ក្រុមហ៊ុនអភិវឌ្ឍន៍ឆ្នេរមាសតេជោសែនកំពុងពន្លឿនសកម្មភាពសាងសង់ និងបញ្ចប់ឱ្យបានឆាប់រហ័សតាមផែនការ

ដោយ ៖ រ៉ាណេត
កំពត ៖ ឆ្នេរមាសតេជោសែន ជាឆ្នេរកម្សាន្តដ៏ធំលើកដំបូងបង្អស់របស់ខេត្តកំពត ដែលត្រូវបានបង្កើតឡើងដោយកិច្ចសហការរវាងរដ្ឋបាលខេត្តជាមួយក្រុមហ៊ុនដៃគូអភិវឌ្ឍន៍ក្នុងរយៈពេលប្រមាណ២ឆ្នាំនៃការស្ថាបនា ស្ថិតនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត។

អភិបាលខេត្តកំពត លោក ជាវ តាយ បានមានប្រសាសន៍ឱ្យដឹងនៅថ្ងៃទី៩ ខែធ្នូ ឆ្នាំ២០២០ថា ដោយសំអាងផ្អែកលើតួនាទីភារកិច្ចរបស់អនុគណៈកម្មការនីមួយៗដែលសម្រេចនៅពេលខាងមុខនេះ នឹងបង្កឱ្យមានភាពងាយស្រួលក្នុងការអនុវត្តន៍ការងារត្រួតពិនិត្យ និងគ្រប់គ្រងការអភិវឌ្ឍរបស់ក្រុមហ៊ុន ( IGB) សំដៅធ្វើយ៉ាងណាឱ្យគម្រោងមួយនេះមានការអភិវឌ្ឍបានឆាប់រហ័ស។

បន្ទាប់ពីសម្រេចបានលទ្ធផលលេចចេញជារូបរាងឡើងពិតប្រាកដក្រោយការស្ថាបនា តំបន់ឆ្នេរមាសតេជោសែន នឹងអាចទាក់ទាញប្រជាពលរដ្ឋក៏ដូចជាភ្ញៀវទេសចរជាតិ-អន្តរជាតិ មកសម្រាកលំហែកម្សាន្តនៅពេលខាងមុខឆាប់ៗនេះជាក់ជាមិនខាន។

លោកអភិបាលខេត្តបានមានប្រសាសន៍ថា ភ្ញៀវទេសចរ និងប្រជាពលរដ្ឋជាច្រើន កំពុងទន្ទឹងរង់ចាំមើល ថាតើឆ្នេរខ្សាច់កម្សាន្តរបស់ខេត្តកំពត ស្អាត និងទាក់ទាញដល់កម្រិតណា ស្របពេលដែលកន្លែងកម្សាន្ត ដ៏ទាក់ទាញថ្មីៗជាច្រើន ត្រូវបានបង្កើត ឡើងជាហែហូរ។ ប៉ុន្តែមកដល់ថ្ងៃនេះ ឆ្នេរសិប្បនិម្មិត ដែលត្រូវបានកំណត់ឈ្មោះថាឆ្នេរមាសសម្តេចតេជោ នោះនៅមិនទាន់ស្ថាបនារួចរាល់នៅឡើយទេ។

ជាមួយគ្នានេះ លោកក៏បានបញ្ជាក់ផងដែរថា អ្វីដែលរាជរដ្ឋាភិបាលបានសម្រេចថា ត្រូវអភិវឌ្ឍហើយ ត្រូវនាំគ្នាសហការ ជំរុញដល់ដំណើរការអភិវឌ្ឍន៍នោះ ដោយត្រូវធ្វើជាបណ្តើរៗ មិនអាចរង់ចាំ ឬប្រើលេសច្រើនបានទេ ព្រោះនៅក្នុងកិច្ចសន្យាសុំធ្វើការអភិវឌ្ឍ ក៏បានកំណត់ពេលច្បាស់លាស់រួចហើយដែរ។

ដោយឡែកសម្រាប់ក្រុមហ៊ុនត្រូវយកចិត្តទុកដាក់បង្កើនល្បឿនការងារ បង្កើនកម្លាំង គ្រឿងចក្រឱ្យ បានច្រើន ដើម្បីបញ្ចប់ការងារតាមផែនការ ដែលបានកំណត់ទុក ប៉ុន្តែត្រូវគោរពតាមគំនូសប្លង់បច្ចេកទេស ដែលមានការចូលរួមសហការពីជំនាញពាក់ព័ន្ធ ដើម្បីកាត់បន្ថយផលប៉ះពាល់ឱ្យនៅតិចបំផុត។

គម្រោងអភិវឌ្ឍបង្កើតតំបន់ឆ្នេរខ្សាច់ថ្មីសិប្បនិមិត្តនេះ រដ្ឋបាលខេត្តកំពត បានចាប់ដៃគូជាមួយនឹងក្រុមហ៊ុនវិនិយោគឯកជន (IGB) Cambodia CO.LTD ដែលបានអនុវត្តអស់រយៈពេលប្រមាណ ២ឆ្នាំរួចមកហើយ លើផ្ទៃដីប្រមាណ ២៣៤ហិកតា ដោយមានការបែងចែកផលប្រយោជន៍តាមសមាមាត្រផ្ទៃដី៦០ភាគរយ សម្រាប់ក្រុមហ៊ុន IGB Cambodia CO.LTD និងផ្ទៃដី៤០ភាគរយទុកជូនរដ្ឋក្រោមការ គ្រប់គ្រងរបស់រដ្ឋបាលខេត្តកំពត ពោលគឺក្រុមហ៊ុន IGB គ្រប់គ្រងលើផ្ទៃដីទំហំ១២០ហិកតា រដ្ឋបាលខេត្តកំពតទំហំផ្ទៃដី ៨០ហិកតា និង៣៤ហិកតាទៀតសម្រាប់កសាងហេដ្ឋារចនាសម្ព័ន្ធ៕

