ក្រុមហ៊ុនចិន និងអាហ្សង់ទីនចុះកិច្ចព្រៀងសាងសង់ផ្លូវដែកក្នុងទំហំទឺកប្រាក់ ៤,៧ពាន់លានដុល្លារ

ដោយ វុត្ថា

ប៉េកាំងៈ ក្រុមហ៊ុនចិន និងប្រួសអាហ្សង់ទីន បន្តធ្វើកិច្ចសហប្រតិបត្តិការសាងសង់ផ្លូវដែក បន្ទាប់ពីបានចុះហត្ថលេខាលើកិច្ចព្រមព្រៀងថ្មីចំនួន៤ ដើម្បីពង្រឹងការតភ្ជាប់ និងសមត្ថភាពនាំចេញ និងបង្កើតការងាររបស់ប្រទេសអហ្សង់ទីន។

លោក Mario Meoni រដ្ឋមន្ត្រីក្រសួងដឹកជញ្ជូន នៃប្រទេសអាហ្សង់ទីនបានប្រាប់អ្នកសារព័ត៌មាន កាលពីសុក្រចុងសប្តាហ៍កន្លមងកនេះថា កិច្ចសន្យាដែលមានតម្លៃប្រហែល៤,៧ពាន់លានដុល្លារក្នុងការវិនិយោគ និងជាការចាប់ផ្តើមការអភិវឌ្ឍផ្លូវដែក នៅក្នុងប្រទេសអាហ្សង់ទីន។

លោកបន្តថា “ក្រុមហ៊ុនដែលចូលរួមក្នុងការធ្វើឱ្យប្រសើរឡើង នូវបណ្តាញផ្លូវដែករបស់ប្រទេសអាហ្សង់ទីន រួមមាន សាជីវកម្មសំណង់ផ្លូវដែកចិន (CRCC) ក្រុមហ៊ុនវិស្វកម្មចិន និងសាជីវកម្ម CRRC” ។

លោកបន្ថែមថា កិច្ចព្រមព្រៀងនេះ នឹងធ្វើការស្តារឡើងវិញ នូវផ្លូវដែករបស់ភាគខាងជើងប្រទេសអាហ្សង់ទីន ជាមួយនឹងការវិនិយោគជាង៨១៦លានដុល្លារ និងភាគខាងត្បូងវិនិយោគជាង២,៦ពាន់លានដុល្លារ និងគម្រោងហេដ្ឋារចនាសម្ព័ន្ធ ដែលនឹងត្រូវការការវិនិយោគ៧៨៤លានដុល្លារ។

លោកបន្ថែមទៀតថា កិច្ចព្រមព្រៀងទី៤ នឹងធ្វើឱ្យប្រសើរឡើងនូវបណ្តាញរថភ្លើងដឹកអ្នកដំណើរ ដែលបម្រើការធ្វើដំណើរនៅក្នុងតំបន់ Buenos Aires Metropolitan និងប្រព័ន្ធដឹកជញ្ជូនខេត្តចំនួន១៣ នៃប្រទេសអាហ្សង់ទីន ដោយចំណាយទឹកប្រាក់សរុប ៥០០លានដុល្លារ។

លោក Meoni បានបន្ថែមទៀតថា“ គម្រោងទាំងនេះ ពិតជាជះឥទ្ធិពលយ៉ាងខ្លាំងទៅលើការបង្កើតឱ្យមានការងារផ្ទាល់ ច្រើនជាង ៣៥០០កន្លែង” ។ លោក Meoni បានកត់សម្គាល់ថា “កិច្ចសហប្រតិបត្តិការជាមួយប្រទេសចិន បង្ហាញនូវឱកាសមួយដើម្បីកាត់បន្ថយថ្លៃដើមដឹកជញ្ជូន ខណៈពេលដែលប្រទេសនេះ ជំរុញការប្រកួតប្រជែងនៃការនាំចេញកសិកម្ម” ៕

ខេត្តរតនៈគិរីគ្រោងបង្កើតកោះសិប្បនិម្មិតទំហំជាង៥ហិកតានៅកណ្តាលបឹងកន្សែង

ដោយៈ រ៉ាណេត

រតនៈគីរីៈ កោះសិប្បនិម្មិតថ្មីមួយ ដែលមានទំហំ៥,៣១ហិកតា គ្រោងនឹងបង្កើតឡើងនៅចំកណ្តាលផ្ទៃបឹងកន្សែង ក្រុងបានលុង ខេត្តរតនៈគីរី ដោយមានការរៀបចំជាតំបន់ធម្មជាតិ ជាទីជម្រកសត្វស្លាប ក្នុងនាមជាផលិតផលថ្មី ក្នុងវិស័យទេសចរណ៍ប្រចាំខេត្ត។ នេះបើតាមការបង្ហើបប្រាប់ពីរដ្ឋបាលខេត្តរតនៈគីរី កាលពីចុងសប្ដាហ៍កន្លងទៅនេះ។

ស្ថិតនៅក្នុងផែនការអភិវឌ្ឍន៍ និងលើកកម្ពស់សោភ័ណភាពក្រុង ដើម្បីបង្កើនភាពទាក់ទាញលើការវិនិយោគ ពាណិជ្ជកម្ម និងទេសចរណ៍ កាលពីថ្ងៃចុងសប្ដាហ៍កន្លងទៅនេះ រដ្ឋបាលខេត្តរតនៈគីរី បានបង្ហាញពីគម្រោងរៀបចំ និងស្ថាបនាទីសាធារណៈនានា ជាពិសេសតំបន់គោលដៅ ទេសចរណ៍សំខាន់ៗប្រចាំខេត្ត ដែលក្នុងនោះក៏មានការកសាងកោះសិប្បនិម្មិតលើកដំបូង មិនធ្លាប់មាននៅកណ្តាលផ្ទៃបឹងកន្សែង ធ្វើជាទីជម្រកសម្រាប់បណ្តាសត្វស្លាប បន្ថែមពីលើសំណង់អគារនានាស្ថិតនៅជុំវិញបឹង។

អភិបាលខេត្តរតនៈគីរី លោក ថង សាវុន បានមានប្រសាសន៍ឱ្យដឹងថា “ការកែប្រែមុខមាត់ថ្មីរបស់បឹងកន្សែង នៅក្នុងផែនការនៃប្លង់មេ នឹងមានការសាងសង់អគាររដ្ឋបាល អគារសារមន្ទីរ អគារសាលតាំងពិព័រណ៍ ទីធ្លាចំណតរថយន្ត ផ្លូវសម្រាប់ថ្មើរជើងនៅជុំវិញបឹង សួនច្បារ និងកោះសប្បនិម្មិតជាទីជម្រកសត្វស្លាបនៅកណ្ដាលបឹងផងដែរ” ។

