ដោយ ៖ រ៉ាណេត

ភ្នំពេញ ៖ ចាប់តាំងពីរាជរដ្ឋាភិបាលកម្ពុជា បានប្រកាសដាក់ដំណើរឱ្យដំណើរការជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន (ប្រព័ន្ធOnline) កាលពីពេលកន្លងទៅរហូតមកដល់ពេលនេះ មានក្រុមហ៊ុនអាជីកម្មចំនួន២៧០០ហើយបានអនុវត្តចុះបញ្ជីតាមប្រព័ន្ធនេះ ហើយនៅមាននាមករណ៍បម្រុងទុកជាង៣១០០ផ្សេងទៀតត្រូវបានពិនិត្យរួចរាល់។

តាមរយៈគណនីទំនាក់ទំនងអេឡិចត្រូនិកផ្លូវការរបស់ការិយាល័យចុះឈ្មោះអាជីវកម្មតាមថ្នាល់បច្ចេកវិទ្យាព័ត៌មាន (Online Business Registration Service) បានបង្ហាញថា គិតត្រឹមព្រឹកថ្ងៃទី១៤ ខែធ្នូ ឆ្នាំ២០២០ ចំនួនក្រុមហ៊ុនដែលបានចុះបញ្ជីបានកើនឡើងដល់ចំនួន២៦៩៣ ហើយពាក្យស្នើសុំរបស់ក្រុមហ៊ុនចំនួន៦២១ កំពុងតែធ្វើការត្រួតពិនិត្យ។

នៅក្នុងរបាយការណ៍ដដែលបានបង្ហាញទៀតថា ជាមួយនឹងការកើនឡើងនូវចំនួនក្រុមហ៊ុនចុះបញ្ជីអាជិវកម្មតាមថ្នាក់បច្ចេកវិទ្យាព័ត៌មាន ឬតាមប្រព័ន្ធ Online ខាងលើនេះ ក៏មានការចុះឈ្មោះនាមករណ៍បម្រុងទុកផងដែរ ដោយក្នុងនោះនាមករណ៍ដែលទទួលបានជោគជ័យមានចំនួន៣១៦៧ឈ្មោះ ហើយនាមករណ៍ដែលកំពុងធ្វើការត្រួតពិនិត្យមានចំនួន១៨៤ឈ្មោះ។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ផាន់ ផល្លា បានប្រាប់ឱ្យដឹងកាលពីពេលថ្មីៗថា ការចុះបញ្ជីអាជីវកម្មតាមប្រព័ន្ធអនឡាញនេះ បានចំណាយពេលវេលាតិច និងមានភាពងាយស្រួលជាទីបំផុត គឺមុនដូចកាលពីពេលមុននោះទេ ខណៈពីមុនមានស្ថានភាពស្មុកស្មាញច្រើន ដោយរត់ការតាមដំណាក់កាលជាច្រើនស្ថាប័ន។

លោកបន្តថា “តាំងពីមុននេះនៅពេលចុះបញ្ជីអាជីកម្មរបស់ក្រុមហ៊ុន ត្រូវឆ្លង៣ ទៅ៤ស្ថាប័ន ប៉ុន្តែឥឡូវនេះគ្រាន់តែចូលទៅក្នុងវេបសាយរបស់ក្រសួង ហើយបញ្ចូលរាល់ឯកសារពាក់ព័ន្ធទៅក្នុងប្រព័ន្ធចុះបញ្ជីតែប៉ុណ្ណោះ ដោយក្នុងរយៈពេល៨ថ្ងៃនឹងទទួលបាន។ នេះជាឆ្លើយតបទៅនឹងកំណែទម្រង់ស៊ីជម្រៅរបស់រាជរដ្ឋាភិបាលកម្ពុជាក្នុងការទាក់ទាញការវិនិយោគ និងសម្រួលនិតិវិធីនៃការចុះបញ្ជីរឱ្យបានកាន់តែលឿនដល់ធុរកិច្ចនៅក្នុងប្រទេសដែលកំពុងជួបវិបត្តិនៃជំងឺ Covid-19 នាពលេនេះ”។

ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាននេះ បានដាក់ឱ្យដំណើរកាលពីថ្ងៃទី១៥ ខែមិថុនា ឆ្នាំ២០២០កន្លមកងនេះ គឺជាបង្គោលចរថ្មីមួយ នៃការកែទម្រង់មុត ស្រួចរបស់សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា ក្នុងគោលបំណងលើកកម្ពស់ ភាពប្រកួតប្រជែង និងធ្វើឲ្យប្រសើរឡើងនូវបរិយាកាសវិនិយោគនៅកម្ពុជា។

លើសពីនេះ ប្រព័ន្ធចុះបញ្ជីអាជីវកម្មថ្មីនេះ នឹងផ្តល់ឱកាសដ៏សំខាន់មួយទៀតផងដែរ ដល់ធុរជនដែលកំពុងស្វែងរកឯកសារគតិយុត្ត កំណត់អត្តសញ្ញាណ អាជីវកម្មរបស់ខ្លួន ដើម្បីពន្លឿន និងទទួលបានឥណទាន ពីកម្មវិធីហិរញ្ញប្បទានពិសេសរបស់រាជរដ្ឋាភិបាល ក្នុងវិធានការជួយដល់វិស័យឯកជន ដែលទទួលរងផល ប៉ះពាល់ពីការរីករាលដាលនៃជំងឺCovid-19៕

