តំបន់ភាគខាងត្បូងកាន់តែពង្រីកសក្តានុពលជាមួយគំរោងអភិវឌ្ឍន៍៍ធំៗជាច្រើន

ដោយស៊ីវ ម៉េង

ភ្នំពេញៈ តំបន់ភាគខាងត្បូងក្រុងភ្នំពេញ កំពុងមានការរីកចម្រើនយ៉ាងឆាប់រហ័ស ដោយសាតការសាងសង់ទីក្រុងរណបING CITY ដែលមានគំរោងអភិវឌ្ឈន៍ធំៗជាច្រើនឆ្ពោះទៅតំបន់នេះ។

បច្ចុប្បន្នគំរោងអភិវឌ្ឍន៍ជាច្រើន កំពុងសាងសង់យ៉ាងសកម្មនៅតំបន់នេះ ដូចជាគម្រោងUrban Village, Peng Hourt, Chip Mong, EAON MALL3 និងគំរោងជាច្រើនទៀត ដែលកំពុងទាក់ទាញចំណាប់អារម្មណ៍៍ពីអ្នកវិនិយោគក្នុងស្រុក។

ហេតុផលដែលគួរវិនិយោគលើគំរោងUrban Villageនៅតំបន់នេះ ដោយសារគំរោងនេះផ្តោតលើការរស់នៅ បែបសហគមន៍តំបូងគេនៅទីក្រុងភ្នំពេញ ជាគម្រោងដែល ផ្តោតលើគុណភាព និងបែបផែនជីវិតសម័យថ្មី ពិសេសតំបន់នេះមានការរីកចម្រើនលឿន និងមានហេដ្ឋារចនាសម្ព័ន្ឋជាច្រើន ដែលតភ្ជាប់ទៅតំបន់ព្រលានយន្តហោះអន្តរជាតិភ្នំពេញថ្មី ផ្លូវតភ្ជាប់ទៅកាន់ផ្លូវជាតិលខ២ ផ្លូវជាតិលេខ៣ និងផ្លូវជាតិលេខ៤ ដែលផ្តល់ភាពងាយស្រួលក្នុងការធ្វើដំណើរ។

ប្រធានសមាគមអ្នកវាយតម្លៃនិងភ្នាក់ងងារអចលនវត្ថុកម្ពុជា លោកច្រឹក សុខនីមបានមានប្រសាសន៍ថា តំបន់ផ្លូវ៦០ម៉ែត្រ កំពុងពង្រីកសក្តានុពលបណ្តើរៗហើយ ដោយមានគំរោងជាច្រើនបានបាញ់ឆ្ពោះ និងសម្រុកសាងសង់នៅតំបន់នេះ។ ភាពទាក់ទាញតំបន់់នេះ ដោយសារវាជាទីក្រុងថ្មី ដែលមានដីធំៗច្រើន ងាយស្រួលរៀបចំហេដ្ឋារចនាសម្ព័ន្ឋ ពិសេសជាផ្លូវភ្ជាប់ជាមួយព្រលានយន្តហោះថ្មី ដែលកំពុងសាងសង់យ៉ាងសកម្ម។

លោកបន្តថា ការរីកចម្រើនតំបន់់នេះបានធ្វើឲ្យតម្លៃដីធ្លីកើនឡើង ដែលតម្លៃដីមានចន្លោះពី១៨០០ទៅ២៨០០ដុល្លារក្នុងមួយម៉ែត្រការ៉េ បើគិតពីចំណុចច្រមុះជ្រូកផ្លូវ២៧១ ដល់ស្តុបទី១ ដែលជាសាលពិព៌ណរបស់រថយន្តម៉ាសឺដេស និងចាប់ពីតំបន់ស្តុបទី១ដល់ចំណុចផ្លូវ៥០០ម៉ែត្រ ដីមានតម្លៃចន្លោះពី១៥០០ដល់២៣០០ដុល្លារ និងចំណុចចុងក្រោយតភ្ជាប់ជាមួយផ្លូវជាតិលេខ២ ដីមានតម្លៃចន្លោះពី១៦០០ទៅ១៨០០ដុល្លារក្នុងមួយម៉ែត្រការ៉េ។

លោកច្រឹក សុខនីមបានបន្តថា បច្ចុប្បន្នគំរោងធំៗជាច្រើនឆ្ពោះទៅតំបន់នេះ ដែលវាបាននិងកំពុងជះឥទ្ឋិពលដល់តំបន់ផ្លូវជាតិលេខ២ ដែលនឹងមានគំរោងជាច្រើនពង្រីកទៅដល់តំបន់នេះ នៅពេលការពង្រីកផ្លូវជាតិនេះបញ្ចប់”៕

ក្រុមហ៊ុនធានារ៉ាប់រងដ៏ធំរបស់ថៃប្រកាសបង្កើនសកម្មភាពវិនិយោគនៅទីផ្សារកម្ពុជា

ដោយៈម៉ាណេត

ភ្នំពេញៈ ក្រុមហ៊ុនធានារ៉ាប់រងថៃ Muang Thai Life Assurance (MTL) នឹងបង្កើនសកម្មភាពវិនិយោគរបស់ខ្លួន ក្នុងប្រទេសកម្ពុជា ឡាវ មីយ៉ាន់ម៉ា វៀតណាម និងថៃ (CLMVT) ដើម្បីទទួលបានទីផ្សារធំជាងមុននៅប្រទេសទាំង៤នេះ។ នេះបើតាមប្រសាសន៍របស់លោក Sara Lamsam ក្រុមហ៊ុន MTL។

ក្រុមហ៊ុន MTL មានប្រតិបត្តិការនៅក្នុងប្រទេសចំនួន៤ តាមរយៈក្រុមហ៊ុនបណ្តាក់ទុនរួមគ្នាចំនួន៤ ដែលរួមមានក្រុមហ៊ុនធានារ៉ាប់រង ST-Muang Thai នៅប្រទេសឡាវក្រុមហ៊ុន MB Ageas Life នៅប្រទេសវៀតណាម ក្រុមហ៊ុនធានារ៉ាប់រងអាយុជីវិតសុវណ្ណភូមិ និងក្រុមហ៊ុនធានារ៉ាប់រងដារ៉ានៅកម្ពុជា និងការិយាល័យតំណាងមួយនៅប្រទេសមីយ៉ាន់ម៉ា។