អគារមជ្ឈមណ្ឌលពាណិជ្ជកម្មតម្លៃជាង១ពាន់លានដុល្លារនៅក្នុងទីក្រុងឡុងបញ្ចប់ការសាងសង់

ដោយវុត្ថា

ទីក្រុងឡុងដ៏ៈ ផែនការសាងសង់គម្រោងអគារពាណិជ្ជកម្មធំៗ មួយចំនួននៅក្នុងលើពិភពលោកសម្រាប់ឆ្នាំ២០២០ ប្រហែលជាត្រូវផ្អាកបណ្តោះអាសន្ន ដែលបង្កឡើងដោយជំងឺកូវីដ១៩ ប៉ុន្តែសម្រាប់ការាអគារខ្ពស់ជាងគេមួយ ក្នុងទីក្រុងឡុងដ៏ត្រូវបានបញ្ចប់ការសាងសង់។

យោងតាមការចុះផ្សាយពីគេហទំព័រ www.timeout.com បានឱ្យដឹងថា គម្រោងសាងសងអគារមជ្ឈមណ្ឌល 22 Bishopsgate បានឈានដល់ដំណាក់កាលបញ្ចប់ ដែលធ្វើឱ្យអាគារខ្ពស់ជាងគេនេះ នៅទីក្រុងឡុងមានកម្ពស់២៧៨ ម៉ែត្រ។

មជ្ឈមណ្ឌលនេះ ត្រូវបានប្រើប្រាស់មុខងារជាអគារិយាល័យ ដែលខ្ពស់ជាងគេបំផុតនៅក្នុងប្រទេសអឺរ៉ុប។ អគារនេះមានលក្ខណៈពិសេសជាច្រើន រួមមាន កន្លែងហាត់ប្រាណ ឧទ្យានមួយដែលមានទីធ្លា១.៧០០ម៉ែត្រការ៉េ ផ្សារទំនើប អាហារដ្ឋាន ដែលនឹងក្លាយជាវិចិត្រសាលទស្សនាសាធារណៈ ដោយឥតគិតថ្លៃខ្ពស់បំផុតនៅទីក្រុងឡុង។

អគារ 22 Bishopsgate មានកំពស់២៧៨ ម៉ែត្រ ស្មើនឹងកំពស់៦២ ជាន់ ត្រូវបានគេស្គាល់ថា TwentyTwo រចនាឡើងដោយ ក្រមហ៊ុន PLP Architecture ដែលបានរៀបចំផែនការរចនាប្លង់សំរាប់អាគារ Nova ដែលមានលក្ខណៈស្រដៀងនឹងអាគារ Victoria ។

អគារ 22 Bishopsgate នេះបានចាប់ផ្តើមសាងសង់នៅឆ្នាំ២០១៧ ហើយគ្រោងនឹងបើកដំណើរការជាផ្លូវការ នៅក្នុងឆ្នាំ២០២១ខាងមុខនេះ ដែលធ្វើឱ្យទីក្រុងឡុងដ៏កាន់តែមានភាពទាក់ទាញកាន់ខ្លាំង៕

ខេត្តកំពតបន្តភាពទាក់ទាញលើគម្រោងវិនិយោគធំៗតម្លៃរាប់សិបលានដុល្លារ

ដោយៈ រ៉ាណេត

កំពតៈ ស្របទៅនឹងចក្ខុវិស័យរបស់រាជរដ្ឋាភិបាលកម្ពុជា ក្នុងការប្រែក្លាយខេត្តជាប់មាត់សមុទ្រ ឱ្យទៅជាតំបន់កម្សាន្តដ៏ទាក់ទាញលំដាប់អន្តរជាតិ បច្ចុប្បនេះ ខេត្តកំពត បានបន្តភាពទាក់ទាញលើគម្រោងវិនិយោគ និងអភិវឌ្ឍន៍ធំៗជាច្រើនដែលមានតម្លៃរាប់សិបលានដុល្លារ ដែលបម្រើដល់វិស័យទេសចរណ៍។

ភ្ជាប់ជាមួយនឹងការទទួលបានគម្រោងវិនិយោគ និងអភិវឌ្ឍន៍ជាច្រើននៅទូទាំងខេត្តកំពត លោកឧកញ៉ា តេង រិទ្ធី ដែលជាអគ្គនាយកក្រុមហ៊ុនអចលទ្រព្យ R Investment Group នៅល្ងាចថ្ងៃទី៨ ខែធ្នូ ឆ្នាំ២០២០បានបង្ហាញពីក្ដីសាទរ ទៅនឹងអ្វីដែលខេត្តកំពតទទួលបាននៅពេលនេះ ជាមួយនឹងការបញ្ជាក់ថា គម្រោងបណ្តាក់ទុនវិនិយោគដែលមានទំហំជាច្រើនលានដុល្លារខាងលើនេះ ភាគច្រើនជាការវិនិយោគ ទៅលើការបង្កើតតំបន់កម្សាន្តទ្រង់ទ្រាយធំ រួមជាមួយនឹងការសាងសង់លំនៅដ្ឋានបែបលំហែរកាយ។

លោកឧកញ៉ាបន្តទៀតថា “បច្ចុប្បន្ននេះមានអ្នកវិនិយោគជាច្រើន បានទម្លាក់ទុនធ្វើការអភិវឌ្ឍតំបន់មួយចំនួន ឱ្យក្លាយទៅជាតំបន់កម្សាន្តបែបកែច្នៃ និងធម្មជាតិ ជាពិសេសតំបន់ដែលស្ថិតនៅជាប់មាត់ព្រែក ជាប់សមុទ្រ និងតំបន់ក្បែរជើងភ្នំ” ។ លោកបន្តថា “ជាមួយនឹងសកម្មភាពដែលកំពុងបន្តអភិវឌ្ឍន៍ ក៏មានគម្រោងថ្មីបន្តបន្ទាប់ទៀត ដែលមិនយូរមិនឆាប់ខេត្តកំពត នឹងក្លាយទៅជាទីតាំងគោលដៅទេសចរណ៍ ដ៏មានប្រជាប្រិយភាពជាក់មិនខាន” ។

