ប្រទេសវៀតណាមគ្រោងនឹងនាំចូលអគ្គិសនីបន្ថែមទៀតពីប្រទេសឡាវ

ដោយ វុត្ថា

វៀងច័ន្ទ៖ ប្រទេសវៀតណាមកំពុងទិញអគ្គិសនីពីរោងចក្រថាមពល ដែលសាងសង់ដោយវិនិយោគិនឡាវ និងវៀតណាមដើម្បីយកទៅផ្គត់ផ្គង់តម្រូវនៅក្នុងប្រទេសខ្លួន។

អនុរដ្ឋមន្ត្រីក្រសួងថាមពល និងរ៉ែ លោក Daovong Phonekeo បានអោយដឹងកាលពីពេលថ្មីៗនេះថា ចាប់ពីពេលនេះរហូតដល់ឆ្នាំ ២០២៥ ប្រទេសវៀតណាមនឹងទិញអគ្គិសនីចំនួន ៣០០០មេហ្កាវ៉ាត់ពីប្រទេសឡាវក្នុងតម្លៃ ៦.៩៥សេនដុល្លារក្នុងមួយគីឡូវ៉ាត់ម៉ោង។

លោកបន្តថា បរិមាណអគ្គិសនីដែលបានលក់ទៅឱ្យប្រទេសវៀតណាមនឹងកើនឡើងដល់ ៥,០០០មេហ្កាវ៉ាត់ រវាងឆ្នាំ ២០២៦ និង ២០៣០ ដោយតម្លៃនឹង ត្រូវបានកំណត់ឡើងវិញ។

លោក Daovong បន្តថា ប្រទេសឡាវមានសក្តានុពលធំធេងក្នុងការផលិតថាមពលពីរោងចក្រវារីអគ្គិសនីថាមពលពន្លឺព្រះអាទិត្យ និងខ្យល់សម្រាប់លក់ទៅប្រទេសវៀតណាម និងប្រទេសកម្ពុជា។

បច្ចុប្បន្នប្រទេសឡាវមានរោងចក្រវារីអគ្គិសនីចំនួន៧៨ ដែលមានកម្លាំងដំឡើង ៩.៩៧២មេហ្កាវ៉ាត់កំពុងដំណើរការដែលលើសពីតម្រូវការប្រើប្រាស់ក្នុងស្រុក។ ជាមួយគ្នានេះក៏មានរោងចក្រថាមពលធ្យូងថ្មគម្រោងជីវម៉ាស ៤ និងរោងចក្រថាមពលពន្លឺព្រះអាទិត្យចំនួន ៦ ផងដែរ។

អគ្គិសនីគឺជាអ្នករកប្រាក់ចំណូលដ៏សំខាន់មួយរបស់ឡាវជាពិសេសតាមរយៈការលក់ទៅប្រទេសថៃ វៀតណាម កម្ពុជា និងមីយ៉ាន់ម៉ា។

ទន្ទឹមនឹងនេះដែរតម្រូវការអគ្គិសនីនៅប្រទេសឡាវមានការកើនឡើងគួរឱ្យកត់សម្គាល់ក្នុងឆ្នាំ ២០១៩ ដោយសារការកើនឡើងនៃចំនួនប្រជាជននិងចំនួនរោងចក្រ។

នៅឆ្នាំ ២០១៩ ការប្រើប្រាស់អគ្គិសនីនៅក្នុងស្រុកមានចំនួន ១,២២២ មេហ្គាវ៉ាត់ហើយក្រសួងថាមពលនិងរ៉ែឡាវបានបញ្ជាក់ថាការប្រើប្រាស់អគ្គិសនីនឹងកើនឡើងដល់ ១.៨០០ មេហ្គាវ៉ាត់នៅចន្លោះឆ្នាំ ២០២០ និង ២០២៥ ៕

មន្ត្រីជាន់ខ្ពស់ក្រសួងសាធារណការអះអាងាថា ការដឹកជញ្ជូនទំនិញតាមផ្លូវសមុទ្រមិនមានបញ្ហានោះទេ

ដោយ វុត្ថា

ភ្នំពេញ៖ មន្ត្រីជាន់ខ្ពស់នៃក្រសួងសាធារណការ និងដឹកជញ្ជូនបានអះអាងថា ការដឹកជញ្ជូនគ្រប់ប្រភេទ ជាពិសេសទំនិញតាមនាវានៅតាមផ្លូវសមុទ្ររបស់កម្ពុជារហូតមកដល់បច្ចុប្បន្ននេះ មិនមានអ្វីរាំងស្ទះដោយសារបង្កឡើងដោយ ជំងឺកូវីដ-១៩ នោះទេ ។

លោក ម៉ក់ ស៊ីដេត អគ្គនាយកដឹកជញ្ជូនផ្លូវទឹក ផ្លូវសមុទ្រ និងកំពង់ផែននៃក្រសួងសាធារណការ និងដឹកជញ្ជូន បានឱ្យដឹងនៅថ្ងៃទ១០ ខែធ្នូថា ការដឹកជញ្ជូនទំនិញតាមផ្លូវសមុទ្រប្រព្រឹត្តទៅតាមប្រក្រតី មិនមានបញ្ហានោះទេ បើទោះពិភពលោកកំពុងប្រឈមទៅនឹងវិបត្តិជំងឺកូវីដ-១៩ ប៉ុន្តែលោកថាមានខែខ្លះក៏មានចំនួនច្រើន ហើយខ្លះទៀត ក៏មានចំនួយថយចុះ ទៅតាមការបញ្ជាទិញ។

លោកបន្ថែមថា សម្រាប់ការដឹកជញ្ជូនទំនិញនៅតាមផ្លូវសមុទ្រនេះ ហាក់មានទំនិញឆ្លងកាត់ក្នុងចំនួនតិច បើធៀបជាមួយនឹងផ្លូវទឹកសាបមានច្រើន ។ លោកពន្យល់ថា បញ្ហានេះ គឺជារឿងធម្មតាទេ ប៉ុន្តែវាមិនប៉ះពាល់ធ្ងន់ធ្ងរលើកការដឹកជញ្ជូនទំនិញពីកម្ពុជាទៅកាន់ពិភពលោក និងពិភពលោកមកកាន់កម្ពុជាទេ ។

