ដោយៈសុខុម

តូក្យូៈ នាយករដ្ឋមន្ត្រីជប៉ុន លោកយូស៊ីហ៊ីដេ ស៊ូហ្គា (Yoshihide Suga) បានថ្លែងកាលពីថ្ងៃអង្គារទី៨ខែធ្នូនេះថា ប្រទេសជប៉ុន នឹងប្រមូលកញ្ចប់ថវិកាស្ដារសេដ្ឋកិច្ចថ្មីចំនួន ៧៣,៦ទ្រីលានយ៉េន (៧០៨ពាន់លានដុល្លារអាមេរិក)។

លោកនាយករដ្ឋមន្រ្តីជប៉ុន បានបង្ហាញជាសញ្ញាបង្ហាញយ៉ាងច្បាស់ថា លោកកំពុងប្រឹងប្រែងស្ដារប្រទេស ឱ្យងើបផុតពីសេដ្ឋកិច្ចដាំក្បាលចុះ ដែលបង្កឡើងដោយសារវិបត្តិកូវីដ-១៩។

ក្នុងកិច្ចប្រជុំជាមួយក្រុមមន្ត្រីជាន់ខ្ពស់ នៃបក្សកាន់អំណាច លោកយូស៊ីហ៊ីដេ ស៊ូ ហ្គាបានលើកឡើងថា កញ្ចប់ថវិកាស្ដារសេដ្ឋកិច្ចថ្មីនេះ នឹងរួមបញ្ចូលការចំណាយសារពើពន្ធប្រមាណ៤០ទ្រីលានយ៉េន (៣៨៤ពាន់លានដុល្លារអាមេរិក)។

រដ្ឋាភិបាល គ្រោងអនុម័តកញ្ចប់ថវិកាស្ដារសេដ្ឋកិច្ចនេះ ជាដំណាក់កាលចុងក្រោ​យនៅថ្ងៃអង្គារដដែល។ ការទម្លាក់កញ្ចប់ថវិកាស្ដារសេដ្ឋកិច្ចនេះធ្វើឡើង ក្រោយពីទម្លាក់កញ្ចប់ថវិកា២លើករួចមកហើយ បន្ទាប់ពីប្រមូលបាន២,២ទ្រីលានដុល្លារអាមេរិក ដែលបានផ្ដោតលើការដោះស្រាយការលំបាក ជាបន្ទាន់របស់ប្រជាជន និងអាជីវកម្ម។

លោកយូស៊ីហ៊ីដេ ស៊ូហ្គា មានប្រសាសន៍ក្នុងកិច្ចប្រជុំខាងលើថា “វិធានការស្ដារសេដ្ឋកិច្ចថ្មីនេះនឹងជួយជំរុញ “កំណើនសេដ្ឋកិច្ចថ្មី”។

កញ្ចប់ថវិកាស្ដារសេដ្ឋកិច្ចនេះ ទំនងជារាប់បញ្ចូលការឧបត្ថម្ភធន និងគ្រឿងលើកទឹកចិត្តដល់ក្រុមហ៊ុននានា ដើម្បីលើកកម្ពស់ការវិយោគបៃតង និងការចំណាយលើការធ្វើឌីជីថលនីយកម្ម ជាវិស័យមួយដែលលោក យូស៊ីហ៊ីដេ ស៊ូហ្គា ធ្លាប់បានបង្ហាញថា ជាអាទិភាពមួយក្នុងគោលនយោបាយអាទិភាពសំខាន់ៗរបស់លោក។

សេដ្ឋកិច្ចរបស់ប្រទេសជប៉ុន បានរើបឡើងអំឡុងខែកក្កដា ដល់ខែកញ្ញា ពីការធ្លាក់ចុះខ្លាំងបំផុតក្នុងត្រីមាសទី២ ប៉ុន្តែអ្នកវិភាគជាច្រើនរំពឹងថា រលកទី៣ នៃការឆ្លងរាតត្បាតវីរុសកូវីដ-១៩ នឹងធ្វើឱ្យសេដ្ឋកិច្ចមានឱកាសងើបឡើងតិចបំផុត៕