ក្រុមហ៊ុនធានារ៉ាប់រងដារ៉ា ដែលជាក្រុមហ៊ុនមិនផ្តោតលើការធានារ៉ាប់រងជីវិត និងបណ្តាក់ទុនរួមគ្នា ជាមួយក្រុមហ៊ុនធានារ៉ាប់រងអាយុជីវិតសុវណ្ណភូមិ គឺការវិនិយោគចុងក្រោយ បន្ទាប់ពីក្រុមហ៊ុន MTL ប្រកាសឈានចូលប្រទេសកម្ពុជាកាលពី៤ឆ្នាំមុន តាមរយៈការបណ្តាក់ទុនរួមគ្នាជាមួយធនាគារកាណាឌីយ៉ា។

លោកSara Lamsam បានមានប្រសាសន៍ថា “ទីផ្សារCLMVT មានសក្តានុពលខ្ពស់ណាស់ ដោយមានប្រជាជនសរុបជិត៣០០លាននាក់ និងមានចំនួនប្រជាសាស្ត្រចម្រុះ”។

លោកបានមានប្រសាសន៍ថា “ប្រទេសកម្ពុជា ជាកន្លែងវិនិយោគដ៏សំខាន់របស់ក្រុមហ៊ុន MTL ដោយសារតែកំណើនសេដ្ឋកិច្ចយ៉ាងឆាប់រហ័ស៧ភាគរយប្រចាំឆ្នាំ ក្នុងកំឡុងឆ្នាំ២០១៤-២០១៩ ដែលនាំឱ្យមានតម្រូវការកើនឡើង សម្រាប់ការការពារធានារ៉ាប់រង”។

លោកបានថ្លែងទៀតថា “គ្រឿងបន្លាស់រថយន្ត និងឧស្សាហកម្ម ដែលពាក់ព័ន្ធនៅក្នុងប្រទេសកម្ពុជា មានការរីកចម្រើនយ៉ាងឆាប់រហ័ស ស្របនឹងសេដ្ឋកិច្ចសំណង់ និងទេសចរណ៍របស់ប្រទេសនេះ”។

ក្រុមហ៊ុនបុត្រសម្ព័ន្ធធានារ៉ាប់រងអាយុជីវិតថ្មីរបស់ក្រុមហ៊ុន MTL នឹងផ្តោតលើផលិតធានារ៉ាប់រងរថយន្ត ធានារ៉ាប់រងអចលនទ្រព្យ និងធានារ៉ាប់រងវិស្វកម្ម៕ Bangkok Post៕

ដំណឹងល្អ ! កំណាត់ផ្លូវជាតិលេខ៣ ពីរង្វង់មូលចោមចៅ-ក្រុងកំពត សម្រេចបាន៨៣ភាគរយហើយ

ដោយ ៖ គង់ ម៉ាលីន

ភ្នំពេញ ៖ គម្រោងពង្រីក និងលើកកម្រិតគុណភាពផ្លូវជាតិលេខ៣ សម្រេចបាន គិតត្រឹមដើមខែធ្នូ ឆ្នាំ២០២០នេះ សម្រេចបានប្រមាណ៨៣ភាគរយ ហើយបច្ចុប្បន្នកំពុងសាងសង់សួនច្បារចែកទ្រូងផ្លូវ និងសាងសង់ស្ពានរំលងផ្លូវ ដែលគ្រោងនឹងបញ្ចប់ការសាងសង់ទាំងស្រុងនៅពាក់កណ្តាលឆ្នាំ២០២២ខាងមុខ។

រដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ថុល បានមានប្រសាសន៍កាលពីពេលកន្លងទៅនេះថា កំណាត់ផ្លូវជាតិលេខ៣ ពីរង្វង់មូលចោមចៅរាជធានីភ្នំពេញដល់ក្រុងកំពតមានប្រវែងប្រមាណ១៣៤ គីឡូម៉ែត្រ គ្រោងបញ្ចប់នៅពាក់កណ្តាលឆ្នាំ២០២២ខាងមុខ ដែលសរុបរយៈពេលសាងសង់ត្រឹម៤៨ខែ ។

លោកបានបញ្ជាក់ថា ផ្លូវនេះត្រូវបានស្ថាបនាជាប្រភេទផ្លូវ ប៊េតុងកៅស៊ូ (AC) បែងចែកជាពីរដំណាក់កាល។ ដំណាក់កាលទីមួយ ពីចោមចៅ-បែកគូស (ត្រូវបានពង្រីកពីពីរកន្លងទៅបួនកន្លង និងមានសួរច្បារកណ្តាលទ្រូងផ្លូវ) និងដំណាក់កាលទីពីរ បែកគូស-ក្រុងកំពត (មួយគន្លងទៅមួយគន្លងមក)។ គម្រោងនេះចំណាយថវិកាប្រមាណជាង២១៥លានដុល្លារ ក្រោមហិរញ្ញប្បទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា។

ក្នុងប្រវែងសរុបជាង១៣៤គីឡូម៉ែត្រ កំណាត់ផ្លូវជាតិលេខ៣ (ភ្នំពេញ-កំពត)មាន៦៩គីឡូម៉ែត្រ ចាប់ពីចោមចៅ ដល់បែកគុស ត្រូវសាងសង់ជាផ្លូវ៤គន្លង(២ទៅ២មក)សួនច្បារកណ្តាល ទទឹង២៤.៥ម និងចាប់ពីបែកគូស ដល់ទីរួមខេត្តកំពត ប្រវែង ៦៥,៧៩៦ គីឡូម៉ែត្រ ត្រូវសាងសង់ជាផ្លូវ ២គន្លង(១ទៅ១មក ទទឹង១២ម) ដោយក្រាលបេតុងកៅស៊ូ (AC 70mm)។

នៅពេលកែលម្អរួចរាល់ហើយ ផ្លូវនេះ នឹងចូលរួមចំណែកច្រើនដល់ការធ្វើដំណើររបស់ប្រជាពលរដ្ឋ ការដឹកជញ្ជូនទំនិញផលិតផល ពិសេសការដឹកជញ្ជូនអំបិលពីខេត្តកំពតទៅកាន់ខេត្តផ្សេងៗនិងសម្រាប់វិស័យទេសចរណ៍ធ្វើដំណើរទៅកាន់ភូមិភាគទិសនារតីនៃតំបន់សមុទ្រកម្ពុជាផងដែរ។បងប្អូនប្រជាពលរដ្ឋធ្វើដំណើរនឹងចំណេញពេលវេលា និងកាត់បន្ថយការចំណាយផ្សេងៗបានច្រើន។ តាមរយៈផ្លូវជាតិលេខ៣នេះ បើមានបងប្អូនប្រជាពលរដ្ឋចង់ធ្វើដំណើរទៅលេងកំពង់សោម ក៏អាចធ្វើ ដំណើររតាមផ្លូវជាតិនេះបានផងដែរ។