ជាមួយនឹងការបង្ហាញពីសក្ដានុពល ក្នុងការវិនិយោគខាងលើនេះ លោកឧកញ៉ា តេង រិទ្ធី ក៏បានបញ្ជាក់ថា សម្រាប់ការអភិវឌ្ឍលើវិស័យលំនៅដ្ឋាន បែបលំហែរកាយនៅពេលបច្ចុប្បន្ន ត្រូវបានធ្វើឡើងជាច្រើនគម្រោង និងច្រើនកម្រិត ហើយតម្លៃក៏អាស្រ័យទៅតាមគម្រោងផងដែរ ដែលក្នុងនោះមានតម្លៃចាប់ពីជាង៣ ទៅ៤ម៉ឺនដុល្លារឡើងទៅសម្រាប់លំនៅដ្ឋានបែបលំហែរមួយខ្នង។

ប្រធានមន្ទីរទេសចរណ៍ខេត្តកំពត លោក សយ ស៊ីណុល បានមានប្រសាសន៍ផងដែរថា សព្វថ្ងៃនេះមានគម្រោងវិនិយោគ លើវិស័យបដិសណ្ឋារកិច្ចជាច្រើន នៅក្នុងខេត្តកំពត ជាពិសេស គម្រោងរមណីយដ្ឋាន សណ្ឋាគារ និងបឹងហ្គាឡូ នៅតាមដងព្រែកនានារបស់ខេត្តកំពត។

លោកបន្តថា “នៅពេលដែលមានគម្រោងវិនិយោគ ផ្នែកបដិសណ្ឋារកិច្ចច្រើននៅក្នុងខេត្តនាពេលនេះ បានឆ្លុះបញ្ចាំងនៃភាពល្អប្រសើរ និងជំរុញឱ្យមានការប្រកួតប្រជែងកាន់តែខ្លាំងក្លា នៅក្នុងវិស័យទេសចរណ៍របស់ប្រទេសកម្ពុជា និងធានាបាននូវគុណភាពខ្ពស់” ។ លោកបញ្ជាក់ថា “ធម្មតានៅក្នុងធ្វើពាណិជ្ជកម្ម ឬមុខជំនួញណាមួយដែលមានការប្រកួតប្រជែង វានឹងធានាបាននូវគុណភាព និងកម្រិតស្តង់ដារមួយ ហើយយើងក៏ចង់បានការប្រកួតប្រជែងបែបនេះឱ្យបានច្រើន ដើម្បីជំរុញទៅដល់ការលើកកម្ពស់កម្រិតគុណភាព” ។

លោកសយ ស៊ីណុល បានបញ្ជាក់ថា បច្ចុប្បន្ននេះកម្ពុជា មិនមែនមានការប្រកួតប្រជែងតែនៅក្នុងស្រុកនៅទេ គឺកម្ពុជាបាននិងកំពុងប្រកួតប្រជែងទាំងថ្នាក់តំបន់ និងពិភពលោក លើវិស័យបដិសណ្ឋារកិច្ចនេះ។ ការទាក់ទាញភ្ញៀវទេសចរទាំងក្នុងស្រុក និងក្រៅស្រុក គឺទាមទារឱ្យមានគុណភាព និងស្តងដារចាំបាច់បំផុត ដូច្នេះនៅពេលមានការប្រកួតប្រជែងកាន់តែច្រើនវាកាត់តែល្អ ហើយឆ្លើយតបទៅនឹងតម្រូវការភ្ញៀវទេសចរ និងជាតិអន្តរជាតិ៕

គម្រោងសាងសង់ខ្សែរថភ្លើងលើអាកាសអាចចំណាយទឹកប្រាក់ជាង ១៤០០លានដុល្លារប៉ុន្តែការបរិច្ឆេទសាងសង់មិនទាន់កំណត់

ដោយស៊ីវ ម៉េង

ភ្នំពេញៈ គំរោងសាងសង់រថភ្លើងលើអាកាស ឬក្រោមដីអាចចំណាយទឹកប្រាក់រហូតដល់១០០០ទៅ១៥០០លានដុល្លារអាមេរិក ប៉ុន្តែការចាប់ផ្តើមសាងសង់នៅពេលណាមិនទាន់កំណត់ពេលវេលាជាក់លាក់ទេ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់មានប្រសាសន៍ឲ្យដឹង កាលពីពេលកន្លងមកថ្មីៗនេះថា គម្រោងសិក្សារថភ្លើងលើអាកាស គឺខាង JICA បានសិក្សារួចហើយ ហើយក្រសួងនៅរង់ចាំលទ្ធផលសិក្សា។ ដោយឡែក គម្រោងរថភ្លើង Monorail និងរថភ្លើងក្រោមដី ក្រុមហ៊ុនចិនជាអ្នកសិក្សា។

លោកបន្តថា “ក្រោយការសិក្សាចប់ ក្រសួងនឹងប្រៀបធៀប ដើម្បីជ្រើសរើសយកគម្រោងណាមួយដែលមានតម្លៃសមរម្យ និងឆ្លើយតបទៅនឹងការអភិវឌ្ឍន៍” ។ លោកបន្តថា “គម្រោងនេះ អាចនឹងប្រើប្រាស់ថវិកាចន្លោះពី ១០០០លានដុល្លារ ទៅ១,៤០០ពាន់លានដុល្លារអាមេរិក។

ការសិក្សាលទ្ធភាពសាងសង់គម្រោងរថភ្លើងលើអាកាស នៅភ្នំពេញនៅតែបន្ត ដោយមានមួយបានបញ្ចប់រួច និង២ផ្សេងទៀតកំពុងរង់ចាំលទ្ធផល។ អំឡុងពេលនេះរដ្ឋាភិបាលក៏កំពុងស្វែងរកប្រភពហរិញ្ញប្បទាន ដើម្បីយកមកអនុវត្តន៍គម្រោងនេះផងដែរ។