ដោយៈ រ៉ាណេត

កោះកុងៈ គម្រោងសាងសង់រោងចក្រអគ្គិសនី ដើរដោយថាមពលធ្យូងថ្មថ្មីមួយទៀត មានអនុភាព៧០០មេហ្គាវាត់ ក្រោមទុនវនិនិយោគប្រមាណ១០០០លានដុកល្លារ ស្ថិតនៅស្រុកបូទុមសាគរ ខេត្តកោះកុង ត្រូវបានរាជរដ្ឋាភិបាលកម្ពុជាសម្រេចអនុម័ត និងគាំទ្រទាំងស្រុង ប៉ុន្តែតម្រូវឱ្យមានការសិក្សាលម្អិត និងដោះស្រាយទៅលើផលប៉ះពាល់ដោយផ្ទាល់ និងដោយប្រយោលដល់ប្រជាពលរដ្ឋ សង្គម និងបរិស្ថាន។

តាមរយៈក្រុមប្រឹក្សាអភិវឌ្ឍន៍កម្ពុជា នៅរសៀលថ្ងៃទី៨ ខែធ្នូ ឆ្នាំ២០២០នេះបានបញ្ជាក់ថា តបតាមសំណើសុំវិនិយោគលើគម្រោង សាងសង់រោងចក្រអគ្គិសនីដុតធ្យូងថ្ម អានុភាព៧០០មេហ្គាវ៉ាត់ របស់ក្រុមហ៊ុនBOTUM SAKOR ENERGY COMPANY LIMITED  គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិថ្មស និងភូមិចម្លងគោ ឃុំថ្មស ស្រុកបុទុមសាគរ ខេត្តកោះកុង មានទុនវិនិយោគប្រមាណ ១០០០លានដុល្លារអាមេរិក និងអាចបង្កើតការងារបានចំនួន ៣៦០កន្លែង។

ស្ថិតនៅក្នុងឃុំថ្មស ស្រុកបុទុមសាគរ ខេត្តកោះកុង ក៏មានគម្រោងសាងសង់រោងចក្រអគ្គិសនី ដើរដោយថាមពលធ្យូងថ្ម កម្លាំង៧០០មេហ្គាវាត់ ក្រោមការវិនិយោគរបស់ក្រុមហ៊ុនROYAL Group  ដែលមានទុនជាង១០០០លានដុល្លារដូចគ្នា ខណៈដែលបច្ចុ​  ប្បន្នកំពុងដំណើរការដោះស្រាយផលប៉ះពាល់។

រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានមានប្រសាសន៍កាលពីពេលថ្មីៗនេះថា ប្រទេសកម្ពុជាបានធ្វើបច្ចុប្បន្នភាព ផែនការថាមពលរបស់ខ្លួន សម្រាប់ឆ្នាំ២០២០ ដល់ឆ្នាំ២០៣០ បន្ថែមពីលើគម្រោងវិនិយោគលើវិស័យថាមពល ពីវិស័យឯកជន រដ្ឋាភិបាលក៏បានគ្រោងប្រើឧស្ម័នធម្មជាតិ (Natural Gas) សម្រាប់ការផលិតថាមពលអគ្គិសនី ក្នុងចំណែកមួយដ៏ធំ ដែលមានអនុភាពសរុប៣៦០០ មេហ្គាវ៉ាត ដោយអាចនឹងផ្តើមអនុវត្តចាប់ពីឆ្នាំ២០២៧ រហូតដល់ឆ្នាំ២០៣០។

លោកបន្តថា “សេដ្ឋកិច្ចរបស់ប្រទេសកម្ពុជា ត្រូវបានរំពឹងថា នឹងងើបឡើងវិញនៅឆ្នាំ២០២១ បន្ទាប់ពីថយចុះនៃការរីករាលដាលជាសកលនៃជម្ងឺកូវីដ១៩”។ លោកបន្តថា “ដូច្នេះ តម្រូវការថាមពលរបស់ប្រទេសកម្ពុជារំពឹងថា នឹងមានសន្ទុះឡើងវិញ ក្នុងនេះឧស្ម័នធម្មជាតិ នឹងដើរតួនាទីយ៉ាងសំខាន់ សម្រាប់ល្បាយប្រភពថាមពលនៅកម្ពុជា ពិសេ​សក្នុងវិស័យឧស្សាហកម្ម ដឹកជញ្ជូន ពាណិជ្ជកម្ម និងលំនៅដ្ឋាន”៕

