សម្ដេចតេជោ ហ៊ុន សែន សម្រេចបង្កើតតំបន់បេតិកភ័ណ្ឌធម្មជាតិភ្នំព្រះគុហារហ្លួង ទំហំ២៥ហិកតា ស្ថិតនៅខេត្តកំពត

ដោយ ៖ រ៉ាណេត

កំពត ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានសម្រេចចេញអនុក្រឹត្យស្ដីពីការបង្កើតតំបន់បេតិកភ័ណ្ឌធម្មជាតិភ្នំព្រះគុហារហ្លួង ស្ថិតនៅភូមិសាស្ត្រ ឃុំទូកមាសខាងលិច ស្រុកបន្ទាយស្រី ខេត្តកំពត។

តាមរយៈអនុក្រឹត្យលេខ១២ អនក្រ.បក ដែលចុះហត្ថលេខាដោយសម្ដេចតេជោ ហ៊ុន សែន និងបានចែកចាយនៅព្រឹកថ្ងៃទី២៧ ខែមករា ឆ្នាំ២០២១បានបញ្ជាក់ថា រដ្ឋាភិបាលបានសម្រេចបងកើតតំបន់បេតិកភ័ណ្ឌធម្មជាតិភ្នំព្រះគុហារហ្លួង ទំហំ២៥ហិកតា ដែលស្ថិតនៅទីតាំងដូចបានបង្ហាញខាងលើនេះក្នុងគោលបំណងការពារតួនាទីផ្នែកប្រព័ន្ធអេកូឡូស៊ីសម្រាប់ជាប្រយោជន៍របស់មនុស្សគ្រប់ជំនាន់ កម្រិតដល់ការប្រើប្រាស់ធនធានជីវចម្រុះ ធនធានធម្មជាតិ ធនធានវប្បធម៌ និងមុខងារនៃតំបន់មួយនេះ។

ជាមួយគ្នានេះក៏មានបំណងការពារទេសភាពធម្មជាតិ តម្លៃធម្មជាតិសម្រាប់បម្រើដល់ការកម្សាន្ត ការអប់រំ ការសិក្សាស្រាវជ្រាវវិទ្យាសាស្ត្រ និងជំនឿដែលគ្រប់សកម្មភាពទាំងនេះពុំបង្កការគំរាមកំហែងដល់បរិស្ថានធម្មជាតិ និងវប្បធម៌ក្នុងមូលដ្ឋាននោះទេ។ បន្ថែមពីនេះនៅមានផ្តល់ជាសេវាកម្មធម្មជាតិ និងវប្បធម៌សម្រាប់ការប្រើប្រាស់ប្រកបដោយនិរន្តរភាព លើកកម្ពស់ការចូលរួមរបស់សហគមន៍មូលដ្ឋាន ក៏ដូចជាសាធារណៈជនក្នុងការរួមចំណែកដល់ការគ្រប់គ្រង ការការពារ និងអភិរក្សជីវៈចម្រុះ ធនធានធម្មជាតិ និងបេតិកភណ្ឌវប្បធម៌ក្នុងតំបន់៕

សារព័ត៌មានបរទេសថាក្រុងព្រះសីហនុកំពុងវិវត្តន៍ក្លាយទៅជាទីក្រុងShenzhenរបស់ចិននាពេលអនាគត   

ដោយៈ វឌ្ឈនា

ភ្នំពេញៈ សារព័ត៌មាន Global Timeបានចុះផ្សាយថា បន្ទាប់ពីអនុញ្ញាតឱ្យនាវា MS Westerdam និងអ្នកដំណើរនិងនាវិកចំនួន២០០០ នាក់ចូលចតនៅកំពង់ផែកាលពីខែកុម្ភៈឆ្នាំ២០២០កន្លងមកនេះ បានធ្វើឱ្យកំពង់ផែក្រុងព្រះសីហនុ ដែលមានសភាពស្ងប់ស្ងាត់ និងតូចមួយនៅក្នុងប្រទេសកម្ពុជា បានជំរុញឱ្យមានការយកចិត្តទុកដាក់ជាសកល និងភាពអូអរឡើងវិញ។

សារព័ត៌មានបានសរសេរថា ក្រៅពីការផ្តល់ជូនការចាកចេញ ប្រកបដោយសុវត្ថិភាពសម្រាប់អ្នកធ្វើដំណើរ ក្រុងព្រះសីហនុ កំពុងស្ថិតនៅក្នុងការផ្តល់ឱកាសដល់អ្នករស់នៅក្នុងតំបន់នេះយ៉ាងច្រើនផងដែរ ។ ពាណិជ្ជកម្ម និងការវិនិយោគរបស់ចិន បាននាំឱ្យមានការអភិវឌ្ឍន៍សួនឧស្សាហកម្ម រោងចក្រ លំនៅដ្ឋាន ពាណិជ្ជកម្ម សណ្ឋាគារភោជនីយដ្ឋាននិងកាស៊ីណូផងដែរ។ ទីក្រុងទេសចរណ៍មាត់សមុទ្រ កំពុងផ្លាស់ប្តូរបន្តិច ម្តងៗ ទៅជាទីក្រុងShenzhen  និងក្បាលម៉ាស៊ីនសេដ្ឋកិច្ចរបស់ប្រទេសកម្ពុជា។

ក្នុងរយៈពេល៥ឆ្នាំកន្លងមកនេះ មនុស្សមួយចំនួនបានចាប់ផ្តើមហៅក្រុងព្រះសីហនុថាជាកទីក្រុង Shenzhen ទី២។ ផ្លូវឆ្ពោះទៅការអភិវឌ្ឍមិនងាយស្រួលទេ ព្រោះទីក្រុងនៅតែប្រឈមនឹងបញ្ហាអភិវឌ្ឍន៍ជាច្រើន។ ប៉ុន្តែការចូលរួមក្នុងគំនិតផ្តួចផ្តើមខ្សែក្រវ៉ាត់និងផ្លូវ និងការបង្កើនកិច្ចសហប្រតិបត្តិការ ជាមួយប្រទេសចិនបានក្លាយជាការមូលមតិគ្នាលើវិធីដើម្បីឆ្ពោះទៅមុខ។

ក្រុងព្រះសីហនុមានមូលដ្ឋានគ្រឹះល្អ សម្រាប់ការអភិវឌ្ឍលើគ្រប់វិស័យ។  ទោះយ៉ាងណាចំនួនប្រជាជនកម្ពុជានៅមានចំនួនតិច ស្របទៅនឹងទីផ្សារថ្មីមានន័យថា ការអភិវឌ្ឍន៍ខេត្តព្រះសីហនុ នៅតែប្រឈមនឹងកង្វះដើមទុន និងហេដ្ឋារចនាសម្ព័ន្ធបាននឹងកំពុងអភិវឌ្ឍន៍។ ដើមទុនចិនបានចាប់ផ្តើមជួយប្រទេសកម្ពុជា ឱ្យជៀសផុតពីឧបសគ្គទាំងនេះ។

ក្រុងព្រះសីហនុមានអគារពាណិជ្ជកម្ម និងលំនៅដ្ឋានថ្មីៗជាច្រើន ដែលមានសំណ​ង់ជាច្រើនទៀត ដែលធ្វើរកទីកន្លែងណាមួយ នៅក្នុងទីក្រុងព្រះសីហនុនៅទំនេរនោះទេ។