ដោយស៊ីវ ម៉េង

        ភ្នំពេញៈ ដើម្បីទទួលបានផលចំណេញខ្ពស់ពីការវិនិយោគ មិនមែនជាការប្រថុយប្រថាននោះទេ ប៉ុន្តែវាជាការវិនិយោគដោយឈ្លាសវៃ តាមរយៈការទទួលបានព៌តមានច្បាស់លាស់ និងដាក់ចេញផែនការត្រឹមត្រូវ។

ហេតុនេះមុនវិនិយោគលើដីធ្លី  តើអ្នកត្រូវពិនិត្យទៅលើកត្តាអ្វីខ្លះ និងដឹងអ្វីខ្លះពីផែនមការអភិវឌ្ឍន៍របស់រដ្ឋាភិបាល។

គេហទំព័រPropertyarea.asiaសូមលើកយកចំណុចមួយចំនួន សំរាប់អ្នកអាន អ្នកវិនិយោគយកធ្វើជាមួលដ្ឋានសំរាប់ពិចារណា។

ព៌តមានពីផែនការអភិវឌ្ឍន៍របស់រដ្ឋាភិបាល

        រដ្ឋាភិបាលកម្ពុជាតែងតែដាក់ចេញនូវផែនការ គោលនយោបាយថ្មីៗជារៀងរាល់៥ទៅ១០ឆ្នាំម្តង ដែលជាផែនទីចង្អុលបង្ហាញផ្លូវ ដើម្បីសម្រេចបានកំនើនសេដ្ឋកិច្ច សង្គមតាមចក្ខុវិស័យរបស់ខ្លួន។ ហេតុនេះ ការតាមដានព៌តមានរបស់រដ្ឋាភិបាលឲ្យបានជាប់លាប់ នឹងធ្វើឲ្យយើងមានព៌តមានច្រើនសំរាប់ពិចារណា និងដាក់ចេញផែនការវិនិយោគ ដើម្បីទទួលបានផលប្រយោជន៍ពីការអភិវឌ្ឍន៍នានា។

ជាក់ស្តែងរដ្ឋាភិបាលកម្ពុជា បានដាក់ចេញគោលនយោបាយ កសាងហេដ្ឋារចនាសម្ព័ន្ឋ គោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ជាលទ្ឋផលក្រុងចំនូន៣ ដែលបានដាក់ចេញក្នុងគោលនយោបាយនេះ មានការរីកចម្រើនយ៉ាងលឿន ដូចជាក្រុងព្រះសីហនុ ក្រុងប៉ោយប៉ែត និងក្រុងបាវិត។

ផែនការអភិវឌ្ឍន៍ហេដ្ឋារចនាសម្ព័ន្ឋរបស់រដ្ឋាភិបាល

        ដើម្បីបង្កើនសន្ទុះសេដ្ឋកិច្ច និងកាត់បន្ថយបញ្ហាសង្គម រដ្ឋាភិបាលបានដាក់ចេញផែនការកសាងហេដ្ឋារចនាសម្ព័ន្ឋជាបន្តបន្ទាប់ ដូចជា គម្រោងផ្លូវល្បឿនលឿនភ្នំពេញ ព្រះសីហនុ គំរោងផ្លូវល្បឿនលឿនភ្នំពេញ បាវិត គម្រោងសាងសង់ផ្លូវក្រវ៉ាត់ក្រុងទី៣ ផ្លូវក្រវ៉ាត់ក្រុងទី៤ ព្រលានយន្តហោះអន្តរជាតិភ្នំពេញថ្មី ព្រលានយន្តហោះអន្តរជាតិខេត្តសៀមរាប ព្រលានយន្តហោះតារាសាគរ ខេត្តកោះកុង ព្រលានយន្តហោះខេត្តមណ្ឌលគិរីជាដើម។

ជាមួយនឹងផែនការសកម្មភាពទាំងនេះ ជាក់ស្តែងតំបន់ស្ថិតនៅក្បែរគំរោងធំៗ បា​ន​ធ្វើឲ្យតម្លៃដីធ្លីកើនឡើងយ៉ាងគំហុក ហើយអ្នកទទួលបានផលប្រយោជន៍ផ្ទាល់គឺប្រជាជននៅមូលដ្ឋាន និងអ្នកវិនិយោគដែលក្តាប់ព៌តមានបានលឿន និងជាប់លាប់។

ផែនការអភិវឌ្ឍន៍៍តំបន់ឧស្សាហកម្ម

        ដោយសារការរីកចម្រើននៃនគរូបនីយកម្ម ដែលប្រជាជនមានការកើនឡើងនៅក្នុងទីក្រុង កំនើនការកកស្ទះចរាចរណ៍៍ កំនើននៃការអភិវឌ្ឍន៍លំនៅដ្ឋាន និងមជ្ឈមណ្ឌ​លពាណិជ្ជកម្មនានា បានធ្វើឲ្យរដ្ឋាភិបាលបានដាក់ចេញគោលនយោបាយថ្មី ដោយរុញរោងចក្រ សហគ្រាសនានាចេញពីទីក្រុង ទៅកាន់តំបន់ជាយក្រុង ដូចជាតំបន់រោងចក្រសហ គ្រាសនៅតាមផ្លូវជាតិលេខ២ ម្តុំចក្រអង្រែលើ ចក្រអង្រែក្រោមជាដើម ត្រូវផ្លាស់ប្តូរទៅកាន់ផ្លូវជាតិលេខ៤១ និង៥១ ដែលចាលទ្ឋផលបានធ្វើឲ្យតម្លៃដីធ្លី នៅតំបន់នោះកើនឡើងយ៉ាងគំហុក។