ដោយ ៖ រ៉ាណេត

ភ្នំពេញ ៖ ស្ថានីយ៍ផលិតថាមពលអគ្គិសនីដើរដោយពន្លឺព្រះអាទិត្យចំនួន ៣ នឹងចាប់ផ្តើមបង្កើត រួមនឹងតភ្ជាប់បណ្តាញអគ្គិសនីនៅដើមឆ្នាំក្រោយ ខណៈដែល បច្ចុប្បន្នបានដំណើរសាងសង់បានប្រមាណជាង៩០ ភាគរយហើយ។

អគ្គនាយកនៃអគ្គនាយកដ្ឋានថាមពលក្រសួងរ៉ែ និងថាមពល លោក វិចទ័រ ហ្សូណា បានមានប្រសាសន៍ថា វិនិយោគិនចង់បញ្ចប់ការសាងសង់ដែលគ្រោងដំណើរការបង្កើតថាមពលអគ្គិសនីនេះនៅត្រឹមដើមឆ្នាំក្រោយ ព្រោះបច្ចុបន្ននេះ គម្រោងទាំងមូលបានបញ្ចប់ជាង ៩០ ភាគរយហើយ ដែលស្របទៅនឹងផែនការដែលបានគ្រោងទុក ហើយមានលទ្ធភាពផលិតគ្រប់គ្រាន់នៅក្នុងត្រីមាសទី ១ ឆ្នាំ២០២១ ។

លោកបានបញ្ជាក់ថា គម្រោងទាំង ៣ នោះគឺរួមមានទី១ រោងចក្រថាមពលពន្លឺព្រះអាទិត្យមានកម្លាំង ២០ មេហ្គាវ៉ាត់ វិនិយោគដោយក្រុមហ៊ុន Green Sustainable Ventures Co., Ltd មានទីតាំងស្ថិតនៅក្រុងបាវិតខេត្តស្វាយរៀង ទី២រោងចក្រថាមពលពន្លឺព្រះអាទិត្យ ៣០ មេហ្គាវ៉ាត់នៅស្រុកសេរីសោភ័ណ្ឌខេត្តបន្ទាយមានជ័យ វិនិយោគដោយក្រុមហ៊ុន Ray Power Supply Co,. Ltd និងទី៣ រោងចក្រថាមពលពន្លឺព្រះអាទិត្យ ៦០ មេហ្គាវ៉ាត់នៅស្រុកថ្មគោលខេត្តបាត់ដំបង ដែលជាកម្មសិទ្ធិរបស់ក្រុមហ៊ុន Risen Energy Co., Ltd. ។

លោក វិចទ័រ ហ្សូណា បានបញ្ជាក់ឱ្យដឹងថា រដ្ឋាភិបាលមានគោលនយោបាយក្នុងការធ្វើយ៉ាងណា ដើម្បីឲ្យប្រទេជាតិទាំងមូល មានអគ្គិសនីប្រើប្រាស់បានគ្រប់គ្រាន់នៅឆ្នាំខាងមុខ គឺឆ្នាំ២០២០ ឲ្យភូមិទាំងអស់ដែលមានចំនួន១៤,១៦៨ភូមិ។ ធ្វើមកទល់ថ្ងៃនេះ យើងគិតត្រឹមបំណច់ខែមិថុនា ការផ្គត់ផ្គង់ដល់ភូមិទាំងអស់បានចំនួន៧៩ភាគរយ គឺស្មើនឹង១១,៤០០ភូមិ។

