ចំណេះដឹង! តើអ្វីជាប្រាក់ចំណូលដែលមិនជាប់ពន្ធ និង ប្រាក់ចំណូលជាប់ពន្ធ?

ដោយវុត្ថា

ភ្នំពេញ៖ យោងតាមច្បាប់ស្តីពីពន្ធដារកម្ពុជាត្រូវបានបែងចែកប្រាក់ចំណូលជា២ យ៉ាងពោលគឺប្រាក់ចំណូលមិនជាប់ពន្ធ និងប្រាក់ចំណូលជាប់ពន្ធ។

ប្រាក់ចំណូលមិនជាប់ពន្ធ

ប្រាក់ចំណូលមិនជាប់ពន្ធសំដៅដល់ ប្រាក់ចំណូលរបស់រាជរដ្ឋាភិបាល ឬប្រាក់ចំណូលស្ថាប័នរាជរដ្ឋាភិបាល។ ប្រាក់ចំណូលរបស់អង្គការណាមួយដែលត្រូវបានរៀបចំឡើង និងដំណើរការសំរាប់គោលដៅសុទ្ធសាធខាងសាសនា សប្បុរសធម៌ វិទ្យាសាស្ត្រ អក្សរសាស្ត្រ ឬអប់រំ និងគ្មានចំណែកណាមួយនៃទ្រព្យ ឬប្រាក់ចំណូលត្រូវបានប្រើប្រាស់ជាផលប្រយោជន៍ឯកជន។

ប្រាក់ចំណូលរបស់អង្គការពលករ ឬសភាពាណិជ្ជកម្ម ឧស្សាហកម្ម ឬកសិកម្ម ក្នុងករណីដែលប្រាក់ចំណូលរបស់អង្គការទាំងនោះ មិនត្រូវបានប្រើប្រាស់ជាផលប្រយោជន៍ឯកជនរបស់អ្នកចូល ហ៊ុន ឬរូបវន្តបុគ្គល ក៏មិនត្រូវបង់ពន្ធ និងប្រាក់ចំណេញដែលបានមកពីការលក់ផលិតផលកសិកម្ម ដែលបុគ្គលមិនមែនជាអ្នកជាប់ពន្ធតាមរបបពិតផលិតបានដោយខ្លួនឯង ទោះបីផលិតផលនោះមិនទាន់កែច្នៃ ឬកែច្នៃហើយក៏ដោយទៅតាមទំលាប់នៃការងារកសិកម្ម។

ប្រតិបត្តិការតាមមធ្យោបាយឧស្សាហកម្ម រួមទាំងការកែច្នៃការរក្សាគុណភាព ការវេចខ្ចប់សំរាប់លក់ ពុំត្រូវបានចាត់ទុកជាទំលាប់នៃការងារកសិកម្មឡើយ។

ប្រាក់ចំណូលជាប់ពន្ធ

ប្រាក់ចំណូលជាប់ពន្ធ គឺជាប្រាក់ចំណូលសុទ្ធបានមកពីលទ្ធផលទាំងអស់នៃប្រតិបត្តិការ អាជីវកម្មគ្រប់ប្រភេទរួមបញ្ចូលទាំងចំណូលមូលធនដែលសម្រេចបានក្នុងពេលកំពុងប្រកបអាជីវកម្ម ឬនៅពេលបញ្ចប់អាជីវកម្មព្រមទាំងប្រាក់ចំណូលពីទ្រព្យសកម្មហិរញ្ញវត្ថុ ឬទ្រព្យសកម្មវិនិយោគការប្រាក់ថ្លៃឈ្នួល និងសួយសារផង។

ប្រាក់ចំណូលជាប់ពន្ធក៏រួម បញ្ចូលផងដែរនូវចំណូលធនទាំងអស់ពីអចលនទ្រព្យ ទ្រព្យហិរញ្ញវត្ថុ ឬទ្រព្យវិនិយោគ ដែលសម្រេចបានមកពីប្រតិបត្តិការនានាក្រៅពីប្រតិបត្តិការអាជីវកម្ម៕

តើជីវភាពរបស់ប្រជាពលរដ្ឋជាប់ទាក់ទងគ្នាយ៉ាងដូចម្តេចពីការរីកចម្រើននៃវិស័យសំណង់ និងអចលនទ្រព្យ?

ដោយៈប្រុសណេត

ភ្នំពេញៈ កំណើនសេដ្ឋកិច្ចកម្ពុជា ក្នុងរយៈពេលជាង២ទសវត្សរ៍កន្លងមក ដែល រក្សាបាននូវអត្រាកំនើនក្នុងរង្វង់៧ភាគរយ ធ្វើឱ្យពលរដ្ឋមានជីវភាពកាន់តែប្រសើរជាមុន និងបានជំរុញឱ្យតម្រូវការនៃភាពស៊ីវិលស័យក្នុងប្រទេសក៏កាន់តែកើនជាងមុនដែរ។

ជាក់ស្ដែង តម្រូវការលំនៅឋានលំហែកាយ នៅតំបន់ទេសចរណ៍ក៏ឃើញ មានកំណើនជាងមុន និងកំពុងមានការអភិវឌ្ឍ ដើម្បីផ្គត់ផ្គង់ទៅតាមតម្រូវការ បើទោះបីជាបច្ចុប្បន្ននេះកម្ពុជាកំពុងជួបនឹងវិបត្តិនៃកូវីដ១៩ក្ដី។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍កាលពីថ្មីៗនេះថា ដោយសារតែកំណើនសេដ្ឋកិច្ចកម្ពុជា មានសន្ទុះក្នុងរង្វង់៧ភាគរយក្នុងមួយឆ្នាំ រយៈពេលប៉ុន្មានចុងក្រោយនេះ ធ្វើឱ្យកម្រិតជីវភាពពលរដ្ឋកម្ពុជាបានប្រសើរឡើងមួយកម្រិតទៀត និងធ្វើឱ្យភាពស៊ីវិល័យរបស់ប្រជាជនកម្ពុជា ចាប់ផ្ដើមមានតម្រូវការ។

លោកបន្តថា “ដំបូងឡើយពលរដ្ឋត្រូវមានផ្ទះធម្មតា ស្នាក់នៅអចិន្ត្រៃយ៍ បន្ទាប់មកពួកគាត់ក៏ស្វែងរកផ្ទះទី២ ផ្ទះសម្រាប់ស្នាក់លំហែពេលទំនេរ” ។ លោកបន្តថា ក្នុងស្ថានភាពបច្ចុប្បន្ននេះ គឺជាស្ថានភាពដែលកម្ពុជាចាប់ផ្ដើម មានតម្រូវការលំនៅឋានលំហែកាយចុងសប្ដាហ៍ ក៏ប៉ុន្តទន្ទឹមនឹងនោះ ការវិនិយោគលើលំនៅឋានលំហែកាយក៏ត្រូវជ្រើសរើសរកទីតាំងសម្រាប់អភិវឌ្ឍន៍ផងដែរ” ។