លោកបន្ថែមថា ការដឹកជញ្ជូនទំនិញមកពីក្រៅស្រុកចូលមកកម្ពុជាក៏មិនមានសញ្ញាណាមួយគួឱ្យព្រួយបារម្ភទេ ពីព្រោះ ពួកគេទំលាក់ទំនិញ ហើយដឹកត្រឡប់ទៅវិញ ដូច្នេះ វាមិនមានអ្វីជាបញ្ហាទេ ប៉ុន្តែយ៉ាងណាក៏ដោយ លោកមិនបានដឹងពីតួលេខពិតប្រកដនោះទេចំពោះការដឹកជញ្ជូនទំនិញតាមផ្លូវសមុទ្រនេះ ព្រោះខែខ្លះក៏ឡើង ខែខ្លះក៏មានការធ្លាក់ចុះទៅតាមតម្រូវការបញ្ជាទិញ ពីក្នុងស្រុក និងក្រៅស្រុក ។

លោកថ្លែងថា “ និយាយជារួមគឺមិនមានបញ្ហាអ្វីទេចំពោះការដឹកជញ្ជូនទំនិញតាមផ្លូវសមុទ្រនេះ វាមានឡើងចុះ ជារឿងធម្មតា ប៉ុន្តែបើឱ្យធ្លាក់ខ្លាំង គឺមិនមានទេ” ។

បើទោះបីមិនមិនបញ្ហានៅក្នុងការដឹកជញ្ជូន ក៏ដោយ លោកឧកញ៉ា ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) តម្លៃសេវាដឹកទំនិញពីកម្ពុជាទៅកាន់ទីផ្សារប្រទេសចិន អឺរ៉ុប និងអាមេរិក កំពុងកើឡើងខ្ពស់នៅក្នុងរយៈពេលប៉ុន្មានខែចុងក្រោយនេះ។

លោកថា តម្លៃដឹកជញ្ជូនទំនិញតាមនាវាពីកំពង់ផែស្វយ័តក្រុងព្រះសីហនុទៅប្រទេសចិនបានកើនឡើងពី ៦០០ ដុល្លារដល់ ២ ០០០ដុល្លារក្នុង ១ កុងតឺន័រ ៤០ហ្វីតចាប់តាំងពីខែសីហាមក។

លោក ចន្ធី បានពន្យល់ថាតម្លៃហឡើងនេះដោយសារចំនួននាវាផ្ទុកកុងតឺន័រដឹកទំនិញមកកម្ពុជាមានការថយចុះដែលជាការជះឥទ្ធិពលអវិជ្ជមាននៃការរាតត្បាតជំងឺកូវីដ-១៩ ជាសកល ហើយអាចនឹងធ្លាក់ចុះមកនៅខែមករា ឬខែកុម្ភៈ ឆ្នាំ ២០២១ ៕

ចំណេះដឹង! តើមានលក្ខខណ្ឌអ្វីខ្លះក្នុងការចុះបញ្ជីពាណិជ្ជកម្មសម្រាប់ពាណិជ្ជករជានីតិបុគ្គលបរទេស?

ដោយ វុត្ថា

ភ្នំពេញ៖ ក្រុមហ៊ុនពាណិជ្ជកម្មបរទេសទាំងអស់ ដែលមានតែសាខា ឬទីភ្នាក់ងារ នៅព្រះរាជាណាចក្រកម្ពុជា ត្រូវធ្វើការបំពេញទំរង់ចុះបញ្ជីពាណិជ្ជកម្មតាមមាត្រា១៧ និងមាត្រា១៨ នៃច្បាប់ស្ដីពីវិធានពាណិជ្ជកម្ម និងបញ្ជីពាណិជ្ជកម្ម ដូចគ្នានឹងពាណិជ្ជករជានីតិបុគ្គលដែរ (មាត្រា១៩ កថាខណ្ឌ១ ២ នៃច្បាប់ស្ដីពីវិធានពាណិជ្ជកម្ម និងបញ្ជីពាណិជ្ជកម្ម) ។

ផ្ទុយទៅវិញ ករណីដែលពាណិជ្ជករ និងក្រុមហ៊ុនពាណិជ្ជកម្មទាំងឡាយណា ដែលមិនបានចុះបញ្ជីពាណិជ្ជកម្ម តាមការបញ្ញត្តិរបស់ក្រសួងពាណិជ្ជកម្មទេ ត្រូវផ្ដន្ទាទោសពិន័យជាប្រាក់ចំនួន ៥០,០០០៛ (ប្រាំម៉ឺនរៀល) ទៅ ៥០០,០០០៛ (ប្រាំសែនរៀល) (មាត្រា៤០ ចំណុច១ នៃច្បាប់ស្ដីពី វិធានពាណិជ្ជកម្ម និងបញ្ជីពាណិជ្ជកម្ម) ឬមានទោសនិទ្ធនភាពសាមញ្ញក្នុងករណីធនក្ស័យ (មាត្រា ៤១ នៃច្បាប់ដដែល) ។

ហើយចំពោះករណី ពាណិជ្ជករ ឬរាល់អ្នកដឹកនាំក្រុមហ៊ុនពាណិជ្ជកម្ម ទាំងឡាយណាដែលប្រើឯកសារក្លែងក្លាយនោះ ត្រូវផ្ដន្ទាទោសចាប់ពី ១ (មួយ) ឆ្នាំ ទៅ ៥ (ប្រាំ) ឆ្នាំ និងពិន័យជាប្រាក់ពី ១,០០០,០០០៛ (មួយលានរៀល) ដល់ ១០,០០០,០០០៛ (ដប់លានរៀល)(មាត្រា ៤២ នៃច្បាប់ដដែល) ។