លោកថា ដើម្បីអាចសម្រេចគោលដៅឲ្យមានសន្តិសុខថាមពល ចាំបាច់ត្រូវមានការអភិវឌ្ឍប្រភពថាមពលចម្រុះ ដែលកម្ពុជាយើងកំពុងមានបច្ចុប្បន្ន គឺថាមពលវារីអគ្គិសនី ថាមពលដែលបានមកពីធ្យូងថ្ម ថាមពលបានពីជីវម៉ាស់ និងថាមពលដែលនាំចូលពីប្រទេសជិតខាងដូចជា ប្រទេសថៃ វៀតណាម និងឡាវ។

ការអភិវឌ្ឍន៍ថាមពលកកើតឡើងវិញ គឺជាគោលនយោបាយមួយ របស់រាជរដ្ឋាភិបាលកម្ពុជា ក្នុងនោះការផ្តោតជាសំខាន់ទៅ លើការអភិវឌ្ឍន៍ថាមពលពន្លឺព្រះអាទិត្យ ស្ថិតក្នុងអាទិភាពមួយ។ ក្រៅពីនេះលោកក៏បានបញ្ជាក់ថាបន្ថែមថា បណ្តាញផ្គត់ផ្គង់នៅកម្ពុជាដែលរួមមាន២៥ខេត្តក្រុង ក្នុងនោះ១៥ខេត្តក្រុង បានតភ្ជាប់ជាមួយនឹងបណ្តាញបញ្ជូនជាតិ ហើយគោលដៅរបស់កម្ពុជានៅឆ្នាំ២០២០ខាងមុខនេះ កម្ពុជានឹងរំពឹងថាសម្រេចឲ្យបាននូវផ្តល់អគ្គិសនីឲ្យបានទាំង២៥ខេត្តក្រុង ដោយថាមពលអគ្គិសនីក្នុងប្រភេទតុងស្យង់ខ្ពស់៕

ដោយ ៖ រ៉ាណេត

ភ្នំពេញ ៖ តាមរយៈសារជាសំឡេង សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបញ្ជាក់ឱ្យដឹងថា ពេលនេះក្រសួងសុខាភិបាលបាន និងកំពុងរៀបចំសាងសង់សឃ្លាំងសុវត្ថិភាពសម្រាប់ស្តុកវ៉ាក់សាំង Covid-19 ដែលមានកំណត់សីតុណ្ហភាពរហូតដល់៨០អង្សារក្រោមសូន្យ ។

សម្ដេចតេជោ ហ៊ុន សែន បានមានប្រសាសន៍ថា “លោកជំទាវ យក់ សម្បត្តិ បានរាយការណ៍ឱ្យខ្ញុំបានដឹងអំពីការសាងសង់ឃ្លាំង សម្រាប់ការស្តុកទុក ដែលនៅក្នុងកន្លែងស្តុកទុកនោះ យើងអាចស្តុកទុកគឺមានកម្រិតរហូតទៅដល់ ៨០អង្សារក្រោមសូន្យ (-៨០អង្សារសេ)។ ប៉ុន្តែក៏មានក្នុងកម្រិត ៤០អង្សារ (ក្រោមសូន្យ) ឬក៏ ៣០អង្សារ (ក្រោមសូន្យ) ឬក៏ប៉ុន្មានអង្សារ។ ក៏ប៉ុន្តែកម្រិតអតិបរមា គឺបានទៅដល់ ៨០អង្សារក្រោមសូន្យឯណោះ។ អ៊ីចឹងកន្លែងស្តុក មិនជាពិបាកពេកទេ ជំរុញនូវការសាងសង់ រួចទម្រាំនឹងការបញ្ជាទិញ ល្មមស៊ីសង្វាក់គ្នា ជាមួយនឹងការមកដល់នៃវ៉ាក់សាំង”។

សម្រាប់វ៉ាក់សាំងដែលនឹងត្រូវបញ្ជាទិញក្នុងជំហានដំបូង ត្រូវបានសម្តេចតេជោ ហ៊ុន សែន បញ្ជាក់ថា បានត្រៀមទិញចំនួន1លានដូស ដើម្បីចាក់ជូនប្រជាជន ដោយឥតគិតថ្លៃ នៅកន្លែងដែលមានហានិភ័យខ្ពស់ និងអ្នកដែលមានហានិភ័យ។ ប៉ុន្តែពុំទាន់កំណត់ថា នឹងទិញពីប្រទេសណានៅឡើយនោះទេ ហើយសម្តេចបានស្នើយោបល់ថា ក្រុមគ្រូពេទ្យគួរតែជាជម្រើសអាទិភាពទីមួយសម្រាប់ការទទួលវ៉ាក់សាំង បន្ទាប់មកគឺគ្រូបង្រៀន កងកម្លាំងប្រដាប់អាវុធ និងមន្ត្រីយុត្តិធម៌ ៕