ខេត្តព្រះសីហនុបានអភិវឌ្ឍន៍ ពីទីក្រុងកំពង់ផែសមុទ្រដ៏ស្ងប់ស្ងាត់ ទៅជាទីក្រុងមានសភាពអ៊ូអរ នៅពេលដែលជនជាតិចិនកាន់តែច្រើនឡើងៗ ជាមួយនឹងការអភិវឌ្ឍក្រុមហ៊ុន និងអចលនទ្រព្យ ដូចទៅនឹងទីក្រុងShenzhen។

និន្នាការនេះ ត្រូវបានអមដោយការកើនឡើង នៃឧស្សាហកម្មសេវាកម្មទីក្រុងជាមួ​យភោជនីយដ្ឋាន និងសណ្ឋាគារចិន។

រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានឱ្យដឹងថា លោកវង្សី វិស្សុត ក្រោមការគាំទ្រពីអង្គការអភិវឌ្ឍន៍ឧស្សាហកម្ម របស់អង្គការសហប្រជាជាតិ វិទ្យាស្ថានរៀបចំផែនការ និងរចនាប្លង់ទីក្រុងស៊ីនជិន បាននឹងកំពុងជួយក្រុងព្រះសីហនុ ក្នុងការរៀបចំបញ្ចូលទៅជា “ទីក្រុងសិនជិនកម្ពុជា” ដើម្បីទាក់ទាញការវិនិយោគបន្ថែមទៀត។

រដ្ឋាភិបាលបានដាក់ខេត្តព្រះសីហនុជាតំបន់សេដ្ឋកិច្ច ពាណិជ្ជកម្មពហុបំណងនៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥ ២០២៥ ដែលគោល​នយោ​បាយនេះ បាននិងកំពុងលើកស្ទួយការអភិវឌ្ឍ ក្នុងខេត្តនេះលឿនស្ទើរមិនគួរឲ្យជឿដោយត្រឹមរយៈពេល៤ឆ្នាំ ខេត្តនេះទទួលបានទុនវិនិយោគ៨០០០លានដុល្លារអាមេរិកលើវិស័យសំណង់ និងអចលនទ្រព្យ៕

ទីផ្សារលំនៅដ្ឋានបែបប្រណីតទទួលបានសញ្ញាវិជ្ជមាននៅដើមឆ្នាំ២០២១នេះ

ដោយៈម៉ាណេត

ភ្នំពេញៈ អ្នកជំនាញបានអះអាងថា សម្រាប់ដើមឆ្នាំ២០២១នេះ តម្រូវការលំនៅ   ដ្ឋានបែបប្រណីតនៅក្នុងគម្រោងបុរី បានចាប់ផ្តើមមានកំណើន ខណៈវិស័យអចលនទ្រព្យនៅកម្ពុជាត្រូវបានមើញថា ចាប់ផ្តើមមានសកម្មភាព កម្រើកឡើងវិញនៅដើមឆ្នាំនេះ។

លោកប៉ូ អ៊ាវគង់អគ្គនាយក និងស្ថាបនិកក្រុមហ៊ុនអ៊ែតវ៉ាន់ស៍ រៀលអ៊ីស្ទេតបានថ្លែងប្រាប់គេទំព័រ Propertyarea.asia នៅព្រឹកថ្ងៃទី២៧ ខែមករា ឆ្នាំ២០២១នេះថា សញ្ញាវិជ្ជមានសម្រាប់ វិស័យអចលនទ្រព្យចាប់ផ្តើមមានឡើងវិញជាបណ្តើរៗ ហើយទន្ទឹមនឹងនេះ លំនៅដ្ឋានបែបប្រណីតក្នុងគម្រោងបុរីថ្មីៗមួយចំនួន ត្រូវបានដាក់ដំណើរការសាងសង់នៅដើមឆ្នាំ២០២១នេះ។

លោកបានឱ្យដឹងថា “តម្រូវការលំនៅដ្ឋានបែបប្រណីតភាគច្រើន ទីផ្សារនៅក្នុងស្រុ​ករបស់យើង ហើយមួយភាគតូច ក៏ត្រូវបានវិនិយោគិនទិញសម្រាប់ជួល ទៅឱ្យអ្នកប្រធានអង្គការធំៗ និងប្រធានក្រុមហ៊ុនធំៗពីបរទេស ដើម្បីទទួលបានផលចំណេញផងដែរ”។លោកបានថ្លែងថា “យើងឃើញថាតម្រូវការលំនៅដ្ឋានបែបប្រណីត នៅដើមឆ្នាំ២០២១ នៅតែមានកំណើន ដោយសារអ្នកមានចំណូលខ្ពស់ និងអ្នករកស៊ីមានរំហូរសាច់ល្អ នៅតែត្រូវការលំនៅដ្ឋានបែបប្រណីត”។

លោកប៉ូ អ៊ាវគង់បានបន្តថា សម្រាប់ដើមឆ្នាំ២០២១ សញ្ញាវិជ្ជមានចំពោះវិស័យអចលនទ្រព្យនៅកម្ពុជា ចាប់ផ្តើមបង្ហាញជាបណ្តើរៗ ដោយសារស្ថាប័នធំៗ បានព្យាករពីកំណើនវិជ្ជមានសេដ្ឋកិច្ចកម្ពុជា ដែលវាផ្តល់ទំនុកចិត្តដល់អ្នកអភិវឌ្ឍន៍ និងវិនិយោគិន។

លំនៅដ្ឋានបែបប្រណីតមានតម្លៃចាប់ពី១០ម៉ឺនដុល្លារ ទៅដល់ជាង១លានដុល្លារ ហើយលំនៅដ្ឋានបែបប្រណីតភាគច្រើន ត្រូវបានអភិវឌ្ឍន៍ក្នុងគម្រោងបុរី។

យោងតាមលោកប៉ូ អ៊ាវគង់បានឱ្យដឹងថា លំនៅដ្ឋានបែបប្រណីតត្រូវបានបែងចែកចេញជាច្រើនប្រភេទ ក្នុងនោះទី១ វិឡាកូនកាត់ ឬLinkhouse ដែលមានទំហំចាប់ពី៥គុណ១២ និងមានកម្ពស់ពី២ទៅ៣ជាន់ មានតម្លៃចន្លោះពី១០ម៉ឺនដុល្លារ ទៅ២០ម៉ឺនដុល្លារ ទី២ វីឡាភ្លោះមានតម្លៃចាប់ពី២០ម៉ឺន ទៅ៣០ម៉ឺនដុល្លារ ទី៣ វីឡាទោល (បែងចែកចេញជាប្រភេទ ដូចជាវIឡា Queen A និងវីឡា Queen B) មានតម្លៃចាប់ពី ៥០ម៉ឺន ទៅ៩០ម៉ឺន និងទី៤ King វីឡា មានតម្លៃចាប់ពី១លានដុល្លារឡើងទៅ។

នាយិកាប្រចាំប្រទេសនៃក្រុមហ៊ុនភ្នាក់ងារអចលនទ្រព្យ CBRE Cambodia លោកស្រីអាន សុធីតា បានមានប្រសាសន៍ថា “ទីផ្សារលំនៅដ្ឋាននៅពេលពេលបច្ចុប្បន្ន គឺនៅតែមានភាពរឹងមាំខុសប្លែក ពីវិស័យដទៃទៀតដោយសារតែទីផ្សារ និងតម្រូវការពិតប្រាក​ដគឺផ្តើមចេញពីអ្នកនៅក្នុងស្រុក”។