ជាលទ្ឋផលតំបន់នោះ មានការរីកចម្រើនលឿន ជាមួយគម្រោងលំនៅដ្ឋាន បុរី រោងចក្រ សហគ្រាស។

តំបន់ព្រំដែន
ដោយដាក់ចេញគោលនយោបាយ ប្រែក្លាយតំបន់ព្រំដែន ជាតំបន់សន្តិភាព កិច្ចសហប្រតិបត្តិការ និងការអភិវឌ្ឍរបស់សម្តេចតេជោហ៊ុន សែនប្រមុខរដ្ឋាភិបាលកម្ពុជា បានធ្វើឲ្យតំបន់ព្រំដែននានាមានការរីកចម្រើនលឿន ដូចជាព្រំដែនបាវិត ព្រំដែនជ្រៃធំ ព្រំដែនកម្ពុជា ថៃប៉ោយប៉ែតជាដើម។

ហេតុនេះការក្តាប់ព៌តមានបានលឿន ឆាប់រហ័ស និងច្បាស់លាស់ នឹងធ្វើឲ្យការអភិវឌ្ឍឬការវិនិយោគរបស់យើងទទួលបានផលប្រយោជន៍។

តំបន់កៀកទីក្រុង

        ដោយសារទីក្រុងមានការរីកចម្រើនលឿន ការរីកចម្រើនផ្នែកនគរូបនីយកម្មទីក្រុង កាន់តែបង្កភាពស្មុគ្រស្មាញ ហេតុនេះរដ្ឋាភិបាលត្រូវតែរៀបចំ ផែនការពង្រីកទីក្រុងរៀងរាល់៥ទៅ១០ឆ្នាំម្តង អាស្រ័យលើស្ថានភាពជាក់ស្តែង។

ហេតុនេះដីធ្លីនៅតំបន់ជាយក្រុង នៅតែមានចរន្តទិញលក់សកម្ម តម្លៃដីធ្លីនៅតែកើនឡើង ដោយសារការកសាងហេដ្ឋារចនាសម្ព័ន្ឋរបស់រដ្ឋាភិបាល ភាពងាយស្រួលនៃការតភ្ជាប់លំហីរចរាចរណ៍ និងកំនើនប្រជាជនចូលមករស់នៅទីក្រុង កើនឡើងជារៀងរាល់ឆ្នាំ។

តំបន់មានមនុស្សរស់នៅច្រើន

        តាមធម្មតាតម្លៃដីធ្លីមានការកើនឡើងលឿនឬយឺត វាអាស្រ័យលើកត្តាមនុស្ស កត្តាហេដ្ឋារចនាសម្ព័ន្ឋ កត្តាសេដ្ឋកិច្ច ពោលគឺសេដ្ឋកិច្ចមានការកើនឡើង និងស្ថេរភាពនយោ​បាយ។ ហេតុនេះ តម្លៃដីធ្លីនៅតាមតំបន់និមួយៗតែងតែឡើងថ្លៃ ឬស្ថិតនៅទ្រឹងអាស្រ័យ​លើកត្តាទាំងនេះ។

តម្លៃដីធ្លីនឹងមិនកើនឡើងខ្ពស់នោះទេ បើតំបន់នោះគ្មានមនុស្សរស់នៅច្រើន និងគ្មានហេដ្ឋារចនាសម្ព័ន្ឋតភ្ជាប់ល្អប្រសើរ។

អានព៌តមានឲ្យបានច្រើន 

        ដើម្បីក្តាប់ដឹងព៌តមានទាក់ទងនឹងគោលនយោបាយ ផែនការអភិវឌ្ឍន៍របស់រដ្ឋាភិបាល សេដ្ឋកិច្ចមានស្ថានភាពបែបណា ការអានព៌តមានជាប្រចាំពិតជាមានសារៈសំខាន់ ណាស់ ដើម្បីអាចឲ្យលោក អ្នកបានដឹងព៌តមានច្រើន លំអិត ស៊ីជម្រៅ ដើម្បីប្រើប្រាស់ជាមូលដ្ឋានសំរាប់ការវិភាគ ពិចារណាគ្រប់ជ្រុងជ្រោយ មុនសម្រេចចិត្តវិនិយោគ និងធ្វើឲ្យការវិនិយោគរបស់ខ្លួនមិនប្រឈមនឹងហានិភ័យខ្ពស់៕

        ដោយគង់ សូរិយា

        ភ្នំពេញៈ ប្រភពព៌តមានគួរឲ្យទុកចិត្តបានបង្ហើបឲ្យដឹងថា អ្នកវិនិយោគចិនធំៗនឹងត្រលប់មកកម្ពុជាវិញ ពិសេសភ្ញៀវទេសចរណ៍ចិន នឹងមកទស្សនាកម្ពុជាច្រើននៅកំឡុងខែកុម្ភៈខាងមុខនេះ បន្ទាប់ពីពិធីបុណ្យចូលឆ្នាំប្រពៃណីជាតិចិនបញ្ចប់។