លោកបានបញ្ជាក់ថា បឹងកន្សែងមានផ្ទៃទឹក១៨,៨១ហិកតា ស្ថិតនៅភូមិអូរកន្សែង សង្កាត់បឹងកន្សែង ក្រុងបានលុង និងមានដើមឈើដុះស្អេកស្កះនៅជុំវិញបឹង។ ចំពោះអគាររដ្ឋបាល អគារមហោស្រពគ្របដណ្ដប់ លើផ្ទៃដីមានទំហំ១,១៦ហិកតា និងកោះអណ្តែត៥,៣១ហិតតា។ លោកបន្តថា ក្រោយការសាងសង់ និងរៀបចំរួចរាល់ អ្នកទេសចរអាចជួបជុំគ្នាជាលក្ខណៈគ្រួសារ មិត្តភ័ក្តិ អង្គុយទទួលទានអាហារនៅក្បែរមាត់បឹង អមជាមួយបរិយាកាសដ៏ស្រស់ស្រាយរបស់បឹងកន្សែង។

ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីន បានបង្ហាញពីក្ដីសាទរចំពោះគម្រោង និងផែនការអភិវឌ្ឍន៍ខាងលើមួយនេះ ដោយលោកស្រីបានមានប្រសាសន៍ថា “តាមរយៈផែនការនេះ វាគឺជាការបង្កើតនូវផលិតផលទេសចរណ៍ថ្មីដែលមិនធ្លាប់មាននៅក្នុងខេត្តមួយនេះ” ។

លោកស្រីបានបញ្ជាក់ថា ខេត្តរតនៈគីរី ត្រូវបានគេស្គាល់ថា ជាគោលដៅទេសចរណ៍ធម្មជាតិដ៏ល្បីឈ្មោះ ប៉ុន្តែអ្វីដែលសំខាន់បំផុតនោះ តំបន់ទេសចរណ៍ភាគច្រើននៅមិនទាន់មានការអភិវឌ្ឍ កែច្នៃបន្ថែមនោះទេ។ មិនថាតំបន់ទេសចរណ៍នៅក្នុងខេត្តណានោះទេ។ ប្រសិនបើមានតែរូបភាព និងទិដ្ឋភាពដដែលៗ វានឹងក្លាយជាភាពស៊ាំរបស់ទេសចរ ដែលទៅតែម្ដងឬ២ដងគេណាយចិត្តលែងចង់ទៅទៀត។

លោកស្រីថា “បឹងកន្លែងជាតំបន់ទេសចរណ៍ធម្មជាតិនៅក្នុងក្រុង ដែលខេត្តដទៃមិនមាននោះទេ ប៉ុន្តែបច្ចុប្បន្ននេះ ភាពទាក់ទាញគឺនៅមានកម្រិតបំផុត ដោយសារខ្វះការថែរទាំ ខ្វះការរៀបចំសណ្តាប់ធ្នាប់បន្ថែម។ លោកបន្តថា “ប្រសិនបើមានការរៀបចំឱ្យបានល្អ ដូចទៅនឹងអ្វីដែលបានលើកឡើង នៅក្នុងគម្រោងផែនការអភិវឌ្ឍន៍ខាងលើនេះ ខ្ញុំជឿថាភាពទាក់ទាញ នៅក្នុងវិស័យទេសចរណ៍ក្នុងក្រុងបានលុង ក៏ដូចជាខេត្តរតនៈគីរីនឹងមានការចាប់អារម្មណ៍បន្ថែមទៀត” ។

ជាមួយគ្នានេះ លោកស្រីបានស្នឱ្យមានសកម្មភាពនៃការរៀបចំសណ្ដាប់ធ្នាក់ រក្សាអនាម័យ និងការកែច្នៃបង្កើនផលិតផលទេសចរណ៍ថ្មី កើតមានឱ្យបានច្រើនកន្លែងបន្ថែមទៀត៕

អចលនទ្រព្យកម្ពុជា៖ ទិដ្ឋភាពអ្វីខ្លះនឹងប្រែប្រួល និងគួរវិនិយោគនៅឆ្នាំ២០២១?

ដោយស៊ីវ ម៉េង

ភ្នំពេញៈ អ្នកជំនាញអចលនទ្រព្យកម្ពុជា ដែលបាននិងកំពុងធ្វើការងារយ៉ាងសកម្មជាមួយអ្នកវិនិយោគចិន និងអន្តរជាតិដទៃទៀតបានប្រមើលមើលលើទិដ្ឋភាពប្រែប្រួលនៃទីផ្សារអចលនទ្រព្យកម្ពុជាសំរាប់ឆ្នាំ២០២១ខាងមុខថាតើមានភាពប្រែប្រួល និងបត់បែនបែបណា។

លោកឡោ វិចិត្រ អនុប្រធានសមាគមអចលនទ្រព្យសកលប្រចាំរាជធានីភ្នំពេញបានមានប្រសាសន៍ឲ្យដឹងនារសៀលថ្ងៃចុងសប្តាហ៍កន្លងមកថា ឆ្នាំ២០២០នៅសល់តែប៉ុន្មានថ្ងៃទៀតនឹងឈានចូលឆ្នាំ២០២១ បងប្អូនប្រាកដជាចង់ដឹងថា អចលនទ្រព្យកម្ពុជានឹងមានសភាពបែបណា ក៏ដូចជាវិវឌ្ឍន៍ដល់កម្រិតណាសំរាប់ឆ្នាំ២០២១ ខាងក្រោមនេះ???។

លោកបន្តថា ជាមួយនឹងការវិភាគផ្អែកលើទិដ្ឋភាពសេដ្ឋកិច្ចកម្ពុជា និងទិដ្ឋភាពសាកល លោកបានសង្ខែបបទបង្ហាញខ្លះៗ ដោយបែងចែកអចលនទ្រព្យជាប្រភេទសំខាន់ៗដូចជា ១ ដីធ្លី ២ ផ្ទះជាប់ដី ឬផ្ទះអាជីវកម្ម និង៣ ខុនដូជាលំនៅដ្ឋានសហកម្មសិទ្ធិ។

តើការវិនិយោគទៅលើប្រភេទមួយណាល្អជាង និងហានិភ័យនៃការវិនិយោគលើប្រភេទអចលនទ្រព្យនីមួយៗ លោកសូមធ្វើការចែករំលែកលើចំណុចសំខាន់ៗមួយចំនួន ៖

