មន្ត្រីជាន់ខ្ពស់រាជរដ្ឋាភិបាលអះអាងថា ការនាំចេញរបស់កម្ពុជាទៅទីផ្សារអាមេរិកនៅតែមានកំណើនខ្ពស់

ដោយ ៖ រ៉ាណេត

ភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុកម្ពុជា បានអះអាងថា ការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកនឹងនៅតែអាចមានកំណើនខ្ពស់ បើទោះបីជាប្រព័ន្ធនុគ្រោះពន្ធ GSP ត្រូវបានផុតសុពលភាពក៏ដោយ។

រដ្ឋមន្ត្រីប្រតិភូអមនាយករដ្ឋមន្ត្រី លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានអះអាងនៅថ្ងៃទី២៧ ខែមករា ឆ្នាំ២០២១ថា នៅឆ្នាំ ២០២០កន្លងទៅនេះ ការនំាចេញរបស់កម្ពុជា ទៅកាន់ទីផ្សារសហរដ្ឋអាមេរិក នៅតែមានកំណើនគួរឲ្យកត់សម្គាល់ ទោះបីស្ថិតក្នុងកាលៈទេសៈនៃវិបត្តិជំងឺកូវីដ១៩ក្តី ហើយសហរដ្ឋអាមេរិក បានក្លាយជាទីផ្សារនាំចេញធំបំផុតរបស់កម្ពុជា ស្របពេលទីផ្សារសហភាពអឺរ៉ុប បានធ្លាក់មកនៅលេខរឿងទី២វិញ។

លោកបញ្ជាក់ថា ការអូសបន្លាយនៃការស្នើសុំបន្តអនុគ្រោះពន្ធទាំងស្រុងក្រោមប្រព័ន្ធ GSP សម្រាប់ផលិតផលការបូបធ្វើដំណើរទៅកាន់រដ្ឋាភិបាលសហរដ្ឋអាមេរិក ដោយសារតែការផ្លាស់ប្តូររដ្ឋបាលថ្មីរបស់សហរដ្ឋអាមេរិកដែលទើបធ្វើឡើងថ្មីៗនេះ។

លោកបន្តថា ចំពោះគម្រោងស្នើសុំបន្តសុពលភាពប្រព័ន្ធអនុគ្រោះពន្ធនេះ គឺមានភាគរយខ្ពស់ ក្នុងការទទួលបានសាជាថ្មីឡើងវិញ។ ប៉ុន្តែលោកថា ទោះបីមិនមានប្រព័ន្ធអនុគ្រោះពន្ធ GSP ក៏ការនាំចេញរបស់កម្ពុជា ទៅសហរដ្ឋអាមេរិក នៅតែមានកំណើនខ្ពស់ដែរ ព្រោះថា ការអនុគ្រោះនេះ គឺសម្រាប់តែផលិតផលកាបូបធ្វើដំណើរតែប៉ុណ្ណោះ ចំណែកផលិតផលផ្សេងទៀត នៅតែទទួលបានការអនុគ្រោះពន្ធក្រោមប្រព័ន្ធ MSN ដដែល។ ប្រសិនបើសហរដ្ឋអាមេរិក មិនបន្តផ្តល់ការអនុគ្រោះពន្ធទាំងស្រុងក្រោមប្រព័ន្ធ GSP សាជាថ្មីទេ គឺមិនមែនតែកម្ពុជាទេ ដែលមិនបាន គឺប្រទេសជាង ៩០ផ្សេងទៀត ក៏មិនបានដូចគ្នា ដូច្នេះវាមិនបារម្ភសម្រាប់ការប្រកួតប្រជែងនោះទេ ដែលមានន័យថា ផលិតផលត្រូវបង់ពន្ធទាំងអស់គ្នា។

របាយការណ៍របស់ក្រសួងពាណិជ្ជកម្មសហរដ្ឋអាមេរិក បានបង្ហាញថា ក្នុងរយៈពេល ១១ខែ ឆ្នាំ ២០២០ ការនាំចេញរបស់កម្ពុជា ទៅសហរដ្ឋអាមេរិក មានតម្លៃទឹកប្រាក់សរុបប្រមាណ ៦០៥៧លានដុល្លារ ដែលមានកំណើន ២២,២១ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩។ ចំណែកការនាំចេញរបស់សហរដ្ឋអាមេរិក ត្រឡប់មកកម្ពុជាវិញ មានតម្លៃទឹកប្រាក់ ៣១២លានដុល្លារ បានធ្លាក់ចុះ ៣៥,៦៧ភាគរយ បើធៀបនឹងរយៈពេលដូចគ្នាកាលពីឆ្នាំមុន។ សម្រាប់ផលិតផលដែលកម្ពុជាធ្វើការនាំទៅកាន់ទីផ្សារអាមេរិករួមមាន សម្លៀកបំពាក់កាត់ដេរ ស្បែកជើង កាបូបធ្វើដំណើរ គ្រឿងអេឡិចត្រូនិក កង់ ផលិតផលកសិកម្ម សូឡា និងគ្រឿងសង្ហារឹម៕

គម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែក្នុងក្រុងសៀមរាបសម្រេចបានជាង១៧.៥ភាគរយ

ដោយ ៖ រ៉ាណេត
សៀមរាប ៖ គម្រោងសាងសង់ និងស្ថាបនាហេដ្ឋារចនាសម្ព័ន្ធផ្លូវថ្នល់៣៨ខ្សែនៅទូទាំងក្រុងសៀមរាប ខេត្តសៀមរាប សម្រេចបាន១៧.៥ភាគរយហើយ ដោយអាចនឹងបញ្ចប់ទៅតាមផែនការដែលបានគ្រោងទុកនៅត្រឹមដំណាច់ឆ្នាំ២០២១ខាងមុខនេះ។

សម្ដេចពិជ័យសេនា ទៀ បាញ់ ប្រធានគណៈកម្មការអន្តរក្រសួង រួមជាមួយជានឹងរដ្ឋមន្ត្រីក្រសួងពាក់ព័ន្ធ នៅព្រឹកថ្ងៃទី២៨ ខែមករា ឆ្នាំ២០២១នេះ បានចុះពិនិត្យគម្រោងស្ថាបនាផ្លូវ ក្នុងខេត្តសៀមរាប ដើម្បីប្រសិទ្ធិភាព និងទទួលបានគុណភាពតាមស្តង់ដារបច្ចេកទេសត្រឹមត្រូវ ដោយមានការចូលរួមពីគ្រប់ផ្នែកពាក់ព័ន្ធនៃគណៈកម្មការអន្តរក្រសួង ដែលជាលទ្ធផលនៃការសាងសង់សម្រេចបានប្រមាណ១៧.៥ភាគរយហើយ។

ការចុះត្រួតពិនិត្យការស្ថាបនាផ្លូវនេះធ្វើឡើងក្នុងគោលបំណងដើម្បីពិនិត្យគុណភាពនៃការសាងសង់ ជំរុញឱ្យអង្គភាពសាងសង់ អនុវត្តតាមលក្ខណៈបច្ចេកទេស សៀវភៅបន្ទុកឱ្យបានត្រឹមត្រូវ និងស្តង់ដារ ដែលអាចទទួលយកបាន ពោលគឺធ្វើផ្លូវឱ្យមានគុណភាពរឹងមាំ អាចប្រើប្រាស់ជាប់បានយូរអង្វែង និងបញ្ចប់តាមផែនការគ្រោងទុក។