លោកស្រីបញ្ជាក់ថា ការអភិវឌ្ឍនៅក្នុងវិស័យលំនៅដ្ឋាន ផ្តោតសំខាន់ទៅលើទីផ្សារក្នុងស្រុក មិនមែនមកពីក្រៅប្រទេសនោះទេ ហើយអ្នកអភិវឌ្ឍន៍ ក៏បានសិក្សាយ៉ាងច្បាស់ទៅលើកម្រិតនៃតម្រូវការ រួមជាមួយលទ្ធភាពរបស់អតិថិជនគោលដៅរបស់ពួកគេ ដូច្នេះរាល់គម្រោងអភិវឌ្ឍទាំងអស់ភាគច្រើន មិនជាប់គាំងនោះទេ ហើយមានអត្រាទទួលបានភាពជោគជ័យខ្ពស់។

លោកស្រីបន្តថា “ខ្ញុំជឿជាក់ថា នៅឆ្នាំ២០២១ នេះ ទីផ្សារអចលនទ្រព្យរួមនឹងវិលត្រឡប់មករកភាពល្អប្រសើរវិញជាបណ្តើរ ខណៈដែលបច្ចុប្បន្ននេះលទ្ធផលនៃការប្រើប្រាស់ថ្នាំបង្ការ ឬវ៉ាក់សាំងការពារជំងឺឆ្លង ត្រូវបានចាប់ផ្តើមអនុវត្តនៅតាមបណ្តាប្រទេសមួយចំនួន ហើយរដ្ឋាភិបាលកម្ពុជាក៏បានត្រៀមខ្លួនរួចរាល់ ក្នុងការនាំយកវ៉ាក់សាំងមកកាន់កម្ពុជាក្នុងពេលឆាប់ខាងមុខនេះផងដែរ”៕

គម្រោងអភិវឌ្ឍន៍ក្រុងថ្មីដ៏ធំនៅតំបន់ឆ្នេររាមតម្លៃជិត១០០០លានដុល្លារ ចាប់ដំណើរការបុគគ្រឹះសាងសង់ក្នុងដំណាក់កាលដំបូង

ដោយ ៖ រ៉ាណេត

ព្រះសីហនុ ៖ គម្រោងអភិវឌ្ឍន៍ក្រុងថ្មីស្ថិតនៅតំបន់ឆ្នេររាមនៃខេត្តព្រះសីហនុ ដែលមានទុនវិនិយោគសរុបជិត១០០០លានដុល្លារក្រោមកិច្ចសហការរវាងក្រុមហ៊ុនក្នុងស្រុក និងក្រុមហ៊ុនសឹង្ហបុរី គិតត្រឹមដើមឆ្នាំ២០២១នេះបានចាប់ផ្តើមធ្វើការបុគគ្រឹះសាងសង់សំណង់ក្នុងដំណាក់កាលដំបូងហើយ ដោយផ្តើមចេញពីប្រភេទសំណង់វីឡាប្រណីតបែបលំហែប្រមាណ១០០ខ្នង រួមជាមួយនឹងការកសាងហេដ្ឋារចនាសម្ព័ន្ធនានានៅក្នុងគម្រោងផងដែរ។

គម្រោងវិនិយោគ និងអភិវឌ្ឍន៍ក្រុងថ្មីនៃតំបន់ឆ្នេរសមុទ្ររាម Crystalville Ream Beach ដែលមានទុនវិនិយោគជិត១០០០លានដុល្លារ គឺជាគម្រោងដ៏ធំដែលមានការអភិវឌ្ឍន៍ចម្រុះ រួមមានសំណង់លំនៅដ្ឋានប្រភេទវីឡាកម្រិតអភិជន មជ្ឈមណ្ឌលពាណិជ្ជកម្ម ផ្សារទំនើប និងសណ្ឋាគារកម្រិតផ្កាយ៥ នឹងបង្ហាញវត្តមានរបស់ខ្លួននៅពេលឆាប់ៗខាងមុខនេះ ក្រោមការវិនិយោគរួមគ្នាពីសំណាក់ក្រុមហ៊ុនក្នុងស្រុក និងក្រុមហ៊ុនលំដាប់យក្សមកពីប្រទេសសឹង្ហបុរី។

នាយិកាគ្រប់គ្រងផ្នែកលក់គម្រោងវីឡាបែបលំហែរកាយ និងប្រណីតភាពលើកដំបូងនៅតំបន់ឆ្នេរសមុទ្ររាម ដែលស្ថិតនៅក្នុងគម្រោង Crystalville Ream Beach អ្នកនាង លីម សុខាដាវីន បានបង្ហើបប្រាប់ឱ្យដឹងកាលពីពេលថ្មីៗនេះថា គម្រោងសាងសង់លំនៅដ្ឋានប្រភេទជាវីឡាបែបលំហែរ និងកម្សាន្តកម្រិតអភិជននេះ គឺជាការវិនិយោគរួមគ្នារវាងក្រុមហ៊ុនក្នុងស្រុក FURI Corporation និងក្រុមហ៊ុនវិនិយោគអចនទ្រព្យដ៏ធំមកពីសាំងហ្គាពួរ គឺជាផ្នែកមួយក្នុងគម្រោង Crystalville Ream Beach។

អ្នកនាងបានបន្តទៀតថា “គម្រោងលំនៅដ្ឋានប្រភេទវីឡាលំហែរកាយនេះ បានចាប់ផ្តើមបើកលក់ជាបណ្ដើរៗហើយ ខណៈដែលបច្ចុប្បន្នក្រុមហ៊ុនអភិវឌ្ឍន៍បានចាប់ផ្តើមធ្វើការបុគគ្រឹះសាងសង់ស្ថិតនៅក្នុងដំណាក់ដំបូង ដោយវីឡាទាំងអស់នេះ មានលក្ខណៈខុសប្លែកពីគម្រោងទូទៅ។ ក្រុមហ៊ុនវិនិយោគ និងអភិវឌ្ឍន៍បានផ្តោតសំខាន់ទៅលើភាពច្នៃប្រឌិត បង្កើតសោភ័ណភាពស្រស់ស្អាត និងប្រណីតភាព ស័ក្ដិសមទៅនឹងប្រភេទវីឡាស្នាក់នៅបែបលំហែរកាយនៅតំបន់ឆ្នេរសមុទ្រ ជិតឧទ្យានជាតិរាម ខេត្តព្រះសីហនុ” ។

ភាពអស្ចារ្យនៅក្នុងគម្រោងមួយនេះ ក្រៅតែពីជាប្រភេទវីឡាសម្រាប់ស្នាក់នៅលំហែរកាយ គឺនៅមានហេដ្ឋារចនាសម្ព័ន្ធសំខាន់ៗជាច្រើនទៀតក្រោមគំនិតច្នៃប្រឌិតរបស់អ្នកជំនាញមកពីសាំងហ្គាពួរ ដោយគ្រប់វីឡាទាំងអស់សុទ្ធតែមានអាងហែកទឹកនៅពីមុខ ត្រូវតាមក្បួនហុងស៊ុយជនជាតិចិន មានកន្លែងអង្គុយសម្រាកលេង ឬដេកហាលកំដៅថ្ងៃនាតំបន់សមុទ្រ មានតំបន់ម្លប់ឈើបៃតងនៅព័ទ្ធជុំវិញ ហើយនៅលើដំបូលក៏មានកន្លែងអង្គុយលេង ឬទទួលទានអាហារលក្ខណៈគ្រួសារផងដែរ។