សរុបមកសម្រាប់ពាណិជ្ជករ និងក្រុមហ៊ុនពាណិជ្ជកម្មទាំងឡាយណាដែលបានធ្វើការចុះបញ្ជីពាណិជ្ជកម្ម លើអាជីវកម្មរបស់ខ្លួន ពួកគេនឹងទទួលបាន នូវអាជីវកម្មមួយស្របច្បាប់ ហើយទទួលបាននូវការការពារចំពោះឈ្មោះ និងផលិតផលរបស់ក្រុមហ៊ុននោះ ព្រមទាំងដើម្បីធ្វើការបញ្ជៀស ការខាតបង់ផលប្រយោជន៍នានា ដែលបណ្ដាល មកពីជនទុច្ចរឹតធ្វើការក្លែងបន្លំឈ្មោះ ឬផលិតផលរបស់ក្រុមហ៊ុននោះផងដែរ ។

ចំពោះករណីនេះ ម្ចាស់អាជីវកម្ម ក៏អាចធ្វើការប្ដឹងទៅក្រសួងពាណិជ្ជកម្មដើម្បីធ្វើការរំលាយ អាជីវកម្មរបស់ជនទុច្ចរឹតនោះបានដែរ ប៉ុន្ដែបើអំពើរបស់ជននោះ បានធ្វើឱ្យខាតបង់ផលប្រយោជន៍ធ្ងន់ធ្ងរ នោះម្ចាស់អាជីវកម្មដែលទទួលរងគ្រោះអាចធ្វើការប្ដឹងទាមទារ សំណងតាមផ្លូវតុលាការដែលមានសមត្ថកិច្ច នៃព្រះរាជាណាចក្រកម្ពុជាបាន ៕

អ្នកជំនាញនិយាយពីផ្នែកមួយចំនួននៃទីផ្សារអចលនទ្រព្យ ដែលមានតម្រូវការលឿនក្រោយចប់កូវីដ១៩

ដោយ ៖ រ៉ាណេត

ភ្នំពេញ ៖ ជាមួយនឹងដំណឹងល្អនៃការត្រៀមទិញវ៉ាក់សាំបង្ការជំងឺឆ្លងកូវីដ១៩របស់រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខដឹកនាំសម្រាប់ចាក់ជូនប្រជាពលរដ្ឋកម្ពុជា អ្នកជំនាញនៅក្នុងវិស័យអចលនទ្រព្យសុទ្ធតែបានបង្ហាញពីក្ដីសាទរ រួមជាមួយនឹងក្ដីរំពឹងពីការកម្រើកឡើងវិញនូវតម្រូវការទីផ្សារក្នុងវិស័យមួយនេះ។

អគ្គនាយកក្រុមហ៊ុនភ្នាក់ងារអចលនទ្រព្យ LUCKY Realty Co,.Ltd លោកឌិត ចណ្ណា បានមានប្រសាសន៍កាលពីរសៀលថ្ងៃទី១០ ខែធ្នូ ឆ្នាំ២០២០នេះថា ស្ទើរតែគ្រប់ផ្នែកនៃវិស័យអចលនទ្រព្យនឹងមានតម្រូវការខ្ពស់ជាងឆ្នាំ២០២០នេះ ក្រោយពេលកម្ពុជាមានវ៉ាក់សាំងចាក់ជូនពលរដ្ឋ ព្រោះថាបច្ចុប្បន្ននេះទាំងតម្រូវការ លំនៅឋានជាប់ដី ទីផ្សារខុនដូ ក៏ដូចជាការជួយទីតាំងស្នាក់នៅ និងបំពេញការងារផ្សេងៗនៅតែមានខ្ពស់ ប៉ុន្តែត្រូវបានរារាំងដោយសារតែកូវីដ១៩។

លោកបន្តថា “ក្រោយពីមានវ៉ាក់សាំងរួចរាល់ អ្នកវិនិយោគក្រៅស្រុកប្រហែលជាមិនមានច្រើនដូចមុនទេ តែវានឹងចាប់ផ្ដើមពីអ្នកវិនិយោគក្នុងស្រុក ដូច្នេះនៅពេលអ្នកក្នុងស្រុកចាប់ផ្ដើមវិនិយោគច្រើន ហើយមានចលនាទិញដូរមានច្រើន ពេលនោះអ្នកវិនិយោគខាងក្រៅក៏ចាប់ផ្ដើមចូលមកដោយសារតែមានជំនឿចិត្ត។ ជាបន្តបន្ទាប់អ្នកវិនិយោគក្រៅស្រុក ទេសចរ នឹងចូលមកជាហូរហែរ ពេលនោះនឹងជំរុញឱ្យសេដ្ឋកិច្ចកម្ពុជានឹងមានសន្ទុះប្រសើរឡើងវិញ”។

ស្រដៀងគ្នានេះ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងផងដែរថា កម្ពុជាត្រូវការពេលយ៉ាងតិចប្រមាណ១ឆ្នាំ ដើម្បីស្ដារវិស័យអចលនទ្រព្យឱ្យបានដូចស្ថានភាពមុនកូវីដ១៩ ហើយវានឹងចាប់ផ្ដើមធ្វើសកម្មភាពដោយអ្នកវិនិយោគសម្រាប់គម្រោងតូចៗ ហើយបន្តទៅទៀត អ្នកវិនិយោគគម្រោងធំៗនឹងចាប់ផ្ដើមទៅតាមនោះដែរ ដោយសារតែមួយចំនួនរង់ចាំមើលពីប្រសិទ្ធភាពនៃវ៉ាក់សាំងប្រឆាំងកូវីដ១៩ជាមុនសិន ។