គម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែក្នុងទីក្រុងសៀមរាប ខេត្តសៀមរាប ចំនួន៣៨ខ្សែនេះ មានប្រវែងសរុប១០៨,៧៤ គីឡូម៉ែត្រ គ្រោងប្រើប្រាស់ថវិកាជាតិសរុបប្រមាណជាង ១៤០ លានដុល្លារអាមេរិក និងថវិកាប្រមាណជាង៩លានដុល្លារអាមេរិកទៀត សម្រាប់ការងារចាំបាច់ ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ដែលនៅក្រៅគម្រោងសាងសង់ខ្សែផ្លូវទាំង៣៨នេះ ដោយប្រើប្រាស់រយៈពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១ ត្រូវបានសម្ពោធបើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលថ្មីៗកន្លងទៅ នេះ។

គម្រោងនេះ អនុវត្តដោយអង្គភាពសាងសង់ចំនួន០៨រួមមាន៖ ១) កងវិស្វកម្មលេខ១៧៨ស្ពាន-ថ្នល់នៃ នាយកដ្ឋានវិស្វកម្ម ២) កងវិស្វកម្មសម្តេចតេជោ ខេត្តសៀមរាប ៣) កងវិស្វកម្មតេជោ ហ៊ុន សែន សៀមរាប ៤) អគ្គនាយកដ្ឋានសាធារណការ ៥) អគ្គនាយកដ្ឋានប្រព័ន្ធចម្រោះទឹកកខ្វក់ ៦) នាយកដ្ឋានគ្រឿងចក្រ និងស្ថាបនាផ្លូវ ៧) នាយកដ្ឋានជួសជុល និងថែទាំផ្លូវថ្នល់ និង ៨) មន្ទីរសាធារណការ និងដឹកជញ្ជូនខេត្តសៀមរាប។

គម្រោងនេះមានការរៀបចំលើគ្រប់ទិដ្ឋភាព ក្នុងនោះរួមមាន៖ ប្រព័ន្ធលូទឹកកខ្វក់ លូទឹកភ្លៀង ចិញ្ចើមផ្លូវ ផ្លូវថ្មើរជើង ផ្លូវសម្រាប់ជនមានពិការភាព ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញា និងគំនូសចរាចរណ៍ ប្រព័ន្ធកាមេរ៉ាសុវត្ថិភាព អាងចម្រោះទឹកកខ្វក់ និងការធ្វើសួននិងដាំដើមឈើ។

ក្រៅពីស្ថាបនាហេដ្ឋារចនាសម្ព័ន្ធផ្លូវ ៣៨ខ្សែហើយនោះ ក៏នៅមានការស្ដារ កែលម្អធ្វើឱ្យប្រសើរឡើងដងស្ទឹងសៀមរាបប្រវែងជាង ៨គីឡូម៉ែត្រ អនុវត្តដោយអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន ដើម្បីលើកកម្ពស់សោភ័ណភាពបន្ថែមទៀត ឱ្យស័ក្កិសមជាទីក្រុងទេសចរណ៍ វប្បធម៌ ប្រវត្តិសាស្រ្ដ និងធម្មជាតិ ក៏ដូចជាដើម្បីជួយជំរុញដល់កំណើនសេដ្ឋកិច្ចជាតិផងដែរ៕

មន្រ្តីជាន់ខ្ពស់រដ្ឋាភិបានបង្ហាញសុទិដ្ឋិនិយមពីកំណើនសេដ្ឋកិច្ចកម្ពុជាល្អប្រសើរនៅឆ្នាំនេះ

ដោយ : ស៊ីវ ម៉េង

ភ្នំពេញៈ មន្រ្តីជាន់ខ្ពស់រដ្ឋាភិបាល បានបង្ហាញសុទិដ្ឋិនិយមអំពីកំនើនសេដ្ឋកិច្ចកម្ពុជានៅឆ្នាំនេះ ដែលអាចសម្រេចបានកំនើន៤ភាគរយ ឬអាចកើនឡើងខ្ពស់ជាងនេះ ដោយ​​សារការងើបឡើងវិស័យសំខាន់ៗមួយចំនួន។

រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោកវង្សី វិស្សុតបានមានប្រសាសន៍ក្នុងវេទិកាសាធារណៈ កាលពីថ្ងៃម្សិលម៉ិញនេះថា នៅឆ្នាំ២០២១នេះកម្ពុជាមានឳកាសទីផ្សារធំ ខុសពីឆ្នាំមុន ដោយសារយើងបានចុះហត្ថលេខា លើកិច្ចព្រមព្រៀងពាណិជ្ជកម្មសេរីជាមួយចិនរួចហើយ ដែលជាការបើកទីផ្សារមួយ​ធំណាស់ ដែលអ្នកវិនិយោគនឹងចូលមកច្រើន។

 

លោកបន្តថា “ជំងឺកូវីដ១៩យើងគ្រប់គ្រងបាន យើងមានស្ថេរភាពសង្គម ស្ថេរភាពសេដ្ឋកិច្ច យើងមានច្បាប់វិនិយោគថ្មី និងច្បាប់ភាពជាដៃគូរវាងវិស័យសាធារណៈ និងឯកជន និងការកែទម្រង់ដើម្បីបង្កើនភាពប្រកួតប្រជែង ដែលធ្វើឲ្យសេដ្ឋកិច្ចកម្ពុជាមានភាព​ល្អប្រសើរ”។ លោកបន្តថា “ជាមួយបរិការណ៍ខាងក្រៅ ដែលយើងមានកិច្ចព្រមព្រៀងពាណិជ្ជកម្មសេរីជាមួយចិន និងពេលខាងមុខយើងនឹងមានFTAជាមួយកូរ៉េ ដែលយើងនឹងមានផលល្អជាមួយកូរ៉េ មិនខុសពីចិនទេ”។

លោកវង្សី វិស្សុតបានបន្តថា កម្ពុជាយើងបានចុះកិច្ចព្រមព្រៀមRCEP ដែលរំពឹងប្រទេសទាំងអស់នឹងផ្តល់សច្ចាប័ណ្ណ ហើ​យយើងនឹងទទួលបន្តEBA ពីចក្រភពអង់គ្លេស និងទីផ្សារអាមេរិកងើបឡើងវិញលឿន ដោយសាររដ្ឋាភិបាលអាមេរិក បញ្ចេញកញ្ចប់ថវិកាសង្រ្គោះសេដ្ឋកិច្ចជិត២ទ្រីលាន​ដុល្លារ។

លោកបន្តថា “ខ្ញុំមើលឃើញថាបរិការណ៍នេះ សេដ្ឋកិច្ចកម្ពុជាអាចកើនឡើងខ្ពស់ហើយបើយើងអាច​ចាក់វ៉ាក់សាំងបានលឿន គឺយើងអាចសម្រេចបានកំនើនសេដ្ឋកិច្ចខ្ពស់ជាង៤ភាគរយ៕

ប្រា​សាក់ ផ្តល់​សេវា​ទូទាត់​វិក្កយបត្រ​ថ្លៃ​ប្រមូល​សំរាម​និង​សំណល់​រឹង

ដោយ ស្រី​នាង

ភ្នំពេញ៖ ប្រា​សាក់ ដែលជា​គ្រឹះស្ថាន​ហិរញ្ញវត្ថុ​ធំជាងគេ​នៅ​កម្ពុជា បាន​សហការ​ជាមួយ​រដ្ឋាករ​ស្វយ័ត​គ្រប់គ្រង​សំរាម​និង​សំណល់​រឹង​រាជធានី​ភ្នំពេញ ដើម្បី​ផ្តល់នូវ​សេវា​ទូទាត់​វិក្កយបត្រ​ថ្លៃ​ប្រមូល​សំរាម​និង​សំណល់​រឹង​ប្រកបដោយ​ភាពងាយស្រួល ដែលជា​ផ្នែក​មួយ​នៃ​ការពង្រីក​សេវា​របស់ខ្លួន​ជូន​ដល់​អតិថិជន បន្ថែម​ពីលើ​សេវា​ទូទាត់​វិក្កយបត្រ​អគ្គិសនី វិក្កយបត្រ​ទឹក វិក្កយបត្រ​សិក្សា​សាលារៀន​វ៉េ​ស្ទ​ឡា​ញន៍ និង​សាលារៀន​ណ​ត្ស​ឡា​ញន៍។