ជាមួយគ្នានេះ លោកលី បូរិន អនុរដ្ឋលេខាធិការ ក្រសួងសាធារណការ និងដឹកជញ្ជូនទទួលបន្ទុកផ្នែកផ្លូវដែកបានឱ្យដឹងផងដែរថា តាមការប៉ាន់ស្មាន គម្រោងរថភ្លើងលើអាកាសនេះ មានតម្លៃខ្ពស់ណាស់សម្រាប់វិនិយោគ។

លោកបានឲ្យដឹងថា “ការសិក្សារថភ្លើងលើអាកាស យើងបានសិក្សារួចហើយ ប៉ុន្តែគម្រោងនឹងវាអស់ច្រើនពេក។ ហេតុនេះទាល់តែរដ្ឋាភិបាលជាអ្នកសម្រេច។

សម្រាប់គម្រោងហេដ្ឋារចនាសម្ព័ន្ធ នៅរាជធានីភ្នំពេញ ក្រសួងសាធារណការ និងដឹកជញ្ជូនបានបង្ហាញថា ក្រសួងកំពុងជ្រើសរើសរវាង រថភ្លើងលើអាកាស រថភ្លើង Mono Rail និងរថភ្លើងក្រោមដី៕

រដ្ឋមន្ត្រីសាធារណៈការបង្កើតក្រុមការងារជំនាញដើម្បីធ្វើការជាមួយភាគីកូរ៉េលើគំរោងសាងសង់ស្ពានមិត្តភាពរវាងប្រទេសទាំងពីរ

ដោយគង់ សូរិយា

ភ្នំពេញៈ ទេសរដ្ឋមន្ត្រី រដ្ឋមន្ត្រីក្រសួងសាធារណៈការនិងដឹកជញ្ជូនលោកស៊ុន ចាន់ថុលបានបង្កើតក្រុមការងារបច្ចេកទេស ដើម្បីធ្វើការជាមួយអ្នកជំនាញការកូរ៉េ សំរាប់ពិភាក្សាគ្នាឈានទៅសាងសង់ស្ពានមិត្តភាពកម្ពុជា កូរ៉េនាពេលខាងមុខនេះ។

អ្នកនាំពាក្យក្រសួងសាធារណៈការ លោកវ៉ាស៊ីម សូរិយា បានមានប្រសាសន៍ឲ្យដឹងតាមទូរស័ព្ទនាល្ងាចថ្ងៃទី៨ ធ្នូកន្លងមកថា ផែនការសាងសង់ស្ពាននេះ ត្រូវបានបង្ហើបដោយប្រធានាធិបតីកូរ៉េ លោកម៉ូន ជេអ៊ីន ក្នុងកិច្ចប្រជុំកំពូលអាស៊ាននៅប្រទេសវៀតណាមកាលពីកំឡុងខែវិច្ឆិកាកន្លងមកនេះ។លោកបន្តថា បច្ចុប្បន្នលោកទេសរដ្ឋមន្ត្រីបានបង្កើតក្រុមការងារ ដើម្បីធ្វើការងារនេះជាមួយអ្នកជំនាញការ នៃទីភ្នាក់ងារសហប្រតិបត្តិការនៃសាធារណៈរដ្ឋកូរ៉េ (koica) ដើម្បីធ្វើការងារនេះ។

លោកបន្តថា “ខ្ញុំមិនបានដឹងថាគំរូស្ពាននេះបានសិក្សារួចឬនៅនោះទេ ប៉ុន្តែនៅពេលអ្នកជំនាញការកូរ៉េមកដល់នាពេលខាងមុខ ពួកគេអាចបង្ហាញពីទម្រង់ស្ពាននេះតែម្តងក៏ថាបាន ដោយសារកន្លងមកភាគីកូរ៉េបានសិក្សារួចហើយ” ។

លោកសូរិយាបានបន្តឲ្យដឹងផងដែរថា តាមធម្មតាគំរោងធំៗបែបនេះ យើងមិនទាន់កំណត់ពេលវេលាជាក់លាក់បានទេ ដោយសារវានៅត្រូវការពេលវេលានិងនិតិវិធីច្រើន លើកលែងតែសម្តេចប្រមុខរដ្ឋាភិបាល អញ្ជើញបើកការដ្ឋានតែម្តងទើបយើងអាចដឹងបានជាក់លាក់។

ក្នុងកំឡុងដំណើរទស្សនកិច្ចរបស់ប្រមុខរដ្ឋាភិបាលកម្ពុជា ទៅកាន់់ប្រទេសកូរ៉េ សម្តេចតេជោហ៊ុន សែនបានស្នើភាគីកូរ៉េជួយសាងសង់ស្ពានមិត្តភាព សម្រាប់ប្រទេសទាំងពីរ ខណៈមិត្តចិន និងជប៉ុនបានសាងសង់ស្ពានមិត្តភាពសំរាប់កម្ពុជា ជាច្រើនរួចមកហើយ៕

រដ្ឋសភាអនុម័តច្បាប់វិនិយោគលើវិស័យអគ្គិសនីចំនួន៧គម្រោងនៅក្នុងឆ្នាំនេះ

ដោយវុត្ថា

ភ្នំពេញៈ រដ្ឋសភាកម្ពុជាបានអនុម័តច្បាប់វិនិយោគ លើវិស័យអគ្គិសនីចំនួន៧ គម្រោងនៅក្នុងឆ្នាំនេះ ដែលបានស្នើរឡើងដោយរដ្ឋាភិបាល ដើម្បីឆ្លើយតបទៅនឹងតម្រូវការ ការរីកចំរើនរបស់ប្រទេសកម្ពុជា និងទាក់ទាញវិនិយោគបរទេសឱ្យមកបណ្តាក់ទុនវិនិយោគនៅកម្ពុជា។