ដោយ ៖ រ៉ាណេត

ភ្នំពេញ ៖ នៅក្នុងផែនការនៃការអភិវឌ្ឍស្របតាមគោលនយោបាយរបស់រាជរដ្ឋាភិបាលកម្ពុជា បច្ចុប្បន្ននេះមានខេត្តចំនួន៣បានបង្ហាញពីគោលបំណងនៃការបង្កើតក្រុងរណបក្នុងនាមជាមជ្ឈមណ្ឌលពាណិជ្ជកម្មថ្មី។

ផែនការនៃការបង្កើតក្រុងរណបនៅខេត្តចំនួន៣រួមមានខេត្តសៀមរាប ខេត្តកែប និងខេត្តមណ្ឌលគីរី ដែលត្រូវបានលើកឡើងដោយក្រសួងទេសចរណ៍កាលពីពេលកន្លងទៅថ្មីៗនេះ។

ខេត្តកែប ៖អភិបាលខេត្តកែប លោក សោម ពិសិដ្ឋ

បានបង្ហាញពីគម្រោងក្នុងការបង្កើតទីក្រុងរណបថ្មីមួយនៅក្នុងខេត្តដើម្បីទាក់ទាញវិនិយោគិនជាតិ និងអន្តរជាតិចូលមកបណ្តាកទុនវិនិយោគនៅក្នុងខេត្តកាន់តែច្រើន។ គម្រោងបង្កើតឱ្យមានទីក្រុងរណបនេះ គឺដើម្បីផ្តល់ឱកាសការងារជូនពលរដ្ឋនៅក្នុងខេត្ត ដើម្បីកាត់បន្ថយការធ្វើនេសាទខុសច្បាប់ និងអភិវឌ្ឍន៍ឱ្យសាកសមជាខេត្តទេសចរណ៍ធម្មជាតិ ដែលស្របទៅនឹងរាជរដ្ឋាភិបាលដាក់ចេញទិសដៅថាខេត្តកែបទៅថ្ងៃក្រោយទៅជាខេត្តទេសចរណ៍ធម្មជាតប្រណិតកម្រិតខ្ពស់ ។
ជាមួយគ្នានេះ លោកអភិបាលខេត្តកែបក៏បានជំរុញនិងលើកទឹកចិត្តដល់អាជីវករ វិនិយោគិនលើវិស័យទេសចរណ៍ សណ្ឋាគារ ដើម្បីចូលរួមអភិវឌ្ឍន៍ខេត្តកែបកាន់តែរីកចម្រើនបន្ថែមទៀត ខណៈខេត្តជាប់មាត់សមុទ្រមួយនេះ បាននឹងកំពុងមានភាពទាក់ទាញលើវិស័យទេសចរណ៍។

ខេត្តសៀមរាប ៖ សម្រាប់ខេត្តសៀម ក៏មានគម្រោងអភិវឌ្ឍន៍

និងបង្កើតជាក្រុងថ្មីមួយទៀតដែលស្ថិតនៅក្នុងស្រុកបន្ទាយស្រី ដែលកំពុងកំណើការអភិវឌ្ឍន៍ជាជំហានៗក្រោមការគ្រប់គ្រងដោយលោក ឃីម ហ្វីណង់ ជាអភិបាលស្រុក។