អតិថិជន​ប្រា​សាក់​ទាំងអស់ នឹង​អាច​ទូទាត់​ថ្លៃ​សេវា​ប្រមូល​សំរាម​តាមរយៈ សេវា​ធនាគារ​ចល័ត និង​អេ​ធី​អឹម​ប្រា​សាក់ បាន​យ៉ាង​ងាយស្រួល លឿន​រហ័ស និង​សុវត្ថិភាព ដោយ​ចំណាយ​កម្រៃ​សេវា​ត្រឹមតែ 500 រៀល ឬ 0.12 ដុល្លារ​អាមេរិក ក្នុង​មួយ​ប្រតិបត្តិការ។

លោក សាយ សូ​នី នាយក​ប្រតិបត្តិ​នៃ​គ្រឹះស្ថាន​មីក្រូហិរញ្ញវត្ថុ​ប្រា​សាក់ បាន​មានប្រសាសន៍ថា «ប្រា​សាក់ មាន​សេចក្តី​រីករាយ​ក្នុងការ​សហការ​ជាមួយ រដ្ឋាករ​ស្វយ័ត​គ្រប់គ្រង​សំរាម​និង​សំណល់​រឹង​រាជធានី​ភ្នំពេញ ក្នុងការ​នាំយក​នូវ​សេវា​ទូទាត់​វិក្កយបត្រ​ថ្លៃ​ប្រមូល​សំរាម​យ៉ាង​ងាយស្រួល​ជូន​អតិថិជន។ ការបង់ថ្លៃ​ប្រមូល​សំរាម មាន​សារៈសំខាន់​មិនអាច​ខ្វះ​បាន ដើម្បី​ចូលរួម​ធ្វើឱ្យ​រាជធានី​ភ្នំពេញ​ស្អាត និង​មាន​អនាម័យ។ ហើយ​ជាមួយនឹង​ការផ្តួចផ្តើម​ដើម្បី​ផ្ដល់​មធ្យោបាយ​ងាយស្រួល​នេះ​ក្នុងការ​ទូទាត់​ថ្លៃ​សេវា​ប្រមូល​សំរាម​នេះ ប្រជាជន​រស់នៅក្នុង​រាជធានី​ភ្នំពេញ លែងមាន​កង្វល់​ក្នុង​ចិត្ត​ទៀតហើយ ដោយ​ពួកគាត់​អាចបំពេញ​កាតព្វកិច្ច​នោះ​ដោយ​គ្មាន​ការខកខាន»។

លោក សូ​នី បាន​បន្ថែមទៀតថា «ជាមួយនឹង​សេវា​ធនាគារ​ចល័ត​ប្រា​សាក់ និង​ម៉ាស៊ីន​អេ​ធី​អឹម​ជាច្រើន​ដែល​មាននៅ​ជិត​អតិថិជន​ប្រា​សាក់ ពួកគាត់​អាច​ទូទាត់​ថ្លៃ​ប្រមូល​សំរាម​យ៉ាង​លឿន​រហ័ស ងាយស្រួល និង​សុវត្ថិភាព ដោយ​អាច​បង់​ជា​រៀងរាល់ខែ ឬ ប្រចាំឆ្នាំ​តែម្ដង» ។

លោក​បាន​បន្តទៀតថា «សូម​អតិថិជន​បើក​គណនី​សន្សំ​នៅ​ប្រា​សាក់​នៅថ្ងៃនេះ ដើម្បី​ទទួលបាន​ប័ណ្ណ​អេ​ធី​អឹម​ដ៏​ស្រស់ស្អាតភ្លាមៗ និង​រីករាយ​ជាមួយ​ការប្រើ​សេវា​ធនាគារ​ចល័ត​ប្រា​សាក់ ដើម្បី​ទូទាត់​វិក្កយបត្រ​នានា​បាន​យ៉ាង​ងាយស្រួល» ។

សូមបញ្ជាក់ថា ប្រា​សាក់ ជា​គ្រឹះស្ថាន​ហិរញ្ញវត្ថុ​មួយ​ក្នុងចំណោម​ធនាគារធំៗទាំង 5 នៅ​កម្ពុជា។ ប្រា​សាក់ ផ្ដល់​សេវា​ហិរញ្ញវត្ថុ​ច្រើន​សម្បូរបែប​ជូន​អតិថិជន ដូចជា៖ ទូទាត់​វិក្កយបត្រ​ថ្លៃ​ប្រមូល​សំរាម​និង​សំណល់​រឹង សេវា​ឥណទាន សេវា​ប្រាក់​បញ្ញើ​សន្សំ សេវា​ទូទាត់​វិក្កយបត្រ​ទឹក ទូទាត់​វិក្កយបត្រ​ភ្លើង ផ្ទេរប្រាក់​ឆ្លង​ធនាគារ​តាម​ប្រព័ន្ធ​បាគង និង រី​ធែ​ល​ផេ (Retail Pay) ផ្ទេរប្រាក់​រវាង​គណនី​ទៅ​គណនី​នៅក្នុង​ប្រា​សាក់ ផ្ទេរប្រាក់​តាម​លេខ​សម្ងាត់ ឬ ដក​ប្រាក់​ពី​អេ​ធី​អឹម​ប្រា​សាក់​ទោះ​គ្មាន​ប័ណ្ណ​អេ​ធី​អឹម ប្តូរប្រាក់ ទិញ​កាត​ទូរស័ព្ទ សេវា​បញ្ជាក់​សមតុល្យ​គណនី សេវា​បើកប្រាក់​បៀវត្ស សេវា​ទូទាត់​រហ័ស ម៉ាស៊ីន​អេ​ធី​អឹម ម៉ាស៊ីន​ដាក់​ប្រាក់ ប្រា​សាក់​ម៉ូ​បាល​ប៊ែ​ង​ឃី​ង (PRASAC Mobile Banking) ប្រា​សាក់​អ៊ី​ន​ធឺ​ណែ​ត​ប៊ែ​ង​ឃី​ង (PRASAC Internet Banking) ម៉ាស៊ីន​ឆូត​កាត សេវា​ខេ​ម​បូ​ឌា​ន​ស៊ែរ​ស្វ៊ី​ច (CSS) ឬ សេវា​ដែល​អាចឱ្យ​អតិថិជន​ធនាគារ​ផ្សេង​អាច​ដក​ប្រាក់​តាម​ម៉ាស៊ីន​អេ​ធី​អឹម​ប្រា​សាក់​បាន និង​សេវាផ្សេងៗទៀត ជាមួយនឹង​បណ្តាញ​ការិយាល័យ​ជិត 200 ទីតាំង ព្រមទាំង​បុគ្គលិក​រង់ចាំ​បម្រើសេវា​ចំនួន 10,000 នាក់៕

ក្រុមហ៊ុនធំមួយរបស់សិង្ហបុរីបានប្រកាសពីគម្រោងវិនិយោគលើការគ្រប់គ្រងកាកសំណល់នៅកម្ពុជា

ដោយៈប៊ី

ភ្នំពេញៈ ក្រុមហ៊ុនគ្រប់គ្រងកាកសំណល់ 800 Super ដែលមានមូលដ្ឋាននៅសិង្ហបុរី បានប្រកាសឈានជើងចូលមកវិនិយោគក្នុងការគ្រប់គ្រងកាកសំណល់រ៉ឹងនៅកម្ពុជាដោយជោគជ័យ។ នេះបើយោងតាមការចេញផ្សាយរបស់សារព័ត៌មានសិង្ហបុរី Business Times នៅយប់ថ្ងៃទី២៧ ខែមករា ឆ្នាំ២០២១។