លោកបានបញ្ជាក់ថា “បើទោះបីជាឆ្នាំ២០២០នេះកម្ពុជាជួបនឹងវិបត្តិកូវីដ១៩ក្ដី ក៏មិនធ្វើឱ្យតម្លៃអចលនទ្រព្យធ្លាក់ចុះខ្លាំងនោះដែរ។ តំបន់ខ្លះនៅតែមានតម្លៃខ្ពស់ និងងើបជាងឆ្នាំមុន តែតំបន់ខ្លះទៀតនៅទ្រឹង និងមានការថមថយតិចតួច”៕

តុលាការពាណិជ្ជកម្មកម្ពុជា អាចនឹងចាប់ដំណើរការនៅឆ្នាំក្រោយ

ដោយ ៖ រ៉ាណេត

ភ្នំពេញ ៖ តុលាការពាណិជ្ជកម្មកម្ពុជា ដែលផ្តួចផ្តើមឡើង និងជំរុញបង្កើតឡើងដោយសភាពាណិជ្ជកម្មកម្ពុជា ក្នុងគោលបំណងជួយដោះស្រាយនូវរាល់បញ្ហានានានៅក្នុងវិស័យពាណិជ្ជកម្មប្រកបដោយតម្លាភាពនោះ អាចនឹងចាប់ដំណើរការនៅក្នុងឆ្នាំ២០២១ខាងមុខនេះ ខណៈពេលដែលសមាសភាពនៃក្រុមអ្នកច្បាប់ និងអង្គចៅក្រមតុលាការមួយនេះត្រូវបានក្រសួងយុត្តិធម៌រៀបចំមន្ត្រីរួចរាល់ហើយនោះ ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍នៅល្ងាចថ្ងៃទី១០ ខែធ្នូ ឆ្នាំ២០២០នេះថា ការបង្កើតឱ្យមានតុលាការពាណិជ្ជកម្មនេះគឺក្នុងគោលបំណងចម្បងបំផុតក្នុងការដោះស្រាយនូវរាល់បញ្ហាវិវាទនានាដែលតែងកើតមាន ដែលធានាបាននូវតម្លាភាព ដើម្បីជំរុញ និងបង្កើនភាពទាក់ទាញការធ្វើពាណិជ្ជកម្ម និងវិនិយោគបន្ថមនៅកម្ពុជា។

លោកឧកញ៉ាបន្តថា “ដោយសារតែបញ្ហា និងរឿងវិវាទនានាដូចដែលបានលើកឡើងខាងលើនេះ តែងតែកើតមាន បានធ្វើឱ្យប៉ះពាល់ដល់វិស័យពាណិជ្ជកម្ម ជាពិសេសទីផ្សារក្នុងស្រុក ដូច្នេះហើយបានជានៅពេលបច្ចុប្បន្ននេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានជំរុញ និងស្នើសុំទៅកាន់ក្រសួងយុត្តិធម៌ ក្នុងបង្កើតស្ថាប័នតុលាការពាណិជ្ជកម្ម ដើម្បីចូលរួមដោះស្រាយនូវរាល់បញ្ហាឱ្យបានកាន់តែឆាប់តាមដែលអាចធ្វើទៅបាន”។

លោកឧកញ៉ាបានបញ្ជាក់ថា “កាលពីពេលកន្លងទៅនេះ នៅតាមបណ្តាខេត្ត ក្រុង ស្ទើរទូទាំងប្រទេស តែងកើតមានបញ្ហារវាងពាណិជ្ជកម្ម និងស្ថាប័នតុលាការ ទៅលើការដោះស្រាយពាក្យបណ្តឹង ក្នុងការធ្វើពាណិជ្ជកម្មគ្មានតម្លាភាព។ ពេលនេះ ដើម្បីជាដំណោះស្រាយកាន់តែល្អ និងអាចជួយសម្រួលដល់បណ្តាពាណិជ្ជករផងដែរ សភាពាណិជ្ជកម្មកម្ពុជា បានស្នើសុំដល់ក្រសួងយុត្តិធម៌ក្នុងការរៀបចំ និងបង្កើតឱ្យមានតុលាការពាណិជ្ជកម្ម ដែលរហូតមកដល់ពេលនេះ ក៏ឯកឧត្តមរដ្ឋមន្ត្រីក្រសួងយុត្តិធម៌បានបង្ហាញពីកិច្ចគាំទ្រផងដែរ។ អ្វីដែលសំខាន់ គឺស្វែងរកទីតាំង ដែលជាបណ្តោះអាសន្នអាចនឹងដាក់ទីតាំងនៅក្នុងសភាពាណិជ្ជកម្ម ហើយអាចនឹងចាប់អនុវត្តនៅឆ្នាំ២០២១ខាងមុខនេះ”៕

ក្រុមហ៊ុន ប៉េង ហួត គ្រុប រួមគ្នាជាមួយបណ្ដាក្រុមហ៊ុន និងសប្បុរសជនជាច្រើនចូលរួមជាមួយ សម្តេច តេជោ ក្នុងយុទ្ធនាការទិញវ៉ាក់សាំងកូវីដ-១៩ចាក់ជូនប្រជាពលរដ្ឋ។

ក្នុងកាលៈទេសៈដ៏លំបាកដែលប្រទេសកម្ពុជាបានជួបប្រទះនៅក្នុងឆ្នាំ២០២០នេះ សាធារណៈជនសង្កេតឃើញថា
មានធុរៈជន និងក្រុមហ៊ុនធំៗជាច្រើនបានសាមគ្គីគ្នាឧបត្ថម្ភថវិកាជាហូរហែរដើម្បីចូលរួមជាមួយរាជរដ្ឋាភិបាលក្នុងការដោះស្រាយបញ្ហាប្រឈមនានា ដែលប្រជាពលរដ្ឋ និងរាជរដ្ឋាភិបាលកម្ពុជាកំពុងជួបប្រទះ។