គម្រោង Crystalville Ream Beach ត្រូវបានរៀបចំអភិវឌ្ឍន៍នៅលើផ្ទៃដីតំបន់ឆ្នេរសមុទ្ររាម ខេត្តព្រះសីហនុ ទំហំសរុបប្រមាណ៤៣ហិកតា ដោយត្រូវបានចែកចេញជា ៣ដំណាក់កាលក្នុងការសាងសង់។ ដំណាក់កាលទី១ ក្រុមហ៊ុននឹងសាងសង់លំនៅដ្ឋានបែបលំហែរកាយចំនួន១០០ខ្នង (មាន៣ប្រភេទ វីឡាលំហែរកាយ, វីឡាឆ្នេរខ្សាច់ និងវីឡាកោងកាង) ចំណាយពេលត្រឹម២ឆ្នាំ ។

ដំណាក់ទី២ នឹងចាប់ដំណើរការសាងសង់អាងហែលទឹកគ្រីស្ទាល់ (Crystal Swimming Pool) ដែលមានទំហំរហូតដល់៦ហិកតា ក្រោមជំនាញរបស់ក្រុមហ៊ុនមកពីសាំងហ្គាពួរ ហើយក៏ជាលក្ខណៈពិសេស ដែលស្ថិតនៅចំកណ្តាលគម្រោង Crystalville Ream Beach ផងដែរ។

ដោយឡែកដំណាក់ទី៣ ក្រុមហ៊ុននឹងចាប់ផ្តើមសាងសង់សំណង់អគាមជ្ឈមណ្ឌលពាណិជ្ជកម្ម ដែលរួមមាន ខុនដូ អាផាតមិន សណ្ឋាគារកម្រិតផ្កាយ៥ រួមជាមួយនឹងផ្សារទំនើប ដែលផ្តោតសំខាន់ទៅសេវាចំណីអាហារ និងសម្ភារៈប្រើប្រាស់ប្រចាំគម្រោងផងដែរ៕

ឥណ្ឌូនេស៊ីប្រើមូលនិធិរបស់ខ្លួនទាក់ទាញការវិនិយោគដល់ទៅ១០ពាន់លានដុល្លារ

ដោយៈសុខុម

ហ្សាការតា:  សារព័ត៌មានCNA ចុះផ្សាយថា ប្រទេសឥណ្ឌូនេស៊ី ទទួលបានការវិនិ​យោគពីបណ្ដាក្រុមហ៊ុនជុំវិញពិភពលោក រហូតដល់១០ពាន់លានដុល្លារអាមេរិក សម្រា​ប់មូលនិធិ Sovereign Wealth Fund (SWF) របស់ខ្លួន នៅមុនការចាប់ផ្ដើមដំណើរការមូលនិធិនេះជាផ្លូវការដែលគេរំពឹងថា នឹងធ្វើឡើងនៅឆ្នាំ២០២១ នេះ។ នេះបើយោងតាមទេសរដ្ឋមន្ត្រីមួយរូបទម្លាយឱ្យដឹងកាលពីថ្ងៃអង្គារ ទី២៦ ខែមករា ឆ្នាំ២០២១។

អាជ្ញាធរឥណ្ឌូនេស៊ី ទទួលបន្ទុកផ្នែកវិនិយោគ (Indonesia Investment Authority (INA)) មានបំណងទាក់ទាញមូលនិធិបរទេស ឱ្យចូលរួមធ្វើជាសហវិនិយោ​គិន ដែលខុសពីមូលនិធិSWF ផ្សេងទៀតដែលបណ្ដាប្រទេសអភិវឌ្ឍន៍បង្កើតឡើង ដើម្បីគ្រប់គ្រងចំណូលប្រេង ឬរូបិយប័ណ្ណបរទេស។

ទេសរដ្ឋមន្ត្រី Airlangga Hartarto និងជារដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូនេស៊ីបានថ្លែងប្រាប់វេទិកាពាណិជ្ជកម្មមួយថា INA ត្រូវបានដាក់ឱ្យស្ថិតក្នុងចំណោ​មវិនិយោគិនចំនួនជាង៥០ជុំវិញពិភពលោក។

ជាមួយនឹងគោលដៅ គ្រប់គ្រងមូលនិធិ២០ពាន់លានដុល្លារអាមេរិក រដ្ឋាភិបាលឥណ្ឌូនេស៊ី នឹងត្រូវផ្ដល់សាច់ប្រាក់ចំនួន៥ពាន់លានដុល្លារអាមេរិក និងទ្រព្យសកម្មផ្សេងៗទៀតដល់ INA ជាមុនសិន។

បទបង្ហាញរបស់ទេសរដ្ឋមន្ត្រីខាងលើបង្ហាញថា មូលនិធិសោធនកាណាដា Caisse de depot et placement du Quebec (CDPQ) បានចុះហត្ថលេខាលើលិខិតក្រៅផ្លូវការមួយ ដោយបញ្ជាក់ពីបំណងវិនិយោគ រហូតដល់ទៅ២ពាន់លានដុល្លារអាមេរិក និង១,៥ ពាន់លានដុល្លារអាមេរិក ទៀតបានពីមូលនិធិសោធនហូឡង់ APG។

មូលនិធិ SWF របស់សិង្ហបុរី ដែលមានឈ្មោះថា GIC ក៏បានចុះឈ្មោះដែរ ខណៈធនាគារវិនិយោគអូស្ត្រាលី Macquarie បានសុំគ្រប់គ្រងមូលនិធិផ្លូវបង់ប្រាក់ ហើយអាចនឹងចូលរួមចំណែក៣០០លានដុល្លារអាមេរិក បន្ថែមទៀត។

ទោះជាយ៉ាងណា ពេលទីភ្នាក់ងារព័ត៌មាន Reuters ព្យាយាមទាក់ទងដើម្បីសុំការបំភ្លឺដោយឡែកៗពីគ្នាជុំវិញបញ្ហានេះ មូលនិធិសោធនហូឡង់ APG ធនាគារវិនិយោគអូស្ត្រាលី Macquarie មូលនិធិសោធនកាណាដា CDPQ និងមូលនិធិសិង្ហបុរី GIC មិនបានឆ្លើយតបនោះទេ។

តើមូលនិធិ SWF ជាអ្វី?