ប្រភពព៌តមានដែលធ្វើការជិតសិ្នទ្ឋជាមួយក្រុមហ៊ុនចិនធំៗ និងកម្រិតរដ្ឋាភិបាលបាននិយាយក្នុងលក្ខខ័ណ្ឌមិនបញ្ចេញឈ្មោះថា គំរោងវិនិយោគចិនធំៗនៅកម្ពុជា ពិសេ​សក្រុងព្រះសីហនុ នឹងមានសកម្មភាពរសរវើកឡើងវិញ បន្ទាប់ពីអ្នកវិនិយោគចិនធំៗត្រលប់មកជាថ្មី ព្រោះគំរោងតម្លៃរាប់ពាន់លានដុល្លារជាច្រើននឹងចាប់ផ្តើមនៅកម្ពុជា តាម​រយៈអ្នកវិនិយោគចិន។

លោកបន្តថា “អ្នកវិនិយោគចិនភាគច្រើន បានត្រៀមត្រលប់មកកម្ពុជារួចហើយ ប៉ុន្តែពួកគេបានផ្អាកវិញ ដោយសារបញ្ហាការរីករាលដាលមេរោគកូវីដ១៩ ដែលបានកើតឡើងម្តងទៀត”។លោកបន្តថា “អ្នកវិនិយោគចិនធំៗ ដែលបានសាងសង់អាគារមជ្ឈម​ណ្ឌលពាណិជ្ជកម្មធំៗ ពួកគេមិនបោះបង់គម្រោងពួកគេចោលនោះទេ ពួកគេមកវិញជាមួយនឹងផែនការសកម្មភាព និងវិនិយោគមានភាពស៊ីជម្រៅជាងមុន”។

ជាមួយគ្នានេះ កញ្ញាហ្សាង ហៅសារ៉ាយអ្នកសារព៌តមានតំណាងរដ្ឋាភិបាលចិនប្រចាំកម្ពុជា បានមានប្រសាសន៍ឲ្យដឹងកាលពីសប្តាហ៍មុនថា តាមពិតភ្ញៀវទេសចរណ៍ចិន បានត្រៀមមកទស្សនាកម្ពុជាច្រើនឡើងវិញរួចហើយ ប៉ុន្តែនៅពេលពួកគេត្រៀមមក ប្រទេសកម្ពុជាបានកើតមានព្រឹត្តិការណ៍៣វិច្ឆិកា ហើយពួកគេត្រៀមមកម្តងទៀត ស្រាប់​តែព្រឹត្តិការណ៍២៨វិច្ឆិកាបានកើតមានម្តងទៀត។

កញ្ញាបន្តថា “ខ្ញុំជាអ្នកសរសេររបាយការណ៍ទៅរដ្ឋាភិបាលចិន ដើម្បីជំរាបពីស្ថានភាពប្រទេសកម្ពុជា ប៉ុន្តែស្ថានភាពនេះខ្ញុំមិនដឹងសរសរបែបណាឡើយ ហេតុនេះមានតែស្ងៀមស្ងាត់សិន”។កញ្ញាបន្តថា “ខ្ញុំចូលចិត្តប្រទេសកម្ពុជា ខ្ញុំរស់នៅទីនេះ៨ឆ្នាំហើយ ខ្ញុំតែងតែសរសេររឿងរ៉ាវល្អៗពីកម្ពុជា”។

នៅពេលសួរថា អ្នកវិនិយោគចិនធំៗនឹងត្រលប់មកកម្ពុជាវិញឬទេ? កញ្ញាហ្សាង ហៅសារ៉ាយបានមានប្រសាសន៍ឲ្យដឹងថា តាមព៌តមានដែលកញ្ញាទទួលបាន ពួកគេនឹងត្រលប់មកកម្ពុជាវិញនៅពេលខាងមុខ ប៉ុន្តែលឿនកម្រិតណាវាអាស្រ័យលើស្ថានភាពនៃការរីករាលដាលមេរោគកូវីដ១៩នៅទីនេះថា តើរដ្ឋាភិបាលកម្ពុជាគ្រប់គ្រងវាបានដោយរបៀបណា។

ពាក់ព័ន្ឋព្រឹត្តិការណ៍៍២៨វិច្ឆិកា កញ្ញាហ្សាងបានឲ្យដឹងថា “នៅប្រទេសចិន អ្នកឆ្លងជំងឺកូវីដហើយចេញដើរបំពាន បំរ៉ាមរដ្ឋាភិបាលចំនួន២នាក់ ត្រូវបានចាប់ដាក់ពន្ឋធនាគារ ប៉ុន្តែនៅកម្ពុជាខ្ញុំមិនដឹងទេ”។

រដ្ឋាភិបាលកម្ពុជា ចិនបានដាក់ចេញយុទ្ឋសាស្រ្តភាពជាដៃគូ គ្រប់ជ្រុងជ្រោយចាប់តាំងពីឆ្នាំ២០១០កន្លងមកនេះ ដែលចាប់តាំងពីពេលនោះមក អ្នកវិនិយោគចិន ភ្ញៀវទេសចរណ៍ចិន ពិសេសជំនួយឥតសំណង និងហិរញ្ញប្បទានមានការប្រាក់ទាបបានកើងឡើងយ៉ាងគំហុកនៅកម្ពុជា។