អគ្គលេខាធិការដ្ឋានរដ្ឋសភាកម្ពុជា លោក ឡេង ប៉េងឡុង បានឱ្យដឹងកាលពីថ្ងៃទី ៨ ខែធ្នូ ឆ្នាំ ២០២០កន្លងនេះថា កម្ពុជាត្រូវមានច្បាប់ ដើម្បីទាក់ទាញវិនិយោគិនបរទេសដោយក្នុងនោះ នៅក្នុងឆ្នាំ២០២០ នេះ រដ្ឋសភាបានអនុម័តសំខាន់ជាច្រើន ដូចជា ច្បាប់វិនិយោគលើវិស័យអគ្គិសនី ច្បាប់សំណង់ ច្បាប់សម្អាតប្រាក់ និងហិរញ្ញប្បទានភេរកម្ម ច្បាប់មូលបត្ររដ្ឋ ច្បាប់ល្បែងពាណិជ្ជកម្ម និងច្បាប់ជាច្រើនផ្សេងទៀត ដែលសុទ្ធសឹងត្រូវតម្រូវការចាំបាច់របស់ប្រទេស។

លោកបន្តថា “ច្បាប់ទាំងអស់នេះ បានជួយច្រើនក្នុងទាក់ទាញ វិនិយោគពីក្រៅប្រទេសមកកាន់កម្ពុជា ដើម្បីរុញកំណើនសេដ្ឋកិច្ចនៅក្នុងប្រទេស និងកាត់បន្ថយភាពក្រីក្ររបស់ប្រជាពលរដ្ឋ” ។ លោកបន្យល់ថា “សម្រាប់ការអនុម័តច្បាប់វិនិយោគលើវិស័យអគ្គិសនីចំនួន៧នេះ ធ្វើឡើងដើម្បីទាក់ទាញវិនិយោគ និងធ្វើយ៉ាងខិតខំបង្កលក្ខណៈងាយស្រួលដល់វិនិយោគិនជាតិ និងអន្តរជាតិ” ។

លោកប៉េងឡុងបានបន្តថា វិស័យអគ្គិសនីមានតម្រូវការច្រើនទាំងប្រជាពលរដ្ឋ វិនិយោគិនជាតិ និងអន្តរជាតិ រួមជាមួយនឹងបណ្តារោងចក្រសហគ្រាសផ្សេងៗ ដែលមានតម្រូវការលើវិស័យអគ្គិសនីនេះ។ នៅពេលតម្លៃអគ្គិសនីចុះថោក នឹងធ្វើឱ្យមានការទាក់ទាញវិនិយោគិនមកពីបរទេស។

យោងតាមរបាយការណ៍របស់រដ្ឋសភាបង្ហាញថា រដ្ឋសភាបានអនុម័តគម្រោងវិនិយោគចំនួន៧នៅក្នុងឆ្នាំនេះ នៅក្នុងចំណោមច្បាប់ផ្សេងៗទៀត រួមមានច្បាប់ស្ដីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃកម្ពុជាឲ្យក្រុមហ៊ុន រ៉ូយ៉ាល់ គ្រុប អ៊ីនវេសម៉ិន គ្រុប ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើដោយពន្លឺព្រះអាទិទ្យ អនុភាព៧០០មេហ្គាវ៉ាត់ នៅខេត្តកោះកុង។

ច្បាប់ស្ដីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃកម្ពុជា ឲ្យក្រុមហ៊ុន ហាន សេង ខូល ម៉ាញ សម្រាប់គម្រោងសាងសង់ រោងចក្រអគ្គិសនីដុតធ្យូងថ្ម អនុភាព២៦៥មេហ្គាវ៉ាត់ នៅខេត្តឧត្តរមានជ័យ។

ច្បាប់ស្ដីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃកម្ពុជា ឲ្យក្រុមហ៊ុន ហាន សេងខូល ម៉ាញ សម្រាប់គម្រោងវិនិយោគ សាងសង់ខ្សែបណ្តាញបញ្ជូនអគ្គិសនីតង់ស្យុង២៣០គីឡូវ៉ុល តភ្ជាប់ពីរោងចក្រអគ្គិសនីដុធ្យួងថ្ម ខេត្តបន្ទាយមានជ័យ មកស្ថានីយសៀមរាបខាងកើត។

ច្បាប់ស្ដីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃកម្ពុជាឲ្យក្រុមហ៊ុន ហ្គ្រីន សឺស្គែនណេប៊ល វេនឈ័រ (ខេមបូឌា) ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើដោយពន្លឺព្រះអាទិទ្យ អនុភាព២០មេហ្គាវ៉ាត់ នៅខេត្តស្វាយរៀង។

ច្បាប់ស្ដីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃកម្ពុជា ឲ្យក្រុមហ៊ុន រ៉ាយ ផៅវ័រ សឹបផ្លាយ ឯ.ក សម្រាប់គម្រោងសាងសង់ស្ថានីយ ផលិតអគ្គិសនី ដើដោយពន្លឺព្រះអាទិទ្យ អនុភាព៣០មេហ្គាវ៉ាត់ នៅខេត្តបន្ទាយមានជ័យ។

ច្បាប់ស្ដីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃកម្ពុជា ឲ្យក្រុមហ៊ុន រ៉ាយសិន រេតនីជី (ខេមបូឌា)បាត់ដំបង ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើដោយពន្លឺព្រះអាទិទ្យអនុភាព៦០មេហ្គាវ៉ាត់ នៅខេត្តបាត់ដំបង។ និងច្បាប់ស្ដីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃកម្ពុជា ឲ្យក្រុមហ៊ុន ស្មេថេក អ៊ីនហ្វីនី ឯ.ក សម្រាប់គម្រោងសាងសង់ស្ថានីយ៍ ផលិតអគ្គិសនី ដើដោយពន្លឺព្រះអាទិទ្យ អនុភាព៣០មេហ្គាវ៉ាត់ នៅខេត្តពោធិ៍សាត់៕

ចំណេះដឹង! តើអ្វីជាយុទ្ធសាស្ត្រ៤ចំណុច ក្នុងគោលនយោបាយឧស្សាហកម្ម?