ផ្លូវជាតិលេខ៣ (ពិសេសកំណាត់ផ្លូវពីចោមចៅ ទៅបែកគុស) គឺជាភូមិសាស្ត្រមានការអភិវឌ្ឍខ្លាំង បច្ចុប្បន្នកំណាត់ផ្លូវនេះអមដោយឧស្សាហកម្មរោងចក្រ សហគ្រាសតូចៗ និងមធ្យម ទីផ្សារ សាលារៀន និងវត្តអារាម ធ្វើឱ្យមានចរាចរណ៍មមាញឹកជារៀងរាល់ថ្ងៃ។ តាមរយៈកំណើនសេដ្ឋកិច្ច និងកំណើនប្រជាពលរដ្ឋ នៅថ្ងៃអនាគតតំបន់នេះនឹងក្លាយទៅជាទីប្រជុំជនដ៏ធំមួយ ដែលរាជរដ្ឋាភិបាលត្រូវតែយកចិត្តទុកដាក់សាងសង់ហេដ្ឋារចនាសម្ព័ន្ធផ្លូវថ្នល់ឱ្យស្របតាមលក្ខណៈបច្ចេកទេស កំណើនយានយន្ត និងកំណើនប្រជាពលរដ្ឋនិងចក្ខុវិស័យរបស់ខ្លួនជៀសវាងផលវិបាកនានាដែលអាចកើតមាននៅពេលកំណើនប្រជាពលរដ្ឋកាន់តែកើនឡើងនៅតំបន់នេះ៕

កម្ពុជាឈរលំដាប់ទី២នៅអាស៊ី ដែលមានដីទំហំប្រមាណ៧,៣លានហិកតា សម្រាប់ជាតំបន់ការពារធម្មជាតិ

ដោយ ៖ រ៉ាណេត

ភ្នំពេញ ៖ មន្ត្រីជាន់ខ្ពស់ក្រសួងបរិស្ថានបានអះអាងថា បច្ចុប្បន្នកម្ពុជាបានក្លាយទៅជាប្រទេសឈរនៅលំដាប់ទី២ក្នុងអាស៊ី ដែលមានផ្ទៃដីទំហំរហូតដល់ប្រមាណ៧,៣លានហិកតា ស្មើនឹងប្រមាណ៤១ភាគរយនៃផ្ទៃប្រទេសសម្រាប់ជាតំបន់ការពារធម្មជាតិ។

លោកនេត្រ ភក្ត្រា រដ្ឋលេខាធិការក្រសួងបរិស្ថានបានមានប្រសាសន៍នៅថ្ងៃទី៩ ខែធ្នូ ឆ្នាំ២០២០ម្សិលមិញថា ប្រទេសកម្ពុជាមានធនធានធម្មជាតិ និងជីវៈចម្រុះដ៏សំបូរបែប។ ព្រៃឈើគ្របដណ្តប់ ៤៦,៨៦ភាគរយនៃផ្ទៃប្រទេស ដែលជាអត្រាខ្ពស់បំផុតនៅក្នុងតំបន់អាស៊ីអាគ្នេយ៍។

លោកនេត្រ ភក្ត្រា បានបញ្ជាក់ថា “មកទល់បច្ចុប្បន្ននេះ រាជរដ្ឋាភិបាលបានបង្កើតផ្ទៃដីតំបន់ការពារធម្មជាតិ ដែលស្ថិតនៅក្រោមយុត្តាធិការរបស់ក្រសួងបរិស្ថាន រហូតដល់ប្រមាណ ៤១ភាគរយនៃផ្ទៃប្រទេស គឺស្មើនឹងប្រមាណ ៧,៣លានហិកតា ដែលធ្វើឱ្យកម្ពុជាឈរលំដាប់ទី២ នៅអាស៊ី បន្ទាប់ពីប្រទេសប៊ូតាន ហើយកម្ពុជាក៏ទទួលបាននូវការកោតសរសើរពីសហគមន៍អន្តរជាតិថាបានអនុវត្តបានល្អលើការការពារនិងអភិរក្សជីវៈចម្រុះ និង បរិស្ថាន ព្រមទាំងបានកសាងកេរ្តិ៍ឈ្មោះល្អ នៅក្នុងឆាកអន្តរជាតិលើទីផ្សារឥណទានកាបូនស្ម័គ្រចិត្តថែមទៀតផង”។

ស្ថិតនៅក្នុងផែនការយុទ្ធសាស្ត្ររបស់រាជរដ្ឋាភិបាលកម្ពុជាក្នុងការក្លាយខ្លួនជាប្រទេសស្ថិតនៅលំដាប់ទី២ក្នុងអាស៊ី បច្ចុប្បន្នមានក្រុមហ៊ុនឯកជនកំពុងបណ្តាក់ទុនចូលរួមវិនិយោគដាំកូនឈើរហូតដល់ប្រមាណ៣០លានដើមបន្ថែមទៀតនៅក្នុងត្រឹមរយៈពេល៤ឆ្នាំតែប៉ុណ្ណោះ។

លោក លូ ឈូឆាង នាយកក្រុមហ៊ុនស៊ីងបាយអូថេក(ខេមបូឌា) បានមានប្រសាសន៍ថា ទាំងនៅក្នុងឆ្នាំ២០១៩ និងឆ្នាំ ២០២០ ក្រុមហ៊ុនស៉ីងបាយអូថេក បានដាំកូនឈើប្រភេទប្រេងខ្យល់បានចំនួនជិត ៤លានដើម ហើយរំពឹងថានឹងចាប់ផ្តើមទទួលផលនៅឆ្នាំ២០២៣ ខណៈដើមឈើបច្ចុប្បន្ននេះ មានការលូតលាស់បានល្អប្រកបដោយគុណភាព។ ដោយឡែកនៅអំឡុងខែឧសភា ឆ្នាំ២០២១ ខាងមុខ ក្រុមហ៊ុនបានត្រៀមដាំកូនឈើប្រភេទប្រេងខ្យល់ចន្លោះពី១០ ទៅ១២លានដើមបន្ថែមទៀតនៅពេលចាប់ផ្តើមរដូវវស្សាសាជាថ្មី។

លោកបានបន្តថា “នៅក្នុងផែនការរបស់ក្រុមហ៊ុន បាននឹងកំពុងបន្តផែនការដាំកូនឈើជាង ៣០លានដើម របស់ខ្លួន ក្នុងរយៈពេល៤ឆ្នាំ ពីឆ្នាំ២០២០ ដល់ឆ្នាំ២០២៣ ដើម្បីឆ្លើយតបទៅនឹងតម្រូវការទីផ្សារប្រើប្រាស់ឈើ ក្នុងវិស័យឧស្សាហកម្មកែច្នៃឈើ ដែលបច្ចុប្បន្នកម្ពុជាកំពុងត្រូវការខ្លាំង ជាពិសេសនៅក្នុងវិស័យសំណង់ ដែលកំពុងតែត្រូវការឈើកែច្នៃខ្លាំង សម្រាប់បម្រើឱ្យការសាងសង់សំណង់ផ្សេងៗ”។