លោកច្រឹក សុខនីមបានបន្តថា ទីតាំងសមស្របសម្រាប់អភិវឌ្ឍន៍លំនៅឋានលំហែកាយគឺជាកន្លែង ដែលមានសក្ដានុពលក្នុងវិស័យទេសចរណ៍ ហើយស្ថិតនៅតំបន់ធម្មជាតិ ជាក់ស្ដែងក្នុងនោះកំពត ដែលជាខេត្តមួយសមស្របបំផុត សម្រាប់ការអភិវឌ្ឍជាលំនៅឋានលំហែកាយទាំងបច្ចុប្បន្ននិងនៅពេលអនាគត។

ជាមួយគ្នានេះ លោក Seraj Sutton តំណាងក្រុមហ៊ុនអភិវឌ្ឍន៍លំនៅឋានលំហែកាយមួយនៅខេត្តកំពតបាននិយាយថា ក្រុមហ៊ុនរបស់លោកបានអភិវឌ្ឍន៍លំនៅឋានលំហែកាយលើគម្រោងទី១ ដែលមានទីតាំងនៅខេត្តកំពត ទទួលបានជោគជ័យ និងលក់អស់រួចហើយ ហើយពេលនេះ ក៏ឈានដល់ការបើកលក់គម្រោងទី២ បន្តបន្ទាប់ទៀត។

លោកបន្តថា តាមរយៈការលក់គម្រោងទី១អស់ក្នុងពេលខ្លីនេះ បានបង្ហាញពីតម្រូវការលំនៅឋានលំហែកាយនៅកម្ពុជាចាប់ផ្ដើមមាន និងជំរុញឱ្យក្រុមហ៊ុនអភិវឌ្ឍន៍ត្រូវរកវិធីក្នុងការទាក់ទាញអតិថិជន ប្រជាជនកម្ពុជា និងបរទេស ដើម្បីទទួលបានលំនៅឋានលំហែកាយ ប្រកបដោយផាសុកភាព និងមិនខកបំណងចំពោះការទិញលំនៅឋានសម្រាប់សម្រាកលំហែនៅចុងសប្ដាហ៍ និងថ្ងៃឈប់សម្រាក។

យោងតាមការសិក្សារបស់ក្រសួងរៀបចំដែនដី នគរូបនីយកម្មនិងសំណង់បានឲ្យដឹងថា កម្ពុជាត្រូវការលំនៅដ្ឋានប្រមាណ ៩០ម៉ឺនខ្នងបន្ថែមទៀត សម្រាប់ចន្លោះរយៈពេលពីឆ្នាំ២០១៥ ដល់ឆ្នាំ២០៣០ខាងមុខនេះ ហើយប្រជាពលរដ្ឋរស់នៅតាមទីក្រុងនិងតាមទីប្រជុំជននឹងកើនឡើងដល់ជាង៧លាននាក់៕

វិភាគ៖ តើការជ្រៀតជ្រែករបស់អាមេរិកលើកិច្ចការផ្ទៃក្នុងចិនជាមូលហេតុដែលចិនដាក់ទណ្ឌកម្មលើក្រុមហ៊ុនអាមេរិក?

ដោយៈប៊ី

អន្តរជាតិៈ លោក ចាវ លីចៀន (Zhao Lijian) អ្នកនាំពាក្យក្រសួងការបរទេសចិន បាននិយាយនៅថ្ងៃចន្ទនេះថា រដ្ឋាភិបាលទីក្រុងប៉េកាំងនឹងដាក់ទណ្ឌកម្ម ទៅលើក្រុមហ៊ុន និងបុគ្គលមួយចំនួននៅសហរដ្ឋអាមេរិក ដែលពាក់ព័ន្ធនឹងការលក់សព្វាវុធឲ្យកោះតៃវ៉ាន់។

លោក Zhao បានថ្លែងថា “រដ្ឋាភិបាលចិនបានសម្រេចថា នឹងចាត់វិធានការចាំបាច់ ដើម្បីដាក់ទណ្ឌកម្មទៅលើក្រុមហ៊ុន ដែលចូលរួមពាក់ព័ន្ធក្នុងការលក់អាវុធ របស់សហរដ្ឋអាមេរិកឲ្យទៅតៃវ៉ាន់ ក្នុងនោះរួមមានក្រុមហ៊ុន Lockheed Martin ក្រុមហ៊ុន Boeing Defense និងក្រុមហ៊ុន Raytheon ដើម្បីការពារផលប្រយោជន៍ជាតិរបស់ប្រទេសចិន» ។

ក្រុមហ៊ុនទាំង៣នេះ សុទ្ធតែជាក្រុមហ៊ុនផលិតសព្វាវុធធំៗ បំផុតរបស់សហរដ្ឋអាមេរិក។

លោក Zhao បានថ្លែងថា ក្រុមហ៊ុន និងបុគ្គលអាមេរិកផ្សេងទៀត ដែលមានប្រវត្តិមិនល្អក្នុងការលក់សព្វាវុធ ក៏នឹងត្រូវរងទណ្ឌកម្មដូចគ្នាផងដែរ ប៉ុន្តែអ្នកនាំពាក្យក្រសួងការបរទេសចិនរួបនេះមិនបានបញ្ជាក់ថា មានចំនួនប៉ុន្មានឲ្យច្បាស់លាស់នោះឡើយ។

សហរដ្ឋអាមេរិក កាលពីថ្ងៃទី២១ខែតុលា បានអនុញ្ញាតចំពោះ គម្រោងប្រព័ន្ធសព្វាវុធចំនួន៣ឲ្យទៅកោះតៃវ៉ាន់ រួមមានដូចជា ប្រព័ន្ធចាប់សញ្ញាសិនស័រ (Sensor)ប្រព័ន្ធមីស៉ីល និងប្រព័ន្ធកាំភ្លើងធំដែលមានតម្លៃសរុប រហូតដល់១.៨ពាន់លានដុល្លារ។

ពេលនោះចិនបានសម្តែងការជំទាស់ជាខ្លាំង ហើយក៏ព្រមានពីការឆ្លើយតបចាំបាច់ទៅវិញផងដែរ។

កាលពីថ្ងៃព្រហស្បតិ៍ សប្តាហ៍មុន ក្រសួងការបរទេសចិនបានអះអាងថា ប្រទេសចិននឹងធ្វើការឆ្លើយតបចាំបាច់ នៅពេលដែលស្ថានការណ៍មានការវិវឌ្ឍ បន្ទាប់ពីសហរដ្ឋអាមេរិកបានយល់ព្រម លើការលក់អាវុធចំនួន១,៨ពាន់លានដុល្លារទៅកាន់កោះតៃវ៉ាន់។