ក្នុងកំឡុងទស្សនកិច្ចនៅកម្ពុជាកំឡុងឆ្នាំ២០១៦ ប្រធានាធិបតីចិនលោកស៊ី ជីនពីងបានហៅកម្ពុជាជាមិត្តដែកថែប និងអាចទុកចិត្តបាន ហើយលោកបានអះអាងថា “ចិននឹងជំរុញការរីកចម្រើនដល់កម្ពុជា និងជួយការពារអធិបតេយ្យ និងបូរណៈភាពកម្ពុជា”៕

ដោយ៖ សុខុម

ភ្នំពេញ៖ យោងតាមការប៉ាន់ប្រមាណជាផ្លូវការ និងការព្យាកររបស់ក្រុមសេដ្ឋវិទូបង្ហាញថា អត្រាកំណើនសេដ្ឋកិច្ចរបស់កោះតៃវ៉ាន់ អាចនឹងវ៉ាឈ្នះកំណើនសេដ្ឋកិច្ចរបស់ចិនដីគោក ជាលើកដំបូងគួរឱ្យភ្ញាក់ផ្អើលក្នុងរយៈពេលជិត ៣០ឆ្នាំ។ នេះបើយោងតាមកាសែត South China Morning Post ចុះផ្សាយកាលពីថ្ងៃទី១២ ធ្នូ។

រដ្ឋាភិបាលកោះតៃវ៉ាន់ បានកែសម្រួលការប៉ាន់ប្រមាណអំពីកំណើនសេដ្ឋកិច្ចប្រចាំឆ្នាំរបស់ខ្លួនឡើងទៅដល់ ២,៥% កាលពីដំណាច់ខែមុន។ ទោះបីជារដ្ឋាភិបាលចិនដីគោក មិនទាន់ប្រកាសពីគោលដៅកំណើនសម្រាប់ឆ្នាំនេះក្ដី ក៏បណ្ដាសេដ្ឋវិទូព្យាករថា កំណើននោះអាចមានប្រមាណ ២% ដែលជាការងើបយ៉ាងឆាប់រហ័សពីការឆ្លងរាតត្បាតវីរុសកូវីដ-១៩ សម្រាប់ឆ្នាំនេះ។

ប្រសិនបើតួលេខនេះត្រូវបានបញ្ជាក់ជាការពិតមែនពេលចេញនៅដើមឆ្នាំក្រោយ នោះវាគឺជាលើកដំបូងហើយដែលកំណើនសេដ្ឋកិច្ចរបស់កោះតៃវ៉ាន់ វ៉ាឈ្នះកំណើនសេដ្ឋកិច្ចរបស់ចិនដីគោក ចាប់តាំងពីឆ្នាំ១៩៩១ មក។

ទាំងចិនដីគោក និងកោះតៃវ៉ាន់ សុទ្ធតែស្ថិតក្នុងចំណោមសេដ្ឋកិច្ចដែលធ្វើបានល្អបំផុតនៅក្នុងការទប់ការឆ្លងរាតត្បាតវីរុសកូវីដ-១៩ ថ្វីបើប្រើប្រាស់វិធីសាស្ត្រផ្សេងគ្នាយ៉ាងណាក្ដី។ ទន្ទឹមនេះ ប្រទេសចិន ក៏បានព្យាយាមទប់ការវិនិយោគបរទេសពីកោះតៃវ៉ាន់ ដែលបាននិងកំពុងធ្លាក់ចុះផងដែរ។

លោក លូអ៊ីស គូវីស (Louis Kuijs) ប្រធានផ្នែកសិក្សាសេដ្ឋកិច្ចអាស៊ីប្រចាំក្រុមហ៊ុន Oxford Economics ដែលជាក្រុមហ៊ុនផ្ដល់សេវាព្យាករណ៍សេដ្ឋកិច្ច និងការវិភាគបែបបរិមាណវិស័យទូទាំងពិភពលោកបានលើកឡើងថា “ហេតុផលចម្បងដែលកោះតៃវ៉ាន់ អាចនឹងទទួលបានកំណើនជាមធ្យមប្រហាក់ប្រហែលគ្នា ឬសូម្បីខ្ពស់ជាងកំណើនសេដ្ឋកិច្ចរបស់ចិនដីគោល គឺដោយសារកោះតៃវ៉ាន់ អាចជៀសផុតការធ្លាក់ចុះទិន្នផលខ្លាំងកាលពីដើមឆ្នាំនេះ។ ដោយឡែកនៅចិនដីគោក មានបម្រាមហាមឃាត់មិនឱ្យប្រជាជនចេញពីផ្ទះ និងការបិទមួយផ្នែកធំនៃសេដ្ឋកិច្ចក្នុងត្រីមាសទី១។ កោះតៃវ៉ាន់ ប្រហែលជាគំរូល្អបំផុតដែលមិនបានជ្រើសរើសការបិទសេដ្ឋកិច្ចទ្រង់ទ្រាយធំបែបនេះ”។

ក្នុងត្រីមាសទី៣ សេដ្ឋកិច្ចរបស់កោះតៃវ៉ាន់ បានកើនឡើង ៣,៩% ពីឆ្នាំ២០១៩ ហើយគេរំពឹងថាវានឹងកើនឡើង ៣,៣% នៅក្នុងត្រីមាសទី៤ នេះបើយោងតាមរដ្ឋាភិបាលកោះតៃវ៉ាន់។ សេដ្ឋកិច្ចរបស់កោះតៃវ៉ាន់ ទទួលបានកំណើនដោយសារការវិនិយោគក្នុងស្រុករឹងមាំ ជាពិសេសឧស្សាហកម្មផលិតបន្ទះឈីប និងការនាំចេញផលិតផលគ្រឿងអេឡិចត្រូនិក។