ទី១ ដីធ្លីនៅឆ្នាំ២០២១

ដីជាប្រភេទអចលនទ្រព្យល្អបំផុតសំរាប់បងប្អូន ដែលមានការស្វែងយល់ពីភូមិសាស្ត្រច្បាស់លាស់ ហើយទទួលជ្រាបព័ត៍មានជាក់លាក់ស្តីអំពីគំរោងរដ្ឋាភិបាលទៅផែនការអភិវឌ្ឍន៍ហេដ្ឋារចនាសម្ព័ន្ធដូចជាផ្លូវថ្នល់ សាលារៀន និងផ្សារជាដើម។

ប៉ុន្តែប្រភេទអចលនទ្រព្យនេះ សំរាប់បងប្អូនដែលមានសាច់ប្រាក់គ្រប់គ្រាន់ និងទុនសំរាប់វិនិយោគយ៉ាងតិចពី៣ឆ្នាំ ឬអាចរហូតដល់១០ឆ្នាំ បើទិញខុសពីតំបន់ដែលគេអភិវឌ្ឍន៍ ឬរូបរាងដីខុសប៉ាន់។ បើបងប្អូនត្រូវការសាច់ប្រាក់បង្វិលសំរាប់រកស៊ី សូមពិចារណាអោយបានច្បាស់សិនថា លទ្ធភាពយើងអាចទិញដីទំហំណា? ហើយបើកប់ទុនយូរ តើយើងទប់ទល់បាន ឬទេ?។

ទី២ ផ្ទះជាប់ដី ឬផ្ទះអាជីវកម្ម

លោកឡោ វិចិត្របានបន្តថា បច្ចុប្បន្ននេះ បើលទ្ធភាពបងប្អូននៅមានគម្រិតគឺពិបាកទិញផ្ទះនៅក្នុងក្រុងខ្លាំងណាស់ ព្រោះតម្លៃសំរាប់ផ្ទះជាប់ដីនៅកណ្តាលក្រុងគឺថ្លៃខ្លាំងណាស់ ដូច្នេះជម្រើសគឺផ្ទះជាយក្រុង។

ផ្ទះជាប់ដីជាយក្រុង គឺជាជម្រើសល្អសំរាប់បងប្អូន ដែលប្រកបអាជីវកម្ម ឬការងារនៅជាយក្រុង ព្រោះការធ្វើដំណើរបច្ចុប្បន្នគឺស្ទះចរាចរខ្លាំង ហើយប្រើពេលយូរដូចដែលបងប្អូនបានជ្រាបស្រាប់ហើយ។

ទី៣ ខុនដូ សហកម្មសិទ្ធិ

ខុនដូ ជាប្រភេទអចលនទ្រព្យថ្មីមួយ សំរាប់បងប្អូនដែលត្រូវការបែបបទរស់នៅសម័យថ្មី ហើយជាអ្នកប្រកបអាជីវកម្ម ឬការងារនៅកណ្តាលក្រុង តែលទ្ធភាពនៅមានកម្រិត។

ខុនដូផ្តល់ភាពងាយស្រួលសំរាប់ទំហំគ្រួសារតូច ឬមធ្យមដែលត្រូវការលំនៅដ្ឋានកណ្តាលក្រុង ដែលនៅជិតកន្លែងធ្វើការឬអាជីវកម្ម។

ប៉ុន្តែខុនដូរមានហានិភ័យខ្ពស់ ជាងប្រភេទអចលនទ្រព្យជាដី ឬផ្ទះជាប់ដី ព្រោះគំរោងដែលត្រូវបានបញ្ចប់ការសាងសង់ តាមកិច្ចសន្យាទិញ លក់ ហើយប្រគល់សោទៀងទាត់ជូនភ្ញៀវគឺនៅមានតិច។

បើបងប្អូនជាវប៉ះចំគំរោងស្អុយ គឺស្មើនឹងបោះលុយចោលដូចគ្នា។

ការសន្និដ្ឋាន

ប្រភេទអចលនទ្រព្យទាំងបីប្រភេទ សុទ្ធតែមានគុណវិបត្តិ និងគុណសម្បត្តិដូចគ្នាដូច្នេះបងប្អូន ត្រូវវិនិយោគទៅតាមលទ្ធភាព ដែលមានជាក់ស្តែង និងជ្រើសរើសទីតាំងដែលស្រប និងកន្លែងការងារ ឬអាជីវកម្ម ក៏ដូចជាទំហំគ្រួសារ៕

កម្ពុជាកំពុងអនុវត្តផែនការផលិតអគ្គិសនីដោយថាមពលកកើតឡើងវិញចំនួន ២៥ភាគរយនៅឆ្នាំ២០៣០

ដោយៈ រ៉ាណេត

ភ្នំពេញៈ នៅក្នុងចក្ខុវិស័យដែលជាផែនការមេរបស់រដ្ឋាភិបាល បានកំណត់ដាក់បញ្ចូលគោលដៅអនុវត្តន៍ថ្មី នៃការផលិតអគ្គិសនីដើរ ដោយថាមពលកកើតឡើងវិញប្រមាណ២៥ភាគរយ នៅក្នុងល្បាយថាមពលនៅត្រឹមឆ្នាំ២០៣០ ដើម្បីផ្គត់ផ្គង់តម្រូវការប្រើប្រាស់ជាក់ស្ដែង និងរួមចំណែកក្នុងការដោះស្រាយនូវបម្រែបម្រួលអាកាសធាតុ ដែលជាកង្វល់របស់ពិភពលោកនាពេលបច្ចុប្បន្ន។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍កាលពីថ្ងៃចុងសប្ដាហ៍កន្លងទៅនេះថា គោលដៅថ្មីនេះ ក៏រួមបញ្ចូលការផលិតអគ្គិសនី ពីថាមពលកកើតឡើងវិញចំនួន២៥ភាគរយ នៅក្នុងល្បាយថាមពល (Energy Mix)នៅឆ្នាំ២០៣០ ។ ទន្ទឹមនេះដែរ ការប្រែប្រួលអាកាសធាតុជាបាតុភូតប្រទាក់ក្រឡាគ្នា ដែលត្រូវដោះស្រាយតាមមធ្យោបាយជាកញ្ចប់គ្រប់ជ្រុងជ្រោយ ទាំងលើទិដ្ឋភាពសង្គមសេដ្ឋកិច្ច និងបរិស្ថាន។

នៅក្នុងរបាយការណ៍បច្ចុប្បន្នភាពស្តីពី ការចូលរួមចំណែករបស់ជាតិ ដើម្បីដោះស្រាយការប្រែប្រួលអាកាសធាតុ ដែលកម្ពុជាត្រៀមដាក់ជូនទៅលេខាធិការដ្ឋាន អនុសញ្ញាសហប្រជាជាតិស្តីពី ការប្រែប្រួលអាកាសធាតុ (UNFCCC) នាដំណាច់ឆ្នាំនេះ កម្ពុជា បានបញ្ចូលនូវគោលដៅថ្មីច្បាស់លាស់ ពាក់ព័ន្ធនឹងការកាត់បន្ថយ ការបញ្ចេញឧស្ម័ន ប្រមាណ៣៨,៩លានតោនសមមូលឧស្ម័នកាបូនិក រួមបញ្ចូលទាំងក្នុងវិស័យព្រៃឈើ វិស័យសំណល់ និងកសិកម្ម ឬស្មើនឹង១៨ភាគរយ ធៀបនឹងសេណារីយ៉ូតាមទម្លាប់ធម្មតា (Business As Usual) នៅត្រឹមឆ្នាំ២០៣០ ។