ជាមួយនឹងការវិនិយោគលើចម្ការឈើដាំដែលត្រូវបានសាទរ ដោយមន្ត្រីជាន់ខ្ពស់នៃក្រសួងបរិស្ថាន ដែលចាត់ទុកចម្ការឈើដាំជាជម្រើសថ្មីមួយដើម្បី កាត់បន្ថយសម្ពាធលើការប្រើប្រាស់ឈើធម្មជាតិហួសកំណត់ និងដើម្បីចូលរួមការពារធនធម្មជាតិដែលកម្ពុជានៅសល់នាពេលបច្ចុប្បន្នឱ្យបានគង់វង្ស។

ចាប់តាំងពីដើមខែធ្នូមក ក្រុមហ៊ុនស៉ីងបាយអូថេក បាននឹងកំពុងឈូសឆាយសម្អាត ដីចន្លោះពី៨.០០០ ទៅ ១០.០០០ហិកតា នៅលើផ្ទៃដីសរុបលើផ្ទៃដីសរុបទំហំ ៣៤.០០៧ហិកតា នៅលើដីរបស់ស្ថានីយផ្សព្វផ្សាយ និងស្តារព្រៃឈើបឹងចារ ស្ថិតនៅក្នុងខេត្តក្រចេះ និងខេត្តស្ទឹងត្រែង ដែលក្រុមហ៊ុនបានទទួលបានសិទ្ធិពីរាជរដ្ឋាភិបាលកម្ពុជា ប្រើប្រាស់ដីព្រៃរបស់រដ្ឋសម្រាប់ដាំឈើជាលក្ខណៈឧស្សាហកម្ម ក្រោមកិច្ចសហការជាមួយរដ្ឋបាលព្រៃឈើ ក្រសួងកសិកម្ម រុក្ខប្រមាញ់ និងនេសាទ៕

អ្នកជំនាញព្យាករណ៍ថា វិស័យអចលនទ្រព្យកម្ពុជាអាចអូសបន្លាយដល់ចុងឆ្នាំ២០២១ទើបងើបឡើងវិញ

ដោយៈរ៉ាណេត

ភ្នំពេញៈ ក្រោមឥទ្ធិពលនៃវិបត្តិជំងឺសាកល ដែលកំពុងញាំញីសេដ្ឋកិច្ចស្ទើរគ្រប់ប្រទេសលើសាកលលោកឱ្យដាំក្បាលធ្លាក់ចុះនោះ សម្រាប់តែចរន្តទីផ្សារអចលនទ្រព្យកម្ពុជា ត្បិតថាទទួលនូវឥទ្ធិពលអវិជ្ជមានមិនសូវធ្ងន់ធ្ងរដូចគេ ប៉ុន្តែទម្រាំឱ្យមានស្ថានភាពល្អប្រសើរឡើងវិញដូចឆ្នាំ២០១៩ យ៉ាងហោចណាស់រហូតដល់ចុងឆ្នាំ២០២១ ។

អ្នកជំនាញនៅក្នុងវិស័យអចលនទ្រព្យកម្ពុជា លោក វ៉ា វីរៈ អគ្គនាយកក្រុមហ៊ុនអចលនទ្រព្យ Century21 Fortuna Investment បានមានប្រសាសន៍នៅល្ងាចថ្ងៃទី៩ ខែធ្នូ ឆ្នាំ២០២០ថា បើប្រៀបធៀបទៅនឹងបណ្តាប្រទេសនានា នៅលើសាកលលោក ក៏ដូចជាប្រទេសនៅក្នុងតំបន់ កម្ពុជាហាក់មានភាពល្អប្រសើរជាងគេបន្តិច។ ដោយឡែកសម្រាប់វិស័យអចលនទ្រព្យ ក៏មានស្ថានភាពមិនអាក្រក់ខ្លាំងនោះដែរ ក្រោយសកម្មភាពទីផ្សារក្នុងនៅតែបន្ត។

លោកបន្តថា “មួយរយៈពេលចុងក្រោយនេះ ស្ថានភាពនៃចរន្តទីផ្សារអចលនទ្រព្យ ទាំងការអភិវឌ្ឍ ទាំងការវិនិយោគទៅលើគម្រោងធំគឺមិនមាននោះទេ លើកលែងតែការសាងសង់គម្រោង ដែលបានបន្សល់ទុកតាំងពីឆ្នាំចាស់តែប៉ុណ្ណោះ” ។ លោកបានបន្តថា “ការទិញលក់ពេលនេះ ស្ទើរតែមិនមានដោយសារតែបញ្ហា នៃការរាលដាលជំងឺក្នុងសហគមន៍ ដែលធ្វើឱ្យមនុស្សភាគច្រើន មិនហ៊ានចេញក្រៅមើលគម្រោងអភិវឌ្ឍន៍ ឬដីធ្លីដូចកាលពីពាក់កណ្តាលឆ្នាំ២០២០នោះទេ” ។

លោកគិតថា បើទោះជាពេលនេះមានបណ្តាប្រទេសធំៗ នៅលើសាកលលោកបានចាប់ផ្តើមដាក់ឱ្យប្រើប្រាស់វ៉ាក់សាំង ខណៈដែលរាជរដ្ឋាភិបាលកម្ពុជា ក៏កំពុងត្រៀមទិញយកមកប្រើប្រាស់នៅក្នុងប្រទេសក៏ដោយ ក៏ទីផ្សារអចលនទ្រព្យមួយនៅមិនទាន់អាចវិលទៅរកភាពល្អប្រសើរដូចឆ្នាំ២០១៩ ភ្លាមៗនោះដែរ ពោលគឺវាត្រូវការពេលវេលាយូរបន្តិច។

ស្រដៀងនឹងការលើកឡើងខាងលើនេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា “តម្រូវការទីផ្សារអចលនវត្ថុក្នុងស្រុកគឺនៅតែបន្តមានដដែល ជាពិសេសផ្នែកលំនៅដ្ឋាន ខុនដូកម្រិតមធ្យម រួមនឹងការប្រើប្រាស់ដី សម្រាប់អភិវឌ្ឍន៍ក្នុងទ្រង់ទ្រាយមធ្យម និងទ្រង់ទ្រាយ ក្រោមការបណ្តាក់ទុនពីអ្នកក្នុងស្រុក ប៉ុន្តែសម្រាប់គម្រោងធំៗ ដែលមានតម្លៃរាប់លានដុល្លារគឺមិនមាននោះទេ” ។