SWFជាមូលនិធិគ្រប់គ្រងដោយរដ្ឋមួយ ដែលមានទ្រព្យសកម្មហិរញ្ញវត្ថុដូចជាភាគហ៊ុន សញ្ញាប័ណ្ណ ទ្រព្យសម្បត្តិ និងឧបករណ៍ហិរញ្ញវត្ថុ (Financial Instrument) ផ្សេងៗទៀត។ មូលនិធិប្រភេទនេះគឺជាស្ថាប័ន ដែលគ្រប់គ្រងលុយសន្សំរបស់ជាតិសម្រាប់គោ​លបំណងវិនិយោគ៕

រដ្ឋាភិបាលបន្តពិភាក្សាផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍ខេត្តសៀមរាប ២០២១-២០៣៥

ដោយៈគង់ សូរិយា

ភ្នំពេញៈ រដ្ឋាភិបាលបានបន្តពិភាក្សាផែនទីច្ងូលបង្ហាញផ្លូវ និងផែនការស្តារលើកស្ទួយនិងអភិវឌ្ឍន៍វិស័យទេសចរណ៍កម្ពុជា និងខេត្តសៀមរាបសម្រាប់ឆ្នាំ២០២១ ២០៣៥ខាងមុខនេះ។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិ ការជាតិអភិវឌ្ឍន៍ទេសចរណ៍បានដឹកនាំកិច្ចប្រជុំលើកទី៣ នៃគណៈកម្មាធិការជាតិអភិវឌ្ឍន៍ទេសចរណ៍ ដើម្បីត្រួតពិនិត្យនិងសម្រេចលើសេចក្តីព្រាង(១).ផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុងនិងក្រោយវិបិត្តជំងឺឆ្លងកូវីដ-១៩ និង(២).ផែនការអភិវឌ្ឍន៍ទេសចរណ៍ខេត្តសៀមរាប២០២១-២០៣៥។

សេចក្តីព្រាងផែនទីចង្អុលផ្លូវ(Roadmap)ស្តីពីផែនការស្តារ និងលើកស្ទួយវិស័យទេសចរណ៍កម្ពុជាឡើងវិញនៅ ក្រោយពីវិបត្តិនៃជំងឺកូវីដ-១៩។ ផែនការនេះមានរយៈពេល៥ឆ្នាំដោយរំពឹងថានឹងទាក់ទាញភ្ញៀវទេសចរ អន្តរជាតិ ឱ្យបាន៧លាននាក់នៅក្នុងឆ្នាំ២០២៥។ ក្រសួងទេសចរណ៍កម្ពុជានឹងធ្វើឱ្យប្រសើរឡើងវិញពីការចូលរួមរបស់វិស័យ ទេសចរណ៍ទៅក្នុងសេដ្ឋកិច្ច និងសង្គម។

វិស័យទេសចរណ៍ត្រូវបានរដ្ឋាភិបាលកម្ពុជាចាត់ទុកថាជាឧស្សាហកម្មគ្មានផ្សែង និងជាមាសបៃតងដែលបានរួម ចំណែកសម្រាប់ផលិតផលក្នុងស្រុកសរុបរបស់កម្ពុជាប្រមាណ១៣%។ ប៉ុន្តែដោយសារការរីករាលដាលនៃជំងឺកូវីដ១៩ បានធ្វើឲ្យវិស័យមួយនេះដាំក្បាលចុះ ហើយកម្ពុជាបានខាតបង់ចំណូលប្រមាណជាង៣ពាន់លានដុល្លារអាមេរិកក្នុងរយៈពេល៤ខែដំបូង ឆ្នាំ២០២០។ នេះបើយោងតាមរបាយការណ៍ពីក្រសួងទេសចរណ៍។

ក្រសួងទេសចរណ៍នៅពេលនេះនឹងចង្អុលបង្ហាញនូវផែនការស្តារ និងលើកស្ទួយវិស័យទេសចរណ៍កម្ពុជាឡើងវិញ ដោយចាប់ផ្តើមអនុវត្តពីឥឡូវនេះសម្រាប់ទីផ្សារទេសចរណ៍ ដែលមានសក្តានុពល និងទីផ្សារទេសចរណ៍សមស្របណាមួយនៅក្នុងដំណាក់កាលនៃការរីករាលដាលជំងឺឆ្លងកូវីដ-១៩នេះ។ ប៉ុន្តែ ដើម្បីសម្រេចបាននូវចក្ខុវិស័យនេះ ផែនការស្តារ និងលើកស្ទួយវិស័យទេសចរណ៍បានដាក់ចេញនូវវិធានគោលនយោបាយអន្តរាគមន៍ក្នុងរយៈពេលខ្លី មធ្យម និងវែងជា៣ដំណាក់កាល។

ដំណាក់កាលទី១. (Resilient & Restart)៖ ការគ្រប់គ្រងវិបត្តិក្នុងដំណាក់កាលប្រក្រតីភាពតាមទម្លាប់ថ្មី(New Normal) និងរៀបចំផែនការសម្រាប់ការស្តារឡើងវិញ(ឆមាសទី២ ឆ្នាំ២០២០ ដល់ឆមាសទី១ ឆ្នាំ២០២១) ទី២. ដំណាក់កាល(Recovery) ការជំរុញ និងការស្តារឡើងវិញនៃវិស័យទេសចរណ៍(ឆមាសទី២ឆ្នាំ២០២១-២០២២) និង ទី៣ ដំណាក់កាល(Relaunch)៖ ការរៀបចំឆ្ពោះទៅកាន់អនាគតថ្មីនៃវិស័យទេសចរណ៍កម្ពុជា(២០២៣-២០២៥)។

ក្រសួងទេសចរណ៍បានបន្តថា ក្នុងដំណាក់កាលនីមួយៗមានការដាក់ចេញនូវយុទ្ធសាស្ត្រ និងផែនការសកម្មភាពអនុវត្តដោយអនុលោមទៅតាមសសរស្តម្ភ៤ គឺ បេតិក ភណ្ឌវប្បធម៌ ទេសចរណ៍ តំបន់ឆ្នេរ អេកូទេសចរណ៍ និង ភាពជាប្រជាជនខ្មែររួមទាំងគោលដៅយុទ្ធសាស្ត្រចំនួន៣ គឺសេដ្ឋកិច្ច និងការងារក្នុងវិស័យទេសចរណ៍ ការផ្សព្វផ្សាយ និងការជំរុញទេសចរណ៍ក្នុងស្រុក និងអន្តរជាតិ និងអភិបាលកិច្ចក្នុងវិស័យទេសចរណ៍។ សេចក្ដីព្រាងផែនទីចង្អុលផ្លូវនេះនឹងបញ្ចូលនូវសកម្មភាពយុទ្ធសាស្ត្រចំនួន៤៨ និងគម្រោងអភិវឌ្ឍគំរូធំៗសរុបចំនួន១៦ដែល សេចក្តីព្រាងនេះគ្រោងនឹងដាក់ឆ្លងគណៈកម្មាធិការជាតិអភិវឌ្ឍន៍ទេសចរណ៍នាពេលខាងមុខនេះ។

ផែនការអភិវឌ្ឍន៍ទេសចរណ៍ខេត្តសៀមរាប ២០២១-២០៣៥ មានរយៈពេល១៥ឆ្នាំដើម្បីអភិវឌ្ឍទេសចរណ៍នៅក្នុងខេត្តសៀមរាបឱ្យក្លាយទៅជា«មាសបៃតង»ផងដែរ៕