ក្រុមហ៊ុនសិង្ហបុរី ជាមួយដៃគូបានវិនិយោគរួមគ្នា ក្រុមហ៊ុន GAEA Waste Managementនៅកម្ពុជា ដែលទទួលបានកិច្ចសន្យារយៈពេល១០ឆ្នាំ សម្រាប់ការប្រមូលសំរាម និងការដឹកជញ្ជូនសំរាមសម្រាប់តំបន់មួយក្នុងចំណោមតំបន់ទាំង៣ ក្នុងរាជធានីភ្នំពេញ។

ការបណ្តាក់ទុនរួមគ្នា នឹងទទួលខុសត្រូវក្នុងការប្រមូល និងដឹកជញ្ជូនកាកសំណល់រឹងពីអនុតំបន់ចំនួន៥ ក្នុង Zone1  នៃទីក្រុងទៅកាន់ស្ថានីយ៍ផ្ទេរ ហើយបន្ទាប់មកទៅកន្លែ​ងចាក់សំរាមក្នុងតំបន់ ដែលស្ថិតនៅរវាងរាជធានីភ្នំពេញ និងខេត្តជុំវិញ។

បរិមាណសំរាមដែលបានប៉ាន់ប្រមាណ មានប្រហែល១.០៤០តោន ក្នុងមួយថ្ងៃ កាលពីឆ្នាំមុន ត្រូវបានព្យាករថា នឹងកើនឡើងដល់ប្រហែល២.៧០០តោន ក្នុងមួយថ្ងៃនៅឆ្នាំ២០៣០ នៅពេលទីក្រុងនេះរីកចម្រើនកាន់តែខ្លាំង។

ក្រុមហ៊ុន 800 Super  គ្រោងដាក់ចេញបច្ចេកវិទ្យាជាច្រើន ដើម្បីគាំទ្រដល់តម្រូវការរយៈពេលវែង នៃទីក្រុងដែលកំពុងរីកចម្រើនរបស់ប្រទេសកម្ពុជា។ ជាដំបូង ក្រុមហ៊ុនគ្រប់គ្រងកាកសំណល់នេះ នឹងដាក់ចេញប្រព័ន្ធគ្រប់គ្រងGPS ដែលកំពុងត្រូវបានប្រើប្រា​ស់នៅក្នុងប្រទេសសិង្ហបុរី ដើម្បីតាមដាន និងគ្រប់គ្រងការងារ ក៏ដូចជាពង្រឹងសុវត្ថិភាពកម្មកររបស់ខ្លួននៅភ្នំពេញ។

ក្រុមហ៊ុន 800 Super មានការគាំទ្រពី Enterprise Singapore (ESG) បានបញ្ចូលបច្ចេកវិទ្យាជាច្រើន នៅក្នុងប្រតិបត្តិការរបស់ខ្លួននៅសិង្ហបុរី ដើម្បីបង្កើនផលិតភា​ព និងបង្កើនប្រសិទ្ធភាព។

លោក William Lee នាយកប្រតិបត្តិក្រុមហ៊ុន ៨០០ Super បានមានប្រសាសន៍ថា “ការបណ្តាក់ទុនរួមគ្នារវាងក្រុមហ៊ុន800Super និងក្រុមហ៊ុនGAEA (800 Super-GAEA) នឹងនាំមកនូវបទពិសោធន៍ និងជំនាញរួមរបស់យើង ក្នុងការធ្វើការជាមួយរដ្ឋបាលរាជធានីភ្នំពេញ ដើម្បីលើកកម្ពស់ភាពស្អាត និងការរស់នៅក្នុងរាជធានីភ្នំពេញ”។លោកបន្តថា “យើងក៏នឹងបន្តស្វែងរកឱកាសថ្មីៗ នៅក្នុងប្រទេសកម្ពុជា ដែលជាទីផ្សារដ៏សំខាន់បំផុត នៅក្នុងយុទ្ធសាស្ត្រកំណើនរបស់យើង”។

រដ្ឋបាលរាជធានីភ្នំពេញ បានជ្រើសរើសយកក្រុមហ៊ុន បណ្តាក់ទុនរួម 800 Super-GAEA ក្នុងចំណោមក្រុមហ៊ុនចំនួន២០ ដែលបានចូលរួមក្នុងដេញថ្លៃ ដែលបានធ្វើឡើង កាលពីខែមីនា ឆ្នាំមុន។

ក្រុមហ៊ុន ESG ទីភ្នាក់ងារបរិស្ថានជាតិ និងហេដ្ឋារចនាសម្ព័ន្ធអាស៊ីសិង្ហបុរី បានធ្វើការរួមគ្នា ដើម្បីចែករំលែកបទពិសោធន៍ នៃការគ្រប់គ្រងសំណល់រឹងនៅសិង្ហបុរី និងការអនុវត្តល្អបំផុត ដើម្បីធានាការគ្រប់គ្រងសំរាម ប្រកបដោយនិរន្តរភាព ជាមួយអាជ្ញាធរកម្ពុជា។

លោក Ng Chun Pin អនុប្រធាននាយកប្រតិបត្តិគម្រោងផែនការសាជីវកម្ម និងបច្ចេកវិទ្យានៃទីភ្នាក់ងារបរិស្ថានជាតិ បានមានប្រសាសន៍ថា “នេះគឺជាព្រឹត្តិការណ៍សំខាន់មួយ សម្រាប់វិស័យសេវាកម្មបរិស្ថាន របស់ប្រទេសសិង្ហបុរី និងជាការបញ្ជាក់យ៉ាងមុតមាំនៃ កិច្ចសហប្រតិបត្តិការយ៉ាងជិតស្និទ្ធរវាងទីភ្នាក់ងារ ដើម្បីជួយក្រុមហ៊ុនរបស់យើង ធ្វើអន្តរជាតូបនីយកម្ម”។

លោកបានបន្ថែមទៀតថា ការបណ្តាក់ទុនរួមនេះ គឺជាការបញ្ជាក់ពីសមត្ថភាព និងការប្រើប្រាស់ នៃវិស័យបរិស្ថានក្នុងស្រុករបស់សិង្ហបុរី ដែលអាចនាំមកនូវគុណតម្លៃ មិនត្រឹមតែតាមរយៈជំនាញ និងបទពិសោធន៍ ប៉ុណ្ណោះទេ ប៉ុន្តែថែមទាំងការរួមបញ្ចូលបច្ចេកវិទ្យានិ ងការច្នៃប្រឌិត ដើម្បីធ្វើឱ្យសេវាកម្មរបស់ខ្លួន ឲ្យកាន់តែមានផលិតភាព និងប្រសិទ្ធភាព៕

ក្រុមហ៊ុនរុស្សុី កំពុងសិក្សាពីឱកាសវិនិយោគ និងការបង្កើតរោងចក្រចម្រាញ់ប្រេងកាតនៅកម្ពុជា

ដោយ ៖ រ៉ាណេត
ភ្នំពេញ ៖ ក្រុមហ៊ុនរុស្សុីដែលកំពុងមានដំណើរការយ៉ាងសកម្មនៅក្នុងប្រទេសរបស់ខ្លួន បាន និងកំពុងស្វែងយល់ពីសក្ដានុពល និងឱកាសនៃការវិនិយោគនៅក្នុងវិស័យថាមពល ជាពិសេសវិស័យប្រេង និងឧស្ម័ន រួមានការរុករក ការអភិវឌ្ឍបច្ចេកវិទ្យា និងការបង្កើតរោងចក្រចម្រាញ់ប្រេងកាតផងដែរ។