លោកបានបន្តថា ត្បិតថា ថ្នាំបង្ការជំងឺឆ្លងអាច នឹងត្រូវបានប្រើប្រាស់ជាផ្លូវការនៅត្រឹមដើមឆ្នាំ២០២១ ប៉ុន្តែមិនមែនមានន័យថា ទីផ្សារអចលនទ្រព្យនឹងមានភាពល្អប្រសើរស្របពេលនៃការប្រើថ្នាំបង្ការនោះទេ” ។ លោកបន្តថា“វាត្រូវការពេលវេលាក្នុងការស្រោចស្រង់ឡើងវិញ លុះត្រាតែកំណើននៃការព្យាបាល ទទួលបានលទ្ធផលច្រើន ហើយការចម្លងត្រូវបានទប់ស្កាត់បានដោយជោគជ័យ ដែលវាត្រូវការពេលយូរ។

លោកច្រឹក សុខនីម បានអះអាងថា “តាមខ្ញុំគិត ត្រូវចំណាយពេលមិនតិចជាង១ឆ្នាំ ឬអាចលើសនេះ ទើបអាចមានភាពល្អប្រសើរឡើងវិញ គ្រាន់តែថា ចាប់ពីពាក់កណ្តាលឆ្នាំ២០២១ សកម្មភាពដែលផ្តើមចេញពីក្នុងស្រុក នឹងចាប់កម្រើកឡើងវិញជាបណ្តើរៗជំនួសភាពអវត្តមានរបស់អ្នកវិនិយោគធំមកពីក្រៅប្រទេស” ៕

ក្រុមហ៊ុន Cambodia Airports បញ្ចប់ការបំពាក់អំពូល LED ផ្លូវរត់យន្តហោះនៅក្នុងខេត្តព្រះសីហនុ

ដោយ វុត្ថា

ភ្នំពេញៈ ក្រុមបច្ចេកទេស នៃក្រុមហ៊ុនអាកាសយានដ្ឋាន Cambodia Airports បានបញ្ចប់ការប្តូរអំពូល នៅតាមផ្លូវរត់យន្តហោះរបស់អាកាសយានដ្ឋានអន្តរជាតិ ខេត្តព្រះសីហនុដែលមានចម្ងាយ ៣.៣០០ ម៉ែត្រ (រួមទាំងការពង្រីកបន្ថែម ៨០០ ម៉ែត្រថ្មី)ទៅជាអំពូល LED វិញ។

ក្រុមហ៊ុន Cambodia Airports ឱ្យដឹងកាលពីថ្ងៃទី ៩ ខែធ្នូ ម្សិលមិញថា នេះគឺជាផែនការប្រកបដោយមហិច្ឆតាចុងក្រោយ។ ក្រុមហ៊ុនអាកាសយានដ្ឋាន Cambodia Airports ឥឡូវនេះ បានបំលែងប្រភពពន្លឺ ដែលអាចមានទាំងអស់ទៅជា LED ។

ក្រុមហ៊ុនបន្តថា ការបំពាក់នេះគឺជាជំហានដ៏សំខាន់ ក្នុងការកាត់បន្ថយការប្រើប្រាស់អគ្គិសនី និងការកាត់បន្ថយការបញ្ចេញកាបូន នៅអាកាសយានដ្ឋានអន្តរជាតិទាំង។

អាកាសយានដ្ឋានអន្តរជាតិកងកេង ខេត្តព្រះសីហនុ បានពង្រីកផ្លូវរត់យន្តហោះ (Runway) ពី២.៥០០ម៉ែត្រ រហូតដល់៣.៣០០ម៉ែត្រ បន្ថែមពីលើការពង្រឹងផ្លូវយន្តហោះឡើងចុះ (airstrip) បច្ចុប្បន្ន។

ផ្លូវរត់យន្តហោះ (Runway) ថ្មីនេះ មានសមត្ថភាពទទួលការចុះចតយន្តហោះប្រភេទធំៗ បានដូចជា B-777-300ER ឬយន្តហោះ A-350-1000 ដែលធ្វើប្រតិបត្តិការហោះហើរត្រង់រយៈចម្ងាយឆ្ងាយទៅ មកពីអាកាសយានដ្ឋាន អន្តរជាតិខេត្តព្រះសីហនុ និងអាកាសយានដ្ឋានអន្តរជាតិក្នុងពិភពលោក។

ការពង្រីកផ្លូវរត់នេះ ធ្វើឱ្យអាកាសយាន្តដ្ឋាននេះ មានសមាសភាពអាចទទួលការចុះចតយន្តហោះធំៗ (កូដ E) ដូចជាយន្តហោះ B-777-300ER រឺយន្តហោះ A-350- 1000 ដែលធ្វើប្រតិបត្តិការហោះហើរត្រង់រយៈចម្ងាយឆ្ងាយ ទៅមកពីអាកាសយានដ្ឋានអន្តរជាតិខេត្តព្រះសីហនុ។

យោងតាមទិន្នន័យរបស់ក្រុមហ៊ុនអាកាសចរណ៍កម្ពុជា នៅចន្លោះឆ្នាំ២០១៥ និង ២០១៩ អ្នកដំណើរបានកើនឡើងពី ៩៤,០០០នាក់ ដល់ជាង១,៦លាននាក់ ហើយអាកាសយានដ្ឋានខេត្តព្រះសីហនុ មានកំណើនក្នុងតួលេខ៣ខ្ទង់ស្ទើរតែរៀងរាល់ឆ្នាំ៕

គម្រោងសាងសង់ផ្លូវក្រវ៉ាត់ក្រុងទី៣អាចទ្រទ្រង់ទម្ងន់យានចរាចរណ៍ចំរុះបានរហូតដល់២០ឆ្នាំ

ដោយៈវុត្ថា

ភ្នំពេញៈ គម្រោងសាងសង់ផ្លូវក្រវ៉ាត់ក្រុងទី៣ នៅតែបន្តដំណើរការទៅមុខ បើទោះបីកម្ពុជាកំពុងប្រឈមទៅនឹងវិបត្តិជំងកូវីដ១៩យ៉ាងណាក្តី ហើយនៅពេលសាងសង់បញ្ចប់ផ្លូវនេះ អាចទ្រទ្រង់ទម្ងន់យានចរាចរណ៍ចំរុះបានរហូតដល់២០ឆ្នាំ ខណៈបច្ចុប្បន្ននេះ សម្រេចបានលទ្ធផលប្រមាណជាង៤០ភាគរយ ។