ជប៉ុនបានផ្តល់ឥណទានសម្បទាន២៣៨លានដុល្លារដល់កម្ពុជាក្នុងកិច្ចអភិវឌ្ឍន៍វិស័យអាទិភាព

ដោយៈ គង់ ម៉ាលីន

ភ្នំពេញៈ រដ្ឋាភិបាលប៉ុន បានផ្តល់ជំនួយឥណទានសម្បទាន ប្រមាណ២៣៨លានដុល្លារ សម្រាប់ការអនុវត្តផែនការអភិវឌ្ឍន៍ នៅក្នុងវិស័យសំខាន់ៗ ដែលជាអាទិភាពរបស់កម្ពុជា ក៏ដូចជាការចូលរួមលើកកម្ពស់ និងទ្រទ្រង់កំណើនសេដ្ឋកិច្ចកម្ពុជាផងដែរ។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៥ ខែមករា ឆ្នាំ២០២១ បានមានប្រសាសន៍នៅក្នុងកិច្ចទទួលជួបពិភាក្សាការងារជាមួយលោកស្រី KAMEI Haruko ប្រធានតំណាងថ្មីរបស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំកម្ពុជាថា ជប៉ុនគឺជាមិត្តដ៏ជិតស្និទ្ធ និងជាដៃគូអភិវឌ្ឍន៍ប្រទេសដ៏សំខាន់របស់កម្ពុជា។

លោកឧបនាយករដ្ឋមន្រ្តី ក៏បានថ្លែងអំណរគុណចំពោះរដ្ឋាភិបាលជប៉ុន និងប្រជាជនជប៉ុន ដែលតែងតែជួយគាំទ្រក្នុងការស្តារ និងការអភិវឌ្ឍសេដ្ឋកិច្ច និងសង្គមដល់កម្ពុជា។ លោកបានមានប្រសាសន៍ថា ប្រទេសជប៉ុន គឺជាដៃគូយុទ្ធសាស្រ្ត និងជាដៃគូសហប្រត្តិការទ្វេភាគីធំជាងគេមួយ ដែលបានផ្តល់ហិរញ្ញប្បទានដល់ប្រទេសកម្ពុជា។

ការផ្តល់ហិរញ្ញប្បទានរបស់រដ្ឋាភិបាលជប៉ុន គឺចំគោលដៅលើគ្រប់វិស័យ រួមមាន៖ សុខាភិបាល អប់រំ កសិកម្ម ហេដ្ឋារចនាសម្ព័ន្ធផ្លូវជាតិ ស្ពាន កំពង់ផែស្វយ័ត អន្តរជាតិប្រព័ន្ធធារាសាស្រ្ត បណ្តាញថាមពលអគ្គិសនី និងការផ្គត់ផ្គង់ទឹកស្អាតជាដើម ។ល។ ជាក់ស្តែងក្នុងឆ្នាំ២០២០ កន្លងទៅនេះ រដ្ឋាភិបាលជប៉ុនបានផ្តល់ឥណទានសម្បទាន មានទឹកប្រាក់ចំនួន២៥ពាន់លានយ៉េនជប៉ុន (ត្រូវជាប្រមាណ ២៣៨ លានដុល្លារអាមេរិក) ចូលរួមចំណែកជាមួយដៃគូអភិវឌ្ឍន៍នានាជួយគាំ ទ្រសកម្មភាពនៃការអនុវត្តគោលនយោបាយរបស់រាជរដ្ឋាភិបាលកម្ពុជា ក្នុងការឆ្លើយតបទៅនឹងផលប៉ះពាល់ដោយសារជំងឺកូវីដ-១៩ លើបញ្ហាសុខភាព សង្គម និងសេដ្ឋកិច្ចកម្ពុជា សំដៅរក្សាលំនឹងសេដ្ឋកិច្ច-សង្គម ក៏ដូចជា ជំរុញកំណើនសេដ្ឋកិច្ចឡើងវិញ។

ជាថ្មីម្តងទៀតលោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនជប៉ុន ពិសេស ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុនប្រចាំកម្ពុជា ដែលបានដើរតួនាទីយ៉ាងសកម្ម ក្នុងការផ្តល់កិច្ចសហប្រតិបត្តិការអភិវឌ្ឍន៍ផ្លូវការ (ODA) ឆ្លើយតបចំទិសដៅអភិវឌ្ឍន៍របស់រាជរដ្ឋាភិបាលកម្ពុជា និងសង្ឃឹមថា JICA នឹងបន្តជួយពង្រឹង និងពង្រីកកិច្ចសហប្រតិបត្តិការក្នុងវិស័យសេដ្ឋកិច្ច-សង្គមរវាងព្រះរាជាណាចក្រកម្ពុជា និងប្រទេសជប៉ុនឲ្យកាន់តែទូលំទូលា​យ និងស្អិតរមួតថែមទៀត ។

លោកស្រី KAMEI Haruko ក៏បានសម្តែងនូវសេចក្តីសោមនស្សរីករាយ ដែលបានមកបំពេញភារកិច្ចនៅកម្ពុជា និងបានសម្តែងនូវការកោតសរសើរ ចំពោះ​កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលសម្រេចបាននូវសមិទ្ធផលផ្លែផ្កាជាច្រើន ជាពិសេ​ស ក្នុងការចាត់វិធានការយ៉ាងម៉ឺងម៉ាត់ និងម៉ត់ចត់ បង្ការ និងទប់ស្កាត់ការរីករាលដាលនៃជំងឺកូវីដ-១៩ នាពេលបច្ចុប្បន្ននេះ៕

រដ្ឋមន្រ្តីមកពីក្រសួងចំនួន៣រៀបចំវេទិកាជាតិអេកូទេសចរណ៍រួមគ្នានៅសៀមរាប

ដោយៈ ស៊ីវ ម៉េង

ភ្នំពេញៈ រដ្ឋមន្រ្តីសំខាន់ៗមកពីក្រសួងចំនួនបី បានរួមគ្នារៀបចំវេទិកាជាតិអេកូទេសចរណ៍នៅខេត្តសៀមរាប ដើម្បីជម្រុញនិងលើកស្ទួយវិស័យនេះ ឲ្យមានភាពរីកចម្រើន​ប្រកបដោយនរន្តរភាព។

រដ្ឋមន្រ្តីទាំងនោះរួមមាន លោកបណ្ឌិត ថោង ខុន រដ្ឋមន្រ្តីក្រសួងទេសចរណ៍ និងជាប្រធានក្រុមការងារអន្ដរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (ក.គ.អ.អ.) តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា លោក សាយ សំអាល់រដ្ឋមន្រ្តីក្រសួងបរិស្ថាន និងជាអនុប្រធានអចិន្រ្តៃយ៍ (ក.គ.អ.អ.) និង លោកវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាអនុប្រធាន (ក.គ.អ.អ.) នៅខេត្តសៀមរាប។

អង្គវេទិកានឹងប្រព្រឹត្តទៅ ដោយមានការចូលរួមពីថ្នាក់ដឹកនាំក្រសួង- ស្ថាប័នពាក់ព័ន្ធ គណៈអភិបាលរាជធានី-ខេត្ត ដែលជាសមាជិកក្រុមការងារអន្តរក្រសួងគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ មន្ទីរជំនាញពាក់ព័ន្ធទាំងបី គឺទេស​ចរណ៍ បរិស្ថាន កសិកម្ម រុក្ខាប្រមាញ់ និងនេសាទ តំណាងអង្គការជាតិ-អន្តរជាតិ និងដៃគូពាក់ព័ន្ធដែលធ្វើការងារពាក់ព័ន្ធនឹងសហគមន៍ តំណាងសហគមន៍ទេសចរណ៍ និងអេកូទេសចរណ៍ទូទាំងប្រទេស ផ្នែកឯកជន ប្រតិបត្តិករទេសចរណ៍ សមាគមក្នុងវិស័យទេ​សចរណ៍ និងភាគីពាក់ព័ន្ធជាច្រើនទៀត។