ស្ថិតនៅក្នុងគោលដៅខាងលើនេះ បច្ចុប្បន្នសម្រាប់វិស័យថាមពល កម្ពុជាបានគាំទ្រ និងអនុម័តលើគម្រោងស្នើសុំវិនិយោគ បង្កើតស្ថានីយផលិតអគ្គិសនី ដើរដោយថាមពលពន្លឺព្រះអាទិត្យជាច្រើនគម្រោងជាបន្តបន្ទាប់ ស្ថិតនៅតាមបណ្តាខេត្តក្រុងមួយចំនួនដូចជាខេត្តព្រះសីហនុ កំពង់ស្ពឺ ពោធិ៍សាត់ កំពង់ឆ្នាំង កណ្តាល បន្ទាយមានជ័យ និងខេត្តឧត្តមានជ័យជាដើម។

ការអភិវឌ្ឍន៍ថាមពលកកើតឡើងវិញ គឺជាគោលនយោបាយមួយរបស់រាជរដ្ឋាភិបាលកម្ពុជា ក្នុងនោះការផ្តោតជាសំខាន់ ទៅលើការអភិវឌ្ឍថាមពលពន្លឺព្រះអាទិត្យ ស្ថិតក្នុងអាទិភាពមួយ។ បណ្តាញផ្គត់ផ្គង់នៅកម្ពុជា ដែលរួមមាន២៥ខេត្តក្រុង ក្នុងនោះ១៥ខេត្ត ក្រុងបានតភ្ជាប់ជាមួយនឹងបណ្តាញបញ្ជូនជាតិ ហើយគោលដៅរបស់កម្ពុជានៅឆ្នាំ២០២០នេះ កម្ពុជានឹងរំពឹងថាសម្រេចឲ្យបាន នូវផ្តល់អគ្គិសនីឲ្យបានទាំង២៥ខេត្តក្រុង ដោយថាមពលអគ្គិសនីក្នុងប្រភេទតុងស្យង់ខ្ពស់។

រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានមានប្រសាសន៍កាលពីពេលថ្មីៗនេះថា ប្រទេសកម្ពុជាបានធ្វើបច្ចុប្បន្នភាព ផែនការថាមពលរបស់ខ្លួន សម្រាប់ឆ្នាំ២០២០ ដល់ឆ្នាំ២០៣០ បន្ថែមពីលើគម្រោងវិនិយោគលើវិស័យថាមពល ពីវិស័យឯកជន រដ្ឋាភិបាលក៏បានគ្រោងប្រើឧស្ម័នធម្មជាតិ (Natural Gas) សម្រាប់ការផលិតថាមពលអគ្គិសនី ក្នុងចំណែកមួយដ៏ធំ ដែលមានអនុភាពសរុប៣៦០០មេហ្គាវ៉ាត ដោយអាចនឹងផ្តើមអនុវត្តចាប់ពីឆ្នាំ២០២៧ រហូតដល់ឆ្នាំ២០៣០ ។

លោកបន្តថា “សេដ្ឋកិច្ចរបស់ប្រទេសកម្ពុជា ត្រូវបានរំពឹងថា នឹងងើបឡើងវិញនៅឆ្នាំ២០២១ បន្ទាប់ពីថយចុះនៃការរីករាលដាលជាសកលនៃជម្ងឺកូវីដ១៩” ។ លោកបន្តថា “ដូច្នេះតម្រូវការថាមពលរបស់ប្រទេសកម្ពុជារំពឹងថា នឹងមានសន្ទុះឡើងវិញ ក្នុងនេះឧស្ម័នធម្មជាតិ នឹងដើរតួនាទីយ៉ាងសំខាន់ សម្រាប់ល្បាយប្រភពថាមពលនៅកម្ពុជា ពិសេសក្នុងវិស័យឧស្សាហកម្ម ដឹកជញ្ជូន ពាណិជ្ជកម្ម និងលំនៅដ្ឋាន”៕

ចំណេះដឹង! អ្វីជាវិញ្ញាបនបត្របញ្ជាក់ប្រភពដើមទំនិញ?

ដោយវុត្ថា

ភ្នំពេញៈ វិញ្ញាបនបត្របញ្ជាក់ប្រភពដើមទំនិញ គឺជាឯកសារផ្លូវការមួយ ប្រើដើម្បីបញ្ជាក់ ពីប្រភពដើមទំនិញ ដែលបានផលិតឬបានទទួលទាំងស្រុង នៅក្នុងប្រទេសមួយ។

ជាទូទៅឯកសារនេះ គឺជាផ្នែកស្នូលនៃឯកសារនាំចូល ដែលប្រទេសនាំចូលបានតម្រូវ។

នៅពេលអនុវត្តទម្រង់ការទាំងឡាយ សម្រាប់នាំចេញទំនិញ ក្រោមប្រព្រឹត្តិកម្ម អនុគ្រោះ អ្នកនាំចេញឬតំណាងទទួលសិទ្ធិរបស់ខ្លួន ត្រូវដាក់ពាក្យជាលាយលក្ខណ៍អក្សរ ស្នើសុំវិញ្ញាបនបត្រ បញ្ជាក់ប្រភពដើម ទំនិញដោយភ្ជាប់មកជាមួយ នូវឯកសារគាំទ្រ ត្រឹមត្រូវ ដែលបង្ហាញថា ទំនិញដែលត្រូវនាំចេញ មានលក្ខណៈសម្បត្តិគ្រប់គ្រាន់សម្រាប់ការចេញ វិញ្ញាបនបត្របញ្ជាក់ប្រភពដើមទំនិញ។

វិញ្ញាបនបត្រ បញ្ជាក់ប្រភពដើមទំនិញ មានពីរប្រភេទគឺ៖

មិនទទួលបានភាពអនុគ្រោះពន្ធនិង
ទទួលបានភាពអនុគ្រោះពន្ធ។

ប្រទេសដែលតម្រូវឲ្យមានវិញ្ញាបនបត្រ បញ្ជាក់ប្រភពដើមទំនិញកម្ពុជាវិញ្ញាបនបត្របញ្ជាក់ ប្រភពដើមទំនិញ ទទួលបានអត្រាពន្ធអនុគ្រោះក្នុងទម្រង់ផ្សេងៗដូចជា៖