បច្ចុប្បន្ននៅក្នុងស្រុកបន្ទាយស្រីត្រូវបានគេមើលឃើញថាកំពុងមានអភិវឌ្ឍនៅតាមភូមិ ឃុំគោលដៅមួយចំនួន ដូចជាការស្ថាបនាហេដ្ឋារចនាសម្ព័ន្ធ ការអនុវត្តនូវគោលនយោបាយផ្ទះមួយអំពូលមួយ រួមជាមួយនឹការបង្កើតជាភូមិទេសចរណ៍ និងវប្បធម៌ប្រចាំតំបន់ បន្ថែមពីលើតំបន់ទេសចរណ៍ធម្មជាតិដែលមានស្រាប់។
នៅក្នុងយុទ្ធនាការ «ផ្ទះ១អំពូល១» ផ្តើមចេញពីការបំភ្លឺអំពូល នៅតាមផ្ទះនីមួយៗនៅទូទាំងស្រុកបន្ទាយស្រី ខេត្តសៀមរាបចំនួន១ម៉ឺនខ្នង ត្រូវបានចាប់ផ្តើមអនុវត្តជាជំហានដំបូងនៅក្នុងភូមិព្រះដាក់។ យុទ្ធនាការនេះបានប្រែក្លាយភូមិជនបទជាភូមិគំរូ និងទទួលបានការស្វាគមន៍ច្រើនពីអ្នកភូមិ។

ខេត្តមណ្ឌលគីរី ៖ ខេត្តដែលស្ថិតនៅប៉ែកឦសាននៃប្រទេស

និងស្ថិតនៅក្នុងគម្រោងប្រែក្លាយជាប៉ូលសេដ្ឋកិច្ចពិសេសមួយនេះក៏មានផែនការបង្កើតក្រុងរណបថ្មីមួយផងដែរ នៅក្នុងស្រុកអូររាំង ដែលមានគម្រោងសាងសង់ព្រលានយន្ដហោះជាចំណុចទាក់ទាញការវិនិយោគជាសំខាន់។
គោលបំណងនៃការបង្កើតក្រុងរណបនេះ ត្រូវបានប្រកាសឡើងតាមរយៈកិច្ចប្រជុំស្តីពីគម្រោអភិវឌ្ឍន៍ខេត្តមណ្ឌលគីរីរបស់ក្រសួងទេសចរណ៍កាលពីសប្ដាហ៍កន្លងទៅដោយលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍។ លោកបានបញ្ជាក់ថា នៅក្នុងផែនការមេនេះគ្រោងនឹងដាក់ឆ្លងការសម្រេចពីសំណាក់រាជរដ្ឋាភិបាលនៅដើមឆ្នាំក្រោយ ដោយនឹងមានការអភិវឌ្ឍន៍ជាច្រើនកន្លែង រួមជាមួយនឹងការបង្កើនតំបន់ទេសចរធម្មជាតិកែច្នៃ ដែលជាផលិតផលទេសចរណ៍ថ្មីៗទាំងនៅក្នុង និងក្រៅក្រុងផងដែរដើម្បីធ្វើយ៉ាងណាឱ្យខេត្តមណ្ឌលគីរីក្លាយជាគោលដៅទេសចរណ៍ និងវិនិយោគកម្រិតខ្ពស់៕

ដោយៈម៉ាណេត

ភ្នំពេញៈ ការធ្វើពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកមានទំហំទឹកប្រាក់ប្រមាណ៥,៨ពាន់លានដុល្លារ ក្នុងរយៈពេល១០ខែដំបូងនៃឆ្នាំនេះ កើនឡើង១៦ភាគរយ បើធៀបនឹងរយៈពេលដូចគ្នាកាលពីឆ្នាំមុន។

យោងតាមតួលេខពីការិយាល័យជំរឿនសហរដ្ឋអាមេរិក ដែលបានចេញផ្សាយនៅថ្ងៃទី៧ ខែធ្នូ ឆ្នាំ២០២០ បានបង្ហាញថា ចាប់ពីខែមករាដល់ខែតុលា ឆ្នាំ២០២០ ប្រទេសកម្ពុជាបាននាំចេញ ផលិតផលគិតជាទឹកប្រាក់ប្រមាណ៥,៥ពាន់លានដុល្លារទៅសហរដ្ឋអាមេរិក កើនឡើង២១ភាគរយ។

ទន្ទឹមនឹងនេះដែរ ការនាំចូលទំនិញរបស់កម្ពុជា ពីសហរដ្ឋអាមេរិកមានតម្លៃ២៦៩លានដុល្លារធ្លាក់ចុះ៣៩ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