ឯកអគ្គរដ្ឋទូតប្រទេសរុស្សុីប្រចាំនៅកម្ពុជា លោកAnatoly BOROVIK បានមានប្រសាសន៍នៅរសៀលថ្ងៃទី២៧ ខែមករា ឆ្នាំ២០២១ថា ខណៈដែលប្រទេសកម្ពុជាកំពុងមានការអភិវឌ្ឍន៍ និងមានសក្ដានុពលនៅក្នុងវិស័យផ្សេងៗជាច្រើន ជាពិសេសវិស័យងថាមពលនោះ បច្ចុប្បន្នមានក្រុមហ៊ុនរុស្សុីមួយចំនួន បាន និងកំពុងព្យាយាមសិក្សា និងស្វែងយល់ពីឱកាសក្នុងការវិនិយោគនៅកម្ពុជា ជាពិសេសទៅលើវិស័យថាមពល។

លោកបញ្ជាក់ថា “ក្រុមហ៊ុនរុស្សុី តាមរយៈស្ថានទូតរុស្សុីដែលប្រចាំការនៅកម្ពុជាកំពុងស្វែងយល់ពីសក្តានុពល និងឱកាសនៃការវិនិយោគរបស់ក្រុមហ៊ុនរុស្សី ក្នុងវិស័យប្រេង និងឧស្ម័ន រួមមាន ការស្វែងរុករក ការអភិវឌ្ឍបច្ចេកវិទ្យា និងការបង្កើតរោងចក្រចម្រាញ់ប្រេងកាត និងចង់វិនិយោគលើវិស័យថាមពលកកើតឡើងវិញ រួមមាន ថាមពលដើរដោយខ្យល់ និងថាមពលដើរដោយពន្លឺព្រះអាទិត្យ”។

ក្រៅពីគោលបំណងនៃវិស័យឯកជន រដ្ឋាភិបាលនៃប្រទេសរុស្សុីក៏មានបំណងបង្កើនកិច្ចសហប្រតិបត្តិការភូគព្ភសាស្ត្រ និងការអភិវឌ្ឍធនធានរ៉ែ រវាងក្រសួងរ៉ែ និងថាមពលកម្ពុជា និងក្រសួងធនធានធម្មជាតិ និងបរិស្ថានរុស្សី រួមជាមួយនឹងគម្រោងកិច្ចសហប្រតិបត្តិការក្នុងការប្រើប្រាស់ថាមពលបរមាណូសម្រាប់បម្រើឱ្យគោលបំណងសន្តិភាព, ការផ្តល់អាហារូបករណ៍ និងគម្រោងកសាងសមត្ថភាពសម្រាប់មន្ត្រី និងសិស្សនិសិ្សតកម្ពុជា ក្នុងវិស័យថាមពល ប្រេងនិងឧស្ម័នផងដែរ។

យោងតាមស្ថិតិពីក្រសួងពាណិជ្ជកម្ម គិតចាប់ពីខែមករា ដល់ខែតុលាឆ្នាំ២០២០ ប្រទេសកម្ពុជាបាននាំចេញទំនិញ ដែលមានតម្លៃជាង ៣៨,៧៥លានដុល្លារទៅកាន់ប្រទេសរុស្ស៊ី ពោលគឺធ្លាក់ចុះ ៤,៨ភាគរយ បើធ្វើការប្រៀបធៀបទៅនឹងរយៈពេលដូចគ្នាកាលពីឆ្នាំមុន។ ទោះជាយ៉ាងណា ការនាំចូលទំនិញពីប្រទេសរុស្ស៊ីវិញ បានកើនឡើងក្នុងរយៈពេលនេះ ដល់ ៦,៤លានដុល្លារ ពោលគឺកើនឡើងពី ២,៥លានដុល្លារអាមេរិក បើប្រៀបធៀបទៅនឹងរយៈពេលដូចគ្នា កាលពីឆ្នាំ២០១៩ ដែលកើនឡើងជាង ១៥៥ភាគរយ។

ការនាំចេញរបស់កម្ពុជាទៅទីផ្សាររុស្ស៊ី ធ្លាក់ចុះនៅក្នុងអំឡុង១០ខែឆ្នាំ ២០២០។ ការនាំចេញរបស់កម្ពុជា ទៅកាន់ប្រទេសរុស្ស៊ីភាគច្រើន មានដូចជា សម្លៀកបំពាក់ ស្បែកជើង និងទំនិញធ្វើដំណើរ។ ទោះជាយ៉ាងណា តម្រូវការសម្រាប់ផលិតផលទាំងនេះ បានធ្លាក់ចុះដោយសារតែផ្សារទំនើបនៅប្រទេសរុស្ស៊ី ត្រូវបានបិទដោយអនុញ្ញាតឲ្យមានតែទីតាំងលក់ម្ហូបអាហារប៉ុណ្ណោះ៕

រដ្ឋាភិបាលដាក់យុទ្ធសាស្ត្រចំនួន៣ធំៗដើម្បីជំរុញសេដ្ឋកិច្ចឱ្យងើបឡើងវិញជាមួយភាពធន់នឹងវិបត្តិ

ដោយ៖ ប៊ី
ភ្នំពេញ៖ រដ្ឋាភិបាលបានត្រៀមដាក់យុទ្ធសាស្ត្រធំៗចំនួន៣ ដើម្បីជួយជំរុញសេដ្ឋកិច្ចឱ្យងើបឡើងវិញជាមួយជានឹងភាពធន់នៃសេដ្ឋកិច្ចចំពោះវិបត្តិសេដ្ឋកិច្ច ដែលកើតឡើងនាអនាគត។

លោកវង្សី វិស្សុតរដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២៧ ខែមករា ឆ្នាំ២០២១នេះបានថ្លែងក្នុងវេទិកាសាធារណៈស្តីពីគ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ថា រដ្ឋាភិបាលត្រៀមដាក់យុទ្ធសាស្ត្រចំនួន៣ធំៗ ដើម្បីធ្វើឱ្យមានភាពធន់នៃសេដ្ឋកិច្ចចំពោះវិបត្តិដែលនឹងអាចកើតឡើងបន្តទៀតនៅពេលខាងមុខ។

យុទ្ធសាស្ត្រចំនួន៣ធំៗមានដូចខាងក្រោម៖ យុទ្ធសាស្ត្រ (Survival) ទី១ ប្រយុទ្ធប្រឆាំងនឹងកូវីដ១៩ ដើម្បីការពារអាយុជីវិតរបស់ប្រជាជន ដែលជាការអាទិភាព។ ទី២ ការងារប្រជាជន ដែលរងផលប៉ះពាល់ជាសេដ្ឋកិច្ចសង្គម ដែលនឹងបន្តអន្តរគមន៍ជាជំនួយសង្គម ជាការបង្កើតការងារបន្តទៀតជូនប្រជាជន។ ទី៣ ជួយឱ្យសេដ្ឋកិច្ច និងធុរកិច្ច ដែលជួបផលលំបាកអាចរស់បាន ប៉ុន្តែធុរកិច្ចមិនមែនទាំងអស់នោះទេ ពោលគឺរដ្ឋាភិបាលជួយធុរកិច្ចណាដែលមានសក្តានុពល ហើយអាចរីកលួតលាស់ល្អនាអនាគត។ ការបែងចែកធនធាននេះក៏ត្រូវធ្វើទៅលើអ្វីដែលអាចរកបាន និងអ្វីដែលមានក្នុងដៃ ត្រូវតែប្រើប្រាស់មិនមែនក្នុងឆ្នាំនោះទេ ហើយត្រូវប្រើឱ្យឆ្លងដល់ឆ្នាំ២០២៣ ដោយប្រើឱ្យសមស្រប និងត្រូវទិសដៅ។