ជាក់ស្តែងចាប់តាំងពីថ្ងៃទី០៨ ខែធ្នូ ឆ្នាំ២០២០ គេសង្កេតឃើញមាន ឧកញ៉ា អ្នកឧកញ៉ាល្បីៗពីបណ្តាក្រុមហ៊ុនធំៗជាច្រើនបានបង្ហាញសាមគ្គីភាពសង្គមតាមរយៈការបរិច្ចាគថាវិកាយ៉ាងច្រើនជូនដល់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីទិញវ៉ាក់សាំងកូវីដ-១៩ មកចាក់ជូនប្រជាពលរដ្ឋដោយឥតគិតថ្លៃ។ ក្នុងចំណោមបណ្ដាក្រុមហ៊ុនធំៗទាំងនោះ ក៏មានក្រុមហ៊ុន ប៉េង ហួត គ្រុប ដែលឈានមុខគេក្នុងវិស័យអចលនទ្រព្យ អភិវឌ្ឍបុរី និងវីឡាប្រណីតៗ បានបរិច្ចាគថវិកាចំនួន ៣លានដុល្លារអាមេរិចផងដែរ។

តំណាងក្រុមហ៊ុន ប៉េង ហួត គ្រុប លោក ចាន់ រដ្ឋា ប្រធានផ្នែកកិច្ចការសាធារណៈជាន់ខ្ពស់ បានលើកឡើងថា៖ “ភាពជោគជ័យ ការរីកចម្រើន និងទំនួលខុសត្រូវរបស់ក្រុមហ៊ុនមួយឆ្លុះបញ្ចាំងតាមរយៈ ការចែករំលែក និងចូលរួមក្នុងសង្គម។
ការីកចម្រើនរបស់ក្រុមហ៊ុនរហូតមកដល់សព្វថ្ងៃផ្សារភ្ជាប់ទៅនឹងទស្សនៈ ដែលជានិច្ចជាកាលដក់ជាប់ក្នុងផ្នត់គំនិតរបស់ថ្នាក់ដឹកនាំពោលគឺ “ផឹកទឹកនឹកដល់ប្រភព” ព្រមជាមួយចក្ខុវិស័យដែល “គ្រប់បែបយ៉ាងគឺដើម្បីធ្វើឲ្យជីវិតកាន់តែមានន័យ” ។ ប្រភពនៃការរីកចម្រើនរបស់ក្រុមហ៊ុន គឺការគាំទ្រពីរាជរដ្ឋាភិបាលតាមរយៈ សន្តិភាព ស្ថិរភាពសង្គម និងបរិយាកាសវិនិយោគល្អ ការគំាំទ្រពីអតិថិជន កាខិតខំប្រឹងប្រែងរបស់បងប្អូនកម្មករ និងបុគ្គលិកគ្រប់ជាន់ថ្នាក់ ខណៈដែលការចែករំលែក ការជួយគ្នាក្នុងគ្រាលំបាកគឺជាសេចក្តីសុខដែលធ្វើឲ្យជីវិតយើងទាំងអស់គ្នាកាន់តែមានន័យ។ ឆ្លៀតក្នុងឳកាសនេះដែរ ខ្ញុំបាទ សូមថ្លែងអំណអរគុណដល់អតិថិជនដែលតែងតែគាំទ្រផលិតផល និងគម្រោងនានារបស់ក្រុមហ៊ុន និងចូលរួមចែករំលែកភាពជោគជ័យរបស់យើងទាំងអស់គ្នាទៅដល់សង្គមវិញ។ សូមចូលរួមរក្សាអនាម័យ ពាក់ម៉ាស់ និងរក្សាគម្លាតសង្គមអោយបានគ្រប់ៗគ្នា ដើម្បីបង្ការជំងឺកូវីដ-១៩។

សូមរំលឹកផងដែរថាជាច្រើនឆ្នាំកន្លងមកនេះ ក្រុមហ៊ុន ប៉េង ហួត គ្រុប បានចូលរួមយ៉ាងសកម្មក្នុងការចែករំលែកនិងតបស្នងទៅសង្គមដូចជា សាងសង់វត្តអារាម ផ្លូវថ្នល់ មន្ទីរពេទ្យ ឧបត្ថម្ភថវិកាដល់មន្ទីរពេទ្យគន្ធបុប្ផា មន្ទីរពេទ្យកុមារអង្គរ ចូលរួមជាមួយរាជរដ្ឋាភិបាលរាល់គ្រប់កាលៈទេសៈដូចជាគ្រោះទឹកជំនន់ កូវីដ-១៩។ល។

បេក្ខភាពដែលមានសក្ដានុពល២រូប នឹងឈរឈ្មោះជាប្រធាន CVEA ក្នុងអាណត្តិថ្មីឆ្នាំ២០២១

ដោយ ៖ រ៉ាណេត

ភ្នំពេញ ៖ សម្រាប់អាណត្តិថ្មីនៃការបោះឆ្នោតជ្រើសតាំងប្រធានដឹកនាំសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាឆ្នាំ២០២១ នឹងត្រូវប្រព្រឹត្តទៅនៅថ្ងៃទី២៣ ខែធ្នូ ឆ្នាំ២០២០ឆាប់ៗខាងមុខនេះ នៅសណ្ឋាគារភ្នំពេញ ក្រោមសម្លេងគាំទ្រដែលជាសមាជិកសរុបប្រមាណជាង១០០ក្រុមហ៊ុន។

ខុសប្លែកពីអាណត្តិមុនៗដែលមានបេក្ខភាពជាច្រើនរូបចូលរួមប្រកួតប្រជែងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) សម្រាប់អាណត្តិថ្មីឆ្នាំ២០២១ខាងមុខនេះ បេក្ខភាពប្រកួតប្រជែងមានតែ២រូបប៉ុណ្ណោះ ដែលសុទ្ធតែត្រូវបានគេស្គាល់ថាមានកេរ្តិ៍ឈ្មោះល្បីក្នុងវិស័យអចលនទ្រព្យយ៉ាងទូលាយ និងមានសក្ដានុពលខ្លាំងដូចគ្នា។