សកម្មភាពបែបនេះ បានរំលោភយ៉ាងធ្ងន់ធ្ងរ ទៅលើគោលការណ៍ចិនតែមួយ និងសេចក្តីថ្លែងការណ៍រួមប្រទេសចិន-សហរដ្ឋអាមេរិកចំនួន៣ ដែលបង្ហាញពីសញ្ញាខុសឆ្គង ដែលចាត់ទុកកោះតៃវ៉ាន់ ជាប្រទេសឯករាជ្យ។ នេះបើយោងតាមការលើកឡើងរបស់អ្នកនាំពាក្យក្រសួងការបរទេសចិនលោក Zhao Lijian នៅក្នុងសន្និសីទសារព័ត៌មានមួយនៅទីក្រុងប៉េកាំង។

លោក Zhao បានកត់សម្គាល់ថា “ប្រទេសចិនបានជំរុញឱ្យភាគី សហរដ្ឋអាមេរិក លុបចោលការលក់អាវុធ និងបញ្ឈប់ការទាក់ទងយោធាជាមួយកោះតៃវ៉ាន់” ។

ប៉ុន្មានម៉ោងក្រោយម កអ្នកនាំពាក្យចិនដីគោក បានសម្តែងការប្រឆាំងយ៉ាងខ្លាំងចំពោះសហរដ្ឋអាមេរិក ដែលបានគ្រោងលក់អាវុធទៅតំបន់តៃវ៉ាន់ របស់ប្រទេសចិនដោយជំរុញឱ្យសហរដ្ឋអាមេរិក គោរពតាមគោលការណ៍ចិនតែមួយ និងសេចក្តីថ្លែងការរួមអាមេរិក-ចិនទាំង។

អ្នកនាំពាក្យការិយាល័យកិច្ចការកោះតៃវ៉ាន់ នៃក្រុមប្រឹក្សារដ្ឋ លោក Zhu Fenglian បាននិយាយថា យើងបានអំពាវនាវឱ្យអាជ្ញាធរ មានសមត្ថកិច្ចរបស់គណបក្សប្រជាធិបតេយ្យ (DPP) នៅតៃវ៉ាន់ បញ្ឈប់ទំនាក់ទំនងជាមួយសហរដ្ឋអាមេរិក តាមគ្រប់រូបភាព និងជៀសវាងកុំធ្វើដំណើរទៅមុខទៀត ដើម្បីស្វែងរកឯករាជ្យតៃវ៉ាន់។

លើសពីនេះ ក្រសួងការពារជាតិចិននៅយប់ថ្ងៃព្រហស្បតិ៍នេះ បានជំរុញយ៉ាងខ្លាំងដល់សហរដ្ឋអាមេរិក ឱ្យបញ្ឈប់ទំនាក់ទំនងយោធាជាមួយកោះតៃវ៉ាន់ និងដោះស្រាយដោយប្រយ័ត្នប្រយែងនូវបញ្ហា ដែលទាក់ទងនឹងកោះតៃវ៉ាន់ ដើម្បីជៀសវាងផលប៉ះពាល់ធ្ងន់ធ្ងរ ដល់ទំនាក់ទំនងទ្វេភាគី និងយោធារវាងចិន និងសហរដ្ឋអាមេរិក ក៏ដូចជាសន្តិភាពនិ ងស្ថេរភាពឆ្លងកាត់ច្រកសមុទ្រតៃវ៉ាន់។

ក្រសួងបានថ្លែងនៅក្នុងសេចក្តីថ្លែងការណ៍មួយថា ភាគីចិននឹងប្រយុទ្ធតបវិញ ដោយម៉ឺងម៉ាត់ ប្រសិនបើភាគីអាមេរិក មិនអើពើនឹងបទដ្ឋានជាមូលដ្ឋាន នៃទំនាក់ទំនងអន្តរជាតិ និងបន្តមានអាកប្បកិរិយាបែបនេះ។

ទីភ្នាក់ងារសារព័ត៌មានរ៉យទ័របានរាយការណ៍នៅថ្ងៃពុធនេះថា ក្រសួងការបរទេសសហរដ្ឋអាមេរិក បានជូនដំណឹងជាផ្លូវការទៅសភា អំពីការលក់អាវុធដែលបានគ្រោងទុកទៅកាន់កោះតៃវ៉ាន់របស់ប្រទេសចិន បើទោះបីជាប្រទេសចិនបានព្រមានម្តងហើយ ម្តងទៀតដល់សហរដ្ឋអាមេរិក ឱ្យបញ្ឈប់កិច្ចព្រមព្រៀងនេះក៏ដោយ។

ដកស្រង់សម្តីមន្ទីរបញ្ចកោណ ទីភ្នាក់ងារព័ត៌មានរ៉យទ័របាននិយាយថា ក្រសួងការបរទេសសហរដ្ឋអាមេរិក បានយល់ព្រមលើសក្តានុពល នៃការលក់ប្រព័ន្ធអាវុធចំនួន៣ ទៅកោះតៃវ៉ាន់របស់ប្រទេសចិន រួមមានឧបករណ៍ចាប់សញ្ញា កាំជ្រួចមីស៊ីល និងកាំភ្លើងធំដែលអាចមានតម្លៃសរុប១,៨ ពាន់លានដុល្លារ។

កាលពីសប្តាហ៍មុន សេតវិមាន បានអះអាងថា ពួកគេកំពុងឆ្ពោះទៅមុខជាមួយនឹងការលក់ឧបករណ៍យោធា ទំនើបចំនួន៥ដាច់ដោយឡែកពីគ្នា ទៅកាន់កោះនេះ ដែលមានតម្លៃសរុបប្រហែល៥ពាន់លានដុល្លារ។

ប្រភពបាននិយាយថា ស្ថានីយ៍មីស៊ីលចំនួន១០០ និងមីស៊ីល៤០០គ្រាប់នឹងត្រូវចំណាយថវិកាប្រមាណ២ពាន់លានដុល្លារ ។

ការជូនដំណឹងជាផ្លូវការផ្តល់ឱ្យសភា រយៈពេល៣០ថ្ងៃ ដើម្បីជំទាស់ទៅនឹងការលក់ណាមួយ ប៉ុន្តែទីភ្នាក់ងារព័ត៌មានរ៉យទ័របាននិយាយថា ការណ៍នេះទំនងជាមិនមានការគាំទ្រទ្វេភាគីចំពោះកោះតៃវ៉ាន់ឡើយ។

ប្រទេសចិន បានព្រមានម្តងហើយម្តងទៀត ដល់សហរដ្ឋអាមេរិក កុំឲ្យមានការលក់អាវុធ ខណៈដែលទំនាក់ទំនងនៃប្រទេសទាំងពីរ ស្ថិតក្នុងស្ថានភាពតានតឹង ចាប់តាំងពីការរីករាលដាលនៃជំងឺរាតត្បាតកូវីដ១៩ ។