លោកថា យុទ្ធសាស្ត្រទី២ ការកែទំរង់ (Reform) គឺការរៀបចំខ្លួនមួយ និងជាការបន្តរៀបចំខ្លួនឱ្យខ្លាំងក្នុងការកែទម្រង់រចនាសម្ព័ន្ធក្នុងគោលដៅធ្វើឱ្យសេដ្ឋកិច្ចរបស់យើង មានការធ្វើពិពិធកម្មជាងមុន និងឱ្យមានភាពប្រកួតប្រជែងខ្លាំងជាងមុន។ យើងមិនអាចពឹងតែលើវិស័យមួយៗបាននោះទេ ព្រោះបច្ចុប្បន្ន ប្រទេស ដែលមានសេដ្ឋកិច្ចងើបលឿនជាងគេ គឺប្រទេសឧស្សាហកម្ម និងកសិកម្ម តែប្រទេសពឹងផ្អែកលើសេវាកម្ម ងើបឡើងយឺតជាងគេ។ យើងត្រូវរៀនសូត្រពីវិបត្តិ ដើម្បីពង្រឹងមូលដ្ឋានសេដ្ឋកិច្ចរបស់យើង ឱ្យកាន់តែមានពិពិធកម្ម តាមរយៈកែទំរង់បរិកាកាសរកស៊ី និងកិច្ចសម្រួលពាណិជ្ជកម្ម ហើយនឹងត្រូវដោះស្រាយបញ្ហាប្រឈម ដើម្បីធ្វើឱ្យបរិយាកាសធុរកិច្ចរបស់យើង កាន់តែល្អ និងទាក់ទាញ សម្រាប់អ្នកវិនិយោគ និងអ្នករកស៊ី ក្នុងគោលដៅបង្កើនភាពប្រកួតប្រជែង ក្នុងនោះមួយដែរ ការធ្វើឌីជីថលនីយកម្ម ទាំងរដ្ឋភិបាល និងធុរកិច្ច ដែលយើងរៀបចំនាពេលខាងមុខ។

លោកវង្សី វិស្សុតបានបន្តថា យុទ្ធសាស្ត្រទី៣ ភាពធន់នឹងវិបត្តិសេដ្ឋកិច្ច (Resilience) ប្រទេសរបស់យើងនៅថ្ងៃក្រោយទៅ ខណៈវិបត្តិសេដ្ឋកិច្ចកើតឡើង១០ឆ្នាំៗម្តង ហើយវិបត្តិ ដូចជាវិបត្តិជំងឺកូវីដ១៩ វាអាចឡើងក្នុងរយៈពេល៥ឆ្នាំម្តង ឬ១០ម្តង ដែលយើងមិនអាចដឹងមុនបាន និងការប្រែប្រួលអាកាសធាតុ ក៏ពិបាកក្នុងការដឹងមុន ដូច្នេះយើងត្រូវធ្វើឱ្យមានភាពធន់នៃសេដ្ឋកិច្ចរបស់យើង។ ភាពធននៃសេដ្ឋកិច្ចមានដូចជា ទី១ វិស័យសាធារណៈគឺកន្លែងមួយ ដែលចាប់ផ្តើមឡើងមុនគេបង្អស់។ ក្នុងលំបាក និងវិបត្តិ គឺរដ្ឋ ដែលជាអ្នកដឹកមុខ និងអ្នកដោះស្រាយបញ្ហា ហើយយើងបានគិតគូរពីបញ្ហានេះ យូរណាស់មកហើយ ហើយវិស័យរដ្ឋ គឺជាគន្លឹះមួយធ្វើឱ្យមានភាពខ្លាំងជាងគេ ឆ្លាតវៃជាង និងស្អាតស្អំជាងមុន៕

ស្ថានីយផលិតអគ្គិសនីដើរដោយពន្លឺព្រះអាទិត្យនៅភ្នំគូលែនត្រូវបានដាក់ឱ្យដំណើរការ

ដោយ ៖ រ៉ាណេត

សៀមរាប ៖ ស្ថានីយផលិតអគ្គិសនីដើរដោយថាមពលពន្លឺព្រះអាទិត្យកម្លាំង៣២គីឡូវ៉ាត់ ជាមួយប្រព័ន្ធផ្ទុកថាមពល(អាគុយ)៨៧គីឡូវ៉ាត់ម៉ោង នៅមជ្ឈមណ្ឌលស្រាវជ្រាវ និងអភិរក្សកេសរកូល សុខ អានភ្នំគូលែន ខេត្តសៀមរាបត្រូវបានដាក់ឱ្យដំណើរការសម្រាប់ផ្គត់ផ្គង់ការប្រើប្រាស់នៅក្នុងតំបន់។

លោកង៉ាន់ ភិរុណ អភិបាលរងនៃគណៈអភិបាលខេត្តសៀមរាប បានមានប្រសាសន៍នៅថ្ងៃទី២៧ ខែមករា ឆ្នាំ២០២១ថា សមិទ្ធផលថ្មីសម្រាប់ខេត្តសៀមរាប ដែលជាខេត្តគោលដៅទេសចរណ៍ វប្បធម៌ និងធម្មជាតិ ដូចនេះការប្រើប្រាស់ថាមពលស្អាត មិនប៉ះពាល់ដល់បរិស្ថាន គឺជាចំណុចចាប់ផ្ដើមគំរូដល់រមណីយដ្ឋានដទៃនៅក្នុងខេត្តសៀមរាប ក៏ដូចជាខេត្តដទៃទៀត ដែលមិនមានបណ្ដាញអគ្គិសនីជាតិ។

លោកបន្តថា ស្ថានីយផលិតថាមពលពីពន្លឺព្រះអាទិត្យនេះ គឺជាមជ្ឈមណ្ឌលទី១ នៅក្នុងប្រទេសកម្ពុជា ដែលបាន និងកំពុងដើរតួនាទីយ៉ាងសំខាន់ក្នុងការពង្រឹងការចូលរួមដល់មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ធ្វើការកំណត់អត្តសញ្ញាណ និងរក្សានូវពូជកេសរកូលព្រៃ រុក្ខជាតិ និងសត្វក្នុងស្រុក ជាពិសេសប្រភេទដែលកំពុងរងគ្រោះថ្នាក់ ប្រភេទកម្រ និងប្រភេទជិតផុតពូជ សំដៅធានាដល់និរន្តរភាពនៃធនធានជីវចម្រុះសម្រាប់ការអភិវឌ្ឍសេដ្ឋកិច្ច សង្គម និងវប្បធម៌នៃព្រះរាជាណាចក្រកម្ពុជា។

រដ្ឋមន្ត្រីក្រសួងបរិស្ថាន លោកសាយ សំអាល់ បានមានប្រសាសន៍ថា សមិទ្ធផលមួួនេះនេះ គឺជាការបោះជំហានថ្មីមួយបន្ថែមទៀត សម្រាប់ការរៀបចំហេដ្ឋារចនាសម្ព័ន្ធគាំទ្រដទៃទៀតនាពេលអនាគត សំដៅអភិវឌ្ឍន៍មជ្ឈមណ្ឌលនេះឱ្យដើរតួនាទីជាមូលដ្ឋាននៃកិច្ចសហប្រតិបត្តិការ ការសិក្សាស្រាវជ្រាវលក្ខណៈវិទ្យាសាស្រ្ត ការផ្លាស់ប្តូរចំណេះដឹង និងបច្ចេកវិទ្យា ការលើកកម្ពស់ការយល់ដឹងអំពីសារៈប្រយោជន៍នៃធនធានជីវចម្រុះ និងប្រព័ន្ធអេកូឡូស៊ី ការអភិវឌ្ឍដោយនិរន្តរភាព និងការរស់នៅដោយចីរភាពនៅកម្ពុជា។