បេក្ខភាពទី១ លោក ច្រឹក សុខនីម អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Mekong និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជានៅពេលបច្ចុប្បន្ន។ បេក្ខភាពទី២ លោក វ៉ន ចាន់ថន អគ្គនាយកក្រុមហ៊ុនភ្នាក់ងារអចលនទ្រព្យ TOWN CITY Real Estate និងអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជានាពេលបច្ចុប្បន្ន។

ជាមួយនឹងការឈរឈ្មោះជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាក្រោមការស្វែងរកសន្លឹកឆ្នោតពីសមាជិកនៅក្នុងសមាគមសរុបជាង១០០ក្រុមហ៊ុន ដែលនឹងប្រព្រឹត្តទៅនៅត្រឹមថ្ងៃទី២៣ ខែធ្នូ ឆ្នាំ២០២១ខាងមុខនេះ បេក្ខភាពទាំង២រូប សុទ្ធតែមានចក្ខុវិស័យ និងផែនការដឹកនាំសមាគម ក៏ដូចជាសមាជិកទាំងអស់ឱ្យមានដំណើរឆ្ពោះទៅមុខប្រកបដោយភាពរីកចម្រើន និងបង្កើនការអភិវឌ្ឍវិស័យអចលនទ្រព្យកម្ពុជាឱ្យមានសន្ទុះខ្លាំងជាងពេលបច្ចុប្បន្ន។

គួរកត់សម្គាល់ផងដែរថា សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលជាចំណុះរបស់ក្រសួងសេដ្ឋកិច្ច និងហិរញ្ញវត្ថុ ធ្លាប់មានប្រធានដឹកនាំក្នុងវិស័យឯកជនចំនួន៥រូប រួមមានលោក ស៊ឹង ប៊ុណ្ណា លោកឧកញ៉ា ចេង ខេង លោកឧកញ៉ា សុខ ប៊ុន លោកឧកញ៉ា គឹម ហ៊ាង និងលោក ច្រឹក សុខនីម ដែលកំពុងបន្តឈរឈ្មោះជាប្រធានសមាគមសម្រាប់អាណត្តិថ្មី ឆ្នាំ២០២១ខាងមុខនេះ៕

ចិនប្រកាសដំឡើងពន្ធលើទំនិញនាំចូលពីស្រាអូស្រ្តាលី ចំពេលមានភាពតានតឹងរវាងប្រទេសទាំងពីរ

ដោយ៖ វុទ្ធី

ក្រុងប៉េកាំង៖ ចិន បានប្រកាសនៅថ្ងៃទី១០ ខែធ្នូថា ខ្លួនបានកំណត់ពន្ធនាំចូលថ្មីលើស្រាក្រហមអូស្រ្តាលី បន្ទាប់ចិនបានចោទប្រកាន់ថា រដ្ឋាភិបាលអូស្ត្រាលីបានផ្តល់ប្រាក់ឧបត្ថម្ភដល់ក្រុមហ៊ុនជាច្រើន ដែលធ្វើឱ្យខូចដល់តម្លៃទំនិញក្នុងស្រុក។

ការប្រកាសយកពន្ធនេះ ត្រូវបានធ្វើឡើង នៅពេលទំនាក់ទំនងរវាងប្រទេសទាំងពីរនៅតែបន្តមានភាពតានតឹង បន្ទាប់ពីប្រទេសអូស្រ្តាលី បានអំពាវនាវកាលពីដើមឆ្នាំនេះ ដើម្បីសាកសួរពីប្រភពដើមនៃការផ្ទុះឡើងនៃជំងឺកូវីដ១៩ ដែលបានកើតឡើងនៅក្នុងប្រទេសចិន។

ពន្ធប្រឆាំងការឧបត្ថម្ភធនពី ៦,៣ ដល់ ៦,៤ ភាគរយ នឹងចាប់ផ្តើមនៅថ្ងៃសុក្រខាងមុខ។ ក្រសួងពាណិជ្ជកម្មចិន បាននិយាយថា ការសម្រេចដាក់ពន្ធធ្វើឡើង បន្ទាប់ពីការស៊ើបអង្កេតមួយបានប្រកាសកាលពីចុងខែសីហា។

ក្រសួងពាណិជ្ជកម្ម បានឱ្យដឹងថា “អាជ្ញាធរស៊ើបអង្កេត បានកំណត់ជាបឋមថា មានការឧបត្ថម្ភធនសម្រាប់ស្រាដែលនាំចូលមកពីប្រទេសអូស្ត្រាលី ហើយឧស្សាហកម្មស្រាក្នុងស្រុករបស់ប្រទេសចិន បានរងការខូចខាតយ៉ាងខ្លាំង”។

ក្រសួងបានត្អូញត្អែរថា អ្នកផលិតស្រាអូស្រ្តាលី ទទួលបានអត្ថប្រយោជន៍ពីការឧបត្ថម្ភធនរបស់រដ្ឋាភិបាល ដែលផ្តល់ឱ្យពួកគេនូវអត្ថប្រយោជន៍ជាងក្រុមហ៊ុនចិន។

ប៉ុន្តែរដ្ឋមន្រ្តីក្រសួងពាណិជ្ជកម្មអូស្រ្តាលី បានហៅវិធានការណ៍កាលពីខែមុនថា ជារឿងអយុត្តិធម៌ទាំងស្រុង មិនមានការអះអាង និងគ្មានហេតុផល។

អ្នកផលិតអូស្រ្តាលី ក៏បានព្រមានថា ពន្ធគយកាលពីខែវិច្ឆិកា ទំនងជាមានន័យថា ទីផ្សារចិនដែលធ្លាប់តែរកប្រាក់ចំណេញ នឹងលែងមានការផ្គត់ផ្គង់។

ក្រុមហ៊ុនផលិតស្រា Treasury Wine Estates ដែលផលិតម៉ាក Penfolds ដែលមានប្រជាប្រិយភាពខ្ពស់ បាននិយាយថា ខ្លួននឹងសំឡឹងមើលទៅទីផ្សាររីកចម្រើនដ៏ទៃទៀត ហើយកាត់បន្ថយការចំណាយនៃការលក់ ព្រោះទីផ្សារមានចំនួនត្រឹមតែ ៣០ ភាគរយនៃប្រាក់ចំណូលរបស់ខ្លួនប៉ុណ្ណោះ៕ AFP