អ្នកនាំពាក្យក្រសួងការបរទេសចិនលោក Zhao Lijian បាននិយាយកាលពីសប្តាហ៍មុនថា ការលក់អាវុធរបស់សហរដ្ឋអាមេរិក ទៅកាន់កោះតៃវ៉ាន់របស់ប្រទេសចិន បានធ្វើឱ្យខូចខាតដល់អធិបតេយ្យភាព និងផលប្រយោជន៍សន្តិសុខរបស់ចិនយ៉ាងធ្ងន់ធ្ងរ។

សហរដ្ឋអាមេរិកកំពុងរំលោភយ៉ាងធ្ងន់ធ្ងរ លើគោលការណ៍ចិនតែមួយ និងបទប្បញ្ញត្តិនៃសេចក្តីថ្លែងការណ៍ប្រទេសចិន-សហរដ្ឋអាមេរិកទាំងបី។

លោក Zhao បាននិយាយនៅក្នុងសន្និសីទសារព័ត៌មាន ប្រចាំថ្ងៃមួយកាលពីថ្ងៃទី ១៣ ខែតុលាថា សេចក្តីថ្លែងការណ៍រួមរួមគ្នា ជាពិសេសគឺសេចក្តីថ្លែងការណ៍ថ្ងៃទី ១៧ ខែសីហាដោយការលក់អាវុធទៅកោះតៃវ៉ាន់ គឺជាការជ្រៀតជ្រែកយ៉ាងខ្លាំង នៅក្នុងកិច្ចការផ្ទៃក្នុងរបស់ប្រទេសចិន។

លោកបានទទូចដល់សហរដ្ឋអាមេរិក ឱ្យលុបចោលការលក់ ដែលបានគ្រោងទុក ហើយបានព្រមានថា ប្រទេសចិននឹងធ្វើការឆ្លើយតបស្របច្បាប់ និងចាំបាច់ស្របតាមស្ថានភាពជាក់ស្តែង៕

ផ្សារទំនើប FURI Times Square ក្រុងព្រះសីហនុទទួលបានអតិថិជនកាន់តែច្រើន

ដោយៈ រ៉ាណេត

ព្រះសីហនុៈពីមួយថ្ងៃទៅមួយថ្ងៃ កំណើននៃចំនួនអតិថិជនចម្រុះជាតិសាសន៍ ជាពិសេសជនជាតិខ្មែរ បានបង្ហាញពីការគាំទ្រ និងជឿទុកចិត្តយ៉ាងខ្លាំងមកលើរាល់មុខទំនិញ ដែលត្រូវបានដាក់លក់នៅក្នុងផ្សារទំនើប FURI Times Square ស្របពេលដែលក្រុមហ៊ុនជាដៃគូជាច្រើនបានបន្តចូលមកសហការជាបន្តបន្ទាប់។

ប្រធានផ្នែកគ្រប់គ្រងផ្នែកទីផ្សារ និងការលក់នៅក្នុងផ្សារទំនើប FURI Times Square កញ្ញាពុធ ប៊ុនរស្មី បានប្រាប់ឱ្យដឹងថា បច្ចុប្បន្ននេះទាំងចំនួនក្រុមហ៊ុន និងហាងលក់ទំនិញនានាដែលជាដៃគូវិនិយោគ ក៏ដូចជាចំនួនអតិថិជន មកកាន់ផ្សារទំនើបលើកដំបូងប្រចាំនៅក្រុងព្រះសីហនុមួយនេះ មានការកើនឡើងជាលំដាប់។

កញ្ញាបានបន្តថា “ជារៀងរាល់ថ្ងៃ គឺមានអតិថិជនចំរុះជាតិសាសន៍ចូលមកកាន់ផ្សារទំនើប FURI Times Square ជាច្រើន ដែលក្នុងនោះមានអ្នកខ្លះ មកទិញផលិតផល និងសម្ភារៈប្រើប្រាស់ប្រចាំថ្ងៃ ដូចជាសម្លៀកបំពាក់ គ្រឿងលម្អរខ្លួន ហើយអ្នកខ្លះទៀតមកទទួលទានអាហារ និងភេសជ្ជៈ ដោយឡែកអ្នកខ្លះទៀតគាត់ មកដើរកម្សាន្តលក្ខណៈជាក្រុម” ។

កញ្ញាបានបញ្ជាក់ឱ្យដឹងថា ជាមួយនឹងការទទួលបានកំណើន នៃចំនួនអតិថិជនខាងលើនេះ គណៈគ្រប់គ្រងផ្សារទំនើប FURI Times Square បានអនុវត្តនូវវិធានការដែលបានដាក់ចេញដោយរាជរដ្ឋាភិបាល តាមរយៈក្រសួងសុខាភិបាល ទៅលើការរក្សាគម្លាត និងអនាម័យ ដោយការបាញ់ទឹកអាល់កុលសម្អាតដៃ ផ្តល់ម៉ាស់ និងការវាស់កម្ដៅទាំងបុគ្គលិកបម្រើការងារនៅក្នុង ទាំងបុគ្គលិកក្រុមហ៊ុន និងហាងលក់ទំនិញ ក៏ដូចជាអតិថិជនមុនពេលអនុញ្ញាត ឱ្យចូលក្នុងបរិវេណផ្សារទាំងអស់ ដើម្បីចូលរួមក្នុងការទប់ស្កាត់ការរីករាលដាលនៃជំងឺផ្លូវដង្ហើម Covid-19 នៅក្នុងតំបន់ ក៏ដូចជានៅទូទាំងប្រទេសកម្ពុជាផងដែរ។

ផ្សារទំនើប FURI Times Square មានទីតាំងស្ថិតនៅសង្កាត់លេខ៤ ក្រុងព្រះសីហនុ ក្បែរវិមានឯករាជ បាននាំមកជូននូវបទពិសោធន៍ថ្មី នៅក្នុងតំបន់ ដោយការនាំយកមកនូវបណ្តាផលិតផល មុខទំនិញចំរុះគ្រប់ប្រភេទយ៉ាងសម្បូរបែប ដែលសុទ្ធតែជាម៉ាកយីហោល្បីៗលំដាប់សាកលលោក ដូចជា ក្រុមហ៊ុន KFC ក្រុមហ៊ុន Starbucks ក្រុមហ៊ុន Amazon Café ,ក្រុមហ៊ុន KOI ក្រុមហ៊ុន Dakasi Tea ហាងអាហារមកពីប្រទេសសាំងហ្គាពួរ ក្រុមហ៊ុនលក់សម្លៀកបំពាក់ LEVI’s ក្រុមហ៊ុន NIKE ក្រុមហ៊ុន Samsonite ក្រុមហ៊ុននាឡិកាដ៏ល្បីឈ្មោះ G-Shock ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងសំអាងផងដែរ សរុបជិត៣០ក្រុមហ៊ុន៕