លោកបញ្ជាក់ថា មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន នឹងរួមចំណែកធ្វើពិពិធកម្មសេដ្ឋកិច្ចមូលដ្ឋាន ជាពិសេសទេសចរណ៍ផ្សាភ្ជាប់នឹងវប្បធម៌-ធម្មជាតិ និងជួយបង្កើនជម្រើសមុខរបរ ប្រភពចំណូលបន្ថែម និងលើកកម្ពស់ជីវភាពរបស់ប្រជាពលរដ្ឋ ក្នុងមូលដ្ឋាននេះបានមួយកម្រិតបន្ថែមទៀត ស្របតាមគោលនយោបាយរបស់រាជរដ្ឋាភិបាលកម្ពុជា។

ប្រព័ន្ធស្ថានីយផលិតថាមពលអគ្គិសនី ដើរដោយថាមពលពន្លឺព្រះអាទិត្យនេះ អាចផលិតថាមពលបានក្នុងរង្វង់ ១៥០គីឡូវ៉ាត់ម៉ោងក្នុងមួយថ្ងៃ។ ប្រព័ន្ធអគ្គិសនីនេះបានផ្តល់ប្រយោជន៍ដល់ការប្រើប្រាស់ម៉ាស៊ីនត្រជាក់ ឬម៉ាស៊ីនបូមទឹកបានរៀងរាល់ថ្ងៃ និងសម្រាប់បំពេញតម្រូវការប្រើប្រាស់ចាំបាច់ប្រចាំថ្ងៃរបស់ស្ថានីយស្រាវជ្រាវ៕

វិស័យ​អាកាសចរណ៍​កម្ពុជា​នៅ​បន្ត​ជួប​ភាព​ខ្មៅ​ងងឹត ខណៈ​អឺរ៉ុប​កំពុង​តស៊ូ​មតិ​ជាមួយ​WHO ដើម្បី​ឲ្យ​អ្នក​ចាក់​វ៉ាក់សាំង​អាចធ្វើ​ដំណើរ​បាន

ដោយ​គង់ សូរិយា

ភ្នំពេញៈ វិស័យ​អាកាសចរណ៍​កម្ពុជា និង​ពិភពលោក​កំពុង​ជួប​ភាព​ខ្មៅ​ងងឹត ខណៈ​ការរំពឹង​លើ​វិស័យនេះ នឹងមាន​ភាពប្រសើរឡើង​វិញ​នៅ​ឆ្នាំ២០២៣ ឬ២០២៤ ហាក់ដូចជា​អស់សង្ឃឹម។

អនុរដ្ឋលេខាធិការ នៃ​រដ្ឋលេខាធិការដ្ឋាន​អាកាសចរណ៍​ស៊ីវិល លោក​ស៊ិន ចាន់​សិរី​វុត្ថា បាន​មានប្រសាសន៍​ឲ្យ​ដឹង​តាម​ទូរស័ព្ទ​នា​រសៀល​ថ្ងៃទី២៧ មករា​នេះ​ថា ស្ថានភាព​នៃ​ការ​ងើបឡើង​វិញ របស់​វិស័យ​អាកាសចរណ៍​អាច​យឺត​ជាង​ការព្យាករណ៍ ព្រោះ​ប្រ​សិ​ទ្ឋ​ភាព​វាំង​សាំង​ប្រឆាំង​មេរោគ​កូ​វីដ១៩ មិនទាន់មាន​ភាពប្រាក​ដ​ប្រជា ខណៈ​ការរីក​រាលដាល​ជំងឺ​នេះ​នៅតែ​ធ្ងន់ធ្ងរ​ក្នុង​ពិភពលោក។

លោក​បន្តថា “ទោះជា​យ៉ាងណា​សហគមន៍​អឺរ៉ុប កំពុងត​ស៊ី​មតិ​ជាមួយ​អង្គការ​សុខភាព​ពិភពលោក (WHO) ដើម្បី​ឲ្យ​អ្នក​បាន​ចាក់​វ៉ាក់សាំង​រួច​អាចធ្វើ​ដំណើរ​បាន ប៉ុន្តែ WHO បាន​បដិសេធ” ។ លោក​បន្តថា “ប្រសិនជា​អឺរ៉ុប អាច​ទទួលបាន​ការយ​ល់​ព្រម​ពី​អង្គការ​សុខភាព​ពិភពលោក គឺ​តំបន់​អាស៊ាន​ក៏​អាចអនុវត្ត​ន៍​បាន​ដូចគ្នា ប៉ុន្តែ​វា​ត្រូវការ​ពេលវេលា” ។

លោក​ស៊ិន ចាន់​សិរី​វុត្ថា បាន​បន្តទៀតថា បច្ចុប្បន្ន​រដ្ឋាភិបាល​ក​ម្ពុ​ជា នៅតែ​បើកចំហ​ឲ្យ​មានការ​ហោះហើរ​ត្រង់​ពី​ប្រទេស​ដទៃ ប៉ុន្តែ​អ្នកដំណើរ​ត្រូវធ្វើ​ច​ត្តា​ឡី​ស័ក្តិ​រយៈពេល១៤ថ្ងៃ និង​ស្នាក់នៅ​សណ្ឋាគារ តាម​ការកំណត់​របស់​ក្រសួងសុខាភិបាល” ។ លោក​បន្តថា “បញ្ហា​នេះ​ក្រសួងទេសចរណ៍ ជា​អ្នកធ្វើការ​ជាមួយ​ក្រសួងសុខាភិបាល​ថា តើ​អ្នកទេសចរ ណ៍​ឬ​អ្នកដំណើរ​អាច​ជ្រើសរើស​សណ្ឋាគារ ដែល​ពួកគេ​ចង់​ស្នាក់​នៅបាន​ឬ​អត់​ផងដែរ” ។

បច្ចុប្បន្ន​ប្រទេស​ចិន​បានធ្វើ​ច​ត្តា​ឡី​ស័ក្តិ លើ​អ្នកធ្វើដំណើរ​កើន​ឡើងដល់​រយៈពេល២៨ថ្ងៃ ក្នុងនោះ២១ថ្ងៃ​ស្នាក់នៅ​កន្លែង​ដែល​រៀបចំ​ដោយ​រដ្ឋាភិបាល និង​រយៈពេល៧ថ្ងៃ​ស្នាក់​នៅផ្ទះ ដោយ​មិន​អនុ​ញ្ញា​ត្ត​ឲ្យ​មាន​ការជួប​ប្រាស្រ័យ ទាក់ទង​ជាមួយ​អ្នក​ខាងក្រៅ ខណៈ​រដ្ឋាភិបាល​កម្ពុជា កំណត់​ច​ត្តា​ឡី​ស័ក្តិ​លើ​អ្នកដំណើរ​ត្រឹម១៤ថ្ងៃ​ប៉ុណ្ណោះ។

លោក​ស៊ិន ចាន់​សិរី​វុត្ថា បាន​បន្តទៀតថា ការព្យាករណ៍​ពី​អ្នកជំនាញ​លើកដំបូង​គឺ​រំពឹងថា វិស័យ​អាកាសចរណ៍​នឹង​អាច​ងើបឡើង​វិញ​នៅ​ឆ្នាំ២០២៣ ឬ២០២៤ខាងមុខ ប៉ុន្តែ​បើ​ស្ថានភាព​នៅតែមាន​សភាព​ដូច​បច្ចុប្បន្ន វិស័យ​អាកាសចរណ៍​នឹង​ងើប​ឡើងវិញ​នៅ​ឆ្នាំ២០២៥ ឬ២០២៦ខាងមុខ។ ប៉ុន្តែ​យ៉ាងណាអ្វីៗអាស្រ័យ​លើ​ប្រ​សិ​ទ្ឋ​ភាព​នៃ​វ៉ាក់សាំង និង​វិធានការណ៍​ដាក់ចេញ​ដោយ​រដ្ឋាភិបាល​ប្រទេស​និមួយៗ” ៕