ដោយវុត្ថា

ភ្នំពេញៈ រាជរដ្ឋាភិបាលកម្ពុជា បានដាក់ចេញនូវយុទ្ធសាស្ត្រចំនួន៤ចំណុចទៅក្នុងគោលនយោបាយឧស្សាហកម្មឆ្នាំ ២០១៥-២០២៥ ដោយផ្តោតទៅលើការតម្រង់ទិសដៅទីផ្សារ និងបរិយាកាសអំណោយផលសម្រាប់ការអភិវឌ្ឍឧស្សាហកម្ម។

នៅក្នុងគោលនយោបាយឧស្សាហកម្មខាងលើនេះ រាជរដ្ឋាភិបាលកម្ពុជាបានដាក់ចេញនៅយុទ្ធសាស្ត្រចំនួន៤ចំណុច រួមមាន ទី១ ការបញ្ចុះថ្លៃអគ្គិសនី និងការបង្កើតតំបន់នៅការផ្គត់ផ្គង់ថាមពលអគ្គិសនី ដើម្បីបម្រើសកម្មភាព កសិកម្ម និងឧស្សាហកម្ម ដោយជួយបង្កើតផលិតភាពទាក់ទាញ ការវិនិយោគ និងបង្កើនទំនុកចិត្តផ្នែកអាជីវកម្ម។

ទី២ ការអភិវឌ្ឍហេដ្ឋារចនាសម្ព័ន្ធទូទាំងប្រទេសកម្ពុជា ជាពិសេសនៅតាមដងផ្លូវដឹកជញ្ជូនទាំង៣ ដែលមានអាទិភាពខ្ពស់ និងចាំបាច់សម្រាប់ការអភិវឌ្ឍឧស្សាហកម្ម ការតភ្ជាប់ ការប្រកួតប្រជែង និងតម្រូវការរបស់វិស័យឯកជន។

ទី៣ ការបង្កើតយន្តការពង្រីកទីផ្សារពលកម្ម និងជំនាញជាឯកទេសដើម្បីធានាឱ្យមានការផ្គត់ផ្គង់កម្លាំងពលកម្មគ្រប់គ្រាន់ និងផលិតភាពកាន់តែប្រសើរទ្បើង និងទី៤ ការប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសស និងអភិវឌ្ឍឧស្សាហកម្មបៃតងទៅថ្ងៃអនាគត។

រាជរដ្ឋាភិបាលកម្ពុជាប្តេជ្ញាអនុវត្តន៍ ផែនការសកម្មភាពសំខាន់ៗមួយចំនួនទៀតមានដូចជា ការពង្រឹងនិងពង្រីកផ្លូវជាតិ និងអន្តរជាតិតភ្ជាប់ទៅបណ្តាប្រទេសជិតខាង ពង្រឹងការដឹកជញ្ជូនតាមផ្លូវទឹក ការបង្កើន និងពង្រីកផ្លូវដែកបន្ថែមទៀត ការអភិវឌ្ឍកំពង់ផែសមុទ្រ និងកំពង់ផែទន្លេ និងការកាត់បន្ថយការចំណាយឡូជីស្ទីក (Logistic) ជាដើម៕

អ្នកជំនាញនិយាយពីការត្រៀមខ្លួនរបស់អ្នកវិនិយោគក្នុងវិស័យអចលនទ្រព្យ ដើម្បីជំរុញវិស័យមួយនេះឱ្យល្អប្រសើរឡើងវិញក្រោយវិបត្តិ Covid-19

ដោយ ៖ ប៊ី

ភ្នំពេញ ៖ ស្របពេលដែលបណ្តាប្រទេសជឿនលឿនមួយចំនួនចាប់ផ្តើមអនុវត្តលើការប្រើប្រាស់វ៉ាក់សាំងប្រឆាំង Covid-19 ជាបណ្ដើរៗទៅហើយនោះបានធ្វើឱ្យបណ្តាអ្នកវិនិយោគនៅក្នុងវិស័យអចលនទ្រព្យបង្ហាញពីក្ដីសាទរ និងត្រៀមខ្លួនសារជាថ្មីក្នុងការចាប់ផ្តើមសកម្មភាពនៅក្នុងទីផ្សារមួយនេះ។ ស្របពេលជាមួយគ្នានេះ មានសំណួរលើកឡើងថា តើកម្ពុជាគួរត្រៀមអ្វីខ្លះដើម្បីជំរុញវិស័យអចលនទ្រព្យឱ្យបានល្អប្រសើរឡើងវិញបន្ទាប់ពីបញ្ចប់វិបត្តិនៃជំងឺឆ្លងមួយនេះ?

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍នៅល្ងាចថ្ងៃទី៨ ខែធ្នូ ឆ្នាំ២០២០ថា រហូតមកដល់ពេលនេះ មានប្រទេសមួយចំនួនហើយបានចាក់វ៉ាក់សាំងប្រឆាំង Covid-19 ហើយប្រជាជននៃប្រទេសទាំងនោះក៏កំពុងរង់ចាំមើលពីប្រតិកម្មរបស់វាផងដែរ។

លោកបានឱ្យដឹងថា បើសិនជាវ៉ាក់សាំងនេះមានប្រសិទ្ធភាពដែលអាចកំចាត់ Covid-19 បាននោះ ប្រជាជនលើពិភពលោក ទាំងវិនិយោគិន និងទេសចរនឹងចេញធ្វើសកម្មភាពវិនិយោគ និងទេសចរណ៍។

លោកបន្តថា “អ្វីដែលកម្ពុជាត្រូវត្រៀមសម្រាប់ទទួលស្វាគមន៍ការវិលត្រលប់នៃភាពប្រសើរឡើងវិស័យអចលនទ្រព្យគឺត្រូវមានផលិតផលដែលត្រឹមត្រូវច្បាស់លាស់ ។ក្នុងន័យនេះគឺត្រូវដោះស្រាយរាល់ទំនាស់ដែលកើតឡើងចំពោះអចលនទ្រព្យ ដើម្បីឱ្យវិនិយោគិនមានជំនឿជាក់លើអចលនទ្រព្យក្នុងប្រទេសកម្ពុជា និងមកបណ្ដាក់ទុនវិនិយោគ បន្ថែមទៀត”។