អាស៊ាន-អូស្ត្រាលី-ញ៉ូវហ្សីលែន៖ វិញ្ញាបនបត្រ បញ្ជាក់ប្រភពដើមទំនិញ ទម្រង់ AANZ
ចិន: វិញ្ញាបនបត្រ បញ្ជាក់ប្រភពដើមទំនិញទម្រង់ AC
ឥណ្ឌា: វិញ្ញាបនបត្រ បញ្ជាក់ប្រភពដើមទំនិញទម្រង់ AI
កូរ៉េ: វិញ្ញាបនបត្រ បញ្ជាក់ប្រភពដើមទំនិញទម្រង់ AK
ជប៉ុន: វិញ្ញាបនបត្រ បញ្ជាក់ប្រភពដើមទំនិញទម្រង់ AJ
វៀតណាម: វិញ្ញាបនបត្រ បញ្ជាក់ប្រភពដើមទំនិញទម្រង់ S
ប្រព័ន្ធអនុគ្រោះទូទៅ ផ្នែកពាណិជ្ជកម្ម (LDC និងLLDC): វិញ្ញាបនបត្រ បញ្ជាក់ប្រភពដើមទំនិញទម្រង់ A ។
អត្រាពន្ធមិនអនុគ្រោះអាចចេញបាន ដោយប្រើវិញ្ញាបនបត្រ បញ្ជាក់ប្រភពដើមទំនិញ ទម្រង់N៕

ក្រុមហ៊ុនភ្នាក់ងារអចលនទ្រព្យដ៏ល្បី CSA ចុះអនុស្សរណៈយោគយល់ជាមួយក្រុមហ៊ុនលំដាប់អន្តរជាតិធំចំនួន២ ជំរុញការលក់នៅកម្ពុជា

ដោយ ៖ រ៉ាណេត

ភ្នំពេញ ៖ ក្រុមហ៊ុនភ្នាក់ងារអចលនទ្រព្យដ៏ល្បីឈ្មោះ CSA Real Estate Group ដែលមានគម្រោងជាច្រើននៅក្នុងដៃបានសម្រេចធ្វើការចុះអនុស្សរណៈយោគយល់ (MOU) ជាមួយក្រុមហ៊ុនភ្នាក់ងារអចលនទ្រព្យលំដាប់អន្តរជាតិធំៗចំនួន២ រួមមានក្រុមហ៊ុន CBRE Cambodia និងក្រុមហ៊ុន APi (ATSOLUTIONS) ដើម្បីជំរុញលក់ និងលើកកម្ពស់ទីផ្សារអចលនទ្រព្យនៅកម្ពុជា។

នៅក្នុងពិធីចុះអនុស្សរណៈយោគយល់នៅព្រឹកថ្ងៃទី១២ ខែធ្នូ ឆ្នាំ២០២០ លោក Alan Neo នាយកប្រតិបត្តិក្រុមហ៊ុន Cambodia Singapore Alliance (CSA) បានមានប្រសាសន៍ថា “ក្នុងនាមជាតំណាងក្រុមហ៊ុន CSA ពិតជាមានភាពរីករាយក្នុងកិច្ចសហការជាដៃគូយុទ្ធសាស្ត្រយ៉ាងស៊ីជម្រៅជាមួយក្រុមហ៊ុនភ្នាក់ងារអចលនទ្រព្យទាំង២ ដែលសុទ្ធតែមានកេរ្តិ៍ឈ្មោះល្បីល្បាញ និងមានបទពិសោធន៍យូរឆ្នាំនៅក្នុងវិស័យអចលនទ្រព្យជាសកល”។

លោក Alan Neo បានមានប្រសាសន៍បន្តថា “ហេតុផលដែលក្រុមហ៊ុន CSA សម្រេចចិត្តសហការជាដៃគូលក់អចលនវត្ថុស៊ីជម្រៅជាមួយក្រុមហ៊ុនភ្នាក់ងារអចលនទ្រព្យ CBRE Cambodia និងក្រុមហ៊ុនភ្នាក់ងារអចលនទ្រព្យ APi (ATSOLUTIONS) ក៏ព្រោះតែក្រុមហ៊ុនទាំង២សុទ្ធតែជាក្រុមហ៊ុនជំនាញដ៏ល្បីល្បីឈ្មោះលំដាប់អន្តរជាតិ និងមានបទពិសោធន៍ក្នុងការលក់នៅក្នុងវិស័យអចលនទ្រព្យនៅកម្ពុជាច្រើនជាង១០ឆ្នាំ និងទទួលបានលទ្ធផលជោគជ័យខ្ពស់។ តាមរយៈកិច្ចចុះអនុស្សារណៈយោគយល់នៅពេលនេះ ខ្ញុំជឿជាក់ថាពិតជាអាចធ្វើឱ្យទីផ្សារលក់ ជាពិសេសផ្នែកខុនដូនៅកម្ពុជាទទួលបានជោគជ័យខ្ពស់ តាមរយៈការបំពេញបន្ថែមឱ្យគ្នាទៅវិញទៅមក”។

លោកបានបញ្ជាក់ថា អ្វីដែលសំខាន់នៅក្នុងកិច្ចសហការជាដៃគូយុទ្ធសាស្ត្រជាមួយក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia និងក្រុមហ៊ុនភ្នាក់ងារអចលនទ្រព្យ APi នៅពេលនេះ គឺនៅមានការបំពេញបន្ថែមនូវការចែករំលែកបទពិសោធន៍ និងជំនាញទៅវិញទៅមកតាមរយៈការបណ្តុះបណ្តាលនូវចំណេះដឹង យុទ្ធសាស្ត្រប្រកបដោយប្រសិទ្ធភាពខ្ពស់ក្នុងការលក់នៅលើទីផ្សារដែលមានភាពប្រកួតប្រជែងផងដែរ”។

នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា នៅពេលទីផ្សារអចលនទ្រព្យមានការវិវត្ត និងរីកចម្រើន ប្រទេសកម្ពុជាត្រូវការភ្នាក់ងារអចលនទ្រព្យដែលមានជំនាញក៏ដូចជាឈ្មួញកណ្តាលអចលនទ្រព្យដែលមានក្រមសីលធម៌ និងវិជ្ជាជីវៈខ្ពស់ដើម្បីបម្រើនៅក្នុងទីផ្សារជួរមុខ។