លោក ហ្វ្រេដឺរីក នូមែន (Frederic Neumann) សហប្រធានផ្នែកសិក្សាស្រាវជ្រាវសេដ្ឋកិច្ចអាស៊ីប្រចាំនៅក្រុមហ៊ុនអង់គ្លេស HSBC ជាក្រុមហ៊ុនវិនិយោគពហុជាតិសាសន៍ និងផ្ដល់សេវាហិរញ្ញវត្ថុ បានលើកឡើងថា “តម្រូវការរបស់ពិភពលោកនៅឆ្នាំនេះបានងាកទៅរកទំនិញរបស់កោះតៃវ៉ាន់ ជាពិសេសគ្រឿងអេឡិចត្រូនិក។ បរិបទថ្មីនៃការធ្វើការងារពីផ្ទះដែលធ្វើឱ្យតម្រូវការកុំព្យូទ័រ Laptop និងគ្រឿងអេឡិចត្រូនិចផ្សេងៗទៀតកើនឡើង បណ្ដាក្រុមហ៊ុននាំចេញរបស់តៃវ៉ាន់ ជាអ្នកទទួលបានអត្ថប្រយោជន៍ដោយផ្ទាល់។ ហើយក៏មានការពាក់ព័ន្ធទៅនឹងការបន្តកើនឡើងនូវតម្រូវការបន្ទះឈីបដែលកោះតៃវ៉ាន់ កំពុងតែកាក់កបមួយរយៈពេលវែងគួរសមផងដែរ”។

សង្គ្រាមពាណិជ្ជកម្មសហរដ្ឋអាមេរិក-ចិន និងការពង្រីកការរឹតបន្តឹងរបស់សហរដ្ឋអាមេរិក លើការនាំចេញគ្រឿងបង្គុំបន្ទះឈីបទៅកាន់ប្រទេសចិន មួយអន្លើបានរួមចំណែកជួយជំរុញការនាំចេញរបស់កោះតៃវ៉ាន់ ទៅកាន់ប្រទេសចិន ឱ្យកើនឡើងខ្ពស់មិនធ្លាប់មានក្នុងខែវិច្ឆិកា។

ក្នុងរយៈពេល ១១ ខែនៃឆ្នាំ២០២០ ការនាំចេញរបស់កោះតៃវ៉ាន់ ទៅកាន់ចិនដីគោក បានកើនឡើង ១១% រហូតដល់ទំហំទឹកប្រាក់ ៩២ ពាន់លានដុល្លារអាមេរិក ដែលស្មើនឹង ១ ភាគ ៣ នៃការនាំចេញសរុប ខណៈក្រុមហ៊ុនជាច្រើននៅចិនដីគោក បាននិងកំពុងទិញបន្ទះឈីបស្តុកទុកដើម្បីត្រៀមលក្ខណៈទប់ទល់នឹងបម្រាមនាំចេញរបស់សហរដ្ឋអាមេរិក។

លោក ឡយ ចាន់ (Lloyd Chan) សេដ្ឋវិទូប្រចាំក្រុមហ៊ុន Oxford Economics ដែលផ្ដោតលើបញ្ហាកោះតៃវ៉ាន់ និយាយថា “នៅតាមរោងចក្រផលិតបន្ទះឈីបជាច្រើននៅកោះតៃវ៉ាន់ ដំណើរការផលិតភាគច្រើនគឺស្វ័យប្រវត្តិទាំងស្រុង។ ទោះបីជាកោះតៃវ៉ាន់ រងផលប៉ះពាល់ដោយសារវីរុសកូវីដ យ៉ាងណាក្ដី ក៏បណ្ដារោងចក្រផលិតឈីបត្រៀមខ្លួនរួចជាស្រេចដើម្បីបន្តដំណើរការផលិតក៏ព្រោះតែដំណើរការដោយស្វ័យប្រវត្តិ”។

សេដ្ឋវិទូដដែលបានបន្តថា ខណៈតម្រូវការគ្រឿងអេឡិចត្រូនិកដែលកើតមានឡើងដោយសារការឆ្លងរាតត្បាតអាចនឹងថមថយទៅវិញក្នុងឆ្នាំ២០២១ នៅពេលវីរុសកូវីដ-១៩ ស្ថិតក្រោមការគ្រប់គ្រងបានជាបន្តបន្ទាប់ទូទាំងសកលលោក បច្ចេកវិទ្យាថ្មីៗដូចជា 5G និងការផ្ទេរការផលិតពីប្រទេសចិន ទៅកោះតៃវ៉ាន់ នឹងរក្សាការដឹកជញ្ជូនពីកោះតៃវ៉ាន់ ទៅកាន់ពិភពលោក។