លោកបន្ថែមថា នៅពេលកម្ពុជាមានវ៉ាក់សាំង Covid-19 លោករំពឹងថា នៅឆ្នាំ ២០២១វិស័យអចលនទ្រព្យនឹងទទួលបានសកម្មភាពវិនិយោគ ការទិញលក់ប្រសើរឡើងវិញ តែវាត្រូវប្រើពេលយូរបន្តិចដើម្បីឱ្យវាបានប្រសើរដូចស្ថានភាពមុនកូវីដ១៩។

លោកបានថ្លែងថា “អ្វីដែលពលរដ្ឋត្រូវធ្វើនៅពេលនេះគឺការទប់ស្កាត់ការចម្លងមេរោគនេះបន្តទៀតក្នុងសហគមន៍ ដូច្នេះ ពលរដ្ឋត្រូវស្ដាប់តាមការណែនាំរបស់ក្រសួងសុខាភិបាលនិងអនុវត្តន៍ឱ្យបានខ្ជាប់ខ្ជួន”៕

ឱកាសចំណេញសម្រាប់អ្នកអភិវឌ្ឍន៍ ! ដីទំហំ១៤ហិកតា ជាប់ផ្លូវជាតិលេខ៦ ក្បែរផ្សារទំនើបម៉ាក្រូ ដាក់លក់តម្លៃក្រោមទីផ្សារ

ដោយ ៖ រ៉ាណេត

សៀមរាប ៖ ដីទំនេរដែលស័ក្ដិសមទៅនឹងគម្រោងអភិវឌ្ឍន៍ធំៗក្នុងតំបន់ទីប្រជុំជន នៅជាប់ផ្លូវជាតិលេខ៦ និងមានផ្លូវហ៊ុមព័ទ្ធជុំវិញ ក្នុងភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប ក្បែរផ្សារទំនើបម៉ាក្រូត្រូវបានប្រកាសដាក់លក់នៅក្នុងតម្លៃក្រោមទីផ្សារ ដែលផ្តល់ឱកាសដល់បណ្តាអ្នកអភិវឌ្ឍន៍ទទួលបានចំណេញច្រើនពីការវិនិយោគបន្ត។

លោកស្រី ជិន លក្ខិណា បានមានប្រសាសន៍នៅល្ងាចថ្ងៃទី៨ ខែធ្នូ ឆ្នាំ២០២០នេះថា “សម្រាប់ដីដែលបានដាក់លក់ទំហំ១៤ ហិកតា ស្ថិតនៅទីតាំងដូចបានបញ្ជាក់ខាងលើនេះ អាចនិយាយបានថា ជាដីដែលមានទំហំធំ និងមានសក្ដានុពលក្នុងតំបន់ ព្រោះក្រៅពីនៅជាប់ផ្លូវជាលេខ៦ (ក្បាលដីខាងមុខ) នៅខាងក្រោយទីតាំងដីជាប់ផ្លូវរដ្ឋទំហំ២២ម៉ែត្រ ហើយនៅចំហៀងដី មានផ្លូវភូមិទំហំ១០ម៉ែត្រ និងនៅក្បែរផ្លូវក្រវាត់ក្រុងទំហំ៤០ម៉ែត្រ ដែលផ្តល់ភាពងាយស្រួលចរាចរណ៍ និងដឹកជញ្ជូន”។

លោកស្រីបញ្ជាក់ថា “ក្រៅពីមានផ្លូវជាច្រើននៅហ៊ុមព័ទ្ធជុំវិញ ទីតាំងដីក៏ស្ថិតនៅជិតផ្សារម៉ាក្រូ ផ្សារស្វាយធំ មានសាលារៀនរដ្ឋ មណ្ឌលសុខភាពរដ្ឋ និងឯកជន ស្ថាប័នរដ្ឋ (មន្ទីរសាធារណការ និងដឹកជញ្ជូន) គ្រឹះស្ថានហិរញ្ញវត្ថុឯកជន មានគម្រោងអភិវឌ្ឍន៍បុរីលំនៅដ្ឋាជាច្រើន និងជាតំបន់ដែលមានការប្រកបអាជីវកម្មចម្រុះ ដែលទាំងអស់នេះសុទ្ធតែជាកត្តាសំខាន់ដែលជំរុញមានសក្ដានុពលកាន់តែខ្លាំង”។

ពាក់ព័ន្ធទៅនឹងការដាក់លក់ដីដែលមានទំហំធំមួយនេះ លោកស្រី ជិន លក្ខិណា បានមានប្រសាសន៍បញ្ជាក់ថា “តម្លៃដីដែលត្រូវបានដាក់លក់នៅពេលនេះគឺស្ថិតក្នុងកម្រិតទាបជាងទីផ្សារ ពោលគឺត្រឹម១៦០ដុល្លារក្នុងមួយម៉ែត្រការ៉េ ប្លង់រឹង ដែលផ្តល់ឱកាសចំណេញច្រើនសម្រាប់អ្នកទិញទុកវិនិយោគបន្ត ក៏ដូចជាអ្នកទិញសម្រាប់គម្រោងអភិវឌ្ឍន៍ផ្សេងៗជាពិសេសគម្រោងអភិវឌ្ឍន៍ជាបុរី ឬបណ្តុំលំនៅដ្ឋានតម្លៃសមរម្យ”។

លោកស្រីបានបង្ហើបប្រាប់ថា “តាមខ្ញុំដឹក នៅក្បែរទីតាំងដីខាងលើនេះ មានក្រុមហ៊ុនអភិវឌ្ឍន៍របស់ចិនដ៏ធំមួយដែលគ្រោងនឹងចូលមកអភិវឌ្ឍន៍អចលនទ្រព្យ បង្កើតជាក្រុងថ្មីមួយ ដែលមានឈ្មោះថា China Town នៅទំហំទឹកប្រាក់វិនិយោគរាប់រយលានដុល្លារ ហើយប្រសិនគមរោងអភិវឌ្ឍន៍មួយនេះលេចចេញជារូបរាង វានឹងជំរុញឱ្យតម្លៃដីទាំងក្នុងតំបន់អភិវឌ្ឍន៍ ទាំងដីនៅតំបន់ក្បែរខាងឡើងថ្លៃខ្ពស់ជាក់ជាមិនខាន។ ដូច្នេះសម្រាប់ការទិញដីនៅតំបន់នេះក្នុងពេលបច្ចុប្បន្ន គឺជាឱកាសដ៏ល្អបំផុត ខណៈដែលនៅមានកម្រិតនៅឡើយ”។