វត្តមានអគារខ្ពស់ៗជាច្រើនគម្រោងត្រៀមនឹងបង្ហាញវត្តមានបន្ថែមនៅក្នុងតំបន់បឹងកេងកង

ដោយ ៖ រ៉ាណេត

ភ្នំពេញ ៖ បន្ថែមពីលើវត្តមានសំណង់អាគារនានាដែលមានស្រាប់ ដូចជាសណ្ឋាគារ ខុនដូ អាផាតមិន អាគារការិយាល័យ និងសំណង់អាគាពាណិជ្ជកម្ម នៅឆ្នាំបន្ទាប់នេះ វត្តមានអាគារពាណិជ្ជកម្មថ្មីៗជាច្រើនទៀតនឹងរំលេចខ្លួននៅក្នុងតំបន់បឹងកេងកង បន្ថែមទៀតខណៈដែលបច្ចុប្បន្ន ទីតាំងនៃគម្រិងសាងសង់ត្រូវបានក្រុមហ៊ុនអភិវឌ្ឍន៍ទិញទុករួចរាល់។

នៅក្នុងចំណោមសំណង់អាគារខ្ពស់ៗជិត ១៥០០ ដែលកំពុងមានរូបរាងនៅក្នុងរាជធានីភ្នំពេញ តំបន់បឹងកេងត្រូវបានគេមើលឃើញថា មានអាគារទំនើប និងខ្ពស់ៗជាច្រើន រហូតត្រូវបានគេចាត់ទុកថា បឹងកេងកងជាតំបន់ពាណិជ្ជកម្មកម្រិតខ្ពស់ប្រចាំនៅរាជធានីភ្នំពេញ ។

ប្រធានក្រុមប្រឹក្សាភិបាលក្រុមហ៊ុន Homes Global Realty លោក សុត វីរៈ បានមានប្រសាសន៍នៅថ្ងៃចុងសប្ដាហ៍កន្លងទៅនេះថា “យើងទទួលស្គាល់ថា បឹងកេងកងដែលទើបតែបង្កើតជាខណ្ឌថ្មីកាលពីពេលកន្លងទៅនេះ ត្រូវបានបំពេញទៅដោយវត្តមាននៃសំណង់អគារធំៗ និងខ្ពស់ជាច្រើន ដើម្បីបម្រើប្រយោជន៍ក្នុងនាមជាអគារពាណិជ្ជកម្ម អគារស្នាក់នៅសហកម្មសិទ្ធិ ឬហៅថា ខុនដូ អាគារអាផាត អាគារការិយាល័យ និងសណ្ឋាគារជាដើម”។

លោកបានបន្តថា “យើងមើលទៅឃើញថា បច្ចុប្បន្ននេះសម្រាប់ដីទំនេរនៅក្នុងតំបន់បឹងកេងកងហាក់មិនមាននៅទំនេរនោះទេ ជាពិសេសនៅក្នុងបឹងកេងកងមួយ ដែលសូម្បីតែដីដែលឃើញមានព័ន្ធរបងក៏ភាគជាច្រើនជាគម្រោងដែលនឹងសាងសង់ជាសំណង់ធំៗ និងខ្ពស់ៗដែរ ជាពិសេសគម្រោងខុនដុ និងគម្រោងអគារបម្រើដល់ការិយាល័យ ដែលកំពុងមានតម្រូវការ។ ពេលនេះដោយសារតែស្ថិតនៅក្នុងភាពប្រឈមនឹងជំងឺរាតត្បាត ទើបក្រុមហ៊ុនបរទេសជាច្រើនមិនបានចូលមកកាន់កម្ពុជាដើម្បីធ្វើជំនួញ ប្រសិនបើបញ្ហាទាំងនេះត្រូវបានបញ្ចប់ អ្នកជំនួញអន្តរជាតិត្រឡប់មកវិញដើម្បីបន្តការសាងសង់ ហើយតម្រូវការជួលអាគារគឺនឹងកម្រើកឡើងវិញ ហើយបើសម្រាប់ការទិញសំណង់ខុនដូ អាចនឹងទិញមិនទាន់ជនបរទេសក៏ថាបានដែរ ព្រោះពួកគាបានយល់ច្បាស់ពីខុនដូ”។

លោក សុត វីរៈ បានមានប្រសាសន៍ទៀតថា “នៅប្រទេសគេទម្រាំអាចទិញលំនៅដ្ឋានធ្វើជាកម្មសិទ្ធិគឺត្រូវប្រើពេលវេលាច្រើន ឬពិបាកក្នុងការកំណត់ទីតាំងតាមការចង់បាន ប៉ុន្តែសម្រាប់កម្ពុជា ជនបរទេសអាចមានសិទ្ធិក្លាយជាម្ចាស់កម្មសិទ្ធិអចលនទ្រព្យបានចាប់ពីជាន់ទី១ឡើងទៅ ដូច្នេះ ពួកគេអាចមានឱកាសក្លាយជាម្ចាស់ផ្ទះពេញសិទ្ធិ ហើយអាចដាក់ជួលដើម្បីទទួលបានចំណូលជាប្រចាំខែ ឬប្រចាំឆ្នាំត្រឡប់មកវិញបាន”៕

ក្រុមហ៊ុនING Holdingកំពុងចាក់ដីបំពេញស្ថាបនាផ្លូវថ្មីមួយទៀតនៅផ្នែកប៉ែកខាងកើតនៃមហាវិថី៦០ម៉ែត្រ ឆ្ពោះកាន់ផ្លូវជាតិលេខ២

ដោយវុត្ថា

ភ្នំពេញៈ ក្រុមហ៊ុនING Holding បានអះអាងថា បច្ចុប្បន្នក្រុមហ៊ុនកំពុងបន្តសម្រុកចាក់បំពេញតួមហាវិថី ឈុន គង់ មួយផ្នែកទៀតប៉ែកខាងកើត នៃចំណុចប្រសព្វមហាវិថីសម្ដេច ហ៊ុន សែន (ផ្លូវ ៦០ម៉ែត្រ) ឆ្ពោះទៅកាន់ផ្លូវជាតិលេខ២ ដែលរហូតមកដល់ពេលនេះ ស្ទើតែសម្រេច ១០០ភាគរយ។

ក្រុមហ៊ុន ING Holding បានឱ្យដឹងកាលពីពេលថ្មីៗនេះថា បន្ទាប់ពីសម្រេចបានប្រមាណ៩០ភាគរយ នៃការចាក់បំពេញតួផ្លូវពីចំណុច ប្រសព្វមហាវិថីសម្ដេច ហ៊ុន សែន ឆ្ពោះទៅផ្លូវជើងឯក(ផ្លូវលេខ២១៧) ដែលកំពុងបន្តការដោះស្រាយផលប៉ះពាល់ ដើម្បីឈានទៅរកការសម្រេច នៃការស្ថាបនាមហាវិថីដ៏សំខាន់នេះចប់ជាស្ថាពរ ដាក់ឱ្យប្រើប្រាស់ជាសាធារណៈ។