លោកស្រីបានបញ្ជាក់ថា “តាមរយៈកិច្ចសហកាជាដៃគូយុទ្ធសាស្ត្ររវាងក្រុមហ៊ុន CSA និងក្រុមហ៊ុន CBRE Cambodia ជឿជាក់ថានឹងនាំមកនូវជោគជ័យខ្ពស់សម្រាប់ទីផ្សារអចលនទ្រព្យនៅកម្ពុជានៅពេលបច្ចុប្បន្ន និងបន្តទៅថ្ងៃអនាគត។ ការធ្វើជាដៃគូនេះបានបង្ហាញឱ្យឃើញថាខ្លួនជាឧបករណ៍អាជីវកម្មដ៏មានឥទ្ធិពលបំផុតមួយក្នុងការដោះស្រាយ និងរាប់រងទីផ្សារជាមួយអតិថិជនដែលមានការភាពរីកចម្រើនយ៉ាងឆាប់រហ័ស ខណៈពេលដែលសេដ្ឋកិច្ចពិភពលោក ក៏ដូចជានៅក្នុងប្រទេសកម្ពុជាមានសន្ទុះកើនឡើងជាបន្តបន្ទាប់”។

ជាមួយគ្នានេះ លោក ឆម ចំរើន ប្រធានក្រុមប្រឹក្សាភិបាលក្រុមហ៊ុនភ្នាក់ងារអចលនទ្រព្យ APi (ATSOLUTIONS) បានមានប្រសាសន៍ថា “ភាពជាដៃគូយុទ្ធសាស្ត្រក្នុងការលក់នៅក្នុងទីផ្សារអចលនទ្រព្យកំពុងក្លាយជាជម្រើដ៏ប្រសើរ និងឈានមុខនៅពេលបច្ចុប្បន្ននេះ ដែលអាចនាំមកនូវភាពជោគជ័យខ្ពស់នៅក្នុងទីផ្សារដែលកំពុងតែមានការប្រកួតប្រជែងខ្លាំង”។

លោកបន្តថា “APi ដែលមានសម្ព័ន្ធជាង១០ក្រុមហ៊ុនភ្នាក់ងារដទៃទៀត បានត្រៀមខ្លួនរួចជាស្រេច ជាមួយនឹងបទពិសោធន៍ជោគជ័យជាច្រើនឆ្នាំនៅក្នុងទីផ្សារដែលកំពុងតែមានសក្ដានុពលមួយនេះ ដើម្បីសហការជាដៃគូគ្រប់ជ្រុងជ្រោយជាមួយក្រុមហ៊ុន CSA ហើយយើងនឹងជួយបំពេញនូវចន្លោះខ្វះខាតឱ្យគ្នាទៅវិញទៅមក ដើម្បីធ្វើយ៉ាងអាចជំរុញការលក់ឱ្យទទួលបានភាពជោគជ័យខ្ពស់ ក៏ដូចជាជួយលើកកម្ពស់វិស័យអចលនទ្រព្យនៅកម្ពុជាឱ្យកាន់តែមានភាពល្អប្រសើរជាងនេះបន្ថែមទៀត”៕

ក្រុមហ៊ុនចិនឈ្នះការដេញថ្លៃសាងសង់អាកាសយានដ្ឋានអន្តរជាតិភ្នំពេញថ្មី ក្នុងតម្លៃ៤០៥លានដុល្លារ

ដោយៈវុត្ថា

ភ្នំពេញៈ ក្រុមហ៊ុនចិនMetallurgical Corporation of China (MCC )បានឈ្នះការដេញថ្លៃ លើទំហំទឹកប្រាក់២.៦៧ពាន់លានយ័ន ស្មើនឹង៤០៥លានដុល្លារ ក្នុងការរចនា និងសាងសង់ផ្នែកមួយចំនួន នៃអការយានដ្ឋានអន្តរជាតិភ្នំពេញថ្មី ស្ថិតនៅក្នុងទឹកដីខេត្តកណ្តាលដែលមានម្លៃ១,៥លានដុល្លារអាមេរិក ។ នេះបើយោងតាមការចុះផ្សាយរបស់សារព័ត៌មានជប៉ុន NIKNEI កាលពីពេលថ្មីៗនេះ។

សារព័ត៌មាន NIKNEI បានសរសេរថា អាកាសយានដ្ឋានអាកាសយានដ្ឋានថ្មីដែលតម្លៃសរុប១,៥ពាន់លានដុល្លារ ត្រូវបានគ្រប់គ្រងស្ទើរតែទាំងស្រុង ដោយទីក្រុងប៉េកាំង។ អាកាសយានដ្ឋានថ្មីនេះ គឺជាផ្នែកមួយនៃយុទ្ធសាស្ត្ររបស់រដ្ឋាភិបាលកម្ពុជា ក្នុងការជំរុញវិស័យទេសចរណ៍ ។

ក្រុមហ៊ុនចិន Metallurgical Corporation of China បានចុះកិច្ចសន្យាសាងសង់អាកាសយានដ្ឋាននេះ គឺជាការឈ្នះដ៏មានសារៈសំខាន់បំផុត ព្រោះជាកិច្ចសន្យាបរទេសដែលមានតម្លៃធំបំផុតរបស់ក្រុមហ៊ុននៅឆ្នាំនេះ ដែលលើសពីកិច្ចសន្យាមុន(ក្នុងខែកុម្ភៈ) ដែលមានតម្លៃ១,២៦ពាន់លានយ័នក្នុងការរចនា និងសាងសង់ឧទ្យានទឹកភ្លៀង ឧទ្យានភាគខាងជើងតំបន់Mandai នៃប្រទេសសិង្ហបុរី។

ដោយសារបញ្ហាជំងឺកូវីដ១៩ ក្រុមហ៊ុនMCC បានពឹងផ្អែកលើពលកម្មក្នុងស្រុកដើម្បីគាំទ្រដល់គម្រោងសាងសង់របស់ខ្លួន ក្នុងការេះជំរុញធ្វើយ៉ាងណាឲ្យគម្រោងនេះបញ្ចប់ទៅតាមផែនការ។ តម្រូវការនៅក្នុងស្រុកបានជួយអោយកិច្ចសន្យា ដែលទើបនឹងចុះហត្ថលេខាថ្មីរបស់ក្រុមហ៊ុន MCC ឈានដល់ទំហំទឹកប្រាក់៨០៣,៣២ពាន់លានយ័នក្នុងរយៈពេល១០ ខែឆ្នាំ២០២០ កើនឡើង៣៥% ធៀបនឹងរយៈពេលដូចគ្នាកាលពីឆ្នាំមុន។

ក្រុមហ៊ុននិងក្រុមហ៊ុនបុត្រសម្ព័ន្ធរបស់ខ្លួន មានគម្រោងជាច្រើនរួចទៅហើយនៅក្នុងប្រទេសកម្ពុជា រួមទាំង ការអភិវឌ្ឍឆ្នេរតារាសាគរនៅក្នុងខេត្តកោះកុង ដែលអនុវត្តដោយក្រុមហ៊ុន Union Development Group ។