លោកវ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូន បានប្រាប់គេហទំព័រ Propertyarea.asia កាលពីកន្លងមកនេះ ថា គម្រោងសាងសង់ផ្លូវក្រវ៉ាត់ក្រុងទី ៣នេះ សាងសង់ដោយក្រុមហ៊ុនចិន ហើយក្រុមហ៊ុនចិនជាធម្មតា គឺអនុវត្តលឿន ជាង ការរំពឹងទុក ដែលរហូតមកដល់ពេលនេះ ជាលទ្ធផលនៃការសាងសងផ្លូវក្រវ៉ាត់ក្រុងទី៣នៅតែបន្តដំណើរទៅមុខ។

លោកបន្តថា “យើងបានពិនិត្យឃើញថា ក្រុមហ៊ុនសាងសង់បានគោរពតាមបទដ្ឋា នស្តង់ដារ ទាំងគុណភាពបេតុង នៃទម្រជើងសសរស្ពានអាកាស រួមទាំងគុណភាពផ្លូវ អាចទ្រទ្រង់ទម្ងន់យានចរាចរណ៍ចំរុះបានរហូតដល់២០ឆ្នាំ ស្របទៅតាមផែនការមេ” ។

លោកបន្តថា “ផ្លូវដ៏សំខាន់នេះនឹងជួយសម្រួល ដល់ការកកស្ទះចរាចរណ៍នៅក្នុងក្រុង ជាពិសេសផ្លូវវេងស្រេង ផ្លូវទួលពង្រ ហើយថែមទាំងជួយសម្រួល ដល់ការធ្វើដំណើរ និងដឹកជញ្ជូនត្រង់ ចេញពីក្រុងព្រះសីហនុ ឆ្ពោះទៅកាន់តំបន់ព្រំដែនក្រុងបាវិត ដោយបំបែកចេញ ពីចំណុចដើមផ្លូវក្រវ៉ាត់ក្រុងទី៣ នៃផ្លូវជាតិលេខ៤ នឹងចុះទៅកាន់ផ្លូវជាតិលេខ១” ។

លោកបញ្ជាក់ទៀថា រាល់គម្រោងសាងសង់ហេដ្ឋរចនាសម្ព័ន្ធទាំងអស់ នៅកម្ពុជា ជាពិសេសគម្រោងផ្លូវក្រវ៉ាត់ក្រុងទី៣ នាពេលបច្ចុប្បន្ននេះ កំពុងដំណើរការដោយរលូន និងអាចបញ្ចប់ទៅតាមផែនការ និងការគ្រោងទុក។

ផ្លូវក្រវាត់ក្រុងខ្សែទី៣ គឺជាផ្លូវដ៏សំខាន់ក្នុងការជួយកាត់បន្ថយការកកស្ទះ និងជួយសម្រួលចរាចរណ៍ក្នុងរាជធានីភ្នំពេញ ម្យ៉ាងទៀតគឺជាការតភ្ជាប់ផ្ទៃក្នុង និងសមាហរណកម្មតំបន់ ពិសេសតភ្ជាប់ផ្លូវអាស៊ានហាយវ៉េ និងផ្លូវរបៀងសេដ្ឋកិច្ចសំខាន់ៗ របស់មហាអនុតំបន់មេគង្គ។ រួមចំណែកក្នុងការសម្រួលការដឹកជញ្ជូន ឆ្លងកាត់ព្រំដែន ជំរុញពាណិជ្ជកម្មអន្តរជាតិ និងប្រែក្លាយទឹកដី ដែលនៅសងខាងផ្លូវខ្សែក្រវាត់ក្រុងនេះ ទៅជាតំបន់អភិវឌ្ឍថែមទៀតផង។

ផ្លូវនេះមួយខ្សែនេះ ត្រូវស្ថាបនាផ្លូវដោយមានប្រវែងសរុប៤៧.៦គីឡូម៉ែត្រ ជាប្រភេទផ្លូវ៤គន្លង ដោយមានទទឹងតួផ្លូវសរុប២៥ម៉ែត្រ សម្រាប់ផ្លូវរថយន្ត៤គន្លង មានទទឹង៣.៥០ម៉ែត្រ /គន្លង និងផ្លូវទោចក្រយានយន្ត២គន្លង ទទឹង២.២៥ ម៉ែត្រ/គន្លង ដោយចាប់ ពីផ្លូវជាតិលេខ៤ ម្តុំអូរដឹម ត្រង់គីឡូម៉ែត្រលេខ ១៤+ ១០៥ ទៅចំណុចបញ្ចប់ភ្ជាប់នឹងផ្លូវជាតិលេខ១ ត្រង់គីឡូម៉ែត្រលេខ២៤+៨៤០ ដោយត្រូវងកាត់ផ្លូវជាតិលេខ ៣ត្រង់ ចំណុចគីឡូម៉ែត្រ លេខ២១+២០០កាត់ផ្លូវជាតិលេខ២ ត្រង់ចំណុចគីឡូម៉ែត្រលេខ ២២+៨០០ និងកាត់ផ្លូវ ជាតិលេខ២១ត្រង់ចំណុចគីឡូម៉ែត្រលេខ ១៨+ ៤០០ និងផ្លូវខ្នែងប្រវែង ៥.៣៧គីឡូម៉ែត្រ៕

វិស័យសំណង់នៅក្នុងក្រុងព្រះសីហនុនឹងមានសន្ទុះឡើងវិញនៅក្រោយចូលឆ្នាំខ្មែរ

ដោយៈវុត្ថា

ភ្នំពេញៈ វិស្វករកម្ពុជាដែលកំពុងបំរើការងារឱ្យក្រុមហ៊ុនចិនមួយនៅក្នុងទីក្រុងព្រះសីហនុបានមើលឃើញថា ការអភិវឌ្ឍវិស័យសំណង់នៅក្នុងក្រុងព្រះសីហនុ នឹងមានសន្ទុះឡើងវិញ បន្ទាប់ពីចូលឆ្នាំខ្មែរនៅក្នុងឆ្នាំ២០២១ខាងមុខនេះ ព្រោះសំណង់ភាគច្រើនត្រូវបានវិនិយោគដោយជនជាតិចិន ហើយគេមិនទុកចោលនោះទេ។