ក្រុមហ៊ុនបន្តថា ក្រុមហ៊ុន អ៊ីអនម៉ល របស់ប្រទេសជប៉ុន បានចាប់ផ្ដើមការសាងសង់គម្រោងផ្សារទំនើបខ្នាតយក្សទី៣របស់ខ្លួន នៅក្នុងតំបន់អភិវឌ្ឍន៍ទីក្រុងរណប ING City ទន្ទឹមគ្នាជាមួយនឹងដំណើរការ នៃការស្ថាបនាមហាវិថីឈុន គង់ របស់ក្រុមហ៊ុន ING Holding ។

ទីក្រុងរណប ING City របស់ក្រុមហ៊ុន ING Holding កំពុងមានសន្ទុះខ្លាំងលើវិស័យអចលនទ្រព្យ រួមមានសំណង់លំនៅដ្ឋាន បុរី ខុនដូ អគារពាណិជ្ជកម្ម និងសាលារៀនអន្តរជាតិជាដើម។ បច្ចុប្បន្ន មិនត្រឹមតែផ្សារទំនើបអ៊ីអនម៉លមួយប៉ុណ្ណោះទេ ដែលបានចាប់ផ្តើម ប៉ុន្តែនៅមានផ្សារទំនើបធំៗចំនួន២ទៀត ក៏កំពុងដំណើរការសាងសង់យ៉ាងមមារញឹកផងដែរ គឺផ្សារទំនើប PH Diamond Place និងផ្សារទំនើប ជីប ម៉ុង ២៧១ មេហ្គាម៉ល៕

ប្រធានសមាគម CLDA អះអាងថា ហេដ្ឋារចនាសម្ព័ន្ធ គឺជាចលករយ៉ាងសំខាន់ជួយជម្រុញឱ្យទីផ្សារអចលនទ្រព្យកើនឡើង

ដោយ ៖ រ៉ាណេត

ភ្នំពេញ ៖ មិនថាទោះជានៅតំបន់ក៏ដោយ ជាពិសេសនៅតំបន់ជាយរាជធានីភ្នំពេញ វិស័យដ្ឋារចនាសម្ព័ន្ធគឺជាចលករមួយយ៉ាងសំខាន់ក្នុងការជួយជម្រុញឱ្យទីផ្សារអចលនទ្រព្យមានតម្រូវការខ្ពស់ រួមជាមួយនឹងតម្លៃក៏ទទួលបានភាពល្អប្រសើរផងដែរ។ នេះបើតាមការអះអាងរបស់លោក ម៉ន សុខា ប្រធានសមាគមអ្នកអភិវឌ្ឍន៍ដីឡូត៍កម្ពុជា។

ប្រធានសមាគមអ្នកអភិវឌ្ឍន៍ដីឡូត៍កម្ពុជា ( CLDA ) បានមានប្រសាសន៍នៅថ្ងៃទី២៦ ខែតុលា ឆ្នាំ២០២០នេះថា បញ្ហាបណ្តាញហេដ្ឋារចនាសម្ព័ន្ធរួមមានផ្លូវថ្នល់ និងស្ពានសម្រាប់សម្រួលដល់ចរាចរណ៍គឺជាចំណុចសំខាន់បំផុតដែលជួយធ្វើឱ្យទីផ្សារអចលនទ្រព្យមានតម្រូវការ និងសកម្មភាពក្នុងការអភិវឌ្ឍទៅលើសំណង់នានា។

លោកបានបន្តថា “នៅពេលតំបន់ណាមួយមានផ្លូវថ្នល់ល្អ ធំទូលាយ ងាយស្រួលក្នុងការធ្វើដំណើរ និងការដឹកជញ្ជូន វានឹងជម្រុញឱ្យមានកំណើនមនុស្សចូលទៅរស់នៅ និងប្រកបមុខរបរអាជីវកម្មផ្សេងៗដែលបង្កើតជាទីប្រជុំ រហូតអាចកើនមានជាតំបន់ពាណិជ្ជកម្មក្នុងកម្រិតណាមួយជាក់ជាមិនខាន”។

លោក ម៉ន សុខា បានមានប្រសាសន៍បញ្ជាក់ថា “នៅពេលមានតម្រូវការក្នុងការប្រើប្រាស់ដី ក៏ដូជាសម្រាប់អភិវឌ្ឍន៍សម្រាប់បម្រើផលប្រយោជន៍ដល់ផ្នែកណាមួយ តម្លៃដីធ្លីគឺនឹងកើនឡើងដោយស្វ័យប្រវត្តិ ទាស់ត្រង់ថា កើនឡើងតិច ឬច្រើនតែប៉ុណ្ណោះដែលវាអាស្រ័យទៅលើតម្រូវការជាក់ស្ដែងរបស់អ្នកទិញ។ ជាក់ស្ដែងដូចជានៅតំបន់ជាយក្រុងនៃផ្លូវក្រវាត់ទី៣ គឺមានកំណើនប្រជាជនចូលតៅរស់នៅយ៉ាងច្រើន ខណៈដែលទំនោរនៃការអភិវឌ្ឍទាំងផ្នែកដីឡូតិ៍ ក៏ដូចជាផ្នែកសាងសង់សំណង់លំនៅដ្ឋានកម្រិតមធ្យម និងក្រោមមធ្យម បាន និងកំពុងមានសកម្មភាពយ៉ាងមមាញឹក”។

នៅក្នុងដំណាក់កាលដែលតំបន់មួយចំនួនកំពុងរងគ្រោះដោយការជន់លិចនៅពេលនេះ សកម្មភាពនៃការទិញ-លក់ ក៏ដូចជាការសាងសង់មួយចំនួនត្រូវបានអាកខាន ប៉ុន្តែបន្ទាប់ពីឆ្លងផុតការលិចលង់នេះ សកម្មភាពនៅក្នុងទីផ្សារអចលនទ្រព្យដែលផ្តោតសំខាន់ទៅលើផ្នែកដីធ្លី និងលំនៅដ្ឋាននឹងចាប់ផ្តើមបន្តសកម្មភាពឡើងវិញជាមិនខាន៕

តើតម្លៃអចលនទ្រព្យមានការប្រែប្រួលបែបណានៅក្នុងទីផ្សាររួម?