អាកាសយានដ្ឋានភ្នំពេញថ្មី ដែលនឹងគ្របដណ្តប់លើផ្ទៃដី៧០០ហិកតា នឹងក្លាយជាផ្នែកមួយ នៃការអភិវឌ្ឍលំនៅដ្ឋាន និងពាណិជ្ជកម្ម ដែលមានទំហំធំទូលាយប្រហែល ២៦០០ហិកតា កំពុងត្រូវបានត្រួតពិនិត្យ ដោយក្រុមហ៊ុនវិនិយោគដោយក្រុមហ៊ុនOCIC ។

អាកាសយានដ្ឋានអន្តរជាតភ្នំពេញថ្មីនេះ គ្រប់គ្រងដោយអ្នកឧកញ៉ា ពុង ឃាវសែ ប្រធានក្រុមហ៊ុន OCIC ដែលកាន់កាប់គម្រោង៩០ភាគរយ ខណៈរដ្ឋលេខាធិការដ្ឋានអាកាសចរណ៍ស៊ីវិលកម្ពុជា កាន់កាប់១០ភាគរយទៀត៕

អ្នកជំនាញៈផ្លូវជាតិលេខ២នឹងមានបុរីនិងគំរោងជាច្រើនឆ្ពោះទៅតំបន់នេះ ក្រោយពេលផ្លូវនេះស្ថាបនារួច

ដោយគង់ សូរិយា

ភ្នំពេញៈ អ្នកជំនាញបាននិយាយថា តំបន់ផ្លូវជាតិលេខ២ចាប់ពីរង្វង់មូលគួរស្រូវ ឆ្ពោះទៅកាន់ស្រុកបាទី ខេត្តតាកែវនឹងមានគំរោងអភិវឌ្ឈន៍ច្រើនឆ្ពោះទៅតំបន់នេះ រាប់ទាំងលំនៅដ្ឋាន និងមជ្ឈមណ្ឌលពាណិជ្ជកម្មនានា។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍៍ឲ្យដឹងកាលពីថ្ងៃម្សិលម៉ិញនេះថា តំបន់ខាងលើនេះ ចាប់ផ្តើមកំរើកបណ្តើរៗហើយ ព្រោះគំរោងជាច្រើននឹងលេចចេញជារូបរាងនៅតំបន់នេះ នៅពេលផ្លូវជាតិលេខ២ស្ថាបនា និងពង្រីករួច។

លោកបន្តថា “ការរីកចម្រើនតំបន់នេះ ដោយសារវាកៀកនឹងព្រលានយន្តហោះអន្តរជាតិភ្នំពេញថ្មី និងហេដ្ឋារចនាសម្ព័ន្ឋ ពិសេសតំបន់នេះកៀកនឹងផ្លូវ៦០ម៉ែត្រ ដែលបាននិងកំពុងពង្រីកសក្តានុពលទៅកាន់តំបន់នៅក្បែរៗៗនោះ”។លោកបន្តថា “ការរីកចម្រើននៃសេដ្ឋកិច្ច សង្គមនឹងធ្វើឲ្យការអភិវឌ្ឍនឹងរីកទៅកាន់តំបន់ជាយក្រុងកាន់តែច្រើន ដោយសារកត្តាសុខសន្តិភាព និងការរីកចម្រើននៃសេដ្ឋកិច្ច”។

ផ្លូវជាតិលេខបានបើកការដ្ឋានស្ថាបនាឡើងវិញ ដោយសម្តេចតេជោនាយករដ្ឋមន្រ្តីនៃកម្ពុជា កាលពីដើមឆ្នាំនេះ ដែលផ្លូវនេះត្រូវពង្រីកជាពីរគន្លងនៅតំបន់ខ្លះ និងតំបន់ខ្លះទៀតគ្រាន់តែពង្រីកទំហំផ្លូវធម្មតា។ គម្រោងនេះផ្តល់ហិរញ្ញប្បទាន ដោយសាធារណៈរដ្ឋកូរ៉េ។

បច្ចុប្បន្នតំបន់គួរស្រូវ និងតំបន់ជុំវិញនេះមានគំរោងបុរីលំនៅដ្ឋាន ជាច្រើនកំពុងសាងសង់ និងបានបញ្ចប់នៅតំបន់នេះដូចជា បុរីពិភពថ្មី និងបុរីជាច្រើនទៀត។

សិង្ហបុរី នឹងដកការរឹតបន្តឹងព្រំដែនដើម្បីស្វាគមន៍ទេសចរពីតៃវ៉ាន់ចាប់ពីថ្ងៃទី១៨ ខែធ្នូនេះ

ដោយ៖ សុខុម

សិង្ហបុរី: អាជ្ញាធរអាកាសចរណ៍ស៊ីវិលសិង្ហបុរី (CAAS) បានប្រកាសកាលពីថ្ងៃសុក្រ ទី១១ ខែធ្នូ ឆ្នាំ២០២០ថា ប្រទេសនេះនឹងដកការរឹតបន្តឹងព្រំដែនជាឯកតោភាគី (តែភាគីម្ខាង) ដើម្បីស្វាគមន៍ភ្ញៀវទេសចរមកពីកោះតៃវ៉ាន់ ចាប់ពីថ្ងៃ១៨ ធ្នូតទៅ។ នេះបើយោងតាមសារព័ត៌មាន CNA ចុះផ្សាយក្នុងថ្ងៃដដែល។

អាជ្ញាធរនេះបានចេញសេចក្ដីប្រកាសព័ត៌មានថា នៅពេលសេចក្ដីសម្រេចនេះចូលជាធរមានភ្លាម ភ្ញៀវទេសចរមកពីកោះតៃវ៉ាន់ អាចដាក់ពាក្យស្នើសុំប័ណ្ណធ្វើដំណើរតាមផ្លូវអាកាស (Air Travel Pass) ចូលក្នុងប្រទេសសិង្ហបុរី បានចាប់ពីថ្ងៃសុក្រ សប្ដាហ៍ក្រោយតទៅ។ អាជ្ញាធរដដែលបន្ថែមថា ជាលក្ខខណ្ឌ ពួកគេត្រូវតែស្ថិតនៅកោះតៃវ៉ាន់ រយៈពេល ១៤ ថ្ងៃជាប់គ្នា មុនពេលចេញដំណើរមកកាន់សិង្ហបុរី។

ហើយពេលមកដល់សិង្ហបុរី ភ្ញៀវទេសចរទាំងនោះនឹងត្រូវឆ្លងកាត់ការធ្វើតេស្តរកវីរុសកូវីដ-១៩។ ប្រសិនបើលទ្ធផលបង្ហាញថាអវិជ្ជមាន ពួកគេនឹងទទួលបានការអនុញ្ញាតឱ្យដើរហើរដោយសេរីក្នុងប្រទេសសិង្ហបុរី ដោយមិនចាំបាច់ធ្វើចត្តាឡីស័ក។