ធនាគារ ហត្ថា បង្ហាញលេខគណនីសម្រាប់សប្បុរសជនធ្វើការបរិច្ចាគក្នុងការចូលរួមទិញវ៉ាក់សាំងការពារជំងឺកូវីដ១៩ ជាមួយរាជរដ្ឋាភិបាល

ថ្មីៗនេះ សម្តេចអគ្គមហាសេនាបតី តេជោ ហ៊ុន សែន បានប្រកាសពីគម្រោងទិញវ៉ាក់សាំងការពារជំងឺកូវីដ១៩ ដើម្បីចាក់ជូនប្រជាពលរដ្ឋដោយឥតគិតថ្លៃ ក្នុងគោលបំណងទប់ស្កាត់ និងការពារប្រជាជនកម្ពុជាពីការឆ្លងជំងឺនេះ។ យុទ្ធសាស្រ្តរបស់ សម្តេច ដែលបានលើកឡើងពិតជាល្អឥតអ្វីប្រៀបបាន យើងខ្ញុំជាថ្នាក់គ្រប់គ្រង បុគ្គលិក ធនាគារ ហត្ថា និងប្រជាពលរដ្ឋកម្ពុជាសុំចូលរួមបរិច្ចាគថវិកាផ្ទាល់ខ្លួនជាមួយសម្តេចដើម្បីប្រយុទ្ធប្រឆាំងនឹងជំងឺកូវីដ១៩ នៅក្នុងប្រទេសកម្ពុជា។

ដើម្បីគាំទ្រដល់យុទ្ធសាស្រ្តរបស់សម្តេច និងជួយសម្រួលដល់សប្បុរសជនទាំងអស់ដែលមានបំណងបរិច្ចាគថវិកាគាំទ្រដល់ការទិញវ៉ាក់សាំងនេះ ធនាគារ ហត្ថា ដែលមានបណ្តាញការិយាល័យសាខាធំលំដាប់ទី២ ក្នុងប្រទេសកម្ពុជា បានបង្កើតគណនីសប្បុរសធម៌ កូវីដ១៩ សម្រាប់ផ្តល់ភាពងាយស្រួលដល់ អតិថិជន របស់ធនាគារ ហត្ថា និងសប្បុរសជនទាំងអស់ ព្រមទាំងនិយោជិតរបស់ខ្លួន ធ្វើការបរិច្ចាគជូនរាជរដ្ឋាភិបាល។ សប្បុរសជនអាចធ្វើការបរិច្ចាគដោយផ្ទេរចូលគណនី Hattha Bank Covid-19 Contribution Fund របស់ធនាគារ ហត្ថា ដែលមានលេខគណនី 168000033270 (សម្រាប់ប្រាក់រៀល) និង 168000033305 (សម្រាប់ប្រាក់ដុល្លារ) ហើយការបរិច្ចាគអាចធ្វើឡើងតាមរយៈសេវាធនាគារចល័ត ឬនៅបញ្ជរបេឡាសាខាគ្រប់ខេត្តក្រុងរបស់ធនាគារ ហត្ថា ដោយមិនគិតថ្លៃ។

គួររំលឹកផងដែរថា ធនាគារ ហត្ថា ទើបតែបានកម្លាយខ្លួនជាផ្លូវការទៅជាធនាគារពាណិជ្ជ ពីគ្រឹះស្ថានមីក្រូហិរញ្ញវត្ថុហត្ថា កសិករ លីមីតធីត នៅខែសីហា ឆ្នាំ២០២០ថ្មីៗនេះ បន្ទាប់ពីបានផ្តល់សេវាហិរញ្ញវត្ថុក្នុងប្រទេសកម្ពុជា ២៦ឆ្នាំ។ បច្ចុប្បន្ន ធនាគារ ហត្ថា មានការិយាល័យសាខាចំនួន ១៧៧ ម៉ាស៊ីនអេធីអឹមចំនួន ១៣៧ និងផ្តល់សេវាកម្មហិរញ្ញវត្ថុយ៉ាងច្រើនសម្បូរបែបដល់អតិថិជនដូចជា៖ សេវាឥណទាន សេវាប្រាក់បញ្ញើសន្សំ សេវាផ្ទេរប្រាក់ក្នុងស្រុក សេវាអេធីអឹម សេវាធនាគារចល័ត សេវាបើកប្រាក់បៀវត្ស ជាភ្នាក់ងារណែនាំលក់សេវាធានារ៉ាប់រង និងត្រៀមដាក់ជូនឲ្យប្រើប្រាស់នូវសេវាហិរញ្ញវត្ថុថ្មីៗជាច្រើនបន្ថែមទៀត។ ធនាគារ ហត្ថា គឺជាបុត្រសម្ព័ន្ធរបស់ធនាគារក្រុងស្រ៊ី ដែលជាធនាគារពាណិជ្ជធំជាងគេលំដាប់ទី ៥ នៅព្រះរាជាណាចក្រថៃឡង់ដ៏ និងជាសមាជិករបស់សម្ព័ន្ធហិរញ្ញវត្ថុអន្តរជាតិ Mitsubishi UFJ Financial Group (MUFG) ដែលជាសម្ព័ន្ធហិរញ្ញវត្ថុធំជាងគេបំផុតនៅប្រទេសជប៉ុន ព្រមទាំងជាសម្ព័ន្ធសេវាហិរញ្ញវត្ថុដ៏ធំមួយក្នុងចំណោមសម្ព័ន្ធហិរញ្ញវត្ថុធំជាងគេលើសកលលោក។