ដោយ ៖ វុត្ថា

ភ្នំពេញ៖ អ្នកជំនាញបានមើលឃើញពីទីផ្សារអចលទ្រព្យមានការប្រែប្រួលពាក់ព័ន្ធនឹងតម្លៃគឺអាស្រ័យលើតម្រូវការជាក់ស្ដែង របស់អតិថិជន ឬអ្នកអភិវឌ្ឍន៍ ដោយមិនបានកំណត់តំបន់ណា ឬទីតាំងណានោះទេ ។

លោកស្រី ចេវ សុឃុន ប្រធានសមាគមអ្នកជំនាញអចលនទ្រព្យកម្ពុជា បានប្រាប់គេហទំព័រ propertyarea.asia កាពីពេលថ្មីៗនេះថា តាមពិតមិនថា តំបន់ពាណិជ្ជកម្ម ឬតំបន់លំនៅឋាននោះទេ ឱ្យតែមានតម្រូវការ នឹងជួយជំរុញឱ្យតម្លៃលើទីផ្សារអចលនទ្រព្យកាន់តែមានការប្រែប្រួលកាន់តែខ្លាំង។

លោកស្រីបន្តថា “សម្រាប់តំបន់ពាណិជ្ជកម្ម មានការកើនឡើងខ្ពស់ជាងចំពោះតម្លៃអចលនទ្រព្យ ដោយសារតែតំបន់នេះ មានតម្រូវការខ្លាំង តែសម្រាប់តំបន់រស់នៅឡើងតម្លៃទៅតាមកម្រិតរបស់វា”។

លោកស្រីបញ្ជាក់ទៀតថា “យើងមិនអាចកំណត់ថា តំបន់នេះ មានតម្លៃអចលនទ្រព្យខ្ពស់ ឬតំបន់នោះមានតម្លៃទាប ឬ ខ្ពស់អីបានទេ វាស្រ័យទៅលើការចង់បានរបស់វិនិយោគ ឬអ្នកអភិវឌ្ឍន៍ប៉ុណ្ណោះ ទីតាំណក៏មានតម្លៃដែរ គ្រាន់តែភាគរយនៃការឡើងគឺខុសគ្នា”។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងដែរថា សម្រាប់ទីផ្សាតម្លៃអចលនទ្រព្យនៅក្នុងប្រទេសកម្ពុជា នៅតំបន់ណាក៏ដូចជាតំបន់ណា គឺថា មិនមានសញ្ញាណាមួយធ្លាក់ចុះនោះទេ បើទោះបីកម្ពុជាប្រឈមក៏ដោយ។

លោកថ្លែងថា “ខ្ញុំមើលឃើញថា តម្លៃអចលនទ្រព្យទាំងដីធ្លី និងលំនៅឋានជាដើម ទាំងនៅក្នងទីក្រុងភ្នំពេញ និងនៅតាមបណ្តាខេត្ត ដូចមិនមានអីប្រែប្រួលទេ គ្រាន់តែវាទទួលរងនូវប៉ះពាល់ពីប្រតិបត្តិការលក់តែប៉ុណ្ណោះ គឺមានការលក់យឺត”។ លោកបន្តថា “តម្រូវការអចលនទ្រព្យនៅតែមាន ជាពិសេសលំនៅឋាន ហើយតម្លៃក៏វាមិនមិនធ្លាក់ចុះដែរ”៕

សឹង្ហបុរីស្ថិតក្នុងចំណោមប្រទេសចំនួន១០ដែលមានទុនវិនិយោគច្រើនជាងគេនៅកម្ពុជា

ដោយវុត្ថា

ភ្នំពេញៈ លោក Michael Tan Keng Siong ឯកអគ្គរដ្ឋទូតនៃសាធារណរដ្ឋសឹង្ហបូរី ប្រចំាកម្ពុជាបានអះអាងថា សឹង្ហបុរីស្ថិតក្នុងចំណោមប្រទេសចំនួន១០ ដែលមានទុនវិនិយោគច្រើនជាងគេនៅកម្ពុជា ដោយទុនវិនិយោគរបស់សឹង្ហបុរីបានហក់ឡើងខ្ពស់ កាលពីឆ្នាំ២០១៨ និង២០១៩ ក្នុងនោះកាលពីឆ្នាំ២០១៨ មានប្រមាណ៤ពាន់លានដុល្លារអាមេរិក។

ក្នុងជំនួបជំរាបលាសំរាប់ការបញ្ចប់អាណត្តិកាទូតរបស់លោកនៅកម្ពុជា ជាមួយសម្តេចអគ្គមហាពញ្ញាចក្រីហេង សំរិនប្រធានរដ្ឋសភាជាតិនៅថ្ងៃទី២៦ តុលានេះ លោក Michael Tan Keng Siongបានថ្លែងថា កាលពីឆ្នាំ២០១៩ សឹង្ហបុរីវិនិយោគនៅកម្ពុជាមានទំហំទឹកប្រាក់៤,៥ពាន់លានដុល្លារអាមេរិក តែវាបានធ្លាក់ចុះទៅវិញនៅត្រីមាសដើមឆ្នាំ២០២០ ដោយសារតែវិបត្តិនៃជម្ងឺកូវីដ១៩ ដោយទុនវិនិយោគរបស់សឹង្ហបុរីនៅកម្ពុជាក្នុង ឆ្នាំ២០២០នេះមានប្រហែល២ពាន់លានដុល្លារអាមេរិកតែប៉ុណ្ណោះ។

សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា បានមានប្រសាសន៍ដែរថា ការបោះទុនវិនិយោគរបស់សឹង្ហបុរីនៅកម្ពុជា គឺជាការរួមចំណែកដល់ការអភិវឌ្ឍសេដ្ឋកិច្ចរបស់កម្ពុជា បង្កើតការងារជូនពលរដ្ឋកម្ពុជារាប់ម៉ឺននាក់ ហើយវាក៏បានបញ្ជាក់ពីគុណតម្លៃនៃទំនាក់ទំនង និងកិច្ចសហប្រតិបត្តិការរវាងប្រទេសទំាងពីរកម្ពុជា-សឹង្ហបុរី ផងដែរ។

សម្តេចបន្តថា “រដ្ឋសភាកម្ពុជាពេញចិត្តចំពោះផ្លែផ្កា នៃកិច្ចសហប្រតិបត្តិការនានារវាងរដ្ឋាភិបាលកម្ពុជា និងសឹង្ហបុរីលើវិស័យនយោបាយ ការទូត សេដ្ឋកិច្ច ពាណិជ្ជ កម្ម វិនិយោគ ទេសចរណ៍ អប់រំ និងបណ្តុះបណ្តាលបច្ចេកទេសវិជ្ជាជីវៈ ដែលបានរួមចំណែកដ៏សំខាន់ក្នុងការអភិវឌ្ឍនៅកម្ពុជា”។