ជាផ្នែកមួយនៃដំណើរការតាមដានប្រវត្តិប្រាស្រ័យទាក់ទងគ្នា ភ្ញៀវទេសចរដែលមកពីកោះតៃវ៉ាន់ ត្រូវដោនឡូត និងចុះឈ្មោះប្រើប្រាស់កម្មវិធីតាមដានប្រវត្តិប្រាស្រ័យទាក់ទង TraceTogether App លើទូរស័ព្ទដៃរបស់ពួកគេ មុនពេលចូលក្នុងប្រទេសសិង្ហបុរី ហើយត្រូវរក្សាឱ្យវាដំណើរការជាប់ជានិច្ចអំឡុងការស្នាក់នៅរបស់ពួកគេ។ ហើយពួកគេមិនត្រូវលុបវាចោលឡើយសម្រាប់រយៈពេល ១៤ ថ្ងៃជាប់គ្នា ក្រោយចាកចេញប្រទេសសិង្ហបុរី។

អាជ្ញាធរនេះបានគូសបញ្ជាក់ថា ទេសចរទាំងនោះក៏នឹងត្រូវរ៉ាប់រងការចំណាយលើការព្យាបាលជំងឺរបស់ខ្លួនពាក់ព័ន្ធវីរុសកូវីដ-១៩ ផងដែរ ខណៈពួកគេនៅក្នុងប្រទេសសិង្ហបុរី។

ក្នុងបទសម្ភាសន៍ផ្ដាច់មុខជាមួយសារព័ត៌មាន CNA លោក អុង យេ គង់ (Ong Ye Kung) រដ្ឋមន្ត្រីដឹកជញ្ជូនរបស់សិង្ហបុរី បានថ្លែងថា “កោះតៃវ៉ាន់ ជាដៃគូដ៏មានសុវត្ថិភាពដែលយើងគួរបើកចំហព្រំដែនជាឯកតោភាគីដើម្បីស្វាគមន៍ពួកគេ”។

លោកក៏បានសង្កត់ធ្ងន់ដែរថា កាលពីប៉ុន្មានសប្តាហ៍មុន កោះតៃវ៉ាន់ បានកាត់បន្ថយរយៈពេលធ្វើចត្តាឡីស័កសម្រាប់ភ្ញៀវទេសចរជាពាណិជ្ជករសំខាន់ៗទៅពីប្រទេសសិង្ហបុរី មកនៅត្រឹមរយៈពេល ៥ ថ្ងៃ។ ទន្ទឹមនេះ ភ្ញៀវទេសចរបែបនេះក៏ត្រូវគោរពតាមកម្មវិធីធ្វើដំណើរដែលមានការគ្រប់គ្រងត្រឹមត្រូវនៅកោះតៃវ៉ាន់ ឱ្យបានខ្ជាប់ខ្ជួនផងដែរ៕

អ្នកជំនាញនិយាយថាតម្រូវការលំនៅឋាននឹងស្ទុះងើបឡើងវិញក្រោយចប់កូវីដ១៩

ដោយៈលក្ខិណា

ភ្នំពេញៈ នៅក្នុងវិបត្តិកូវីដ១៩ បានធ្វើឱ្យតម្រូវការទិញ លក់អចលនទ្រព្យក្នុងនោះតម្រូវការលំនៅឋានទាំងបុរី និងខុនដូ មានការថមថយចុះ តែនៅពេលមានដំនឹងពីវ៉ាក់សាំងប្រឆាំងនឹងកូវីដ១៩ អ្នកជំនាញអចលនវត្ថុកម្ពុជា បានរំពឹងថាតម្រូវការលំនៅឋានទាំងផ្ទះជាប់ដី ក្នុងបុរី និងខុនដូជាដើម នឹងមានកំណើនឡើងវិញ។

លោកឌឹត ចណ្ណា អគ្គនាយកក្រុមហ៊ុនអចលនទ្រព្យឡាក់គីរៀលធី បានមានប្រសាសន៍ថា នៅពេលមានវ៉ាក់សាំង ចាក់ជូនពលរដ្ឋអស់ហើយការវិនិយោគ សកម្មភាពសេដ្ឋកិច្ចនឹងល្អប្រសើរឡើងវិញ។ នៅពេលនោះ ជីវភាពពលរដ្ឋក៏ងើបឡើងវិញ ពេលនោះ តម្រូវការអចលនទ្រព្យក៏ងើបឡើងវិញផងដែរ ។

លោកបន្តថា “នៅពេលកម្រិតជីវភាពល្អប្រសើរនោះ តម្រូវការលំនៅឋានមិនថាបុរី ផ្ទះល្វែងវីលា និងខុនដូ នឹងងើបឡើងវិញនៅពេលចប់កូវីដ១៩ ហើយពេលនោះការវិនិយោគលើលំនៅឋានបុរីនិងខុនដូ ក៏នឹងងើបឡើងវិញដូចគ្នាផងដែរ” ។

លោកស្រីអាន សុធីតា អគ្គនាយិកាក្រុមហ៊ុន CBRE បាននិយាយកន្លងមកថា នៅពេលកូវីដ១៩ ផ្ទុះឡើងនៅលើពិភពលោក ឃើញថាតម្រូវការទាំងជួល និងលក់ខុនដូនៅកម្ពុជា បានធ្លាក់ចុះហើយក៏បានបង្វែរនិន្នាការ ពីជនបរទេសស្នាក់នៅក្នុងខុនដូ មកជាជនជាតិខ្មែរជាអ្នកស្នាក់នៅខុនដូ និងទិញខុនដូវិញ ។

ជាមួយគ្នានេះលោករិន ចន្ទរឹទ្ធ នាយកគ្រប់គ្រងក្រុមហ៊ុនភ្នាក់ងារលក់អចលនទ្រព្យមួយនៅកម្ពុជាក៏បាននិយាយផងដែរថា អ្នកទិញគម្រោងខុនដូនៅកម្ពុជា ក្នុងវិបត្តិកូវីដ១៩ឃើញថា ភាគច្រើនជាជនជាតិខ្មែរទៅវិញ ខុសពីមុនដែលសំបូរទៅដោយជនបរទេសជាអ្នកទិញ។

លោកបន្តថា “ទោះក្នុងស្ថានភាពបែបនេះក្ដី ការទិញលក់ខុនដូនៅក្នុងប្រទេសកម្ពុជាឃើញថា នៅតែមានសកម្មភាព តែវាមិនមានសកម្មភាពខ្លាំង ដូចពីមុនពេលកូវី១៩នោះទេ” ៕