រដ្ឋាភិបាល​គ្រោង​បោះ​លក់​មូល​ប​ត្រ​បំណុល​រដ្ឋ ខណៈ​កម្ចី​ពី​បរទេស​មានការប្រាក់​កាន់តែ​ខ្ពស់

ដោយ​គង់ សូរិយា

ភ្នំពេញៈ មន្ត្រីជាន់ខ្ពស់​នៃ​រាជរដ្ឋាភិបាល​កម្ពុជា​បាន​បង្ហើប​ឲ​ម្យ​ដឹងថា រដ្ឋាភិបាល​កម្ពុជា​កំពុង​គិតគូរ​បោះ​ផ្សារ​លក់​សញ្ញាប័ណ្ណ ឬ​ប័ណ្ណបំណុល ដើម្បី​យកប្រាក់​មក​អភិវឌ្ឍន៍​ប្រទេស ជាជាង​ប្រើប្រាស់​ប្រាក់កម្ចី​ពី​បរទេស ដែលមាន​អត្រា​ការប្រាក់​កាន់តែ​ខ្ពស់។

រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ប្រចាំការ នៃ​ក្រសួង​សេដ្ឋកិច្ច​និង​ហិរញ្ញវត្ថុ លោក វ​ង្សី វិស្សុត​បានលើកឡើង​ក្នុង​វេទិកាសាធារណៈ​ស្តីពី គ្រប់គ្រង​ម៉ាក្រូសេដ្ឋកិច្ច និង​ច្បាប់​ស្តីពី​ហិរញ្ញវត្ថុ សម្រាប់​ការគ្រប់គ្រង​ឆ្នាំ២០២១ របស់​ក្រសួង​សេដ្ឋកិច្ច និង​ហិរញ្ញវត្ថុ​កាលពី​ថ្ងៃ​ម្សិល​ម៉ិ​ញ​នេះ​ថា រដ្ឋាភិបាល​កម្ពុជា​កំពុង​គិតគូរ ងាក​មករក​ប្រភពធនធាន​ក្នុងស្រុក​វិញ តាមរយៈ​ការបោះ​មូល​ប​ត្រ​បំណុល​រដ្ឋាភិបាល (Government Bond) ខណៈ​អត្រា​ការប្រាក់​កម្ចី​ពី​ដៃគូ​វិនិយោគ​ឡើងថ្លៃ​ជាង​មុន។

លោក​បាន​ឲ្យ​ដឹងថា កម្ពុជា​គួរ​ឈប់​ខ្ចីប្រាក់​ពី​ខាងក្រៅ ហើយ​ងាក​មក​ខ្ចី​ក្នុងស្រុក​វិញ ព្រោះ​កម្ចី​ខាងក្រៅ​ចាប់ផ្ដើម​ឡើងថ្លៃ ជាក់ស្ដែង​ធនាគារពិភពលោក​បច្ចុប្បន្ន​នេះ មាន​អត្រា​ការប្រាក់២.៨ភាគរយ​ក្នុង​មួយឆ្នាំ ខណៈ​ពីមុន​មាន​ត្រឹម០.៧ភាគរយ​ប៉ុណ្ណោះ ដូច្នេះ​កម្ពុជា​បាន​ផ្អាក​ក្នុងការ​ខ្ចី​ខ្លះ ហើយ​ងាក​មក​ខ្ចី​ប្រទេស​ជប៉ុន ធនាគារ​ADB និង​ពី​អឺរ៉ុប​វិញ។

លោក​បាន​បន្ថែមថា បច្ចុប្បន្ននេះ​កម្ពុជា​ក៏​កំពុង​ចរចារ ជាមួយ​ធនាគារពិភពលោក ដើម្បី​បន្ធូរបន្ថយ​អត្រា​ការប្រាក់ កុំ​ឲ្យ​ឡើងថ្លៃ​ខ្លាំងពេក។

លោក​បញ្ជាក់ថា “យ៉ាងណាមិញ​គោលដៅ​ធំ​របស់​កម្ពុជា គឺ​មិន​ខ្ចីប្រាក់​ពី​ប្រទេសក្រៅ​ទៀត​ទេ គឺ​ងា​ក់មក​ខ្ចី​ក្នុងស្រុក តាមរយៈ​ការបោះ​មូល​ប​ត្រ​បំណុល” ។ លោក​បន្តថា “ចំណែកឯ​បំណុល​របស់​កម្ពុជា ស្ថិតក្នុង​ចន្លោះ​ទាប​នៅឡើយ​ទេ ទោះបី​ស្ថិតក្នុង​វិបត្តិ​កូ​វីដ១៩ ក្នុង​ឆ្នាំ២០២០ក្តី” ។

ច្បាប់​ស្តីពី​មូល​ប​ត្រ​រដ្ឋ ត្រូវបាន​រដ្ឋសភា អនុម័ត​ទាំងស្រុង​កាលពី​ថ្ងៃទី២៥ ខែវិច្ឆិកា ឆ្នាំ២០២0 ហើយ​ត្រូវបាន​សម្ដេចព្រះ​បរមនាថ នរោត្តម សីហមុនី ព្រះមហាក្សត្រ​នៃ​កម្ពុជា ចេញ​ព្រះរាជក្រម ដាក់​ឲ្យ​ប្រាស់​នៅ​ថ្ងៃទី២៦ ខែធ្នូ ឆ្នាំ២០២០ ។

ច្បាប់​ស្តីពី​មូល​ប​ត្រ​រដ្ឋ មាន​គោលបំណង​ផ្តល់នូវ​ក្របខណ្ឌ​រួម សម្រាប់​គ្រប់គ្រង​ការបោះ​ផ្សាយ​ការជួញដូរ និង​ការគ្រប់គ្រង​មូល​ប​ត្រ​រដ្ឋ ប្រកបដោយ​តម្លាភាព គណនេយ្យភាព ប្រសិទ្ធភាព និង​ស័​ក្កិ​សិទ្ធិ​ភាព ព្រមទាំង​ធានាបាន​នូវ​ចីរភាព នៃ​ការគ្រប់គ្រង​បំណុល​សាធារណៈ សំដៅ​រួមចំណែក​ពង្រឹង ការគ្រប់គ្រង​តម្រូវការ​សាច់ប្រាក់ របស់​រាជរដ្ឋាភិបាល, ឆ្លើយតប​ទៅនឹង​តម្រូវការ​ហិរញ្ញប្បទាន សម្រាប់​ការអភិវឌ្ឍ​សេដ្ឋកិច្ច និង​សង្គម, អភិវឌ្ឍ​ទីផ្សារ​មូល​ប​ត្រ និង​ទីផ្សារ​ហិរញ្ញវត្ថុ​នៅក្នុង​ព្រះរាជាណាចក្រ​កម្ពុជា និង​គាំទ្រ​គម្រោង​អាទិភាព និង​ចាំបាច់​ផ្សេងទៀត។

បច្ចុប្បន្ន​គណកម្មការ​មូល​ប​ត្រ​កម្ពុជា បាន​អនុ​ញ្ញា​ត្ត​ឲ្យ​ស្ថាប័នហិរញ្ញវត្ថុ​មួយចំនួន​បោះផ្សាយ​លក់​សញ្ញាប័ណ្ណ​រប​ស់​ខ្លួន ដូចជា ធនាគារ​ហត្ថា ធនាគារ ABA គ្រឹះស្ថាន​មីក្រូហិរញ្ញវត្ថុ​ប្រា​សាក់​ជាដើម៕