អង្គវេទិកាប្រព្រឹត្តទៅដោយមានការរៀបចំ ជាកិច្ចពិភាក្សាបច្ចេកទេស (Panel Discussion) ដោយមានការចូលរួមពីវាគ្មិនសំខាន់ៗ អញ្ជើញមកពីស្ថាប័នសាធារណៈ ផ្នែកឯកជន តំណាងសហគមន៍ទេសចរណ៍ និងអេកូទេសចរណ៍ ដៃគូជាតិ និងអន្តរជាតិ និងភាគីពាក់ព័ន្ធនានា ដោយលទ្ធផលនៃកិច្ចពិភាក្សានេះ នឹងត្រូវបញ្ចូលជាខ្លឹមសារក្នុងសេចក្តីថ្លែងការណ៍លើកទី២ ស្តីពីការអភិវឌ្ឍសហគមន៍ទេសចរណ៍ និងអេកូទេសចរណ៍ ដែលនឹងពិភាក្សា និងអនុម័តនាពិធីបិទវេទិកា។

កិច្ចពិភាក្សាបច្ចេកទេសនឹងផ្តោតលើប្រធានបទសំខាន់ចំនួនបីដូចជា ទី១ ការវិវត្តន៍ និងអនាគតនៃវិស័យអេកូទេសចរណ៍ និងសហគមន៍ ក្នុងបរិបទជំងឺកូវីដ-១៩ ទី២ ភាពជាដៃគូបំពេញគ្នារវាងការអភិវឌ្ឍ និងការអភិរក្ស ក្នុងការជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍ និងទី៣ ការគាំទ្រក្របខណ្ឌគោលនយោបាយអន្តរវិស័យ និងយន្តការជម្រុញការអភិវឌ្ឍសហគមន៍។

ទន្ទឹមនឹងនេះ អង្គវេទិកាក៏មានរៀបចំជាពិព័រណ៍ខ្នាតតូច ស្តីពីសហគមន៍ទេសច​រណ៍ និងអេកូទេសចរណ៍ដើម្បីបង្ហាញ ពីផលិតផល និងសមិទ្ធផលសំខាន់ៗពាក់ព័ន្ធនឹងការងារអភិវឌ្ឍន៍ផលិតផលទេសចរណ៍ និងអេកូទេសចរណ៍ទូទាំងប្រទេស។

ព្រមជាមួយអង្គវេទិកា នឹងមានរៀបចំដំណើរទស្សនកិច្ចសិក្សា (Technical Tour)ទៅកាន់តំបន់សហគមន៍សំខាន់ៗ មួយចំនួនក្នុងខេត្តសៀមរាប ដូចជាសហគមន៍ទេស​ចរណ៍កំពង់ភ្លុក សហគមន៍អេកូទេសចរណ៍ទឹកជប់ខ្នារពោធិ៍ សហគមន៍ទេសចរណ៍ភ្នំគូលែន សហគមន៍ទេសចរណ៍បាគងភូមិខ្ញុំ សហគមន៍ភូមិធម្មជាតិរុនតាឯក សហគមន៍ទេសចរណ៍បឹងឈូកបន្ទាយស្រី៕

ឥណ្ឌូនេស៊ី អះអាងថា មូលនិធិ​ថ្មី​មួយ​របស់ខ្លួន​ទាក់ទាញ​បានការ​វិនិយោគ​ដល់​ទៅ ១០ពាន់​លាន​ដុល្លារ

ដោយ សុខុម

ហ្សា​ការ​តា៖ សារព័ត៌មាន CNA ចុះផ្សាយ​ថា ប្រទេស​ឥណ្ឌូនេស៊ី ទទួលបាន​ការវិនិយោគ​ពី​បណ្ដា​ក្រុមហ៊ុន​ជុំវិញ​ពិភពលោក​រហូតដល់ ១០ ពាន់​លាន​ដុល្លារ​អាមេរិក សម្រាប់​មូលនិធិ Sovereign Wealth Fund (SWF) របស់ខ្លួន នៅមុន​ការចាប់ផ្ដើម​ដំណើរការ​មូលនិធិ​នេះ​ជា​ផ្លូវ​ការដែល​គេ​រំពឹងថា​នឹងធ្វើ​ឡើង​នៅ​ឆ្នាំ២០២១ នេះ។ នេះ​បើ​យោងតាម​ទេសរដ្ឋមន្ត្រី​មួយរូប​ទម្លាយ​ឱ្យដឹង​កាលពី​ថ្ងៃ​អង្គារ ទី២៦ មករា។

អាជ្ញាធរ​ឥណ្ឌូនេស៊ី ទទួលបន្ទុក​ផ្នែក​វិនិយោគ (Indonesia Investment Authority (INA)) មានបំណង​ទាក់ទាញ​មូលនិធិ​បរទេស​ឱ្យ​ចូលរួម​ធ្វើជា​សហ​វិនិយោគិន ដែល​ខុសពី​មូលនិធិ SWF ផ្សេងទៀត​ដែល​បណ្ដា​ប្រទេស​អភិវឌ្ឍន៍​បង្កើតឡើង​ដើម្បី​គ្រប់គ្រង​ចំណូល​ប្រេង ឬ​រូបិយប័ណ្ណ​បរទេស។

ទេសរដ្ឋមន្ត្រី Airlangga Hartarto និង​ជា​រដ្ឋមន្ត្រី​សម្របសម្រួល​កិច្ចការ​សេដ្ឋកិច្ច​ឥណ្ឌូនេស៊ី បាន​ថ្លែងប្រាប់​វេទិកា​ពាណិជ្ជកម្ម​មួយ​ថា INA ត្រូវបាន​លើក​ឱ្យ​ស្ថិត​ក្នុងចំណោម​វិនិយោគិន​ចំនួន​ជាង ៥០ ជុំវិញ​ពិភពលោក។

ជាមួយនឹង​គោលដៅ​គ្រប់គ្រង​មូលនិធិ ២០ ពាន់​លាន​ដុល្លារ​អាមេរិក រដ្ឋាភិបាល​ឥណ្ឌូនេស៊ី នឹងត្រូវ​ផ្ដល់​សាច់ប្រាក់​ចំនួន ៥ ពាន់​លាន​ដុល្លារ​អាមេរិក និង​ទ្រព្យសកម្មផ្សេងៗទៀត​ដល់ INA ជាមុនសិន។

បទ​បង្ហាញ​របស់​ទេសរដ្ឋមន្ត្រី​ខាងលើ​បង្ហាញថា មូលនិធិ​សោធន​កាណាដា Caisse de depot et placement du Quebec (CDPQ) បាន​ចុះហត្ថលេខា​លើ​លិខិត​ក្រៅផ្លូវការ​មួយ​ដោយ​បញ្ជាក់​ពី​បំណង​វិនិយោគ​ដល់​ទៅ ២ ពាន់​លាន​ដុល្លារ​អាមេរិក និង ១,៥ ពាន់​លាន​ដុល្លារ​អាមេរិក ទៀត​បាន​ពី​មូលនិធិ​សោធន​ហូ​ឡង់ APG។