លោកឆន ច័ន្ទសុជាតិ វិស្វករកម្ពុជា ដែលកំពុងបំរើការងារនៅក្នុងក្រុមហ៊ុនចិន China Construction Fouth (CSCEC) នៅក្នុងខេត្តព្រះសីហនុប្រាប់គេហទំព័រPropertyarea.asia កាលពីថ្ងៃទី៩ ខែធ្នូឆ្នាំ ២០២០កន្លងមកនេះថា សម្រាប់វិស័យទាំងអស់រួមទាំងវិស័យសំណង់ផងដែរ ជាពិសេសនៅក្នុងខេត្តព្រះសីហនុ ដែលធ្លាប់តែមានការរីកចំរើនក៏ទទួលរងនូវផលប៉ះពាល់ផងដែរពីជំងឹកូវីដ១៩ ប៉ុន្តែមិនយូរមិនឆាប់វានឹងងើបឡើងវិញនាពេលខាងមុខដ៏ខ្លី។

លោកបញ្ជាក់ថា “វិនិយោគិនចិនវិលត្រឡប់មកកាន់ទីក្រុងព្រះសីហនុនាពេលខាងមុខនេះ ហើយការអភិវឌ្ឍវិស័យសំណង់នៅក្នុងខេត្តព្រះសីហនុ នឹងមានសន្ទុះឡើងវិញ ពីព្រោះថាពួកគេមិនអាចទុកសំណង់របស់គេពាក់កណ្តាលទីបានទេ” ។

លោក ច័ន្ទសុជាតិ ដែលទទួលបានបញ្ចប់ការសិក្សាខាងផ្នែកពីវិស្វកម្មមកពីសកលវិទ្យាល័យមួយនៅក្នុងប្រទេសចិន បានបង្ហាញនូវទស្សនវិជ្ជមានថា អ្វីៗនឹងល្អប្រសើរឡើងវិញនៅឆ្នាំក្រោយនេះ បន្ទាប់ពីចូលឆ្នាំខ្មែរ ។ ពេលនោះ វិស័យនេះនឹងចាប់ផ្តើមដំណើរទៅមុខជាបណ្តើរៗ។

លោកបន្ថែមថា ការអភិវឌ្ឍន៍វិស័យសំណង់នៅក្នុងទីក្រុងព្រះសីហនុពីសំណាក់វិនិយោគិនចិន បានចូលរួមនៅក្នុងអភិវឌ្ឍន៍ខេត្តឱ្យមានការរីកចំរើន។

ជាមួយគ្នានេះ លោកឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានថ្លែងឲ្យដឹងកាលពីពេលថ្មីៗនេះថា ក្រុមអ្នកវិនិយោគ អ្នកធ្វើការងារនៅតាមក្រុមហ៊ុនចិនជាច្រើន បាន និងកំពុងចាប់ផ្តើមមកកាន់ខេត្តព្រះសីហនុវិញហើយ ដោយមួយខែមានអ្នកធ្វើដំណើរតាមអាកាសចរណ៍ប្រមាណ១០,០០០នាក់។

លោកបន្តថា “សកម្មភាពវិនិយោគ និងការរសាងសង់សំណង់នៅខេត្តនេះ បាននិងកំពុងចាប់ផ្តើមបណ្តើរៗឡើងវិញ ប៉ុន្តែមិនមានសកម្មភាពមមាញឹកខ្លាំងនោះទេ” ។

ខេត្តព្រះសីហនុត្រូវបានរាជរដ្ឋាភិបាល ដាក់បញ្ចូលក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ដោយប្រែក្លាយខេត្តនេះជាតំបន់សេដ្ឋកិច្ចពិសេស និងក្រោយមកប្រែក្លាយខេត្តនេះជាតំបន់សេដ្ឋកិច្ចពហុបំណង។

ខេត្តព្រះសីហនុ នៅក្នុងរយៈពេលប៉ុន្មានឆ្នាំចុងក្រោយនេះ មានការរីកចំរើនលើវិស័យសំណង់ និងអចលនទ្រព្យយ៉ាងខ្លាំង តាមរយៈការមកវិនិយោគរបស់ជនជាតិចិនដែលធ្វើឱ្យខេត្តមួយនេះមានឈ្មោះល្បីទាំងនៅក្នុងតំបន់និងពិភពលោក៕

ចំណេះដឹង! តើរដ្ឋាភិបាលមានចក្ខុវិស័យអ្វីខ្លះសំរាប់ឆ្នាំ២០៣០ខាងមុខ?

ដោយវុត្ថា

ភ្នំពេញៈ ចក្ខុវិស័យរបស់រដ្ឋាភិបាលកម្ពុជា គឺការប្រែក្លាយកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់ នៅក្នុងឆ្នាំ ២០៥០ ។

ដើម្បីឱ្យកម្ពុជាសម្រេចបាននូវគោលដៅនេះ ក៏ដូចជាដើម្បីជួយដល់ប្រទេសអភិវ ឌ្ឍន៍តិចតួច ឱ្យអាចចាកចេញពីភាពក្រីក្របានឆាប់រហ័ស ស្របតាមគោលដៅអភិវឌ្ឍន៍ប្រកបដោយចីរភាពឆ្នាំ២០៣០ ។

វិស័យសំខាន់មួយចំនួន ដូចខាងក្រោម៖

ទី១ ការពង្រីកភាពប្រកួតប្រជែង របស់បណ្តាប្រទេសអភិវឌ្ឍន៍តិចតួច និងជួយគាំទ្រដល់កម្មវិធី និងដំណើរការចាកចេញពីប្រទេសអភិវឌ្ឍន៍តិចតួច (LDC Graduation)។

ទី២ ការបន្ត និងបង្កើនការផ្តល់ភាពអនុគ្រោះនានា តាមរយៈប្រព័ន្ធពាណិជ្ជកម្មពហុភាគី ឬ ឯកតោភាគី ហើយសូមធ្វើការពិចារណាឱ្យបានដិតដល់ មុននឹងដាក់វិធានការព្យួរ ឬដកចេញនូវភាពអនុគ្រោះពីប្រទេសអភិវឌ្ឍន៍តិចតួច ព្រោះការព្យួរឬដកចេញនេះ នឹងធ្វើឱ្យប្រទេសទាំងនោះ មិនអាចជួយពិភពលោកឱ្យសម្រេចបាន នូវគោលដៅអភិវឌ្ឍន៍ប្រកបដោយចីរភាព និងមិនអាចជួយពួកគេឱ្យចាកចេញ ពីឋានៈជាប្រទេសអភិវឌ្ឍន៍តិចតួចបានឡើយ ដែលចលនានេះ គឺជាដំណើរផ្ទុយទាំងស្រុង ទៅនឹងគោលដៅរបស់អង្គការសហប្រជាជាតិ និង អង្គការពាណិជ្ជកម្មពិភពលោក។

