ដោយ ៖ គង់ សូរិយា
ភ្នំពេញៈ លំនៅដ្ឋានជាជីវិត វាផ្តល់នូវផាសុកភាព និងការរស់នៅប្រកបដោយសេចក្តីសុខ ឬអត់ អាស្រ័យលើស្ថាបត្យករ ដែលជាអ្នកសាងសង់ ឬអ្នកគូរប្លង់ ហេតុនេះការសាងសង់លំនៅដ្ឋានមានស្តង់ដាត្រឹមត្រូវនឹងធ្វើឲ្យការរស់នៅមានភាពសុខដុម។
ចំណុចសំខាន់ៗចំនួន៤ ដែលអ្នកទិញផ្ទះគួរមានការយល់ដឹង ដើម្បីទទួលបានការរស់នៅមានផាសុកភាព
បើតាមស្ថាបត្យករល្បីឈ្មោះមួយរូបបានមានប្រសាសន៍ឲ្យដឹងថា ការសាងសង់លំនៅដ្ឋានដែលគិតពីផាសុកភាពដល់អ្នករស់នៅមានសារៈសំខាន់ណាស់ ហេតុនេះទើបការវិនិយោគបុរីរបស់លោកតែងតែគិតគូរពីបញ្ហានេះ ដើម្បីផ្តល់ឲ្យអ្នករស់នៅមានភាពត្រជាក់ត្រជុំ។
ប្រវែងផ្ទះ
ផ្ទះល្វែង គេនិយមសាងសង់មិនឲ្យវែងជាង១៤ម៉ែត្រនោះទេ ដើម្បីឲ្យខ្យល់ចេញចូលគ្រប់គ្រាន់ មិនហប់ខ្សល់ ប៉ុន្តែនៅកម្ពុជាគេសាងសង់ប្រវែង១៦ម៉ែត្រ ខ្លះមានប្រវែងរហូតដល់១៨ម៉ែត្រ ដែលនេះគេហៅផ្ទះសំរាប់ផ្ទុកទំនិញ ជាជាងសម្រាប់ការរស់នៅ។ ផ្ទះដែលមានបណ្តោយ១៦ទៅ១៨ម៉ែត្រ មានបរិយាកាសក្នុងផ្ទះមិនសូវល្អនោះទេ ដោយសារមិនមានខ្យល់អាកាសចេញចូលគ្រប់គ្រាន់ និងមិនមានពន្លឺថ្ងៃល្អ។
ប្រភេទបង្អួច
ដោយសារការប្រែប្រួលអាកាសធាតុ កំដៅផែនដីបានកើនឡើង បានធ្វើឲ្យអ្នកសាងសង់ដែលគិតពីផាសុកភាពដល់ម្ចាស់ផ្ទះតែងតែរៀបចំបង្អួចធំៗ មានដាំដើមឈើច្រើន និងមានកន្លែងសម្រាប់ដាក់ទឹកជាការលំអរ ដើម្បីផ្តល់ឲ្យបរិយាកាសរស់នៅមានភាពស្រស់ស្រាយ និងសុខដុមរមនា។ ការរៀបចំធ្វើបង្អួចធំ ក៏ជួយឲ្យពន្លឺ និងខ្យល់ចេញចូលក្នុងផ្ទះគ្រប់់គ្រាន់ផងដែរ ហើយនៅពេលមានខ្យល់ ពន្លឺចេញចូលគ្រប់គ្រាន់ វានឹងមិនមានមេរោគ ឬបាក់តេរីច្រើននៅក្នុងផ្ទះនោះទេ។
កំពស់ពីជាន់១ទៅជាន់មួយទៀត
កំពស់ផ្ទះ ឬអាគារខ្ពស់ៗ តែងតែត្រូវបានគិតគូរពីស្ថាបត្យករជំនាញផងដែរ ដែលផ្ទះល្វែងគួរមានកំពស់ចន្លោះពី៣ទៅ៤ម៉ែត្រ ដើម្បីធ្វើឲ្យបរិយាកាសក្នុងផ្ទះត្រជាក់ មិនហប់់ខ្យល់ និងផ្តល់ឲ្យអ្នករស់នៅអាចមានអារម្មណ៍ល្អ និងមានសុខភាពល្អផងដែរ។ ប៉ុន្តែអ្នកសាងសង់អាគារខ្ពស់ៗជាច្រើន ដើម្បីផលចំណេញពួកគេបានលៃ ឬគេងចំណេញពីកំពស់នេះ ដើម្បីចំណេញលើសម្ភារៈសំណង់ ដោយសាងសង់ពីជាន់មួយទៅជាន់មួយទៀតមានកំពស់ទាបៗ ដែលនេះគេហៅថា “ជាការរស់នៅក្នុងប្រអប់”។ ការរស់នៅបែបនេះមានគ្រោះថ្នាក់ណាស់ដល់សុខភាព ព្រោះវាហប់ បើមិនបើកម៉ាស៊ីនត្រជាក់។
ទិសខាងត្បូង ជើង កើត
ក្នុងចំណោមទិសទាំងបួន គឺទិសទាំងបីនេះមានការនិយមជាងគេ ពិសេសទិសខាងកើត ដោយសារជាទិសព្រះអាទិត្យរះ ដែលមនុស្សទូទៅតែងតែចាត់ទុកទិសខាងកើតជាទិសល្អ សម្រាប់ការរស់នៅ និងអារម្មណ៍របស់ពួកគេ ប៉ុន្តែទិសខាងកើតក៏មានវិបត្តិផងដែរ បើសិនជាផ្នែកខាងមុខផ្ទះមិនមានអ្វីបាំង ផ្ទះបែរមុខទៅទិសខាងកើតនឹងរងកំដៅខ្លាំងនៅពេលព្រឹក។ ប៉ុន្តែទិសខាងជើង និងខាត្បូង ត្រូវបានគេនិយមផងដែរ ដោយសារអ្នកមានជំនឿលើផ្នែកហុងស៊ុយ គិតថាជាទិសល្អ និងត្រជាក់ត្រជុំផងដែរ៕