ផលិតផលនាំចេញសំខាន់ៗរបស់កម្ពុជា ទៅកាន់សហរដ្ឋអាមេរិក រួមមាន ផលិត​ផលវាយនភណ្ឌ ស្បែកជើង ទំនិញធ្វើដំណើរ និងផលិតផលកសិកម្ម ខណៈដែលការនាំចូលរបស់កម្ពុជា ពីសហរដ្ឋអាមេរិករួមមានយានយន្ត ចំណីសត្វ និងគ្រឿងម៉ាស៊ីន។

យោងតាមស្ថានទូតអាមេរិកប្រចាំកម្ពុជាបានឱ្យដឹងថា ពាណិជ្ជកម្ម ពិសេសលទ្ធភាពចូលទៅក្នុងទីផ្សារសហរដ្ឋអាមេរិក បានផ្តល់ប្រយោជន៍ដល់ប្រទេសកម្ពុជាយ៉ាងច្រើន ក្នុងពេលរាប់ឆ្នាំមកនេះ។ សហរដ្ឋអាមេរិក គឺជាគោលដៅនាំចេញធំជាងគេរបស់ប្រ​ទេ​សកម្ពុជា […]។

ការនាំចេញនេះ ជួយឲ្យប្រជាជនកម្ពុជារាប់ម៉ឺននាក់មានការងារធ្វើ រាប់ពីការងារតាមរោងចក្រនៅក្រុងព្រះសីហនុ និងក្រុងបាវិត ដល់កសិករនៅខេត្តបាត់ដំបង និងកំពង់ចាម ដល់អ្នកជំនាញព័ត៌មានបច្ចេកវិទ្យា នៅភ្នំពេញ។ ការនាំចេញទាំងនេះមានចំណែកយ៉ាងសំខាន់ក្នុងកំណើនសេដ្ឋកិច្ចដ៏ច្រើនរបស់កម្ពុជា។

ការនាំចេញរបស់កម្ពុជាថែមទាំងផ្តល់ការចំណេញ ដល់អតិថិជនអាមេរិកផងដែរ ដោយផ្តល់ឲ្យនូវជម្រើស។ ពេលនេះមានទំនិញពីកម្ពុជា នៅក្នុងហាងក្នុងសហរដ្ឋអាមេរិកច្រើនជាងពេលណាទាំងអស់។

ទំនិញទាំងនេះមានមិនត្រឹមតែសម្លៀកបំពាក់ និងស្បែកជើងតែប៉ុណ្ណោះទេ តែថែមទាំងមានផលិតផលកសិកម្ម ដែលបានទទួលរង្វាន់ ដូចជា ម្រេចកំពត និងអង្ករកម្ពុជា។ លើសពីនេះទៀត លោកអ្នកអាចឃើញមានទំនិញសម្រាប់ការធ្វើដំណើរ ដែលធ្វើនៅកម្ពុជា មានលក់កាន់តែច្រើនឡើងនៅក្នុងសហរដ្ឋអាមេរិក។

បន្ទាប់ពីសហរដ្ឋអាមេរិក បានផ្តល់ការលើកលែងពន្ធគយ ដល់ទំនិញសម្រាប់ការធ្វើដំណើរ នៅឆ្នាំ២០១៦  នៅក្រោមកម្មវិធីនៃប្រព័ន្ធផ្តល់ការអនុគ្រោះទូទៅ (GSP) ទំនិ​ញសម្រាប់ការធ្វើដំណើរដែលនាំចេញពីកម្ពុជា មានតម្លៃកើនពី៥០លានដុល្លារដល់ជិត ១ ពាន់លានដុល្លារ។

ពាណិជ្ជកម្មទ្វេភាគីរវាងប្រទេសទាំងពីរ មានទំហំទឹកប្រាក់ប្រមាណ៥,៨ពាន់លានដុល្លារអាមេរិក កើនឡើង៣៧ភាគរយ កាលពីឆ្នាំ២០១៩ បើធៀបនឹងឆ្នាំ២០១៨៕