ទិន្នន័យពីក្រសួងពាណិជ្ជកម្មរបស់ប្រទេសចិន បានបង្ហាញថា ចាប់តាំងឆ្នាំ២០១៩ ការវិនិយោគបរទេសពីកោះតៃវ៉ាន់ រួមទាំងការវិនិយោគដែលឆ្លងកាត់កំពង់ផែដោយសេរីដូចជាកោះកៃម៉ង់ (Cayman Islands) នៅតំបន់ការ៉ាអ៊ីព ដែលគ្រប់គ្រងដោយអង់គ្លេស ជាដើម បាននិងកំពុងធ្លាក់ចុះយ៉ាងខ្លាំង។ តួយ៉ាង ក្នុងឆមាសទី១ ដើមឆ្នាំនេះ វាបានធ្លាក់ចុះ ៤៦% ធៀបនឹងឆ្នាំ២០១៩។
លោក ឆាលស៍ អ៊ូ (Charles Wu) សាស្រ្តាចារ្យរងផ្នែកការទូតនៅសកលវិទ្យាល័យជាតិ ឈឹងឈី (Nationa

l Chengchi University) នៅកោះតៃវ៉ាន់ បានគូសបញ្ជាក់ថា ការនាំចេញដ៏រឹងមាំរបស់កោះតៃវ៉ាន់ ទៅកាន់ចិនដីគោក នៅឆ្នាំនេះជាភ័ស្តុតាងបង្ហាញថា កោះតៃវ៉ាន់ មិនអាចកាត់ផ្ដាច់ពីទីផ្សារចិនដីគោក បានឡើយ។

ប្រសិនបើកោះតៃវ៉ាន់ ពិតជាអាចវ៉ាឈ្នះកំណើនសេដ្ឋកិច្ចរបស់ចិនដីគោក មែននោះ អ្នកវិភាគភាគច្រើនរំពឹងថា វានឹងមិនកើតឡើងជាលើកទី២ ឡើយ ព្រោះពួកគេបានព្យាករថា សេដ្ឋកិច្ចរបស់ចិនដីគោក នឹងទទួលបានកំណើនកាន់តែរឹងមាំនៅឆ្នាំក្រោយ។ ហើយរដ្ឋាភិបាលកោះតៃវ៉ាន់ ប៉ាន់ប្រមាណថា កំណើនសេដ្ឋកិច្ចរបស់ខ្លួននឹងកើនឡើងដល់ ៣,៨៣% សម្រាប់ឆ្នាំក្រោយដែលនៅតែជាកំណើនដ៏រឹងមាំសម្រាប់ប្រទេសអភិវឌ្ឍន៍៕

ដោយ ៖ គង់ ម៉ាលីន

ភ្នំពេញ ៖ ក្រុមហ៊ុនកំពង់ផែស្វយ័តភ្នំពេញ បានបង្ហាញពីទិន្នន័យនៃប្រាក់ចំណូលនៅក្នុងឆ្នាំ២០២០ មានចំនួនត្រឹមជាង២៨លានដុល្លារ មានការធ្លាក់ចុះតិចតួចបើធៀបទៅនឹងឆ្នាំ២០១៩កន្លងទៅនេះ។

ប្រតិបត្តិករកំពង់ផែទន្លេ ដែលគ្រប់គ្រងដោយរដ្ឋនេះ នៅក្នុងឯកសារផ្ញើទៅក្រុមហ៊ុនផ្សារមូលបត្រកម្ពុជា (CSX) កាលពីថ្មីៗនេះ បានរាយការណ៍ប្រាក់ចំណូលដែលប៉ាន់ប្រមាណជាង ២៨,៨៦៣ លានដុល្លារ បើធៀបនឹងជាង ៣០,២៦០ លានដុល្លារ កាលពីឆ្នាំ ២០១៩ ធ្លាក់ចុះ ៤,៦ ភាគរយ។

ក្រុមហ៊ុន បានឱ្យដឹងថា កុងតឺន័រតាមរយៈកំពង់ផែមានកំណើន ២ភាគរយ ប៉ុន្តែសម្រាប់ការដឹកជញ្ជូនទំនិញ និងប្រេងឥន្ធនៈឧស្ម័នបានធ្លាក់ចុះ ១,២ ភាគរយ បរិមាណនាវាដឹកទំនិញធ្លាក់ចុះ ៣,៤៩ ភាគរយ ចំនួនកាណូតដឹកអ្នកដំណើរធ្លាក់ចុះ ៦៨,២៦ ភាគរយ និងចំនួនអ្នកដំណើរ ថយចុះ ៦៩,៨៦ ភាគរយ។
ក្រុមហ៊ុននេះក៏បានកត់ត្រាប្រាក់ចំណេញសុទ្ធដែលប៉ាន់ប្រមាណចំនួន ៩,៦៨៩ លានដុល្លារ ធៀបនឹងចំនួន ១០,៥៤៧ លានដុល្លារធ្លាក់ចុះជាង ៨ ភាគរយ។

របាយការណ៍របស់ CSX បង្ហាញថា គិតត្រឹមខែតុលា CSX ទទួលបានក្រុមហ៊ុនចុះបញ្ជីចំនួន ១៣ ក្នុងចំណោមនោះក្រុមហ៊ុនចំនួន ៧ ចុះបញ្ជីភាគហ៊ុន និងក្រុមហ៊ុន ៦ ចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង ១៣ នេះបានប្រមូលមូលនិធិរួមចំនួន ២៥៣ លានដុល្លារ និងសន្ទស្សន៍ភាគហ៊ុនបានកើនជាង ៥៧ ភាគរយ កាលពីឆ្នាំមុនធៀបនឹងឆ្នាំ ២០១៨។

ក្នុងរយៈពេល ៩ ខែដំបូងឆ្នាំនេះ ក្រុមហ៊ុន ២ បានចុះបញ្ជីភាគហ៊ុន និងក្រុមហ៊ុន ៣ ផ្សេងទៀតចុះបញ្ជីមូលបត្របំណុល។ ក្រុមហ៊ុនទាំង ៥ នេះប្រមូលមូលនិធិរួមចំនួន ៩២ លានដុល្លារ៕