អ្នកជំនាញៈ និយាយពីភាពប្រឈម និងឱកាសសម្រាប់ភ្នាក់ងារអចលនទ្រព្យក្នុងដំណាក់វិបត្តិ

ដោយៈ រ៉ាណេត

ភ្នំពេញៈ អ្នកជំនាញបាននិយាយថា ទីផ្សារអចលនទ្រព្យនៅពេលបច្ចុប្បន្នត្រូវបាន អ្នកជំនាញទទួលស្គាល់ថា ពិតជាទទួលរងនូវផលប៉ះពាល់ពីវិបត្តិនៃជំងឺឆ្លង ហើយបានជះឥទ្ធិពលអាក្រក់បន្ត ទៅដល់បណ្តាភ្នាក់ងារដែលរកចំណូលពីទីផ្សារមួយនេះ។

យ៉ាងណាក៏ដោយ អ្នកជំនាញដែលធ្លាប់មានបទពិសោធន៍ច្រើនឆ្នាំ បានរំលឹកថាក្នុងដំណាក់កាលនេះ ភ្នាក់ងារគួរតែយកពេលដែលទីផ្សារកំពុងស្ងប់ស្ងាត់នេះ បង្កើនចំណេះដឹងបន្ថែមទៀត។

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោក ឃាង ពុទ្ធី បានមានប្រសាសន៍នៅថ្ងៃទី១០ ខែធ្នូ ឆ្នាំ២០២០នេះថា នៅក្នុងដំណាក់កាលនេះ មិនថាចំពោះទីផ្សារអចលនទ្រព្យនោះទេ ដែលរងនូវផលប៉ះពាល់ ទីផ្សារនៃវិស័យផ្សេងទៀតក៏ប៉ះពាល់ដូចគ្នា ទាស់ត្រង់ថាតិចឬច្រើនតែប៉ុណ្ណោះ។

លោកបន្តថា“សម្រាប់ទីផ្សារអចលនទ្រព្យ បានប៉ពាល់តាំងពីដើមឆ្នាំ២០២០ ប៉ុន្តែវាកាន់តែធ្ងន់ធ្ងរក្រោយពេលមានការរាតត្បាត នៅក្នុងសហគមន៍ដែលកាន់តែធ្វើឱ្យទីផ្សាររួមមានភាពស្ងប់ស្ងាត់”។ លោកបន្តថា “ភាពស្ងប់ស្ងាត់នេះ វាប៉ះពាល់ទាំងអ្នកវិនិយោគ ទាំងអស់អ្នកអភិវឌ្ឍន៍ ជាពិសេសធ្វើឱ្យបណ្តាភ្នាក់ងារភាគច្រើន ប៉ះពាល់ចំណូលដែលបានមកពីកម្រៃជើងសារ”។

លោកឃាង ពុទ្ធី បានមានប្រសាសន៍បន្តទៀតថា ពួកគាត់ភាគច្រើនពិតជាប៉ះពាល់ចំណូលប្រាកដមែន ព្រោះចំណូលរបស់ពួកគាត់បានមកពីការលក់ និងការទទួលបានកម្រៃជើងសារ លុះនៅពេលទីផ្សារធ្លាក់ចុះ មានភាពស្ងប់ស្ងាត់ដូចបច្ចុប្បន្ននេះ ចំណូលពួកគាត់ក៏ត្រូវធ្លាក់ដែរ។ ប៉ុន្តែអ្វីដែលសំខាន់សម្រាប់ពួកគាត់ ដែលជាភ្នាក់ងារត្រូវធ្វើនៅពេលនេះ ត្រូវតែចេះយកពេលស្ងប់ស្ងាត់ទាំងនេះ ធ្វើឱ្យមានប្រយោជន៍ដោយការបង្កើនចំណេះដឹងបន្ថែម តាមរយៈការហាត់រៀនពីជំនាញនៃការលក់។ រៀនពីរបៀបនៃការផ្សព្វផ្សាយតាមបច្ចេកវិទ្យា រៀនភាសាបន្ថែមសម្រាប់ត្រៀមអនុវត្តន៍ លើទីផ្សារក្រោយពេលស្ថានការណ៍វិលត្រឡប់រកភាពល្អប្រសើរវិញ។

លោកបន្តថា “យើងកុំប្រើយុទ្ធសាស្ត្រកាប់បំពុងរង់ចាំទឹកភ្លៀង ប៉ុន្តែត្រូវកែប្រែកាលៈទេសៈប្រឈមនៅពេលនេះ ឱ្យក្លាយជាវេលាល្អសម្រាប់បង្កើនចំណេះដឹងបន្ថែម ដើម្បីអភិវឌ្ឍន៍ខ្លួនបន្ថែមទៀតទៅលើអាជីពរបស់ខ្លួន”។

ជាមួយគ្នានេះ លោក ម៉ាន់ ច័ន្ទឌី អគ្គនាយកក្រុមហ៊ុន PREMIUM Group បានមានប្រសាសន៍ថា ទោះជាមិនស្ថិតនៅក្នុងកាលទេសៈបែបនេះក៏ដោយ ក្នុងនាមជាភ្នាក់ងារអាជីពដែលអាចមានទីផ្សារច្រើន និងអាចទទួលបានភាគរយជោគជ័យខ្ពស់ គឺជាភ្នាក់ងារដែលមានចំណេះដឹងទូលំទូលាយ មានកាស្វែងយល់ច្រើនពីទីផ្សាររួម ជាពិសេសមានជំនាញផ្នែកទំនាក់ទំនងខ្ពស់”។

លោកថា “ការរៀនសូត្រ បង្កើនចំណេះដឹងគឺមិនមានដែនកំណត់នោះទេ ដូច្នេះគួរកុំទុកពេលទំនេរឱ្យកន្លងផុតទៅឱ្យសោះ តែត្រូវយកឱកាសនេះចាប់ជំនាញថ្មី បន្ថែមទៀត ចេះច្រើនពេលណា មានឱកាសចាប់បានចំណែកទីផ្សារបានច្រើនដូចគ្នា”៕

1...2,2022,2032,204...3,317 Page 2,203 of 3,317