មូលនិធិ SWF របស់​សិង្ហ​បុរី ដែលមាន​ឈ្មោះថា GIC ក៏បាន​ចុះឈ្មោះ​ដែរ ខណៈ​ធនាគារ​វិនិយោគ​អូស្ត្រាលី Macquarie បាន​សុំ​គ្រប់គ្រង​មូលនិធិ​ផ្លូវ​បង់ប្រាក់ ហើយ​អាច​នឹង​ចូលរួមចំណែក ៣០០ លាន​ដុល្លារ​អាមេរិក បន្ថែមទៀត។

ទោះជា​យ៉ាងណា ពេល​ទីភ្នាក់ងារ​ព័ត៌មាន Reuters ព្យាយាម​ទាក់ទង​ដើម្បី​សុំ​ការបំភ្លឺដោយឡែកៗពីគ្នា​ជុំវិញ​បញ្ហា​នេះ មូលនិធិ​សោធន​ហូ​ឡង់ APG ធនាគារ​វិនិយោគ​អូស្ត្រាលី Macquarie មូលនិធិ​សោធន​កាណាដា CDPQ និង​មូលនិធិ​សិង្ហ​បុរី GIC មិនបាន​ឆ្លើយតប​នោះទេ។

តើ​មូលនិធិ SWF ជា​អ្វី?

SWF ជា​មូលនិធិ​គ្រប់គ្រង​ដោយ​រដ្ឋ​មួយ​ដែលមាន​ទ្រព្យសកម្ម​ហិរញ្ញវត្ថុ​ដូចជា​ភាគហ៊ុន សញ្ញាប័ណ្ណ ទ្រព្យសម្បត្តិ និង​ឧបករណ៍​ហិរញ្ញវត្ថុ (Financial Instrument) ផ្សេងៗទៀត។ មូលនិធិ​ប្រភេទ​នេះ​គឺជា​ស្ថាប័ន​ដែល​គ្រប់គ្រង​លុយ​សន្សំ​របស់​ជាតិ​សម្រាប់​គោលបំណង​វិនិយោគ៕

គម្រោង​ស្ថាបនា​ព្រលានយន្តហោះ​ខេត្តបាត់ដំបង​ចាប់ផ្តើម​ដាំ​បង្គោល កំណត់​ព្រំដី ដើម្បី​ឈានទៅ​ជួសជុល​ឡើងវិញ

ដោយ ៖ រ៉ា​ណេ​ត

បាត់ដំបង ៖ គម្រោង​ស្ថាបនា​សាងសង់​ព្រលានយន្តហោះ​បែក​ចាន​ខេត្តបាត់ដំបង រហូតមកដល់​ពេលនេះ​ឈានដល់​ដំណាក់កាល​នៃ​ការដាំ​បង្គោល  កំណត់​ព្រំដី និង​កំពុង​បន្ត​សិក្សា​ពី​ទំហំ​ទុន​នៃ​ការសាងសង់ រួម​ជាមួយនឹង​ផលប៉ះពាល់​លើ​គម្រោង​ផងដែរ។

លោក សឿ​ម ប៊ុន​រិ​ទ្ធិ អភិបាលរង​ខេត្តបាត់ដំបង​បាន​មានប្រសាសន៍​នៅ​ថ្ងៃទី២៥ ខែមករា ឆ្នាំ២០២១ថា បច្ចុប្បន្ន​រដ្ឋបាលខេត្ត​កំពុងធ្វើការ​មួយ​ជំហាន​ហើយ ជាមួយនឹង​រដ្ឋលេខាធិកា​រដ្ឋា​ន​អាកាសចរ​ស៊ីវិល ដោយ​ទីមួយ​ក្នុង​ក្របខ័ណ្ឌ​នៃ​ការចុះបញ្ជី​ដីធ្លី​លក្ខណៈ​ជា​ប្រព័ន្ធ ក្នុងការ​អនុវត្ត​ការងារ​ជាក់ស្តែង តាម​ណែនាំ​របស់​ក្រសួង​រៀបចំ​ដែនដី នគរូបនីយកម្ម និង​សំណង់ ដោយបាន​ឆ្វៀល​ផ្ទៃដី​ព្រលានយន្តហោះ​ទុក​សម្រាប់​ការសាងសង់​ឡើងវិញ​នាពេលខាងមុខ ទាំង​នៅ​ស្រុក​សង្កែ និង​ក្រុង​បាត់ដំបង។

លោក​បាន​បន្តថា ប្រសិនបើ​ប្រជាពលរដ្ឋ​ទៅ​ដាំ​ដុះ ឬ​ធ្វើស្រែ​ទៅដល់​ដី​កន្លែង​ព្រលាន​នោះ នៅពេលដែល​ចេញ​ប្លង់​កម្មសិទ្ធិ គឺ​រដ្ឋ​មិន​ចេញ​ប្លង់​ឱ្យ​ទេ ហើយ​ប្រជាពលរដ្ឋ​ក៏បាន​ទទួលស្គាល់ និង​ផ្តិតមេដៃ​អនុវត្តតាម​កិច្ចសន្យា​នេះហើយ​ដែរ។

លោក​បញ្ជាក់ថា “ការពង្រីក​ត្រូវ​ឱ្យមាន​លក្ខណៈ​សមស្រប​ជា​ព្រលាន​ក្នុងស្រុក​មួយ​ដែល​ការ​ចុះចត​យន្តហោះ​កម្រិតណា​បាន គឺ​នៅលើ​ការងារ​បច្ចេកទេស ជាពិសេស​នៅលើ​រដ្ឋលេខាធិការដ្ឋាន អាកាសចរណ៍​ស៊ីវិល ដែល​ត្រូវ​សិក្សា​បន្ថែម​ជាមួយ​អ្នកបច្ចេកទេស។ រដ្ឋបាលខេត្ត​គ្រាន់តែ​សម្របសម្រួល រឿង​បញ្ហា​បោះបង្គោល​ព្រំដី​ព្រលាន ដើម្បី​ជៀសវាង​ប្រជាពលរដ្ឋ​ចេះតែ​ទន្ទ្រាន​កាន់កាប់​ដី​របស់​រដ្ឋ​នៅ​ទីនោះ​បន្ថែមទៀត” ។

បច្ចុប្បន្ន ប្រជាពលរដ្ឋ​ក្នុង​តំបន់​បានធ្វើ​ស្រែ ធ្វើ​ចំការ​នៅក្នុង​ដី​ព្រលានយន្តហោះ​ស្ទើរតែ​ទាំងស្រុង ហើយ​ពួកគាត់​នៅតែមាន​បំណង​ទាមទារ​ឱ្យ​រដ្ឋ​ដោះស្រាយ​គោលនយោបាយ ខណៈដែល​ដោយ​ពួកគាត់​បានដឹងហើយថា​ទីតាំង​នេះ​ជា​ដី​របស់​រដ្ឋ​ជា​ទ្រព្យសម្បត្តិ​សាធារណៈ ដូច្នេះ រដ្ឋ​មិន​ចេញ​បណ្ណ​កម្មសិទ្ធិ​ជូន​ឡើយ៕