ដោយៈ វី​ធុ​ត

ភ្នំពេញៈ ក្រុមហ៊ុន Maserati ដែលជា​អ្នក​ផលិត​រថយន្តប្រណីតៗ និង​មូលដ្ឋាន​នៅ​ប្រទេស​អ៊ីតាលី ប្រកាស​ឈាន​ជើង​ចូលមក​ទីផ្សារ​កម្ពុជា ហើយ​មាន​មហិច្ឆតា​ប្រែក្លាយជា​អ្នកផ្គត់ផ្គង់​រថយន្ត​ប្រណីត លំដាប់​ពិភពលោក​នៅ​ទីផ្សារ​កម្ពុជា។ នេះ​បើ​យោងតាម​សេចក្តីប្រកាស​ព័ត៌មាន​របស់​ក្រុមហ៊ុន កាល​ចុង​សប្តាហ៍​កន្លងមកនេះ។

ក្រុមហ៊ុន Maserati ត្រូវបាន​តំណាង​នៅក្នុង​ប្រទេស​កម្ពុជា ដោយ​ក្រុមហ៊ុន HGB Group ដែលជា​ប្រតិបត្តិ​ករ​ផ្គត់ផ្គង់​រថយន្ត​ដ៏​ល្បីល្បាញ​មួយ ហើយ​មាន​វត្តមាន​នៅលើ​ទីផ្សារ​ចាប់តាំងពី​ឆ្នាំ២០១០ ។ ក្រុមហ៊ុន HGB Group នឹង​ចែកចាយ​រថយន្ត​ប្រណីត​របស់​អ៊ីតាលី ដែល​ត្រូវបាន​បាន​រចនា​ឡើង និង​ផលិត​ថ្មី​ប្រកបដោយ​ភាព​ច្នៃប្រឌិត ដើម្បី​បំពេញ​តាម​តម្រូវការ​របស់​អតិថិជន​យ៉ាង​ពេញលេញ។

ការតាំង​បង្ហាញ​រថយន្ត Maserati របស់​ក្រុមហ៊ុន HGB Group ត្រូវបាន​ធ្វើឡើង​នៅ​ទីតាំង​ដែលមាន​ភាពឆើតឆាយ និង​លេចធ្លោ​ជាងគេ​នៅ​រាជធានី​ភ្នំពេញ សម្រាប់​ស្វាគមន៍​អតិថិជន​របស់ Maserati នៅ​កម្ពុជា។

លោក Bernard Loire ប្រធាន​ផ្នែក​ពាណិជ្ជកម្ម​ក្រុមហ៊ុន Maserati បាន​និយាយថា “ការជ្រើសរើស​ដៃគូ​ត្រឹមត្រូវ និង​មាន​ផលិតផលល្អៗ គឺជា​គ្រឹះ​សម្រាប់​ភាពជោគជ័យ​របស់​យើង​នៅ​ទូទាំង​តំបន់” ។ លោក​បន្តថា “ក្រុមហ៊ុន​Maserati កំពុង​ឈានចូល​ក្នុងដំណាក់កាល​នៃ​ការផ្លាស់ប្តូរ​យ៉ាងខ្លាំង ជាមួយនឹង​ការច្នៃប្រឌិត​និង​គម្រោងថ្មីៗ ហើយ​ឥឡូវនេះ យើង​ផ្តោតអារម្មណ៍​យ៉ាងខ្លាំង​លើ​អនាគត រួមទាំង​ម៉ូ​ដែល Hybrid និង​អគ្គិសនី។ សម្រាប់​ហេតុផល​ទាំងនេះ វា​ជា​ពេលវេលា​ល្អ ដើម្បី​ចូលរួម​ជាមួយ​យើង ក្នុងការ​ចាប់ផ្តើម​នៃ​សម័យ Maserati ថ្មី” ។

លោក Luca Delfino ប្រធាន​ក្រុមហ៊ុន Maserati ប្រចាំ​តំបន់​អាស៊ី​ប៉ាស៊ីហ្វិក បាន​ថ្លែងថា “ក្រុមហ៊ុន​Maserati បាន​នឹង​កំពុង​បង្កើត​វត្តមាន​របស់ខ្លួន យ៉ាងសកម្ម​នៅក្នុង​តំបន់​អាស៊ីអាគ្នេយ៍ ក្នុង​ប៉ុន្មាន​ឆ្នាំ​ចុង​ក្រោយនេះ” ។

លោក​បាន​ថ្លែង​ទៀតថា “យើង​មាន​ដៃគូ​រួចហើយ​នៅ​ប្រទេស​សិង្ហ​បុរី ម៉ាឡេស៊ី ថៃ វៀតណាម និង​ឥណ្ឌូនេស៊ី” ។ លោក​បន្តថា “ប្រទេស​កម្ពុជា គឺជា​ទីផ្សារ​ដែលមាន​ស​ក្តា​នុព​ល​មួយ សម្រាប់​កំណើន Maseratiនៅ​អាស៊ីអាគ្នេយ៍ ហើយ​យើង​រីករាយ ដែលមាន​ក្រុមហ៊ុន HGB Group ជា​ដៃគូ ដើម្បី​ពង្រឹង​តួនាទី​របស់​យើង​ជា​ម៉ាក​រថយន្ត​ប្រណីត” ៕ ‘