ទី៣ ការកសាងសមត្ថភាព ដើម្បីទាញយកផលប្រយោជន៍ពីប្រភពកំណើនថ្មី ជាពិសេស ផ្នែកសេវាកម្ម និងការទទួលយកបដិវត្តឧស្សាហកម្មទី៤ និងដើម្បីទាញយកផលប្រយោជន៍ដែលអាចទទួលបានពីសេដ្ឋកិច្ចឌីជីថល។

ទី៤ ការរៀបចំយុទ្ធសាស្ត្រធ្វើពិពិធកម្មសេដ្ឋកិច្ច និងផលិតផលចម្រុះ សំដៅបង្កើនការនាំចេញ ដែលជាប្រភពចំណូលសម្រាប់លើកកម្ពស់សុខមាលភាព និងការងារដល់ស្ត្រី។

ទី៥ ការតភ្ជាប់គោលនយោបាយ យុទ្ធសាស្ត្រ និងចក្ខុវិស័យនានា របស់ប្រទេសអភិវឌ្ឍន៍តិចតួចជាមួយនឹងការវិវត្តន៍សេដ្ឋកិច្ចតំបន់ និងពិភពលោក។

ទី៦ ការបង្កើតនវានុវត្ត និងជំរុញលើកកម្ពស់ការអនុវត្តន៍ថ្មីៗ តាមរយៈកៀរគរហិរញ្ញប្បទានបន្ថែម ពីដៃគូអភិវឌ្ឍន៍ និងវិស័យឯកជន ក្រោមក្របខ័ណ្ឌនៃកិច្ចប្រជុំនេះ និងកិច្ចប្រជុំផ្សេងទៀត។

ទី៧ ការផ្តល់ជំនួយនានា សម្រាប់ការកែទម្រង់ និងសម្រាប់ការគាំទ្រដល់ការអនុវត្តកិច្ចព្រមព្រៀងសម្រួលពាណិជ្ជកម្ម ពិសេសលើការងារកែទម្រង់លិខិតបទដ្ឋានគតិយុត្តិនានា៕

ការសាងសង់ពហុកីឡដ្ឋានជាតិមរតកតេជោសម្រេចបានជាង៨៥ភាគរយ

ដោយ ៖ រ៉ាណេត

ភ្នំពេញ ៖ ពហុកីឡដ្ឋានជាតិមរតកតេជោ ស្ថិតនៅខណ្ឌជ្រោយចង្វារ រាជធានីភ្នំពេញ កំពុងត្រូវបានពន្លឿនការសាងសង់យ៉ាងសកម្មរបស់ក្រុមហ៊ុនសាង់សងចិន ដើម្បីបញ្ចប់នៅត្រឹមខែឧសភា ឆ្នាំ២០២១ តាមការគ្រោងទុក ខណៈដែលបច្ចុប្បន្នសម្រេចបានជាង៨៥ភាគរយហើយ។

លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានមានប្រសាសន៍នៅរសៀលថ្ងៃទី៩ ខែធ្នូ ឆ្នាំ២០២០ថា ពហុកីឡដ្ឋានធំនៃពហុកីឡដ្ឋានជាតិមរតកតេជោ ដែលជាជំនួយឥតសំណងរបស់សាធារណរដ្ឋប្រជាមានិតចិនបានសាងសង់ប្រមាណជា៨៥ភាគរយហើយ ដែលគ្រោងនឹងបញ្ចប់ការសាងសង់រួចរាល់នៅខែឧសភា ឆ្នាំ២០២១ខាងមុខនេះ។

លោកបានបញ្ជាក់ថា “គិតមកដល់ពេលនេះ សំណង់បានសាងសង់ប្រមាណជា៨៥ភាគរយហើយ ដោយភាគីចិនបានពន្លឿនការងារបានច្រើន ក្នុងនោះបានបំពាក់ដំបូល ជារចនាបថក្បាច់ផ្កាចន្ទបាន ១០ភាគរយ ទៅ ២០ភាគរយ បំពាក់កៅអីមានពណ៌ចម្រុះបន្ថែម មានព៌ណស ខៀវ និងបៃតង។ បន្ទាប់ពីបញ្ចប់ការសាងសង់ ពហុកីឡដ្ឋាជាតិមរតកតេជោនឹងរៀបចំការប្រកួតសាកល្បង ដូចជាកីឡាបាល់ទាត់ ជាពិសេសការប្រកួតជាលក្ខណៈមិត្តភាពអន្តរជាតិកម្ពុជា-ចិន ដើម្បីអបអរសាទរពិធីដាក់ឱ្យប្រើប្រាស់ជាផ្លូវការឱ្យបានអធិកអធម និងជាការថ្លែងអំណរគុណដល់មិត្តចិនផងដែរ”។

តាមការបញ្ជាក់ពីក្រុមហ៊ុនសាងសង់ ពហុកីឡដ្ឋានជាតិមរតកតេជោនឹងបញ្ចប់ការសាងសង់នៅត្រឹមខែឧសភា ឆ្នាំ២០២១ ដោយត្រូវការពេលវេលាបន្ថែម ក្នុងការបំពាក់កៅអី កញ្ចក់ ការតុបតែងផ្សេងៗ ជាពិសេសគឺការតុបតែងផ្នែកខាងក្នុងកីឡដ្ឋានធំ ដូចជាទីលានបាល់ទាត់ ទីលានរត់អត្តពលកម្ម សណ្ឋាគារ បន្ទប់ VIP ដោយ សង្ឃឹមថា នៅពាក់កណ្តាលឆ្នាំ២០២១ នឹងបញ្ចប់ការសាងសង់កីឡដ្ឋានធំទាំងស្រុង ហើយនៅឆ្នាំ២០២២ ត្រៀមបើកសម្ពោធការប្រកួតកីឡាជាតិលើកទី៤នៅពហុកីឡដ្ឋានជាតិមរតកតេជោ។

នៅក្នុងពហុកីឡដ្ឋានជាតិមរតកតេជោនេះដែរ ក៏មានភូមិកីឡាដែលកំពុងដំណើរការសាងសង់ដូចគ្នា ដែលជាកន្លែងហូបចុកស្នាក់នៅរបស់អត្តពលិក គ្រូបង្វឹក មន្ត្រីកីឡាបានប្រមាណ៧០០០នាក់ ហើយអាចកាត់បន្ថយការចំណាយលើការរៀបចំនេះបានច្រើន ដែលអត្តពលិក គ្រូបង្វឹកអាចហូបចុក ស្នាក់នៅទីនេះជុំគ្នា ផ្តល់ភាពងាយស្រួលក្នុងការប្រកួត ហើយមិនចំណាយលើការស្នាក់នៅសណ្ឋាគារ និងការដឹកជញ្ជូនជាដើម៕