សម្រាប់ព័ត៌មានលម្អិតពីការលក់ដី អាចទាក់ទងតាមរយៈទូរស័ព្ទលេខ ៖ 077 27 99 99 / 088 27 99 999

ខេត្តក្រុងចំនួន៥នៅតែបន្តមានតម្រូវការទីផ្សារដីធ្លីក្នុងស្ថានភាពវិបត្តិ Covid-19

ដោយៈ រ៉ាណេត

ភ្នំពេញៈ ទោះជាកំពុងស្ថិតនៅក្នុងស្ថានភាព នៃវិបត្តិជំងឺCovid-19 យ៉ាងណាក៏ដោយ សម្រាប់ខេត្តក្រុងចំនួន៥រួមមាន ខេត្តកែប កំពត កោះកុង កំពង់ស្ពឺ និងខេត្តមណ្ឌលគីរី នៅតែបន្តមានតម្រូវការទីផ្សារដីធ្លី និងមានសកម្មភាពទិញលក់ដដែល ខណៈដែលនៅក្នុងរាជធានីភ្នំពេញកំពុងជួបភាពស្ងប់ស្ងាត់។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍នៅរសៀលថ្ងៃទី៨ ខែធ្នូ ឆ្នាំ២០២០នេះថា ទោះជាមានបញ្ហាប្រ ឈមទៅនឹងព្រឹត្តិការណ៍២៨វិច្ឆិកា ប៉ុន្តែសម្រាប់សកម្មភាពនៃការទិញលក់ដីធ្លីនៅតាមតំបន់ជាយក្រុង ជាពិសេសនៅខេត្តគោលដៅទេសចរណ៍មួយចំនួនដែលកំពុងមានគម្រោងអភិវឌ្ឍន៍ ពីវិស័យឯកជននៅតែមានសកម្មភាព គ្រាន់តែមិនសូវមមាញឹកខ្លាំង។

លោកស្រីបានបន្តថា “សម្រាប់នៅរាជធានីភ្នំពេញ ហាក់មានភាពស្ងប់ស្ងាត់បន្តិច ប៉ុន្តែនៅតាមខេត្តមួយចំនួន ដូចជា កំពត កែប កោះកុង កំពង់ស្ពឺ ក៏ដូចជាមណ្ឌលគីរី គឺនៅបន្តសកម្មភាពទិញលក់ ប៉ុន្តែមិនសូវមមាញឹកខ្លាំងដូចដើមឆ្នាំនោះទេ ហើយភាគច្រើនអ្នកទិញគឺជាអ្នកអភិវឌ្ឍន៍គម្រោងនានា ដូចជាគម្រោងតំបន់កម្សាន្តជាដើម”។

លោកស្រីបានបន្តថា ខេត្តទាំងអស់នេះ គឺមានសក្ដានុពលដូចគ្នា ទៅលើផ្នែកទេសចរណ៍ ដូច្នេះការទិញភាគច្រើន គឺសម្រាប់អភិវឌ្ឍន៍ជាតំបន់កម្សាន្ត ផ្ទះលំហែរ ឬបឹងហ្គាឡូជាដើម ប៉ុន្តែសម្រាប់តម្លៃហាក់មិនមានការឡើងនោះទេ”។

ជាមួយគ្នានេះ អគ្គនាយកក្រុមហ៊ុនភ្នាក់ងារអចលនទ្រព្យ Century21 Fortuna Investment លោក វ៉ា វិរៈ បានប្រសាសន៍ថា “តាមការមើលឃើញរបស់ខ្ញុំ ក្នុងតំណាក់កាលនេះ ទាំងនៅក្នុងរាជធានីភ្នំពេញ ទាំងនៅតាមបណ្តាខេត្តនានា គឺមានភាពស្ងប់ស្ងាត់បន្តិច លើកលែងតែខេត្តក្រុងដែលជាគោលដៅទេសចរណ៍ ដែលនៅមានបន្តការទិញលក់”។

លោកបានបន្តថា សកម្មភាពនៃការទិញលក់នេះទៀតសោត ក៏មិនមានទំហំធំដុំនោះដែរ ដោយសារតែចរន្តនៃការវិនិយោគទ្រង់ទ្រាយ ធំពីសំណាក់អ្នកវិនិយោគ និងអភិវឌ្ឍន៍បរទេសត្រូវបានកាត់បន្ថយ ជាពិសេសការអវត្តមានក្រុមហ៊ុនវិនិយោគចិនដែលបណ្តាលមកពីវិបត្តិនៃជំងឺដែលកំពុងកើតមាន។

លោក វ៉ា វីរៈ បានមានប្រសាសន៍ថា “នៅពេលដែលមានអ្នកវិនិយោគធំៗចុះទិញដីធ្លីសម្រាប់អភិវឌ្ឍន៍ក្នុងគម្រោងណាមួយ វានឹងបន្តជះឥទ្ធិពលល្អ ដល់អ្នកវិនិយោគបន្ទាប់ដែលមានទំហំតូចជាង ប៉ុន្តែនៅពេលដែលអវត្តមានក្រុមហ៊ុនធំ ដូច្នេះការទិញលក់មួយចំនួនទៀតការត្រូវបានកាត់បន្ថយ”។ លោកបន្តថា “ប៉ុន្តែសម្រាប់ខេត្តទាំង៥ដូចដែលបានលើកឡើងខាងលើនេះ ភាគច្រើនជាការវិនិយោគដោយក្រុមហ៊ុនក្នុងស្រុក សម្រាប់ រយៈពេលវែងតែប៉ុណ្ណោះ”៕