ជាមួយគ្នានេះ សម្តេចប្រធានរដ្ឋសភាកម្ពុជា បានអរគុណដល់សឹង្ហបុរី ដែលបានជួយបណ្តុះ បណ្តាលរយៈពេលខ្លីដល់មន្រ្តីកម្ពុជាបានជិត១ម៉ឺននាក់ ក្នុងរយៈពេលប៉ុន្មានឆ្នាំកន្លងមកនេះ ក្រោមគំនិត ផ្តួចផ្តើមសមាហរណកម្មអាស៊ាន។

លោក Michael Tan Keng Siong ឯកអគ្គរដ្ឋទូត នៃសាធារណរដ្ឋសឹង្ហបូរី ប្រចំាកម្ពុជាដែលចប់អាណត្តិបានលើកឡើងថា ចំណងមិត្តភាព និងកិច្ចសហប្រតិបត្តិការកម្ពុជា-សឹង្ហបុរី មានការរីកចម្រើននៅលើគ្រប់វិស័យ ទំាងវិស័យនយោបាយ សេដ្ឋកិច្ច ពាណិជ្ជកម្ម និងការផ្លាស់ប្តូរប្រជាជន បើទោះជា នៅឆ្នាំ២០១៩ មានការរំខានដោយសារបញ្ហាជំងឺកូវីដ១៩យ៉ាងណាក្តី។

កម្ពុជា និងសឹង្ហបុរី បានភ្ជាប់ទំនាក់ទំនងការទូតជាមួយគ្នា ជាផ្លូវការតំាងពីឆ្នាំ ១៩៦៥ ហើយទំនាក់ទំនងមួយនេះ មានការរីកចម្រើនទៅមុខជាលំដាប់៕

សភាពាណិជ្ជកម្មត្រៀមចេញផ្សាយសៀវភៅមគ្គុទេសក៏វិនិយោគខេត្តស្វាយរៀង

ដោយគង់ សូរិយា

ស្វាយរៀងៈ សភាពាណិជ្ជកម្មកម្ពុជាបាន និងកំពុងពង្រីកការផ្សព្វផ្សាយ តាមរយៈការសរសរសៀវភៅ មគ្គុទេសវិនិយោគក៏សំរាប់បណ្តាខេត្តនិមួយៗ ដែលអាចបង្ហាញដល់អ្នកវិនិយោគជាតិ អន្តរជាតិទៅវិនិយោគនៅតាមបណ្តារាជធានី ខេត្តទាំង២៥នៅកម្ពុជា។

ជាក់ស្តែងកាលពីថ្ងៃទី២៤ តុលាកន្លងមកនេះ ថ្នាក់ដឹកនាំាំសភាពាណិជ្ជកម្មកម្ពុជា ដឹកនាំដោយលោកឧកញ៉ាងួន ម៉េងតិចអគ្គនាយកសភាពាណិជ្ជកម្មកម្ពុជា បានជួបជាមួយលោកឧកញ៉ាសុខ រ៉ាដូ ប្រធានសភាពាណិជ្ជកម្មខេត្តស្វាយរៀង និងសហការីដើម្បីប

ញ្រ្ជាបពីផែនការសរសេរសៀវភៅ “មគ្គុទេសក៏វិនិយោគខេត្តស្វាយរៀង” ដែលអ្នកវិនិយោគជាតិ និងអន្តរជាតិអាចប្រើប្រាស់ជាព៌តមាន ដើម្បីធ្វើការសម្រេចចិត្តវិនិយោគនៅក្នុងវិស័យដែលមានសក្តានុពលសំខាន់ៗរបស់ខេត្ត។

ជាមួយគ្នានេះ សភាពាណិជ្ជកម្មកម្ពុជា ក៏ដូចជាសភាពាណិជ្ជកម្មខេត្តស្វាយរៀងបានបើកឳកាសឲ្យថ្នាក់ដឹកនាំក្រុមហ៊ុននានា អ្នកវិនិយោគជាតិ អន្តរជាតិអាចផ្សព្វផ្សាយពីក្រុមហ៊ុន និងសេវាកម្មរបស់ខ្លួន និងចូលរួមឧបត្ថម្ភគាំទ្រដល់ការបោះពុម្ពសៀវភៅនេះ ដែលមានតម្លៃចាប់ពី៥០០ដល់៣០០០ដុល្លារអាមេរិក។

សៀវភៅនេះនឹងត្រុវនិពន្ឋ និងរៀបរៀងឡើងដោយក្រុមហ៊ុនANA Advisory ដែលនឹងចុះស្រាវជ្រាវ និងចងក្រងសៀវភៅនេះ។

ទោះជាយ៉ាងណាការរៀបចំសៀវភៅនេះ មិនទាន់សម្រេចបញ្ចប់នៅពេលណានៅឡើយទេ ខណៈក្រុមការងារកំពុងរៀបចំស្រាវជ្រាវ។

លោកឧកញ៉ាសុខ រ៉ាដូប្រធានសភាពាណិជ្ជកម្មខេត្តស្វាយរៀង បានគាំាំទ្រយ៉ាងពេញទំហឹងលើការងារនេះ ព្រោះសៀវភៅនេះបានផ្តល់ចំណេះដឹង ក៏ដូចជាបង្ហាញពីសក្តានុពលសំខាន់ៗរបស់ខេត្តស្វាយរៀង ពិសេសជាការបង្ហាញព៌តមានពីភាពរីកចម្រើន នៃវិស័យនិមួយៗក្នុងខេត្តស្វាយរៀង ដែលថ្នាក់ដឹកនាំក្រុមហ៊ុននានា ក៏ដូចជា អ្នកវិនិយោគជាតិ និងអន្តរជាតិ អាចមើលឃើញពីសក្តានុពលរបស់ខេត្ត ដែលអាចចាប់យកឳកាសវិនិយោគក្នុងខេត្ត។

លោកឧកញ៉ាបន្តថា “ក្នុងនាមថ្នាក់ដឹកនាំសភាពាណិជ្ជកម្មខេត្ត ខ្ញុំគាំទ្រយ៉ាងពេញទំហឹងដល់ការសរសេរ និងរៀបរៀងសៀវភៅនេះឡើង ព្រោះវាផ្តល់ប្រយោជន៍៍សំខាន់ណាស់ដល់ប្រជាពលរដ្ឋទូទៅ ក៏ដូចជាអ្នកវិនិយោគជាតិ អន្តរជាតិ”។លោកបន្តថា “ក្រោមការដឹកនាំរបស់សម្តេចតេជោនាយករដ្ឋមន្រ្តី ខេត្តស្វាយរៀងមានការអភិវឌ្ឍយ៉ាងលឿន ហេតុនេះ បន្ទាប់ពីការចេញផ្សាយសៀវភៅនេះបន្ថែមទៀត ខ្ញុំសង្ឃឹមថាខេត្តស្វាយរៀងនឹងទាក់ទាញបាននូវគំរោងវិនិយោគធំៗជាច្រើនទៀត”៕