោក វាយប្រហារយ៉ាងធ្ងន់ធ្ងរ ទៅលើសេដ្ឋកិច្ចធំបំផុតទី៣ រប ស់ពិភពលោកមួយនេះ។

ការស្ទង់មតិពាណិជ្ជកម្មរយៈពេលខ្លីនេះ បង្ហាញពីភាពខុសគ្នារវាងភាគរយ នៃក្រុមហ៊ុន ដែលមានគំនិតវិជ្ជមាន និងក្រុមហ៊ុនដែលមើលឃើញស្ថានភាពថា មិនអំណោយផល។

លទ្ធផលរង្វាស់ស្ទង់មតិចុងក្រោយនេះទទួលបាន បន្ទាប់ពីរដ្ឋាភិបាលជប៉ុន កាលពីសប្តាហ៍មុនបានអនុម័តទម្លាក់កញ្ចប់ថវិកាថ្មី ដើម្បីស្ដារសេដ្ឋកិច្ចក្នុងទំហំទឹកប្រាក់ជាង ៧០០ពាន់លានដុល្លារអាមេរិក ដើម្បីជួយដល់គម្រោងនានារាប់ចាប់ ពីវិធានការប្រយុទ្ធប្រឆាំងវីរុសកូវីដ-១៩ រហូតដល់ការអភិវឌ្ឍបច្ចេកវិទ្យាបៃតង ហើយកញ្ចប់ថវិកាបែបនេះគឺជាកញ្ចប់ថវិកាធំបំផុតទី៣ របស់ជប៉ុនសម្រាប់ឆ្នាំសារពើពន្ធនេះ។

ប្រទេសជប៉ុន បានងើបចេញផុតពីឱនភាពសេដ្ឋកិច្ចជាផ្លូវការ កាលពីខែមុន បន្ទាប់ពីធ្លាក់ចុះ៣ត្រីមាសជាប់ៗគ្នា ប៉ុន្តែពេលនេះសេដ្ឋកិច្ចធំបំផុតទី៣ របស់ពិភពលោកមួយនេះកំពុងតែប្រឈម នឹងការកើនឡើងយ៉ាងឆាប់រហ័ស នូវករណីឆ្លងវីរុសកូវីដ-១៩ ដោយករណីឆ្លងថ្មីៗកើនឡើងខ្ពស់ មិនធ្លាប់មានក្នុងរយៈពេលប៉ុន្មានសប្តាហ៍ចុងក្រោយនេះ៕

ការបង្កើនកម្ពស់ពីជាន់មួយទៅជាន់មួយក្នុងគម្រោងខុនដូនឹងបន្ថែមភាព ទាក់ទាញដល់អ្នកទិញ

ដោយៈ ប៊ី

អាមេរិកៈ នៅក្នុងទីផ្សារខុនដូប្រណីត នៅទីក្រុងមានប្រជាជនច្រើន អ្នកអភិវឌ្ឍន៍ខុនដូ បានរឹះរកវិធីដើម្បីឆ្លើយតបនឹងការប្រកួតប្រជែង ដោយបន្ថែមកម្ពស់ពីជាន់មួយទៅមួយក្នុងគម្រោងរបស់ខ្លួន។

យោងតាមការសិក្សាមួយរបស់ក្រុមហ៊ុនRealtor.com ដែលមានមូលដ្ឋាននៅសហរដ្ឋអាមេរិកបានឱ្យដឹងកាលពីថ្មីៗនេះថា កម្ពស់ស្តង់ដារពីជាន់មួយទៅជាន់មួយ៨ ហ្វីត(២.៤៣ម៉ែត្រ) អាចនឹងមិនមានការអភិវឌ្ឍទៀតទេនាពេលខាងមុខ ព្រោះអ្នកអភិវឌ្ឍន៍បាននិងកំពុងផ្លាស់ប្តូរ ទៅរកការសាងសង់គម្រោងខុនដូ ដែលមានកម្ពស់ជាន់មួយទៅជាន់មួយចាប់ពី១១,១២ (៣.៣៨ម៉ែត្រ) ទៅ ២០ហ្វីត (៦ម៉ែត្រ) ខណៈអ្នកទិញក៏មានបំណងចង់ខុនដូប្រភេទនេះផងដែរ។

នៅទីក្រុងសាន់ហ្វ្រាន់ស៊ីស្កូ ខុនដូមួយក្នុងចំណោមខុនដូ ដែលថ្លៃជាងគេបំផុតនៅក្នុងទីក្រុង គឺ Penthouse តម្លៃ១៥លានដុល្លារ ដែលកំពុងសាងសង់នៅតំបន់ Lumina នឹងមានកម្ពស់ពីជាន់មួយ ទៅជាន់មួយរហូតដល់១៨ហ្វីត (៥.៤៨ម៉ែត្រ)។

នៅក្នុងទីក្រុងបូស្តុន Penthouse មានទំហំ ១៣,០០០ ហ្វីតការ៉េ (៣.៩៦២ម៉ែត្រការ៉េ)ដែលមានកម្ពស់ដល់ទៅ១៤ ហ្វីត (៤.២៦ម៉ែត្រ) នៅឯអគារ Millennium Tower មានតម្លៃរហូតដល់៣០លានដុល្លារ។ នៅក្រុងម៉ៃអាមី Penthouse មានទំហំ ៦.៦៤៤ ហ្វីតការ៉េ (២០២៥ម៉ែត្រការ៉េ) កម្ពស់១៨ហ្វីត (៥.៤៨ម៉ែត្រ) បានដាក់លក់នៅឆ្នាំនេះក្នុងតម្លៃ២១,៥លានដុល្លារ។

ក្រុមហ៊ុនRealtor.com បានរកឃើញថា ការបង្កើនកម្ពស់ស្តង់ដារ ពីជាន់មួយទៅជាន់មួយពី៨-៩ហ្វីត ទៅ ១០-១១ ហ្វីត (៣-៣.៣៥ម៉ែត្រ) ធ្វើឱ្យតម្លៃខុនដូកើនឡើង៥០ភាគរយក្នុងការចុះបញ្ជី